ដោយៈ គង់ សូរិយា

        ភ្នំពេញៈ រដ្ឋាភិបាលកម្ពុជា បានសម្រេចកាត់ដីក្នុងឧទ្យានជាតិកែបជិត៣០ហិកតា ជួលឱ្យក្រុមហ៊ុន វ័នម័រ (One More, Ltd.) ដើម្បីអភិវឌ្ឍន៍ជាតំបន់ទេសចរណ៍។

យោងតាមអនុក្រឹត្យចុះថ្ងៃទី២៥ ខែវិច្ឆិកា ឆ្នាំ២០២២បានឲ្យដឹងថា កន្លងមក រាជរដ្ឋាភិបាលកម្ពុជា ក៏ធ្លាប់បានកាត់ដីជាង២០០ហិកតាក្នុងឧទ្យានជាតិគិរីរម្យ ស្ថិតក្នុងខេត្តកំពង់ស្ពឺ ឱ្យក្រុមហ៊ុននេះ ដើម្បីអភិវឌ្ឍ ដែលជាតំបន់ប្រើប្រាស់ដោយចីរភាព។

ចំណែកក្រុមហ៊ុន One Fraternity Co., Ltd ក៏ធ្លាប់ទទួលបានដី៦៤៩ហិកតា ដែលរដ្ឋាភិបាល​បានកាត់ជួល ឱ្យក្រុមហ៊ុននេះអភិ​វឌ្ឍ​ជាតំបន់ទេសចរណ៍ផ្សារភ្ជាប់ធម្មជាតិ ស្ថិតក្នុងដែនជម្រកសត្វព្រៃឱរ៉ាល់ ឃុំក្តុលសែនជ័យ និងឃុំជៀប ស្រុកទឹកផុស ខេត្តកំពង់ឆ្នាំង។ដីទាំងអស់នេះ ត្រូវបានរាជរដ្ឋាភិបាលធ្វើអនុប្បយោគ ពីទ្រព្យសម្បត្តិសាធារណៈរបស់រដ្ឋ ទៅជាទ្រព្យសម្បត្តិឯកជនរបស់រដ្ឋ ជួលឱ្យអ្នកឧកញ៉ា ជឹង សុគន្ធាវី ដែលជាម្ចាស់ក្រុមហ៊ុនមីជាតិ និងក្រុមហ៊ុនទាំងពីខាងលើ (One More, Ltd និង One Fraternity Co., Ltd)៕

ដោយៈ គង់ សូរិយា

        ភ្នំពេញៈ រាជរដ្ឋាភិបាលកម្ពុជា បានសម្រេចដាក់ចេញអនុក្រឹត្យ ដើម្បីធ្វើការគ្រប់គ្រង និងត្រួតពិនិត្យអាជីវកម្ម អភិវឌ្ឍអចលនវត្ថុ សំ​ដៅដល់ការធានាឱ្យបាននូវប្រសិទ្ធភាព តម្លាភាព សមធម៌ បង្កើនការទុកចិត្ត និងទាក់ទាញអ្នកវិនិយោគបន្ថែមមកកម្ពុជា។

យោងតាមអនុក្រឹត្យលេខ៥០ អនក្រ.បក ចុះថ្ងៃទី០២ ខែមីនា​ ឆ្នាំ២០២៣ អាជីវកម្មអភិវឌ្ឍអចលនវត្ថុ សំដៅដល់សកម្មភាពពាណិ​ជ្ជកម្ម ឬវិនិយោគគ្រប់ប្រភេទ ក្នុងគោលបំណងសាងសង់លំនៅឋាន អគារសហកម្មសិទ្ធិ ឬអភិវឌ្ឍដីឡូតិ៍សម្រាប់លក់ ឬជួល។

និយ័តករអាជីវកម្មអចលនវត្ថុ និងបញ្ចាំ (ន.អ.ប) នៃអាជ្ញាធរសេវាហិរញ្ញវត្ថុមិនមែនធនាគារ ជាអ្នកមានសមត្ថកិច្ចក្នុងការគ្រប់គ្រង និងការត្រួតពិនិត្យអាជីវកម្មអភិវឌ្ឍអចលនវត្ថុ ដែលជាអ្នកអនុញ្ញាតចេញអាជ្ញាបណ្ណ និងលិខិតអនុញ្ញាតក្នុងការប្រកបអាជីវកម្ម។

អាជ្ញាបណ្ណ និងលិខិតអនុញ្ញាតអាជីវកម្មអភិវឌ្ឍអចលនវត្ថុ ត្រូវបានបែងចែកជាបីដូចជា ទី១ អាជ្ញាបណ្ណ ឬលិខិតអនុញ្ញាតអាជីវកម្មអភិវឌ្ឍលំនៅឋាន ទី២ អាជ្ញាបណ្ណ ឬលិខិតអនុញ្ញាតអាជីវកម្មអភិវឌ្ឍអគារសហកម្មសិទ្ធិ និងទី៣ អាជ្ញាបណ្ណ ឬលិខិតអនុញ្ញាតអាជីវកម្មអភិវឌ្ឍដីឡូត៍។

