ដោយៈ ស៊ីវ ម៉េង

       សៀមរាបៈ គំរោងអភិវឌ្ឍន៍ចម្រុះដ៏ធំមួយ ដែលមានទំហំរហូតដល់​៣០០ហិកតា ស្ថិតនៅស្រុកបន្ទាយស្រី បាននិងកំពុងលេចរូបរាងឡើងស្រ​បពេលទស្សនទានៃការអភិវឌ្ឍន៍នេះ បាននិងកំពុងផ្តល់ផលប្រយោជន៍ដល់សេដ្ឋកិច្ចជាតិ។

“បំពេញរាជ” ជាឈ្មោះគំរោងនេះ ដែលបាននិងកំពុងអភិវឌ្ឍន៍ដោយអ្នកវិនិយោគក្នុងស្រុក ដើម្បីប្រែក្លាយ និងបំពេញសក្តានុពលស្រុកបន្ទា​យស្រីឲ្យមានភាពទាក់ទាញមួយកម្រិតទៀត។

គំរោងនេះ ក្រៅពីសាងសង់ផ្ទះលំហែរ រមណីយដ្ឋានលំហែរកាយ កន្លែងបង្ហាញពីសិល្បៈវប្បធ៌មជាតិ ដល់ភ្ញៀវទេសចរណ៍ជាតិ និងអន្តរជាតិ គំរោងនេះ ក៏បាននិងកំពុងចូលរួមលើកស្ទួយវិស័យកីឡាជាតិ ដែលក្រុមហ៊ុននេះ បាននិងកំពុងសាងសង់ស្តាតចំនួន៣ ក្នុងនោះស្តាតមួយមាន​សមត្ថភាពអាចផ្ទុកអ្នកទស្សនាចំនួន៤៣០០នាក់ សម្រាប់ជាទីតាំងហាត់សមកីឡាករ ដែលគំរោងនេះ នឹងបញ្ចប់ការសាងសង់ នៅខែមេសាខាងមុខនេះ។

លើសពីនេះ នៅចុងឆ្នាំ២០២៤ ឬដើមឆ្នាំ២០២៥ខាងមុខ អ្នកអភិវឌ្ឍន៍គំរោង “បំពេញរាជ” នឹងសាងសង់ស្តាតថ្មីមួយទៀត តាមស្តង់ដាអន្តរជាតិ ដែលអាចផ្ទុកអ្នកទស្សនា បានចំនួនរហូតដក់២៥,០០០នាក់ ដែលជាតំណា​ងឲ្យមុខមាត់ និងលើកកំពស់កិត្យានុភាពខេត្តសៀមរាបទាំងមូល។

បច្ចុប្បន្នអ្នកអភិវឌ្ឍន៍គំរោងនេះ កំពុងស្វែងរកដៃគូសហការ ដើម្បីព  ង្រីកសក្តានុពលវិនិយោគ ដើម្បីប្រែក្លាយស្រុកបន្ទាយស្រី ខេត្តសៀមរាប ក្លាយជាមូលដ្ឋានសក្តានុពល និងទាក់ទាញភ្ញៀវទេសចរណ៍ជាតិ អន្តរជាតិ​មកទស្សនាស្រុកនេះ បានកាន់តែច្រើនថែមមួយកម្រិតទៀត។

“បំពេញរាជ” បាននិងកំពុងលក់ដីលំហែរមួយចំនួន រៀបចំសាងសង់ផ្ទះអាជីវកម្ម រៀបចំរមណីយដ្ឋាន និងសេវាកម្មបំរើសេវាកំសាន្តនិងស្នាក់នៅតាមស្តង់ដាអន្តរជាតិជាច្រើនទៀត។

ស្រុកបន្ទាយស្រី ខេត្តសៀមរាប បានក្លាយជាស្រុកដ៏លេចធ្លោមួយក្នុងខេត្តសៀមរាប បន្ទាប់ពីការដឹកនាំរបស់លោកឃឹម ហ្វីណង់អតីតអភិបាលស្រុកនេះ ដែលបច្ចុប្បន្នលោកបានផ្លាស់ប្តូរតួនាទី មកជាអភិបាលរងខេត្តសៀមរាប ខណៈអភិបាលស្រុកថ្មី ក៏ជាបុគ្គលមានឆន្ទៈមោះមុត ក្នុងការរួមចំណែកក្នុងការអភិវឌ្ឍន៍សក្តានុពល និងទាញយកសក្តានុពលដែលមានស្រាប់មកប្រើប្រាស់ឲ្យកាន់តែមានប្រសិទ្ឋភាព និងផ្តល់ប្រាក់ចំណូលដើម្បីបង្កើនមូលដ្ឋានសេដ្ឋកិច្ចដល់ស្រុកនេះផងដែរ។

