• ដោយគង់ សូរិយា

​ភ្នំពេញ ស្ថាប័នARENAសហរដ្ឋអាមេរិក នឹងនាំអ្នកជំនាញដីធ្លីមកពីជុំវិញពិភពលោកមកកាន់ទីក្រុងភ្នំពេញ ក្នុងកំឡុងពេលកម្ពុជាធ្វើជាម្ចាស់ផ្ទះរៀបចំកិច្ចប្រជុំកំពូលនៅ​ទីក្រុងភ្នំពេញនាខែសីហាខាងមុខនេះ។

​លោកបណ្ឌិតគីម ហ៊ាងប្រធានសមាគមអ្នកវាយតម្លៃ និងភ្នាក់ងារអចលនវត្ថកម្ពុជា និងជាប្រធានប្តូរវេននៃសមាគមARENA បានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី២៤ កក្កដានេះថា កិច្ចប្រជុំកំពូលនេះ នឹងចាប់ផ្តើមពីថ្ងៃទី២៤ដល់២៥ សីហាខាងមុខនេះ ដោយសមាគមនឹងជ្រើសរើស អ្នកចូលរួមប្រមាណ៦០០នាក់ប៉ុណ្ណោះ ប៉ុន្តែ​បើសិនជាសមាគមទទួល គឺអាចមានអ្នកចូលរួមច្រើនជាងនេះ តែដោយសារចំនួនមានកំណត់ ទើបសមាគមជ្រើសរើសយកចំនួនសមាជិកចូលរួមប៉ុណ្ណឹង។

​លោកបន្តថា “កិច្ចប្រជុំរយៈពេលពីរថ្ងៃនេះ នឹងតម្រូវឲ្យអ្នកចូលរួមបង់ប្រាក់១៥០ដុល្លារអាមេរិកក្នុងម្នាក់ ទាំងជនជាតិខ្មែរ និងជនជាតិបរទេស”។លោកបន្តថា “រហូតមកទល់ពេលនេះមានជនបរទេសមក ពីជុំវិញពិភពលោក៣៦០នាក់ហើយបានចុះឈ្មោះចូលរួម និងជនជាតិខ្មែរប្រមាណ២៥០នាក់ទៀតនឹងអនុញ្ញាត្តឲ្យចូលរួម ក្នុងកិច្ចប្រជុំលំដាប់ពិភពលោកនេះ”។

​អ្នកជំនាញដីធ្លីមកពីអាស៊ាន អាស៊ី សហរដ្ឋអាមេរិក និងបណ្តាអ្នកជំនាញដីធ្លីមកពីអឺរ៉ុបនឹងចូលរូមព្រឹត្តិការណ៍កម្រមាននេះ។ កិច្ចប្រជុំនេះនឹងរៀបចំធ្វើនៅសណ្ឋាគារសូហ្វីតែល ទីក្រុងភ្នំពេញ។

​លោកគីម ហ៊ាងបានបន្តថា អ្នកចូលរួមព្រឹត្តិការណ៍នេះ នឹងទទួលបានចំណេះដឹង ទាក់ទងនឹងវិស័យដីធ្លី ការទិញលក់ និងអាចស្វែងរកដៃគូពាណិជ្ជកម្ម ឬដៃគូសហការវិនិ​យោគរបស់ពួកគេផងដែរ ហើយនេះជាឳកាសសំខាន់ដែលអាចបង្ហាញមុខមាត់កម្ពុជា ពិ

សេសការរីកចម្រើនរបស់កម្ពុជា ទាក់ទាញការវិនិយោគមកកម្ពុជា និងជាការបង្ហាញពីកិត្តិនាម និងកិត្យា​នុភាពកម្ពុជាទៅកាន់ពិភពលោកបន្ថែមទៀត៕

ដោយ គង់ សូរិយា

ភ្នំពេញ៖ វគ្គបណ្តុះបណ្តាលជំនាញអចលនទ្រព្យ ដែលមានការទទួលស្គាល់ជាសា​កល និងមានតម្លៃខ្ពស់មិនធ្លាប់មាននៅកម្ពុជា នឹងចាប់ផ្តើមជាលើកតំបូងនៅទីក្រុងភ្នំពេ​ញ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកបណ្ឌិតគីម ហ៊ាងបានថ្លែងឲ្យដឹងតាមទូរស័ព្ទនាព្រឹកថ្ងៃទី២៤ កក្កដានេះថា វគ្គបណ្តុះបណ្តាលនេះសហការរៀបចំដោយសមាគម និងស្ថាប័នCIPSរបស់អាមេរិក និងបង្រៀនដោយគ្រូមកពីសហ​រដ្ឋអាមេរិក និងរៀនជាភាសាអង់គ្លេស។ លោកបន្តថា វគ្គបណ្តុះបណ្តាលនេះ សិក្ខាកាមអាចចូលរួមមានកម្រិត ដោយវគ្គនេះទទួលយកតែសិក្ខាកាម៣០រូបប៉ុណ្ណោះ  ហើយអ្នកសិក្សាវគ្គនេះត្រូវរៀនពី៨ទៅ១០ម៉ោងក្នុងមួយថ្ងៃ។

