ដោយ គង់ សូរិយា

ភ្នំពេញ៖ សេដ្ឋកិច្ចកម្ពុជាក្នុងរយៈពេលជាងពីរទសវត្សរ៍ចុងក្រោយនេះ សម្រេចបា​ន​កំណើនជាង៧ភាគរយ ដែលបានធ្វើឲ្យកម្ពុជាក្លាយជាខ្លាសេដ្ឋកិច្ចថ្មីមួយក្នុងតំបន់ ស្របពេលគេមើលឃើញថា សេដ្ឋកិច្ចកម្ពុជានៅតែមានកំណើនរ៉ឹងមាំបន្តទៀត។

ប្រតិភូរាជរដ្ឋាភិបាលទទួលបន្ទុកនៃអគ្គនាយកដ្ឋានថវិកា នៃក្រសួងសេដ្ឋកិច្ច និងហិរញ្ញវត្ថុ លោកហាវ រតនៈបានថ្លែងក្នុងបទបង្ហាញទាក់ទងច្បាប់ថវិកាឆ្នាំ២០១៨ កាលពីពេលថ្មីៗនេះថា សូចនាករនៃក្របខណ្ឌម៉ាក្រូសេដ្ឋកិច្ចឆ្នាំ២០១៦- ២០១៨ ផលិតផលក្នុងស្រុកសរុប ហៅកាត់ផ.ស.ស តាមការព្យាករណ៍នៅក្នុងឆ្នាំ២០១៨នេះ អាចកើនឡើងជិត១០០លានលានរៀល ខណៈឆ្នាំ២០១៧ ត្រូវបានប៉ាន់ស្មានមានជាង៨៩លានលានរៀល ដែលធ្វើឲ្យផលិតផលក្នុងស្រុកសរុបមានកំនើន៧ភាគរយ  និងឆ្នាំ២០១៧សម្រេចបានកំនើនប្រមាណ៦,៩ភាគរយ  និងនៅឆ្នាំ២០១៨ កម្ពុជានឹងអាចរក្សាបានកំនើនផលិតផលក្នុងស្រុកសរុបក្នុងរង្វង់ ៦,៩ភាគរយផងដែរ។

វិស័យដែលនៅតែរក្សាកំណើនល្អសម្រាប់ឆ្នាំ២០១៨រួមមាន វិស័យកសិកម្ម អាចស្ថិតនឹងមានកំនើននៅក្នុងរង្វង់២,៣ភាគរយ ខណៈឆ្នាំ២០១៧ ត្រូវបានប៉ាន់ស្មាន២,០ភាគរយ វិស័យឧស្សាហកម្មនឹងមានកំនើន៨,៦ភាគរយ ខណៈឆ្នាំ២០១៧ ត្រូវបានប៉ាន់ស្មានមានកំនើន៩,២ភាគរយ វិស័យសេវាកម្មមានកំនើនប្រមាណ៧,៦ភាគរយ ខណៈឆ្នាំ២០១៧ត្រូវបានប៉ាន់ស្មាន៧,២ភាគរយផងដែរ។

លោកហាវ រតនៈបានបន្តថា ប្រាក់ចំណូលប្រជាជនម្នាក់ៗកាលពីក្នុងឆ្នាំ២០១៦បានកើនឡើង១.៣០២ដុល្លារ។ ឆ្នាំ២០១៧ត្រូវបានប៉ាន់ស្មានកើនដល់១.៤៣៥ដុល្លារ និងឆ្នាំ២០១៨នេះ ត្រូវព្យាករណ៍កើនឡើងដល់១.៥៦៨ដុល្លារអាមេរិកក្នុងមួយឆ្នាំ។ ចំណែកអតិផរណាជាប្រាក់រៀល មានកំណើន៣ភាគរយនៅឆ្នាំ២០១៦ និងឆ្នាំ២០១៧ ឡើងដល់៣,៨ភាគរយ និងនៅឆ្នាំ២០១៨តាមការព្យាករណ៍ អត្រាអតិផរណាមានកំនើនប្រមាណ៣,៥ភាគរយ ។

