ផ្សារទំនើប FURI Times Square នឹងចាប់បើកដំណើរការនៅដើមសប្ដាហ៍ក្រោយនេះហើយ

ដោយ ៖ រ៉ាណេត

ព្រះសីហនុ ៖ នៅត្រឹមថ្ងៃច័ន្ទដើមសប្ដាហ៍ក្រោយនេះ ផ្សារទំនើបដ៏ទាន់សម័យ និងស៊ីវិល័យលើកដំបូងគេបង្អស់ប្រចាំនៅក្នុងក្រុងព្រះសីហនុ FURI Times Square នឹងចាប់បើកដំណើរការហើយ ជាមួយនឹងការនាំមកនូវបទពិសោធន៍ថ្មីនៃការទិញលក់ទំនិញគ្រប់ប្រភេទយ៉ាងសម្បូរបែបបំផុត ក្រោមការចូលរួមពីសំណាក់លោកអភិបាលខេត្តព្រះសីហនុជាអធិបតី។

ជាមួយនឹងការត្រៀមខ្លួនបង្ហាញវត្តមានថ្មី នៃការបើកទំព័រជាប្រវត្តិសាស្ត្រប្រចាំនៅក្នុងក្រុងព្រះសីហនុ ផ្សារទំនើបដ៏ធំលើកដំបូងគេបង្អស់ ប្រចាំនៅក្នុងតំបន់ប៉ូលសេដ្ឋកិច្ចទី២ប្រចាំប្រទេសកម្ពុជា FURI TIMES SQUARE នឹងធ្វើឱ្យមហាជន ក៏ដូចជាអតិថិជនទូទៅមានភាពភ្ញាក់ផ្អើល និងរំភើបយ៉ាងខ្លាំងទៅនឹងទិដ្ឋភាពដ៏អស្ចារ្យ នៃការរចនាម៉ូដផ្សារទំនើបទាំងមូល រាប់ទាំងផ្នែកខាងក្នុង និងខាងក្រៅផងដែរ។

ប្រធានគ្រប់គ្រងផ្នែកលក់នៅផ្សារទំនើប FURI Times Square កញ្ញា តាំង គីមហុង បានប្រាប់ឱ្យដឹងថា នៅត្រឹមថ្ងៃច័ន្ទ ទី៩ ខែធ្នូឆ្នាំ២០១៩ខាងមុខនេះ ផ្សារទំនើបបែបស៊ីវិល័យមួយនេះ នឹងចាប់បើកទ្វារដំណើរការលក់លើកដំបូង ដើម្បីជាការឆ្លើយតបទៅនឹងតម្រូវការរបស់អតិថិជននៅក្នុងក្រុងព្រះសីហនុ។

កញ្ញា តាំង គីមហុង បានបន្តឱ្យដឹងថែមទៀតថា “ជាមួយនឹងកិច្ចដំណើរការសាកល្បងនេះ ផ្សារទំនើប FURI Times Square បាននាំមកជូនអតិថិជននូវបណ្តាផលិតផល មុខទំនិញចំរុះយ៉ាងសម្បូរបែប ដែលសុទ្ធតែជាម៉ាកយីហោល្បីៗ លំដាប់សាកលលោកដូចជា ក្រុមហ៊ុន KFC , ក្រុមហ៊ុន Starbucks, ក្រុមហ៊ុន Amazone Café , ក្រុមហ៊ុន KOI , ក្រុមហ៊ុន Dakasi Tea, ហាងអាហារមកពីប្រទែសាំងហ្គាពួរ ក្រុមហ៊ុនលក់សម្លៀកបំពាក់ LEVI’s , ក្រុមហ៊ុន NIKE , ក្រុមហ៊ុន Samsonite, ក្រុមហ៊ុននាឡិកាដ៏ល្បីឈ្មោះ G-Shock, ក្រុមហ៊ុនលក់រថយន្ត HGB Group រួមជាមួយក្រុមហ៊ុនល្បីៗជាច្រើនទៀត ដោយរាប់បញ្ចូលទាំងគ្រឿងបរិក្ខាប្រើប្រាស់ប្រចាំថ្ងៃ និងគ្រឿងសំអាងផងដែរ ”។

កញ្ញាបានបន្តទៀតថា “ផ្សារទំនើបនេះ នឹងចាប់បើកទ្វារបម្រើអតិថិជនចាប់ពីម៉ោង៩ព្រឹក រហូតដល់ម៉ោង១១យប់ ដែលក្រៅពីមានលក់នូវមុខទំនិញ និងអាហារយ៉ាងសម្បូរបែប ក៏មានទីកន្លែងកម្សាន្តសម្រាប់កុមារ និងយុវវ័យផងដែរ ជាពិសេសមានរោងកុនបែបទំនើបនៅជាន់ខាងលើ រួមជាមួយនឹង Sky Bar ដែលរៀបចំនៅជាន់ខាងលើលំហរអាកាសនៅពេលរាត្រីផងដែរ”។

សូមចូលរួមទាំងអស់គ្នា និងស្វាគមន៍ចំពោះការមកដល់ថ្មីនៃផ្សារទំនើបដ៏ទាន់សម័យ និងស៊ីវិល័យលើកដំបូងគេបង្អស់នៅក្រុងព្រះសីហនុ ….៕

គម្រោងបុរីធំៗ កំពុងសម្រុកចូលអភិវឌ្ឍន៍នៅតំបន់ជាយក្រុងក្នុងខណ្ឌដង្កោ

ដោយ ៖ រ៉ាណេត

ភ្នំពេញ ៖ ជាតំបន់ដែលមានភូមិសាស្ត្រល្អសមស្របទៅនឹងវិស័យលំនៅដ្ឋានយ៉ាងប្រសើរ បច្ចុប្បន្ន តំបន់ជាយក្រុងដែលស្ថិតនៅក្នុងខណ្ឌដង្កោ កំពុងតែទាក់ទាញការចាប់អារម្មណ៍ពីសំណាក់បណ្តាអ្នកវិនិយោគឱ្យចូលទៅអភិវឌ្ឍយ៉ាងគំហុកក្នុងរយៈពេលដ៏ខ្លីនាពេលចុងក្រោយនេះ ។

ស្ថិតនៅភាគខាងត្បូងរាជធានីភ្នំពេញ ខណ្ឌដង្កោ បាន និងកំពុងតែបង្ហាញនូវសក្ដានុពលយ៉ាងខ្លាំងនៅក្នុងវិស័យសំណង និងអចលនទ្រព្យ ជាពិសេសវិស័យលំនៅដ្ឋាន ដោយសារតែតំបន់នេះមានហេដ្ឋារចនាសម្ព័ន្ធប្រទាក់ក្រឡាគ្នាជាមួយនឹងមហាវិថីសម្ដេចតេជោ ដែលមានទំហំផ្លូវ៦០ម៉ែត្រ ផ្លូវ៣០ម៉ែត្រ រួមជាមួយនឹងបណ្តាញផ្លូវសំខាន់ៗជាច្រើនទៀតដែលរាជរដ្ឋាភិបាលកំពុងតែរៀបចំស្ថាបនាបន្ថែម។

