ចំណេះដឹង! តើការនាំចូលផលិតផលពីក្រៅប្រទេសមកកាន់កម្ពុជាមាននីតិវិធីដូចម្ដេចខ្លះ ?

ដោយ ៖ វុត្ថា

ភ្នំពេញ៖ ទំនិញនាំចូលទាំងអស់ត្រូវបានរាយការណ៍នៅការិយាល័យគយ ឬ ទីកន្លែងផ្សេងទៀតទៅតាមការកំណត់ របស់នាយកទីចាត់ការគយនិងរដ្ឋាករ។

រដ្ឋមន្រ្តីក្រសួងសេដ្ឋកិច្ចនិងហិរញ្ញវត្ថុត្រូវចេញប្រកាសកំណត់ ពេលវេលា របៀបរបបតម្រូវការឯកសារ កាលៈទេសៈ និងការលើកលែងនានាពាក់ព័ន្ធនឹងការរាយការណ៍ ពីទំនិញនាំចូល (មាត្រា ១០)។

យោងតាមអគ្គនាយកដ្ឋានគយ និងរដ្ឋករកម្ពុជា បានឱ្យដឹងថា គ្មានជនណាម្នាក់អាចរើទំនិញចេញពីមធ្យោបាយដឹកជញ្ជូនពេលមកដល់កម្ពុជាបានទេ មុនពេលដែល ទំនិញទាំងនេះត្រូវបានរាយការណ៍ដល់គយស្របតាមច្បាប់នេះ លើកលែងតែក្នុងករណីដែលសុវត្ថិភាព មធ្យោបាយដឹកជញ្ជូនទំនិញ ជននានាលើមធ្យោបាយដឹកជញ្ជូន ឬ តតិយជនផ្សេងទៀតត្រូវបានគំរាម កំហែងក្នុងល័ក្ខខ័ណ្ឌមានអាសន្ន ដូចចែងក្នុងប្រកាសរបស់រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ (មាត្រា ១២)។

រដ្ឋបាលគយអាចអនុញ្ញាតឲ្យទំនិញដូចមានចែងក្នុងមាត្រា ១០ នៃច្បាប់នេះយកចេញពីកន្លែងបំពេញ បែបបទបញ្ចេញទំនិញពីគយមុនពេលបង់ពន្ធ អាករ និងកម្រៃនានាបន្ទាប់ពីបានបំពេញទម្រង់ការគយរួច និងនៅក្រោមការត្រួតពិនិត្យគយក្នុងគោលបំណង៖ ធ្វើសន្និធិគយបណ្តោះអាសន្ន ធ្វើសន្និធិគយមានដែនកំណត់ ដឹកជញ្ជូនបន្តក្នុងរង្វង់ ឬតាមដែនគយ ឆ្ពោះទៅគម្យដ្ឋានតាមតម្រាយផ្លូវស្របច្បាប់ និងក្នុងរយៈពេលកំណត់ដោយគយរួមមាន ការឆ្លងកាត់ ការផ្ទេរមធ្យោបាយដឹកជញ្ជូន ឬ ការដឹកជញ្ជូនឆ្ពោះទៅកាន់ មកពី ឬ រវាងការិយាល័យ និងភណ្ឌាគារគយនានា (មាត្រា ១៣)។

ទំនិញនាំចូលទាំងឡាយ អាចទទួលបានការអនុញ្ញាតដោយរដ្ឋបាលគយឲ្យយកចេញតាមរបប ប្រវេសន៍កាលិក ប្រសិនបើក្នុងពេលនាំចូលអាចត្រូវបានបង្ហាញថាទំនិញទាំងនោះនឹងត្រូវនាំចេញទៅវិញ។ ទំនិញនាំចូលបណ្តោះអាសន្ន ត្រូវស្ថិតនៅក្រោមការត្រួតពិនិត្យគយ រហូតដល់ពេលដែលល័ក្ខខ័ណ្ឌផ្សេងៗ តាមរបបប្រវេសន៍កាលិកត្រូវបានបំពេញរួច (មាត្រា ១៥)៕

ផ្លូវជាតិសំខាន់ចំនួន ២ខ្សែ នឹងចាប់ផ្តើមស្ថាបនាឡើងវិញនៅចុងឆ្នាំនេះ

ដោយ វុត្ថា

ភ្នំពេញ៖ រដ្ឋាភិបាលតាមរយៈក្រសួងសាធាណៈការ និងដឹកជញ្ជូន នឹងចាប់ផ្តើមអនុវត្តគម្រោងធ្វើឱ្យប្រសើរឡើងនូវផ្លូវជាតិសំខាន់ៗចំនួន ២ ខ្សែក្នុងទំហំទឹកប្រាក់រាប់រយលានដុល្លារអាមេរិក នៅចុងឆ្នាំ ២០១៩នេះ ខណៈគម្រោងទាំងពីរត្រូវបានអនុម័ត។

១) គម្រោងធ្វើឱ្យប្រសើរឡើងនូវផ្លូវជាតិលេខ២

គម្រោងផ្លូវជាតិលេខ២ និងលេខ២២ គ្រោងនឹងបើកការដ្ឋានធ្វើឡើងក្នុងអំឡុងខែវិច្ឆិកា ឬខែធ្នូខាងមុខនេះ ដោយបានត្រៀមទឹកប្រាក់ចំនួនទឹកប្រាក់សរុប ៥៦លាន ១០ម៉ឺនដុល្លារ បន្ទាប់ពីក្រសួងសាធារណការ និងដឹកជញ្ជូន និងធនាគារនីហរ័ណអាហរ័ណកូរ៉េ (Export-Import Bank of Korea) នៃមូលនិធិសហប្រតិបត្តិការអភិវឌ្ឍន៍សេដ្ឋកិច្ច (EDCF) បានចុះកិច្ចសន្យាជាមួយគ្នាកាលពីន្លងមកនេះ។

ការបើកការដ្ឋានសាងសង់ផ្លូវជាតិលេខ២ និងលេខ២២នេះ នឹងធ្វើឡើងក្នុងអំឡុងខែវិច្ឆិកា ឬខែធ្នូខាងមុខនេះ ដោយបានត្រៀមទឹកប្រាក់ចំនួនទឹកប្រាក់សរុប ៥៦លាន ១០ម៉ឺនដុល្លារ។ក្នុងនោះថវិកាគ្រោងសម្រាប់ការសាងសង់ (Civil Works) មានចំនួន ៤៣លាន៦សែន១ពាន់ដុល្លារ និងថវិកាបម្រុង (Cortingencies) មានចំនួន ៨លាន ៩ម៉ឺន១ពាន់ដុល្លារ។

