ដោយៈ គង់ សូរិយា

        ភ្នំពេញៈ ក្រុមអាជីវករ ដែលបានទិញតូបផ្សារ TRIUMPH COMMERCIAL CENTER (TCC) វិនិយោគដោយក្រុមហ៊ុន យុនណាន សេងម៉ៅ អ៊ីនវេសមិន (Yun Nan Sheng Mao Investment Co, Ltd) ស្ថិតនៅភូមិបឹងសាឡាង សង្កាត់ឫស្សីកែវ ខណ្ឌឫស្សីកែវ រាប់រយនាក់ បានចេញតវ៉ាជាបន្តបន្ទាប់។

ការតវ៉ានេះ កើតមានក្រោយពីថៅកែក្រុមហ៊ុន ព្រងើយកន្តើយ មិនព្រមចេញ​មុខដោះស្រាយ​ជាមួយអតិថិជន និងរំលោភកិច្ចព្រមព្រៀង ដែលបានសន្យាជាមួយអ្នកទិញ។

លោក ហាក់ ចាន់ថា តំណាងអ្នកទិញតូបផ្សារ TCC បានលើកឡើងថា ចាប់តាំងពីកើតមានរឿងរ៉ាវនេះឡើង ពុំដែលឃើញថៅកែក្រុមហ៊ុន ចេញមុខមកដោះស្រាយ ជាមួយអតិថិជនម្តងណាឡើយ។ លោកបន្តថា គិតចាប់ពីឆ្នាំ ២០១៨ រហូតមកដល់ពេលនេះ មានរយៈពេលច្រើនឆ្នាំហើយ ដែលក្រុមហ៊ុនបានសាងសង់ តែមិនទាន់រួចរាល់ ស្របតាមកិច្ចសន្យា និងពុំមានសកម្មភាពសាងសង់បន្តឡើយ ក្រោ​យពីប្រមូលលុយ ពីអតិថិជនបានជាច្រើន​លានដុល្លារ។ បើតាមតំណាងអតិថិជន បានបញ្ជាក់ថា ទិន្នន័យបណ្តោះអា​សន្នដែលទទួលបាន ក្រុមមានគម្រោង​សាងសង់ប្រហែល៤ពាន់តូប ដោយមានតម្លៃ១តូប មានតម្លៃចាប់ពីជាង ៦ពាន់ដុល្លារឡើង​ទៅដល់ជាង១០ម៉ឺនដុល្លារ។ តំណាងអតិថិជន បានគូសបញ្ជាក់ទៀតថា រហូតមកដល់ពេល ក្រុមអាជីវករ បានស្នើសុំអន្តរាគមន៍ពីអាជ្ញាធរ ​ខណ្ឌឫស្សីកែវរួចហើយដែរ ដើម្បីជួយរកដំណោះស្រាយ និងអញ្ជើញភាគីក្រុមហ៊ុនចេញ​មុខមកដោះស្រាយជាមួយ​អតិថិជន។

យោងតាមកិច្ចសន្យាក្រុមហ៊ុន បានព្រមព្រៀងគ្នាទិញលក់តូប រយៈពេល៤០ឆ្នាំ (២០១៦- ២០៥៦) ដោយក្រុមហ៊ុន​សន្យាថា នឹងសាងសង់ឱ្យរួចរាល់ ប្រគល់តូប និងផ្ទះអាជីវកម្មដល់អតិថិជន នៅថ្ងៃទី ៣១ ខែធ្នូ ឆ្នាំ២០១៩ ប្រសិនបើមានឧបសគ្គ នឹងត្រូវពន្យារយៈពេល៦ខែយ៉ាងយូរ។

លោកហាក់ ចាន់ថា បានសង្កត់ធ្ងន់ថា អាជីវករដែលទិញតូបផ្សារនេះ បានកំពុងរងផលប៉ះពាល់ ដោយអ្នកខ្លះត្រូវបង់​ធនាគារ ខ្លះទៀតបាត់បង់ចំណូល ដោយសារស្ថានភាពសេដ្ឋកិច្ចមិនសូវល្អ ដោ​យរំពឹងថា ទិញតូបផ្សារនេះហើយ អាចចូលលក់ដូរបានដើម្បីដោះស្រាយជីវភាព។

អាជីវករបានបញ្ជាក់ថា បើលើស៦ខែភាគីខាងផ្សារ នឹងផ្តល់សំណង១ភាគរយរៀងរាល់ខែ។ ប៉ុន្តែរហូតមកដល់​ពេលនេះ ក្រុមអាជីវករ បានអះអាងថា ភាគីផ្សារមិនបានផ្តល់សំណង ដល់អតិថិជននោះឡើយ ខណៈដែលផ្សារ​ក៏មិនទាន់សាងសង់រួចរាល់។ ក្រុមអាជីវករ បានសំណូមពរដល់ថ្នាក់ដឹកនាំ គ្រប់លំដាប់ថ្នាក់ ជាពិសេសសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ឱ្យជួយរកយុត្តិធម៌ និងសូមឱ្យភាគីខាងផ្សារពន្លឿនដំណើរការសាងសង់ គោរពតាមកិច្ចសន្យា ចូលខ្លួនមកដោះស្រាយជាមួយអតិថិជន ដោយកំណត់ពេលវេលាឱ្យបានច្បាស់លាស់។

