ដោយ: គង់ លាងហួរ

អន្តរជាតិ: ក្រុមហ៊ុនអភិវឌ្ឍន៍អចលនទ្រព្យអារ៉ាប់រួម Emaar Properties បានប្រកាសឡើងនូវផែនការ នៃការពង្រីកផ្សារទំនើប Dubai Mall ក្រោមទុនវិនិយោគចំនួន៤០៨លានដុល្លារអាមេរិក។នេះបើយោងតាមសារពត៌មានអាមេរិក CNN។

បច្ចុប្បន្ន ផ្សារទំនើបនេះមានទំហំ១២លានហ្វីតការ៉េ និងជាប់ឈ្មោះជាផ្សារទំនើប ដែលធំជាងគេនៅលើពិភពលោក រួចស្រេចទៅហើយ។ បើយោងតាមផែនការពង្រីកនេះ ក្រុមហ៊ុនខាងលើនឹងអភិវឌ្ឍន៍ហាងប្រណីត ចំនួន២៤០ទីតាំងបន្ថែមទៀត រួមជាមួយនឹងកន្លែងលក់អាហារថ្មីៗ។

មជ្ឈមណ្ឌលលក់ទំនិញខ្នាតយក្សមួយនេះ មានអាងចិញ្ចឹមត្រីដ៏ធំបំផុតនៅលើពិភពលោក សារមន្ទីរសិល្បៈឌីជីថលដ៏អស្ចារ្យ គ្រោងឆ្អឹងដាយណូស័រ ដែលមានអាយុកាល១៥៥លានឆ្នាំ កន្លែងជិះស្គីទឹកកកខ្នាតអូឡាំពិក និងរោងកុនដែលមានអេក្រង់ចំនួន២៦ផ្ទាំង។

នៅក្នុងសេចក្តីប្រកាសព័ត៌មានមួយ លោក Mohamed Alabbar ស្ថាបនិកនៃក្រុមហ៊ុនអចលនទ្រព្យ Emaar Properties  បានចាត់ទុកការពង្រីកផ្សារទំនើបនេះថា ជា “ការបន្ថែមដ៏អស្ចារ្យមួយទៅលើទីតាំង ដែលមានអ្នកចូលមកទស្សនាច្រើនបំផុត នៅលើពិភពលោក”។

ជាក់ស្ដែង ផ្សារទំនើប Dubai Mall បានអះអាងថា ខ្លួនទទួលបានភ្ញៀវទេសចរណ៍សរុប ចំនួន១០៥លាននាក់កាលពីឆ្នាំមុន ដោយកើនឡើង១៩ភាគរយ បើធៀបនឹងឆ្នាំ២០២២។ ដូច្នេះ ការពង្រីកផ្សារទំនើបនេះបន្ថែមទៀត នឹងឆ្លើយតបទៅនឹងការកើនឡើងនៃចំនួនភ្ញៀវទេសចរណ៍ ដែលរំពឹងថា នឹងចូលមកទស្សនាកាន់តែច្រើននាពេលអនាគត។

ស្របពេលការលក់រាយ នៅទីតាំងផ្សារទំនើបជាច្រើននៅជុំវិញពិភពលោកកំពុងធ្លាក់ចុះ។ ផ្ទុយទៅវិញ ការចាយវាយលើទីផ្សារលក់រាយនៅក្នុងប្រទេសអារ៉ាប់រួម បានកើនឡើង១៤% កាលពីឆ្នាំមុន ដែលជំរុញដោយវិស័យម៉ូដទាន់សម័យ ដែលកើនឡើង៣១% ការលក់រាយទូទៅកើនឡើង១៦% ខណៈការលំហែ និងការកម្សាន្ត បានកើនឡើង១៥%។ នេះបើយោងតាមរបាយការណ៍ពីក្រុមហ៊ុន Majid Al Futtaim Group៕ប្រភព:CNN៕

