ដោយ ម៉ាណេត
ភ្នំពេញៈ ក្រុមហ៊ុន Nippon Express (Cambodia) Co. , Ltd. ដែលជាក្រុមហ៊ុនបុត្រសម្ព័ន្ធ នៃក្រុមហ៊ុនភស្តុភារយក្សជប៉ុន Nippon Express Co., Ltd. គ្រោងបញ្ចប់ការសាងសង់ឃ្លាំង ឬមជ្ឈមណ្ឌលផលិតកម្មនៅកម្ពុជាចុងឆ្នាំនេះ ដើម្បីចូលរួមចំណែកដល់ការអភិវឌ្ឍន៍វិស័យដឹកជញ្ជួននៅកម្ពុជា។
ក្រុមហ៊ុន Nippon Express នឹងបញ្ចប់ការសាងសង់មជ្ឈមណ្ឌលសេវាកម្មផលិតកម្មនៅកម្ពុជាក្នុងខែ ធ្នូ ឆ្នាំនេះ។ នេះបើយោងតាមសារព័ត៌មាន Nikkei ដែលមានមូលដ្ឋាននៅប្រទេសជប៉ុន។
ប្រធានក្រុមប្រឹក្សាភិបាល នៃតំបន់សេដ្ឋកិច្ចពិសេសភ្នំពេញ លោក Hiroshi Uematsu បានឲ្យដឹងកាលពីពេលថ្មីៗនេះថា តំបន់សេដ្ឋកិច្ចពិសេសភ្នំពេញបានចុះហត្ថលេខាជាមួយក្រុមហ៊ុន Nippon Express ដែលជាក្រុមហ៊ុនដឹកជញ្ចូនដ៏ធំរបស់ជប៉ុន ដែលក្រុមហ៊ុននេះ នឹងបង្កើតមជ្ឈមណ្ឌលសេវាកម្មផលិតកម្មលើផ្ទៃដី៤ហិកតា នៅតំបន់សេដ្ឋកិច្ចពិសេសភ្នំពេញ។
លោក Hiroshi Uematsu អះអាងថា “អស់រយៈពេល៥ឆ្នាំហើយ ដែលភាគហ៊ុននិកទាំងនោះពេញចិត្ត នឹងផលិតភាពរបស់កម្មករកម្ពុជា ពួកគេចង់ពង្រីកផលិតកម្មរបស់ខ្លួនក្នុងប្រទេសកម្ពុជា”។
ក្រុមហ៊ុន Nippon Express (Cambodia) Co. , Ltd. បានរៀបចំពិធីបញ្ចុះបឋមសិលាកាលពីថ្ងៃពុធទី២០ ខែកុម្ភៈ ឆ្នាំនេះ ដើម្បីចាប់ផ្តើមសាងសង់ឃ្លាំងថ្មី នៅក្នុតំបន់សេដ្ឋកិច្ចពិសេសភ្នំពេញ (SEZ) នៅកម្ពុជា។
សេដ្ឋកិច្ចកម្ពុជាបានកើនឡើងក្នុងអត្រាប្រចាំឆ្នាំប្រហែល៧ភាគរយ ក្នុងរយៈពេលប៉ុន្មានឆ្នាំចុងក្រោយនេះ ហើយរំពឹងថានឹងបន្តទទួលបានអត្រាកំណើនខ្ពស់ នាពេលអនាគត។ ការប្រើប្រាស់អតិថិជននៅក្នុងប្រទេសកម្ពុជាបានកើនឡើង ខណៈដែលប្រាក់ចំណូលជាតិមានការរីកចម្រើន ដែលជំរុញឲ្យមានតម្រូវការកាន់តែច្រើន សម្រាប់ការនាំចូលទំនិញប្រើប្រាស់ និងការដឹកជញ្ជូន និងឃ្លាំងស្តុកក្នុងស្រុក។
តំបន់សេដ្ឋកិច្ចពិសេសភ្នំពេញ បានផ្តល់នូវទីតាំងដ៏ងាយស្រួលមួយជាទីតាំងភស្តុភារ ដែលមានចំងាយ១៨ គីឡូម៉ែត្រពីភ្នំពេញ និង៨គីឡូម៉ែត្រពីអាកាសយានដ្ឋានអន្តរជាតិភ្នំពេញ។ តំបន់សេដ្ឋកិច្ចពិសេសនេះ ស្ថិតនៅតាមបណ្តោយផ្លូវជាតិលេខ៤ តភ្ជាប់ទៅកំពង់ផែស្វយ័តក្រុងព្រះសីហនុកំពង់ផែសមុទ្រជ្រៅ។ បច្ចុប្បន្នប្រទេសជប៉ុន និងក្រុមហ៊ុនដទៃទៀតប្រមាណ ៩០ កំពុងប្រតិបត្តិការនៅក្នុងតំបន់សេដ្ឋកិច្ចពិសេសនេះ។
តំបន់សេដ្ឋកិច្ចពិសេស ក៏ស្ថិតនៅក្នុងច្រករបៀងសេដ្ឋកិច្ចភាគខាងត្បូងរបស់មហាអនុតំបន់ទន្លេមេគង្គ ដែលធ្វើឲ្យវាជាមជ្ឈមណ្ឌលយុទ្ធសាស្រ្តសម្រាប់ភ័ស្តុភារ ដែលភ្ជាប់ទីក្រុងបាងកក ប្រទេសថៃ និងទីក្រុងហូជីមិញ ប្រទេសវៀតណាមហើយការរំពឹងទុកថានឹងមានតម្រូវខ្ពស់ផ្នែកភ័ស្តុភារបន្ថែមទៀត។
ក្រុមហ៊ុន Nippon Express Cambodia បានសំរេចចិត្តសាងសង់ទីតាំងអាជីវកម្មថ្មីនេះ ដើម្បីបំពេញតម្រូវការភ័ស្តុភាររបស់អតិថិជនរបស់ខ្លួន រួមមាន ការដឹកជញ្ជូនតាមយន្តហោះ សមុទ្រ ដឹកជញ្ជូនក្នុងស្រុក ដឹកជញ្ជូនតាមរថយន្តដឹកជញ្ជូនឆ្លងកាត់ព្រំដែន និងការផ្ទុក/ការចែកចាយដោយប្រើឧបករណ៍ម៉ាស៊ីនត្រជាក់។
ដោយមានការរីកចម្រើនបន្ថែមទៀត នៅក្នុងប្រទេសកម្ពុជា និងអាស៊ីអាគ្នេយ៍ទាំងមូល Nippon Express កំពុងខិតខំប្រឹងប្រែងជំរុញមុខងារ ដឹកជញ្ជូនរបស់ខ្លួននៅក្នុងតំបន់ និងពង្រីកអាជីវកម្មដឹកជញ្ជូនទូទាំងពិភពលោករបស់ខ្លួន ដោយបំពេញតម្រូវការពេញលេញរបស់អតិថិជន៕
