ដោយៈ គង់ សូរិយា

ភ្នំពេញៈ ប្លង់ទន់ គឺជាឯកសារប្រភេទក្រដាសទន់ ដែលមានច្រើនទម្រង់ហើយអាច ធ្វើជាសក្ខីភាពនៃការកាន់កាប់ ក្នុងនោះអាចមានការបញ្ជាក់ដោយអាជ្ញាធរមូលដ្ឋាន ភូមិ ឃុំ ដល់ថ្នាក់ស្រុក ឬអាចជាលិខិតទិញ លក់ ឬកិច្ចសន្យាផ្ទេរសិទ្ធិដ៏សាមញ្ញ។

ប្លង់ទន់គឺជាទម្រង់បង្ហាញពីភាពជាម្ចាស់ ដែលគេប្រើជាទូទៅនៅក្នុងប្រទេសកម្ពុជា។ វាជាប័ណ្ណកម្មសិទ្ធិដីធ្លីនៅកម្ពុជា ដែលត្រូវបានទទួលស្គាល់ពី រដ្ឋាភិបាលក្នុងស្រុក។

ច្បាប់ភូមិបាលឆ្នាំ២០០១ បានបង្កើតប្រព័ន្ធបញ្ជីឈ្មោះដីធ្លីឲ្យមាន ប័ណ្ណកម្មសិទ្ធិដីធ្លី នៅប្រទេសកម្ពុជានាពេលបច្ចុប្បន្ននេះ។ ការកាន់កាប់អចលនទ្រព្យបច្ចុប្បន្ន ត្រូវបានធានាសុវត្ថិភាពដោយប័ណ្ណមួយ ក្នុងចំណោម៣នៃទម្រង់របស់ប័ណ្ណកម្មសិទ្ធិក្នុង ប្រទេសកម្ពុជា។ ប្រភេទប័ណ្ណកម្មសិទ្ធអចលនទ្រព្យវត្ថុ ជាទូទៅគេតែងតែលើកយកប័ណ្ណសម្គាល់ម្ចាស់ កម្មសិទ្ធិស្របច្បាប់តែពីរប៉ុណ្ណោះ មកបញ្ជា​ក់គឺប្លង់រឹង និងប្លង់ទន់។ដោយឡែក ប្លង់ទន់ត្រូវបានផ្ដល់ជូន ដោយការិយាល័យសង្កាត់ឬស្រុកនិងមិនត្រូវបាន ចុះឈ្មោះនៅថ្នាក់ជាតិនោះទេ ប៉ុន្តែនៅតែត្រូវបានគេចាត់ទុកជាឯកសារ ម្ចាស់កម្មសិទ្ធិពេញសិទ្ធិ។ ភាគច្រើននៃការផ្ទេរអចលនទ្រព្យ ត្រូវបានគេធ្វើឡើងជាប្លង់ទន់ ដើម្បីចៀសវាងការបង់ពន្ធ និងតម្លៃសេវាទៅកាន់រដ្ឋ។

ត្រង់ចំណុចនេះ យើងអាចលើកឡើងពីតថភាពជាក់ស្ដែងសម្រាប់អ្នករស់នៅភ្នំពេញនាពេលបច្ចុប្បន្ន យើងសង្កេតឃើញថា ភាគច្រើនអ្នករស់នៅជាន់ទី២ ទី៣នៃសំណង់ផ្ទះល្វែង ប្រើប្រាស់ប្លង់ទន់ជាកម្មសិទ្ធអចលនវត្ថុ ដោយសារតែផ្ទះមួយអាគារ មានចន្លោះ3 – ៤ជាន់ ហើយក្នុងមួយជាន់ មានម្ចាស់ផ្សេងៗគ្នា។

ប្រសិទ្ធិភាពនៃប្លង់ទន់នៅភ្នំពេញ វាមានប្រសិទ្ធិភាពខ្លាំងសម្រា​ប់អ្នករស់នៅភ្នំពេញ ។ តើដំណើរការផ្ទេរសិទ្ធិ លើអចលនទ្រព្យនៃប្លង់ទន់ធ្វើឡើងដោយរបៀបណា?។

ជាការពិតណាស់ ប្លង់ទន់នៃអចលនទ្រព្យ ក៏ទទួលស្គាល់ដោយតាមផ្លូវច្បាប់ តែស្ថិតនៅក្នុងកម្រិតមួយ ឬមានប្រសិទ្ធិភាពតិចជាងប្លង់រឹង ដូច្នេះ ដំណើរការនៃការផ្ទេរសិទ្ធិលើអចលនវត្ថុ គឺធ្វើឡើងតាមរយៈការបញ្ជាក់លិខិតផ្ទេរសិទ្ធិ ជាការលក់ឬធ្វើពី សំណាក់អាជ្ញាធរមូលដ្ឋានចាប់ពីកម្រិតថ្នាក់ភូមិ ឃុំ រហូតដល់ស្រុក ឬ ខណ្ឌ។

ការធ្វើប្លង់ទន់ ម្ចាស់អចលនទ្រព្យ ក៏ត្រូវបំពេញលិខិតកិច្ចសន្យា ដើម្បីធានាថា ផ្ទះ និង ដី ដែលកំពុងកាន់កាប់មិនប៉ះពាល់ដល់ដីរដ្ឋ ហើយការធ្វើប្លង់ទន់នេះ មិនតម្រូវឲ្យបង់ពន្ធលើការ ផ្ទេរសិទ្ធ នោះឡើយ៕

