ដោយ: គង់ លាងហួរ

ភ្នំពេញ: មន្ត្រីអង្គការសហប្រជាជាតិមួយរូប បានលើកឡើងថា ការធ្លាក់ចុះគួរឱ្យកត់សម្គាល់ នៃអត្រាភាពក្រីក្រ គឺជាជំហានវិជ្ជមានឆ្ពោះទៅរកការបញ្ចប់ឋានៈរបស់កម្ពុជា ក្នុងនាមជាប្រទេសប្រទេសអភិវឌ្ឍន៍តិចតួច (LDC) ។

អត្រានៃភាពក្រីក្រនៅកម្ពុជា បានធ្លាក់ចុះមកត្រឹម១៦,៦ភាគរយក្នុងឆ្នាំ២០២២ ពី៣៦,៧ភាគរយក្នុងឆ្នាំ២០១៤។ នេះបើយោងតាមសន្ទស្សន៍ នៃភាពក្រីក្រសកលលោក (MPI) ឆ្នាំ២០២៣ ដែលចេញផ្សាយកាលពីសប្តាហ៍មុន ដោយកម្មវិធីអភិវឌ្ឍន៍អង្គការសហប្រជាជាតិ (UNDP) និងសាកលវិទ្យាល័យ Oxford ។

របាយការណ៍បានបន្តថា ចំនួនប្រជាជនក្រីក្រនៅកម្ពុជា ត្រូវបានកាត់បន្ថយ អស់ពាក់កណ្តាលពី៥,៦លាននាក់ មកត្រឹម២,៨លាននាក់”។ លោកបន្ថែមថា “ប្រជាជនកម្ពុជាម្នាក់ ក្នុងចំណោម៥នាក់បានចាកចេញពីភាពក្រីក្រ ក្នុងរយៈពេលត្រឹមតែ៧ឆ្នាំកន្លះតែប៉ុណ្ណោះ”។

លោកស្រី Alissar Chaker តំណាងទីភ្នាក់ងារសម្រាប់ការអភិវឌ្ឍន៍អង្គការសហប្រជាជាតិ(UNDP) ប្រចាំកម្ពុជា បានប្រាប់សារពត៌មាន Xinhua ថា “វឌ្ឍនភាពរបស់កម្ពុជា ក្នុងការកាត់បន្ថយភាពក្រីក្រ គឺជាសញ្ញាវិជ្ជមានមួយឆ្ពោះ ទៅរកការបញ្ចប់ឋានៈរបស់កម្ពុជាក្នុងនាមជាប្រទេសអភិវឌ្ឍតិចតួច”។លោកស្រី Chaker បានមានប្រសាសន៍ថា កម្ពុជាស្ថិតក្នុងចំណោមប្រទេសចំនួន១៩៣ ផ្សេងទៀតដែលបានអនុម័តរបៀបវារៈឆ្នាំ២០២០ សម្រាប់ការអភិវឌ្ឍន៍ប្រកបដោយចីរភាព ក្នុងឆ្នាំ២០១៥ ដែលបានសន្យាថា នឹងមិនទុកនរណាម្នាក់ឱ្យនៅពីក្រោយឡើយ។លោកស្រីបានបន្តថា “ដូច្នេះវាមានសារៈសំខាន់ណាស់ ក្នុងការថែរក្សាសន្ទុះវិជ្ជមាន និងធានាឱ្យមានវឌ្ឍនភាព លើសូចនាករទាំងអស់”។

​លោកស្រីបញ្ជាក់ថា “UNDP ប្តេជ្ញាបន្តការបង្កើនល្បឿន នៃគោ​លដៅអភិវឌ្ឍន៍ប្រកបដោយចីរភាព (SDGs) និងគាំទ្រដល់កិច្ចខិតខំប្រឹងប្រែងរបស់រដ្ឋាភិបាលកម្ពុជា និងសង្គមស៊ីវិលក្នុងការកាត់បន្ថយការស្ទះជាប់គាំង និងកសាងភាពធន់”។សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានមានប្រសាសន៍កាលពីខែមុនថា កម្ពុជាត្រូវបានព្យាករណ៍ថា នឹងបញ្ចប់ពីឋានៈជាប្រទេសអភិវឌ្ឍន៍តិចតួចនៅឆ្នាំ២០២៧។សម្តេចតេជោបានថ្លែងនៅក្នុងសុន្ទរកថា ជាសាធារណៈថា “ខ្ញុំមានទំនុកចិត្តយ៉ាងខ្លាំងថា កម្ពុជានឹងបញ្ចប់ពីឋានៈជាប្រទេសអភិវឌ្ឍន៍តិចតួចនៅឆ្នាំ២០២៧  ហើយនឹងសម្រេចបាននូវគោលដៅរបស់យើង ក្នុងការក្លាយជាប្រទេស ដែលមានប្រាក់ចំណូលមធ្យមកម្រិតខ្ពស់នៅឆ្នាំ២០៣០”៕

