ដោយ Donald Lee

ភ្នំពេញ៖ របាយការណ៍ត្រីមាសទី ៤ របស់ក្រុមហ៊ុន Facebook បានឱ្យដឹងថា ក្រុមហ៊ុន Facebook Inc បានទទួលរងនូវការធ្លាក់ចុះដ៏អាក្រក់បំផុតនៅចុងឆ្នាំ ២០១៩។

ប្រាក់ចំណូលរបស់ក្រុមហ៊ុន Facebook កើនឡើងត្រឹមតែ ២៥ ភាគរយ ហើយក្រុមហ៊ុនរំពឹងថាប្រាក់ចំណូលនឹងធ្លាក់ចុះបន្ថែមទៀតនៅឆ្នាំ ២០២០ ដោយសារក្រុមហ៊ុនឈានដល់ភាពចាស់ទុំ និងកំពុងរងផលប៉ះពាល់ដោយបទប្បញ្ញត្តិឯកជនភាពទូទាំងពិភពលោក។

ប្រធានផ្នែកហិរញ្ញវត្ថុរបស់ Facebook លោក David Wehner បាននិយាយនៅក្នុងសន្និសិតថា “យើងបានឆ្លងកាត់ផលប៉ះពាល់ខ្លាំងពីបញ្ហាខាងលើរហូតមកដល់បច្ចុប្បន្ន។ ផលប៉ះពាល់ភាគច្រើនគឺនៅចំពោះមុខយើង”។

ក្រុមហ៊ុន Facebook បាននិយាយថា ការរីកចម្រើនខ្លាំងបំផុតគឺមកពីការផ្ញើសារឯកជន និង Facebook Stories នៅក្នុងវេទិកាប្រព័ន្ធផ្សព្វផ្សាយសង្គមរបស់ខ្លួន។

ស្ថាបនិកក្រុមហ៊ុន Facebook លោក Mark Zuckerberg មានប្រសាសន៍ថា “នៅទូទាំងសេវាកម្មរបស់យើង កំណើនដ៏ធំបំផុតនៃរបៀបដែលមនុស្សកំពុងប្រាស្រ័យទាក់ទងបន្តមកពីការផ្ញើសារឯកជន ក្រុមតូចៗនិង Facebook Stories ដែលទិន្នន័យរបស់អ្នកមិនមានជារៀងរហូត#។

តម្លាភាព និងគណនីក្លែងក្លាយគឺជាបញ្ហាធំមួយសម្រាប់ Facebook កាលពីឆ្នាំមុន។ ស្ថាបនិក Facebook លោក Mark Zuckerberg បានប្រឈមមុខនឹងការបែកបាក់ផ្ទៃក្នុងនៅឯក្រុមហ៊ុនរបស់លោក ខណៈដែលនិយោជិករាប់រយនាក់បានចុះហត្ថលេខាលើលិខិតថ្កោលទោសចំពោះជំហររបស់ស្ថាបនិកក្នុងការមិនហាមឃាត់ការផ្សាយពាណិជ្ជកម្មនយោបាយមិនស្មោះត្រង់។

ការរុញច្រានដ៏មានឥទ្ធិពលនេះរបស់និយោជិកបានកើតឡើង បន្ទាប់ពីការស៊ើបអង្កេតរបស់រដ្ឋាភិបាលអាមេរិកបានបង្ហាញថា ប្រតិបត្ដិរបស់រុស្ស៊ីបានបើកគណនីក្លែងក្លាយ ហើយបានប្រើប្រាស់វេទិកានេះយ៉ាងទូលំទូលាយនៅក្នុងយុទ្ធនាការផ្តល់ព័ត៌មានមិនត្រឹមត្រូវនៅក្នុងការបោះឆ្នោតប្រធានាធិបតីអាមេរិកឆ្នាំ ២០១៦ ដើម្បីជ្រើសរើសលោក Donald Trump៕

ដោយវុត្ថា

ភ្នំពេញ៖ ក្រុមហ៊ុនមកពីប្រទេសឥណ្ឌាបាននឹងកំពុងស្វែងរកដៃគូសហការវិនិយោគក្នុងខេត្តបាត់ដំបងដើម្បីបង្កើតរោងចក្រកែឆ្នៃដំឡូងមី ទៅជាម្សៅកំរិតស្តង់ដារខ្ពស់ សំរាប់នាំចេញ ខណៈខេត្តមួយនេះ មានសក្តានុពលខ្ពស់ចំពោះការវិនិយោគ និងជាខេត្តគោលដៅរបស់វិនិយោគិនបរទេស។

នេះ បើយោងតាមការចុះផ្សាយរបស់សភាពាណិជ្ជកម្មខេត្តបាត់ដំបង នៅក្នុងជំនួបពិភាក្សាការងារ និងស្វែងរកដៃគូរបស់វិនិយោគនៅក្នុងខេត្តបាត់ដំបងរបស់វិនិយោគិនឥណ្ឌាដែលគេហទំព័រ propertyarea.asia ដែលទទួលបាននៅថ្ងៃទី ៣០ ខែមករា ឆ្នាំ ២០២០នេះ។

លោក ងួន រតនៈ អភិបាលនៃគណៈអភិបាលខេត្តបាត់ដំបង បានបង្ហាញពីក្ដីសាទរ និងគាំទ្រទៅលើគម្រោងថ្មីនៃការវិនិយោគក្នុងវិស័យរោងចក្រនេះ ដោយហេតុថា នៅទូទាំងខេត្តបាត់ដំបង់ វិស័យមួយនេះហាក់នៅមានកម្រិតតិចតួចនៅឡើយបើប្រៀបធៀបជាមួយបណ្តាខេត្តដទៃទៀត។

