ដោយ គង់ សូរិយា

ភ្នំពេញ៖ ប្រធាន​សមាគម​សម្ព័ន្ធ​ខ្មែរ ចិន​បាន​ជំរុញ​ឲ្យ​ផ្សារ​បរពៃណី​ក្នុងស្រុក​ពង្រឹង​សេវាកម្ម និង​កែលំអរ​គុណភាព​បរិស្ថាន អាន​ម័​យ និង​តម្លៃ ទើប​អាច​រក្សា​ភាព​ប្រកួតប្រជែង​ជាមួយ​ផ្សារទំនើបៗបាន។

លោក​ឧកញ៉ា ពុង ឃាវ​សែ​បានលើកឡើង​ក្នុង​ពិធី​ទទួលទាន​អាហារ​មិត្តភាព​របស់​សមាគម​សម្ព័ន្ធ​ខ្មែរ ចិន ធ្វើឡើង​នា​ល្ងាច​ថ្ងៃទី ១៩ ខែមិថុនា ឆ្នាំ២០១៨ ដោយមាន​ការចូលរួម​ពី​អាជីវករ​ជាង២ពាន់​នាក់ មកពីផ្សារធំៗទាំង១០ក្នុង​រាជធានី​ភ្នំពេញ និង​សមាជិកសមាគម​សម្ព័ន្ធ​ខ្មែរ ចិន​ប្រមាណ៥០០នាក់​ថា ច្បាស់​ណាស់​សព្វថ្ងៃ​ផ្សារ​លក្ខណៈ​ប្រពៃ​ក្នុង​រាជធានី​ភ្នំពេញ​ជួប​នូវ​បញ្ហា​មួយចំនួន ស្របពេល​មាន​វត្តមាន​ផ្សារ​ទំនើប​ជាច្រើន​រីកដុះដាល​ក្នុង​រយៈពេលថ្មីៗនេះ។ តែ​ផ្សារ​ប្រពៃណី​នៅតែមាន​លក្ខណៈពិសេស​ស ដូចជា​ផ្សារ​ធំថ្មី និង​ផ្សារ​ទួល​ទំពូង​ជា​ផ្សារ​ទទួល​ភ្ញៀវទេសចរ ផ្សារ​អូរ​ឬ​ស្សី និង​ផ្សារ​អូឡាំពិក ជា​ផ្សារ​លក់ទំនិញ​បោះ​ដុំ រីឯ​ផ្សារ​ចាស់ ផ្សារ​ដេប៉ូ ផ្សារកណ្ដាល ផ្សារ​ដើម​គរ និង​ផ្សារ​ច្បារអំពៅ​ជា​ផ្សារ​លក់រាយ លក់​បន្លែ​និង​ត្រី​សាច់។ តែ​ក្នុងនោះ​ក៏​ទាមទារ​អោយ​អាជីវករ​ក្នុង​ផ្សារ​ប្រពៃណី​ត្រូវ​ពង្រឹង​ខ្លួនឯង ដើម្បី​ធានា​នូវ​ភាពជោគជ័យ។

លោក​បន្តថា “ការរៀបចំ​ពិធី​បាយ​មិត្តភាព​នេះ​ឡើង ដើម្បី​ពង្រឹង​ទំនាក់ទំនង រវាង​សមាគម​ជាមួយនឹង អាជីវករ​ក្នុង​រាជធានី​ភ្នំពេញ និង​ដើម្បី​ស្វែងយល់​ពី​តម្រូវការ ថែមទាំង​ភាពលំបាក​របស់​អជីវ​ករ​ផ្សារ​ទាំងអស់ ក្នុង​រាជធានី​ភ្នំពេញ។ លោក​បន្តថា អាជីវករ​ដែល​ជួប​បញ្ហា​អាច​ទំនាក់ទំនង​មក​សមាគម នោះ​សមាគម​ជន​នឹង​ជួយ​ទៅ​លទ្ធភាព​ដែល​សមាគម​ធ្វើទៅបាន។