នាថ្ងៃទី29 ខែធ្នូ ឆ្នាំ2023 ក្រុមហ៊ុនអាកាសចរណ៍ខេមបូឌាអ៊ែរវ៉េរបានចុះហត្ថលេខាជាផ្លូវការលើកិច្ចព្រមព្រៀងសហប្រតិបត្តិការរយៈពេលវែងដើម្បីដាក់ដំណើរការផ្លូវហោះហើរភ្នំពេញ⇌ជាយ៉ាង។ ជើងហោះហើរត្រង់ទៅមករវាងទីក្រុងភ្នំពេញប្រទេសកម្ពុជា និងទីក្រុងជាយ៉ាងប្រទេសចិន នឹងចាប់ផ្តើមដំណើរការជាលើកដំបូងនៅដើមឆ្នាំ 2024នេះ។

ដំណាក់កាលដំបូងនៃការដាក់ដំណើរការផ្លូវហោះហើរភ្នំពេញ⇌ជាយ៉ាង នឹងមានកាលវិភាគហោះហើរជាទៀងទាត់ពីរដងក្នុងមួយសប្តាហ៍ នៅរៀងរាល់ថ្ងៃអង្គារ និងថ្ងៃសៅរ៍។ ជើងហោះហើរចេញដំណើរពីភ្នំពេញទៅជាយ៉ាង គ្រោងនឹងចាកចេញនៅម៉ោង 8:05 ព្រឹក ហើយមកដល់អាកាសយានដ្ឋានអន្តរជាតិជាយ៉ាងឆាវសាន នៅម៉ោង 12:00ថ្ងៃត្រង់ (ម៉ោងក្នុងស្រុក)។ ជើងហោះហើរពីជាយ៉ាងត្រលប់មកភ្នំពេញវិញ គ្រោងហោះចេញនៅម៉ោង 13:00រសៀល ហើយមកដល់អាកាសយានដ្ឋានភ្នំពេញនៅម៉ោង 15:10រសៀល (ម៉ោងក្នុងស្រុក)។

គួរបញ្ជាក់ផងដែរថា ផ្លូវហោះហើរភ្នំពេញ ⇌ ជាយ៉ាង គឺជាផ្លូវទីពីររបស់ក្រុមហ៊ុនអាកាសចរណ៍ខេមបូឌាអ៊ែរវ៉េដែលហោះហើរទៅកាន់ភាគខាងត្បូងប្រទេសចិនបន្ទាប់ពីផ្លូវហោះហើរភ្នំពេញ⇌ សិនជិន។

បន្ទាប់ពីផ្លូវហោះហើរនេះត្រូវបានដាក់ដំណើរការ វានឹងក្លាយជាផ្លូវអាកាសដែលតភ្ជាប់ប្រទេសកម្ពុជាជាមួយតំបន់ឆាវសាន នៃខេត្តគ័ងតុងប្រទេសចិន ហើយបំពេញតម្រូវការនៃការធ្វើដំណើរជាលក្ខណៈធុរកិច្ច និងទេសចរណ៍រវាងទីតាំងទាំងពីរផងដែរ។

ដោយ: គង់ លាងហួរ
ហាណូយ: យោងតាមប្រភពពីរដ្ឋាភិបាលបានឱ្យដឹងថា GDP របស់ប្រទេសវៀតណាមបានកើនឡើង៥,០៥% ក្នុងឆ្នាំ២០២៣ ដែលទាបជាងគោលដៅមួយភាគរយ ប៉ុន្តែនៅតែវ៉ាដាច់ប្រទេសជាច្រើនផ្សេងទៀត។

បើគិតក្នុងរយៈពេលមួយទសវត្សរ៍កន្លងមកនេះ អត្រាកំណើនខាងលើបានកើនឡើងលើសតែឆ្នាំ២០២០ និងឆ្នាំ២០២១ ដែលជាឆ្នាំរងផលប៉ះពាល់យ៉ាងខ្លាំងដោយសារជំងឺរាតត្បាតប៉ុណ្ណោះ។

យោងតាមសារពត៌មានវៀតណាម VNExpress បានចុះផ្សាយនៅថ្ងៃសុក្រ ទី២៩ ខែធ្នូ ឆ្នាំ២០២៣នេះថា GDP របស់ប្រទេសវៀតណាម នៅក្នុងត្រីមាសទី៤ចុងក្រោយនៃឆ្នាំ២០២៣ បានកើនឡើង៦,៧២% បើធៀបនឹងរយៈពេលដូចគ្នាកាលពីឆ្នាំមុន។

លោក Nguyen Thi Huong អគ្គនាយកនៃការិយាល័យស្ថិតិបានអត្ថាធិប្បាយអំពីលទ្ធផលសេដ្ឋកិច្ចរបស់វៀតណាម ដោយលោកបានគូសបញ្ជាក់ថា វាជាសមិទ្ធិផលគួរឱ្យកត់សម្គាល់ ស្របពេលដែលយើងកំពុងប្រឈមមុខនឹងបញ្ហានានានៅទូទាំងពិភពលោក។

លោកបានបន្តថា “កិច្ចខិតខំប្រឹងប្រែងរបស់ប្រទេសវៀតណាមត្រូវបានបង្ហាញឱ្យឃើញច្បាស់តាមរយៈការកើនឡើងនៃអត្រាកំណើនសេដ្ឋកិច្ចប្រចាំត្រីមាស”។

នៅពេលនេះ GDP របស់វៀតណាមមានទំហំទឹកប្រាក់ចំនួន៤៣០ពាន់លានដុល្លារ ខណៈ GDP សម្រាប់ប្រជាជនវៀតណាមម្នាក់ៗ គឺ៤.២៨៤ដុល្លារក្នុងមួយឆ្នាំ ពោលគឺកើនឡើង៣,៨៨% បើធៀបនឹងឆ្នាំមុន។

