ដោយវុត្ថា

​ភ្នំពេញ: ឱបាត់ដំបងបណ្តូលចិត្តអើយ រៀមសូមកៀកកើយកែវកុំប្រកែក ទឹកដីនេះ ពិតជាមានមន្តស្នេហ៍ដ៏លន្លង់លន្លោច និងមានសម្បត្តិធម្មជាតិប្រវត្តិសាស្រ្ត វប្បធ៌មរាប់មិនអស់ ទើបខេត្តមួយនេះហាក់ដូចជាមានមន្តពិសេស ក្នុងការទាក់ទាញភ្ញៀវទេសចរណ៍ ជាតិ អន្តរជាតិ។

​ជាក់ស្តែងកាលពីរាត្រីឆ្លងឆ្នាំសាកលឆ្នាំ២០១៨ ឈានចូលឆ្នាំ២០១៩កន្លងមកនេះ ភ្ញៀវទេសចរណ៍ជាតិ អន្តរជាតិរហូតដល់ជាង៦០,០០០នាក់ បានទៅកាន់ទឹកដីពោរ​ពេញដោយអនុស្សាវរីយ៍រាប់មិនអស់នេះ។

គណៈអភិបាលនៃអភិបាលខេត្តបាត់ដំបងលោកងួន រតនៈដែលបានអញ្ជើញចូលរួមការរៀបចំពិធីបុណ្យឆ្លងឆ្នាំសកល២០១៨ ឈានចូលឆ្នាំ ២០១៩ នៅទីធ្លាសួនច្បារ “សួននាគសន្តិភាព” ស្ថិតក្នុងភូមិកម្មករ សង្កាត់ស្វាយប៉ោ ក្រុង-ខេត្តបាត់ដំបង បានថ្លែងថា ការឆ្លងឆ្នាំចាស់ ផ្លាស់ចូលឆ្នាំថ្មី២០១៩នេះ វាពិតជាផ្តល់នូវអត្ថន័យដ៏ជ្រាលជ្រៅ និងជាថ្ងៃប្រវត្តិសាស្ត្ររបស់ប្រជាជនកម្ពុជាទាំងមូល ជាពិសេសបងប្អូនប្រជាពលរដ្ឋ ក្នុងខេត្តបាត់ដំបងយើងផ្ទាល់។

លោកបានគូសបញ្ជាក់ពីគោលបំណង និងសារៈសំខាន់នៃថ្ងៃនេះផងដែរថា ទី១  ផ្តោតសំខាន់រំលឹកដល់ថ្ងៃខួប៤០ឆ្នាំ នៃទិវាថ្ងៃជ័យជម្នះ៧មករា១៩៧៩-៧មករា២០១៩ និងទី២ ដើម្បីរំលឹកខួបនៃថ្ងៃបញ្ចប់សង្គ្រាមទាំងស្រុងរវាងខ្មែរ និងខ្មែរ ក្រោមគោលនយោ​បាយឈ្នះ-ឈ្នះរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា នៅក្នុងចន្លោះឆ្នាំ១៩៩៨ដល់២០១៨។

ជាមួយនឹងការរៀបចំបានយ៉ាងល្អប្រសើរនូវបរិយាកាសសប្បាយរីករាយ ខេត្តបាត់​ដំបងបានផ្ទុកនូវរតនៈសម្បត្តិជាច្រើន ដូចជាស្ទឹងសង្កែ ដែលល្បីល្បាញក្នុងបទចម្រៀងនៃទសវត្សរ៍ឆ្នាំ៥០ និងទសវត្សរ៍ឆ្នាំ៦០ មានសំណង់បុរាណសន្សល់ទុកពីសម័យអាណានិគមនិយមបារាំងច្រើនជាងគេ មានព្រះវិហារ សារៈមន្ទីរបុរាណ មានផ្ទះបុរាណ មានរមណីយដ្ឋានធម្មជាតិជាច្រើនដូចជាអាងទឹកកំពីងពួយ ភ្នំសំពៅ ប្រាសាទឯកភ្នំជាដើម។

