ដោយៈ ជេស៊ីកា
 ភ្នំពេញៈ ក្រុមហ៊ុន Toyota Tsusho Corporationបាននិងកំពុងត្រៀមពង្រីកការបោះទុនវិនិយោគ ទៅកាន់ក្រុងប៉ោយប៉ែតនៅចុងឆ្នាំនេះ។

ព៌តមានដ៏ល្អនេះ ត្រូវបានលើកឡើង ក្នុងជំនួបរវាងលោកជា វុទ្ធី អគ្គលេខាធិការរង គណៈកម្មាធិការវិនិយោគកម្ពុជា/គណៈកម្មាធិការតំបន់សេដ្ឋកិច្ចពិសេសកម្ពុជា ជាមួយតំណាងក្រុមហ៊ុន Toyota Tsusho Corporation ដែលកំពុងមានប្រតិបត្តិការវិនិយោគ នៅក្នុងតំបន់សេដ្ឋកិច្ចពិសេស សានកូ ប៉ោយប៉ែត ចាប់តាំងពីឆ្នាំ ២០១៦ រហូតមកដល់បច្ចុប្បន្នកាលពីថ្ងៃទី៤ សីហាកន្លង​មកនេះ។ថ្មីៗនេះ ក្រុមហ៊ុន Toyota Tsusho Corporation បាននិងកំពុងពង្រីកសកម្មភាព វិនិយោគរបស់ខ្លួនជាបន្តបន្ទាប់ ដែលក្នុងនោះ នឹងបង្កើតគម្រោងវិនិយោគថ្មីមួយទៀត ក្នុងតំបន់សេដ្ឋកិច្ចពិសេស សានកូ ប៉ោយប៉ែត លើមុខសញ្ញាវិនិយោគ ផលិតប្រព័ន្ធខ្សែភ្លើងសម្រាប់រថយន្ត (Automotive Wire Harness) ដែលគ្រោងចាប់ផ្តើមដំណើរការនៅខែឆ្នូ ឆ្នាំ២០២៣ ខាងមុខ និងអាចស្រូបយកកម្លាំងពលកម្មប្រមាណ៨០០កន្លែងបន្ថែមទៀត។បច្ចុប្បន្ន កម្មករនិយោជិតកម្ពុជាមួយចំនួន កំពុងទទួលការបណ្តុះបណ្តាលនៅប្រទេសថៃ៕

ដោយៈ គង់ សូរិយា

        ភ្នំពេញៈ លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានបញ្ជាក់ឲ្យដឹងថា ក្រសួងគ្រោងសាងសង់មជ្ឈម​ណ្ឌលបច្ចេកវិទ្យាសហគមន៍ នៅតាមវិទ្យាល័យចំនួន៥៥៨ ទូទាំងប្រទេស ដើម្បីជំរុញការអភិវឌ្ឍជំនាញ និងការបង្កើនសមត្ថភាពផ្នែកឌីជីថល។

ការបញ្ជាក់ឲ្យដឹងបែបនេះ ធ្វើឡើងក្នុងឱកាសដែល លោក ជា វ៉ាន់ដេត និងលោកPARK Jung-Wook ឯកអគ្គរដ្ឋទូតនៃសាធារណរដ្ឋកូរ៉េ អញ្ជើញជាអធិបតី ក្នុងពិធីសម្ពោធកម្មវិធីវិញ្ញាបនបត្រ វិទ្យាសាស្ត្រទិន្នន័យ (Data Science) របស់អង្គការយូណេស្កូ (University Twinning and Networking-UNITWIN) កាលពីរសៀលថ្ងៃទី៤ ខែសីហា ឆ្នាំ២០២៣។

