ដោយ: គង់ លាងហួរ

អន្តរជាតិ: គម្រោង​ផ្លូវ​រថភ្លើង​ថ្មី​ តភ្ជាប់រវាង​ប្រទេសឡាវ និង​វៀតណាម ​ត្រូវបានអនុម័តជាផ្លូវការហើយ ដោយរថភ្លើងនេះនឹងបង្កើតការតភ្ជាប់ ដោយផ្ទាល់រវាងប្រទេសទាំង២ និងមានបំណងក្លាយជាប្រភពចម្បង នៃការអភិវឌ្ឍសេដ្ឋកិច្ច និងហេដ្ឋារចនាសម្ព័ន្ធនៅក្នុងតំបន់។

គម្រោងនេះគឺជាផ្នែកមួយ នៃផែនការអភិវឌ្ឍន៍ផ្លូវរថភ្លើង វៀងច័ន្ទ-វាំងអាង(Vientiane-Vung Ang)  សម្រាប់ឆ្នាំ២០២១ ដល់ឆ្នាំ២០៣០ ជាមួយនឹងចក្ខុវិស័យឆ្ពោះទៅកាន់ឆ្នាំ២០៥០។

សារពត៌មាន Vietnam Plus បានរាយការណ៍ថា គម្រោងនេះគឺជាការបណ្តាក់ទុនរួមគ្នា រវាងក្រុមហ៊ុនវៀតណាម Deo Ca Group JSC និងក្រុមហ៊ុនឡាវ Petroleum Trading Lao Public Company (PTL) ដែលនឹងត្រូវបានអភិវឌ្ឍឡើង ក្រោមទម្រង់នៃភាពជាដៃគូសាធារណៈ និងឯកជន។កំណាត់ទីមួយ នៃគម្រោងផ្លូវរថភ្លើងវៀងច័ន្ទ-វាំងអាង នឹងគ្របដណ្តប់ចម្ងាយ១០៣គីឡូម៉ែត្រ ចាប់ពីកំពង់ផែវៀតណាម Vung Ang រហូតដល់ Mu Gia ដែលជាព្រំដែនរវាងប្រទេសវៀតណាម និងឡាវ ហើយនឹងត្រូវចំណាយថវិកា សាងសង់អស់ជិត២៧,៥ពាន់ពាន់លានដុង (ប្រហែល១,១២ពាន់លានដុល្លារ)។

ជាផ្នែកមួយនៃផ្លូវដែកវៀងច័ន្ទន៍-វាំងអាង កំណាត់ដំបូងនេះ នឹងដើរតួយ៉ាងសំខាន់ ក្នុងការតភ្ជាប់ប្រទេសឡាវ ទៅកាន់ពាណិជ្ជកម្មដែនសមុទ្រក្នុងតំបន់ ពង្រឹងទំនាក់ទំនងសេដ្ឋកិច្ច ជាមួយវៀតណាម និងទីផ្សារគោលដៅនៅក្នុងប្រទេសចិន កូរ៉េខាងត្បូង និងជប៉ុន។ជាមួយគ្នានេះ គម្រោងផ្លូវរថភ្លើង វៀងចន្ទន៍-វាំងអាង ដែលមានប្រវែងសរុប៥៥៤,៧គីឡូម៉ែត្រ ក៏នឹងត្រូវបានសាងសង់ក្រោមភាពជាដៃគូសាធារណៈ និងឯកជនផងដែរ ជាមួយទុនវិនិយោគសរុបចំនួន១៤៩,៥៥ពាន់ពាន់លានដុង (ប្រហែល៦,៣ពាន់លានដុល្លារ)។

នៅពេលសាងសង់រួចរាល់ ខ្សែរថភ្លើងនេះ នឹងតភ្ជាប់ពីរដ្ឋធានីវៀងច័ន្ទន៍ ទៅកាន់ស្រុកថាក់ខាក ក្នុងខេត្តខាំមួន ប្រទេសឡាវ បន្ទាប់មកបន្តទៅកាន់ព្រំដែនវៀតណាម និងទៅកាន់កំពង់ផែសមុទ្រ Vung Ang ក្នុងខេត្ត Ha Tinh ប្រទេសវៀតណាម។

យោងតាមប្រភពពីប្រព័ន្ធផ្សព្វផ្សាយ វៀតណាមបានឱ្យដឹងថា ក្រុមហ៊ុនបណ្តាក់ទុនរួមគ្នាខាងលើនេះ ត្រូវតែធ្វើការសិក្សាជាមុនអំពីលទ្ធភាព និងបញ្ជូនរបាយការណ៍ស្តីពី ការរកឃើញរបស់ពួកគេដោយអនុលោម ទៅតាមច្បាប់ជាតិ និងតំបន់ និងគម្រោងផែនការមុនពេលចាប់ផ្តើមការងារលើគម្រោង៕

