ដោយវុត្ថា
ភ្នំពេញ:​ រាជរដ្ឋាភិបាលបានសម្រេចបង្កើនលទ្ធភាព ផ្គត់ផ្គង់ថាមពលអគ្គិសនីឲ្យដល់ជាង២៨៧០មេហ្គាវ៉ាត់ ដើម្បីឆ្លើយតបទៅនឹងតម្រូវការប្រើប្រាស់របស់ប្រជាពលរដ្ឋ និងកំណើនការពង្រីករោងចក្រសហគ្រាសនៅកម្ពុជា។

លោក វ៉ិចទ័រ ហ្ស៊ូណា អ្នកនាំពាក្យក្រសួងរ៉ែ និងពលបានឲ្យដឹងកាលពីព្រលប់ថ្ងៃទី៣ មករាកន្លងមកថា ការពង្រីកលទ្ធិភាពផ្គត់ផ្គង់អគ្គិសនី ជូនប្រជាពលរដ្ឋរហូតដល់ជិត៣ពាន់មេហ្គាវ៉ាត់នេះ ដោយសារតែកំណើននៃការប្រើប្រាស់អគ្គិសនី ក្នុងរយៈពេលចុងក្រោ​យនេះ បានកើនឡើងយ៉ាងច្រើនហួសប្រមាណលើសពីការរំពឹងទុក ពិសេសការពង្រីកគម្រោងវិនិយោគនានាទំាងសំណង់ និងរោងចក្រសហគ្រាសដែលត្រូវការថាមពលអគ្គិសនីជាច្រើន។

លោកបន្តថា “ដើម្បីឆ្លើយតបទៅនឹងតម្រូវការផ្គត់ផ្គង់នេះ បានធ្វើឡើងបន្ទាប់ពីក្រសួ​ងទទួលបានប្រភពថាមពលបន្ថែម ពីរោងចក្រផលិតធ្យូងថ្មនៅខេត្តព្រះសីហនុ ការបើកអោយដំណើរការពេញលេញ នៃរោងចក្រផលិតថាមពលអគ្គិសនីវារីអគ្គិសនីសេសានក្រោម២ និងគម្រោងដាក់ឲ្យប្រើប្រាស់ថាមពលអគ្គិសនីដើរដោយថាមពល ពន្លឺព្រះអាទិត្យនៅចុងឆ្នាំ២០១៩នេះ”។

ជាមួយគ្នានេះ កម្ពុជានៅតែត្រូវការនាំចូលប្រភពថាមពលអគ្គិសនីពីប្រទេសជិតខាងដូចជា ប្រទេសវៀតណាម ចំនួន២៧៧ មេហ្គាវ៉ាត់ ពីថៃចំនួនជាង ១៣៥ មេហ្គាវ៉ាត់ និងពីប្រទេសឡាវចំនួន៣០មេហ្គាវ៉ាត់។

លោកបន្ថែមថា ក្នុងផែនការបពង្រីកការផ្គត់ផ្គង់ ប្រភពថាមពលអគ្គិសនីជូនដល់ប្រជាពលរដ្ឋនេះ រាជរដ្ឋាភិបាលក៏បានត្រៀមបញ្ចុះតម្លៃថ្លៃអគ្គិសនីផងដែរ ចាប់ពីថ្ងៃទី២០ ខែមករា ឆ្នាំ២០១៩នេះទៅ ដើម្បីជួយសម្រួលការចំណាយរបស់ប្រជាពលរដ្ឋ។

យោងតាមតារាងតម្លៃអគ្គិសនីសម្រាប់ឆ្នាំ២០១៩ បានបង្ហាញថា សម្រាប់លំនៅឋានដែលប្រើប្រាស់អគ្គិសនីចាប់ពី១ ដល់១០គីឡូវ៉ាត់ម៉ោងក្នុង១ខែ តម្លៃអគ្គិសនីនឹងត្រូវចុះពី៤៨០ រៀលនៅឆ្នាំ២០១៨ មកនៅ៣៨០ រៀលឆ្នាំ ២០១៩ និងឆ្នាំ២០២០ ការប្រើប្រាស់ចាប់ពី១១ដល់៥០ គីឡូវ៉ាត់ក្នុង១ខែ នឹងត្រូវចុះពី៦១០ រៀលនៅឆ្នាំ ២០១៨ ទៅ ៤៨០រៀលនៅឆ្នាំ២០១៩ និងឆ្នាំ២០២០ ខណៈលំនៅឋានដែលប្រើចាប់ពី៥១ដល់២០០ គីឡូវ៉ាត់ក្នុង១ ខែតម្លៃអគ្គិសនីនឹងត្រូវចុះពី៧៧០ រៀលនៅឆ្នាំ២០១៨ ទៅ ៦១០ រៀល។