លោកបន្តថា “ថ្វីដ្បិតខេត្តបាត់ដំបង បានខិតខំធ្វើការអភិវឌ្ឍលើគ្រប់វិស័យ ជាពិសេសវិស័យកសិកម្ម និងពាណិជ្ជកម្ម ដែលជំរុញឱ្យកម្រិត GDP បានកើន ឡើងដល់ជាង ១៥៥០ដុល្លារក្នុងម្នាក់ក្តី ប៉ុន្តែសម្រាប់វិស័យរោងចក្រកែច្នៃ គឺនៅមានកម្រិតនៅឡើយ ដោយបច្ចុប្បន្ននេះយើងមានតែរោងចក្រផលិតឱសថ រោងចក្រផលិតស៊ីម៉ង់តិ៍ រោងចក្រម្សៅមី រួមជាមួយនឹងប្រភេទសិប្បកម្មខ្នាតតូច និងលក្ខណៈគ្រួសារតែប៉ុណ្ណោះ”។

លោក ងួន រតនៈ ក៏បានលើកទឹកចិត្តដល់បណ្តាវិនិយោគិននានា ឱ្យបន្ថែមការវិនិយោគនៅក្នុងវិស័យរោងចក្រនៅក្នុងខេត្តបាត់ដំបងកាន់តែច្រើនបន្ថែមទៀត ស្របពេលដែលខេត្តបាត់ដំបងជាតំបន់ដែលមានសក្ដានុពលលើកត្តាភូមិសាស្ត្រ និងមានហេដ្ឋារចនាសម្ព័ន្ធអនុគ្រោះដល់ការដឹកជញ្ជូនបានយ៉ាងប្រសើរ។

យោងតាមរបាយការណ៍ឆ្នាំ ២០១៩ របស់រដ្ឋបាលខេត្តបាត់ដំបងបានឱ្យដឹងថា ការនាំចេញផលផលិតផលកែច្នៃក្នុងនិងក្រៅខេត្តបាត់ដំបងមានចំនួន ៥.៣៩០ តោន ដោយមានរោងចក្រធុនធំ ១៥ មូលដ្ឋាន មានទុនវិនិយោគសរុប ៤៦៦.១៩២.០៧៥ ដុល្លាអាមេរិក ។

ដោយឡែកសហគ្រាសធុនតូច-មធ្យម និងសិប្បកម្មសរុបចំនួន ២៤០ មូលដ្ឋាន។

ដំណាំដំឡូងមីគឺជាផលិតផលដ៏មានសក្ដានុពលរបស់ខេត្តបាត់ដំបង បន្ទាប់ពីស្រូវ ប៉ុន្តែដំណាំនេះហាក់ស្ថិតក្នុងដំណាក់កាលអស់សង្ឃឹម ដែលទាមទារឱ្យរួបរួមគ្នារៀបចំ គោលនយោបាយមួយឲ្យបានច្បាស់លាស់ និងទាមទាឱ្យមានការកែច្នៃប្រកបដោយស្តងដារខ្ពស់ ដើម្បីជាប្រយោជន៍ក្នុងការផលិតសម្រាប់បម្រើទីផ្សារទាំងក្នុងនឹងក្រៅប្រទេស។

ខេត្តបាត់ដំបងគឺជាខេត្តមួយរបស់កម្ពុជា ដែលមានសក្តានុពលវិយោគខ្ពស់លើគ្រប់វិស័យជាពិសេសវិស័យកសិកម្ម បានទាក់ទាញការចាប់អារម្មណ៍ពីវិនិយោគិន និងខេត្តក្រុងមកពីប្រទេសក្នុងតំបន់ និងពិភពលោកចាប់អារម្មណ៍លើកគម្រោងជាច្រើនរួមរោងចក្រ វិស័យកសិកម្ម ទេសចរណ៍ និង សហគ្រាសផ្សេងៗទៀត។

ក្នុងរយៈពេលកន្លងមកថ្មីៗនេះ មានវិនិយោគិនបរទេសជាច្រើនរួមមានមកពីប្រទេសកូរ៉េ បារាំង សង្ហបុរី សាធារណៈរដ្ឋឆែក ប៉ូញឡូញ ជប៉ុន និងចិនជាដើមបានចាប់អារម្មណ៍លើសក្តានុពលវិនិយោគលើខេត្តមួយនេះ ដោយមានបំណងចង់ធ្វើកិច្ចសហប្រតិបត្តិការ បង្កើតចំណងសម្ព័ន្ធមេត្រីភាព និងកិច្ចសហប្រតិបត្តិការ ដើម្បីជំរុញការអភិវឌ្ឍសេដ្ឋកិច្ច ពាណិជ្ជកម្ម ទេសចរណ៍និងការអភិវឌ្ឍន៍៕

ដោយ ប៊ី

ភ្នំពេញ៖ រដ្ឋាភិបាលកម្ពុជាទម្លាក់ការព្យាករណ៍កំណើនសេដ្ឋកិច្ចមកត្រឹមជុំវិញ ៦ ភាគរយ នៅឆ្នាំ ២០២០នេះ ដោយសារបញ្ហាខាងក្រៅ និងក្នុងដែលនឹងធ្វើឱ្យសេដ្ឋកិច្ចកម្ពុជាមានធ្លាក់ចុះបន្តិចបន្តួច។ នេះបើយោងតាមការអះអាងរបស់មន្រ្តីជាន់ខ្ពស់របស់រដ្ឋាភិបាល។