ក្រុមអាជីវករ បានអះអាងថា នឹងប្រមូលផ្តុំតវ៉ាជាបន្តទៀត ប្រសិ​នបើភាគីពាក់ព័ន្ធ ជាពិសេសថៅកែក្រុមអភិវឌ្ឍផ្សារTCC មិនចេញមកដោះស្រាយជូនអតិថិជន ដូចមានចែងក្នុងកិច្ចសន្យា ដែលបានព្រមព្រៀងគ្នាទេនោះ៕

ដោយៈស៊ីវ ម៉េង

        ភ្នំពេញៈ ការយល់ពីរសនិយមរបស់អតិថិជន បរិបទរស់នៅសម័យថ្មី បាននិងកំពុងធ្វើឲ្យអ្នកអភិវឌ្ឍន៍ បុរីវិមានសំណាងផ្តោតការយកចិត្តទុកដាក់លើចំណុចសំខាន់ៗជាច្រើន។

ចំណុចសំខាន់ៗទាំងនោះរួមមាន ទី១ ការរក្សាទុកផ្ទៃដីជិត៤០ភាគរយ ជាតំបន់បៃតង និងការលំហែរ ទី២ រក្សាទុក និងសំអាតព្រែកធម្មជាតិប្រវែង១០០០ម៉ែត្រ សម្រាប់លំហែរកាយ និងផ្តល់បរិយាកា​សស្រស់ស្រាយដល់អ្នករស់នៅក្នុងបុរីនេះ ទី៣ ផ្តោតល់សំណង់មានឥដ្ឋ២០ ដែលផ្តល់នូវបរិយាកាសត្រជាក់ និងកាត់បន្ថយសម្លេងរំខាន​នានា។ ការចាកបេតុងលើជាន់ដំបូល ដើម្បីការពារជម្រាបទឹក និងត្រជាក់ដល់ជាន់ខានក្រោម។ ការវិនិយោគ ដែលផ្សារភ្ជាប់សំណង់ជាមួយធម្មជាតិ ដើមឈើ ទឹក បាននិងកំពុងអនុវត្តន៍កាន់តែច្រើន ឡើងពីអ្នកអភិវឌ្ឍន៍នានា ដើម្បីឲ្យមានភាពសមស្រប នឹងលក្ខខ័ណ្ឌបរិស្ថានផង និងនិន្នាការនៃការរស់នៅក្នុងសម័យថ្មីផង។

លោកជំទាវឧកញ៉ាគង់ សំណាងអគ្គនាយិកាបុរីវិមានសំណាង​ដែលបាននិងកំពុងអភិវឌ្ឍន៍បុរី លំដាប់អភិជនទំហំ២៥ហិកតាបានមានប្រសាសន៍ឲ្យដឹងថា លោកជំទាវអភិវឌ្ឍន៍បុរីនេះឡើង ដោយផ្តោតលើបរិស្ថាន និងមិនគិតដល់ផលចំណេញជាអាទិភាពទេ ព្រោះយើងចង់ផ្តល់លំនៅដ្ឋានមួយ ដែលមានភាពស៊ីវិល័យ និងផ្តល់ការរស់នៅប្រកបដោយផាសុខភាព និងគិតគូរជាចម្បងដល់ការរស់នៅរបស់អតិថិជន។ លោកជំទាវបន្តថា “ដោយសារភាពជាភ្នាក់ងារ អចលនវត្ថុរយៈពេលជាង១០ឆ្នាំ ខ្ញុំបានសិក្សាចំណង់ចំណូលចិត្តអតិថិជន និងបានអភិវឌ្ឍន៍បុរីឡើង ដើម្បីឆ្លើយតបតម្រូវការ និងរសនិយមរបស់អតិថិជន”។

បុរីវិមានសំណាងផ្តោត លើការសាងសង់វីឡាទោល និងផ្ទះអាជី​វកម្ម ប៉ុន្តែផ្ទះអាជីវកម្មត្រូវបានលក់អស់ហើយ។ នេះបើតាមលោកឧកញ៉ាបណ្ឌិតគីម ហ៊ាងបង្ហាញសារលើបណ្តាញទំនាក់ទំនងសង្គម។
បុរីវិមានសំណាង បាននិងកំពុងវិនិយោគដោយផ្តោតលើប្រព័ន្ឋ​ហេដ្ឋារចនាសម្ព័ន្ឋធំៗ ដែលមានផ្លូវធំទូលាយ ដើម្បីងាយស្រួលក្នុងការធ្វើចរាចរណ៍ផងដែរ៕

