ធនាគារពិភពលោកបង្កើនការព្យាករកំណើនសេដ្ឋកិច្ចកម្ពុជាកើនឡើង៦,១ភាគរយសម្រាប់ឆ្នាំ២០២៤

ដោយ: គង់ លាងហួរ

ភ្នំពេញ: ធនាគារពិភពលោក បានរក្សាការព្យាករកំណើនសេដ្ឋកិច្ចកម្ពុជានៅកម្រិត៥,៥ភាគរយ សម្រាប់ឆ្នាំ២០២៣នេះ និងបង្កើនការព្យាករដល់៦,១ភាគរយសម្រាប់ឆ្នាំ២០២៤។ នេះបើយោងតាមរបាយការណ៍ចុងក្រោយ ដែលបានចេញផ្សាយនៅថ្ងៃចន្ទនេះ។

កំណើនសេដ្ឋកិច្ចរបស់ប្រទេសកម្ពុជា ត្រូវបានជំរុញដោយការនាំចេញសម្លៀកបំពាក់ ទេសចរណ៍ កសិកម្ម សំណង់ និងអចលនទ្រព្យ។

លោក Aaditya Mattoo ប្រធានសេដ្ឋវិទូប្រចាំតំបន់អាស៊ីបូព៌ា និងប៉ាស៊ីហ្វិករបស់ធនាគារពិភពលោក បានមានប្រសាសន៍ថា “ទស្សនវិស័យសេដ្ឋកិច្ចរបស់កម្ពុជា នៅតែមានភាពវិជ្ជមាន ដែលជំរុញភាគច្រើន ដោយការងើបឡើងវិញ នៃវិស័យសេវាកម្ម ជាពិសេសទេសចរណ៍ និងការកែលម្អផលិតកម្មកសិកម្ម”។លោកបានថ្លែងក្នុងសន្និសីទកាសែត វីដេអូស្តីពីការចាប់ផ្តើមរបាយការណ៍ បច្ចុប្បន្នភាពសេដ្ឋកិច្ចអាស៊ីបូព៌ា និងប៉ាស៊ីហ្វិកថា “នៅឆ្នាំ២០២៤សេដ្ឋកិច្ចកម្ពុជា នឹងកាន់តែប្រសើរឡើងបន្ថែមទៀតដោយអាចនឹងកើនឡើងក្នុងអត្រា៦,១% ដោយសារការនាំចេញទំនិញត្រូវបានព្យាករថានឹងមានភាពប្រសើរឡើង និងធ្វើពិពិធកម្មបន្តិចម្តងៗ”។

លោក Mattoo បានបន្ថែមថា លំហូរវិនិយោគផ្ទាល់ពីបរទេស (FDI) ចូលប្រទេសកម្ពុជា អាចនឹងត្រូវបានជំរុញដោយច្បាប់ថ្មីស្តីពីការវិនិយោគ និងកិច្ចព្រមព្រៀងពាណិជ្ជកម្មសេរីថ្មី ដែលបានផ្តល់សច្ចាប័ន៕Xinhua៕

លោក សុខ លូ ស្នើឱ្យសិង្ហបុរី ងាកមកវិនិយោគលើផ្នែកកសិឧស្សាហកម្មនៅក្នុងខេត្តបាត់ដំបង

បាត់ដំបងៈ អភិបាលខេត្តបាត់ដំបង លោក សុខ លូ បានជម្រាបជូនតំណាងទូតសិង្ហបុរីប្រចាំនៅកម្ពុជាពីសក្តានុពលផ្នែកកសិកម្ម ជាពិសេសអង្ករដ៏មានគុណភាព និងស្នើឱ្យវិនិយោគិនប្រទេសនេះ ងាកមកវិនិយោគលើផ្នែកកសិឧស្សាហកម្ម ក្នុងការកែច្នៃផលិតផលសម្រាប់លក់ក្នុងស្រុក និងនាំចេញទៅក្រៅប្រទេស។

ការស្នើបែបនេះ ធ្វើឡើងតាមរយៈជំនួបរវាងរដ្ឋបាលខេត្តបាត់ដំបងដឹកនាំដោយលោក សុខ លូ អភិបាលខេត្ត និងលោកស្រី Teo Lay Cheng ឯកអគ្គរដ្ឋទូតសិង្ហបុរីកាលថ្ងៃទី២៧ ខែកញ្ញា ឆ្នាំ២០២៣។ នេះបើយោងតាមរដ្ឋបាលខេត្តបាត់ដំបង។

