តែម សុខុម

តៃប៉ិ: អ្នកវិនិយោគបរទេសពេលនេះកំពុងទុកបញ្ហាភាពតានតឹងផ្នែកភូមិសាស្ត្រនយោបាយមួយឡែកសិន ហើយសម្រុកទៅវិនិយោគលើភាគហ៊ុននៅតៃវ៉ាន់ ដោយទទួលបានរំហូរវិនិយោគបរទេសដ៏ធំបំផុតមិនធ្លាប់មានក្នុងរយៈពេលប៉ុន្មានឆ្នាំមកនេះដោយសារភាគហ៊ុនបញ្ញាសិប្បនិម្មិត (AI) និងភាគហ៊ុនបន្ទះឈីបហក់ឡើងស្រឺតៗ។

ការទិញដុលពីអ្នកវិនិយោគបរទេសក្នុងទំហំ១២ពាន់លានដុល្លារអាមេរិក សម្រាប់រយៈពេល៦ខែគិតមកទល់នឹងខែមិថុនា នេះគឺជាចំនួនដ៏ធំបំផុតមិនធ្លាប់មានចាប់តាំងពីឆមាសទី១ ដើមឆ្នាំ២០០៨ ហើយលទ្ធផលសន្ទស្សន៍គោលរបស់តៃវ៉ាន់ ដែលបានកើនឡើងរហូតដល់២០%ក្នុងឆ្នាំនេះគឺល្អបំផុតនៅអាស៊ី។

ហើយក្រុមអ្នកឃ្លាំមើលទីផ្សារបានព្យាករថា ភាគហ៊ុនបច្ចេកវិទ្យា AI នឹងហក់ឡើងបន្ថែមទៀត។ នេះបើយោងតាមសារព័ត៌មាន CNA ចុះផ្សាយកាលពីថ្ងៃសុក្រ ទី២១ ខែកក្កដា។

លោក Carlos Casanova អ្នកជំនាញសេដ្ឋកិច្ចជាន់ខ្ពស់ប្រចាំតំបន់អាស៊ី នៅធនាគារស្វីស Union Bancaire Privee បានលើកឡើងថា “អ្វីដែលយើងកំពុងមើលឃើញនៅពេលនេះ គឺជាពាណិជ្ជកម្មជាយុទ្ធសាស្ត្រដែលមានទំនោរផ្អែកលើការបណ្តាក់ទុករយៈពេលខ្លី មុននឹងតម្លៃនៃវិស័យបច្ចេកវិទ្យាកើនឡើងដល់កម្រិតកំពូល”។

លោកបានបន្ថែមថា “ស្ថានភាពតានតឹងដែលអាចកើតមាននៅចក្រសមុទ្រតៃវ៉ាន់ Taiwan Strait គឺមិនសូវពាក់ព័ន្ធឡើយសម្រាប់អ្នកវិនិយោគទាំងនេះ”។

ប្រទេសចិន បានអះអាងថា តៃវ៉ាន់ ដែលគ្រប់គ្រងតាមបែបប្រជាធិបតេយ្យថាជាទឹកដីរបស់ខ្លួន ហើយការអះអាងបែបនេះត្រូវបានរដ្ឋាភិបាលតៃប៉ិ ជំទាស់យ៉ាងដាច់អហង្ការរហូតមក៕ Reuters៕

តែម សុខុម

បាងកក: ចាប់ពីថ្ងៃទី២៤ ដល់ថ្ងៃទី៣០ ខែកក្កដា ខេត្តកោះកុង និងខេត្តត្រាត នៃប្រទេសថៃ គ្រោងរៀបចំព្រឹត្តិការណ៍កីឡារត់ប្រណាំង និងពិព័រណ៍ផលិតផល។ គំនិតផ្តួចផ្តើមនេះគ្រោងធ្វើនៅផ្សារព្រំដែន បាន ហាត់ ឡេក (Ban Hat Lek) ក្នុងគោលបំណងជំរុញទេសចរណ៍ និងពង្រឹងទំនាក់ទំនងរវាងតំបន់ជិតខាងទាំងនេះ។

