ដោយ ដែន ចែងចាំង

ភ្នំពេញ៖ ប្រទេសកម្ពុជាជាថ្មីម្តងទៀត បានទទួលការអនុគ្រោះពន្ឋនាំចីលសហរដ្ឋអាមេរិករយៈពេលពីរឆ្នាំ ដែលចាប់អនុវត្តន៍ពីថ្ងៃទី១​មករា ឆ្នាំ២០១៨ដល់ថ្ងៃទី៣១ ធ្នូ ឆ្នាំ​២០២០ខាងមុខនេះ។

អគ្គនាយកនៃអគ្គនាយកដ្ឋានពាណិជ្ជកម្មក្នុងប្រទេស នៃក្រសួងពាណិជ្ជកម្មលោក ប៉ែន សុវិជាតិបានថ្លែងឲ្យដឹងតាមទូរស័ព្ទនាព្រឹកថ្ងៃទី២៦ មេសានេះថា ប្រព័ន្ឋអនុគ្រោះពន្ឋនេះ សហរដ្ឋអាមេរិកបានផ្តល់ជូនកម្ពុជា ចាប់តាំងពីដើមទសវត្សរ៍ទី៩០ ហើយប្រព័ន្ឋបែបនេះ សហរដ្ឋអាមេរិកតែងតែធ្វើរៀងរាល់ពីរឆ្នាំម្តង ដើម្បីពិនិត្យលើមុខទំនិញ ដើម្បីការផ្តល់ការអនុ​គ្រោះ​ ដល់ប្រទេសនិមួយៗដែលស្ថិតក្នុងប្រទេសអភិវឌ្ឍន៍តិចតួច ដើម្បីនាំទំនិញចូលសហរដ្ឋអាមេរិក។

លោកបន្តថា “ “ក្នុងចំណោមទំនិញទាំងនោះ កម្ពុជាផលិតបានខ្លះ និងទំនិញខ្លះកម្ពុជាមិនទាន់មានលទ្ឋភាពផលិតបានខ្លួនឯងទេ ប៉ុន្តែជារួមការផ្តល់ការអនុគ្រោះបែបនេះ ជាការផ្តល់ផលចំណេញដល់កម្ពុជា ដើម្បីទាក់ទាញអ្នកវិនិយោគមកវិនិយោគលើមុខទំនិញទាំងនោះ ដើម្បីនាំចេញទៅសហរដ្ឋអាមេរិក”។

លោកសុវិជាតិបានបន្តថា កន្លងមកសហរដ្ឋអាមេរិក បានផ្តល់ការអនុគ្រោះលើមុខទំនិញប្រមា​ណ៥០០០មុខដល់កម្ពុជា ប៉ុន្តែមិនមែនរាល់មុខទំនិញទាំងនោះ សុទ្ឋតែអនុ​គ្រោះពន្ឋនោះទេ គឺមានទំនិញមួយចំនួនក៏បានគិតពន្ឋក្នុងកម្រិតតិចតួចផងដែរ”។

សហរដ្ឋអាមេរិកបានផ្តល់ជូនកម្ពុជា នូវប្រព័ន្ឋអនុគ្រោះលើមុខទំនិញនាំចេញនេះ បានធ្វើឡើងតាំងពីដើមទសវត្សរ៍ទី៩០ មុនពេលកម្ពុជាបានចូលជាសមាជិកអង្គការពាណិជ្ជកម្មពិភពលោក។

