រដ្ឋមន្ត្រីពាណិជ្ជកម្មថា កម្ពុជាគឺជាប្រទេសបើកចំហរល្អជាងគេក្នុងតំបន់

October 3, 2018

ដោយ វុត្ថា

ភ្នំពេញ៖ រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ បានអះអាងថា កម្ពុជា គឺជាប្រទេសបើកចំហរសេដ្ឋកិច្ច ជាមួយគោលនយោបាយគាំពារវិនិយោគល្អជាងគេនៅក្នុងតំបន់ ជាពិសេសគ្មានការរើសអើង ចំពោះការធ្វើពាណិជ្ជកម្មឆ្លងកាត់ព្រំដែន ហើយវិនិយោគិនបរទេស មានសិទ្ធិកាន់កាប់ភាគហ៊ុនបានទាំងស្រុង និងអាចប្រមូលប្រាក់ចំណេញពីការធ្វើធុរកិច្ចបាន១០០ភាគរយ។

នៅក្នុងជំនួបពិភាក្សាការងារ ដើម្បីផ្សព្វផ្សាយឱកាសវិនិយោគ ជូនប្រតិភូធុរជននៃបណ្តាប្រទេសអាស៊ាន និងអាមេរិកមកពីក្រុមហ៊ុនធំៗចំនួន១០ ដឹកនាំដោយលោក Michael W. Michalak អនុប្រធានជាន់ខ្ពស់ និងជានាយកប្រចាំតំបន់នៃក្រុមប្រឹក្សាធុរកិច្ចអាស៊ាន-អាមេរិក កាលពីរសៀលថ្ងៃទី២ ខែតុលា ម្សិលមិញនេះ លោក ប៉ាន សូរស័ក្តិបានពន្យល់ប្រតិភូធុរជនអាស៊ាន-អាមេរិក អំពីគោលដៅនៃយុទ្ធសាស្ត្រចតុកោណ ដំណា ក់កាលទី៤ ដែលផ្តោតសំខាន់លើការកែទម្រង់ ដើម្បីធានាការអភិវឌ្ឍសង្គមសេដ្ឋកិច្ចដោ យសមធម៌ និងវឌ្ឍនភាពនៃការរៀបចំសេចក្តីព្រាងច្បាប់ E-Commerce ដែលបច្ចុប្បន្នកំពុងត្រូវបានពិនិត្យ និងកែសម្រួលចុងក្រោយ ដោយក្រុមប្រឹក្សាអ្នកច្បាប់នៃទីស្តីការគណៈរដ្ឋមន្ត្រី ដើម្បីឱ្យមានសង្គតិភាព (ចំណុចស្រប) ជាមួយច្បាប់ដ៏ទៃទៀតរបស់កម្ពុជា។

លោករដ្ឋមន្ត្រីបានលើកឡើងពីឧត្តមភាពរបស់កម្ពុជា ដូចជាលក្ខណៈពិសេសនៃទីតាំងភូមិសាស្ត្រ (បេះដូងនៃអាស៊ាន) គោលនយោបាយអភិវឌ្ឍន៍ឧស្សាហកម្ម កម្លាំងពលកម្មវ័យក្មេង តំបន់សេដ្ឋកិច្ចពិសេស និងគម្រោង Plus One ដែលផ្តល់ភាពបត់បែនខ្ពស់ដល់វិនិយោគិន ក្នុងការប្រើប្រាស់ទឹកដីកម្ពុជា ធ្វើជាមូលដ្ឋានផលិតកម្ម ដើម្បីនាំចេញទីកាន់ទីផ្សារអន្តរជាតិ នៅក្រោមប្រព័ន្ធអនុគ្រោះពន្ធផ្សេងៗ ផ្តល់ប្រទេសជាដៃគូរបស់កម្ពុជា។

លោក ប៉ាន សូរស័ក្តិ ក៏បានសន្យាជួយសម្របសម្រួលរាល់បញ្ហាទាំងឡាយ ដើម្បីឈានទៅសម្រេចបានស្ថានភាពឈ្នះ-ឈ្នះទាំងអស់គ្នា គឺការវិនិយោគដើម្បីបង្កើតប្រាក់ចំណេញ និងបែងចែងកំណើនដោយសមធម៌ កាត់បន្ថយផលប៉ះពាល់បរិស្ថាន និងធានានូវការអភិវឌ្ឍប្រកបដោយចីរភាព ស្របតាមយុទ្ធសាស្ត្រចតុកោណថ្មី។

ជាការឆ្លើយតប លោក ម៉ាយឃើល មីឆាលឡាក់ តំណាងឱ្យប្រតិភូធុរជនអាស៊ាន-អាមេរិក បានថ្លែងអំណរគុណចំពោះលោករដ្ឋមន្ត្រី ដែលបានរៀបចំជំនួបដ៏មានសារៈសំខាន់ថ្ងៃនេះ ដើម្បីឱ្យតំណាងក្រុមហ៊ុនទាំងអស់បានស្វែងយល់កាន់តែច្បាស់ អំពីគោលនយោបាយ និងចក្ខុវិស័យរបស់រាជរដ្ឋាភិបាលកម្ពុជា ព្រមទាំងសក្តានុពលវិនិយោគលើវិស័យអទិភាពផ្សេងៗ រាប់តាំងពីសេដ្ឋកិច្ច ថាមពល បរិស្ថាន សុខាភិបាល ហេដ្ឋារចនាសម្ព័ន្ធ វប្បធម៌ កសិកម្ម និងការអភិវឌ្ឍធនធានមនុស្ស៕

ឧកញ៉ា សៀ រិទ្ធី លូកដៃកាន់តែជ្រៅក្នុងវិស័យ SME ដើម្បីដោះស្រាយបញ្ហាប្រឈម

October 3, 2018

0

ដោយ គង់ សូរិយា

ភ្នំពេញ៖ លោកឧកញ៉ា សៀ រិទ្ធី ប្រធានក្រុមប្រឹក្សាភិបាលនៃក្រុមហ៊ុន World Bridge Group ដែលល្បីល្បាញលើការវិនិយោគអចលនទ្រព្យ ពេលនេះលោកបាននិងកំពុងលូកដៃចូលក្នុងវិស័យថ្មីមួយទៀត គឺវិស័យសហគ្រាសធុនតូចនិងមធ្យម (SME) ដើម្បីជួយជំ រុញវិស័យនេះឲ្យមានភាពរីកចម្រើន។

មានប្រសាសន៍ក្នុងពិធីបើកសិក្ខាសាលាស្តីពី ការអភិវឌ្ឍចង្កោមសហគ្រាសធុនតូចនិងមធ្យមថ្មី កាលពីថ្ងៃទី២ ខែតុលា ឆ្នាំ២០១៨កន្លងមក លើកឡើងស្របគ្នានេះដែរ លោកឧកញ៉ា សៀ ឬទ្ធី បានមានប្រសាសន៍ថា ដោយសារតែក្រុមហ៊ុនលោកមានចក្ខុវិស័យស្របគ្នា នឹងស៊ីសង្វាក់ជាមួយរដ្ឋាភិបាលលើគោលនយោបាយ និងទិសដៅអភិវឌ្ឍន៍ចង្កោមសហគ្រាសធុនតូច និងមធ្យម ទើបក្រុមការងារដែលមានសមត្ថភាពបានពិគ្រោះយោបល់ពីអាទិភាពនិងលទ្ធភាព ក្នុងការអភិវឌ្ឍផែនការមួយនេះ ឲ្យកាន់តែមានសក្ដានុពល និងការទទួលខុសត្រូវ និងមានការចូលរួមទ្រទ្រង់ជាលក្ខណៈស្តង់ដារអន្តរជាតិ។