អភិបាលខេត្តកោះកុង លោកស្រី មិថុនា ភូថង បានបញ្ជាក់តាមរយៈសេចក្តីប្រកាសព័ត៌មានកាលពីថ្ងៃទី១៨ ខែកក្កដា ថា សកម្មភាពទាំងនេះត្រូវបានរៀបចំឡើងជាពិសេសដើម្បីពង្រឹងទំនាក់ទំនងរវាងខេត្តទាំងពីរនេះ។ នេះបើយោងតាមសារព័ត៌មាន The Nation ចុះផ្សាយកាលពីថ្ងៃសុក្រ ទី២១ កក្កដា។

លោកស្រីបានបន្ថែមថា “ខ្ញុំបានស្នើឱ្យប្រជាពលរដ្ឋ ម្ចាស់សណ្ឋាគារ ផ្ទះសំណាក់ រោងចក្រ សហគ្រាស ក្រុមហ៊ុន ធនាគារឯកជន និងភោជនីយដ្ឋានដែលមានបំណងចូលរួមកម្មវិធីនេះចុះឈ្មោះនៅវត្តកាសេម ស៊ីម៉ារាម (Wat Kasem Simaram) ឬ វត្តហាត់ ឡេក (Hat Lek)”។អភិបាលរងខេត្តកោះកុង លោក សុខ សុទ្ធី មិនអាចទាក់ទងសុំការបំភ្លឺបានទេជុំវិញរឿងនេះកាលពីថ្ងៃទី១៩ ខែកក្កដា។ ទោះជាយ៉ាងណា លោក សុខ សុទ្ធី ធ្លាប់បានបញ្ជាក់ថា ទំនាក់ទំនងល្អជាមួយខេត្តត្រាត នឹងជួយជំរុញទំនាក់ទំនងព្រំដែនកាន់តែស៊ីជម្រៅ។

លោកបានស្នើបន្ថែមទៀតធ្វើយ៉ាងបង្កលក្ខណៈឱ្យខេត្តទាំងពីរអាចស្វែងរកឱកាសវិនិយោគទៅវិញទៅមកក្នុងវិស័យមានសក្តានុពលនានា។

លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា (CATA) បានធ្វើការកត់សម្គាល់កាលពីថ្ងៃទី១៩ ខែកក្កដា ថា កម្មវិធី និងការតាំងពិព័រណ៍នេះបានបង្ហាញពីការរីកចម្រើនជាវិជ្ជមានក្នុងវិស័យទេសចរណ៍៕ The Nation៕

ដោយ: គង់ លាងហួរ
អន្តរជាតិ: កំណើនសេដ្ឋកិច្ចរបស់ប្រទេសកូរ៉េខាងត្បូងទំនងជាបានធ្លាក់ចុះបន្តិចជាងកាលពីត្រីមាសមុន ខណៈដែលការនាំចេញធ្លាក់ចុះ និងអត្រាការប្រាក់ខ្ពស់បានជះផលប៉ះពាល់ដល់ការប្រើប្រាស់ឯកជន ដែលគ្របដណ្តប់ប្រហែលពាក់កណ្តាលនៃសេដ្ឋកិច្ច។

ការនាំចេញពីប្រទេសសេដ្ឋកិច្ចធំជាងគេទី៤នៅតំបន់អាស៊ីមួយនេះបានធ្លាក់ចុះនៅក្នុងខែមិថុនា ចំណែក ការនាំចូលក៏ធ្លាក់ចុះផងដែរ ដែលនេះបង្ហាញពីកង្វះខាតនៃតម្រូវការក្នុងស្រុក និងតម្រូវការពីបរទេស ជាពិសេសពីប្រទេសចិន ដែលជាដៃគូពាណិជ្ជកម្មធំបំផុតរបស់ប្រទេសកូរ៉េខាងត្បូង។