ដោយៈ គង់ សូរិយា

        ភ្នំពេញៈ ស្ថាបត្យករល្បីឈ្មោះ និងជាស្ថាបត្យករអាស៊ាន បានបង្ហាញម៉ូតផ្ទះថ្មីៗ ទំហំតូចល្មម សម្រាប់អ្នកមិនចង់បានភូមិគ្រឹះធំៗស្កឹមស្កៃ។

លោកសាស្រ្តាចារ្យទួស សាភឿនអគ្គលេខាធិការរងនៃគណៈស្ថាបត្យករកម្ពុជា និងជាស្ថាបត្យករអាស៊ាន បានសរសេរនិងបង្ហាញរូបភាព ក្នុងបណ្តាញតេឡេក្រាមកាលពីថ្ងៃទី១០ មិថុនាថា ចង់មានជីវិត រស់នៅស្រស់ស្រាយបែបធម្មជាតិ គួរមានលំនៅដ្ឋានខ្យល់ធម្មជាតិបែបនេះល្អណាស់ ។លោកបញ្ជាក់ថា “នរណាក៏ចូលចិត្តដែរ តែពេលមានលុយចូលចិត្តសាងសង់ធំហួសការប្រើ ចូលចិត្តបង្ហាញគេថា មានលុយច្រើនចាយមិនអស់”។ លោកបន្ថែមថា “សង់ធំហួសសមាជិកគ្រួសារប្រើប្រាស់ ចុងក្រោយមានតែពីរនាក់យាយ តានៅថែរក្សាផ្ទះដដែល”។

ជាមួយគ្នានឹងការបង្ហាញរចនាបទម៉ូតផ្ទះ បែបសាមញ្ញ តែមានលក្ខណៈស៊ីវិល័យ ក៏បានរួមបញ្ចូលនូវរុក្ខជាតិ និងទឹកព័ទ្ឋជុំវិញ ដែលផ្តល់ឲ្យបរិយាកាសត្រជាក់ មានខ្យល់ចេញចូល និងកាត់បន្ថយកំដៅ ស្របពេល ការប្រែប្រួលអាកាសធាតុសាកល កាន់តែមានសភាពកាន់តែអាក្រក់ពីមួយឆ្នាំទៅមួយឆ្នាំ៕

ដោយៈ គង់ ហ្វីអូណា

        កោះកុងៈ រដ្ឋបាលខេត្តកោះកុង បានរៀបចំកិច្ចប្រជុំត្រៀមរៀបចំវេទិកាផ្គូផ្គង រវាងអ្នកលក់ និងអ្នកទិញ ក្រោមគម្រោងអភិវឌ្ឍអាជីវកម្ម និងការទទួលបានទីផ្សារសម្រាប់អ្នកផលិតក្នុងស្រុកនាពេលខាងមុខ។

លោក អន សុធារិទ្ធ អភិបាលរង នៃគណៈអភិបាលខេត្ត និង ជាប្រធានលេខាធិការដ្ឋាន នៃគណៈកម្មាធិការជំរុញចលនាភូមិមួយ ផលិ​តផលមួយ ខេត្តកោះកុង បានអញ្ជើញដឹកនាំកិច្ចប្រជុំ ពិភាក្សាត្រៀម​រៀបចំវេទិកាផ្គូផ្គង រវាងអ្នកលក់ និងអ្នកទិញ ក្រោមគម្រោងអភិវឌ្ឍន៍អាជីវកម្ម និងការទទួលបានទីផ្សារ សម្រាប់អ្នកផលិតក្នុងស្រុកនិងM/ SMEsនិងនាំចេញនៅនឹងកន្លែង នៅខេត្តកោះកុង។