លោកបន្តថា “វគ្គបណ្តុះបណ្តាលនេះមានតម្លៃ១២០០ដុល្លារនៅប្រទេសថៃ តែ​នៅ​កម្ពុជាសមាគមយកតែ៧៥០ដុល្លារអាមេរិកប៉ុណ្ណោះ ដោយសារសមាគមមានថវិកាគាំទ្របន្ថែម”។លោកបន្តថា “ក្រោយចប់ការបណ្តុះបណ្តាល និងទទួលបានវិញ្ញាបនបត្រសិក្ខកាមដែលបញ្ចប់ការសិក្សាវគ្គនេះ គឺនឹងក្លាយជាអ្នកជំនាញអចលនទ្រព្យដែលមានការទទួ​លស្គាល់ជាសាកល”។

លោកគីម ហ៊ាងបានបន្តថា ទោះជាយ៉ាងណារហូតមកទល់ពេលនេះ សិក្ខាកាមចុះឈ្មោះចូលរៀនវគ្គនេះបានពេញអស់ហើយ និងមិនអាចទទួលអ្នកចូលរួមដទៃទៀតទេ ប៉ុន្តែករណីអ្នកណាម្នាក់មានភាពយឺតយ៉ាវ នឹងត្រូវដកចេញហើយដាក់អ្នកថ្មីជំនួស។លោ​កបន្តថា អ្នកចុះឈ្មោះចូលរៀនវគ្គនេះបានពេញអស់ហើយ ប៉ុន្តែសម្រាប់អ្នកណាមានភា

ពយឺតយ៉ាវ សមាគមនឹងដកចេញហើយអនុញ្ញាត្ត ឲ្យអ្នកចង់ចូលរួមពិតប្រាកដចូលរៀន។ វគ្ពបណ្តុះបណ្តាលនេះនឹងចាប់ផ្តើមពីថ្ងៃទី២០ដល់២៥ សីហាខាងមុខនេះ។

នៅកម្ពុជាមិនទាន់មានអ្នកជំនាញអចលនទ្រព្យ បានសិក្សាវគ្គនេះច្រើននោះទេពីមុនមក គឺមានតែលោកវ៉ា វីរៈអគ្គនាយកក្រុមហ៊ុន Century21 Fortuna Realty និងអ្នកនាង Grace Rachny Fong នាយិកាក្រុមហ៊ុន Century21 Cambodia ប៉ុណ្ណោះដែលបានទទួលវិញ្ញាបនបត្រទទួលស្គាល់ជាសាកលបែបនេះ៕

ដោយ ដែន ចែងចាំង

ភ្នំពេញ៖ ការមកដល់នៃអ្នកវិនិយោគអន្តរជាតិ បានធ្វើឲ្យការវិនិយោគតំបន់ឧស្សា​ហកម្ម និងតម្រូវការប្រើប្រាស់ឃ្លាំង និងរោងចក្រនានានៅតាមតំបន់សេដ្ឋកិច្ចពិសេស បាន​កើនឡើងខ្លាំងនៅដើមឆ្នាំនេះ ធៀបរយៈពេលដូចគ្នាកាលពីឆ្នាំមុន។

យោងការសិក្សារបស់ក្រុមហ៊ុន CBRE Cambodia ដែលទើបបានបញ្ចប់របាយការ​ណ៍របស់ខ្លួននៅដំណាច់ត្រីមាសទី២ឆ្នាំនេះបានរកឃើញថា គិតត្រឹមរយៈពេល៥ខែ​ដើមឆ្នាំនេះ តំបន់ឧស្សាហកម្មបានកើនឡើងរហូតដល់២៦កន្លែង ដែលមានទំហំផ្ទៃក្រឡាសរុ​បចំនួន២៤ម៉ឺនម៉ែត្រការ៉េ។ តម្លៃជួលឃ្លាំង ឬរោងចក្រ ដែលបានសាងសង់ចប់រួចរាល់ មានតម្លៃជួលរហូតដល់៣,២ ទៅ២,១ដុល្លារក្នុងមួយម៉ែត្រការ៉េ។