គំរោងនេះទទួលបានការគាំទ្រ និងចង្អុលបង្ហាញពីអភិបាល នៃគណៈអភិបាលខេត្តសៀមរាប លោកទៀ សីហា ដែលលោកតែងតែគិតគូរពីទស្ស​នវិស័យ និងលើកកំពស់សក្តានុពលខេត្តសៀមរាប ក៏ដូចជាស្រុកបន្ទាយ​ស្រីទាំងមូលឲ្យមានការរីកចម្រើន និងទាក់ទាញភ្ញៀវទេសចរណ៍ជាតិ អន្តរជាតិ ដើម្បីឲ្យមានលំហូរសាច់ប្រាក់ដល់មូលដ្ឋាន ដែលជាការចូលរួមលើកកំពស់ជីវភាពរបស់ប្រជាពលរដ្ឋ៕

ដោយៈ វឌ្ឈនៈ

ភ្នំពេញៈ សេវាកម្មគ្រប់គ្រងអចលនទ្រព្យជំនួស ដែលផ្ដោតលើការចាត់ចែងទ្រព្យជំនួសម្ចាស់ទ្រព្យ ស្វែងរកភ្ញៀវជួលអចលនទ្រព្យជំនួសម្ចាស់ទ្រព្យ នៅតែមានភាពទីផ្សារខ្ពស់ ខណៈការប្រកួតប្រជែងនៅមានតិចតួចប៉ុណ្ណោះ ។

លោកញឹម រាសីអគ្គនាយកក្រុមហ៊ុន WH ដែលជាក្រុមហ៊ុនផ្ដោតលើការគ្រប់គ្រងអចលនទ្រព្យជំនួសម្ចាស់ទ្រព្យ និងការស្វែងរកអតិថិជនមកជូនម្ចាស់ទ្រព្យនោះបានឱ្យដឹងក្នុងសប្តាហ៍មុនថា ក្រុមហ៊ុនWH ជាក្រុមហ៊ុនជំនាញក្នុងការអភិវឌ្ឍអចលនទ្រព្យស្នាក់នៅ ដូចជាសណ្ឋាគារ និងអាផាត់មែន ហើយក្រៅពីនេះ ក្រុមហ៊ុនក៏មានសេវាកម្មសហការជាមួយម្ចាសទ្រព្យដើម្បីឱ្យម្ចាស់ទ្រព្យមានចំណូលជាប្រចាំ ។

លោកបន្តថា សេវាកម្មទាំងនេះ គឺនៅមានភាពទូលំទូលាយនៅឡើយ នៅក្នុងប្រទេសកម្ពុជា ខណៈម្ចាស់ទ្រព្យជាច្រើនគាត់រកភ្ញៀវមិនបាន ហើយក៏ទុកអគារទាំងនោះចោល ជាពិសេសនៅក្នុងអំឡុងវិបត្តិកូវីដ១៩ ដែលធ្វើឱ្យម្ចាស់អគារទាំងនោះមិនមានចំណូល។ ការបង្កើតក្រុមហ៊ុនសេវាកម្មគ្រប់​គ្រងអចលនទ្រព្យជំនួសម្ចាស់ទ្រព្យ គឺនឹងជួយឱ្យម្ចាស់ទ្រព្យទទួលបានចំណូលត្រលប់មកវិញ ហើយធ្វើឱ្យអគាររបស់គាត់មានដំណើរការ ។

លោកញឹម រាសីបានបន្តថា ទីផ្សារអចលនទ្រព្យវាមានឡើងមានចុះ ហើយបើសិនជាម្ចាស់ទ្រព្យ គាត់មិនបានដឹងពីទីផ្សារថែមទៀតនោះ អចលនទ្រព្យរបស់គាត់នឹងកាន់តែបាត់បង់ចំណូល រឹតតែធ្វើគាត់មានបញ្ហាជាមួយនឹងហិរញ្ញវត្ថុផងដែរ ។