ដោយ: គង់ លាងហួរ
អន្តរជាតិ: ការវិនិយោគទៅលើសណ្ឋាគារនៅតំបន់អាស៊ីប៉ាស៊ីហ្វិកបានដាំក្បាលចុះ៥១% ពីមួយឆ្នាំទៅមួយឆ្នាំ នៅឆមាសទីមួយនៃឆ្នាំនេះ ដោយសារបញ្ហាប្រឈមផ្នែកម៉ាក្រូសេដ្ឋកិច្ច និងការកើនឡើងនៃថ្លៃដើមបំណុលបានជះឥទ្ធិពលទៅលើការពង្រាយមូលធន។

យោងតាមទិន្នន័យ និងការវិភាគរបស់ទីភ្នាក់ងារ JLL បានឱ្យដឹងថា ទឹកប្រាក់វិនិយោគលើសណ្ឋាគារបានដាំក្បាលចុះដល់៣,១៣ពាន់លានដុល្លារនៅក្នុងឆមាសទីមួយបើធៀបនឹង៦,៤១ពាន់លានដុល្លារក្នុងរយៈពេលដូចគ្នាកាលពីឆ្នាំមុន។

ទោះបីជាយ៉ាងនេះក្តី ក្នុងអំឡុងឆមាសទីមួយ សកម្មភាពវិនិយោគមានភាពរឹងមាំបំផុតនៅក្នុងប្រទេសជប៉ុន ដែលប្រទេសនេះបានវិនិយោគ១,៥៤ពាន់លានដុល្លារ និងប្រទេសអូស្ត្រាលី/នូវែលសេឡង់ ដែលបានវិនិយោគ៨២០លានដុល្លារ ពោលគឺបានហក់ឡើង៥៦% និង១៨៩%រៀងៗគ្នា ពីមួយឆ្នាំទៅមួយឆ្នាំ។លោក Nihat Ercan នាយកប្រតិបត្តិក្រុមហ៊ុន JLL Hotels & Hospitality Group, Asia Pacific បានមានប្រសាសន៍ថា យើងបានសង្កេតឃើញពីផលប៉ះពាល់នៃការបន្តផ្តាច់ទំនាក់ទំនងរវាងតម្រូវការទេសចរណ៍ដ៏រឹងមាំ បញ្ហាប្រឈមម៉ាក្រូសេដ្ឋកិច្ច និងភូមិសាស្ត្រនយោបាយនៅក្នុងឆមាសទីមួយ ដែលបណ្តាលឱ្យមានគម្លាតរវាងការរំពឹងទុកចំពោះតម្លៃរបស់អ្នកលក់ និងការចូលប្រើប្រាស់ដើមទុនរបស់អ្នកទិញ។

លោកបានបន្ថែមថា“ទោះជាយ៉ាងណាក្តី ដំណើរការជួញដូរនៃវិស័យនេះនៅតែមានភាពរឹងមាំ ហើយមូលដ្ឋានគ្រឹះផ្សេងទៀត រួមទាំងការមកដល់នៃទេសចរណ៍ និងអត្រាកាន់កាប់ខ្ពស់ ផ្តល់ឱ្យយើងនូវទំនុកចិត្តយ៉ាងពេញលេញថា បរិយាកាសវិនិយោគបច្ចុប្បន្នគឺផ្អែកលើកត្តាខាងក្រៅ”៕

ដោយ: គង់ លាងហួរ
ភ្នំពេញ: មន្ត្រីជាន់ខ្ពស់រដ្ឋាភិបាលកម្ពុជា បានមានប្រសាសន៍ថា ក្របខណ្ឌកិច្ចសហប្រតិបត្តិការត្បូងពេជ្រ ទ្វេរភាគីបានលើកកម្ពស់ទំនាក់ទំនងកម្ពុជា-ចិន ឱ្យឈានឡើងដល់កម្រិតថ្មី ខណៈដែលប្រទេសទាំងពីរប្រារព្ធខួបលើកទី៦៥នៃទំនាក់ទំនងការទូត។