លោក វង្សី វិស្សុត រដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុ បានថ្លែងនៅឯវេទិការសាធារណៈស្តីពី ការគ្រប់គ្រងម៉ាក្រូសេដ្ឋកិច្ច និងច្បាប់ថវិកាឆ្នាំ ២០២០ ថា តាមការព្យាករណ៍ សេដ្ឋកកិច្ចកម្ពុជានឹងមានកំណើន ៦ ភាគរយ ដោយសារឆ្នាំ ២០២០ វិបត្តិជាច្រើនបាននិងកំពុងកើតឡើង ដូចជាការផ្ទុះឡើងនៃវីរុសវូហាននៅចិន បញ្ហាសង្គ្រាមពាណិជ្ជកម្មនឹងអូសបន្លាយពេលយូរ និងបញ្ហា EBA។

លោក វង្សី វិស្សុត បានថ្លែងថា “បញ្ហាដែលប្រទះធំបំផុតសម្រាប់ឆ្នាំ ២០២០ វីរុសផ្លូវដង្ហើមថ្មីដែលមានប្រភពចេញពីប្រទេសចិនអាចនឹងប៉ះពាល់សេដ្ឋកិច្ចកម្ពុជា សង្គ្រាមពាណិជ្ជកម្មរវាងអាមេរិក និងចិនដែលជាផលប្រយោជន៍រយៈពេលវែង បើទោះបីជាមានការចុះកិច្ចព្រមព្រៀងពាណិជ្ជកម្មរបស់រវាងប្រទេសទាំងពីរដោយ ព្រោះប្រទេសចិនជាដៃគូពាណិជ្ជកម្ម និងវិនិយោគដ៏ធំរបស់កម្ពុជា”។ 

លោក បានបន្តថា “បញ្ហាខាងក្នុង គឺប្រព័ន្ធអនុគ្រោះពន្ធ EBA ដែលអឺរ៉ុបនឹងប្រកាសថា ដក ឬមិនដកចេញពីកម្ពុជា ប៉ុន្តែកម្ពុជាក៏បានត្រៀមខ្លួនរួចស្រេចសម្រាប់ទប់ទល់នឹងបញ្ហានេះ”។

ទាក់ទងនឹងការជំរុញកំណើនសេដ្ឋកិច្ច លោក បានបន្តថា “ធម្មតាថវិកាជាតិយើងក្នុងរយៈពេល ៣ និង៤កន្លងមកនេះចំណាយត្រឹមតែ ២៤,៥ ភាគរយនៃផលិតផលសរុបក្នុងស្រុកទេ ប៉ុន្តែនៅក្នុងឆ្នាំ ២០២០ យើងចាយទៅដល់ ២៨ ភាគរយដែលថវិកាលើកកម្ពស់តម្រូវការសេដ្ឋកិច្ចដើម្បីជំរុញកំណើនសេដ្ឋកិច្ចរបស់យើង”។

កញ្ចប់ថវិកាដែលធំជាងគេគឺត្រូវទៅដោះស្រាយបញ្ហាហេដ្ឋារចនាសម្ព័ន្ធដែលគេហៅថា បញ្ហាភាពប្រកួតប្រជែងសេដ្ឋកិច្ច និងបញ្ហាពិពិធក្មសេដ្ឋកិច្ច រួមប្រព័ន្ធដឹកជិញ្ជួន អគ្គិសនី ជំនាញ ហើយកញ្ចប់មួយទៀតគឺការបង្កើតការងារ។

លោក បន្ថែមថា “យើងត្រូវពង្រឹងសេវាសាធារណៈ។ រដ្ឋរបស់យើងត្រូវតែខ្លាំងជាងមុន ស្អាតស្អំជាងមុន ហើយឆ្លាតជាងមុន។

លោក ឱ្យដឹងទៀតថា “សភាពការណ៍ពិភពលោកសព្វថ្ងៃនេះ ហើយទៅមុខ ១០ ទៅ២០ ឆ្នាំទៀតគឺទាមទាររដ្ឋបាលសាធារណៈមួយដ៏ខ្លាំង។ ក្នុងក្របខ័ណ្ឌនេះ យើងមានបីចំណុច ទី១ គឺសមត្ថភាពដឹកនាំរបស់ស្ថាប័នយើងត្រូវតែខ្លាំង ទាំងការគិតគូរផែនការយុទ្ធសាស្រ្ត និងទាំងការអនុវត្តន៍ ទី២ គុណភាពមន្ត្រីរាជការ….. ការផ្តល់សេវាសាធារណៈ”។

ផ្ទុយពីការព្យាករណ៍កំណើនសេដ្ឋកិច្ចរបស់រដ្ឋាភិបាលកម្ពុជា ការិយាល័យស្រាវជ្រាវម៉ាក្រូសេដ្ឋកិច្ចអាស៊ាន+៣ ដែលមានមូលដ្ឋាននៅប្រទេសសឹង្ហបូរី បានឱ្យដឹងនៅក្នុងសេចក្តីប្រកាសព័ត៌មានមួយកាលពីថ្ងៃ ពុធកន្លងមកនេះ ថា សេដ្ឋកិច្ចរបស់ប្រទេសកម្ពុជាត្រូវបានរំពឹងថានឹងនៅតែរឹងមាំនៅឆ្នាំ ២០២០ ទោះបីមានបញ្ហាប្រឈមពីខាងក្រៅក៏ដោយ បើទោះបីជាកម្ពុជាកំពុងប្រឈមនឹងការដកប្រព័ន្ធអនុគ្រោះពន្ធ EBA ពីអឺរ៉ុប។