សន្ទស្សន៍តម្លៃទំនិញប្រើប្រាស់ ដែលវាស់វែងអតិផរណាបានកើនឡើង៣,២៥% ពោលគឺទាបជាងគោលដៅរបស់រដ្ឋសភាវៀតណាម ដែលបានកំណត់ក្នុងរង្វង់ក្រោម៤% ។

វិស័យសេវាកម្មបានកើនឡើង៦,៨២% ជាមួយនឹងការកើនឡើងនៃការលក់រាយ ការដឹកជញ្ជូន ឡូជីស្ទីក ហិរញ្ញវត្ថុ ធនាគារ និងធានារ៉ាប់រង។

វិស័យឧស្សាហកម្ម និងសំណង់ប្រឈមមុខនឹងបញ្ហា ស្របពេលដែលតម្រូវការធ្លាក់ចុះ ដោយបានកើនឡើងត្រឹមតែ៣,០២% ប៉ុណ្ណោះ។ ចំណែក ការផលិត និងការកែច្នៃបានឈានដល់អត្រាកំណើនទាបបំផុតក្នុងរយៈពេល១៣ឆ្នាំ គឺ៣,៦២% ។

ពាណិជ្ជកម្មបានធ្លាក់ចុះ៦,៦% មកនៅត្រឹមទំហំទឹកប្រាក់៦៩៣ពាន់លានដុល្លារ ដោយសារបញ្ហាប្រឈមសេដ្ឋកិច្ចពិភពលោក ខណៈទឹកប្រាក់អតិរេកពាណិជ្ជកម្មឈានដល់២៨ពាន់លានដុល្លារ៕VNexpress៕

ដោយ: គង់ លាងហួរ
អន្តរជាតិ: អ្នកវិភាគបានព្យាករថា ការលក់អចលនទ្រព្យនៅប្រទេសម៉ាឡេស៊ីនឹងមានភាពប្រសើរឡើងនៅឆ្នាំ២០២៤ ដែលជំរុញដោយទស្សនវិស័យសេដ្ឋកិច្ចកាន់តែប្រសើរឡើង និងការអភិវឌ្ឍន៍គម្រោងហេដ្ឋារចនាសម្ព័ន្ធធំៗ។

ធនាគារ AmInvestment Bank បានឱ្យដឹងតាមរយៈការចេញផ្សាយ របាយការណ៍ថ្មី ថា ចំនួនប្រតិបត្តិការទិញ-លក់ និងទំនុកចិត្តនៅក្នុងវិស័យអចលនទ្រព្យរបស់ប្រទេសម៉ាឡេសុីនឹងមានការងើបឡើងវិញបន្តិចម្តងៗក្នុងឆ្នាំ២០២៤។

ធនាគារខាងលើបន្តថា ការស្ទុះងើបឡើងវិញនេះ បណ្តាលមកពី ការព្យាករណ៍កំណើនសេដ្ឋកិច្ចម៉ាឡេសុី ក្នុងរង្វង់៤,៥ភាគរយ ការស្តារទីផ្សារការងារ ការស្ថាបនាគម្រោងហេដ្ឋារចនាសម្ព័ន្ធធំៗ និងការផ្តួចផ្តើមរបស់រដ្ឋាភិបាលក្នុងការអភិវឌ្ឍន៍រដ្ឋ Johor ដែលមានព្រំប្រទល់ជាប់ប្រទេសសិង្ហបុរី។

ការផ្គត់ផ្គង់លើសតម្រូវការនៅលើទីផ្សារអចលនទ្រព្យរបស់ប្រទេសម៉ាឡេសុី ក៏ត្រូវបានគេរំពឹងថា នឹងបន្ធូរបន្ថយបន្តិចម្តងៗ ហើយទំនុកចិត្តរបស់វិនិយោគិននឹងមានភាពប្រសើរឡើង។

យោងតាមការស្រាវជ្រាវរបស់ធនាគារវិនិយោគ RHB ដែលមានមូលដ្ឋាននៅទីក្រុងគូឡាឡាំពួ បានបង្ហាញថា ការលក់អចលនទ្រព្យនៅប្រទេសម៉ាឡេស៊ីត្រូវបានគេរំពឹងថា នឹងកើនឡើងចន្លោះពី១០ ទៅ១៥ភាគរយនៅឆ្នាំក្រោយ។

ធនាគារបានបន្តថា ការសម្រេចបានកំណើនតម្លៃលក់អចលនទ្រព្យសរុបក្នុងរង្វង់៩ភាគរយ ក្នុងរយៈពេល៩ខែដំបូងដើមឆ្នាំនេះ បើប្រៀបធៀបទៅនឹងរយៈពេលដូចគ្នាកាលពីឆ្នាំមុន បង្ហាញឱ្យឃើញពីតម្រូវការដែលមានសុខភាពល្អសម្រាប់អចលនទ្រព្យក្នុងស្រុក។

ធនាគារ RHB បានបន្ថែមទៀតថា ការបន្ធូរបន្ថយតម្រូវការសម្រាប់កម្មវិធី Malaysia My Second Home (MM2H) ក៏ត្រូវបានរំពឹងថា នឹងជំរុញឱ្យជនបរទេសទិញអចលនទ្រព្យនៅក្នុងប្រទេសម៉ាឡេស៊ីផងដែរ។