ទន្ទឹមគ្នានេះ ក៏មានពិធីចុះអនុស្សរណៈយោគយល់ រវាងសាក​លវិទ្យាល័យ Handong Global សាធារណរដ្ឋកូរ៉េ និងគ្រឹះស្ថានឧត្ដមសិក្សាកម្ពុជាចំនួន៦ រួមមាន សាកលវិទ្យាល័យអាមេរិកាំងភ្នំពេញ សាកលវិទ្យាល័យភូមិន្ទភ្នំពេញ សាកលវិទ្យាជាតិគ្រប់គ្រង សាកលវិទ្យាបញ្ញាសាស្ត្រ សាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច និងវិទ្យាស្ថានបច្ចេកវិទ្យាកម្ពុជា។

ពិធីនេះ ក៏មានការអញ្ជើញចូលរួមពីលោកស្រី អគ្គលេខាធិការក្រុមប្រឹក្សាជាតិកម្ពុជាដើម្បីស្ត្រីផងដែរ។លោករដ្ឋមន្ត្រី ជា វ៉ាន់ដេត បានថ្លែងថា កម្មវិធីវិញ្ញាបនបត្រវិទ្យាសាស្ត្រទិន្នន័យ គឺជាសមិទ្ធផលថ្មីមួយទៀត នៅក្នុងភាពជាដៃគូដ៏ល្អរវាងកម្ពុជា កូរ៉េ និងអង្គការយូណេស្កូ ជាពិសេសទៅលើការអភិវឌ្ឍវិស័យបច្ចេកវិទ្យាគមនាគមន៍និងព័ត៌មាន។

លោកបន្ថែមទៀតថា ថ្មីៗនេះ ក្រសួងបានចាប់ផ្តើមការប្រកួតថ្នាក់ជាតិមួយ ដែលមានឈ្មោះថា “កម្មវិធីបញ្ញវន្តឌីជីថល Digital Talents» ដើម្បីលើកកម្ពស់ចំណាប់អារម្មណ៍ លើជំនាញឌីជីថល ជាពិសេសក្នុងចំណោមសិស្សវិទ្យាល័យនៅទូទាំងប្រទេស។

លោករដ្ឋមន្ត្រី ជា វ៉ាន់ដេត បានបន្ថែមថា ដើម្បីរួមចំណែកបន្ថែមទៀត ដល់ការកសាងធនធានមនុស្ស ឌីជីថលរបស់ប្រទេស ក្រសួងគ្រោងសាងសង់ មជ្ឈមណ្ឌលបច្ចេកវិទ្យាសហគមន៍ នៅវិទ្យាល័យចំនួន៥៥៨ ទូទាំងប្រទេស ដើម្បីជំរុញការអភិវឌ្ឍជំនាញ និងការបង្កើនសមត្ថភាព ផ្នែកឌីជីថលដល់អ្នកពាក់ព័ន្ធ ជាអាទិ៍ សិស្សា​នុសិស្ស មន្ត្រីមូលដ្ឋាន ពលករជំនាញ និងការប្រើប្រាស់ប្រព័ន្ធឌីជីថល ដល់ប្រជាជនតាមសហគមន៍មូលដ្ឋាន។

លោករដ្ឋមន្ត្រី ជា វ៉ាន់ដេត ជឿជាក់ថា កម្មវិធីវិញ្ញាបនបត្រនឹងផ្តល់ឲ្យយុវជនកម្ពុជា កាន់តែច្រើនឡើងទទួលនូវចំណេះដឹង ដ៏ទំនើបនេះ។លោករដ្ឋមន្ត្រីសង្ឃឹមថា កម្មវិធីនេះ នឹងជំរុញកិច្ចសហប្រតិបត្តិការ ការផ្សារភ្ជាប់វប្បធម៌បន្តរវាងនិស្សិត សាស្ត្រាចារ្យ និងអ្នកស្រាវ​ជ្រាវរបស់គ្រឹះស្ថានសិក្សាដៃគូទាំងអស់ ដើម្បីអាចទាញយកអត្ថប្រយោជន៍ ជាអតិបរមានៃវិទ្យាសាស្ត្រទិន្នន័យ សម្រាប់ការអភិវឌ្ឍប្រទេសកម្ពុជា៕