របាយការណ៍ដដែលបានបង្ហាញថា តម្រូវការសេវាកម្មជួលនានានៅតាមតំបន់ឧស្សាហកម្មបន្តកើនឡើងខ្ពស់ អាស្រ័យលើផែនការនៃគំរោង ហេដ្ឋារចនាសម្ព័ន្ឋ ទីតាំ​ង និងគោ​លដៅនៃការវិនិយោគ។

នាយិការប្រចាំប្រទេសនៃក្រុមហ៊ុនCBRE Cambodiaអ្នកនាងអាន សុធីតាបានថ្លែងថា កំណើននៃការវិនិយោគតំបន់ឧស្សាហកម្មកើនឡើង ដោយសារកត្តាបីសំខាន់ ទី១ កម្ពុជាជាគោលដៅនៃការវិនិយោគផ្នែកឧស្សាហកម្ម ទី២ កំលាំងពលកម្មនៅកម្ពុជាមាន​តម្លៃទាប ធៀបជាមួយប្រទេសថៃ គឺកម្ពុជាអាចទាបជាង២ដង និងទី៣ ការអនុគ្រោះពន្ឋ និងច្បាប់វិនិយោគដ៏ទាក់ទាញរបស់កម្ពុជា។

អ្នកនាងបន្តថា “ទោះជាយ៉ាងណាកម្ពុជា​ក៏មានបញ្ហាប្រឈមរបស់ខ្លួនផងដែរ ទាក់​ទងនឹងតម្លៃទឹក និងអគ្គិសនីនៅថ្លៃជាងប្រទេសជិតខាង”។ អ្នកនាងបន្ថែមថា “យ៉ាងណាខ្ញុំគិតថារដ្ឋាភិបាលនឹងដោះស្រាយបញ្ហាទាំងនេះបាន សម្រាប់រយៈពេល៣ទៅ៥ឆ្នាំខាងមុខ ដោយសារបច្ចុប្បន្ន​រដ្ឋាភិបាលបាននិងកំពុងវិនិយោគវារីអគ្គិសនី និងរោងចក្រអគ្គិសនីជាច្រើន”។

អគ្គនាយកក្រុមហ៊ុន Camtop Property Groupលោកខាត់ សុវណ្ណបានថ្លែងឲ្យ​ដឹងកាលពីពេលថ្មីៗនេះផងដែរថា តម្រូវការឃ្លាំង និងរោងចក្រនានានៅតាមតំបន់សេដ្ឋកិច្ចពិសេស និងតាមតំបន់ជាយក្រុង​នានាពិតជាបានកើនឡើង ដោយសារការកើនឡើងនៃការវិនិយោគពីបរទេស ពិសេសអ្នកវិនិយោគមកពីប្រទេសចិន។ លោកបន្តថា កំនើននៃការផ្គត់ផ្គង់ឃ្លាំង ឬរោងចក្រនៅក្នុងទីក្រុងត្រូវបានកាត់បន្ថយ ដោយនិន្នាការនេះបានងាកទៅតំបន់ជាយក្រុង ហើយការ​វិនិយោគឃ្លាំង និងរោងចក្រសម្រាប់ជួលដែលមានស្តង់ដា កាន់តែមានភាពទាក់ទាញនិងទទួលបានតម្លៃបន្ថែមកាន់តែខ្ពស់។

លោកបន្តថា “ការវិនិយោគឃ្លាំងឬរោងចក្រសម្រាប់ជួល ពិតជាបានងាកទៅជាយក្រុងភ្នំពេញ ពិសេសនៅតាមបណ្តោយផ្លូវជាតិសំខាន់ៗ ដែលតភ្ជាប់រវាងទីក្រុងភ្នំពេញ និងបណ្តាខេត្ត ដែលមានហេដ្ឋារចនាសម្ព័ន្ឋល្អប្រសើរ សម្រាប់តភ្ជាប់ជាមួយកំពង់ផែ និង​ហេដ្ឋារចនាសម្ព័ន្ឋចាំបាច់នានា”៕

