ដោយ គង់ សូរិយា

ភ្នំពេញ៖ ហាងអាហាររហ័សទាន់ចិត្តដ៏ល្បី Mc Donald’s អាចនឹងចូលមកទីផ្សារកម្ពុជា​នៅចុងឆ្នាំនេះ ឬដើមឆ្នាំក្រោយ បើសិនជាការចចានាំក្រុមហ៊ុននេះមកកម្ពុជា សម្រេចបានជោគជ័យ។

តាមប្រភពព៌តមានជាក់លាក់បានឲ្យដឹងថា ការចចារនាំក្រុមហ៊ុនអាហាររហ័សទាន់ចិត្តដ៏ល្បីនេះមកកម្ពុជា កំពុងមានភាពតានតឹងផងដែរ ព្រោះក្រុមហ៊ុនដ៏ធំរបស់អាមេរិកនេះមានភាពម៉ត់ចត់ណាស់ មុនសម្រេចអនុញ្ញាត្តឲ្យមានការនាំយកយីហោរបស់ខ្លួន មកប្រតិបត្តិការនៅកម្ពុជា។ ក្រុមហ៊ុនអាហាររហ័សទាន់ចិត្ត Mc Donald’s ជាក្រុមហ៊ុនមួយ​មានភាពតឹងរ៉ឹង ក្នុងការអនុញ្ញាត្តឲ្យមានការនាំចូលម៉ាកយីហោរបស់ខ្លួន ទៅកាន់ប្រទេស​ណាមួយ។

បច្ចុប្បន្ននៅកម្ពុជាមានហាងអាហាររហ័សទាន់ចិត្តល្បីៗ ជាច្រើនបានចូលមកកម្ពុជារួចមកហើយ ដោយម៉ាកសញ្ញាខ្លះទទួលបានជោគជ័យ និងម៉ាកសញ្ញាខ្លះមិនសូវទទួ​លបានជោគជ័យនោះទេ។

ប្រភពព៌តមានបានបន្តថា ការចចារវាងក្រុមហ៊ុនកម្ពុជា និងក្រុមហ៊ុនគ្រប់គ្រងហាងអាហាររហ័សទាន់ចិត្ត Mc Donald’s កំពុងប្រព្រឹត្តិទៅយ៉ាងតានតឹងផងដែរ ដោយ​សារក្រុមហ៊ុននេះ ត្រូវពិនិត្យលក្ខខ័ណ្ឌជាច្រើន មុនសម្រេចផ្តល់អាជ្ញាប័ណ្ណធ្វើអាជីវកម្ម​របស់ខ្លួននៅកម្ពុជា។

ទោះជាយ៉ាងណារហូតមកទល់ពេលនេះ យើងមិនទាន់ដឹងពីក្រុមហ៊ុនណាមួយ ដែលមានបំណងចង់នាំហាងអាហារនេះមកកម្ពុជានៅឡើយទេ។

ទស្សនវិទ្យារបស់ហាងអាហារហ័សទាន់ចិត្ត Mc Donald’s គឺតម្រូវឲ្យថៅកែឬអ្នកនាំ​ចូលពាណិជ្ជសញ្ញារបស់ខ្លួនមកប្រទេសណាមួយ ត្រូវចូលរួមលាងបន្ទប់ទឹកនៅក្រុមហ៊ុន​របស់ខ្លួនសិន។

ហាងអាហាររហ័សទាន់ចិត្ត Mc Donald’s បានបើកដំណើរការលើកតំបូងនៅស ហរដ្ឋអាមេរិកក្នុងឆ្នាំ១៩៤០ និងបានពង្រីកហាងរហូតដល់ ៣៥,០០០កន្លែង នៅជុំវិញពិភព​លោក ដោយរកចំណូលបាន៧៧៤៥ពាន់លានដុល្លារកាលពីឆ្នាំ២០១៦៕

ដោយ ដែន ចែងចាំង

ភ្នំពេញ៖ គេហទំព័រទេសចរណ៍ដ៏ល្បីបំផុតនៅលើពិភពលោក Trip advisor បានចាត់ចំណាត់ថ្នាក់ប្រាសាទអង្គរវត្ត ជាគោលទេសចរណ៍ជាប់ចំណាត់ថ្នាក់លេខ១ នៅលើពិភពលោកក្នុងឆ្នាំ២០១៨នេះ។

