(ព្រះសីហនុ)៖ នារសៀលថ្ងៃទី០៦ ខែកក្កដា ឆ្នាំ២០២៣នេះ ឯកឧត្ដម ថោង ខុន រដ្ឋមន្ដ្រីក្រសួងទេសចរណ៍ បានអញ្ជើញសម្ពោធបើកឱ្យប្រើប្រាស់ជាផ្លូវការកំពង់ផែទេសចរណ៍ខេត្តព្រះសីហនុ ដែលជាកំពង់ផែដ៏ធំមួយដែលអាចចេញចូលអូប័រទេសចរណ៍តូចធំ ២០គ្រឿងក្នុងពេលតែមួយ និងជាទីចំណតដ៏សុវត្ថិភាពតែមួយគត់ សក្កិសមជាកំពង់ផែទេសចរណ៍ដ៍មានសក្តានុពលប្រចាំខេត្តព្រះសីហនុ និងដើម្បីសម្រួលដល់ការធ្វើដំណើររបស់ភ្ញៀវទេចរទាំងជាតិ និងអន្តរជាតិ។

បើតាមអ្នកឧកញ៉ា ទៀ វិចិត្រ បានឱ្យដឹងថា ដោយមានការជំរុញនិងលើកទឹកចិត្តពីរដ្ឋបាលខេត្ត លើវិស័យទេសចរណ៍ផ្លូវទឹក និងទទួលបានការអនុញ្ញាតពីប្រតិភូរាជរដ្ឋាភិបាលទទួលបន្ទុក អគ្គនាយកកំពង់ផែអន្តរជាតិខេត្តព្រះសីហនុ ក្រុមហ៊ុន G.T.V.C IMPORT EXPORT CO.LTD បានទទួលសិទ្ធវិនិយោគពីកំពង់ផែអន្តរជាតិក្រុងព្រះសីហនុ ដែលស្ថិតនៅច្រកទី១ លើផ្ទៃដី ប្រមាណ ២២,០០០ម៉ែត្រការេ និងមានកំពង់ផែដែលអាចចេញចូល អូប័រទេសចរណ៍តូចធំ ២០គ្រឿងក្នុងពេលតែមួយ។ កំពង់ផែមួយនេះគឺជាទីចំណតដ៏សុវត្ថិភាពតែមួយគត់ ដែលមានលក្ខណៈសម្បត្តិពេញលេញ សក្កិសមជាកំពង់ផែទេសចរណ៍ដ៍មានសក្តានុពលប្រចាំខេត្តព្រះសីហនុ។លើកឡើងនាឱកាសនោះដែរឯកឧត្ដម គួច ចំរើន ក៏បានស្នើសុំការគាំទ្រពីឯកឧត្ដមរដ្ឋមន្ត្រីក្រសួងទេសចរណ៍ លើកការរៀបចំកំពង់ផែទេសចរណ៍ខេត្តព្រះសីហនុ ទៅជាកំពង់ផែទេសចរណ៍អន្តរជាតិ ដើម្បីធ្វើការផ្លាស់ប្តូរភ្ញៀវទេសចរមកពី ថៃ និងវៀមណាម និងលំហូរពីបណ្តាប្រទេសដ៏ទៃទៀតឱ្យមានការផ្លាស់ប្តូរទេសចរទៅមកផងដែរ។ ដោយលោកអះអាងថា នាពេលកន្លងមកខេត្តព្រះសីហនុ មិនទាន់មានកំពង់ផែទេសចរណ៍ខ្នាតអន្តរជាតិនៅឡើយទេ ដោយលោកគ្រោងស្នើសុំរាជរដ្ឋាភិបាល ដើម្បីរៀបចំកំពង់ផែនេះឱ្យក្លាយជាកំពង់ផែខ្នាតអន្តរជាតិនាទឹកដីក្រុងព្រះសីហនុនាពេលខាងមុខផងដែរ។លើកឡើងនាឱកាសនោះឯកឧត្ដម ថោង ខុន បានឱ្យដឹងថា ក្រោមការដឹកនាំប្រកបដោយគតិបណ្ឌិត និងឈ្លាសវៃរបស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា, កម្ពុជាទទួលបានសុខសន្តិភាព ស្ថិរភាពនយោបាយ សន្តិសុខ និងសណ្តាប់ធ្នាប់សង្គមយ៉ាងពេញលេញ និងមានការអភិវឌ្ឍលើគ្រប់វិស័យ ជាពិសេស វិស័យទេសចរណ៍កម្ពុជាបានរីកលូតលាស់គួរជាទីមោទនៈ ដោយត្រូវបានចាត់ទុកថាជា «មាសបៃតង» ដែលបានដើរតួនាទីជាចន្ទល់គន្លឹះមួយក្នុងការជំរុញកំណើនសេដ្ឋកិច្ចជាតិ តាមរយៈការបង្កើនចំណូលជូនជាតិ ព្រមទាំងការបង្កើតការងារ និងការលើកកម្ពស់ជីវភាពរបស់ប្រជាពលរដ្ឋ។ឯកឧត្ដម ថោង ខុន ក៏បានបង្ហាញជំនឿយ៉ាងមុតមាំថា កំពង់ផែទេសចរណ៍ និងសម្បទាទ្រទ្រង់នៅទីនេះនឹងមិនត្រឹមតែជាសម្បទាទេសចរណ៍ដ៏សំខាន់មួយ ដែលនឹងផ្តល់នូវភាពងាយស្រួល សុវត្ថិភាព សន្តិសុខសណ្តាប់ធ្នាប់ល្អជូនដល់ភ្ញៀវទេសចរមកពីគ្រប់ទិសទី រួមចំណែកលើកស្ទួយដល់វិស័យទេសចរណ៍តភ្ជាប់ទៅតាមបណ្តាកោះនានាក្នុងខេត្តព្រះសីហនុប៉ុណ្ណោះទេ ប៉ុន្តែក៏នឹងរួមចំណែកជាមួយរដ្ឋាភិបាលក្នុងការបម្រើនិងផ្តល់សេវាកម្មទេសចរណ៍ប្រកបដោយគុណភាព និងសុវត្ថិភាព, បង្កើតឱកាសការងារជូនប្រជាពលរដ្ឋ, និងដើរតួនាទីយ៉ាងសំខាន់ក្នុងការទាក់ទាញភ្ញៀវទេសចរជាតិ និងអន្តរជាតិមកកាន់កម្ពុជានិយាយជារួម និងមកកាន់ខេត្តព្រះសីហនុ និយាយដោយឡែកឱ្យមកលេងកំសាន្តកាន់តែច្រើន និងពន្យាការស្នាក់នៅកាន់តែយូរថ្ងៃថែមទៀតផងដែរ៕