គម្រោងនេះ ឆ្លងកាត់រាជធានី-ខេត្តចំនួន៣រួមមាន រាជធានីភ្នំពេញ ខេត្តកណ្តាល និងខេត្តតាកែវ មានប្រវែងផ្លូវជាង ៧២គីឡូម៉ែត្រ «គម្រោងផ្លូវជាតិលេខ២ ចាប់ផ្តើមពីរង្វង់មូលតាខ្មៅ (ស្ថិតក្នុងក្រុងតាខ្មៅ ខេត្តកណ្តាល) ដល់រង្វង់មូលអូរចំបក់ (ស្ថិតក្នុងក្រុងដូនកែវ ខេត្តតាកែវ) និងផ្លូវជាតិលេខ២២ ពីរង្វង់មូលអូរចំបក់ ដល់ផ្លូវជាតិលេខ៣ ត្រង់ផ្សារអង្គតាសោម»។

គម្រោងនេះ ត្រូវបានបែងចែកជា ៣កំណាត់ផ្លូវធំៗមានដូចជា កំណាត់ទី១ ចាប់ផ្តើមចេញពីរង្វង់មូលតាខ្មៅ ដល់រង្វង់មូលស្ត្រីបីកួរស្រូវ ដែលមានប្រវែង ៨,៧៤គីឡូម៉ែត្រ កំណាត់ទី២ ចាប់ផ្តើមចេញពីរង្វង់មូលស្ត្រីបីកួរស្រូវ ដល់រង្វង់មូលអូរចំបក់ ដែលមានប្រវែង ៥៣,៨១៩គីឡូម៉ែត្រ ស្ថិតក្នុងតំបន់ជនបទ និងកំណាត់ទី៣ ចាប់ផ្តើមពីរង្វង់មូលអូរចំបក់ ដល់ផ្សារអង្គតាសោម (ផ្លូវជាតិលេខ២២) ដែលមានប្រវែង ៩,៦១១ គ.ម ស្ថិតក្នុងតំបន់ជនបទ។

២) គម្រោងធ្វើឱ្យប្រសើរឡើងផ្លូវជាតិលេខ១០

ផ្លូវជាតិលេខ១០ប្រវែង ១៩៣គីឡូម៉ែត្រ នឹងត្រូវបើកការដ្ឋានសាងសង់ នៅចុងឆ្នាំនេះ។ ពិធីបើកការដ្ឋានស្ថាបនាផ្លូវជាតិលេខ១០នេះ នឹងត្រូវធ្វើឡើងរួមគ្នានឹងពិធីសម្ពោធឲ្យប្រើប្រាស់ផ្លូវជាតិលេខ៥៥ ក្រោមអធិបតីសម្ដេចនាយករដ្ឋមន្ត្រី ហ៊ុន សែន ។ ផ្លូវជាតិលេខ១០ មានប្រវែង១៩៣ គីឡូម៉ែត្រ ដែលតភ្ជាប់ចេញពីស្រុកសំឡូតនៃខេត្តបាត់ដំបង ទៅខេត្តកោះកុង ដោយឆ្លងកាត់ស្រុកវាលវែង ខេត្តពោធិ៍សាត់ ។ បើតាមលោក ស៊ុន ចាន់ថុល គម្រោងផ្លូវមួយខ្សែនេះ នេះ មានសក្ដានុពលសម្រាប់ការដឹកជញ្ជូន ហើយទទួលបានប្រាក់កម្ចីពីរដ្ឋាភិបាលចិនប្រមាណ ១៨៣ លានដុល្លារអាមេរិកសម្រាប់ការសាងសង់៕

ចរាចរណ៍ទំនិញរវាងកម្ពុជា និងថៃនៅព្រំដែនស្រះកែវមានទឹកប្រាក់ជិត ៣១១ពាន់លានបាត

ដោយ ប៊ី

ភ្នំពេញ៖ ចរាចរណ៍ទំនិញរវាងថៃ និងកម្ពុជានៅព្រំដែនស្រះកែវក្នុងឆ្នាំ ២០១៩ បានឈានដល់ទឹកប្រាក់ជាងចំនួន ៣១០,៥ ពាន់លានបាតកើនឡើងប្រមាណ ២០ ពាន់លានបាតពីឆ្នាំមុននៅ នៅស្រះកែវ។ នេះបើយោងតាមលោក On Unthaweesup មន្រ្តីគយអារញ្ញប្រាថេតបានប្រាប់អ្នកយកព័ត៌មាននៅថ្ងៃកាលពីពេលថ្មីៗនេះ។

លោកបានមានប្រសាសន៍ថា “ការនាំចេញរបស់ថៃមកកម្ពុជាមានចំនួន ៨៧,៥៣ ពាន់លានបាត (១បាត ស្មើនឹង ០.០៣៣ ដុល្លារ) ខណៈដែលការនាំចូលមានចំនួន ១៦,០២ ពាន់លានបាត”។ ផលិតផលកំពូលទាំង ៥ ដែលនាំចេញទៅកាន់ទីផ្សារកម្ពុជាគឺភេសជ្ជៈដែលមិនមានជាតិកាបូណាត ឡាន ម៉ូតូ គ្រឿងបន្លាស់ម៉ូតូ និងម៉ាស៊ីន។

ផលិតផលកំពូលៗទាំង ៥ ដែលនាំចូលពីកម្ពុជាគឺដំឡូងមី គ្រឿងបន្លាស់ម៉ូតូ ផលិតពីអាលុយមីញ៉ូម អេតចាយអាលុយមីញ៉ូម បំណែកស្ពាន់ និងអាហារឆ្កែ។

លោក On បានថ្លែងថា “កត្តាទាំងបីសម្រាប់ការកើនឡើងតម្លៃទំនិញឆ្លងកាត់ព្រំដែននេះគឺការកើនឡើងនៃអំណាចទិញរបស់ពលរដ្ឋកម្ពុជា ការប្រើប្រាស់ព្រំដែនសម្រាប់ទំនិញចុងក្រោយសម្រាប់ប្រទេសវៀតណាម និងភាពងាយស្រួលនៃការដឹកជញ្ជូនឆ្លងកាត់ព្រំដែនចាប់តាំងពីការពង្រីកច្រកទ្វារព្រំដែនលោកបានកៅឌីន” ។

លោក បានបន្ថែមថា តម្លៃទីផ្សារនឹងមានការកើនឡើងបន្ថែមទៀតបន្ទាប់ពីការបើកច្រកទ្វារព្រំដែន Ban Nong Ian។ ច្រកព្រំដែន Ban Nong Ian នៅខាងថៃត្រៀមបើក ប៉ុន្តែយើងត្រូវរង់ចាំការស្ថាបនាផ្លូវតភ្ជាប់ និងស្ពាននៅខាងកម្ពុជាដើម្បីបញ្ចប់ការប្រើប៉ុស្តិ៍ត្រួតពិនិត្យពេញលេញ”៕