ដោយៈ តែម សុខុម

តូក្យូ: ធនាគារកណ្តាលជប៉ុន (BOJ) បានព្រមានកាលពីថ្ងៃសុក្រ ទី២០ ខែតុលា ថា ទីផ្សារអចលនទ្រព្យក្នុងប្រទេសជប៉ុន កំពុងបង្ហាញសញ្ញាឈានទៅរកពពុះ ដោយសាររំហូរចូលនៃរូបិយប័ណ្ណ​បរទេស និងការវិនិយោគដែលកំពុងកើនឡើង ពីសំណាក់បណ្ដាក្រុមហ៊ុនអភិវឌ្ឍន៍អចលនទ្រព្យធំៗ។

ការរកឃើញនេះកើតមានឡើង នៅពេលធនាគារកណ្ដាលមួយនេះ បានរក្សាអត្រាការប្រាក់ទាបបំផុតអស់ រយៈពេលជាច្រើនទស្សវត្សរ៍មកហើយ ដើម្បីជំរុញសេដ្ឋកិច្ចដែលផុយស្រួយ និងដើម្បីទប់អតិផរណា ដែលបណ្ដាលឱ្យអ្នកវិភាគមួយចំនួនព្រមានថា ការបោះពុម្ពប្រាក់ក្រដាសប្រាក់យ៉ាងច្រើនសន្ធឹកសន្ធាប់ របស់ធនាគារកណ្ដាលជប៉ុន កំពុងនាំទៅរកពពុះអចលនទ្រព្យនាពេលអនាគត។

ធនាគារកណ្តាលជប៉ុន បានលើកឡើងក្នុងរបាយការណ៍ប្រចាំត្រីមាសរបស់ខ្លួនស្តីពីប្រព័ន្ធហិរញ្ញវត្ថុថា ប្រាក់កម្ចីទាក់ទងនឹងអច​លនទ្រព្យ បានបន្តកើនឡើងឥតឈប់ឈរ ដែលជាចម្បងដើម្បីផ្តល់ហិរញ្ញប្បទាន ដល់តម្រូវការរបស់បណ្ដាវិនិយោគិនបរទេស។ថ្នាក់ដឹក​នាំធនាគារកណ្តាលជប៉ុនបាននិយាយថា នៅក្នុងការវាស់ស្ទង់វិស័យសេដ្ឋកិច្ចបង្ហាញថា អនុបាតនៃការវិនិយោគរបស់បណ្ដាក្រុមហ៊ុនអចលនទ្រព្យ ធៀបនឹងផលទុនជាតិសរុប (GDP) បានប្រែទៅជា “ក្រហម” ជាសញ្ញាដែលបង្ហាញថា ទីផ្សារអចលនទ្រព្យកំពុងពុះកញ្រ្ជោលខ្លាំង។

ធនាគារកណ្ដាលនេះបានបន្ថែមថា “កំណើននៃការវិនិយោគរបស់បណ្ដាក្រុមហ៊ុនអចលនទ្រព្យ ត្រូវបានពន្លឿនដោយគម្រោងអភិវឌ្ឍន៍ទីក្រុងឡើងវិញ ដោយក្រុមហ៊ុនអភិវឌ្ឍន៍អចលនទ្រព្យធំៗ”។

ធនាគារនេះបានបន្តថា “នៅក្នុងតំបន់ពាណិជ្ជកម្មមានកម្រិតមួយចំនួននាកណ្តាលទីក្រុងតូក្យូ ប្រតិបត្តិការក្នុងជួរតម្លៃ កាន់តែខ្ពស់បាននិងកំពុងកើនឡើង” ហើយថា ស្ថានការណ៍វិវឌ្ឍន៍ក្នុងទីផ្សារប្រតិបត្តិការអចលនទ្រព្យ “បន្តទាមទារឱ្យមានការឃ្លាំងមើលយ៉ាងយកចិត្តទុកដាក់”៕ Reuters៕

តែម សុខុម

វៀងចន្ទន៍: ស្របពេលសេដ្ឋកិច្ចសកលស្ថិតក្នុងស្ថានភាពមិនប្រាកដប្រជាដោយសារជួបវិបត្តិធ្ងន់ធ្ងរផ្ទួនៗរួមមានវិបត្តិកូវីដ-១៩ ក្រោយមកវិបត្តិសង្គ្រាមរុស្ស៊ី-អ៊ុយក្រែន និងថ្មីៗនេះវិបត្តិសង្គ្រាមអ៊ីស្រាអែល-ប៉ាឡេស្ទីន សេដ្ឋកិច្ចកម្ពុជា នៅតែបង្ហាញសញ្ញាល្អប្រសើរឆ្ពោះទៅរកកំណើនខ្ពស់នៅឆ្នាំ២០២៤។