របាយការណ៍របស់ក្រសួងសេដ្ឋកិច្ច និងហិរញ្ញវត្ថុបានបង្ហាញថា ទុនបម្រុងអន្តរជាតិ នៅក្នុងឆ្នាំ២០១៦ មានចំនួន៦.៧៣១លានដុល្លារ ក្នុងនោះចំនួនខែនៃការនាំចូលទំនិញ និងសេវាស្ថិតក្នុងរង្វង់៥,៤ភាគរយ។ នៅឆ្នាំ២០១៧ ត្រូវបានប៉ាន់ស្មាន៩.០៥០លានដុល្លារ ហើយចំនួននាំចូលទំនិញ និងសេវាក្នុងរង្វង់ ៦,០ភាគរយ ។ ដោយឡែកនៅក្នុងឆ្នាំ២០១៨ តាមការព្យាករណ៍ទុនបម្រុងអន្តរជាតិ អាចឡើងដល់១០.៥១៨លានដុល្លារ រួមជាមួយចំនួននាំចូលទំនិញ និងសេវាស្ថិតក្នុងរង្វង់៦,៥ភាគរយផងដែរ។

លោកហាវ រតនៈបានបន្តថា ទោះបីសូចនាករនៃក្របខណ្ឌម៉ាក្រូសេដ្ឋកិច្ច មានភាពល្អប្រសើរក៏ដោយ តែបរិការណ៍រួម នៃការរៀបចំថវិការឆ្នាំ២០១៨ នៅតែមានបញ្ហាប្រឈម និងហានិភ័យផងដែរ ដូចជាសម្ពោធចំណាយថវិកា បន្ទុកបុគ្គល ខណៈចំណូលថវិការកៀកនឹងពិដាននៃសក្តានុពល និន្នាការកើនឡើងនៃថ្លៃប្រេង និងសម្ពោធនៃថ្លៃម្ហូនអាហារ ដែលធ្វើឲ្យមានបញ្ហាប្រឈមផ្សេងៗទៀត រួមមាន ថ្លៃអគ្គិសនីខ្ពស់ ប្រព័ន្ធដឹកជញ្ជូន និងឡូជីស្ទិកនៅទន់ខ្សោយ កំណើនប្រាក់ឈ្នួលអប្បបរមា ផលិតភាពទាប កង្វះជំនាញ ភាពស្មុកស្មាញ, និងមានថ្លៃខ្ពស់នៃនីតិវិធីធុរកិច្ចផងដែរ។

ទីប្រឹក្សាផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Market Consulting លោកង៉ែត ជូបានថ្លែងថា វិស័យសំខាន់ៗ ដែលជាកំលាំងចលករជួយជំរុញកំនើនសេដ្ឋកិច្ចកម្ពុជានៅតែមានភាពល្អប្រសើរ ហើយសេដ្ឋកិច្ចកម្ពុជារីកចម្រើនក្នុងរង្វង់៧ភាគរយ សុទ្ឋតែជាសញ្ញាវិជ្ជមាន ដែលនាំឲ្យកម្ពុជាអាចសម្រេចបានគោលដៅរបស់ខ្លួន ក្នុងការនាំប្រទេសទៅកាន់ប្រទេសមានប្រាក់ចំណូលមធ្យម កម្រិតខ្ពស់នៅឆ្នាំ២០៣០ខាងមុខ។

លោកបន្តថា “ផ្អែកលើ់មូលដ្ឋាន និងគោលនយោបាយត្រឹមត្រូវរបស់រដ្ឋាភិបាល សេដ្ឋកិច្ចកម្ពុជា នឹងបន្តរីកចម្រើនរយៈពេលមធ្យមខាងមុខបន្ថែមទៀត”៕

ដោយ គង់ សូរិយា

ភ្នំពេញ៖ Property Management ជាសេវាគ្រប់គ្រងអចលនទ្រព្យ ដែលកម្ពជាមិនទាន់បំពេញបាននៅឡើយទេ ដោយសារក្រុមហ៊ុនអចលនទ្រព្យនានានៅកម្ពុជាមិនទាន់មានជំនាញនេះនៅឡើយ។