ភ្នំពេញ ថ្ងៃទី២០ ខែតុលា ឆ្នាំ២០២៣៖ ធនាគារ ហត្ថា ដែលជាធនាគារមួយក្នុងចំណោមធនាគារពាណិជ្ជឈានមុខគេនៅកម្ពុជា បានដាក់ឱ្យដំណើរការនូវផលិតផលថ្មីរបស់ខ្លួន គឺសេវាទទួលប្រាក់ពីក្រៅប្រទេសតាមរយៈប្រព័ន្ធ SWIFT ​INTERNATIONAL TRANSFER ដោយផ្តល់នូវដំណោះស្រាយប្រតិបត្តិការហិរញ្ញវត្ថុ កាន់តែប្រសើរ និងមានភាពងាយស្រួលដល់ការគ្រប់គ្រងលំហូរសាច់ប្រាក់ដល់អតិថិជនទូទៅ និងម្ចាស់អាជីវកម្ម។ បន្ថែមពីនេះ អតិថិជនទាំងអស់អាចរីករាយជាមួយនឹងការទទួលប្រាក់ពីក្រៅប្រទេសដោយឥតគិតថ្លៃសេវា ជុំវិញពិភពលោកប្រកបដោយភាពងាយស្រួល បត់បែន និងចំណេញពេលវេលា ដោយពុំចាំបាច់ចំណាយពេលមកធនាគារឡើយ។លោក ដួង ច័ន្ទសុវិជ្ជា, អគ្គនាយកលក់ និង ចែកចាយ នៃធនាគារ ហត្ថា បាន​មាន​ប្រសាសន៍ថា៖ នេះគឺជាសមិទ្ធផលដ៏អស្ចារ្យថ្មីមួយទៀតសម្រាប់ធនាគារ ហត្ថា ​ដែលវាជាការឆ្លើយតបទៅនឹងតម្រូវការជាក់ស្តែងរបស់អតិថិជនយើង។ ចាប់ពីពេលនេះលោកអ្នក​អាចធ្វើការទទួលប្រាក់ពីក្រៅប្រទេសដោយឥតគិតថ្លៃសេវា ប្រកបដោយភាពងាយស្រួល​ រហ័ស និងអាចត្រួតពិនិត្រសាច់ប្រាក់បានតាមរយៈHattha Mobile គ្រប់ពេលវេលា គ្រប់ទីកន្លែង។ លោកបានបន្ថែមទៀតថា ធនាគារ ហត្ថា បាននឹងកំពុងបន្តអភិវឌ្ឍនូវផលិតផល​ និងសេវាកម្មថ្មីៗជាច្រើនទៀតដើម្បីឆ្លើយតបទៅនឹងតម្រូវការទីផ្សារ ក៏ដូចជាស្របទៅនឹងយុគសម័យឌីជីថលនេះផងដែរ។

អំពីធនាគារ ហត្ថា៖
ធនាគារ ហត្ថា គឺជាធនាគារពាណិជ្ជដែលបានផ្តល់សេវាហិរញ្ញវត្ថុក្នុងប្រទេសកម្ពុជាអស់រយៈពេលជិត ៣០ ឆ្នាំ និងបានផ្តល់សេវាកម្មហិរញ្ញវត្ថុយ៉ាងទូលំទូលាយសម្រាប់អតិថិជន រួមមានប្រាក់កម្ចី ប្រាក់បញ្ញើសន្សំ សេវាផ្ទេរប្រាក់ក្នុងស្រុក សេវាផ្ទេរប្រាក់ឆ្លងធនាគារទៅកាន់ធនាគារក្នុងស្រុក សេវាផ្ទេរប្រាក់ឆ្លងប្រទេស សេវាអេធីអឹម សេវាធនាគារចល័ត (Hattha Mobile) សេវាបើកប្រាក់បៀវត្សរ៍ ក៏ដូចជាភ្នាក់ងារធានារ៉ាប់រង និង សេវាកម្មហិរញ្ញវត្ថុជាច្រើនទៀត។ ធនាគារ ហត្ថា គឺជាបុត្រសម្ព័ន្ធរបស់ ធនាគារ ក្រុងស្រ៊ី។ ធនាគារ ក្រុងស៊្រី (ធនាគារ អាយុធ្យា ម.ក និង ក្រុមហ៊ុនជាបុត្រសម្ព័ន្ធ) គឺជាសម្ព័ន្ធហិរញ្ញវត្ថុធំជាងគេលំដាប់ទី៥ នៅក្នុងព្រះរាជាណាចក្រថៃ ដែលបានធ្វើប្រតិបត្តិការអាជីវកម្មជូនអតិថិជនរបស់ខ្លួនអស់រយៈពេល ៧៧ ឆ្នាំ មកហើយ។ ធនាគារ ក្រុងស៊្រី គឺជាសមាជិកយុទ្ធសាស្ត្ររបស់សម្ព័ន្ធហិរញ្ញវត្ថុ MUFG ដែលជាសម្ព័ន្ធហិរញ្ញវត្ថុធំជាងគេបង្អស់នៅជប៉ុន​ និងជាសម្ព័ន្ធហិរញ្ញវត្ថុដ៏ធំមួយក្នុងចំណោមសម្ព័ន្ធហិរញ្ញវត្ថុធំៗផ្សេងទៀតនៅលើពិភពលោក។