លើសពីនេះ អាជ្ញាបណ្ណ និងលិខិតអនុញ្ញាតអាជីវកម្មអភិវឌ្ឍលំនៅឋាន និងអគារសហកម្មសិទ្ធិ ត្រូវបានចែកចេញជា២ប្រភេទផងដែរដូចជា ទី១ អាជ្ញាបណ្ណ និងលិខិតអនុញ្ញាតអាជីវកម្មប្រភេទ១ ផ្ដល់ជូនបុគ្គល អភិវឌ្ឍអចលនវត្ថុទាំងឡាយណា ដែលសាងសង់គម្រោងចប់ជាស្ថាពរទើបប្រកាសលក់ឬជួល ទី២ អាជ្ញាបណ្ណ និងលិខិតអនុញ្ញាតអាជីវកម្មប្រភេទ២៖ ផ្តល់ជូនបុគ្គលអភិវឌ្ឍអចលនវត្ថុទាំងឡាយ ណាដែលសាងសង់គម្រោងបណ្ដើរ និងប្រកាសលក់ ឬជួលបណ្ដើរ។

លើសពីនេះ បុគ្គលអភិវឌ្ឍលំនៅឋាន ឬអគារសហកម្មសិទ្ធិដែលទទួលបានអាជ្ញាបណ្ណ ឬលិខិតអនុញ្ញាតអាជីវកម្ម ប្រភេទ១ អា​ចដំណើរការប្រតិបត្តិការលក់ ឬជួល បន្ទាប់ពីគម្រោងត្រូវបានបញ្ច​ប់ការសាងសង់ជាស្ថាពរ។

ចំណែកបុគ្គលអភិវឌ្ឍន៍លំនៅឋាន ឬអគារសហកម្មសិទ្ធិដែលទទួលបានអាជ្ញាបណ្ណ ឬលិខិតអនុញ្ញាតអាជីវកម្មប្រភេទ២ អាចដំណើរការប្រតិបត្តិការលក់ ឬជួលបន្ទាប់ពីទទួលបានអាជ្ញាបណ្ណពីន.អ.ប.៕

ដោយ: គង់ លាងហួរ

អន្តរជាតិ: រដ្ឋបាលរបស់ទីក្រុងហុងកុង បានសម្រេចចិត្តខុសពីការរំពឹងទុករបស់ទីផ្សារ ដោយបានប្រកាសថា ខ្លួននឹងលក់ដីលំនៅដ្ឋានតែ២ឡូតិ៍ប៉ុណ្ណោះ នៅក្នុងត្រីមាសទី២ នៃឆ្នាំហិរញ្ញវត្ថុ ពោលគឺប្រហែលពាក់កណ្តាល នៃចំនួនដែលបានព្យាករណ៍ ដោយអ្នកវិភាគមួយចំនួន។

ក្បាលដីនៅ Kai Tak ដែលជាទីតាំងរបស់អតីតព្រលានយន្តហោះអន្តរជាតិរបស់ហុងកុង និងតំបន់ Tung Chung នៅលើកោះ Lantau ដែលនឹងអាចសាងសង់ផ្ទះល្វែង សរុបចំនួន១.៧៣៩ខ្នង នឹងត្រូវដាក់លក់ដេញថ្លៃ នៅចន្លោះខែកក្កដាដល់ខែកញ្ញាខាងមុខនេះ។
ការផ្តល់នេះគឺតិចជាង បើធៀបទៅនឹងការផ្តល់ផ្ទះល្វែងចំនួន២.៤០០ខ្នង ពីទីតាំងចំនួន២ ដែលស្ថិតនៅក្នុងតំបន់លំនៅដ្ឋាន Kennedy Town និងទីក្រុង Tsuen Wan នៅក្នុងរយៈពេល៣ខែ ដែលគិតពីខែមេសា រហូតដល់ខែមិថុនាកន្លងមកនេះ។

ទោះជាយ៉ាងនេះក្តី ការផ្គត់ផ្គង់សរុបសម្រាប់ឆមាសទី១ នៃឆ្នាំហិរញ្ញវត្ថុ រួមទាំងការអភិវឌ្ឍឯកជន ត្រូវបានគេរំពឹងថានឹង ផ្គត់ផ្គង់ផ្ទះល្វែងចំនួន៨.២៨០ខ្នង ដែលស្មើប្រហែល៦៥ភាគរយ នៃគោលដៅប្រចាំឆ្នាំរបស់រដ្ឋបាលក្រុងហុងកុងសម្រាប់លំនៅដ្ឋាន។ក្រុមអ្នកវិភាគបានលើកឡើងថា ការដាក់លក់ដីតិចតួចដ៏គួរឱ្យភ្ញាក់ផ្អើលនៅក្នុងត្រីមាសទីពីរ អាចឆ្លុះបញ្ចាំងពីស្ថានភាពទីផ្សារដ៏អាប់អួរ ទោះបីជារដ្ឋបាលក្រុងហុងកុងបានបដិសេធថា  នេះមិនមែនជាកត្តាមួយ ក្នុងការសម្រេចចិត្តរបស់ខ្លួនយ៉ាងណាក្តី៕

