ដោយវុត្ថា
ភ្នំពេញ: ប្រធានសមាគមអ្នកជំនាញអចលនទ្រព្យកម្ពុជា (CREA) បានអះអាងថា ការវិនិយោគ​អចលនទ្រព្យដែលត្រឹមត្រូវ និងមិនមានហានិភ័យ អ្នកវិនិយោគត្រូវមានមូលដ្ឋាននិងចំណេះដឹងគ្រប់ជ្រុងជ្រោយ។

លោកឃាង ពុទ្ធី ស្ថាបនិកក្រុមហ៊ុនអចលនទ្រព្យស្លឹករឹតរៀលធី និងជាប្រធានសមាគមអ្នកជំនាញអចលនទ្រព្យ បានមានប្រសាសន៍ឲ្យដឹងក្នុងសន្និបាតរបស់ក្រុមហ៊ុនអចលនទ្រព្យមួយកាលពីចុងសប្តាហ៍មុនថា ធ្វើអ្វីក៏ដោយត្រូវតែសំឡឹងទៅមុខ ទោះក្នុងការវិយោគក្នុងទំហំគម្រោងតូចៗក្តី យើងត្រូវសំឡឹងរកឪកាសទៅថ្ងៃក្រោយ ដើម្បីលក់គម្រោងធំៗ ដោយប្រើប្រាស់ផ្តោតលើជំនាញ និងចំណេះរបស់យើង។

លោកបន្តថា” ការវិយោគដ៏ត្រឹមត្រូវ គឺត្រូវតែមានចំនេះដឹងគ្រប់ជ្រុងជ្រោយ លើវិស័យអចលនទ្រព្យ ព្រោះក្នុងនាមយើងជាអ្នកជំនាញអចលនទ្រព្យ គ្មានអ្វីក្រៅពីមានចំនេះដឹង និងជំនាញច្បាស់លាស់នោះទេ”។លោកបន្តថា “ដូច្នេះអ្នកវនិនិយោគត្រូវស្វែងរក និងតាមដានព័ត៌មានទាក់ទង នឹងវិស័យអចលនទ្រព្យក្នុងស្ថានភាព សកលវូបនីយកម្មឲ្យបានជាប់ជាប្រចាំ”។

វិស័យអចលនទ្រព្យរបស់កម្ពុជា នៅតែមានសុខភាពល្អប្រសើរសម្រាប់ឆ្នាំបន្តបន្ទា​ប់ទៀត ជាពិសេស ដីធ្លី អគារពាណិជ្ជកម្ម អគារអាផាតម៉ិន និងខុនដូរនៅទូទាំងប្រទេស នឹងកើនឡើងលើសទ្វេរដងនៅត្រឹមឆ្នាំ២០៣០ខាងមុខ។

ជាមួយគ្នានេះ លោកឧកញ៉ាចេង ខេង ស្ថាបនិក និងអគ្គនាយកក្រុមហ៊ុនCPLបា​ន​ថ្លែងឲ្យដឹងផងដែរថា វិស័យចលនទ្រព្យគឺជាវិស័យដែលល្អ ក្នុងចំណោមវិស័យផ្សេងទៀតរបស់ប្រទេសកម្ពុជា ជាពិសេសវិស័យមួយនេះ នឹងនៅតែមានការរីកចម្រើនឥតឈប់ឈរនាពេលខាងមុខៗទៀត ហើយវិស័យនេះបានចូលរួមចំណែកយ៉ាងច្រើនក្នុងការគាំទ្រសេដ្ឋកិច្ច និងក្នុងការអភិវឌ្ឍន៍ប្រទេសឲ្យមានការរីកចម្រើនដូចបច្ចុប្បន្ន ដោយមានលំហូរចូលពីអ្នកវិនិយោគិនបរទេសកាន់តែច្រើ។
លោកបន្តថា “យ៉ាងណាក៏ដោយ ដើម្បីរកស៊ីវិស័យមួយនេះ មាននិរន្តភាព និងយូអង្វែងនោះ អ្នករកស៊ីត្រូវតែមានចំណេះ និងជំនាញពិតប្រកដទើបរកស៊ីបានយូរអង្វែង”។