ដោយ: គង់ លាងហួរ
អន្តរជាតិ: ក្រុមអ្នកវិភាគបានព្យាករថា វិស័យអចលនទ្រព្យនៅប្រទេសវៀតណាមនឹងត្រូវជួបការលំបាកយ៉ាងហោចណាស់៣ត្រីមាសទៀត មុនពេលវិស័យនេះអាចចាប់ផ្តើមស្ទុះងើបឡើងវិញនៅឆមាសទី២ ឆ្នាំ២០២៤ខាងមុខ។

នៅក្នុងត្រីមាសទី៣ ឆ្នាំនេះ ប្រតិបត្តិការអចលនទ្រព្យចំនួន៦.០០០ ត្រូវបានកត់ត្រានៅទូទាំងប្រទេសដោយសមាគមអ្នកអចលនទ្រព្យវៀតណាម (VARS) ដែលកើនឡើង១,៥ដងធៀបនឹងត្រីមាសទីពីរ។លោក Vo Hong Thang នាយកទីផ្សារនៃក្រុមហ៊ុនប្រឹក្សាអចលនទ្រព្យ DKRA Group បានមានប្រសាសន៍ថា ឥឡូវនេះ យើងសង្កេតឃើញ មានភាពវិជ្ជមាននៅលើទីផ្សារបើធៀបនឹងដើមឆ្នាំ។

លោកបានបន្ថែមថា នៅក្នុងត្រីមាសទី៣តែមួយគត់ អាផាតមុិន ផ្ទះ និងដីឡូតិ៍ចំនួន៤.៨០០យូនីត ត្រូវបានផ្គត់ផ្គង់ទៅកាន់ទីផ្សារនៅភាគខាងត្បូងប្រទេស ដោយ៧០% នៃអចលនទ្រព្យទាំងនេះត្រូវបានលក់ដាច់រួចមកហើយ។ លោក Thang បានបន្តថា ផ្នែកតូចមួយនៃការផ្គត់ផ្គង់ថ្មីត្រូវបានគេរំពឹងថានឹងចូលទៅក្នុងទីផ្សារក្នុងត្រីមាសនេះ ហើយតម្រូវការនឹងមានស្ថិរភាពដោយសារអត្រាការប្រាក់កម្ចីធ្លាក់ចុះ។ លោកបានបន្ថែមថា ប៉ុន្តែសញ្ញានៃការស្ទុះងើបឡើងវិញដ៏រឹងមាំនឹងអាចមើលឃើញជាក់ស្តែងចាប់ពីខែកក្កដា ឆ្នាំ២០២៤ខាងមុខ។

លោកស្រី Duong Thuy Dung នាយកជាន់ខ្ពស់នៅក្រុមហ៊ុនប្រឹក្សាអចលនទ្រព្យ CBRE Vietnam បានលើកឡើងថា ប្រភេទអចលនទ្រព្យដែលមានតម្លៃថោកសមរម្យ និងតម្លៃមធ្យមនឹងចាប់ផ្តើមស្ទុះងើបឡើងវិញនៅត្រីមាសទី៣ ឆ្នាំក្រោយនេះ។ លោកស្រីបានបន្ថែមថា ប្រភេទអចលនទ្រព្យលំដាប់ខ្ពស់ប្រណីតៗដូចជាវីឡា និងផ្ទះអាជីវកម្ម នឹងស្ទុះងើបឡើងវិញយឺតៗនៅដើមឆ្នាំ២០២៥៕

ដោយៈ គង់ ហ្វីអូណា

        ប្រទេសចិនៈ ឧបនាយករដ្ឋមន្ត្រី អនុប្រធានទី១ក្រុមប្រឹក្សាអភិវឌ្ឍន៍កម្ពុជា លោកស៊ុន ចាន់ថុល កាលពីចុងសប្តាហ៍មុនបានបន្តបេសកកម្មក្នុងទីក្រុង Guangzhou ដោយបានចុះទស្សនកិច្ចនៅមជ្ឈមណ្ឌលបណ្តុះធុរកិច្ចថ្មី Guangzhou International Corporate Incubator (GICI) របស់ ក្រុមហ៊ុន Guangzhou Industrial Investment and Capital Operation Holding Group ស្របតាមការស្វាគមន៍យ៉ាងកក់ក្តៅ ពីលោក Qun Ge នាយករង និងជាប្រធានប្រតិបត្តិក្រុមហ៊ុន។