យោងតាមការព្យាករជាមធ្យមរបស់អ្នកសេដ្ឋកិច្ចចំនួន២២នាក់ បានឱ្យដឹងថា ដោយផ្អែកលើមូលដ្ឋានពីមួយឆ្នាំទៅមួយឆ្នាំ ផលិតផលក្នុងស្រុកសរុប (GDP) របស់កូរ៉េខាងត្បូង ត្រូវបានគេរំពឹងថា នឹងកើនឡើង០,៨ភាគរយនៅក្នុងអំឡុងខែមេសាដល់ខែមិថុនា ដែលថយចុះបន្តិចបើធៀបទៅនឹងកំណើន០,៩ភាគរយដែលបានកែប្រែក្នុងខែមករាដល់ខែមីនា។ទោះបីជាយ៉ាងណាក្តី បើផ្អែកលើមូលដ្ឋានប្រចាំត្រីមាស សេដ្ឋកិច្ចដែលជំរុញដោយនាំចេញរបស់ប្រទេសនេះបានងើបឡើង០,៥%នៅត្រីមាសទី២ ពោលគឺខ្ពស់ជាងកំណើន០,៣% នៅក្នុងត្រីមាសទី១។

លោក Park Sang-hyun សេដ្ឋវិទូនៅក្រុមហ៊ុន HI Investment and Securities បានអះអាងថា “កំណើន GDP របស់កូរ៉េខាងត្បូង ត្រូវបានគេរំពឹងថា នឹងមានល្បឿនប្រហាក់ប្រហែលនឹងត្រីមាសទី១ ដោយសារការនាំចេញ និងវិស័យផលិតកម្មធ្លាក់ចុះ ការវិនិយោគក៏ធ្លាក់ចុះ ក៏ដូចជាការចំណាយរបស់រដ្ឋាភិបាលតិចជាងមុន”។

លោកបានបន្ថែមថា “កំណើនសេដ្ឋកិច្ចរបស់ប្រទេសកូរ៉េត្រូវបានគេរំពឹងថា នឹងស្ទុះងើបឡើងវិញនៅឆមាសទីពីរនៃឆ្នាំនេះ ប៉ុន្តែវានឹងពឹងផ្អែកលើល្បឿននៃការងើបឡើងវិញនៃសេដ្ឋកិច្ចនៅក្នុងប្រទេសចិនផងដែរ”៕

អាជ្ញាធរជាតិអប្សរាមានកិត្តិយស សូមជូនដំណឹងដល់ក្រសួង ស្ថាប័នជាតិ-អន្តរជាតិ អាជ្ញាធរដែនដី មន្ទីរ-អង្គភាព សមាគមទីភ្នាក់ងារទេសចរណ៍ សមាគមមគ្គុទ្ទេសក៍ទេសចរណ៍ សមាគមដឹកជញ្ជូនភ្ញៀវទេសចរ ក្រុមហ៊ុនទេសចរណ៍ ភ្ញៀវ ទេសចរជាតិ-អន្តរជាតិ និងសាធារណជនទាំងអស់មេត្តាជ្រាបថា ដើម្បីបង្កើនគុណភាពនៃការទស្សនា និងលើកតម្លៃប្រាសាទ ក៏ដូចជាផ្តល់នូវបទពិសោធន៍ល្អៗជូនភ្ញៀវទេសចរជាតិ និងអន្តរជាតិ អាជ្ញាធរជាតិអប្សរាបានសិក្សាស្រាវជ្រាវ និងរៀបចំខ្សែ ទស្សនាថ្មីនៅប្រាសាទចំនួនពីរ គឺប្រាសាទអង្គរវត្ត និងប្រាសាទបន្ទាយស្រី។ ខ្សែទស្សនាថ្មីនេះ គ្រោងនឹងដាក់ឱ្យដំណើរការ សាកល្បងចាប់ពីថ្ងៃទី០១ ខែសីហា ឆ្នាំ២០២៣តទៅ។ តាមរយៈនេះ ហេដ្ឋារចនាសម្ព័ន្ធ និងបរិក្ខារចាំបាច់នានា ដូចជាជណ្តើរ វនាំង ខ្សែរបារ ស្លាកសញ្ញាប្រាប់ទិសដៅទស្សនា ផ្ទាំងព័ត៌មានបរិយាយពីចម្លាក់ នៅតាមជញ្ជាំងថែវ… ។ល។ ត្រូវបានរៀបចំថ្មី បន្ថែមរួចរាល់ ដើម្បីសម្រួលដល់ការដាក់ដំណើរការសាកល្បងនេះ។ ខ្សែទស្សនាថ្មីមានជម្រើសដូចខាងក្រោម៖

