ដោយ: គង់ លាងហួរ
អន្តរជាតិ: ប្រទេសអារ៉ាប់រួមគ្រោងសាងសង់អគារការិយាល័យថ្មីចំនួន៣ នៅចំកណ្តាលទីក្រុងឌូបៃ ដើម្បីបំពេញឱ្យទាន់កំណើនតម្រូវការប្រើប្រាស់។ ការណ៍នេះហាក់ខុសផ្ទុយស្រឡះទៅនឹងស្ថានភាពទីផ្សារការិយាល័យនៅក្នុងទីក្រុងនានាជុំវិញពិភពលោកដែលកំពុងដាំក្បាលចុះនាពេលបច្ចុប្បន្ន។

អគារ DIFC Square ចំនួន៣ នឹងត្រូវបានសាងសង់នៅក្នុងតំបន់មជ្ឈមណ្ឌលហិរញ្ញវត្ថុអន្តរជាតិឌូបៃ (DIFC) ដែលមានទំហំផ្ទៃក្រឡាសរុបចំនួន១លានម៉ែត្រការ៉េ។ ក្នុងនោះ ចំនួន៦០%នៃទីធ្លាសរុប(Space) នៅក្នុងអគារទាំងនេះ ជាការិយាល័យ។ នេះបើយោងតាមការឱ្យដឹងពីការិយាល័យទំនាក់ទំនងរដ្ឋាភិបាលអារ៉ាប់រួម។

លោក Essa Kazim អគ្គនាយកមជ្ឈមណ្ឌល DIFC បានបញ្ជាក់ឱ្យដឹងនៅក្នុងបទសម្ភាសតាមប្រព័ន្ធទូរស័ព្ទថា អគារទាំងនេះ នឹងរួមមានទីតាំងលក់រាយ និងភោជនីយដ្ឋានសរុបទំហំ១៧.២០០ហ្វីតការ៉េ ហើយត្រូវចំណាយដើមទុនវិនិយោគប្រហែល២៧០លានដុល្លារអាមេរិកដើម្បីស្ថាបនាឱ្យលេចចេញជារូបរាងឡើង។

អគារ​ទាំង​នេះ​គ្រោង​នឹង​បញ្ចប់​ការសាងសង់នៅ​ត្រីមាស​ទី​១ ​ឆ្នាំ២០២៦ ដើម្បីឆ្លើយតប​ចំពោះការ​កើនឡើង​នៃ​ការជួលការិយាល័យ ខណៈបណ្តាក្រុមហ៊ុនធំៗជាច្រើនកំពុង​បន្ត​សម្រុក​បើកអាជីវកម្មរបស់ពួកគេនៅទីក្រុង​ឌូបៃ។ និន្នាការនេះបាន​ជំរុញ​ឱ្យទីផ្សារ​អចលនទ្រព្យ​ពាណិជ្ជកម្ម​​ស្ទុះងើប​ឡើង​វិញ​យ៉ាងឆាប់រហ័ស។

យោងតាមក្រុមហ៊ុនប្រឹក្សាអចលនទ្រព្យ ​​CBRE Group បានឱ្យដឹងថា អត្រាគ្របដណ្តប់ការជួលការិយាល័យ(Occupancy rates)នៅទូទាំងទីក្រុងឌូបៃ បានកើនឡើងដល់៩១,៣% ខណៈទីផ្សារការិយាល័យនៅទីក្រុងធំៗផ្សេងទៀតនៅលើពិភពលោក រួមមាន ទីក្រុងឡុងដ៍នៃប្រទេសអង់គ្លេស និងទីក្រុងញូវយ៉ករបស់សហរដ្ឋអាមេរិក កំពុងជួបប្រទះការលំបាក។

លោក Taimur Khan ប្រធានផ្នែកស្រាវជ្រាវនៅក្រុមហ៊ុនប្រឹក្សាអចលនទ្រព្យ CBRE បានលើកឡើងថា “តម្រូវការការិយាល័យនៅទីក្រុងឌូបៃបានកើនឡើងយ៉ាងគំហុក ដោយសារក្រុមហ៊ុននានា ដែលកំពុងដំណើរការស្រាប់នៅទីនោះ មានបំណកពង្រីកទំហំការិយាល័យរបស់ខ្លួន និងបណ្តាក្រុមហ៊ុនថ្មីៗ ដែលកំពុងចូលមកបង្កើតអាជីវកម្ម”៕ប្រភព:The edge Malaysia៕

