ដោយ គង់ សូរិយា

ភ្នំពេញ៖ ការលក់ផ្ទះ មិនមែនដូចការលក់បន្លែនៅលើទីផ្សារទេ ព្រោះផ្ទះជាអចលនទ្រព្យធំមានតម្លៃខ្ពស់ និងជាអចលនទ្រព្យសម្រាប់បំរើការរស់នៅ ហេតុនេះ ការលក់ផ្ទះពិតជាពិបាក តែក៏មិនពិបាកបើសិនជាលោកអ្នកអនុវត្តន៍តាមអ្នកជំនាញរបស់យើង។

លោកស្រី តាំង ហួរ អគ្គនាយិកានៃក្រុមហ៊ុន AMATAK Property Service Co, Ltd ដែលមានជំនាញលើការងារនេះ បានឲ្យដឹងកាលពីព្រឹកថ្ងៃទី១៦ កក្កដានេះថា ការលក់ផ្ទះឲ្យឆាប់ដាច់ មិនមែនជាការងាយស្រួលនោះទេ ប្រសិនជាយើងមិនដឹងពី​យុទ្ឋសាស្រ្ត និងរបៀបរៀបចំផ្ទះឲ្យបានត្រឹមត្រូវ។

លោកស្រីបានបន្តថា ដើម្បីលក់ផ្ទះឆាប់ដាច់ម្ចាស់ផ្ទះត្រូវអនុវត្តន៍វិធីសាស្រ្ត​ចំនួន៥ រួមមាន ទី១ ហាមលក់ផ្ទះដែលមិនបានសំអាតហើយ​កខ្វក់ និងមានក្លិនមិនល្អ។ ទី២ នៅពេលដែលអ្នកសម្រេចចិត្តលក់អចលនទ្រព្យ របស់អ្នកត្រូវសុំការប្រឹក្សាពីក្រុមហ៊ុន ឬអ្នកដែលមានជំនាញ ឬត្រូវទទួលយកតំលៃសមរម្យណាមួយសំរាប់លក់ និងត្រូវការសំអាតអនាម័យឲ្យបានស្អាត ប្រសិន​បើផ្ទះអ្នកមានសួនច្បារត្រូវថែរក្សារកាត់ផ្កាឲ្យស្រស់បែបធម្មជាតិ។

ទី៣ ម្ចាស់ផ្ទះត្រូវយកចិត្តទុកដាក់ជាពិសេស ទៅលើបន្ទប់គេង កុំឲ្យមានខោ អាវ​រញ៉េរញ៉ៃ​ និងបន្ទប់ទឹកក្លិនមិនល្អ។ អំពូលភ្លើងដាច់ងងឹតឈឹង ផ្ទះបាយមិនស្អាត កន្លែងទទួលភ្ញៀវ និងទីធ្លាផ្នែកខាងក្រោយមិនសំអាតជារឿងមិនត្រូវធ្វើ​។ កុំទុកឱ្យមានចានមិនទាន់លាង ឬផ្ទះបាយមិនស្អាតឱ្យសោះ ឫក្លិនជក់បារីនៅក្នុងផ្ទះ និងចៀសវាងក្លិនអាហារផ្សេងៗ ដូចជាត្រី ប្រហុក ឬអាហារដែលមានក្លិនខ្លាំងដទៃទៀត។

ទី៤ ត្រូវសម្អាតផ្ទះឲ្យបានស្អាត និងមានក្លិនល្អជាគន្លឹះ ដើម្បីផ្តល់ភាពទាក់ទាញ។ ជៀសវាងប្រើគ្រឿងក្រអូបSpayបាញ់ខ្លាំងពេក មុនពេលអ្នកទិញមកផ្ទះ របស់អ្នក និងចំណុចទី៥ គឺជាគន្លឹះពិសេសចុងក្រោយមុន នឹងភ្ញៀវមកមើលផ្ទះអ្នកត្រូវបើកភ្លើងពណ៍ឲ្យភ្លឺល្មម ហើយកុំភ្លេចបើកម៉ាស៊ីនត្រជាក់ចោលផង ហើយត្រូវមានក្លិនល្អ។ លោក អ្នកអាចឆុងកាហ្វេ ឬដុតទៀនក្រអូប Aroma មុនពេលមានការចុះមកមើលផ្ទះរបស់អ្នកទិញ ព្រោះក្លិនទាំងនេះ គឺមានការទាក់ទាញយ៉ាងខ្លាំង ហើយអាចទាក់ទាញចំណាប់អារម្មណ៍អ្នកទិញបាន៕