សេចក្តីប្រកាសព័ត៌មានបានឱ្យដឹងថា “កំណើនផលិតផលក្នុងស្រុកសរុបពិត (GDP) ត្រូវបានព្យាករណ៍ថានឹងមានអត្រាមធ្យមដល់ ៧.១ ភាគរយក្នុងឆ្នាំ ២០១៩ និង២០២០ ដែលគាំទ្រដោយសកម្មភាពសំណង់រឹងមាំ កំណើនឥណទានក្នុងស្រុក និងតម្រូវការក្នុងស្រុកដែលកំពុងកើនឡើង”។

អតិផរណាត្រូវបានរំពឹងថានឹងកើនឡើងដល់ ២,៣ ភាគរយនៅឆ្នាំនេះ ពោលគឺកើនឡើងបន្តិចពី ២,១ ភាគរយកាលពីឆ្នាំមុន។

សេចក្តីប្រកាសព័ត៌មានបានឱ្យដឹងថា ភាពងាយរងគ្រោះខាងក្រៅដ៏ធំរបស់កម្ពុជានឹងផ្តើមចេញពីការពឹងផ្អែកខ្ពស់របស់ខ្លួនលើទីផ្សារមួយចំនួន ជាពិសេសទីផ្សារអឺរ៉ុប។

ការិយាល័យស្រាវជ្រាវម៉ាក្រូសេដ្ឋកិច្ចអាស៊ាន បានបញ្ជាក់ថា ប្រសិនបើសហភាពអឺរ៉ុប (EU) ព្យូរប្រព័ន្ធអនុគ្រោះពន្ធពាណិជ្ជកម្មពាណិជ្ជកម្ម អ្វីគ្រប់យ៉ាងលើកលែងតែអាវុធ (EBA) ពីប្រទេសកម្ពុជា ការនាំចេញរបស់ប្រទេសនេះនឹងរងផលប៉ះពាល់យ៉ាងធ្ងន់ធ្ងរ។

សេចក្តីប្រកាសព័ត៌មាន បន្តថា “ការឆ្ពោះទៅមុខ ការពង្រឹងការប្រកួតប្រជែង និងការធ្វើពិពិធកម្មមូលដ្ឋានសេដ្ឋកិច្ចមានសារៈសំខាន់ក្នុងការរក្សាសក្តានុពលកំណើនដ៏រឹងមាំរបស់ខ្លួន។ ប្រទេសកម្ពុជាត្រូវតែដោះស្រាយបញ្ហាប្រឈមខាងរចនាសម្ព័ន្ធសំខាន់ៗ ដូចជាហេដ្ឋារចនាសម្ព័ន្ធខ្សោយ ការផ្គត់ផ្គង់កម្លាំងពលកម្មមានកម្រិត និងភាពទន់ខ្សោយរបស់ស្ថាប័ន”។

សហគមន៍អឺរ៉ុបបានចាប់ផ្តើមកាលពីខែ កុម្ភះ ឆ្នាំមុន ដំណើរការរយៈពេល ១៨ ខែដែលអាចនាំឱ្យមានការផ្អាកជាបណ្តោះអាសន្ននៃការទទួលបានការធ្វើពាណិជ្ជកម្មដោយមិនបង់ពន្ធរបស់ប្រទេសកម្ពុជាទៅកាន់ទីផ្សារសហភាពអឺរ៉ុបក្រោមប្រព័ន្ធអនុគ្រោះ EBA ដោយសារតែការព្រួយបារម្ភលើបញ្ហាសិទ្ធិមនុស្ស និងសិទ្ធិការងារ។

សេចក្តីសម្រេចចុងក្រោយស្តីពីថាតើត្រូវដក EBA ពីកម្ពុជា ឬអត់នឹងត្រូវធ្វើឡើងនៅខែ កុម្ភៈ ឆ្នាំនេះ។

ក្នុងនាមជា ប្រទេសអភិវឌ្ឍន៍តិចតួច ប្រទេសកម្ពុជាបាននាំចេញផលិតផលទាំងអស់លើកលែងតែអាវុធ និងគ្រាប់រំសេវទៅកាន់ទីផ្សារសហភាពអឺរ៉ុបដោយមិនគិតពន្ធអស់ជាច្រើនសតវត្ស។

ទិន្នន័យរបស់សហភាពអឺរ៉ុបបានបង្ហាញថា ការនាំចេញរបស់ប្រទេសកម្ពុជាទៅកាន់សហភាពអឺរ៉ុបមានតម្លៃ ៥,៨៦ ពាន់លានដុល្លារក្នុងឆ្នាំ ២០១៨ ដែលប្រហែល ៩៥ ភាគរយនៃទំនិញទាំងនោះបានចូលក្នុងសហភាពអឺរ៉ុបដោយទាញយកប្រយោជន៍ពី EBA ហើយផលិតផលសម្លៀកបំពាក់ ស្បែកជើងគឺស្មើប្រហែល ៣ ភាគ ៤ ក្នុងការនាំចេញទៅសហភាពអឺរ៉ុប។

ឧស្សាហកម្មកាត់ដេរសម្លៀកបំពាក់ និងស្បែកជើងគឺជាវិស័យនាំចេញដ៏ធំបំផុតរបស់ប្រទេសកម្ពុជាដែលផ្តល់ការងារដល់ប្រជាជនប្រហែល ៧៥០,០០០ នាក់នៅក្នុងរោងចក្រចំនួន ១,១០០ ។

បើដកហូតពន្ធលើផលិតផលសម្លៀកបំពាក់ ស្បែកជើង និងកង់ទៅកាន់ទីផ្សារអឺរ៉ុប ពន្ធសម្លៀកបំពាក់កើនឡើង ១២ ភាគរយ ស្បែកជើងកើនឡើង ១៦ ភាគរយ និងកង់កើនឡើង ១០ ភាគរយ។ នេះបើយោងតាមរបាយការណ៍របស់ធនាគារពិភពលោក។