វាជាជំនាញមួយ និងជាសេវាកម្មមួយដែលអាចរកប្រាក់បានច្រើន ប៉ុន្តែមិន​ទាន់មានក្រុមហ៊ុនច្រើននៅឡើយទេ ដែលអាចចាប់យកឳកាសនេះបាន។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាលោកបណ្ឌិតគីម ហ៊ាងកាលពីពេលថ្មីៗនេះបានលើកឡើងថា ជំនាញគ្រប់គ្រងអចលនវត្ថុ(Property Management) នៅ​កម្ពុជាមិនទាន់មានក្រុមហ៊ុនច្រើនអាចធ្វើបាននៅ ឡើយទេ គឺបច្ចុប្បន្នមានក្រុមហ៊ុនអន្តរជាតិបីឬបួនប៉ុណ្ណោះ បានផ្តល់សេវាកម្មផ្នែកនេះ ខណៈសេវាកម្មបែបនេះនៅមានសក្តានុពល ពោលគឺមានតម្រួវការច្រើន​ក្នុងទីផ្សារ។

លោកបន្តថា ​”ជំនាញនេះមានសារៈសំខាន់ និងអាចរកលុយបានច្រើន ហេតុនេះ យើងគួរពង្រឹងផ្នែកនេះ ដើម្បីអាចផ្តល់សេវាកម្មជាមួយចំណេះដឹងនិង​ផ្តល់សេវាកម្មល្អប្រសើរដល់អតិថិជន”។លោកបន្តថា “សំណង់អាការធំៗខ្ពស់ៗ ជាច្រើនបានរីកចម្រើននៅកម្ពុជាយ៉ាងខ្លាំង ហេតុនេះការសិក្សាជំនាញនេះពិតជា​មានសារៈសំខាន់ ដើម្បីជួយដល់វិស័យនេះ”។ ក្រុមហ៊ុនអន្តរជាតិតិចតួចប៉ុណ្ណោះបាន និងកំពុងផ្តល់សេវាកម្មនេះនៅកម្ពុជា។

នាយិកាប្រចាំប្រទេសនៃក្រុមហ៊ុន CBRE Cambodia អ្នកនាង អាន សុធីតា បានមានប្រសាសន៍ឲ្យដឹងថា បើអាគារខុនដូ អាគារការិយាល័យ ឬអាផាតម៉ិនណាមួយមានអ្នក​ជំនាញគ្រប់គ្រងបានល្អ ផ្តល់សុវត្ថិភាព ផ្តល់ការថែរទាំ នឹងធ្វើ  ឲ្យអចលនទ្រព្យកើនឡើង និងធ្វើឲ្យអាគារនោះមានភាពថ្មីជានិច្ច ព្រោះសេវាគ្រប់គ្រងអចលនទ្រព្យ នឹងផ្តល់ការថែរទាំ ជួលជុសអាគារនោះ។

អ្នកនាងបន្តថា “ការមានក្រុមហ៊ុនជំនាញធ្វើការលើផ្នែកនេះ នឹងធ្វើឲ្យអច​លនទ្រព្យនោះទាក់ទាញអ្នកជួល និងទាក់ទាញអ្នកទិញអាគារនោះកាន់តែច្រើន ប៉ុន្តែយ៉ាងណាក៏ដោយនៅកម្ពុជា មិនសូវមានក្រុមហ៊ុនជំនាញគ្រប់គ្រងអចលន​ទ្រព្យបែបនេះច្រើននៅឡើយ”។

អ្នកនាង អាន សុធីតា បានបន្តថា ការផ្តល់សេវាគ្រប់គ្រងអាគារឬអចលនទ្រព្យណាមួយ ធ្វើឡើងដោយមានកិច្ចព្រមព្រៀងរវាងម្ចាស់អាគារ និងក្រុមហ៊ុន​គ្រប់គ្រងអចលនទ្រព្យ ដែលយកកម្រៃសេវាកម្មពីអ្នកស្នាក់នៅលើអាគារ តាមតម្លៃសមរម្យមួយ ដែលមានការឯកភាពរវាងអ្នកគ្រប់គ្រង និងអ្នកវិនិយោគ ហើ​យថវិកានោះ នឹងបែងចែងប្រើប្រាស់លើការថែរទាំ ការជួសជុលអាគារ និងបែងចែកភាគលាភផ្សេងៗទៀត ដល់ក្រុមហ៊ុនគ្រប់គ្រងអចលនទ្រព្យនោះ៕

