ការសិក្សា៖ ទីផ្សារការិយាល័យនៅក្នុងតំបន់អាស៊ីស្ថិតនៅក្នុងសភាពទ្រឹង

September 5, 2019

ដោយ វុត្ថា

អាស៊ី៖ ទីផ្សារការិយាល័យកម្រិតមធ្យមក្នុងតំបន់អាស៊ីប៉ាស៊ីហ្វិក កើនឡើត ប្រមាណ ០.៩ ភាគរយនៅត្រីមាសទី ២ នៃឆ្នាំ ២០១៩ បន្ទាប់ពីបានធ្លាក់ចុះក្នុងរយៈពេល ៣ ខែដំបូងនៃឆ្នាំនេះ។

យោងតាមការស្រាវជ្រាវរបស់ក្រុមហ៊ុន Knight Frank ប្រចាំអាស៊ីប៉ាស៊ីហ្វិក បានបង្ហាញកន្លងមកនេះថា ការិយាល័យនៅក្នុងទីក្រុងតូក្យូមានកំណើនជួលខ្លាំងបំផុតនៅត្រីមាសទី ២ ឆ្នាំ ២០១៩ ដែលកើនឡើង ៦,៩ ភាគរយពីមួយត្រីមាសទៅមួយត្រីមាសដោយសារការផ្គត់ផ្គង់ការិយាល័យមានកំណត់។

Knight Frank បន្តថា ចំណែកទីផ្សារការិយាលនៅក្នុងទីក្រុងសំខាន់ៗរបស់ចិនបានធ្លាក់ចុះយ៉ាងខ្លាំងនៅប្រចាំត្រីមាសបំផុតនៅអាស៊ីប៉ាស៊ីហ្វិកដោយទីក្រុងប៉េកាំង ទីក្រុងសៀងហៃ និងទីក្រុងហុងកុងធ្លាក់ចុះ ១,៦% ១,១% និងទីក្រុងហុងកុងធ្លាក់ចុះ ១,១% ក្នុងត្រីមាសទី ២ ឆ្នាំ ២០១៩ នេះ។

ប្រធានផ្នែកស្រាវជ្រាវប្រចាំអាស៊ីប៉ាស៊ីហ្វិកនៅក្រុមហ៊ុន Knight Frank លោក Nicholas Holt បានមានប្រសាសន៍ថា សង្គ្រាមពាណិជ្ជកម្មរវាងប្រទេសមហាយក្សសេដ្ឋកិច្ច ចិន-អាមេរិក ដែលបន្តទៅដោយគ្មានទីបញ្ចប់ និង ប្រទេសអង់គ្លេសគ្រោងដកខ្លួនចេញពីសមាជិកសហភាពអឺរ៉ុ (Brexit) ព្រមទាំងការផ្ទុះតវានៅក្នុងទីក្រុងហុងក្នុងរយៈពេលកន្លងមកនេះ ត្រូវបានរំពឹងថា សម្រាប់ឆ្នាំ ២០១៩ នេះ នឹងនៅតែជាបញ្ហាប្រឈមសម្រាប់ទីផ្សារការិយាល័យនៅក្នុងតំបន់អាស៊ីប៉ាស៊ីហ្វីក។

តែយ៉ាងណាក៏ដោយ សម្រាប់ទីផ្សាការិយាល័យនៅក្នុងទីក្រុង Melbourne មានការជួលកើនឡើងបាន ៣,៧ ភាគរយ ខណៈទីផ្សារផ្សេងទៀតនៅក្នុងសន្ទស្សន៍នេះនៅដដែលឬកើនឡើងតិចតួច។

ក្នុងរយៈពេល ១២ ខែ ទីក្រុង Melbourne នាំមុខមុនជាមួយនឹងការកើនឡើង ១៦ ភាគរយនៃការជួលការិយាល័យធំ ៗ ក្នុងរយៈពេលមួយឆ្នាំដល់ត្រីមាសទី ២ ឆ្នាំ ២០១៩ ។ទីក្រុងតូក្យូ ទីក្រុងបាងកក និងទីក្រុងសឹង្ហបូរីបានប្រកាសពីការជួលការិយាល័យឈានមុខគេជាង ១០ ភាគរយនៅចន្លោះត្រីមាសទី ២ ឆ្នាំ ២០១៨ និងត្រីមាសទី ២ ឆ្នាំ ២០១៩ ។

លើសពីនេះទៀតការជួលការិយាល័យនៅទីក្រុង Jakarta បានធ្លាក់ចុះ ១០,៨% ក្នុងកំឡុងពេល ១២ ខែដល់ត្រីមាសទី ២ ឆ្នាំ ២០១៩ ខណៈពេលដែលទីក្រុងប៉េកាំងឃើញថាមានការធ្លាក់ចុះ ៣,២%។

ក្រុមហ៊ុន Knight Frank បានព្យាករណ៍ថា ការជួលបឋមនៅក្នុងទីផ្សារការិយាល័យភាគច្រើននឹងមានស្ថិរភាព ឬកើនឡើងក្នុងរយៈពេល ១២ ខែខាងមុខ ប៉ុន្តែរំពឹងថានឹងមានការធ្លាក់ចុះនៅទូទាំងទីក្រុងប៉េកាំង ទីក្រុងសៀងហៃ ទីក្រុងហុងទីក្រុងកុងគូឡាឡាំពួ និងទីក្រុងម៉ានីល៕

រដ្ឋាភិបាលសម្រេចអនុម័តលើគម្រោងអាជីវកម្មថ្មអារ ក្រានីត នៅខេត្តក្រចេះ

September 5, 2019

0

ដោយ ៖ រ៉ាណេត

ភ្នំពេញ ៖ គម្រោងអាជីវកម្មថ្មអារ (ក្រានីត) ថ្មីមួយទៀតរបស់ក្រុមហ៊ុន TAY NAM GRANITE (CAMBODIA) Co,.Ltd ដែលមានទីតាំងស្ថិតនៅក្នុស្រុកស្នួល ខេត្តក្រចេះ នៅលើផ្ទៃដីទំហំ ៤៨ហិកតា ត្រូវបានរដ្ឋាភិបាលសម្រេចគាំទ្រ និងអនុម័តឱ្យធ្វើអាជីវកម្ម ប៉ុន្តែស្ថិតនៅក្រោមលក្ខខណ្ឌនៃការគ្រប់គ្រងដោយច្បាប់។