លោកឧកញ៉ាចេង ខេងបានបន្តថា “បងប្អូនទាំងអស់គ្នាមានចំណេះហើយ អាចរកលុយបានត្រឹមតែមួយរស់ តែបើប្អូនទាំងអស់គ្នា ចង់មានបានក្នុងអាជីពអចលនទ្រព្យ មានកិត្តយស មុខមាត់ក្នុងសង្គម បងប្អូនត្រូវតែរៀនឲ្យមានជំនាញពិតប្រកដ នោះអាចរកលុយបានរាប់រយលានដុល្លារលើវិស័យមួយនេះ ហើយអ្នកទាំងអស់គ្នាក៏ត្រូវគោរពច្បាប់ និងអនុវត្តច្បាប់ឲ្យបានត្រឹមត្រូវ ក្នុងអាជីពរបស់ខ្លួនបើចង់រកស៊ីយូរអង្វែងនោះ”៕

​ដោយគង់ សូរិយា
​ភ្នំពេញ: ផ្លូវក្រវ៉ាត់ក្រុងទី៣ដែលមានប្រវែង៤៧,៦គីឡូម៉ែត្រ ពិតជាទាក់ទាញការចាប់អារម្មណ៍ជាច្រើនពីសំណាក់ប្រជាពលរដ្ឋ និងអ្នកវិនិយោគក្នុងវិស័យសំណង់និងអច​លនទ្រព្យ។

ផ្លូវដែលនឹងបើកការដ្ឋានសាងសង់នៅថ្ងៃទី១៤ មករាខាងមុខនេះ ក្រោមវត្តមានសម្តេចតេជោហ៊ុន សែននាយករដ្ឋមន្រ្តីកម្ពុជា នឹងត្រូវសាងសង់ជា៤គន្លង ។

តាមរបាយការណ៍របស់ក្រសួងសាធារណៈការ និងដឹកជញ្ជូនបានឲ្យដឹងថា ផ្លូវនេះមានប្រវែងសរុប៤៧.៦គីឡូម៉ែត្រ ជាប្រភេទផ្លូវ៤គន្លង ដោយមានទទឹងតួផ្លូវសរុប២៥ម៉ែត្រ។ សម្រាប់ផ្លូវរថយន្តមាន៤គន្លង មានទទឹង៣.៥០ម៉ែត្រ។ គន្លង និងផ្លូវទោចក្រយានយន្ត២គន្លងមានទំហំទទឹង២.២៥ ម៉ែត្រ។

តើផ្លូវដ៏សំខាន់នេះ នឹងឆ្លងកាត់តំបន់ណាខ្លះ និងចេញពីចំណុចណាគេហទំព័រPropertyarea.asia ធ្លាប់បានចេញផ្សាយជាច្រើនលើករួចមកហើយ ដោយផ្លូវនេះនឹងចាប់ពីផ្លូវជាតិលេខ៤ ម្តុំអូរដឹម ត្រង់គីឡូម៉ែត្រលេខ១៤+១០៥ ទៅចំណុចបញ្ចប់ភ្ជាប់ នឹងផ្លូវជាតិលេខ១ត្រង់គីឡូម៉ែត្រលេខ២៤+៨៤០។

ផ្លូវនេះក៏ឆ្លងកាត់ផ្លូវជាតិលេខ៣ត្រង់ ចំណុចគីឡូម៉ែត្រលេខ២១+២០០កាត់ផ្លូវជាតិ លេខ២ ត្រង់ចំណុចគីឡូម៉ែត្រលេខ២២+៨០០ និងកាត់ផ្លូវ ជាតិលេខ២១ ត្រង់ចំណុចគីឡូម៉ែត្រលេខ១៨+ ៤០០ និងផ្លូវខ្នែងប្រវែង៥.៣៧គីឡូម៉ែត្រ។
ជាមួយនឹងការចំណាយថវិកាដ៏ច្រើន២៥៩លានដុល្លារ ផ្លូវនេះនឹងត្រូវសាងសង់ស្ពានអាកាសជាច្រើន ដូចជា ស្ពានអាកាសកាត់ពីលើផ្លូវជាតិលេខ៤ ផ្លូវជាតិលេខ៣ ផ្លូវ ជាតិលេខ២ ផ្លូវជាតិលេខ២១ ផ្លូវជាតិលេខ១ និងស្ពានវែងមួយឆ្លងកាត់កោះអន្លង់ចិន ឆ្ពោះទៅឃុំឈើទាល ក្នុងស្រុកកៀនស្វាយ ខេត្តកណ្តាល៕