អគ្គនាយកក្រុមហ៊ុនអចលនទ្រព្យអន្តរជាតិ Cenrury21 Fortuna Investment លោក វ៉ា វីរៈ បានមានប្រសាសន៍ថា គ្រប់បណ្តាអ្នកវិនិយោគ និងអភិវឌ្ឍគម្រោងលំនៅដ្ឋាន ឬបុរីធំៗ គឺពួកគេសុទ្ធតែមានធ្វើការសិក្សាស្វែងយល់ពីសក្ដានុពល និងឱកាសទទួលបានចំណេញត្រឡប់មកវិញយ៉ាងពិតប្រាកដ។

លោកថា “តំបន់ជាយក្រុងនៅប៉ែកខាងត្បូងរាជធានីភ្នំពេញ គឺមានសក្ដានុពលខ្លាំងជាងគេ បើប្រៀបធៀបទៅនឹងតំបន់ដទៃទៀតដោយសារតែនៅប៉ែកខាងត្បូងនេះ មានភាពទាក់ទាញពីមហាវិថី ៦០ម៉ែត្រ ដែលប្រមូលផ្តុំទៅដោយគម្រោងអភិវឌ្ឍធំៗជាច្រើនដែលក្នុងនោះរួមមានដូចជា មជ្ឈមណ្ឌលពាណិជ្ជកម្ម ខុនដូរ ផ្សារទំនើប AEON3 ផ្សារទំនើប ជីពម៉ុង ដែលកំពុងសម្រុកសាងសង់ផ្សារទំនើបរបស់ក្រុមហ៊ុន ប៉េងហួត PH Diamond Place រួមជាមួយនឹងគម្រោងសំណង់ធំៗជាច្រើនទៀត។ ដោយសារតែគម្រោងនិងសន្ទុះនៃការអភិវឌ្ឍទាំងអស់នេះហើយ ដែលជំរុញឱ្យតំបន់មួយនេះមានភាពទាក់ទាញ និងមានលំហូរប្រជាសាស្ត្រចូលទៅរស់នៅច្រើន”។

បច្ចុប្បន្ននេះ ក្រៅពីសកម្មភាពនៃការអភិវឌ្ឍលើវិស័យហេដ្ឋារចនាសម្ព័ន្ធរបស់រាជរដ្ឋាភិបាល រួមជាមួយនឹងគម្រោងអភិវឌ្ឍន៍សំណង់ធំៗ ក៏មានគម្រោងអភិវឌ្ឍន៍លើវិស័យលំនៅដ្ឋានយ៉ាងសកម្មផងដែរ។

លោក ហេង ពិសិដ្ឋ នាយកប្រតិបត្តិគម្រោងបុរីលំនៅដ្ឋានដ៏ទំនើប GALAXY 11 ដែលស្ថិតនៅក្នុងតំបន់ភាគខាងត្បូងនៃរាជធានីភ្នំពេញ និងកំពុងតែសម្រុកដំណើរការសាងសង់ និងគ្រោងបញ្ចប់ក្នុងពេលឆាប់ៗខាងមុខនេះ បានទទួលស្គាល់ថា នៅមួយរយៈពេលចុងក្រោយនេះ ពិតជាមានគម្រោងអភិវឌ្ឍធំៗចូលមកកាន់តំបន់នេះប្រាកដមែន ជាពិសេសគម្រោងអភិវឌ្ឍន៍លំនៅដ្ឋានកម្រិតមធ្យមនិងក្រោមមធ្យម។

លោកបានបន្តទៀតថា “សម្រាប់តែគម្រោងរបស់បុរី GALAXY 11 ដែលកំពុងសាងសង់នៅពេលនេះ គឺជាប្រភេទលំនៅដ្ឋានបែបទំនើប និងទាន់សម័យ ដែលមានចែកចេញជា៣ប្រភេទ រួមមានដូចជា ប្រភេទ Shop House ផ្ទះវីឡាទោល និងវីឡាព្រីនស៍(Prince) ដោយគ្រប់ប្រភេទនៃផ្ទះទាំងអស់សុទ្ធតែត្រូវបានរៀបចំរចនាយ៉ាងវិចិត្រពីសំណាក់អ្នកជំនាញ”។ លោកបានបន្តទៀតថា“ក្រៅពីយកចិត្តទុកដាក់ទៅលើការរចនាម៉ូត ប្លង់មេរបស់បុរីទាំងមូលដែលធានាថា ស្អាតទំនើបល្អឥតខ្ចោះនោះ នៅក្នុងបុរីក៏មានការស្ថាបនាផ្លូវភ្លោះទំហំ១៣ម៉ែត្រ មានរៀបចំជាកន្លែងកម្សាន្ត សួនច្បារសាធារណៈ មានពិភពបៃតងផ្តល់នូវបរិយាកាសដ៏ល្អ និងខ្យល់ត្រជាក់បក់មកពីស្ទឹង មានអាងហែលទឹក ជាពិសេស មានការរៀបចំជាក្លឹបហាត់ប្រាណបែបទំនើប ដោយមិនចាំបាច់ចំណាយពេលចេញទៅហាត់ប្រាណនៅក្រៅបុរីនោះឡើយ”។

លោក ហេង ពិសិដ្ឋ បានមានប្រសាសន៍បន្តទៀតថា “ភ្ជាប់ជាមួយនឹងទីតាំងដ៏មានសក្ដានុពល ដែលប្រមូលផ្តុំទៅដោយគម្រោងអភិវឌ្ឍន៍ធំៗជាច្រើនដែលស្ថិតនៅផ្លូវ៦០ម៉ែត្រ ដែលនៅក្បែរគម្រោងបុរីស្រាប់ ជាពិសេសស្ថិតនៅលើផ្លូវទំហំ ៣២ម៉ែត្រ ដែលស្របទិសឆ្ពោះទៅគម្រោងសាងសង់ព្រលានយន្តហោះភ្នំពេញថ្មី គឺ កាន់តែបង្កឱ្យការរស់នៅក្នុងបុរី GALAXY 11 មានភាពងាយស្រួលក្នុងការធ្វើអាជីវកម្មគ្រប់ប្រភេទ ប្រកបដោយ សុវត្ថិភាពខ្ពស់ មិនចាញ់តំបន់អភិវឌ្ឍនៃផ្សារទំនើប AEON2 នោះទេហើយវាក៏ជាជម្រើសដ៏ល្អបំផុតសម្រាប់លោកអ្នកផងដែរ បើប្រៀបធៀបជាមួយគម្រោងបុរីដទៃទៀត”។

គម្រោងបុរី GALAXY 11 នៅក្នុងតំបន់ដ៏មានសក្ដានុពល ជាបណ្តុំនៃទីប្រជុំជន ស្ថិតនៅសង្កាត់ស្ពានថ្ម ខណ្ឌដង្កោ រាជធានីភ្នំពេញដោយចំណាយពេលត្រឹម៥នាទីក្នុងការធ្វើដំណើរពីទីតាំងគម្រោងផ្សារទំនើប AEON3 តែប៉ុណ្ណោះ។ ប្រភេទលំនៅដ្ឋានប្រភេទShop House មានតម្លៃចាប់ពីជាង ៨ម៉ឺនដុល្លារឡើងទៅ ។ ប្រភេទលំនៅដ្ឋាន វីឡាទោល មានតម្លៃចាប់ពី ជាង១៤ម៉ឺនដុល្លារឡោះងទៅ ។ ប្រភេទលំនៅដ្ឋាន វីឡា ព្រីនស៍ មានតម្លៃចាប់ពី ជាង ៣០ម៉ឺនដុល្លារឡើងទៅ ដោយគ្រប់ប្រភេទលំនៅដ្ឋានទាំងអស់លោកអ្នកគ្រាន់តែកក់ត្រឹម ៣០ភាគរយ ជាមួយនឹងការបង់រំលស់រយៈ១៨ខែ ដោយគ្មានការប្រាក់។