លោក អភិបាលរងខេត្ត បានលើកឡើងថា ការងារនេះ ត្រូវផ្តោតលើការងារសំខាន់ៗជាច្រើនរួមមាន ទី១ ត្រៀមរៀបចំស្តង់សម្រាប់ដាក់តាំងផលិតផល ជូនដល់បងប្អូនជាម្ចាស់ផលិតផល ដែលបានចុះឈ្មោះចូលរួម ។ ទី២ ក្រុមការងារត្រូវរៀបចំ ឲ្យបងប្អូនមានផលិត​ផលស្ងួតៗ អាចដាក់តាំងក្នុងមហោស្រពបាន ។ រីឯផលិតផលដែលមានក្លិន មានផ្សែង សូមឱ្យរៀបចំដាក់នៅលើស្តង់ខាងក្រៅ ។

ទី៣ អញ្ជើញអ្នកពាក់ព័ន្ធ ផ្នែកសេវាកម្មដូចជា រីសត សណ្ឋាគារ និងភោជនីយដ្ឋាន រោងការអាចចូលរួមក្នុងពិធី ។ ដោយឡែក ម្ចាស់ផលិតផលទាំងអស់ មានរយៈពេល៥នាទី ដើម្បីធ្វើបទបង្ហាញ វីដេអូឃ្លីបអំពីផលិតផលរបស់ខ្លួន ។

លោកអន សុធារិទ្ធ បានបន្តទៀតថា ជាមួយគ្នានេះរដ្ឋបាល ខេត្ត គ្រោង និងរៀបចំផ្លែទុរេន ម្ឃុត សាវម៉ាវ ដែលទិញពីររដ្ឋបាលក្រុង ស្រុក មួយ ចំនួន ដើម្បីត្រៀមរៀបចំចែកជូនដល់បងប្អូន ដែលអ្នកមកចូលរួម ឱ្យបានភ្លក់ពិសាផងដែរ។

កិច្ចប្រជុំនេះធ្វើឡើងក្នុងគោលបំណង ដើម្បីត្រៀមរៀបចំវេទិកាផ្គូរផ្គង រវាងអ្នកលក់ និងអ្នកទិញ ដែលគ្រោងធ្វើឡើងនៅថ្ងៃទី ១៨ -២០ ខែមិថុនា ឆ្នាំ២០២៤ នៅខេត្តកោះកុង ដែលមានរយៈពេល ៣ថ្ងៃ ដេីម្បីលេីកកម្ពស់សក្តានុពលផលិតផលក្នុងស្រុក ការស្វែងរកទីផ្សារជូនអ្នកផលិត ការជំរុញចលនាភូមិ១ ផលិតផល ១ ជាពិសេស ដើម្បីចូលរួមអបអរសាទរ ព្រះរាជពិធីបុណ្យចម្រើនព្រះជន្ម សម្ដេចព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរ៕

ដោយៈ គង់ សូរិយា

        កណ្តាលៈ ក្រុមមន្រ្តីបាន​​រៀបចំ​ពិធី​ក្រុង​សែនពាលី សែនព្រេន​សុំ​ម្ចាស់​ទឹកម្ចាស់​ដី​ ដើម្បី​ត្រៀម​បើក​ការដ្ឋាន​សាងសង់ “​ព្រែកជីកហ្វូណនតេជោ” នៅថ្ងៃទី៥ សីហា ​ខាងមុខ។

​អ្នក​នាំពាក្យ​ក្រសួង​សាធារណការ​ និង​ដឹកជញ្ជូន​ លោកផន រឹមបាន​បង្ហោះ​រូបភាព ពិធី​ក្រុង​សែនពាលី​ ​សុំម្ចាស់ទឹកម្ចាស់ដីរុះរើកាយគាស់ រៀបចំកន្លែង ដើម្បី​​ត្រៀមសម្ពោធ​បើកការដ្ឋាន​ផ្លូវ​នាវាចរ ​គម្រោ​ង​  “ព្រែកជីកហ្វូណន-តេជោ”។