មូលនិធិរូបិយវត្ថុអន្តរជាតិ IMF បានធ្វើការព្យាករគួរឱ្យសាទរថា សេដ្ឋកិច្ចរបស់កម្ពុជា នឹងសម្រេចបានកំណើនក្នុងរង្វង់៦,១%នៅឆ្នាំក្រោយ។ នេះបើយោងតាមកាសែតថៃ The Nation ចុះផ្សាយកាលពីថ្ងៃសុក្រ ទី២០ ខែតុលា។ទន្ទឹមនេះ ស្ថាប័ន IMF បានព្យាករថា នៅក្នុងឆ្នាំ២០២៤ សេដ្ឋកិច្ចឡាវ នឹងសម្រេចបានកំណើន៤% ប៉ុន្តែអតិផរណានៅតែជាបញ្ហាប្រឈមដ៏សំខាន់។

ស្ថាប័នអន្តរជាតិមួយនេះបានព្យាករទៀតថា សេដ្ឋកិច្ចថៃ នឹងសម្រេចបានកំណើន៣,២% សេដ្ឋកិច្ចវៀតណាម ៥,៨% សេដ្ឋកិច្ចឥណ្ឌូនេស៊ី ៥% សេដ្ឋកិច្ចម៉ាឡេស៊ី ៤,៣% និងសេដ្ឋកិច្ចមីយ៉ាន់ម៉ា ២,៦%។

ថ្វីបើបរិយាកាសសកលមានបញ្ហាប្រឈមយ៉ាងណាក្ដី ក៏តំបន់អាស៊ី និងប៉ាស៊ីហ្វិក នៅតែមានភាពល្អប្រសើរច្រើន។ តំបន់នេះត្រូវបានរំពឹងថានឹងសម្រេចបានកំណើនសេដ្ឋកិច្ច៤,៦%ក្នុងឆ្នាំ២០២៣ និង៤,២%ក្នុងឆ្នាំ២០២៤ ដែលធ្វើឱ្យវាឆ្ពោះទៅរកការរួមចំណែកគ្របដណ្ដប់ប្រមាណ២ភាគ៣នៃកំណើនសេដ្ឋកិច្ចសកលក្នុងឆ្នាំនេះ៕ The Nation៕

ដោយៈ តែម សុខុម
បាងកក: ក្រុមហ៊ុនផលិតរថយន្តប្រណីត លំដាប់សេដ្ឋីរបស់ប្រទេសអង់គ្លេស Rolls-Royce Motor Cars គ្រោងផលិតរថយន្តអគ្គិសនីសុទ្ធ (All-electric Automobile) ក្នុងផ្នែករថយន្តអគ្គិសនីលំដាប់ខ្ពស់នៅឆ្នាំ២០៣០។

ក្រុមហ៊ុននេះបានបង្ហាញពីគោលដៅ ថ្ងៃអនាគតរបស់ខ្លួននេះ បន្ទាប់ពីចេញលក់រថយន្តអគ្គិសនី (EV) ប្រណីតដំបូងគេក្នុងពិភពលោក។ នេះបើយោងតាមកាសែត The Nation ចុះផ្សាយកាលពីថ្ងៃសុក្រ ទី២០ ខែតុលា។

កាលពីពេលថ្មីៗនេះក្រុមហ៊ុន Rolls-Royce បានបញ្ចេញរថយន្ត EV ដំបូងបង្អស់របស់ខ្លួន ដែលមានឈ្មោះថា “Spectre” នៅប្រទេសថៃ បន្ទាប់ពីខ្លួនបានបញ្ចេញរថយន្តនេះ ​ជាលើកដំបូងនៅប្រទេសកូរ៉េខាងត្បូង ដែលស្ថិតក្នុងតំបន់អាស៊ី-ប៉ាស៊ីហ្វិក និងប្រទេ​សសិង្ហបុរី ដែលស្ថិតក្នុងតំបន់អាស៊ីអាគ្នេយ៍។ រថយន្ត Rolls-Royce អគ្គិសនីមូឌែលដំបូង Spectre នេះមានតម្លៃចាប់ពីប្រមាណ៣២លានបាត ឬជិត៨៨០.០០០ដុល្លារអាមេរិក ឡើងទៅ។

