ដោយ ៖ វុត្ថា
ព្រះសីហនុៈ ក្រសួងបរិស្ថានសូមប្រកាសជូនដំណឹង និងព្រមានមិនឲ្យមានការទិញលក់ដីធ្លីនៅតំបន់ឧទ្យានជាតិរាម ដែលក្រសួងចាត់ទុននូវសកម្មភាពល្មើសច្បាប់។
រដ្ឋលេខាធិការ និងជាមន្ត្រីនាំពាក្យក្រសួងបរិស្ថាន លោក នេត្រ ភក្ត្ រានៅថ្ងៃទី២៣ មិនានេះបានមានប្រសាសន៍ ដោយបានអំពាវនាវដល់សាធារណជន ដែលកំពុងព្យាយាមទិញដីធ្លីនៅតំបន់ឧទ្យានជាតិរាមថា សូមបងប្អូនមេត្តាមានការប្រុងប្រយ័ត្ន ព្រោះការទិញលក់ដូរដី ស្ថិតក្នុងតំបន់ការពារធម្មជាតិជាទង្វើខុសច្បាប់ ហើយជនប្រព្រឹត្តល្មើសច្បាប់នឹងអាចត្រូវប្រឈមមុខច្បាប់។ លោកបន្តថា គ្មានជនណាម្នាក់មានសិទ្ធិយកដីរដ្ឋទៅលក់ដូរ និងចេញបណ្ណកម្មសិទ្ធិឱ្យបុគ្គលណាបានឡើយ។
លោកបន្តថា “ប្រសិនបើបងប្អូនបន្តសកម្មភាពទិញដូរដីធ្លី ដែលស្ថិតក្នុងតំបន់ការពារធម្មជាតិក្រោមការបោកប្រាស់របស់ជនខិលខូច នោះអាចធ្វើឱ្យបងប្អូនខាតបង់ប្រាក់ឥតប្រយោជន៍ បើសិនអជ្ញាធរមានសមត្ថកិច្ចស្រាវជ្រាវឃើញថា ដីធ្វើការទិញដូរនោះស្ថិតនៅក្នុងតំបន់ឧទ្យានជាតិ”។
លោកបន្តថា ជនល្មើសដែលទៅកាប់រុករានទន្ទ្រានដីរដ្ឋដោយខុសច្បាប់ ក៏ដូចជាទៅចាប់ដីលើកម្មសិទ្ធិឯកជន នៅខេត្តព្រះសីហនុជាច្រើនករណីបាន និងកំពុងតែត្រូវបានចាប់ខ្លួន និងចោទប្រកាន់ រង់ចាំការជំនុំជម្រះក្តីចំពោះបទល្មើស ដែលខ្លួនប្រព្រឹត្តប្រឆាំងឹងច្បាប់ស្តីពីតំបន់ការពារតំបន់ធម្មជាតិ និងការទន្ទ្រានកាន់កាប់ដីដោយខុសច្បាប់ និងច្បាប់ដីធ្លី។
តំបន់រាមមានផ្ទៃដីទំហំ ១៥០០០ហិកតាត្រូវបានបង្កើតជាឧទ្យានជាតិព្រះសីហនុ (រាម)ដោយព្រះរាជក្រឹត្យនៅឆ្នាំ ១៩៩៣។ រដ្ឋលេខាធិការ និងជាអ្នកនាំពាក្យក្រសួងបរិស្ថានបានឱ្យដឹងថា ដោយសារតែដីនៅខេត្តព្រះសីហនុមានតម្លៃថ្លៃ នៅក្នុងរយៈពេលប៉ុន្មានឆ្នាំចុងក្រោយនេះ ចលនានៃការកាប់រុករានទន្ទ្រានកាន់កាប់ដីរដ្ឋដោយខុសច្បាប់ពីសំណាក់ក្រុមជនខិលខូចបន្តកើតមាន នងែលខ្លះមានការរំលោភកាន់កាប់ដីខុសច្បាប់ពីជនខិលខូចលើដីជាទ្រព្យសម្បត្តិរដ្ឋ និងជារបស់ឯកជនខ្លះ ទោះបីជាអាជ្ញាគ្រប់ជាន់ថ្នាក់ខិតខំប្រឹងប្រែងក្នុងការទប់ស្កាត់បង្ក្រាបក៏ដោយ។