រដ្ឋាភិបាលកម្ពុជាបានប្រកាសកាលពីខែ មីនា ឆ្នាំមុន នូវវិធានការណ៍មួយចំនួន រួមមានការបញ្ចុះថ្លៃដឹកជញ្ជូន និងថ្លៃដើមផលិតកម្ម កាត់បន្ថយការិយាធិបតេយ្យ ដើម្បីជួយគាំទ្រដល់ក្រុមហ៊ុនផលិតកម្មក្នុងស្រុក និងអ្នកនាំចេញក្នុងករណីដែលសហភាពអឺរ៉ុបដក EBA ចេញពីកម្ពុជា។

សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជាបាន មានប្រសាសន៍ថា វិធានការនេះបានជួយកាត់បន្ថយថ្លៃដើមប្រតិបត្តិការសម្រាប់ផលិតករ និងអ្នកនាំចេញប្រមាណ ៤០០ លានដុល្លារអាមេរិកក្នុងមួយឆ្នាំ៕

ដោយ ៖ រ៉ាណេត

ភ្នំពេញ ៖ ចាប់តាំងពីឆ្នាំ២០២០ និងបណ្តាឆ្នាំទៅមុខ ពិភពលោកនឹងបន្តវិវឌ្ឍនៅលើផ្លូវដ៏លំបាកស្មុគស្មាញ ពិបាកប៉ាន់ស្មានបានក្នុងដំណើរទៅរករបបពហុប៉ូល ហើយការប្រកួតប្រជែងរវាងមហាអំណាចធំៗ នឹងបន្តក្នុងលក្ខណៈស្វិតស្វាញ ជះឥទ្ធិពលដោយផ្ទាល់ និងមិនផ្ទាល់ដល់ដំណើរ និងកិច្ចការពិភពលោកទាំងវិស័យ នយោបាយ សេដ្ឋកិច្ច យោធា សន្តិសុខនិងបច្ចេកវិទ្យា។

លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានមានប្រសាសន៍នៅក្នុងសន្និបាតបូករុបការងារប្រចាំ២០១៩ និងលើកទិសដៅឆ្នាំ២០២០ នៅទីស្ដីការក្រសួងកាលពីថ្ងៃទី៣០ ខែមករា ឆ្នាំ២០២០ ថា រាប់ចាប់គិតពីឆ្នាំ២០២០នេះទៅ ប្រព័ន្ធពហុភាគីនិយមនឹងបន្តទទួលសម្ពាធខ្លាំងក្លា ដោយសារតែការកើនឡើងនៃទំនោរឯកតោភាគីនិយម។

លោកឧបនាយករដ្ឋមន្ត្រីបានមានប្រសាសន៍ទៀតថា “សង្គ្រាមពាណិជ្ជកម្ម និងការប្រកាន់នយោបាយគាំពារនិយមក៏នឹងបង្កហានិភ័យច្រើនដល់សេដ្ឋកិច្ច ពាណិជ្ជកម្ម និងហិរញ្ញវត្ថុតំបន់ និងពិភពលោក។ ភាពតានតឹង និងភ្នក់ជំលោះនៅតំបន់មួយចំនួន នឹងបង្កអស្ថិរភាព និងភាពមិនប្រាកដប្រជាទាំងសំរាប់តំបន់នោះផង ទាំងសំរាប់ពិភពលោកផងដែរ។ ការកើនឡើងនៃបញ្ហាសន្តិសុខប្រពៃណី និងមិនប្រពៃណី នឹងបន្តទាមទារការរួមដៃនៃសហគមន៍អន្តរជាតិទាំងមូល ដើម្បីរកដំណោះស្រាយសមស្រប ស៊ីជម្រៅ និងស្ថិតស្ថេរ”។

មកដល់ពេលនេះ កម្ពុជាបានភ្ជាប់ទំនាក់ទំនងការទូតជាមួយប្រទេសចំនួន១៧៤ ហើយមានស្ថានតំណាងប្រចាំនៅបរទេសចំនួន៦៣។ កាលពីឆ្នាំ២០១៩ កម្ពុជា ចាប់ផ្តើមស្តារទំនាក់ទំនងការទូតនិងមិត្តភាពជាមួយប្រទេសនានា ដែលជាមិត្តចាស់របស់យើងមានសាធារណរដ្ឋឆែក ប៊ុលហ្គារី ហុងគ្រី រ៉ូម៉ានី ស៊ែប៊ី ហើយបានទិញអាគាររៀបចំស្ថានទូតនៅទីក្រុងអង់ការ៉ា ចាប់ផ្តើមជួសជុលស្ថានទូតយើងនៅទីក្រុងសូហ្វីយ៉ា និងបែលក្រាដ បើកស្ថានអគ្គកុងស៊ុលថ្មីនៅទីក្រុងហៃគូ និងកំពុងគិតគូរបើកស្ថានទូតថ្មីនៅប៊ូដាប៉េស្តាំផងដែរ។