លោកបន្ថែមថា ម្ចាស់ទ្រព្យពេលខ្លះ គាត់មានទ្រព្យហើយ តែគាត់អាចនឹងគិតមិនឃើញថា នឹងធ្វើអ្វី ឬមិនមានពេលគ្រប់គ្រង ថែរទាំ និងផ្តល់ភាពកក់ក្តៅដល់អតិថិជន តែបើសិនជាមានក្រុមហ៊ុនគ្រប់គ្រងជំនួសនេះ យើងអាចនឹងជួយគាត់បានច្រើន ហើយនឹងអាចបំពេញតម្រូវការទីផ្សារ អចលនទ្រព្យបានទៀតផង ដោយសារតែយើងដឹងពីទីផ្សារពីតម្រូវការ និងអាចកែច្នៃអចលនទ្រព្យឱ្យស្របនឹងបរិបទទីផ្សារជាក់ស្ដែង។

លោកបន្ថែមទៀតថា មានក្រុមហ៊ុនគ្រប់គ្រងអចលនទ្រព្យជំនួសម្ចាស់ទ្រព្យក៏អាចឱ្យម្ចាស់ទ្រព្យជួលទ្រព្យរបស់ខ្លួន ទៅអតិថិជនបានលឿនរហ័សផងដែរ ជាក់ស្ដែងបើសិនជាយងមានផ្ទះមួយទាំងមូល ជួលក្នុងតម្លៃមួយដែលមនុស្សម្នាក់មិនអាចមានលទ្ធភាពជួលបាន តែយើងអាចយកផ្ទះនោះមករៀបចំជាបន្ទប់ៗ និងជួលទៅមនុស្សច្រើននាក់ក្នុងតម្លៃទាប ប៉ុន្តែបើបូកសរុប គឺយើងទទួលបានចំណូលខ្ពស់ជាងការជួលផ្ទះទាំងមូល។

លោកបន្តថា មួយទៀតការជួលខុនដូ អាផាត់មិនក៏ដូចគ្នា បើសិនជាយើងជួលមិនបានហើយ យើងមិនគួររង់ចាំអ្នកមានលទ្ធភាពមកជួលនោះទេ គឺត្រូវការកែច្នៃវាដើម្បីឱ្យជួលបានលឿនរហ័ស។

ការវិនិយោគក្នុងវិស័យអចលនទ្រព្យ ក្នុងប្រទេសកម្ពុជានាពេលបច្ចុប្បន្ននេះ ត្រូវបានមើលឃើញថា កាន់តែមានបែបផែនច្រើនទម្រង់ ដែលអាចឱ្យវិនិយោគិន និងអ្នកអភិវឌ្ឍន៍អាចរកចំណូលបានខ្ពស់ និងសាងភាពមានបានលឿនរហ័ស បើសិនជាអ្នកទាំងនោះដើរត្រូវនឹងបែបផែន៕

 ដោយៈ វឌ្ឍនៈ

ភ្នំពេញៈ កាលពីប៉ុន្មានឆ្នាំមុននេះ តំបន់ផ្លូវ៥១ ជាតំបន់ដែលមានសក្ដានុពល និងពេញនិយមខ្លាំងលើការអភិវឌ្ឍដីឡូត៏ ដោយមានអ្នកអភិវឌ្ឍន៍ជាច្រើនចូលទៅអភិវឌ្ឍន៍តំបន់នោះជាដីឡូត៏ និងមានអតិថិជន ប្រជាពលរដ្ឋជាច្រើន បានចូលទៅទិញដីឡូត៏ពីក្រុមហ៊ុនអភិវឌ្ឍន៍ទាំងនោះ។

ប៉ុន្តែមកដល់បច្ចុប្បន្ននេះ តំបន់ផ្លូវ៥១បាននិងកំពុងប្រែក្លាយទៅជាឧស្សាហកម្មនិងលំនៅឋានដ៏មានសក្ដានុពល ។