(ភ្នំពេញ)៖ នៅព្រឹកថ្ងៃចន្ទ ១៤កើត ខែភទ្របទ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៦ ខែកញ្ញា ឆ្នាំ២០២៤នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា អញ្ជើញជាអធិបតីក្នុងពិធីបញ្ចុះបឋមសិលា​បើក​ការដ្ឋាន​សាងសង់អគារបន្ថែមចំនួន៣ នៅមន្ទីរពេទ្យកាល់ម៉ែត រួមមាន អគារមជ្ឈមណ្ឌលកណ្តាល អគារចំណត និងរោងជាង និងអគារមជ្ឈមណ្ឌលវេជ្ជសាស្ត្រស៊ីក្លូត្រុង។

មន្ទីរពេទ្យកាល់ម៉ែត ជាកន្លែងផ្តល់សេវាសុខាភិបាលដ៏សំខាន់មួយនៅកម្ពុជានាពេលបច្ចុប្បន្ន។ ដើម្បីឆ្លើយតបសេចក្តីត្រូវការកាន់តែច្រើនឡើងលើសេវាសុខាភិបាល មន្ទីរពេទ្យបានពង្រីកហេដ្ឋា​រចនា​សម្ព័ន្ធ រួមមានការសង់អគារផ្តល់សេវាសុខាភិបាលកាន់តែច្រើន និងបំពាក់បរិក្ខាបម្រើការ​ព្យាបាលកាន់តែទំនើបៗផងដែរ។ បើទោះបីមានអគារជាច្រើនត្រូវបានសាងសង់យ៉ាងណាក្តី ក៏មិន​ទាន់ឆ្លើយតបនឹងកំណើននៃតម្រូវការផ្នែកសុខាភិបាលនោះដែរ ជាហេតុតម្រូវឱ្យមន្ទីរពេទ្យត្រូវ​សាងសង់អគារផ្តល់សេវាសុខាភិបាលបន្ថែម។

អគារទាំង៣ដែលបើកការដ្ឋានសាងសង់នាព្រឹកថ្ងៃនេះ គឺជាអគារផ្តល់សេវាសុខាភិបាល​ដ៏ចាំ​បាច់​បំផុតនៅក្នុងមន្ទីរពេទ្យ ដើម្បីជួយផ្តល់សេវាសុខាភិបាលឱ្យកាន់តែល្អប្រសើរ។ អគារមន្ទីរពេទ្យ​ដែល​បើក​ការដ្ឋានសាងសង់នាព្រឹកថ្ងៃនេះ ​នឹងត្រូវសាងសង់ ដោយប្រើប្រាស់ថវិកានៅសល់​ពី​គម្រោងអគារតេជោអភិវឌ្ឍន៍ ដែលសម្តេចតេជោ និង សម្តេចកិត្តិព្រឹទ្ធបណ្ឌិត បានចូលរួមបរិច្ចាគ និងសម្តេច បានអំពាវនាវដល់សប្បុរសជននានាឱ្យចូលរួមបរិច្ចាគ កាលពីថ្ងៃទី២៤ ខែវិច្ឆិកា ឆ្នាំ​២០១៩ ក្រោមពាក្យស្លោក «បរិច្ចាគដើម្បីជីវិតមនុស្ស» រួមនឹងថវិកាស្វយ័តសន្សំ​រំលស់​របស់​មន្ទីរ​ពេទ្យកាល់ម៉ែត។ គម្រោងសាងសង់នេះគ្រោងចំណាយថវិកាសរុបចំនួន ៦២,៤១៥,៦០០ដុល្លារ។