យោងតាមគេហទំព័រនេះ ដែលបានចេញផ្សាយរបាយការណ៍របស់ខ្លួនកាលពីម្សិល​ម៉ិញបានឲ្យដឹងថា ក្នុងចំណោមអ្នកបោះឆ្នោតជាងបួនម៉ឺននាក់ ដែលបានចូលបោះឆ្នោតក្នុងគេហទំព័រនេះ បានជ្រើសរើសរមណីយដ្ឋានអង្គរ ជារមណីយដ្ឋានទេ​សចរណ៍ដ៏ទាក់ទាញជាងគេនៅ​ក្នុងឆ្នាំនេះ ក្នុងចំណោមរមណីដ្ឋានទេសចរណ៍នៅលើពិភពលោក​ដទៃទៀត។ គេហំទំព័រនេះបានជ្រើសរើសប្រាសាទមួយ នៅប្រទេសអ៊ីតាលីជាប់ចំណាត់​ថ្នាក់លេខ២ និងប្រាសាទតាច ម៉ាហាល់ក្នុងប្រទេសឥណ្ឌា ជាប់ចំណាត់ថ្នាក់លេខ៣ ក្នុងនាមជាគោលដៅទេសចរណ៍ទាក់ទាញក្នុងពិភពលោកផងដែរ។

យោងតាមរបាយការណ៍របស់ក្រសួងទេសចរណ៍បានឲ្យដឹងថា គិតត្រឹមដំណាច់​ត្រីមាសទី១ឆ្នាំនេះ កម្ពុជាទទួលបានភ្ញៀវទេសចរណ៍អន្តរជាតិជាង៨៥ម៉ឺននាក់ កើនឡើង​ជាង១២ភាគរយធៀបរយៈពេលដូចគ្នាកាលពីឆ្នាំមុន។

លោកធួន ស៊ីណានប្រធានសមាគមទេសចរណ៍អាស៊ីប៉ាស៊ីហ្វិកបានថ្លែងថា ការ​ចាត់ចំណាត់ថ្នាក់នេះ ជាការជួយច្រើនណាស់ក្នុងការផ្សព្វផ្សាយ ផ្នែកទីផ្សារ និង​កេរ្ត៍ឈ្មោះរបស់កម្ពុជា ពិសេសប្រាសាទអង្គរវត្ត ហេតុនេះនៅពេលគេលើកយើងឡើងដល់កំពូលបែបនេះ ទាំងប្រជាជន និងរដ្ឋាភិបាលរបស់យើង គួរតែធ្វើអ្វីឲ្យបានល្អថែមទៀត ស័ក្តិសមនឹងកេរ្ត៍ឈ្មោះ និងអ្វីដែលគេលើកតម្កើង។

លោកបន្តថា ក្រុងសៀមរាប មិនគួរឲ្យមានផ្លូវដីទៀតទេ ហើយគួរពង្រឹងអនាម័យ​បន្ថែមទៀត ដែលនេះជាការងាររបស់អាជ្ញាធរថ្នាក់ក្រោមជាតិ ព្រោះអាជ្ញាធរថ្នាកើជាតិបានខិតខំហើយ សម្តេចតេជោលោកបានខិតខំហើយ ហេតុនេះអាជ្ញាធរថ្នាក់ក្រោមជាតិ គួរយកចិត្តទុកដាក់លើបញ្ហានេះបន្ថែម។

ទីប្រឹក្សាសមាគមទីភ្នាក់ងារទេសចរណ៍កម្ពុជា លោក ហូ វណ្ឌីបានសម្តែងក្តីរីករាយ​នឹងព៌តមានដ៏ល្អនេះ ហើយលោករំពឹងតាមរយៈការបោះឆ្នោតនេះ នឹងជួយទាក់ទាញ ភ្ញៀវ​ទេសចរណ៍អន្តរជាតិ នឹងមកទស្សនាកម្ពុជាកាន់តែច្រើនថែមទៀតនៅក្នុងឆ្នាំនេះ៕

ដោយ គង់ សូរិយា

ភ្នំពេញ៖ ស្របពេលប្រជាពលរដ្ឋ ចូលមករស់នៅរាជធានីភ្នំពេញកាន់តែច្រើន ការកកស្ទះចរាចរកាន់តែអាក្រក់ និងណែនណាប់តាន់តាប់ដែលជាបញ្ហាកំពុងក្លាយជាចំណោទមួយ ប៉ុន្តែសំណួរគួរសួរថា តើទីក្រុងនេះមានប្រជាជនរស់នៅប៉ុន្មាននាក់ ក្នុងមួយគីឡូម៉ែត្រ?។