តំបន់អាស៊ី-ប៉ាស៊ីហ្វិក គ្របដណ្ដប់ជាង៦០%នៃទីផ្សាររថយន្ត EV ទូទាំងពិភពលោក ហើយក្រុមហ៊ុន Rolls-Royce សម្លឹងឃើញសក្តានុពល ក្នុងការសម្រេចបានកំណើន ជាពិសេសក្នុងប្រទេសចិន ដែលជាទីផ្សារធំទី២ របស់ក្រុមហ៊ុននេះ។

លោកស្រី Irene Nikkein នាយកប្រចាំតំបន់អាស៊ី-ប៉ាស៊ីហ្វិកនៃក្រុមហ៊ុន Rolls-Royce Motor Cars បានថ្លែងថា “Rolls-Royce ជឿនលឿនណាស់ផ្នែកបច្ចេកវិទ្យា និងវិស្វកម្ម។ ដូច្នេះក្នុងនាមជាក្រុមហ៊ុនដំបូង និងតែមួយគត់ នៅក្នុងទីផ្សាររថយន្តប្រណីតពេលនេះគឺជាការផ្លាស់ប្ដូរដ៏អស្ចារ្យ”៕ The Nation៕

ដោយ: គង់ លាងហួរ

អន្តរជាតិ: ស្ថាប័នអាជីវកម្មលក់រាយOR របស់ក្រុមហ៊ុនប្រេងខ្នាតយក្ស PTT កំពុងពង្រីកអាជីវកម្មអន្តរជាតិរបស់ខ្លួន ដោយផ្តោតជាពិសេសលើកម្ពុជា ដែលក្រុមហ៊ុននេះចាត់ទុកជាផ្ទះទី២ របស់ពួកគេ ដើម្បីទ្រទ្រង់ដល់កំណើនប្រកបដោយចីរភាព។

លោក Disathat Panyarachun នាយកប្រតិបត្តិក្រុមហ៊ុន PTT Oil and Retail Business Pcl (OR) បានបង្ហាញពីយុទ្ធសាស្ត្រ និងទិសដៅរបស់ក្រុមហ៊ុន ក្នុងការធ្វើអាជីវកម្មអន្តរជាតិ ដើម្បីពង្រឹងភាពរឹងមាំនៃប្រតិបត្តិការរបស់ខ្លួន។

ជាក់ស្តែង ក្រុមហ៊ុននេះគ្រោងធ្វើពិពិធកម្ម អាជីវកម្មរបស់ពួកគេ ដូចជាតាមរយៈការលក់ឧស្ម័ន LPG និងកៅស៊ូអ៊ុតថ្នល់ ព្រមទាំងធ្វើការពង្រីកប្រតិបត្តិការអន្តរជាតិ ជាមួយដៃគូរបស់OR ដូចជាក្រុមហ៊ុន K-NEX Corporation ហាងបោកគក់ និងសម្ងួតសម្លៀកបំពាក់បែបទំនើប និងរហ័សទាន់ចិត្ត Otteri Wash & Dry និងក្រុមហ៊ុន Dusit Foods Limited។សម្រាប់ប្រទេសកម្ពុជា ដែលជាទីតាំងធ្វើអាជីវកម្មអន្តរជាតិរបស់ក្រុមហ៊ុនOR វាគឺប្រៀបដូចជាផ្ទះទីពីររបស់ពួកគេ ព្រោះថា នៅកម្ពុជា នៅតែមានឱកាសជាច្រើនសម្រាប់ការរីកចម្រើន។គិតត្រឹមខែសីហា ឆ្នាំ២០២៣នេះ ក្រុមហ៊ុនOR បានបើកដំណើរការសាខាស្ថានីយPTT ចំនួន១៦៩ និងឃ្លាំងផលិតផលចំនួន៧ រួមជាមួយនឹងអាជីវកម្មប្រេងរំអិល PTT Lubricantsនៅកម្ពុជា។

ទន្ទឹមគ្នានេះ ក្រុមហ៊ុនក៏បានវិនិយោគ ក្នុងគម្រោងបណ្តាក់ទុនរួមគ្នា ដើម្បីផ្តល់ឥន្ធនៈអាកាសចរណ៍ នៅឯអាកាសយានដ្ឋានអន្តរជាតិថ្មីក្នុងរាជធានីភ្នំពេញ ដែលគ្រោងនឹងបញ្ចប់នៅត្រីមាសទី៣ ឆ្នាំ២០២៤ខាងមុខនេះ។ចំណែកឯ នៅក្នុងប្រភេទអាជីវកម្មបែប Lifestyle ក្រុមហ៊ុន OR មានសាខា Café Amazon ចំនួន២៣១ និងហាងទំនិញងាយស្រួលចំនួន៦៥នៅកម្ពុជា។