អនុប្រធានសភាពាណិជ្ជកម្មកម្ពុជា លោកឧកញ៉ាលឹម ហេងបានថ្លែងថា ការផ្តល់កូតាពីសហរដ្ឋអាមេរិក ដើម្បីប្រទេសអភិវឌ្ឍន៍តិចតួច រួមទាំងកម្ពុជានេះ ពិតជាផ្តល់ផលចំណេញដល់កម្ពុជា ដើម្បីទាក់ទាញអ្នកវិនិយោគមកផលិតទំនិញទាំងនោះ ដើម្បីនាំចេញ ទៅកាន់សហរដ្ឋអាមេរិក។លោកបន្តថា ការដំឡើងពន្ឋទំនិញរបស់សហរដ្ឋអាមេរិក ជាមួ​យប្រទេសចិន និងប្រទេសដទៃទៀតលើមុខទំនិញមួយចំនួន ដូចជាដែកថែប អាល្លុយមីញ៉ូមជាដើម សុទ្ឋតែផ្តល់ផលចំណេញដល់កម្ពុជា ដើម្បីទាក់ទាញអ្នកវិនិយោគចិន និងអ្នកវិនិយោគដទៃទៀតមកផលិតនៅកម្ពុជា ដើម្បីនាំចេញ។

យោងតាមសេចក្តីជូនដំណឹងរបស់ក្រសួងពាណិជ្ជកម្មបានឲ្យដឹងថា រដ្ឋបាលលោ​កដូណាល់ ត្រាំ ប្រធានាធិបតីអាមេរិកបានចុះហត្ថលេខាលើច្បាប់ស្តីពីH R 1625 The consolidated Appropriations Act 2018 ដើម្បីបន្តឡើងវិញនៃប្រព័​ន្ឋ អនុគ្រោះពន្ឋទូទៅ ដោយភ្ជាប់ជាមួយការធ្វើប្រតិសកម្ម។ ការឡើងវិញនៃប្រព័ន្ឋអនុគ្រោះ ទូទៅនេះ នឹងចូលជាធរមានពីថ្ងៃទី២២ មករា ដល់ថ្ងៃទី៣១ ធ្នូ ឆ្នាំ២០២០។  អ្នកនាំចូលទៅសហ​រដ្ឋអាមេរិក គិតចាប់ពីថ្ងៃទី១ មេសា អាចមកស្នើសុំដកប្រាក់ពន្ឋ ដែលបានបង់ពន្ឋរួចវិញបាន តាមការជូនដំណឹងរបស់តំណាងពាណិជ្ជកម្មសហរដ្ឋអាមេរិក៕

ដោយ វុត្ថា

ភ្នំពេញ៖ ក្នុងគោលដៅផ្តល់ផលប្រយោជន៍ដល់គ្នាទៅវិញទៅមក ប្រទេសកម្ពុជា និងបង់ក្លាដែស បានសន្យាពិនិត្យលទ្ធភាពចុះកិច្ចព្រមព្រៀងពាណិជ្ជកម្មជាមួយគ្នាថែមទៀត ដើម្បីបង្កើនទំហំពាណិជ្ជកម្មទ្វេភាគី ឲ្យបានដល់ទឹកប្រាក់១០០លានដុល្លារ នៅត្រឹមឆ្នាំ២០២០។

ក្នុងជំនួបជាមួយលោកប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជា និងលោក តូហ្វែល អាមេត រដ្ឋមន្ត្រីក្រសួងពាណិជ្ជកម្មបង់ក្លាដែស ដែលរៀបចំឡើង កាលពីព្រឹកថ្ងៃទី២៥ ខែមេសា ឆ្នាំ២០១៨ ម្សិលម៉ិញនេះ លោកប៉ាន សូរស័ក្តិ បានជំរុញឲ្យភាគីបង់ក្លាដែស គោរពកិច្ចព្រមព្រៀងទិញអង្ករពីកម្ពុជាចំនួន១លានតោន សម្រាប់រយៈពេល៥ឆ្នាំ (២០១៧-២០២២) ដែលបានចូលជាធរមានកាលពីឆ្នាំ២០១៧ និងធ្វើការនាំចូលនូវផលិត​ផលកសិកម្មថែមទៀតពីកម្ពុជាដូចជា ដំឡូងមី ពោត និងម្រេច ជាដើម។