១. ប្រាសាទអង្គរវត្ត មានបីជម្រើសដូចជា ខ្សែទស្សនារយៈពេលខ្លី “ទិសដៅទស្សនាបែបទេសចរ” រយៈពេល ២ម៉ោង ។ ខ្សែទស្សនារយៈពេលមធ្យម “ទិសដៅទស្សនាបែបជំនឿ-សាសនា” រយៈពេល២ម៉ោង៣០នាទី និងខ្សែទស្សនា រយៈពេលវែង “ទិសដៅទស្សនាបែបប្រវត្តិសាស្ត្រ” រយៈពេល៣ម៉ោង។

២. ប្រាសាទបន្ទាយស្រី មានពីរជម្រើសដូចជា៖ ជម្រើសរយៈពេលខ្លីមានរយៈពេល១ម៉ោង២០នាទី និងជម្រើសរយៈ ពេលវែងមានរយៈពេល១ម៉ោង៤០នាទី។

ចំពោះខ្សែទស្សនាថ្មីក្នុងប្រាសាទទាំងពីរខាងលើនេះ នឹងអនុញ្ញាតឱ្យភ្ញៀវទេសចរឆ្លងកាត់ផ្នែកសំខាន់ៗដូចជា ផ្ទាំង ចម្លាក់សាច់រឿង ចំណុចសំខាន់ដែលអាចទស្សនាបានទូលំទូលាយជាងកាលពីពេលមុនជាដើម។ ជាមួយគ្នានេះ អំឡុងពេលនៃ ការដាក់ដំណើរការសាកល្បងនេះ អាជ្ញាធរជាតិអប្សរា ក៏នឹងប្រើប្រាស់នូវវិធីសាស្ត្រក្នុងការស្ទង់មតិ ការរាប់ចំនួនភ្ញៀវ និងការដើរ តាមភ្ញៀវ (Tracking)ផងដែរ។

សេចក្តីដូចបានជម្រាបជូនខាងលើ សូមក្រសួង ស្ថាប័នជាតិ-អន្តរជាតិ អាជ្ញាធរដែនដី មន្ទីរ-អង្គភាព សមាគមទី ភ្នាក់ងារទេសចរណ៍ សមាគមមគ្គុទ្ទេសក៏ទេសចរណ៍ សមាគមដឹកជញ្ជូនភ្ញៀវទេសចរ ក្រុមហ៊ុនទេសចរណ៍ – ភ្ញៀវទេសចរ ជាតិ-អន្តរជាតិ និងសាធារណជនទាំងអស់មេត្តាជ្រាបជាព័ត៌មាន និងចូលរួមសហការអនុវត្តសាកល្បងខ្សែទស្សនាខាងលើ តាមការគួរ៕

ដោយ: គង់ លាងហួរ
វ៉ាសុីនតោន: តម្លៃផ្ទះនៅសហរដ្ឋអាមេរិកបានបន្តធ្លាក់ចុះក្នុងខែមិថុនាបើធៀបទៅនឹងមួយឆ្នាំមុន ប៉ុន្តែកត្តានេះប្រហែលជាមិនមានផលល្អអ្វីច្រើនសម្រាប់អ្នកទិញផ្ទះនោះទេ ខណៈតម្លៃផ្ទះជាមធ្យមនៅតែមានកម្រិតខ្ពស់ខ្លាំងដដែល។