ដោយៈ តែម សុខុម

រីយ៉ាដ: រោងចក្រថាមពលអ៊ីដ្រូសែនបៃតង ដ៏ធំបំផុតរបស់ពិភពលោក ស្ថិតក្នុងគម្រោងទីក្រុងឆ្លាតវៃ តម្លៃ៥០០ពាន់លានដុល្លារអាមេរិក នៃប្រទេសអារ៉ាប៊ីសាអូឌីត បានឈានចូលដំណាក់កាលសាងសង់ជាផ្លូវការហើយ។ នេះបើយោងតាមសារព័ត៌មាន Arab News ចុះផ្សាយកាលពីថ្ងៃព្រហស្បតិ៍ ទី៦ ខែកក្កដា។

តាមរយៈសេចក្តីថ្លែងការណ៍ ទៅកាន់ផ្សារហ៊ុនអារ៉ាប៊ីសាអូឌីត Tadawul ក្រុមហ៊ុន ACWA Power បញ្ជាក់ថា ក្រុមហ៊ុនបុត្រសម្ព័ន្ធរបស់ខ្លួន NEOM Green Hydrogen Co បានចេញសេចក្តីជូនដំណឹងអំពីការ ចាប់ផ្ដើមដំណើរការការងារវិស្វកម្ម លទ្ធកម្ម និងការសាងសង់ដែលត្រូវបានអនុម័តរួចហើយ។ក្រុមហ៊ុន ACWA Power បានបន្ថែមទៀតថា ការរួមចំណែករបស់ខ្លួនចំនួន៣០០លានដុល្លារ សម្រាប់ការជូនដំណឹងឱ្យចាប់ផ្ដើមដំណើរការការងារនេះ នឹងក្លាយជាផ្នែកមួយ នៃការរួមចំណែកសមធម៌របស់ខ្លួនដល់គម្រោងនេះ។