លោកតូហ្វែល អាមេតបានទទួលស្គាល់ថា ទំហំពាណិជ្ជកម្មទ្វេភាគីរវាងកម្ពុជា និងបង់ក្លាដេស ពិតជានៅមានកម្រិត ដែលទាមទារឲ្យមានការចុះកិច្ចព្រមព្រៀងពាណិជ្ជកម្មសេរីបន្ថែម និងការរៀបចំជំនួបធុរកិច្ច រវាងវិស័យឯកជននៃប្រទេសទាំងពីរ ដើម្បីបង្កើនការដោះដូរទំនិញ និងសេវាកម្មផ្សេងៗ សំដៅឈានទៅសម្រេចផែនការពាណិជ្ជកម្ម ដែ​ល​ប្រទេសទាំងពីរបានកំណត់។

បើតាមស្មារតីនៃកិច្ចប្រជុំបានឲ្យដឹងថា កិច្ចព្រមព្រៀងពាណិជ្ជកម្មនេះនឹងត្រូវរៀប​ចំឲ្យបានរួចរាល់នៅក្នុងខែឧសភា ដើម្បីដាក់ឆ្លងគណៈរដ្ឋមន្ត្រីនៃប្រទេសទាំងពីរ ធ្វើការត្រួតពិនិត្យ មុនពេលចុះហត្ថលេខាដោយរដ្ឋមន្ត្រីក្រសួងពាណិជ្ជកម្មនៃប្រទេសទាំងពីរ។

យោងតាមរបាយការណ៍ពីស្ថានទូតបង់ក្លាដែស​បានឲ្យដឹងថា ទំហំពាណិជ្ជកម្មទ្វេ​រ​ភាគីរវាងកម្ពុជា និងបង់ក្លាដែសនៅក្នុងឆ្នាំ ២០១៥ មានត្រឹមតែ៦លានដុល្លារប៉ុណ្ណោះ​ ខណ:ដែលប្រទេសទាំងពីរមានធនធាន​ច្រើន​ និងលទ្ធភាពខ្ពស់សម្រាប់កិច្ចសហការលើវិស័យពាណិជ្ជកម្ម។

លោកប៉ាន សូរស័ក្តិ បានរំលឹកឡើងវិញនូវខ្លឹមសារ នៃអនុស្សរណៈយោគយល់ និងកិច្ចព្រមព្រៀងសំខាន់ៗ ដែលកម្ពុជានិងបង់ក្លាដែស បានចុះហត្ថលេខាជាមួយគ្នាកា​ល​ពីចុងឆ្នាំ ២០១៧ និងបានទទូចដល់អាជ្ញាធរពាក់ព័ន្ធនៃប្រទេសទាំងពីរ បន្តអនុវត្តន៍លក្ខខណ្ឌដែលបានចែងប្រកបដោយស្មារតីយោគយល់ខ្ពស់។

កាលពីចុងឆ្នាំ២០១៧ ប្រទេសកម្ពុជា និងបង់ក្លាដេស បានចុះហត្ថលេខាលើអនុស្សារណៈចំនួន៩ ដែលផ្តោតសំខាន់លើការពង្រឹងកិច្ចសហប្រតិបត្តិការ វិស័យទេស​ចរណ៍ បច្ចេកវិទ្យាព័ត៌មាន និងសារគមនាគមន៍ ការបង្កើតក្រុមប្រឹក្សាពាណិជ្ជកម្មរួម ការអនុវត្តគោលដៅអភិវឌ្ឍន៍និរន្តរភាពឆ្នាំ២០៣០ ការបណ្ដុះបណ្ដាលការងារនិងវិជ្ជាជីវៈ ការការពារកេរ្តិ៍ដំណែលប្រវត្តិសាស្ត្រ និងស្លាកស្នាមសង្គ្រាម ការវិនិយោគលើវិស័យជលផល និងវារីវប្បកម្ម កិច្ចសហការស្រាវជ្រាវរវាងវិទ្យាស្ថានសិក្សាអន្តរជាតិកម្ពុជា និងវិទ្យាស្ថានយុទ្ធសាស្រ្តសិក្សាបង់ក្លាដែស ព្រមទាំងការជំរុញវិនិយោគរវាងក្រុមប្រឹក្សាអភិវឌ្ឍន៍កម្ពុជា និងអាជ្ញាធរអភិវឌ្ឍន៍វិនិយោគបង់ក្លាដែស៕