លោកឧកញ៉ាបន្តថា “ដើម្បីឲ្យការចងក្រងជាបណ្ដុំសហគ្រាសធុនតូច និងមធ្យមកាន់តែមានប្រសិទ្ធភាព ខ្ញុំបានចុះហត្ថលេខា ដើម្បីធ្វើកិច្ចជាមួយស្ថាប័នអន្តរជាតិធំពីរ គឺអង្គការសហប្រជាជាតិ (UNDP) និងអង្គការសហប្រជាជាតិដើម្បីអភិវឌ្ឍន៍ឧស្សាហកម្ម (UNIDO) ដើម្បីធ្វើឲ្យប្រាកដថា អ្វីដែលពួកយើងធ្វើនឹងទទួលបានប្រយោជន៍ខ្ពស់ និងមានប្រសិទ្ធភាពខ្ពស់។

រដ្ឋលេខាធិការក្រសួងឧស្សាហកម្ម និងសិប្បកម្ម លោកគឹម ទូចបានមានប្រសាសន៍ឲ្យដឹងផងដែរថា ដើម្បីអោយខ្សែសង្វាក់ផលិតកម្មរបស់វិស័យសហគ្រាសធុនតូច និងមធ្យមនៅកម្ពុជាកាន់តែប្រសើរឡើង មិនមែនមានតែជាការងារក្រសួងតែមួយទេ តែត្រូវមានការចូលរួមពីគ្រប់ភាគីពាក់ព័ន្ធដូចជាវិស័យឯកជន ជាពិសេសពីវិស័យនេះផ្ទាល់តែម្ដង។ លោកបន្តថា វិស័យមួយនេះប្រាកដជាពិបាករីកចម្រើនណាស់ បើមិនមានការលើកទឹកចិត្តពីសំណាក់រដ្ឋាភិបាល និងដៃគូពាក់ព័ន្ធនានា ហើយបើសិនជាវិស័យនេះមិនមានការរីកចម្រើននោះទេ កំណើនសេដ្ឋកិច្ចរបស់កម្ពុជា ក៏ពិបាកនឹងសម្រេចបានទៅតាមផែនការនោះដែរ។

លោកបន្តថា “ហេតុនេះទើបរដ្ឋាភិបាល ដែលមានក្រសួងឧស្សាហកម្ម និងសិប្បកម្មតែងតែជំរុញ និងលើកទឹកចិត្តរាល់ការច្នៃប្រឌិតនានារបស់សហគ្រិន ក្នុងវិស័យសហគ្រាសធុនតូចនិងមធ្យមកម្ពុជា”៕

តើជាន់នីមួយៗ នៃមជ្ឈមណ្ឌលពាណិជ្ជកម្មលំដាប់ពិភពលោក Thai Bunrong ត្រូវរៀបចំយ៉ាងដូចម្តេច?

October 3, 2018

0

ដោយ ស៊ីវ ម៉េង

ភ្នំពេញ៖ ខណៈការបុកគ្រឹះ ដើម្បីទប់ដីនៅជុំវិញបរិវេណអាគារពាណិជ្ជកម្មលំដាប់ពិភពលោកបានឈានដល់ជិតបញ្ចប់ និងការបុកគ្រឹះសាងសង់អាគារនេះ នឹងចាប់ផ្តើមនៅពេលឆាប់ៗនេះ គំរោងមជ្ឈមណ្ឌលពាណិជ្ជកម្មលំដាប់អន្តរជាតិ Thai Bunrong Twin Tower នឹងក្លាយជា Landmark ដ៏អស្ចារ្យមួយសម្រាប់រាជធានីភ្នំពេញ។

តើរចនាសម្ព័ន្ឋនិងជាន់និមួយៗនៃអាគារភ្លោះកំពស់៥៦១ម៉ែត្រនេះ មានការរៀបចំយ៉ាងដូចម្តេច គេហទំព័រ Propertyarea.asia សូមនាំមិត្តអ្នកអានទៅសិក្សាស្វែងយល់ទាំងអស់គ្នា។

យោងតាមវីដេអូនៃគំរោងនេះបានឲ្យដឹងថា គំរោងនេះមានអនុមាតក្បាលដីទំហំ៥០,០០០ម៉ែត្រការ៉េ ដែលមានទំហំអាគារសរុប១,៥២លានម៉ែត្រការ៉េ ដោយបែងចែកពីជាន់ទី១ ដល់ជាន់ទី១០ជាទីតាំងផ្សារទំនើបលំដាប់អន្តរជាតិ ការិយាល័យលំដាប់5A សណ្ឋាគារលំដាប់ផ្កាយ៥ អាផាតម៉ិន និងលំនៅដ្ឋានយ៉ាងប្រណីត។ ក្នុងចំណោមជាន់ទាំង១០ផ្នែកខាងក្រោម គឺពីជាន់ទី១ដល់ជាន់ទី៤អាគឺជាហាងលក់ទំនិញ ដែលមានទំហំ១៦៣,០០០ម៉ែត្រការ៉េ ដែលមានផ្លូវថ្មើជើង មានដំបូលប្រវែង១២ម៉ែត្រ ដែលផ្តល់ម្លប់សម្រាប់អតិថិជនអាចសម្រាក និងទទួលបានផាសុខភាព។

នៅពីលើហាងលក់ទំនិញ គឺជាច្រកចូលសំខាន់ដែលមានការបំពាក់អេក្រង់ LED ដ៏ធំ ដែលអាចផ្សាយពាណិជ្ជកម្មបានគ្រប់សណ្ឋាន។

ជាមួយគ្នានេះមជ្ឈមណ្ឌលនេះក៏មានហាល ចំនួន១១ជាន់ ដែលមានសួនច្បារចំនួន១១ជាន់ មានសួនច្បារ ហាងអាហារ សកម្មភាពកំសាន្ត។ នៅលើជាន់ទី១២មានលំនៅដ្ឋានដ៏ប្រណីតដែលមានផ្ទះ៨០០យូនីត និងមានទំហំ២៥០,០០០ម៉ែត្រការ៉េ ដោយផ្ទះមានទំហំចាប់ពី៦០ដល់២៦៨ម៉ែត្រការ៉េ។ លំនៅដ្ឋាននេះមានការរចនាយ៉ាងពិសេសសំរាប់មនុស្សលំដាប់ខ្ពស់ និងឥស្សរជននានា។

ជាន់ទី១២ ដល់ជាន់ទី២១ គឺជាមជ្ឈមណ្ឌលពាណិជ្ជកម្ម ការទិញលក់ភាគហ៊ុន ការជួញដូរភាគហ៊ុនលំដាប់ពិភពលោក។ ជាការិយាល័យស្នាក់ការកណ្តាលសម្រាប់អភិវឌ្ឍន៍សេដ្ឋកិច្ចអាស៊ាន ដែលការបង្កើតសហគមន៍សេដ្ឋកិច្ចអាស៊ាន បានធ្វើឲ្យពិភពលោកសម្លឹងមកកម្ពុជាកាន់តែច្រើនជាងមុន និងច្បាស់ជាងមុន។ មានសាលប្រជុំ ទីតាំងរៀបចំពិធនានាដែលអាចទទួលភ្ញៀវបានចាប់ពី១០០០ដល់៣០០០នាក់ជាដើម។