អភិបាលរងខេត្តលោក សឿម ប៊ុនរិទ្ធិ បានឲ្យដឹងផងដែរថា ក្នុងថ្ងៃឆ្លងឆ្នាំសកល២០១៩នេះ រដ្ឋបាលខេត្តបាត់ដំបងបានជំរុញឲ្យអាជ្ញាធរក្រុង និងស្រុកបាណន់ ត្រូវយកចិត្តទុកដាក់ខិតខំបង្កការរៀបចំ តាមទីកន្លែងកម្សាន្តនៅក្នុងតំបន់ខ្លួន ដើម្បីបម្រើការកម្សា​ន្តជូនប្រជាពលរដ្ឋ និងភ្ញៀវទេសចរជាតិ អន្តរជាតិ ដើម្បីបង្កឲ្យមានការរាំលេងតាមទីកន្លែងកម្សាន្តនានាផងដែរ។

តាមរបាយការណ៍អំពីចំនួនភ្ញៀវទេសចរជាតិ អន្តរជាតិ ដែលមកកម្សាន្តក្នុងខេត្តបាត់ដំបង ថ្ងៃបុណ្យឆ្លងឆ្នាំថ្មីឆ្នាំសកល២០១៩នេះ មានចំនួនសរុប៦៥,៩៩៦នាក់ ក្នុងនោះ ក្រុងបាត់ដំបង មានចំនួនសរុប៥២,៧៨៥នាក់៕

ដោយវុត្ថា

បាត់ដំបង៖ ក្រសួងវប្បធម៌ និងវិចិត្រសិល្បៈ  និងអាជ្ញាធរខេត្តបាត់ដំបងគ្រោងនឹងសម្ពោធដាក់សារមន្ទីរ និងសាលតាំងពិព័រណ៍រូបថតនៃមន្ទីរវប្បធម៌ខេត្តបាត់ដំបង នៅពាក់កណ្តាលខែមករា ឆ្នាំ ២០១៩ ខាងមុខនេះ ក្រោយពីការជួយជុលរួចរាល់ដើម្បីឲ្យភ្ញៀវជាតិ និងអន្តរជាតិ បានចូលទស្សនានូវសមិទ្ធិផលនានា ដែលខេត្តសម្រេចបាននាពេលកន្លងមកនេះ។

លោកស្រី កែវ សុភាព ប្រធានមន្ទីរវប្បធម៌ និងវិចិត្រសិល្បៈខេត្តបាត់ដំបងបានឲ្យ ដឹងកាលពីពេលថ្មីៗនេះថា អគារសារមន្ទីរខេត្ត នឹងត្រូវរក្សានិងរៀបចំទុកដាក់តាំងនូវវត្ថុបុរាណនានា ដែលប្រមែប្រមូលបានពីទីកន្លែងតំបន់ផ្សេងៗ យកមករក្សាទុកនៅទីនេះ ដើម្បីការថែរក្សាទុកផង និងរៀបចំដាក់តាំងបម្រើភ្ញៀវទេសចរជាតិ និងអន្តរជាតិចូលទស្សនា រហូតដល់ធ្វើការជួសជុលកែលម្អជាទ្រង់ទ្រាយធំសាជាថ្មីឡើងវិញ ទាំងអគារសារមន្ទីរ ក៏ដូចជាសាលពិព័រណ៍រូបថតផងដែរ។

លោកស្រីបន្តថា “គម្រោងជួសជុលធំនៃអគារសារមន្ទីរនេះគឺជាថវិកាបដិភាគ រវាងក្រសួងវប្បធម៌ និងវិចិត្រសិល្បៈ ជាមួយនឹងដៃគូផ្តល់ជំនួយអភិវឌ្ឍន៍របស់អង្គការហ្វុកស៊ី ក្នុងនោះក្រសួងជាអ្នកគ្រប់គ្រង និងអនុវត្តគម្រោងដោយផ្ទាល់ ដោយបានរៀបចំដួសជុលធ្វើការកែលម្អនូវទីតាំងទាំងនេះ អស់រយៈពេលប្រមាណជាង២ឆ្នាំកន្លងមកហើយ”។ លោកស្រីបន្តថា “ការកែលម្អរៀបចំ និងជួសជុលសាលពិព័រណ៍រូបថតនេះ គឺជាការចំណា​យថវិកាផ្ទាល់របស់ក្រសួងតែម្តង”។

