Gold Tower 42 នឹងសាងសង់បញ្ចប់នៅឆ្នាំ២០១៩

ដោយ៖ គង់ សូរិយា
ភ្នំពេញ៖ ក្រុមហ៊ុនYUNWOO ម្ចាស់GOLD TOWER42 បានប្រកាសថា ការសាងសង់អាគារនេះឡើងវិញនឹងចាប់ផ្តើមនៅដើមឆ្នាំ២០១៨ និងបញ្ចប់ជាផ្លូវការនៅចុងឆ្នាំ២០១៩ខាងមុខនេះ។
លោកKIM TAE YEON អគ្គនាយកក្រុមហ៊ុនYUNWOO Co, Ltdបានថ្លែងប្រាប់ក្រុមអ្នកសារព៌តមាន ក្រោយបញ្ចប់ពិធីចុះកិច្ចព្រមព្រៀងជាមួយ អគ្គនាយកក្រុមហ៊ុនSHENGZHENG HONGTOAO Decoration និងក្រុមហ៊ុនWAIMAN Construction& Engineering (Macao China)នាព្រឹកថ្ងៃទី២២ វិច្ឆិកានេះថា ក្រុមហ៊ុនសាងសង់នឹងចាប់ផ្តើមសាងសង់អាគារនេះឡើងវិញ នៅដើមឆ្នាំ២០១៨ និងបញ្ចប់ការសាងសង់ជាផ្លូវការនៅឆ្នាំ២០១៩ខាងមុខនេះ។
លោកបន្តថា “ខ្ញុំបានសន្យាជាមួយនាយករដ្ឋមន្រ្តីហ៊ុន សែននិងប្រជាជនកម្ពុជាថា នឹងបញ្ចប់ការសាងសង់អាគារនេះ នៅចុងឆ្នាំ២០១៩ខាងមុខនេះយ៉ាងពិតប្រាកដ”។

លោកបន្តថា “អាគារGold Tower42 នឹងចាប់ផ្តើមលក់ជាថ្មីនៅពេលគ្រោងអាគារនេះបញ្ចប់ ហើយយើងនឹងផ្តល់ឲ្យអតិថិជនដឹងថា អាគារនេះមានលក្ខណៈពិសេសដូចម្តេច នៅពេលសាងសង់ចប់ហើយយើងមានទំនុកចិត្តថា វានឹងទទួលបានជោគជ័យ”។
អាគារGold Tower៤២ បានបញ្ចប់ការសាងសង់ដល់ជាន់ទី៣១រួចហើយ។ អាគារនេះជាមជ្ឈមណ្ឌលពាណិជ្ជកម្មចម្រុះ ដែលមានចំណតយានយន្តក្រោមដីចំនួន៥ជាន់ និងចាប់ពីជាន់ទី១ដល់ទី៣ ជាផ្សារទំនើប ចាប់ពីជាន់ទី៤ដល់ជាន់ទី១២ ជាអាគារការិយាល័យ និងពីជាន់ទី១៣ដល់ជាន់ទី៤២ជាខុនដូ ដែលមានផ្ទះចំនួន៣៩៩យូនីត។

លោកKim Tae Yeonបានបន្តថា រហូតមកទល់ពេលនេះ អាគារGold Towerបានចំណាយប្រាក់អស់១០០លានដុល្លាររួចហើយ ហើយយើងនឹងចំណាយទឹកប្រាក់១៤០លានដុល្លារទៀត ដើម្បីបញ្ចប់គំរោងនេះជាផ្លូវការ។

អគ្គនាយកក្រុមហ៊ុនSHENGZHENG HONGTAO DECORATION Co, LtdលោកLIU NIAN XIN បានមានប្រសាសន៍ថា លោកបានចាប់អារម្មណ៍ចំពោះអាគារនេះ និងមានភាពរីករាយ ដើម្បីសហការសាងសង់អាគារនេះបញ្ចប់នាចុងឆ្នាំ២០១៩ខាងមុខ។ លោកបន្តថា ប្រសិនជានៅប្រទេសចិនវិញ ការសាងសង់អាគារនេះនឹងមិនចំណាយពេលយូរទេ ព្រោះគុណភាពសំណង់របស់អាគារនេះនៅល្អណាស់ មិនមានបញ្ហាអ្វីនោះទេ។
លោកបន្តថា “ខ្ញុំនឹងបញ្ចប់ការសាងសង់អាគារនេះតាមផែនការ និងធ្វើឲ្យប្រាកដថាអាគារនេះនឹងមានភាពលេចធ្លោ និងអស្ចារ្យសម្រាប់ជាLandmark នៃទីក្រុងភ្នំពេញ”។លោកបន្តថា “គ្រោងអាគារនេះនឹងបញ្ចប់នៅខែសីហា ឆ្នាំ២០១៨ ហើយអាគារទាំងមូលនឹងបញ្ចប់នៅចុងឆ្នាំ២០១៩ខាងមុខ។

អាគារនេះបានផ្អាកការសាងសង់ នៅកំឡុងវិបត្តិសេដ្ឋកិច្ច និងហិរញ្ញវត្ថុសាកលកាលពីឆ្នាំ២០០៨ និងបានសាងសង់ឡើងវិញនៅកំឡុងឆ្នាំ២០១០ ដែលធ្វើឲ្យអាគារនេះសាងសង់សម្រេចបាន៣១ជាន់ ហើយបានផ្អាកការសាងសង់ឡើងវិញរហូតមកទល់ពេលនេះ៕

ធនាគារពិភពលោក៖ សេដ្ឋកិច្ចកម្ពុជា នឹងថយមកនៅត្រឹម ៦,៨% នាឆ្នាំនេះ

ដោយ៖ គង់ សូរិយា

ភ្នំពេញ៖ ធនាគារពិភពលោកបានបន្តទម្លាក់ ការព្យាករណ៍កំនើនសេដ្ឋកិច្ចកម្ពុជា មកនៅត្រឹម ៦,៨ភាគរយនៅឆ្នាំ២០១៧នេះ ដោយសារការថមថយនូវការនាំចេញសម្លៀកបំពាក់ ការថមថយល្បឿននៃវិស័យសំណង់។

យោងតាមរបាយការណ៍ស្តពីបច្ចុប្បន្នភាព សេដ្ឋកិច្ចកម្ពុជាៈកម្ពុជាបោះជំហ៊ានឡើងខ្សែសង្វាក់តម្លៃក្នុងវិស័យកម្មន្តសាល ដែលបានចេញផ្សាយនាព្រឹកថ្ងៃទី២២ វិច្ឆិកានេះថា កំនើនសេដ្ឋកិច្ចកម្ពុជាឆ្នាំ២០១៨ នឹងកើនឡើងដល់៦,៩ភាគរយធៀបនឹងឆ្នាំនេះ។ របាយការណ៍ដដែលបានលើកឡើងថា ទោះបីជាមានការថមថយនូវការនាំចេញសម្លៀកបំពាក់ក្តី ប៉ុន្តែវិស័យនាំចេញរបស់កម្ពុជាបានប៉ះប៉ូវដោយការនាំចេញម៉ាស៊ីន ឧបករណ៍គ្រឿងបន្លាស់អេឡិកត្រូនិក និងគ្រឿងបន្លាស់រថយន្ត ដែលទើបលេចរូបរាងកាលពីពេលថ្មីៗនេះ។