លោកផន រឹម បាន​ឲ្យដឹងថា ពិធី​​ក្រុងសែន​ពាលី​​បាន​រៀបចំ​ឡើង​នៅ​ព្រែកតាកែវ ស្ថិត​នៅ​តាម​បណ្តោយ​ផ្លូវជាតិលេខ១ នៅស្រុកកៀនស្វាយ ខេត្តកណ្តាល។

ថ្លែង​នៅ​ក្នុងពិធីសម្ពោធបើកដំណើរការ “កំពង់ផែពហុបំណងកំពត” របស់​ក្រុមហ៊ុន​កំពត​ផតនៅ​ក្រុងបូកគោ ខេត្តកំពត កាលពី​ថ្ងៃទី ៦ ខែ​មិថុនា ឆ្នាំ២០២៤ សម្តេចធិបតីហ៊ុន ម៉ាណែត នាយករដ្ឋមន្រ្តីនៃកម្ពុជា បាន​ប្រកាស​កំណត់យកថ្ងៃទី ៥ ខែ​សីហា ឆ្នាំ២០២៤ បើកការដ្ឋានសាងសង់ ​គម្រោងព្រែក​ជីកហ្វូណនតេជោ។

សម្តេចបាន​​បញ្ជាក់​​ថា ដំណើរការ​សាងសង់​ព្រែកជីក​ហ្វូណន​តេជោ នឹង​ផ្ដល់លទ្ធភាព​ឱ្យកម្ពុជា​មាន​ឯករាជ្យភាព​ លើ​ការ​ដឹកជញ្ជូន និង​ផ្ដល់​ផលប្រយោជន៍ ​ដល់​ប្រជាពលរដ្ឋនៅ​ខេត្ត​ទិស​និរតិ ក៏ដូចជា​ក្នុង​ក្រប​ខ័ណ្ឌ​ទូទាំងប្រទេស។

ដើម្បី​ឲ្យ​គម្រោង​ព្រែកជីក ជា​ប្រវត្តិសាស្ត្រ​ក្លាយជា​សមិទ្ធផល​ជាក់ស្ដែង សម្តេច​ធិបតី​ក៏​អំពាវនាវ​ ដល់​ប្រជា​ពលរដ្ឋកម្ពុជា​ទូទាំ​ង​ប្រទេស បន្ត​គាំទ្រគម្រោង​ប្រវត្ដិសាស្ដ្រ​នេះ ដើម្បី​ជា​ប្រយោជន៍ជាតិ​រហូត​ដល់​គម្រោង​លេចចេញ​ជារូបរាង​ទ្បើង ​និង​រួចរាល់​ជាស្ថាពរ។

គម្រោងព្រែកជីកហ្វូណនតេជោ នឹងផ្ដល់អត្ថប្រយោជន៍ជាច្រើនដល់ប្រទេសកម្ពុជា ជាពិសេស​វិស័យដឹកជញ្ជូន និងការវិនិយោគផ្សេងៗ ខណៈគម្រោង​ត្រូវប្រើពេលវេលាសាងសង់​៤ឆ្នាំ និង​ចាយ​ថវិកា​ប្រមាណ១៧០០លាន​ដុល្លារ។

លោក ស៊ុន ចាន់ថុល ឧបនាយករដ្ឋមន្រ្តី និង​ជា​អនុប្រធាន​ទី ១ ក្រុម​ប្រឹក្សាអភវឌ្ឍ​កម្ពុជា​បាន​បញ្ជាក់ថា គម្រោង​សាងសង់​ព្រែកជីក​ហ្វូនណន​តេជោ អាច​ធ្វើ​ឲ្យ​ថ្លៃ​ដឹកជញ្ជូន​ទំនិញ​ចេញ​ពី​កម្ពុជា​ចំណេញ​ប្រហែល២០០ ទៅ៣០០ដុល្លារ ដោយ​មិន​បាច់​ឆ្លង​កាត់​ប្រទេស​វៀតណាម។