លោកផូន សុអុនដែនប្រធានផ្នែកលក់នៃក្រុមហ៊ុន KH Land បានថ្លែងប្រាប់តាមទូរសព្ទឱ្យដឹងថា ការអភិវឌ្ឍដីឡូត៏បានថមថយបន្តិចហើយនៅតំបន់តាមបណ្ដោយផ្លូវ៥១ ដោយជំនួសមកវិញនូវការអភិវឌ្ឍជាតំបន់ឧស្សាហកម្ម និងលំនៅឋានដូចជាបុរីជាដើម។

លោកបន្តថា “ពីមុនតំបន់នេះ ពិតជាសំបូរទៅដោយការអភិវឌ្ឍដីឡូត៏មែន ដោយសារតែតម្លៃដីធ្លីនៅមានតម្លៃទាប តែនៅពេលតម្លៃដីធ្លីកាន់តែឡើងថ្លៃធ្វឱ្យតំបន់នោះ មិនអាចអភិវឌ្ឍន៍ជាដីឡូត៏បានទៀតនោះទេ”។

លោកផូន សុអុនបានបន្តថា បច្ចុប្បន្ននេះ នៅតំបន់តាមបណ្ដោយផ្លូវ៥១គឺមានការអភិវឌ្ឍទៅជាឧស្សាហកម្ម និងលំនៅឋានហើយក៏មានក្រុមហ៊ុនអភិវឌ្ឍន៍លំនៅឋានជាច្រើន បានចូលទៅអភិវឌ្ឍន៍ជាបន្តបន្ទាប់ ស្របនឹងក្រុមហ៊ុនអភិវឌ្ឍន៍ឧស្សាហកម្មមួយចំនួន ក៏បានធ្វើសកម្មភាពអភិវឌ្ឍន៍ដើម្បីផ្គត់ផ្គង់ជូនអ្នកវិនិយោគផងដែរ ។ តម្លៃដីធ្លីនៅតំបន់នោះ បានហក់ឡើងជាបន្តបន្ទាប់ ក្នុងរយៈពេលប៉ុន្មានឆ្នាំចុងក្រោយនេះ ។

លោកសន្និដ្ឋានថា នៅពេលអនាគត តំបន់ផ្លូវ៥១នឹងអាចដូចមហាវិថីឈ្នះ ឈ្នះនាពេលបច្ចុប្បន្ននេះ ស្របនឹងផែនការអភិវឌ្ឍរបស់រាជរដ្ឋាភិបាល ក៏បាននិងកំពុងតែអនុវត្តជាបន្តបន្ទាប់ដូចគ្នានោះដែរ ។

អ្នកជំនាញអចលនទ្រព្យអន្តរជាតិ លោក វ៉ា វីរៈបានលើកជាទស្សនថា តំបន់ខាងលិចភ្នំពេញ នឹងទាក់ទាញខ្លាំងទៅលើឧស្សាហកម្ម ហើយវិនិយោគិនបរទេសចូលមកថ្មីៗ ក៏កំពុងតែចាប់អារម្មណ៍នៅតំបន់ខាងលិចសម្រាប់ គម្រោងអភិវឌ្ឍន៍ឧស្សាហកម្មរបស់ខ្លួនផងដែរ ដូចជាតំបន់សេដ្ឋកិច្ចពិសេស គម្រោងរោងចក្រ សហគ្រាសនានា ។

ជាមួយគ្នានេះ អភិបាលខេត្តកំពង់ស្ពឺលោកវ៉ី សំណាងបានថ្លែងកាលពីពេលថ្មីៗនេះថា ដោយសារតែវត្តមានរោងចក្រ សហគ្រាស នៅក្នុងខេត្តកំពង់ស្ពឺបានធ្វើឱ្យតម្លៃដីធ្លី នៅតំបន់មួយចំនួននៅខេត្តកំពង់ស្ពឺ ហក់ឡើងជាបន្តបន្ទាប់ និងធ្វើឱ្យតំបន់ខ្លះដែលធ្លាប់តែធ្វើស្រែចំការ ឬជាតំបន់កសិ​កម្ម ក្លាយជាតំបន់ឧស្សស្សាហកម្ម ជំរុញតម្លៃដីឡើងថ្លៃ ធ្វើឱ្យជីវភាពពលរដ្ឋកាន់តែប្រសើរ៕