ដោយៈ គង់ សូរិយា

       ភ្នំពេញៈ គោលនយោបាយសំខាន់ៗនៃប្រព័ន្ធភស្ដុភារកម្មកម្ពុជា ត្រូវបានលើកយកមកពិភាក្សាក្នុងកិច្ចប្រជុំពិនិត្យលើកទី២ របស់គណៈកម្មការរួមសម្របសម្រួល គម្រោងរបស់អន្តរក្រសួង លើដំណើរការនៃការអនុវត្តគម្រោងធ្វើឱ្យប្រសើរឡើង ប្រព័ន្ធភស្ដុភារកម្មប្រទេសកម្ពុជាជំហានទី២។

កិច្ចប្រជុំនេះត្រូវបានដឹកនាំលោកជំទាវ កុយ សុដានី រដ្ឋលេខាធិការក្រសួងសាធារណការ និងដឹកជញ្ជូន ទទួលបន្ទុកជាប្រធានគណៈកម្មការគ្រប់គ្រងគម្រោងធ្វើឱ្យប្រសើរឡើង ប្រព័ន្ធភស្ដុភារកម្មនៃប្រទេសកម្ពុជា ជំហានទី២ (PMU) និងលោកស្រី MIYAHARA Ai តំណាងជាន់ខ្ពស់នៃទីភ្នាក់ងារសហប្រតិបត្តិការអន្តរជាតិជប៉ុន (JICA)ប្រចាំកម្ពុជា បានអញ្ជើញជាសហប្រធានដឹកនាំកិច្ចប្រជុំពិនិត្យលើកទី២ របស់គណៈកម្មការរួមសម្របសម្រួលគម្រោងរបស់អន្តរក្រសួង ដើម្បីពិនិត្យ និងពិភាក្សាលើដំណើរការនៃការអនុវត្ត គម្រោងធ្វើឱ្យប្រសើរឡើងនូវប្រព័ន្ធភស្ដុភារកម្ម នៃប្រទេសកម្ពុជា ជំហានទី២ (PMU) ។

អង្គប្រជុំបានផ្តោតការពិភាក្សា លើរបាយការណ៍លទ្ធផលការងារ បញ្ហាប្រឈម និងដំណោះស្រាយចំពោះគម្រោង និងការវិវឌ្ឍថ្មីៗទាក់ទងនឹងច្រកទ្វារព្រំដែនអន្តរជាតិរវាងកម្ពុជា-ថៃ និងវៀតណាម ព្រមទាំងបង្ហាញពីវឌ្ឍនភាព ក្នុងការរៀបចំបង្កើតឡើងគោលនយោបាយ ផែនការសកម្មភា​ពនានា ដែលក្រុមការងារកំពុងរៀបចំរួមមាន ទី១ គោលនយោបាយភស្ដុភារកម្មបៃតង (Green Logistics Policy) ទី២ គោលនយោបាយរក្សាទំនិញត្រជាក់ (Cold Chain Policy) និងទី៣ គោលនយោបាយទំនើបកម្មរថយន្ដដឹកទំនិញ (Truck Modernization Policy) គោលការណ៍ណែនាំរៀបចំមជ្ឈមណ្ឌលភស្តុភារកម្ម ក៏ដូចជា ការធ្វើបទបង្ហាញអំពីការត្រួតពិនិត្យ និងវាយតម្លៃគម្រោងផែនការមេ ប្រព័ន្ធភស្តុភារកម្មកម្ពុជា ការបង្កើតឡើង ប្រព័ន្ធទិន្នន័យប្រព័ន្ធទំនាក់ទំនង និងការសិក្សាទីផ្សារភស្តុភារកម្ម និងបទបង្ហាញអំពីវឌ្ឍនភាពនៃការរៀបចំ សាងសង់ហេដ្ឋារចនាសម្ព័ន្ធចាំបាច់មួយចំនួនសម្រាប់សម្រួល និងធ្វើឱ្យប្រសើរឡើងចរាចរណ៍ ឆ្លងកាត់នៅច្រកទ្វារព្រំដែនបាវិត និងប៉ោយប៉ែត និងការជួយសម្របសម្រួលការងារបើកប្រតិបត្តិការដឹកជញ្ជូន ឆ្លងកាត់ព្រំដែនជាបណ្តោះអាសន្ន ច្រកទ្វារស្ទឹងបត់-បានណងអៀន (កម្ពុជា-ថៃ)។

អង្គប្រជុំក៏បានស្តាប់បទបង្ហាញ និងជជែកពិភាក្សាគ្នាផងដែរលើការសិក្សា និងអនុសាសន័របស់ទីភ្នាក់ងារ JICA ទៅលើគំហើញកត្តាមួយចំនួនដែលកើតឡើង និងសំណើស្វែងរកដំណោះស្រាយ ការកកស្ទះនៅច្រកទ្វារព្រំដែនបាវិត រវាងកម្ពុជា-វៀតណាម។