អបអរសាទរៈក្រុមហ៊ុនCentury21ចំនួន៨បានទទួលពានរង្វាន់ពីសហរដ្ឋអាមេរិក

ដោយ : គង់ សូរិយា
ភ្នំពេញ : រយៈពេល៤ឆ្នាំនៃការនាំយកក្រុមហ៊ុន Master Century21Cambod​ia ​​មកកាន់កម្ពុជា ទីផ្សារអចលនវត្ថុកម្ពុជាបានចាប់ផ្តើម ទទួលសេវាកម្មកាន់តែមានគុណភាព និងទំនុកចិត្ត។
ក្នុងចំណោមក្រុមហ៊ុនដែលបានទិញ Franchise ជាច្រើន មានក្រុមហ៊ុនចំនួន៨ បា​ន​​ទទួលពានរង្វាន់ពីសហរដ្ឋអាមេរិក ដែលជាការទទួលស្គាល់លើការផ្តល់សេវាកម្មប្រ​កបដោយទំនុកចិត្តពីអតិថិជនជាតិ និងអន្តរជាតិ។

ក្រុមហ៊ុនទាំង៨នោះរួមមាន ក្រុមហ៊ុន Century21 Mekong ដែលមានលោក ច្រឹក សុខនីម ជាអគ្គនាយក, ក្រុមហ៊ុន Century21 Dream Property ដែលមានលោក គាម សៀកឡុង ជាអគ្គនាយក, ក្រុមហ៊ុន Century21 Advanced Property ដែលមានលោក ឡុង គីមសួរ ជាអគ្គនាយក, ក្រុមហ៊ុន Century21 Fuji Realty ដែលមានលោក អ៊ុក ឆេងលី ជាអគ្គនាយក, ក្រុមហ៊ុន Century21 Regent Realty ដែលមានលោក Yeh Chen Shu ជាអគ្គនាយក ,ក្រុមហ៊ុន Century21 Imperial realty  ដែលមានលោក Ken Lo ជាអគ្គនាយក, ក្រុមហ៊ុន Century21 Golden Realty ដែលមានលោក ហេង វឌ្ឍនា ជាអគ្គនាយក និងក្រុមហ៊ុន Century21 World trust ដែលមានលោក ជា លីហៀង ជាអគ្គនាយក។

ក្នុងពិធីអបអរសាទរសម្រាប់វឌ្ឍនភាពនៃក្រុមហ៊ុននេះ អ្នកនាង Grace Rachny Fong នាយិកាក្រុមហ៊ុន Century21 Cambodia បាន​ថ្លែងឲ្យដឹងកាលពីថ្ងទី១៤កក្កដាកន្ល​ងមក ដោយបានអបអរសាទរចំពោះសមិទ្ឋិផល ដែលមហាគ្រួសារក្រុមហ៊ុន Century21 ទំាង៨ការិយាល័យប្រចាំកម្ពុជា ដែលសម្រេចបាននូវសមិទ្ឋិផលរបស់ខ្លួន និងបានទទួលពីក្រុមហ៊ុនដ៏ធំ Century21 នៅសហរដ្ឋអាមេរិក។
អ្នកនាងបន្តថា “វាជាកិត្តិយសសម្រាប់ក្រុមហ៊ុន និងសម្រាប់ប្រទេសរបស់យើងដែលក្រុមហ៊ុនទាំងនេះបានបំពេញការងារយ៉ាងសកម្ម និងបានបង្វឹកភ្នាក់ងារបស់យ៉ាងជោគជ័យ ក្នុងការបំរើសេវាកម្មដ៏ល្អដល់ម្ចាស់ទ្រព្យអ្នកទិញ និងអ្នកវិនិយោគ”។