លោកឆឹង ស៊ីណា តំណាងអគ្គិសនីជនបទបានឲ្យដឹងថា ប្រជាពលរដ្ឋនៅតាមជនបទ មានកំណើននៃការប្រើប្រាស់ថាមពលអគ្គិសនីកើនឡើងជិត២ដង ដោយសារការពង្រីកលំនៅដ្ឋានថ្មី និងការប្រើប្រាស់សម្ភារៈអេឡិចត្រូនិចមានទូរទស្សន៍ កង្ហារ ម៉ាស៊ីនបោកខោអាវ និងម៉ាស៊ីនត្រជាត់ជាដើម។ លោកបញ្ជាក់ថា ក្រុមសេវាករដែលជាសមាជិកនៃសមាគមអគ្គិសនីជនបទ នឹងខិតខំពង្រីកការតបណ្តាញអគ្គិសនីជូនដល់ប្រជាពលរដ្ឋដែលរស់នៅភូមិឆ្ងាយៗពី ខ្សែបណ្តាញជាតិ ដើម្បីអោយពួកគេមានលទ្ធភាពប្រើប្រាស់អគ្គិសនីដូចប្រជាពលរដ្ឋដ៏ទៃទៀត។

នៅក្នុងឆ្នាំ២០១៨កន្លងទៅនេះ កម្ពុជាបានប្រើប្រាស់ប្រភពថាមមពលអគ្គិសនីក្នុងទំហំជាង២៦៥០មេហ្គាវ៉ាត់ ដែលបានគ្រប់ដណ្តប់លំនៅដ្ឋានរបស់ប្រជាពលរដ្ឋជាង៨៣ភាគរយនៅទូទាំងប្រទេស៕

​ដោយវុត្ថា
​ភ្នំពេញ:​ ទើបតែដើមសប្តាហ៍ទី១ ឆ្នាំ២០១៩នេះ ក្រុមប្រឹក្សាអភិវឌ្ឍន៍កម្ពុជាហៅកាត់CDC បានអនុម័តគំរោងវិនិយោគមានទឹកប្រាក់៤,០៧លានដុល្លារអាមេរិក ដែលជា​ការវិនិយោគរោងចក្រផលិតកាបូបនៅកម្ពុជា។

​យោងតាមសេចក្តីប្រកាសព៌តមាន លើគេហទំព័រCDCបានឲ្យដឹងកាលពីថ្ងៃទី៣មករាកន្លងមកថា គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា អនុញ្ញាតឲ្យក្រុមហ៊ុន “IREACH FACTORY (CAMBODIA) CO.,LTD.”បោះទុនវិនិយោគប្រមាណ ៤,០៧ បង្កើតរោងចក្រផលិតកាបូបគ្រប់ប្រភេទ។

គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញ “វិញ្ញាបនប័ត្រចុះបញ្ជីជាស្ថាពរ” ជូនដល់ក្រុមហ៊ុនខាងលើ ដែលមានទីតាំងវិនិយោគស្ថិតនៅប្លុក K ផ្លូវជាតិលេខ៤ ភូមិត្រពាំងក្រសាំង ឃុំបែកចាន ស្រុកអង្គស្នួល ខេត្តកណ្តាល មានទុនវិនិយោគប្រមាណ ៤,០៧លានដុល្លារអាមេរិក និងអាចបង្កើតការងារបានចំនួន ១.០៧៩កន្លែង។