ជាមួយគ្នានេះ ដោយសារកិច្ចខិតខំប្រឹងប្រែង ទាក់ទាញទេសចរណ៍ពីអាជ្ញាធរ វិស័យនេះហាក់បីដូចជាមានលទ្ឋផលល្អ ដោយមានការងើបឡើងវិញនូវចំនួនភ្ញៀវទេសចរណ៍អន្តរជាតិ។

របាយការណ៍របស់ធនាគារពិភពលោកបានរកឃើញផងដែរថា កំនើនសេដ្ឋកិច្ចកម្ពុជារឹងមាំនៅឆ្នាំ២០១៨ គឺជំរុញដោយការធ្វើពិពិធកម្មនៃការនាំចេញ គាំទ្រដោយការហូរចូលនៃការវិនិយោគផ្ទាល់ពីបរទេស និងភាពប្រសើរឡើងនៃទស្សនវិស័យពិភពលោក៕

ក្រុមអ្នកជំនាញនៅតែមានសុទិដ្ឋិនិយមចំពោះកំណើនវិស័យសំណង់ និងអចលនទ្រព្យ

ដោយ៖ គង់ សូរិយា

ភ្នំពេញ៖ បើទោះបីជាសំឡេងសាងសង់សំណង់នានា កំពុងលាន់ឮស្ទើរគ្រប់ទីកន្លែ ងក្នុងរាជធានីភ្នំពេញក្តី ប៉ុន្តែទីផ្សារនេះទំនងជាមិនទាន់ឆ្អែតចំពោះលំហូរចូលនៃវិស័យនេះទេ ខណៈស្ថិរភាពនយោបាយ និងកំណើនសេដ្ឋកិច្ចដ៏រឹងមាំក្នុងប្រទេសកំពុងមានភាពល្អប្រសើរ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាលោក គីម ហ៊ាងបានមានប្រសាសន៍ថា ការអភិវឌ្ឍនៅកម្ពុជានឹងមានសក្តានុពលខ្លាំងជាបន្តទៀត ខណៈវិស័យសេដ្ឋកិច្ចប្រទេសកម្ពុជា មានកំណើនក្នុងរង្វង់៧ភាគរយនារយៈពេល២០ឆ្នាំចុងក្រោយនេះ។ កម្ពុជាបានក្លាយជាទិសដៅមួយដ៏ទាក់ទាញសម្រាប់វិនិយោគិន ព្រោះកម្ពុជាជាប្រទេសដែលមានប្រព័ន្ធហេដ្ឋារចនាសម្ពន្ធល្អប្រសើរ មានតម្លៃកម្លាំងពលកម្មទាប និងមានប្រជាជនប្រហែល៧០ភាគរយជាអ្នកដែលមានអាយុក្រោម៣៥ឆ្នាំ។ ទាំងអស់នេះសុទ្ធតែជាអ្វីដែលទទួលបានការចាប់អារម្មណ៍ច្រើនពីសំណាក់វិនិយោគិន។

លោកបន្តថា “ការរីកចម្រើននៃវិស័យសំណង់ និងអចលនទ្រព្យនៅកម្ពុជានាពេលនេះវាទាមទារជាចាំបាច់នូវទំនួលខុសត្រូវជាច្រើន។ នេះគឺជាកាតព្វកិច្ចរបស់ពួកយើងក្នុងកិច្ចការបម្រើប្រទេសជាតិ និងប្រជាជន។ លោកបានបន្តថា“បច្ចុប្បន្នសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា និងក្រុមហ៊ុនជាសមាជិកទាំងអស់បានត្រៀមខ្លួនរួចជាស្រេច សម្រាប់កិច្ចការដ៏ធំនេះ ដើម្បីធ្វើឲ្យយើងឈានទៅដល់កម្រិតមួយទៀត។ កម្ពុជាត្រូវបានគេដឹងថា ជាប្រទេស១នៅក្នុងចំណោមប្រទេស ដែលមានកំណើនសេដ្ឋកិច្ចខ្ពស់ជាងគេ នៅក្នុងតំបន់អាស៊ាន ហើយនឹងឈានមុខគេផងដែរនាពេលខាងមុខ។

លោក ច្រឹក សុខនីម អគ្គនាយកក្រុមហ៊ុន Century21 Mekong បានថ្លែងថា លោកនៅតែមានសុទិដ្ឋិនិយមថា វិស័យអចលនទ្រព្យកម្ពុជានៅតែរក្សាកំណើនប្រកបដោយចីរភាពចាប់ពីពេលនេះ រហូតដល់ឆ្នាំ២០១៨ ព្រោះមិនមានកត្តាអ្វីជាឧបសគ្គរារាំងដល់កំណើននេះទេ។ ការដែលលោកហ៊ានអះអាងបែបនេះដោយសារមានកត្តាចំនួនដូចជា ទី១ នយោបាយមានស្ថិរភាពល្អ ព្រោះអំឡុងពេលនេះ មិនមានការផ្លាស់ប្តូរថ្នាក់ដឹកនាំនយោបាយនោះទេ ដែលនេះជាកត្តាដ៏សំខាន់ក្នុងការទាក់ទាញអ្នកវិនិយោគ ទី២ ការចូលរួមក្នុងសហគមន៍សេដ្ឋកិច្ចអាស៊ានកាលពីចុងឆ្នាំ២០១៥ ដែលបានធ្វើឱ្យការធ្វើពាណិជ្ជកម្ម ការផ្លាស់ប្តូរវប្បធម៌ និងតម្រូវការប្រើប្រាស់អគារស្នាក់នៅ និងការិយាល័យកើនឡើង។

ទី៣ កំណើននៃវិស័យអចលនទ្រព្យនាពេលនេះ មិនកើនឡើងដូចពពុះសាប៊ូដូចពេលមុនទេ ដោយសារអ្នកវិនិយោគបានគិតគូរពីផែនការវិនិយោគច្បាស់លាស់ ហើយអគារដែលកំពុងសាងសង់ ត្រូវបានយកចិត្តទុកដាក់លើសោភ័ណភាព និងកាន់តែមានភាពទាក់ទាញ និងទី៤ រាជរដ្ឋាភិបាលអាចនឹងផ្តល់ហិរញ្ញប្បទានដល់វិស័យនេះ រយៈពេលកាន់តែយូររហូតដល់ចន្លោះពី២០ទៅ២៥ឆ្នាំ ដែលពេលនោះអ្នកណាក៏អាចមានលទ្ធភាពទិញលំនៅឋានបានដែរ។ នៅពេលអ្នកណា ក៏ទិញលំនៅឋានបានពេលនោះវិស័យសំណង់ និងអចលនទ្រព្យនឹងបន្តរីកចម្រើនថែមទៀត។