        ដោយៈ គង់ សូរិយា

        ភ្នំពេញៈ ឌីសាញឡើងប្រកបដោយភាពច្នៃប្រឌិត និងសហសម័​យ បុរីបុស្បាបាននិងកំពុងបង្ហាញនូវវីឡាកូនកាត់ ដែលមានភាពស្រស់ស្អាត និងទាក់ទាញចិត្តអតិថិជន។

ក្រុមប្រឹក្សាភិបាល និងជាអគ្គនាយកនៃគណៈកម្មការទីផ្សារនៃបុរីបុស្បា លោកអ៊ី ពិសិដ្ឋ បានសរសររលើបណ្តាញទំនាក់ទំនងសង្គមតេឡេក្រាមនៅថ្ងៃទី៣ កក្កដានេះថា បុរីបុស្បាបាននិងកំពុងផ្តល់ជូនអតិថិជននូវជម្រើសងាយស្រួល លើលក្ខខ័ណ្ឌបង់ប្រាក់ ដោយអតិថិជនបង់ត្រឹមតែ៤៥០ដុល្លារ នឹងទទួលបានវីឡាកូនកាត់ ដែលមានកំពស់៣ជាន់ ៣បន្ទប់គេង។លោកបន្តថា “ស្អាតណាស់បងប្អូន យើងលក់អស់ជាង៥០ភាគរយនៃគំរោងទាំងមូលហើយ”។បុរីបុស្បា ជាទីតាំងដែលមានសក្តានុពលខ្ពស់ ហ៊ុមព័ទ្ធដោយតំបន់សេដ្ឋកិច្ចពិសេសៗ ដែលបង្ករភាពងាយស្រួលទាំងការរស់នៅ និងប្រកបអាជីវកម្មផ្សេងៗ។

បុរីបុស្បា ស្ថិតក្នុងសង្កាត់ព្រៃវែង ខ័ណ្ឌដង្កោ រាជធានីភ្នំពេញ ដែលជាតំបន់កំពុងមានការរីកចម្រើនលឿន ដោយបច្ចុប្បន្នផ្សារទំនើ​ប ហាងកាហ្វេល្បីៗ និងមីនីម៉ាតតូចៗជាច្រើន បានបើកដំណើរ​ការ​នៅតំបន់នេះ។ទីតាំងរបស់បុរីនេះ ងាយស្រួលក្នុងការធ្វើដំណើរទៅកាន់ផ្លូវជាតិលេខ៣ លេ៣ខ៤ ផ្លូវក្រវ៉ាត់ក្រុងទី៣ មហាវិថីសម្តេចតេជោ ឬផ្លូវ៦០ម៉ែត្រ និងព្រលានយន្តហោះអន្តរជាតិតេជោផងដែរ។

លោកឧកញ៉ាឈាង រ័ត្ន អ្នកអភិវឌ្ឍន៍បុរីបុស្បាបានមានប្រសា​សន៍ឲ្យដឹងថា  តំបន់នេះនឹងមានការរីកចម្រើន ដូចតំបន់ស្ថិតក្នុងខ័ណ្ឌទួលគោកនាពេលអនាគត ដោយសារតំបន់នេះ ជាតំបន់អភិវឌ្ឍន៍ថ្មី ងាយស្រួលក្នុងការរៀបចំហេដ្ឋារចនាសម្ព័ន្ឋ មានមនុស្សរស់នៅច្រើន និងងាយតភ្ជាប់ ទៅកាន់មជ្ឈមណ្ឌលពាណិជ្ជកម្មធំៗ ស្ថិតនៅជុំវិញនេះ។

លោកឧកញ៉ាឈាង រ័ត្នបានបន្តថា “ការអភិវឌ្ឍបុរីបុស្បា បាននិងកំពុងរៀបចំឡើងសមស្របតាមសម័យកាល និងរសនិយមរបស់អតិថិជន ដោយយើងផ្តោតលើគុណភាព សោភ័ណភាព ហេដ្ឋារចនាសម្ព័ន្ឋធំៗ និងផ្តោតជាពិសេសលើតំបន់បៃតង”។
📍ទីតាំងគម្រោង ៖ https://bit.ly/BosbaApsorMeraProject