អ្នកជំនាញ​អចលនទ្រព្យ​កម្ពុជា អ្នកនាង​អាន សុ​ធីតា​នាយិកា​ប្រចាំ​ប្រទេស​នៃ​ក្រុមហ៊ុន​CBRE Cambodia បាន​ថ្លែងថា ការរីកចម្រើន​ផ្សារ​ទំនើប​នៅ​កម្ពុជា បាននិងកំពុង​ធ្វើ​ឲ្យ​ផ្សារ​ប្រពៃណី​ជួប​បញ្ហា​ផងដែរ ដែល​ទាមទារ​ឲ្យ​ផ្សារ​និមួយៗពង្រឹង​នូវ​គុណភាព​សេវាកម្ម អនាម័យ និង​បរិស្ថាន​របស់ខ្លួន​កាន់តែ​ល្អប្រសើរ ដើម្បី​អាច​ធានា​និរន្តរភាព​របស់ខ្លួន។អ្នកនាង​បន្តថា ឆ្នាំ២០១៨ជា​ឆ្នាំ​នៃ​ផ្សារ​ទំនើប ដោយ​ផ្សារ​ទំនើប​លំដាប់​អន្តរជាតិ និង​ផ្សារ​ទំនើប ដែល​វិនិយោគ​ដោយ​អ្នកវិនិយោគ​ក្នុងស្រុក ដែល​ធ្វើ​ឲ្យ​និន្នាការ​ប្រកួតប្រជែង​កើនឡើង។

អ្នកនាង​បន្តថា “ទោះជា​យ៉ាងណា​ការផ្គត់ផ្គង់​ផ្សារ​ទំនើប​នៅ​កម្ពុជា មិនទាន់​លើស​តម្រូវការ​ទេ ប៉ុន្តែ​បើ​មានការ​ផ្គត់ផ្គង់​ផ្សារ​ទំនើប​ច្រើន​ដូច​ឆ្នាំនេះ នឹងធ្វើ​ឲ្យ​ការផ្គត់ផ្គង់​ប្រឈមមុខ​នឹង​លើស​តម្រូវការ”៕

ដោយ គង់ សូរិយា

ភ្នំពេញ៖ ស្របពេលតម្លៃប្រេងកំពុងឡើងថ្លៃ និងកំពុងប៉ះពាល់ដល់ជីវភាពប្រជា​ពលរដ្ឋកម្ពុជា សម្តេចតេជោហ៊ុន សែននាយករដ្ឋមន្រ្តីកម្ពុជាបានប្រកាសថា សម្តេចនឹង​ប្រកាសគោលការណ៍តម្លៃប្រេងជាថ្មី នៅថ្ងៃទី២៨ មិថុនា ខាងមុខនេះ។

សម្តេចតេជោហ៊ុន សែនបានថ្លែងក្នុងពិធីប្រកាសគោរពងារមន្រ្តីជាន់ខ្ពស់កម្ពុជានៅរាជបណ្ឌិតសភាកម្ពុជានាព្រឹកថ្ងៃទី១៩ មិថុនានេះថា សម្តេចនឹងប្រកាសគោលការ​ណ៍​តម្លៃប្រេង ដើម្បីកាត់បន្ថយនូវផលប៉ះពាល់ដោយសារ ការតម្លើងថ្លៃតម្លៃប្រេងរបស់ពិភពលោក។ ទោះជាយ៉ាងណាសម្តេចមិនបញ្ជាក់នូវគោលការណ៍លំអិតនេះទេ ប៉ុន្តែទំនងជាគោលការណ៍ថ្មីនេះ នឹងធ្វើឲ្យតម្លៃប្រេងធ្លាក់ចុះ តាមរយៈការកាត់បន្ថយពន្ឋលើការនាំចូលប្រេងពីបរទេស។

សម្តេចតេជោបានបន្តដោយបង្ហើបថា “កម្ពុជាបាននិងកំពុងរៀបចំគោលនយោ​បា​យសេដ្ឋកិច្ចមួយ​ចំនួន សម្រាប់អនុវត្តន៍នៅអាណត្តិថ្មី”។

បច្ចុប្បន្នកម្ពុជានាំចូលប្រេងពីបណ្តាប្រទេសក្នុងតំបន់ ដែលធ្វើឲ្យតម្លៃប្រេងនៅកម្ពុជាពិបាកក្នុងការគ្រប់គ្រងតម្លៃប្រេងក្នុងស្រុក។