ប្រធានក្រុមប្រឹក្សាភិបាលក្រុមហ៊ុន Century21 Cambodia លោក គុយ វ៉ាត បានថ្លែងថា អ្វីដែលយើងបានប្រឹងប្រែងរយៈពេលជាង៣ឆ្នាំមកនេះ យើងទទួលបានលទ្ឋផលមិនធំពេកទេ តែយើងបាននាំមុខក្នុងទីផ្សារនៅកម្ពុជា ហើយប្រសិនជាយើងខិតខំប្រឹងប្រែងរយៈពេលពីរបីឆ្នាំទៀត ក្រុមហ៊ុននេះនឹងមិនមានអ្នកណា តាមទាន់នៅក្នុងទីផ្សារនោះទេ។
លោកបន្តថា “ការផ្តល់សេវាកម្មមានគុណភាពមានសារៈសំខាន់ណាស់ ដើម្បីផ្តល់ទំនុកចិត្តដល់ទីផ្សារ ផ្តល់ទំនុកចិត្តដល់អ្នវិនិយោគជាតិ និងអន្តរជាតិ ដើម្បីរួមចំណែកអភិ​វឌ្ឍន៍ក្រុមហ៊ុនរបស់យើង និងប្រទេសជាតិរបស់យើង”។ លោកបន្តថា “ការសម្រេចបាន​ពានរង្វាន់នៃក្រុមហ៊ុនទាំង៨ បានឆ្លុះបញ្ចាំងពីភាពជោគជ័យរបស់យើង និងទំនុកចិត្តរប
ស់អតិថិជនចំពោះក្រុមហ៊ុនរបស់យើង”។
លោក គុយ វ៉ាត បានបន្តថា ជាភ្នាក់ងារអចលនទ្រព្យ យើងត្រូវខិតខំធ្វើការងារ និងផ្តល់សេវាកម្មប្រកបដោយគុណភាព ស្មោះត្រង់ជាមួយអតិថិជន ព្រោះយើងក៏អាចប្រែក្លាយខ្លួនពីភ្នាក់ងារអចលនវត្ថុ ទៅជាអ្នកវិនិយោគ ព្រោះនៅសហរដ្ឋអាមេរិក ភ្នាក់ងារអចលនទ្រព្យខ្លះបានក្លាយជា​សេដ្ឋី និងមានលំនៅដ្ឋានច្រើន ដូច្នេះភ្នាក់ងារអចលនវត្ថុកម្ពុជារបស់យើង ក៏អាចធ្វើបាន​ដែរ៕

ដោយ រ៉ាវី

ភ្នំពេញ៖ ចំនួនយូនីតខុនដូថ្មី ដែលបានបញ្ចប់ការសាងសង់ និងដាក់ចូលទីផ្សារបាន​បន្តកើនចំនួនប្រមាណ2,000យូនីតបន្ថែមទៀត ខណៈទីផ្សារលក់លំនៅដ្ឋានបែបសហកម្មសិទ្ឋមានភាពយឺតជាងមុន។

យោងតាមរបាយការណ៍ចេញផ្សាយដោយក្រុមហ៊ុន CBRE Cambodiaកាលពីពេលថ្មីៗនេះបានបង្ហាញថា ការលក់របស់ខុនដូតម្លៃសមរម្យ និងខុនដូប្រភេទមធ្យមពុំមានការផ្លាស់ប្តូរដែលគួរឱ្យកត់សំគាល់នោះទេ ស្របពេលដែលតម្លៃរបស់ខុនដូប្រភេទប្រណីតបានកើនឡើង២%បើធៀបនឹងត្រីមាសមុន។ ក្នុងពេលដែលការផ្គត់ផ្គង់ការិយា​ល័យបានថយចុះ៣.៣% ខណៈដែលអត្រានៃការជួលអាគារការិយាល័យ បានកើនឡើងរហូតដល់៨៧.៧% នៅចុងត្រីមាសទី២ ពី៨២.៧% នៅចុងឆមាសទី១នៃឆ្នាំ2018នេះ។

ខុនដូដែលបានបញ្ចប់ការសាងសង់នៅក្នុងត្រីមាសទី២នេះ មានចំនួន5គម្រោង ដែលមានខុនដូសរុបរហូតដល់២,២៥៦យូនីត ត្រូវបានបើកលក់នៅលើទីផ្សារភ្នំពេញ។​