ការសិក្សាមួយធ្វើឡើងដោយក្រុមហ៊ុន CBRE Cambodia កាលពីឆ្នាំមុនបានរក ឃើញថា តង់ស៊ីតេប្រជាពលរដ្ឋនៅរាជធានីភ្នំពេញ មានប្រជាជនរស់នៅចំនួន១៨០០នាក់ក្នុងមួយគីឡូម៉ែត្រ ខណៈទីក្រុងហូជីម៉ិញ មានប្រជាពលរដ្ឋរស់នៅ៦០០០នាក់ ទីក្រុងបាងកកចំនួន៧០០០នាក់ និងទីក្រុងរ៉ង់ហ្គូនមានតង់ស៊ីតេប្រជាពលរដ្ឋចំនួន៨០០០​នាក់ក្នុងមួយគីឡូម៉ែត្រ។

អ្នកនាង អាន សុធីតា នាយិកាប្រចាំប្រទេសនៃក្រុមហ៊ុន CBRE Cambodia បានថ្លែងថា របាយការណ៍នេះបានបង្ហាញថា ទីក្រុងភ្នំពេញមានចំនួនតង់ស៊ីតេប្រជាពលរដ្ឋតិច ធៀបនឹងទីក្រុងធំៗនៅក្នុងតំបន់នេះ ប៉ុន្តែអ្វីដែលយើងឃើញមានបញ្ហា គឺការកកស្ទះចរាចរណ៍នឹងភាពមមាញឹកនៃទីក្រុងនេះ។

អ្នកនាងបន្តថា “ការបើកបរមិនគោរពច្បាប់ មិន​យល់ដឹងពីច្បាប់ និងបំពានគំនូសសញ្ញាចរាចរណ៍ ជារឿងដែលកើតឡើងច្រើននៅទីក្រុងភ្នំពេញ”។អ្នកនាងបន្ថែមថា “អា ​ជ្ញាធរពាក់ព័ន្ឋគួរយកចិត្តទុកដាក់លើបញ្ហានេះ ដើម្បីបញ្ចៀសភាពអាណាធិបតេយ្យលើដងផ្លូវ”។

លោកហូ វណ្ឌីទីប្រឹក្សាសមាគមទីភ្នាក់ងារទេសចរណ៍កម្ពុជាបានថ្លែងថា បញ្ហាសណ្តាប់ធ្នាប់សាធារណៈ ការគោរពច្បាប់ចរាចរណ៍ និងការចតយានយន្តដោយមានសណ្តា​ប់ធ្នាប់របៀបរៀបរយ ជារឿងគួរយកចិត្តទុកដាក់ និងដោះស្រាយបន្ទាន់ ដើម្បីកុំឲ្យរឿងនេះ​ក្លាយជាបញ្ហាសង្គមកាន់តែធ្ងន់ធ្ងរនាពេលអនាគត។

លោកបន្តថា “ការធ្វើចរាចររបស់​យានយន្តនានា និងការចតអាណាធិបតេយ្យ

កំពុងកើតមានស្ទីរគ្រប់ទីកន្លែងនៅទីក្រុងភ្នំពេញ ដែលជារឿងគួរតែយកចិត្តទុកដាក់ជាបន្ទាន់ពីសំណាក់អាជ្ញាធរ”៕

ដោយ គង់ សូរិយា

ភ្នំពេញ៖ រដ្ឋាភិបាលតាមរយៈក្រសួងរ៉ែ និងថាមពលបានសម្រេចដកហូតអាជ្ញាប័ណ្ណក្រុមហ៊ុនរ៉ុករករ៉ែនៅកម្ពុជាចំនួន៥០អាជ្ញាប័ណ្ណ ដើម្បីជាការព្រមានដល់ក្រុមហ៊ុនផ្សេងទៀតឲ្យធ្វើអាជីវកម្មប្រកបដោយតម្លាភាព និងការទទួលខុសត្រូវ។

លោកម៉េង ស័ក្តិធារ៉ា រដ្ឋលេខាធិការក្រសួងរ៉ែ និងថាមពលបានថ្លែងឲ្យដឹងបន្ទាប់ពីកិច្ចប្រជុំជាមួយក្រុមហ៊ុនធ្វើអាជីវកម្មរ៉ែ នៅកម្ពុជានាព្រឹកថ្ងៃទី២៣ ឧសភានេះថា ក្រុមហ៊ុនដែលរុករ៉ែនៅកម្ពុជាបច្ចប្បន្ន មានចំនួនប្រមាណជាង៥០ក្រុមហ៊ុន ដែល​បាន​កំពុង​ដំណើរ​ការរបស់ខ្លួន ក្នុងនោះក្រុមហ៊ុនរុករករ៉ែប្រមាណជាង៥០ក្រុមហ៊ុន ត្រូវបានក្រសួងរ៉ែ និង​ថាមពល ដកអាជ្ញាប័ណ្ណមិនឲ្យធ្វើអាជីវកម្ម ព្រោះក្រុម ហ៊ុនទាំងនោះ មិនបាន​អនុវត្ត​ត្រឹម​ត្រូវ​តាម​លក្ខខ័ណ្ឌ​របស់ក្រសួង។

