ដោយ: គង់ លាងហួរ

ប៉េកាំង: ប្រព័ន្ធផ្សព្វផ្សាយរដ្ឋចិនបានរាយការណ៍ថា ប្រទេសចិនដាក់ចេញវិធានការថ្មី ដើម្បីគាំទ្រដល់ទីផ្សារអចលនទ្រព្យ ស្របពេលមានការព្រួយបារម្ភ អំពីការបញ្ជាឱ្យរំលាយចោលក្រុមហ៊ុន Evergrande ដោយតុលាការក្រុងហុងកុង។

វិធានការនោះ សំដៅលើគម្រោងអចលនទ្រព្យ ដែលគាំទ្រដោយរដ្ឋ នៅក្នុងប្រទេសចិន បានទទួលប្រាក់កម្ចីអភិវឌ្ឍន៍ដំបូងក្រោមយន្តការដែលគេហៅថា “បញ្ជីស” របស់ទីក្រុងប៉េកាំង ខណៈទីក្រុងធំៗចំនួន២ បានបន្ធូរបន្ថយការទប់ស្កាត់ការទិញផ្ទះ។

វិធានការចុងក្រោយនេះ បានបន្ថែមពីលើគោលនយោបាយជាច្រើន ដែលរដ្ឋាភិបាលចិនបានដាក់ចេញ កាលពីឆ្នាំមុន ដើម្បីជួយស្តារវិស័យអចលនទ្រព្យឡើងវិញ ដែលបានធ្លាក់ផុងជ្រៅចូលទៅក្នុងវិបត្តិបំណុល។ទោះបីជាទីក្រុងប៉េកាំង បានដាក់ចេញវិធានការជាច្រើនបែបនេះយ៉ាងណាក្តី ក៏ទីផ្សារអចលនទ្រព្យរបស់ប្រទេសចិន នៅតែបន្តដាំក្បាលចុះ ខណៈតម្លៃផ្ទះថ្មីៗបានថយចុះ ដល់កម្រិតទាបបំផុតមិនធ្លាប់មាន។

ក្រុមអ្នកវិភាគលើកឡើងថា ការបញ្ជាឱ្យរំលាយក្រុមហ៊ុនអចល​នទ្រព្យ China Evergrande Group អាចធ្វើឱ្យទស្សនវិស័យនៃតម្រូវការកាន់តែអាក្រក់ឡើង ខណៈអ្នកទិញផ្ទះបន្តប្រកាន់ជំហរប្រុងប្រយ័ត្នខ្ពស់ ដោយសារតែភាពមិនច្បាស់លាស់ អំពីសុខភាពរបស់ក្រុមហ៊ុនអភិវឌ្ឍន៍ឯកជនផ្សេងទៀត។

ប្រព័ន្ធផ្សព្វផ្សាយផ្លូវការបានរាយការណ៍ កាលពីថ្ងៃអង្គារ ទី៣០ ខែមករា ថា ទីក្រុងធំៗចំនួន២របស់ប្រទេសចិនគឺ ទីក្រុងស៊ូចូវ និងទីក្រុងសៀងហៃ បានចាត់វិធានការដូចទៅនឹងទីក្រុងក្វាងចូវ ដោយបន្ធូរបន្ថយការរឹតបន្តឹងលើការទិញផ្ទះ។ជាមួយគ្នានេះដែរ រដ្ឋាភិបាលទីក្រុងប៉េកាំង បានប្រកាសបញ្ចេ​ញកញ្ចប់ប្រាក់កម្ចី ដែលមានតម្លៃប្រមាណ៣៣០លានយ័ន(ប្រហែល៤៦លានដុល្លារ) ដល់គម្រោងអភិវឌ្ឍន៍ដែលគាំទ្រដោយរដ្ឋ៕

ដោយៈ ជេស៊ីកា

ព្រះសីហនុៈ ក្រុមអ្នកជំនាញបានលើកឡើងថា ការដាក់ចេញកម្មវិធីជម្រុញការវិនិយោគ នៅខេត្តព្រះសីហនុ របស់រដ្ឋាភិបាលនឹងជួយជម្រុញ និងទាក់ទាញការវិនិយោគក្នុងខេត្តនេះ ឲ្យមានភាពប្រសើរឡើង។

