ដោយវុត្ថា

ភ្នំពេញ៖ ក្រុមហ៊ុន Unitedgreen ដែលមានមូលដ្ឋាននៅទីក្រុងឡុងចក្រភពអង់គ្លេសវិនិយោគលើវិស័យកសិកម្ម ជាពិសេសគឺការបង្កើតកសិដ្ឋានចិញ្ចឹមគោទឹកដោះនៅកម្ពុជា ខណៈកម្ពុជាមានសក្តានុពលខ្ពស់។

លោក Rod Bassett នាយកក្រុមហ៊ុន Unitedgreen នៅក្នុងជំនួបជាមួយលោក វេង សាខុន រដ្ឋមន្ត្រីក្រសួងរុក្ខាប្រមញ្ញ និងនេសាទ កាលពីថ្ងៃទី ៥ ខែកុម្ភៈម្សិលមិញនេះឱ្យដឹងថា គោលបំណងនៃជំនួបនាពេល នេះគឺទី១- ធ្វើការសិក្សាស្វែងយល់ឱ្យបានស៊ីជម្រៅអំពីគោលនយោបាលវិនិយោគរបស់រាជរដ្ឋា ភិបាល ក៏ដូចជារបស់ក្រសួង ទី២- ពិនិត្យលើសក្តានុពលនៃធនធានដី ទឹក និងទីផ្សារ ដើម្បីវិនិយោគលើខ្សែច្រវាក់ផលិតកម្មគោទឹកដោះដែលប្រើប្រាស់បច្ចេកវិទ្យាទំនើបចុងក្រោយតាំងពីការបង្កាត់ពូជ ការដាំស្មៅជាចំណី ការចិញ្ចឹម និងរោងចក្រកែច្នៃ វេចខ្ចប់ទឹកដោះស្រស់សម្រាប់ទីផ្សារក្នុងស្រុក និងនាំចេញ។

លោកបានបន្ថែមទៀតថា កម្ពុជាជាប្រទេសមានសក្តានុពលលើវិស័យកសិកម្ម បូករួមទាំងឱកាសអំណោយផលពេញលេញ ប៉ុន្តែនៅត្រង់ថាកម្ពុជាមិនទាន់បានចាប់ ផ្តើមអនុវត្តបច្ចេកវិទ្យាឱ្យបានគ្រប់ចំណុចនៃខ្សែច្រវាក់ផលិតកម្ម ធ្វើឱ្យគំលាតរវាងផលិតផលដែលផលិតដោយកសិករ និងទីផ្សារស្ថិតនៅឆ្ងាយពីគ្នា។

លោកបន្តថា ដោយមើលឃើញពីបញ្ហានេះ ក្រុមហ៊ុនមានចំណាប់អារម្មណ៍ធ្វើការរៀបចំគម្រោងវិនិយោគតាំងពីមូលដ្ឋាននៃផលិតកម្ម រហូតដល់ទីផ្សារ ដោយនាំយកទំនើបកម្មកសិកម្ម និងទំនើបកម្មកសិឧស្សាហកម្ម ជាពិសេសហិរញ្ញវត្ថុមកអនុវត្ត។

លោក វេង សាខុន រដ្ឋមន្ត្រីក្រសួងរុក្ខាប្រមញ្ញ និងនេសាទបានសម្តែងនូវឆន្ទ:គាំទ្រ និងស្វាគមន៍ចំពោះក្រុមហ៊ុន ព្រោះថាបច្ចុប្បន្នកម្ពុជាបាននិងកំពុងបោះជំហានជាវិជ្ជមានទៅមុខយ៉ាងលឿនគួរឱ្យកត់សម្គាល់ទាំងនយោបាយ សេដ្ឋកិច្ច សង្គម ដែលបង្កលក្ខណ:អំណោយផលយ៉ាងល្អប្រសើរសម្រាប់វិនិយោគិនក្នុង និងក្រៅស្រុក។