តបទៅនឹងសំណើររបស់ក្រុមហ៊ុន TAY NAM GRANITE (CAMBODIA) CO., LTD នៅត្រឹមថ្ងៃទី៤ ខែកញ្ញា ឆ្នាំ២០១៩ម្សិលមិញនេះ នៅទីស្តីការក្រសួងបរិស្ថាន លោក រ័ត្ន វីរៈ អនុរដ្ឋលេខាធិការក្រសួងបរិស្ថាន បានដឹកនាំកិច្ចប្រជុំអន្តរក្រសួងស្ដីពីការពិនិត្យ និងផ្តល់យោបល់លើរបាយការណ៍វាយតម្លៃហេតុប៉ះពាល់បរិស្ថាន និងសង្គមពេញលេញ (ESIA) សម្រាប់គម្រោងអាជីវកម្មថ្មអារ (ក្រានីត) របស់ក្រុមហ៊ុន TAY NAM GRANITE (CAMBODIA) CO., Ltd។

គម្រោងអាជីវកម្មមួយនេះស្ថិតនៅលើផ្ទៃដីទំហំ ៤៨ ហិកតា មានទីតាំងស្ថិតនៅតំបន់ស្វាយជ្រះ ក្នុងភូមិថ្នល់ ឃុំស្វាយជ្រះ ស្រុកស្នួល ខេត្តក្រចេះ ដែលរៀបចំរបាយការណ៍ ESIA ដោយក្រុមហ៊ុនទីប្រឹក្សា ENVIROTECH SERVICE CO., Ltd ។

កិច្ចប្រជុំខាងលើនេះ មានសមាសភាពចូលរួមពីអគ្គនាយកដ្ឋានចំណុះក្រសួងបរិស្ថាន អន្តរក្រសួងពាក់ព័ន្ធ រដ្ឋបាលខេត្តក្រចេះ អង្គការ DPA នាយកដ្ឋានវាយតម្លៃហេតុប៉ះពាល់បរិស្ថាន ក្រុមហ៊ុនម្ចាស់គម្រោង និងក្រុមហ៊ុនទីប្រឹក្សា ចំនួន ៣៥នាក់។

ជាលទ្ធផល អង្គប្រជុំបានសម្រេចដូចខាងក្រោម៖

១-គាំទ្រទៅលើគម្រោងនេះ

២-ក្រុមហ៊ុន ត្រូវមានផែនការគ្រប់គ្រងសំណល់រាវ ដែលចេញពីកន្លែងអារថ្ម និងកន្លែងកែច្នៃថ្មអារឱ្យបានត្រឹមត្រូវចៀសវាងបង្ហូរចូលទៅក្នុងប្រភពទឹកធម្មជាតិ

៣-ក្រុមហ៊ុន ត្រូវមានផែនការគ្រប់គ្រងអាចម៍ដី កម្ទេចថ្ម ឬថ្មគ្មានគុណភាព និងសំណល់ភក់ (ផេះថ្ម) ឱ្យបានត្រឹមត្រូវ ដោយក្រុមហ៊ុនត្រូវសហការជាមួយក្រសួងរ៉ែ និងថាមពល និងក្រសួងបរិស្ថាន ដើម្បីជំរុញ និងកែច្នៃថ្ម និងផេះថ្ម យកទៅប្រើប្រាស់ឱ្យអស់លទ្ធភាព

៤-ក្រុមហ៊ុន ត្រូវកាត់បន្ថយការបំពុលខ្យល់ សំឡេង និងរំញ័រ ដែលចេញពីខ្សែសង្វាក់ផលិតកម្ម

៥-ក្រុមហ៊ុន ត្រូវផ្តល់សម្ភារឧបករណ៍សុវត្ថិភាពការងារដល់បុគ្គលិក-កម្មករ រួមទាំងចុះបញ្ជី ប.ស.ស ដល់បុគ្គលិក-កម្មករឱ្យបានត្រឹមត្រូវ

៦-ក្រុមហ៊ុន ត្រូវសហការជាមួយក្រសួងសាធារណការ និងដឹកជញ្ជូន សម្រាប់ដាក់ជញ្ជីងថ្លឹងដែលពាក់ព័ន្ធនឹងការដឹកជញ្ជូនឱ្យបានត្រឹមត្រូវ ព្រមទាំងត្រួតពិនិត្យអ្នកបើកបរដោយមិនប្រើប្រាស់ជាតិស្រវឹង និងគ្រឿងញៀន

៧-ក្រុមហ៊ុន ត្រូវបញ្ឈប់សកម្មភាពអាជីវកម្ម និងសហការជាមួយក្រសួង ឬមន្ទីរវប្បធម៌ និងវិចិត្រសិល្បៈ ក្នុងករណីជីកប្រទះឃើញវត្ថុបុរាណ ឬសម្បត្តិវប្បធម៌

៨-នៅពេលបញ្ចប់គម្រោង ក្រុមហ៊ុនត្រូវប្រែក្លាយការដ្ឋានអាជីវកម្មថ្មអារទៅជាអាងស្តុកទឹក ព្រមទាំងវិភាគគុណភាពទឹកជាមុនសិន មុននឹងឱ្យប្រជាពលរដ្ឋប្រើប្រាស់សម្រាប់វិស័យកសិកម្ម

៩-ក្រុមហ៊ុន ត្រូវធ្វើការបច្ចុប្បន្នទិន្នន័យលើរបាយការណ៍ ESIA និងលិខិតបទដ្ឋានគតិយុត្តពាក់ព័ន្ធឡើងវិញឱ្យបានត្រឹមត្រូវ

១០-ក្រុមហ៊ុន ត្រូវអនុវត្តឱ្យបានត្រឹមត្រូវទៅតាមការរៀបរាប់ដែលមាននៅក្នុងរបាយការណ៍ ESIA នេះនិង

១១-ក្រុមហ៊ុន ត្រូវបញ្ចូលមតិយោបល់វិជ្ជមាន ស្របតាមស្មារតីអង្គប្រជុំ ទៅក្នុងរបាយការណ៍ ESIA ៕

UN អះអាងថាកូរ៉េខាងជើងបានប្រើការវាយប្រហារតាមប្រព័ន្ធ Internet លួចប្រាក់បានចំនួន២ពាន់លានដុល្លារពីធនាគារនានា

September 5, 2019

0

ដោយ Donald Lee

ភ្នំពេញៈ របាយការណ៍របស់អង្គការសហប្រជាជាតិ (UN) បានបញ្ជាក់ថា រដ្ឋាភិបាលកូរ៉េខាងជើង បានប្រើការវាយប្រហារតាមប្រព័ន្ធអ៊ីនធឺណេត ដើម្បីលួចលុយចំនួន២ពាន់លានដុល្លារពីធនាគារជាច្រើន និងការផ្លាស់ប្តូររូបិយប័ណ្ណឌីជីថល។