ដោយ រ៉ាវី

ភ្នំពេញ៖ ស្របពេលចលនានៃការទិញដីឡូត៍ និងពុះដីឡូត៍លក់ចាប់ផ្តើមផ្ទុះរឿងបណ្តើរៗ។ Propertyarea.asia សូមយកចំណុចពិសេសខ្លះចេញពីវេបសាយលំដាប់អន្តរជាតិមួយ គឺគេហទំព័រ Propertyarea.asia ដែលបានពន្យល់លំអិតពីបញ្ហានេះ។

គេហទំព័រនេះបានណែនាំអ្នកមានបំណងទិញ ឬវិនិយោគលើដីឡូត៍ពិនិត្យ​មើលទិដ្ឋភាពមួយចំនួន មុនសម្រេចចិត្តទិញឬមិនទិញដីឡូត៍ទាំងនោះ។

ទិដ្ឋភាពផ្លូវច្បាប់

ត្រូវប្រាកដថាដីឡូត៍ដែលលោកអ្នកទិញ ជាការទិញពីម្ចាស់ប័ណ្ណពិតប្រាក​ដ មិនមែនទិញពីអ្នកពុះដីឡូត៍នោះទេ ព្រោះអ្នកពុះដីឡួត៍មួយចំនួនបានយកដីគេមកលក់ ហើយរត់ចោលអតិថិជនរបស់ខ្លួន នៅពេលពួកគេប្រមូលប្រាក់បាន(ករណីនេះបានកើតមានរួចហើយ។

ប្លង់កម្មសិទ្ឋ

ចំណុចមួយទៀតត្រូវប្រាកដថា ដីឡូត៍ដែលខ្លួនបានទិញមានប្លង់ត្រឹមត្រូវ។ នេះមានន័យថា ប្រសិនជាដីឡូត៍នោះមានប្លង់រឹង ត្រូវតែកាត់ប្លង់រឹង ព្រោះអ្នកលក់ដីឡូត៍ខ្លះមានប្លង់រឹង តែបានកាត់ប្លង់​ត្រឹម ស្រុក ឬខ័ណ្ឌ ឬត្រឹម ឃុំសង្កាត់។ ប្រសិនជាការទិញលក់បែបនេះ ពិតជាមានហានិភ័យ ព្រោះម្ចាស់ដីឡូត៍ខ្លះបានដាក់ប្លង់នៅធនាគាររួចហើយ និងអាចលួចផ្ទេរកម្មសិទ្ឋដល់កូនចៅ​របស់ខ្លួនជាប្លង់រឹង នោះអ្នកទិញដីឡូត៍នោះនឹងមានហានិភ័យកើតឡើង ព្រោះពួកគេគ្មានមូល​ដ្ឋានផ្លូវច្បាប់តវ៉ាឡើយ។

ហេដ្ឋារចនាសម្ព័ន្ឋ

តាមធម្មតា អ្នកពុះដីឡូត៍លក់តែងតែមានយុទ្ឋសាស្រ្តខុសៗគ្នា ដើម្បីទាក់​ទាញអតិថិជនរបស់ខ្លួន តាមរយៈការចាក់ផ្លូវ ដាក់បង្គោលអគ្គិសនី ទឹកស្អាត និងប្រព័ន្ឋលូជាដើម។ ហេតុនេះអ្នកទិញ ដែលមិនយល់ពីបញ្ហានេះ ពួកគេមិនបារម្ភឡើយ ប៉ុន្តែមានរឿងជាច្រើននៅក្នុងនោះ ដូចជា តើផ្លូវត្រូវតាមស្តង់ដាឬទេ? ប្រព័ន្ឋលូមានកន្លែងបង្ហូរត្រឹមត្រូវឬទេ ឬគ្រាន់តែដាក់ឲ្យរួចពីដៃ។ ចំណុចមួយទៀតតើប្លង់ទាំងនោះត្រូវបានទទួលស្គាល់កម្រិតណា?ជាដើម។ នេះជាចំណុច ដែលត្រូវសួរ។