លោករដ្ឋមន្ត្រីថា ក្រុមហ៊ុនគួរចាប់ផ្តើមពីកសិដ្ឋានតូច ធ្វើជាលក្ខណ:បង្ហាញ រួចឈានទៅពង្រីកអាជីវកម្មបន្តិចម្តងៗ ស្របតាមនិន្នាការវិវឌ្ឍន៍រីកចម្រើនរបស់ប្រទេសជាតិ និងត្រូវការនៃការប្រើប្រាស់ទឹកដោះគោ។ មួយវិញទៀត លោកបានណែនាំឱ្យក្រុមហ៊ុនគួរសិក្សាឱ្យបានច្បាស់ លាស់ពីរចនាសម្ព័ន្ធគាំទ្រសំខាន់ៗដូចជាទឹក ភ្លើង និងការដឹកជញ្ជូន។ល។ ធ្វើយ៉ាងណាឱ្យគម្រោងវិនិយោគនាពេលខាងមុខដំណើរការទៅដោយរលូន។

លោករដ្ឋមន្ត្រីបន្តថា ក្រសួងនឹងរង់ចាំ ផ្តល់កិច្ចសហការជាមួយក្រុមហ៊ុនធ្វើយ៉ាងណាឱ្យគម្រោងវិនិយោគនេះទទួលបានជោគជ័យដូចការគ្រោងទុក៕

ដោយ ប៊ី

ភ្នំពេញៈ អ្នកជំនាញផ្នែកសេដ្ឋកិច្ចបានអះអាងថា ដំណើរទស្សនកិច្ចផ្លូវការរបស់សម្តេចតេជោហ៊ុន សែន កាលពីថ្ងៃ ពុធទី៥ ខែកុម្ភៈ ឆ្នាំ ២០២០ នឹងផ្តល់ផលវិជ្ជមានច្រើនដល់កម្ពុជា ដោយនឹងនាំមកវិនិយោគចិនចូលកម្ពុជាបន្ថែម ខណៈវិនិយោគចិនបាននិងកំពុងឈរលើលំដាប់កំពូលនៃវិនិយោគិនបរទេសនៅកម្ពុជា។

លោកបណ្ឌិតហុង វណ្ណៈ  អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជាបានមាន​ប្រសាសន៍ឱ្យ​ដឹងនៅថ្ងៃព្រហស្បតិ៍ ទី ៦ ខែកុម្ភៈនេះថា ដំណើរទស្សនកិច្ចរបស់ស   ម្តេចទៅជួបជាមួយ ឯកឧត្តមស៊ី ជីនពីង កាលពីម្សិលមិញនេះ មានសញ្ញាល្អច្រើន ហើយនឹងមានវិនិយោគត្រឡប់វិញ ព្រោះក្រុមហ៊ុនធំៗនៅប្រទេសចិន ជាទូទៅមានការជាប់ពាក់ព័ន្ធ និងការគាំទ្ររដ្ឋាភិបាលចិន។

លោកមានប្រសាសន៍ថា “កត្តានេះហើយដែលប្រធានាធិបតីមានប្រសាសន៍ហើយគឺមានន័យថា គាត់មានគម្រោងរួចហើយ គិតគូររួចហើយ ដូច្នេះអ្នកវិនិយោគចិនប្រាកដជាត្រឡប់មកវិញ”។

លោកបានថ្លែងថា “វាជាកិច្ចសហប្រតិបត្តិការយុទ្ធសាស្ត្រគ្រប់ជ្រុងជ្រោយ និងគោលនយោបាយជោគវាសនាតែមួយ របស់ប្រទេសទាំងពីរ និងកិច្ចព្រមព្រៀងនៅតែមានជាធរមាននៅឡើយ”។ លោកបន្តថា “ក្នុងករណីដែលមានវិនិយោគិនមួយចំនួនមកប្រទេសកម្ពុជា ហើយត្រឡប់នៅវិញ គឺមានតែមួយចំនួនតូចទេ ដោយសារការរកស៊ីរបស់គាត់មិនចំណេញ កត្តាខ្លះទៀតមកពី EBA ដូរទៅរកស៊ីនៅប្រទេសផ្សេង កត្តាខ្លះទៀតដូរឈ្មោះក្រុមហ៊ុនរកស៊ី”។

វិស័យជាទូទៅដែលភាគីចិននឹងមកវិនិយោគវិស័យច្រើន ក្នុងនោះវិស័យកាត់ដេរ វិស័យថាមពល វិស័យរ៉ែ វិស័យទេសចរណ៍ អចលនទ្រព្យ លើកសិកម្ម វិស័យអេឡិចត្រូនិច និងធានាគារផងដែរ។