អគ្គនាយកក្រុមហ៊ុនERA Cambodia លោកខន គង្គាបានមានប្រសាសន៍ឲ្យដឹងតាមបណ្តាញតេឡេក្រាម កាលពីរសៀលថ្ងៃទី៣១ មករាថា ជាធម្មតានៅពេលរដ្ឋាដាក់ចេញ កម្មវិធីលើកទឹកចិត្តដល់ការវិនិយោគ វាជាសញ្ញាល្អសម្រាប់ក្រុងព្រះសីហនុ ខណៈបច្ចុប្បន្នទីផ្សារ អចលនទ្រព្យ ខុនដូ បានមានភាពប្រសើរឡើងបណ្តើរៗហើយ។លោកបន្តថា “អ្នកវិនិយោគមកពីអឺរ៉ុប អាមេរិក និងមកពីតំបន់អាស៊ី បានចាប់ផ្តើមចូលមកកម្ពុជាកាន់តែច្រើនហើយ”។ជាមួយគ្នានេះ លោកឌិត ចណ្ណា អគ្គនាយកក្រុមហ៊ុនLucky Realty បានមានប្រសាសន៍ឲ្យដឹងផងដែរថា តាមរយៈកម្មវិធី និងគោលនយោបាយថ្មីៗជាច្រើន ដែលបានដាក់ចេញដោយប្រមុខរដ្ឋាភិបាល នឹងធ្វើឲ្យទីផ្សារអចលនទ្រព្យ នៅខេត្តព្រះសីហនុមានភាពរសរវើកឡើងវិញ។

លោកបន្តថា “ខ្ញុំគិតថា វាជាព័ត៌មានដ៏រីករាយ សម្រាប់អ្នកវិនិយោគដែលបានជាប់គាំង អ្នកវិនិយោគថ្មី និងអ្នកវិនិយោគដែលចង់ទិញអាគារជាប់គាំងនៅក្រុងព្រះសីហនុ”។ លោកបន្ថែមថា “តាមរយៈគោលនយោបាយ និងកម្មវិធីជម្រុញការវិនិយោគ របស់រដ្ឋាភិបាល នឹងធ្វើឲ្យខេត្តព្រះសីហនុ មានសកម្មភាពកាន់តែច្រើនឡើង”។លោកឌិត ចណ្ណាបានបន្តថា នៅពេលណាអចលនទ្រព្យ ខេត្ត ព្រះសីហនុមានចលនាខ្លាំង នឹងធ្វើឲ្យបណ្តាខេត្តជាប់តំបន់ឆ្នេរ នឹងមានចលនាផងដែរ ហើយបណ្តាខេត្តផ្សេងៗទៀត ក៏នឹងមានចលនាបន្តបន្ទាប់។

លោកបញ្ជាក់ថា “ចំណុចសំខាន់មួយទៀត នៅពេលណារដ្ឋាភិបាលយកចិត្តខ្លាំង ជម្រុញការវិនិយោគបែបនេះ កាន់តែជួយឲ្យអ្នកអភិវឌ្ឍន៍ជាតិ អន្តរជាតិឲ្យកាន់តែមានទំនុកចិត្ត ក្នុងការអភិវឌ្ឍវិស័យនេះបន្ថែមទៀត”។

ចំណែកលោកស្រីតាំង ហួរ អគ្គនាយិកាក្រុមហ៊ុនAmatak Property Service Co, Ltdបានមានប្រសាសន៍ឲ្យដឹងផងដែរថា វាជាដំណឹងល្អ និងជាការបើកទំព័រដ៏ល្អ សម្រាប់ដើមឆ្នាំ២០២៤នេះ ហើយយើងសង្ឃឹមថា អ្វីៗនឹងដំណើរការសន្សឹមៗ ទៅកាន់តែប្រសើរ។ លោកស្រីបន្តថា “យើងឃើញមានអាគារខ្លះ បានដំណើរការសាងសង់ឡើងវិញ ទោះមិនទាន់ទាំងអស់ តែការសាងសង់បានធ្វើឡើងទាំងយប់ទាំងថ្ងៃ”។ លោកស្រីបន្ថែមថា​ “ យើងឃើញអាគារខ្មែរយើងមួយចំនួន បានសាងសង់បញ្ចប់ និងបានធ្វើការកែលំអរ ដើម្បីដំណើរការជួល ឬធ្វើអាជីវកម្មឡើងវិញ”។លោកស្រីតាំង ហួរបានបន្តថា “អ្វីៗវាបាននិងកំពុងចាប់ផ្តើម ទោះបីមិនលឿន តែវានឹងដំណើរការសន្សឹមៗ”។ លោកស្រីបន្ថែមថា “ក្នុងនាមជាអ្នករកស៊ីក្នុងវិស័យនេះ គឺយើងឃើញអ្វីៗបានចាប់ផ្តើមប្រសើរឡើង ទោះបីទើបចាប់ផ្តើមឆ្នាំ២០២៤ បានត្រឹមរយៈពេល១ខែក្តី”។