ធនាគារក៏បានបន្ថែមដែរថា ទំនុកចិត្តលើវិស័យអចលនទ្រព្យរបស់ប្រទេសម៉ាឡេស៊ីត្រូវបានជះឥទ្ធិពលជាវិជ្ជមានដោយការអភិវឌ្ឍន៍ដ៏អំណោយផលលើគម្រោងរថភ្លើងល្បឿនលឿន Kuala Lumpur-Singapore និងគម្រោងផ្លូវដែកធុនស្រាល Penang៕Xinhua៕

ដោយ: គង់ លាងហួរ

អន្តរជាតិ: ស្ពាន Huajiang Grand Canyon ក្នុងខេត្ត Guizhou ភាគនិរតីនៃប្រទេសចិន ដែលបច្ចុប្បន្នកំពុងស្ថិត ក្រោមការសាងសង់ និងជាស្ពានខ្ពស់បំផុតរបស់ពិភពលោក ត្រូវបានគេរំពឹងថា នឹងបញ្ចប់នៅខែមិថុនា ឆ្នាំ២០២៥។ នេះបើយោងតាមសន្និសីទសារព័ត៌មានដែលបានរៀបចំឡើងកាលពីថ្ងៃពុធ។

គិតមកទល់ពេលបច្ចុប្បន្ន ការសាងសង់ស្ពានខាងលើសម្រេចបានវឌ្ឍនភាព៥០% បន្ទាប់ពីការសាងសង់ត្រូវបានចាប់ផ្តើម នៅក្នុងជ្រលងជ្រោះដ៏ជ្រៅមួយ នៅភាគនិរតីនៃទីក្រុង Guizhou កាលពីជិត២ឆ្នាំមុន។

ស្ពានយោងដោយខ្សែកាបនេះ នឹងក្លាយជាផ្នែកមួយនៃផ្លូវល្បឿ​ន​​​លឿនក្នុងទីក្រុងGuizhou ដែលមានកម្ពស់៦២៥ម៉ែត្រ ពីបាតជ្រលងភ្នំរហូតដល់ស្ពាន និងមានប្រវែង២.៨៩០ម៉ែត្រ។ ក្រោយបើកដាក់ឱ្យដំណើរការ ស្ពាននេះនឹងជួយកាត់បន្ថយពេលវេលាឆ្លងកាត់ជ្រលងភ្នំយ៉ាងច្រើន ពីប្រហែល៧០នាទីមកនៅសល់ត្រឹមតែប្រហែលមួយនាទីប៉ុណ្ណោះ។

យោង​តាម​សន្និសីទ​សារព័ត៌មាន​ ដែល​រៀបចំ​ឡើង​ដោយ​រដ្ឋបាល​ខេត្ត​ Guizhou បាន​ឲ្យ​ដឹង​ថា សំណុំ​នៃ​កម្មវិធីធ្វើដំណើរកម្សាន្ត និងកម្មវិធីដើរទស្សនាមើលទេសភាព និងទិដ្ឋភាពស្ពានកំពុង​ត្រូវ​បាន​គ្រោងទុក។ ដោយសារមានទីតាំង ស្ថិត​នៅ​ក្នុង​ចន្លោះកូនភ្នំតូចៗ និង​ជ្រលង​ភ្នំ ខេត្ត Guizhou ជា​ខេត្តមួយដែលសម្បូរទៅដោយស្ពានខ្ពស់ៗ ដោយខេត្តនេះ មានស្ពានជិត៥០ខ្សែ ដែលស្ថិតក្នុងចំណោមស្ពានខ្ពស់បំផុតទាំង១០០នៅលើពិភពលោក។

បច្ចុប្បន្ន ស្ពាន Beipanjiang ដែលស្ថិតនៅព្រំដែនរវាងខេត្ត Guizhou និងខេត្ត Yunnan គឺជាស្ពានខ្ពស់បំផុតរបស់ពិភពលោក ដែលមានកម្ពស់ ប្រហែល៥៦៥ម៉ែត្រពីលើជ្រលងភ្នំ ដោយស្មើនឹងកម្ពស់អគារ២០០ជាន់៕Xinhua៕

        ដោយៈ ហ្វីអូណា

        សៀមរាបៈ  រដ្ឋបាល​ខេត្ត​សៀមរាប​ ​បាន​រៀបចំ​នីតិវិធី​ស្នើ​ទៅ​ក្រ​សួងមហាផ្ទៃ​ ​ដើម្បី​បង្កើត​រដ្ឋបាល​ក្រុង​ថ្មី​ ​ដែល​ត្រូវ​កាត់​យក​ឃុំ​ចំនួន​ពីរ​របស់​ស្រុក​បន្ទាយស្រី​ ​និង​ស្រុក​ប្រាសាទ​បាគង​ ​សម្រាប់​អភិវឌ្ឍ​ប្រែក្លាយ​ទៅជា​ទីក្រុង​គំរូ​របស់​ខេត្ត​។​​

