ដោយៈ គង់ ហ្វីអូណា

        ភ្នំពេញៈ ក្រុមហ៊ុនធំៗថ្មីចំនួន២ទៀត គ្រោងបោះទុនវិនិយោគជាង១០០០លានដុល្លារនៅកម្ពុជា​ លើការផលិតសំបកកង់ឡានដើម្បីនាំទៅរបរទេស ខណៈបច្ចុប្បន្នមានក្រុមហ៊ុនមួយចំនួនហើយកំពុងផលិតសំបកកង់ឡាន​នាំទៅលក់នៅទីផ្សារអឺរ៉ុប។

ថ្មីៗនេះកម្ពុជាកំពុងទាក់ទាញក្រុមហ៊ុន២ទៀត ដែលគ្រោង បោះទុនវិនិយោគលើ ការផលិតសំបកកង់ឡាននៅកម្ពុជា សម្រាប់នាំយកទៅលក់នៅទីផ្សារអន្តរជាតិដែរ។

សម្តេចនាយករដ្ឋមន្ត្រី ហ៊ុន​ ម៉ាណែត បានថ្លែងបែបនេះ នៅថ្ងៃ ទី​២៨មេសា ឆ្នាំ២០២៤ ក្នុងឱកាសខួបអនុស្សាវរីយ៍លើកទី១៣៨ នៃទិវាពលកម្មអន្តរជាតិ ១ឧសភា។

សម្តេច​​បន្តថា ក្រុមហ៊ុនចំនួន២ទៀត ដែលគ្រោងបោះទុនវិនិយោគនៅកម្ពុជានោះ គឺមានក្នុងទំហំទឹកប្រាក់១០០០លានដុល្លារ។ ក៏ប៉ុន្តែនៅក្នុងដំណាក់កាលទី១ ក្រុមហ៊ុន គ្រោងបោះទុនវិនិយោគក្នុងចំនួន៥០០លានដុល្លារសិន។

ជាមួយគ្នានេះ សម្តេច ហ៊ុន ម៉ាណែតបានណែនាំក្រុមហ៊ុនរោងចក្រផលិតសំបកកង់រថយន្តនោះ ចាប់ដៃសហការ ជាមួយសមាគមជ័រកៅស៊ូដើម្បីគាំទ្រដំណាំកៅស៊ូនៅកម្ពុជា។

សម្តេចបន្តថា “ក្នុងអាណត្តិដែលខ្ញុំដឹកនាំ ខ្ញុំនឹងបន្តជំរុញឱ្យកាន់​តែមុតស្រួច នៅក្នុងការបង្កើននូវលទ្ធភាពបែបនេះ ជូនប្រជាជនរបស់យើង”។

យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា(CDC) បានបង្ហាញថា ក្នុង១ត្រីមាស ឆ្នាំ២០២៤ កម្ពុជា ទទួលបានគម្រោងវិនិយោគចំនួន១០៦គម្រោង ដែលមានទុនប្រមាណ២ ២០០លានដុល្លារ។ ក្នុងនោះខេត្តកំពង់ស្ពឺ និងស្វាយរៀង មាន​រហូតដល់​ទៅ​៤៩គម្រោង។CDC បានបញ្ជាក់ថា គម្រោងទាំង១០៦នេះ អាចបង្កើតការងារឱ្យពលរដ្ឋបានជាង១០៧ពាន់កន្លែង៕

ដោយ: គង់ លាងហួរ

សេអ៊ូល: ការនាំចេញរបស់ប្រទេសកូរ៉េខាងត្បូង បានកើនឡើងយ៉ាងឆាប់រហ័ស  បើទោះបីជាការប្រើប្រាស់ឯកជន និងការវិនិយោគ នៅតែបន្តធ្លាក់ចុះយ៉ាងណាក្តី។

វិទ្យាស្ថានអភិវឌ្ឍន៍កូរ៉េ (KDI) បានសរសេរនៅក្នុងរបាយការណ៍វាយតម្លៃសេដ្ឋកិច្ច ប្រចាំខែមេសារបស់ខ្លួន ថា “សេដ្ឋកិច្ចកូរ៉េកំពុងជួបប្រទះ នឹងការធ្លាក់ចុះក្នុងកម្រិតមធ្យម ដែលត្រូវបានជំរុញដោយកំណើនយ៉ាងឆាប់រហ័សនៃការនាំចេញ ជាពិសេសពីវិស័យព័ត៌មានវិទ្យា”។

របាយការណ៍ដដែលបានបន្តថា “ប៉ុន្តែការប្រើប្រាស់នៅតែធ្លាក់ចុះ ជាពិសេសគឺការប្រើប្រាស់ ឬការទិញទំនិញ ខណៈលក្ខខណ្ឌហិរញ្ញប្បទានមិនមានភាពប្រសើរឡើង ដោយសារអត្រាការប្រាក់កំពុងបន្តស្ថិតក្នុងកម្រិតខ្ពស់នៅឡើយ”។ការវាយតម្លៃចុងក្រោយបំផុត នៅមេសាអំពីការនាំចេញ បានបង្ហាញសញ្ញាវិជ្ជមានជាងការវាយតម្លៃ ដែលបានធ្វើឡើងកាលពីខែមីនាកន្លងទៅ ប៉ុន្តែវិទ្យាស្ថានខាងលើ ក៏បានចង្អុលបង្ហាញផងដែរថា តម្រូវការក្នុងស្រុក បានធ្លាក់ចុះក្នុងរយៈពេល៥ខែជាប់ៗគ្នា។