លើសពីនេះ ក្រុមហ៊ុនOR មានគម្រោងវិនិយោគលើហេដ្ឋារចនាសម្ព័ន្ធដើម្បីគាំទ្រដល់ការពង្រីកអាជីវកម្ម ដូចជា ឃ្លាំងប្រេង និងឧស្ម័ន LPG រោងចក្រលាយកៅស៊ូអ៊ុតថ្នល់ និងស្វែងរកឱកាសនៅក្នុងអាជីវកម្ម ដែលទាក់ទងនឹងថាមពលផ្សេងទៀត ដូចជា ការប្តូរថ្មអាគុយ (Battery Swapping) និងស្ថានីយបញ្ចូលថាមពលយានយន្ដអគ្គិស នី (EV station Pluz) ជាដើម៕

ដោយៈ ហ្វីអូណា

        ភ្នំពេញៈ ប្រជាពលរដ្ឋ៧០០គ្រួសារ ដែលរងផលប៉ះពាល់ក្នុងគម្រោងសាងសង់ផ្លូវ និងស្ពានឆ្លងកាត់ទន្លេមេគង្គ ក្នុងខេត្តក្រចេះអាជ្ញាធរកំពុងពន្លឿនក្នុងការដោះស្រាយហើយ។

ការដោះស្រាយនេះ ដើម្បីឲ្យក្រុមហ៊ុនសំណង់សៀងហៃគ្រុប បានចុះបើកការដ្ឋានសាង់សង់ “មហាវិថីតេជោ” ចាប់ពីរង្វង់មូលព្រាប ស រហូតដល់រង្វង់មូលខ្លាស្ទុះ ឲ្យបានលឿនទៅតាមគម្រោងផែនការ។នេះការលើកឡើងរបស់ លោក លឹម ស៊ីដេនីន រដ្ឋលេខាធិការក្រសួងសាធារណៈការ និងដឹកជញ្ជូន និងជានាយកគ្រប់គ្រងគម្រោងសាងសង់ស្ពានឆ្លងកាត់ទន្លេមេគង្គ និងផ្លូវតភ្ជាប់ នៅក្នុងកិច្ចប្រជុំជាមួយលោក វ៉ា ថន អភិបាលខេត្តនិងក្រុមការងារ គណៈកម្មការអន្តរក្រសួង ក្នុងការចុះអនុវត្តការងារដោះស្រាយ ផលប៉ះពាល់ដោយសារគម្រោងសាងសង់ស្ពានឆ្លងកាត់ទន្លេមេគង្គ និងផ្លូវតភ្ជាប់ក្នុងភូមិសាស្ត្រខេត្តក្រចេះ នៅថ្ងៃទី២០ ខែតុលា ឆ្នាំ២០២៣ នៅសាលប្រជុំក្រុមប្រឹក្សាខេត្ត។លោកលឹម ស៊ីដេនីន បានបន្តថា នៅក្នុងដំណាក់កាលទី១.យើងចុះស្រង់ផលប៉ះពាល់នៃគម្រោងធ្វើផ្លូវ និងគម្រោងសាងសង់ស្ពាន។ទី២. យើងត្រូវធ្វើកិច្ចសន្យាឲ្យបានច្បាស់លាស់ សំដៅលើការដោះស្រាយផលប៉ះពាល់ កុំឲ្យមានជម្លោះទៅថ្ងៃក្រោយ ជាមួយប្រជាពលរដ្ឋ។លោកលឹម ស៊ីដេនីន ក៏បានបញ្ជាក់ថា រាជរដ្ឋាភិបាលកម្ពុជាក្រោមការដឹកនាំ ដោយសម្ដេចមហាបវរអធិបតី ហ៊ុន ម៉ាណែត ជានាយករដ្ឋមន្ត្រី ក្នុងអាណត្តិទី៧នេះ ដែលបានដាក់ចេញនៅយុទ្ធសាស្ត្រ បច្ចុកោណ “មនុស្ស,ផ្លូវ,ទឹក,ភ្លើងនិងបច្ចេកវិទ្យាឌីជីថល។លោកបបន្តថា សូមឲ្យមន្រ្តីយើងទាំងអស់គ្នា ខិតខំប្រឹងប្រែងធ្វើល្អ ដើម្បីបម្រើប្រជាពលរដ្ឋ ទៅតាមគោលនយោបាយរាជរដ្ឋាភិបាលដើម្បីសំដៅឲ្យប្រជាពលរដ្ឋយើង បានរស់នៅធម្មតាហ្នឹងមានជីវភាពល្អប្រសើរ។គម្រោងសាងសង់ផ្លូវតភ្ជាប់ និងស្ពានឆ្លងកាត់ទន្លេមេគង្គ ក្នុងខេត្តក្រចេះ គឺជាជំនួយឥណទានសម្បទាន ​ពីរាជរដ្ឋាភិបាលសាធារ​ណរដ្ឋប្រជាម៉ាចិន ដែលបានបើកការដ្ឋានសាងសង់កាលពីថ្ងៃទី ២ ខែមករា ឆ្នាំ ២០២៣ ដោយសម្ដេចអគ្គមហាសេនាបតីតេជោ ហ៊ុនសែន បច្ចុប្បន្ននេះស្ពានឆ្លងក្នុងខេត្តក្រចេះ ដោយសម្រេចការសាងសង់ បាន១៧%ហើយ។ ស្ពាននេះមានគម្រោងសាងសង់មានរយៈពេល៤២ខែទើបបញ្ចប់៕