អតីតឯកអគ្គរដ្ឋទូតអាមេរិកប្រចាំកម្ពុជា លោកវីល្លៀម ហេដស៍ធ្លាប់បានមានប្រ​សា​សន៍ឲ្យដឹងថា សហរដ្ឋអាមេរិកបានអនុញ្ញាត្តឲ្យកម្ពុជា នាំចូលផលិតផលធ្វើដំណើរ ដូចជា កាបូបស្ពាន វ៉ាលី ជាដើមក្នុងតម្លៃទឹកប្រាក់១០០លានដុល្លារកាលពីឆ្នាំ២០១៧ ខណៈសហរដ្ឋអាមេរិក បានផ្តល់ការអនុគ្រោះពន្ឋនាំចេញលើផលិតផលសម្រាប់ធ្វើដំណើរដល់កម្ពុជាកំឡុងឆ្នាំ២០១៦កន្លងមកនេះ៕

​ដោយគង់ សូរិយា

​ភ្នំពេញ: ការសិក្សាមួយដែលបានធ្វើឡើងដោយធនាគារជាតិនៃកម្ពុជា(NBC)បានឲ្យដឹងថា កម្ពុជាអាចទទួលបានកំនើនវិនិយោគលើវិស័យកម្មន្តសាល​ និងកសិកម្ម ដោយ​សារកម្ពុជាអាចផលិត និងនាំចេញទៅកាន់ទីផ្សារសហរដ្ឋអាមេរិក និងប្រទេសចិន។

​ការបង្ហាញនូវសញ្ញាសុទិដ្ឋិនិយមនេះ ត្រូវបានបង្ហាញក្នុងរបាយការណ៍ប្រចាំឆ្នាំស្តីពីវឌ្ឍនភាពម៉ាក្រូសេដ្ឋកិច្ច និងវិស័យធនាគារឆ្នាំ២០១៨ និងទស្សនវិស័យឆ្នាំ២០១៩ដែលបានចេញផ្សាយនៅដើមសប្តាហ៍នេះ។ របាយការណ៍បានអះអាងថា ជាក់ស្តែងការ​នាំចេញរបស់កម្ពុជាបានកើនឡើងគួរឲ្យកត់សំគាល់ ជាពិសេសផលិតផលកាត់ដេរ ត្រូវ​បានប៉ាន់ស្មានថាកើនឡើង២៤,៧ភាគរយ ស្របពេលដែលការនាំចេញផលិតផលមួយចំនួន បានកើនឡើងក្នុងអត្រាពីរទៅបីខ្ទង់ ដូចជាការនាំចេញអង្ករកើនឡើង២៣ភាគរយ ទោចក្រយានកើនឡើង១២ភាគរយ និងគ្រឿងបន្លាស់យានយន្តកើនឡើងបីដង។

​របាយការណ៍ដដែលនេះបានបន្តឲ្យដឹងទៀតថា ថ្វីបើការនាំចេញផលិតផលកាត់ដេរនៅបន្តមានចំណែកធំ ប្រមាណ២ភាគ៣នៃការនាំចេញសរុបក៏ដោយ ក៏ចំណែកនេះ​បានថយចុះគួរឲ្យកត់សំគាល់ បើធៀបនឹងប្រមាណ៩៦ភាគរយនៃការនាំចេញកាលពី១០​ឆ្នាំមុន។

​រដ្ឋាភិបាលកម្ពុជាបានដាក់ចេញ គោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥ ២០២៥ ដើម្បីធ្វើពិពីធកម្មសេដ្ឋកិច្ចកម្ពុជា ក្នុងគោលដៅធ្វើឲ្យសេដ្ឋកិច្ចកម្ពុជា​បន្តមានកំនើនរ៉ឹងមាំ និងធ្វើពិពិធកម្មផលិតផលនានា ដើម្បីនាំចេញទៅកាន់បរទេស។

​លោកឧកញ៉ាលឹម ហេងអនុប្រធានសភាពាណិជ្ជកម្មកម្ពុជាបានថ្លែងថា រដ្ឋាភិបាល​កម្ពុជា បានដាក់ចេញនូវគោលនយោបាយ អភិវឌ្ឍន៍វិស័យឧស្សាហកម្មឆ្នាំ២០១៥