វីដេអូដដែលបានឲ្យដឹងទៀតថា ចាប់ពីជាន់ទី២៣ ដល់ជាន់ទី៦០ជាទីតាំងការិយាល័យ ដែលមានកម្រិត5A ដែលក្នុងមួយជាន់មានទំហំជាង៣៨០០ម៉ែត្រការ៉េ ដែលមានការបំពាក់សម្ភារៈការិយាល័យប្រណីតលំដាប់កំពូល និងវាក្លាយជាទីតាំងការិយាល័យប្រកបផាសុខភាព និងការគ្រប់គ្រងលំដាប់អន្តរជាតិ។

ជាន់ទី៦១ដល់ជាន់ទី១០០ គឺជាទីតាំងសម្រាប់អាផាតម៉ិនលំដាប់ផ្កាយ៥ ដែលមានការគ្រប់គ្រងសេវាកម្មបែបសណ្ឋាគារ សម្រាប់អតិថិជនតាមចំណង់ចំណូលចិត្ត និងយូនីតនិមួយៗមានគ្រប់ទំហំ ដើម្បីឆ្លើយតបតម្រូវការបស់អតិថិជនលំដាប់ខ្ពស់។

ចាប់ពីជាន់ទី១០១ ដល់ជាន់១៣២ ជាទីតាំងសណ្ឋាគារលំដាប់ផ្កាយ៥ ដែលមានការរចនាយ៉ាងពិសេស និងអាចគយគន់ទិដ្ឋភាពក្រុងភ្នំពេញបានយ៉ាងប្រណីត និងជាន់ទី១៣៣ ជាទីតាំងសម្រាប់គយគន់ទេសភាពក្រុងភ្នំពេញ និងបើកឲ្យភ្ញៀវទេសចរណ៍ជាតិ អន្តរជាតិអាចទស្សនាបាន។

ពិសេសជាងនេះ គឺសណ្ឋាគារដែលមានការបែងចែកខុសៗគ្នា គឺជាសណ្ឋាគារសម្រាប់ទទួលប្រធានាធិបតី នាយករដ្ឋមន្ត្រី និងឥស្សរជនលំដាប់ខ្ពស់មកពីជុំវិញពិភពលោក។

អ្វីកាន់តែពិសេសគឺជាន់កំពូលនៃអាគារនេះ អាចចតឧទ្ឋម្ភាចក្រអាចចុះចតបាន ដែលមានច្រកចេញចូលយ៉ាងងាយស្រួល៕

សិក្សា៖ វិធីសាស្ត្រលក់អចលនទ្រព្យឆាប់ដាច់គួរធ្វើដូចម្តេច?

October 3, 2018

0

ដោយ គង់ សូរិយា

ភ្នំពេញ៖ ក្នុងពិភពនៃការទិញ លក់អចលនទ្រព្យ អ្នកជំនាញមានវិធីសាស្ត្រផ្សេងៗគ្នាក្នុងការផ្សព្វផ្សាយ និងចចារជាមួយអតិថិជនរបស់ខ្លួន ដើម្បីឲ្យអចលនទ្រព្យរបស់ខ្លួនលក់ដាច់លឿន។

វាមិនមែនជាការងាយស្រូលដូចត្រឹមការនិយាយនោះទេ តែវិធីសាស្ត្រមួយចំនួនខាងក្រោមនេះទំនងជាមួយលោកអ្នកបាន។

បញ្ជីគុណភាព

យោងតាមការសិក្សាស្រាវជ្រាវមួយដែលធ្វើឡើង ដោយសមាគមជាតិភ្នាក់ងារអចលនទ្រព្យ (អាមេរិក) កាលពីពេលថ្មីៗនេះបានរកឃើញថា ការស្រាវជ្រាវដែលទាក់ទងនឹងអចលនទ្រព្យនៅក្នុង Google.com បានកើនឡើង២៥៣ភាគរយ នៅបួនឆ្នាំចុងក្រោយនេះ ហើយនៅពេលនេះប្រមាណ៩០ភាគរយ នៃមានបំណងទិញផ្ទះ បានប្រើប្រាស់អ៊ីនធឺណិត ដើម្បីធ្វើការស្វែងរកទិញផ្ទះរបស់ពួកគេ។

ការស្រាវជ្រាវថ្មីៗនេះពី We Are Social របស់សិង្ហបុរីក៏បានរកឃើញផងដែរថា ការប្រើប្រាស់អ៊ីនធឺណិតនៅប្រទេសកម្ពុជា បានកើនឡើង៤០០ភាគរយនៃចន្លោះឆ្នាំ២០១៥ និង២០១។

ដោយសារការកើនឡើងយ៉ាងរហ័ស នៃអ្នកប្រើប្រាស់អ៊ីនធឺណិតនៅប្រទេស កម្ពុជា ដែលបានកើនឡើងដល់ទៅ៦,៧០លាននាក់ នៅក្នុងឆ្នាំ២០១៦កន្លងមកនេះ បញ្ជីរគុណភាពអចលនទ្រព្យ ក៏បានក្លាយទៅជារឿងដែលមានសារៈសំខាន់យ៉ាងខ្លាំង។

ដំបូន្មានដើម្បីទទួលបានបញ្ជីគុណភាពខ្ពស់

ការបង្ហោះរូបភាព

រូបភាពបង្ហោះ គុណភាព និងសោភ័ណភាពនៃរូបភាពមានសារៈសំខាន់ណាស់ ដើម្បីទាក់ទាញទឹកចិត្តអតិថិជន ព្រោះថារូបមួយសន្លឹកមានន័យរាប់មិនអស់ ។ វាមានសារៈសំខាន់ណាស់ ដោយរូបដែលអ្នកបង្ហោះ គឺជារូបនៃអចលនទ្រព្យដែលអ្នកកំពុងលក់ពិតប្រាកដមែន ដោយសាររូបនេះអាចបង្ហាញពីភិនភាគពិតៗ នៃអចនលទ្រព្យទៅកាន់អ្នកទិញ។

សរសេរពិពណ៌នាពីអចលនទ្រព្យរបស់អ្នក

អ្នកលក់អចលនទ្រព្យ អាចផ្តល់ព័ត៌មានលម្អិតឲ្យបានច្រើន តាមដែលអ្នកអាចធ្វើទៅបាន នៅពេលដែលអ្នកសរសេរពិពណ៌នាបញ្ជីគុណភាព។ សាកស្រមៃថាខ្លួនអ្នកជាអ្នកទិញ។ តើអ្នកនឹងចង់បានគុណភាពយ៉ាងណាខ្លះពីអចលនទ្រព្យមួយនេះ។

ផ្តល់ព័ត៌មានទំនាក់ទំនងដែលល្អបំផុត

ការផ្សព្វផ្សាយបស់អ្នកនឹងមិនបានផលប្រយោជន៍អ្វីនោះទេ ប្រសិនបើគេមិនអាចទាក់ទងអ្នកបាន។ ហេតុនេះហើយទើបអ្នកត្រូវធានាថា ព័ត៌មានលម្អិតសម្រាប់ទំនាក់ទំនងជាមួយអ្នកមានភាពល្អ និងផ្តល់ភាពជឿជាក់បំផុត ។ ចុះលេខទូរស័ព្ទពីរខ្សែ និងអាសយដ្ឋានអ៊ីមែល ប្រសិនបើពេលខ្លះអ្នកមិនមានពេលលើកទូរស័ព្ទ។