លោកបណ្ឌិតហុង វណ្ណៈបាននិយាយថា “ការត្រឡប់មកវិញរបស់អ្នកវិនិយោគចិននឹងផ្តោតទៅវិស័យចំរុះ ប៉ុន្តែយើងមិនមានហេតុផលណាដើម្បីពន្យល់ថា តើវិស័យមួយណាលេចធ្លោជាងវិស័យណាទេ។ វាទៅតាមការចាប់អារម្មណ៍របស់វិនិយោគិនចិន”។

លោកឱ្យដឹងទៀតថា “ការវិលត្រឡប់មកវិញលើកនេះមានរយៈវែង ឬខ្លីអាស្រ័យទៅលើវិស័យដែលគាត់វិនិយោគ។ វិស័យឧស្សហកម្មធនមធ្យម និងធ្ងន់ វិស័យកសិកម្ម និងវិស័យអចលនទ្រព្យធំៗគឺវិស័យដែលមានវិនិយោគរយៈពេលវែង”។

ទោះបីជាយ៉ាងក៏ដោយ លោក ម៉ី កល្យាណទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិ បានឱ្យដឹងនៅថ្ងៃដដែលថា ធម្មតាទស្សនកិច្ចផ្លូវការតែងតែមានការលើកឡើង និងការសន្យាធ្វើអ្វីមួយ ខណៈការលើកឡើងទាក់ការជំរុញការវិនិយោគ អំឡុងពេលទស្សនកិច្ចរបស់សម្តេចទៅប្រទេសចិនត្រូវរង់ចាំ និងតាមដាន។

លោកបានថ្លែងថា “យើងត្រូវរងចាំមើលថា តើនឹងមានអ្វីកើតឡើងបន្ទាប់ ហើយការលើឡើងទាក់ទងនឹង ការជំរុញការវិនិយោគមកកម្ពុជា គឺភាសាការទូត”៕

ដោយ ហ្សូលី

ភ្នំពេញ៖ កម្ពុជារកបានចំណូលប្រមាណជាជិត ៤០០លានដុល្លារអាមេរិកពីការនាំចេញកៅស៊ូធម្មជាតិជិត ៣០ម៉ឺនតោន កាលពីឆ្នាំ ២០១៩។ នេះបើតាមការលើកឡើងនៅក្នុងកិច្ចប្រជុំបូកសរុបលទ្ធផលការងារឆ្នាំ ២០១៩ និងលើកទិសដៅអនុវត្តឆ្នាំ ២០២០ របស់អគ្គនាយកដ្ឋានកៅស៊ូ ដោយមានការចូលរួមពី រដ្ឋមន្ត្រីក្រសួងកសិកម្ម លោក វេង សាខុន នៅព្រឹកថ្ងៃទី ០៦ កុម្ភៈ ឆ្នាំ ២០២០នេះ។

លោករដ្ឋមន្ត្រីបានមានប្រសាសន៍ថា ឧស្សាហកម្មកៅស៊ូធម្មជាតិគឺជាវិស័យកសិកម្មមួយដែលដើរតួយ៉ាងសំខាន់ក្នុងយុទ្ធសាស្រ្តចតុកោណរបស់រាជរដ្ឋាភិបាលកម្ពុជា។ លើសពីនេះ កៅស៊ូធម្មជាតិផ្តល់អត្ថប្រយោជន៍ជាច្រើនដល់សេដ្ឋកិច្ចជាតិ សេដ្ឋកិច្ចគ្រួសារ ជួយកាត់បន្ថយនៅភាពក្រីក្រក្នុងប្រទេស កាត់បន្ថយអត្រាធ្វើចំណាកស្រុក ជាដើម។

មិនតែប៉ុណ្ណោះ ក៏បានជម្រុញដល់ការអភិវឌ្ឍន៍កៅស៊ូឱ្យមានភាពជោគជ័យតាមផែនការអភិវឌ្ឍន៍ឧស្សាហកម្មកៅស៊ូធម្មជាតិនៅកម្ពុជាឆ្នាំ ២០១១-២០២០ផងដែរ។