លោកសុខនីម បានបញ្ជាក់ថា“ទោះជាយ៉ាងណាវិស័យនេះក៏ត្រូវតែឆ្លងកាត់ព្យុះភ្លៀងខ្លះដែរ ប៉ុន្តែអ្វីៗក៏អាស្រ័យទៅលើទីតាំង និងសមត្ថភាពរបស់អ្នកអភិវឌ្ឍដែរ។ ប្រសិនបើពួកគេរចនាអគាររបស់ពួកគេមិនល្អ ពួកគេអាចនឹងមានបញ្ហា។ លោកបានបន្តថា “ប៉ុន្តែការរក្សាបានកំណើនសេដ្ឋកិច្ចចន្លោះពី៧-៧,៥ភាគរយ វានឹងជួយធ្វើឲ្យការប្រកបរបរអាជីវកម្មល្អ និងជួយរក្សាកំណើនរីកចម្រើននៃវិស័យនេះ។

បណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមទីប្រឹក្សាសេដ្ឋកិច្ចជាតិ បានថ្លែងថា ឧបមាថាយើងទិញត្រី ទិញបន្លែ ទិញអង្ករ យើងទិញមកភ្លាមគឺយកមកហូបភ្លាម តែការទិញផ្ទះ ឬអចលនទ្រព្យដទៃទៀតមិនមែនហូបភ្លាមទេ ព្រោះវាជារបស់អាចទុកយូរបាន និងជាចំនួនលុយធំហើយអ្នកទិញមិនសូវមានប្រាក់នោះទេគឺ ភាគច្រើនពួកគេបានប្រើប្រាស់ឥណទានរបស់ធនាគារ ដោយរំពឹងលើការសងត្រឡប់នៅថ្ងៃអនាគត ប៉ុន្តែប្រសិនបើធ្វើផ្ទះលក់ ឬជួលហើយជួលមិនដាច់ នោះនឹងធ្វើពួកគេឲ្យគ្មានប្រាក់សងធនាគារ និងអាចធ្វើឲ្យធនាគារដួលរំលំ ហើយពេលធនាគារដួលរលំ វានឹងធ្វើឲ្យដួលប្រព័ន្ធហិរញ្ញវត្ថុ និងសេដ្ឋកិច្ចជាតិ។

លោកបន្តថា “ត្រូវប្រយ័ត្នប្រយែង ព្រោះបើសង់ផ្ទះជួលតែជួលមិនបាន សង់ផ្ទះលក់ហើយលក់មិនចេញ វានឹងធ្វើឲ្យមានបញ្ហា។ ដូចនេះកុំធ្វើខ្លាំងពេក កុំជ្រុលនិយមជារឿងល្អ។ លោកបានបន្ថែមថា៖“រដ្ឋាភិបាលក៏បានគិតគូ និងមានភាពប្រយ័ត្នប្រយែង ព្រោះការប្រយ័ត្នប្រយែងជារឿងសំខាន់ និងកុំធ្វើអ្វីលឿនពេក។ វិស័យដែលរីកចម្រើនលឿនពេក តែងតែមានមហន្តរាយនៅថ្ងៃក្រោយ។

លោកម៉ី កល្យាណ បានបន្តថា រដ្ឋាភិបាលគួរគ្រប់គ្រងលំហូរសាច់ប្រាក់ឲ្យបានត្រឹមត្រូវ ដើម្បីកុំឲ្យមានលំហូរសាច់ប្រាក់ចូលក្នុងវិស័យនេះច្រើនពេក តែការទប់លំហូរសាច់ប្រាក់ក៏ធ្វើឲ្យសេដ្ឋកិច្ចមិនដើរផងដែរ ដូចនេះការគ្រប់គ្រងលំហូរសាច់ប្រាក់គួរធ្វើឲ្យភាពថ្លឹងថ្លែងផងដែរ។

ទោះបីជាយ៉ាងណាលោក ម៉ី វ៉ាន់ អគ្គនាយកនៃអគ្គនាយកដ្ឋានឧស្សាហកម្មហិរញ្ញវត្ថុ នៃក្រសួងសេដ្ឋកិច្ច និងហិរញ្ញវត្ថុបានថ្លែងថា រហូតមកទល់ពេលនេះ ក្រសួងមិនទាន់មើលឃើញមានហានិភ័យណាមួយ ក្នុងវិស័យអចលនទ្រព្យនៅឡើយទេ ប៉ុន្តែក្រសួងបាននិងកំពុងធ្វើការជាមួយអ្នកវិនិយោគក្នុងវិស័យនេះដើម្បីគ្រប់គ្រងទិន្ធន័យពីការអភិវឌ្ឍ តម្រូវការ និងការផ្គត់ផ្គង់ឲ្យបានច្បាស់លាស់ដើម្បីទប់ស្កាត់ហានិភ័យក្នុងវិស័យនេះនាពេលអនាគត។

លោកបន្ថែមថា “ការគ្រប់គ្រងទិន្នន័យ និងការគ្រប់គ្រងលំហូរសាច់ប្រាក់ចូលមកក្នុងវិស័យនេះមានសារសំខាន់ណាស់ ដើម្បីយើងអាចគ្រប់គ្រងដំណើរវិវត្តន៍រីកចម្រើនក្នុងវិស័យនេះឲ្យមាននិរន្តរភាព”៕

វត្តមានអគារកប់ពពកនៅក្រុងភ្នំពេញបង្កើនទំនុកចិត្តដល់អ្នកវិនិយោគបរទេស

ដោយ៖ ដែន ចែងចាំង

ភ្នំពេញ ការកើនទ្បើងនូវវត្តមានអគារកប់ពពក កាន់តែច្រើននៅរាជធានីភ្នំពេញ មិនត្រឹមតែបានប្រែមុខ មាត់ទីក្រុងនេះឲ្យក្លាយជាប្លុកពាណិជ្ជកម្ម និងហិរញ្ញវត្ថុយ៉ាងឆាប់រហ័សនោះទេ ប៉ុន្តែវាបាននិងកំពុងទាក់ទាញអ្នកវិនិយោគបរទេសឲ្យចាប់អារម្មណ៍សម្លឹងមើល និងបាននិងកំពុងចាប់ផ្តើមបោះទុនវិនិយោគនៅប្រទេសនេះកាន់តែច្រើន។