លោក ផៃ ស៊ីផាន អ្នកនាំពាក្យរដ្ឋាភិបាលកម្ពុជា បានមានប្រសាសន៍ថា ការជឿទុកចិត្តគ្នាជាយុទ្ធសាស្ត្រ ការគាំទ្រ និងការគោរពបូរណភាពទឹកដី និងអធិបតេយ្យភាព ការមិនជ្រៀតជ្រែក និងកិច្ចសហប្រតិបត្តិការឈ្នះ-ឈ្នះ បានជំរុញឱ្យចំណងមិត្តភាពរវាងប្រទេសទាំងពីរកាន់តែរឹងមាំ និងមិនអាចបំបែកបាន។លោកបានបញ្ជាក់ប្រាប់សារពត៌មាន Xinhua នៅក្នុងបទសម្ភាសន៍ផ្តាច់មុខមួយកាលពីពេលថ្មីៗនេះថា “ប្រទេសទាំងពីរតែងតែឆ្ពោះទៅមុខជាមួយគ្នា ដោយសារទំនាក់ទំនង និងកិច្ចសហប្រតិបត្តិការដ៏ជិតស្និទ្ធ”។

លោក ផៃ ស៊ីផាន បានបន្តថា ក្របខ័ណ្ឌកិច្ចសហប្រតិបត្តិការត្បូងពេជ្រទ្វេរភាគី “Diamond Hexagon” ដែលបង្កើតឡើងដោយប្រទេសទាំងពីរកាលពីខែកុម្ភៈ នឹងជំរុញការកសាងសហគមន៍កម្ពុជា-ចិន ជាមួយនឹងអនាគតរួមគ្នាក្នុងយុគសម័យថ្មី។

លោកបានបញ្ជាក់ថា ក្របខណ្ឌនេះត្រូវបានផ្តោតលើវិស័យអាទិភាព ចំនួន៦រួម មាន កិច្ចសហប្រតិបត្តិការ នយោបាយ សមត្ថភាព និងគុណភាពផលិតកម្ម កសិកម្ម ថាមពល សន្តិសុខ និងការផ្លាស់ប្តូររវាងប្រជាជន និងប្រជាជន។ខណៈដែលឆ្នាំ២០២៣នេះ គឺជាខួបលើកទី១០ នៃគំនិតផ្តួចផ្តើមខ្សែក្រវាត់ និងផ្លូវ (BRI) ដែលស្នើឡើងដោយប្រទេសចិន លោក ផៃ ស៊ីផាន មានប្រសាសន៍ថា គំនិតផ្តួចផ្តើមនេះបានផ្តល់នូវអត្ថប្រយោជន៍យ៉ាងច្រើនដល់ការអភិវឌ្ឍសេដ្ឋកិច្ចសង្គម និងការកាត់បន្ថយភាពក្រីក្រនៅកម្ពុជា។

លោកបានមានប្រសាសន៍ថា “ក្រោម គំនិតផ្តួចផ្តើម BRI កម្ពុជាទទួលបានអត្ថប្រយោជន៍ជាច្រើន ហើយតំបន់អាស៊ានទាំងមូលបានចាត់ទុក BRI ជាមូលដ្ឋានគ្រឹះសម្រាប់ការអភិវឌ្ឍសង្គមនៅក្នុងតំបន់របស់យើង”។

លោកបានបន្តថា BRI បានលើកកម្ពស់សន្តិភាព កិច្ចសហប្រតិបត្តិការអន្តរជាតិ និងការអភិវឌ្ឍ ហើយគំនិតផ្តួចផ្តើមនេះមិនបានបង្កើតភាពច្របូកច្របល់ចំពោះប្រទេសណាមួយ ឬរារាំងដល់ការអភិវឌ្ឍរបស់ប្រទេសដទៃឡើយ។