តែម សុខុម

វៀងចន្ទន៍: គ្រួសារពលរដ្ឋឡាវ ពេលនេះកំពុងរស់ទាំងត្រដាបត្រដួសដោយសារជួបវិបត្តិហិរញ្ញវត្ថុកាន់តែធ្ងន់ធ្ងរទៅៗ ខណៈថ្លៃចំណាយជីវភាពបន្តកើនឡើង រូបិយប័ណ្ណក្នុងស្រុកធ្លាក់ថ្លៃ រួមជាមួយអតិផរណាហក់ឡើងខ្ពស់។

ការធ្លាក់ថ្លៃនៃប្រាក់គីប (Kip) របស់ឡាវ នៅតែជាកត្តាចម្បងដែលធ្វើឱ្យអត្រាអតិផរណាហក់ឡើងខ្ពស់ ធ្វើឱ្យទំនិញ និងសេវាកម្មឡើងថ្លៃ។ នេះបើយោងតាមសារព័ត៌មាន Laotian Times ចុះផ្សាយកាលពីថ្ងៃសុក្រ ទី៤ សីហា។

ការស្ទង់មតិដែលធ្វើឡើងដោយធនាគារពិភពលោក (World Bank) បង្ហាញថា ជាង៣ភាគ៤នៃគ្រួសារពលរដ្ឋឡាវ ដែលរងផលប៉ះពាល់នៅក្នុងប្រទេសនេះបានបង្ខំចិត្តកាត់បន្ថយការហូបចុក ឬ ងាកទៅទិញអាហារណាដែលមានតម្លៃថោកៗដើម្បីជាការសន្សំសំចៃ ខណៈជាងពាក់កណ្តាលនៃពលរដ្ឋទាំងនោះបានកាត់បន្ថយការចំណាយរបស់ពួកគេលើផ្នែកសុខភាព និងការអប់រំ។យោងតាមរបាយការណ៍ស្ទង់មតិខាងលើបង្ហាញថា ផលទុនជាតិសរុប (GDP) របស់ប្រទេសឡាវ សម្រេចបានកំណើន២,៧%ក្នុងឆ្នាំ២០២២ ដោយសារកំណើនក្នុងវិស័យទេសចរណ៍ និងសេវាកម្មផ្សេងៗទៀត។ ទោះជាយ៉ាងណា ថ្លៃទំនិញសំខាន់ៗដូចជាអាហារ និងភេសជ្ជៈគ្មានជាតិអាល់កុលជាដើមក៏បានហក់ឡើង៣៧,៨%ផងដែរក្នុងមួយឆ្នាំៗ។

មួយចំនួនធំនៃពលរដ្ឋដែលរងផលប៉ះពាល់ពីការធ្លាក់ចុះសេដ្ឋកិច្ចនេះ រួមមានគ្រួសារពលរដ្ឋដែលមានប្រាក់ចំណូលទាបដល់មធ្យម រួមទាំងអ្នកលក់លក់រាយដែលពិបាកនឹងទប់ទល់ការឡើងថ្លៃផលិតផលផងដែរ។

អ្នកកស្រី សូណេ (Sone) ម្ចាស់ហាងលក់ទំនិញមួយនៅក្នុងរដ្ឋធានីវៀងចន្ទន៍ បានត្អួញត្អែរថា “ការចំណាយលើជីវភាពរបស់ខ្ញុំគឺខ្ពស់កប់ពពក។ សូម្បីទំនិញសំខាន់ៗដូចជាប្រេងឆាក៏បានឡើងថ្លៃទ្វេដងដែរ”។