​ដោយរ៉ាវី
​កណ្តាលៈ ក្រុមអ្នកជំនាញអចលនទ្រព្យបានអះអាងថា តម្លៃដីនៅតាមបណ្តោយផ្លូវជាតិលេខ១ នឹងបន្តឡើងថ្លៃបន្ដថែមទៀត ដោយសារគំរោងវិនិយោគធំៗបាននិងកំពុង​ចាប់ផ្តើមនៅតំបន់នេះ។

​អ្នកស្រី តាំង ហួរ នាយិការក្រុមហ៊ុនAmatak property service, Co, Ltd បានថ្លែងប្រាប់តាមទូរស័ព្ទនាព្រឹកថ្ងៃទី៤ មករាកន្លងមកថា គិតគិតពីចំណុចច្បារអំពៅ ដែលស្ថិតនៅក្នុងខណ្ឌច្បារអំពៅ រាជធានីភ្នំពេញ រហូតដល់ចំណុវាបានចាប់ផ្តើមមានសន្ទុះកើ​នឡើង នូវតម្លៃតាំងពីការបង្កើតតំបន់សេដ្ឋកិច្ចពិសេស និងក្រោយការបង្កើតផែស្ងួតមកម៉្លេះ។ ប៉ុន្តែអ្វីដែលធ្វើឱ្យមានការចាប់អារម្មណ៍ និងកត់សម្គាល់ខ្លាំងបំផុតនាពេលនេះ គឺសកម្មភាពរបស់អ្នកវិនិយោគ ក៏ដូចជាអ្នកអភិវឌ្ឍជាច្រើនកំពុងតែ សម្លឹងមើលតំបន់កៀន​ស្វាយ ជាពិសេសតំបន់ដែលស្ថិតនៅក្នុងឃុំដីឥដ្ឋតែម្ដង។

អ្នកស្រីបន្តថា “បើនិយាយពីតម្លៃដីធ្លី នៅតាមបណ្តោយផ្លូវជាតិលេខ១ បាននិងកំពុងកើនឡើងគ្រប់តំបន់ និងគ្រប់ទីតាំង គ្រាន់តែថាតំបន់ខ្លះឡើងខ្លាំង ហើយតំបន់ខ្លះឡើងតិចតែប៉ុណ្ណោះ”។ អ្នកស្រីបន្តថា “វាជាការធម្មតា កន្លែងមួយដែលមានការអភិវឌ្ឍ និងជាតំបន់ប្រជុំ ដែលមានការធ្វើពាណិជ្ជកម្ម កន្លែងនោះគឺតែងមានហាងឆេងល្អ ជាក់ស្ដែងដូចជាដីដែលស្ថិតនៅតំបន់ចាប់ពីផ្សារគគី រហូតដល់ឃុំដីឥដ្ឋ បើទោះជាស្ថិតនៅស្របតាមបណ្តោយផ្លូវជាតិលេខ១ក៏ពិតមែន ប៉ុន្តែបើធៀបជាមួយដីដែលស្ថិតនៅតំបន់សេដ្ឋកិច្ចពិសេស ឬតំបន់គល់ស្ពានអ្នកលឿងនោះ គឺមានអត្រាខ្ពស់ជាង”។

ដោយឡែកពាក់ព័ន្ធទៅនឹងភាពល្អប្រសើរ នៃតម្លៃដីដែលស្ថិតនៅក្នុតំបន់ឃុំដីឥដ្ឋវិញ បច្ចុប្បន្ននេះយើងថាវាកំពុងតែមានភាពទាក់ទាញខ្លាំង ព្រោះតំបន់នេះកំពុងតែមានគម្រោងអភិវឌ្ឍសំណង់លំនៅដ្ឋានច្រើន ដូចជាសំណង់ផ្ទះល្វែង ក៏ដូចជាបុរីផងដែរនោះ វាក៏មានមជ្ឈមណ្ឌលកម្សាន្តដ៏ធំរបស់ចិន ដែលមានឈ្មោះថា ព្រីនស៍ ម៉ាណ័រ ផងដែរ។