ទន្ទឹមនេះ កៅស៊ូធម្មជាតិមានមុខងារពិសេសដទៃទៀតដូចជា ការផ្តល់ឈើសម្រាប់ប្រើប្រាស់ជាឈើឥន្ធនៈ ចូលរួមចំណែកកាត់បន្ថយការកាប់បំផ្លាញព្រៃឈើ ការពារហូរច្រោះដី និងជាគម្របព្រៃឈើយ៉ាងសំខាន់។

រដ្ឋមន្ត្រីរូបនេះបានសង្កត់ថា ដើម្បីបញ្ជូនបច្ចេកវិទ្យាថ្មីក្នុងខ្សែសង្វាក់ផលិតកម្ម និងទាក់ទាញការវិនិយោគកៅស៊ូធម្មជាតិនេះបន្ថែមទៀត អគ្គនាយកដ្ឋានកៅស៊ូ ត្រូវខិតខំបំពេញតួនាទី ស្វែងរកដំណោះស្រាយបែបណាសហការជាមួយស្ថាប័នជាតិ-អន្តរជាតិ ដៃគូអភិវឌ្ឍន៍កៅស៊ូ ប្រតិបត្តិករកៅស៊ូ សមាគមដាំដុះកៅស៊ូ និងអាជ្ញាធរពាក់ព័ន្ធទាំងអស់ ប្រកបដោយចីរភាព ប្រសិទ្ធភាពខ្ពស់។

ឆ្លៀតក្នុងឱកាសនេះ លោករដ្ឋមន្ត្រីបញ្ចេញមតិណែនាំមួយចំនួនក្នុងគោលបំណងដើម្បីឱ្យអភិវឌ្ឍន៍វិស័យកៅស៊ូឱ្យមានការរីកចម្រើន សមស្របតាមបរិបទនៃកំណើនសេដ្ឋកិច្ច សាកលភាវូបនីយកម្ម ការរីកចម្រើនផ្នែកបច្ចេកវិទ្យា និងប្រកួតប្រជែងទីផ្សារជាមួយប្រទេសជិតខាង ដែលក្នុងនោះមានដូចជា៖

-ការធ្វើបច្ចុប្បន្នភាពផែនការយុទ្ធសាស្រ្តអភិវឌ្ឍន៍ដំណាំកៅស៊ូ បន្តពង្រឹង និងពង្រីកកិច្ចសហការជាមួយបណ្ដាក្រុមហ៊ុនប្រតិបត្តិករ ដៃគូអភិវឌ្ឍន៍ ធនាគារ និងសមាគមកៅស៊ូ និងក្រុមហ៊ុនសម្បទានដីសេដ្ឋកិច្ចដាំកៅស៊ូ ជាពិសេសជាមួយសមាគមអភិវឌ្ឍន៍កៅស៊ូកម្ពុជា (ARDC) ពង្រឹងការងារស្រាវជ្រាវ បណ្តុះបណ្តាល ផ្សព្វផ្សាយទាំងការអនុវត្តច្បាប់។

-រៀបចំបច្ចេកទេសឱ្យបានសមស្របតាមនិន្នាការនៃកំណើនសេដ្ឋកិច្ច ការប្រែប្រួលអាកាសធាតុ និងបរិយាប័ន្ន ពង្រឹងការងារគ្រប់គ្រង និងអភិវឌ្ឍន៍សមាគមកៅស៊ូគ្រួសារ បន្តកៀរគរប្រភពហិរញ្ញប្បទាន ឬបច្ចេកវិទ្យាពីដៃគូអភិវឌ្ឍន៍។

គួរបញ្ជាក់ថា តម្លៃកៅស៊ូជាមធ្យមគឺ ១,៣៣៦ ដុល្លារក្នុង១តោន ដែលបច្ចុប្បន្នកម្ពុជាមានផ្ទៃដីកៅស៊ូសរុបចំនួន ៤០៦,១៤២ ហិកតា៕

ដោយ ប៊ី

ភ្នំពេញៈ កិច្ចព្រមព្រៀងពាណិជ្ជកម្ម ដែលមានទំហំស្មើនឹងប្រមាណ៣០ភាគរយនៃសេដ្ឋកិច្ច និង៥០ភាគរយនៃប្រជាជនសរុបលើពិភពលោក បាននិងកំពុងធ្វើដំណើរឆ្ពោះទៅមុខ ទោះបីគ្មានវត្តមានប្រទេសឥណ្ឌា។