អគារមន្ទីរពេទ្យដែលបើកការដ្ឋានសាងសង់នេះ មានតួនាទីសំខាន់ៗដូចខាងក្រោម៖

ទី១៖ អគារមជ្ឈមណ្ឌលកណ្តាល នឹងរួមចំណែកដល់ការបង្កើនសមត្ថភាពមន្ទីរពេទ្យក្នុង​ការទទួល​ពិនិត្យ​ព្យាលអ្នកជំងឺ ដែលកើនឡើងពីមួយថ្ងៃទៅមួយថ្ងៃ ព្រមទាំងសមត្ថភាពបច្ចេកទេស ឬគ្លីនិក​នៃ​សេវាព្យាបាលតាមឯកទេសនីមួយៗ ប្រកបដោយនវានុវត្តដែលផ្តោតលើគុណ​ភាពជាមូល​ដ្ឋាន​។ មជ្ឈមណ្ឌលកណ្តាលនេះ មានកម្ពស់ ២៥ជាន់ បណ្តោយ ៦៤,៨០ម៉ែត្រ និងទទឹង ៤៩,៥០ម៉ែត្រ ស្មើនឹង ៦៥,៥២១ ម៉ែត្រក្រឡា។

ទី២៖ អគារចំណត និងរោងជាង នឹងផ្តល់ភាពងាយស្រួលជូនប្រជាពលរដ្ឋ ដែលប្រើប្រាស់​មធ្យោបា​​យធ្វើដំណើរផ្ទាល់ខ្លួន មកទទួលសេវាពិគ្រោះ និងសេវាព្យាបាលនៅមន្ទីរពេទ្យ។ អគារចំណតនិងរោងជាងនេះ មានបណ្តោយ៧២ម៉ែត្រ ទទឹង ២៩ម៉ែត្រ និងកម្ពស់ ១៣ជាន់ ស្មើនឹង ២៨,៥៦៨ម៉ែត្រក្រឡា។

ទី៣៖ អគារមជ្ឈមណ្ឌលវេជ្ជសាស្ត្រស៊ីក្លូត្រុង គឺជាគម្រោងទី១ ក្នុងប្រវត្តិសាស្ត្រនៃវេជ្ជសាស្រ្ត​កម្ពុជា ត្រូវបានផ្តួចផ្តើមគំនិតឡើងដោយក្រុមសាស្ត្រាចារ្យ វេជ្ជបណ្ឌិតឯកទេស នៃមន្ទីរពេទ្យ​កាល់​ម៉ែត និងបានធ្វើការប្រឹក្សាយោបល់លើបច្ចេកទេសសាងសង់អគារ និងបំពាក់ឧបករណ៍សម្ភារ: ដែលទាមទារបច្ចេកទេសសំណង់ក្រោមដីស្មុគស្មាញតាមនិយាមសកល ដោយសហការជាមួយ​អ្នក​ជំនាញ​ការក្រុមហ៊ុន Archetype និង G.E. HealthCare PTE LTD និងទីភ្នាក់ងារថាម​ពល​បរមាណូអន្តរជាតិ (IAEA)។ គម្រោងនេះ នឹងផ្តល់អត្ថប្រយោជន៍ដ៏ពិសិដ្ឋសម្រាប់អ្នកជំងឺ ជាពិសេសអ្នកជំងឺមហារីក។

អគារនេះនឹងបំពាក់ដោយម៉ាស៊ីនស៊ីក្លូត្រុងទំនើបថ្មីមួយ ដែលអាចផលិតឱសថវិទ្យុសកម្មប្រើ​ប្រាស់​ក្នុងការធ្វើរោគវិនិច្ឆ័យ និងព្យាបាលជំងឺមហារីក ជំងឺបេះដូង ជំងឺប្រព័ន្ធប្រសាទ ជំងឺឆ្លង និងជំងឺផ្សេងដទៃជាច្រើនទៀត តាមបច្ចេកទេសវេជ្ជសាស្រ្តនុយក្លេអ៊ែរទំនើប ដូចបណ្ដាប្រទេសអភិវឌ្ឍន៍នានានៅលើសកលលោក។

បន្ថែមលើនេះ មជ្ឈមណ្ឌលវេជ្ជសាស្ត្រស៊ីក្លូត្រុង ក៏មានសក្តានុពលក្នុងការផលិតឱសថ​វិទ្យុសកម្ម​បន្ថែមសម្រាប់ត្រៀមចែកចាយទៅមន្ទីរពេទ្យ ឬមជ្ឈមណ្ឌលផ្សេងៗទៀត ដែលត្រូវការ និងមាន​បំណងធ្វើទំនើបកម្មការធ្វើរោគវិនិច្ឆ័យ និងការព្យាបាលជំងឺប្រកបដោយប្រសិទ្ធភាព ទាំងនៅក្នុង​រាជធានីភ្នំពេញ និងតាមបណ្ដាខេត្តនានា។