អ្នកនាង អាន សុធីតា នាយិកាប្រចាំប្រទេសនៃក្រុមហ៊ុន CBRE Cambodia បានលើកឡើងផងដែរថា ចំពោះទីផ្សារខុនដូនាពេលបច្ចុប្បន្ន នៅតែស្ថិតលើបន្ទាត់វិជ្ជមានគ្មានអ្វីដែលគួរអោយបារម្ភនោះទេ ប៉ុន្តែទាស់ត្រង់ថាទំនោររបស់អ្នកទិញបានងាកទៅរកខុនដូដែលជិតបញ្ចប់ការសាងសង់ ឬបញ្ចប់ការសាងសង់ គេមិនទិញខុនដូណាដែលគ្រាន់តែប្រកាសគម្រោង ហើយផ្ដើមលក់នោះទេ។

អ្នកនាងបន្តថា “ខ្ញុំមិនមើលឃើញស្ថានភាពអចលនទ្រព្យ ពិសេសខុនដូមានបញ្ហា​នោះទេ ទោះបីជាការលក់យឺតបន្តិចធៀបនឹងឆ្នាំមុនក៏ដោយ”។

តំបន់បឹងកេងកង១ ខណ្ឌចំការមន នៅតែជាតំបន់ឈរមុខគេ ក្នុងការសាងសង់អាគារខុនដូរសម្រាប់ជួលឬលក់ ដោយក្នុងនោះអតិថិជនភាគច្រើន គឺជាវិនិយោគិនបរទេ​ស ចំណែកវិនិយោគិនក្នុងស្រុកភាគច្រើន ទិញអគារខុនដូរជាយក្រុង ដែលមាននៅក្នុងខណ្ឌសែនសុខ និងសង្កាត់ចាក់អង្រែក្នុងខណ្ឌមានជ័យ៕

ដោយ គង់ សូរិយា

ភ្នំពេញ៖ ក្រុមអ្នកជំនាញអចលនវត្ថុកម្ពុជាបានថ្លែងថា វិស័យអចលនទ្រព្យកម្ពុជានឹងមានភាពរីកចម្រើនខ្លាំង នៅក្រោយការបោះឆ្នោត ជ្រើសតាំងតំណាងរាស្រ្តអាណត្តិទី៦នាថ្ងៃទី២៩ កក្កដាខាងមុខនេះ។

លោក Ken Lo អគ្គនាយកក្រុមហ៊ុនអចលនវត្ថុ Century 21 Imperial Realty បានមានប្រសាសន៍ឲ្យដឹង ក្នុងពិធីអបអរក្រុមហ៊ុនCentury21ចំនួន៨ ដែលទទួលបានពានរង្វាន់ចំនួន៨ពីសហរដ្ឋអាមេរិកនៅព្រឹកថ្ងៃទី១៤ កក្កដានេះថា វិស័យអចលនទ្រព្យនៅកម្ពុជា នឹងមានភាពរីកចម្រើនកាន់តែខ្លាំងថែមទៀត ក្រោមការបោះឆ្នោតនាពេលខាងមុខនេះ។លោកបន្តថា ហេតុនេះភ្នាក់ងារអចលនវត្ថុកម្ពុជានានា ត្រូវខិតខំប្រឹងប្រែងឲ្យបានខ្លាំងក្លាថែមទៀត ដើម្បីពង្រីកសក្តានុពលរបស់ខ្លួន និងជំរុញទំនុកចិត្តក្នុងវិស័យនេះ។

លោកបន្តថា “ការរីកចម្រើនវិស័យអចលនវត្ថុកម្ពុជា នឹងផ្តល់ផលប្រយោជន៍ច្រើន ដល់ប្រទេសជាតិ ហើយការរីកចម្រើននេះនឹងបន្តរយៈពេលវែងបន្តទៀត”។