អ្នកស្រីបានបន្ថែមទៀតថា អាជីវករនៅផ្សារលក់បន្លែស្រស់ៗក៏ប្រឈមនឹងបញ្ហាដូចគ្នាដែរ ប៉ុន្តែពួកគេមានសម្ពាធខ្លាំងជាងដោយសារពួលគេមានបំណុលដែលត្រូវទូទាត់សងភ្លាមៗ៕ Laotian Times៕

  ដោយៈ គង់ សូរិយា

       ភ្នំពេញៈ ជាមួយនឹងផែនការពង្រីកការដាំដុះ និងផលិតទឹកពិសារ “ឋានសួគ៌បូកគោ” ដែលបានចែកចាយតាមMart ធំៗ និងMini Martលើផ្លូវក្រមួន “ស” ក្រុមហ៊ុនបូកគោ ហ្វាមបាននិងកំពុងត្រៀមពង្រីកទុន ដើម្បីវិនិយោគលើផលិតផលទាំងនេះបន្ថែមទៀត។

ក្រុមហ៊ុនបូកគោហ្វាម បាននិងកំពុងវិនិយោគទឹកប្រាក់ប្រមាណ៤លានដុល្លារ ដាំបន្លែសរីរាង្គ លើភ្នំបូកគោ និងកំពុងផលិតទឹកពិសារឋានសួគ៌បូកគោ មានផ្ទុកសារធាតុPH8 ដែលជួយលើកកំពស់សុខភាពអ្នកបរិភោគ និងជំនួយដល់ថ្លើមផងដែរ។

បន្លែដែលបាន និងកំពុងដាំលើភ្នំកំពស់១០៧៥ម៉ែត្រ បាននិងកំពុងទទួលបានការគាំទ្រពីអតិថិជន ដោយសារបន្លែត្រូវបានថែរទាំតាមធម្មជាតិ ដែលធ្វើឲ្យមានរសជាតិឆ្ងាញ់។

បន្លែទាំងនេះ បាននិងកំពុងចែកចាយនៅតាមសណ្ឋាគារទាំង៧របស់ក្រុមហ៊ុនសុខា និងតាមម៉ាតនានា។ ចំណែកទឹកពិសារឋានសួគ៌​បូកគោ ដែលចម្រាញ់ចេញពីទឹកភ្លៀង គ្មានសារធាតុគីមី ត្រូវបានផលិតដោយបច្ចេកវិទ្យាតទំនើបបំផុត ដើម្បីធ្វើឲ្យប្រាកដថា​ទឹកពិសារនេះ មានគុណភាព អនាម័យខ្ពស់ និងជួយលើកសុខភាពអ្នកទទួលទាន។

កញ្ញា ណោត លីដាអ្នកជំនាញផ្នែកបន្លែសរីរាង្គ ដែលបាននិងកំពុងធ្វើការនៅក្នុងកសិដ្ឋាន បានមានប្រសាសន៍ឲ្យដឹងកាលពីពេលថ្មីៗនេះថា ការដាំបន្លែនៅទីនេះ ក្រុមហ៊ុនបានផ្តោតលើបន្លែអឺរ៉ុបច្រើន ដោយក្នុងនោះ ប្រភេទសាឡាត់អឺរ៉ុប មាន៨មុខ មានដូចជា សាឡាត់ផ្កាថ្មក្រហម សាឡាត់រ៉ូមែន សាឡាត់អាយបឺក(សាឡាត់ក្តោប) សាឡាត់ប៉ាតតូវែ ជាដើម។ដោយឡែក បន្លែផ្លែមានដូចជា ស៊ូគីនី(ននោងបារាំង) ននោងបារាំងលឿង និងននោងបារាំងខៀវ ជាដើម។

នៅប្រទេសកម្ពុជា មិនសូវមានកសិករដាំបន្លែទាំងនេះនោះទេ ដោយសារប្រភេទបន្លែទាំងនេះ ត្រូវការអាកាសធាតុត្រជាក់ និងពិបាកក្នុងការដាំដុះ ប៉ុន្តែនៅលើភ្នំបូកគោ អំណោយផលក្នុងការដាំប្រភេទបន្លែទាំងនេះ និងទទួលបានទិន្នផលខ្ពស់។ នេះជាការបន្ថែមរបស់កញ្ញា ណោត លីដា។