ត្រូវធានាគុណភាពអចលនទ្រព្យរបស់អ្នកល្អបំផុត

ធម្មតាទេ ការលក់ផលិតផលអ្វីមួយ មិនត្រឹមតែទាមទារផលិតផលនោះមានគុណភាពនោះទេ តែក៏ត្រូវមានការផ្សព្វផ្សាយឲ្យបានល្អផងដែរ។ ហេតុនេះចំណងជើងអចលនទ្រព្យ ជាភាសាខ្មែរ និងអង់គ្លេស ឬភាសាចិន អ្នកត្រូវតែធ្វើវាឲ្យបានល្អ។ ប្រសិនបើវាមានភាពសាមញ្ញ ងាយយល់ នោះគេនឹងរកឃើញអចលនវត្ថុរបស់អ្នកមុនគេ។

ការដាក់តម្លៃអចលទ្រព្យរបស់អ្នក

ការដាក់តំលៃទាមទារឲ្យមានការប្រុងប្រយ័ត្នបំផុត ព្រោះបើអចលនទ្រព្យរបស់អ្នកដាក់តំលៃខ្ពស់ពេក អចលនទ្រព្យរបស់អ្នក នឹងមិនទទួលបានការចាប់អារម្មណ៍នោះទេ។ ប្រសិនបើតម្លៃនោះអាចតថ្លៃបាន អ្នកគួរតែធានាថា គេអាចដឹងតាមរយៈការពិពណ៌នារបស់អ្នក។

ប្រសិនបើលក្ខខណ្ឌនៃការទិញ ឬជួលអាចតថ្លៃបាន អ្នកក៏ត្រូវធ្វើយ៉ាងណាឲ្យគេដឹងតាមរយៈការពិពណ៌នារបស់អ្នកផងដែរ។

ការឆ្លើយតបជាមួយនឹងការសាកសួររកទិញឲ្យបានសមស្រប

ការឆ្លើយតបលឿនមានសារៈសំខាន់ណាស់ នៅពេលដែលអ្នកទទួលបានការចាប់អារម្មណ៍សាកសួរពីអតិថិជនរបស់អ្នក។ អ្នកគួរតែឆ្លើយតបជាមួយនឹងពួកគេឲ្យបានលឿនបំផុត។ ប្រសិនបើអ្នកមិនឆ្លើយតបលឿនទេ នោះពួកគេនឹងរកមើលវត្ថុថ្មីទៀត និងអ្នកលក់ថ្មីទៀតដែលយកចិត្តទុកដាក់នឹងពួកគេ។

ការបង្កើតបញ្ជីរថ្មីមួយនៅក្នុង Realestate.com.kh មានភាពងាយស្រួលយ៉ាងខ្លាំង ទោះបីជាអ្នកលក់ឯកជន ម្ចាស់ដី ឬភ្នាក់ងារអចលនទ្រព្យ។ អ្នកអាចលក់ដោយខ្លួនឯងបាន ហើយពួកយើងមិនយកកម្រៃជើងសានោះឡើយ។

ការធ្វើឲ្យបញ្ជីរបស់អចលនទ្រព្យរបស់អ្នកកាន់តែប្រសើរ

ដោយសារបច្ចុប្បន្ន អ្នកអាចធ្វើឲ្យបញ្ជីអចនលទ្រព្យសម្រាប់លក់ ឬជួល របស់អ្នកឲ្យប្រសើរឡើង ដោយដាក់វានៅជាមួយវេបសាយអចលនទ្រព្យមួយចំនួនតូច ដែលមាននៅក្នុងប្រទេសកម្ពុជាក៏ដោយ ក៏អ្នកអាចចំណាយត្រឹមតែបន្តិចបន្តួចប៉ុណ្ណោះ ដើម្បីឲ្យអចលនទ្រព្យរបស់អ្នកទទួលបានការចាប់អារម្មណ៍ និងមើលឃើញលឿន៕

រដ្ឋមន្ត្រីទេសចរណ៍ ដាក់កំហិតឲ្យ លោក យន្ត មីន ដោះស្រាយបញ្ហាពាក់ព័ន្ធទេសចរណ៍ក្នុងខេត្តព្រះសីហនុ

October 2, 2018

0

thong khon vs yon min — រដ្ឋមន្ត្រីក្រសួងទេសចរណ៍ លោក ថោង ខុន / លោក យន់ មីន ប្រធានគណៈកម្មការអភិវឌ្ឍន៍ទេសចរណ៍ខេត្ត និងជាអភិបាលខេត្តព្រះសីហនុ

ដោយ វុត្ថា

ភ្នំពេញ៖ រដ្ឋមន្ត្រីក្រសួងទេសចរណ៍ លោក ថោង ខុន បានដាក់កំហិតឲ្យលោក យន់ មីន ប្រធានគណៈកម្មការអភិវឌ្ឍន៍ទេសចរណ៍ខេត្ត និងជាអភិបាលខេត្តព្រះសីហនុ ព្រមកទាំងថា្នក់ដឹកនាំមខេត្តព្រះសីហនុទាំងអស់ ត្រូវខិតខំបន្ថែមទៀតក្នុងការគ្រប់គ្រងកាកសំណល់រាវក្នុងក្រុង ពិសេសចំពោះមុខត្រូវខិតខំទប់ស្កាត់ឱ្យបាន នូវទឹកកខ្វក់មិនឱ្យហូរចូលសមុទ្រ។

លោក ថោង ខុន ក៏បានស្នើឱ្យរដ្ឋបាលក្រុងជំរុញឱ្យក្រុមហ៊ុនប្រមូលសំរាម ក្នុងក្រុងព្រះសីហនុ ត្រូវយកចិត្តទុកដាក់បន្ថែមក្នុងការបំពេញការងារ និងបន្ថែមឧបករណ៍ មធ្យោបាយ សម្ភារៈចាំបាច់ ដើម្បីបង្កើនប្រសិទ្ធភាពការងារក្នុងការប្រមូលសំរាម និងកាកសំណល់ក្នុងក្រុង ពិសេសត្រូវពង្រាយធុងដាក់សំរាមនៅគ្រប់ផ្ទះប្រជាពលរដ្ឋ ត្រូវមានដេប៉ូសំរាម និងពង្រីកមធ្យោបាយដឹកជញ្ជូនសំរាមទាំងនោះឱ្យបានជាប់ជាប្រចាំ ព្រមជាមួយការយកចិត្តទុកដាក់ ជំរុញការជួលជុលផ្លូវទៅកាន់កន្លែងចាក់សំរាម ឱ្យបានឆាប់រហ័ស សំដៅធ្វើឱ្យទីក្រុងព្រះសីហនុទាំងមូល ក្លាយជាទីក្រុងស្អាតគ្មានសំរាម។

ត្រូវខិតខំទប់ស្កាត់សំណង់អនាធិបតេយ្យ និងគ្រប់គ្រងការដ្ឋានសាងសង់ឱ្យបានល្អ ពិសេសការដឹកជញ្ជូនបញ្ចេញកាកសំណល់ សាងសង់ឱ្យបានទាន់ពេលវេលា។ ត្រូវរាយការណ៍ជូនក្រសួងជំនាញ ដើម្បីសុំជួយជួសជុលផ្លូវក្នុងក្រុងអោយបានរហ័ស ក្រោយរដូវភ្លៀវនេះ។ ខាងផ្នែកទេសចរណ៍ ត្រូវខិតខំសហការគ្នាជាមួយក្រុង និងគណកម្មាធិការគ្រប់គ្រងឆ្នេរ ធ្វើការគ្រប់គ្រងឆ្នេរឲ្យបានល្អខិតខំសម្អាត និងគ្រប់គ្រងឆ្នេរខ្សាច់ថ្មីៗ ដើម្បីឱ្យប្រជាជនបានកម្សាន្ត។ ត្រូវគ្រប់គ្រងផ្តល់អាជ្ញាបណ្ណទេសចរណ៍ ឱ្យបានគ្រប់មូលដ្ឋានអាជីវកម្ម និងត្រូវខិតខំបណ្តុះបណ្តាលធនធានមនុស្ស ដើម្បីឆ្លើយតបនឹងសំណូមពរការងារ។ អាជ្ញារធរខេត្ត ក្រុង និងមន្ទីរជំនាញត្រូវខិតខំគ្រប់គ្រងការដាក់ស្លាកសញ្ញាអាជីវកម្មឱ្យបានល្អតាមការណែនាំរបស់ក្រសួងជំនាញ។រដ្ឋមន្ត្រីបញ្ជាក់ឲ្យដឹង។

