ដោយ: គង់ លាងហួរ
ភ្នំពេញ: បុកល្ហុងកម្ពុជាទទួលបានចំណាត់ថ្នាក់ជាមុខម្ហូបបែបសាឡាដល្អបំផុតនៅលើពិភពលោក ពីសំណាក់វេបសាយ TasteAtlas ដែលជាមគ្គុទ្ទេសក៍ទេសចរណ៍តាមអុីនធឺណេត សម្រាប់អាហារបែបប្រពៃណី ដែលរួមបញ្ចូលនូវរូបមន្តពិតប្រាកដ ស្រាវជ្រាវអំពីគ្រឿងផ្សំ និងមុខម្ហូបដ៏ពេញនិយម។

បុកល្ហុងខ្មែរ ជាប់ចំណាត់ថ្នាក់ទី២៨ ជាមួយនឹងពិន្ទុ៤,២ ក្នុងចំណោមមុខម្ហូបសាឡាដចំនួន៥០មុខដ៏ល្អបំផុតនៅក្នុងពិភពលោក។

មគ្គុទ្ទេសក៍ TasteAtlas បានអះអាងទៀតថា បុកល្ហុង គឺជាមុខម្ហូបខ្មែរ ដែលគេយកផ្លែល្ហុងខ្ចីមកធ្វើជាសាឡាដយ៉ាងពេញនិយម នៅទូទាំងតំបន់អាស៊ីអាគ្នេយ៍។

យោងតាម TasteAtlas បានឱ្យដឹងថា មិនដូចបុកល្ហុងបែបថៃ ដែលប្រើសរសៃផ្លែល្ហុងស្តើងៗ ហើយជាធម្មតាតម្រូវឱ្យផ្លែល្ហុងបុកជាមួយគ្រឿងផ្សំផ្សេងទៀតនោះទេ តែបុកល្ហុងបែបខ្មែរ ស្រដៀងនឹងបែបឡាវ និងបែបវៀតណាម ដែលប្រើផ្លែល្ហុងសាប់ជំនួសវិញ ដោយមិនបុកនោះទេ។

សាឡាដបែបនេះ តែងតែមានដាក់អម្ពិល រំដែង និងប្រហុក ដែលជាប្រភេទត្រីផ្អាប់របស់ខ្មែរ។ បុកល្ហុងខ្មែរក៏ដាក់ត្រីឆ្អើរ ឬក្តាមប្រៃផងដែរ ហើយជាធម្មតា វាត្រូវបានបរិភោគជាមួយបាយចំហុយ និងសាច់អាំងដូចជាសាច់មាន់ជាដើម។

ភាពខុសប្លែកគ្នាដ៏សំខាន់មួយរវាងសាឡាដល្ហុងបៃតងបែបប្រពៃណីរបស់ឡាវ និងបុកល្ហុងបែបខ្មែរ គឺការប្រើប្រាស់ទឹកប្រហុកជំនួសឱ្យទឹកត្រី ដែលជាធម្មតាត្រូវបានគេប្រើកាលពីមុន៕

សុខុម

ប៉េកាំង: សមាគមអ្នកផលិតដែកចិន (CISA) ដែលគាំទ្រដោយរដ្ឋាភិបាលក្រុងប៉េកាំង បានជំរុញឱ្យបណ្ដាលក្រុមហ៊ុនផលិតដែកក្នុងស្រុកកាត់បន្ថយទិន្នផលផលិតកម្ម បន្ទាប់ពីតម្លៃដែកធ្លាក់ចុះយ៉ាងលឿន ដើម្បីជួយធានាស្ថិរភាពនៃរំហូរសាច់ប្រាក់។

ក្នុងកិច្ចប្រជុំជាមួយបណ្ដាក្រុមហ៊ុនផលិតដែកកាលពីថ្ងៃច័ន្ទ ទី២៤ ខែមេសា សមាគមនេះបានគូសបញ្ជាក់ថា តម្លៃដែកក្នុងស្រុកបានធ្លាក់ចុះយ៉ាងខ្លាំង ដោយបង្កបញ្ហាប្រឈមធ្ងន់ធ្ងរដល់រោងចក្រផលិតដែកធំៗ។