យោងតាមរបាយការណ៍សមាគមជាតិនៃអ្នកអចលនទ្រព្យ(NAR) បានឱ្យដឹងថា តម្លៃផ្ទះជាមធ្យមក្នុងខែមិថុនាបានបំបែកកំណត់ត្រាជាតម្លៃមធ្យមប្រចាំខែខ្ពស់បំផុតទី២ បើគិតត្រលប់ទៅឆ្នាំ១៩៩៩។តម្លៃផ្ទះជាមធ្យមដែលមានស្រាប់គឺ៤១០.២០០ដុល្លារអាមេរិក កាលពីខែមិថុនា ពោលគឺធ្លាក់ចុះត្រឹមតែ០,៩% ប៉ុណ្ណោះបើធៀបទៅនឹង៤១៣.៨០០ដុល្លារកាលពីមួយឆ្នាំមុន។សារពើភ័ណ្ឌផ្ទះ (Inventory of homes) នៅលើទីផ្សារនៅតែមានកម្រិតទាបជាប្រវត្តិសាស្ត្រ ដោយសារម្ចាស់ផ្ទះបច្ចុប្បន្នមិនព្រមលក់។ លោក Lawrence Yun ប្រធានសេដ្ឋវិទូរបស់សមាគម NAR មានប្រសាសន៍ថា “មិនមានផ្ទះគ្រប់គ្រាន់សម្រាប់លក់នោះទេ ហើយទីផ្សារអាចស្រូបយកសារពើភ័ណ្ឌទ្វេរដងបានយ៉ាងងាយស្រួល”។ការលក់ផ្ទះដែលមានស្រាប់ ដូចជាផ្ទះគ្រួសារទោល ផ្ទះទីក្រុង Townhome ខុនដូ និង ផ្ទះ សហករណ៍ (co-ops) បានធ្លាក់ចុះទាបជាងការរំពឹងទុក ក្នុងអត្រា៣,៣%គិតចាប់ពីខែឧសភារហូតដល់ខែមិថុនា។

លោក Yun បានមានប្រសាសន៍ថា “អត្រាប្រាក់កម្ចីទិញផ្ទះខ្ពស់ជិត៧% និងសារពើភ័ណ្ឌទាបជាប្រវត្តិសាស្ត្រនៃផ្ទះដែលមានស្រាប់នៅលើទីផ្សារកំពុងរារាំងដល់សកម្មភាពលក់”៕

ដោយ: គង់ លាងហួរ
សេអ៊ូល: យោងតាមរបាយការណ៍មួយបានបង្ហាញនៅថ្ងៃព្រហស្បតិ៍នេះថា ការនាំចេញស្មាតហ្វូនជាសកលបានដាំក្បាលចុះ១១ភាគរយ នៅត្រីមាសទីពីរធៀបនឹងឆ្នាំមុន ខណៈទីផ្សារបានបន្តប្រឈមមុខនឹងការថយចុះនៃតម្រូវការអ្នកប្រើប្រាស់ ស្របពេលមានភាពមិនច្បាស់លាស់ខាងផ្នែកម៉ាក្រូសេដ្ឋកិច្ច។

ក្រុមហ៊ុនស្រាវជ្រាវទៅលើទីផ្សារ Canalys បានអះអាងថា ការថយចុះនៃតម្រូវការបានជះផលប៉ះពាល់ដល់ក្រុមហ៊ុននាំមុខគេនៅលើទីផ្សារ ដូចជាក្រុមហ៊ុន Samsung Electronics និងក្រុមហ៊ុន Apple ដែលត្រូវកាត់បន្ថយការលក់ ឬការនាំចេញទៅកាន់អ្នកលក់រាយរបស់ពួកគេ។ក្រុមហ៊ុន Samsung បាននាំមុខគេជាមួយនឹងចំណែកទីផ្សារ២១ភាគរយ តាមពីក្រោយដោយក្រុមហ៊ុន Apple ជាមួយចំណែកទីផ្សារ១៧ភាគរយ ក្រុមហ៊ុន Xiaomi មានចំណែកទីផ្សារ១៣ភាគរយ រីឯក្រុមហ៊ុន OPPO មានចំណែកទីផ្សារ១០ភាគរយ។