ការចោទប្រកាន់នេះត្រូវបានធ្វើឡើង ខណៈប្រទេសនេះមានទំនាក់ទំនងជាមួយការវាយប្រហារតាមប្រព័ន្ធអ៊ីនធឺណេត ជាច្រើននៅអាមេរិក និងកូរ៉េខាងត្បូង។

របាយការណ៍របស់អង្គការសហប្រជាជាតិបានឲ្យដឹងថា កូរ៉េខាងជើងកំពុងប្រើប្រាស់មូលនិធិដែលលួចបាន ដើម្បីគាំទ្រកម្មវិធីស្រាវជ្រាវអាវុធរបស់ខ្លួន។

នៅពេលទទួលបានសេចក្តីរាយការណ៍នេះពីប្រព័ន្ធផ្សព្វផ្សាយ ទីភ្នាក់ងារសារព័ត៌មាន KCNA ដែលមានមូលដ្ឋាននៅកូរ៉េខាងជើង បានស្តីបន្ទោសអាមេរិក ចំពោះការផ្សព្វផ្សាយអាមេរិក ដោយហៅការចោទប្រកាន់នេះថា “ជាពាក្យចចាមអារ៉ាម”។

ការចេញផ្សាយដោយ KCNA បានបញ្ជាក់ថា “អាមេរិក និងកម្លាំងអរិភាពដទៃទៀតកំពុងផ្សព្វផ្សាយពាក្យចចាមអារាមដែលមិនសមហេតុផល”។

កូរ៉េខាងជើង បានផ្គើននឹងអង្គការសហប្រជាជាតិ និងសហរដ្ឋអាមេរិកដោយបន្តសាកល្បងមីស៊ីលចាប់តាំងពីខែ ឧសភា។

ប្រធានាធិបតីអាមេរិក Donald Trump បានបន្តកាត់បន្ថយការសាកល្បងមីស៊ីលផងដែរ ធ្វើឱ្យមេដឹកនាំកូរ៉េខាងជើងគីម ជុងអ៊ុនស្ងប់ចិត្ត និងធ្វើឱ្យមានសន្តិភាពនៅលើឧបទ្វីបកូរ៉េ។

ប៉ុន្តែអ្នកផ្សេងទៀតនៅក្នុងរដ្ឋបាល Trump កំពុងមានការព្រួយបារម្ភកាន់តែខ្លាំងឡើងចំពោះសកម្មភាពបង្កហេតុរបស់លោកគីម ហើយបានចាត់ទុកប្រទេសកូរ៉េខាងជើងថាជាប្រទេសដែលមិនស្មោះត្រង់។

រដ្ឋមន្រ្តីក្រសួងការបរទេសអាមេរិកលោក Mike Pompeo បានថ្លែងនៅក្នុងសុន្ទរកថាកាលពីខែមុនថា “យើងបានឃើញពីអាកប្បកិរិយាអាក្រក់របស់ចិន លើពាណិជ្ជកម្ម និងសន្តិសុខជាតិ ហើយអាកប្បកិរិយាមិនស្មោះត្រង់របស់កូរ៉េខាងជើង មិនអាចប្រងើយកន្តើយបានទេ”៕

លោក Donald Trump ថាសេដ្ឋកិច្ចចិននឹងដួលរលំ បន្ទាប់ពីលោកជាប់ឆ្នោតនៅអាណត្តិក្រោយ

September 5, 2019

0

ដោយ Donald Lee

ភ្នំពេញៈ ប្រធានាធិបតីអាមេរិកលោក Donald Trump បាននិយាយថា បន្ទាប់ពីលោកបានជាប់ឆ្នោតជាថ្មីនៅឆ្នាំក្រោយ លោកនឹងធ្វើសង្គ្រាមពាណិជ្ជកម្ម ហើយនឹងធ្វើឱ្យសេដ្ឋកិច្ចចិនដួលរលំ។

លោក Trump បានសរសេរនៅលើប្រព័ន្ធផ្សព្វផ្សាយសង្គមធ្វីតធឺ កាលពីថ្ងៃអង្គារថា រដ្ឋាភិបាលចិនសង្ឃឹមថា លោកនឹងចាញ់ការបោះឆ្នោតប្រធានាធិបតីអាមេរិកនៅឆ្នាំក្រោយ ក្នុងការចរចាកិច្ចព្រមព្រៀងពាណិជ្ជកម្មដែលមានប្រយោជន៍។ លោកបានបន្ថែមថា នៅពេលដែលលោកឈ្នះការបោះឆ្នោត លោកនឹងធ្វើសង្គ្រាមពាណិជ្ជកម្ម និងធ្វើឱ្យសេដ្ឋកិច្ចចិនធ្លាក់ចុះ។

លោក Trump បានសរសេរថា “គិតថាតើនឹងមានអ្វីកើតឡើងចំពោះប្រទេសចិននៅពេលដែលខ្ញុំឈ្នះ។ កិច្ចព្រមព្រៀងនេះនឹងកាន់តែពិបាក។ ក្នុងពេលនេះសង្វាក់ផ្គត់ផ្គង់របស់ប្រទេសចិននឹងដួលរលំ ហើយអាជីវកម្មការងារ និងប្រាក់នឹងខាត់បង់”។

ក្រុមអ្នកជំនាញបានបញ្ជាក់ថា ភាពមិនប្រាកដប្រជាដែលបណ្តាលមកពីសង្គ្រាមពាណិជ្ជកម្មរវាងអាមេរិក និងចិននឹងធ្វើឱ្យសេដ្ឋកិច្ចពិភពលោក ខាតបង់ប្រាក់ចំណូលរាប់រយលានដុល្លារនៅឆ្នាំ២០២១។

ជាអកុសលសម្រាប់លោក Trump ទិន្នន័យផលិតកម្មថ្មីៗនេះបានរកឃើញថា ផលិតកម្មរោងចក្រនៅអាមេរិក បានធ្លាក់ចុះជាលើកដំបូង ដែលមិនធ្លាប់មានក្នុងរយៈពេលបីឆ្នាំ។

ទីផ្សាអាមេរិកបានធ្លាក់ចុះ បន្ទាប់ពីបានទទួលបានព័ត៌មាននេះ ដែលធ្វើឱ្យវិនិយោគិនមានការព្រួយបារម្ភថា ការធ្លាក់ចុះសេដ្ឋកិច្ចកំពុងតែជិតឈានមកដល់។