នៅខែមីនា ការនាំចេញ ដែលជាក្បាលម៉ាស៊ីននៃកំណើនសេដ្ឋកិច្ចដ៏សំខាន់ បានកើនឡើង៣,១ភាគរយ បើធៀបនឹងឆ្នាំមុន និងកត់សម្គាល់ពីការកើនឡើងរយៈពេល៦ខែជាប់ៗគ្នា។

ប៉ុន្តែវិទ្យាស្ថាន KDI បានកត់សម្គាល់ឃើញថា ការបញ្ជាការសាងសង់  ដែលជាសូចនាករដ៏សំខាន់បំផុត នៃស្ថានភាពឧស្សាហកម្មបានបន្តដាំក្បាលចុះ ដែលការណ៍នេះបង្ហាញថា ការវិនិយោគនៅក្នុងវិស័យសំណង់បាននិងកំពុងធ្លាក់ចុះ។

របាយ​ការណ៍​ខាងលើបាន​បង្ហាញ​ទៀតថា​ “កត្តា​ហានិភ័យ​ខាង​ក្រៅ​នៅ​តែបន្តកើតមាន​ ដូច​ជា​ ការ​កើន​ឡើង​នៃតម្លៃ​ប្រេង​នៅលើទីផ្សារអន្តរជាតិ និង​ការ​រំខាន​ដល់​ការ​ដឹក​ជញ្ជូន ​ដែល​បង្ក​ឡើង​ដោយ​ភាព​តានតឹង​ភូមិសាស្ត្រ​នយោបាយ”៕ប្រភព: Yonhap៕

ដោយ:សហការី
ប្អូនៗសិស្សានុសិស្សក្រីក្រប្រមាណជាង ៤០០នាក់ និងគណៈគ្រប់គ្រងអង្គការមូលនិធិទ្រទ្រង់កុមារកម្ពុជា បង្ហាញពីក្ដីរំភើបរីករាយក្នុងការទទួលនូវអគារថ្នាក់រៀនថ្មី រួមជាមួយសម្ភារសិក្សា និងសម្ភារអនាម័យមួយចំនួនពី ប៉េង ហួត គ្រុប ខណៈការបរិច្ចាគនេះ គឺនឹងជួយសម្រួលបន្ទុកសិក្សារបស់ប្អូនៗជាសិស្ស និងភាពខ្វះខាតមជ្ឈមណ្ឌល អប់រំមាតុភូមិខ្មែរ នៃអង្គការមូលនិធិទ្រទ្រង់កុមារកម្ពុជា ដែលកំពុងផ្ដល់ការបណ្ដុះបណ្ដាលសេវាអប់រំឥតគិតថ្លៃ ដល់ប្អូនៗសិស្សានុសិស្សក្រីក្រប្រមាណជាង ៤០០នាក់ និងឱកាសការងារដល់បុគ្គលិកគ្រូបង្រៀនជាជនពិការជាច្រើននាក់ផងដែរ។ កម្មវិធីនេះត្រូវបានធ្វើឡើងនៅ មជ្ឈមណ្ឌល អប់រំមាតុភូមិខ្មែរ ភូមិត្រពាំងអណ្ដូង ឃុំពាំងល្វា ស្រុកឧដុង្គ ខេត្តកំពង់ស្ពឺ នារព្រឹកថ្ងៃទី២៧ ខែមេសា ឆ្នាំ២០២៤។

នេះគឺជាលើកទីពីរដែរ ប៉េង ហួត គ្រុប បរិច្ចាគសម្ភារសិក្សា និងសម្ភារអនាម័យ ដល់មជ្ឈមណ្ឌល អប់រំមាតុភូមិខ្មែរ នៃអង្គការមូលនិធិទ្រទ្រង់កុមារកម្ពុជា ស្របពេលដែលក្នុងឆ្នំា២០២២ ប៉េង ហួត គ្រុប បានបរិច្ចាគការសាងសង់អគាសិក្សាមួយខ្នង និងសម្ភារសិក្សាមួយចំនួនរួចមកហើយ។  ជាមួយគ្នានេះ ​​ក្រុមហ៊ុនសង្ឃឹមថាអគារសិក្សា និងសម្ភារគាំទ្រការសិក្សានេះ នឹងចូលរួមចំណែកលើកកម្ពស់ការអប់រំ ហើយនឹងជួយការសិក្សារបស់ពួកគេឆ្ពោះទៅសម្រេចគោលដៅនាថ្ងៃអនាគត។  ​​

ស្របតាមសសរស្តម្ភទាំង៣ របស់ ប៉េង ហួត គ្រុប ពោលគឺ “ការអប់រំ បរិស្ថាន និងសង្គម” ដែលការបរិច្ចាគនេះគឺជាការងារសង្គមនៃបង្គោលទី១ ដែលផ្ដោតលើការរួមចំណែកលើកកម្ពស់វិស័យអប់រំនៅកម្ពុជា ការសាងសង់សាលារៀន ការផ្ដល់អាហារូបករណ៍ដល់សិស្សនិស្សិតក្រីក្រ ការចែករំលែកចំណេះដឹងតាមរយៈការរៀបចំសិក្ខាសាលា និងការយកចិត្តទុកដាក់បរិច្ចាគនូវសម្ភារសិក្សាដល់ប្អូនសិស្សានុសិស្សក្រីក្រតាមតំបន់ខ្វះខាតជាច្រើនទៀត។ ខណៈការអប់រំគឺជាថ្នាលបណ្តុះបណ្តាលចំណេះវិជ្ជាដ៏សំខាន់ និងជាអនាគតសម្រាប់ការអភិវឌ្ឍប្រទេសជាតិ។   ​