ប្រមុខរាជរដ្ឋាភិបាលកម្ពុជា សម្តេចធិបតីហ៊ុន ម៉ាណែតនាយករដ្ឋមន្រ្តីនៃកម្ពុជាកាលពីថ្ងៃទី៣១ មករាកន្លងមកនេះ បានប្រកាសដាក់ចេញកម្មវិធីជម្រុញការវិនិយោគ នៅខេត្តព្រះសីហនុ ដោយបានដាក់ចេញគោលនយោបាយ និងការលើកទឹកចិត្តជាច្រើន ដើម្បីទាក់ទាញអ្នកវិនិយោគជាតិ អន្តរជាតិមកកាន់ខេត្តដ៏សំខាន់នេះ៕

ដោយៈ គង់ សូរិយា

        ភ្នំពេញៈ ប្រសិនជាគ្មានការប្រែប្រួលទេនោះ សម្តេចធិបតីហ៊ុន ម៉ាណែតនាយករដ្ឋមន្រ្តីនៃកម្ពុជា នឹងអញ្ជើញចូលរួមសម្ភោធការដ្ឋានសាងសង់ស្ពានឆ្លងកាត់ទន្លេរបាសាក់ ចក្រអង្រែក្រោម ព្រែកប្រានៅថ្ងៃទី១៩ កុម្ភៈខាងមុខនេះ។

ព័ត៌មាននេះ ត្រូវបានលើកឡើងក្នុងកិច្ចប្រជុំ របស់ក្រសួងសា​ធារណការ និងដឹកជញ្ជូន ត្រៀមរៀបចំពិធីបើកការដ្ឋានសាងសង់ស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) និងផ្លូវតភ្ជាប់ នាថ្ងៃទី១៩ កុម្ភៈ ២០២៤ ខាងមុខ។កិច្ចប្រជុំនេះបានដឹកនាំដោយលោកសួង ហេង រដ្ឋលេខាធិការ និងជាប្រធានគណៈក​ម្មការ បានអញ្ជើញដឹកនាំកិច្ចប្រជុំគណៈកម្មការសម្រាប់រៀបចំពិធី បើកការដ្ឋានសាងសង់ស្ពានឆ្លងកាត់ ទន្លេរបាសាក់ (ចាក់អង្រែក្រោម-ព្រែកប្រា) និងផ្លូវតភ្ជាប់។

កិច្ចប្រជុំនេះធ្វើឡើងក្នុងគោលបំណង ដើម្បីប្រកាសនូវសមាសភាពគណៈកម្មការ អនុគណៈកម្មការ និងបែងចែកការងារដែលត្រូវទទួលបន្ទុកក្នុងការត្រៀមរៀបចំ ពិធីបើកការដ្ឋានសាងសង់ស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) និងផ្លូវតភ្ជាប់។លោករដ្ឋលេខាធិការ ប្រធានគណៈកម្មការ បានណែនាំឱ្យសមា​ជិក សមាជិកានៃគណៈកម្មការ និងអនុគណៈកម្មាការទាំងអស់ សហការគ្នាឱ្យបានជិតស្និទ្ធជាមួយភាគីពាក់ព័ន្ធ ផ្តល់ព័ត៌មានទៅវិញទៅមកឱ្យបានគ្រប់ជ្រុងជ្រោយ ជាពិសេសត្រូវអនុវត្តតាមតួនាទី និងភារកិច្ចដែលថ្នាក់ដឹកនាំបានប្រគល់ជូន សំដៅធានាឱ្យពិធីបើកការដ្ឋានសាងសង់អាចប្រព្រឹត្តទៅបានដោយរលូន មានរបៀបរៀបរយ ប្រកប​ដោយសន្តិសុខ សុវត្ថិភាព សណ្តាប់ធ្នាប់ ជូនគណៈអធិបតី និងអ្នកចូលរួម ទៅតាមផែនការដែលបានគ្រោងទុក។