លោក ផៃ ស៊ីផាន បានមានប្រសាសន៍ថា “នៅក្រោម គម្រោង BRI គ្មានប្រទេសណាមួយនៅក្នុងតំបន់ត្រូវបានដាក់ឱ្យនៅឯកោទេ ពោលគឺតភ្ជាប់តំបន់អាស៊ី តំបន់អាស៊ាន ជាមួយប្រទេសចិន ដែលជាទីផ្សារដ៏ធំដែលមានប្រជាជនជាង១,៤ពាន់លាននាក់”។លោកបានមានប្រសាសន៍ថា ក្រោមគម្រោង BRI គម្រោងធំៗជាច្រើនដូចជា រោងចក្រវារីអគ្គិសនី តំបន់សេដ្ឋកិច្ចពិសេសក្រុងព្រះសីហនុ ផ្លូវល្បឿនលឿនភ្នំពេញ-ព្រះសីហនុ ពហុកីឡដ្ឋានជាតិមរតកតេជោ អាកាសយានដ្ឋានអន្តរជាតិសៀមរាប-អង្គរ និងផ្លូវល្បឿនលឿនភ្នំពេញ-បាវិត ត្រូវបានអភិវឌ្ឍឡើងក្នុងប្រទេសកម្ពុជា។

លោកបានបញ្ជាក់ថា “គម្រោងធំៗទាំងនេះបានចូលរួមចំណែកយ៉ាងសំខាន់ក្នុងការពន្លឿនការអភិវឌ្ឍន៍សេដ្ឋកិច្ចសង្គម និងទេសចរណ៍ប្រកបដោយនិរន្តរភាពនៅកម្ពុជា”។

យោងតាមស្ថិតិផ្លូវការបានបង្ហាញថា ប្រទេសចំនួន១៥១ និងអង្គការអន្តរជាតិចំនួន៣២ បានចុះហត្ថលេខាលើឯកសារក្រោមក្របខ័ណ្ឌ BRI គិតត្រឹមថ្ងៃទី ៦ ខែមករា។លោក ផៃ ស៊ីផាន បានបន្ថែមថា ភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) និងកិច្ចព្រមព្រៀងពាណិជ្ជកម្មសេរីកម្ពុជា-ចិន (FTA) បានជួយជំរុញយ៉ាងខ្លាំងដល់ការនាំចេញ និងការងើបឡើងវិញនៃសេដ្ឋកិច្ចរបស់កម្ពុជាក្នុងយុគសម័យក្រោយជំងឺរាតត្បាតកូវីដ-១៩។

លោក ផៃ ស៊ីផាន បានមានប្រសាសន៍ថា កតិកាសញ្ញាទាំងពីរនេះ គឺជាមេដែកដើម្បីទាក់ទាញអ្នកវិនិយោគបរទេសកាន់តែច្រើន ជាពិសេសពីប្រទេសចិន។
លោកបានអះអាងថា “កិច្ចព្រមព្រៀងពាណិជ្ជកម្មទាំងនេះនឹងជួយឱ្យកម្ពុជាបញ្ចប់ពីឋានៈជាប្រទេសអភិវឌ្ឍតិចតួចនៅឆ្នាំ២០២៧ និងក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសដែលមានប្រាក់ចំណូលខ្ពស់នៅឆ្នាំ២០៥០”។

លោក ផៃ ស៊ីផាន បានបញ្ជាក់ទៀតថា យន្តការកិច្ចសហប្រតិបត្តិការទាំងអស់នេះ បានផ្តល់នូវសន្ទុះយ៉ាងខ្លាំងក្លាដល់ការកសាងសហគមន៍ចិន-កម្ពុជា ដែលមានគុណភាពខ្ពស់ កម្រិតខ្ពស់ និងស្តង់ដារខ្ពស់ រួមជាមួយនឹងអនាគតរួមគ្នាក្នុងយុគសម័យថ្មី៕

ដោយ: គង់ លាងហួរ
ភ្នំពេញ: យោងតាមរបាយការណ៍របស់ក្រសួងពាណិជ្ជកម្ម នៅថ្ងៃអង្គារនេះបានឱ្យដឹងថា ការនាំចេញសរុបរបស់កម្ពុជាទៅកាន់បណ្តាប្រទេសជាសមាជិកកិច្ចព្រមព្រៀងដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) សម្រេចបានទំហំទឹកប្រាក់ចំនួន៤,០៧ពាន់លានដុល្លារអាមេរិក នៅក្នុងឆមាសទីមួយ ឆ្នាំ២០២៣នេះ។