ការបង់រំលោះ

ដោយសារតែចង់ពុះដីឡូត៍លក់បានច្រើន និងយកចំណេញ អ្នកវិនិយោគពុះ​ដីឡូត៍លក់តែងតែឲ្យអតិថិជន បង់ប្រាក់នៅក្រុមហ៊ុនរបស់ខ្លួន ដោយគ្មានការ​ប្រាក់។នេះជាចំណុចហានិភ័យមួយ ព្រោះទី១ ការទូទាត់បែបនេះមិនមានច្បាប់​ណាមួយគ្រប់គ្រងឡើយ ទី២ ការបង់រំលោះបែបនេះ ក្រុមហ៊ុនអាចប្រមូលបានប្រាក់ហើយរត់ និងមិនទទួលខុសត្រូវ និងប្រព័ន្ឋបង់ប្រាក់បែបនេះ ជាការទូទាត់​ខុសច្បាប់។

ទិដ្ឋភាពសង្គម

តំបន់ដីឡូត៍មិនងាយនឹងមានការអភិវឌ្ឍនោះទេ ដោយសារអ្នកទិញដីឡូត៍ភាគច្រើន ជាអ្នកមានជីវភាពមធ្យម និងពួកគេរង់ចាំគ្នា មិនងាយនឹងធ្វើការសាងសង់លំនៅដ្ឋាននោះទេ។ ទោះជាពួកគេសាងសង់លំនៅដ្ឋាន ក៏ជាលំនៅដ្ឋានគ្មា​នរបៀបរៀបរយនោះដែរ ព្រោះពួកគេមានចិត្តស្រលាញ់ខុសៗគ្នា ដែលធ្វើឲ្យស​ហគមន៍ពួកគេរស់នៅមិនមានសោភ័ណភាពឡើយ។

ទិដ្ឋភាពសេដ្ឋកិច្ច

អ្នកទិញដីឡូត៍ភាគច្រើន ចង់ទិញយកលក់យកចំណេញ ប៉ុន្តែតាមធម្មតា អ្នកទិញដីឡូត៍ មិនងាយទទួលបានផលចំណេញនោះទេ ព្រោះអ្នកវិនិយោគពុះដីឡូត៍លក់ បានយកចំណេញខ្ពស់រួចទៅហើយ។ ហេតុនេះការទិញដីឡូត៍មិនសូវ ទទួលបានផលចំណេញខ្ពស់នោះឡើយ៕

ជាការចូលរួមចំណែកនៅក្នុងកិច្ចការងារសង្គម ក្រុមហ៊ុន បុរី VIP បានសហការជាមួយអជ្ញាធរក្នុងតំបន់ធ្វើទំបន់ការពារទឹកជំនន់ដែលបង្កឡើងដោយទឹកភ្លៀង សង្គ្រោះប្រជាពលរដ្ឋ ដែលកំពុងរស់នៅក្នុងភូមិម៉ឺនត្រា សង្កាត់ស្ពានថ្ម ខណ្ឌដង្កោ រាជធានីភ្នំពេញ។ ជាមួយនឹងការចូលរួមសកម្មភាពខាងលើនេះ ក្រុមហ៊ុន បុរី VIP បានឧបត្ថម្ភជាគ្រឿងចក្រ រួមមានគ្រឿងចក្រកាយដី គ្រឿងចក្រឈូសឆាយដី គ្រឿងចក្រកិនបង្ហាប់ដី និងរថយន្តដឹកដីជាដើម ។

