ដោយ រ៉ាវី
ភ្នំពេញ៖ មួយរយៈពេលចុងក្រោយនេះ ខណៈដែលនៅតាមបណ្តាខេត្តមួយចំនួនកំពុងមានការផុសផុលទៅលើវិស័យអចលនទ្រព្យ ជំរុញឱ្យតម្លៃដីធ្លីមានការកើនឡើងយ៉ាងគំហុកនោះ ពេលនេះទីរួមខេត្តត្បូងឃ្មុំ ក៏បានបង្ហាញពីសក្ដានុពលរបស់ខ្លួន និងទាក់ទាញបណ្តាអ្នកវិនិយោគលើវិស័យអចលនទ្រព្យនានា ដើម្បីទាញយកសក្តានុពលពីខេត្តកូនពៅគេមួយនេះ។
គិតត្រឹមចំណុចចាប់តាំងពីគល់ស្ពានគីហ្សូណា តាមបណ្តោយផ្លូវជាតិ7A រហូតដល់ចំណុចផ្លូវបំបែកលេខ73 ដែលស្ថិតនៅក្នុងស្រុកត្បូងឃ្មុំ ខេត្តត្បូងឃ្មុំ គេសង្កេតឃើញថា អ្នកវិនិយោគនានា បាននិងកំពុងតែមានកម្មភាពយ៉ាងសកម្ម ក្នុងការសាងសង់សំណង់លំនៅដ្ឋានក្នុងរូបភាពជាបណ្តុំនៃផ្ទះល្វែង បុរី ក៏ដូចជាការពុះដីឡូតិ៍យ៉ាងស្អេកស្កះ ដែលបញ្ជាក់ថា វិសាលភាពនៃទីផ្សារអចលនទ្រព្យនៅតំបន់នេះ កំពុងមានភាពពុះកញ្ជ្រោលជាខ្លាំង។
លោក សឿន ចាន់ថុន នាយកគ្រប់គ្រងផ្នែកលក់នៃគម្រោងដីឡូត៍ អាណាចក្ររុងរឿង ដែលមានទីតាំងស្ថិតនៅភូមិនិគមលើ ឃុំស្រឡប់ ស្រុកត្បូងឃ្មុំ ខេត្តត្បូងឃ្មុំ បានប្រាប់ឱ្យដឹងកាលពីសប្តាហ៍មុនថា បច្ចុប្បន្នទីតាំងខាងលើនេះកំពុងតែមានភាពពុះកញ្ជ្រោលខ្លាំងលើការទិញ-លក់ មិនថាចំពោះតែដីឡូតិ៍ ឬជាផ្ទះល្វែងនោះទេ ហើយភាគច្រើនគឺអ្នកដែលទិញទុកលក់បន្តយកចំណេញ ។
លោកបានបញ្ជាក់ថា “និយាយតែចំពោះគម្រោងដីឡូតិ៍ អាណាចក្ររុងរឿង ត្រឹមតែមួយរយៈពេលខ្លីសោះ ក្រុមហ៊ុនបានបង្កើតរហូតដល់គម្រោងទី៣ ដែលកំពុងតែមានការចាប់អារម្មណ៍យ៉ាងខ្លាំងពីសំណាក់អតិថិជន ខណៈដែលគម្រោងទី១ និងគម្រោងទី២ ត្រូវបានលក់អស់រួចទៅហើយ”។ លោកបន្តថា “ហេតុផលដែលធ្វើឱ្យមានការចាប់អារម្មណ៍ពីសំណាក់អតិថិជន ក៏ព្រោះតែនៅទីតាំងមួយនេះមានភាពទាក់ទាញ និងមានអំណោយផលជាខ្លាំងសម្រាប់ការសង់លំនៅដ្ឋាន ក៏ដូចជាការប្រកបអាជីវកម្មផ្សេង»។