សេចក្តីថ្លែងការណ៍ដដែលបញ្ជាក់ថា កិច្ចព្រមព្រៀងគម្រោងទាំងអស់ ត្រូវបានចុះហត្ថលេខារួចហើយ ហើយបណ្ដាដៃគូក៏បានយល់ព្រមគ្រប់គ្រងហានិភ័យ នៃការអនុវត្តការងារទាក់ទិននឹងកិច្ចសន្យា EPC រួចហើយដែរ។

កាលពីខែឧសភា ក្រុមហ៊ុន NGHC បានចុះហត្ថលេខាលើឯកសារហិរញ្ញវត្ថុជាមួយធនាគារក្នុងស្រុក ធនាគារថ្នាក់តំបន់ និងធនា​គារអន្តរជាតិអន្តរជាតិ ព្រមទាំងក្រុមហ៊ុនវិនិយោគសរុបចំនួន២៣ ដើម្បីសាងសង់រោងចក្រអ៊ីដ្រូសែនបៃតង ក្នុងតម្លៃវិនិយោគសរុបចំនួន៨,៤ពាន់លានដុល្លារខាងលើនេះ។

NGHC គឺជាក្រុមហ៊ុនបណ្តាក់ទុនរួមគ្នារបស់ ACWA Power, Air Products និង NEOM។នៅពេលសាងសង់បញ្ចប់ជាស្ថាពរនៅឆ្នាំ២០២៦ រោងចក្រខាងលើនេះត្រូវបានរំពឹងថា នឹងផលិតអ៊ីដ្រូសែន គ្មានកាបូនបានរហូតដល់ទៅ៦០០តោនក្នុងមួយថ្ងៃ៕ Arab News៕

ដោយៈ គង់ សូរិយា

        កណ្តាលៈ ក្រសួងសាធារណៈការ និងដឹកជញ្ជូនបានបង្ហាញពីសមិទ្ឋផល ដែលបានសាងសង់បញ្ចប់ ជាសមិទ្ឋផលដែលបាននិងកំពុងដើរតួនាទីសំខាន់ក្នុងការតភ្ជាប់ និងលើកកំពស់សេដ្ឋកិច្ចជាតិ។

ក្រសួងនេះ​បានបង្ហាពី សមិទ្ធិផល “ស្ពានជ្រៃធំ” ស្ថិតក្នុងស្រុកកោះធំ ខេត្តកណ្តាល ដែលស្ពាននេះមានបណ្ដោយប្រវែង៤២៨ម៉ែត្រ

និងបានបើកការដ្ឋានសាងសង់ កាលពីថ្ងៃទី១៤ មករា ឆ្នាំ២០១៤ ក្រោមអធិបតីភាព សម្ដេចតេជោ និងសម្ពោធដាក់ឱ្យប្រើប្រាស់ កាលពីថ្ងៃទី១៣ ខែកុម្ភៈ២០១៧ ក្រោមអធិបតីភាព សម្ដេចតេជោនាយក​រដ្ឋមន្រ្តីនៃកម្ពុជា។ក្រសួងសាធារណៈការបានបញ្ជាក់ថា “សមិទ្ធិផលស្ពាននេះដើរ​តួនាទីយ៉ាងសំខាន់ ក្នុងការជួយ សម្រួលការដឹកជញ្ជូនគ្រប់ប្រភេទ ជាពិសេស ទំនិញ និងកសិផលសម្រាប់ការដោះដូរពាណិជ្ជកម្ម រវាងកម្ពុជា-វៀតណាម ព្រមទាំងបានជំរុញ និងប្រែក្លាយតំបន់នៅតាមព្រំដែនឱ្យក្លាយជាតំបន់អភិវឌ្ឍន៍ និងរីកចម្រើនផងដែរ”៕