ដោយឡែកសម្រាប់អតិថិជនដែលកក់លំនៅដ្ឋាន ដើម្បីបានធ្វើជាម្ចាស់លំនៅដ្ឋានចាប់ពីថ្ងៃនេះ រហូតដល់ដំណាច់ឆ្នាំ២០១៩ នឹងទទួលបានការបញ្ចុះតម្លៃពិសេស រួមជាមួយនឹងការទទួលរង្វាន់នូវម៉ូតូ Honda ស៊េរីថ្មីមួយគ្រឿងភ្លាមៗ ព្រមទាំងទទួលបានប័ណ្ណផ្សងសំណាងដែលមានទឹកប្រាក់សរុបរហូតដល់ 200,000ដុល្លារ និងគ្រឿងបរិក្ខា សម្ភារៈប្រើប្រាស់នៅក្នុងផ្ទះជាច្រើនប្រភេទថែមទៀតផង ។

ព័ត៌មានបន្ថែមសូមទាក់ទងតាមរយៈទូរស័ព្ទលេខ ០១៧ ៦៦ ១១ ២២ / ០៩៨ ៦៦ ១១ ២២៕

ទីផ្សារអាស៊ីបានងើបឡើងវិញ ខណៈនៅតែមានសុទិដ្ឋិនិយមលើកិច្ចព្រមព្រៀងពាណិជ្ជកម្មរវាងអាមេរិក និងចិន

ដោយ Donald Lee

ភ្នំពេញ៖ ទីផ្សារអាស៊ីបានកើនឡើងដោយមានភាពសុទិដ្ឋិនិយមលើកិច្ចព្រមព្រៀងពាណិជ្ជកម្មរវាងអាមេរិក និងចិនជិតដល់ទីបញ្ចប់ បើទោះបីជាមានភាពតានតឹងកើនឡើង ដោយសារតែការអត្ថាធិប្បាយរបស់ប្រធានាធិបតីអាមេរិក Donald Trump និងច្បាប់ដ៏ចម្រូងចម្រាសរបស់រដ្ឋាភិបាលអាមេរិកស្តីពីហុងកុង និងស៊ីនជាំងក៏ដោយ។

សន្ទស្សន៍ក្រុមហ៊ុន Topix របស់ជប៉ុនកើនឡើង ០,៣ ភាគរយ ក្រុមហ៊ុនអូស្ត្រាលី S&;P កើនឡើង ០,៩ ភាគរយ ហុងកុងកើនឡើង ០,៦ ភាគរយ និងក្រុមហ៊ុនសៀងហៃ Composite កើនឡើង ០.៥ ភាគរយ។

អ្នកចរចាអាមេរិកកំពុងរំពឹងថាកិច្ចព្រមព្រៀងពាណិជ្ជកម្មដំណាក់កាលទី ១ នឹងត្រូវឈានដល់ មុនការដំឡើងពន្ធគយលើទំនិញចិនដែលមានតម្លៃ ១៥៦ ពាន់លានដុល្លារ។ នេះបើយោងតាមរបាយការណ៍ពីទីភ្នាក់ងារព័ត៌មាន Bloomberg ។

ទីផ្សារជាច្រើនបានធ្លាក់ចុះនៅដើមសប្តាហ៍នេះ បន្ទាប់ពីលោក Trump បានធ្វើអត្ថាធិប្បាយក្រៅផ្លូវការដោយបញ្ជាក់ថា លោកបានយល់ព្រមគំនិតនៃការបញ្ឈប់កិច្ចព្រមព្រៀងពាណិជ្ជកម្មរហូត បន្ទាប់ពីការបោះឆ្នោតឡើងវិញនៅឆ្នាំ ២០២០។

លោក Trump បាននិយាយទៅកាន់អ្នកសារព័ត៌មានថា “តាមវិធីខ្លះ ខ្ញុំចូលចិត្តគំនិតនៃការរង់ចាំរហូតដល់ក្រោយការបោះឆ្នោតសម្រាប់កិច្ចព្រមព្រៀងជាមួយចិន ប៉ុន្តែពួកគេចង់ធ្វើកិច្ចព្រមព្រៀងឥឡូវនេះ ហើយយើងនឹងដឹងថាតើកិច្ចព្រមព្រៀងនេះនឹងត្រូវធ្វើឡើង ឬអត់”។

ទន្ទឹមនឹងនេះដែរ ទីក្រុងប៉េកាំងបានបញ្ជាក់ថា មិនមានពេលវេលា និងកាលបរិច្ឆេទកំណត់សម្រាប់បញ្ចប់កិច្ចព្រមព្រៀងពាណិជ្ជកម្មទេ។

លោកស្រី Hua Chunying អ្នកនាំពាក្យក្រសួងការបរទេសចិននៅថ្ងៃ ពុធ នេះ និយាយទៀតថា “អាមេរិកនិយាយម្តងហើយម្តងទៀតថា កិច្ចព្រមព្រៀងពាណិជ្ជកម្មមួយកំពុងតែមកដល់ ឬ មិនមានកិច្ចព្រមព្រៀង ឬសង្ឃឹមថានៅពេលឈានដល់កិច្ចព្រមព្រៀង ខ្ញុំមិនត្រូវការកិច្ចព្រមព្រៀងទេ ប៉ុន្តែចិនមិនដែលនិយាយរឿងទាំងនេះទេមែនទេ”។

លោកស្រីបានបន្ថែមថា “យើងជឿជាក់ថា សង្គ្រាមពាណិជ្ជកម្មមិនសមស្របនឹងផលប្រយោជន៍របស់ភាគីណាមួយឡើយ។ ស្របពេលសាកលភាវូបនីយកម្ម ផលប្រយោជន៍ចិន និងអាមេរិកមានទំនាក់ទំនងគ្នាយ៉ាងខ្លាំង ហើយកិច្ចសហប្រតិបត្តិការរបស់ពួកគេគឺជាគន្លឹះក្នុងការស្តារសេដ្ឋកិច្ច និងកំណើនសេដ្ឋកិច្ចឡើងវិញ”។

សង្គ្រាមពាណិជ្ជកម្មអស់រយៈពេលជាង ១៦ ខែបានបង្អាក់ដល់សេដ្ឋកិច្ចពិភពលោក។ អង្គការសហប្រតិបត្តិការនិងអភិវឌ្ឍន៍សេដ្ឋកិច្ច (OECD) បានបញ្ជាក់ថា ផលប៉ះពាល់នៃសង្រ្គាមពាណិជ្ជកម្មអាមេរិក និងចិនបានបណ្តាលឱ្យកំណើនសេដ្ឋកិច្ចពិភពលោកធ្លាក់ចុះដូចកម្រិតវិបត្តិហិរញ្ញវត្ថុដ៏ធំកាលពី ១០ ឆ្នាំមុន៕