សម្តេចតេជោពន្យល់ពីមូលហេតុនៃការបិទកាស៊ីណូអនឡាញនៅកម្ពុជា

ដោយ ប៊ី

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងទៅកាន់អ្នកវិនិយោគចិននៅថ្ងៃនេះថា ការបិទកាស៊ីណូអនឡាញ ដោយសារតែការស៊ីណូអនឡាញនេះទទួលបានពន្ធតិចតួច ហើយនាំមកនូវបញ្ហាប្រឈមជាច្រើនដូចជាឧក្រិដ្ឋកម្ម និងការលាងលុយកខ្វក់ជាដើម។

ប្រសាសន៍ទាក់ទងនឹងមូលហេតុនាំឱ្យបិទកាស៊ីណូអនឡាញនេះ បានធ្វើឡើងក្នុងពេលសម្តេចតេជោ ហ៊ុន សែន អនុញ្ញាតឱ្យអ្នកវិនិយោគចិនមានត្រកូល «ហ៊ុន» ប្រមាណ ៤០នាក់ ចូលជួបសម្តែងការគួរសម និងសំណេះសំណាលការងារនៅព្រឹកថ្ងៃទី០៨ ខែតុលា ឆ្នាំ២០១៩នេះ នៅវិមានសន្តិភាព។

សម្តេចតេជោ ហ៊ុន សែន បានប្រាប់អ្នកវិនិយោគចិនទាំងនោះថា ប្រទេសកម្ពុជាដ្បិតប្រកាន់យកនូវរបបទីផ្សារសេរី តែសេដ្ឋកិច្ចកម្ពុជាមិនពឹងផ្អែកលើល្បែងនោះឡើយ។ មួយវិញទៀតកម្ពុជាជំរុញធ្វើយ៉ាងណាឱ្យមានការអ្នកវិនិយោគធំៗ និងវិស័យផ្សេងៗជំនួសវិញ។

រាជរដ្ឋាភិបាលកម្ពុជាកាលពីថ្ងៃទី១៨ ខែសីហា ឆ្នាំ២០១៩កន្លងទៅ បានចេញសារាចរណ៍បិទអាជីវកម្មល្បែងភ្នាល់តាមម៉ាស៊ីនអេឡិចត្រូនិច តាមរយៈអ៉ិនអើណេតអនឡាញក្នុង និងក្រៅប្រទេសគ្រប់ប្រភេទ និងគ្រប់រូបភាព។

ក្នុងសារាចរណ៍បានបង្ហាញការបិទនេះ បន្ទាប់ពីបានពិនិត្យឃើញថា មានឧក្រិដ្ឋជនបរទេសមួយចំនួន បានជ្រកក្រោមរូបភាពល្បែងភ្នាល់ប្រភេទនេះ ធ្វើសកម្មភាពបោកប្រាស់ជំរិតទារប្រាក់ពីជនរងគ្រោះទាំងក្នុង និងក្រៅប្រទេស ធ្វើឱ្យប៉ះពាល់ដល់សន្តិសុខ សណ្តាប់ធ្នាប់សាធារណៈ និងរបៀបរៀបរយក្នុងសង្គម។

ក្រសួងការបរទេសចិនលោក Geng Shuang បានលើកឡើងនូវសំណួរមួយចំនួនទាក់ទងនឹងសេចក្តីប្រកាសរបស់កម្ពុជានាពេលថ្មីៗនេះដែលថា ខ្លួននឹងបញ្ឈប់កម្មវិធីផ្តល់អាជ្ញាប័ណ្ណល្បែងស៊ីសងតាមអ៊ិនធើណេត ក៏ដូចជាហ្វីលីពីនប្រកាសផ្អាកក្នុងការចេញអាជ្ញាប័ណ្ណលេងល្បែងអនឡាញថ្មី។

លោក Geng បាននិយាយថា ចិនសូមកោតសរសើរយ៉ាងខ្លាំងចំពោះការសម្រេចចិត្តរបស់កម្ពុជាក្នុងការហាមឃាត់ការលេងល្បែងតាមអ៊ិនធើណេតដោយផ្អែកលើជំនឿរបស់ក្រសួងថា វានឹងជួយការពារផលប្រយោជន៍របស់កម្ពុជា និងចិនព្រមទាំងពង្រឹងកិច្ចសហប្រតិបត្តិការ ពង្រឹងច្បាប់ និងទំនាក់ទំនងមិត្តភាពរបស់ប្រទេសទាំងពីរ៕

សេដ្ឋកិច្ចឌីជីថលឥណ្ឌូនេស៊ី និងវៀតណាមហក់ឡើងខ្លាំង

ដោយ Donald Lee

ភ្នំពេញ៖ សេដ្ឋកិច្ចអ៊ីនធឺណេតឥណ្ឌូនេស៊ីនឹងកើនឡើងដល់ ១៣០ពាន់លានដុល្លារនៅឆ្នាំ ២០២៥។ នេះបើយោងតាមរបាយការណ៍ថ្មីៗនេះចេញផ្សាយដោយ Google LLC ។

សេដ្ឋកិច្ចអ៊ីនធឺណេតរបស់ឥណ្ឌូនេស៊ីបានកើនឡើង ៤ ដង បើប្រៀបធៀបទៅនឹងឆ្នាំ ២០១៥ ដែលស្មើនឹង ៤០ ពាន់លានដុល្លារនៅឆ្នាំ ២០១៩។ នេះបើយោងតាមរបាយការណ៍របស់ Google ដែលមានឈ្មោះថា“ e-Conomy SEA 2019។

របាយការណ៍នេះបានឱ្យដឹងថា “ក្នុងនាមជាសេដ្ឋកិច្ចអ៊ីនធឺណេតដែលរីកលូតលាស់ និងរីកលូតលាស់លឿនបំផុតនៅក្នុងតំបន់ ឥណ្ឌូនេស៊ីកំពុងដើរលើផ្លូវដែលអាចទទួលបានទឹកប្រាក់ ១៣០ ពាន់លានដុល្លារនៅឆ្នាំ ២០២៥”។ ក្រុមហ៊ុនឥណ្ឌូណេស៊ីកំពុងនាំមុខគេជាថ្មីម្តងទៀតនៅឆ្នាំនេះ ហើយគ្រោងនឹងទទួលបានទឹកប្រាក់វិនិយោគ ៤ ពាន់លានដុល្លារក្នុងឆ្នាំ ២០១៨ ។

នេះបើតាមរបាយការណ៍របស់ក្រុមហ៊ុនឥណ្ឌូនេស៊ី Bukalapak ក្រុមហ៊ុន Gojek ក្រុមហ៊ុន Tokopedia និងក្រុមហ៊ុន Traveloka ដែលបានបង្កើនដើមទុនយ៉ាងច្រើននៅឆ្នាំនេះ។ ក្រុមហ៊ុនក Grab ក៏កំពុងរៀបចំផែនការវិនិយោគដ៏ធំមួយចូលនៅប្រទេសប្រជុំកោះនេះផងដែរ។