២០២៥ ដើម្បីទាក់ទាញការវិនិយោគពីបរទេសបន្ថែមទៀត ដោយសារកម្ពុជាមានសុខ​សន្តិភាព ស្ថេរភាពនយោបាយ និងកំនើនសេដ្ឋកិច្ចល្អប្រសើរ និងលក្ខខ័ណ្ឌអាកាសធាតុ និងផ្ទៃដីកម្ពុជា មានភាពអំណោយផលដល់ការវិនិយោគ ក្នុងវិស័យកម្មន្តសាល និងកសិ​កម្ម ដើម្បីកែច្នៃផលិតផលកសិកម្ម ដើម្បីនាំចេញទៅបរទេស ដែលបច្ចុប្បន្នយើងឃើញក្រុម​ហ៊ុនជាច្រើនបានចូលមកវិនិយោគក្នុងវិស័យទាំងពីរនេះ។

​លោកបន្តថា “ខ្ញុំគិតថានៅបណ្តាឆ្នាំខាងមុខ កម្ពុជានឹងទទួលបានកំណើនវិនិយោគ​ក្នុងវិស័យកសិកម្ម ដោយសារកម្ពុជាមានភាពអំណោយផលជាច្រើន ពិសេសច្បាប់វិនិយោគរបស់កម្ពុជាមានភាពបើកចំហ ដែលអនុញ្ញាត្តឲ្យក្រុមហ៊ុនបរទេសអាចបោះទុន១០០ភាគរយវិនិយោគនៅកម្ពុជា”។លោកបន្តថា “ច្បាប់នេះរួមទាំងកត្តាសុខសន្តិភាព និងស្ថេរភាពនយោបាយនៅកម្ពុជា បានទាក់ទាញអ្នកវិនិយោគបរទេសយ៉ាងខ្លាំង”។

​ទោះជាយ៉ាងណាលោកវេង សាខុនរដ្ឋមន្រ្តីក្រសួងកសិកម្ម រុក្ខាប្រមាញ់និងនេសា​ទបានថ្លែងឲ្យដឹងនៅថ្ងៃដដែលនេះថា កម្ពុជាមានកំនើនការវិនិយោគក្នុងវិស័យកសិកម្ម មួយៗនៅឡើយ ដោយសារប្រព័ន្ឋហេដ្ឋារចនាសម្ព័ន្ឋរបស់យើងមិនទាន់មានភាពអំណោយ​ផលនៅឡើយ ពិសេសតម្លៃដឹកជញ្ជូន និងថ្លៃទឹក ភ្លើងរបស់កម្ពុជាមានតម្លៃខ្ពស់ធៀបជា​មួយបណ្តាប្រទេសក្នុងតំបន់។

​លោកបន្តថា “ទោះជាតម្លៃពលកម្មយើងទាប តែបញ្ហាហេដ្ឋារចនាសម្ព័ន្ឋជារឿងមួ​យដែលត្រូវការពេលវេលាក្នុងការដោះស្រាយ”។

​លោកបណ្ឌិតម៉ី កល្យាណទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិបាន​មានប្រសាសន៍ថា សុខភាពសេដ្ឋកិច្ចកម្ពុជានៅតែមានសញ្ញាល្អប្រសើរ តែបញ្ហាប្រឈម​

របស់យើងនៅនៅតែមានភាពដដែលៗ ដូចជា តម្លៃដឹកជញ្ជូនខ្ពស់ កង្វះធនធានមនុស្ស ការិយាធិបេតយ្យ ថ្លៃទឹកភ្លើងនៅមានតម្លៃថ្លៃ និងមិនទាន់មានគុណភាពជាដើម។

ទាក់ទងនឹងគោលនយោបាយឧស្សាហកម្ម លោកបណ្ឌិតបានថ្លែងថា សេដ្ឋកិច្ចរបស់យើងប្រៀបដូចជារថយន្តចាស់ ដែលយើងត្រូវធ្វើការជួសជុល ឬបន្ថែមគ្រឿង ដើម្បីឲ្យរថយន្តរបស់យើងរត់បានលឿន និងឆ្ងាយជាងមុន៕​

​ដោយស៊ីវ ម៉េង

​ភ្នំពេញ: សេដ្ឋកិច្ចកម្ពុជាឆ្នាំ២០១៨ បានបញ្ចប់ជាមួយលទ្ឋផលជាវិជ្ជមាន និងគួរជាទីមោទន ហើយទស្សនវិស័យសំរាប់សេដ្ឋកិច្ចឆ្នាំ២០១៩ នៅតែមានសញ្ញាវិជ្ជមាន។នេះបើយោងតាមរបាយការណ៍ស្តីពីវឌ្ឍនភាពម៉ាក្រូសេដ្ឋកិច្ច និងវិស័យធនាគារឆ្នាំ២០១៨ និងទស្សនវិស័យឆ្នាំ២០១៩ ដែលបានចេញផ្សាយកាលពីថ្ងៃទី២ មករាកន្លងមក​នេះ។