បើតាមប្រភពដដែល នៅក្នុងឱកាសនោះ លោក សុខ លូ បានលើកឡើងថា បាត់ដំបង គឺខេត្តដែលមានសក្ដានុពលខ្លាំងលើវិស័យកសិកម្ម ហើយកំពុងទាមទារឱ្យវិនិយោគិនក្នុងស្រុកនិងក្រៅស្រុក ពិសេសសិង្ហបុរីចាប់អារម្មណ៍វិនិយោគផ្នែកកសិឧស្សាហកម្ម ដូចជាការកែច្នៃផ្លែឈើជាដើម។ លោកបានបន្តថា៖ «ផ្នែកកសិឧស្សាហកម្មដែលខេត្តត្រូវការអ្នកវិនិយោគគឺការយកផលិតផលកសិកម្មយកទៅកែច្នៃដើម្បីធ្វើការលក់ និងនាំចេញទៅក្រៅប្រទេស ព្រោះសព្វថ្ងៃនេះផលិតផលកសិកម្មជាច្រើន នៅមិនទាន់បានយកមកកែច្នៃអស់លទ្ធភាពនៅឡើយទេ ធ្វើឱ្យផលិតផលទាំងនោះលើសតម្រូវការទីផ្សារបណ្ដាលឱ្យមានការធ្លាក់ថ្លៃចុះ»។

លោកអភិបាលខេត្តបានជម្រាបជូនឯកអគ្គរដ្ឋទូតសិង្ហបុរីទៀតថា៖«ទន្ទឹមនឹងគុណភាពដ៏ឈ្ងុយឆ្ងាញ់របស់អង្ករកម្ពុជាដែលកំពុងនាំចេញទៅក្រៅប្រទេសហើយនោះ ក្នុងនោះខេត្តនេះ ក៏មានដំណាំម្រេចសំឡូត ដែលជាដំណាំមួយមិនសូវមានអ្នកស្គាល់ច្រើនដូចដំណាំម្រេចនៅកំពតឡើយ។ តែចំពោះដំណាំម្រេចសំឡូតនេះគឺត្រូវបានទទួលការលើកសរសើរអំពីគុណភាព និងរសជាតិឆ្ងាញ់មិនចាញ់ដំណាំម្រេចនៅឯខេត្តកំពតឡើយ»។ ជាការឆ្លើយតបលោកស្រី Teo Lay Cheng ឯកអគ្គរដ្ឋទូតនៃសាធារណរដ្ឋសិង្ហបុរី បានលើកឡើងថា ខេត្តបាត់ដំបងមានភាពទាក់ទាញខ្លាំង ពិសេសចំពោះអគារបុរាណនិងចំណាស់ៗដែលបន្សល់ទុកពីសម័យអាណានិគមនិយមបារាំង ដែលកំពុងលើកសម្រស់ក្រុងបាត់ដំបងឱ្យកាន់តែមានភាពចាប់អារម្មណ៍បានមួយកម្រិតទៀត។

លោកស្រីបានបន្តថា៖«បន្ទាប់ទស្សនកិច្ចរោងម៉ាស៊ីនកិនស្រូវដើម្បីយល់បន្ថែមអំពីបញ្ហាស្រូវអង្ករនៅក្នុងខេត្តបាត់ដំបងរួចមក សង្ឃឹមថាអាចយល់ដឹងបន្ថែមពីស្រូវអង្ករនៅខេត្តនេះបានកាន់តែច្រើន ហើយយើងក៏សង្ឃឹមថាស្រូវអង្ករពីប្រទេសកម្ពុជានឹងអាចនាំចូលទៅប្រទេសសិង្ហបុរីផងដែរ»។

ជុំវិញរឿងនេះដែរ អ្នកជំនាញសេដ្ឋកិច្ចនៃវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជាលោក ហុង វណ្ណៈ បានថ្លែងថា ការចុះមកស្វែងយល់ពីសក្ដានុពលរបស់ខេត្តគឺជាសញ្ញាល្អនិងបង្ហាញពីការរួមចំណែកធានាដល់និរន្តរភាពសេដ្ឋកិច្ចរយៈពេលវែងរបស់កម្ពុជា។

លោកថា៖«ជាភារកិច្ចដែលខេត្តពិសេសរដ្ឋាភិបាលគួរធ្វើបន្ថែមទៀតដើម្បីផ្តល់ទំនុកចិត្តសម្រាប់អ្នកវិនិយោគ គឺរដ្ឋាភិបាលចាំបាច់ត្រូវមានកិច្ចសន្ទនាច្បាស់លាស់តាមរយៈការជំរុញកិច្ចសហការជាមួយវិនិយោគិនក្នុងស្រុកដែលមានលទ្ធភាពធំៗបង្ហាញពីសុទិដ្ឋិនិយមពីកម្ពុជាបង្ហាញសក្តានុពលវិស័យអាទិភាពដល់វិនិយោគិនបរទេសទាំងនោះថាយើងពិតជាមានផែនការច្បាស់លាស់ដើម្បីធានាសុខុមាលភាពរបស់កម្ពុជារយៈពេលវែង»។