ដែកថ្នាំងអំពៅនៅក្នុងការជួញដូរលើផ្សារហ៊ុនក្រុងសៀងហៃ Shanghai Futures Exchange បានធ្លាក់ចុះជិត១១%ពីចុងខែមីនា មកនៅត្រឹម៥៣២,៣៣ដុល្លារ ក្នុងមួយតោនកាលពីថ្ងៃអង្គារ ទី២៥ ខែមេសា។

សមាគមបានចេញសេចក្ដីថ្លែងការណ៍នៅលើគណនី WeChat របស់ខ្លួនកាលពីថ្ងៃអង្គារ ទី២៥ ខែមេសា ថា អ្នកតំណាងមកពីក្រុមហ៊ុនផលិតដែកចំនួន១៦ និងសមាគមបានចូលរួមក្នុងកិច្ចប្រជុំខាងលើនេះ។

ក្រុមហ៊ុនសិក្សាស្រាវជ្រាវទីផ្សារលោហៈចិន Mysteel and Shanghai Metals Market (SMM) បានលើកឡើងតាមរយៈរបាយការណ៍មួយថា ក្នុងពេលជាមួយគ្នានេះ ក្រុមហ៊ុនផលិតដែកមួយចំនួននៅភាគពាយព្យ និងភាគខាងជើងនៃប្រទេសចិន បានចាប់ផ្ដើមធ្វើការជួសជុលឡរំលាយរ៉ែដែកដែលផ្ទុះខូច បន្ទាប់ពីទទួលរងការខាតបង់។

លោក Connie Zhang អ្នកវិភាគខាងដែកនៅក្រុមហ៊ុន SMM លើកឡើងថា “រោងចក្រផលិតដែកក្នុងតំបន់ទាំងនេះបានប្រឈមមុខនឹងសម្ពាធហិរញ្ញវត្ថុយ៉ាងខ្លាំងដោយសារតែស្តុកដែកច្រើនពេក”។

យោងតាមក្រុមហ៊ុន Mysteel ឱ្យដឹងថា គិតត្រឹមថ្ងៃអង្គារ ទី២៥ ខែមេសា មានរោងចក្រផលិតដែកជាង៣០បានដាក់ចេញផែនការជួសជុលថែទាំ៕ Reuters៕

        ដោយៈ វឌ្ឍនៈ

ព្រះសីហនុៈ អាងប្រព្រឹត្តិកម្មទឹកកខ្វក់ទី៣ តម្លៃជាង២០លានដុល្លារអាមេរិក គ្រោងនឹងដាក់ដំណើរការ នៅដំណាច់ឆមាសទី១ឆ្នាំ ២០២៣នេះ ស្របនឹងអាងប្រព្រឹត្តិកម្មទី១ និងទី ២ បានដាក់ដំណើរការរួចរាល់។

លោកលី រឹទ្ធ នាយកប្រតិបត្តិនៃក្រុមហ៊ុន X-Water Technology ដែលជាក្រុមហ៊ុនអភិវឌ្ឍន៍ លើអាងប្រព្រឹត្តិកម្មទឹកកខ្វក់នេះបានឱ្យដឹងនាព្រឹកថ្ងៃទី២៥ មេសាថា អាងប្រព្រឹត្តិកម្មទឹកកខ្វក់ ដែលរដ្ឋាភិបាលបានប្រគល់សិទ្ធិ ដល់ក្រុមហ៊ុនរបស់លោក ក្នុងការអភិវឌ្ឍន៍អាងប្រព្រឹតិ្តកម្ម ទឹកកខ្វក់នៅក្នុងខេត្តព្រះសីហនុ។ អាងប្រព្រឹត្តិកម្មទឹកកខ្វក់នេះ នឹងត្រូវយកទឹកកខ្វក់ ដែលប្រើប្រាស់រួចមកចម្រុះរួចទើបបង្ហូរទៅសមុទ្រ ដែលវានឹងជួយបរិស្ថានបានច្រើន ធ្វើឱ្យឆ្នេរសមុទ្រកម្ពុជារក្សាសម្រស់ស្អាត ។