បច្ចុប្បន្នក្រុមហ៊ុន KRISENERGY បាន និងកំពុងចាបផ្តើមធ្វើអាជីវកម្មទាញយកប្រេងឆៅពីតំបន់ប្លុកអេរបស់កម្ពុជា ដែលរំពឹងថាកម្ពុជានឹងទទួលបានដំណក់ប្រេងតំបូងនៅចុងឆ្នាំ២០១៩ខាងមុខនេះ៕

ដោយ វុត្ថា

ភ្នំពេញ៖ រដ្ឋសភានៃកម្ពុជា បានអនុម័តឲ្យក្រុមហ៊ុនចំនួន២ វិនិយោគលើវិស័យអគ្គិសនីនៅកម្ពុជាគឺ ក្រុមហ៊ុនក្រុមហ៊ុន ស្នេថេក ខូអិលធីឌី និងក្រុមហ៊ុនខេមបូឌា អ៊ិនធើណេសិនណល អ៊ិនវេសមែន ឌីវើឡុបមែនគ្រុប ដែលក្រុមហ៊ុនទាំងពីរនេះនឹងបោះទុនវិនិយោគជាង១៣៤៨លានដុល្លារអាមេរិក។

គំរោងវិនិយោគលើវិស័យវារីអគ្គិសនៅនៅក្នុងខេត្តកំពុងស្ពឺ ស្ថិតនៅក្នុងតំបន់ត្មាតពង ឃុំដំណាក់វាំង ស្រុងកឧត្តុង ខេត្តកំពង់ស្ពឺ លើផ្ទៃដីទំហំប្រមាណ៨០ហិកតា ស្ថិតនៅតាមបណ្តោយផ្លូវជាតិលេខ៥១ ដែលមានអនុភាព៦០មេហ្គាវ៉ាត់ និងអាចផ្តល់បរិមាណចំនួន៩៦លានគីឡូវ៉ាត់ម៉ោងក្នុងមួយឆ្នាំ។ ក្រុមហ៊ុនគ្រោងនឹងបោះទុនវិនិយោគចំនួន ៥៨,២២៥,៣២០ដុល្លារអាមរិក។

ចំណែកក្រុមហ៊ុនក្រុមហ៊ុន ខេមបូឌា អ៊ិនធើណេសិនណល អ៊ិនវេសមែន ឌីវើឡុបមែនគ្រុប វិនិយោគទៅលើអគ្គិសនីឃ្យូងថ្មក្នុងខេត្តព្រះសីហនុ ដែលមានអនុភាពដំឡើង ៧០០មេហ្កាវ៉ាត់ និងបរិមាណថាមពលបញ្ចេញឲ្យបណ្តាញជាតិ៥២១២.២០លានគីឡូវ៉ាតម៉ោងក្នុងមួយឆ្នាំ ដោយប្រើប្រាស់បច្ចេកវិទ្យាថ្មី (Supper Critical ) រួមជាមួយបច្ចេកវិទ្យាធ្យូងថ្មស្អាត (Clean Coal Technology ) ដែលនាំយកនូវផលិតផល និងសម្ភារៈ មកពីបណ្តាប្រទេសនៅអឺរ៉ុបខាងលិច អាមេរិក ជប៉ុន ដែលធានបានប្រសិទ្ធិភាព ស្ថិរភាព និងប៉ះពាល់ដល់បរិស្ថានតិចតួចបំផុត។

ក្រុមហ៊ុននេះ នឹងបោះទុនវិនិយោគលើទំហំទឹកប្រាក់១២៩០,៥៤លានដុល្លារអាមេរិក ដែលក្នុងនោះទុនផ្ទាល់របស់ក្រុមហ៊ុន៣០ភាគរយ និងប្រាក់កម្ចី៧០ភាគរយ។