ការ​ស្នើ​បង្កើត​តំបន់​រុន​តា​ឯក​ ​ទៅជា​ទីក្រុង​ថ្មី​របស់​រដ្ឋបាល​ខេត្ត​ ​បន្ទាប់ពី​សម្តេចធិបតី​ហ៊ុន​ ​ម៉ា​ណែ​តនាយករដ្ឋមន្រ្តី​នៃកម្ពុជាបាន​ ​ណែ​នាំ​ក្រសួង​រៀបចំ​ដែនដី​ ​ន​គ​រូប​នី​យ​កម្ម​ ​និង​សំណង់​ ​ក្រសួង​កសិកម្ម​ ​រុក្ខា​ប្រមាញ់​ ​និង​នេសាទ​ ​ក្រសួង​ទេសចរណ៍​ ​និង​ក្រសួងការងារ​និង​បណ្តុះបណ្តាល​វិជ្ជាជីវៈ​ ​លើក​ក​ម្ពស់​សេដ្ឋកិច្ច​ ​និង​បង្កើត​ការងារ​ក្នុង​តំបន់​រុន​តា​ឯក​ ​ដើម្បី​ប្រែក្លាយ​ទៅ​ជា​តំបន់​អភិវឌ្ឍ​ន៍ថ្មី ​សម្រាប់​អ្នក​ជំនាន់​ក្រោយ​។​ក្នុង​ពិធី​បិទ​សន្និបាត​បូកសរុប​លទ្ធផល​ការងារ ​ឆ្នាំ​២០២៣​ ​និង​លើក​ទិសដៅ​ការងារ​ឆ្នាំ​២​០​២​៤​ ​របស់​រដ្ឋបាល​ខេត្ដ​សៀមរាប​ ​កាលពី​ថ្ងៃចន្ទ​ ​ដល់​ថ្ងៃអង្គារ​ ​លោក​ ​ប្រាក់​ ​សោភ័ណ​ ​អភិបាល​ខេត្ដ​សៀមរាប​ ​បាន​ឱ្យ​ដឹង​ថា​ ​រដ្ឋបាល​ខេត្ត​បាន​រៀបចំ ​ស្នើសុំ​ទៅ​ក្រសួងមហាផ្ទៃ​ ​ដើម្បី​បង្កើត​រដ្ឋបាល​ក្រុង​ថ្មី​ ​ដែល​មាន​ឈ្មោះ​ថា​ ​ក្រុង​រុន​តា​ឯក​ តេជោ​សែន​។​លោកបន្ត​ថា “​ការ​បង្កើត​ឱ្យ​មាន​ក្រុង​ថ្មី​ (​ក្រុង​រុនតាឯក​ តេជោ​សែន​) ​ដោយ​កាត់​យក​ឃុំ​ចំនួន​ពីរ​ ​គឺ​ឃុំ​រុន​តា​ឯក​ ​នៃ​ស្រុក​បន្ទាយស្រី​ ​និង​ឃុំ​ប​ល្ល័ង្គ ​នៃ​ស្រុក​ប្រាសាទ​បាគង​”។​

លោក​បន្ត​ថា​ ​រដ្ឋបាល​ខេត្ត​ ​ក៏បាន​រៀបចំ​សេវា​ដឹកជញ្ជូន​សាធារណៈ​តាមរយៈ​រថយន្តក្រុង ​របស់​រដ្ឋបាល​ខេត្ត​ ​ដោយ​ដឹក​ជញ្ជូន​ប្រជាពលរដ្ឋ​ឥត​គិតថ្លៃ​ទាំង​ទៅ ​និង​មក​ពី​តំបន់​អភិវឌ្ឍន៍​រុន​តា​ឯក​ ​និង​ក្រុង​សៀមរាប​ ​ដែល​នឹង​ដាក់​ឱ្យ​ដំណើរការ​ជា​ផ្លូវការ ​នៅដើម​ឆ្នាំ​២​០​២​៤​ ​ខាងមុខ​។​លោក​បញ្ជាក់​ថា​ ​ក្នុង​ដំណាក់កាល​ទី​៣​ ​រដ្ឋាភិបាល​បាន​ផ្តល់​ដី​ឡូ​តិ៍​ចំនួន​​១,​​១​២​៦​ឡូ​តិ៍ ដើមី្ប​ដោះស្រាយ​ជូន​ប្រជាពលរដ្ឋ ​ដែល​រស់នៅ​តាម​ចំណី​ស្ទឹង​សៀមរាប​ ​និង​ដំណាក់កាល​ទី​៤​ ​រដ្ឋាភិបាល​បាន​ផ្តល់​ជូន​ដល់​ប្រជាពលរដ្ឋ​ស្ម័គ្រចិត្ត ​ចាក​ចេញ​ពី​តំបន់​រមណីយដ្ឋាន​អង្គរ​ ​គឺ​មាន​ដី​ឡូ​តិ៍​ចំនួន​៥,​​៨​៦​៥​។​

លោក​ ​ប្រាក់​ ​សោភ័ណ​បាន​បន្ថែម​ថា​ ​បច្ចុប្បន្ន​ក្រុម​ការងារ​បាន​រៀបចំ​ហេ​ដ្ឋា​រចនា​ស​ម្ព័ន្ធ​ផ្លូវ​ ​ថ្នល់​ ​ប្រព័ន្ធ​ទឹក​កខ្វក់​ ​ប្រព័ន្ធ​ទឹក​ស្អាត​ ​បណ្តាញ​អគ្គិសនី​ ​សាលា​ស្រុក​ ​សាលា​រៀន​ ​មន្ទីរពេទ្យ​ ​វត្តអារាម​ ​ផ្សារ​លក់ដូរ​ ​និង​ប៉ុស្តិ៍​នគរបាល​រដ្ឋបាល​ផង​ដែរ​។​

ជាមួយគ្នានេះ លោក​ ​ប្រាក់​ ​សំអឿន​ ​រដ្ឋលេខាធិការ​ក្រសួងមហាផ្ទៃ​បាន​ឱ្យ​ដឹង​ថា​​ក្រោយ​ពី​ប្រជាពលរដ្ឋ​បាន​ដឹង ​ពី​គម្រោង​បង្កើត​ក្រុង​ថ្មី​បែប​នេះ​ ​ពួក​គេ​បាន​ត្រេកអរ​ ​និង​សាទរ​ដែល​តំបន់​ក្នុង​ភូមិសាស្ត្រ​ភូមិ​ឃុំ​ របស់​ពួកគាត់​បាន​ក្លាយទៅ​ជា​ក្រុង​ ​ដែល​ធ្វើ​ឱ្យ​ដីធ្លី​កាន់តែ​មាន​តម្លៃ​ខ្ពស់​ ​ដូច​នៅ​ក្រុង​សៀមរាប​ដែរ​។​