លោក ឧកញ៉ា សៀ រិទ្ឋី អគ្គនាយកក្រុមហ៊ុន World Bridge Landដែលបាននិងកំពុងសហការជាមួយក្រុមហ៊ុន Oxley Holding International មានមូលដ្ឋាននៅប្រទេសសឹង្ហបុរីដើម្បីកសាងខុនដូ The Bidge កំពស់៤៥ជាន់ចំនួន៤អាគារដោយបានបោះទុនវិនិយោគ៣០០លានដុល្លាររ និងបាននិងកំពុងត្រៀមកសាងសណ្ឋាគារ Shangri-La និងអាគារពាណិជ្ជកម្មឈ្មោះ The Peak កំពស់៥៥ជាន់ចំនួន៣អគារនៅក្បែរតំបន់កោះពេជ្របានថ្លែងថា ការបង្ហាញវត្តមានអគារខ្ពស់កប់ពពកច្រើននៅកម្ពុជាពិតជាទាក់ទាញ។ ឧទាហរណ៍បើធ្វើដំណើរទៅបរទេស ពេលចុះពីព្រលានយន្តហោះធ្វើដំណើរតាមផ្លូវ អ្វីដែលចាប់អារម្មណ៍មុនគេគឺហេដ្ឋារចនាសម្ព័ន្ឋ និងអគារខ្ពស់។

លោកបន្តថា «ពេលដែលជនបរទេសមកកម្ពុជា ក៏ពួកគេចាប់អារម្មណ៍ដូចយើងផងដែរ បើមានអគារខ្ពស់ច្រើនគេដឹងថាប្រទេសនេះមានការអភិវឌ្ឈន៍ ហើយពេលគេចាប់អារម្មណ៍ចង់វិនិយោគ អ្នកវិនិយោគមើលស៊ីជម្រៅទៅលើផ្លូវច្បាប់ និងគោលនយោបាយរបស់រដ្ឋាភិបាល កំណើនសេដ្ឋកិច្ច ស្ថេរភាពនយោបាយជាដើម»។លោកបន្តថា«ពេលយើងមានអគារខ្ពស់កាន់តែច្រើន វាទាក់ទាញអ្នកវិនិយោគកាន់តែច្រើន ឲ្យចាប់អារម្មណ៍មកបោះទុនវិនិយោគនៅកម្ពុជា»។

លោកឧកញ៉ាសៀ រិទ្ឋី បានថ្លែងថា ល្បឿននៃការអភិវឌ្ឈន៍លឿនឬយឺតវាអាស្រ័យ លើគោលនយោបាយរបស់រដ្ឋាភិបាលនីមួយៗ ប៉ុន្តែអ្វីដែលលោកមើលឃើញគឺថា កម្ពុជាឈរលើគោលនយោបាយមួយល្អ គឺកម្ពុជានៅពីក្រោមប្រទេសសឹង្ហបុរីតែមួយទេ ក្រៅពីនោះកម្ពុជាល្អជាងបណ្តាប្រទេសក្នុងតំបន់អាស៊ានទាំងអស់។ ចំណុចល្អទាំងនោះមានដូចជា ទី១ រដ្ឋាភិបាលបានអនុញ្ញាត្តឲ្យជនបររទេសធ្វើជាម្ចាស់ក្រុមហ៊ុន១០០ភាគរយ។ នេះជាចំណុចសំខាន់។ ទី២ រដ្ឋាភិបាលបានផ្តល់ការលើកលែងពន្ឋលើការនាំចូលផ្សេងៗចំពោះអ្នកវិនិយោគ ដែលគ្មានប្រទេសណា មានគោលនយោបាយបែបនេះនោះទេ និងទី៣ ការយកពន្ឋគឺខ្មែរទាបជាងគេបំផុត។

លោក បន្តឲ្យដឹងទៀតថា «ការដែលកម្ពុជាបានអនុម័តច្បាប់សហកម្មសិទ្ឋដែលអនុញ្ញាត្តិ ឲ្យជនបរទេសគ្រប់គ្រងផ្ទះពីជាន់ទី១ទ្បើងទៅ “ពិតជាល្អ” ព្រោះវាជួយឲ្យជនបរទេសមានទំនុកចិត្ត គឺដូចតែយើងជាជនជាតិខ្មែរ បើទៅទិញអចលនទ្រព្យ នៅក្រៅប្រទេសមិនបានដាក់ឈ្មោះខ្លួនឯង។ តើភ័យអត់? ចម្លើយគឺច្បាស់ជាភ័យហើយ»។

យោងតាមរបាយការណ៍របស់ក្រសួងរៀបចំដែនដី នគររូបនីយកម្មនិងសំណង់បានឲ្យដឹងថា គិតត្រឹមដំណាច់ឆ្នាំនេះ នៅរាជធានីភ្នំពេញមានអគារខ្ពស់ប្រមាណ៧០០អគារ កើនទ្បើងពី៥៦១អគារកាលពីដំណាច់ឆ្នាំមុន។

លោកទ្បៅ ទិព្វសីហា អនុរដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់បានថ្លែងថា ប្រសិនពិនិត្យពីលើយន្តហោះវិញ គេឃើញទីក្រុងភ្នំពេញកំពុងមានការរីកចម្រើន មានសោភ័ណភាព និងមានការរៀបចំនគរូបនីយកម្មល្អ។ បើធៀបជាមួយប្រទេសជិតខាងទីក្រុងភ្នំពេញ មានការរីកចម្រើនមិនចាញ់បណ្តាប្រទេសក្នុងតំបន់នោះទេ។

លោកបន្តថា «ការបង្ហាញវត្តមានអគារខ្ពស់ៗកាន់តែច្រើន វាឆ្លុះបញ្ចាំងពីសមិទ្ឋផលធំៗរបស់កម្ពុជាដែលសម្រេចបាន និងមិនធ្លាប់មានពីមុនមក។ ដូច្នេះការវិនិយោគអគារខ្ពស់ជាការប្រសើរ ស្របពេលហេដ្ឋារចនាសម្ព័ន្ឋរបស់យើងកំពុងមានការអភិវឌ្ឈន៍»។ លោកបន្តថា“សូម្បីតែជនបរទេសដែលធ្លាប់មកកម្ពុជាកាលពី៥ឆ្នាំមុន ក៏ពួកគេមានការភ្ញាក់ផ្អើលនិងសមិទ្ឋិផលទាំងនេះដែរ ហើយខ្ញុំគិតថាកម្ពុជា នឹងទទួលបាននូវផលប្រយោជន៍ជាច្រើនបន្ថែមទៀត ពីការធ្វើសមាហរណកម្មជាមួយអាស៊ាននាពេលខាងមុខ»៕