ថ្លែងក្នុងឱកាសនោះ លោកជំទាវរដ្ឋលេខាធិការប្រធានអង្គប្រជុំ បានថ្លែងអំណរគុណយ៉ាងជ្រាលជ្រៅ ដល់ក្រុមជំនាញការជប៉ុន ក្រុមការងាររបស់ក្រសួងសាធារណការ និងដឹកជញ្ជូន និងក្រុមការងារនៃគណៈកម្មការគ្រប់គ្រងគម្រោងធ្វើឱ្យប្រសើរឡើង ប្រព័ន្ធភស្ដុភារកម្មជំហានទី២ និងសមា​ជិកគណៈកម្មការរួមសម្របសម្រួលគម្រោង ដែលបានខិតខំប្រឹងប្រែងបំពេ​ញការងារយ៉ាងសកម្ម និងការចូលរួមពីគ្រប់ស្ថាប័ន និងភាគីពាក់ព័ន្ធទទួលលទ្ធផលបានល្អប្រសើរ។

លោកជំទាវរដ្ឋលេខាធិការ ក៏បានសំណូមពរផងដែរ ឱ្យក្រុមការងារទាំងអស់បន្តសហការបន្ថែមទៀត ដើម្បីលើកកម្ពស់វិស័យដឹកជញ្ជូន និងភស្ដុភារកម្មនៅកម្ពុជា ឱ្យកាន់តែមានការរីកចម្រើនថែមទៀត និងអាចបញ្ចប់គម្រោងដោយជោគជ័យ ក្នុងអំឡុងខែមិថុនា ឆ្នាំ២០២៣ខាងមុខ៕

ដោយៈ សុខុម

ហុងកុង: កូវីដ-១៩មិនត្រឹមតែកែប្រែទម្លាប់យើងធ្វើការ និងទិញអីវ៉ាន់ប៉ុណ្ណោះទេ ប៉ុន្តែវាក៏ជំរុញឱ្យមនុស្សកាន់តែច្រើន គិតចង់រើផ្ទះផងដែរ តាមរយ:ការទិញផ្ទះថ្មី នៅទីតាំងកណ្តាលក្រុង ដែលពួកគេអាចទទួលបានស្តង់ដាររស់នៅកាន់តែប្រសើរ និងចំណាយពេលតិចក្នុងការធ្វើដំណើរ។

យោងតាមសារព័ត៌មាន South China Morning Post ចុះផ្សាយកាលពីថ្ងៃពុធ ទី១៤ ខែធ្នូ ឱ្យដឹងថា ការសង្កេតនេះ គឺធ្វើឡើងដោយផ្អែកលើការស្ទង់មតិថ្មី ដោយក្រុមហ៊ុនអចលនទ្រព្យអាមេរិកCBRE ទៅលើមនុស្សជាង២០.០០០នាក់ នៅទូទាំងពិភពលោក ដើម្បីស្វែងយល់ពីរបៀបដែលពួកគេរស់នៅ រៀបធ្វើការ និងទិញទំនិញនាពេលអនាគត។

ទន្ទឹមនេះ អ្នកឆ្លើយសំណួរចំនួន៩.០០០នាក់ ដែលមកពីទូទាំងអាស៊ី-ប៉ាស៊ីហ្វិក ក៏ត្រូវបានរាប់បញ្ចូលនៅក្នុងការស្ទង់មតិនេះផងដែរ។

គ្រួសារពលរដ្ឋអាស៊ី ជាទូទៅជំពាក់បំណុលតិចជាង និងមានជំហរហិរញ្ញវត្ថុរឹងមាំជាងគ្រួសារពលរដ្ឋលោកខាងលិច។

លោក Henry Chin នាយកផ្នែកស្រាវជ្រាវទីផ្សារអាស៊ី-ប៉ាស៊ីហ្វិក នៅក្រុមហ៊ុន CBRE លើកឡើងថា ជាទូទៅពលរដ្ឋអាស៊ី យល់ឃើញថា អចលនទ្រព្យជាការវិនិយោគរយៈពេលវែង។

អ្នកជំនាញរូបនេះបានគូសបញ្ជាក់ថា “ខណៈទីផ្សារអចលនទ្រព្យក្នុងទីផ្សារមួយចំនួននៅអាស៊ី ពេលនេះកំពុងធ្វើការកែតម្រូវ ដើម្បីឆ្លើយតបទៅនឹងការដំឡើង អត្រាការប្រាក់កាលពីពេលថ្មីៗនេះ អ្នកទិញកំពុងសញ្ជឹងរង់ចាំមើលស្ថានភាពទីផ្សារ ដើម្បីក្ដាប់ឱកាសទិញ នៅពេលឱកាសល្អហុចឱ្យ”។

ការសិក្សាបានរកឃើញថា មនុស្ស៦៦%នៅពេលនេះ ចាត់ទុកសុខភាព និងសុវត្ថិភាពសំខាន់ជាងតម្លៃ នៅពេលជ្រើសរើសទិញផ្ទះថ្មី។ នេះមានន័យថា ពួកគេមិនសូវសូញសាញ រឿងតម្លៃប៉ុន្មានឡើយ ឱ្យតែផ្ទះថ្មីដែលពួកគេទិញផ្ដល់ផាសុកភាព និងសុវត្ថិភាពខ្ពស់។