សូមរំលឹកថា អង្គការមូលនិធិទ្រទ្រង់កុមារកម្ពុជា គឺជាអង្គការមិនមែនរដ្ឋាភិបាលកម្ពុជា ដែលត្រូវបានបង្កើតឡើងនៅដើមឆ្នាំ ២០០៦ និងទទួលស្គាល់ពីទីស្ដីការគណៈរដ្ឋមន្រ្តី ដោយក្រសួងមហាផ្ទៃ ក្នុងឆ្នាំ២០០៦។ គោលបំណងដើម្បីផ្ដល់មធ្យោបាយតាមរយៈការផ្ដល់ការអប់រំឥតគិតថ្លៃដល់កុមារកម្ពុជា ជាមួយកម្មវិធីសិក្សាថ្នាក់មត្តេយ្យសហគមន៍ ការអប់រំថ្នាក់បំប៉ន​ភាសា​អង់​ភាសាបរទេស ដោយអង្គការធ្វើការផ្ដល់មូលនិធិដោយផ្ទាល់ដល់កុមារ និងគ្រួសាររបស់ពួកគេ ឬ ដោយប្រយោលតាមរយៈអង្គការក្នុងស្រុកនានាដែលអនុវត្តកម្មវិធីមនុស្សធម៌ ដើម្បីធ្វើឱ្យប្រសើឡើងនូវជីវភាពរបស់កុមារ និងគ្រួសារដែលងាយរងគ្រោះ៕​

        ដោយៈ ស៊ីវ ម៉េង

        ភ្នំពេញៈ មជ្ឈមណ្ឌលពាណិជ្ជកម្មអាស៊ាន-អន្តរជាតិ(ផ្សារដើមគរថ្មី) លើផ្ទៃដី៣០ហិកតា​ ត្រូវបានប្រកាសដាក់ឱ្យដំណើរការជាផ្លូវការ ក្រោមចក្ខុវិស័យប្រែក្លាយទៅជាទីផ្សារដ៏ធំ នៅក្នុងរាជធានីភ្នំពេញនាពេលអនាគត។

ផ្សារបោះដុំដ៏ធំមួយនេះ មិនត្រឹមនាំមកនូវកសិផល និងទំនិញមានគុណភាពល្អ ជាមួយតម្លៃសមរម្យជូនសម្រាប់ប្រជាជនខ្មែរប៉ុណ្ណោះទេ តែនឹងជួយជំរុញកសិផល និងទំនិញផ្សេងៗទៀតរបស់កម្ពុជាទៅកាន់ទីផ្សារអន្តរជាតិ ថែមទៀត។​

លោក សៀក លូភីង (Xie Luping) ប្រធានក្រុមប្រឹក្សាភិបាលនៃផ្សារដើមគរថ្មីបានមានប្រសាសន៍ក្នុងពិធីសម្ភោធផ្សារដើមគរថ្មីកាលពីចុងសប្តាហ៍មុនថា “ការប្តេជ្ញារបស់ខ្ញុំនាពេលនេះ គឺដើម្បីផលប្រ​យោជន៍ទៅវិញទៅមក ពង្រឹងកិច្ចសហប្រតិបត្តិការឈ្នះ រវាងប្រជាជនកម្ពុជា-ចិន និងប្រជាជនក្នុងតំបន់អាស៊ានផងដែរ ស្របតាមគំនិតផ្ដួចផ្ដើមខ្សែក្រវាត់និងផ្លូវ”។

លោក វ៉ាង វិនធាន ឯកអគ្គរដ្ឋទូតចិនប្រចាំកម្ពុជា​ ជាមួយនឹងលោក ឃួង ស្រេង អភិបាលរាជធានីភ្នំពេញបានអញ្ជើញជាអធិបតីក្នុងពិធីនេះ។

លោក វ៉ាង វិនធាន បានបង្ហាញក្ដីសង្ឃឹមចំពោះមជ្ឈមណ្ឌលពាណិជ្ជកម្មអាស៊ាន-អន្តរជាតិនេះ នឹងបម្រើការដល់ការអភិវឌ្ឍសង្គម សេដ្ឋកិច្ចកម្ពុជា ជាពិសេស គឺរួមចំណែកដល់ទំនាក់ទំនងពាណិជ្ជកម្មរវាងកម្ពុជានិងចិន។

លោកបន្តថា “កិច្ចសហប្រតិបត្តិការក្នុងវិស័យពាណិជ្ជកម្ម រវាងកម្ពុជា និងចិនបានទទួលលទ្ធផលជាផ្លែផ្កាច្រើន ហើយប្រទេសចិនបានបន្តជាដៃគូពាណិជ្ជកម្មធំបំផុត និងប្រទេសវិនិយោគធំបំផុតនៅកម្ពុជា”។ លោកបន្ថែមថា “មជ្ឈមណ្ឌលពាណិជ្ជកម្មអាស៊ាន-អន្តរជាតិ ជាគម្រោងលើកកម្ពស់ជីវភាពប្រជាពលរដ្ឋ ដ៏សំខាន់នៅរាជធានីភ្នំពេញ”។