មន្ត្រីជាន់ខ្ពស់ឥណ្ឌូនេស៊ីបាននិយាយថា ប្រទេសឥណ្ឌាបានអវត្តមានពីកិច្ចពិភា​   ក្សារយៈពេល២ថ្ងៃស្តីពី កិច្ចព្រមព្រៀងពាណិជ្ជកម្មសេរីអាស៊ីប៉ាស៊ីហ្វិក នៅឥណ្ឌូនេស៊ីដែលបានបញ្ចប់កាលពីថ្ងៃអង្គារ ដោយជំរុញឱ្យមានការរំពឹងទុកថា ឥណ្ឌានឹងដកខ្លួនចេញពីការចរចានេះ។

មន្ត្រីជាន់ខ្ពស់របស់ឥណ្ឌា ដែលជាធម្មតានឹងចូលរួមនៅក្នុងកិច្ចប្រជុំ នៅកោះបាលី បានអះអាងថា “មិនមានបញ្ជាណាមួយពីរដ្ឋមន្ត្រីរបស់ខ្លួន (ដើម្បីចូលរួម) ទេ ពីព្រោះរដ្ឋមន្រ្តីរបស់លោក មិនទទួលបញ្ជាណាមួយពីនាយករដ្ឋមន្រ្តីឥណ្ឌា Narendra Modi ទេ។ លោកស្រី Donna Gultom ប្រធានអ្នកចរចារបស់ឥណ្ឌូនេស៊ី និងប្រធានក្រសួងចរចាអាស៊ាន នៅក្រសួងពាណិជ្ជកម្មបានប្រាប់សារព័ត៌មានក្យូដូដូច្នេះ។

ទោះជាយ៉ាងណា លោកស្រីមិនបានបញ្ជាក់ឲ្យបានលម្អិតពីបញ្ហានេះទេ។

ប្រទេសចំនួន១៦ ដែលបានចូលរួមនៅក្នុងកិច្ចពិភាក្សា សម្រាប់ភាពជាដៃគូសេដ្ឋកិច្ចគ្រប់ជ្រុងជ្រោយ (RCEP) ក្នុងតំបន់ ដែលបានចាប់ផ្តើមការចរចាក្នុងឆ្នាំ២០១៣ ដោយមានគោលដៅដំបូង នៃការបញ្ចប់ពួកគេនៅក្នុងឆ្នាំ២០១៥ ប៉ុន្តែពួកគេបានបន្តខកខានពេលវេលាកំណត់ ដោយមានមហិច្ឆិតាខុសគ្នាពីសមាជិករបស់ខ្លួន។

ក្រៅពីសមាគមអាស៊ានដែលមានសមាជិក១០ប្រទេស ដែលមានប្រទេសប្រ៊ុយណេ កម្ពុជា ឥណ្ឌូនេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សឹង្ហបូរី ថៃ និងវៀតណាម កិច្ចព្រមព្រៀង RCEP រួមមានអូស្រ្តាលី ចិន ឥណ្ឌា ជប៉ុន កូរ៉េខាងត្បូង និងនូវែលសេឡង់។

ប្រសិនបើតំបន់ពាណិជ្ជកម្មសេរី ដែលមានចំនួនប្រជាជនពាក់កណ្តាលពិភពលោ​កបានអនុវត្តន៍សកម្មភាពពាណិជ្ជកម្ម និងការវិនិយោគក្នុងចំណោមប្រទេសRCEP នឹងធ្វើឱ្យកាន់តែមានភាពខ្លាំងខ្លាឡើង ដោយមានការគាំទ្រពីវិធានការណ៍ ដូចជាការលុបបំបាត់ និងការកាត់បន្ថយពន្ធ។

ប៉ុន្តែកិច្ចពិភាក្សានៅក្នុងកិច្ចប្រជុំកំពូលមួយ នៅទីក្រុងបាងកក ក្នុងខែវិច្ឆិកា បានបែកបាក់ បន្ទាប់ពីប្រទេសឥណ្ឌាដែលមានការព្រួយបារម្ភថា ការបើកទីផ្សាររបស់ខ្លួននឹងមើលឃើញឱនភាពពាណិជ្ជកម្មរបស់ខ្លួន ជាមួយប្រទេសចិនមានការកើនឡើងដោយបាននិយាយថា ខ្លួនមិនចង់ចូលរួមទៀតទេ។