លោករដ្ឋមន្ត្រីបន្តថា ថ្វីដ្បិតគណៈកម្មការអភិវឌ្ឍន៍វិស័យទេសចរណ៍ខេត្តជួបប្រទះនូវបញ្ហាខ្វះខាតមួយចំនួន ដូចជាធនធានមនុស្ស សម្ភារៈប្រើប្រាស់ ក៏ដូចជាថវិកាក៏ពិតមែន ប៉ុន្តែសមាជិកនៃគណៈកម្មការអភិវឌ្ឍន៍វិស័យទេសចរណ៍ ត្រូវខិតខំអនុវត្តការងារជំនាញដែលក្រសួងបានដាក់ចុះ ពិសេសនៅពេលសង្កេតឃើញមានបញ្ហាមិនប្រក្រតី ត្រូវរាយការណ៍ទៅកាន់ក្រសួងជំនាញ ដើម្បីធ្វើការណែនាំឱ្យបានទាន់ពេលវេលា ពីព្រោះការរាយការណ៍ពីព័ត៌មានជារឿងដ៏ចាំបាច់បំផុត ដើម្បីក្រសួង-ស្ថាប័នជំនាញ មានផែនការជួយដោះស្រាយទាន់ពេលវេលា ព្រោះខេត្តព្រះសីហនុ ជាតំបន់សេដ្ឋកិច្ចពហុបំណងមួយដ៏សំខាន់នោះ មានការអភិវឌ្ឍប្រកបដោយនិរន្តរភាព និងក្លាយជាគោលដៅទេសចរណ៍ស្អាត និងបៃតង ដើម្បីទទួលបានអ្នកវិនិយោគ និងទេសចរជាតិ-អន្តរជាតិឱ្យបានកាន់តែច្រើន។

លោកអភិបាលយន្ត មីន បានលើកឡើងថា អជ្ញាធរខេត្តតែងតែយកចិត្តទុកដាក់គ្រប់គ្រងសន្តិសុខ សណ្ដាប់ធ្នាប់ បញ្ហាអនាម័យ បរិស្ថាន សំរាម កាកសំណល់រាវ ដីធ្លី សំណង់ ការគ្រប់គ្រងអាជីវកម្មទេសចរណ៍ជាដើម ដែលសម្រេចបានលទ្ធផលនាពេលកន្លងមក ហើយក៏នៅមានបញ្ហាប្រឈមនានា ក្នុងខេត្តព្រះសីហនុផងដែរ ដើម្បីរួមគ្នាពិភាក្សារិះរកវិធីសាស្ត្រដោះស្រាយឱ្យបានល្អ ប្រកបដោយប្រសិទ្ធភាពជាបន្ត៕

ភ្ញាក់ផ្អើល! កូរ៉េខាងត្បូង គ្រោងវិនិយោគគំរោងដ៏ទាន់សម័យនៅកូរ៉េខាងជើង

October 2, 2018

0

ដោយ វុត្ថា

ភ្នំពេញ៖ ក្រោយជំនួបជាប្រតិ្តសាស្ត្ររវាងមេដឹកនាំកូរ៉េខាងជើង និងខាងត្បូងជាបន្តបន្ទាប់នាពេលកន្លងមកនេះ ប្រទេសកូរ៉េខាងត្បូងមានបំណងបង្កើតទីក្រុងឆ្លាត (Smart City) នៅក្នុងប្រទេសកូរ៉េខាងជើង ដើម្បីរឹតចំណងការទូត និងសហប្រតិបត្តិការរវាងប្រទេសទាំងពីរឲ្យកាន់តែស្និតស្នាល ដែលជាគូសត្រូវនឹងគ្នាអស់រយៈពេលជាច្រើនឆ្នាំ។

បើតាមរបាយការណ៍សារព័ត៌មាន Govlnsider បានចេញផ្សាយកាលពីពេលថ្មីនេះ ថា បើគ្មានការរំខានពីទីក្រុងព្យុងយ៉ាងនោះទេ អង្គការអន្តរជាតិនៃរដ្ឋាបាលទីក្រុងសេអ៊ូល និងវិទ្យាស្ថាន ICT នឹងសាងសង់ទីក្រុងឆ្លាត នៅក្នុងទឹកដីនៃទីក្រុងព្យុងយ៉ាងប្រទេសកូរ៉េខាងជើង។

លោក Lee Kyong-yol អគ្គលេខាធិការរបស់អង្គការ World Smart Sustainable Cities Organization បានឲ្យដឹងថា អង្គការទីក្រុងប្រកដោយភាពវ័យឆ្លាត ពិភពលោក (World Smart Sustainable Cities Organization) នឹងសាងសង់ទីក្រុងក្រុងឆ្លាតនៅក្នុងទីព្យុងយ៉ាង ក្នុងគោលបំណងធ្វើការរួមគ្នា ជាមួយបណ្តាទីក្រុងកូរ៉េខាងជើង ដើម្បីអោយមានការអភិវឌ្ឍន៍ល្អ និងមានភាបឆ្លាតវៃ។

ទីក្រុងព្យុងយ៉ាង នឹងអនុញ្ញាតឲ្យចូលរួមជាមួយទីក្រុងសេអ៊ូល ទីក្រុងប៉េកាំង ទីក្រុងសឹង្ហបុរី ទីក្រុងតូក្យូ និងទីក្រុងវ៉ាស៊ីនតោន ក្នុងការសម្ភោធបណ្តាញទីក្រុងឆ្លាង ពោលគឺនឹងចាប់ផ្តើមសម្ពោធជាផ្លូវការ នៅពាក់កណ្តាលខែកញ្ញាឆ្នាំ២០១៩ ខាងមុខនេះ។ វេទិកាមួយនឹងត្រូវបានផ្តល់ឱ្យអភិបាលក្រុងនានា មកពីប្រទេសទាំងនេះចូលរួម ហើយត្រូវបានគេដាក់ឈ្មោះថា បណ្តាញ North East Asian Smart City។

កិច្ចចរចាសន្តិភាព រវាងប្រទេសកូរ៉េទាំងពីនៅក្នុងឆ្នាំនេះ បានធ្វើអោយទីក្រុងព្យុងយ៉ាង និងទីក្រុងសេអ៊ូលនៅឆ្នាំនេះ ដើរតួនាទីយ៉ាងសំខាន់ក្នុងគំនិតផ្តួចផ្តើម ក្នុងការបង្កើតទីក្រុងឆ្លាតនេះ (Smart City)៕