កន្លងមក ការទន្ទ្រាន រុករានកាន់កាប់ដីដោយខុសច្បាប់ របស់បងប្អូនប្រជាពលរដ្ឋខ្លះ ត្រូវបានធ្វើឡើងក្រោមការបំផុសពីឈ្មួញរកស៊ីដីធ្លី ដែលពួកគេបានញុះញង់ឱ្យប្រជាពលរដ្ឋនៅមូលដ្ឋានរំលោភបំពានច្បាប់ និងបផ្លាញធនធានធម្មជាតិក្រោមច្រើនរូបភាព ដូចជា ការដាំដំណាំចេក ស្វាយ ខ្លុរ អាកាស្យា.. ជាដើម ដើម្បីបន្លំថាជាដី និងដំណាំដែលខ្លួនបានកាន់កាប់ និងអាស្រ័យផលជាកម្មសិទ្ធិ ឬខ្លួនបានគ្រប់គ្រងជាយូរមកហើយ។ ល្បិចកលក្នុងការបំផ្លាញធនធានធម្មជាតិខ្លះ ដែលជនខិលខូចខ្លះបានធ្វើក្នុងការទន្ត្រានកាន់កាប់ដីព្រៃខុសច្បាប់នោះ គឺដូចជាការបោះព្រំដី ការត្រាយព្រៃតូចៗឱ្យងាប់ រួចដុតសម្អាត សម្រាប់ដាំដំណាំតាមរដូវ ដូចជា ពោត ដំឡូង សណ្តែក បន្លែ ។ល។ ក្នុងរូបភាពអាស្រ័យផល និងឈានទៅដាក់ស្នើសុំការវាស់វែង ផ្តល់កម្មសិទ្ឋិជូនពួកគាត់ទៅ អាជ្ញាធរដែនដី ស្ថាប័នជំនាញពាក់ព័ន្ឋ ជាពិសេសស្នើទៅរដ្ឋាភិបាលជាបន្តបន្ទាប់៕
នាយកក្រុមហ៊ុន Century21 Fortuna Investment លោក វ៉ា វីរៈ បានប្រាប់ឱ្យដឹងតាមរយៈទូរស័ព្ទកាលពីល្ងាចថ្ងៃទី២១ ខែមីនានេះថា អចលនទ្រព្យដែលស្ថិតនៅតាមបណ្តោយផ្លូវព្រះមុនីរ៉េត បើប្រៀបធៀបជាមួយតំបន់ដទៃទៀត ដូចជានៅតាមបណ្តោយផ្លូវព្រះមុនីវង្ស ផ្លូវកម្ពុជាក្រោម ផ្លូវហ្សាឌឺហ្គោល ឬមហាវិថីសហព័ន្ធរុស្ស៊ី គឺនៅមានកម្រិតទាបនៅឡើយ។ លោកបន្តថា យើងមើលឃើញជាក់ស្ដែងស្រាប់ ចំពោះសំណង់អាគារដែលស្ថិតនៅតាមផ្លូវព្រះមុនីរ៉េត មិនសូវជាមានភាពទាក់ទាញខ្លាំង ដូចតាមបណ្តាផ្លូវដូចដែលបានរៀបរាប់ខាងលើនោះទេ។
យ៉ាងណាក៏ដោយ លោកវ៉ា វីរៈ ក៏បានបញ្ជាក់បន្ថែមថា តម្លៃខាងលើនេះជាតម្លៃនៅលើទីផ្សារនាពេលបច្ចុប្បន្ន ប៉ុន្តែនៅថ្ងៃខាងមុខនេះ អាចនឹងមានការកើនឡើងខ្ពស់ជាងនេះ ព្រោះជាទូទៅតម្លៃដីនៅក្នុងរាជធានីភ្នំពេញ តែងមានការកើនឡើងក្នុងរង្វង់ប្រមាណ១០-១៥ ភាគរយប្រចាំឆ្នាំ៕