លោកឃួង ស្រេងអភិបាលរាជធានីភ្នំពេញបានមានប្រសាសន៍ថា មជ្ឈមណ្ឌលពាណិជ្ជកម្មអាស៊ាន-អន្តរជាតិ ដើរតួនាទីសំខាន់ក្នុងការនាំចេញ-នាំចូលកសិផល និងរក្សាស្ថិរភាពនៃខ្សែច្រវាក់ផ្គត់ផ្គង់។ លើសពីនេះ ផ្សារមួយនេះ នឹងដើរតួនាទី ក្នុងការបង្កើនទំហំពាណិជ្ជកម្មនៃកសិផលកម្ពុជា ឱ្យក្លាយទៅជាមជ្ឈមណ្ឌលចែកចាយកសិផល។

លោកបន្តថា “មជ្ឈមណ្ឌលពាណិជ្ជកម្មនេះ នឹងអំណោយផលដល់ការផ្សព្វផ្សាយកសិផលកម្ពុជា ដ៏មានគុណភាពល្អៗទៅដល់តំបន់ផ្សេងៗលើពិភពលោក”។

តាមរយៈរៀបចំផ្សារឱ្យបានសមស្របនិងត្រឹមត្រូវ ទំនិញដែលធូរថ្លៃនិងមានគុណភាពខ្ពស់ នឹងលើកកម្ពស់កម្រិតពាណិជ្ជកម្មនៃផ្សារបោះដុំធំនៅភ្នំពេញ យ៉ាងមានប្រសិទ្ធភាព ហើយអាចសម្រួលភាពស្ទះចរាចរណ៍នៅកណ្តាលទីក្រុង​ កាត់បន្ថយហានិភ័យនានា និងកែលម្អបរិស្ថានរាជធានីភ្នំពេញ។
លោកឃួង ស្រេងបានបញ្ជាក់ថា “រាជរដ្ឋាភិបាលកម្ពុជានឹងបន្តគាំទ្រ ដល់ការកសាងនិងអភិវឌ្ឍនៃផ្សារថ្មីនេះ”៕

ដោយ: គង់ លាងហួរ

ឥណ្ឌា: តម្រូវការទីផ្សារលំនៅដ្ឋាន នៅក្នុងប្រទេសឥណ្ឌាកំពុងស្ទុះងើបឡើងវិញ ដែលស្តែងឱ្យឃើញតាមរយៈការកើនឡើង នៃការទិញដីធ្លីដោយបណ្តាអ្នកអភិវឌ្ឍន៍។ នេះបើយោងតាមការចុះផ្សាយដោយសារពត៌មាន Times of India។

យោងតាមក្រុមហ៊ុនប្រឹក្សាអចលនទ្រព្យ Anarock បានឱ្យដឹងថា ក្រៅពីផ្នែកលំនៅដ្ឋានហើយនោះ គេក៏សង្កេតឃើញថា ផ្នែកអច​លនទ្រព្យពាណិជ្ជកម្ម ការលក់រាយ ឧស្សាហកម្ម ភស្តុភារ និងឃ្លាំងក៏កំពុងជំរុញឱ្យមានកិច្ចព្រមព្រៀងទិញ -លក់ដីធ្លីជាច្រើន ក្នុងទីតាំងសំខាន់ៗនៅទូទាំងប្រទេសឥណ្ឌាផងដែរ។

យោងតាមទិន្នន័យរបស់ក្រុមហ៊ុន Anarock បានបង្ហាញថា អ្នកអភិវឌ្ឍន៍ និងអង្គភាពនានាបានចុះកិច្ចព្រមព្រៀង ទិញដីធ្លីប្រមាណ១០១ ដាច់ដោយឡែកពីគ្នា ក្នុងឆ្នាំសារពើពន្ធ២០២៣-២០២៤ ដែលគិតជាផ្ទៃក្រឡា មានទំហំជិត២.៩៨៩ហិកតា នៅទូទាំងប្រទេស។ ផ្ទុយទៅវិញ កាលពីឆ្នាំសារពើពន្ធ២០២២-២០២៣ អ្នកអភិវឌ្ឍន៍បានចុះហត្ថលេខា លើចំនួនកិច្ចព្រមព្រៀងទិញដីធ្លី ត្រឹមតែ៨៨ប៉ុណ្ណោះ ដែលគិតជាផ្ទៃក្រឡាមានទំហំប្រមាណ១.៨៨៦ហិកតា នៅទូទាំងទីក្រុងនានាក្នុងប្រទេសឥណ្ឌា។

លោក Anuj Puri ប្រធានក្រុមហ៊ុន ANAROCK Group បានមានប្រសាសន៍ឱ្យដឹងថា “អ្វីដែលគួរឱ្យចាប់អារម្មណ៍ នៅត្រង់ថាក្នុងចំណោមកិច្ចព្រមព្រៀងដីធ្លីសរុប នៅក្នុងឆ្នាំសារពើពន្ធ២០២៣-២០២៤ ក្នុងនោះ កិច្ចព្រមព្រៀងជាង៨៣ ដែលគិតជាទំហំប្រហែល១.១៣៥ហិកតា ត្រូវបានសម្រេចនៅក្នុងទីក្រុង លំដាប់កំពូលទាំង៧”។

ទីក្រុងទាំង៧នោះ រួមមាន ទីក្រុង Mumbai ទីក្រុង Delhi ទីក្រុង Kolkata ទីក្រុង Chennai ទីក្រុង Bangalore ទីក្រុង Hyderabad  និងទីក្រុង Pune។