របាយការណ៍បានឱ្យដឹងថា “ក្រុមហ៊ុន Grab ដែលមានមូលដ្ឋាននៅប្រទេសសឹង្ហបូរីក៏បានប្រកាសពីការប្តេជ្ញាចិត្តជាច្រើនពាន់លានដុល្លារក្នុងការវិនិយោគនៅក្នុងប្រទេសនេះក្នុងរយៈពេលប៉ុន្មានឆ្នាំខាងមុខ”។ តាមរបាយការណ៍បានឱ្យដឹងថា សេដ្ឋកិច្ចអ៊ីនធឺណេតធំជាងគេទី ២ ក្នុងតំបន់នៅឆ្នាំនេះគឺប្រទេសវៀតណាមឈានដល់ ១២ ពាន់លានដុល្លារក្នុងឆ្នាំ ២០១៩ ដែលមានអត្រាកំណើនប្រចាំឆ្នាំជិត ៤០ ភាគរយ។

ការទូទាត់ឌីជីថលទទួលលបានការរីកចម្រើនរបាយការណ៍របស់ Google បានព្យាករណ៍ថា ការទូទាត់តាមឌីជីថលនឹងក្លាយជាបទដ្ឋានក្នុងរយៈពេលតែប៉ុន្មានឆ្នាំប៉ុណ្ណោះ ហើយចំណាយពេល ៥០ ភាគរយ (ធៀបនឹងប្រតិបត្តការហិរញ្ញវត្ថុប្រពៃណី) ដើម្បីធ្វើប្រតិបត្តិការហិរញ្ញវត្ថុ។

ការទទួលយកការទូទាត់ឌីជីថលទីបំផុតឈានដល់ចំណុចរបត់មួយ ហើយត្រូវបានរំពឹងថានឹងចំណាយដល់ ១ សែនកោដិដុល្លារនៅឆ្នាំ ២០២៥៕

ច្បាប់ស្តីពីពាណិជ្ជកម្មតាមប្រព័ន្ធអនឡាញ នឹងរួមចំណែកយ៉ាងសកម្មក្នុងការអភិវឌ្ឍសេដ្ឋកិច្ចឌីជីថលនៅកម្ពុជា

ដោយ វុត្ថា

ភ្នំពេញ៖ រដ្ឋមន្ត្រីក្រសួងពាណិជ្ជកម្ម បានឱ្យដឹងថា ច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិក នឹងរួមចំណែកយ៉ាងសកម្មក្នុងការអភិវឌ្ឍសេដ្ឋកិច្ចឌីជីថលនៅកម្ពុជា នៅកម្ពុជា ដោយហេតុថា ក្របខណ្ឌច្បាប់ និងបទដ្ឋានគតិយុត្តិ ដើម្បីអាចបង្កើតសេដ្ឋកិច្ចឌីជីថលរឹងមុំាមួយព្រមទាំងត្រៀមទទួលយកនូវការឈានមកដល់នៃបដិវត្តន៍ឧស្សាហកម្មទី ៤។

លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានមានប្រសាសន៍បែននៅក្នុងសម័យ ប្រជុំរដ្ឋសភាលើកទី៣ នីតិកាលទី៦ នៅព្រឹកថ្ងៃទី៨ ខែតុលា ឆ្នាំ២០១៩ ខណៈ លោករដ្ឋមន្ត្រីរូបនេះដឹកនាំគណៈប្រតិភូក្រសួងពាណិជ្ជកម្មឡើងការពារសេចក្តីព្រាងច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិកនៅរដ្ឋសភា។

លោកបន្តថា ជាងនេះ ទៅទៀត សេចក្តីព្រាងច្បាប់នេះ នឹងផ្តល់លទ្ធភាពឱ្យសហគ្រាសធនតូច និងធម្យម (SMEs) នៅកម្ពុជា អាចតភា្ជប់ខ្លួននៅនឹងខ្សែ សង្វាក់ផលិតកម្ម និងទីផ្សារក្នុងស្រុក និងអន្តរជាតិ ក៏ដូចជាជំរុញឱ្យមានការកែឆ្នៃប្រឌិត និងការបង្កើតទំនិញ និងសេវាកម្មថ្មីៗបន្ថែមទៀតផងដែរ។

លោកបន្ថែមថា ច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិក នឹងផ្តល់វិធានជាមូលដ្ឋានដ៏សំខាន់ក្នុងការជំរុញពាណិជ្ជកម្មតាមប្រព័ន្ធអេឡិចត្រូនិក ក្នុង និងក្រៅប្រទេសប្រកដោយទំនុកចិត្ត តាមរយៈការទទួលស្គាល់សុពលភាព អានុភាព ភាពអាចអនុវត្តបាន និងភាពអាចទទួលយកបាននៃទំនាក់ទំនងអេឡិចត្រូនិក។

កំណត់ត្រាអេឡិចត្រូនិក និងហត្ថលេខាអេឡិចត្រូវនិក ដែលកំណត់ដោយបច្ចេកវិទ្យា និងគ្រប់គ្រងដោយស្ថាប័នរដ្ឋ។រដ្ឋសភា បានចាត់ទុកសេចក្តីព្រាងច្បាប់នេះ គឺជាច្បាប់ដ៏សំខាន់ៗ ដែលនឹង ក្លាយជាបទដ្ឋានគតិយុត្តក្នុងការលើកកម្ពស់ វិស័យពាណិជ្ជកម្ម សម្រាប់គំាទ្រដល់កំណើនសេដ្ឋកិច្ច ការរីកចម្រើនវិស័យបច្ចេកវិទ្យា និង ការលើកកម្ពស់ជីវភាពរស់នៅរបស់ប្រជាពលរដ្ឋ ឱ្យកាន់តែរីកចម្រើនឡើង ស្រប តាមសម័យកាល។

ច្បាប់នេះ នឹងផ្តល់វិធានជាមូលដ្ឋាន ដ៏សំខាន់ក្នុងការជំរុញពាណិជ្ជកម្មតាមប្រព័ន្ធអេឡិចត្រូនិកក្នុងក្រៅប្រទេស ប្រកបដោយទំនុកចិត្ត ហើយនឹងចូលរួមចំណែកយ៉ាងសកម្ម ក្នុងការអភិវឌ្ឍ សេដ្ឋកិច្ចឌីជីថលនៅកម្ពុជា។ ច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិកដែលមានចំនួន ១២ ជំពូក និង ៦៧ មាត្រានេះ ត្រូវបានរដ្ឋសភា អនុម័តនៅថ្ងៃនេះ និងត្រូវបានគណៈរដ្ឋមន្ត្រីសម្រេចយល់ព្រមក្នុងសម័យប្រជុំពេញអង្គគណៈរដ្ឋមន្ត្រីកាលពីថ្ងៃទី ១២ខែកក្កដា ឆ្នាំ ២០១៩ កន្លងមកនេះ៕