យោងតាមរបាយការណ៍របស់រដ្ឋបាលខេត្តបាត់ដំបងគិតត្រឹមរយៈពេល៥ឆ្នាំពោលគឺពីឆ្នាំ២០១៨-២០២២ ខេត្តមានដំណាំស្រូវអនុវត្តបានចំនួន៤១៤ ៧៦១ហិកតានិងដំណាំសាកវប្បកម្មនិងឧស្សាហកម្មសរុបមានចំនួន២៥៤ ៩៧៤ហិកតា៕

ប្រទេសចិននឹងក្លាយទៅជាទីផ្សារទេសចរណ៍ដ៏ធំបំផុតរបស់ពិភពលោក ក្នុងរយៈពេលប៉ុន្មានឆ្នាំខាងមុខនេះ

ដោយ: គង់ លាងហួរ
អន្តរជាតិ: យោងតាមសារពត៌មានXinhua បានចុះផ្សាយថា ប្រទេសចិននឹងក្លាយទៅជាទីផ្សារទេសចរណ៍ និងការធ្វើដំណើរដ៏ធំបំផុតរបស់ពិភពលោកក្នុងរយៈពេលចន្លោះពី៣ឆ្នាំទៅដល់៥ឆ្នាំខាងមុខនេះ។

លោកស្រី Julia Simpson ប្រធានក្រុមប្រឹក្សាភិបាលនៃការធ្វើដំណើរ និងទេសចរណ៍ពិភពលោក (WTTC) បានប្រាប់សារពត៌មាន Xinhua ក្នុងបទសម្ភាសន៍មួយនៅវេទិកាសេដ្ឋកិច្ចទេសចរណ៍សកល (GTEF) ដែលរៀបចំឡើងថ្មីៗនេះនៅទីក្រុងម៉ាកាវ ថា “ទីបំផុតប្រទេសចិនបានបើកដំណើរការឡើងវិញហើយ ហើយយើងកំពុងមើលឃើញការស្ទុះងើបឡើងវិញយ៉ាងពេញលេញ” ។

លោកស្រី Simpson អះអាងថា “ប្រទេសចិនគឺជាទីផ្សារដ៏សំខាន់មួយ ដែលមានតម្លៃ១,៨ពាន់ពាន់លានដុល្លារអាមេរិក។ ទីផ្សារនេះបានបាត់បង់តម្លៃមួយចំនួនក្នុងអំឡុងពេលនៃជំងឺរាតត្បាត ប៉ុន្តែទីផ្សារចិនបានបើកទ្វារម្តងទៀត ហើយជនជាតិចិនបានត្រលប់មកវិញ។ មនុស្សក៏ចាប់ផ្តើមទៅលេងប្រទេសចិនដែរ ដូច្នេះទស្សនវិស័យនៃការធ្វើដំណើរ និងទេសចរណ៍របស់ប្រទេសចិនគឺល្អណាស់”។លោកស្រីបានបន្ថែមថា “យើងកំពុងរំពឹងថា ក្នុងរយៈពេលចន្លោះពី៣ទៅ៥ឆ្នាំខាងមុខ ប្រទេសចិននឹងក្លាយជាទីផ្សារនៃការធ្វើដំណើរ និងទេសចរណ៍ដ៏ធំបំផុតរបស់ពិភពលោក… ហើយវាពិតជាអស្ចារ្យមិនគួរឱ្យជឿ”។

យោងតាមទិន្នន័យរបស់អង្គការទេសចរណ៍ពិភពលោក(WTO)បានបង្ហាញថា វិស័យទេសចរណ៍អន្តរជាតិបានបន្តងើបឡើងវិញពីវិបត្តិដ៏អាក្រក់បំផុតក្នុងប្រវត្តិសាស្ត្ររបស់ខ្លួន ខណៈចំនួននៃការមកដល់របស់ភ្ញៀវបានឈានដល់៨៤ភាគរយនៃកម្រិតមុនជំងឺរាតត្បាតរវាងខែមករាដល់ខែកក្កដាឆ្នាំ២០២៣នេះ។

អង្គការ WTO បញ្ជាក់ថា ការបង្កើនប្រសិទ្ធភាព និងការកែសម្រួលវិធានការឆ្លើយតបនឹងជំងឺកូវីដ នៅក្នុងប្រទេសចិន ក៏ដូចជាការបើកឡើងវិញនូវទីផ្សារ និងគោលដៅនៅតំបន់អាស៊ីផ្សេងទៀត ត្រូវបានគេរំពឹងថា នឹងបន្តជំរុញការធ្វើដំណើរទាំងក្នុងតំបន់ និងជំរុញទៅកាន់ផ្នែកផ្សេងទៀតនៃពិភពលោក៕