ក្រុមហ៊ុន YUNWOO នឹងចុះហត្ថលេខាសាងសង់ Gold Tower 42 នៅព្រឹកនេះ

ដោយ៖ គង់ សូរិយា

ភ្នំពេញ៖ ក្រុមហ៊ុន YUNWOO ដែលជាម្ចាស់អាគារ Gold Tower 42 នឹងចុះកិច្ចព្រមព្រៀងជាមួយក្រុមហ៊ុនសាងសង់ ដើម្បីចាប់ផ្តើមសាសងសង់អាគារនេះឡើងវិញនៅពេលឆាប់ៗនេះ។

យោងតាមប្រភពពីមន្ត្រីស្និទ្ឋនឹងម្ចាស់គំរោងនេះ បានថ្លែងឲ្យដឹងតាមទូរស័ព្ទនាព្រឹកថ្ងៃទី២២ វិច្ឆិកានេះថា ក្រុមហ៊ុន YUNWOO នៅតែជាម្ចាស់កម្មសិទ្ឋរបស់អាគារនេះ ហើយក្រុមហ៊ុននេះនឹងចុះហត្ថលេខាជាមួយក្រុមហ៊ុនសាងសង់ ដើម្បីចាប់ផ្តើមសាងសង់អាគារនេះឡើងវិញនាពេលឆាប់ៗនេះ។ ក្រុមហ៊ុនដែលនឹងសហការសាងសង់អាគារនេះឡើងវិញ ជាក្រុមហ៊ុនសាងសង់ល្បីឈ្មោះរបស់ប្រទេសចិន តែយ៉ាងណាប្រភពខាងលើមិនទាន់បញ្ជាក់ពីឈ្មោះក្រុមហ៊ុនសាងសង់នៅឡើយទេ។

ប្រភពដដែលបានបញ្ជាក់ថា “ការចុះកិច្ចព្រមព្រៀងនេះនឹងធ្វើឡើងនៅសណ្ឋាគារឡឺរ៉ូយ៉ាល់នាព្រឹកថ្ងៃទី២២ វិច្ឆិកានេះ ហើយការចាប់ផ្តើមសាងសង់អាគារនេះនឹងចាប់ផ្តើមឆាប់ៗនេះហើយ។

ក្រុមហ៊ុន YUNWOO ដែលជាម្ចាស់អាគារនេះ បានផ្ញើរលិខិតមកកាន់ក្រសួងកាលពីខែសីហា និងសុំរយៈពេល៦ខែបន្ទាប់ នឹងធ្វើការសាងសង់អាគារនេះឡើងវិញ ហើយបើគិតពីខែសីហា មករយៈពេល៦ខែខាងមុខ អាគារនេះអាចនឹងសាងសង់ឡើងវិញនៅដើមឆ្នាំក្រោយ។

អាគារ Gold Tower 42 គ្រោងសាងសង់ ដោយចំណាយប្រាក់២៤០លានដុល្លារអាមេរិក និងសាងសង់ដោយក្រុមហ៊ុន Hanil Construction ដែលមានមូល ដ្ឋាននៅប្រទេសកូរ៉េ។

អ្នកជំនាញអចលនទ្រព្យនានាសុទ្ឋតែស្វាគមន៍ និងមានសុទិដ្ឋិនិយមពីភាពជោគជ័យរបស់អាគារនេះ ប្រសិនជាបញ្ចប់ការសាងសង់នៅពេលខាងមុខ។

លោកគីម ហ៊ាងប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានថ្លែងថា ប្រសិនជាអាគារ Gold Tower 42 សាងសង់ឡើងវិញ គម្រោងនេះនឹងទទួលបានជោគជ័យ ព្រោះគំរោងនេះស្ថិតនៅចំទីតាំងលេខ១សម្រាប់ក្រុងភ្នំពេញ ដោយសារវាជាប់ផ្លូវធំទាំងអស់ និងជាតំបន់ពាណិជ្ជកម្មដ៏ល្អ។

លោកបន្តថា “ទោះជាយ៉ាងណាក្រុមហ៊ុនអភិវឌ្ឍន៍អាគារនេះ ត្រូវធ្វើឲ្យមានទំនុកចិត្តសិន មុននឹងប្រកាសលក់ ដោយសារគំរោងនេះហាក់បាត់ទំនុកចិត្តរួចទៅហើយ។

អាគារនេះបានផ្អាកការសាងសង់ នៅកំឡុងវិបត្តិសេដ្ឋកិច្ច និងហិរញ្ញវត្ថុសាកលកាលពីឆ្នាំ២០០៨ និងបានសាងសង់ឡើងវិញនៅកំឡុងឆ្នាំ២០១០ ដែលធ្វើឲ្យអាគារនេះសាងសង់សម្រេចបាន៣២ជាន់ ហើយបានផ្អាកការសាងសង់ឡើងវិញរហូតមកទល់ពេលនេះ៕

កម្ពុជា នឹងមានផ្លូវរថភ្លើង ភ្នំពេញ-សៀមរាប-ស៊ីសុផុន ឆាប់ៗនេះ

ដោយ៖ វុត្ថា

ភ្នំពេញ៖ CRCC 17th ដែលជាក្រុមហ៊ុនសាងសង់ផ្លូវរថភ្លើងដ៏ធំរបស់ប្រទេសចិន គ្រោងបោះទុនវិនិយោគសាងសង់ផ្លូវរថភ្លើង ភ្នំពេញ-សៀមរាប-ស៊ីសុផុន នាពេលខាងមុខ ក្រោយពីក្រុមហ៊ុននេះ បានចំណាយពេលសិក្សាអស់រយៈពេលជិត ប្រាំមួយខែកន្លងមកនេះ។

នៅថ្ងៃទី២១ ខែវិច្ឆិកា ឆ្នាំ២០១៧ គណៈប្រតិភូមួយក្រុមរបស់ក្រុមហ៊ុន CRCC 17th ដែលដឹកនាំដោយលោក Lu Peng ប្រធានក្រុមប្រឹក្សានៃក្រុមហ៊ុន CRCC 17th ដោយមានការចូលរួមផងដែរ ពីអ្នកឧកញ៉ា គិត ម៉េង ប្រធានក្រុមហ៊ុន Royal Group និងជាប្រធានសភាពាណិជ្ជកម្មកម្ពុជា បានបង្ហាញនូវលទ្ធផលនៃការសិក្សាបឋមពី លទ្ធភាពក្នុងការសាងសង់ផ្លូវរថភ្លើង ភ្នំពេញ-សៀមរាប-ស៊ីសុផុន ដែលក្រុមហ៊ុនបានចំណាយពេលសិក្សាដល់លោក ស៊ុន ចាន់ថុល រដ្ឋមន្ត្រីក្រសួងសាធារណៈការនឹងដឹកជញ្ជូនៅនៅទីស្តីការក្រសួង។