លោកបន្តព្រមានថា “​ក្រុមហ៊ុនដែល​កំពុង​ធ្វើ​អាជីវកម្ម មិនត្រូវធ្វេសប្រហែស និងពិនិត្យឲ្យបានត្រឹមត្រូវ  ក្នុងការស្វែងរករ៉ែលោហៈ ក៏ដូចជា​រ៉ែ​អាជីវកម្ម​ផ្សងៗជាដើម  ក្នុងនោះក្រុមហ៊ុន ត្រូវមានកាតព្វកិច្ចខ្ពស់ចំពោះសង្គម សេដ្ឋកិច្ច និង​បរិស្ថាន​”។

រដ្ឋមន្ត្រីក្រសួងរ៉ែ និងថាមពលលោកស៊ុយ សែមបានបន្ទរថា ​ក្រុមហ៊ុនដែលកំពុងរុករករ៉ែនៅកម្ពុជា ត្រូវអនុវត្តន៍ឲ្យបានត្រឹមត្រូវ ទៅតាមប្រកាសរបស់ក្រសួង សម្រាប់​ក្រុមហ៊ុនដែលមានអាអាជ្ញាប័ណ្ណស្វែងរុករករ៉ែ ត្រូវអនុវត្តន៍តាមច្បាប់នៃការរុករករ៉ែ ក្នុងនោះ​ប្រសិន​បើ​ក្រុមហ៊ុនណាលួចធ្វើអាជីវកម្មរ៉ែខុសច្បាប់ ក្រុមហ៊ុននោះ មិនត្រូវអត់ឱនឲ្យបានដាច់ខាត ដោយ​ឈាន​ទៅដកអាជ្ញាប័ណ្ណទាំងស្រុងតែម្តង។

លោកបន្តថា ការស្វែងរករករ៉ែនេះ ការប្រើប្រាស់សម្ភារៈ ដូចជា ការ​ប្រើប្រាស់​វត្ថុដែលនាំឲ្យប៉ះពាល់ដល់បរិស្ថាន ការប្រើប្រាស់កាកសំណល់ជាតិពុលផ្សេងៗ ក្រុមហ៊ុននានាត្រូវរក្សាទុក​​ដាក់​ឲ្យ​បាន​ត្រឹមត្រូវ បើមានការខុសឆ្គងក៏មិន មានការអព្យាស្រ័យឲ្យបាននោះដែរ ព្រោះបរិស្ថាន​មាន​សារៈសំខាន់​ណាស់ សម្រាប់ការងាររស់នៅរបស់មនុស្ស សត្វជាដើម ៕

ដោយ ដែន ចែងចាំង

ភ្នំពេញ៖ មន្ត្រីជាន់ខ្ពស់ក្រសួងទេសចរណ៍ បានជម្រុញឲ្យបណ្តារមណីយដ្ឋាន និងសហគមន៍ទេសចរណ៍​ទាំងអស់​ ត្រូវពង្រឹងវិធានការចលនាប្រកួតប្រជែង និងប្រលងយកជ័យលាភីឆ្នើមរមណីយដ្ឋាន និង​សហគមន៍​ទេសចរណ៍គំរូ ខណៈ​បច្ចុប្បន្នភ្ញៀវទេសចរទាំងជាតិ និងអន្តរជាតិកំពុង បាននិងកំពុង​ផ្តោត​ការចាប់អារម្មណ៍លើតំបន់ទេសចរណ៍បែប​​ធម្មជាតិ។

ថ្លែងក្នុងពិធីបើកសិក្ខាសាលាផ្សព្វផ្សាយ ចលនាប្រឡងប្រណាំងរមណីយដ្ឋានទេសចរណ៍គំរូលើកទី២ អមជាមួយ​ចលនា​ប្រឡងប្រណាំងសហគមន៍ទេសចរណ៍ និងអេកូទេសចរណ៍គំរូលើកទី១ នៅថ្ងៃទី២៣ ខែឧសភានេះ លោកជា បូរ៉ា រដ្ឋលេខាធិការក្រសួងទេសចរណ៍បានថ្លែងថា បច្ចុប្បន្នកម្ពុជា​មានរមណីយដ្ឋាន​​ទេសចរណ៍ ​​សរុប​​ជិត៤០០កន្លែង ដែលបានចុះបញ្ជីផ្លូវការ និងមាន​សហគមន៍ទេសចរណ៍ និងអេកូទេសចរ​ណ៍ចំនួន៥៦កន្លែង ​​មាន​​ដាក់បញ្ចូលសកម្មភាពទេសចរណ៍ ដើម្បីទាក់ទាញភ្ញៀវទេសចរ​ណ៍ទៅទស្សនាកំសាន្ត។