ប្រធានក្រុមប្រឹក្សាភិបាល នៃក្រុមហ៊ុនអចលនទ្រព្យលំដាប់ពិភពលោក Century​21 Cambodia និងជាអ្នកនាំយក Master Franchise ក្រុមហ៊ុននេះមកកាន់កម្ពុជាបានថ្លែងថា ស្ថានភាពវិស័យអចលនវត្ថុកម្ពុជា នៅតែបន្តមានភាពរ៉ឹងមាំ ហើយក្រុមហ៊ុនរបស់​យើងមិនទាន់ទទួលបានលទ្ឋផលធំដុំពេកទេ តែបើយើងពីទីផ្សារវិញ យើងនៅតែមានភាព​នាំមុខគេនៅក្នុងទីផ្សារនេះ។

លោកបន្តថា “ក្រោយការបោះឆ្នោត ស្ថានភាពវិស័យនេះ​នឹងរីកចម្រើនបន្តទៀត ប្រសិនជាស្ថានភាពនយោបាយ មិនមានការប្រែប្រួលជាដុំកំភួនណា​មួយនោះ”។

ក្នុងរយៈពេលមួយទសវត្សរ៍ចុងក្រោយនេះ ទឹកប្រាក់រាប់ពាន់លានដុល្លារបានចាក់ចូលក្នុងវិស័យអចលនវត្ថុកម្ពុជា ដែលធ្វើឲ្យទីក្រុងភ្នំពេញឈានទៅកាន់កម្រិតថ្មីមួយទៀ​ត ក្នុងនាមជាទីក្រុងពាណិជ្ជកម្មនិងហិរញ្ញវត្ថុអន្តរជាតិ។

លោក គុយ វ៉ាត បានបន្តថា អ្វីដែលត្រូវធ្វើបន្តគឺពង្រីកសេវាកម្មរបស់យើង និងផ្តល់ទំនុកចិត្តដល់អ្នកវិនិយោគជាតិ និងអន្តរជាតិ ទើបយើងអាចជំរុញឲ្យវិស័យនេះមានការរីក​ចម្រើនប្រកបដោយនិរន្តរភាព៕

ជាដំណឹងមួយដ៏រីករាយ និងល្អបំផុតសម្រាប់អ្នកដែលមានបំណងចង់បានលំនៅដ្ឋានប្រភេទផ្ទះល្វែងបែបប្រណីតភាព និងទាន់សម័យ ហើយអាចប្រកបអាជីវកម្មបានទៀតនោះ បុរី VIP ដែលមានកេរ្តិ៍ឈ្មោះល្បីខាងសាងសង់សំណង់លំនៅដ្ឋាននោះ បានបង្កើតកម្មវិធីយ៉ាងពិសេសសម្រាប់អតិថិជនរបស់ខ្លួនដោយការលក់ជូននូវលំនៅដ្ឋានប្រភេទផ្ទះល្វែងដ៏ស្រស់ស្អាតត្រឹមតែតម្លៃ 25800ដុល្លារតែប៉ុណ្ណោះ។

លោក យ៉ែន សុខលីន ប្រធានគ្រប់គ្រងផ្នែកទីផ្សារបានប្រាប់ឱ្យដឹងថា ៖ សម្រាប់លំនៅដ្ឋានប្រភេទផ្ទះល្វែងដែលនៅក្នុងតម្លៃដ៏ទាបមិនធ្លាប់មាននេះគឺស្ថិតនៅក្នុងគម្រោងទី4 របស់ បុរី VIP ខណៈដែលគម្រោងទី1 គម្រោងទី2 និងគម្រោងទី 3 ត្រូវបានដំណើរការយ៉ាងរលូន និងជោគជ័យបំផុត ។ ចំពោះគម្រោងទី4 ដែលកំពុងតែដំណើរការផ្តើមសាងសង់មួយនេះ ត្រូវបានរៀបចំ និងសង់ជាសំណង់លំនៅដ្ឋានបែបជាផ្ទះល្វែង 4ប្រភេទ ដែលប្រភេទនីមួយៗសុទ្ធតែមានភាពប្រណីត ស្រស់ស្អាត ទាន់សម័យ និងអាចប្រកបអាជីវកម្មបានដូចគ្នាទាំងអស់ ហើយអ្វីដែលសំខាន់ គឺគុណភាពនៃការសាងសង់ស្របតាមស្ដង់ដារសំណង់ និងមានទីធ្លានៅសល់មុខផ្ទះ4-6ម៉ែត្រ សម្រាប់ទុកយានយន្តផងដែរ។

