ដោយ រ៉ាណេត
ភ្នំពេញ៖ ជាដំណឹងល្អ គួរឱ្យរីករាយចំពោះវិស័យសេដ្ឋកិច្ច អចលនទ្រព្យ និងវិស័យសំណង់នៅកម្ពុជា ខណៈដែលនៅក្នុងឆ្នាំ ២០១៩ នេះ អ្នកជំនាញបានបង្ហើបប្រាប់ឱ្យដឹងថា នឹងមានក្រុមហ៊ុនធំៗលំដាប់អន្តរជាតិប្រចាំនៅក្នុងប្រទេសជប៉ុនចំនួន៥ មកបង្ហាញវត្តមានចូលរួមវិនិយោគ និងប្រកួតប្រជែងនៅលើទីផ្សារកម្ពុជា។
នាយិកាក្រុមហ៊ុនអចលនទ្រព្យលំដាប់អន្តរជាតិ Century21 Cambodai អ្នកនាង Grace Rachny Fong បានបង្ហើបប្រាប់ថា នៅត្រឹមដំណាច់ឆ្នាំ២០១៩នេះ នឹងមានក្រុមហ៊ុនជប៉ុនមកកាន់កម្ពុជាចំនួន៥បន្ថែមទៀត ដែលវិនិយោគ និងធ្វើការប្រកួតប្រជែងនៅលើទីផ្សារផ្នែកវិស័យសំណង់ និងផ្នែកអចលនទ្រព្យ។
អ្នកនាងបន្តទៀតថា ៖ «វត្តមានបន្ថែមថ្មីនៃក្រុមហ៊ុនជប៉ុនកម្រិតអន្តរជាតិទាំង៥ដែលនឹងមកដល់កម្ពុជានៅក្នុងឆ្នាំ២០១៩នេះ វាគឺជាសញ្ញាដ៏ល្អមួយ ដែលបញ្ជាក់ថា វិស័យសាងសង់សំណង់នៅកម្ពុជាកាន់តែមានភាពល្អប្រសើរឆ្ពោះទៅមុខ។ ជាធម្មតា សម្រាប់អ្នកវិនិយោគជប៉ុនគឺមានភាពច្បាស់ការ ប្រាកដប្រជាណាស់ ដែលមុននឹងសម្រេចចិត្តបោះជំហាន ឬចាប់ដៃសហការវិនិយោគជាមួយអ្នកណាគឺគេបានសិក្សាលម្អិត និងច្បាស់រួចទៅហើយ គឺភាគច្រើនមិនត្រូវបានធ្វើទាំងភាពប្រថុយប្រថាននោះទេ។
ជាបទពិសោធន៍ នៅកម្ពុជាគឺមានក្រុមហ៊ុនជប៉ុនមកវិនិយោគជាច្រើនរួចមកហើយ និងស្ទើរគ្រប់វិស័យ ជាក់ស្ដែងដូចជាក្រុមហ៊ុនផ្សារទំនើប AEON ជាដើម ដែលត្រឹមរយៈពេលខ្លីបានពង្រីកសាខារបស់ខ្លួនបញ្ជាក់ពីភាពជោគជ័យក្នុងការវិនិយោគ រូបភាពវិជ្ជមានទាំងនេះហើយ ដែលជាទំនុកចិត្តរបស់ពួកគេ។
អ្នកនាង Grace Rachny Fong បានបញ្ជាក់ទៀតថា ៖ «ជាការពិត បច្ចុប្បន្ននេះ ក្រុមហ៊ុនជប៉ុន បាន និងកំពុងតែសម្លឹងមើលបណ្តាប្រទេសនានាដែលនៅជិតខាងដើម្បីធ្វើការវិនិយោគ ពង្រីកវិសាលភាពរបស់ខ្លួន ព្រោះនៅក្នុងប្រទេសជប៉ុន ការប្រកួតប្រជែងគឺមានភាពលំបាក ទីផ្សារចង្អៀត ជាពិសេសខ្វះនូវកម្លាំងពលកម្មជំនាញ ដែលចាំបាច់ត្រូវតែស្វែងរកទីផ្សារក្រៅប្រទេសដើម្បីធ្វើការអភិវឌ្ឍក្រុមហ៊ុនរបស់ខ្លួន។
ដោយឡែកសម្រាប់កម្ពុជា ត្រូវបានគេសម្លឹងឃើញពីសក្តានុពលច្រើន សម្បូរកម្លាំងជំនាញ ជាពិសេសទីផ្សារប្រកួតប្រជែងនៅមានភាពទូលាយ ដែលវាជាឱកាសដ៏ល្អសម្រាប់ពួកគេ»។ ប្រធានសមាគមអ្នកជំនាញអចលនទ្រព្យកម្ពុជា លោក ឃាង ពុទ្ធី បានសាទរជាមួយដំណឹងចំណូលថ្មីនៃក្រុមហ៊ុនជប៉ុនលំដាប់អន្តរជាតិទាំង៥ខាងលើនេះ ដោយលោកបានលើកឡើងថា ៖ «វាជារឿងមួយដ៏ល្អសម្រាប់ដំណឹងនេះ ព្រោះនៅពេលដែលមានក្រុមហ៊ុនអន្តរជាតិកាន់តែច្រើនចូលមកបង្ហាញខ្លួន នោះបញ្ជាក់ថា កម្ពុជា កាន់តែមានភាពល្អប្រសើរ ដែលផ្តល់ទំនុកចិត្តខ្ពស់ដល់អ្នកវិនិយោគ។