អ្នកស្រីតាំង ហួរបានបន្តថា កត្តទាំងនេះហើយដែលជាកក្តាជម្រុញឱ្យតម្លៃនៅតំបន់នេះ កើនឡើងជាបន្តបន្ទាប់ឥតឈប់ឈរ ដែលសព្វថ្ងៃតម្លៃដីដែលស្ថិតនៅជាប់ផ្លូវជាតិលេខ១ អាចមានចាប់ពី២៨០ដុល្លារ ទៅ៣៥០ដុល្លារក្នុងមួយម៉ែត្រការ៉េ ដោយឡែកសម្រាប់ដីដែលស្ថិតនៅឆ្ងាយពីផ្លូវជាតិ ឬដីភូមិនៅក្បែរផ្លូវជាតិ អាចមានតម្លៃចាប់ពី១៥០ទៅ២០០ដុល្លារ។

​ជាមួយគ្នានេះ លោកឧកញ៉ា នួន រឹទ្ធី អគ្គនាយកក្រុមហ៊ុន Khmer Foundation Appraisal ដែល​បច្ចុប្បន្នកំពុងមានសកម្មភាពយ៉ាងមមាញឹក វិនិយោគវិស័យដីធ្លីនៅក្នុងតំបន់កៀនស្វាយផងដែរនោះបានមានប្រសាសន៍ឲ្យដឹងផងដែរថា មិនយូរទៀតនោះទេ ស្រុកកៀនស្វាយ និងមាន​សក្ដានុពលខ្លាំង មិនចាញ់តំបន់ជុំវិញរាជធានីភ្នំពេញឯទៀតនោះទេ ។

សព្វថ្ងៃនេះ ដោយសារតែផ្ទៃដីនៅក្នុងក្រុងមានភាពចង្អៀត និងមានតម្លៃថ្លៃផងនោះ បានជម្រុញ​ឱ្យបណ្តាអ្នកវិនិយោគនានា ងាកទៅកាន់តំបន់ជាយក្រុង ដែលក្នុង​នោះកៀនស្វាយ​ ក៏ស្ថិតក្នុងក្រសែភ្នែករបស់អ្នកជំនួញទាំងអស់នោះផងដែរ ដែលការវិនិយោគទាំងនោះ មានដូចជា ការសង់សំណង់លំនៅដ្ឋានតម្លៃមធ្យម សំណង់បុរី មណ្ឌលកម្សាន្តកែច្នៃ ជាដើម ហើយអ្នកវិនិយោគមួយចំនួន ក៏កំពុងវិនិយោគដោយផ្ទាល់ជាមួយការពុះដីឡូត៍ផងដែរ។

លោកបន្តថា “អ្វីដែលជាហេតុផល​បណ្តាលឱ្យដីនៅតំបន់កៀនស្វាយ មានភាពលេចធ្លោ ក៏ព្រោះតែទីនេះនៅមានវិសាល​ភាព​ផ្ទៃដីនៅទូលាយច្រើន តម្លៃដីនៅមានកម្រិ​ត ជាពិសេសជាតំបន់ដែលស្ថិតនៅក្នុង​គម្រោង​​អភិវឌ្ឍផ្លូវក្រវ៉ាត់ក្រុងទី3 មានទំហំផ្លូវថ្នល់ដល់ទៅ60ម៉ែត្រ ដែលជាផ្លូវ​តភ្ជាប់​សេដ្ឋកិច្ចយ៉ាងសំខាន់”៕

​ដោយស៊ីវ ម៉េង
​ភ្នំពេញ: នៅទីបំផុតការសាងសង់ផ្លូវល្បឿនលឿនភ្នំពេញ ទៅកាន់ក្រុងព្រះសីហនុកាន់តែខិតជិតមកដល់ហើយ ដោយបច្ចុប្បន្នក្រុមហ៊ុនចិនដែលទទួលបន្ទុកសាងសង់ផ្លូវនេះនឹងដឹកគ្រឿងចក្រមកដល់កម្ពុជានៅចុងខែមករានេះហើយ។