លោក យ៉ែន សុខលីន ប្រធានគ្រប់គ្រងផ្នែកទីផ្សារបានប្រាប់ឱ្យដឹងថា ៖ សម្រាប់ទំនប់ដែលកំពុងធ្វើនាពេលនេះ មានប្រវែងជិត2000ម៉ែត្រ ដោយយើងត្រូវកាយធ្វើជាប្រឡាយ និងចាក់ដីបន្ថែម ដែលអាចមានលទ្ធភាពបញ្ចៀសគ្រោះទឹកជំនន់ដល់ប្រជាពលរដ្ឋប្រមាណជិត 1000គ្រួសារ ដែលកំពុងរស់នៅក្នុងសង្កាត់ស្ពានថ្ម ខណ្ឌដង្កោ រាជធានីភ្នំពេញ ។

លោកបានបន្ថែមទៀតថា ៖ នេះគ្រាន់តែជាការចូលរួមចំណែកនៅក្នុងការងារសង្គមជាមួយរដ្ឋាភិបាលតែប៉ុណ្ណោះ ខណៈដែលជាទូទៅ ក្រុមហ៊ុន បុរី VIP តែងព្យាយាមចូលរួមក្នុងសកម្មភាពមនុស្សធម៌ ដូចជាកាលពីថ្ងៃទី20 ម្សិលមិញនេះ ក្រុមហ៊ុន បាននាំយកថវិកាចំនួនមួយម៉ឺនដុល្លារ សហការជាមួយលោក ហេរ៉ូ ពិធីករប្រចាំនៅស្ថានីយទូរទស្សន៍ អាស៊ីអាគ្នេយ៍ និងសប្បុរសជនមួយចំនួនទៀត ជូនដល់មន្ទីរពេទ្យគន្ធបុប្ផា ដើម្បីរួមចំណែកគាំទ្រដល់ដំណើររបស់មន្ទីរពេទ្យមួយនេះ ៕

ដោយ វុត្ថា

ភ្នំពេញ៖ ក្រុមហ៊ុន ៧ អិនជី (ខេមបូឌា) និងក្រុមហ៊ុន មាតារ៉ាប់រង ភីអិលស៊ី បានចុះហត្ថលេខាលើអនុស្សារណ: នៃការយោគយល់គ្នាស្តីពីសហប្រតិបត្តិការផ្តល់ធានារ៉ាប់រងអាយុជីវិតរយៈពេល ៥ជូនដល់អតិថិជនទិញដីឡូដិ៍ នៅតំបន់អភិវឌ្ឍន៍ ៧ អិនជី ដែលស្ថិតនៅក្នុងឃុំវិហារសួគ៌ ខេត្តកណ្តាល។

ថ្លែងប្រាប់គេហទំព័រ propertyarea.asia ក្រោយពិធីចុះហត្ថលេខាលើអនុស្សារណៈ នៅថ្ងៃទី ២០ ខែកក្កដា ឆ្នាំ ២០១៨ នេះ លោក ខែម សារី នាយកប្រតិបត្តិក្រុមហ៊ុនធានារ៉ាប់រងខ្នាតតូច មាតារ៉ាប់រង ភីអិលស៊ី បានអោយដឹងថា ការសហការគ្នានេះ គឺជាគំនិតផ្តួចផ្តើមឡើងរវាងថ្នាក់ដឹកនាំ ក្រុមហ៊ុន 7 NG ជាមួយក្រុមហ៊ុន ធានាមាតារ៉ាប់រង ក្នុងគោលបំណងក្នុងការលើកទឹកចិត្តក៏ដូចជាតម្រូវការអតិថិជនថ្មីដែលទិញដីឡដិ៍តំបន់នេះ។

លោកបន្តទៀតថា នៅក្នុងជីវិតរបស់មនុស្សមិនត្រឹមតែត្រូវការអចលនទ្រព្យដូចជា ដី ធ្លី ឬ លំនៅដ្ឋាន សម្រាប់រស់នៅប៉ុណ្ណោះទេ ទើបក្រុមហ៊ុនក៏បានគិតគូដល់អាយុជីវិតអតិថិជនផងដែរ។