ក្នុងរយៈពេលជិត៤ឆ្នាំនេះ រដ្ឋាភិបាលកម្ពុជា បានធ្វើការកែទម្រង់ជាច្រើននៅក្នុងក្រសួង ដូចជា លក្ខខណ្ឌការងារសំរាប់មន្ត្រីត្រូវបានកែលំអ ដោយមានរបបប្រាក់រង្វាន់សំរាប់មន្ត្រី និងបុគ្គលិកក្នុងក្រសួង ការតំឡើងប្រាក់ខែជូនមន្ត្រីការទូតនៅឯក្រៅប្រទេស ការបង្កើនកញ្ចប់ថវិកាចំណាយទូទៅសំរាប់ស្ថានតំណាងនៅបរទេសចំនួន១០ភាគរយ ការកែលម្អរកន្លែងធ្វើការ ការបង្កើតវិទ្យាស្ថាន ដើម្បីបំពាក់បំប៉ន និងបណ្តុះបណ្តាលមន្ត្រីការទូតជាដើម ៕

ដោយ ប៊ី

ភ្នំពេញ៖ មន្ត្រីជាន់ខ្ពស់របស់ក្រសួងសេដ្ឋកិច្ច និងហិរញ្ញវត្ថុ បានថ្លែងថា អតិរេកចរន្តនៃថវិកាជាតិឡើងទៅដល់ ៨ ភាគរយនៃផលទុនជាតិសរុប ខណៈឱនភាពនៃថវិកាជាតិសឹងតែគ្មានក្នុងឆ្នាំ ២០១៩ ធ្វើឱ្យមានការសន្សំច្រើនសម្រាប់រដ្ឋាភិបាល។

លោក វង្សី វិស្សុត រដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុ បានថ្លែងនៅឯវេទិការសាធារណៈស្តីពី ការគ្រប់គ្រងម៉ាក្រូសេដ្ឋកិច្ច និងច្បាប់ថវិកាឆ្នាំ ២០២០ នៅថ្ងៃ ៣០ ខែ មករា ឆ្នាំ ២០១៩ ថា ការគ្រប់គ្រប់ត្រឹមត្រូវនៃការចំណាយរបស់រដ្ឋាភិបាលបានធ្វើឱ្យអធិរេកចរន្តនៃថវិកាជាតិមានកើនឡើង។

លោក វង្សី វិស្សុត បានថ្លែងថា “ការចំណាយរបស់យើងគ្រោងចំណាយត្រឹមតែ ២៥ ភាគរយនៃផលទុនជាតិសរុប។ យើងមិនដែលចំណាយលើសកញ្ចប់ថវិកាទេ វិន័យថវិការបស់យើងគឺគ្រប់គ្រងបានល្អណាស់ ចាយមិនដែលលើស តែរកបានលើសរហូត”។

លោក បានបន្តថា “ដូច្នេះបានជាយើងសល់ថវិកាជាតិបំរុង ហើយក្នុងឆ្នាំ២០១៩ អតិរេកចរន្តឡើងទៅដល់ ៨ ភាគរយនៃផលទុនជាតិសរុបដែលយើងគ្រោងត្រឹមតែ ២ ឬ ៣ ភាគរយនៃផលទុនជាតិសរុប ហើយឱនភាពនៃថវិកាជាតិសឹងតែគ្មានក្នុងឆ្នាំ ២០១៩ ធ្វើឱ្យយើងមានការសន្សំច្រើនសម្រាប់រដ្ឋាភិបាល”។ (អតិរេកចរន្តគឺជាលទ្ធផលវិជ្ជមាននៃផលដករវាងចំណូលចរន្ត និងចំណាយចរន្ត)

របាយការណ៍របស់ធនាគារជាតិនៃកម្ពុជា បានឱ្យដឹងថា នៅក្នុងឆ្នាំ ២០១៩ ផលទុនជាតិសរុបកើនឡើងដល់ ២៧ ២២២ លានដុល្លារអាមេរិក។

ជាលទ្ធផលនៃការអភិវឌ្ឍន៍កំណើនសេដ្ឋកិច្ចល្អ និងភាពរឹងមាំខាងម៉ាក្រូសេដ្ឋកិច្ច យើងឃើញថា ការប្រមូលថវិកាជាតិក៏មានការល្អប្រសើរគួរឱ្យកក់ក្តៅ។ ចំណូលក្នុងឆ្នាំ ២០១៩ នេះកើនឡើងដល់ ២៥ ភាគរយនៃផលិតសរុបក្នុងស្រុកដែលជាប្រទេសមួយមានចំណូលមធ្យមកម្រិតទាប ប៉ុន្តែមានចំណូលទៅ ២៥ ភាគរយនៃផលិតផលសរុបក្នុងស្រុកដោយមិនពឹងផ្អែកលើធនធានធម្មជាតិ។

ស្របពេលនេះដែរ លោក វង្សី វិស្សុត ឱ្យដឹងថា “ទុនបំរុងជាតិរបស់កម្ពុជាកើនឡើងជាង ១៧ ពាន់លានដុល្លារ ដែលធានារដល់ការនាំចូលរហូតដល់រយៈពេល ៨ ខែ។ នេះបង្ហាញថាជាក្របខ័ណ្ឌម៉ាក្រូសេដ្ឋកិច្ចមួយដ៏រឹងមាំរបស់សេដ្ឋកិច្ចជាតិយើង”។

ដោយឡែក លោក បានលើកឡើងថា នៅក្នុងឆ្នាំ ២០២០ នេះ មានទិដ្ឋភាពមួយផ្សេងបន្តិចខុសពីឆ្នាំមុនៗ ដោយសារវិធានការមួយចំនួនធំ ការបែងចែកថវិការបស់យើងគឺផ្អែកទៅលើស្ថានភាពថ្មីៗច្រើន។ ម្ខាងទប់ទល់នឹងសភាពការ ហានិភ័យ ការប្រឈមធំដែលយើងកំពុងជួបប្រទះ ហើយខាងម្ខាងទៀតបន្តអនុវត្តឱ្យមានចីរភាពនៃប្រសិទ្ធភាពនៃគោលនយោបាយរបស់រាជរដ្ឋាភិបាលស្របតាមកញ្ចប់ថវិកាជាតិរបស់រដ្ឋាភិបាល៕