ADB ផ្តល់ហិរញ្ញប្បទានជិត ១២០លានដុល្លារ ដើម្បីជួយធ្វើទំនើបកម្មប្រព័ន្ធធារាសាស្ត្រនៅកម្ពុជា

ដោយ ប៊ី

ភ្នំពេញ៖ ធនាគារអភិវឌ្ឍន៍អាស៊ី (ADB) បានអនុម័តកញ្ចប់ហិរញ្ញប្បទានចំនួន ១១៩,១៦ លានដុល្លារដើម្បីជួយធ្វើទំនើបកម្ម និងកែលម្អអាកាសធាតុ និងភាពធន់សម្រាប់គ្រោះមហន្តរាយនៃប្រព័ន្ធធារាសាស្ត្រនៅក្នុងខេត្តចំនួន ៤ នៅកម្ពុជាដែលនឹងជួយផ្គត់ផ្គង់ទឹកដល់ដីកសិកម្មចំនួន ៤៣,៥០០ ហិកតាដែលផ្តល់អត្ថប្រយោជន៍ដល់ប្រជាជន ២៩០,០០០ នាក់ដែលពាក់កណ្តាលជាស្ត្រី។

ប្រព័ន្ធធារាសាស្រ្តគ្របដណ្តប់ដោយជំនួយរបស់ធនាគារអភិវឌ្ឍន៍អាស៊ីដែលមានប្រាក់កម្ចីចំនួន ១១៧ លានដុល្លារ និងជំនួយឥតសំណងចំនួន ២,១៦ លានដុល្លារពីមូលនិធិអភិវឌ្ឍន៍អាស៊ីគឺកាំពីងពួយនៅខេត្តបាត់ដំបង ព្រែកមួយកន្លែង (Prek Po) ខេត្តកំពង់ចាម ស្ទឹងជីនិតខាងត្បូងក្នុងខេត្តកំពង់ធំ និងប្រឡាយ ១៥ នៅខេត្តតាកែវ។

គម្រោងនេះនឹងជួយលើកកម្ពស់ផលិតភាពកសិកម្មរបស់ខេត្ត និងចូលរួមកាត់បន្ថយភាពក្រីក្រនៅតាមជនបទទូទាំងប្រទេស។

លោកស្រី Thuy Trang Dang អ្នកឯកទេសខាងអភិវឌ្ឍន៍ទីក្រុងជាន់ខ្ពស់របស់ធនាគារអភិវឌ្ឍន៍អាស៊ីប្រចាំតំបន់អាស៊ីអាគ្នេយ៍ បានថ្លែងថា “កសិកម្មបានដើរតួនាទីយ៉ាងសំខាន់នៅក្នុងជីវិតសេដ្ឋកិច្ច និងសង្គមរបស់ប្រជាជននៅកម្ពុជា ជាពិសេសប្រជាជនដែលរស់នៅតាមតំបន់ជនបទ”។

លោកស្រីបានបន្តថា “ការជម្រុញផលិតភាពកសិកម្មដោយផ្តោតលើការកែលំអហេដ្ឋារចនាសម្ព័ន្ធក្នុងវិស័យ ដូចជាប្រព័ន្ធធារាសាស្ត្រដែលគំនិតផ្តួចផ្តើមរបស់ធនាគារអភិវឌ្ឍន៍អាស៊ីនឹងយកចិត្តតុកដាក់ នឹងធ្វើឱ្យមានភាពយូរអង្វែងដើម្បីផ្តល់អំណាចដល់ប្រជាជន និងលើកកម្ពស់ពួកគេចេញពីភាពក្រីក្រ”។

កសិកម្មជាកត្តាជំរុញដ៏សំខាន់មួយនៅក្នុងសេដ្ឋកិច្ចកម្ពុជាដែលរួមចំណែក ២២ ភាគរយនៃផលិតផលក្នុងស្រុកសរុបរបស់ប្រទេសក្នុងឆ្នាំ ២០១៨ ។ ទោះយ៉ាងណា វិស័យនេះដែលបានដើរតួនាទីជាឆ្អឹងខ្នងនៃជីវភាពរស់នៅនៅតាមជនបទនៅតែមានលក្ខណៈមិនល្អប្រសើរជាមួយនឹងហេដ្ឋារចនាសម្ព័ន្ធកសិកម្មហួសសម័យ ឬមិនគ្រប់គ្រាន់។

ឧទាហរណ៍ ផ្ទៃដីកសិកម្ម ១,៣ ហិកតានៃជិតផ្ទៃដីជិត ៤ លានហិកតាប៉ុណ្ណោះដែលគ្របដណ្តប់ដោយប្រព័ន្ធធារាសាស្ត្ររបស់ប្រទេសនេះ។ ប្រហែល ៩០ ភាករយ នៃប្រព័ន្ធធារាសាស្រ្តទាំងនេះត្រូវបានចាត់ទុកថាមិនដំណើរការ ឬហួសសម័យ ដោយសារតែបញ្ហាការរចនា និងបញ្ហាមិនត្រឹមត្រូវ។

គម្រោងកែលម្អប្រព័ន្ធស្រោចស្រពកសិកម្មនេះនឹងធ្វើទំនើបកម្ម និងប្រព័ន្ធធារាសាស្រ្តការងារអាកាសធាតុដោយជួសជុលទំនប់អាងស្តុកទឹក ស្ថានីយ៍បូមទឹក ប្រឡាយ និងប្រឡាយមេ ក៏ដូចជាកែលម្អការអនុវត្តកសិកម្ម និងលើកកម្ពស់ការធ្វើពិពិធកម្មដំណាំតាមរយៈការបណ្តុះបណ្តាលយ៉ាងតិចដី ២០០ កន្លែង។

គម្រោងនេះនឹងសាកល្បងប្រព័ន្ធគ្រប់គ្រងទ្រព្យសម្បត្តិធារាសាស្រ្តដើម្បីធានាបាននូវនិរន្តរភាពនៃប្រព័ន្ធធារាសាស្រ្តដែលបានធ្វើឱ្យប្រសើរឡើង ទន្ទឹមនឹងការពង្រឹងសហគមន៍អ្នកប្រើប្រាស់ទឹក កសិករដែលមានស្រាប់ និងបង្កើតប្រព័ន្ធបន្ថែម ចំនួនបីបន្ថែមទៀតដោយមានការចូលរួមយ៉ាងខ្លាំងពីស្ត្រី។

គម្រោងនេះក៏នឹងទទួលបានជំនួយឥតសំណងចំនួន ១,៦ លានដុល្លារពីមូលនិធិបច្ចេកវិទ្យាកម្រិតខ្ពស់ដែលផ្តល់ហិរញ្ញប្បទានដោយរដ្ឋាភិបាលជប៉ុន និងគ្រប់គ្រងដោយធនាគារអភិវឌ្ឍន៍អាស៊ីនឹងធ្វើឱ្យប្រសើរឡើងនូវការគ្រប់គ្រងធនធានទឹកនៅក្នុងខេត្តទាំង ៤ តាមរយៈការបង្កើតមជ្ឈមណ្ឌលគ្រប់គ្រងទិន្នន័យធនធានទឹដើម្បីកែលំអវិធីទិន្នន័យស្តីពីការប្រមូលទឹកចែករំលែក និងប្រើប្រាស់សម្រាប់ការធ្វើផែនការការគ្រប់គ្រង និងវិនិយោគធនធានទឹកឱ្យកាន់តែប្រសើរ៕