លោក​បន្ថែម​ថា​ ​តាម​ការពិនិត្យ​ទៅលើ​ឃុំ​ចំនួន​បី​ ​គឺ​មាន​តែ​ឃុំ​ចំនួន​ពីរ​តែប៉ុណ្ណោះ​ ​ដែល​អាច​បង្កើត​ជា​ក្រុង​បាន​ ​នោះ​គឺ​មាន​ ​ឃុំ​រុន​តា​ឯក​ ​ដែល​បច្ចុប្បន្ន​ជា​ឃុំ​របស់​ស្រុក​បន្ទាយស្រី​ ​និង​ឃុំ​ប​ល្ល័ង្គ ​ជា​ឃុំ​របស់​ស្រុក​ប្រាសាទ​បាគង​ ​ដែល​មាន​ហេដ្ឋារចនាសម្ពន្ធ​សមស្រប​ទៅ​នឹង​នីតិវិធី​នៃ​ការ​បង្កើត​ទីក្រុង​ថ្មី​។​រដ្ឋលេខាធិការ​ក៏បាន​ជំរុញ​ ​និង​ណែនាំ​ដល់​អាជ្ញាធរ​ខេត្ត​ ​ត្រូវ​ធ្វើ​ការពិភាក្សា​ឱ្យ​បាន​ជាក់លាក់​ ជាមួយ​ក្រុម​ប្រឹក្សា​ខេត្ត​ ​ដើម្បី​ដាក់ឈ្មោះ​ទីក្រុង​ថ្មី​នេះ​ ដើមី្ប​ដាក់​ជូន​រដ្ឋាភិបាល​ ​និង​ស្មើ​សុំ​ទៅ​រដ្ឋសភា​សម្រេច​ជា​ផ្លូវការ​។​

លោក​ ​ប្រាក់​ ​សំអឿន​ ​បញ្ជាក់​ថា​ ​តំបន់​រុន​តា​ឯក​នេះ​ ​ក៏​ជា​សក្តានុពល​នៃ​វិ​ស័យ​ទេសចរណ៍​មួយ​របស់​ខេត្ត​សៀមរាប​ ​ក្នុង​ការ​ទាក់ទាញ​ភ្ញៀវ​ទេសចរ​ជាតិ​ ​និង​អន្តរជាតិ​ ​ដើម្បី​ចូល​ទៅ​ក​ម្សាន្ត ​ហើយក៏​ជា​ប្រភព​ចំណូល​សេដ្ឋកិច្ច​របស់​ប្រជាពលរដ្ឋ​ផង​ដែរ​។​

ចំណែកលោកស្រី​ ​ឈួន​ ​អ៊ឹម​ ​មេឃុំ​រុន​តា​ឯក​បានមានប្រសាសន៍ឲ្យដឹងផងដែរថា បច្ចុប្បន្ន​ជីវភាព​ប្រជាពលរដ្ឋ ​មិន​ទាន់​មាន​ភាព​ល្អ​ប្រសើរ​នោះ​ទេ​ ​ដោយសារ​តំបន់​រុន​តា​ឯក​ ​កំពុង​ស្ថិត​ក្នុង​ការ​អភិវឌ្ឍ​ ​និង​ពុំទាន់​មាន​ការងារ​ធ្វើ​សម្រាប់​ប្រជាពលរដ្ឋ​ ​ដូច្នេះ​ពួក​គេ​មួយ​ចំនួន​បាន​ទៅ​ប្រកប​មុខ​របរ​ នៅ​កន្លែង​ដែល​ខ្លួន​ធ្លាប់​រស់​នៅ​មួយ​រយៈ​សិន​។​

លោកស្រី​បញ្ជាក់​ថា​ “​មួយ​ស​ប្ដាហ៍ ​ឬ​ពីរ​ស​ប្ដាហ៍ ​ទើប​ពួក​គាត់​បាន​មក​សម្រាក​នៅផ្ទះ​ម្ដង​ ​ប៉ុន្តែ​អ្នក​ខ្លះ​គាត់​ប្រកប​មុខរ​បរ​នៅ​ក្នុង​ភូមិ​នេះ​ស្រាប់​ ​ហើយ​អ្នកខ្លះ​ទុក​ផ្ទះ​ចោល​ ​ប៉ុន្តែ​មិនមែន​ទៅ​ទាំងអស់គ្នា​នោះ​ទេ​។​ ​គាត់​ទុក​កូនក្មេង​ ​ឬ​មនុស្ស​ចាស់​ ​ដើម្បី​ឱ្យ​នៅ​ចាំផ្ទះ”​។​

លោកស្រី​​ឈួន​ ​អ៊ឹម​ បាន​បន្ថែម​ថា​ ​បច្ចុប្បន្ន​ភាគី​ពាក់ព័ន្ធ​បាន​បង្កើត​ផ្សារ ​ក្នុង​តំបន់​រុន​តា​ឯក​​បាន​ប្រហែល​៩​០​% ​ប៉ុន្តែ​សាលារៀន​ដាក់​ឱ្យ​ដំណើរការ​បានជា​ង​ពីរ​ឆ្នាំ​ ​ខណៈ​មន្ទីរពេទ្យ​បាន​បើក​ឱ្យ​ដំណើរការ​បាន​ប្រមាណ​​៦​ខែ​ហើយ​។​ បច្ចុប្បន្ន​ប្រជាពលរដ្ឋ​រស់នៅ​ក្នុង​ឃុំ​រុន​តា​ឯក​ ​ទាំង​អ្នក​រស់នៅ​ចាស់​ ​និង​ទាំង​អ្នក​រស់នៅ​ថ្មី​ ​គឺ​មាន​ចំនួន​៦​៧​១​១​គ្រួសារ៕