កញ្ញាបានឱ្យដឹងថា “បន្លែងបួកគោ អាចផ្គត់ផ្គង់អតិថិជនគ្រប់ប្រាំងគ្រប់វស្សា មានន័យថា បើបន្លែនៅខាងក្រៅ រងការខូចខាត ដោយសារជំនន់ទឹកភ្លៀងនៅរដូវវស្សា តែនៅបូកគោនៅតែអាចផ្គត់ផ្គង់បានធម្មតា”។

អ្នកជំនាញបច្ចេកទេស ដែលបានបញ្ចប់ការសិក្សាផ្នែកកសិកម្មជាន់ខ្ពស់ពីបរទេសរូបនេះ បានលើកឡើងថា ចំពោះការដាំដុះ ដែលអំណោយផលល្អសម្រាប់បន្លែ គឺចាប់ពីខែ វិច្ឆិកា រហូតដល់ខែ មីនា ដែលចន្លោះពេលនេះ ការដាំដុះគឺទទួលបានទិន្នផលខ្ពស់។

កញ្ញាបានបន្តថា អ្វីដែលពិសេសសម្រាប់បន្លែសុវត្ថិភាព និងសរីរាង្គ នៅកសិដ្ឋានបូកគោហ្វាម គឺការដាំដុះមិនប្រើជាតិ​គីមី១០០ភាគរយ គឺប្រើតែជីលាមកប្រជៀវ ជីលាមកគោ ជីត្រីធ្វើជាកំប៉ុសទឹក ដែលជីទាំងនេះ បានជួយឱ្យបន្លែផ្លែមាន​ទំហំធំ ជាងដំណាំនៅតាមតំបន់ផ្សេងៗ។ជាមួយគ្នានេះ អ្នកស្រី សៀ ចាន់រ៉ា នាយកផ្នែកលក់ និងទីផ្សារនៃក្រុមហ៊ុនបូកគោហ្វាម ដែលជាបុត្រសម្ព័ន្ធក្រុមហ៊ុន សូគម៉ិច អ៊ិនវេសមេនគ្រុប បានឱ្យដឹងថា ក្រៅពីបន្លែបែបអឺរ៉ុប នៅក្នុងកសិដ្ឋាន មានដាំដុះ ដូចជា បន្លែស្ពៃក្តោប ស្ពៃបូកគោ ខាត់ណា ប៉េងប៉ោះខៀវ ប៉េងប៉ោះក្រហម និងប្រភេទសាឡាត់ជាច្រើនមុខទៀត៕

តែម សុខុម

ស៊ីដនី: ប្រទេសចិន នៅទីបំផុតប្រកាសថា ខ្លួននឹងបញ្ចុះពន្ធលើការនាំចូលស្រូវបាលី (Barley) របស់អូស្ត្រាលី ដែលត្រូវបានដំឡើងកប់ពពករយៈពេល៣ឆ្នាំមកហើយ និងដែលបានប៉ះពាល់ដល់ទំហំពាណិជ្ជកម្មរាប់ពាន់លានដុល្លារ។

នាយករដ្ឋមន្ត្រីអូស្ត្រាលី លោក អែនថូនី អាល់បានីស (Anthony Albanese) បានបង្ហាញជំហរស្វាគមន៍ចំណាត់ការនេះដោយក្ដីរីករាយ។ នេះបើយោងតាមសារព័ត៌មាន BBC ចុះផ្សាយកាលពីថ្ងៃសុក្រ ទី៤ សីហា។