លោកសឿន ចាន់ថុនបានបញ្ជាក់ទៀតថា នៅជិតគម្រោងអាណាចក្ររុងរឿង គឺមានសាលារៀនរបស់រដ្ឋ មានមណ្ឌលកម្សាន្តទន្លេសិប្បនិម្មិត មានសួនច្បារ កន្លែងលេងកីឡា សាលាខេត្ត ជាបណ្តុំអាហារដ្ឋាន និងសំណង់បុរី ជាពិសេស នៅជិតទីតាំងសាងសង់មន្ទីរពេទ្យមិត្តភាពកម្ពុជា-ចិន ត្បូងឃ្មុំ ដែលនឹងត្រូវសម្ពោធចាប់ផ្តើមដំណើរការសាងសង់ក្រោមវត្តមាន ដ៏ខ្ពង់ខ្ពស់របស់សម្តេចតេជោហ៊ុន សែន នៅថ្ងៃទី១ ខែមីនា ឆ្នាំ២០១៩ខាងមុខនេះ ដែលមន្ទីរពេទ្យលំដាប់អន្តរជាតិនេះ គ្រោងវិនិយោគទឹកប្រាក់សរុបប្រមាណ៥០លានដុល្លារ។
លោកបន្តថា “សក្តានុពលទាំងអស់នេះហើយដែលជាចំណុចពិសេស ធ្វើឱ្យតម្លៃដីនៅតំបន់នេះមានការកើនឡើងជា បន្តបន្ទាប់ ហើយវាក៏ផ្តល់ឱកាសដល់អ្នកដែលមានបំណងទិញទុកលក់ដើម្បីទទួលបានចំណេញយ៉ាងប្រសើរបំផុត”។
ស្រដៀងគ្នានឹងការលើកឡើងខាងលើនេះ លោក សូ ច័ន្ទម៉ូលីដា ម្ចាស់គម្រោងបុរីចំការថ្មត្បូងឃ្មុំ ក៏បានប្រាប់ឱ្យដឹងផងដែរថា បច្ចុប្បន្ននេះចំពោះទីផ្សារអចលនទ្រព្យនៅក្នុងខេត្តត្បូងឃ្មុំ ជាពិសេសក្នុងស្រុកត្បូងឃ្មុំតែម្ដង បាននិងកំពុងតែមានសកម្មភាពដើរទៅមុខយ៉ាងរលូន ព្រោះក្រៅពីកត្តាសន្ដិសុខសង្គម កត្តាសេដ្ឋកិច្ចមានភាពល្អប្រសើរនោះ ដោយសារជីវភាពប្រជាពករដ្ឋកាន់តែមានភាពធូរធារច្រើន។
លោកបញ្ជាក់ថា គម្រោងបុរីចំការថ្មត្បូងឃ្មុំរបស់លោក ដែលទើបតែចាប់ផ្តើមបើកលក់ មិនទាន់បានប៉ុន្មានផងនោះ ពេល នេះលក់បានស្ទើរតែ៧០%ហើយ ដែលចំនួននេះលើសពីការរំពឹងទុករបស់ក្រុមហ៊ុន។ សម្រាប់ថ្ងៃខាងមុខនេះ ទីផ្សារដីធ្លី ក៏ដូចជាសំណង់លំនៅដ្ឋាននឹងកាន់តែមានភាពល្អប្រសើរជាងនេះ បន្ថែមទៀតជាក់ជាមិនខាន។
លោកបណ្ឌិតបេងហុង សុជាតិខេមរ៉ូអគ្គនាយកនៃអគ្គនាយកដ្ឋានលំនៅដ្ឋាន និងជាអ្នករៀបចំប្លង់គោលអភិវឌ្ឍន៍ទីក្រុង នៃខេត្តត្បូងឃ្មុំបានមានប្រសាសន៍ឲ្យដឹងថា ក្រុងថ្មីនៃទីរួមខេត្តត្បូងឃ្មុំត្រូវបានរៀបចំជាលក្ខណៈពិសេស ដោយហេដ្ឋារចនាសម្ព័ន្ឋទីក្រុងនេះ ត្រូវបានរៀបចំបែងចែករវាងទឹកភ្លៀង និងទឹកកខ្វក់ដាច់ពីគ្នា ដើម្បីធ្វើយ៉ាងណាឲ្យអ្នករស់នៅក្នុងទីក្រុងនេះមានផាសុខភាព និងមិនរងការបំពុលបរិស្ថាន។