ដោយៈ គង់ សូរិយា

        ប្រទេសចិនៈ លោកឧបនាយករដ្ឋមន្ត្រីស៊ុន ចាន់ថុលអនុប្រធានទី១ក្រុមប្រឹក្សាអភិវឌ្ឍន៍កម្ពុជា អញ្ជើញចុះទស្សនកិច្ចនៅទីក្រុង Shenzhen សាធារណរដ្ឋប្រជាមានិតចិន ដើម្បីទាក់ទាញវិនិយោគិន និងបង្ហាញជូនឱកាសវិនិយោគថ្មីៗនៅកម្ពុជា ដល់ក្រុមហ៊ុនចំនួន២រួមមាន ក្រុមហ៊ុនផលិតកង់ XDS Bicycle និងក្រុមហ៊ុន Huawei។

ក្នុងឱកាសនោះ លោកបានអញ្ជើញចុះទស្សនកិច្ចថែទាំវិនិយោ​គិន បង្ហាញជូនឱកាសវិនិយោគថ្មីៗ និងពិភាក្សាការងារជាមួយលោកស្រី Chuqiao Li អនុប្រធានក្រុមហ៊ុន SHENZHEN XIDESHENG Bicycle Co., Ltd. (XDS) និងលោក Jianlin Bao អនុប្រធានក្រុមហ៊ុន Huawei Technologies Co., Ltd.។ដំណើរទស្សនកិច្ចថែទាំវិនិយោគដោយផ្ទាល់ ជាលើកដំបូង (Investment Aftercare) ដល់ស្នាក់ការកណ្តាលរបស់ក្រុមហ៊ុនផលិតកង់ XDS Bicycle និងក្រុមហ៊ុនHuawei នេះ គឺជាបេសកកម្មលើកទី១ របស់ថ្នាក់ដឹកនាំក្រុមប្រឹក្សាអភិវឌ្ឍន៍កម្ពុជា ក្នុងនីតិកាលទី៧ ដើម្បីបង្ហាញការយកចិត្តទុកដាក់ របស់រាជរដ្ឋាភិបាលកម្ពុជាដល់វិនិយោគិនក្រៅប្រទេស ដែលបានចូលមកវិនិយោគនៅកម្ពុជា តាមរយៈការចុះសួរសុខទុក្ខវិនិយោគិនដោយផ្ទាល់ និងជម្រាបជូនអំពីឱកាសវិនិយោគថ្មីៗនៅកម្ពុជា ដល់ទីស្នាក់ការកណ្តាលរបស់ក្រុមហ៊ុន។

ក្នុងជំនួបជាមួយ XDS Bicycle ក្រុមហ៊ុនបានថ្លែងអំណរគុណដល់រាជរដ្ឋាភិបាលកម្ពុជា ដែលបានផ្តល់ការយកចិត្តទុកដាក់ជាខ្លាំង និងបានផ្តល់ឱកាស ឱ្យក្រុមហ៊ុនមានលទ្ធភាព ក្នុងការពង្រីកសង្វាក់ផលិតកម្មរបស់ខ្លួនបានយ៉ាងឆាប់រហ័ស ក្នុងព្រះរាជាណាចក្រកម្ពុជា។ជាពិសេសជាងនេះទៅទៀត ក្រុមហ៊ុនបានបង្ហាញអំពីចក្ខុវិស័យ ក្នុងការពង្រីករោងចក្ររបស់ខ្លួន ដែលមានទីតាំងក្នុងក្រុងបាវិត ឱ្យមានទំហំធំដូចរោងចក្រ ក្នុងទីស្នាក់ការកណ្តាលទីក្រុង Shenzhen នេះផងដែរ។