ដោយវុត្ថា

ភ្នំពេញ៖ ក្រុមហ៊ុន ថៃ ប៊ុន រ៉ុង គ្រោងសាងសង់អគារពហុមុខងារថ្មីមួយទៀត នៅលើផ្ទៃដីទំហំ ៧២.១១៥ម៉ែត្រការ៉េ ដែលមានទីតាំងស្ថិតនៅភូមិ១ សង្កាត់លេខ៣ ក្រុងព្រះសីហនុ ខេត្ដព្រះសីហនុ ខណៈគម្រោងរបស់ក្រុមហ៊ុនផ្សេងៗនៅក្នុងខេត្តមួយនេះបាននឹងកំពុងសាងសង់យ៉ាងសកម្ម។

គម្រោងសាងសងអគារពហុមុខងារថ្មីមួយទៀតរបស់ក្រុមហ៊ុនថៃប៊ុន រ៉ុងនេះ មានឈ្មោះ Star Ocean Bay Views ត្រូវបានឯកភាព និងគាំទ្រដោយកិច្ចប្រជុំ ប្រជុំអន្តរក្រសួងស្តីពី ការពិនិត្យ និងផ្តល់យោបល់លើរបាយការណ៍វាយតម្លៃហេតុប៉ះពាល់បរិស្ថាន និងសង្គមពេញលេញ (ESIA) នៅថ្ងៃទី ៣០ ខែមករា ឆ្នាំ ២០២០ នេះ ដែលសិក្សាវាយតម្លៃហេតុប៉ះពាល់បរិស្ថាន និងសង្គមពេញលេញ ដោយក្រុមហ៊ុនទីប្រឹក្សា អ៊ី&អេ ខនសាល់ធេន។

ក្រៅតែពីបានគំាទ្រចំពោះគម្រោងមួយនេះ អន្តរក្រសួងក៏បានស្នើដល់ម្ចាស់គម្រោងរំលេចរចនាបទខ្មែរខ្លះនៅក្នុងសំណង់អគារ ត្រូវចូលរួមប្រើប្រាស់ថាមពលពន្លឺព្រះអាទិត្យ ត្រូវគ្រប់គ្រងសំណល់រឹង-រាវ ឱ្យបានត្រឹមត្រូវដោយគោរពទៅតាមបទដ្ឋានបច្ចេកទេស និង ត្រូវបញ្ចូលបន្ថែមច្បាប់សំណង់ថ្មីៗ និងគោរពឱ្យបានខ្ជាប់ខ្ជួន។

អន្តរក្រសួងក៏បានជំរុញឱ្យ ម្ចាស់គម្រោង ត្រូវញែកឱ្យដាច់រវាងប្រព័ន្ធរំដោះទឹកភ្លៀង និងប្រព័ន្ធលូទឹកកខ្វក់ ត្រូវគោរពតាមលក្ខខណ្ឌដែលក្រសួងរៀបចំដែនដី នគរូបនីយកម្ម និងសំណង់ បានកំណត់សម្រាប់ចំណតរថយន្ដ និងត្រូវរៀបចំប្រព័ន្ធការពារសុវត្ថិភាពឱ្យស្របតាមបទដ្ឋានបច្ចេកទេស។

ខេត្តព្រះសីហតាមភាពជាក់ស្ដែងនៅពេលបច្ចុប្បន្ននេះត្រូវបានរាជរដ្ឋាភិបាល បាននិងកំពុងយកចិត្តទុកដាក់យ៉ាងខ្លាំងទៅលើការស្ដារ និងអភិវឌ្ឍន៍ទៅលើបណ្តាញហេដ្ឋារចនាសម្ព័ន្ធនានា ជាពិសេស នៅក្នុងតំបន់កណ្តាលក្រុងដែលជាទីបណ្តុំនៃសំណង់មណ្ឌលពាណិជ្ជកម្មបែបទំនើបយ៉ាងស្អេកស្កះ ខណៈ បច្ចុប្បន្ននេះ ក្រុងព្រះសីហនុបានចាប់ផ្តើមមានភាពទាក់ទាញសារជាថ្មី ដោយមានកំនើនទេសចរជាច្រើនបានចាប់អារម្មណ៍ទៅកម្សាន្តសារជាថ្មី។

ក្នុងរយៈពេលប៉ុន្មានឆ្នាំចុងក្រោយនេះ ខេត្តព្រះសីហនុ ទទួលបាននូវការចាប់អារម្មណ៍ និងការបណ្តាក់ទុនយ៉ាងច្រើនសន្ធឹកសន្ធាប់ ពីអ្នកវិនិយោគបរទេស ជាពិសេសអ្នកវិនិយោគជនជាតិចិនស្ថិតក្នុងលំដាប់លេខ១ ជាហេតុធ្វើឱ្យខេត្តព្រះសីហនុ មានសន្ទុះអភិវឌ្ឍរីកចំរើនយ៉ាងឆាប់រហ័សលើវិស័យសំខាន់ៗដូចជា ឧស្សាហកម្ម ពាណិជ្ជកម្ម ដឹកជញ្ជូន សំណង់ ទេសចរណ៍ និងកាស៊ីណូ ក្នុងចំណោមនេះវិស័យសំណង់មានការអភិវឌ្ឍរីកចម្រើនយ៉ាងគំហុកគួរឱ្យកត់សំគាល់ គិតចាប់ពីឆ្នាំ២០១៧ដល់ខែធ្នូឆ្នាំ២០១៩ មានចំនួន១,១៣៧គម្រោង មានផ្ទៃក្រឡាសរុប១០,៧៧១,៧២០.៩២ម៉ែត្រក្រឡាស្មើនិងទុនវិនិយោគសរុប ៥,៨៧១,៩៧៦,៩៨៥.៥០ ដុល្លា ៕