លោក Anuj Puri បានបន្តថា “កិច្ចព្រមព្រៀង ដែលនៅសេសសល់ចំនួន១៨ទៀត ដែលមានផ្ទៃដីជាង១.៨៥៣ហិចតា ត្រូវបានសម្រេចនៅក្នុងទីក្រុងលំដាប់ទី២ និងទី៣ផ្សេងៗដូចជាទីក្រុង Ayodhya ទីក្រុង Jaipur ទីក្រុង Nagpur ទីក្រុង Mysuru និងទីក្រុង Ludhianaជាដើម”។

លោកបញ្ជាក់បន្ថែមថា “ទីក្រុងលំដាប់ទី២ និងទី៣ បានក្លាយជាម៉ាស៊ីនកំណើន ដែលមិនអាចប្រកែកបាន ដោយសារតែការកែលម្អហេដ្ឋារចនាសម្ព័ន្ធ និងឱកាសរីកចម្រើនយ៉ាងឆាប់រហ័សរបស់ពួកគេ”៕ ប្រភព: Times of India៕

ដោយ: គង់ លាងហួរ

អន្តរជាតិ: មហាសន្និបាត AIM Congress គឺជាវេទិកាវិនិយោគកំពូលនៅមជ្ឈឹមបូព៌ា ដែលផ្ដោតសំខាន់លើការវិនិយោគផ្ទាល់ពីបរទេស ទីក្រុងអនាគត និងសហគ្រាសធុនតូច និងមធ្យម។

AIM Congress ផ្តោតលើការលើកកម្ពស់សេដ្ឋកិច្ច និងពង្រឹងទំនាក់ទំនងអន្តរជាតិ ដោយកន្លងមកបានទទួលស្វាគមន៍គណៈប្រតិ​ភូចូលរួមជាង១ម៉ឺននាក់ មកពី១៧៥ប្រទេស និងមានការដាក់តាំងបង្ហាញអាជីវកម្មពីក្រុមហ៊ុនជាង៥០០ មកពីជុំវិញពិភពលោក។

កិច្ចប្រជុំវិនិយោគប្រចាំឆ្នាំ (AIM) គឺជាគំនិតផ្តួចផ្តើមរបស់មូលនិធិ AIM Foundation ដែលជាអង្គការអន្តរជាតិឯករាជ្យមួយ ដែលបានប្តេជ្ញាចិត្តយ៉ាងពេញលេញ ក្នុងការផ្តល់អំណាចដល់សេដ្ឋកិច្ចពិភពលោក តាមរយៈការជំរុញយុទ្ធសាស្រ្ត លើកកម្ពស់ប្រកបដោយប្រសិទ្ធភាព និងសម្របសម្រួលឱកាសសម្រាប់ផលិតភាព និងការពង្រីកសេដ្ឋកិច្ច។

មូលនិធិនេះក៏អនុវត្តន៍ប្រតិបត្តិការ និងការគ្រប់គ្រងបណ្តាញវិនិយោគសកល AIM និងក្រុមធុរកិច្ច ដែលពាក់ព័ន្ធចំនួន១៥របស់ខ្លួន រួមទាំងការត្រួតពិនិត្យ នៃកិច្ចប្រជុំវិនិយោគប្រចាំឆ្នាំសកល និងថ្នាក់តំបន់។

ចាប់តាំងពីត្រូវបានបង្កើតឡើង កិច្ចប្រជុំវិនិយោគប្រចាំឆ្នាំ(AIM) បានប្រែក្លាយខ្លួន ទៅជាវេទិកាវិនិយោគឈានមុខគេ  នៅតំបន់មជ្ឈិ​មបូព៌ា ដែលមានបំណងជំរុញការផ្លាស់ប្តូរជាវិជ្ជមាន ដោយបង្កើតឱកាសវិនិយោគ ពង្រឹងសាមគ្គីភាព និងការអភិវឌ្ឍន៍ទំនាក់ទំនងសេដ្ឋកិច្ចក្នុងចំណោមប្រជាជាតិនានា ក៏ដូចជាការដោះស្រាយវិបត្តិសកល ដែលនឹងផ្តល់ផលប្រយោជន៍យ៉ាងខ្លាំងដល់កំណើនសេដ្ឋកិច្ច។

រាល់ការរៀបចំកិច្ចប្រជុំវិនិយោគប្រចាំឆ្នាំ គឺជាព្រឹត្តិការណ៍ និងឱកាសមួយ ដើម្បីដោះស្រាយបញ្ហាប្រឈមជាមូលដ្ឋាន ដែលប្រទេសនានាកំពុងប្រឈមមុខ ក្នុងដំណើររបស់ពួកគេ ដើម្បីសម្រេចបាននូវការអភិវឌ្ឍន៍ និងដើម្បីពិភាក្សាអំពីនិន្នាការ និងយុទ្ធសាស្រ្តនៃការវិនិយោគដែលអាចប្រើប្រាស់បាន ដើម្បីបង្កើនសក្តានុពលនៃគ្រប់អាជីវកម្ម ប្រទេស និង  តំបន់ ដើម្បីជំរុញការធ្វើពិពិធកម្មសេដ្ឋកិច្ច។

ជាមួយគ្នានេះ មហាសន្និបាត AIM Congress ប្រ​ចាំឆ្នាំ២០២៤ នឹងបន្តប្រមូលផ្តុំថ្នាក់ដឹកនាំសាជីវកម្ម អ្នកបង្កើតគោលនយោបាយ អ្នកជំនួញ អ្នកវិនិយោគក្នុងតំបន់ និងអន្តរជាតិ សហគ្រិន អ្នកសិក្សាឈានមុខគេ និងអ្នកជំនាញ ដែលពួកគេនឹងធ្វើបទបង្ហាញអំពីព័ត៌មា​នថ្មីៗ យុទ្ធសាស្ត្រ និងចំណេះដឹងស្តីពីការទាក់ទាញការវិនិយោគ។