ក្នុងដំណើរទស្សនកិច្ចនេះ ក្រុមហ៊ុនបានធ្វើបទបង្ហាញអំពីការងា​រមួយចំនួនជូនគណៈប្រតិភូកម្ពុជាដើម្បីបានជ្រាប ហើយក្នុងនោះ ឯកឧត្តមឧបនាយករដ្ឋមន្ត្រី បានជម្រាបជូនក្រុមហ៊ុនផងដែរ អំពីការលើកទឹកចិត្តខ្ពស់របស់រាជរដ្ឋាភិបាលកម្ពុជា លើកិច្ចការងារធុរកិច្ចថ្មីនេះ តាមរយៈការបើកឱកាសឱ្យមានកិច្ចសហប្រតិបត្តិការវិនិយោគ។លោកឧបនាយករដ្ឋមន្ត្រី បានលើកទឹកចិត្តឱ្យក្រុមហ៊ុនសិក្សាលើការបណ្ដាក់ទុន វិនិយោគធុរកិច្ចរបស់ខ្លួននៅកម្ពុជា ព្រមទាំងអញ្ជើញក្រុមហ៊ុន ចុះមកធ្វើទស្សនកិច្ចនៅកម្ពុជាដោយផ្ទាល់ ដើម្បីឈ្វេងយល់ឱ្យកាន់តែច្បាស់ នូវរាល់សក្ដានុពលរបស់កម្ពុជា។ជាមួយគ្នានេះដែរ ក្រុមហ៊ុនបានបង្ហាញអំពីឆន្ទ:របស់ខ្លួនក្នុងការចុះទៅទស្សនកិច្ចប្រទេសកម្ពុជា ដើម្បីពិនិត្យមើលលទ្ធភាពផ្តល់ទុនវិនិយោគដល់ធុរកិច្ចថ្មីនៅកម្ពុជា។ ក្រុមហ៊ុនក៏បានរំលេចបន្ថែមអំពីភាពជាដៃគូរបស់ខ្លួនកន្លងមក ជាមួយបណ្ដាប្រទេសដែលជាសមា​ជិករបស់កម្មវិធីខ្សែក្រវាត់ និងផ្លូវ ហើយក្នុងនោះកម្ពុជា ក៏ជាសមាជិកកម្មវិធីនេះផងដែរ ដែលអនុញ្ញាតឱ្យក្រុមហ៊ុន មានភាពប្រាកដនិយមខ្ពស់ លើការធ្វើសហប្រតិបត្តិការ និងវិនិយោគជាមួយគ្នា។មជ្ឈមណ្ឌល GICI ជាមជ្ឈមណ្ឌលដ៏ជោគជ័យមួយ ហើយតាមរយៈការគាំទ្ររបស់មជ្ឍមណ្ឌលនេះ បានជួយជំរុញឱ្យធុរកិច្ចថ្មីចំនួន១២ បានទទួល ជោគជ័យ រហូតដល់មានលទ្ធភាពអាចបោះភាគហ៊ុនលើទីផ្សារភាគហ៊ុនបានផងដែរ៕

នាពេលរាត្រីចូលមកដល់ ជីវិតពេលរាត្រីក៏ចាប់ផ្តើម ហើយផ្សាររាត្រីក៏ក្លាយជាកន្លែងដែលមានភាពអ៊ូអរបំផុតផងដែរក្នុងទីក្រុង។

ជីវិតផ្សាររាត្រីនៅភ្នំពេញ នឹងចាប់ផ្តើមហើយ!

ផ្សាររាត្រីភូមិអាហារផ្លូវជាតិលេខ 5 ដែលស្ថិតនៅតំបន់ស្នូលនៃខណ្ឌជ្រោយចង្វារ និងជាផ្សាររាត្រីធំបំផុតនៅភ្នំពេញ នឹងចាប់បើកក្នុងពេលឆាប់ៗនេះហើយ។ ផ្សាររាត្រីភូមិអាហាផ្លូវជាតិលេខ 5  គឺជាផ្សាររាត្រីទី2 សាងសង់ដោយក្រុមហ៊ុនព្រីនស៍ គ្រុប ជាមួយនឹងការវិនិយោគទុនជាងមួយលានដុល្លារ ហើយវាក៏ជាផ្សាររាត្រីដែលមានទុនវិនិយោគច្រើនបំផុតក្នុងប្រទេសកម្ពុជាផងដែរ។ ផ្សារ​រាត្រីនេះមាន​ផ្ទៃដី​សរុប​ជាង 18000 ម៉ែត្រការ៉េ ដែល​ស្មើនឹង​ទីលាន​បាល់ទាត់ 3 ដង។ អ្នកឌីហ្សាញបានបែងចែកគម្រោងនេះទៅជាតំបន់ធំៗ 4 ដែលមានស្តង់សរុប 334 ដោយបានប្រមូលផ្តុំនូវអាហារសម្រន់ដ៏ឈ្ងុយឆ្ងាញ់ពីជុំវិញពិភពលោក និងគំនូរលើជញ្ជាំង ដែលពោរពេញទៅដោយភាពសប្បាយរីករាយ និងទាន់សម័យបំផុត។ លើសពីនេះក៏មានផងដែរនូវការប្រគុំតន្ត្រីដ៏ពិរោះ និងការ​សំដែង​របាំ​តាម​ដង​ផ្លូវ ​ក៏ដូចជា​មាន​ការ​តុប​តែង​ដោយ​សិប្បកម្ម​ប្រជាប្រិយ​ជាច្រើនប្រភេទផងដែរ។