        ដោយៈ គង់ ហ្វីអូណា

        ភ្នំពេញៈ ​ការសិក្សាថ្មីរបស់សាជីវកម្ម​ហិរញ្ញវត្ថុ​អន្តរជាតិ​ (IFC) បាន​បង្ហាញ​ថា​ ​ការ​កែ​លម្អ​លទ្ធភាព​ទទួល​បាន ​ហិរញ្ញប្បទាន​ពាណិជ្ជកម្ម​ដែល​មាន​តម្លៃ​សមរម្យ​ ​ដែល​ទី​ផ្សារ​ក្នុងស្រុក​ក្នុង​ប្រទេស​កម្ពុជា​មាន​ចំនួន​១​,​៦​ ​ប៊ី​លាន​ដុល្លារ​ ​អាច​បង្កើន​ការនាំចូល​ ​និង​ការនាំចេញ​របស់​ប្រទេស​រហូតដល់​​៩​​ភាគរយ​។​

នៅ​ក្នុង​ប្រទេស​កម្ពុជា​ ​ឡាវ​ ​និង​វៀតណាម​ ​ហិរញ្ញវត្ថុ​ពាណិជ្ជកម្ម​ក្នុងស្រុក​ ​មិន​ត្រឹមតែ​ត្រូវ​បាន​ប្រើប្រាស់​តិចតួច​ប៉ុណ្ណោះ​ទេ​ ​ប៉ុន្តែ​ថែមទាំង​ជា​លក្ខណៈ​ប្រពៃណី​ ​បែងចែក​ ​និង​មាន​តម្លៃ​ថ្លៃ​ផង​ដែរ​។​ របាយការណ៍​កត់​សម្គាល់​ថា​ ​ការ​បង្កើន​ការ​គ្របដណ្តប់​គឺ​មាន​សារៈសំខាន់​ជាង ​ការ​កាត់បន្ថយ​ថ្លៃ​ដើម ​ហិរញ្ញប្បទាន​ពាណិជ្ជកម្ម​។​នេះ​ជា​ការសិក្សា​លើក​ទីពីរ ​នៅ​ក្នុង​ការស្ទង់មតិ​ហិរញ្ញវត្ថុ​ពាណិជ្ជកម្ម​ក្នុង​តំបន់​ជាបន្តបន្ទាប់​ ​បាន​វិភាគ​ប្រព័ន្ធ​អេកូ​ឡូ​ស៊ី​ហិរញ្ញវត្ថុ​ពាណិ​ជ្ជកម្ម​ក្នុង​តំបន់​ ​និង​ផ្តល់​នូវ​ការយល់​ដឹង​អំពី​របៀប ​ដែល​អ្នកនាំ​ចូល​ ​និង​អ្នកនាំ​ចេញ​ ​អាច​បង្កើន​ពាណិជ្ជកម្ម​អន្តរជាតិ​ ជាមួយនឹង​ការ​គាំទ្រ​ប្រសើរ​ឡើង​ពី​ស្ថាប័ន​ហិរញ្ញវត្ថុ​។​មុខងារ​នៃ​ហិរញ្ញវត្ថុ​ពាណិជ្ជកម្ម​ ​គឺ​ដើម្បី​ណែនាំ​ភាគី​ទីបី​ចំពោះ​ប្រតិបត្តិការ​ ​ដើម្បី​ដកចេញ​នូវ​ហា​និ​ភ័យ​នៃ​ការ​ទូទាត់​ ​និង​ការ​ផ្គត់ផ្គង់​។​

ឧបករណ៍​ហិរញ្ញវត្ថុ​ពាណិជ្ជកម្ម​សំខាន់​ៗ​ នៅ​ក្នុង​ប្រទេស​កម្ពុជា​គឺ​ ​លិខិត​ឥណទាន​ ​ការធានា​ ​និង​បញ្ជរ​ធានា​ ​លិខិត​រង់ចាំ​ឥណទាន​ ​ការ​ប្រមូល​ឯកសារ​ ​ការ​ដេញថ្លៃ​ ​ឬ​ប័ណ្ណ​ប្រតិបត្តិការ​ ​ទុន​ធ្វើការ​ទូទៅ​ដែល​ប្រើ​សម្រាប់​ពាណិជ្ជកម្ម​ ​ហិរញ្ញប្បទាន​ក្រោយ​ការ​​​ដឹកជញ្ជូន​ ​ហិរញ្ញប្បទាន​នាំចូល​ឧបករណ៍​ ​ហិរញ្ញប្បទាន​មុន​ការនាំចេញ​ ​ការ​ផ្តល់​​ហិរញ្ញប្បទាន​ខ្សែ​ច្រ​វ៉ា​ក់​ផ្គត់ផ្គង់​ ​ទម្រង់​ផ្សេងទៀត​នៃ​ហិរញ្ញប្បទាន​នាំចូល​ ​និង​ការ​ផ្តល់​ជូន​ពិសេស​សម្រាប់​ការ​ប្រែប្រួល​អាកាសធាតុ​។​