ពិធីបើកការដ្ឋានសាងសង់ស្ពានឆ្លងកាត់ទន្លេបាសាក់ (ចាក់អង្រែក្រោម -ព្រែកប្រា) និងផ្លូវតភ្ជាប់ ក្រោមក្របខ័ណ្ឌឥណទានសម្បទានពីរដ្ឋាភិបាល នៃសាធារណរដ្ឋប្រជាមានិតចិន៕

ដោយៈ គង់ ហ្វីអូណា

        ភ្នំពេញៈ កំណើន​អគារការិយាល័យ​ នៅក្នុង​រាជធានីភ្នំពេញ​បានកើនឡើង​ជា​បន្តបន្ទាប់ គិ​តចាប់តាំងពី​ឆ្នាំ២០១៨កន្លងមក ជាក់ស្ដែង​ក្នុងឆ្នាំ២០១៨​ ការផ្គត់ផ្គង់ការិយាល័យ​មានត្រឹមតែ​ប្រមាណ​៤០ម៉ឺន​ម៉ែត្រក្រឡា​ប៉ុណ្ណោះ​។

ប៉ុន្តែបើគិតមកដល់ឆ្នាំ​២០២៣​កន្លងទៅនេះ កំណើន​ការផ្គត់ផ្គង់ការិយាល័យ​ មានទំហំរហូតដល់ប្រមាណ១លាន​ម៉ែត្រក្រឡា ។ នេះ​បើតាមរបាយការណ៍របស់​ក្រុមហ៊ុន CBRE Cambodia ចេញផ្សាយ​នៅពេល​ថ្មីៗនេះ ។

យោងតាម​ការសិក្សារបស់​ក្រុមហ៊ុន​ CBRE Cambodia បានរំពឹងថា​ នៅក្នុងឆ្នាំ២០២៥​ខាងមុខ ការផ្គត់ផ្គង់​កា​រិ​យាល័យ​នៅក្នុង​រាជធានីភ្នំពេញ មាន​រហូតដល់​ជាង​១,៥​លានម៉ែត្រក្រឡា ។ នៅក្នុង​ពេល​បច្ចុប្បន្ន​នេះ ការិ​យាល័​យសរុ​ប្រមាណ​៦០ម៉ឺនម៉ែត្រក្រឡា ​ត្រូវ​បាន​កំពុង​ជួល​ និងដាក់ឱ្យប្រើប្រាស់ ហើយផ្សេង​ទៀត​កំពុង​ស្វែង​រកអ្នក​​ដែល​មានតម្រូវការ​ ។​ការសិក្សាដដែលបានបង្ហាញ ពីតម្លៃ​ការិយាល័យ​នៅក្នុងរាជធានីភ្នំពេញ ដោយក្នុងនោះដែរ អគារ​ការិយាល័យ​កម្រិត​A មានតម្លៃប្រមាណ២៦,៥ដុល្លារ​អាមេរិក ក្នុងមួយម៉ែត្រក្រឡា​ក្នុងមួយខែ ប៉ុន្តែការិយាល័យ​ប្រភេទនេះ មិនមាន​ច្រើនប៉ុន្មាននោះទេ ដោយអ្នកផ្គត់ផ្គង់​ភាគច្រើនផ្ដោតលើ​កម្រិត​B និង C ​។​

ទីតាំង​ផ្គត់ផ្គង់ការិយាល័យ ​ដែលពេញនិយម​ជាង​គេ ត្រូវ​បានមើលឃើញថា​ នៅតំបន់​កណ្ដាល​រាជ​ធា​នី​ភ្នំ​ពេញ ដូចជា​នៅខណ្ឌចំការ​មន ខណ្ឌ​បឹង​កេងកង ខណ្ឌ៧ មករា ខណ្ឌដូនពេញ និង​ខណ្ឌទួល​គោក​ជាដើម​។