ផ្សាររាត្រីនៅភ្នំពេញនឹងជោគជ័យនាពេលអនាគត
ផ្សាររាត្រីភូមិអាហាផ្លូវជាតិលេខ 5 នាំមកនូវបទពិសោធន៍ផ្សាររាត្រីថ្មីស្រឡាងមកកាន់ភ្នំពេញ ដោយមានកន្លែងរៀបចំទីកម្មវិធីចម្រុះបែប មានរចនាប័ទ្មជាផ្សារទំនើបនិងទាន់សម័យ កម្មវីធីចម្រុះបែបនិងគួរឲ្យចាប់អារម្មណ៍ ព្រមទាំងមានទីធ្លាលំហែកម្សាន្តស្តង់ដារអន្តរជាតិផងដែរ។

ផ្សាររាត្រីភូមិអាហាផ្លូវជាតិលេខ 5 នឹងបើកដំណើរការជាផ្លូវការនៅថ្ងៃទី24 ខែវិច្ឆិកាខាងមុខនេះ។ នៅថ្ងៃបើកដំណើរការនោះ គម្រោងមានស្តង់លក់អាហារ ផ្សារសិប្បកម្ម និងការសម្តែងវប្បធម៌ដែលមកពីជុំវិញពិភពលោក ព្រមទាំងមានផលិតផលម៉ាកអន្តរជាតិធំៗផងដែរ។ លោកអ្នកអាចរីករាយជាមួយការបាញ់កាំជ្រួចលើវាលស្មៅលើកដំបូងនៅភ្នំពេញ ឬមើលកុន ឬញ៉ាំអាហារឆ្ងាញ់ៗនៅតំបន់ឆាកកណ្តាល ឬក្រេបរសជាតិស្រាបៀរក្រោមខ្យល់អាកាសដ៏ស្រស់ស្រាយ ឬរីករាយជាមួយជីវិតពេលរាត្រីក្រោមបរិយាកាសដ៏ល្អប្លែក។

កសាងជីវិតឲ្យកាន់តែប្រសើរ បង្កើតគំរូស្តង់ដារសម្រាប់ភ្នំពេញ
ក្នុងនាមជាក្រុមហ៊ុនអភិវឌ្ឍន៍និងវិនិយោគទីក្រុងនៅកម្ពុជា ព្រីនស៍ គ្រុប តែងតែប្រកាន់ខ្ជាប់នូវទស្សៈអាជីវកម្ម “កសាងជីវិតឲ្យកាន់តែប្រសើរ” និងបានខិតខំសាងសង់ផ្សាររាត្រីភូមិអាហាផ្លូវជាតិលេខ 5 ដើម្បីប្រែក្លាយវាជាគំរូស្តង់ដារផ្សាររាត្រីនៅភ្នំពេញ ដែលអាចបំពេញតម្រូវការផ្នែកកម្សាន្តនិងទេសចរណ៍សម្រាប់ទាំងភ្ញៀវជាតិ​និងអន្តរជាតិ។

នៅចម្ងាយ 5 គីឡូម៉ែត្រពីផ្សាររាត្រី មានសាលារៀនចំនួន 11 ដែលមានសិស្សនិស្សិតយ៉ាងច្រើន ដែលសុទ្ធតែជាអតិថិជនសក្តានុពល។ ម៉្យាងវិញទៀត នៅជុំវិញខណ្ឌជ្រោយចង្វារ មានប្រជាជនរស់នៅយ៉ាងច្រើនសន្ធឹកសន្ធាប់ ហើយជាមួយនឹងការកើនឡើងនៃភ្ញៀវទេសចរអន្តរជាតិនៅកម្ពុជា នឹងផ្តល់ឲ្យគម្រោងនូវលំហូរអតិថិជនជាង 500,000 នាក់។ នៅពេលខាងមុខ ទីនេះមិនត្រឹមតែជាផ្សាររាត្រីដែលមានភាពទាន់សម័យបំផុតនៅភ្នំពេញប៉ុណ្ណោះទេ ថែមទាំងអាចក្លាយជាផ្សាររាត្រីដែលទំនើបនិងទាន់សម័យនាំមុខគេនៅអាស៊ីអាគ្នេយ៍ផងដែរ។

ស្តង់មានកំណត់ នៅសល់មិនដល់ពាក់កណ្តាលផង!
ផ្សាររាត្រីភូមិអាហារផ្លូវជាតិលេខ 5 នឹងបើកសម្ពោធជាផ្លូវការនៅថ្ងៃទី24 ខែវិច្ឆិកា ខាងមុខនេះហើយ។ បច្ចុប្បន្ន ស្តង់ជាងពាក់កណ្តាលត្រូវបានជួលអស់ហើយ នៅសល់តែស្តង់មួយចំនួនតូចប៉ុណ្ណោះ!