រដ្ឋមន្ត្រីសាធារណៈការ៖ ផ្លូវជាតិលេខ ២ នឹងចាប់ផ្តើមសាងសង់នៅឆ្នាំ ២០២០ខាងមុខនេះ

ដោយ វុត្ថា

ភ្នំពេញ៖ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូន បានឱ្យដឹងថា ផ្លូវជាតិលេខ ២ នឹងចាប់ផ្តើមបើកការដ្ឋានស្ថាបនានៅក្នុងឆ្នាំ ២០២០ ខាងមុខនេះ ខណៈគ្រឿងចក្របានដឹកមកដល់ប្រទេសកម្ពុជារួចហើយ។

លោកទេសរដ្ឋមន្ត្រី ស៊ុន ចាន់ថុល ថ្លែងប្រាប់ក្រុបអ្នកសារព័ត៌មាននៅក្នុងវេទិកាសំណេះសំណាលស្ដីពីចល័តភាពក្នុងទីប្រជុំជន (URBAN MOBILITY FORUM) នាថ្ងៃទី ៥ ខែធ្នូ ២០១៩នេះ គ្រឿងចក្របាន មកដល់ប្រទេសកម្ពុជាបណ្តើរហើយ និងថវិកាក៏មានគ្រប់គ្រាន់ដោយត្រៀមពេលវេលាសមស្របស្នើសុំសម្តេចតេជោ ហ៊ុន សែន រកពេលវេលា អញ្ជើញបើករដ្ឋានជាផ្លូវការ។

បើតាមលោកទេសរដ្ឋមន្ត្រីស៊ុន ចាន់ថុល បញ្ជាក់ថា “ស្របជាមួយគ្នានេះ ក៏នឹងរៀបចំបើកសម្ពោធឱ្យដំណើរជាផ្លូវការនូវផ្លូវជាតិលេខ ២១ ពីក្រុងតាខ្មៅ ទៅកោះធំ ហើយជាមួយគ្នានោះនឹងបើករដ្ឋានស្ថាបនាផ្លូវជាតិលេខ ២ និង ផ្លូវជាតិលេខ ២២ នៅឆ្នាំ ២០២០ ខាងមុខនេះ”។

ការស្ថាបនាឡើងវិញនូវផ្លូវជាតិលេខ ២ ដោយរាប់ចាប់ពីតាខ្មៅ ដល់អូរចំបក់ និងផ្លូវជាតិលេខ២២ ពីអូរចំបក់ដល់ទីប្រជុំជនអង្គតាសោម គឺស្ថិតក្រោមគម្រោងឥណទានសម្បទានចំនួន៤៥លានដុល្លារអាមេរិក ដែលជាហិរញ្ញប្បទានសប្បទានពីរដ្ឋាភិបាលកូរ៉េ ។

គម្រោងផ្លូវជាតិលេខ២ មានប្រវែង៦៦គីឡូម៉ែត្រដោយក្នុងនោះចាប់ពីរង្វង់មូលតាខ្មៅ រហូតដល់រង្វង់មូលអូរចំបក់មានប្រវែង៥៧គីឡូម៉ែត្រ និង៩គីឡូម៉ែត្រ នៅលើផ្លូវជាតិលេខ២២គ្រោងក្រាលកៅស៊ូ AC សង់ស្ពានថ្មី និងពង្រីកទទឹងផ្លូវឲ្យបាន ១៣ម៉ែត្រ តាមទំហំចរាចរណ៍ និងតាមដំណាក់កាល។ រីឯចាប់ពីរង្វង់មូលគួរស្រូវ ទៅទិសខាងត្បូងប្រវែង ៨គីឡូម៉ែត្រ គ្រោងនឹងសាងសង់ជា ៤គន្លង៕

កិច្ចព្រមព្រៀងពាណិជ្ជកម្មសេរីកម្ពុជា-សហភាពសេដ្ឋកិច្ចអឺរ៉ុប-អាស៊ី បង្ហាញពីឱកាសឈានឡើងរបស់កម្ពុជា

ដោយ ប៊ី

ភ្នំពេញ៖ ក្រសួងពាណិជ្ជកម្ម បានបញ្ជាក់ថា កិច្ចព្រមព្រៀងពាណិជ្ជកម្មសេរីកម្ពុជា-សហភាពសេដ្ឋកិច្ចអឺរ៉ុប-អាស៊ីបង្ហាញពីកាលានុវត្តភាពឈ្នះ-ឈ្នះសម្រាប់កម្ពុជា បន្ទាប់ពីបានចំណាយពេលសិក្សាស្រាវជ្រាវអស់រយៈពេលជាយូរមកនោះ។

ការសិក្សាស្រាវជ្រាវស្តីពីកិច្ចព្រមព្រៀងពាណិជ្ជកម្មសេរីរវាងកម្ពុជា និងសហភាពសេដ្ឋកិច្ចអឺរ៉ុប-អាស៊ី (EAEU) ត្រូវបានធ្វើឡើងរវាងក្រសួងពាណិជ្ជកម្ម និងវិទ្យាស្ថានសិក្សាស្រាវជ្រាវស្តីពីសេដ្ឋកិច្ចអឺរ៉ុប-អាស៊ី (EAEU) ។

ពិធីផ្សព្វផ្សាយលទ្ធផលនៃការសិក្សានេះធ្វើឡើងកាលពីម្សិលមិញក្រោមអធិបតីភាព លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងលោកសាស្រ្តាចារ្យ Hidetoshi Nishimura ប្រធានវិទ្យាស្ថានស្រាវជ្រាវសេដ្ឋកិច្ចសម្រាប់អាស៊ាន និងអាស៊ីបូព៌ា (ERIA)។ ពិធីផ្សព្វផ្សាយនេះ ក៏មានការអញ្ជើញចូលរួមពីមន្ត្រីមកពីបណ្តាក្រសួង-ស្ថាប័នពាក់ព័ន្ធនៃរាជរដ្ឋាភិបាល វិស័យឯកជន ដៃគូអភិវឌ្ឍន៍ អង្គការអន្តរជាតិ និងវិទ្យាស្ថានស្រាវជ្រាវនានាសរុបប្រមាណ ៨០នាក់។

សហភាពសេដ្ឋកិច្ចអឺរ៉ុប-អាស៊ី ជាទីផ្សារមួយដ៏ធំមួយគ្របដណ្ដប់ប៉ែកអឺរ៉ុបខាងកើត ដោយមានសមាជិកចំនួន៥ ប្រទេស គឺអាមេនី បេឡារុស កាហ្សាក់ស្ថាន កៀហ្ស៉ីស៊ីស្ថាន និងរុស្ស៉ី។ សហភាពសេដ្ឋកិច្ចអឺរ៉ុប-អាស៊ី មានប្រជាជនសរុបចំនួន ១៧៦លាននាក់ និងផលិតផលក្នុងស្រុកសរុប ២.៥ ទ្រីលានដុល្លារអាមេរិក នៅឆ្នាំ២០១៦។