លោកបញ្ជាក់ទៀតថា ដោយមើលឃើញពីតម្រូវការបែបនេះ ហើយ ទើបក្រុមហ៊ុនបង្កើតគម្រោង Orange Sky នេះ ឡើង ក្នុងការផ្តល់ធានារ៉ាប់រងអាយុជីវិតរយៈពេល ៥ ដល់អថិជនថ្មីទាំងនៅពេលដែលពួកគេ ទិញដីឡូដិ៍ណាមួយនៅក្នុងតំបន់នេះ។ បើអិតិថិជនរូបណាមានបញ្ហាណាមួយកើតឡើងដល់អាយុជីវិតក្នុងចន្លោះពេល ៥ ឆ្នាំនៃការទិញដីឡូដិ៍នោះ ក្រុមហ៊ុនជាអ្នកចេញថ្លៃសំណងនានាជូនដល់អិតិជនទាំងអស់ ព្រោះថា បច្ចុប្បន្ននេះ នណាៗ ក៏គិតគូពីធានារ៉ាប់រងជីវិតដែរ។ ដូច្នេះអ្វីដែលក្រុមហ៊ុនទាំងពីរបានសហការគ្នាធ្វើឡើង នេះ គឺដើម្បីសម្រួលដល់អតិជន និងលើកទឺកចិត្តដល់អតិថិជន។

តែយ៉ាងណាក៏ដោយលោកបានពន្យល់ដែរថា សំណងដែលត្រូវសង់អិតិថិជននេះ មិនមែនសង់ទៅលើការ បង់ប្រាក់ រំលោះដីធ្លីនោះទេ គឺក្រុមហ៊ុនមានកញ្ចប់ថវិការផ្តល់ជូននៅពេលអតិជន ជួបគ្រោះថ្នាក់ដល់អាយុ ជីវិតតែប៉ុណ្ណោះ។
លោក លន់ ដារិន នាយកអចលនទ្រព្យនិងធានារ៉ាប់រងនៃក្រុមហ៊ុន ៧ អិនជី (ខេមបូឌា) បានលើកឡើងដែរថា នេះ គឺជាលើកទីមួយក្នុងប្រទេសកម្ពុជាដែលក្រុមហ៊ុនទាំងពីរបានសហការគ្នាក្នុងការផ្តល់គម្រោងធានារ៉ាប់រងដល់អាយុជីវិតជូនដល់អតិថិជន និងផ្តល់ជំនឿទុកចិត្តដល់អតិថិជនដោយក្រុមហ៊ុនមានដីឡូដិ៍ច្បាស់លាស់លក់ជូនដល់អថិជន។

លោកបន្តទៀតថា នៅក្នុងតំបន់អភិវឌ្ឍន៍ ៧ អ៊ិនជី នេះ មានគម្រោងជាច្រើន កំពុអភិវឌ្ឍន៍ តែក្រុមហ៊ុនកំពុងលក់ជូនដល់អតិថិជននេះ មាន ៣ គម្រោងប៉ុណ្ណោះ គឺ គម្រោង Orange Sky មាន ២ គម្រោង និង New Family មានមួយគម្រោង។

លោកបានរំពឹង ក្រោយពីចុះហត្ថលេខាលើកអនុស្សារណៈយោគយល់គ្នាក្នុងការផ្តល់ធានារ៉ាប់រងអាយុជីវិតជូនដល់អតិថិជននេះ នឹងទទួលបានជោគជ័យព្រោះថា តំបន់នេះ កំពុងតែមានសក្កដានុពលសេដ្ឋកិច្ចខ្លាំង មានទំាងរោងចក្រចំនួន ២០ កំពុងប្រតិបត្តិការ ដោយក្នុងនោះក៏មានគម្រោងរបស់រដ្ឋាភិបាលសហការជាមួយកូរ៉េវិនិយោគ ទៅលើការសាងសង់ស្ពានឆ្លងកាត់ទន្លេចំនួនពីរបន្ថែមទៀតទៅកាន់តំបន់នេះ នឹងធ្វើអោយតំបន់នេះមានសកក្កានុពលផ្នែកដីធ្លីកាន់តែមានតម្លៃឡើងថ្លៃមួយកម្រិតទៀត៕