ក្រុមហ៊ុនចាប់ផ្តើមអាជីវកម្ម (start-ups) ជាង៣០០ក្រុមហ៊ុន នៅគ្រប់វិស័យ បានបញ្ជាក់ពីការចូលរួមរបស់ពួកគេ ជាផ្លូវការនៅក្នុងមហាសន្និបាត AIM លើកទី១៣ ឆ្នាំ២០២៤នេះ។ ព្រឹត្តិការណ៍ដ៏ធំនេះនឹងប្រព្រឹត្តទៅចាប់ពីថ្ងៃទី៧ ដល់ថ្ងៃទី៩ ខែឧសភា ឆ្នាំ២០២៤ នៅមជ្ឈមណ្ឌលពិព័រណ៍ជាតិ Abu Dhabi ប្រទេសអារ៉ាប់រួម ។

ការរៀបចំមហាសន្និបាតនេះឡើង មានគោលបំណងស្វែងយល់អំពីដំណោះស្រាយ ប្រកបដោយភាពច្នៃប្រឌិត ស្វែងយល់ពីអនាគតនៃការវិនិយោគ ជំរុញភាពជាដៃគូ និងសម្របសម្រួលការផ្លាស់ប្តូរចំណេះដឹងក្នុងចំណោមសហគ្រិនទូទាំងពិភពលោក។

លើសពីនេះ វេទិកា AIM ផ្តល់ឱកាសដែលមិនអាចកាត់ថ្លៃបាន និងមិនអាចប្រៀបផ្ទឹមបាន សម្រាប់អង្គភាពសាធារណៈ និងឯកជនក្នុងការរួមគ្នា ដើម្បីសម្រេចបាននូវចក្ខុវិស័យរួមគ្នានៃកំណើន និងនិរន្តរភាពរបស់ពួកគេ។

តាមរយៈការចូលរួមក្នុងមហាសន្និបាទនេះ អ្នកវិនិយោគ នឹងទទួលបានអត្ថប្រយោជនសំខាន់ៗដូចជា:ទី១ ស្វែងយល់ពីគម្រោងវិនិយោគដែលមានសក្តានុពល ឬឱកាសដែលស្របតាមលក្ខណៈវិនិច្ឆ័យ និងគោលបំណងនៃការវិនិយោគរបស់អ្នក។ ទី២ -ផ្សារភ្ជាប់ទំនាក់ទំនងជាមួយដៃគូវិនិយោគ និងកិច្ចសហការនាពេលអនាគត តាមរយៈការបង្ហាញទិសដៅវិនិយោគ វគ្គបណ្ដុះបណ្ដាល សកម្មភាពផ្គូផ្គង និងការតាំងពិពណ៌អន្តរជាតិ ដែលមានរៀបចំនៅក្នុងព្រឹត្តិការណ៍។

ទី៣ ទទួលបានការយល់ដឹងដោយផ្ទាល់ លើគំនិតផ្តួចផ្តើមរបស់រដ្ឋាភិបាល គោលនយោបាយវិនិយោគ និងក្របខ័ណ្ឌបទប្បញ្ញត្តិដែលជះឥទ្ធិពលដល់ការវិនិយោគ។ ទី៤ ជ្រៀតចូលទៅក្នុងទីផ្សារអន្តរជាតិ និងស្វែងរកឱកាសវិនិយោគ ក្នុងប្រទេសផ្សេងទៀត ដែលអាចនាំឱ្យមានការធ្វើពិពិធកម្មផលប័ត្រ និងការកាត់បន្ថយហានិភ័យ។

ចំណែកឯសហគ្រិន នឹងទទួលបានឱកាសស្វែងរកការវិនិយោគដែលមានសក្តានុពល តាមរយៈឱកាសវិនិយោគដ៏ធំទូលាយ នៅទូទាំងវិស័យផ្សេងៗ ដែលបានបង្ហាញនៅក្នុងព្រឹត្តិការណ៍នេះ កសាងទំនាក់ទំនង សហការ និងបង្កើតភាពជាដៃគូដែលមានសក្តានុពលជាមួយអ្នកចូលរួម រួមទាំងអ្នកវិនិយោគ មន្ត្រីរដ្ឋាភិបាល និងអ្នកជំនាញក្នុងឧស្សាហកម្ម ព្រមទាំងទទួលបានការយល់ដឹងអំពីឱកាសអាជីវកម្មថ្មី និងកម្លាំងរំខាន ដែលអាចមានផលប៉ះពាល់ដល់ឧស្សាហកម្មរបស់សហគ្រិន តាមរយៈបច្ចេកវិទ្យាដែលកំពុងរីកចម្រើន និងការច្នៃប្រឌិត៕

ដោយៈ គង់ សូរិយា

        ភ្នំពេញៈ អ្នកអភិវឌ្ឍន៍នានាហាក់បន្តសម្ងំ ដោយមិនបានបើកលក់គម្រោងថ្មីរបស់ពួកគេ ថ្នាក់ដឹកនាំធនាគារធំៗនៅតែមានការប្រុងប្រយ័ត្នក្នុងការផ្តល់ឥណទានរបស់ពួកគេ ហើយអ្នកឆ្លៀតឱកាសទិញដី នៅតែស្វែងរកដីតម្លៃក្រោមទីផ្សារចន្លោះពី៣០ ទៅ៥០ភាគរយ។
តើស្ថានភាពដែលកម្ពុជា រង់ចាំការងើបឡើងវិញក្នុងវិស័យនេះត្រូវការដំណោះស្រាយបែបណា?។