លោកប៉ូ អ៊ាវគង់អគ្គនាយកក្រុមហ៊ុនAdvance Real Estate បានមានប្រសាសន៍ឱ្យដឹងថា ជាការកត់សម្គាល់​ក្នុង​រយៈ​ពេលប៉ុន្មានឆ្នាំកន្លងមកនេះ និន្នាការនៃការផ្លាស់ប្តូរ​យកផ្ទះល្វែង​ ផ្ទះវីឡា​ការិយា​ល័យ​ធ្វើការ មកជាកា​រជួលអគារ​ការិយាល័យស្តង់ដារ ​សម្រាប់ជាការិយាល័យ​ធ្វើការ​របស់ពួកគេ ដែលធ្វើឱ្យតម្រូវការ​ និងការ​ផ្គត់​ផ្គង់​​អគារការិយាល័យ​ស្តង់ដារ​ នៅក្នុងរាជធានីភ្នំពេញ មានកំណើនឡើង​ជា​បន្តបន្ទាប់ ។​​លោកបន្តថា “កំណើន​សហគ្រិន​ថ្មីៗ​កាន់តែច្រើន ធ្វើឱ្យតម្រូវ​នៃការជួលការិយាល័យ​ក៏កាន់​តែច្រើន​ ហើយ​អ្នក​វិនិយោគលើ​អគារការិយាល័យ​ ក៏​ចាប់អារម្មណ៍​ក្នុងការ​បណ្ដាក់ទុន​វិនិយោគ ​លើអគារ​ការិយាល័យ​នេះ​ក៏​មានកំណើនដូច​គ្នាដែរ”។

យោងតាមការ​សិក្សា​​របស់​ក្រុមហ៊ុន CBRE Cambodia បានបង្ហាញថា​ តម្លៃជួលការិយាល័យ​​ក្នុងឆ្នាំ២០២៣ ជាមធ្យម កម្រិត A ចន្លោះពី២៥​ ទៅ ៣២​ដុល្លារ​ក្នុងមួយម៉ែត្រក្រឡា​ ក្នុងមួយខែ ការិយា​ល័យ​កម្រិត​B មានតម្លៃ​ចន្លោះពី​២០​ ទៅ​២៥ដុល្លារ​អាមេរិក​ក្នុងមួយម៉ែត្រក្រឡា​ក្នុងមួយ​ខែ និ​ងកម្រិតC តម្លៃ ចន្លោះពី១០ ​ទៅ១៥​ដុល្លារ​អាមេរិកក្នុងមួយម៉ែត្រ​ក្រឡា​ក្នុងមួយខែ៕

ដោយៈ គង់ សូរិយា

        ភ្នំពេញៈ ថ្នាក់ដឹកនាំសមាគម អង្គការ១២ស្ថាប័ន មើលឃើញនូវសារៈសំខាន់នៃ គម្រោងផ្លូវទឹកប្រវត្តិសាស្ត្រ ពិតជាផ្ដល់សារៈសំខាន់ខ្លាំងណាស់សម្រាប់សេដ្ឋកិច្ចជាតិ និងការដឹកទំនិញ ព្រមទាំងពេលវេលា ដែលគ្រោងនេះបានប្រសិទ្ធិនាមថា ព្រែកជីកហ្វូណន-តេជោ។

គំរោងព្រែកជីកហ្វូណន តេជោ ជាផ្លូវនាវាចរណ៍តភ្ជាប់ប្រព័ន្ធទន្លេមេគង្គ និងផ្លូវសមុទ្រ ដែលមានប្រវែងសរុប១៨០គីឡូម៉ែត្រ។ គំរោងព្រែកជីកនេះ នឹងចាប់ផ្តើមចេញពីព្រែកតាកែវ ឆ្លងកាត់ព្រែកតាឯក ចូលតាមព្រែកតាហ៊ឹង និងបន្តរហូតដល់សមុទ្រកែប ដែលត្រូវឆ្លងកាត់៤ខេត្ត រួមមាន ខេត្តកណ្ដាល តាកែវ កំពត និងខេត្តកែប និងមានប្រជាជនរស់នៅតាម អមសងខាងព្រែកជីកនោះចំនួនជាង ១,៦លាននាក់ ដែលនឹងអាចអាស្រ័យផលនឹងព្រែកជីកនេះ។ជាចុងក្រោយសមាគម អង្គការទាំង១២ស្ថាប័ន សូមសម្តែងនូវការសោកស្តាយចំពោះវិទ្យុអាស៊ីសេរី ដែលតែងតែផ្សាយបង្អាក់ការដំណើរការជីកព្រែកហ្វូណន-តេជោ។