ដោយ រ៉ាវី

ភ្នំពេញ៖ បើទោះបីជាសកម្មភាពនៃការសាងសង់ហាក់មានភាពថមថយបន្តិចបន្តួច បើប្រៀបទៅនឹងឆ្នាំកន្លងទៅដោយសារវឌ្ឍនភាពក្នុងវិស័យនេះក៏ពិតមែន ប៉ុន្តែបើផ្អែកតាមសូចនាករសំខាន់ៗដូចជា ការនាំចូលនូវសម្ភារសំណង់គ្រប់ប្រភេទ និងការបញ្ចេញឥណទានចំពោះវិស័យសំណង់ ក៏ដូចជាគម្រោងវិនិយោគនានានៅតែបង្ហាញពីកំណើនដដែល។

យោងតាមរបាយការណ៍ក្រសួងដែនដី និងសំណង់ ដែលត្រូវបានគណនាដោយស្ថាប័នពាក់ព័ន្ឋបង្ហាញថា បរិមាណនៃការនាំចូលសម្ភារសំណង់មានកំណើនប្រមាណជា ២៧% នៅឆមាសទី១ ឆ្នាំ២០១៨នេះ។ កំណើនវិនិយោគក្នុងវិស័យសំណង់ វាគឺជាសូចនាករមួយទៀតដែលបង្ហាញពីភាពរីកចម្រើននៃវិស័យនេះ ដែលបានកើនឡើង១៤% ដល់ប្រមាណ ១.៧៤២គម្រោង ដែលក្នុងនោះសំណង់លំនៅដ្ឋានបានរួមចំណែកដល់ទៅ៨៥% នៃគម្រោងសាងសង់សរុបកំពុងដំណើរការ។

កំណើននៃសំណង់លំនៅដ្ឋាន គឺដោយសារតែសំណង់ថ្មីៗ ភាគច្រើនផ្តោតលើសំណង់ដែលមានតម្លៃទាបជាងមុន ដើម្បីផ្គត់ផ្គង់តម្រូវការរបស់ប្រជាជន ដែលមានចំណូលមធ្យមនិងទាប។ កំណើននេះសម្រេចបានដោយសារវិនិយោគិនបន្តមានទំនុកចិត្ត មកលើស្ថានភាពនយោបាយនៅកម្ពុជា ជាពិសេសចាប់តាំងពីពេលដែលកម្ពុជា ឈានឡើងពីប្រទេសមានចំណូលទាប ទៅជាប្រទេសមានចំណូលមធ្យមកម្រិតទាបតាំងចាប់ពីឆ្នាំ២០១៥មក រួមជាមួយ ការអនុវត្តគោលនយោបាយរាជរដ្ឋាភិបាល ក្នុងការលើកកម្ពស់គុណភាពសេវាកម្ម ក្នុងវិស័យសំណង់ដូចជាការសម្រួលសេវានិងពេលវេលា និងការស្នើសុំគម្រោងសាងសង់ជាដើម៕

ដោយ វុត្ថា

ភ្នំពេញ៖ រដ្ឋាភិបាលប្រទេសម៉ាឡេស៊ី បានប្រកាសកាលពីចុងសប្តាហ៍កន្លងទៅថា​ខ្លួននឹងចេញ គោលនយបាយលំនៅដ្ឋានថ្មីមួយនៅចុងឆ្នាំនេះ ដើម្បីផ្តល់លទ្ធភាពឲ្យអ្នកមិនទាន់មានលំនៅដ្ឋាន អាចមានលទ្ឋភាពទិញលំនៅដ្ឋានបាន។

រដ្ឋមន្ត្រីលំនៅដ្ឋានលោក Zuraida Kamaruddin បានសន្យាថា នឹងខិតខំប្រឹងប្រែងធ្វើគោលនយោបាយលំនៅដ្ឋាននេះ អោយរួចរាល់នៅក្នុងខែធ្នូចុងឆ្នាំ២០១៨នេះ ដើម្បីជួយដល់ប្រជាជនក្នុងស្រុក បានក្លាយជាម្ចាស់ផ្ទះបានលឿនបំផុត។ លោកបន្តថា គោលបំណងរបស់យើង គឺចង់ឃើញតម្លៃលំនៅដ្ឋានថោក និងធ្វើអោយប្រជាពលរដ្ឋមានលទ្ធភាពទិញបាន។

លោកបន្តថា ដូច្នេះយើងត្រូវតែមានការផ្លាស់ប្តូរគោលនយោបាយ ឲ្យបានសមស្របទៅតាមច្បាប់ ក្នុងន័យជួយសម្រួលដល់ហិរញ្ញវត្ថុ និងឆាប់បានក្លាយជាម្ចាស់លំនៅដ្ឋាន”។