រដ្ឋាភិបាលក្រុងកង់បេរ៉ា ក៏បានបញ្ជាក់ជំហរផងដែរថា ខ្លួននឹងព្យួរសំណុំរឿងរបស់ខ្លួននៅអង្គការពាណិជ្ជកម្មពិភពលោក (WTO) ជុំវិញពន្ធដែលរដ្ឋាភិបាលភិបាលក្រុងប៉េកាំង បានដំឡើងកប់ពពកលើស្រូវ Barley របស់ខ្លួន។នៅក្នុងសញ្ញាវិជ្ជមានមួយទៀតនៃទំនាក់ទំនងប្រេះឆារវាងប្រទេសទាំងពីរ អូស្ត្រាលី ក្នុងសប្តាហ៍នេះបានអញ្ជើញរដ្ឋមន្ត្រីការបរទេសថ្មីរបស់ប្រទេសចិន មកធ្វើទស្សនកិច្ចនៅក្នុងប្រទេសនេះ។ក្រសួងពាណិជ្ជកម្មចិន និយាយថា ពន្ធគយលើស្រូវ Barley របស់អូស្ត្រាលី នឹងត្រូវបញ្ចុះចាប់ពីថ្ងៃសៅរ៍ សប្ដាហ៍នេះតទៅ។ក្រសួងពាណិជ្ជកម្មចិន និយាយថា “ដោយមើលឃើញពីការប្រែប្រួលក្នុងទីផ្សារស្រូវ Barley របស់ប្រទេសចិន វាលែងចាំបាច់ទៀតហើយក្នុងការបន្តការដំឡើងពន្ធកប់ពពកលើស្រូវ Barley ដែលនាំចូលពីប្រទេសអូស្ត្រាលី”។មុនពេលពន្ធនេះត្រូវបានដំឡើង រដ្ឋាភិបាលអូស្ត្រាលី បានប៉ាន់ប្រមាណថា ការនាំចេញស្រូវ Barley ទៅកាន់ប្រទេសចិន មានទំហំជាមធ្យមប្រហែល១,២ពាន់លានដុល្លារអូស្ត្រាលី ឬ ៧៩០លានដុល្លារអាមេរិក ក្នុងមួយឆ្នាំ។

ក្នុងឆ្នាំ២០២០ រដ្ឋាភិបាលក្រុងប៉េកាំង បានដំឡើងពន្ធកប់ពពកលើទំនិញនាំចេញសំខាន់ៗរបស់អូស្ត្រាលី ដូចជាស្រូវ Barley សាច់គោ និងស្រា ក៏ដូចជាការរឹតបន្តឹងក្រៅផ្លូវការលើការនាំចេញបង្កង និងសាច់ពីកន្លែងសម្ងួតមួយចំនួនផងដែរ។

ពេលនេះរដ្ឋាភិបាលក្រុងកង់បេរ៉ា កំពុងជំរុញឱ្យរដ្ឋាភិបាលក្រុងប៉េកាំង បញ្ចុះពន្ធលើស្រារបស់អូស្ត្រាលី ដែលជាកម្មវត្ថុនៃបណ្តឹងដាច់ដោយឡែកមួយដាក់នៅអង្គការពាណិជ្ជកម្មពិភពលោក WTO៕ BBC៕

តែម សុខុម

យោងតាមអាជ្ញាធរទេសចរណ៍ថៃ (TAT) ឱ្យដឹងថា ឧស្សាហកម្ម “គ្មានផ្សែង” របស់ប្រទេសថៃ ត្រូវបានរំពឹងថានឹងរកប្រាក់ចំណូលបានរហូតដល់ទៅ៨៦,៣ពាន់លានដុល្លារអាមេរិក ក្នុងឆ្នាំ២០២៤ ដែលស្មើនឹងកម្រិតមុនពេលផ្ទុះវិបត្តិកូវីដ-១៩។