កម្ពុជាទាក់ទាញទុនវិយោគពីវិស័យសំណង់បាន ១,៤ពាន់លានដុល្លារ កើនឡើងជាង១៣០%

ភ្នំពេញ ៖ កម្ពុជាបានទាក់ទាញគម្រោងសំណង់នៅទូទាំងប្រទេសបានចំនួន ៨២៦ គម្រោង ដែលមានទុនវិយោគសរុបប្រមាណ ១,៤ ពាន់លានដុល្លារនៅត្រីមាសទី២ ឆ្នាំ២០២៣ កើនឡើង ១៣០,២% ធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមព្រឹត្តិបត្រស្ថិតិសេដ្ឋកិច្ច និងហិរញ្ញវត្ថុប្រចាំត្រីមាសទី២ ឆ្នាំ២០២៣ របស់ក្រសួងសេដ្ឋកិច្ច និងហិរញ្ញវត្ថុ។

របាយការណ៍បានឱ្យដឹងថា នៅត្រីមាសទី២ ឆ្នាំ២០២៣ គម្រោងសំណង់ទូទាំងប្រទេស មានសរុបចំនួន ៨២៦ គម្រោង បានធ្លាក់ចុះ ១៧៣ គម្រោង ស្មើនឹង ១៧,៣% ប៉ុន្តែទុនវិនិយោគ មានសរុបចំនួន ១ ៤៧៥ លានដុល្លារអាមេរិក បានកើនឡើង ១៣០,២% ក្នុងនោះ សំណង់លំនៅដ្ឋានមានចំនួន ៦០៧,៥ លានដុល្លារអាមេរិក សំណង់ឧស្សាហកម្មមានចំនួន ៥៦៨,៥ លានដុល្លារអាមេរិក សំណង់ពាណិជ្ជកម្មមានចំនួន ២៤៩ លានដុល្លារ សំណង់សាធារណៈមានចំនួន ៨៧,១ លានដុល្លារ និងសំណង់ទេសចរណ៍មានចំនួន ៧៩,៦ លានដុល្លារ។ក្រសួងសេដ្ឋកិច្ច និងហិរញ្ញវត្ថុ បានបញ្ជាក់ថា សេដ្ឋកិច្ចកម្ពុជា ត្រូវបានប៉ាន់ស្មានថានឹងសម្រេចបានក្នុងអត្រា ៥,៦% នៅឆ្នាំ២០២៣នេះ ដែលខ្ពស់ជាឆ្នាំ២០២២ កន្លងទៅ។ ការឡើងនេះ គឺគាំទ្រដោយការរក្សាបានកំណើនល្អ នៃកម្មន្តសាលមិនមែនកាត់ដេរ ដែលបម្រើឱ្យការនាំចេញ និងការប្រើប្រាស់ក្នុងស្រុក ការកើនឡើងនូវគម្រោងវិនិយោគធំៗ ការងើបឡើងវិញនៃសំណើសាងសង់ និងការងើបឡើងវិញគួរឱ្យកត់សម្គាល់នៃវិស័យសំណង់ទេសរណ៍ តាមរយៈភ្ញៀវទេសចរក្នុងស្រុក និងអន្តរជាតិ។ក្រសួងបានឱ្យដឹងថាទៀតថា ជាការសង្កេត សកម្មភាពសេដ្ឋកិច្ចខ្លះទៅទ្រឹង និងខ្លះទៀតថមថយ ជាពិសេស ជាពិសេស ការនាំចេញផលិតផលកាត់ដេរ។ ដោយឈរលើមូលដ្ឋាននៃស្ថានភាពសូចនាករសំខាន់ៗក្នុងត្រីមាសទី២ ឆ្នាំ២០២៣ ធៀបនឹងត្រីមាសដូចគ្នាឆ្នាំមុន បានបង្ហាញថា ស្ថានភាពសេដ្ឋកិច្ចភាពល្អប្រសើរ ដែលស្តែងតាមរយៈ ការកើនឡើងចំនួនភ្ញៀវអន្តរជាតិជាង ២៧១% ការកើនឡើងទុនគម្រោងសាងសង់ប្រមាណ ១៣០,២% ការកើនឡើងនៃទុនវិនិយោគប្រមាណ ៦៣,៣% ការកើនឡើងនៃទំហំទំនិញនាំចេញមិនរាប់បញ្ចូលមាសប្រមាណ ០,១% និងការថមថយប្រេងឆៅប្រមាណជាង ៣០%៕

ទីបំផុតឥណ្ឌូនេស៊ី ដាក់ឱ្យដំណើរការរថភ្លើងល្បឿនលឿន ឬ Bullet Train ដំបូងគេនៅអាស៊ីអាគ្នេយ៍

តែម សុខុម

ហ្សាការតា: ប្រទេសឥណ្ឌូណេស៊ី បានដាក់ឱ្យដំណើរការរថភ្លើងល្បឿនលឿនដែលគេស្គាល់ថា Bullet Train ដំបូងគេបង្អស់មិនធ្លាប់មាននៅអាស៊ីអាគ្នេយ៍ កាលពីថ្ងៃអាទិត្យ ទី០១ ខែតុលា ដែលនឹងតភ្ជាប់ទីក្រុងធំបំផុត២ក្នុងប្រទេសនេះ។