រដ្ឋសភាអនុម័តយល់ព្រមអោយក្រុមហ៊ុនចំនួន២ វិនិយោគលើវិស័យអគ្គិសនីនៅកម្ពុជា គឺដើម្បីឆ្លើយតបទៅនឹងតម្រូវការប្រើប្រាស់អគ្គិសនី និងកាត់បន្ថយការនាំចូលអគ្គិសនីពីប្រទេសជិតខាង។  ម្ពុជាត្រូវការអភិវឌ្ឍន៍ប្រភពថាមពលថ្មីៗបន្ថែមទៀត ដោយប្រើប្រាស់សក្តានុពលដែលខ្លួនមានឲ្យអស់លទ្ធភាព និងប្រកបដោយប្រសិទ្ធិភាពខ្ពស់។

ប្រភពថាមពលដែលប្រទេសកម្ពុជាអភិវឌ្ឍន៍កន្លងមករួមមាន ស្ថានីយវារីអគ្គិសនី រោងចក្រផលិតអគ្គិសនី ដុតធ្យូងថ្ម និងស្ថានីយផលិតអគ្គសនី ដើរដោយពន្លឺព្រះអាទិត្យ ៕

ដោយ គង់ សូរិយា

ភ្នំពេញ៖ សម្តេចតេជោហ៊ុន សែន នាយករដ្ឋមន្ត្រីកម្ពុជាបានណែ​នាំឱ្យបញ្ញវ័ន្តខ្មែរ ជាពិសេសមន្រ្តី​រាជបណ្ឌិតសភាកម្ពុជា សិក្សាស្រាវជ្រាវ ប្រមើ​លមើលដើម្បីត្រៀមបង្ការអំពីផលប៉ះពាល់នានា ពាក់ព័ន្ធនឹងជំលោះ​សង្គ្រាម​ពាណិជ្ជកម្មសកលលោក។

ប្រមុខរាជរដ្ឋាភិបាលកម្ពុជា បានមានប្រសាសន៍ក្នុងឳកាសអញ្ជើញ​ជាអធិបតី ​ក្នុងពិធី​ប្រកាស​គោរមងារវិទ្យាសាស្ត្រ និងគោរមងារ​កិត្តិយស នៃ​រាជបណ្ឌិតសភាកម្ពុជាចំនួន៨រូបនៅវិមានសន្តិភាព  ទីស្តី​ការ​នាយករដ្ឋមន្ត្រី នាព្រឹកថ្ងៃទី១៩ខែមិថុនានេះថា សភាពការណ៍ថ្មី កំពុងតែស្ថិតនៅចំពោះមុខយើង នោះគឺសង្គ្រាមពាណិជ្ជកម្ម បានផ្ទុះឡើងពេញទំហឹង ដែលនៅតែប៉ុន្មានថ្ងៃទៀតគឺអាចនឹងឈានចូលទៅលើការអនុវត្ត ហើយក៏ជាលើកដំបូងនៅក្នុងប្រវត្តិសា ស្ត្រនៃប្រទេសអភិវឌ្ឍន៍ទាំង៧ ដែលមានការប្រឈមមុខដាក់គ្នា។

សម្តេចបានបន្តថា “វាមិនមែនតែជាបញ្ហានេះប៉ុណ្ណោះទេ ជំលោះពាណិជ្ជកម្ម ក៏បានកើតឡើងរវាងចិន និងអាមេរិក ដែលផ្តើមពីសហរដ្ឋអាមេរិក ប៉ុន្តែនៅជាមួយនឹងមិចស៊ិចដែលជាប្រទេសក្បែរខាង រួមជាមួយនឹង​ប្រទេស​ឥណ្ឌា​ ដែលនឹងធ្វើការឆ្លើយតបនៅពេលខាងមុខ”។ សម្តេចបានដាក់ជាសំណួរថា តើវាមាន​ផល​ប៉ះពាល់​យ៉ាងណាសម្រាប់កម្ពុជាយើង និងមានផលប៉ះពាល់យ៉ាងណា សម្រាប់តំបន់ និងកំណើនសេដ្ឋកិច្ចសកល​ដែលបញ្ហានោះ វាមិនអនុគ្រោះឱ្យអ្នកណាទាំងអស់ ហើយសម្តេចបានចាត់ទុកបញ្ហា​នេះថា វាក៏ជាល្បែង «ចាញ់-ចាញ់»មួយនៅលើពិភពលោក ប្រសិន​បើមិនមានការកែតម្រូវណាមួយ ហើយបន្ត​នៅក្នុង​ល្បែងដ៏មានគ្រោះថ្នាក់ស្តីពីសង្គ្រាមពាណិជ្ជកម្មនេះ។