អគារមជ្ឈមណ្ឌលវេជ្ជសាស្ត្រស៊ីក្លូត្រុងនេះ មានបណ្តោយ ១៤,៩ម៉ែត្រ ទទឹង ១១,៧ម៉ែត្រ និងកម្ពស់២ជាន់ មានផ្ទៃក្រឡាសរុប ៦០៥.២៣ម៉ែត្រការ៉េ។

សូមបញ្ជាក់ថា មន្ទីរពេទ្យកាល់ម៉ែតត្រូវបានសាងសង់ក្នុងឆ្នាំ១៩៥៨-១៩៦០ និងមានឈ្មោះថា មូលនិធិកាល់ម៉ែត។ ក្នុងរបបប្រល័យពូជសាសន៍ ប៉ុល ពត មន្ទីរពេទ្យត្រូវបានបោះបង់ចោល និង​បំផ្លាញ​ស្ទើរទាំងស្រុង។ ក្រោយថ្ងៃជ័យជម្នះ ៧មករា ឆ្នាំ១៩៧៩ រដ្ឋាភិបាលកម្ពុជានាពេ​លនោះ​បានជួសជុល និងបើកមន្ទីរពេទ្យឱ្យដំណើរការឡើងវិញ ដោយមានការជួយឧបត្ថម្ភគាំទ្រពីបណ្ដា​ប្រទេសជាមិត្ត។

ក្នុងអំឡុងជាងមួយ​ទសវត្សរ៍ចុងក្រោយនេះ ហេដ្ឋារចសម្ព័ន្ធ និងសមត្ថភាពធ្វើរោគ​វិនិច្ឆ័យ និងផ្តល់​សេវា​ព្យាបាលថែទាំ រួមទាំងសេវាឯកទេស របស់មន្ទីរពេទ្យត្រូវបានអភិវឌ្ឍឈានឡើងជា​បន្ត​បន្ទាប់ ក្នុងនោះរួមមានជាអាទិ៍៖ ការជួសជុលកែលម្អអគារមួយចំនួន និងសាងសង់ថ្មីបន្ថែម ដូច​ជា​មជ្ឈមណ្ឌលព្យាបាលជំងឺបេះដូង មជ្ឈមណ្ឌលវិទ្យាសាស្រ្តប្រព័ន្ធប្រសាទ មជ្ឈមណ្ឌលព្យាបាល​ជំងឺមហារីក អគារសម្ភពសន្តិភាព និងអគារតេជោអភិវឌ្ឍន៍ដែលត្រូវបានសម្ពោធឱ្យដំណើរការ​ជា​ផ្លូវ​ការកាលពីពាក់កណ្ដាល ឆ្នាំ២០២៣ ក្រោមការជួយឧបត្ថម្ភពីរាជរដ្ឋាភិបាល និងសប្បុរស​ជន។

ទន្ទឹមនឹងនេះមន្ទីរពេទ្យត្រូវបានបំពាក់ដោយឧបករណ៍វេជ្ជសាស្រ្ត និងអមវេជ្ជសាស្រ្តទំនើប​បែប​ឌីជី​ថល ដើម្បីឆ្លើយតបនឹងតម្រូវការប្រើប្រាស់សេវារបស់ប្រជាជនក្នុងប្រទេស និងជនបរទេសដែល​កំពុងរស់​នៅបំពេញការងារ ឬធុរកិច្ចនៅកម្ពុជា។

គិតត្រឹមខែសីហា ឆ្នាំ២០២៤ មន្ទីរពេទ្យកាល់ម៉ែត មានមន្ត្រី-បុគ្គលិក កំពុងបម្រើការងារ​សរុប​ចំនួន ២.១៦១នាក់ (ស្រី ១.១៧៤នាក់) ក្នុងនោះរួមមាន៖ សាស្រ្តាចារ្យ ៤៣នាក់ វេជ្ជបណ្ឌិត​ឯក​ទេស ៣៦៤នាក់ វេជ្ជបណ្ឌិត ១៣នាក់ ឱសថបណ្ឌិត និងឱសថការីឧត្តម ២១នាក់ គិលានុ​បដ្ឋាក-យិកា ៨៥៣នាក់ ឆ្មប ១៨៤នាក់ និងមន្ត្រី-បុគ្គលិកផ្សេងៗ ចំនួន ៦៨៣នាក់៕ ប្រភព៖ https://fna.asia/821d40f