ដោយគង់ ម៉ាលីន

ភ្នំពេញ៖ ដំណាច់ត្រីមាសទី១ឆ្នាំនេះ អគ្គនាយកដ្ឋានពន្ធដារប្រមូលចំណូលពន្ធ-អាករគ្រប់ប្រភេទបានប្រមាណ៧៦១លានដុល្លារអាមេរិក ស្មើជិត៤០ភាគរយ នៃផែន​ការកំណត់ដោយច្បាប់ កើនឡោះង៦៧លានដុល្លារបើធៀបរយៈពេលដូចគ្នាកាលពីឆ្នាំមុន។

ប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានពន្ធដារលោកគង់ វិបុល បានថ្លែងឲ្យដឹងនៅក្នុងកិច្ចប្រជុំបូកសរុប លទ្ធផលប្រមូលចំណូលពន្ធប្រចាំខែមីនា និងត្រីមាសទី១ ឆ្នាំ២០១៨ កាលពីថ្ងៃទី២៥ ខែមេសា ឆ្នាំ២០១៨កន្លងមកថា លទ្ធផលប្រមូលចំណូលពន្ធ របស់អគ្គនាយកដ្ឋានពន្ធដារទទួលបានគួរជាទីមោទនៈ ជាក់ស្តែងនៅក្នុងខែមីនា ឆ្នាំ២០១៨នេះ ចំណូលពន្ធ-អាករគ្រប់ប្រភេទដែលប្រមូលបាន (តាមប្រព័ន្ធគ្រប់គ្រងទិន្នន័យចំណូលអនឡាញ Online) មានចំនួនជាង១៧០០លានរៀល ត្រូវប្រមាណជាង៤៤៦លានដុល្លារអាមេរិក និងបានបំពេញបែបបទបង់ចូលថវិកាជាតិបានចំនួន៨៩៧ពាន់លានរៀល ត្រូវប្រ​មាណជាង២២៤លាន ដុល្លារអាមេរិកស្មើជាង ១១ភាគរយ នៃផែនការច្បាប់ បើប្រៀបធៀបទៅនឹងរយៈពេលដូចគ្នាកាលពីឆ្នាំមុន។

លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ទេសរដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុបានអបអរសាទរ និងកោតសរសើរ ចំពោះមន្ត្រីរាជការពន្ធដារគ្រប់លំដាប់ថ្នាក់ទាំងអស់ ដែលបានខិតខំប្រឹងប្រែង ប្រមូលចំណូលពន្ធប្រកបដោយប្រសិទ្ធភាព ដោយសំរេចបានតាមផែកការកំណត់ និងលើសផែនការច្បាប់ក្នុងរយៈពេល ត្រីមាសទី១ ឆ្នាំ២០១៨នេះ ដោយបន្ថែមពីលើលទ្ធផលដ៏ប្រសើរ ក្នុងរយៈពេល៦ឆ្នាំជាប់ៗគ្នាចុងក្រោយនេះ លើបរិបទមួយដែលគោលនយោបាយរបស់រាជរដ្ឋាភិបាលកម្ពុជា គឺមិនមានការបង្កើនអត្រាពន្ធឬបង្កើតពន្ធថ្មី មានតែពង្រឹងច្បាប់ និងបទប្បញ្ញត្តិស្តីពី ពន្ធដារមានស្រាប់ ការពង្រឹងគ្រប់គ្រងប្រមូលចំណូលពន្ធ ឱ្យអស់សក្តានុពលដែលមានស្រាប់ និង ការធានាឱ្យបាននូវភាពងាយស្រួល សមធម៌ និងភាពត្រឹមត្រូវក្នុងការបង់ពន្ធ៕