ក្រុមហ៊ុនបានយកចិត្តទុកខ្ពស់លើការផ្តល់ជូនអតិថិជនប្រកបដោយផាសុកភាពខ្ពស់ ទាំងការបុកគ្រឹះដ៏រឹងមាំ សំណង់លំនៅដ្ឋានមានគុណភាព មានផ្លូវបេតុងធំទូលាយ ទំហំ 8-12ម៉ែត្រ មានប្រព័ន្ធលូ ប្រព័ន្ធអគ្គិសនី យ៉ាងត្រឹមត្រូវ។ លោកបានបន្តទៀតថា ៖ អ្វីដែលរឹតតែពិសេស និងអស្ចារ្យនោះ គឺរាល់អតិថិជនទាំងអស់អាចមានជម្រើសជាច្រើនក្នុងការបង់ប្រាក់ និងមានរយៈពេលយូរ ដូចជាអាចបង់ប្រាក់ផ្ដាច់តែម្ដង ឬបង់រំលោះជាដំណាក់កាលប្រចាំខែ ដែលអាចអនុគ្រោះយ៉ាងប្រសើរសម្រាប់អ្នកដែលមានចំណូលមធ្យម និងក្រោមមធ្យម ចង់ក្លាយជាម្ចាស់ពេញសិទ្ធិលើលំនៅដ្ឋាន។

ជាមួយនឹងគម្រោងទី4 របស់បុរី VIP នេះ មានលក្ខណៈពិសេសជាច្រើន ដែលផ្តល់ភាពងាយស្រួលក្នុងការរស់នៅ និងប្រកបអាជីវកម្ម ដូចជាមានហ៊ុំព័ទ្ធទៅដោយ សាលារៀនឯកជន សាលារៀនរដ្ឋ មន្ទីពេទ្យ គ្លីនិក Martទំនើប ភោជនីយដ្ឋាន ផ្សារម៉ឺនត្រា ផ្សាររបស់បុរី VIP 2ជាន់ សម្រាប់អ្នករស់នៅក្នុងបុរីចង់ប្រកបអាជីវកម្ម និងស្ថិតនៅជិតផ្លូវសេដ្ឋកិច្ចជាច្រើន រួមមានផ្លូវ217 ដ៏ធំទូលាយ កែងផ្លូវសម្តេចតេជោ 60ម៉ែត្រ  ដែលចំណាយពេលត្រឹម10នាទីអាចធ្វើដំណើរទៅដល់ផ្សារទំនើប PH Mall និងផ្សារទំនើប AEON 3 ។

ចំពោះប្រភេទផ្ទះល្វែងមានដូចជា ៖ ប្រភេទទំហំ 4,50m X 8m ដែលមានបន្ទប់គេងចំនួន2 បន្ទប់ទឹកចំនួន2 បន្ទប់ទទួលភ្ញៀវចំនួន1 និងផ្ទះបាយចំនួន1 លក់ក្នុងតម្លៃត្រឹម 25800 ដុល្លារតែប៉ុណ្ណោះ ។

ដោយឡែកប្រភេទទំហំ 4,20m X 9m ដែលមានបន្ទប់គេងចំនួន2 បន្ទប់ទឹកចំនួន2 បន្ទប់ទទួលភ្ញៀវចំនួន1 និងផ្ទះបាយចំនួន1 ហើយអាចឡើងជាន់បាន ។

ប្រភេទទំហំ 4,20m X 12m ដែលមានបន្ទប់គេងចំនួន2 បន្ទប់ទឹកចំនួន3 បន្ទប់ទទួលភ្ញៀវចំនួន1 និងផ្ទះបាយចំនួន1 ហើយអាចឡើងជាន់បាន។

ប្រភេទទំហំ 4,20m X 14m ដែលមានបន្ទប់គេងចំនួន2 បន្ទប់ទឹកចំនួន3 បន្ទប់ទទួលភ្ញៀវចំនួន1 និងផ្ទះបាយចំនួន1 ហើយអាចឡើងជាន់បាន។