ជាមួយគ្នានេះដែរ លោកឧបនាយករដ្ឋមន្ត្រី បានថ្លែងអំណរគុណដល់ក្រុមហ៊ុនXDS Bicycle ដែលសម្រេចចិត្តចូលមកវិនិយោគបង្កើតរោងចក្រនៅកម្ពុជា រហូតបច្ចុប្បន្ននេះ បានផ្តល់ឱកាសការងារជូនដល់ប្រជាពលរដ្ឋប្រមាណ១៤០០នាក់រួចមកហើយ។

លោកឧបនាយករដ្ឋមន្ត្រីស៊ុន ចាន់ថុល ក៏បានអនុញ្ញាតឱ្យក្រុមហ៊ុនលើកជាសំណូមពរ និងបង្ហាញនូវបញ្ហាប្រឈម ដែលក្រុមហ៊ុនកំពុងជួប ដើម្បីឱ្យរដ្ឋាភិបាលកម្ពុជាចូលរួមដោះស្រាយ ក្នុងទិសដៅ  ជម្រុញឱ្យក្រុមហ៊ុនវិនិយោគ ពង្រីករោងចក្របន្ថែមទៀតនៅកម្ពុជា ព្រមទាំងអាចប្រែក្លាយ ជាមជ្ឈមណ្ឌលនៃឧត្តមភាព (Center of Excellence) នៅក្នុងតំបន់ និងនៅលើពិភពលោក ដើម្បីបង្កើតការងារបន្ថែមដល់ប្រជាពលរដ្ឋកម្ពុជា។

លោកឧបនាយករដ្ឋមន្ត្រី បានឆ្លៀតយកឱកាសនេះ ផ្តួចផ្តើមគំនិតឱ្យមានរៀបចំការជិះកង់ របស់ក្រុមហ៊ុនផ្ទាល់(XDS Bike Tour) នៅក្នុងខេត្តសៀមរាប ដើម្បីគោលដៅសំខាន់ៗចំនួន ៤ រួមមាន ទី១).ផ្សព្វផ្សាយអំពីការវិនិយោគ របស់ក្រុមហ៊ុនXDSនៅកម្ពុជា ទី២ផ្សព្វផ្សាយអំពីវិស័យ ទេសចរណ៍នៅប្រទេសកម្ពុជា ទី៣ ផ្សព្វផ្សាយផលិតផលរបស់ក្រុមហ៊ុន និងទី៤ រៃអង្គាសថវិកាជូនដល់មន្ទីរពេទ្យកុមារអង្គរ។

ក្នុងដំណើរទស្សនកិច្ចនៅក្រុមហ៊ុន Huawei បទបង្ហាញអំពីនវានុវត្តឌីជីថលថ្មីៗ រួមមាន ប្រព័ន្ធរដ្ឋបាលឌីជីថល ប្រព័ន្ធហេដ្ឋារចនាសម្ព័ន្ធឌីជីថល ប្រព័ន្ធកំពង់ផែឌីជីថល ប្រព័ន្ធអាកាសយានដ្ឋានឆ្លាតវៃ ទីក្រុងឌីជីថល ប្រព័ន្ធគ្រប់គ្រងថាមពលឌីជីថល ប្រព័ន្ធហិរញ្ញវត្ថុឌីជីថល និងប្រព័ន្ធទំនើបផ្សេងៗទៀត ត្រូវបានជម្រាបជូនដល់គណៈប្រតិភូកម្ពុជា។ក្រុមហ៊ុនក៏បានលើកឡើង អំពីកិច្ចសហប្រតិបត្តិការរវាងក្រុមហ៊ុន Huawei និងរាជរដ្ឋាភិបាលកម្ពុជាកន្លងមក ក្នុងការចូលរួមក្នុងធ្វើឌីជីថលូបនីយកម្ម របស់រាជរដ្ឋាភិបាលកម្ពុជាផងដែរ។

ក្នុងដំណើរទស្សនកិច្ចនេះ លោកឧបនាយករដ្ឋមន្ត្រី ក៏បានលើកឡើងអំពីគោលនយោបាយ និងចក្ខុវិស័យសេដ្ឋកិច្ច និងសង្គមឌីជីថលរបស់រាជរដ្ឋាភិបាលកម្ពុជា ជូនដល់ក្រុមហ៊ុនឱ្យជ្រាបកាន់តែច្បាស់។ ពិសេសជាងនេះ លោកស៊ុន ចាន់ថុលក៏បានបញ្ចាក់បន្ថែមផងដែរថា វិស័យបច្ចេកវិទ្យាឌីជីថល បានទទួលការយកចិត្តទុកដាក់ខ្ពស់ពីរាជរដ្ឋាភិបាល តាមរយៈផ្តល់ការលើកទឹកចិត្ត ជាពិសេសដល់វិនិយោគិន ដែលធ្វើការវិនិយោគលើវិស័យនេះ នៅកម្ពុជា។ អាស្រ័យលើកត្តាអំណោយផលនេះ លោកឧបនាយករដ្ឋមន្ត្រី បានជម្រុញលើកទឹកចិត្តខ្ពស់ ឱ្យក្រុមហ៊ុនបង្កើតសង្វាក់ផលិតកម្មរបស់ខ្លួន នៅក្នុងប្រទេសកម្ពុជាដោយផ្ទាល់ផងដែរ៕