តាម​រយៈ​គម្រោង​ព្រែកជីក​ហ្វូណន​ នឹង​សម្រួល​ថ្លៃ​ដឹកជញ្ជូន ធ្វើ​ឲ្យ​កម្ពុជា​មាន​លទ្ធភាព ​ប្រកួតប្រជែង​ថ្លៃ​ដឹកជញ្ជូន​ ជាមួយ​​ប្រទេស​ជិត​ខាង។

លោក ស៊ុន ចាន់ថុល បានអះអាង​ថា​ គម្រោង​សាងសង់ព្រែកជីកហ្វូណនតេជោ មានការ​សិក្សា​រួមគ្នា​រវាង​ក្រុមអ្នកជំនាញ​បច្ចេកទេស​ជាតិ និងអន្តរជាតិ ដែល​​ធ្វើឡើង​ទាំង​នៅ​លើដី​ផ្ទាល់ និង​ប្រើ​ឧបករណ៍​សិក្សា​ពី​លើអាកាស។

​ព្រែកជីក​ដែល​មាន​ប្រវែងជាង១៨០គីឡូម៉ែត្រនេះ មិនមែន​អភិ​វឌ្ឍន៍​លើ​ដី​ថ្មី​ទាំងស្រុង​នោះ​ទេ ពោល​គឺអភិវឌ្ឍន៍​តាមគំរូ​ព្រែកចាស់​បុរាណ​។ ដូច្នេះការអភិវឌ្ឍន៍គ្រាន់តែ​ពង្រីក​ទំហំទទឹង និងជីកឱ្យជ្រៅជាងមុន ដែល​​អាច​ធ្វើ​ឱ្យនាវាចំណុះ៣ពាន់​តោន ​អាចធ្វើចរាចរណ៍​បាន​តែប៉ុណ្ណោះ៕

ដោយ: គង់ លាងហួរ
អន្តរជាតិ: បើប្រៀបធៀបនឹងតម្លៃក្នុងពេលបិទការជួញដូរកាលពីថ្ងៃសុក្រសប្តាហ៍មុន គេសង្កេតឃើញថា តម្លៃហាងឆេងមាសបានបន្តស្ថិតក្នុងសភាពមិនច្បាស់លាស់នៅល្ងាចថ្ងៃច័ន្ទនេះ ខណៈពេលដែលទស្សនៈវិស័យនៃការកាត់បន្ថយអត្រាការប្រាក់របស់ធនាគារ Fed បន្តមានភាពមិនប្រាកដប្រជា បន្ទាប់ពីចេញផ្សាយអត្រាអ្នកមានការងារធ្វើរបស់សហរដ្ឋអាមេរិក។

តួយ៉ាង តម្លៃមាស Spot Gold បានងើបឡើង០,១៨%ដល់២២៩៦,៧២ដុល្លារ ក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានធ្លាក់ចុះ០,៥៦ភាគរយដល់២.៣១២ដុល្លារ ក្នុងមួយអោន គិតត្រឹមម៉ោង៥:០៦នាទីល្ងាច។

គិតត្រឹមពេលបិទការជួញដូរកាលពីថ្ងៃសុក្រសប្តាហ៍មុន តម្លៃមាស Spot Gold បានស្ថិតនៅត្រឹម២២៩២,៧១ដុល្លារ ក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold future បានស្ថិតនៅត្រឹម២.៣២៥ដុល្លារ ក្នុងមួយអោន។

កំណត់សម្គាល់: តម្លៃមាសបានបន្តស្ថិតក្នុងសភាពមិនច្បាស់លាស់នៅល្ងាចថ្ងៃច័ន្ទនេះ បើសិនយកទៅប្រៀបធៀបនឹងតម្លៃក្នុងពេលបិទការជួញដូរកាលពីថ្ងៃសុក្រសប្តាហ៍មុន៕