ចំនួនភ្ញៀវបរទេសដែលមកលេងប្រទេសថៃ បានកើនឡើងយ៉ាងខ្លាំងក្នុងឆ្នាំ២០២២ ឈានដល់១១,៥លាននាក់ ដោយលើសគោលដៅដែលបានកំណត់ចំនួន១០លាននាក់។ នេះបើយោងតាមកាសែត The Nation ចុះផ្សាយកាលពីថ្ងៃសុក្រ ទី៤ សីហា។ទោះជាយ៉ាងណា ការចាយវាយទាបជាងមុន ខណៈជើងហោះហើរអន្តរជាតិនៅមានកម្រិត ភ្ញៀវទេសចរបរទេសភាគច្រើនមកពីបណ្ដាប្រទេសជិតខាងរួមមានកម្ពុជា ឡាវ និងវៀតណាម ជាដើម។

នៅឆ្នាំ២០២៣ អាជ្ញាធរទេសចរណ៍ថៃ (TAT) បានកំណត់គោលដៅសម្រេចឱ្យបាន៨០%នៃប្រាក់ចំណូល៦៨,៥ពាន់លានដុល្លារដែលសម្រេចបានក្នុងឆ្នាំ២០១៩ ប៉ុន្តែរំពឹងថានឹងសម្រេចបានត្រឹមតែប្រមាណ៦២ពាន់លានដុល្លារអាមេរិក ប៉ុណ្ណោះ។ សម្រាប់ឆ្នាំ២០២៤ គោលដៅកំណត់គឺធ្វើយ៉ាងណាឱ្យឈានដល់១០០%នៃប្រាក់ចំណូលសម្រេចបានក្នុងឆ្នាំ២០១៩។លោក យុតថាសាក់ ស៊ូផាសន (Yuthasak Supasorn) ប្រធានអាជ្ញាធរទេសចរណ៍ថៃ (TAT) បានថ្លែងថា ដើម្បីសម្រេចបានគោលដៅនេះ អាជ្ញាធរទេសចរណ៍ថៃ (TAT) ចាំបាច់ត្រូវអនុវត្តកិច្ចខិតខំប្រឹងប្រែងធ្វើទីផ្សារឱ្យបានពេញលេញ និងគ្រប់គ្រងប្រកបដោយប្រសិទ្ធភាពនូវហានិភ័យខាងក្រៅដែលអាចប៉ះពាល់ដល់ប្រាក់ចំណូលរំពឹងទុក និងចំនួនភ្ញៀវទេសចរដែលចូលមកប្រទេសក្នុងពេលប៉ុន្មានឆ្នាំខាងមុខនេះ។

អាជ្ញាធរទេសចរណ៍ថៃ (TAT) បានប៉ាន់ប្រមាណថា ចំនួនភ្ញៀវទេសចរចិន ដែលមកលេងប្រទេសថៃ នឹងកើនឡើងក្នុងឆមាសទី២ ចុងឆ្នាំនេះដោយសារការងើបឡើងវិញនៃផ្លូវអាកាសថៃ-ចិន ដែលបច្ចុប្បន្នកំពុងដំណើរការប្រមាណ៤០០ជើងហោះហើរក្នុងមួយសប្តាហ៍ ដោយកើនឡើងពី១៥០ជើងហោះហើរក្នុងមួយសប្តាហ៍ក្នុងខែឧសភា។

នេះធ្វើឱ្យអាជ្ញាធរទេសចរណ៍ថៃ (TAT) មានក្តីសង្ឃឹមថានឹងអាចសម្រេចបាននូវគោលដៅរបស់ខ្លួនក្នុងការទាក់ទាញភ្ញៀវទេសចរចិន ឱ្យបានចំនួន៥លាននាក់ពេញមួយឆ្នាំ បន្ទាប់ពីបានស្វាគមន៍ភ្ញៀវទេសចរចិន ប្រមាណ១,៥លាននាក់ក្នុងពេល៦ខែដើមឆ្នាំនេះ៕ The Nation៕