លោកបន្តថា ជាទូទៅគ្រប់គោលដៅរមណីយដ្ឋានទេសចរណ៍ និងសហគមន៍ទេសចរណ៍ ព្រមទាំង​សហគមន៍​អេកូទេសចរណ៍ នៅពេលមានកម្មវិធីបុណ្យជាតិ និងថ្ងៃឈប់សំរាកម្តងៗ ក្រសួងសង្កេត​ឃើញថា មានប្រជាពលរដ្ឋ និង​​ភ្ញៀវទេសចរ​​រាប់លាននាក់បានដើរកំសាន្ត​ នៅ​តាម​រមណីយដ្ឋាន​ទូទាំងប្រទេស ពិសេសថ្ងៃឈប់សំរាកក្នុង​​ឱកាសពិធីបុណ្យ​​ភ្ជុំបិណ្ឌ​​នាឆ្នាំកន្លងមក មានភ្ញៀវទេសចរចេញ ដើរកំសាន្តសរុបប្រមាណ ជាង១លាននាក់ ពិធីបុណ្យអុំទូកសរុបប្រមាណ៤​​លាននាក់ បុណ្យឆ្លងឆ្នាំសាកលជាង ៩០ម៉ឺននាក់ និងពិធីបុណ្យចូលឆ្នាំប្រពៃណីជាតិខ្មែរមានភ្ញៀវប្រមាណ៤,៨លាន​​នាក់ បានដើរកំសាន្តនៅតាមគោលដៅទេសចរណ៍នានាទូទាំងប្រទេស។

លោកជា បូរាបានបន្តថា ការជំរុញអោយគ្រប់រមណីយដ្ឋាន សហគមន៍ទេសចរណ៍ និងអេកូទេសចរណ៍​​ ពង្រឹង​​ចលនាប្រលងប្រណាំងគ្នានោះ ចង់ឲ្យគ្រប់គោលដៅកន្លែង  ផ្តល់សេវាទេសចរណ៍ ត្រូវរួមគ្នារក្សាភាពស្អាត គ្មានសំរាម និង​​ចូលរួមគាំទ្រដល់ចលនាប្រលងប្រណាំង ទីក្រុងស្អាត រមណីយដ្ឋានស្អាត សេវាល្អ បដិសណ្ឋារកិច្ចល្អ  និងឃោសនា​​ផ្សព្វ​​ផ្សាយទេសចរណ៍ កម្ពុជាព្រះរាជាណាចក្រអច្ឆរិយៈ  ផ្តល់ភាពកក់ក្តៅដល់ភ្ញៀវទេសចរ។

លោកធួន ស៊ីណានប្រធានសមាគមទេសចរណ៍អាស៊ីប៉ាស៊ីហ្វិកបានថ្លែងថា សហគមន៍ទេសចរណ៍នៅតាមមូលដ្ឋាន បានរៀបចំកាន់តែល្អប្រសើរជាងមុន ប៉ុន្តែទាមទារឲ្យ​មានការពង្រឹងបន្ថែមទៀត លើគុណភាពម្ហូបអាហារ គុណភាពសេវាកម្ម និងគួរពង្រឹងនូវ​ស្តង់ដាអនាម័យ បរិស្ថានឲ្យបានកាន់តែប្រសើរ ដើម្បីទាក់ទាញ និងទាញបាននូវផល​ប្រ​យោជន៍ដល់សហគមន៍មូលដ្ឋាន បានកាន់តែច្រើនថែមទៀតពីភ្ញៀវទេសចរណ៍ជាតិ និងអន្តរជាតិ។

លោកបន្តថា “ការទៅទស្សនាកំសាន្តនៅតាមសហគមន៍ទេសចរណ៍ រមណីយដ្ឋាន​ទេសចរណ៍នានា មិនត្រឹមតែអាចផ្តល់ចំណូលដល់សហគមន៍មូលដ្ឋានដោយផ្ទាល់ និងប្រយោលនោះទេ ប៉ុន្តែក៏រួមចំណែកផ្តល់ចំណេះដឹង ដល់ប្រជាពលរដ្ឋនៅមូលដ្ឋានផងដែរ”៕