លោក Peng ប្រធានក្រុមប្រឹក្សានៃក្រុមហ៊ុន CRCC 17th ក៏បានស្នើសុំការគាំទ្រពីក្រសួងសាធារណៈការ និងដឹកជញ្ជូន ក៏ដូចជារាជរដ្ឋាភិបាលកម្ពុជាលើគម្រោងវិនិយោគផ្លូវរថភ្លើងថ្មីនេះ។

លោកទេសរដ្ឋមន្ត្រី ស៊ុន ចាន់ថុល បានគូសបញ្ជាក់ពីគាំទ្រលើគម្រោងវិនិយោគសាងសង់ផ្លូវរថភ្លើង ភ្នំពេញ-សៀមរាប-ស៊ីសុផុន ព្រោះវាមានសារសំខាន់ណាស់ សំដៅ និងបង្កភាពងាយស្រួលដល់ការដឹកជញ្ជូននិងការតភ្ជាប់ និងជំរុញការអភិវឌ្ឍវិស័យផ្លូវដែកនៅកម្ពុជាផងដែរ។

លោកទេសរដ្ឋមន្ត្រី ក៏បានស្នើឱ្យក្រុមហ៊ុននេះពិនិត្យ និងសិក្សាបន្ថែមទៀតពីលទ្ធភាពក្នុងការបណ្តាក់ទុកវិនិយោគលើគម្រោងផ្លូវដែកនៅកម្ពុជាតាមរបៀប BOT(Build Operation Transfer) និងលើក សំណើមកវិញពីតម្រូវការនានាសម្រាប់កិច្ចសហប្រតិបត្តិការរវាងក្រុមហ៊ុនឯកជន CRCC 17th និងរាជរដ្ឋាភិបាលកម្ពុជាលើគម្រោងវិនិយោគនេះ។

តែយ៉ាងណាក៏ដោយ គេមិនទាន់ដឹង ថា ក្រុមហ៊ុន CRCC 17th សាសង់ផ្លូវរថភ្លើងដ៏ធំរបស់ប្រទេសចិន មួយនេះ នឹងចាប់ផ្តើមដំណើការសាងសង់នៅពេលណា និងចំណាយពេលថវិកាប៉ុន្មានក្នុងការបោះទុនវិនិយោគសាងសង់ចំពោះផ្លូវរថភ្លើង ភ្នំពេញ-សៀមរាប-ស៊ីសុផុននេះទេ៕

Regus ពង្រីកខ្លួននៅរាជធានីភ្នំពេញ ដើម្បីជួយគាំទ្រដល់អាជីវកម្មថ្មីនៅកម្ពុជា

ដោយ៖ រ៉ាវី

ដោយសារកម្មវិធីអភិវឌ្ឍអាជីវកម្មកំពុងទាក់ទាញការបោះដើមទុនពីបរទេសសម្រាប់សហគ្រាសក្នុងស្រុក ធ្វើឲ្យរាជធានីភ្នំពេញក្លាយជាបណ្ដុំមួយក្នុងចំណោមបណ្ដុំទាក់ទាញបំផុតនៅក្នុងតំបន់ទន្លេមេគង្គ សម្រាប់សហគ្រាស និងអាជីវកម្មថ្មី

ភ្នំពេញ៖ ក្រុមហ៊ុនផ្គត់ផ្គង់ការិយាល័យលំដាប់ពិភពលោក ឈ្មោះថារីជឹស (Regus) នៅថ្ងៃនេះ ប្រកាសអំពីការបើកទ្វារដំណើរការមជ្ឈមណ្ឌលពាណិជ្ជកម្មទីពីររបស់ខ្លួននៅក្នុងរាជធានីភ្នំពេញ ។ វិស័យអាជីវកម្មថ្មីរបស់កម្ពុជាបានមើលឃើញពីកំណើនយ៉ាងលឿន ក្នុងរយៈកាលប៉ុន្មានឆ្នាំមកនេះ ភាគច្រើនគឺតាមរយៈគំនិតផ្ដួចផ្ដើមអាជីវកម្មផ្សេងៗ ដែលភ្ជាប់សហគ្រិនកម្ពុជាឲ្យបានជួបជាមួយនឹងវិនិយោគិនបរទេស ។ ដោយផ្អែកលើមូលដ្ឋានគ្រឹះនៃកំណើនសេដ្ឋកិច្ចរឹងមាំ និងស្ថិរភាពនយោបាយ ប្រទេសកម្ពុជាបានបន្តជំរុញបរិយាកាសពាណិជ្ជកម្មកាន់តែមានភាពទាក់ទាញជាងមុនសម្រាប់ការវិនិយោគ និងការធ្វើអាជីវកម្ម ។

លោក ឡាស៍ វីតធីង (Lars Witting) នាយកប្រចាំប្រទេសរបស់ក្រុមហ៊ុន រីជឹស កម្ពុជា បានថ្លែងថា៖ “ប្រទេសកម្ពុជាបានក្លាយជាមជ្ឈដ្ឋានអាជីវកម្មដ៏រឹងមាំ ជាមួយនឹងការវិនិយោគជាច្រើនលើហេដ្ឋារចនាសម្ព័ន្ធ និងសេវាកម្ម ហើយសេដ្ឋកិច្ចត្រូវបានរំពឹងថា នឹងរក្សាកំណើនរឹងមាំក្នុងរយៈពេលច្រើនឆ្នាំទៅមុខទៀត ។ អាជីវកម្ម និងសហគ្រាសខ្នាតតូច គឺមានចំនួនច្រើន ធៀបនឹងអាជីវកម្មទូទៅ ហើយយុវជនមានចំនួន ប្រមាណ ៤០% នៃប្រជាជនកម្ពុជាសរុប ដូច្នេះ កម្ពុជាគឺជាទីផ្សារដ៏សក្តិសមមែនទែនសម្រាប់ក្រុមហ៊ុន រីជឹស” ។

លោកបានបន្តទៀតថា៖ “ជាមួយនឹងកម្លាំងពលកម្មវ័យក្មេងបំផុតក្នុងតំបន់ឥណ្ឌូចិន ព្រមទាំងបណ្ដាញសហគ្រិនដែលចេះតែបន្តអភិវឌ្ឍ យើងបានមើលឃើញនូវកំណើនសក្ដានុពល នៃការស្វែងរកដំណោះស្រាយចំពោះការិយាល័យធ្វើការដែលមានភាពបត់បែន ។ ក្រុមហ៊ុន រីជឹស មានសេចក្តីសោមនស្សរីករាយដែលបានចូលរួមចំណែកក្នុងកំណើនអាជីវកម្មទាំងនេះ ហើយការពង្រីកប្រតិបត្តិការរបស់យើងក្នុងរាជធានីភ្នំពេញ គឺគ្រាន់តែជាជំហានដំបូងតែប៉ុណ្ណោះ” ។