ប្រទេសចំនួន១៥ទៀត ដែលនៅសេសសល់បានសន្យាថា នឹងចុះហត្ថលេខាលើកិច្ចព្រមព្រៀងមួយនៅឆ្នាំ២០២០ ប៉ុន្តែប្រទេសជប៉ុនចង់ឱ្យប្រទេសឥណ្ឌា ស្ថិតនៅក្នុងការចរចានេះមួយផ្នែក ដោយសារតែការព្រួយបារម្ភរបស់ខ្លួនដែលថា ឥទ្ធិពលរបស់ចិននៅក្នុងតំបន់នឹងកាន់តែធំជាងនេះទៅទៀត។

ប្រទេសជប៉ុនបានផ្តល់ការជួយឥណ្ឌាដោះស្រាយ បញ្ហាចំពោះមុខ។

មន្ត្រីក្រសួងពាណិជ្ជកម្ម និងឧស្សាហកម្មឥណ្ឌា បានប្រាប់សារព័ត៌មានក្យូដូថា ប្រទេសឥណ្ឌា បានទទួលការអញ្ជើញឱ្យចូលរួមកិច្ចប្រជុំបាលី “ប៉ុន្តែឥណ្ឌាមិនបានចូលរួម” ដោយមិនផ្តល់ហេតុផលអ្វីឡើយ។

លោក Iman Pambagyo អគ្គនាយកនៃកិច្ចចរចាពាណិជ្ជកម្មអន្តរជាតិនៅក្រសួងពាណិជ្ជកម្មឥណ្ឌូនេស៊ីបានឱ្យដឹងថា កិច្ចពិភាក្សានៅកោះបាលី បានផ្តោតលើបញ្ហាយុទ្ធសាស្ត្រ និងបញ្ហាចំពោះមុខ ដូចជាការស្វែងរកដំណោះស្រាយលើ បញ្ហាឥណ្ឌា និង ការចូលទៅកាន់ទីផ្សារក្នុងពាណិជ្ជកម្ម និងសេវាកម្មពាណិជ្ជកម្ម និងសេវាកម្មល្អ ។

លោក Iman បាននិយាយថា ការចរចាត្រូវបានបញ្ចប់ដោយជោគជ័យ ហើយដូច្នេះឆន្ទៈរបស់ប្រទេសនីមួយៗ ដើម្បីបញ្ចប់ការចរចាពេញលេញ ដែលកិច្ចព្រមព្រៀងមួយនេះអាចត្រូវបានចុះហត្ថលេខានៅចុងឆ្នាំនេះ។

លោកបានបន្ថែមថា លទ្ធផលនៃកិច្ចប្រជុំកោះបាលី នឹងត្រូវរាយការណ៍ទៅកិច្ចប្រជុំរដ្ឋមន្រ្តីអន្តរក្រសួងរបស់រដ្ឋមន្រ្តីសេដ្ឋកិច្ចRCEP នៅទីក្រុងដាណាងប្រទេសវៀតណាមនៅថ្ងៃទី១០ និង ១១ ខែ មីនាខាងមុខ។

មន្ត្រីនៃក្រសួងសេដ្ឋកិច្ចពាណិជ្ជកម្ម និងឧស្សាហកម្មរបស់ជប៉ុនបានចែករំលែកទស្សនៈស្រដៀងគ្នាដោយនិយាយថា “មិនមានការផ្លាស់ប្តូរ នៅក្នុងគោលនយោបាយរបស់ជប៉ុន ក្នុងការចុះហត្ថលេខា RCEP នៅឆ្នាំ២០២០នោះទេ”៕

ដោយ ហ្សូលី

អាមេរិក៖ មូលនិធិរបស់កំពូលមហាសេដ្ឋីលើពិភពលោក Bill Gates បានប្រកាសថា នឹងបរិច្ចាគថវិការាប់លានដុល្លារ ដើម្បីចូលរួមទប់ស្កាត់និងប្រយុទ្ធប្រឆាំងវីរុសកូរ៉ូណា។
នេះបើតាមការផ្សាយរបស់ទស្សនាវដ្តីអាមេរិក Forbes កាលពីថ្ងៃទី ០៥ កុម្ភៈ ឆ្នាំ ២០២០ ថ្មីៗនេះ។