របាយការណ៍ដដែលបានឲ្យដឹងថា “សេដ្ឋកិច្ចកម្ពុជាបានបន្តរីកចម្រើនគួរជាទីមោ​ទ​​ន”។ ស្ថេរភាពម៉ាក្រូសេដ្ឋកិច្ច និងហិរញ្ញវត្ថុមានភាពរ៉ឹងមាំ ទោះបីជាបានប្រឈមនឹងហានិភ័យមួយចំនួនក្តី។ វិស័យកាត់ដេរ សំណង់ និងទេសចរណ៍បន្តមានកំនើនក្នុងអត្រាពីរខ្ទង់ ក្នុងបរិយាកាសអំ ណោយផលនៃកំនើនសេដ្ឋកិច្ចពិភពលោក និងដោយមានការគាំទ្រពីគោលនយោបាយ​សាររពើវិត្ថារកម្ម គោលនយោបាយហិរញ្ញវត្ថុ និងផ្លែផ្កានៃវឌ្ឈនភាពនិងវិស័យធនាគារនិង​វិស័យដទៃទៀត។

របាយការណ៍ដដែលបានបន្តថា ទោះបីជាបានប្រឈមនឹងភាពតានតឹងផ្នែកពា​ណិជ្ជកម្មរវាងសហរដ្ឋអាមេរិក ចិន និងឥទ្ឋិពលនៃប្រក្រតីកម្មនៃគោលនយោបាយហិរញ្ញវត្ថុ ក្នុងប្រទេសអភិវឌ្ឍន៍មួយចំនួនក៏ដោយ កំនើនសេដ្ឋកិច្ចពិភពលោក និងតំបន់មានភាពល្អ​ប្រសើរ និងបានផ្តល់កាលានុវត្តន៍ភាពល្អដល់សេដ្ឋកិច្ចកម្ពុជា។ លំហូរវិនិយោគផ្ទាល់ពី​បរទេសមកកម្ពុជា បន្តកើនឡើងក្នុងអត្រា១២ភាគរយ ពិសេសវិស័យធនាគារ អចលនទ្រព្យ និងវិស័យកាត់ដេរ ហើយបានគាំទ្រជញ្ជីងទូទាត់ឲ្យមានអតិរេកប្រមាណ៤,៥ភាគ​រយ នៃផលទុនជាតិសរុបក្នុងស្រុក។

អតិរេកជញ្ជីងទូទាត់ពាណិជ្ជកម្ម បានរួមចំណែកគរពូនទុនបង្រុងអន្តរជាតិរបស់កម្ពុជាដល់១០ពាន់លានដុល្លារអាមេរិក ដែលអាចធានាការនាំចេញទំនិញនិងសេវាសម្រាប់ឆ្នាំបន្ទាប់បាន៥,៤ខែ ដែលជាកម្រិតខ្ពស់ធៀបនឹងអកម្រិតអប្បរមា ដែលប្រទេស អភិវឌ្ឍន៍គួរមាន។

សំរាប់ទស្សនវិស័យឆ្នាំ២០១៩ របាយការណ៍នេះបានបញ្ជាក់ថា ទស្សនវិស័យ​សំ​រាប់ឆ្នាំ២០១៩ សេដ្ឋកិច្ចកម្ពុជារំពឹងបន្តកំនើនក្នុងរង្វង់អត្រា៧ភាគរយ ហើយអតិផរណាបន្តស្ថិតក្នុងកម្រិតទាបក្នុងរង្វង់២,៦ ជាមួយនឹងស្ថេរភាពអត្រាប្តុឬប្រាក់៤០៥០រៀ​លក្នុងមួយដុល្លារអាមេរិក។ ចំណែកទុនបំរុងអន្តរជាតិរំពឹងកើនដល់១១,៣ពាន់លាន​ដុល្លារអាមេរិក ដែលអាចធានាដល់ការនាំចេញ និងសេវាបានរយៈពេល៥ខែ។