ដើម្បីឆ្លើយតបទៅនឹងកំណើនតម្រូវការនេះ ក្រុមហ៊ុន រីជឹស បានបើកមជ្ឈមណ្ឌលពាណិជ្ជកម្មទីពីររបស់ខ្លួននៅឯអគារ ឌឹ កាសា មើរីឌៀន (The Casa Meridian) នៅកោះពេជ្រ ដើម្បីនាំបណ្ដាញរបស់ រីជឹស មកកាន់ប្រទេសកម្ពុជា ។

សហគ្រាស ក្រុមហ៊ុន និងអ្នកជំនាញពាណិជ្ជកម្ម ទាំងក្នុងស្រុក និងអន្តរជាតិ នៅពេលនេះអាចទទួលបានអត្ថប្រយោជន៍ ពីការិយាល័យការងារដែលមានភាពបត់បែនរបស់ក្រុមហ៊ុន រីជឹស ដែលមានទីតាំងសំខាន់ៗចំនួនពីរកន្លែងក្នុងរាជធានីភ្នំពេញ ដោយទីតាំងទីមួយស្ថិតនៅឯអគារធនាគារកាណាឌីយ៉ា ។

កោះពេជ្រ កំពុងប្រែក្លាយខ្លួនយ៉ាងឆាប់រហ័សទៅជាជម្រើសមួយទៀតបន្ថែមលើតំបន់អាជីវកម្ម ដែលបានឈរជើងរឹងមាំទៅហើយនៅក្នុងរាជធានីភ្នំពេញ ហើយកោះពេជ្រក៏បានក្លាយជាមូលដ្ឋានសម្រាប់ស្ថានទូតជាច្រើន គម្រោងអាជីវកម្ម សណ្ឋាគារ និងអាជីវកម្មលក់រាយផ្សេងៗ ។ មជ្ឈមណ្ឌលថ្មីរបស់ក្រុមហ៊ុនផ្ដល់នូវការិយាល័យធ្វើការចំនួន ១៩១ កន្លែង ព្រមជាមួយនឹងជម្រើសធ្វើការប្រកបដោយភាពបត់បែនជាច្រើនទៀត សម្រាប់អាជីវកម្ម និងអ្នកជំនាញនានា ។ ជម្រើសទាំងនេះរួមមាន ទីកន្លែងធ្វើការរួម សេវាការិយាល័យនិម្មិត (virtual office) និងបន្ទប់ប្រជុំ ដែលអាចកក់ទុកប្រើតាមម៉ោងបាន ។

លោក ឡាស៍ វីតធីង បានបន្ថែមថា៖ “ក្នុងនាមជាប្រទេសមានសេដ្ឋកិច្ចកំពុងអភិវឌ្ឍន៍ សហគ្រាសរបស់កម្ពុជា ជាពិសេសអាជីវកម្មថ្មី ជួបបញ្ហាប្រឈមដោយកង្វះដើមទុន និងបណ្ដាញអាជីវកម្មសំខាន់ ។ តាមរយៈការផ្ដល់នូវឱកាសសម្រាប់អាជីវកម្មបែបទំនើប និងមានការអភិវឌ្ឍន៍ ដើម្បីបានប្រតិបត្តិការទៅតាមទីកន្លែង និងពេលវេលាដែលខ្លួនចង់ ក្រុមហ៊ុន រីជឹស ក៏ជួយដល់សហគ្រិនបង្កើតបណ្ដាញ ជាមួយនឹងសហគមន៍អាជីវកម្មធំៗក្នុងស្រុក និងនៅលើសកលលោកថែមទៀតផង” ។

មិនថាអាជីវកម្មរបស់អ្នកជាអាជីវកម្មអន្តរជាតិ ឬអាជីវកម្មថ្មីនោះទេ អ្នកត្រូវការភាពបត់បែន និងភាពរហ័សរហួនជាងមុន ព្រមជាមួយនឹងទីតាំងត្រឹមត្រូវជាងមុនដើម្បី បានទទួលជោគជ័យ ។ នៅពេលនេះបណ្ដាក្រុមហ៊ុនក្នុងប្រទេសកម្ពុជាអាចទទួលអត្ថប្រយោជន៍ពីការចូលរួមនៅក្នុងបណ្ដាញអន្តរជាតិរបស់យើង ដែលកំពុងប្រើប្រាស់ទីតាំងរបស់យើងប្រមាណ ៣០០០ កន្លែងទូទាំងសកលលោក៕

រយៈពេល ១០ខែ អគ្គនាយកដ្ឋានពន្ឋដាប្រមូលពន្ឋបានចំនួន ១៦៨៣ លានដុល្លារ

ដោយ៖ ដែន ចែងចាំង

ភ្នំពេញ៖ ក្នុងរយៈពេល ១០ខែឆ្នាំនេះ អគ្គនាយកនៃអគ្គនាយកដ្ឋានពន្ឋដាបានប្រមូលបានចំនួន ១៦៨៣លានដុល្លារអាមេរិក ស្មើនឹងប្រមាណជាង ៩៨ភាគរយនៃផែនការរបស់ខ្លួន។

ប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានពន្ធដារលោកគង់ វិបុលបានថ្លែងថា ផ្តើមចេញពីការពង្រឹងអភិបាលកិច្ចល្អ ស្របតាមគោលនយោបាយ កែទម្រង់ស៊ីជម្រៅរបស់រាជរដ្ឋាភិបាល និងកើតឡើងពីការខិតខំប្រឹងប្រែងបំពេញភារកិច្ចរបស់មន្ត្រីពន្ធដារ ក្នុងការពង្រឹង អនុវត្តច្បាប់ វិន័យការងារ ក្នុងនោះសម្រាប់រយៈពេល០៥ឆ្នាំចុងក្រោយ អគ្គនាយកដ្ឋានពន្ធដារ បានធ្វើការប្រមូលពន្ធ លើសផែនការជារៀងរាល់ឆ្នាំ។

ការប្រមូលរយៈពេល១០ខែ ឆ្នាំ២០១៧នេះវិញ អគ្គនាយក ដ្ឋានពន្ធដារធ្វើការប្រមូលបានជាង១.៦៨៣ដុល្លារអាមេរិក កើនឡើងជាង៩៨ភាគរយ ដូច្នេះសម្រាប់ការប្រមូលពន្ធរយៈពេល១២ខែ ឆ្នាំ២០១៧នេះ អគ្គនាយកដ្ឋានពន្ធដារនឹងធ្វើការប្រមូលពន្ធលើសផែនការ១០០ភាគរយជាមិនខាន។

លោក ង៉ែត ជូ ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Market Consulting បានថ្លែងថា ការកែទម្រង់ការប្រមូលពន្ឋមានលក្ខណៈវិជ្ជមានច្រើន ក្នុងប៉ុន្មានឆ្នាំចុងក្រោយនេះ ដែលជារឿងអបអរសាទរ និងសូមឲ្យអគ្គនាយកដ្ឋានពន្ឋដាបន្តការងាររបស់ខ្លួនបន្តទៀត ដើម្បីធ្វើយ៉ាងណាឲ្យការប្រមូលពន្ឋកាន់តែមានប្រសិទ្ឋិភាព និងតម្លាភាព៕

Real Estate Sector Needs More Professionalism

While Cambodian real estate agents with license are facing some challenges with real estate brokers without license that have no professionalism and exact knowledge, the sector need more human resource to serve itself with professional and license.