ទន្ទឹមនឹងនេះដែរ វិស័យផលិតកម្មចិនមានការរីកចម្រើន ដែលធ្វើអ្នកព្យាករណ៍សេដ្ឋកិច្ចមានការភ្ញាក់ផ្អើល ដែលបានព្យាករណ៍ពីការធ្លាក់ចុះ ដោយសារតែសង្គ្រាមពាណិជ្ជកម្ម។

សង្រ្គាមពាណិជ្ជកម្ម បានឡើងកំដៅកាន់តែខ្លាំងនៅចុងសប្តាហ៍នេះ ខណៈប្រទេសមានសេដ្ឋកិច្ចធំបំផុតទាំងពីរនៅលើពិភពលោក បានអនុវត្តការដំឡើងពន្ធលើទំនិញរបស់គ្នាទៅវិញទៅមក។

ធនាគារUBS ដែលមានមូលដ្ឋាននៅប្រទេសស្វ៊ីសបានព្យាករណ៍ថា អាមេរិកនឹងធ្លាក់ចូលក្នុងវិបត្តិសេដ្ឋកិច្ចនៅឆ្នាំក្រោយ ដោយសារតែភាពមិនប្រាកដប្រជា ដែលបង្កឡើងដោយសង្គ្រាមពាណិជ្ជកម្មរវាងអាមេរិក និងចិន។

ធនាគារស្វីសបានព្យាករណ៍ថា សេដ្ឋកិច្ចអាមេរិកនឹងធ្លាក់ចុះដល់ ១,៨ភាគរយនៅត្រីមាសទី៤នៃឆ្នាំ២០១៩។

សេដ្ឋវិទូនៅធនាគារនេះបានបន្ថែមថា ការធ្លាក់ចុះនេះនឹងបន្តដល់ឆ្នាំ២០២០ ជាមួយនឹងកំណើនផលិតផលសរុបក្នុងស្រុក បានធ្លាក់ចុះដល់០.៥ ភាគរយ នៅក្នុងត្រីមាសទី ១ ហើយបន្ទាប់មកបន្តធ្លាក់ចុះទៀតនៅត្រីមាសបន្ទាប់ដល់០,៣ ភាគរយ។

វិបត្តិសេដ្ឋកិច្ចកើតឡើង នៅពេលដែលសេដ្ឋកិច្ចមួយជួបប្រទះ នូវការធ្លាក់ចុះ២ត្រីមាសជាប់គ្នា៕

កម្ពុជា-កូរ៉េ ពង្រឹងកិច្ចសហប្រតិបត្តិការលើវិស័យអាកាសចរស៊ីវិលកាន់តែប្រសើរថែមទៀត

September 5, 2019

0

ដោយ រ៉ាណេត

កូរ៉េខាងត្បូងៈ រាជរដ្ឋាភិបាលកម្ពុជា និងសាធារណៈរដ្ឋកូរ៉េបានលើកកិច្ចប្រជុំទ្វេរភាគី ដើម្បីរកវិធីសាស្ត្រពង្រឹងកិច្ចសហប្រតិបត្តិការរវាងប្រទេសទាំង២ លើវិស័យអាកាសចរណ៍ស៊ីវិលឱ្យកាន់តែមានភាពរឹងមាំ និងល្អប្រសើរបន្ថែមទៀត។

នៅក្នុងឱកាសចូលរួមសន្និសីទអន្តរជាតិលើកទី៧ ស្តីពីកិច្ចសហប្រតិបត្តិការកសាងហេដ្ឋារចនាសម្ព័ន្ធសកល កាលពីថ្ងៃទី៤ ខែកញ្ញា ឆ្នាំ២០១៩នេះ លោកបណ្ឌិត ម៉ៅ ហាវណ្ណាល់ រដ្ឋមន្ត្រីប្រតិភូអមនាយករដ្ឋមន្រ្តី ទទួលបន្ទុករដ្ឋលេខាធិការដ្ឋានអាកាសចរស៊ីវិល ដោយមានវត្តមានចូលរួមផងដែរពីលោក ឡុង ឌីម៉ង់ ឯកអគ្គរាជទូតកម្ពុជា ប្រចាំសាធារណរដ្ឋកូរ៉េ បានចូលរួមប្រជុំទ្វេភាគី ជាមួយ លោកផាក ស៊ុនហូ អនុរដ្ឋមន្ត្រីក្រសួងដែនដី ហេដ្ឋារចនាសម្ព័ន្ធ និងដឹកជញ្ជូនកូរ៉េ ដើម្បីពង្រឹងកិច្ចសហប្រតិបត្តិការរវាងប្រទេសទាំងពីរ លើវិស័យអាកាសចរស៊ីវិល។

លោក ម៉ៅ ហាវណ្ណាល់ បានលើកឡើងអំពីភាពរីកចម្រើននៃវិស័យអាកាសចរស៊ីវិលនៅកម្ពុជា ក្រោមការដឹកនាំប្រកបដោយកិត្តិបណ្ឌិតរបស់សម្តេច អគ្គមហាសេនាបតី តេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងលើកបង្ហាញអំពីកត្តាប្រឈមមួយចំនួន ដែលតម្រូវឱ្យរដ្ឋលេខាធិការដ្ឋានអាកាសចរស៊ីវិល ខិតខំប្រឹងប្រែងបន្ថែមទៀត តាមរយៈការបង្កើនកិច្ចសហប្រតិបត្តិការអន្តរជាតិ និងដកស្រង់បទពិសោធន៍ល្អៗ ពីសាធារណរដ្ឋកូរ៉េ ជាពិសេសស្របពេលដែលវិស័យអាកាសចរស៊ីវិលកូរ៉េ កំពុងតែមានការរីកចម្រើនជាលំដាប់ប្រកបដោយនិរន្តរភាព។

ក្នុងនាមរាជរដ្ឋាភិបាលកម្ពុជា លោកក៏បានស្នើសុំការគាំទ្រពីក្រសួងដែនដី ហេដ្ឋារចនាសម្ព័ន្ធ និងដឹកជញ្ជូនកូរ៉េលើសំណើសំខាន់ៗចំនួន៣ ដែលពាក់ព័ន្ធនឹងវិស័យអាកាសចរស៊ីវិលកម្ពុជាដូចជា ទី១ ការធ្វើឱ្យប្រសើរឡើងហេដ្ឋារចនាសម្ព័ន្ធ និងពង្រឹងសមត្ថភាពគ្រូបង្គោលបន្ថែមទៀត របស់មជ្ឈមណ្ឌលហ្វឹកហ្វឺនអាកាសចរស៊ីវិលកម្ពុជា ដែលបានចាប់ផ្តើមដំណើរការបង្រៀន តាំងពីឆ្នាំ២០១៧ ក្រោមជំនួយរបស់ទីភ្នាក់ងារសហប្រតិបត្តិការអន្តរជាតិកូរ៉េ (KOICA)។