នៅពេលអនាគត ក្រុមហ៊ុន ព្រីនស៍ រៀល អ៊ីស្ទេត គ្រុប នឹងបន្តគិតគូរលើការកែទម្រង់ទីក្រុងទាំងមូល និងការធ្វើផែនការ និងប្រតិបត្តិការ ដើម្បីប្រមូលបទពិសោធន៍ក្នុងការសាងសង់ និងបន្តការអភិវឌ្ឍទីក្រុងប្រកបដោយតុល្យភាព និងពហុវិស័យ។ ក្រុមហ៊ុនព្យាយាមបង្កើតលទ្ធភាពបន្ថែមទៀតសម្រាប់ការអភិវឌ្ឍប្រកបដោយចីរភាពនាពេលអនាគតសម្រាប់កម្ពុជា។

ទូរស័ព្ទផ្នែកជួល៖ +855 81 334 011
អាសយដ្ឋាន៖ ផ្លូវជាតិលេខ 5 ភូមិមិត្តភាព ខណ្ឌឬស្សីកែវ រាជធានីភ្នំពេញ ព្រះរាជាណាចក្រកម្ពុជា

ក្រុមហ៊ុន ប៉េង ហួត គ្រុប បានសហការរៀបចំព្រឹត្តិការណ៍រត់ម៉ារ៉ាតុងសប្បុរសធម៌ជាមួយអង្គការផ្កាយសមុទ្រ Indochina Starfish Foundation (ISF) និងឧបត្ថម្ភបន្ថែមនូវថវិកាចំនួន $10,000 (មួយម៉ឺនដុល្លារ អាមេរិក) ក្នុងគោលបំណងដើម្បីចូលរួមលើកកម្ពស់ការងារសង្គម និងស្វែងរកជំនួយសប្បុរសធម៌យកទៅផ្គត់ផ្គង់ជីវភាពខ្វះខាត និងរួមចំណែកគាំទ្រដល់ការសិក្សារបស់សិស្សានុសិស្សក្រីក្រជាង ៧០០នាក់ របស់អង្គការផ្កាយសមុទ្រ​ នាព្រឹកថ្ងៃទី២២ ខែតុលា ឆ្នាំ២០២៣ ស្ថិតនៅក្នុងគម្រោងបុរី ប៉េង ហួត ហ្គ្រេនស្តាផ្លាទីនីម (បឹងស្នោ) ខណ្ឌច្បារអំពៅ រាជធានីភ្នំពេញ។​

ព្រឹត្តិការណ៍នេះមានអ្នកចូលរួមរត់ប្រមាណជាង ១,២០០នាក់ មកជួបជុំគ្នារត់ដើម្បីសុខភាព ភាពសប្បាយរីករាយ កសាងទំនាក់ទំនងជាមួយគ្នា និងជាពិសេសគឺបង្ហាញពីស្មារតីចូលរួមចំណែកក្នុងសកម្មភាពសប្បុរសធម៌ ដែលការរត់នេះគឺចាប់ផ្ដើមជាមួយនឹងចម្ងាយពី ៣ គីឡូម៉ែត្រ ១០ គីឡូម៉ែត្រ និង ២១ គីឡូម៉ែត្រ។គួរបញ្ជាក់ថា មួយរយៈពេលចុងក្រោយនេះគេសង្កេតឃើញថាគម្រោងបុរី ប៉េង ហួត ហ្រ្គេនស្ដាផ្លាទីនីម (បឹងស្នោ) ទទួលលបានដៃគូសហការរៀបចំព្រឹត្តិការណ៍កីឡាជាច្រើន ជាពិសេសគឺព្រឹត្តិការណ៍រត់ពាក់កណ្ដាលម៉ារ៉ាតុងក្នុងន័យសប្បុរសធម៌និងការលើកកម្ពស់ការរត់ដើម្បីសុខភាព។ល។ ហើយក្នុងពេលឆាប់ៗខាងមុខនេះ​ក្រុមហ៊ុននឹងត្រៀមរៀបចំពិធីសម្ពោធផ្លូវជិះកង់និងរត់ប្រណាំងស្ដង់ដាក្នុងគម្រោងអភិវឌ្ឍលំនៅឋានរបស់ខ្លួនដំបូងគេក្នុងប្រទេសកម្ពុជាផងដែរ។ ​សូមបញ្ជាក់ថា ក្រុមហ៊ុន ប៉េង ហួត គ្រុប ត្រូវបានគេស្គាល់ថាជាក្រុមហ៊ុនប្រតិបត្តិមេត្រីភាពបរិស្ថាន ដែលគ្រប់គម្រោងលំនៅឋានមានដើមឈើធំៗរាប់ពាន់ដើម សួនកម្សាន្តផ្កាចម្រុះពណ៌ និងហេដ្ឋារចនាសម្ព័ន្ធបៃតងធំទូលា ជាពិសេសគឺមានផ្លូវជិះកង់និងរត់ប្រណាំងស្ដង់ដាដំបូងគេក្នុងប្រទេសកម្ពុជា ខណៈបច្ចុប្បន្ននេះគឺជាទិសដៅទេសចរណ៍ទាក់ទាញសាធារណជនទាំងខ្មែរ និងបរទេសមកលេងកម្សាន្តរាប់ពាន់នាក់៕