លោកបន្តថា អាងព្រឹត្តិកម្មទឹកកខ្វក់ទី៣នេះ អាចមានសមត្ថភាព ក្នុងការចម្រុះទឹកកខ្វក់ បានប្រមាណ២ម៉ឺនម៉ែត្រគូប ក្នុងមួយថ្ងៃ ខណៈអាងប្រព្រឹត្តិកម្មទី២ មានសមត្ថភាពប្រមាណ៧២០០ម៉ែត្រគូបប៉ុណ្ណោះ ក្នុងមួយថ្ងៃ។ លោកបន្តថា អាងប្រព្រឹត្តិកម្មទឹកកខ្វក់ទី៣នេះ អាចចាត់ទុកជាគម្រោងធំៗ ជាងគេនៅលើពិភពលោក ដែលប្រើប្រាស់បច្ចេកវិទ្យាទំនើបចុងក្រោយគេ ដោយបច្ចេកវិទ្យានេះ មិនទាន់មានប្រទេសណាបានធ្វើនៅឡើយ។

លោកបន្ថែមថា តាមពិតទៅអាងប្រព្រឹត្តិកម្មទឹកកខ្វក់នេះ គឺមានសារសំខាន់ណាស់ ពីព្រោះថាទឹកដែលប្រើប្រាស់ហើយ មិនត្រូវបង្ហូរចូលទៅសមុទ្រភ្លាមៗទេ ពោលគឺត្រូវឆ្លងកាត់ការចម្រុះឱ្យស្អាតសិនទើបវាមិនប៉ះពាល់ដល់បរិស្ថាន ហើយតាមពិតទៅថ្លៃចំណាយលើការចម្រុះទឹកកខ្វក់នេះ គឺត្រូវការចំណាយគុណនឹង២ នៃថ្លៃផលិតទឹកស្អាតទៅទៀត ហើយនៅប្រទេសរីកចម្រើន ដែលពលរដ្ឋមានការយល់ដឹង ត្រូវចំណាយលើថ្លៃបង្ហូរទឹកកខ្វក់ ដូចនឹងថ្លៃប្រើប្រាស់ទឹកស្អាតដែរ។

លោកឡុង ឌីម៉ង់ អ្នកនាំពាក្យសាលាខេត្តព្រះសីហនុបានមានប្រសាសន៍ផងដែរថា នៅពេលអនាគត ពលរដ្ឋរស់នៅក្នុងខេត្តព្រះសីហនុ ត្រូវចំណាយថ្លៃលើការបង្ហូរ ទឹកកខ្វក់ចេញពីផ្ទះផងដែរ ។ ការគណនាថ្លៃចំណាយ លើការបង្ហូរទឹកកខ្វក់នោះ គឺមានន័យថាគាត់ប្រើប្រាស់ទឹកស្អាតកាន់តែច្រើន គាត់ក៏ត្រូវចំណាយលើការបង្ហូរទឹកកខ្វក់ក៏ច្រើន ហើយអាជ្ញាធរនឹងចុះពន្យល់ពលរដ្ឋ ឱ្យយល់ដឹងពីបរិស្ថាន និងចូលរួមក្នុងការក្នុងការថែរក្សាបរិស្ថាន ៕

ដោយ: គង់ លាងហួរ
ភ្នំពេញ: ចំនួនអ្នកវិនិយោគចិននៅកម្ពុជា ឬបង្ហាញចំណាប់អារម្មណ៍នៅកម្ពុជាបានកើនឡើងជាលំដាប់ ខណៈកម្ពុជាមានកិច្ចព្រមព្រៀងពាណិជ្ជកម្មសេរីទ្វេរភាគី (FTA) ជាមួយប្រទេសចិន និងជាមួយប្រទេសដទៃទៀត។