ម្យ៉ាងវិញទៀត ឥណទានធនាគាររំពឹងថា នឹងបន្តកើនឡើងក្នុងល្បឿន១៧,១ភាគរយ និងបរិយាប័ណហិរញ្ញវត្ថុនឹងបន្តកើនឡើងជាលំដាប់ ដែលកត្តាទាំងនេះនឹងបន្តរួមចំ​ណែកជំរុញការរីកចម្រើនសកម្មភាពសេដ្ឋកិច្ច និងកាត់បន្ថយភាពក្រីក្របន្ថែមទៀត។

លោកបណ្ឌិតហុង វណ្ណៈអ្នកស្រាវជ្រាវសេដ្ឋកិច្ចនៃរាជបណ្ឌិតសភាកម្ពុជាបានគាំទ្ររបាយការណ៍នេះ ដោយលោកបានមានប្រសាសន៍ថា នៅពេលណាយើងគ្រប់គ្រងបាន​នូវម៉ាក្រូសេដ្ឋកិច្ច និងអនុវត្តន៍ច្បាប់បទដ្ឋានគតិយុត្តិនានាបានល្អ និងគោលនយោ​បាយលើកទឹកចិត្តចំពោះអ្នកវិនិយោគនានា វាជំរុញឲ្យមាន​ស្ថេរភាព និងកំនើសេដ្ឋកិច្ច ហើយកំណើននេះមិនត្រឹមតែសម្រេចបាននៅឆ្នាំ២០១៩នេះទេ តែអាចបន្តរុញកំនើនបន្តនៅឆ្នាំ២០២០ ឬឆ្នាំ២០២១បន្ថែមទៀត។

លោកបន្តថា “ជាមួយនឹងកត្តាសុខសន្តិភាព ស្ថេរភាពនយោបាយ និងកំណើនសេដ្ឋកិច្ចនេះ នឹងជាការជំរុញឲ្យអ្នកវិនិយោគបរទេស ចូលមកកាន់កម្ពុជាកាន់តែច្រើន​ថែមទៀត”។

លោកស្រី Sunniya Durrani-Jamal នាយិកាប្រចាំប្រទេសនៃធនាគារអភិវឌ្ឍន៍អាស៊ីប្រចាំនៅកម្ពុជា បានមានប្រសាសន៍ឲ្យដឹងកាលពីពេលថ្មីៗនេះថា សេដ្ឋកិច្ចកម្ពុជានឹងបន្តរក្សាបានកំនើនក្នុងរង្វង់៧ភាគរយរយៈពេលវែងបន្តទៀត៕

​ដោយគង់ សូរិយា

​ភ្នំពេញ: ស្ថាប័នមីក្រូហិរញ្ញវត្ថុនានាបានចាប់ផ្តើមដាក់ចេញនូវផែនការយុទ្ឋសាស្រ្តថ្មី ដើម្បីធ្វើពិពីធកម្មទីផ្សាររបស់ខ្លួន ដើម្បីពង្រីកទីផ្សារ និងឈានទៅរកការប្រកួតប្រជែងនៅក្នុងទីផ្សារ។

អគ្គនាយកគ្រឹះស្ថានមីក្រូហិរញ្ញវត្ថុអម្រិត លោកជា ផល្លារិនបានមានប្រសាស៍ឲ្យដឹងតាមទូរស័ព្ទកាលពីថ្ងៃទី២ មករាកន្លងមកថា អម្រិតទទួលបានភាពរីកចម្រើនទាំងផ្នែកឥណទាន និងប្រាក់បញ្ញើរកាលពីឆ្នាំមុន ប៉ុ​ន្តែទីផ្សារហាក់កាន់តែមានការប្រកួតប្រជែងគ្នាតា​ន​តឹងជាងមុន ដែលតម្រូវឲ្យលោកត្រូវធ្វើពិពិធកម្មសេវាកម្ម និងផលិតផលរបស់ខ្លួននាឆ្នាំ២០១៩នេះ។