រដ្ឋមន្ត្រីរូបនេះបានជួបជាមួយរដ្ឋមន្ត្រីមួយចំនួន ដូចជារដ្ឋមន្ត្រីហិរញ្ញវត្ថុ ធនាគារកណ្តាល និងភាគីពាក់ព័ន្ធនានាដើម្បីស្វែងរកលទ្ធភាព និងវិធានការផ្សេងៗដើម្បីគោលនយោបាយថ្មីនេះទទួលបានជោគជ័យ។

លោក Zuraida បាននិយាយថា “ខ្ញុំមានសុទិដ្ឋិនិយមខ្លាំងណាស់ នៅពេលស្ថិតក្រោមរដ្ឋាភិបាលថ្មី គោលយោបាយនឹងមានការផ្លាស់ប្តូរ និងកាន់តែមានភាពងាយស្រួលធ្វើជាម្ចាស់លំនៅដ្ឋានបានយ៉ាងឆាប់ ព្រោះថាគោលនយោបាយនេះ នឹងធ្វើអោយប្រជាពលរដ្ឋធ្វើជាកម្មសិទ្ធិលំនៅដ្ឋាន”។

លោករដ្ឋមន្ត្រីរូបនេះ ក៏មានគម្រោងទៅជួបមន្ត្រីទីស្តីការគណៈរដ្ឋមន្ត្រី ដើម្បីដាក់គម្រោង ឬផែនការលំនៅដ្ឋានសាធារណៈនេះឲ្យក្រសួងរដ្ឋាភិបាល និងលំនៅដ្ឋានពិនិត្យនៅពាក់កណ្តាលខែកញ្ញាខាងមុខនេះ។

គោលនយោបាយលំនៅដ្ឋានថ្មីនេះ ក៏ទទួលបាការគំាទ្រពីនាយករដ្ឋមន្ត្រីប្រទេសម៉ាឡេស៊ី ដែលទើបជាប់ឆ្នោតសារជាថ្មី លោក Mahathir Mahamad និងបានអំពាវដល់ក្រុមប្រឹក្សាលំនៅដ្ឋានតម្លៃសមរម្យជាតិ រៀបចំគោលនយោបាយផងដែរ៕

ដោយ គង់ សូរិយា

ភ្នំពេញ៖ មជ្ឈមណ្ឌលហិរញ្ញវត្ថជប៉ុនកំពស់កប់ពពកដំបូងគេ នៅទីក្រុងភ្នំពេញបានចាប់ផ្តើមសាងសង់យ៉ាងសកម្ម នោះគឺអាគារការិយាល័យកណ្តាលធនាគារ ពាណិជ្ជស្ថាបនាភីអ៊ិលស៊ី។

លោក Han Chang Woo បានថ្លែងឲ្យដឹងក្នុងពេលប្រកាសគំរោងនេះកាលពីពេលថ្មីៗនេះថា ការសាងសង់អាគារកំពស់២២ជាន់ និង៥ជាន់នៅក្រោមដីនេះ គ្រោងនឹងបញ្ចប់នៅចុងឆ្នាំ២០១៩ខាងមុខនេះ ដែលអាគារនេះនឹងប្រើប្រាស់សម្រាប់ តែការិយា​ល័យកណ្តា​ល រប​ស់ធនាគារពាណិជ្ជស្ថាបនាភីអ៊ិលស៊ីតែមួយប៉ុណ្ណោះ ហើយអាគារនេះ អាចអនុញ្ញាត្តិ ឲ្យបុគ្គ​លិកធ្វើការបានចំនួន១២០០នាក់។

គំរោងនេះជាកម្មសិទ្ធរបស់ក្រុមហ៊ុន MARUHAN Investment Cambodia ដែលដឹកនាំដោយ MARUHAN Corporation in Japan។

លោក Han Chang Woo បានបន្តថា “យើងជឿជាក់ថាវិស័យធនាគារនៅកម្ពុជា នឹងបន្តរីកចំរើនក្រោមការគាំទ្រយ៉ាងរឹងមាំពីរដ្ឋាភិបាល និងគ្រប់គ្រងដោយធនាគារជាតិនៃកម្ពុជា ហើយស្ថាបនានឹងប្តេជ្ញាចិត្តចូលរួមចំណែក ក្នុងការជំរុញឲ្យវិស័យនេះកាន់តែ​រីកចំរើន ក៏ដូចជាជំរុញកំនើនសេដ្ឋកិច្ចកម្ពុជា”។លោកបន្តថា “ ខ្ញុំជឿជាក់ថាប្រទេ​សកម្ពុជា នឹងបន្តមានការអភិវឌ្ឍលូតលាស់យ៉ាងខ្លាំងលើគ្រប់វិស័យ ក្នុងពេល​អនាគត ហើយនេះជាពេលវេលាដែលស័ក្តិសមបំផុត ក្នុងការចាប់ផ្តើមសាងសង់​អាគារនេះ”។