ដោយ: គង់ លាងហួរ
អន្តរជាត: បណ្តាប្រទេសនៅក្នុងតំបន់អាស៊ានត្រូវបានគេរំពឹងថា នឹងបង្កើនការដោះដូរពាណិជ្ជកម្ម និងការប្រើប្រាស់ធ្យូងថ្មក្នុងទសវត្សរ៍នេះ ខណៈតម្រូវការនៅប្រទេសចិនកាន់តែខិតជិតដល់ចំណុចនៃកម្រិតកំពូល។

សមាគមអ្នកជីករ៉ែធ្យូងថ្មឥណ្ឌូនេស៊ី (ICMA) បានរំពឹងថា ការនាំចូលធ្យូងថ្មទៅកាន់ប្រទេសចិន និងឥណ្ឌានឹងហក់ឡើងដល់កម្រិតកំពូលនៅឆ្នាំ២០២៥ខាងមុខ។នេះបើយោងតាមការដកស្រង់ចុះផ្សាយដោយសារពត៌មាន Reuters។

ទោះជាយ៉ាងណា សមាគម ICMA រំពឹងថា ការនាំចូលធ្យូងថ្មប្រចាំឆ្នាំដោយបណ្តាប្រទេសអាស៊ាន ដូចជាវៀតណាម និងហ្វីលីពីននឹងកើនឡើងជិត៣ភាគរយគិតជាមធ្យមក្នុងមួយឆ្នាំដល់១៧០,៩លានតោនក្នុងឆ្នាំ២០៣០ បើធៀបនឹងចំនួន១៤០,៩លានតោនក្នុងឆ្នាំ២០២៣។

ការផលិតថាមពលអគ្គិសនីដើម្បីបំពេញតម្រូវការនៅក្នុងប្រទេសវៀតណាម ត្រូវបានគេមើលឃើញថា ជាទីផ្សារកំណើនដ៏ជោគជ័យបំផុតសម្រាប់ធ្យូងថ្ម ខណៈបច្ចុប្បន្ន វៀតណាមជាប្រទេសមានកំណើនសេដ្ឋកិច្ចជឿនលឿនបំផុតមួយក្នុងតំបន់។

ចំណែក ការនាំចូលធ្យូងថ្មដោយប្រទេសហ្វីលីពីនបានកើនឡើង៧,៦ភាគរយក្នុងរយៈពេល៨ខែដំបូងឆ្នាំ២០២៤ ខណៈការនាំចូលរបស់ម៉ាឡេស៊ីបានកើនឡើង៤ភាគរយ។

បណ្តាប្រទេសអាស៊ានត្រូវបានគេរំពឹងថា នឹងចូលមកជំនួសប្រទេសចិន និងឥណ្ឌាក្នុងនាមជាទីផ្សារដ៏ធំសម្រាប់ក្រុមហ៊ុននាំចេញធ្យូងថ្ម។ ប៉ុន្តែ ក្រុមមន្ត្រីឧស្សាហកម្មនៅតែរំពឹងថា ការប្រើប្រាស់នៅក្នុងប្រទេសចិន និងឥណ្ឌានឹងនៅតែមានកម្រិតខ្ពស់។

បច្ចុប្បន្ន ប្រទេសម៉ាឡេស៊ី ហ្វីលីពីន និងឥណ្ឌូនេស៊ី ស្ថិតក្នុងចំណោមបណ្តាប្រទេសផលិតថាមពលកកើតឡើងវិញបានក្នុងទំហំទាបបំផុត និងដើរយឺតយ៉ាវខ្លាំងបើធៀបនឹងបណ្តាប្រទេសផលិតថាមពលបៃតងធំៗ ដូចជាប្រទេសចិន និងឥណ្ឌា៕ប្រភព:Reuters៕

