ដោយ វុត្ថា
ភ្នំពេញ៖ រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ បានស្នើឱ្យភាគីឥណ្ឌូនេស៊ី និងក្រុមហ៊ុនផលិតកង់ឱ្យមកបណ្តាក់ទុនវិនិយោគនៅក្នុងប្រទេសកម្ពុជានាលពេលខាងមុខនេះ ។
លោករដ្ឋមន្ត្រី នៅក្នុងជំនួបជាមួយក្រុមហ៊ុនផលិតសម្ភារកីឡា ក្នុងឱកាសនៃកិច្ចប្រជុំត្រួតពិនិត្យឡើងវិញជាសកលលើកទី៧ ស្ដីពីជំនួយសម្រាប់ពាណិជ្ជកម្ម នាទីក្រុងហ្សឺណែវ កាលពីពេលថ្មីៗនេះ បានជម្រាបជូនពីវិធានការណ៍របស់កម្ពុជា ដើម្បីជួយដល់កិច្ចសម្រួលពាណិជ្ជកម្ម និងកាត់បន្ថយថ្លៃភស្ដុភារពាណិជ្ជកម្ម។
សម្រាប់វិស័យសម្លៀកបំពាក់ ស្បែកជើង និងឧបករណ៍កីឡា ជាពិសេសឧស្សាហកម្មទោចក្រយាន លោករដ្ឋមន្ត្រីបានពិភាក្សារួចហើយជាមួយភាគីឥណ្ឌូនេស៊ី ហើយនឹងដឹកនាំគណៈប្រតិភូពាណិជ្ជកម្មទៅឥណ្ឌូនេស៊ីនៅថ្ងៃខាងមុខ ដើម្បីទាក់ទាញការវិនិយោគលើឧស្សាហកម្មគាំទ្រដល់ការផលិតកង់ ដើម្បីផលិតគ្រឿងបង្គុំដោយផ្ទាល់នៅកម្ពុជា ដោយមិនចាំបាច់នាំចូលពីបរទេស។
លោកបន្តថា ការធ្វើដូចនេះ នឹងបង្កើតឱកាសថ្មី ក្នុងការទាញយកផលប្រយោជន៍ពីច្បាប់នៃប្រភពដើមទំនិញ ព្រមទាំងបង្កើតការងារ បង្កើតតម្លៃបន្ថែមក្នុងឧស្សាហកម្មក្នុងស្រុក និងពង្រឹងផលិតភាព និងភាពប្រកួតប្រជែងនៃវិស័យកម្មន្ដសាលនៅកម្ពុជា។
លោកប៉ាន សូរស័ក្តី រដ្ឋមន្ត្រីក្រសួងពាណិជ្ជកម្ម បានជួបពិភក្សាធុរជនបរទេសមួយក្រុមរួមមាន តំណាងរបស់សហព័ន្ធឧស្សាហកម្មសម្ភារកីឡាពិភពលោក (World Federation of the Sporting Goods Industry – WFSGI), ក្រុមហ៊ុនផលិតទោចក្រយាន Specialized និងក្រុមហ៊ុន VF នៅក្នុងកិច្ចប្រជុំត្រួតពិនិត្យឡើងវិញជាសកលលើកទី៧ ស្ដីពីជំនួយសម្រាប់ពាណិជ្ជកម្ម នាទីក្រុងហ្សឺណែវ ប្រទេសស្វីស និងបានលើកទឹកចិត្តឲ្យក្រុមហ៊ុនទាំងបីគាំទ្រឧស្សាហកម្មកម្ពុជា ឲ្យរឹតតែខ្លាំងបន្ថែមទៀត ដោយទីផ្សារនាំចេញរបស់កម្ពុជាមានលក្ខណៈទូលំទូលាយ និងទទួលបានការអនុគ្រោះផងដែរ៕