ដោយ គង់ សូរិយា

ភ្នំពេញ៖ ថ្នាក់ដឹកនាំជាន់ខ្ពស់នៃអេស៊ីលីដាបានឲ្យដឹងថា ការដាក់ប្រាក់បញ្ញើរនៅធនាគារអេស៊ីលីដា សម្រេចបានកំណើន៥ភាគរយ ខណៈទំហំឥណទានស្ថិតក្នុសភាពទ្រឹង ក្នុងដំណាច់ត្រីមាសទី១ឆ្នាំនេះ ធៀបនឹងដំណាច់ឆ្នាំ២០១៧កន្លងមក។

ប្រធាននាយកប្រតិបត្តិធនាគារអេស៊ីលីដាភី អ៊ិល ស៊ី លោកអ៊ិន ចាន់នីបានថ្លែងឲ្យ ដឹតតាមទូរស័ព្ទនាព្រឹកថ្ងៃទី២៥ មេសានេះថា ទំហំឥណទានរបស់អេស៊ីលីដាបានកើនទឹកប្រាក់ពី៣០២២,៥លានដុល្លារ ដល់៣០២៣លានដុល្លារអាមេរិក កើនឡើង០០,៣ភាគរយ និងទំហំប្រាក់បញ្ញើរបានកើនឡើងប្រមាណ៥ភាគរយ ដោយទំហំទឹកប្រាក់បាន​កើនពីប្រមាណ៣២៥០លានដុល្លារ ដល់ទឹកប្រាក់៣៤៦៣លានដុល្លារ គិតត្រឹមដំណាច់ត្រីមាសទី១ឆ្នាំនេះ ធៀបនឹងដំណាច់ឆ្នាំ២០១៧។

លោកបន្តថា ទំហំឥណទានកើនឡើងតិចតួចនេះ ដោយសារចាប់ពីខែមករា ដល់ខែមិនា ជាពេលដែលប្រជាជនប្រមូលផល ទើបពួកគាត់មិនសូវត្រូវការឥណទានយកទៅ​ប្រើប្រាស់នោះទេ ផ្ទុយទៅវិញវាជាពេលដែលកសិករមានប្រាក់នៅសល់ យកមកផ្ញើរទុកនៅធនាគារ ទើបធ្វើឲ្យទំហំប្រាក់បញ្ញើរបានកើនឡើង។លោកបន្តថា តាមធម្មតា​ចាប់ពីខែមេសាឡើងទៅ ទើបជាពេលដែលប្រជាពលរដ្ឋត្រូវការឥណទាន ដើម្បីចាប់ផ្តើមអាជីវកម្ម ឬកសិកម្មច្រើន ដែលនោះជាពេលដែលតម្រូវការឥណទានកើនឡើង ហើយ​និន្នាការបែបនេះបានកើតឡើងជារៀងរាល់ឆ្នាំ។

លោកអ៊ិន ចាន់នីបានបន្តថា កំណើននៃការដាក់ប្រាក់បញ្ញើរ មួយផ្នែកក៏ដោយសារ បរិយាកាសទូទៅមានភាពល្អប្រសើរ ទាំងបរិយកាសកាសសង្គម សេដ្ឋកិច្ច និងបរិយកាសនយោបាយ ព្រមទាំងការទុកចិត្តរបស់ប្រជាពលរដ្ឋ មកលើប្រព័ន្ឋធនាគារមានការ​កើនឡើង។