Smart Axiata វិនិយោគ ១,៥លានដុល្លារ ដើម្បីជំរុញអភិវឌ្ឍន៍ក្នុងវិស័យបច្ចេកវិទ្យា

October 2, 2018

0

ដោយ គង់ សូរិយា

ភ្នំពេញ៖ ក្រុមហ៊ុន Smart Axiata បានវិនិយោគ១,៥លានដុល្លារ ដើម្បីជំរុញអភិវឌ្ឍន៍វិស័យបច្ចេកវិទ្យា ដោយសហការជាមួយក្រសួងអប់រំយុវជន និងកីឡា និងក្រសួងប្រៃសណីយ៍ និងទូរគមនាគមន៍។

លោក Thomas Hundt នាយកប្រតិបត្តនៃក្រុមហ៊ុន Smart Axiata បានមានប្រសាសន៍ឲ្យដឹង ក្នុងពិធីចុះអនុស្សរណយោគយល់គ្នាជាត្រីភាគី ដើម្បីជំរុញធនធានបច្ចេកវិទ្យា ព័ត៌មាន និងទូរគមនាគមន៍របស់កម្ពុជានេះ ធ្វើឡើងនាព្រឹកថ្ងៃទី ២ ខែតុលាឆ្នាំ ២០១៨នេះដោយមានការចូលរួមពីថ្នាក់ដឹកនាំក្រសួងទាំងពីរថា នេះជាគំនិតផ្ដួចផ្ដើមក្នុងគោលបំណងរួមចំណែក ជំរុញកំណើនសេដ្ឋកិច្ចកម្ពុជាក្នុងយុគ្គសម័យឌីជីថល។ គំរោងនេះ ក្រុមហ៊ុននឹងបរិច្ចាកទឹកប្រាក់ចំនួន១,៥លានដុល្លារសម្រាប់កម្មវិធីចំនួន២ គឺកម្មវិធីអាហារូបករណ៍ Smart Edu និងកម្មវិធីអភិវឌ្ឍនិស្សិតសកលវិទ្យាល័យ Smart Edu ( USDP) ។

លោកបន្តថា “ការចុះអនុស្សារណៈខាងលើ ក៏មានការដាក់សម្ពោធកម្មវិធីអភិវឌ្ឍន៍ និស្សិតសាកលវិទ្យាល័យ (USDP) ដោយ នឹងជ្រើសរើសពូកែ ៤៨នាក់ ដើម្បីចូលរួមអភិវឌ្ឍន៍ផ្នែកទ្រឹស្ដីបទពិសោធន៍ ការធ្វើពិសោធន៍អជីវកម្មក្នុងរយៈពេល១៣ថ្ងៃ។ ជាពិសេសក្រុមដែលឈ្នះនឹងទទួលបានប្រាក់រង្វាន់ និងបេក្ខជនឆ្នើមចំនួន៥នាក់ នឹងអាចចុះកម្មសិក្សារយៈពេល២ខែ នៅក្រុមហ៊ុន Axiata ក្នុងប្រទេសម៉ាឡេស៊ី។

លោកបណ្ឌិតសភាចារ្យហង់ ជួនណារ៉ុន រដ្ឋមន្ត្រីក្រសួងអប់រំ បានលើកឡើងផងដែរថា ការចុះអនុស្សារណៈត្រីភាគីនេះ ជាឱកាសដ៏ប្រសើរសម្រាប់និស្សិតកម្ពុជា ដែលគ្មានលទ្ធភាពអាចទទួលបានឱកាសសិក្សា និងអាចចូលរួមប្រកួតប្រជែងក្នុងកម្មវិធីអភិវ ឌ្ឍនិស្សិតសកលវិទ្យាល័យ ( USDP)។

រដ្ឋលេខាធិការក្រសួងប្រៃសណីយ៍ និងទូរគមនាគមន៍ លោកសារ៉ាក់ ខាន់បានថ្លែងថា ក្រុមហ៊ុន Smart Axiata បានប្រើប្រាស់មូលនិធិកសាងសមត្ថិភាព ការស្រាវជ្រាវ និងអភិវឌ្ឍន៍យ៉ាងត្រឹមត្រូវ ក្នុងការជំរុញជាខ្លាំងក្នុងការអភិឌ្ឍធនធានមនុស្ស លើការអភិវឌ្ឍភាពជាអ្នកដឹកនាំផ្តោតលើផ្នែកឌីជីថល៕

រដ្ឋមន្ត្រីរ៉ែ៖ កម្ពុជានឹងទាញយកប្រេង និងរ៉ែមាសនៅក្នុងអាណត្តិថ្មី

October 2, 2018

0

ដោយស៊ីវ ម៉េង

ភ្នំពេញ៖ រដ្ឋមន្ត្រីក្រសួងរ៉ែ និងថាមពលអះអាងថា កម្ពុជានឹងទាញយកធនធានប្រេងកាត និងរ៉ែមាសបាននៅក្នុងអាណត្តិថ្មីនេះ ដែលធ្វើឲ្យការប្រមូលចំណូលពីធនធានរ៉ែនឹងកើនឡើងខ្ពស់។

លោក ស៊ុយ សែម រដ្ឋមន្ត្រីក្រសួងរ៉ែ និងថាមពល បានថ្លែងលើកឡើងនៅក្នុងពិធីអបអរសាទរទិវាមនុស្សចាស់កម្ពុជា និងទិវាមនុស្សចាស់អន្តរជាតិ នៅថ្ងៃទី១ ខែតុលា ឆ្នាំ២០១៨កន្លងមកថា នៅក្នុងអណត្តិថ្មីនេះយើងរំពឹងថា នឹងប្រមូលបានរ៉ែមាសពីក្នុងដី និងទាញយកធនធានចេញពីវិស័យប្រេងកាតវិញ ព្រោះយើងនឹងមានអណ្តូងប្រេងកាតមួយ ដែលអាចរំពឹងថា នឹងផ្តល់ប្រេងដល់ប្រទេសជាតិយើង នៅក្នុងអណត្តិទី៦នេះ ដើម្បីដាក់ចូលក្នុងកញ្ចប់ថវិកាជាតិសម្រាប់យកមកអភិវឌ្ឍន៍សង្គម។

លោកបន្តថា “វិស័យទាំង៣នៅក្រោមការគ្រប់គ្រងរបស់ក្រសួង ពិសេសវិស័យថាមពលបានជម្រុញគ្រប់គ្រងឲ្យអគ្គិសនីមានស្ថិរភាព គុណភាព សុវត្ថិភាព ដែលកម្ពុជាអាចមានអគ្គិសនីគ្របដណ្តប់ទូទាំងប្រទេស ក្នុងតម្លៃទាប និងគោរពឲ្យបានអំពីបញ្ហាបរិស្ថាន។ លោកបន្តថា ជាក់ស្តែងគិតមកដល់ពេលនេះ វិស័យអគ្គិសនី ក្រសួងបានអភិវឌ្ឍន៍ពីគ្មានអគ្គិសនីប្រើប្រាស់ រហូតមកដល់ពេលនេះ យើងមានប្រភពថាមពលជាង ២ពាន់មេហ្គាវ៉ាត់ នឹងបានអូសខ្សែភ្លើងបានគ្រប់ដណ្តប់ជាង៨៥ភាគរយ នៅតាមភូមិក្នុងក្របខណ្ឌទូទាំងប្រទេស និងជម្រុញតភ្ជាប់បណ្តាញឲ្យបានគ្រប់ភូមិទូទាំងប្រទេសនៅក្នុងឆ្នាំ២០២០ ខាងមុខនេះ។