ដោយ: គង់ លាងហួរ
អន្តរជាតិ: i-City ជាទីក្រុងឌីជីថលឈានមុខគេរបស់ប្រទេសម៉ាឡេស៊ី បានដាក់បង្ហាញគម្រោងអគារសួនកំសាន្ត SkyCity Tower ដែលមានកម្ពស់៦០ម៉ែត្រផុតពីផ្ទៃដី។នេះបើយោងតាមសារពត៌មាន NST Online។

មន្ត្រីជាន់ខ្ពស់ម៉ាឡេសុីមួយរូប បានលើកឡើងថា គោលដៅទាក់ទាញថ្មី រួមជាមួយនឹងផលិតផលទេសចរណ៍ដែលមានស្រាប់នៅក្នុងទីក្រុង i-City នឹងដើរតួនាទីយ៉ាងសំខាន់ក្នុងការជំរុញយុទ្ធនាការ “Visit Selangor”ឆ្នាំ២០២៥ឱ្យទទួលបានជោគជ័យ។ តំបន់នេះរំពឹងថា នឹងទាក់ទាញបានភ្ញៀវទេសចរណ៍ក្នុងស្រុក និងអន្តរជាតិចំនួន៥លាននាក់នៅឆ្នាំក្រោយ។

ទីក្រុងឌីជីថល i-City មានកេរ្តិ៍ឈ្មោះល្បីល្បាញជាយូរយារណាស់មកហើយ និងបានបោះជំហានឈានមុខគេក្នុងការអភិវឌ្ឍន៍ទីក្រុង និងទីតាំងទេសចរណ៍នៅក្នុងរដ្ឋ Selangor។បច្ចុប្បន្ន i-City បានក្លាយ​ជា​មជ្ឈមណ្ឌល​មួយ​ ដែលអាចជួយឱ្យ​អាជីវកម្ម​ក្នុង​ស្រុក​រីក​ចម្រើន ដោយ​ទទួល​បាន​អត្ថប្រយោជន៍​ពី​លំហូរ​ភ្ញៀវ​ទេសចរណ៍ និង​សេដ្ឋកិច្ច​។

រដ្ឋបាលរដ្ឋ Selangor បានកត់សម្គាល់ថា ទីក្រុង i-City បានដើរតួនាទីយ៉ាងសំខាន់ក្នុងការជួយជំរុញដល់ឧស្សាហកម្មទេសចរណ៍តាមរយៈការផ្តល់សកម្មភាពកម្សាន្ត និងបដិសណ្ឋារកិច្ច ដែលឆ្លុះបញ្ចាំងពីរបៀបរស់នៅបែបសកល។

អគារប៉ម SkyCity Tower កំពស់៦០ម៉ែត្រនេះ ដែលមានបំពង់បង្ហូរទឹកធ្វើអំពីកញ្ចក់(Water Slide) ប្រវែង៦០០ម៉ែត្រ នឹងក្លាយជាលក្ខណៈពិសេសប្លែកសម្រាប់តំបន់ទេសចរណ៍របស់ទីក្រុងឌីជីថល i-City ក្នុងពេលឆាប់ៗនេះ។

SkyCity គ្រោងនឹងបើកដាក់ឱ្យដំណើរការនៅថ្ងៃទី១១ ខែធ្នូ ឆ្នាំ២០២៤ ស្របពេលជាមួយនឹងថ្ងៃកំណើតរបស់ព្រះចៅស៊ុលតង់ Sultan Sharafuddin Idris Shah ថ្នាក់ដឹកនាំកំពូលនៃរដ្ឋ Selangor របស់ម៉ាឡេសុី៕ ប្រភព: NST Online ៕

ដោយ: គង់ លាងហួរ
អន្តរជាតិ: លោក Ram Mohan Naidu Kinjarapu រដ្ឋមន្ត្រីក្រសួងអាកាសចរណ៍ស៊ីវិលឥណ្ឌាបានទម្លាយឱ្យដឹងថា ប្រទេសឥណ្ឌា និងចិនបានពិភាក្សាគ្នាអំពីការចាប់ផ្តើមឡើងវិញនៃជើងហោះហើរត្រង់ដោយផ្ទាល់រវាងប្រទេសទាំងពីរ។