ធនាគារស្ថាបនាជាធនាគារពាណិជ្ជនាំមុខមួយនៅកម្ពុជា ដែលមានសាខាសរុបចំនួន១៦៣កន្លែង មានបុគ្គលិកជាង៤០០០នាក់។គិតត្រឹមថ្ងៃទី៣១ ធ្នូ ឆ្នាំមុន ធនាគារស្ថាបនាភីអ៊ិលស៊ី បានចុះឈ្មោះរបស់ខ្លួន ដោយមានដើមទុន១២០លានដុល្លារ និងមានទ្រព្យសកម្មសរុបចំនបួន៩២៩លានដុល្លារ សមតុល្យឥណទានកម្ចីសរុប៦១១លានដុល្លារ និងមានប្រាក់បញ្ញើរ៥៨៣លានដុល្លារអាមេរិក។

រដ្ឋលេខាធិការក្រសួងរៀបចំដែនដី នគរូបនីយកម្មនិងសំណង់លោកប៉ែន សុផលបានថ្លែងថា លោកជឿជាក់ថាម៉ារ៉ូហាន់គ្រុប និងក្រុមហ៊ុនសាងសង់អាគារ​ការិយាល័យកណ្តាលថ្មីរបស់ធនាគារស្ថាបនា ភីអ៊ិលស៊ីនេះពិតជានាំមកនូវបច្ចេ​កវិទ្យាទំនើប បច្ចេក​ទេ​ស និងគុណភាពខ្ពស់ស្របតាមបទដ្ឋានជាតិ និងអន្តរជាតិ ដែលអ្នកអភិវឌ្ឍន៍ អ្នកជំនាញឯកទេស អ្នកចែកចាយសម្ភារៈសំណង់ និងអ្នកពាក់ព័ន្ឋដទៃទៀតនៅកម្ពុជា កំពុងស្រូបយកនូវបទពិសោធន៍ទាំងនេះមកអនុវត្តន៍ និងចូលរួមបង្កើនសក្តានុពលក្នុងវិស័យសំ​ណង់ គាំពារបរិស្ថាន និងលើកតំកើងវបប្បធ៌មខ្មែរក្នុងយុគសម័យនេះ។

ធនាគារនេះសាងសង់នៅលើផ្ទៃដីទំហំ២,១១៣ម៉ែត្រការ៉េ និងមានទីតាំងស្ថិតនៅក្នុងតាមបណ្តោយមហាវិថីនរោត្តម កែងផ្លូវ១៧២ និងផ្លូវលេខ១៧៤ ស្ថិតក្នុង​សង្កាត់ជ័យជំនះ ខ័ណ្ឌដូនពេញ រាជធានីភ្នំពេញ។

ប្រធានសមាគមអ្នកវាយតំលៃ និងភ្នាក់ងារអចលនទ្រព្យកម្ពុជាលោកគីម ហ៊ាងបានថ្លែងថា ពីមុននៅតំបន់នេះការសាងសង់អាគារបានត្រឹមកំពស់៨ជាន់ប៉ុណ្ណោះ ប៉ុន្តែនៅពេលនេះអាចសាងសង់បានកំពស់២២ជាន់ គឺជាការប្រសើរណាស់ ដែលនឹងតំលៃដីនៅតំបន់នោះនឹងកើនឡើង។ លោកបន្តថា ដីនៅតំបន់នេះ មានតំលៃចន្លោះពី៥៥០០ដល់៦០០០ដុល្លារក្នុងមួយម៉ែត្រការ៉េ។

លោកបន្តថា “ទីតាំងណាដែលអាចសាងសង់ខ្ពស់បាន តំលៃដីនឹងមានតំលៃខ្ពស់ ហើយតំលៃដីនៅតំបន់នេះនឹងកើនឡើងបន្តទៀត ប៉ុន្តែក្នុងកម្រិតទាប ព្រោះវាមានតំលៃថ្លៃរួចទៅហើយ។

ប្រសិនជាគិតត្រឹមតែតំលៃដីមួយម៉ែត្រការ៉េ៥៥០០ដុល្លារ បូកនឹងទំហំដី​ ជាក់ស្តែង ដីនៅក្នុងគំរោងនេះមានតំលៃ១១,៦២០,៥០០លានដុល្លារអាមេរិក។

ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិលោកបណ្ឌិតម៉ី កល្យាណបាន​ថ្លែងថា បច្ចុប្បន្ននេះក្រុមហ៊ុនជប៉ុនបានវិនិយោគលើមូលដ្ឋាន សម្រាប់ការ​វិនិយោគរយៈពេលវែងនៅកម្ពុជារួចហើយ ព្រោះបច្ចុប្បន្នមានក្រុមហ៊ុនជប៉ុនជា​ច្រើនវិនិយោគលើមូលដ្ឋានចាំបាច់ សម្រាប់ការស្នាក់នៅរបស់ពួកគេ ដូចជា ខុនដូ មន្ទីរពេទ្យ សណ្ឋាគារ ភោជនីយដ្ឋាន ធនាគារ និងសេវាកម្មនានា ពិសេសការហោះហើរ​ត្រង់ដោយផ្ទាល់របស់អាកាសចរណ៍ ANA ដែលជាប្រវត្តិសាស្រ្តនៃការប្រែប្រួលទំនាក់ទំនង និងពាណិជ្ជកម្មរវាងប្រទេសទាំងពីរ៕

ដោយ គង់ សូរិយា

ភ្នំពេញ៖ សេដ្ឋកិច្ចកម្ពុជាក្នុងរយៈពេលជាងពីរទសវត្សរ៍ចុងក្រោយនេះ សម្រេចបា​ន​កំណើនជាង៧ភាគរយ ដែលបានធ្វើឲ្យកម្ពុជាក្លាយជាខ្លាសេដ្ឋកិច្ចថ្មីមួយក្នុងតំបន់ ស្របពេលគេមើលឃើញថា សេដ្ឋកិច្ចកម្ពុជានៅតែមានកំណើនរ៉ឹងមាំបន្តទៀត។

ប្រតិភូរាជរដ្ឋាភិបាលទទួលបន្ទុកនៃអគ្គនាយកដ្ឋានថវិកា នៃក្រសួងសេដ្ឋកិច្ច និងហិរញ្ញវត្ថុ លោកហាវ រតនៈបានថ្លែងក្នុងបទបង្ហាញទាក់ទងច្បាប់ថវិកាឆ្នាំ២០១៨ កាលពីពេលថ្មីៗនេះថា សូចនាករនៃក្របខណ្ឌម៉ាក្រូសេដ្ឋកិច្ចឆ្នាំ២០១៦- ២០១៨ ផលិតផលក្នុងស្រុកសរុប ហៅកាត់ផ.ស.ស តាមការព្យាករណ៍នៅក្នុងឆ្នាំ២០១៨នេះ អាចកើនឡើងជិត១០០លានលានរៀល ខណៈឆ្នាំ២០១៧ ត្រូវបានប៉ាន់ស្មានមានជាង៨៩លានលានរៀល ដែលធ្វើឲ្យផលិតផលក្នុងស្រុកសរុបមានកំនើន៧ភាគរយ  និងឆ្នាំ២០១៧សម្រេចបានកំនើនប្រមាណ៦,៩ភាគរយ  និងនៅឆ្នាំ២០១៨ កម្ពុជានឹងអាចរក្សាបានកំនើនផលិតផលក្នុងស្រុកសរុបក្នុងរង្វង់ ៦,៩ភាគរយផងដែរ។

វិស័យដែលនៅតែរក្សាកំណើនល្អសម្រាប់ឆ្នាំ២០១៨រួមមាន វិស័យកសិកម្ម អាចស្ថិតនឹងមានកំនើននៅក្នុងរង្វង់២,៣ភាគរយ ខណៈឆ្នាំ២០១៧ ត្រូវបានប៉ាន់ស្មាន២,០ភាគរយ វិស័យឧស្សាហកម្មនឹងមានកំនើន៨,៦ភាគរយ ខណៈឆ្នាំ២០១៧ ត្រូវបានប៉ាន់ស្មានមានកំនើន៩,២ភាគរយ វិស័យសេវាកម្មមានកំនើនប្រមាណ៧,៦ភាគរយ ខណៈឆ្នាំ២០១៧ត្រូវបានប៉ាន់ស្មាន៧,២ភាគរយផងដែរ។