ទឹកប្រាក់ដែលមូលនិធិរបស់កំពូលមហាសេដ្ឋីនេះបានប្រកាសបរិច្ចាគនោះ គឺមានចំនួនប្រមាណ ១០០លានដុល្លារ។ នេះមិនមែនជាលើកទី មួយនោះទេដែលលោក Bill gates បានបរិច្ចាគ ដែលកាលពីចុងខែមករាកន្លងទៅ នៅពេលមានការផ្ទុះពីវីរុសកូរ៉ូណានេះ លោកក៏បានបរិច្ចាគទឹកប្រាក់ ១០លានដុល្លារ។

លោក Bill Gates គឺជាមហាសេដ្ឋីមួយរូបក្នុងចំណោមមហាសេដ្ឋីដទៃទៀតដូចជា ស្ថាបនិកក្រុមហ៊ុន Alibaba Jack Ma និងប្រធានក្រុមហ៊ុន Louis Vuitton លោក Bernard Arnault ជាដើម តាំងតែពីមានមនុស្សប្រមាណ ៥០០នាក់បានស្លាប់ដោយសារវីរុសកូរ៉ូណានេះ ហើយបច្ចុប្បន្នមានអ្នកស្លាប់ដល់ទៅរាប់ពាន់នាក់។

ក្នុងចំនោមថវិកាសរុប ១០០លានដុល្លារ ទឹកប្រាក់ប្រមាណ ២០លានដុល្លារនឹងត្រូវជំនួយទៅកាន់ភ្នាក់ងារធំៗដូចជា អង្គការសុខភាពពិភពលោក World Health Organization (WHO) និង មជ្ឈមណ្ឌលអាមេរិកដើម្បីគ្រប់គ្រងជម្ងឺ U.S Center for Disease Control (CDC) ដើម្បីជួយដល់ការរុករកស្រាវជ្រាវ ការទប់ស្កាត់ និងការព្យាបាល។

ថវិកាចំនួន ២០ លានដុល្លារផ្សេងទៀតនឹងជួយបង្កើនការការពារសម្រាប់ប្រជាជនដែលប្រឈមនឹងហានិភ័យនៅទ្វីបអាហ្វ្រិកនិងអាស៊ីខាងត្បូង។ ថវិកាទាំងអស់នេះ នឹងជួយដល់អាជ្ញាធរសុខាភិបាលសាធារណៈពង្រឹងមណ្ឌលសង្គ្រោះបន្ទាន់អនុវត្តកិច្ចប្រឹងប្រែងតាមដានជំងឺប្រកបដោយប្រសិទ្ធភាពនិងបង្កើនសមត្ថភាពព្យាបាល។

រីឯថវិកា ៦០ លានដុល្លារដែលនៅសល់នឹងឆ្ពោះទៅរកការអភិវឌ្ឍវ៉ាក់សាំងការព្យាបាលនិងការធ្វើរោគវិនិច្ឆ័យរយៈពេលយូរអង្វែងសម្រាប់ការត្រួតពិនិត្យនិងការការពារប្រកបដោយចីរភាពដើម្បីការពារមេរោគមិនឱ្យរីករាលដាល។

នាយកប្រតិបត្តិនៃមូលនិធិហ្គេត លោក Mark Suzman បានមានប្រសាសន៍ថា អង្គការពហុភាគីរដ្ឋាភិបាលជាតិវិស័យឯកជននិងសប្បុរសជនត្រូវតែធ្វើការរួមគ្នាដើម្បីបន្ថយល្បឿននៃការផ្ទុះឡើងក្នុងការជួយប្រទេសនានាការពារពលរដ្ឋដែលងាយរងគ្រោះបំផុត និងពន្លឿនការអភិវឌ្ឍឧបករណ៍ដើម្បីគ្រប់គ្រងការរីករាលដាលនៃជំងឺនេះ។

ក្តីសង្ឃឹមរបស់យើងគឺថា ធនធានទាំងនេះនឹងជួយជំរុញការឆ្លើយតបជាអន្តរជាតិយ៉ាងឆាប់រហ័សនិងមានប្រសិទ្ធភាព៕