ខណៈពេលដែលវិស័យអចលនទ្រព្យកំពុងមានការរីកចម្រើនយ៉ាងខ្លាំងនៅកម្ពុជា ជាពិសេស នៅក្នុងតំបន់ទីប្រជុំជននៃរាជធានីភ្នំពេញ ដែលពោរពេញទៅដោយសំណង់អាផាតមិន និងខុនដូ យ៉ាងស្អែកស្កះនោះ នៅក្នុងពេលដ៏ខ្លីខាងមុខនេះ ដុនដូដ៏ទំនើប និងស្រស់ស្អាតដែលមានឈ្មោះថា VISTA Condo នៅទីតាំងដែលកំពុងតែមានការអភិវឌ្ឍន៍ ប្រកបដោយសក្ដានុពលខ្លាំង ក្បែរផ្សារទំនើប AEON 2 និងផ្សារផលិតផលថៃ Makro។

ផ្អែកតាមការអោយដឹង ពីលោក ងួន ឆាយលាង ដែលជានាយកប្រតិបត្តិ ក្រុមហ៊ុន ភ័ញធើ ប្រូភើធី បានប្រាប់ឱ្យដឹងថា ៖ ជាមួយនឹវត្តមានរបស់ខុនដូបែបទំនើប និងទាន់សម័យ VISTA Condo នឹងទទួលបានភាពល្អប្រសើរជាច្រើន ត្បិតខុនដូមួយនេះបានជ្រើសរើសទីតាំងយ៉ាងល្អប្រសើរ ស្ថិតនៅចំកន្លែងដែលអំណោយផលល្អ ពោលគឺជាទីតាំងមានតម្រូវការជួលខ្ពស់ពីអតិថិជនជាតិ និងអន្តរជាតិ។

ជាពិសេសទីតាំងនោះ មានបុគ្គលិកជាជនបរទេស និងសិស្សសាលាអន្តរជាតិនានា ព្រមទាំងក្បែរផ្សារ Makro និងក្បែរផ្សារទំនើប AEON 2 ផងដែរ ដែលហ៊ុំព័ទ្ធទៅដោយក្រុមហ៊ុន និងមជ្ឈមណ្ឌលពាណិជ្ជកម្ម។ ខុនដូ VISTA បានរួមផ្សំជាមួយនឹងរចនាបទទំនើប និងមានកន្លែងកម្សាន្តលំហែរួមបែបស៊ីវិល័យល្អ មានបំពាក់ប្រព័ន្ធសុវត្ថិភាពខ្ពស់ស្ទើរនឹកស្មានមិនដល់។

លើសពីនេះ ដោយោងតាមប្រសាសន៍លោក គង់ គឹមហុង ដែលជានាយកប្រតិបត្តិនៃគម្រោង VISTA Condo បានអោយដឹងថា ជាមួយនឹងការបង្ហាញវត្តមានយ៉ាងលេចធ្លោរក្នុងពេលដ៏ខ្លីឆាប់ៗខាងមុខនេះ ជាការផ្តល់ជូនយ៉ាងពិសេសសម្រាប់អតិថិជន នៅក្នុងឱកាសនៃការអបអរសាទរបញ្ចប់គ្រោងអគារ និងបើកលក់ជាផ្លូវការ ខុនដូ VISTA មានការបញ្ចុះតម្លៃយ៉ាងពិសេស រហូតដល់ ១៦,០០០ ដុល្លារអាមេរិក ដែលបង់ត្រឹមតែ ៤១៤ ដុល្លារអាមេរិចក្នុងមួយខែ ហើយការផ្តល់ជូននេះ មានចាប់ពីថ្ងៃនេះរហូតដល់ថ្ងៃទី ១៨ ខែសីហា ឆ្នាំ2018 ខណៈដែលការសាងសង់នឹងបញ្ចប់ជាស្ថាពរ នៅត្រឹមចុងឆ្នាំ២០១៨ខាងមុខនេះ៕ សម្រាប់ព័ត៌មានបន្ថែមសូមទាក់ទងតាមរយៈទូរស័ព្ទលេខ ៖ 010 887 336 / 011 887 226