នេះជាទង្វើប្រឆាំងទៅនឹងផលប្រយោជន៍ជាតិ ដែលរាជរដ្ឋាភិបាលបានខិតខំយ៉ាងខ្លាំង ដើម្បីអភិវឌ្ឍជាតិអោយបានរីកចម្រើន។ គ្មានហេតុផលណា ដែលក្នុងនាមយើងជាខ្មែរ ទៅប្រឆាំងគម្រោងព្រែកជីកហ្វូណន-តេជោនេះទេ ការលើកយកហេតុផលរបស់វិទ្យុអាស៊ីសេរី មិនឆ្លុះបញ្ចាំងពីការពិតឡើយ។

សមាគម អង្គការ១២ស្ថាប័ន សូមអំពាវនាវដល់វិទ្យុអាស៊ីសេរី អោយបញ្ឈប់សកម្មភាពបំផ្លាញ ដល់ប្រយោជន៍ជាតិ ដើម្បីតែប្រាក់ខែបន្តិចបន្តួច ដែលទទួលបានពីបរទេស សូមអោយរួមគ្នាមកក៏សាងសង្គមជាតិអោយរុងរឿងរីកចម្រើនវិញ៕

ដោយៈ ស៊ីវ ម៉េង

        ភ្នំពេញៈ មហាវិថីសម្តេចតេជោ ឬផ្លូវ៦០ម៉ែត្រ ដែលស្ថិតនៅក្នុងទីក្រុងរណបING CITYបាននិងកំពុងទាក់ទាញ ការចាប់អារម្មណ៍ខ្លាំងក្នុងរយៈពេលប៉ុន្មានឆ្នាំចុងក្រោយនេះ។

ប៉ុន្តែតម្លៃដីធ្លីនៅកម្ពុជា បានថយចុះក្នុងប៉ុន្មានឆ្នាំចុងក្រោយនេះ ដោយសារវិបត្តិជំងឺកូវីដ១៩ និងសង្រ្គាមរុស្ស៊ី អ៊ុយក្រែន អ៊ីស្រាអែល និងក្រុមហាម៉ាស និងភាពតានតឹងផ្នែកភូមិសាស្រ្តនយោបាយ។

តើតម្លៃដីធ្លីនៅលើផ្លូវ៦០ម៉ែត្រ មានតម្លៃប៉ុន្មាននាឆ្នាំ២០២៤នេះ លោកឌិត ចណ្ណាអគ្គនាយកក្រុមហ៊ុនLucky Realtyបានមានប្រសាសន៍ឲ្យដឹង តាមបណ្តាញតេឡេក្រាម កាលពីរសៀលថ្ងៃទី៣១ មករាថា បើតាមការវាយតម្លៃ តម្លៃដីធ្លីនៅលើផ្លូវនេះ បើគិតពីស្ពានអាកាសមរតកតេជោ ដល់ស្តុបរថយន្តម៉ាសឺដេស តម្លៃស្ថិតនៅចន្លោះពី១០០០ទៅ១៣០០ដុល្លារក្នុងមួយម៉ែត្រការ៉េ។លោកបន្តថា បើគិតពីចំណុចស្តុបខាងលើ ទៅដល់ចំណុចប្រសព្វផ្លូវជាតិលេខ២ ដីនៅលើផ្លូវធំនេះ មានតម្លៃចន្លោះ៨០០ដុល្លា​រ ទៅ១០០០ដុល្លារក្នុងមួយម៉ែត្រការ៉េ ប៉ុន្តែបើនៅតាមបណ្តោយផ្លូវរណប តម្លៃអាចមានការប្រែប្រួលបន្ថែមទៀត អាស្រ័យលើស្ថានភាពភូមិសាស្រ្ត រូបរាងដី និងទំហំដីជាក់ស្តែង។