​អគ្គនាយកបច្ចេកទេសនៃក្រសួងសាធារណការ និងដឹកជញ្ជូនលោកនូ វឌ្ឍនៈបាន​មានប្រសាសន៍ឲ្យដឹងតាមទូរស័ព្ទនាសៀលថ្ងៃទី៤ មករានេះថា គ្រឿងចក្រសម្រាប់សាង​សង់ផ្លូវល្បឿនលឿននេះ នឹងដឹកមកដល់កម្ពុជានៅចុងខែមករានេះ ដោយគ្រឿងចក្រទាំងនោះមានតម្លៃប្រមាណ១០០លានដុល្លារអាមេរិក។ លោកបន្តថា បច្ចុប្បន្នក្រុមអ្នកជំ​នាញចិនជិត២០០នាក់បានមកដល់កម្ពុជាហើយ ហើយការសាងសង់ស្ថានីយ៍និងការរិយា​ល័យសំរាប់ស្នាក់នៅនឹងចាប់ផ្តើមសាងសង់នៅពេលឆាប់ៗនេះ។

​លោកបន្តថា “ជាមួយគ្នានេះរដ្ឋាភិបាលបាននិងកំពុងពន្លឿនការដោះស្រាយផល​ប៉ះពាល់លើប្រជាពលរដ្ឋ ដែលមានដីនៅតាមតំបន់ទាំងនេះ ដែលការងារនេះមានភាពស្មុគ្រស្មាញបន្តិច”។លោកបន្តថា “ពេលវេលាបើកការដ្ឋានសាងសង់នាពេលណា ខ្ញុំមិនទានច្បាស់នៅឡើយទេ ប៉ុន្តែគឺមិនចំណាយពេលយូរនោះទេ”។

​បើយោងតាមអ្នកនាំពាក្យក្រសួងសាធារណៈការ និងដឹកជញ្ជូនលោកវ៉ាស៊ីម សូរិយាបានមានប្រ​សាសន៍ឲ្យដឹងកាលពីពេលថ្មីៗនេះថា ផ្លូវល្បឿនលឿនភ្នំពេញ ព្រះសីហនុ នឹងចាកចេញពីតំបន់អូរដឹម នៃចំណុចប្រសព្វរវាងផ្លូវទៅទំនប់កប់ស្រូវ និងអូស​កាត់ផ្នែកខាងស្តាំដៃនៃផ្លូវជាតិលេខ៤។ លោកបន្តថា ចេញពីរាជធានីភ្នំពេញ ផ្លូវនេះនឹងស្ថិតនៅផ្នែកខាងស្តាំស្របតាមផ្លូវជាតិលេខ៤ ប្រវែងប្រមាណ៣០គីឡូម៉ែត្រ ទើបផ្លូវនេះងាកមកឆ្វេងដៃវិញរហូតដល់ស្រុកព្រៃនប់ ទើបងាកមកខាងស្តាំដៃវិញរហូតដល់ក្រុងព្រះសីហនុ។

លោកបន្តថា “ផ្លូវដ៏សំខាន់នេះនឹងសាងសង់នៅខែវិច្ឆិកាហើយ នេះបើតាមការប្រ​កាលរបស់ឯកឧត្តមទេសរដ្ឋមន្រ្តីស៊ុន ចាន់ថុលរដ្ឋមន្រ្តីក្រសួងសាធារណៈការ និងដឹកជញ្ជូន”។លោកបន្តថា “ផ្លូវប្រវែងជាង១៩០គីឡូម៉ែត្រ និងចំណាយថវិកាសាងសង់១៩០០លានដុល្លារនេះ នឹងសាងសង់រយៈពេល៤ឆ្នាំ ហើយផ្លូវនេះនឹងមានរបងបិទជិតទាំងសងខាង ដើម្បីកុំឲ្យមានការរំខានពីការធ្វើចរាចរណ៍ឆ្លងកាត់ច្រើន”។

លោកវ៉ាស៊ីម សូរិយាបានបន្តថា ផ្លូវល្បឿនលឿនឬ Express Wayនឹងមានទទឹង២៤ម៉ែត្រ ដោយរថយន្តអាចបើកបរបានពីរគន្លងទាំងទៅទាំងមក ហើយមានសួនច្បារនៅចំកណ្តាលតាំងពីរាជធានីភ្នំពេញ រហូតដល់ខេត្តព្រះសីហនុ៕