សារពត៌មាន Reuters ធ្លាប់បានរាយការណ៍កាលពីខែមិថុនាថា ប្រទេសចិនកំពុងដាក់សម្ពាធលើប្រទេសឥណ្ឌាឱ្យចាប់ផ្តើមជើងហោះហើរដឹកអ្នកដំណើរដោយផ្ទាល់ឡើងវិញ។ ប៉ុន្តែទីក្រុងញូវដែលីកំពុងពិចារណា ខណៈការប្រឈមមុខដាក់គ្នានៅតាមព្រំដែននៅតែបន្តជះផលអវិជ្ជមានលើទំនាក់ទំនងរវាងគូប្រជែងទាំង២។

បណ្តាប្រទេសជិតខាងប្រដាប់ដោយអាវុធនុយក្លេអ៊ែរទាំង២ ត្រូវបានខណ្ឌចែកពីគ្នាដោយជួរភ្នំព្រំដែនហិម៉ាឡៃយ៉ា។ ចិន និងឥណ្ឌាមានភាពតានតឹង ចាប់តាំងពីមានការប៉ះទង្គិចគ្នាដោយកម្លាំងយោធាក្នុងឆ្នាំ២០២០។

ចាប់តាំងពីពេលនោះមក ឥណ្ឌាបានរឹតបន្តឹងការត្រួតពិនិត្យលើការវិនិយោគពីប្រទេសចិន ការបិទហាមឃាត់កម្មវិធី App ដ៏ពេញនិយមរាប់រយរបស់ក្រុមហ៊ុនចិន និងកាត់ផ្តាច់ផ្លូវហោះហើរដឹកអ្នកដំណើររវាងប្រទេសដៃគូប្រជែងទាំង២។

កាលពីថ្ងៃទី១២ ខែកញ្ញា លោក Kinjarapu បានបង្ហើបថា លោកបានជួបជាមួយប្រធានរដ្ឋបាលអាកាសចរណ៍ស៊ីវិលនៃប្រទេសចិននៅខាងក្រៅវេទិកាសន្និសីទថ្នាក់រដ្ឋមន្ត្រីមកពីតំបន់អាស៊ីប៉ាស៊ីហ្វិកស្តីពីអាកាសចរណ៍ស៊ីវិល រៀបចំឡើងនៅទីក្រុងញូវដេលី។

រដ្ឋមន្ត្រីក្រសួងអាកាសចរណ៍ស៊ីវិលឥណ្ឌា បានបង្ហោះសារនៅលើបណ្តាញសង្គម X ថា ភាគីទាំង២បានពិភាក្សាអំពីការពង្រឹងបន្ថែមទៀតនូវកិច្ចសហប្រតិបត្តិការអាកាសចរណ៍ស៊ីវិលរវាងប្រទេសទាំងពីរ ជាពិសេសការជំរុញឱ្យមានការដំណើរការឡើងវិញនូវជើងហោះហើរអ្នកដំណើរឱ្យបានឆាប់៕ប្រភព: Reuters៕

ដោយ: គង់ លាងហួរ
អន្តរជាតិ: រដ្ឋាភិបាលកណ្ដាលចិនបានប្តេជ្ញាខិតខំធ្វើឱ្យអស់លទ្ធភាពដើម្បីគាំទ្រឱ្យតំបន់រដ្ឋបាលពិសេសទីក្រុងហុងកុងដើរតួនាទីយ៉ាងធំនៅក្នុងគម្រោងកិច្ចសហប្រតិបត្តិការនៃគំនិតផ្តួចផ្តើមខ្សែក្រវ៉ាត់ និងផ្លូវ(BRI)របស់លោកប្រធានាធិបតីចិន សុី ជីនពីង។

លោកស្រី Li Yongjie តំណាងរងទទួលបន្ទុកផ្នែកពាណិជ្ជកម្មអន្តរជាតិរបស់ប្រទេសចិន បានថ្លែងសុន្ទរកថាបើកកិច្ចប្រជុំកំពូលខ្សែក្រវ៉ាត់ និងផ្លូវលើកទី៩ នៅមជ្ឈមណ្ឌលសន្និបាត និងពិព័រណ៍ហុងកុងថា “ក្រសួងពាណិជ្ជកម្មចិននឹងនាំទីក្រុងហុងកុងចូលរួមក្នុងការអភិវឌ្ឍន៍រួមគ្នាតាមរយៈគំនិតផ្តួចផ្តើមខ្សែក្រវ៉ាត់ និងផ្លូវ”។