លោកយិន លាងគង់ ប្រធានសមាគមសហគ្រិនសារព័ត៌មានសេដ្ឋកិច្ចកម្ពុជា និងជាអគ្គនាយកគេហទំព័រ Propertyarea.asia & Cambodiafinancialtimes.com បានមានប្រសាសន៍ឲ្យដឹងកាលពីល្ងាចថ្ងៃទី២៨ មេសាថា ទីផ្សារនេះ បានស្លោកស្រពោនរយៈពេល៥ឆ្នាំមកហើយ ចាប់តាំងពីវិបត្តិកូវីដ១៩បានចាប់ផ្តើម និងកំលាំងចលករ​សេដ្ឋកិច្ចខ្លះ បានរងផលប៉ះពាល់តាំងពីចុងឆ្នាំ២០១៩ ក្នុងស្ថានភាពនេះ កម្ពុជាត្រូវការលំហូរទុនពីក្រៅប្រទេស ហូរចូលមករាប់ពាន់លានដុល្លារមកជាថ្មី ដើម្បីជម្រុញទីផ្សារនេះឲ្យងើបឡើងវិញ។

លោកបន្តថា “ស្ថានភាពទីផ្សារបែបនេះ កម្ពុជាត្រូវការការវិនិ​យោគពីអ្នកក្នុងស្រុក ជាមួយចលនាមួយ ដែលមានសភាពដូចជាទឹកជោរ ដែលកើនឡើងបន្តិចម្តងៗ ដើម្បីស្តារទំនុកចិត្តក្នុងវិស័យនេះឡើងវិញ ក្នុងចំណោមសាធារណៈជន”។ លោកបន្តថា “ជាមួយគ្នានេះ ធនាគារនានាគួរតែបន្ឋូរបន្ថយ លក្ខខ័ណ្ឌលើការផ្តល់ឥណទាន ដើម្បីបង្ហូរសាច់ប្រាក់ ចូលក្នុងវិស័យនេះឡើងវិញ ដើម្បីជម្រុញទីផ្សារ និងបង្កើនទំនុកចិត្តក្នុងទីផ្សារ”។លោកយិន លាងគង់បានបន្តថា ជាមួយគ្នានេះ រាជរដ្ឋាភិបាលគួរមានកញ្ចប់ថវិកាលើកទឹកចិត្តមួយចំនួន ពិសេសដាក់ចេញគោល​នយោបាយថ្មីៗបន្ថែម ដូចជា កម្មវិធីជម្រុញការវិនិយោគនៅខេត្តព្រះសីហនុ ជម្រុញការបង្កើតតំបន់សេដ្ឋកិច្ចពិសេសឲ្យបានច្រើន នៅទីតាំងដែលមានសក្តានុពល សម្រាប់ការអភិវឌ្ឍវិស័យអចលនទ្រព្យ និងបន្តលើកទឹកចិត្ត ដល់ការវិនិយោគអចលនទ្រព្យ ដែលមានគុណតម្លៃដល់សង្គម សេដ្ឋកិច្ច និងការអភិវឌ្ឍន៍បែបអេកូឡូស៊ីក្នុងវិស័យនេះផងដែរ។

លោកបន្តថា ជាការពិត ការរីកចម្រើនរបស់ប្រទេសមួយ ពិតជាត្រូវការលំហូរទុនវិនិយោគពីបរទេស និងជម្រុញលំហូរពាណិជ្ជកម្មទៅកាន់បរទេស ប៉ុន្តែនៅកម្ពុជាទីផ្សារតូចមួយនេះ ទាមទារឲ្យរដ្ឋាភិបាលកសាងភាពយូនីកមួយ សម្រាប់ប្រទេស និងមូលដ្ឋានសេដ្ឋកិច្ចរបស់ខ្លួន ដើម្បីប្រែក្លាយប្រទេសនេះ ជាមូលដ្ឋានមួយដែលអ្នកវិនិយោគសម្លឹងមករៀងរាល់ពេល ជាមួយនឹងបរិយាកាស និងបរិស្ថានវិនិយោគមានភាពអំណោយផល ជាមួយនឹងការិយាធិបតេយ្យត្រូវ កាត់បន្ថយឲ្យបានជាអតិបរិមា។

លោកបញ្ជាក់ថា “ប្រសិនជាប្រទេសថៃ ឬវៀតណាម ពួកគាត់រាំបទធ្វីស កម្ពុជាក៏គួរមានបទខ្លួនឯងសម្រាប់រាំផងដែរ ដូចជា បទរាំវង់ ឬរាំក្បាច់ តាមស្ថានភាពសង្គម និងសេដ្ឋកិច្ចរបស់ខ្លួន”។