សូមបញ្ជាក់ផងដែថា ចំពោះសំណង់លំនៅដ្ឋាន ដែលស្ថិតនៅក្នុងបុរី VIP គម្រោងទី4នេះ ស្ថិតនៅភូមិម៉ឺនត្រា សង្កាត់ស្ពានថ្ម ខណ្ឌដង្កោ រាជធានីភ្នំពេញ ។ សម្រាប់ព័ត៌មានលម្អិត អាចទាក់ទងតាមរយៈទូរស័ព្ទលេខ៖ 017 63 64 63 / 081 65 33 33 / 088 67 333 77 , Facebook: Yen Soklin
(Page: បុរី VIP វីអាយភី) ឬតាមរយៈ Email: [email protected]

ដោយ វុត្ថា

ភ្នំពេញ៖ ទីក្រុងឌុយបៃជាប្រភពនៃអគារខ្ពស់ៗ ក្នុងចំណោមទីក្រុងនានានៅទូទាំងពិភពលោក ដោយក្នុងទីក្រុងមួយនេះមានអគារខ្ពស់ៗជាច្រើនប្រភេទ ដែលអាចទាក់ទាញទេសចរណ៍ មកពីគ្រប់មជ្ឈដ្ឋានមកទស្សនា និងស្វែងយល់ពីសក្កដានុពលនៃការរីកចម្រើននៃអគារខ្ពស់កប់ពពក។

ថ្ងៃនេះ Propertyarea.asia សូមលើកយកអាគារកប់ពពកដ៏អស្ចារ្យមួយនៃទីក្រុង​នេះ ដើម្បីផ្តល់ការស្វែងយល់ដល់មិត្តអ្នកអានបន្តទៀត។

អគារ Anara Tower ជាមជ្ឈមណ្ឌលពាណិជ្ជកម្មចម្រុះខ្ពស់កប់ពពក់មួយ ស្ថិតនៅក្នុងទីក្រុងឌុបៃប្រទេសអារ៉ាប់រួម ដែលមានកំពស់៦០០ម៉ែត្រ និង១៣០ជាន់។ អគារនេះ ត្រូវបានគេរចនាប្លង់ដ៏ល្អឯកជាមួយបំពុងស្រូបខ្យល់។ អគារនេះត្រូវបានសាងសង់ឡើង សម្រាប់ប្រើប្រាស់រួមមាន ដូចជា ការិល័យធ្វើការ អគារជួល អាផាតមិន សណ្ឋគារនិង កន្លែងតាំងវត្ថុសីល្បៈ ។ អគារនេះរួមបញ្ចូលទាំងសួនកម្សាន្តនៅជាន់ទី១៧ និងមានភោជនីយដ្ឋានដ៏ប្រណិត។

អគារខ្ពស់ដ៏មហិមារនេះ ត្រូវបានគេសាងសង់ឡើងដោយរំពឹងថា នឹងក្លាយជាប៉មថាមពល ដែលមានប្រសិទ្ធិភាពដោយការបញ្ចូលប្រភពថាមពល ដែលអាចកកើតឡើងវិញបាន។

អគារនេះជាកម្មសិទ្ធិរបស់ក្រុមហ៊ុន Tameer Holding Investments សាងសង់ឡើងជាមអគារពាណិជ្ជកម្ម និងស្នាក់នៅ ដែលរចនាមូដដោយស្ថាបត្យករ Atkins  ក្នុងឆ្នាំ ២០០៨ ដែលអាចឲ្យអ្នកទៅលេងទីនោះ អាចមើលទេសភាពមហាសមុទ្រ និងទីក្រុងទាំងមូលបាន។

លោក Ghassan Skhnini អគ្គនាយកក្រុមហ៊ុន Tameer Holding Investments បានថ្លែងអោយដឹងថា អគារនេះត្រូវបានរចនាប្លង់ ឡើងតាមសិល្បៈ និងវប្បធម៌អ្នករស់នៅក្នុងទីក្រុងឌុបៃ៕