សម្តេចបានបន្តថា ដូច្នេះទាមទារឱ្យថ្នាក់ដឹកនាំ បញ្ញវ័ន្តរបស់យើងធ្វើការសិក្សា ស្រា​​វជ្រាវអំពីលទ្ធភាព ដែលអាចកើតមានបែបនេះ លទ្ធភាពកើតមានបែបនោះ  គឺមានលទ្ធភាពច្រើនដែលអាចដាក់​ចេញ ដែលតាមរយៈនោះជម្រើសគោលនយោបាយរបស់យើង ក៏ត្រូវឆ្លើយតបទៅតាមបរិបទនីមួយៗផងដែរ។

សម្តេចបានគូសបញ្ជាក់ថា​ “នេះគឺមិនមែនជាបញ្ហាដ៏តូចនោះទេ ពិតមែនតែឧបទ្វីបកូរ៉េត្រូវបានធូរស្រាល។ ប៉ុន្តែបញ្ហាសកលបានកើត​ឡើងហើយ ដែលជាបញ្ហាប្រឈមសម្រាប់សេដ្ឋកិច្ចពិភពលោក ក៏ដូចជាបញ្ហាសេដ្ឋកិច្ច នៅក្នុងតំបន់​របស់​យើង​ផងដែរ”។

ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Market Consulting លោកង៉ែត ជូបានថ្លែងថា ប្រសិនជាបញ្ហានេះវិវត្តន៍កាន់តែធ្ងន់ធ្ងរវាអាចធ្វើឲ្យមានវិបត្តិសេដ្ឋកិច្ចសាកលកើតឡើង តែលោកតែងតែគិតថាដោយសារលោកដូណាល់ ត្រាំជាបុគ្គលជំនួញ គាត់អាចនឹងគិតពីផលប្រយោជន៍នៃជំនួញ ដែលគាត់អាចបន្ឋូរបន្ថយភាព​តានតឹងបាននាពេលខាងមុខ។លោកបន្តថា ផ្ទុយទៅវិញបើវិវត្តិនេះកើតឡើង កម្ពុជាកាន់​តែពិបាក ដោយសារយើងជាផ្នែកតូចមួយនៃពិភពលោក ហើយពឹងផ្អែកលើការនាំចេញទៅសហរដ្ឋអាមេរិក និងសហគមន៍អឺរ៉ុប ហេតុនេះយើងនឹងរងផលប៉ះពាល់មិនខាន។

លោកបន្តថា“ហេតុនេះដើម្បីកាត់បន្ថយផលប៉ះពាល់នៃវិបត្តិនេះ យើងគួរមានភា​ព​​ឈ្លាសវៃខាងនយោបាយ ដោយកុំឈរនៅតែខាងណាមួយ ប៉ុន្តែយើងឈរលើមូលដ្ឋាន ដែលគិតពីផលប្រយោជន៍សេដ្ឋកិច្ចជាធំ”។លោកបន្តថា “វាដូចជាកប៉ាល់មួយ ហើយ​កម្ពុជាមិនមែនជាអ្នកកាច់ចង្កូតកប៉ាល់នោះទេ តែយើងអាចធ្វើជារលកដែលជួយធ្វើឲ្យកប៉ា​ល់បើកបរទៅមុខ ក្នុងទិសដៅត្រឹមត្រូវមួយ”៕

ដោយ ដែន ចែងចាំង

ភ្នំពេញ៖ គណៈកម្មការមូលបត្រកម្ពុជា និងក្រុមហ៊ុនខេមបូឌាន ដេរីវ៉េទីវ អ៊ិចឆេង (CDX) បានសហការរួមគ្នាបញ្ជ្រាបចំណេះដឹង លើការជួញដូរឧបករណ៍និស្សន្ទក្នុងវិស័យហិរញ្ញវត្ថុកម្ពុជាដល់សាធារណជន ដើម្បីបង្កើនចំណេះដឹង សក្ដានុពលនៃទីផ្សារឧបករ​ណ៍​និស្សន្ទឲ្យបានកាន់តែទូលំទូលាយ។