ដោយ ប៊ី

ភ្នំពេញ៖ មន្ត្រីជាន់ខ្ពស់របស់ក្រសួងសេដ្ឋកិច្ច និងហិរញ្ញវត្ថុ បានថ្លែងថា អតិរេកចរន្តនៃថវិកាជាតិឡើងទៅដល់ ៨ ភាគរយនៃផលទុនជាតិសរុប ខណៈឱនភាពនៃថវិកាជាតិសឹងតែគ្មានក្នុងឆ្នាំ ២០១៩ ធ្វើឱ្យមានការសន្សំច្រើនសម្រាប់រដ្ឋាភិបាល។

លោក វង្សី វិស្សុត រដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុ បានថ្លែងនៅឯវេទិការសាធារណៈស្តីពី ការគ្រប់គ្រងម៉ាក្រូសេដ្ឋកិច្ច និងច្បាប់ថវិកាឆ្នាំ ២០២០ នៅថ្ងៃ ៣០ ខែ មករា ឆ្នាំ ២០១៩ ថា ការគ្រប់គ្រប់ត្រឹមត្រូវនៃការចំណាយរបស់រដ្ឋាភិបាលបានធ្វើឱ្យអធិរេកចរន្តនៃថវិកាជាតិមានកើនឡើង។

លោក វង្សី វិស្សុត បានថ្លែងថា “ការចំណាយរបស់យើងគ្រោងចំណាយត្រឹមតែ ២៥ ភាគរយនៃផលទុនជាតិសរុប។ យើងមិនដែលចំណាយលើសកញ្ចប់ថវិកាទេ វិន័យថវិការបស់យើងគឺគ្រប់គ្រងបានល្អណាស់ ចាយមិនដែលលើស តែរកបានលើសរហូត”។

លោក បានបន្តថា “ដូច្នេះបានជាយើងសល់ថវិកាជាតិបំរុង ហើយក្នុងឆ្នាំ២០១៩ អតិរេកចរន្តឡើងទៅដល់ ៨ ភាគរយនៃផលទុនជាតិសរុបដែលយើងគ្រោងត្រឹមតែ ២ ឬ ៣ ភាគរយនៃផលទុនជាតិសរុប ហើយឱនភាពនៃថវិកាជាតិសឹងតែគ្មានក្នុងឆ្នាំ ២០១៩ ធ្វើឱ្យយើងមានការសន្សំច្រើនសម្រាប់រដ្ឋាភិបាល”។ (អតិរេកចរន្តគឺជាលទ្ធផលវិជ្ជមាននៃផលដករវាងចំណូលចរន្ត និងចំណាយចរន្ត)

របាយការណ៍របស់ធនាគារជាតិនៃកម្ពុជា បានឱ្យដឹងថា នៅក្នុងឆ្នាំ ២០១៩ ផលទុនជាតិសរុបកើនឡើងដល់ ២៧ ២២២ លានដុល្លារអាមេរិក។

ជាលទ្ធផលនៃការអភិវឌ្ឍន៍កំណើនសេដ្ឋកិច្ចល្អ និងភាពរឹងមាំខាងម៉ាក្រូសេដ្ឋកិច្ច យើងឃើញថា ការប្រមូលថវិកាជាតិក៏មានការល្អប្រសើរគួរឱ្យកក់ក្តៅ។ ចំណូលក្នុងឆ្នាំ ២០១៩ នេះកើនឡើងដល់ ២៥ ភាគរយនៃផលិតសរុបក្នុងស្រុកដែលជាប្រទេសមួយមានចំណូលមធ្យមកម្រិតទាប ប៉ុន្តែមានចំណូលទៅ ២៥ ភាគរយនៃផលិតផលសរុបក្នុងស្រុកដោយមិនពឹងផ្អែកលើធនធានធម្មជាតិ។

ស្របពេលនេះដែរ លោក វង្សី វិស្សុត ឱ្យដឹងថា “ទុនបំរុងជាតិរបស់កម្ពុជាកើនឡើងជាង ១៧ ពាន់លានដុល្លារ ដែលធានារដល់ការនាំចូលរហូតដល់រយៈពេល ៨ ខែ។ នេះបង្ហាញថាជាក្របខ័ណ្ឌម៉ាក្រូសេដ្ឋកិច្ចមួយដ៏រឹងមាំរបស់សេដ្ឋកិច្ចជាតិយើង”។

ដោយឡែក លោក បានលើកឡើងថា នៅក្នុងឆ្នាំ ២០២០ នេះ មានទិដ្ឋភាពមួយផ្សេងបន្តិចខុសពីឆ្នាំមុនៗ ដោយសារវិធានការមួយចំនួនធំ ការបែងចែកថវិការបស់យើងគឺផ្អែកទៅលើស្ថានភាពថ្មីៗច្រើន។ ម្ខាងទប់ទល់នឹងសភាពការ ហានិភ័យ ការប្រឈមធំដែលយើងកំពុងជួបប្រទះ ហើយខាងម្ខាងទៀតបន្តអនុវត្តឱ្យមានចីរភាពនៃប្រសិទ្ធភាពនៃគោលនយោបាយរបស់រាជរដ្ឋាភិបាលស្របតាមកញ្ចប់ថវិកាជាតិរបស់រដ្ឋាភិបាល៕