 តើកម្ពុជាអាចពឹងផ្អែកលើការវិនិយោគរបស់ចិន ក្នុងវិស័យនេះបានតទៅទៀរឬយ៉ាងណា លោកយិន លាងគង់បានបញ្ជាក់ថា ការពឹងផ្អែកលំហូរវិនិយោគពីប្រទេសចិន សម្រាប់ជម្រុញការវិនិយោគលើវិស័យអចលនទ្រព្យ និងធ្វើឲ្យទីផ្សារនេះពុះកញ្រ្ជោលឡើងវិញ យើ​ងអាចមើលឃើញក្នុងសញ្ញាមួយ ហាក់ស្ថិតក្នុងសភាពអស់សង្ឃឹ​ម ដោយសារការដួលរលំ ក្នុងវិស័យអចលនទ្រព្យចិន ព្រោះគោលនយោបាយរបស់មេដឹកនាំប្រទេសនេះ ផ្តោតលើការអភិវឌ្ឍអចលនទ្រព្យសម្រាប់ស្នាក់នៅ មិនមែនសម្រាប់ទាញយកប្រាកើចំណេញ។ មេដឹកនាំចិនបាន និងកំពុងដាក់ចេញគោលនយោបាយថ្មី ដោយកាត់បន្ថយការពឹងផ្អែកលើវិស័យនេះ ដែលធ្វើឲ្យក្រុមហ៊ុនអភិវឌ្ឍន៍អចល​នទ្រព្យ លំដាប់យក្សរបស់ចិន ជាច្រើន ដូចជា Country Graden, Evergrade, Shimaoជាដើមបានដួលរលំ៕

        ដោយៈ គង់ សូរិយា

        ភ្នំពេញៈ គេហទំព័រវេបសាយ និងបណ្តាញទំនាក់ទំនងសង្គមដូចជា facebook Page, Telegram , Tik Tokរបស់សមាគមសហគ្រិនសារព័ត៌មានសេដ្ឋកិច្ចកម្ពុជា បាននិងកំពុងផ្តោតការផ្សព្វផ្សាយជាបីភាសា។

ភាសាដែលបាន និងកំពុងផ្សព្វផ្សាយព័ត៌មានទាក់ទងសេដ្ឋកិច្ច អចលនទ្រព្យ ហិរញ្ញវត្ថុ ផ្សារហ៊ុន ទីផ្សារឧបករណ៍និស្សន៍ជាដើម គឺផ្តោតលើភាសាខ្មែរ ភាសាអង់គ្លេស និងភាសាចិន។

លោកយិន លាងគង់ប្រធានសមាគមសហគ្រិនសារព័ត៌មានសេដ្ឋកិច្ចកម្ពុជា(CEMEA) បានមានប្រសាសន៍ឲ្យដឹងកាលពីថ្ងៃទី២៨ មេសាថា អ្វីដែលយើងបានដាក់ចេញនូវចក្ខុវិស័យ ដ៏មុតស្រួចរបស់ខ្លួន គឺផ្តោតលើការផ្សព្វផ្សាយព័ត៌មានសេដ្ឋកិច្ច បែបវិភាគ មានលក្ខណៈស៊ីជម្រៅ និងសម្បូរបែប ដែលជាព័ត៌មាន មានមូលដ្ឋានវិជ្ជាជីវៈ និងក្រមសិលធ៌ម ដែលអាចជឿទុកចិត្តបាន។
លោកបន្តថា “ការខិតខំរបស់រដ្ឋាភិបាល ដើម្បីកសាងប្រទេសតែម្នាក់ឯងមិនគ្រប់គ្រាន់ទេ តែទាមទារឲ្យមានការចូលរួមពីគ្រប់វិស័យ ពិសេសវោស័យសារគមនាគមន៍ ដើម្បីដើរតួនាទីជាអ្នកគាំទ្រ ដើម្បីលើកកំពស់មុខមាត់កម្ពុជា នៅលើឆាកអន្តរជាតិបន្ថែមទៀត”។

លោកយិន​ លាងគង់បានបន្តថា ការរួមចំណែកពីវិស័យសារព័ត៌មាន ដែលមានក្រមសីលធ៌មវិជ្ជាជីវៈ មានសារៈសំខាន់លើផ្នែកសំខាន់ៗចំនួនបួន ដូចជា ទី១ ការផ្សព្វផ្សាយដោយផ្តោតលើព័ត៌មានវិជ្ជមាន ដែលផ្តល់ពុទ្ឋិជាប្រទីប សម្រាប់បញ្ញាញ្ញាណរបស់សាធារណៈជន ទី២ បង្ហាញពីមុខមាត់កម្ពុជាលើឆាកអន្តរជាតិ តាមរយៈសារព័ត៌មាន ដែលនិយាយពីការអភិវឌ្ឍសេដ្ឋកិច្ច សង្គមកម្ពុជា។
ទី៣ បង្កើតនូវចលនាជាតិនិយមមួយ តាមរយៈបណ្តាញព័ត៌មាន ដើម្បីឥ្យប្រជាពលរដ្ឋ បានយល់ដឹងពីគោលនយោបាយរបស់រាជរដ្ឋាភិបាលថាដើរទៅលើផ្លូវណា ក្នុងគោលដៅអ្វី និងដើម្បីអ្វី។ ទី៤ សារព័ត៌មានជាដៃគូរបស់រាជរដ្ឋាភិបាល សម្រាប់ជាកញ្ចក់ឆ្លុះពីរដ្ឋាភិបាលទៅកាន់ប្រជាពលរដ្ឋ និងពីប្រជាពលរដ្ឋមកកាន់រដ្ឋាភិបាល។លោកយិន លាងគង់បានបញ្ជាក់ថា “ចក្ខុវិស័យរបស់CEMEA គឺចង់ឃើញ និងចង់រួមចំណែកជាមួយរាជរដ្ឋាភិបាល ដោយនាំប្រទេសឆ្ពោះ ទៅកាន់ឋានៈជាប្រទេស មានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងប្រទេសមានប្រាក់ចំណូលខ្ពស់នៅឆ្នាំ២០៥០ខាងមុខ៕