លោកស្រីនុត រត្ថា អនុប្រធាន CREA អំពាវនាវឲ្យម្ចាស់អាគារនៅក្រុងព្រះសីហនុប្រែក្លាយអាគាររបស់ខ្លួនជាសណ្ឋាគារ

ដោយគង់ សូរិយា

ភ្នំពេញៈ លោកស្រីនុត រត្ថា អនុប្រធានសមាគមអ្នកជំនាញអចលនទ្រព្យកម្ពុជា (CREA) បានអំពាវនាវឲ្យម្ចាស់អាគារនានានៅក្រុងព្រះសីហនុ ដែលសាងសង់សំរាប់ជួល គួរប្រែក្លាយអាគាររបស់ខ្លួនជាសណ្ឋាគារ ដើម្បីទទួលបដិសណ្ឋារកិច្ចដល់ភ្ញៀវទេស ចរណ៍ជាតិ អន្តរជាតិ។

លោកស្រីបានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី៨ តុលានេះថា ស្របពេល Online Game បានបញ្ចប់នៅកម្ពុជា ម្ចាស់អាគារមួយចំនួនដែលសាងសង់សំរាប់ជួល ហើយមិនអាចជួលបាន គួរតែប្រែក្លាយជាអាគារទាំងនោះជាផ្ទះសំណាក់ និងសណ្ឋាគារ ដើម្បីទាក់ទាញភ្ញៀវទេសចរណ៍ជាតិ អន្តរជាតិទៅទស្សនានៅក្រុងព្រះសីហនុឲ្យបានកាន់តែច្រើន។លោកស្រីបន្តថា កន្លងមកបញ្ហាធ្លាក់ចុះភ្ញៀវទេសចរណ៍នៅខេត្តព្រះសីហនុ មួយផ្នែកក៏ដោយសារការកើនឡើងខ្ពស់ នៃតម្លៃបន្ទប់ផ្ទះសំណាក់ និងសណ្ឋាគារផងដែរ។

លោកស្រីបន្តថា “ខេត្តព្រះសីហនុមានសក្តានុពល និងមានប្រជាប្រិយភាពខ្ពស់លើវិស័យទេសចរណ៍ ហេតុនេះការមានផ្ទះសំណាក់ និងសណ្ឋាគារច្រើន ហើយការលក់បន្ទប់មានតម្លៃសមរម្យ ដូចកាលពីកំឡុង៣ទៅ៥ឆ្នាំមុន នឹងធ្វើឲ្យខេត្តនេះទាក់ទាញភ្ញៀវទេសចរណ៍ជាតិ អន្តរជាតិឡើងវិញ”។ លោកស្រីបន្តថា “ការបិទ Online Game ពីសំណាក់រដ្ឋាភិបាល មិនធ្វើឲ្យខេត្តនេះមិនមានការរីកចម្រើននោះទេ ដោយសារខេត្តនេះមានសក្តានុពលលើវិស័យជាច្រើន”។

វិស័យធំៗ ដែលកំពុងជំរុញសក្តានុពល ខេត្តព្រះសីហនុរួមមាន កំពង់ផែទឹកជ្រៅ បណ្តាញគមនាគមន៍ដ៏សម្បូរបែប តំបន់ឆ្នេរដ៏ស្រស់ស្អាត និងតំបន់សេដ្ឋកិច្ចពិសេសជាច្រើន ពិសេសវិស័យទេសចរណ៍ ដែលអាចស្រូបទាញនូវភ្ញៀវជាតិ អន្តរជាតិរាប់លាននាក់ទៅកំសាន្តនៅខេត្តនេះ។

លោកស្រីនុត រត្ថាបានបន្តថា ភាពរីកចម្រើនរបស់ក្រុងព្រះសីហនុ នឹងពឹងអាស្រ័យលើមូលដ្ឋានដែលមានស្រាប់ទាំងនេះ ហើយការបិទ Online Game អាចធ្វើឲ្យប៉ះពាល់់ រយៈពេលខ្លីដល់វិស័យសំណង់ និងអចលនទ្រព្យ ប៉ុន្តែអ្វីៗនឹងមានភាពប្រសើរឡើងវិញនៅពេលឆាប់់ៗនេះ ខណៈកម្ពុជានៅតែរក្សាបានកំនើនសេដ្ឋកិច្ច ស្ថេរភាពសង្គម និងស្ថេរ ភាពនយោបាយរបស់ប្រទេស៕

សម្តេចតេជោ ស្នើដល់ក្រុមហ៊ុនចិនឱ្យបន្តវិនិយោគនៅកម្ពុជាទោះបីមិនមានប្រព័ន្ឋ EBA

ដោយ វុត្ថា

ភ្នំពេញៈ សម្តេចតេជោ ហ៊ុន សែននាយករដ្ឋមន្ត្រីនៃកម្ពុជា បានស្នើឲ្យក្រុមហ៊ុនចិនដែលកំពុងដាក់ទុននៅកម្ពុជាបន្តវិនិយោគនៅកម្ពុជា ទោះបីជាមានការបញ្ហាអ្វីក៏ដោយ ជាពិសេសការដក EBA ពីកម្ពុជា គឺសម្ដេចស្នើសុំឲ្យចិននៅតែបន្តធ្វើការវិនិយោគនៅក្នុងប្រទេសកម្ពុជាជាបន្តទៀត។

សម្តេចតេជោ ហ៊ុន សែន មានប្រសាសាន៍បែបនេះនៅក្នុងជំនួបពិភាក្សាគណៈប្រតិភូសមាគមត្រកូលហ៊ុន ; និងសហគ្រិនដែលមកពីបណ្ដាខេត្តផ្សេងៗ នៃប្រទេសចិនសុទ្ធតែអ្នកវិនិយោគសំខាន់ៗ ដែលមកសិក្សាអំពីសក្តានុពល និងឱកាសវិនិយោគនៅក្នុងប្រទេសកម្ពុជានៅថ្ងៃទី៨ ខែតុលា ឆ្នាំ ២០១៩ នេះ។

សម្ដេចបានមានប្រសាសន៍ពាក់ព័ន្ធ នឹងការធ្វើយ៉ាងណាឲ្យពាណិជ្ជករ អ្នកវិនិយោគចិនថ្មីឲ្យមកបណ្ដាក់ទុននៅប្រទេសកម្ពុជាបន្ថែម ដើម្បីធ្វើពាណិជ្ជកម្មនៅប្រទេសកម្ពុជា គឺមានន័យថាថែរក្សាចាស់និងបង្កើនការវិនិយោគថ្មី។ ; សម្ដេចតេជោបានស្នើទៅថ្នាក់ដឹកនាំចិន ត្រូវធ្វើយ៉ាងណាបន្តបើកទីផ្សារចិនឲ្យកាន់តែធំជាងមុន សម្រាប់ការនាំចូលផលិតផលកសិផលរបស់ប្រទេសកម្ពុជា ទៅទីផ្សាររបស់ប្រទេសចិន។