លោកបន្តថា “ការរៀបចំហេដ្ឋារចនាសម្ព័ន្ឋបែបនេះ ជាលើកតំបូងហើយសំរាប់កម្ពុជា ហើយវាជាទីក្រុងគំរូមួយសម្រាប់កម្ពុជា”។ លោកបន្តថា “ខេត្តនេះមានសក្តានុពលសំរាប់ជាការតំបន់កសិឧស្សាហកម្ម ដោយសារខេត្តជុំវិញនេះជាតំបន់មានសក្តានុពលលើវិស័យកសិឧស្សាហកម្ម ហើយខេត្តនេះនឹងមានខ្សែរថភ្លើង តភ្ជាប់ភាគខាងត្បូងនៃប្រទេសឆ្លងកាត់នាពេលអនាគត”។
អនុប្រធានក្រុមប្រឹក្សាភិបាល នៃសមាគមអ្នកជំនាញអចលនទ្រព្យកម្ពុជាលោក យិនលាងគង់បានមានប្រសាសន៍ថា ទោះបីខេត្តត្បូងឃ្មុំជាខេត្តកូនពៅគេ តែខេត្តនេះជាខេត្តពោរពេញដោយសក្តានុពលនាពេលអនាគត ដោយសារប្រជាជនប្រមាណ១លាននាក់កំពូងរស់នៅខេត្តនេះ ភាគច្រើនជាអ្នកមានជីវភាពមធ្យម ហេតុនេះការរីកខេត្តនេះ នឹងមានសក្តានុពលខ្លាំងនាពេលឆាប់ៗខាងមុខនេះ ដោយសារអំណាចនៃការទិញរបស់ប្រជាជនកើនឡើង។
លោកបន្តថា “ជាទីរួមខេត្តមួយដែលបានរៀបចំប្លង់គោលពិសេសមួយ បានធ្វើឲ្យទីក្រុងនេះមានហេដ្ឋារចនាសម្ព័ន្ឋល្អប្រសើរ មានផ្លូវធំទូលាយ និងមានតំបន់រដ្ឋបាលពិសេសដាច់ពីគ្នា ដែលផ្តល់ឲ្យអ្នករស់នៅក្នុងទីក្រុងនេះ មិនត្រឹមតែទទួលបានបរិយាកាសរស់នៅល្អប្រសើរទេ ប៉ុន្តែក៏ងាយទទួលបានសេវាកម្មសាធារណៈរបស់រដ្ឋ បានយ៉ាងប្រសើរផងដែរ”។
អតិថិជនដែលមានបំណងទាក់ទងទិញគម្រោងពុះដីឡូតិ៍ទី៣ របស់អាណាចក្ររុងរឿង ដែលមានទីតាំងស្ថិតនៅភូមិនិគមលើ ឃុំស្រឡប់ ស្រុកត្បូងឃ្មុំ ខេត្តត្បូងឃ្មុំ មានចំនួនប្រមាណ៦០០ឡូត៍ ដែលមានតម្លៃចាប់ពី៣៨០០ដុល្លារឡើងទៅ និងមានជម្រើសជាច្រើនក្នុងការទិញ អាចទាក់ទងបានតាមរយៈទូរស័ព្ទលេខ ៖ ០៨៨ ៩១ ៩១ ៧៨៨ ឬ ០១២ ២៣ ១៣ ៤៨ ៕
