ដោយ វុត្ថា
ព្រះសីហនុ៖ រោងចក្រអគ្គិសនីដើរដោយធ្យូងថ្ម ១៥០ មេហ្កាវ៉ាត់ថ្មីនៅខេត្តព្រះសីហនុ នឹងអាចបញ្ចេញថាមពលមកបណ្តាញជាតិខែកញ្ញា២០១៩ខាងមុខនេះ ខណៈកង្វះខាតថាមពលអគ្គិសនី កំពុងក្លាយជាបញ្ហាប្រឈមដ៏ស្រួចស្រាវមួយ។
យោងតាមហ្វេសបុក Kroko ក្រគរ ជួយ ក្រគរ ចេញផ្សាយកាលពីថ្ងៃទី ១៨ ខែមីនាកន្លងមកនេះថា គម្រោងនេះស្ថិតក្រោមការសាងសង់ជាង២ឆ្នាំហើយ ដោយប្រើម៉ាស៊ីនរបស់ក្រុមហ៊ុន GE អាមេរិក និងសង់ព្រមទាំងតម្លើងដោយក្រុមហ៊ុន Toshiba ជប៉ុន។ ការដាក់ឲ្យដំណើរការនេះ គឺដើម្បីឆ្លើយតបទៅនឹងប្រតិកម្ម និងការត្អូញត្អែរ ពីការខ្វះខាតថាមពលអគ្គិសនីប្រើប្រាស់ប្រចាំថ្ងៃ ពីសំណាក់ប្រជាពលរដ្ឋ ជាពិសេសអ្នកដែលកំពុងរស់នៅក្នុងតំបន់រាជធានីភ្នំពេញ រួមជាមួយនឹងតំបន់នានានៅក្នុងប្រទេសកម្ពុជា។
អាជ្ញាធរអគ្គិសនីកម្ពុជា (EDC) បានបញ្ជាក់ដែរថា កម្ពុជានៅតែខ្វះខាតថាមពលប្រមាណ១៣% ដែលតម្រូវឱ្យអាជ្ញាធរអគ្គិសនីកម្ពុជា ធ្វើការកាត់បន្ថយការផ្គត់ផ្គង់ខ្លះរហូតរដូវវស្សាចូលមកដល់ ដោយការបន្ថយការផ្គត់ផ្គង់នេះ ត្រូវធ្វើឡើងនៅពេលថ្ងៃ និងតាមកន្លែងឆ្លាស់គ្នា ដើម្បីរក្សាការផ្គត់ផ្គង់ពេលយប់ ដែលជាពេលដែលប្រជាពលរដ្ឋត្រូវការប្រើប្រាស់ជាចាំបាច់ប្រចាំថ្ងៃ។
សម្តេចតេជោ ហ៊ុន សែន បានថ្លែងនៅក្នុងពិធីចែកសញ្ញាបត្រដល់និស្សិតកាលពីថ្ងៃទី ១៨ ខែមីនាម្សិលមិញនេះឲ្យដឹងថា កម្ពុជាខ្វះខាតអគ្គិសនី៤០០មេហ្គាវ៉ាត់ សម្រាប់ប្រើប្រាស់ និងស្នើរដល់ពលរដ្ឋឪ្យមានការអត់ធ្មត់។
សម្តេចថ្លែងដូច្នេះ ”សូមអោយប្រជាពលរដ្ឋមានការអត់ធ្មត់បន្តិច ពីព្រោះពេលនេះកម្ពុជាយើងកំពុងខ្វះខាតអគ្គិសនី ប្រើប្រាស់រហូតដល់៤០០មេហ្គាវ៉ាត់ ព្រោះយើងខ្វះខាតទឹកក្នុងការទាញយកថាមពលពីវារីអគិ្គសនី”។ សម្តេចបន្តថា “ជាមួយគ្នានេះផងដែរ រាជរដ្ឋាភិបាល កំពុងរង់ចាំការឆ្លើយតបពីប្រទេសទួកគី ក្នុងការទទួលកាប៉ាល់ដែលផ្ទុកអគ្គិសនី ព្រោះយើងត្រូវការទាញថាមពលអគ្គិសនីពីកាប៉ាល់នេះដើម្បីផ្គត់ផ្គង់អគ្គិសនី”។
សម្តេចតេជោនាយករដ្ឋមន្ត្រី នៅតែបន្តអំពាវនាវអោយប្រជាពលរដ្ឋ ក៏ដូចជា សហគ្រាសអាចប្រើម៉ាស៊ីនភ្លើងបាន សូមប្រើម៉ាស៊ីនភ្លើងជំនួសកាប្រើប្រាស់ភ្លើងអគ្គិសនីវិញ ដើម្បីចូលរួមសន្សំសំចៃទាំងអស់គ្នា នៅពេលដែលយើងកំពុងតែខ្វះខាតភ្លើងអគ្គីសនី៕