​លោកបន្តថា “យើងនឹងវិនិយោគទៅលើធនាគារចល័ត និងសហការក្នុងភាពជាដៃគូជាមួយស្ថាប័នដៃគូជាច្រើនទៀត ដើម្បីពង្រីកទីផ្សារនិងផ្តល់ជូនអតិថិជនប្រើប្រាស់សេវាកម្មរបស់យើងកាន់តែងាយស្រួលជាងមុន”។លោកបន្តថា “យើងត្រូវវិនិយោគច្រើនលើប្រព័ន្ឋបច្ចេកវិទ្យា ដើម្បីបង្កើនការគ្របដណ្តប់ទីផ្សារ និងពង្រីកសក្តានុពលទីផ្សាររបស់យើង”។

ជាមួយគ្នានេះ លោក សាយ សូនីប្រធាននាយកដ្ឋានប្រតិបត្តិទីផ្សារនៃគ្រឹះស្ថានមី​ក្រូហិរញ្ញវត្ថុប្រាសាក់បានមានប្រសាសន៍ឲ្យដឹងផងដែរថា ក្នុងឆ្នាំ២០១៩នេះ យើងមានផែនការអនុវត្តយុទ្ធសាស្រ្ត នៃការរីកចម្រើនជាមួយគ្នារបស់យើង ជាមួយនឹងអតិថិជនសហគ្រាសខ្នាតតូចបំផុត ខ្នាតតូច និងខ្នាតមធ្យម ដែលមានស្រាប់ និងការបង្កើនអត្ថប្រយោជន៍ជាអតិបរមា និងការផ្តល់ភាពងាយស្រួលដល់ដៃគូអាជីវកម្ម និងអតិថិជនប្រាក់បញ្ញើសន្សំ តាមរយៈការវិនិយោគទៅលើបច្ចេកវិទ្យាហិរញ្ញវត្ថុ FinTech ដូចជាពង្រីកការផ្តល់សេវាទូទាត់រហ័ស, CSS, បន្ថែមម៉ាស៊ីនឆូតកាត បន្ថែមអេធីអឹម និងសេវាធនាគារចល័ត និងពង្រីកសាខាឱ្យច្រើនបន្ថែមទៀតនៅទូទាំងប្រទេស។

លោកបន្តថា “យើងក៏ប្តេជ្ញាចិត្តក្នុងការកែលំអសេវាអតិថិជន នាំមកនូវនាវនុវត្តន៍ និងការផ្ដល់ជូនសេវានិងផលិតផលថ្មីៗ ដើម្បីបម្រើអតិថិជនរបស់យើងឱ្យកាន់តែប្រសើរឡើង”។

លោកឧកញ៉ាហួត អៀងតុងអគ្គនាយកគ្រឹះស្ថានមីក្រូហិរញ្ញវត្ថុកសិករលីមីតធីតបានមានប្រសា​សន៍ឲ្យដឹងផងដែរថា សុខភាពក្នុងវិស័យនេះ មានភាពល្អមែនទែនសម្រា​ប់ឆ្នាំ២០១៨ ដែលទើបបញ្ចប់នាពេលថ្មីៗនេះ ហើយឆ្នាំ២០១៩ លោករំពឹងថា វិស័យនេះនឹងបន្តមានភាពល្អប្រសើរ ដោយសារកត្តាសុខសន្តិភាព ស្ថេរភាព នយោបាយ កំនើនសេដ្ឋកិច្ចរ៉ឹងមាំរបស់កម្ពុជា។លោកបន្តថា ស្ថានភាពបែបនេះ បានគាំទ្រដំនើររីកចម្រើនក្នុងវិស័យនេះ ដោយសារចំនួនអតិថិជនមិនមានការប្រែប្រួលទេ។

​សម្រាប់គោលដៅនៅឆ្នាំថ្មីនេះ លោកឧកញ៉ាហួត អៀងតុងបានឲ្យដឹងថា សម្រាប់គ្រឹះស្ថានមីក្រូហិរញ្ញវត្ថុកសិករ នឹងផ្តោតលើគោលដៅអតិថិជនថ្មីៗ និងឆ្លើយតបតាមតម្រូវការអតិថិជន ដោយយើងបានសិក្សាពីទីផ្សាររួចហើយ ហេតុនេះ ក្រុមហ៊ុននឹងពង្រីកសក្តានុពលរបស់ខ្លួននៅឆ្នាំ២០១៩នេះ”៕

​