តួលេខខាងលើនេះបង្ហាញពីការកើនឡើង២៤ភាគរយ បើធៀបនឹងទឹកប្រាក់ចំនួន៣,២៨ពាន់លានដុល្លារ ដែលកម្ពុជារកបាន ក្នុងរយៈពេលដូចគ្នាកាលពីឆ្នាំមុន។របាយការណ៍ ដដែលបានបន្តថាក្នុងអំឡុងខែមករារហូតដល់ ខែមិថុនាឆ្នាំនេះ ទិសដៅនាំចេញកំពូលទាំង៣របស់កម្ពុជា ក្រោមកិច្ចព្រមព្រៀង RCEP គឺ ប្រទេស វៀតណាម ចិន និង ជប៉ុន។

កម្ពុជាបាននាំចេញផលិតផល ដែលមានតម្លៃជិត១,៤៣ពាន់លានដុល្លារទៅកាន់ប្រទេសវៀតណាម ពោលគឺកើនឡើង២២ភាគរយ ៧១៣លានដុល្លារទៅកាន់ប្រទេសចិន ពោលគឺកើនឡើង១៧ភាគរយ និង៥៤៥លានដុល្លារទៅកាន់ប្រទេសជប៉ុន ពោលគឺកើនឡើង១ភាគរយ។

កិច្ចព្រមព្រៀងពាណិជ្ជកម្មសេរី RCEP មានសមាជិកប្រទេសនៅតំបន់អាស៊ីប៉ាស៊ីហ្វិកចំនួន១៥ ដែលរួមមានបណ្តារដ្ឋជាសមាជិកអាស៊ានចំនួន១០ និងដៃគូពាណិជ្ជកម្មចំនួន៥ ដូចជា ចិន ជប៉ុន កូរ៉េខាងត្បូង អូស្ត្រាលី និងនូវែលសេឡង់។

រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មកម្ពុជា លោក ប៉ែន សុវិជាតិ បានមានប្រសាសន៍ថា កិច្ចព្រមព្រៀង RCEP ដែលបានចូលជាធរមាននៅថ្ងៃទី១ ខែមករា ឆ្នាំ២០២២ គឺជាកម្លាំងចលករដ៏សំខាន់សម្រាប់កំណើននៃការនាំចេញរបស់កម្ពុជាក្នុងយុគសម័យក្រោយជំងឺរាតត្បាតកូវីដ-១៩។

លោកបានប្រាប់សារពត៌មាន Xinhua ថា “កំណើននេះបង្ហាញយ៉ាងច្បាស់ថាបណ្តាប្រទេស RCEP គឺជាទីផ្សារដ៏មានសក្តានុពលសម្រាប់ផលិតផល ដែលផលិតបាននៅក្នុងប្រទេសកម្ពុជា”។

លោកបន្តថា “ជាមួយនឹងការអនុគ្រោះពន្ធ ដែលត្រូវបានផ្តល់ជូនក្រោមកិច្ចព្រមព្រៀង RCEP នោះគ្មានអ្វីគួរឱ្យសង្ស័យទេថា ការនាំចេញរបស់យើងទៅកាន់បណ្តាប្រទេស RCEP នឹងបន្តកើនឡើងពេញមួយឆមាសទីពីរនៃឆ្នាំនេះ និងឆ្នាំក្រោយផងដែរ”។

លោក ប៉ែន សុវិជាតិ បានអះអាងថា កិច្ចព្រមព្រៀងពាណិជ្ជកម្មសេរីដ៏ធំបំផុតរបស់ពិភពលោកមួយនេះ ក៏បានក្លាយជាមេដែកស្រូបទាញលំហូរវិនិយោគផ្ទាល់ពីបរទេស (FDI) កាន់តែច្រើនមកកម្ពុជាផងដែរ។

លោកបានបន្ថែមថា “កិច្ចព្រមព្រៀងពាណិជ្ជកម្មដ៏ធំនេះ រួមជាមួយនឹងកិច្ចព្រមព្រៀងពាណិជ្ជកម្មសេរីទ្វេរភាគីផ្សេងទៀត នឹងជួយកម្ពុជាឱ្យរួចផុតពីឋានៈប្រទេសអភិវឌ្ឍតិចតួចនៅឆ្នាំ២០២៧ និងសម្រេចបាននូវគោលដៅក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសដែលមានចំណូលខ្ពស់នៅឆ្នាំ២០៥០”៕