លោកឆារស៍ វ៉ាន់ប្រធានស្តីទីសមាគមធនាគារកម្ពុជាបានថ្លែងថា វិស័យធនាគារ​នៅកម្ពុជានៅតែសម្រេចបានកំនើនល្អប្រសើរ ទាំងទំហំឥណទាន និងការដាក់ប្រាក់បញ្ញើរ ដោយសារកត្តាសុខសន្តិភាព និងកំនើនសេដ្ឋកិច្ចដែលកម្ពុជាសម្រេចបាន ដែលបានធ្វើ​ឲ្យកម្ពុជាទាក់ទាញបាន នូវអ្នកវិនិយោគអន្តរជាតិជាច្រើនចូលមកវិនិយោគនៅកម្ពុជា ហើ​យការចូលមកកាន់តែច្រើនពីសំណាក់អ្នកវិនិយោគអន្តរជាតិ ដោយសារកំនើនសេដ្ឋកិច្ច បរិយាកាសនយោបាយល្អប្រសើរ និងការជឿជាក់លើការដឹកនាំរបស់ប្រមុខរដ្ឋាភិបាលកម្ពុជា សម្តេចតេជោហ៊ុន សែននាយករដ្ឋមន្រ្តី។

បច្ចុប្បន្ននៅកម្ពុជាមានធនាគារសរុបចំនួន៥២ ក្នុងនោះមានធនាគារពាណិជ្ជមានចំនួន៣៩ និងធនាគារឯកទេសមានចំនួន១៣។៕

ដោយ គង់ សូរិយា

ភ្នំពេញ ការមកដល់នៃហាងល្បីៗ និងផ្សារបែបសហគមន៍The Park ទំនងមិនគ្រប់គ្រាន់ទេ សម្រាប់តំបន់ផ្លូវជាតិលេខ១ ស្ថិតក្នុងខ័ណ្ឌច្បារអំពៅ ប៉ុន្តែសួនកំសាន្តលំដាប់អន្តរជាតិមួយតម្ល៦០លានដុល្លារ ដែលគ្រោងបើកដំណើរការនៅចុងឆ្នាំនេះ នឹងធ្វើឲ្យតំបន់នេះកាន់តែរសរវើក និងស៊ីវិល័យ។

អគ្គនាយករងនៃបុរីប៉េង ហួតលោកឧកញ៉ាថៃ ម៉េងលីបានថ្លែងឲ្យដឹងកាលពីពេលថ្មីៗនេះថា គំរោងអភិវឌ្ឍន៍នេះ ត្រូវបានអភិវឌ្ឍនៅលើផ្ទៃដីជិត៨ហិកតា​ជាមួយនិងអគារសាលប្រជុំ ឬសាលសំរាប់រៀបចំអាពាហ៏ពិពាហ៏។ សួនកំសាន្តនេះត្រូវបានរចនាឡើងតាមបែបអឺរ៉ុប ដែលមានសំណង់អគារពិសេ​សប្លែកៗ និងលំអរទៅដោយសួនដើមដើមឈើធំៗ សងខាងទន្លេដែលអាចជិះទូកបាន និងមានស្ពានស្អាតៗឆ្លងទន្លេចំនូនបី ភ្ជាប់គ្នាពីតំបន់មួយទៅតំបន់មួយទៀត។លោក បន្តថា ចំពោះការរៀបចំតំបន់ទៀតសោត យើងបានរៀបចំជាតំបន់អឺរ៉ុប​ផ្សេងៗគ្នាចំនួន​ដូចជា តំបន់ទី១ មានអគាររចនាបថបែបប្រទេសស្កត់ឡែន និងអាឡឺម៉ង់មជ្ឈិមសម័យ។

តំបបន់ទី២ មានអគាររចនាបថបែបហូឡង់ និងបារាំងសម័យកាល​រស់​ឡើងវិញ​នៃ​អរិយធម៌​រុងរឿង តំបន់ទី៣ មានអគាររចនាបថបែបអ៊ីតាលីនៃទន្លេវេនីស និងតំបន់ផ្សេងៗទៀត។ អាគារនិមួយៗ ស្ថិតនៅក្បែរមាត់ទន្លេនេះនឹងត្រូវបានគេប្រើប្រាស់ជាភោជនីយដ្ឋានសម្បូរបែប មានអាហារអឺរ៉ុប ចិន​ ជប៉ុន ​​ខ្មែរ។ល។ អ្នកទស្សនាអាចសម្រាកលំហែ និងពិសារអាហារដ៏មានឱជារស់គ្រប់ប្រភេទបាននៅទីនេះ។