លោក Lawrence Kook អភិបាលនៃក្រុមហ៊ុន CDX ថ្លែងឲ្យដឹងកាលពីម្សិលម៉ិញនេះថា ការប្តេជ្ញាចិត្តរបស់ក្រុមហ៊ុន CDX ក្នុងការបន្តគាំទ្របេសកកម្មរបស់ គ.ម.ក  ដោយផ្តល់ចំណេះដឹងហិរញ្ញវត្ថុដល់សាធារណជន និងការនាំយកអ្នកចូលរួមទីផ្សារអន្តរជាតិ មកប្រទេសកម្ពុជាជាបន្តបន្ទាប់ ដែលបង្កើតនូវយុគសម័យដ៏រុងរឿង ក្នុងទីផ្សារឧបករណ៍និស្សន្ទ។លោកបន្តថា កម្មវិធីនេះរៀបចំឡើង​ ក្នុងគោលបំណងផ្តល់នូវចំណេះដឹងស្តីពីទីផ្សារឧបករណ៍និស្សន្ទ និងលើកកម្ពស់ការយល់ដឹង ពីសក្ដានុពលនៃទីផ្សារឧបករណ៍និស្សន្ទ ក៏ដូចជាការអភិវឌ្ឍសេដ្ឋកិច្ច ប្រទេសកម្ពុជា និងបង្ហាញពីឱកាសវិនិយោគដល់វិនិយោគិនទាំងក្នុងស្រុក និងអន្តរជាតិផងដែរ។

ប្រធានគណកម្មការមូលបត្រកម្ពុជាលោក ស៊ូ សុជាតិ បានថ្លែងឲ្យដឹងថា កម្មវិធីនេះរៀបចំឡើងក្នុងគោលបំណង បង្កើតការយល់ដឹងដល់សាធារណជន វិនិយោគិន ព្រមទាំង បង្ហាញពីសក្ដានុពល នៃទីផ្សារឧបករនិស្សន្ទនៅកម្ពុជាផងដែរ។ ទីផ្សារនៃឧបករណ៍និស្សន្ទកម្ពុជា បានលេចរូបរាងឡើងបន្ទាប់ពីការអនុម័តនៅ បទបញ្ញត្តិស្ដីពី ការផ្ដល់អាជ្ញាបណ្ណ និងការគ្រប់គ្រងការជួញដូរឧបករណ៍និស្សន្ទ នៅថ្ងៃទី២ ខែកក្កដា ឆ្នាំ២០១៥កន្លង​មកនេះ។

កិច្ចប្រជុំផ្សព្វផ្សាយនេះ ក៏មានការពិភាក្សាស្ដីពី «កាលានុវត្តភាពក្នុង ស្រុកសម្រាប់អ្នកចូលរួមអន្តរជាតិ» ដោយមានអ្នកវិនិយោគជំនាញៗចំនួន៦រូប មកពីក្រុមហ៊ុនធំៗទាំង ក្នុងប្រទេសកម្ពុជា និងអន្ដរជាតិ។ កិច្ចពិភាក្សានេះបាននាំមកនូវការវិភាគដ៏ស៊ីជម្រៅ អំពីអនាគតនៃទីផ្សារឧបករណ៍និស្សន្ទនៅកម្ពុជា ជាមួយគ្នានោះក៏ការមានការបង្ហាញពីឱកាសវិនិយោគដ៏ធំពាក់ព័ន្ធនឹង ស្ថានភាពហិរញ្ញវត្ថុកម្ពុជា ដែលកំពុងបង្ហាញពីកំណើនវិជ្ជមាន និងការអភិវឌ្ឍន៍ជាមួយធនាគារពាណិជ្ជ និងគ្រឹះស្ថានហិរញ្ញវត្ថុជាច្រើនជាបន្តបន្ទាប់ផងដែរ៕