ការសិក្សា​នេះ​បង្ហាញ​ថា​ ​កំណើន​ពាណិជ្ជកម្ម​ក្នុង​តំបន់​មេគង្គ​-​៣​ ​កម្ពុជា​ ​ឡាវ​ ​និង​វៀតណាម​ ​មាន​ភាព​មិន​ស្មើគ្នា​។​ ​ការនាំចេញ​ពី​ក្រុមហ៊ុន​ដែល​គ្រប់គ្រង​ដោយ​បរទេស​ ​បាន​វ៉ា​ដាច់​ពី​ខ្សែ​ច្រ​វ៉ា​ក់​ផ្គត់ផ្គង់​ក្នុងស្រុក​ ​ដែល​បង្ហាញ​ថា​ហិរញ្ញវត្ថុ​ពាណិជ្ជកម្ម ​ក្នុងស្រុក​មិន​ត្រឹមតែ​ត្រូវ​បាន​ប្រើប្រាស់​តិចតួច​ប៉ុណ្ណោះ​ទេ​ ​ប៉ុន្តែ​ថែមទាំង​មាន​លក្ខណៈ​ប្រពៃ​ណី​ ​បែងចែក​ ​និង​មាន​តម្លៃ​ថ្លៃ​ផង​ដែរ​។​

ធនាគារ​ក្នុងស្រុក​បាន​គាំទ្រ​ ត្រឹមតែ​​២​១​ភាគរយ ​នៃ​ការនាំចេញ​ ​និង​នាំចូល​របស់​វៀតណាម ​កាលពីឆ្នាំមុន​។​ ​នៅ​កម្ពុជា​ ​និង​ឡាវ​ ​តួលេខ​នោះ​មាន​តិច​ជាង​​៣​ភាគរយ​។​ តម្រូវ​ការ​វត្ថុ​បញ្ចាំ​ខ្ពស់​ ​និង​ដំណើរការ​ដាក់ពាក្យ​សុំ​ ដែល​មាន​ភាព​ស្មុគ​ស្មាញ​ ​គឺ​ជាហេតុ​ផល​ចម្បង​ ដែល​លើកឡើង​ថា​ហេតុអ្វីបានជា​ពាណិជ្ជករ​ មិន​ស្វែងរក​ការ​គាំទ្រ​ពី​ធនាគារ​ក្នុងស្រុក​ ​នេះ​បើ​យោង​តាម​របាយការណ៍​នៅ​ក្នុង​សារ​ព័ត៌មាន​កម្ពុជា​។​

ការសិក្សា​បាន​ផ្តល់​អនុសាសន៍ ​ឱ្យ​បង្កើត​ឧបករណ៍ ​ដូចជា​ ​ខ្សែ​ច្រ​វ៉ា​ក់​ផ្គត់ផ្គង់​ហិរញ្ញវត្ថុ​ ​និង​ការ​ផ្តល់​ជូន​ន​វា​នុ​វត្ត​ន៍​ឌី​ជី​ថល​ ​ដើម្បី​កាត់បន្ថយ​ការ​ចំណាយ​ ​និង​កែ​លម្អ​លទ្ធភាព​ប្រើប្រាស់​។​ ​នេះ​តម្រូវ​ឱ្យ​មាន​ក្របខ័ណ្ឌ​បទ​ប្បញ្ញត្តិ​ដែល​រឹង​មាំ​ជាង​មុន​ ​ដែល​ដោះស្រាយ​តម្រូវ​ការ​វត្ថុ​បញ្ចាំ​ ​ប្រតិបត្តិការ​ឌី​ជី​ថល​ ​លក្ខខណ្ឌ​ធនាគារ​កណ្តាល​ ​និង​ក្រប​ខ័ណ្ឌ​គណនេយ្យ​ភាព​។​ វាក៏​ណែនាំ​ផង​ដែរ​អំពី​ការ​បង្កើន​ការ យល់​ដឹង​អំពី​របៀប​ទទួល​បាន​ហិរញ្ញប្បទាន​ពាណិជ្ជកម្ម​ ក្នុងចំណោម​ក្រុមហ៊ុន​តូច​ៗ​ ​និង​អ្នកផ្គត់ផ្គង់​ក្នុងស្រុក​។​

ប្រទេស​វៀតណាម​មាន​ភាព​ចម្រុះ​ជាង​កម្ពុជា ​ក្នុង​ការនាំចូល​ ​និង​នាំចេញ​។​ ​ប្រទេស​កម្ពុជា​ពឹងផ្អែក​យ៉ាង​ខ្លាំង ​លើ​ឧស្សាហកម្ម​កាត់​ដេរ​ ​និង​វាយនភណ្ឌ​របស់​ខ្លួន​ ​ដែល​រួម​មាន​ជិត​ពាក់កណ្តាល​នៃ​ការនាំចេញ​របស់​ខ្លួន​ ​ជាមួយនឹង​គ្រឿងម៉ាស៊ីន​ ​និង​ទំនិញ​ប្រើប្រាស់​ផ្សេងទៀត​ ​បង្កើត​បានជា​ចំណែក​ដែល​នៅសល់​។​

របាយការណ៍​បាន​បន្ថែម​ថា​ ​កម្ពុជា​ ​និង​វៀតណាម​បាន​បង្កើត​ ‘​ការ​បោះជំហាន​គួរ​ឱ្យ​កត់​សម្គាល់​’ ​ក្នុង​ការពង្រីក​ទី​ផ្សារ​នាំចេញ​របស់​ខ្លួន​ ​ដោយ​សម្រេច​បានការ​ជ្រៀតចូល ​ការនាំចេញ​ខ្ពស់​ជាង​មុន​។​ ​ប្រទេស​ឡាវ​ ក៏បាន​បង្កើន​ការ​ជ្រៀតចូល ​ការនាំចេញ​របស់​ខ្លួន​បន្តិចបន្តួច​ផង​ដែរ​៕