ដោយៈ គង់ សូរិយា

        រីយ៉ាតៈ នាយករដ្ឋមន្ត្រីកម្ពុជា និងអារ៉ាប៊ីសាអូឌីត ប្តេជ្ញាចិត្តរួមគ្នាក្នុងការពង្រឹង និងពង្រីកទំនាក់ទំនងទ្វេរភាគីបន្ថែមទៀត។

សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានជួបពិភាក្សាការងារជាមួយព្រះអង្គម្ចាស់ Mohammed Bin Salman Bin Abdulaziz Al Saud រជ្ជទាយាទ និងជានាយករដ្ឋមន្ត្រី នៃព្រះរាជាណាចក្រអារ៉ាប៊ីសាអូឌីត ក្នុងឱកាសនៃការចូលរួមក្នុង “កិច្ចប្រជុំកំពូលអាស៊ាន -ក្រុមប្រឹក្សាសហប្រតិបត្តិការឈូងសមុទ្រ” នៅទីក្រុងរីយ៉ាដ ព្រះរាជាណាចក្រអារ៉ាប៊ីសាអូឌីត ។

ក្នុងកិច្ចជំនួបនេះ ព្រះអង្គម្ចាស់នាយករដ្ឋមន្ត្រី បានអបអរសាទរចំពោះ សម្តេចធិបតី ក្នុងឱកាសនៃការចូលកាន់មុខតំណែងជានាយករដ្ឋមន្រ្តីកម្ពុជា ក្នុងនីតិកាលទី៧ នៃរដ្ឋសភា ព្រមទាំងបានជម្រាបជូន សម្តេចធិបតី អំពីទិសដៅប្រកបដោយសក្តានុពល ក្នុងការលើកកម្ពស់ទំនាក់ទំនងរវាងកម្ពុជា-អារ៉ាប៊ីសាអូឌីត សំដៅឈានទៅបង្កើនកិច្ចសហប្រតិបត្តិការលើវិស័យសំខាន់មួយចំនួន ជាអាទិ៍ វិស័យពាណិជ្ជកម្ម វិនិយោគ, ថាមពល និងវិស័យសក្តានុពលដទៃទៀត ដើម្បីសម្រេចបាន នូវផលប្រយោជន៍រួមសម្រាប់ប្រទេស និងប្រជាជនទាំងពីរ ។ជាការឆ្លើយតប សម្តេចធិបតី បានចូលរួមអបអរសាទរចំពោះជោគជ័យរបស់អារ៉ាប៊ីសាអូឌីត ក្នុងការធ្វើជាម្ចាស់ផ្ទះរៀបចំ “កិច្ចប្រជុំកំពូលអាស៊ាន-ក្រុមប្រឹក្សា សហប្រតិបត្តិការឈូងសមុទ្រ” ជាលើកដំបូងនេះ និងបានសម្តែងនូវការពេញចិត្ត ចំពោះវឌ្ឍនភាពរីកចម្រើននៃទំនាក់ទំនងទ្វេភាគីរវាងកម្ពុជា-អារ៉ាប៊ីសាអូឌីត ដូចដែលឆ្លុះបញ្ចាំងតាមរយៈការសម្រេចបង្កើត ស្ថានឯកអគ្គរាជទូតអារ៉ាប៊ីសាអូឌីតប្រចាំនៅកម្ពុជា ជាដើម ។

ឆ្លងតាមកិច្ចពិភាក្សានេះ នាយករដ្ឋមន្ត្រី នៃប្រទេសទាំងពីរ បានបង្ហាញនូវការប្តេជ្ញាចិត្តរួមក្នុងការពង្រឹង និងពង្រីកទំនាក់ទំនងបន្ថែមទៀត ដោយបានឯកភាពលើទិសដៅ នៃការបង្កើតយន្តការទ្វេភាគី ដើម្បីពិភាក្សា អំពីកិច្ចសហប្រតិបត្តិការ លើវិស័យសក្តានុពលមួយចំនួន ដូចជា វិស័យពាណិជ្ជកម្ម វិនិយោគ និងវិស័យផ្សេងៗទៀត ដែលជាផលប្រយោជន៍រួម ៕