លោកឌិត ចណ្ណាបានបន្តថា “ទោះជាយ៉ាងណា ចរន្តនៃការទិញ លក់ដីធ្លីនៅតំបន់នេះ នៅតែមានសភាពស្ងប់ស្ងាត់នៅឡើយ លើកលែងតែមានការលក់ក្រោមតម្លៃទីផ្សារ ទើបមានការចាប់អារម្មណ៍ពីអ្នកវិនិយោគ”៕

ដោយៈ គង់ លាងហួរ

អន្តរជាតិ: សារពត៌មាន CNN បានចុះផ្សាយថា ប្រធានាធិបតីអាមេរិកលោកចូ បៃដិន បានស្នើដល់ប្រធានាធិបតីចិន លោកស៊ី ជីនពីង កុំឱ្យជ្រៀតជ្រែក ចូលក្នុងកិច្ចការបោះឆ្នោតជ្រើសរើស ប្រធានាធិបតីអាមេរិក ក្នុងឆ្នាំ២០២៤នេះ។

សំណើរខាងលើនេះត្រូវបានលើកឡើង ក្នុងឱកាសដែលថ្នាក់ដឹកនាំប្រទេសមហាអំណាច សេដ្ឋកិច្ចកំពូលទាំង២របស់ពិភពលោក បានជួបប្រជុំគ្នា ក្នុងទីក្រុងសាន់ហ្វ្រាន់ស៊ីស្កូ។យោងតាមប្រភពសារពត៌មាន CNN បានបន្តទៀតថា លោក ស៊ីជីនពីង បានថ្លែងតបទៅកាន់លោក ចូ បៃដិន វិញថា ទីក្រុងប៉េកាំងនឹងមិនជ្រៀតជ្រែកចូល កិច្ចការបោះឆ្នោតជ្រើសរើស ប្រធានាធិបតីអាមេរិកឡើយ។

កិច្ចពិភាក្សានេះត្រូវបានរៀបចំឡើង ក្នុងអំឡុងពេលដែលលោក ស៊ី ជីនពីង បំពេញដំណើរទស្សនកិច្ច ទៅកាន់សហរដ្ឋអាមេរិក ដើម្បីចូលរួមកិច្ចប្រជុំកំពូល APEC កាលពីឆ្នាំមុន។ ប្រភពមួយ បានទម្លាយប្រាប់សារពត៌មាន CNN ឱ្យដឹងថា លោក បៃដិន គឺជាអ្នកដែលបានលើកឡើងនូវសំណើរនេះដំបូងគេ។

គិតចាប់តាំងពីការបោះឆ្នោត ដែលលោកដូណាល់ ត្រាំ ទទួលបានជ័យជំនះក្នុងឆ្នាំ ២០១៦មក មន្ត្រីអាមេរិក ដែលភាគច្រើនមកពីបក្សប្រជាធិបតេយ្យ បានចោទម្តងហើយម្តងទៀតថា មហាអំណាចបរទេសកំពុងជ្រៀតជ្រែក ចូលក្នុងការបោះឆ្នោតរបស់អាមេរិក។

ជាការឆ្លើយតបវិញ រដ្ឋាភិបាលចិន និងរុស្ស៊ី បានច្រានចោលម្តងហើយម្តងទៀត នូវការចោទប្រកាន់ទាំងនេះ ប៉ុន្តែក្រុមមន្ត្រីអាមេរិក នៅតែបន្តការចោទប្រកាន់បែបនេះ ជាសាធារណៈទៅលើប្រទេសទាំងពីរដដែល៕

        ដោយៈ គង់ សូរិយា

        ភ្នំពេញៈ ស្ពានឆ្លងកាត់ទន្លេរមេគង្គក្នុងខេត្តក្រចេះ បានលេចរូបរាងបណ្តើរៗហើយ ជាមួយនឹងសរសេរស្ពានសាងសង់ ឈរតម្រៀបជួរគ្នាគួរឲ្យចាប់អារម្មណ៍។

អភិបាលខេត្តក្រចេះ លោកវ៉ា ថនបានសរសេរលើបណ្តាញទំនាក់ទំនងសង្គមរបស់ខ្លួន ដោយភ្ជាប់ជាមួយរូបថតស្ពានជាច្រើនសន្លឹកកាលពីពេលថ្មីៗនេះថា ស្ពានដែលតភ្ជាប់ពីស្រុកចិត្របុរី ទៅស្រុកព្រែកប្រសព្វ ហើយនៅពេលខាងមុខ យើងនឹងបានឆ្លងទាំងអស់គ្នា។