Century 21 Cambodia reached a Memorandum of Understanding (MoU) with University of Economics and Finance (UEF) yesterday to strengthen a real estate human resource and get license as a professional real estate agents.

Kuy Vat, chairman and CEO of Century 21 Cambodia, said the main purpose is to create one standard and be professional in real estate sector via training, as well as providing license for the property agents or company by MEF.

“With the training course real estate agents and companies will get real estate knowledge professionally, that can compete with ASEAN countries with more experience in real estate, and as well as with Asia Pacific region,” Mr. Vat said.

“The training course will help all real estate agents with license get recognized by local and international customers because all the agents are required to have the ethic, discipline and professionalism,” he said. “However, for those who do not do the business with such things, the license will be confiscated.”

“The license is vital for building confidence for customers in the real estate sector,” he added.

Chuon Rattanak, rector of UEF, said Cambodia has been the strong growth of immovable property sector, while this sector need more human resource to serve itself.

“We cooperate with Century 21 Cambodia in order to increase capacity in real estate sector and to develop human resource, as well as the national economy,” Mr. Rattanak said.

Kim Heang, president of the Cambodian Valuers and Estate Agents Association (CVEA), this really helps strengthen real estate knowledge for its members in order to compete locally and internationally.

“The focus on is training human resources related to the property sector. We need to start training courses and cannot wait any longer,” he said.

“For ASEAN countries like Singapore, Malaysia, Brunei, and as well as Hong Kong, America, and other European countries, they all have the license system for doing business in this sector, so this is the time that Cambodia have to create such a system,” Mr. Heang said.

Mey Van, director general of Financial Industry General Department of MEF, said the real estate agent license can reduce the number of property brokers who do not have professional and knowledge in property sector.

“Exactly we think the property agents has to be recognized throughout the country,” Mr. Van said. “However, we have a lot of unofficial trainings related to the property sector.”

“Now we open a new page for the real estate training like starting from the primary school and the initiative directs to international level,” Mr. Van.

ដំណឹងល្អ!!! ម្ចាស់អាគារ Gold Tower 42 រកបានដៃគូសាងសង់បន្តហើយ

ដោយគង់ សូរិយា

ភ្នំពេញ ដំណឹងល្អ ដំណឹងល្អបានមកដល់ហើយ ដោយបច្ចុប្បន្ននេះក្រុមហ៊ុន YUNWOO ដែលជាម្ចាស់អាគារ Gold Tower42 បានរកដៃគូថ្មី ដើម្បីចាប់ផ្តើមសាងសង់បន្តនៅពេលឆាប់ៗនេះហើយ។

យោងតាមប្រភពពីមន្ត្រីស្និទ្ឋនឹងម្ចាស់គំរោងនេះ បានថ្លែងឲ្យដឹងតាមទូរស័ព្ទពីសហរដ្ឋអាមេរិកនារសៀលថ្ងៃទី២១ វិច្ឆិកានេះថា រហូតមកទល់ពេលនេះ មានដំណឹងល្អពិតប្រាកដហើយ ព្រោះម្ចាស់គំរោងអាគារ Gold Tower 42 ជាន់បានរកដៃគូសហការ ដើម្បីចាប់ផ្តើមបន្តសាងសង់អាគារនេះឡើងវិញហើយ។លោកស្រីបន្តថា ប្រសិនជាគ្មានការប្រែប្រួល ក្រុមហ៊ុននេះនឹងធ្វើសន្និសីទសារព៌តមាន ដើម្បីបញ្ជាក់ពីការចាប់ដៃគូ និងពេលវេលាសាងសង់អាគារនេះឡើងវិញនៅថ្ងៃស្អែកនេះហើយ។

ក្រុមហ៊ុន YUNWOO ដែលជាម្ចាស់អាគារនេះ បានផ្ញើរលិខិតមកកាន់ក្រសួងកាលពីខែសីហា និងសុំរយៈពេល៦ខែបន្ទាប់ នឹងធ្វើការសាងសង់អាគារនេះឡើងវិញ ហើយបើគិតពីខែសីហា មករយៈពេល៦ខែខាងមុខ អាគារនេះអាចនឹងសាងសង់ឡើងវិញនៅដើមឆ្នាំក្រោយ។

អាគារ Gold Tower 42 គ្រោងសាងសង់ ដោយចំណាយប្រាក់២៤០លានដុល្លារអាមេរិក និងសាងសង់ដោយក្រុមហ៊ុន Hanil Construction ដែលមានមូល ដ្ឋាននៅប្រទេសកូរ៉េ។

អ្នកជំនាញអចលនទ្រព្យនានាសុទ្ឋតែស្វាគមន៍ និងមានសុទិដ្ឋិនិយមពីភាពជោគជ័យរបស់អាគារនេះ ប្រសិនជាបញ្ចប់ការសាងសង់នៅពេលខាងមុខ។

លោក គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានថ្លែងថា ប្រសិនជាអាគារ Gold Tower 42 សាងសង់ឡើងវិញ គម្រោងនេះនឹងទទួលបានជោគជ័យ ព្រោះគំរោងនេះស្ថិតនៅចំទីតាំងលេខ១សម្រាប់ក្រុងភ្នំពេញ ដោយសារវាជាប់ផ្លូវធំទាំងអស់ និងជាតំបន់ពាណិជ្ជកម្មដ៏ល្អ។

លោកបន្តថា “ទោះជាយ៉ាងណាក្រុមហ៊ុនអភិវឌ្ឍន៍អាគារនេះ ត្រូវធ្វើឲ្យមានទំនុកចិត្តសិន មុននឹងប្រកាសលក់ ដោយសារគំរោងនេះហាក់បាត់ទំនុកចិត្តរួចទៅហើយ។

អាគារនេះបានផ្អាកការសាងសង់ នៅកំឡុងវិបត្តិសេដ្ឋកិច្ច និងហិរញ្ញវត្ថុសាកលកាលពីឆ្នាំ២០០៨ និងបានសាងសង់ឡើងវិញនៅកំឡុងឆ្នាំ២០១០ ដែលធ្វើឲ្យអាគារនេះសាងសង់សម្រេចបាន៣២ជាន់ ហើយបានផ្អាកការសាងសង់ឡើងវិញរហូតមកទល់ពេលនេះ៕