លោកហាវ រតនៈបានបន្តថា ប្រាក់ចំណូលប្រជាជនម្នាក់ៗកាលពីក្នុងឆ្នាំ២០១៦បានកើនឡើង១.៣០២ដុល្លារ។ ឆ្នាំ២០១៧ត្រូវបានប៉ាន់ស្មានកើនដល់១.៤៣៥ដុល្លារ និងឆ្នាំ២០១៨នេះ ត្រូវព្យាករណ៍កើនឡើងដល់១.៥៦៨ដុល្លារអាមេរិកក្នុងមួយឆ្នាំ។ ចំណែកអតិផរណាជាប្រាក់រៀល មានកំណើន៣ភាគរយនៅឆ្នាំ២០១៦ និងឆ្នាំ២០១៧ ឡើងដល់៣,៨ភាគរយ និងនៅឆ្នាំ២០១៨តាមការព្យាករណ៍ អត្រាអតិផរណាមានកំនើនប្រមាណ៣,៥ភាគរយ ។

របាយការណ៍របស់ក្រសួងសេដ្ឋកិច្ច និងហិរញ្ញវត្ថុបានបង្ហាញថា ទុនបម្រុងអន្តរជាតិ នៅក្នុងឆ្នាំ២០១៦ មានចំនួន៦.៧៣១លានដុល្លារ ក្នុងនោះចំនួនខែនៃការនាំចូលទំនិញ និងសេវាស្ថិតក្នុងរង្វង់៥,៤ភាគរយ។ នៅឆ្នាំ២០១៧ ត្រូវបានប៉ាន់ស្មាន៩.០៥០លានដុល្លារ ហើយចំនួននាំចូលទំនិញ និងសេវាក្នុងរង្វង់ ៦,០ភាគរយ ។ ដោយឡែកនៅក្នុងឆ្នាំ២០១៨ តាមការព្យាករណ៍ទុនបម្រុងអន្តរជាតិ អាចឡើងដល់១០.៥១៨លានដុល្លារ រួមជាមួយចំនួននាំចូលទំនិញ និងសេវាស្ថិតក្នុងរង្វង់៦,៥ភាគរយផងដែរ។

លោកហាវ រតនៈបានបន្តថា ទោះបីសូចនាករនៃក្របខណ្ឌម៉ាក្រូសេដ្ឋកិច្ច មានភាពល្អប្រសើរក៏ដោយ តែបរិការណ៍រួម នៃការរៀបចំថវិការឆ្នាំ២០១៨ នៅតែមានបញ្ហាប្រឈម និងហានិភ័យផងដែរ ដូចជាសម្ពោធចំណាយថវិកា បន្ទុកបុគ្គល ខណៈចំណូលថវិការកៀកនឹងពិដាននៃសក្តានុពល និន្នាការកើនឡើងនៃថ្លៃប្រេង និងសម្ពោធនៃថ្លៃម្ហូនអាហារ ដែលធ្វើឲ្យមានបញ្ហាប្រឈមផ្សេងៗទៀត រួមមាន ថ្លៃអគ្គិសនីខ្ពស់ ប្រព័ន្ធដឹកជញ្ជូន និងឡូជីស្ទិកនៅទន់ខ្សោយ កំណើនប្រាក់ឈ្នួលអប្បបរមា ផលិតភាពទាប កង្វះជំនាញ ភាពស្មុកស្មាញ, និងមានថ្លៃខ្ពស់នៃនីតិវិធីធុរកិច្ចផងដែរ។

ទីប្រឹក្សាផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Market Consulting លោកង៉ែត ជូបានថ្លែងថា វិស័យសំខាន់ៗ ដែលជាកំលាំងចលករជួយជំរុញកំនើនសេដ្ឋកិច្ចកម្ពុជានៅតែមានភាពល្អប្រសើរ ហើយសេដ្ឋកិច្ចកម្ពុជារីកចម្រើនក្នុងរង្វង់៧ភាគរយ សុទ្ឋតែជាសញ្ញាវិជ្ជមាន ដែលនាំឲ្យកម្ពុជាអាចសម្រេចបានគោលដៅរបស់ខ្លួន ក្នុងការនាំប្រទេសទៅកាន់ប្រទេសមានប្រាក់ចំណូលមធ្យម កម្រិតខ្ពស់នៅឆ្នាំ២០៣០ខាងមុខ។

លោកបន្តថា “ផ្អែកលើ់មូលដ្ឋាន និងគោលនយោបាយត្រឹមត្រូវរបស់រដ្ឋាភិបាល សេដ្ឋកិច្ចកម្ពុជា នឹងបន្តរីកចម្រើនរយៈពេលមធ្យមខាងមុខបន្ថែមទៀត”៕