លោករដ្ឋមន្ត្រីបានបញ្ជាក់ឲ្យដឹងផងដែរថា យើងមានរោងចក្រស៊ីម៉ងត៍ធំៗ ដែលបានកំពុងផ្គត់ផ្គង់ស៊ីម៉ង់ក្នុងស្រុកតាមតម្រូវការ ដោយបានកាត់បន្ថយជាអតិបរិមានៃការនាំចូល ខណៈដែលនៅទស្សវត្សទី៨០ និង៩០ យើងបាននាំចូលស៊ីម៉ងត៍១០០ភាគរយ ។ដូច្នេះពាក់ព័ន្ធនឹងវិស័យថាមពល រ៉ែ និងវិស័យប្រេងកាត នៅក្នុងអណត្តិទី៦ថ្មីនេះ យើងនឹងប្រមូលផលចំណូលនៅគ្រប់វិស័យ បានច្រើនជាងអាណត្តិណាៗទាំង ក្នុងការចូលរួមចំណែកបង្កើនប្រាក់ចំណូលដល់សេដ្ឋកិច្ចជាតិ។

លោកបណ្ឌិតម៉ី កល្យាណប្រធានក្រុមប្រឹក្សាភិបាលនៃវិទ្យាស្ថានសិក្សាដើម្បីការអ ភិវឌ្ឍបានថ្លែងថា ការប្រមូលចំណូលរបស់ជាតិមានភាពល្អប្រសើរ ដោយសារការដឹកនាំប្រកបដោយឆន្ទៈរបស់ថ្នាក់ដឹកនាំនៃអគ្គនាយកដ្ឋានពន្ឋដា ប៉ុន្តែវឌ្ឍនភាពនេះនៅមិនទាន់សម្រេចបានតាមអ្វីដែលយើងចង់បាននៅឡើយទេ ព្រោះចំណូលពន្ឋអាចទទួលបានច្រើនជាងនេះ ប្រសិនជាបើយើងប្រមូលបាននិងធ្វើការងារកាន់តែមានប្រសិទ្ឋិភាព។

លោកបន្តថា “ការប្រមូលពន្ឋទាមទារការអត់ធ្មត់ និងឆន្ទៈរ៉ឹងមាំ និងមានឆន្ទៈនយោបាយ ទើបយើងអាចប្រមូលបានច្រើន”៕

លោកបណ្ឌិតគីម ហ៊ាង៖ បញ្ហាដីឡូត៍នឹងរារាំងដល់ការអភិវឌ្ឍនាពេលអនាគត

October 2, 2018

0

ដោយ ស៊ីវ ម៉េង

ភ្នំពេញ៖ ស្របពេលចរន្តពុះដីឡូត៍លក់មានការកើនឡើងយ៉ាងគំហុក ក្នុងប៉ុន្មានឆ្នាំចុងក្រោយនេះ អ្នកជំនាញអចលនទ្រព្យកម្ពុជាបានអះអាងថា ការពុះដីឡូត៍លក់បើគ្មានការទប់ស្កាត់ និងមានយន្តការច្បាស់លាស់ នឹងធ្វើឲ្យប៉ះពាល់ឬរារាំងដល់ការអភិវឌ្ឍទីក្រុងនាពេលអនាគត។

លោកបណ្ឌិតគីម ហ៊ាងប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានមានប្រសាសន៍ឲ្យដឹងកាលពីថ្ងៃទី១ តុលាកន្លងមកថា បើនិយាយពីដីឡូត៍ និងសេចក្តីប្រកាសថ្មីៗរបស់ក្រសួងរៀបចំដែនដី នគរូបនីយកម្ម និងសំណង់វាជាពេលសមស្រប ហើយរំពឹងថាសេចក្តីប្រកាសថ្មីនេះនឹងមានប្រសិទ្ឋិភាព ប៉ុន្តែលោកគិតថាសេចក្តីប្រកាសថ្មីនេះហាក់មិនមានភាពច្បាស់លាស់នោះទេ។

លោកបន្តថា “ការអភិវឌ្ឍដីឡូត៍នៅកម្ពុជា ជិតក្លាយជាជំងឺមហារីកហើយ ខណៈដែលប្រជាពលរដ្ឋគិតថាល្អ ប៉ុន្តែផែនការ១០ទៅ២០ឆ្នាំក្រោយ ដីឡូត៍នឹងធ្វើឲ្យរដ្ឋាភិបាលពិបាកពង្រីកក្រុង អភិវឌ្ឍន៍ទីក្រុងឲ្យទំនើប និងទាន់សម័យ ដោយសារជាប់គាំងនឹងដីឡូត៍នេះឯង។

លោកលាងគង់ យិនស្ថាបនិកគេហទំព័រ Propertyarea.asiaដែលបានតាមដានការវិវត្តន៍នៅក្នុងផ្នែកនេះ បានយល់ស្របនឹងការលើកឡើងរបស់លោកបណ្ឌិតគីម ហ៊ាងដោយលោកបានថ្លែងថា តំបន់ដីឡូត៍ ជាតំបន់គ្មានការអភិវឌ្ឍ ហើយបើទោះជាមានការសាងសង់លំនៅដ្ឋាន ក៏លំនៅដ្ឋានតំបន់នោះគ្មានរបៀបរៀបរយនោះទេ ព្រោះអ្នកអភិវឌ្ឍដីឡូត៍ភាគច្រើនបានលក់តែដី ដោយមិនបានរៀបចំហេដ្ឋារចនាសម្ព័ន្ឋ ឬគំរូលំនៅដ្ឋានដែលគួរសាងសង់នៅលើដីនោះទេ។

លោកបានបន្តលើកជាសំណួរថា អ្នកអភិវឌ្ឍន៍ដីឡូត៍បានប្រកាសពីគំរោងផ្លូវ ប្រព័ន្ឋលូក្នុងគំរោងរបស់ខ្លួន ប៉ុន្តែសួរថាតើផ្លូវពួកគេធ្វើសមស្របតាមស្តង់ដា និងប្រព័ន្ឋបង្ហូរមានភាពច្បាស់លាស់ឬទេ? តើត្រូវបង្ហូរទៅទីណា ទឹកភ្លើងនៅឯណា? អ្នកណាជាអ្នកចំណាយជាដើម?។

លោកបន្តថា “អ្នកលក់ដីឡូត៍ភាគច្រើនចំណេញកប់ក្តោងរួចទៅហើយ ហេតុនេះបើទិញដីឡូត៍ដើម្បីយកចំណេញ គឺមានឳកាសចំណេញតិចតួចណាស់។

លោកលាងគង់ យិនបានសំណូមពរឲ្យក្រសួងរៀបចំដែនដី នគរូបនីយកម្មនិងសំណង់គួរកំណត់បទដ្ឋានច្បាស់លាស់មួយ សម្រាប់អ្នកអភិវឌ្ឍន៍ដីឡូត៍ គួរតែមានការរៀបចំប្រព័ន្ឋហេដ្ឋារចនាសម្ព័ន្ឋច្បាស់លាស់ គួរមានគំរូលំនៅដ្ឋានមួយសមស្របដែលអ្នកទិញដីឡូត៍ត្រូវសាងសង់ដូចៗគ្នា និងគួរកំណត់រយៈពេលច្បាស់លាស់ថា បន្ទាប់ពីទិញរយៈពេលប៉ុន្មានត្រូវសាងសង់លំនៅដ្ឋានរបស់ខ្លួន ព្រោះបច្ចុប្បន្នតំបន់ដីឡូត៍គ្មានការអភិវឌ្ឍច្បាស់លាស់នោះទេ។

បញ្ហានេះមិនត្រឹមតែកើតនៅកម្ពុជានោះទេ ប៉ុន្តែវាបានកើតមាននៅប្រទេសវៀតណាមផងដែរ ប៉ុន្តែរដ្ឋាភិបាលវៀតណាមបានចេញច្បាប់ទប់ស្កាត់ចរន្តពុះដីឡូត៍លក់បានទាន់ពេលវេលា៕