លោកអភិបាលខេត្តបានបន្តថា “អរគុណសន្តិភាព ដែលផ្តល់នូវការអភិវឌ្ឍខេត្តក្រចេះយើង”។

ស្ពានដ៏មានសារៈសំខាន់នេះ ត្រូវបានផ្តល់ហិរញ្ញប្បទានសម្ប​ទានពីរដ្ឋាភិបាលចិន ក្នុងទំហំទឹក​ប្រាក់ចំនួនជិត១១២លានដុល្លារអាមេរិក ដើម្បីសាងសង់ស្ពានឆ្លងកាត់ទន្លេរនេះ រួមនឹងការស្តារឡើងវិញនូវផ្លូវជាតិលេខ៧។ គម្រោង​ទាំងនេះ​ ជា​ការតភ្ជាប់​របៀង​សេដ្ឋកិច្ច​២ គឺ​របៀង​សេដ្ឋកិច្ច​ខាងត្បូង (​បាងកក​-​ភ្នំពេញ​-​ហូ​ជី​មី​ញ​) និង របៀង​សេដ្ឋកិច្ច​កណ្តាល (​យូ​ណាន -​វៀង​ច័​ន្ធ​-​ត្រពាំង​ក្រៀល ) ឬត​ភ្ជាប់​មក​តំបន់​មេគង្គ​។

អតីតអ្នកនាំពាក្យក្រសួងសាធារណៈការ និងដឹកជញ្ជូនលោកវ៉ាស៊ីម សូរិយាបានមានប្រសាសន៍ឲ្យដឹងនាពេលកន្លងមកថា “នៅពេ​លដែល​គម្រោង​ផ្លូវ និង​ស្ពាន​នេះបានបញ្ចប់ នឹង​អនុញ្ញាតឱ្យ​អ្នកធ្វើដំណើរ​ឆ្លងកាត់ ​ពី​តំបន់​មួយ​ទៅ​តំបន់​មួយទៀត និង​ផ្ទៃក្នុង​កាន់​តែមាន​ភាពងាយស្រួល ជាពិសេស​ការដឹកជញ្ជូន​ទំនិញ​នានា​ ឆ្លងកាត់​កាន់តែ​បាន​លឿន និង​ទាន់ពេលវេលា”​។​

ដោយឡែក​គម្រោង​សាងសង់​ស្ពាន​ ឆ្លងកាត់ទន្លេ​មេគង្គ និង​ផ្លូវ​ត​ភ្ជាប់​នេះ មាន​ប្រវែង​សរុប​៣៣,៤៥ គីឡូម៉ែត្រ ត​ភ្ជាប់​ពី​ផ្លូវជាតិ​លេខ​៧ (​រង្វង់​មូល​ខ្លា​ស្ទុះ​) ទៅ​ផ្លូវជាតិ​លេខ​៦០B ដោយ​ក្នុងនោះ​ការសាងសង់​ស្ពាន​ឆ្លងកាត់​ទន្លេមេគង្គ​ មានប្រវែង១៧៦១​ម៉ែត្រ មានមុខ​កាត់​ទទឹង​១៣,៥​ម៉ែត្រ ត​ភ្ជាប់​ពី​ត្រើយ​ខាងកើត​ស្ថិត​ត្រង់ ភូមិ​បុស្ស​លាវ​លើ ឃុំ​បុស​លាវ ស្រុក​ចិត្រ​បុរី ទៅ​ត្រើយ​ខាងលិច​ត្រង់​ភូមិ​ព្រែក​ព្រលូង ឃុំ​សោ​ប ស្រុក​ព្រែក​ប្រសព្វ ខេត្តក្រចេះ​។

ក្រុមហ៊ុនចិន នឹងប្រើពេល​សាងសង់​ស្ពាននេះ រយៈពេលប្រមា​ណ៤២​ខែ អនុវត្ត​ដោយ​ក្រុមហ៊ុន​សំណង់​សៀង​ហៃ (SCG) និង​ត្រួតពិនិត្យ​គុណភាព ​ដោយ​ក្រុមហ៊ុន​ទីប្រឹក្សាបច្ចេកទេស​ក្វាង​ចូ​វ​វ៉ាន​អាន​៕

​