ដោយ គង់ សូរិយា

ភ្នំពេញ៖ អ្នកជំនាញនានាបានលើកឡើងថា ការវិនិយោគលើដីធ្លីសុទ្ឋតែទទួ​លបានផលចំណេញ និងប្រឈមនឹងហានិភ័យផងដែរ ហេតុនេះការជ្រើសរើសទីតាំង ដើម្បីវិនិយោគបានផលចំណេញមានសារៈសំខាន់ណាស់។

ប្រធានសមាគមអ្នកវាយតំលៃ និងភ្នាក់ងារអចលនវត្ថុកម្ពុជាលោកបណ្ឌិត គីម ហ៊ាង បានថ្លែងឲ្យដឹងកាលពីពេលថ្មីៗនេះថា លោកគិតថាការវិនិយោគលើដីធ្លីមានការបែងចែកជាដំណាក់កាលខុសៗគ្នា អាស្រ័យលើទំហំទុន និងពេលវេលាសមស្រប ប៉ុន្តែលោកបានផ្តល់យោបល់ថា បើសិនជាអ្នកមានលទ្ឋភាពចង់ទិញដី​សាងសង់ខុនដូ គួរទិញនៅតំបន់ទួលគោក ភ្នំពេញថ្មីសម្រាប់រយៈពេល៥ឆ្នាំក្រោយ។

ប៉ុន្តែប្រសិនជាចង់ទិញដីសាងសង់បុរី លោកគិតថាគួរទិញដីដែលមានចម្ងា​យ៣០គីឡូម៉ែត្រជុំវិញក្រុងភ្នំពេញ និងនៅស្របតាមខ្សែក្រវ៉ាត់ក្រុងទី២ ហើយបើគិតដល់រយៈពេល១០ឆ្នាំក្រោយ ទិញដីស្ថិតនៅចម្ងាយ៤០គី​ឡូម៉ែត្រពីភ្នំពេញ គឺពិតជាមិនខុសនោះទេ។ លោកគីម ហ៊ាងបញ្ជាក់ឲ្យដឹង។

លោកបន្តថា “តម្លៃដីធ្លីនៅតំបន់ជុំវិញក្រុង នឹងកើនឡើងខ្លាំង ដោយសារកំនើនប្រជាសាស្រ្ត កំណើនសេដ្ឋកិច្ច និងប្រាក់ចំណូលប្រជាពល​រដ្ឋ”។លោកបន្តថា “តាមការព្យាករណ៍បានរកឃើញថា ប្រជាជនក្រុងភ្នំពេញនឹងកើនឡើងដល់៧លាននាក់នៅឆ្នាំ២០៣០ ហើយខ្ញុំយល់ស្រប”។

ប្រធានសមាគមរូបនេះបានបន្តថា បទពិសោធន៍បែបនេះ បានកើតមានរួចហើយ​ នៅប្រទេសម៉ាឡេស៊ី ថៃ វៀតណាម ដែលប្រជាជន ពិសេសយុវជនចូលមកកាន់ទីក្រុងរកការងារធ្វើ និងមកសិក្សា ហើយពួកគេនឹងមិនត្រលប់ទៅវិញនោះទេ។

នាយិកាក្រុមហ៊ុន Century21 Cambodia អ្នកនាង Grace Rachny Fong បានថ្លែងឲ្យដឹងផងដែរថា ប្រសិនជានិយាយពីឳកាសវិនិយោគវិញ អ្នកមានលទ្ឋភាពគួរទិញដីធ្លីទុកយកចំណេញ ប៉ុន្តែគួររកទីតាំងល្អដោយត្រូវពិនិត្យមើលលើតម្រូវការជំវិញ ការអភិ​វឌ្ឍន៍ហេដ្ឋារចនាសម្ពន្ឋ គំរោងវិនិយោគលើវិស័យម្ហូបអាហារ និងភេសជ្ជៈនានា ដែលសុទ្ឋតែជាសកម្មភាពអភិវឌ្ឍន៍ធ្វើឲ្យតម្លៃដីឡើងថ្លៃ។

អ្នកនាងបន្ថែមថា “អ្នកវិនិយោគគួរសម្លឹងមើលដី នៅតាមបណ្តោយផ្លូវជាតិលេខ១ លេខ២ និងទីតាំងមួយចំនួនទៀត ដែលមានសក្តានុពល”៕