លោក ប៉ាន សូរស័ក្តិ បានលើកឡើងថា តាមរយៈការបង្កើតកិច្ចព្រមព្រៀងពាណិជ្ជកម្មសេរីរវាងកម្ពុជា និងសហភាពសេដ្ឋកិច្ចអឺរ៉ុប-អាស៊ី នឹងអាចឱ្យភាគីទាំងពីរបង្កើនកិច្ចសហប្រតិបត្តិការសេដ្ឋកិច្ច-ពាណិជ្ជកម្មលើទំនិញ សេវា និងវិនិយោគ។

លោកបន្តថា កិច្ចព្រមព្រៀងពាណិជ្ជកម្មសេរីរវាងកម្ពុជា និងសហភាពសេដ្ឋកិច្ចអឺរ៉ុប-អាស៊ី មានផលវិជ្ជមានមកលើសេដ្ឋកិច្ចកម្ពុជា និងអនុញ្ញាតឱ្យកម្ពុជាទាញយកផលប្រយោជន៍បន្ថែមតាមរយៈការចូលរួមនៅក្នុងខ្សែចង្វាក់ផលិតកម្មតំបន់ និងពិភពលោក។

ក្នុងរបាយការសិក្សា បានបង្ហាញថា កិច្ចព្រមព្រៀងពាណិជ្ជកម្មសេរីរវាងកម្ពុជា និងសហភាពសេដ្ឋកិច្ចអឺរ៉ុប-អាស៊ី នឹងនាំឱ្យមានការរីកចម្រើនក្នុងវិស័យផលិតកម្ម ពង្រីកសេវាកម្ម និងការអភិវឌ្ឍសេវាកម្មថ្មីៗបន្ថែមទៀត។

ការសិក្សាក៏បង្ហាញថា ការពង្រីកសេវាកម្មហិរញ្ញវត្ថុ ការដឹកជញ្ជូន សេដ្ឋកិច្ចឌីជីថល និងសេវាកម្មកសិកម្ម ជាវិស័យដ៏សំខាន់ដែលចូលរួមជួយឱ្យមានកំណើនសេដ្ឋកិច្ច។កិច្ចព្រមព្រៀងពាណិជ្ជកម្មសេរីកម្ពុជា-សហភាពសេដ្ឋកិច្ចអឺរ៉ុប-អាស៊ី (Cambodia-Eurasian Economic Union FTA-CEFTA) បង្ហាញពីកាលានុវត្តភាពឈ្នះ-ឈ្នះសម្រាប់ប្រទេសកម្ពុជា ក្នុងការធ្វើសមាហរណកម្មសេដ្ឋកិច្ចរបស់ខ្លួនឱ្យកាន់តែស៊ីជម្រៅទៅក្នុងខ្សែសង្វាក់ផលិតកម្មពិភពលោក និងការធ្វើសមាហរណកម្មសេដ្ឋកិច្ចរបស់ខ្លួនជាមួយបណ្តាប្រទេសនៅក្នុងតំបន់អាស៊ីកណ្តាល និងជាមួយប្រទេសរុស្ស៉ី។

តាមរយៈកិច្ចព្រមព្រៀងពាណិជ្ជកម្មសេរីនេះ ត្រូវបានគេរំពឹងថា នឹងបង្កើនឱកាសក្នុងការធ្វើពាណិជ្ជកម្ម និងវិនិយោគទៅវិញទៅមក។ ជាពិសេសកម្ពុជា អាចបង្កើនការនាំចេញសម្លៀកបំពាក់ និងវាយនភ័ណ្ឌ ផលិតផលកសិកម្ម និងទំនិញដទៃទៀត ខណៈដែលសហភាពសេដ្ឋកិច្ចអឺរ៉ុប-អាស៊ី ក៏អាចជ្រៀតចូលទីផ្សារកម្ពុជាកាន់តែទូលំទូលាយជាងមុន ជាពិសេសលើវិស័យថាមពល។

លោក ប៉ាន សូរស័ក្តិ បានលើកឡើងថា អនុលោមតាមយុទ្ធសាស្រ្តចតុកោណដំណាក់កាលទី៤ នីតិកាលទី៦ នៃរាជរដ្ឋាភិបាលកម្ពុជា ដែលផ្តោតលើការបង្កើតកិច្ចព្រមព្រៀងពាណិជ្ជកម្មសេរីទ្វេភាគីជាមួយប្រទេសដៃគូ ក្រសួងពាណិជ្ជកម្មបាន បាននិងកំពុងសិក្សាលើលទ្ធភាពចរចាកិច្ចព្រមព្រៀងជាមួយប្រទេសចិន និងប្រទេសកូរ៉េខាងត្បូងផងដែរ។

លទ្ធផលនៃការសិក្សា បានបង្ហាញពីភាពវិជ្ជមានក្នុងកិច្ចសហប្រតិបត្តិការរួមគ្នាលើកិច្ចព្រមព្រៀងពាណិជ្ជកម្មសេរី នឹងនាំឱ្យទំហំពាណិជ្ជកម្មរបស់កម្ពុជា មានការកើនឡើង បង្កើនការងារសម្រាប់ប្រជាជន ឈានសម្រេចបានតាមផែនការរបស់រាជរដ្ឋាភិបាលក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់ នៅឆ្នាំ២០៥០៕

លោកឧបនាយករដ្ឋមន្ត្រីជា សុផារ៉ា៖ ទុនវិនិយោគក្នុងវិស័យសំណង់នៅក្នុងឆ្នាំនេះ មានចំនួន ៩៣០០លានដល្លារ

ដោយ វុត្ថា

ភ្នំពេញ៖ លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា ទុនវិនិយោគក្នុងវិស័យសំណង់នៅក្នុងឆ្នាំនេះ មានចំនួន ៩៣០០លានដល្លារ កើនឡើង ប្រមាណ ៧៨ ភាគរបើធៀបនឹងឆ្នាំមុន ដោយភាកច្រើនកើនឡើងនៅក្នុងខេត្តព្រះសីហនុ។

លោក ឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ នៅក្នុងពិព័រណ៍ឧស្សាហកម្មសំណង់នៅកម្ពុជា-អន្តរជាតិលើកទី៦ រយៈពេល៣ថ្ងៃគឺចាប់ពីថ្ងៃទី ៥-៧ ខែធ្នូ ឆ្នាំ ២០១៩ នេះ ថាទាំងនេះគឺដោយសារមានការជឿរជាក់លើការអភិវឌ្ឍន៍ រីកចម្រើនសេដ្ឋកិច្ចជាតិ និងស្ថេរភាពនយោបាយរបស់កម្ពុជា ជាពិសេសក្រោមកិច្ច ដឹកនាំរបស់ សម្តេចអគ្គបហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ។

យោងតាមរបាយការណ៍របស់ក្រសួងដែនដី នគរូបនីយកម្ម និងសំណង់ឆ្នាំ ២០១៨ បានឱ្យដឹង ទិន្នន័យសំណង់ទូទាំងប្រទេសក្នុងឆ្នាំ ២០១៨ មានចំនួន ៣,២៩០ គម្រោង មានផ្ទៃក្រឡាចំនួន ១២,៣៧៨,១១៩ ម៉ែត្រការ៉េ ដែលមានតម្លៃប៉ាន់ស្មានទុនវិនិយោគប្រមាណ ៥,៧៥៥,០៧០,១២០ ដុល្លារ ៕