ខ្ញុំបាទឈ្មោះ MOHAMMED ABDULQADER QASSIM ABDULLA ALQASSIM ភេទប្រុស ជនជាតិឌូបៃ សញ្ញាតិអារ៉ាប់រួម បានជ្រុះកាបូបយូរដៃរួមជាមួយសម្ភារៈសំខាន់ៗមួយចំនួន។ ដោយហេតុថាកាលពីម៉ោង12យប់ឈានចូលថ្ងៃទី31 ខែឧសភា​ ឆ្នាំ2024 ខ្ញុំជាមួយក្រុមការងារចេញពីញាំអាហារនៅភោជនីយ៍ដ្ឋានមួយស្ថិតនៅបាសាក់ឡែន ផ្លូវលេខ308 ភូមិ៦ សង្កាត់ទន្លេបាសាក ខណ្ឌចំការមន​ រាជធានីភ្នំពេញ សួនច្បារមាត់ទន្លេមុខព្រះបរមរាជ្យវាំង បានធ្វើដំណើរតាមផ្លូវព្រះសីហនុកាត់តាមចំណុច រង្វង់មូលសម្តេចសង្ឃជួនណាត និងវិមានឯករាជ្យ បានជ្រុះបាត់កាបូបកាន់ដៃមួួយពណ៌ខ្មៅរួមជាមួយសម្ភារៈមួយចំនួនដែលមានភិនភាគដូចរូបខាងក្រោម៖

• អត្តសញ្ញាណប័ណ្ណសញ្ជាតិអារ៉ាប់រួមមានលេខសម្គាល់ 784-1989-9036132-5 ចំនួូន 01សន្លឹក
• ប័ណ្ណបើកបរអារ៉ាប់រួមលេខសម្គាល់ 1162345ចំនួន 01សន្លឹក
• កាតការងារចំនួន 02សន្លឹក
• កាតធនាគារចំនួន 04សន្លឹក
• កូនសោផ្ទះ និងលុយចំនួន 80USD និងលុយខ្មែរចំនួន 9000រៀល និងលុយអង់គ្លេស50ផោន

អាស្រ័យដូចបានជម្រាបព័ត៌មានខាងលើ ករណីប្រជាពលរដ្ឋរូបណាបានរើសបានយកប្រគល់មកជូនខ្ញុំបាទអាចទាក់ទងមកសហការីខ្ញុំបាទតាមរយៈលេខទូរស័ព្ទ 012 245 2222, 097 626 2222 ឬតេឡេក្រាម(Telegram) 012 97 71 08 ខ្ញុំបាទនឹងមានជាសាគុណជូន។

        ដោយៈ គង់ ហ្វីអូណា

        វៀតណាមៈ ស្ថាប័នជំនាញផ្នែកធុរកិច្ចរបស់កម្ពុជា និងវៀតណាមបានរៀបចំសិក្ខាសាលារួមគ្នា ដើម្បីជម្រុញការវិនិយោគនៅប្រទេសទាំងពីរក្នុងឆ្នាំ២០២៤នេះ។

សិក្ខាសាលានេះ ត្រូវបានរៀបចំឡើងក្នុងដំណើរទស្សនកិច្ចជំរុញ និងផ្សព្វផ្សាយវិនិយោគរយៈពេល៣ ថ្ងៃនៅសាធារណរដ្ឋសង្គមនិយមវៀតណាម នាព្រឹកថ្ងៃទី០៧ ខែមិថុនា ឆ្នាំ២០២៤ លោកជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា។ កម្មវិធីនេះរៀបចំឡើង ដោយ​សមាគមសហព័ន្ធធុរកិច្ចវៀតណាម-កម្ពុជា និងមជ្ឈមណ្ឌលជំរុញពាណិជ្ជកម្ម និងវិនិយោគទីក្រុងហូជីមិញ។

ក្នុងសិក្ខាសាលាផ្សព្វផ្សាយវិនិយោគនេះ មានការចូលរួមពីតំណាងសភាពាណិជ្ជកម្មកម្ពុជា និងក្រុមហ៊ុនវិនិយោគវៀតណាមចំនួនប្រមាណ៤០ក្រុមហ៊ុន មកពីជុំវិញទីក្រុងហូជីមីញ និងទីក្រុងអាងយ៉ាង។