ជាផ្នែកមួយនៃគំនិតផ្តួចផ្តើមហេដ្ឋារចនាសម្ព័ន្ធ “ខ្សែក្រវាត់ និងផ្លូវ” (BRI) របស់មហាយក្សចិន និងដែលទទួលបានហិរញ្ញប្បទានមួយភាគធំពីបណ្ដាក្រុមហ៊ុនរដ្ឋចិន គម្រោងរថភ្លើងល្បឿនល្បឿនក្រោមទុនវិនិយោគ៧,៣ពាន់លានដុល្លារ នេះត្រូវបានដាក់ឱ្យដំណើរការស្វាគមន៍សាធារណជនកាលពីថ្ងៃអាទិត្យ ទី០១ ខែតុលា បន្ទាប់ពីមានការពន្យារពេលជាច្រើនលើក។

រថភ្លើងនេះនឹងធ្វើដំណើររវាងរដ្ឋធានីហ្សាការតា និងក្រុងបានឌុង (Bandung) ក្នុងខេត្តជ្វាខាងលិច (West Java)។ Bandung គឺជាទីក្រុងធំទី២ របស់ប្រទេសឥណ្ឌូនេស៊ី និងជាមជ្ឈមណ្ឌលសិល្បៈ និងវប្បធម៌ដ៏សំខាន់។ក្រុមមន្ត្រីនិយាយថា ខ្សែរថភ្លើងល្បឿនលឿនប្រវែង១៣៨គីឡូម៉ែត្រដែលមានឈ្មោះជាផ្លូវការថា WHOOSH នេះដើរដោយថាមពលអគ្គិសនីដោយគ្មានការបំភាយកាបូនដោយផ្ទាល់ និងរត់ក្នុងល្បឿនប្រមាណ៣៥០គីឡូម៉ែត្រក្នុងមួយម៉ោង ដោយកាត់បន្ថយពេលវេលាធ្វើដំណើររវាងរដ្ឋធានីហ្សាការតា និង Bandung ពី៣ម៉ោងមកនៅត្រឹមក្រោមមួយម៉ោង។គ្រប់គ្រងដោយក្រុមហ៊ុនបណ្តាក់ទុនរួមគ្នារបស់រដ្ឋ PT Kereta Cepat Indonesia China (PT KCIC) រថភ្លើងនេះធ្វើដំណើររវាងស្ថានីយ Halim ក្នុងរដ្ឋធានីហ្សាការតា ភាគខាងកើត និងស្ថានីយ Padalarang ក្នុងទីក្រុង Bandung ភាគខាងលិច ហើយត្រូវបានតភ្ជាប់យ៉ាងល្អជាមួយប្រព័ន្ធដឹកជញ្ជូនសាធារណៈក្នុងតំបន់។

ក្រុមមន្ត្រីបានបន្ថែមថា រថភ្លើងដែលត្រូវបានកែសម្រួលយ៉ាងពិសេសឱ្យស្របទៅនឹងលក្ខខណ្ឌអាកាសធាតុត្រូពិចនៃប្រទេសឥណ្ឌូនេស៊ី នេះត្រូវបានបំពាក់ដោយប្រព័ន្ធសុវត្ថិភាពដែលអាចឆ្លើយតបទៅនឹងគ្រោះរញ្ជួយដី ទឹកជំនន់ និងស្ថានភាពគ្រាអាសន្នផ្សេងៗទៀត៕ CNN៕

ក្រុមហ៊ុនអាកាសចរណ៍រដ្ឋ China Eastern Airlines គ្រោងទិញយន្តហោះ C919 ចំនួន១០០គ្រឿង ដែលជាចំនួនច្រើនបំផុតមិនធ្លាប់មាន

ដោយ: គង់ លាងហួរ
អន្តរជាតិ: ក្រុមហ៊ុនអាកាសចរណ៍រដ្ឋចិន China Eastern Airlines គ្រោងនឹងទិញយន្តហោះប្រភេទ C919 ចំនួន១០០គ្រឿងទៀតក្រោមកិច្ចព្រមព្រៀង ដែលមានតម្លៃ១០ពាន់លានដុល្លារអាមេរិក។

ការប្រកាសនេះនឹងក្លាយជាការបញ្ជាទិញដ៏ធំបំផុតមិនធ្លាប់មានសម្រាប់យន្តហោះដែលផលិតឡើងដោយសាជីវកម្មយន្តហោះពាណិជ្ជកម្មចិន (COMAC)។