មកដល់ពេលនេះ គម្រោងជួសជុលកែលម្អអគារទាំង២នេះបានបញ្ចប់ស្ថាពរហើយ។ នៅសេសសល់តែការងាររៀបចំ និងទុកដាក់ថ្មចម្លាក់ នៅក្នុងសារមន្ទីរ ដើម្បីឲ្យមានរបៀបរៀបរយ និងសណ្តាប់ធ្នាប់តែប៉ុណ្ណោះ។

លោកស្រី កែវ សុភាព ក៏បានបញ្ជាក់ឲ្យដឹងថា ក្រោយពីបញ្ចប់គម្រោងជួសជុល និងរៀបចំសម្អាតនូវទីធ្លាទាំង២នេះ មន្ទីរបានដាក់សំណើទៅរដ្ឋបាលខេត្ត និងក្រសួងវប្បធម៌រួចរាល់ហើយ ដោយគ្រោងដាក់សម្ពោធ និងបើកឲ្យដំណើរការជាផ្លូវការដើម្បីបម្រើជូនដល់ភ្ញៀវទេសជាតិ និងអន្តរជាតិចូលទស្សនានៅថ្ងៃទី១១ ខែមករា ឆ្នាំ២០១៩ ឆាប់ៗខាងមុខ នេះប្រសិនបើគ្មានការកែប្រែទេនោះ។

សារមន្ទីរ និងសាលពិព័រណ៍រូបថតខេត្តនៃមន្ទីរវប្បធម៌ និងវិចិត្រសិល្បៈខេត្តបាត់ដំបង មានទីតាំងស្ថិតក្នុងភូមិសាស្ត្រភូមិកំពង់ក្របី សង្កាត់ស្វាយប៉ោ ក្រុង-ខេត្តបាត់ដំបង តាមបណ្តោយផ្លូវខេត្តលេខ១ ជាប់ប្របដងស្ទឹងសង្កែ នាត្រើយខាងលិចទីប្រជុំជនក្រុងបាត់ដំបង (ជាប់វត្តដំរីស) ត្រូវបានធ្វើការជួសជុលជាថ្មី នូវអតីតសារមន្ទីរជាតិក្នុងខេត្តបាត់ដំបង ដែលបានកសាងនៅក្នុងសម័យសង្គមរាស្ត្រនិយម នៃព្រះករុណាព្រះបរមរតនកោដ្ឋ ព្រះបាទព្រះនរោត្តមសីហនុ ក្នុងចន្លោះនៃទសវត្សឆ្នាំ៦០កន្លងមក ហើយត្រូវបានបន្សល់នូវភាពចាស់ទ្រុឌទ្រោម នៅក្នុងចន្លោះរបបខ្មែរក្រហម និងពីការបំផ្លិចបំផ្លាញក្នុងរបបខ្មែរក្រហម និងជនខិលខូចមួយចំនួន។

ក្រោយថ្ងៃរំដាះ ៧មករា ១៩៧៩ និងចន្លោះក្នុងសម័យរដ្ឋកម្ពុជាទាំងសារមន្ទីរ និងសាលពិព័រណ៍នេះ ត្រូវបានអាជ្ញាធរខេត្ត ក្រសួងវប្បធម៌និងវិចិត្រសិល្បៈ និងមន្ទីរជំនាញបានធ្វើការរៀបចំជួសជុលកែលម្អអគារសារមន្ទីរ និងសាលរៀបចំពិព័រណ៍រូបថតឲ្យមានសោភ័ណភាព និងរៀបចំទីតាំងនេះ ដើម្បីរៀបចំដាក់តាំងនូវពិព័រណ៍រូបថត ពីសកម្មភាពថ្នាក់ដឹកនាំសំខាន់ៗ និងសមិទ្ធផលរីកចម្រើននានាលើគ្រប់វិស័យក្នុងខេត្ត៕