សម្តេចតេជោនាយករដ្ឋមន្ត្រី ក៏បានគូសបញ្ជាក់ប្រាប់ពីមូលហេតុ ដែលរាជរដ្ឋាភិបាលបានលុបចោលនូវonline casino នៅប្រទេសកម្ពុជា គឺសម្តេចបានបញ្ជាក់ថា កម្ពុជាជាប្រទេសមួយ ដែលប្រកាន់យកសេដ្ឋកិច្ចទីផ្សារសេរី ក៏ប៉ុន្តែការអភិវឌ្ឍប្រទេសកម្ពុជាមិនពឹងផ្អែកលើកាស៊ីណូអនឡាញទេ ប៉ុន្តែពឹងផ្អែកទៅលើកត្តាជាច្រើន នៅក្នុងមូលដ្ឋានសេដ្ឋកិច្ច ដូច្នេះគឺយើងធ្វើយ៉ាងណា ត្រូវតែពង្រឹងការអនុវត្តច្បាប់នៅប្រទេសកម្ពុជា និងធ្វើយ៉ាងម៉េច ដើម្បីទាក់ទាញការវិនិយោគច្បាស់លាស់ តែមកវិនិយោគទៅលើវិស័យផ្សេងៗទៀត មិនមែនតែពឹងផ្អែកទៅលើកាស៊ីណូអនឡាញនោះទេ។

សម្តេចបន្តថា “កម្ពុជាបានពន្ធតិចតួចណាស់ តាមរយៈកាស៊ីណូអនឡាញនេះហើយកាស៊ីណូអនឡាញនេះ ក៏នាំមកនូវការប្រឈមដូចជាឧក្រិដ្ឋកម្ម កាលាងលុយកខ្វក់ជាដើម ដែលអាចធ្វើប៉ះពាល់ដល់សង្គម”។

សម្ដេចតេជោបានបញ្ជាក់ថា បច្ចុប្បន្ននេះទំហំពាណិជ្ជកម្មរវាងប្រទេសកម្ពុជា និងចិន មានលក្ខណៈកើនឡើងជាបន្តបន្ទាប់ ដែលចំនួននេះគោលដៅនៅក្នុងការធ្វើពាណិជ្ជកម្មដល់ឆ្នាំ២០២២ អាចកើនឡើងរហូតដល់ទៅ១០ពាន់លានដុល្លារ។ សម្ដេចតេជោក៏បានមានប្រសាសន៍ ទាក់ទងនឹងយន្តការដែលកម្ពុជា កំពុងតែសហការនឹងចិនទៅលើ ចំនុចសំខាន់ៗ ដូចជានៅក្នុងអនុតំបន់ គឺកិច្ចសហប្រតិបត្តិការលើមេគង្គឡានឆាង ក្នុងអនុតំបន់មេគង្គអាស៊ានចិន និងកិច្ចប្រជុំអាស៊ីបូព៌ាជាដើម។

បច្ចុប្បន្ននេះ យើងនៅមានសក្តានុពលជាច្រើន ក្នុងការធ្វើពាណិជ្ជកម្ម និងសេដ្ឋកិច្ច ដោយសារកន្លងមកនេះ យើងមានរួចទៅហើយនៅតំបន់សេដ្ឋកិច្ចសេរី រវាងអាស៊ាន និងចិនអាស៊ាន តំបន់សេដ្ឋកិច្ចសេរីរវាងអាស៊ាន ចិន ដែលយើងគួរតែមើលនៅសក្តានុពលដែលអាចនាំចេញផលិតផលកម្ពុជា នាំចេញទៅកាន់ទីផ្សារចិន។

ក្នុងកិច្ចពិភាក្សានេះ សម្តេចតេជោបានជំរុញឲ្យសហគ្រិនចិន មកវិនិយោគនៅក្នុងប្រទេសកម្ពុជា ហើយកុំមានការភ័យព្រួយ ចំពោះចំណុចណានៅប្រទេសកម្ពុជាឲ្យសោះ ដោយសារតែចិន និងកម្ពុជាយើងមានទំនាក់ទំនងល្អ មានកិច្ចសហប្រតិបត្តិការជាដៃគូយុទ្ធសាស្ត្រគ្រប់ជ្រុងជ្រោយរួចទៅហើយ៕

អ្នកជំនាញវិស័យទេសចរណ៍ស្នើឱ្យរដ្ឋាភិបាលគួរមានច្បាប់កំណត់ការវិនិយោគសណ្ឋាគារនៅតាមតំបន់ទេសចរណ៍

ដោយៈ រ៉ាណេត

ភ្នំពេញៈ ចាប់តាំងពីដើមឆ្នាំ២០១៩ រហូតមកដល់ពេលបច្ចុប្បន្ន វិស័យសណ្ឋាគារដែលស្ថិតនៅតំបន់ទេសចរណ៍សំខាន់ៗមួយចំនួននៅកម្ពុជា ដូចជា នៅខេត្តព្រះសីហនុ និងខេត្តសៀមរាបជាដើម ដែលបានិងកំពុងតែប្រឈមនឹងហានិភ័យបាត់បង់ទីផ្សារ ខណៈដែលកំណើននៃចំនួនភ្ញៀវទេសចរមានការថយចុះ។

ប្រធានសមាគមទីភ្នាក់ងារទេសចរណ៍កម្ពុជា លោកស្រីឆាយ ស៊ីវលីន បានមានប្រសាសន៍ប្រាប់កាលពីព្រឹកថ្ងៃទី៨ ខែតុលា ឆ្នាំ២០១៩នេះថា បច្ចុប្បន្ននេះវិស័យសណ្ឋាគារ ដែលកំពុងតែប្រតិបត្តិការអាជីវកម្មនៅក្នុងរាជធានីភ្នំពេញ ក៏ដូចជាតាមបណ្តាខេត្តមួយចំនួនតូច ដែលមានសកម្មភាពពាណិជ្ជកម្មហាក់មិនមានភាពប៉ះពាល់នោះទេ ប៉ុន្តែសម្រាប់សណ្ឋាគារដែលស្ថិតនៅក្នុងតំខេត្តទេសចរណ៍ ដូចជាខេត្តព្រះសីហនុ និងខេត្តសៀមរាប កំពុងតែជួបបញ្ហាប្រឈម ដែលទាមទារឱ្យមានដំណោះស្រាយ។