ទី២. ជំនួយបច្ចេកទេស លើការដាក់ប្រព័ន្ធបច្ចេកវិទ្យាចុងក្រោយ សម្រាប់ការគ្រប់គ្រង តាមដាន សុវត្ថិភាពអាកាសចរស៊ីវិល និង ប្រព័ន្ធគ្រប់គ្រងព័ត៌មានសុវត្ថិភាពអាកាសចរណ៍ (Safety Oversight Management and Safety Management Information System)។ ទី៣ ជំរុញនិងស្វែងរកគ្រប់លទ្ធភាព ដើម្បីបង្កើនការហោះហើររវាងប្រទេសទាំងពីរ ដោយអង្កេតឃើញថា ភ្ញៀវទេសចរណ៍ពីកូរ៉េ ទៅទស្សនាប្រទេសកម្ពុជាមានការធ្លាក់ចុះបន្តិច បើប្រៀបធៀបជាមួយភ្ញៀវទេសចរណ៍ ពីបណ្តាប្រទេសផ្សេងៗទៀត។

លោកផាក ស៊ុនហូ អនុរដ្ឋមន្ត្រីក្រសួងដែនដី ហេដ្ឋារចនាសម្ព័ន្ធ និងដឹកជញ្ជូនកូរ៉េ បានលើកឡើងថា កម្ពុជា កូរ៉េ ជាប្រទេសដែលមានកិច្ចសហការល្អជាមួយគ្នាជាយូរមកហើយ ទាំងវិស័យកាទូត និងវិស័យពាណិជ្ជកម្ម ។ ជាមួយគ្នានេះ លោកក៏បានទទួលយកសំណើរ ដើម្បីដាក់ជូនក្រុមមន្ត្រីជំនាញដែលពាក់ព័ន្ធ ក៏ដូចជាប្រមុខថ្នាក់ដឹកនាំដើម្បីឈានដល់ការសម្រេចរួម៕

តម្លៃដីធ្លីនៅក្នុងឆ្នាំ២០១៩ មានកំនើនដូចម្តេច ខណៈឆ្នាំ២០២០ជិតចូលមកដល់

September 5, 2019

0

ដោយៈ រ៉ាណេត

ភ្នំពេញៈ ក្រុមអ្នកជំនាញអចលនទ្រព្យបានអះអាងថា តម្លៃដីធ្លីបានបន្តកើនឡើងនៅឆ្នាំនេះ ដោយសារកត្តាមួយចំនួនដែលធ្វើឲ្យចរន្តនៃការទិញលក់ដីធ្លីកើនឡើង ខណៈឆ្នាំ២០២០បាននិងកំពុងរំកិលបណ្តើរៗចូលមក ដែលធ្វើឲ្យគេនឹកឃើញពីវិបត្តិថ្មីមួយអាចនឹងមកដល់។

ប្រធានសមាគមអ្នកវាយតម្លៃ និងភា្នក់ងារអចលនវត្ថុកម្ពុជាលោកច្រឹក សុខនីមបានមានប្រសាសន៍ឲ្យដឹងកាលពីពេលថ្មីៗនេះថា វិស័យដីធ្លី មិនថានៅពេលបច្ចុប្បន្ន ក៏ដូចជាពេលអនាគតនោះទេ សន្ទស្សន៍នៃតម្លៃគឺនៅតែមានកំណើនជានិច្ច ដែលវាមិនទាន់មានសញ្ញាអវិជ្ជមានណាមួយបង្ហាញនៅឡើយនោះទេ។

លោបន្តថា ជាក់ស្ដែងនៅពេលបច្ចុប្បន្ននេះយើងឃើញស្រាប់ហើយថា ចំពោះតម្លៃដីធ្លី គឺកំពុងតែមានកំណើនជាបន្តបន្ទាប់ ដែលក្នុងនោះរាប់ទាំងដីនៅក្នុងតំបន់ក្រុង ក៏ដូចជានៅជាយក្រុង ហើយនៅតាមបណ្តាខេត្តសក្ដានុពលមួយចំនួន ក៏កំពុងកើនឡើងយ៉ាងគំហុកផងដែរ ដូចជា ខេត្តព្រះសីហនុ កំពត កោះកុង បាត់ដំបង និងក្រុងប៉ោយប៉ែត ជាដើម”។

លោកបន្តទៀតថា “ប្រសិនបើកម្ពុជាអាចរក្សាបាននូវស្ថិរភាពសេដ្ឋកិច្ច និងនយោបាយដូចពេលបច្ចុប្បន្ននេះ សម្រាប់៥-១០ ឆ្នាំខាងមុខទៀត តម្លៃដីនៅតែបន្តកើនឡើង ដែលគិតជាមធ្យមអាចក្នុងរង្វង់ជាង១០ភាគរយ ហើយចំពោះដីដែលស្ថិតក្នុងតំបន់ពាណិជ្ជកម្មពិសេស ដូចជាតំបន់ទីប្រជុំជនក្នុងខេត្ត ឬក្នុងក្រុង អាចមានកំណើនតម្លៃខ្ពស់ជាងនេះទៅទៀត”។

លោកបន្តថា ចំពោះវិបត្តិសេដ្ឋកិច្ចដែលអាចកើតឡើងឬអត់ វាមិនទាន់មកដល់នៅឡើយទេ ហើយកម្ពុជាក៏មិនប្រឈមបញ្ហាធ្ងន់ធ្ងរនោះដែរ ដោយសារទីផ្សារកម្ពុជាបានពង្រីកជាមួយបណ្តាប្រទេសកាន់តែច្រើន (ក្រៅពីចិន) ដូចជា ជប៉ុន កូរ៉េ និងបណ្តាប្រទេសក្នុងតំបន់អាស៊ាន ហេតុនេះវាមិនមានអ្វីគួរឲ្យបារម្ភឡើយ។

លើកឡើងស្រដៀងគ្នាននេះ អ្នកនាងអាន សុធីតា នាយិកាប្រចាំប្រទេសនៃក្រុមហ៊ុន CBRE Cambodia បានមានប្រសាសន៍ឲ្យដឹងថា យើងពិតជាមានមោទនភាពរួចមកហើយ ដែលក្នុងរយៈពេល១០ឆ្នាំកន្លងទៅ តម្លៃដីធ្លីបានកើនឡើងរហូតដល់២២៥ភាគរយ ពោលគឺកាលពីអំឡុងឆ្នាំ២០០៨ តម្លៃដីដែលអាចលក់បានខ្ពស់ជាងគេត្រឹម២៨០០ដុល្លារក្នុងមួយម៉ែត្រការ៉េប៉ុណ្ណោះ ប៉ុន្តែនៅត្រឹមឆ្នាំ២០១៨នេះ តម្លៃដីដែលខ្ពស់នបានឡើងរហូតដល់៦៥០០ដុល្លារក្នុងមួយម៉ែត្រការ៉េ ហើយវានឹងបន្តកើនឡើ់ងខ្ពស់ជាងនេះទៀតនៅពេលខាងមុខនេះ។