ដោយ: គង់ លាងហួរ
អន្តរជាតិ: នាយករដ្ឋមន្ត្រីវៀតណាមលោក Pham Minh Chinh បានគាំទ្រសំណើរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក្នុងការបង្កើតគំនិតផ្តួចផ្តើម “ប្រទេស៣ គោលដៅតែមួយ” ដែលនឹងរួមបញ្ចូលប្រទេសឡាវផងដែរ ដើម្បីជំរុញវិស័យទេសចរណ៍។

ការបញ្ជាក់ការគាំទ្រនេះបានធ្វើឡើងនៅក្នុងឱកាស ដែលថ្នាក់ដឹកនាំនៃប្រទេសជិតខាងទាំង២បានជួបប្រជុំគ្នាកាលពីថ្ងៃទី២០ ខែតុលា នៅខាងក្រៅកិច្ចប្រជុំកំពូលក្រុមប្រឹក្សាសហប្រតិបត្តិការអាស៊ាន-ឈូងសមុទ្រ (GCC) នៅទីក្រុងរីយ៉ាដ ប្រទេសអារ៉ាប៊ីសាអូឌីត។ក្រុមការងារប្រព័ន្ធផ្សព្វផ្សាយសង្គមរបស់សម្តេចធិបតី ហ៊ុន ម៉ាណែត បានប្រកាសបន្ទាប់ពីកិច្ចប្រជុំថា លោក Pham Minh Chinh ក៏បានគាំទ្រការអំពាវនាវរបស់កម្ពុជា ក្នុងការតភ្ជាប់ផ្លូវល្បឿនលឿនភ្នំពេញ-បាវិត និងផ្លូវល្បឿនលឿនបាវិត-ហូជីមិញ របស់វៀតណាម រួមជាមួយនឹងការតភ្ជាប់ផ្លូវដែកផងដែរ។ជាមួយគ្នានេះ សម្តេចធិបតីបានសម្តែងនូវសេចក្តីរីករាយចំពោះកិច្ចពិភាក្សាជាមួយលោកនាយករដ្ឋមន្ត្រីវៀតណាម ជាពិសេសទាក់ទិននឹងការពិភាក្សាគ្នាលើការចរចារតភ្ជាប់ផ្លូវល្បឿនលឿនភ្នំពេញ-បាវិត និងផ្លូវល្បឿនលឿនបាវិត-ហូជីមិញ ហើយការតភ្ជាប់នេះនឹងជួយជំរុញការផ្លាស់ប្តូរពាណិជ្ជកម្ម និងទេសចរណ៍។

ភាគីទាំងពីរបានវាយតម្លៃខ្ពស់ចំពោះការអភិវឌ្ឍន៍ដ៏រីកចម្រើននៃកិច្ចសហប្រតិបត្តិការទ្វេរភាគីលើគ្រប់វិស័យ ហើយបានឯកភាពគ្នាក្នុងការពង្រឹងកិច្ចសហប្រតិបត្តិការក្នុងវិស័យការពារជាតិ សន្តិសុខ និងវិស័យអនុវត្តច្បាប់ រួមទាំងវិស័យផ្សេងៗទៀត។

លើសពីនេះ លោក Pham Minh Chinh បានកោតសរសើរចំពោះស្ថិរភាព ការអភិវឌ្ឍន៍ និងវឌ្ឍនភាពរបស់កម្ពុជា ក្រោមការដឹកនាំរបស់សម្តេចធិបតី ហ៊ុន ម៉ាណែត។ ទន្ទឹមគ្នានោះ លោកក៏បានកត់សម្គាល់ផងដែរថា វៀតណាមនឹងស្វាគមន៍ដំណើរទស្សនកិច្ចផ្លូវការរបស់សម្តេចធិបតី នាពេលខាងមុខ៕