ក្រៅពីនេះ វត្តមានរបស់ក្រុមហ៊ុនអន្តរជាតិ វានឹងចូលរួមជួយពង្រឹងវិស័យសេដ្ឋកិច្ច ក៏ដូចជាធ្វើឱ្យមានការប្រកួតប្រជែងកាន់តែខ្លាំង ដែលជំរុញឱ្យក្រុមហ៊ុនស្ថិតនៅក្នុងវិស័យរួមគ្នាខិតខំពង្រឹងសមត្ថភាព និងគុណភាព ក៏ដូចជាក្រមសីលធម៌ ដើម្បីធ្វើយ៉ាងណាអាចទទួលបានចំណែកទីផ្សាររបស់ខ្លួន»។
លោកបានបន្តទៀតថា ៖ «ភាគច្រើន ក្រុមហ៊ុនជប៉ុន តែងផ្តោតការយកចិត្តទុកដាក់ទៅលើគុណភាពនៃការផ្គត់ផ្គង់របស់ខ្លួន ដើម្បីឆ្លើយតបទៅនឹងតម្រូវការ ហើយពួកគេមានភាពឆ្លាតវៃក្នុងការចាប់យកចំណែកទីផ្សារ ក៏ដូចជាអតិថិជនរបស់ពួកគេ ជាក់ស្ដែងកាលពីពេលកន្លងទីនេះ យើងឃើញស្រាប់ហើយ ដូចជា ការវិនិយោគទៅលើប្រភេទខុនដូ ប៊ូ តែ ជូ សំណង់លំនៅដ្ឋានតម្លៃមធ្យម អារ៉ាកាវ៉ា ក៏ដូចជាផ្សារទំនើប AEON ជាដើម ដូច្នេះ ចង់មិនចង់ បណ្តាក្រុមហ៊ុននានាដែលស្ថិតនៅក្នុងវិស័យរួមគ្នាត្រូវតែចេះបត់បែន និងពង្រឹងសមត្ថភាពឱ្យល្អ ទើបអាចរក្សាបានចំណែកទីផ្សាររបស់ខ្លួន»។ គិតមកត្រឹមដើមឆ្នាំ២០១៩ ក្រុមហ៊ុនជប៉ុន បានចូលមកវិនិយោគនៅក្នុងប្រទេសកម្ពុជាស្ទើរគ្រប់វិស័យរហូតដល់ជាង២០០០ក្រុមហ៊ុនរួចមកហើយ ។
បណ្ឌិត ម៉ី កល្យាណ ទីប្រឹក្សាឧត្តមក្រុមប្រឹក្សាសេដ្ឋកិច្ចជាតិបានថ្លែងថា កំណើននៃការវិនិយោគរបស់ក្រុមហ៊ុនជប៉ុន បានឆ្លុះបញ្ចាំងពីទំនុកចិត្តដ៏សំខាន់នៃបរិយាកាសនយោបាយ និងបរិយាកាសវិនិយោគនៅកម្ពុជា ព្រោះអ្នកវិនិយោគជប៉ុន មុនពួកគេទៅវិនិយោគនៅប្រទេសណាមួយ ពួកគេសិក្សាច្បាស់លាស់ណាស់ ទើបសម្រេចចិត្តចូលវិនិយោគ។
លោកបន្តថា ៖ «ជប៉ុនបានកសាងមូលដ្ឋានគ្រឹះ វិនិយោគរយៈពេលវែងនៅកម្ពុជាហើយ យើ ងគួរទះដៃអបអរសាទរទាំងអស់គ្នា។ ទោះជាយ៉ាងណាកម្ពុជានៅតែត្រូវការកែលំអរថែមទៀត ហើយការកែលំអរបែបនេះត្រូវតែធ្វើជាបន្តបន្ទាប់ ដើម្បីទាក់ទាញការវិនិយោគកាន់តែច្រើន» ៕
លោក ហែម គីរី អគ្គលេខាធិការសហព័ន្ធខ្មែរកីឡាហែលទឹកធ្លាប់បានឱ្យដឹងថា អាង ហែលទឹកក្នុងពហុកីឡដ្ឋានជាតិអូឡាំពិកនេះ ស្ថាបនាឡើងក្នុងទសវត្សឆ្នាំ១៩៦០ មកដល់ពេលនេះ មានអាយុកាល៥៨ឆ្នាំហើយគឺវាលែងស្ថិតក្នុងលំដាប់ស្ដង់ដាទៅហើយ អាងហែលទឹកនេះ មានកន្លែងសម្រាប់ប្រកួតហែល និងសម្រាប់លោតទឹក ដើម្បីធ្វើវាឱ្យត្រឹមត្រូវតាមស្ដង់ដាជា សកលក្នុងយុគសម័យនេះ គឺមានផ្នែកជាច្រើនត្រូវវ៉ៃចោលធ្វើជាថ្មី ។