លោកស្រីបានបញ្ជា់ថា “និយាយតែនៅក្នុងខេត្តសៀមរាប ដែលជាប៉ូលទេសចរណ៍យ៉ាងសំខាន់ប្រចាំប្រទេសកម្ពុជា មានសណ្ឋាគារប្រមាណ៦០០ទីតាំង ស្មើនឹងជាង២០,០០០ម៉ឺនបន្ទប់ ខណៈដែលតម្រូវការជួលស្នាក់ នៅបានធ្លាក់មកត្រឹមប្រមាណ៤០០០បន្ទប់តែប៉ុណ្ណោះ”។ លោកស្រីបន្តទៀតថា “ទិន្នន័យនៃចំនួនសណ្ឋាគារ និងបន្ទប់សម្រាប់ផ្គត់ផ្គង់នេះ ជាចំនួនមួយលើសតម្រូវការជាក់ស្ដែង ហើយវាក៏ជាក្ដីបារម្ភមួយដែលត្រូវតែមានដំណោះស្រាយ ក្រោមការចូលរួមពីសំណាក់រដ្ឋាភិបាលជាចាំបាច់ ដើម្បីស្ដារ និងកែប្រែស្ថានការណ៍ឱ្យមានភាពល្អប្រសើរឡើងវិញ”។

លោកស្រីឆាយ ស៊ីវលីនបានបញ្ជាក់ទៀតថា ការធ្លាក់ចុះនៃតម្រូវការស្នាក់នៅទាំងអស់ខាងលើនេះ គឺបណ្តាលមួយភាគធំមកពីការធ្លាក់ នៃចំនួនកំណើនភ្ញៀវទេសចរនៅត្រឹមមួយរយៈពេលចុងក្រោយនេះ ដូច្នេះការជំរុញ និងការបង្កើនភាពទាក់ទាញក្នុងវិស័យទេសចរណ៍គឺត្រូវតែមាន។ បន្ថែមពីនេះ លោកស្រីក៏បានលើកឡើងផងដែរថា រដ្ឋាភិបាលក៏គួរតែមានការកំណត់ពីចំនួន នៃការវិនិយោគផ្នែកអាជីវកម្មសណ្ឋាគារ នៅក្នុងតំបន់ទេសចរណ៍ផងដែរ ដោយមិនគួរអនុញ្ញាតឱ្យមានការវិនិយោគរហូតដល់ លើសពីតម្រូវការ ដែលជាការប្រឈមខាតបង់របស់អ្នកវិនិយោគ នឹងអាចប៉ះពាល់ដល់សេដ្ឋកិច្ចជាតិផងដែរ។

ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា លោក ធួន ស៊ីណាន បានមានប្រសាសន៍ថា ការវិនិយោគ គឺជាការចូលរួមចំណែកមួយ នៅក្នុងការជំរុញសេដ្ឋកិច្ចជាតិ ប៉ុន្តែបើការវិនិយោគខុសគោលដៅ ក៏អាចជះឥទ្ធិពលមិនល្អត្រឡប់មកវិញផងដែរ។ លោកបានបន្តទៀតថា ភាគច្រើនពាណិជ្ជករមួយចំនួន ហាក់មិនបានធ្វើការសិក្សាពីឱកាសទទួលបានផលប្រយោជន៍ និងភាពប៉ះពាល់ក្រោយការវិនិយោគនោះទេ។

លោកបានបន្តទៀតថា “តាមខ្ញុំមើលឃើញ ពួកគាត់មួយចំនួនច្រើនតែធ្វើឡើងតាមគ្នា បើឃើញគេរកស៊ីអីបានចំណេញ ក៏ចេញរកស៊ីដូចគេ និងនៅក្បែរៗគេទៀត”។លោកបន្ថែមថា “ជាក់ស្ដែងដូចជាការបើកសណ្ឋាគារ នៅក្នុងខេត្តសៀមរាបជាដើម ការផ្គត់ផ្គង់មានរហូតដល់ទៅជាង២ម៉ឺនបន្ទប់ ខណៈដែលបច្ចុប្បន្ននេះតម្រូវការស្នាក់នៅមានត្រឹមតែប្រមាណ ៤ពាន់បន្ទប់តែប៉ុណ្ណោះ”។

លោកបានមានប្រសាសន៍បន្តទៀតថា “ការវិនិយោគ វាគឺជារឿងមួយ ប៉ុន្តែការចូលរួមជំរុញធ្វើឱ្យមានភាពទាក់ទាញដែលស្ថិតនៅក្នុងផ្នែកមួយនៃវិស័យទេសចរណ៍ ម្ចាស់សណ្ឋាគារនីមួយៗក៏គួរតែមានការចូលរួមជាមួយរាជរដ្ឋាភិបាល ក៏ដូចជាអជ្ញាធរក្នុងតំបន់ ដើម្បីលើកកម្ពស់សោភ័ណភាព និងទាក់ទាញភ្ញៀវបន្ថែមទៀត”។

លោកធួន ស៊ីណានបានបន្តទៀតថា បន្ថែមពីនេះ សណ្ឋាគារនីមួយៗក៏គួរតែមានវិធីសាស្ត្រខ្លួនឯងក្នុងការផ្សព្វផ្សាយពីផលិតផល និងសេវាកម្មរបស់ខ្លួនទៅកាន់ទីផ្សារឱ្យបានទូលំទូលាយ តាមរយៈបច្ចេកវិទ្យាថ្មីៗ និងបញ្ចប់ការផ្សព្វផ្សាយតាមវិធីសាស្ត្របែបបុរាណនោះទៀតទេ៕

ថ្នាក់ដឹកនាំ CEO Master Club បានទស្សនកិច្ចសិក្សាស្វែងយល់ពីរដ្ឋធំៗចំនួន៤ នៅសហរដ្ឋអាមេរិក

ដោយ វុត្ថា

ភ្នំពេញៈ CEO Master Club បានដឹកនាំសមាជិករបស់ខ្លួន ដែលជាម្ចាស់អាជីវកម្មសរុប១៨រូប ទៅរៀនសូត្រពីរដ្ឋធំៗចំនួន៤របស់សហរដ្ឋអាមេរិក ដែលនេះជាលើកទី២ក្នុងឆ្នាំ២០១៩។

កម្មវិធីទស្សនកិច្ចសិក្សានេះ បានផ្តើមពីថ្ងៃទី១៧-២៦កញ្ញាកន្លងមកនេះ ក្នុងន័យឱ្យម្ចាស់អាជីវកម្មកម្ពុជា ចាប់អារម្មណ៍ទីផ្សារពិភពលោក និងចង់ឃើញប្រទេសកម្ពុជាក្លាយជាប្រទេសអ្នកមានបានឆាប់រហ័ស។