របាយការណ៍ដដែលខាងលើបានបន្តថា ខណៈពេលដែលកំណើនប្រចាំឆ្នាំបានធ្លាក់ចុះ អ្វីៗបានចាប់ផ្តើមប្រសើរឡើងវិញ ជាមួយនឹងសញ្ញាកំណើននៃការវិនិយោគ។

លោក Le Xuan Chiew អ្នកវិភាគប្រចាំក្រុមហ៊ុន Canalys បានមានប្រសាសន៍ថា “ទីផ្សារស្មាតហ្វូនកំពុងបញ្ជូនសញ្ញាដំបូងនៃការងើបឡើងវិញបន្ទាប់ពីដាំក្បាលចុះអស់៦ត្រីមាសជាប់ៗគ្នាចាប់តាំងពីឆ្នាំ២០២២”។

លើសពីនេះ ក្រុមហ៊ុន Samsung គ្រោងនឹងដាក់បង្ហាញទូរស័ព្ទស្មាតហ្វូនស៊េរីថ្មីរបស់ខ្លួន Galaxy ដែលអាចបត់បាន នៅសប្តាហ៍ក្រោយនេះ ខណៈក្រុមហ៊ុនមានបំណងជំរុញការលក់ស្មាតហ្វូនរបស់ខ្លួននៅក្នុងឆមាសទី២៕

ដោយ: គង់ លាងហួរ
សិង្ហបុរី: ជនបរទេសដែលកំពុងស្វែងរកទិញអចលនទ្រព្យពាណិជ្ជកម្មចម្រុះ និងអចលនទ្រព្យលំនៅដ្ឋាន ឬដីធ្លីនៅប្រទេសសិង្ហបុរី ត្រូវតែទទួលបានការអនុម័តពីរដ្ឋាភិបាលគិតចាប់ពីថ្ងៃទី២០ ខែកក្កដានេះ។

នេះបើយោងតាមការចុះផ្សាយដោយសារពត៌មាន CNA នៅថ្ងៃព្រហស្បតិ៍ ទី២០ ខែកក្កដា ឆ្នាំ២០២៣នេះ។ ក្រសួងច្បាប់ (MinLaw) និងអាជ្ញាធរដែនដីសិង្ហបុរី (SLA) កាលពីយប់ថ្ងៃពុធកន្លងទៅបានប្រកាសថា ពួកគេបានកែលម្អច្បាប់ស្តីពីអចលនទ្រព្យលំនៅដ្ឋាន (RPA) ដើម្បីចាត់ថ្នាក់ការអភិវឌ្ឍទាំងនេះជាអចលនទ្រព្យលំនៅដ្ឋាន ឬដីធ្លី។ឥឡូវនេះ ជនបរទេសដែលមានគម្រោងទិញ ឬចង់ទទួលបានផលចំណេញលើទីតាំងដែលអនុញ្ញាតសម្រាប់ការប្រើប្រាស់បែបពាណិជ្ជកម្ម និងលំនៅដ្ឋានចម្រុះ នឹងត្រូវដាក់ពាក្យសុំការយល់ព្រមនៅក្រោមច្បាប់ស្តីពីអចលនទ្រព្យលំនៅដ្ឋាន (RPA)។

ចំណែកឯជនបរទេសដែលជាម្ចាស់កម្មសិទ្ធិស្រាប់នៃដី ឬអចលនទ្រព្យនោះមិនតម្រូវឱ្យទទួលបានការយល់ព្រមក្រោមច្បាប់ RPA នោះទេ។

ក្រសួងច្បាប់ (MinLaw) និងអាជ្ញាធរដែនដីសិង្ហបុរី (SLA) បានបញ្ជាក់ថា ទោះបីជាយ៉ាងណាក្តី ការយល់ព្រម ឬការអនុម័តពីរដ្ឋាភិបាលគឺត្រូវការជាចាំបាច់សម្រាប់ជនបរទេស ប្រសិនបើពួកគេចង់អភិវឌ្ឍអចលនទ្រព្យទាំងនោះឡើងវិញ៕