ក្នុងបទសម្ភាសន៍មួយកាលពីថ្ងៃទី២៤ ខែមេសា លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា (CCC) មានមតិថា ការពង្រឹងទំនាក់ទំនងរវាងរដ្ឋាភិបាលកម្ពុជា និងចិនបានទាក់ទាញចំណាប់អារម្មណ៍អ្នកវិនិយោគ និងភ្ញៀវទេសចរចិនមកកម្ពុជា ហើយបានជំរុញឱ្យមានការធ្វើដំណើរកម្សាន្តជាច្រើនមកកាន់កម្ពុជាផងដែរ។

លោកបានចាត់ទុកការកើនឡើងនៃអ្នកវិនិយោគចិននៅក្នុងប្រទេសកម្ពុជាថា ជំរុញមកពី FTAs ពោលគឺសន្ធិសញ្ញាទ្វេរភាគីជាមួយចិន និងកូរ៉េខាងត្បូង ក៏ដូចជាRCEP រួមជាមួយនឹងការលើកទឹកចិត្ត ដែលផ្តល់ដោយច្បាប់ថ្មីស្តីពីការវិនិយោគ និងពន្ធអនុគ្រោះសម្រាប់ការនាំចេញទៅកាន់សហរដ្ឋអាមេរិកសហភាពអឺរ៉ុប និងចក្រភពអង់គ្លេស។

លោកឧកញ៉ា លឹម ហេង បានមានប្រសាសន៍ទៀតថា “ចំនួនក្រុមហ៊ុន និងសហគ្រាសចិន ដែលចូលមកធ្វើអាជីវកម្មនៅក្នុងប្រទេសកម្ពុជាបានកើនឡើងជាលំដាប់ ហើយស្ទើរតែគ្រប់វិស័យ” ដោយកត់សម្គាល់ថា ប្រទេសទាំងពីរបានព្រមព្រៀងគ្នាបង្កើតក្របខណ្ឌកិច្ចសហប្រតិបត្តិការត្បូងពេជ្រ ដើម្បីបំពេញបន្ថែមនូវមិត្តភាពដែកថែបរបស់ពួកគេ។

លោកបានចែករំលែកថា “ក្រុមហ៊ុនចិនជាច្រើនកំពុងចាប់ផ្តើមស្វែងរកឱកាសវិនិយោគក្រោយវិបត្តិកូវីដ នៅក្នុងឧស្សាហកម្មកែច្នៃកសិផលកម្ពុជា” ដោយសម្តែងនូវសុទិដ្ឋិនិយមថា ដំណើរទស្សនកិច្ចរបស់គណៈប្រតិភូថ្នាក់ដឹកនាំមកពីតំបន់ Guangxi ភាគនិរតីរបស់ប្រទេសចិនកាលពីសប្តាហ៍មុននឹងនាំឱ្យមានការយល់ដឹងកាន់តែច្រើនពីសក្តានុពលវិនិយោគរបស់កម្ពុជាក្នុងចំណោមបណ្តាពាណិជ្ជករចិន។

លោក ហុង វណ្ណៈ នាយកផ្នែកសេដ្ឋកិច្ចអន្តរជាតិនៃរាជបណ្ឌិត្យសភាកម្ពុជា អះអាងថា “កិច្ចសហប្រតិបត្តិការល្អរវាងរដ្ឋាភិបាលទាំងពីរបានចាក់បញ្ចូលនូវភាពភ្លឺស្វាងជាច្រើនដល់សេដ្ឋកិច្ចកម្ពុជា ដែលគាំទ្រដោយការផ្គត់ផ្គង់វត្ថុធាតុដើមដ៏សំខាន់របស់ប្រទេសចិនសម្រាប់ផលិតកម្មកម្ពុជា”។

លោក បាន បន្ត ថា “លក្ខខណ្ឌ នយោបាយ ច្បាប់ វិនិយោគ និង ទីតាំង ភូមិសាស្ត្រ ដ៏ អំណោយផល របស់ កម្ពុជា បាន ទាក់ទាញ ចំណាប់អារម្មណ៍ អ្នក វិនិយោគ ចិន យ៉ាងច្រើន សន្ធឹកសន្ធាប់”។