ពិព័រណ៍ឧស្សាហកម្មសំណង់អន្តរជាតិបានចាប់ផ្តើមជាមួយផលិតផលជិត ១០០០ប្រភេទ ក្រោមវត្តមានលោកឧបនាយករដ្ឋមន្ត្រីជា សុផារ៉ា

ដោយ វុត្ថា

ភ្នំពេញៈ ពិព័រណ៍ឧស្សាហកម្មសំណង់នៅកម្ពុជា-អន្តរជាតិលើកទី៦ រយៈពេល៣ថ្ងៃគឺចាប់ពីថ្ងៃទី ៥-៧ ខែធ្នូ ឆ្នាំ ២០១៩ បានចាប់ផ្តើមជាមួយផលិតផលជិត ១០០០ប្រភេទ ក្រោមវត្តមានលោកឧបនាយករដ្ឋមន្រ្តីជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានចាប់ផ្តើមនៅថ្ងៃនេះ នៅមជ្ឈមណ្ឌលពិព័រណ៍កោះពេជ្រ។

អ្នកឧកញ៉ា ពុង ឃាវសែ ប្រធានសមាគមអ្នកសាងសង់កម្ពុជា បានឱ្យដឹងថា ពិព័រណ៍ឧស្សាហកម្មសំណង់នៅកម្ពុជា-អន្តរជាតិ នេះលើកទី៦នៃការរៀបចំពិធីតាំងពិព័រណ៍ឧស្សាហកម្មសំណង់កម្ពុជាមានលក្ខណៈអន្តរជាតិធំជាងគេដែលរៀបចំឱ្យមានស្តង់ឆ្នាំនេះ ៣៥០ ស្តង់ និងផលិតផលជិត ១០០០ ប្រភេទ ដែលផលិតផលាំងនេះមានខ្លះជាផលិតផលក្នុងស្រុក និង មានខ្លះជាផលិតផលដែលបាននាំចូលពីបណ្តាប្រទេសជាច្រើនលើពិភពលោក ហើយឆ្នាំនេះសង្កេតឃើញមានការចូលរួមដាក់តាំងផលិតផលផ្សេងៗ សរុប២០៧ ក្រុមហ៊ុន គឺមានការកើនឡើងជាងឆ្នាំមុន ដែលឆ្នាំមុនមានត្រឹមតែ១៨៦ ក្រុមហ៊ុនប៉ុណ្ណោះ។

អ្នកឧកញ៉ាបន្ថែមថា កម្មវិធីនេះរៀបចំឡើងតីចង់បង្ហាញពីការអភិវឌ្ឍន៍ ការរីកចំរើននិងសក្តានុពលនៃការវិនិយោគលើវិស័យសំណង់នៅលើទីផ្សារកម្ពុជាទាំងមូល។ ជាក់ស្តែងដូចយើងបានឃើញហើយថានៅរាជធានីភ្នំពេញ និងនៅក្រុងព្រះសីហនុ ។

លោកបន្ថែមថា បច្ចុប្បន្នមានសំណង់អគារខ្ពស់ៗ ទំនើបៗធំស្កឹមស្កៃបានរីកដុះដែលគួរឱ្យមានភាពស្ងប់ស្ដែងដូចជាមាន សំណង់អគារមជ្ឈមណ្ឌលពាណិជ្ជកម្ម ការិយាល័យធនាគារ ផ្សារទំនើប សណ្ឋាគារ អគារស្នាក់នៅរួម និង បុរីលំនៅឋានបានសាងសង់ឡើងជាបន្តបន្ទាប់ជាច្រើន ដែលសំណង់ទាំងនេះមានលក្ខណៈទំនើបៗ ទាន់សម័យ ហើយបាន ប្រើប្រាស់បច្ចេកវិទ្យា និងសម្ភារៈបរិក្ខារ ឧបករណ៍ក្នុងការសាងសង់ទាំងអស់សុទ្ធ សឹងមានគុណភាពល្អ និងលក្ខណៈបច្ចេកទេសទំនើបនិងមានស្តង់ដារត្រឹមត្រូវពុំចាញ់បណ្តាប្រទេសកំពុងអភិវឌ្ឍន៍ ដ៏ទៃទៀតនៅលើពិភពលោកឡើយ ហើយសំណង់ទាំងនេះបានប្រែក្លាយទិដ្ឋភាពទីក្រុងយ៉ាងស្រស់បំព្រង។

មិនត្រឹមតែប៉ុណ្ណោះក្នុងកម្មវិធីពិព័រណ៍នេះក៏បានរៀបចំឱកាស និងទីកន្លែង សម្រាប់ផ្តល់ឱ្យធុរកិច្ចជន ទាំងអស់ដែលមានរបរអាជីវកម្មជាអ្នកសាងសង់ អ្នកលក់ ឬម្ចាស់រោងចក្រ អ្នកទិញ អ្នកចែកចាយ អ្នកផ្គត់ផ្គង់ បានជួបគ្នាដោយផ្ទាល់ដើម្បីពិភាក្សាគ្នាថាតើអ្វីដែលជាតម្រូវការជាក់ស្តែង និង ចាំបាច់សម្រាប់វិស័យ ឧស្សាហកម្ម សំណង់នៅកម្ពុជាជាពិសេសនៅក្នុងកម្មវិធីពិព័រណ៍នេះក៏បង្កើតឱ្យមានកម្មវិធីជួបជុំសំណេះសំណាល ពិភាក្សាធុរកិច្ចសម្រាប់ឱ្យសមាជិកសមាគម និង ក្រុមហ៊ុនដែលមានធុរកិច្ចលើវិស័យសំណង់ ៥ទៃទៀតដែលកំពុងប្រតិបត្តិការធុរកិច្ចនៅកម្ពុជាជាច្រើនមកពិភាក្សាគ្នានូវអ្វីដែលមាន និងតម្រូវការជាក់ស្តែងស្របតាមការរីកចំរើន និងអភិវឌ្ឍន៍ប្រទេសជាតិ៕

លោក Donald Trump ដំឡើងកូនប្រសាររបស់ខ្លួនដើម្បីជួយដល់ការចរចាពាណិជ្ជកម្មរវាងអាមេរិក និងចិន

ដោយ Donald Lee

ភ្នំពេញៈ ប្រធានាធិបតីអាមេរិក លោក Donald Trump បានដំឡើងកូនប្រសាររបស់លោក ដើម្បីជួយក្នុងការចរចាពាណិជ្ជកម្មរវាងអាមេរិក និងចិន ដែលកំពុងដួលរលំ ខណៈសង្គ្រាមពាណិជ្ជកម្ម កាន់តែកើនឡើងកំដៅខ្លាំងរវាងភាគីទាំងពីរ។

