ដោយ រ៉ាណេត
ភ្នំពេញ៖ អ្នកជំនាញបានអះអាងស្រដៀងគ្នាថា ចរន្តនៃការវិនិយោគរបស់អ្នកវិនិយោគលើវិស័យអចលនទ្រព្យបានកំពុងងាកទៅកាន់តំបន់ជាយក្រុង ដែលធ្វើឲ្យតម្លៃដីធ្លីនៅជាយក្រុងភ្នំពេញឡើងថ្លៃ។
លោក ង៉ែត ជូ អ្នកវិភាគសេដ្ឋកិច្ចនៃក្រុមហ៊ុន Emerging Market Consulting បានមានប្រសាសន៍ឲ្យដឹងតាមទូរស័ព្ទនាល្ងាថ្ងៃទី៦ មិនានេះថា សម្រាប់ឆ្នាំ ២០១៩ -២០២០ នេះ តម្រូវការទីផ្សារនៃវិស័យអចលនទ្រព្យ នៅមណ្ឌលពាណិជ្ជកម្មមួយនេះ ទំនងជាដល់វេលាមួយគ្រប់គ្រាន់ ហើយបណ្តាអ្នកវិនិយោគនឹងងាក ទៅចាប់អារម្មណ៍នៅតំបន់ជាយក្រុងវិញ។
លោកបន្តថា “នាពេលបច្ចុប្បន្ននេះ បណ្តាអ្នកវិនិយោគក្នុងស្រុកនិងអន្តតរជាតិបានបង្ហាញពីគម្រោង នៃការវិនិយោគរបស់ខ្លួននៅតាមបណ្តាជាយក្រុងនានា ដែលឱ្យតំបន់ជាយក្រុងទាំងនោះមានសក្ដានុពលជាខ្លាំង ខណៈកណ្តាលក្រុងកាន់តែមានភាពចង្អៀត”។
លោក ង៉ែត ជូ បានលើកឡើងថា បច្ចុប្បន្ននេះ បើនិយាយពីតម្រូវការទីផ្សារនៅក្នុងរាជធានីភ្នំពេញហាក់មានថមថយបន្តិច ឬកៀកនឹងចំណុចឆ្អែត ខណៈដែលនៅមានក្រុមហ៊ុនមួយចំនួន បានត្រឹមបន្តសកម្មភាពអភិវឌ្ឍលើគម្រោងចាស់ ដែលនៅសល់តែប៉ុណ្ណោះ។
លោកថា ពេលនេះចំពោះតំបន់ ដែលមានសក្តានុពលលើវិស័យអចលនទ្រព្យ និងមានភាពទាក់ទាញ គឺតំបន់ជាយក្រុង ហើយក៏ជាតំបន់ដែលអាចផ្តល់ឱកាសល្អៗជាច្រើនដល់អ្នកវិនិយោគផងដែរ។
លោកបានបញ្ជាក់ថា តម្រូវការនៅក្នុងក្រុងពេលនេះ វាមិនមានភាពពុះកញ្ជ្រោលទៀតទេ ហើយបើមានគឺមានតែអ្នកវិនិយោគមកពីក្រៅស្រុកតែប៉ុណ្ណោះ ដែលអ្នកទាំងនោះធ្វើការវិនិយោគទៅសំណង់ធំៗ ដូចជា អាផាតមិន ឬខុនដូជាដើម ។ ដោយឡែកសម្រាប់អ្នកវិនិយោគ ក៏ដូចជាអ្នកអភិវឌ្ឍក្នុងស្រុកវិញ ភាគច្រើនគឺបានងាកទៅកាន់តំបន់ជាយក្រុងស្ទើរទាំងស្រុង ដោយសារនៅតំបន់ជាយក្រុងអាចផ្តល់ចំណេញដល់ពួកគេបានច្រើន។
លោកបានបន្តទៀតថា “ការវិនិយោគនៅតំបន់ជាយក្រុង គឺមានភាពងាយស្រួល ដោយសារតែតម្លៃនៅមានកម្រិត និងមានវិសាលធំទូលាយ ហើយការវិនិយោគក៏ស្ថិតក្នុងកម្រិតមធ្យម និងក្រោមមធ្យម ដូចជាការអភិវឌ្ឍសំណង់លំនៅដ្ឋានតម្លៃមធ្យមជាដើម”។
អ្នកនាងអាន សុធីតានាយិកាប្រចាំប្រទេសនៃក្រុមហ៊ុន CBRE Cambodia បានមានប្រសាសន៍ឲ្យដឹងកាលពីពេលថ្មីៗនេះផងដែរថា តម្លដីធ្លីនៅតំបន់ជាយក្រុងបាននិងកំពុងឡើងថ្លៃខ្ពស់នៅឆ្នាំនេះ ដោយសារការវិនិយោគលើហេដ្ឋារចនាសម្ព័ន្ឋរបស់រដ្ឋាភិបាល និងកំនើនប្រជាសាស្រ្ត បានទាក់ទាញឲ្យក្រុមហ៊ុនធំៗជាច្រើនពង្រីកខ្លួនទៅកាន់តំបន់ជាយក្រុងភ្នំពេញ ដែលជាតំបន់មានសក្តានុពលសំរាប់អភិវឌ្ឍន៍។
អ្នកនាងបន្តថា “ការឡើងថ្លៃនៅតំបន់ជាយក្រុងមានភាពខុសៗគ្នា អាស្រ័យលើទីតាំង និងសកម្មភាពនៃការវិនិយោគរបស់អ្នកវិនិយោគនានា”។ អ្នកនាងបន្ថែមថា “ផ្នែកដែលលេចធ្លោជាងគេវិស័យអចលនទ្រព្យនាឆ្នាំ២០១៩នេះ គឺកំនើនតម្លៃដីធ្លីនៅជាយក្រុង កំនើនសណ្ឋាគារល្បីៗ និងទីផ្សារការិយាល័យ”៕