លោក ហុង វណ្ណៈ បានបន្ថែមថា វិនិយោគិនចិនគឺជាអ្នករួមចំណែកដ៏សំខាន់ក្នុងការអភិវឌ្ឍន៍សេដ្ឋកិច្ចរបស់កម្ពុជា ដោយព្យាករណ៍ថា ចំនួនវិនិយោគិនចិននឹងកើនឡើងសម្រាប់អនាគតដ៏ខ្លីខាងមុខ។

លំហូរវិនិយោគផ្ទាល់ពីបរទេស (FDI) ចូលកម្ពុជា ក្នុងរយៈពេល១០.០១១ថ្ងៃ ចាប់ពីថ្ងៃទី ៥ ខែសីហា ឆ្នាំ ១៩៩៤ នៃច្បាប់ចាស់ស្តីពីការវិនិយោគ និងថ្ងៃទី ៣១ ខែធ្នូ ឆ្នាំ ២០២១ មានចំនួន១៦៨,៨ពាន់ពាន់លានរៀល (៤១ពាន់លានដុល្លារ) កើនឡើង១១,២ភាគរយ ពីជិត១៥២ពាន់ពាន់លានរៀលដែលបានកត់ត្រានៅចុងឆ្នាំ២០២០។

យោងតាមស្ថិតិគយ (GDCE) បង្ហាញថា ចិនដីគោកបានក្លាយជាដៃគូពាណិជ្ជកម្មទំនិញធំជាងគេរបស់កម្ពុជាម្តងទៀតក្នុងឆ្នាំ២០២២ ជាមួយនឹងទំហំទឹកប្រាក់សរុបពេញមួយឆ្នាំចំនួន១១,៦៨៦ពាន់លានដុល្លារ កើនឡើង៤,៣៩ភាគរយធៀបនឹងឆ្នាំ២០២១ និងតំណាងឱ្យ២២,២៩១ភាគរយនៃតម្លៃទំនិញអន្តរជាតិសរុបចំនួន៥២,៤២៥ពាន់លានដុល្លាររបស់កម្ពុជា។

ប្រទេសចិនដីគោកគឺជាអ្នកនាំចេញដ៏ធំបំផុតទៅកាន់ប្រទេសកម្ពុជាកាលពីឆ្នាំមុនជាមួយនឹងចំណែក៣៤,៨៩ភាគរយក្នុងតម្លៃទឹកប្រាក់១០,៤៤៦ពាន់លានដុល្លារ កើនឡើង៧,៨៦ភាគរយធៀបនឹងឆ្នាំ២០២១។

យោងតាមតួលេខរបស់គយ GDCE បង្ហាញថា ឱនភាពពាណិជ្ជកម្មរបស់កម្ពុជាជាមួយចិនដីគោកបានកើនឡើង១២,៦១ភាគរយ ពី៨,១៧៤ពាន់លានដុល្លារក្នុងឆ្នាំ២០២១រហូតដល់៩,២០៥ពាន់លានដុល្លារក្នុងឆ្នាំ២០២២។

នៅក្នុងត្រីមាសទីមួយនៃឆ្នាំនេះ ទំហំពាណិជ្ជកម្មទំនិញទ្វេរភាគីបានឈានដល់២,៨៦២ពាន់លានដុល្លារ ធ្លាក់ចុះ០,៣៨ភាគរយលើមូលដ្ឋានប្រចាំឆ្នាំ។

ការនាំចេញរបស់កម្ពុជាទៅកាន់ប្រទេសចិន និងនាំចូលពីប្រទេសចិនមកវិញមានចំនួន៣២៨,៦៤លានដុល្លារ និង២,៥៣ពាន់លានដុល្លារ ពោលគឺកើនឡើង២,១៣ភាគរយ ប៉ុន្តែធ្លាក់ចុះ០,៧ភាគរយរៀងៗគ្នា៕