លោកឧកញ៉ាបានបន្តថា ដោយសារភាពច្នៃប្រឌិតខ្ពស់ និងធ្វើឡើងដោយវិស្វករ និងស្ថាបត្យករជាតិ និងអន្តរជាតិ បានធ្វើឲ្យគំរោងនេះទទួលបានពានចំនួនពីរ ​គឺពានរង្វាន់ផ្នែកស្ថាបត្យកម្មឌិហ្សាញសួនលំហែរ ដែលលជាងគេលំដា​ប់ផ្កាយប្រាំនៅឆ្នាំ២០១៦ និងពានរង្វាន់ផ្នែកអភិវឌ្ឍសួនលំហែរដែលល្អជាងគេនៅកម្ពុជាប្រចាំឆ្នាំ២០១៧ ក្នុងកម្មវិធីពានរង្វាន់អចលនទ្រព្យអន្តរជាតិដែលមានការិយាល័យនៅប្រទេសអង់គ្លេស។

លោកឧកញ៉ាថៃ ម៉េងលីបានបន្តថា “គំរោងនេះនឹងបើកដំណើរការស្វាគមន៏អ្នកដែលរស់នៅក្នុងបុរីប៉េងហួត និង​សាធារណៈជនទូទៅដែលស្វែងរកកន្លែងសម្រាកលំហែរនិងញ៉ាំអាហារប្រកបដោយផាសុកភាព”។ លោកបន្តថា “ក្រុមហ៊ុ​ន​​ចាប់អារម្មណ៏ក្នុងការវិនិយោគឡើង គឺក្នុងគោលបំណង ផ្ដល់ទីកន្លែងស្អាតសំរាប់លំហែកំសាន្ត ញ៉ាំអាហារដល់អ្នករស់នៅក្នុងបុរីប៉េងហួត និងសាធារណៈជនទូទៅ និងជាពិសេសគឺដើម្បីចូលរូមអភិវឌ្ឍទីក្រុងភ្នំពេញ ដោយនាំមកនូវគំរោងថ្មីស្អាត ដែលមិនដែលធ្លាប់មាននៅស្រុកខ្មែរពីមុន ​ជូនដល់ភ្ញៀវជាតិនិងអន្តរជាតិ”​។

ចំពោះការចូលមកទស្សនា និងកំសាន្ត ក្នុងគំរោងនេះនឹងមិនតម្រូវឲ្យមានការទិញសំបុត្រទេ។

លោកហូ វណ្ឌីទីប្រឹក្សាសមាគមទីភ្នាក់ងារទេសចរណ៍កម្ពុជាបានថ្លែងថា នេះជាផលិ​តផលទេសចរណ៍ថ្មីមួយ ដែលកន្លងមកវិស័យឯកជនក្នុងវិស័យនេះ តែងតែជំរុញឲ្យអ្នក​វិនិយោគជាតិ និងអន្តរជាតិវិនិយោគលើរមណីយដ្ឋានកែច្នៃឲ្យបានច្រើន ដើម្បីទាក់ទាញភ្ញៀវ​ទេសចរណ៍អន្តរជាតិមកស្នាក់នៅ និងកម្សាន្តរយៈពេលវែងនៅកម្ពុជា។

លោកបន្តថា “វិស័យឯកជនស្វាគមន៍គំរោងវិនិយោគថ្មីនេះ ព្រោះវាជាការធ្វើពិពិធកម្ម​ទីផ្សារទេសចរណ៍ ខណៈតំបន់កំសាន្តនៅរាជធានីភ្នំពេញនៅមានកម្រិតនៅឡើយ”៕