ក្រុមហ៊ុន China Eastern Airlines អះអាងថា ខ្លួនបានទទួលការបញ្ចុះតម្លៃច្រើន សម្រាប់កិច្ចព្រមព្រៀងនេះ ហើយយន្តហោះទាំងនោះនឹងត្រូវបានបញ្ជូនមកឱ្យក្រុមហ៊ុនចាប់ពីឆ្នាំ២០២៤ ដល់ឆ្នាំ២០៣១។ យន្តហោះប្រភេទ C919 មានតម្លៃក្នុងបញ្ជីចំនួន៩៩លានដុល្លារ ប៉ុន្តែវាអាចត្រូវបានលក់បញ្ចុះតម្លៃរហូតដល់៥០ភាគរយ ជាពិសេសសម្រាប់ម៉ូដែលថ្មីៗ។

កិច្ចព្រមព្រៀងនេះបានធ្វើឡើង រយៈពេល៥ខែបន្ទាប់ពីយន្តហោះដឹកអ្នកដំណើររបស់ចិន ដែលត្រូវបានផលិតឡើងដោយសាជីវកម្ម COMAC បានធ្វើការហោះហើរលើកដំបូងរបស់ខ្លួនដោយជោគជ័យកាលពីខែឧសភាកន្លងទៅ។

យន្តហោះដឹកអ្នកដំណើរ ឬហៅថាយន្តហោះពាណិជ្ជកម្មប្រភេទC919 ដែលផលិតឡើងដោយប្រទេសចិននឹងត្រូវប្រកួតប្រជែងជាមួយយន្តហោះប្រភេទ A320neo របស់ក្រុមហ៊ុន Airbus SE និងយន្តហោះរបស់ក្រុមហ៊ុនអាមេរិក Boeing។

ក្រុមហ៊ុនអាកាសចរណ៍រដ្ឋ China Eastern Airlines ដែលមានទីស្នាក់ការកណ្តាលនៅទីក្រុងសៀងហៃ គឺជាអ្នកប្រើប្រាស់យន្តហោះ C919 ដំបូងគេ ដោយក្រុមហ៊ុនបានទិញយន្តហោះប្រភេទនេះចំនួន៥គ្រឿង ដែលក្នុងនោះ៣គ្រឿងត្រូវបានប្រគល់មកឱ្យរួចរាល់ ខណៈ២គ្រឿងផ្សេងទៀតត្រូវបានគេរំពឹងថានឹងប្រគល់នៅចុងឆ្នាំនេះ ៕

ប្រទេសវៀតណាមទទួលបានភ្ញៀវទេសចរបរទេសលើសគោលដៅដាក់ចេញចំនួន៨លាននាក់ ក្នុងឆ្នាំ២០២៣នេះ

ដោយ: គង់ លាងហួរ
អន្តរជាតិ: សារព័ត៌មានវៀតណាម VN Express បានរាយការណ៍ថា ប្រទេសវៀតណាមបានទទួលស្វាគមន៍ការមកដល់នៃភ្ញៀវទេសចរអន្តរជាតិប្រមាណ៨,៩លាននាក់ ក្នុងរយៈពេល៩ខែដំបូងនៃឆ្នាំ២០២៣នេះពោលគឺលើសគោលដៅដាក់ចេញចំនួន៨លាននាក់ក្នុងឆ្នាំនេះ។
យោងតាមទិន្នន័យ ដែលដកស្រង់ចេញពីរបាយការណ៍របស់ការិយាល័យស្ថិតិទូទៅ បានបង្ហាញថា ចំនួនតួលេខភ្ញៀវទេសចរអន្តរជាតិក្នុងរយៈពេល៩ខែកន្លងមកនេះ បានកើនឡើង៤,៧ដង បើធៀបនឹងឆ្នាំមុន ប៉ុន្តែបើធៀបនឹងមុនពេលផ្ទុះជំងឺរាតត្បាតកូវីដ-១៩ វាស្មើនឹង៦៩%ប៉ុណ្ណោះនៃចំនួនភ្ញៀវទេសចរដែលចូលមកទស្សនាប្រទេសវៀតណាម។

ប្រទេសវៀតណាមកត់សម្គាល់ឃើញថា កូរ៉េខាងត្បូងគឺជាប្រទេស ដែលមានប្រជាជនមកកំសាន្តច្រើនជាងគេបង្អស់នៅក្នុងប្រទេសរបស់ខ្លួន ដោយមានជាង ២,៥លាននាក់ ខណៈភ្ញៀវទេសចរចិនឈរនៅលំដាប់លេខពីរ ដែលមានចំនួន១,១លាននាក់។លំដាប់ទី៣គឺ ភ្ញៀវទេសចរមកពីកោះតៃវ៉ាន់ ដែលមានចំនួន៥៧៥.០០០នាក់ ភ្ញៀវទេសចរអាមេរិកឈរនៅលំដាប់ទី៤ ដែលមានចំនួន៥៤៨.០០០នាក់ ខណៈជប៉ុនឈរនៅលំដាប់ទី៥ ដោយមានចំនួនភ្ញៀវទេសចរមកទស្សនាប្រទេសវៀតណាមប្រមាណ៤១៤.០០០នាក់ក្នុងរយៈពេល៩ខែកន្លងមកនេះ។