អ្នកនាងបានបន្តថា “បើយើងធ្វើការព្យាករណ៍ទៅថ្ងៃអនាគត ក្នុងចន្លោះចាប់ពី៥-១០ឆ្នាំខាងមុខទៀត តម្លៃដីនៅកម្ពុជានៅតែមានការកើនឡើងខ្ពស់ដដែល ដែលអាចក្នុងចន្លោះជាង៧ភាគរយឡើងទៅ”។

អ្នកនាងបន្តថា “កំនើនតម្លៃដីធ្លីជាមធ្យម៧ភាគរយនេះមិនមែនមានន័យថា ជាអត្រានៃកំណើនថេរប្រចាំឆ្នាំនោះទេ ប៉ុន្តែវាអាចមានឆ្នាំខ្លះឡើងបាន៥ភាគរយ ឆ្នាំខ្លះឡើងបាន៧ភាគរយ ហើយឆ្នាំខ្លះឡើងបានត្រឹម៣ភាគរយ”។

ការព្យាករណ៍ចេញជាតួលេខនេះ ក៏ព្រោះយើងសម្អាងទៅលើភាពជាក់ស្ដែង នៃតម្រូវការទីផ្សារអចលនទ្រព្យនាពេលបច្ចុប្បន្ន នៅកម្ពុជាធៀបទៅនឹងប្រទេសជិតខាងក្នុងតំបន់ ជាពិសេសប្រទេសថៃ ដែលកំពុងមានលំហូរវិនិយោគយ៉ាងគំហុកពីសំណាក់អ្នកវិនិយោគក្នុងស្រុក ក៏ដូចជាជនបរទេស ជាពិសេសជនជាតិចិនជាដើម។

ជាមួយគ្នានេះ អ្នកនាង អាន សុធីតា ក៏បានបញ្ជាក់ឱ្យដឹងផងដែរថា ហេតុផលមួយចំនួនទៀត ដែលជាកក្តាជំរុញឱ្យវិស័យដីធ្លីកាន់តែឡើងតម្លៃខ្លាំង ក៏អាចបណ្តាមកពីដំនើរការវិវឌ្ឍសេដ្ឋកិច្ចជាតិ ជាពិសេសការរីកចម្រើនប្រព័ន្ធហេដ្ឋារចនាសម្ព័ន្ធ ដែលបាននិងកំពុងវិនិយោគដោយរដ្ឋាភិបាល៕

ចំណេះដឹង! នីតិវិធីនៃការចាប់ផ្តើមបង្កើតគម្រោងវិនិយោគត្រូវធ្វើដូចម្តេច?

September 5, 2019

0

ដោយ វុត្ថា

ភ្នំពេញៈ ដើម្បីបង្កើតគម្រោងវិនិយោគចាំបាច់ ត្រូវតែប្រកាសអំពីគម្រោងវិនិយោគ ដល់ អាជ្ញាធរមានសមត្ថកិច្ចរបស់រដ្ឋាភិបាលបានដឹងជាមុនផងដែរ ដើម្បីធ្វើការពិនិត្យ និងផ្ទៀងផ្ទាត់ លើគម្រោងវិនិយោគនោះឲ្យបានត្រឹមត្រូវថា តើតំបន់វិនិយោគនោះមានការអនុញ្ញាត្តិឲ្យវិនិយោគ ឬមិនអនុញ្ញាត្តិនៅលើដែនដីកាន់កាប់របស់ខ្លួន។

ដើម្បីអាចបង្កើតគម្រោងវិនិយោគបាន អ្នកវិនិយោគឬវិនិយោគិនត្រូវអនុវត្តវិធានវិធានទូទៅ(ក) វិធានពិសេស(ខ) និងបែបបទនៃការប្រកាសសុំ និងការសម្រេចជាមុន(គ)។

ក.វិធានទូទៅ

ជាទូទៅដើម្បីបង្កើត និងចុះបញ្ជីវិនិយោគ ត្រូវអនុវត្តតាមគោលការណ៍ អនុញ្ញាត និងប្រកាសជាមុន ។ អ្នកស្នើសុំត្រូវធ្វើការសុំចុះបញ្ជីនៅក្រសួងពាណិជ្ជកម្ម ក្នុងគោលបំណងបង្កើតឲ្យមាននីតិបុគ្គលជាមុនសិន តាមច្បាប់ស្តីពីវិធានពាណិជ្ជកម្ម និងចុះបញ្ជីពាណិជ្ជកម្ម និងច្បាប់ស្តីពីសហគ្រាសពាណិជ្ជកម្ម។ វិនិយោគិនត្រូវរងចាំការចេញអជ្ញាប័ណ្ណដើម្បីស្របតាមគតិយិត្តបានត្រឹមត្រូវ។ វិធានទូទៅនេះអនុវត្តចំពោះការវិនិយោគដែលមិនមានលក្ខណៈសម្បត្តិគ្រប់គ្រាន់។

ខ.វិធានពិសេស

វិធាននេះ សម្រាប់អនុញ្ញាតទៅលើគម្រោងវិនិយោគទុនណា ដែលមានលក្ខណៈសម្បត្តិគ្រប់គ្រាន់ ដែលអាចចុះបញ្ជី លើគម្រោងវិនិយោគបាន តាមរយៈច្រកចេញចូលតែមួយ នៃក្រុមប្រឹក្សាអភិវឌ្ឈន៍កម្ពុជា (CDC) ឬអនុគណៈកម្មាធិការរាជធានី ខេត្ត សម្រេចចុះបញ្ជីលើគម្រោងវិនិយោគ ដែលមានទុនវិនិយោគចាប់ពី២លានដុល្លាអាមេរិកចុះក្រោម បានត្រឹមត្រូវតាមច្បាប់វិនិយោគឆ្នាំ១៩៩៤។