យោងតាមសេចក្តីប្រកាសព័ត៌មានរបស់ CEO Master Club ដែលគេហទំព័រ propertyarea.asia នៅថ្ងៃទី ៨ ខែតុលា ឆ្នាំ ២០១៩ នេះថា ដំណើរទស្សនកិច្ចនេះមិនត្រឹមតែជាការទៅសិក្សារៀនសូត្រពីស្ថាប័នធំៗ និងលំដាប់ពិភពលោកក្នុងរដ្ឋធំៗចំនួន៤ រួមមាន Texas, Tennessee, Oregon, Washington States ក្នុងទឹកដីប្រទេសមហាអំណាចសេដ្ឋកិច្ចទី១របស់ពិភពលោក ដែលជាប្រភពចំណេះដឹងថ្មីៗ និងជឿនលឿន ក្នុងការយល់ដឹងបន្ថែមសម្រាប់សមាជិក CEO Master Club នោះទេ ប៉ុន្តែក៏បានផ្សាភ្ជាប់នឹងការកំសាន្ត ដែលធ្វើសមាជិកទាំងអស់រីករាយ និងរំភើបខ្លាំងផងលើសពីការរំពឹងទុកផងដែរ។

នាអំឡុងពេលបំពេញទស្សនកិច្ចលើទឹកដីអាមេរិកនេះ ក្រុមគ្រួសារសមាជិក CEO Master Club ដែលដឹកនាំផ្ទាល់ដោយលោក អោម សេងបូរ៉ា បានទទួលការចែករំលែកចំណេះដឹង បទពិសោធន៍ និងរៀនសូត្រពីស្ថាប័នលំដាប់ពិភពលោកជាច្រើនកន្លែង ដែលរួមមាន សកម្មភាពទី១ក្នុងរដ្ឋ Texas គឺបានរៀនសូត្រអំពីតុល្យភាពរវាងគ្រួសារ និងអាជីវកម្ម (Family and Business Balancing) ថាតើធ្វើយ៉ាងណា ដើម្បីជោគជ័យទាំងគ្រួសារ និងអាជីវកម្ម ព្រោះវាជាអ្វីដែលផ្តោតទៅលើ សុភមង្គលគ្រួសារស្របពេលប្រកបអាជីវកម្ម។

បានទៅទស្សនកិច្ចនៅសាកលវិទ្យាល័យ Rice University បានទៅសិក្សាអំពីអចលនទ្រព្យ ក៏ដូចជាតំលៃដីធ្លីនៅក្នុងទីក្រុង Houston និងបន្ទាប់មកទៀតក៏បន្តទៅសិក្សាអំពីបៀបនាំចេញ-ចូលផលិតផល និងរបៀបសុំសិទ្ធិរស់នៅសហរដ្ឋអាមេរិក ដែលចែករំលែកដោយមេធាវីរបស់ការិយាល័យ Lodestone Advisory ក្រុង Nashville។

ចំណែកសកម្មភាពទី២ គឺទៅរដ្ឋ Oregon ដើម្បីទស្សនាកម្សាន្តភាពស្រស់ស្រាយអមដោយការបន្តសិក្សា តាមរយៈការទស្សនាដងស្ទឹងកូឡំប៊ីរីវ័រ (Colombia River) ដែលជាទន្លេងវែងហូតកាន់រដ្ឋជាច្រើនរបស់អាម៉េរិក និង Japanese Garden ដែលរមណីយដ្ឋានដ៏ស្រស់ស្អាត ជាពិសេសមានការរៀបចំរចនាសម្ព័ន្ធយ៉ាងល្អប្រសើរ។ ក្រៅពីទីតាំងពីរខាងលើ សមាជិកទាំងអស់ក៏បានទៅទស្សនៈកិច្ច MountHood ដែលជាតំបន់ពោរពេញទៅដៅទេសភាពដ៏ស្រស់ស្អាតលាយ ជាមួយការចុះអ័ព្ទនិងធ្លាក់ព្រិលផងដែរ។

រីឯសកម្មភាពទី៣ គឺជាទៅបំពេញទស្សនកិច្ចសិក្សា នៅក្នុងក្រុមហ៊ុនយក្ស Nike ដែលមានយីហោដ៏ល្បី ដើម្បីឈ្វេងយល់អំពីសង្វាក់ផលិតកម្ម ការធ្វើទីផ្សារនិងការក្តោបក្តាប់ទីផ្សារ និងរបៀបធ្វើឱ្យអាជីវកម្មរីកចម្រើនខ្លាំងរហូតអាចឈរលំដាប់ពិភពលោក។

សកម្មភាពទី៤ ជាទស្សនកិច្ចចុងក្រោយនេះ ដែលបានធ្វើដំណើរកំសាន្តតាមរថភ្លើងទៅទីក្រុង Seattle រដ្ឋធានី Washington ដើម្បីទៅទស្សនាអំពីអាជីវកម្មរបស់បងប្អូនជនជាតិខ្មែរនៅទីនោះ ដែលមានដូចជា ហាងលក់ឥវ៉ាន់ និងភោជនីយដ្ឋាន ផ្សារទំនើបជាដើម ហើយអ្វីដែលពិសេសនោះ គឺទទួលទានអាហារសាមគ្គីដោយសេចក្តីស្រឡាញ់ ជាមួយម្ចាស់អាជីវកម្ម ដែលជាជនជាតិខ្មែរទាំងនោះតែម្តង ក្នុងការជជែកសំណេះសំណាល ដើម្បីចែករំលែកបទពិសោធន៍ពីគ្នាទៅវិញទៅមក។

CEO Master Club គឺជាស្ថាប័នប្រមូលផ្ដុំ និងបង្វឹកម្ចាស់អាជីវកម្មខ្នាតតូច និងមធ្យមនៅកម្ពុជា ឱ្យក្លាយទៅជាអគ្គនាយកដែលមានលក្ខណៈអាជីព និងមានសមត្ថភាពខ្ពស់ក្នុងការដឹកនាំគ្រប់គ្រងចាត់ចែងស្ថាប័ន អាជីវកម្មរបស់ខ្លួនពីតូចទៅធំ ពីលក្ខណៈគ្រួសារទៅស្តង់ដារ ពង្រីកបណ្តាញការលក់កាន់តែទូលាយ លើកកេរ្តិ៍ឈ្មោះអាជីវកម្មរបស់ខ្លួនបានកាន់តែខ្លាំង ដើម្បីចូលរួមចំណែកអភិវឌ្ឍសេដ្ឋកិច្ចក្នុងស្រុក ឱ្យមានភាពរឹងមាំ។

គិតត្រឹមដើមខែតុលា ឆ្នាំ២០១៩ នេះ CEO Master Club កើនសមាជិកសរុបចំនួន ១០៤០នាក់ ដែលកំពុងបើកដំណើរការអាជីវកម្មជាង១០០០ក្រុមហ៊ុន៕