តើបដិវត្តន៍ឧស្សាហកម្មទី៤ ចូលរួមចំណែកអភិឌ្ឍន៍វិស័យទេសចរណ៍ដូចម្តេច

October 2, 2018

0

ដោយ គង់ សូរិយា

ភ្នំពេញ៖ ស្របពេលពិភពលោកទាំងមូល បាននិងកំពុងយកចិត្តទុកដាក់លើដំណោះស្រាយបច្ចេកវិទ្យា និងឌីជីថលលើគ្រប់ទិដ្ឋភាព ទាំងសេដ្ឋកិច្ចឌីជីថល (Digital Economy) ពាណិជ្ជកម្មអេឡិចត្រូនិក (E-Commerce) ការអភិឌ្ឍវិស័យទេសចរណ៍ឆ្លាតវៃ (Smart Tourism) តើកម្ពុជានឹងទាញយកផលប្រយោជន៍ពីវិស័យនេះយ៉ាងដូចម្តេច។

រដ្ឋមន្ត្រីក្រសួងទេសចរណ៍លោក ថោង ខុន បានលើកឡើង ក្នុងពិធីទិវាទេសចរណ៍ពិភពលោក ក្រោមប្រធានបទ “វិស័យទេសចរណ៍ និងនិន្នាការផ្លាស់ប្តូរទៅរកប្រព័ន្ធឌីជីថល ដែលបានធ្វើឡើងក្រុងព្រះសីហនុ នៅថ្ងៃទី១ ខែតុលាកន្លងមកថា បដិវត្តន៍ឧស្សាហកម្មទី៤ គឺជាអនាគតនៃការកសាងទេសចរណ៍ទីក្រុងវ័យឆ្លាត ដែលជាផ្នែកមួយដ៏សំខាន់មានការទំនាក់ទំនងគ្នាជាសាកលលើគ្រប់ផ្នែក មិនត្រឹមតែសម្រាប់សកម្មភាពសេដ្ឋកិច្ចប៉ុណ្ណោះទេ ប៉ុន្តែវាក៏ជាកត្តាលិករវិសាមញ្ញមួយ សម្រាប់យុគ្គសម័យឌីជីថល និងប្រព័ន្ធវ័យឆ្លាត ដោយផ្តោតសំខាន់ទៅលើឱកាស និងភាពប្រកួតប្រជែង ពោលគឺអ្វីៗគ្រប់យ៉ាងផ្អែកទៅលើបច្ចេកវិទ្យា ដែលជាវេទិកាថ្មីមួយនៃសេវាកម្មទេសចរណ៍ ក្នុងការផ្លាស់ប្តូរគំរូនៃការទំនាក់ទំនងពាណិជ្ជកម្ម ឆ្ពោះទៅការកាត់បន្ថយនូវភាពអវិជ្ជមានសម្រាប់ទេសចរ និងសហគមន៍ទេសចរណ៍។

លោកបន្តថា “និន្នាការផ្លាស់ប្តូរទៅរកប្រព័ន្ធឌីជីថល ផ្តល់អត្ថប្រយោជន៍ និងមានឥទ្ធិពលវិជ្ជមានយ៉ាងខ្លាំង ក្នុងឧស្សាហកម្មទេសចរណ៍ និងបដិសណ្ឋារកិច្ច។

លោកបន្តថា “វាជាវិធីដ៏ល្អបំផុតដើម្បីលើកកម្ពស់បទពិសោធន៍សម្រាប់ទេសចរ។ ការប្រើប្រាស់ប្រព័ន្ធរួមបញ្ចូលគ្នាវ័យឆ្លាត នៅលើទូរសព្ទដៃកាន់តែពេញនិយមសម្រាប់ទេសចរ ដោយផ្តល់នូវសេវាដ៏មានប្រសិទ្ធភាពខ្ពស់ សម្រាប់ការកក់សំបុត្រមធ្យោបាយធ្វើដំណើរតាមយន្តហោះ រថយន្តក្រុង និងរថភ្លើង កក់បន្ទប់សណ្ឋាគារ ភោជនីយ ដ្ឋាន ការទូរទាត់ប្រាក់តាមប្រព័ន្ធអេឡិកត្រូនិក ទិញទំនិញតាមអនឡាញ កាន់តែងាយស្រួលសម្រាប់ទេសចរ ដោយប្រើតែទូរ ស័ព្ទដៃ និងអ៊ីនធឺណិត គឺអាចធ្វើអ្វីៗបានគ្រប់យ៉ាង។

លោករដ្ឋមន្ត្រីបានបន្ថែមថា ស្របទៅនឹងក្របខ័ណ្ឌតំបន់ និងពិភពលោក នៃនិន្នាការទេសចរណ៍ឆ្ពោះទៅ ប្រព័ន្ធឌីជីថល និងប្រព័ន្ធវ័យឆ្លាត រាជរដ្ឋាភិបាលកម្ពុជា បានដាក់ចេញនូវគោលនយោបាយឆ្ពោះទៅរកសេដ្ឋកិច្ចឌីជីថល ឆ្លើយតបទៅនឹងបដិវត្តន៍ឧស្សាហកម្មទី៤ លើផ្នែកបច្ចេកវិទ្យា “ការប្រើប្រាស់នវានុវត្តន៍ និងភាពជឿនលឿនបច្ចេកវិទ្យា សំដៅពង្រឹងសមត្ថភាពកម្ពុជា សម្រាប់សមាហរណកម្មនៅក្នុងសេដ្ឋកិច្ចតំបន់ និងពិភពលោក។

ក្នុងបរិការណ៍នេះក្រសួងទេស ចរណ៍កម្ពុជា បាននឹងកំពុងផ្សារភ្ជាប់ចក្ខុវិស័យទេសចរណ៍ឆ្នាំ២០៣០ រួមជាមួយឧស្សាហកម្ម៤.០ ដែលមានលក្ខណៈគ្រប់ ជ្រុងជ្រោយ និងបរិយាប័ន្ន និងការអនុវត្តនូវយុទ្ធសាស្ត្រស្តីពី “ការអភិវឌ្ឍវិស័យទេសចរណ៍វ័យឆ្លាត ដោយបាននឹងកំពុងអនុវត្ត ការចុះបញ្ជីប្រព័ន្ធអាជ្ញាបណ្ណទេសចរណ៍តាមប្រព័ន្ធអនឡាញ ប្រព័ន្ធចំណាត់ថ្នាក់សណ្ឋាគារ និងភោជនីយដ្ឋានតាមអនឡាញ ប្រព័ន្ធគ្រប់គ្រងមគ្គទ្ទេសក៍ទេសចរណ៍តាមអនឡាញ ប្រព័ន្ធវាយតម្លៃចលនាប្រលងប្រណាំង “ទីក្រុងស្អាត រមណីយដ្ឋានស្អាត សេវាល្អ បដិសណ្ឋារកិច្ចល្អ” តាមប្រព័ន្ធ QR Code និងប្រព័ន្ធទូរស័ព្ទវ័យឆ្លាត (Mobile App) ព្រមជាមួយការរីកចម្រើននៃមធ្យោបាយទូទាត់សម្រាប់ទេសចរ តាមប្រព័ន្ធ QR Code មធ្យោបាយដឹកជញ្ជូនវ័យឆ្លាត (Pass App, Uber, Grab..) នៅក្នុងវិស័យទេសចរណ៍៕