លោក Jared Kushner បានចូលរួមជាមួយក្រុមចរចា ដែលដឹកនាំដោយអ្នកតំណាងពាណិជ្ជកម្មអាមេរិក លោកRobert Lighthizer និងរដ្ឋលេខាធិការក្រសួងរតនាគារលោក Steven Mnuchin ដើម្បីជួបផ្ទាល់ជាមួយនឹងថ្នាក់ដឹកនាំក្រុមចិន ដែលដឹកនាំដោយឧបនាយករដ្ឋមន្រ្តីចិនលោក Liu He។ នេះបើយោងតាមសារព័ត៌មាន Reuters។

លោក Trump កំពុងប្រើលោក Kushner ធ្វើជាតួអង្គមួយផ្សេងទៀត ដើម្បីចរចាជាមួយទីក្រុងប៉េកាំងដោយផ្ទាល់ នៅពេលដែលភាគីទាំងពីរ ប្រញាប់ប្រញាល់ឈានដល់កិច្ចព្រមព្រៀងពាណិជ្ជកម្ម មុនពេលពន្ធគយថ្មីចូលប៉ះពាល់ដល់ទំនិញចិន នៅថ្ងៃទី១៥ ខែ ធ្នូ។

លោក Kushner គឺជាប្តីរបស់កូនស្រីរបស់ Trump លោកស្រី Ivanka Trump និងធ្លាប់បានណែនាំលើបញ្ហាមួយចំនួន រួមមានការអភិវឌ្ឍផែនការសន្តិភាពមជ្ឈឹមបូព៌ា។

ទីផ្សារនៅជុំវិញពិភពលោកបានធ្លាក់ចុះ បន្ទាប់ពីលោក Trump បានបញ្ជាក់ថា កិច្ចព្រមព្រៀងពាណិជ្ជកម្មជាមួយចិននឹងកើតមាន បន្ទាប់ពីការបោះឆ្នោតប្រធានាធិបតីអាមេរិកនៅឆ្នាំ២០២០។

លោក Trump បាននិយាយទៅកាន់អ្នកសារព័ត៌មានថា “តាមវិធីខ្លះ ខ្ញុំចូលចិត្តគំនិតនៃការរង់ចាំ រហូតដល់ក្រោយការបោះឆ្នោត សម្រាប់កិច្ចព្រមព្រៀងជាមួយចិន ប៉ុន្តែពួកគេចង់ធ្វើកិច្ចព្រមព្រៀងឥឡូវនេះ ហើយយើងនឹងដឹងថា តើកិច្ចព្រមព្រៀងនេះនឹងត្រូវធ្វើឡើងឬអត់”។

សង្គ្រាមពាណិជ្ជកម្មអស់រយៈពេលជាង១៦ខែ បានបង្អាក់ដល់សេដ្ឋកិច្ចពិភពលោក។ អង្គការសហប្រតិបត្តិការ និងអភិវឌ្ឍន៍សេដ្ឋកិច្ច (OECD)បានបញ្ជាក់ថា ផលប៉ះពាល់នៃសង្រ្គាមពាណិជ្ជកម្មអាមេរិក និងចិន បានបណ្តាលឱ្យកំណើនសេដ្ឋកិច្ចពិភពលោកធ្លាក់ចុះដូចកម្រិតវិបត្តិហិរញ្ញវត្ថុដ៏ធំកាលពី១០ឆ្នាំមុន៕

ក្រុមហ៊ុនអចលនទ្រព្យ KW Cambodia ចូលរួមលើកទឹកចិត្តដល់កីឡាបាល់ទាត់ខ្មែរ

ដោយៈ រ៉ាណេត

ភ្នំពេញៈ នៅក្នុងគោលបំណងបង្ហាញពីទឹកចិត្តស្រឡាញ់ និងការគាំទ្រវិស័យកីឡាបាល់ទាត់កម្ពុជា នៃការប្រកួតនៅក្នុងព្រឹត្តិការណ៍កីឡា SEA Games 2019 នៅប្រទេសហ្វីលីពីន ដែលកម្ពុជាកំពុងតែទទួលបាន នូវលទ្ធផលល្អប្រសើរជាបន្តបន្ទាប់ ក្រុមហ៊ុនអចលនទ្រព្យអន្តរជាតិ KW Cambodia បានចូលរួមអបអរសាទរ ជាមួយនឹងការផ្តល់នូវរង្វាន់ជាទឹកប្រាក់លើកទឹកចិត្តយ៉ាងសន្ធឹកសន្ធាប់ ទៅដល់ក្រុមជម្រើសជាតិកម្ពុជាដែលអាចទទួលបានជ័យជំនះ។

លោកឧកញ៉ាបណ្ឌិតគីម ហ៊ាង អគ្គនាយកក្រុមហ៊ុនខ្មែរ រៀលអេស្ទេត និង KW Cambodia បានមានប្រសាសន៍ឲ្យដឹងកាលពីល្ងាចថ្ងៃទី៤ ធ្នូកន្លងមកថា ក្នុងគោលដៅ និងទឹកចិត្តជាអ្នកស្នេហាវិស័យបាល់ទាត់ លោកសូមកោតសរសើរដល់ក្រុមកីឡាករខ្មែរ ដែលលេងបានល្អ នៅក្នុងកីឡាស៊ីហ្គេម។

លោកបន្តថា សម្រាប់ក្រុមបាល់ទាត់ជម្រើសជាតិកម្ពុជា U22 បានឡើងវគ្គពាក់កណ្តាលផ្តាច់ព្រាត់ ក្រុមហ៊ុនអចលនទ្រព្យអន្តរជាតិ KW Cambodia នឹងផ្តល់រង្វាន់ដល់ U22 កម្ពុជាដូចខាងក្រោមៈ

១. នឹងផ្តល់ប្រាក់រង្វាន់ ១២ ០០០ ០០០រៀល សម្រាប់វគ្គនេះ!

២. នឹងផ្តល់ប្រាក់រង្វាន់ ១៦ ០០០ ០០០រៀល បើបានលេខ ៣!

៣. នឹងផ្តល់ប្រាក់រង្វាន់ ២០ ០០០ ០០០រៀល បើបានលេខ ២!

៤. នឹងផ្តល់ប្រាក់រង្វាន់ ៤០ ០០០ ០០០រៀល បើបានលេខ ១!

៥. KW Cambodia ពិតជាមានមោទនៈភាព ចំពោះការឧបត្ថម្ភនេះ បើទោះជាមិនច្រើន តែយើងចង់បង្ហាញពីការគាំទ្ររបស់យើង ចំពោះវិស័យបាល់ទាត់នៅកម្ពុជា និងទៅអនាគត!។

ក្រុមកីឡាបាល់ទាត់ជម្រើសជាតិអាយុក្រោម ២២ឆ្នាំកម្ពុជា បានយកឈ្នះម៉ាឡេស៊ី ៣-១ នាការប្រកួតចុងក្រោយនៅក្នុងពូល A នៃព្រឹត្តិការណ៍កីឡាស៊ីហ្គេម ខណៈហ្វីលីពីនឈ្នះទីម័រខាងកើត ៦-១។ លទ្ធផលនេះ នាំឲ្យកម្ពុជាឡើងទៅវគ្គពាក់កណ្តាលផ្តាច់ព្រ័ត្រជាប្រវត្តិសាស្ត្រជាមួយក្រុមកំពូលតារាង មីយ៉ាន់ម៉ា៕