ប្រទេសវៀតណាមបានប្រណាំងប្រជែងខ្លាំងលើវិស័យទេសចរណ៍អន្តរជាតិ តាមរយៈការដាក់ចេញនូវគោលនយោបាយបន្ធូរបន្ថយទិដ្ឋាការ និងជំរុញយុទ្ធនាការផ្សព្វផ្សាយពីឧស្សាហកម្មគ្មានផ្សែងរបស់ពួកគេផងដែរ។កាលពីឆ្នាំ២០១៩កន្លងទៅ ប្រទេសវៀតណាមបានស្វាគមន៍ភ្ញៀវទេសចរអន្តរជាតិប្រមាណ១៨លាននាក់ និងទាញបានប្រាក់ចំណូលពីវិស័យទេសចរណ៍ចំនួន៣០ពាន់លានដុល្លារអាមេរិក៕

ដំណឹងល្អ! តម្លៃប្រេងសាំងបានបញ្ចុះថ្លៃ ២០០រៀល គិតត្រឹមដើមខែតុលា

ភ្នំពេញ៖ ការកំណត់ថ្លៃលក់រាយប្រេងឥន្ធនៈ ចាប់ពីថ្ងៃទី០១ ដល់១០ ខែតុលា ឆ្នាំ២០២៣នេះ ធៀបនឹងរយៈពេលដូចគ្នា ត្រូវបានមើលឃើញថា ប្រេងសាំងធម្មតាធ្លាក់ថ្លៃចំនួន ២០០រៀល ខណៈប្រេងម៉ាស៊ូតរក្សាថ្លៃនៅដដែល។ក្នុងសេចក្តីជូនដំណឹង ចេញផ្សាយនៅថ្ងៃទី១ ខែតុលានេះ ក្រសួងពាណិជ្ជកម្ម បានឲ្យដឹងថា សម្រាប់ប្រេងសាំងធម្មតាថ្លៃ បានចុះថ្លៃពី ៤៧៥០រៀល មកត្រឹម ៤ ៥៥០រៀល ក្នុង១លីត្រ។ ដោយឡែក ប្រេងម៉ាស៊ូតរក្សាថ្លៃនៅដដែល គឺ ៤ ៨៥០រៀល ក្នុង១លីត្រ។

តម្លៃប្រេងចុងក្រោយគិតត្រឹមព្រឹកថ្ងៃទី១ ខែតុលា ឆ្នាំ២០២៣

ក្រសួងពាណិជ្ជកម្ម បានបញ្ជាក់ក្នុងលិខិតនេះទៀតថា ពាក់ព័ន្ធការកំណត់ថ្លៃលក់រាយប្រេងឥន្ធនៈនៅកម្ពុជានេះ ក្រសួងគ្រាន់តែស្រង់តម្លៃឡើង-ចុះ នៃប្រេងតាមទីផ្សារអន្តរជាតិ មកគណនាតាមប្រកាសដូចមានក្នុងភ្ជាប់ក្នុងឯកសារប៉ុណ្ណោះ។

សូមបញ្ជាក់ថា រហូតមកដល់បច្ចុប្បន្ននេះ ប្រមុខរាជរដ្ឋាភិបាល នៅតែបន្ត និងសម្រេចបញ្ចុះតម្លៃលក់រាយប្រេងឥន្ធនៈនៅកម្ពុជាដដែល គឺចំនួន ៦,៥សេនដុល្លារ ក្នុង១លីត្រ ដើម្បីជួយសម្រួលដល់ជីវភាពរបស់ប្រជាជន និងដោយមានការរួមចំណែកពីក្រុមហ៊ុនចែកចាយប្រេងឥន្ធនៈនៅកម្ពុជា៕

សមាគមមូលនិធិគ្រួសារខ្មែរ សមាគមសប្បុរសធម៌មេត្តា និងក្រុមហ៊ុន Cambodia My Second Home (CM2H) បានសហការក្នុងបេសកកម្មរួមគ្នាជាមួយដៃគូសហការជាច្រើនទៀត ដើម្បីលើកកម្ពស់សប្បុរសធម៌ នៅក្នុងសហគមន៍ និងការផ្សព្វផ្សាយមនុស្សធម៌