គ.បែបបទនៃការប្រកាសសុំ និងការសម្រេចជាមុន

ការដាក់ពាក្យសុំ និងការបង់ថ្លៃត្រូវអនុវត្តតាមគំរូ ដូចមាននៅក្នុងឧបសម្ព័ន្ធ២ នៃអនុក្រឹត្យស្តីវិសោធនកម្មច្បាប់ស្តីពីវិនិយោគ ; និងត្រូវបង់ថ្លៃចុះបញ្ជីនិងសេវាចំនួន៧លានរៀល។ ត្រូវបញ្ជាក់ពីសកម្មភាពអនុវត្តគម្រោងវិនិយោគ ដូចជា ការលើកលែងពន្ធលើប្រាក់ចំណេញ និងការស្នើសុំលើកទឹកចិត្តផងដែរ៕

ក្រុមហ៊ុនអចលនទ្រព្យថៃធំមួយបោះទុន៤ពាន់លានបាតសាងសង់សណ្ឋាគារចំនួន២៥ ក្នុងរយៈពេល៣ឆ្នាំទៅមុខ

September 4, 2019

0

ដោយ ៖ វុត្ថា
បាងកកៈ ក្រុមហ៊ុន CP Land Plc ដែលជាក្រុមហ៊ុនអចលនទ្រព្យរបស់ក្រុមហ៊ុន Charoen Pokphand Group គ្រោងចំណាយថវិកាចំនួន៤ពាន់លានបាត ដើម្បីសាងសង់សណ្ឋាគារ ដើម្បីបង្កើនឱ្យដល់ចំនួន២៥នៅក្នុងរយៈពេល៣ឆ្នាំទៅមុខទៀត ដោយក្នុងនោះថវិកាប្រមាណ២ពាន់លានបាតអភិវឌ្ឍហេដ្ឋារចនាសម្ព័ន្ធ និងឧបករណ៍ប្រើប្រាស់នៅឧស្សាហកម្មមួយនៅតំបន់រ៉ាក់យ៉ងប្រទេសថៃ។

ប្រធាននាយកប្រតិបត្តិក្រុមហ៊ុនCP Land Plc លោក Sunthorn Arunanondchai បានឱ្យដឹងកន្លងមកនេះថា វិស័យទេសចរណ៍ និងឧស្សាហកម្ម គឺជាវិស័យអាទិភាពក្នុងការវិនិយោគរបស់ក្រុមហ៊ុន ពីព្រោះវិស័យទាំពីរនេះ ត្រូវបានជំរុញដោយគោលនយោបាយសំខាន់ៗរបស់រដ្ឋាភិបាលថៃ។
លោកបន្តថា “ទោះបីសេដ្ឋកិច្ចធ្លាក់ចុះក៏ដោយ ក៏ប្រជាជននៅតែធ្វើដំណើរដដែល។ ផលប័ត្រសណ្ឋាគាររបស់យើង នឹងទទួលបានអត្ថប្រយោជន៍ ពីយុទ្ធនាការរបស់រដ្ឋាភិបាល ដែលជំរុញការប្រើប្រាស់ក្នុងស្រុក តាមរយៈការចំណាយរបស់អ្នកទេសចរណ៍នៅតាមបណ្តាខេត្តតូចៗ”។

ក្រុមហ៊ុន CP Land បាននឹងកំពុងធ្វើប្រតិបត្តិការសណ្ឋាគារចំនួន១១នៅតាមខេត្តចំនួន៩ទូទាំងប្រទេស ក្រោមឈ្មោះ Fortune Hotel ដែលមានបន្ទប់ចំនួនសរុប១,៦៥៦ បន្ទប់ ក្នុងនោះសណ្ឋាគារចំនួនប្រាំបីស្ថិតនៅក្នុងខេត្តតូចៗ រួមមានសណ្ឋាគារចំនួនពីរនៅ Nakhon Phanom និងមួយកន្លែងទៀតនៅតាមបណ្តាខេត្ត Chiang Rai ខេត្ត Tak Loei ខេត្ត Nakhon Si Thammarat ខេត្ត Buri Ram និង ខេត្ត Phitsanulok ព្រមទាំងសណ្ឋាគារ៣ ទៀតគឺនៅក្នុងទីក្រុង Bangkok សង្កាត់ Khao Yai និងសង្កាត់ Muang ក្នុងខេត្តនគររាជសីមា។

នៅឆ្នាំ ២០២២ ក្រុមហ៊ុន CP Land មានគោលបំណងបង្កើនចំនួនកន្លែងស្នាក់នៅដល់ជាង៤០០០ បន្ទប់នៅ២៥ទិសដៅក្នុងតំបន់ទាក់ទាញ ដូចជា តំបន់ Khon Kaen តំបន់ Udon Thani និង តំបន់ Hat Yai ក្នុងខេSongkhla ដោយសារតំបន់ទាំងនេះមានតម្រូវការខ្ពស់។
លោកSunthorn បានបន្ថែមថា ក្រុមហ៊ុននឹងចាប់ផ្តើមសាងសង់ហេដ្ឋារចនាសម្ព័ន្ធនិងឧបករណ៍ប្រើប្រាស់ នៅឯតំបន់ឧស្សាហកម្ម CPGC នៅក្នុងស្រុក Ban Khai និង Nikhom Pattana នៅក្នុង ខេត្ត Rayong បន្ទាប់ពីចំណាយប្រាក់សរុបចំនួន៤ពាន់លានបាតក្នុងឆមាសទី១ ដើម្បីទទួលបានដីសរុប៣.០៦៨ រ៉ៃ។

គម្រោងនេះត្រូវបានបង្កើតឡើង ដោយក្រុមហ៊ុនសាជីវកម្ម CG ដែលជាការវិនិយោគរួមគ្នារបស់ក្រុមហ៊ុន CP Land និងក្រុមហ៊ុនវិស្វកម្មសំណង់ Guangxi ដែលជាក្រុមហ៊ុនសាងសង់ធំជាងគេមួយ នៅក្នុងប្រទេសចិន ដែលកាន់កាប់ភាគហ៊ុនចំនួន៥០ភាគរយនិង ៤៨ ភាគរយ។
លោក Sunthorn បានបន្តថា“អចលនទ្រព្យឧស្សាហកម្ម ជាវិស័យដ៏រឹងមាំមួយពីព្រោះរដ្ឋាភិបាលកំពុងមានគំនិតផ្តួចផ្តើម បង្កើតច្រករបៀងសេដ្ឋកិច្ចទិសខាងកើត”៕