គោលបំណងនៃសិក្ខាសាលា គឺផ្តោតសំខាន់លើការជំរុញនិងទាក់ទាញការវិនិយោគ លើឧស្សាហកម្មកែច្នៃកសិផលរបស់កម្ពុជា សម្រាប់ការនាំចេញ តាមរយ:ការបង្កើតជាតំបន់សេដ្ឋកិច្ចពិសេស រឺតំបន់ប្រមូលផ្តុំឧស្សាហកម្មកសិ-ឧស្សាហកម្ម​។

ក្នុងឱកាសនោះ លោកជា វុទ្ឋីបានជម្រាបជូនពីកាលានុវត្តភាពវិនិយោគ និងការដាក់ចេញនូវច្បាប់បទប្បញាត្តិនិងគោលនយោបាយសំខាន់ៗក្រោមការដឹកនាំរបស់សម្តេចមហាបវរធិបតីនាយករដ្ឋមន្ត្រីដើម្បីពង្រឹងភាពប្រកួតប្រជែងរបស់កម្ពុជា និងប្រែក្លាយកម្ពុជាជាគោលដៅវិនិយោគ ដែលកាន់តែមានភាពទាក់ទាញ ហើយបានស្នើដល់វិនិយោគិនវៀតណាម ពិនិត្យលទ្ធភាពពីកាលានុវត្តភាព ដែលមានទាំងនេះដើម្បីបណ្តាក់ទុនវិនិយោគ ចូលរួមចំណែកពង្រឹងនិងពង្រីកកិច្ចសហប្រតិបត្តិការ គ្រប់វិស័យរវាងប្រទេសយើងទាំងពីរ។

បន្ទាប់ពីសិក្ខាសាលាផ្សព្វផ្សាយ​វិនិយោគ​ នារសៀលថ្ងៃដដែល​ ប្រតិភូ​ គ.វ.ក.​ បានទៅទស្សនកិច្ច​ និងជួបប្រជុំពិភាក្សាជាមួយថ្នាក់ដឹកនាំ​ក្រុមហ៊ុនភស្តុភារកម្ម​ និងដឹកជញ្ជូនដ៍មានសក្តានុពល​នៅទីក្រុងហូជីមីញ​ Genuine Partner Group និងគណ:គ្រប់គ្រងសាកលវិទ្យាល័យ​ Van Hien ដែលជាបុត្រសម្ព័ន្ធរបស់ក្រុមហ៊ុន​ Hung Hau Holding។

ក្នុងដំណើរទស្សនកិច្ចរបស់​ សម្តេចធិបតីនាយករដ្ឋមន្ត្រី​ នៅប្រទេសវៀតណាម​ កាលពី​ថ្ងៃទី១១-១២​ ខែធ្នូ​ ឆ្នាំ២០២៣​ កន្លងទៅ​  ក្រុមហ៊ុន​ Hung Hau Agricultural Corporation របស់ប្រទេសវៀតណាម​ បានចុះអនុស្សារណ:យោគយល់គ្នា ជាមួយ​ក្រុមហ៊ុន​ Rithy Granite Cambodia Co., Ltd  ដើម្បីអភិវឌ្ឍវិស័យកែច្នៃផលិតផលកសិ-ឧស្សាហកម្ម​កម្ពុជា​ ជាពិសេសលើផលិតផលគ្រាប់ស្វាយចន្ទី​ ស្វាយរមៀត​ និងកសិផលដ៍ទៃទៀត​ ហើយដែលក្រុមហ៊ុនបានផ្តល់ព័ត៌មានជាវិជ្ជមាន ពីការគ្រោងចាប់ផ្តើមការវិនិយោគរបស់ខ្លួន នៅកម្ពុជានាពេលឆាប់ៗខាងមុខនេះ៕