ដោយ: គង់ លាងហួរ

ភ្នំពេញ: កាលពីថ្ងៃទី២៩ ខែកញ្ញា ឆ្នាំ២០២៣កន្លងទៅ សមាគមមូលនិធិគ្រួសារខ្មែរ និងសមាគមសប្បុរសធម៌មេត្តា បានធ្វើការសហការក្នុងបេសកកម្មរួមគ្នាមួយ ក្នុងការលើកកម្ពស់សហគមន៍ និងការផ្សព្វផ្សាយមនុស្សធម៌ បន្ទាប់ពីសមាគមទាំង២បានចុះហត្ថលេខាលើអនុស្សរណៈនៃការយោគយល់គ្នា (MoU)។

សមាគមទាំង២មានគោលបំណងពង្រីកការងារសហគមន៍ ការស្ម័គ្រចិត្ត និងផ្តល់ការគាំទ្រសម្រាប់អ្នកដែលត្រូវការជំនួយបំផុត ព្រមទាំងជំរុញព្រំដែននៃក្តីមេត្តា និងការប្តេជ្ញាចិត្ត។

នៅថ្ងៃដដែលនោះ ក៏មានការប្រារព្ធពិធីបង្កើតភាពជាដៃគូដ៏សំខាន់ផងដែរ រវាង Cambodia My Second Home (CM2H) និងម៉ាកយីហោ Lifestyle ល្បីៗគួរឱ្យចាប់រម្មណ៍ជាច្រើនដូចជា The Cabinè Restaurant Méso Beauty Center W CLUB – Phnom Penh SOHO MALL J Snooker & Pool Club ភោជនីយដ្ឋានហុងកុង 香港茶餐廳 Luk Hot Pot Chgai Phnom Penh Chet Steak Pastas & Wine និង QSS Studio។

ការបង្កើតសម្ព័ន្ធភាពជាយុទ្ធសាស្ត្រទាំងនេះមានគោលបំណង សរបង្ហាញឱ្យឃើញនូវវិសាលគម និងការផ្តល់ជូនពិសេសសម្រាប់សមាជិក “CM2H Membership Privileges”។

មន្ត្រីចិនអះអាងថា ប្រទេសចិននឹងសម្រេចបានកំណើនសេដ្ឋកិច្ចជាង៥% នៅឆ្នាំ២០២៣នេះ

ដោយ: គង់ លាងហួរ
ប៉េកាំងៈ ទីប្រឹក្សាមួយរូបរបស់ធនាគារកណ្តាលចិនបានអះអាងកាលពីថ្ងៃពុធកន្លងទៅថា ប្រទេសចិនត្រូវបានគេរំពឹងថា នឹងសម្រេចបាននូវកំណើនសេដ្ឋកិច្ចលើសពី៥ភាគរយបន្តិចនៅឆ្នាំនេះ។នេះបើយោងតាមការចុះផ្សាយដោយសារពត៌មាន Reuters កាលពីពេលថ្មីៗកន្លងមកនេះ។

លោក Wang Yiming សមាជិកគណៈកម្មាធិការគោលនយោបាយរូបិយវត្ថុនៃធនាគារប្រជាជនចិន (PBOC) បានថ្លែងប្រាប់វេទិកាសេដ្ឋកិច្ចមួយថា ស្ថានភាពសេដ្ឋកិច្ចរបស់ប្រទេសចិននៅពេលនេះមានភាពខុសប្លែកគ្នាយ៉ាងខ្លាំងពីប្រទេសជប៉ុនក្នុងទសវត្សរ៍ឆ្នាំ១៩៩០។

ក្រុមអ្នកវិភាគមួយចំនួនជឿជាក់ថា សេដ្ឋកិច្ចរបស់ប្រទេសចិន ដែលរងគ្រោះដោយសារការធ្លាក់ចុះនៃវិស័យអចលនទ្រព្យ បំណុលខ្ពស់ និងប្រជាសាស្រ្តវ័យចំណាស់កំពុងឆ្ពោះទៅរកស្ថានភាព“Japanification”ដែលពាក្យនេះគេចង់សំដៅទៅលើ ការជាប់គាំងសេដ្ឋកិច្ចរបស់ប្រទេសជប៉ុនចាប់តាំងពីទសវត្សរ៍ឆ្នាំ១៩៩០។

ប៉ុន្តែលោក Wang បានអះអាងថា “មិនមានស្ថានភាពដូចសេដ្ឋកិច្ចជប៉ុននៅទសវត្សរ៍ឆ្នាំ១៩៩០ Japanification បែបនេះកើតឡើងនៅក្នុងប្រទេសចិននោះឡើយ ហើយយើងនៅតែស្ថិតក្នុងដំណាក់កាលកំណើនសេដ្ឋកិច្ចពីមធ្យមទៅខ្ពស់”។

ទន្ទឹមគ្នានេះ រដ្ឋាភិបាលចិនក៏បានកំណត់គោលដៅកំណើនសេដ្ឋកិច្ចរបស់ខ្លួនប្រហែល៥ភាគរយសម្រាប់ឆ្នាំ២០២៣នេះផងដែរ៕