តោះទៅមើលតម្លៃដីធ្លីនៅតាមបណ្តាប្រទេសចំនួន៦ក្នុងតំបន់អាស៊ី

September 4, 2019

0

ដោយ ៖ ម៉ាទីន

ភ្នំពេញ ៖ បណ្តាប្រទេសនិមួយៗក្នុងតំបន់អាស៊ី និងបណ្តាប្រទេសជាសមាជិកអាស៊ាន មានភាពរីកចម្រើនខុសៗគ្នា អាស្រ័យលើស្ថានភាពនិងបរិបទសេដ្ឋកិច្ច និងគោលនយោបាយរបស់ប្រទេសនិមួយៗ។

តើតម្លៃអចលនទ្រព្យ ពិសេសដីធ្លីក្នុងតំបន់អាស៊ី មានភាពខុសគ្នាយ៉ាងដូចម្តេច? គេហទំព័រ Propertyarea.asia សូមលើកយកពីតម្លៃដីនៅប្រទេសចំនួន៦មកបង្ហាញ និងសិក្សាស្វែងយល់ ដើម្បីប្រើប្រាស់ជាមូលដ្ឋានចំណេះដឹងរបស់ខ្លួន។

យោងតាមទិន្នន័យរបស់ក្លូបលប្រភើធីហ្កាយបានអោយដឹងថាតម្លៃដីធ្លីជាមធ្យមនៅទីក្រុងនៅកម្ពុជា មានតម្លៃប្រមាណ ២៩០០ដុល្លាអាមេរិក។ នៅប្រទេសថៃដីមានតម្លៃ ៣៩០០ដុល្លា នៅប្រទេសឥណ្ឌាដីតម្លៃ ១០.៩០០ដុល្លា នៅប្រទេសចិនតម្លៃ ១១.៨០០ដុល្លារនៅប្រទេសសិង្ហបុរីតម្លៃ ១៣.៧០០ដុល្លា និងនៅទីក្រុងហុងកុងដីតម្លៃ ២៨.៥០០ដុល្លារក្នុងមួយម៉ែត្រការ៉េ។

ប៉ុន្មានឆ្នាំចុងក្រោយនេះតម្លៃអចលនទ្រព្យរបស់កម្ពុជាមានសន្ទុះខ្លាំង ជាពិសេសតម្លៃដីធ្លីមានកំណើនប្រចាំឆ្នាំចន្លោះពី១០ភាគរយ – ១០០ភាគរយ ឬជាង ១០០ភាគរយក៏មាន អាស្រ័យលើទីតាំងភូមិសាស្ត្រ។ សន្ទុះនៃតម្លៃនេះមិនឆ្លុះបញ្ចាំង ពីតម្រូវការមូលដ្ឋានរបស់សេដ្ឋកិច្ច (fundamental needs) នោះទេ ផ្ទុយទៅវិញវាមានចរិតជាកំសួលចិត្តសាស្រ្ត ឬឥរិយាបទ (behavioral) របស់មហាជននិងអ្នកវិនិយោគ។

បណ្តាអ្នកជំនាញបានព្យាករណ៍ថា តម្លៃនឹងមានការកើនឡើងក្នុង១ឆ្នាំប្រមាណ ៧ភាគរយ - ១០ភាគរយ ក្នុងរយៈពេល១០ឆ្នាំខាងមុខ។ ការព្យាករណ៍នេះទំនងជាអាចសម្រេចទៅបាន ព្រោះតម្លៃនៅកម្ពុជាមានតម្លៃទាបនៅឡើយ បើប្រៀបធៀបនឹងបណ្តាប្រទេសនានាក្នុងអាស៊ី៕

មេដឹកនាំហុងកុងដកថយមួយជំហ៊ាន ដើម្បីធ្វើឱ្យមានអ្នកតវ៉ាស្ងប់ស្ងាត់

September 4, 2019

0

ដោយ ៖ Donald Lee

ភ្នំពេញ ៖ អភិបាលក្រុងហុងកុងនឹងដកចេញទាំងស្រុងនូវច្បាប់ស្តីពីការធ្វើបត្យាប័នដែលបានបង្កឱ្យមានការតវ៉ាប្រឆាំងដ៏ខ្លាំងក្លារយៈពេល១៤សប្តាហ៍ និងមានភាពវឹកវរក្នុងទីក្រុងនេះ។

ប្រភពនៅក្នុងរដ្ឋបាលរបស់លោកស្រី Carrie Lam បានប្រាប់កាសែត South China Morning Post (SCMP) ថា លោកស្រីនឹងប្រកាសពីការដកខ្លួនទាំងស្រុងចេញពីនយោបាយនៅថ្ងៃពុធនេះ។

ប្រភពខាងលើបាននិយាយថា “ចេតនាក្នុងការដកខ្លួនចេញជាផ្លូវការ គឺជាការធ្វើឱ្យបរិយាកាសស្ងប់ស្ងាត់”។

ការសម្រេចចិត្តនេះ កើតឡើងបន្ទាប់ពីមានបាតុកម្មរយៈពេល១៤ថ្ងៃ ដ៏ក្តៅបំផុត ដែលអាជ្ញាធរបានប្រយុទ្ធជាមួយក្រុមបាតុករ ដែលអុកឡុកនៅតាមប៉ុស្តិ៍ប៉ូលីស និងការិយាល័យរដ្ឋាភិបាល។

ប្រភពបានបន្ថែមថា “អភិបាលក្រុងបានចាប់ផ្តើមផ្លាស់ប្តូរគំនិតរបស់លោកស្រី បន្ទាប់ពីបានជួបជាមួយមេដឹកនាំមកពីទីក្រុងផ្សេងៗចំនួន១៩កាលពីពីរសប្តាហ៍មុន”។

លោកស្រី Lam ក៏បានជួបជាមួយអ្នកនយោបាយ នឹងរួមបញ្ចូលសមាជិកសភាដែលគាំទ្រក្រុងប៉េកាំងចំនួន៤៣នាក់ផងដែរ។ លោកស្រីនឹងពន្យល់ពីមូលហេតុ ដែលលោកស្រីកំពុងទទួលយកការទាមទារសំខាន់មួយ របស់ក្រុមអ្នកតវ៉ាគាំទ្រលទ្ធិប្រជាធិបតេយ្យបន្ទាប់ពីបានបដិសេធមិនពិចារណាលើបញ្ហានេះ។

ជាមួយនឹងស្ថានភាពប្រសើរឡើងនេះ សន្ទស្សន៍ផ្សារហ៊ុនហុងរបស់ក្រុមហ៊ុន Hang Seng បានកើនឡើងជិត៤ភាគរយ ឬ ៩៥២ ពិន្ទុ គិតត្រឹមម៉ោង៣រសៀលថ្ងៃពុធ បន្ទាប់ពីមានរបាយការណ៍ចេញសេចក្តីសម្រេចរបស់មេដឹកនាំហុងកុង៕