លោកស្រីបានបន្តថា “យើងនឹងរួមគ្នាលើកកម្ពស់គម្រោងកិច្ចសហប្រតិបត្តិការជាក់ស្តែង ដើម្បីលើកកម្ពស់ការចូលរួមរបស់ហុងកុងនៅក្នុងគំនិតផ្តួចផ្តើមខ្សែក្រវ៉ាត់ និងផ្លូវ និងបន្តគាំទ្រអ្នកធុរកិច្ចចិនដីគោក និងហុងកុង ដើម្បីពង្រឹងការផ្លាស់ប្តូរព័ត៌មាន និងធ្វើឱ្យកិច្ចសហប្រតិបត្តិការស៊ីជម្រៅលើគម្រោង BRI”។

ទីក្រុងប៉េកាំងនឹងគាំទ្រតំបន់រដ្ឋបាលពិសេសហុងកុងក្នុងការពង្រីកវត្តមានទៅកាន់ទីផ្សារក្រៅប្រទេស ក្នុងវិស័យឧស្សាហកម្មសេវាកម្មដូចជា វិស័យហិរញ្ញវត្ថុ វិស័យច្បាប់ ការដឹកជញ្ជូន និងគណនេយ្យ និងផ្តល់សេវាកម្មវិជ្ជាជីវៈកម្រិតខ្ពស់សម្រាប់តំបន់សហប្រតិបត្តិការសេដ្ឋកិច្ច និងពាណិជ្ជកម្មក្រៅប្រទេស ការវិនិយោគបរទេស និងគម្រោងកិច្ចសន្យា។

ជាមួយគ្នានេះ លោក John Lee ប្រធានប្រតិបត្តិនៃតំបន់រដ្ឋបាលពិសេសហុងកុង (HKSAR) បានមានប្រសាសន៍ឱ្យដឹងថា ទីក្រុងហុងកុងមានចំណុចខ្លាំងជាច្រើនដើម្បីបញ្ចេញក្រោមក្របខណ្ឌកិច្ចសហប្រតិបត្តិការនៃគំនិតផ្តួចផ្តើមខ្សែក្រវ៉ាត់ និងផ្លូវ និងមានតួនាទីសំខាន់ក្នុងការលើកកម្ពស់និរន្តរភាព។

លោក Lee បន្តថា វិនិយោគិនជុំវិញពិភពលោក រួមទាំងការិយាល័យគ្រួសារជាង២៧០០ការិយាល័យ អាចទាញយកអត្ថប្រយោជន៍បានយ៉ាងពេញលេញពីទីក្រុងហុងកុង រាប់ចាប់ពីសេវាហិរញ្ញវត្ថុ និងច្បាប់ ដល់វិស័យស្ថាបត្យកម្ម វិស្វកម្ម ភស្តុភារ និងវិស័យជាច្រើនទៀតសម្រាប់គម្រោងខ្សែក្រវ៉ាត់ និងផ្លូវរបស់ពួកគេ”។

លោកបានបញ្ជាក់បន្ថែមថា ទីក្រុងហុងកុងអាចបន្តបង្កើនសមត្ថភាពផ្នែកនវានុវត្តន៍បច្ចេកវិទ្យារបស់ខ្លួនដើម្បីជំរុញផលិតភាពមានគុណភាពថ្មី តាមរយៈបច្ចេកវិទ្យាបៃតង និងហិរញ្ញវត្ថុបៃតង។

លោក Peter KN Lam ក្រុមប្រឹក្សាអភិវឌ្ឍន៍ពាណិជ្ជកម្មហុងកុង (HKTDC) បានលើកឡើងថា ហុងកុងជាទីក្រុងដ៏សំខាន់មួយនៅក្នុងតំបន់សេដ្ឋកិច្ចពិសេស Greater Bay Area ដោយមានការតភ្ជាប់ជាមួយទីផ្សារចិនដីគោក។ តំបន់នេះអាចជួយសម្រួលការបណ្តាក់ទុនវិនិយោគនៅប្រទេសចិនរបស់សហគ្រាសមកពីតំបន់អាស៊ី និងតំបន់ផ្សេងទៀត៕ប្រភព:SCMP & Xinhua៕