ដោយ គង់ សូរិយា

ភ្នំពេញ៖ រមណីយដ្ឋាន​បែប​បូ​ទិ​កមួយ​បាន​បើក​ដំណើរការ​ក្នុង​ខេត្តសៀមរាប ដែលជា​ការផ្តល់សេវា​ក​ម្ម​បែប​បដិសណ្ឋារកិច្ច​ថ្មី​មួយ សម្រាប់​ខេត្ត​ដ៏​ទាក់ទាញ​ទេសចរណ៍​មួយ​នេះ។

លោក ឡាយ សំណាង ម្ចាស់​ភូមិឋាន​សំណាង​បានឱ្យដឹង​ក្នុង​ពិធី​សម្ភោ​ធ​គំរោង​របស់លោក​មានឈ្មោះ One Boutique កាលពី​ថ្ងៃទី១ មករា​កន្លងមកនេះ​ថា ការអភិវឌ្ឍ​ភូមិឋាន​សំណាង​ក្លាយជា​បូ​ទិ​ក និង​សំណង់​នានា គឺ​ដើម្បី​បំពេញតម្រូវការ​ប្រជា​ពលរ​ដ្ធ​ខ្មែរ ដែល​ចង់​រស់នៅក្នុង​បែប​ស៊ី​វិ​ល័យ។ លោក​បន្តថា គម្រោង​ភូមិឋាន​សំណាង ខេត្តសៀមរាប គឺ​គម្រោង​ទីមួយ ដែល​បាន​ចេញលក់​ប្រកបដោយ​ជោគជ័យ ដែលមាន​ការគាំទ្រ​ពី​សំណាក់​អតិថិជន។

ក្នុងឱកាស​នោះដែរ ម្ចាស់​ភូមិឋាន​សំណាង បាន​បរិច្ចាគ​ដី​ចំនួន១២ឡូ​តិ៍ ដល់​វីរ​សិល្បករ និង​សិល្បការិនី និង​បណ្ឌិតសភា​ល្បុក្កតោ សម្រាប់​បង្វឹក​ហាត់​កុលបុត្រ​ខ្មែរ ផងដែរ ដែលមាន​ផ្ទៃដី​ចំនួន៦៥០ម៉ែត្រក្រឡា​សុ​រប​ជា​ទឹកប្រាក់​ចំនួន១៤ម៉ឺន​ដុល្លារ។

ទីប្រឹក្សា​រាជរដ្ឋាភិបាល​កម្ពុជា​លោក ជំទាវ​យូ អយ​បាន​មានប្រសាសន៍​នៅក្នុង​ពិធី​សម្ភោ​ធ​គំរោង​ខាងលើ​ថា គំរោង​នេះ​បាន​ឆ្លុះបញ្ចាំង​ឱ្យឃើញ​ពី​ភាព​រីកចម្រើន​លើ​គ្រប់​វិស័យ ជាពិសេស​វិស័យ​អចលនទ្រព្យ​នៅ​កម្ពុជា ដែល​កំពុងមាន​សក្ដានុពល​រីកលូតលាស់​ឥតឈប់ឈ​រ​ក្នុង​ការសាងសង់​សំណង់​នៅ​កម្ពុជា ក្នុង​ភាព​ស៊ីវីល័យ ដើម្បី​បំពេញតម្រូវការ​ប្រជាជន​ទាំងមូល។

លោកជំទាវ​បន្តថា “បច្ចុប្បន្ននេះ​វិស័យ​អចលនទ្រព្យ កាន់តែ​រីកចម្រើន​សម្បូរបែប ដោយមាន​ក្រុមហ៊ុន​អន្ដរជាតិ​មក​ដាក់ទុន​វិនិយោគ​ជា​បន្ដបន្ទាប់”៕