លោកស្រី Ada Choi ប្រធានផ្នែកស្រាវជ្រាវ និងគ្រប់គ្រងទិន្នន័យសម្រាប់អាស៊ី-ប៉ាស៊ីហ្វិក នៅក្រុមហ៊ុនCBRE លើកឡើងថា “ចំនួនអ្នកទិញផ្ទះដែលចង់បានលក្ខខណ្ឌបែបនេះ កើនឡើងកាន់តែច្រើន ជាពិសេសក្នុងចំណោមជនជាតិចិនដីគោក”៕ South China Morning Post៕

វិភាគៈឡោ វិចិត្រអនុប្រធានសមាគមពាណិជ្ជកម្មកម្ពុជា ចិន

ភ្នំពេញ: កម្ពុជាក្លាយជាប្រទេស ដែលស្ថិតក្នុងតំបន់អាស៊ីតែមួយគត់ ដែលប្រើប្រាស់ប្រាក់ដុល្លារជារូបិយប័ណ្ណចម្បង ដើម្បីបង្កើនភាពទាក់ទាញលំហូរFDI  និងការពារដល់ក្រុមវិនិយោគិន ពីការប្រែប្រួលរូបិយប័ណ្ណសំខាន់ៗផ្សេងៗ។

តួយ៉ាងបំណុលជាតិសរុបរបស់កម្ពុជា ធៀបទៅនឹងផលិតផលជាតិសរុបមានត្រឹមតែ៤០ភាគរយប៉ុណ្ណោះ។

ជាក់ស្តែង ស្ថាប័នហិរញ្ញវត្ថុធំៗ ដូចជា ធនាគារអភិវឌ្ឍន៍អាសុី(ADB) មូលនិធិរូបិយវត្ថុអន្តរជាតិ(IMF) និងធនាគារពិភពលោក បានកោតសរសើរថា កម្ពុជាជាប្រទេ​សមានសុវត្ថិភាពផ្នែកហិរញ្ញវត្ថុ សម្រាប់រយៈពេលមធ្យម ក្នុងនាមជាប្រទេ​សកំពុងអភិវឌ្ឍន៍ ដែលត្រូវវិនិយោគច្រើនលើហេដ្ឋា រចនាសម្ព័ន្ធសំខាន់ៗ ដើម្បីអភិវឌ្ឍសេដ្ឋកិច្ចជាតិ។

ប្រទេសកម្ពុជាបានបើកលំហសេដ្ឋកិច្ចសេរី ពេញលេញបំផុតមួយនៅតំបន់អាស៊ី ជាមួយនឹងការធ្វើឯកជនភាវូបនីយកម្មពេញលេញ  សូម្បីតែសម្រាប់ឧស្សាហកម្មសំខាន់ៗ ដូចជាអាកាសចរណ៍ស៊ីវិល ការខួងយកប្រេង និងរោងចក្រចម្រាញ់ និងធនធានរ៉ែ។

ចំណែក អត្រានៃភាពមានការងារធ្វើ ក្នុងប្រទេសកម្ពុជាមានរហូតទៅដល់៩៩ភាគរយ ដោយកម្ពុជាកំពុងមានកម្លាំងពលកម្ម យ៉ាងពេញលេញផងដែរ។

លើសពីនេះទៅទៀត ចំណូលពីការប្រមូលពន្ធ បានកើនឡើងពីមួយឆ្នាំទៅមួយឆ្នាំ  ដែលកត្តានេះបានញុំាងឱ្យរាជរដ្ឋាភិបាលមានឱកាសជាច្រើន  និងមានភាពបត់បែន ក្នុងការវិនិយោគលើការអភិវឌ្ឍហេដ្ឋារចនាសម្ព័ន្ធ។

កម្ពុជាគឺជាប្រទេស ដែលយកពន្ធសាជីវកម្មទាបបំផុតមួយនៅក្នុងទ្វីបអាស៊ី និងគ្រោងដាក់ឱ្យប្រើប្រាស់ច្បាប់វិនិយោគថ្មី  ដែលផ្តល់ការលើកទឹកចិត្តផ្នែកពន្ធ និងការផ្អាកយកពន្ធរហូតដល់ទៅ៩ឆ្នាំ”។

ទីផ្សារមូលធន ដែលកំពុងរីកចម្រើន ដូចជាទីផ្សារភាគហ៊ុន និងឧប​ករណ៍និស្សន្ទវត្ថុ នឹងជំរុញសេដ្ឋកិច្ចកម្ពុជា ឱ្យឈានឆ្ពោះទៅរកកម្រិតកម្ពស់  និងកំណើនថ្មីបន្ថែមទៀត ។

ដោយងាកក្រឡេកទៅមើលវិស័យផ្សេងៗ ដូចជា វិស័យទេសចរណ៍ វិស័យពាណិជ្ជកម្មជាដើម គេមើលឃើញថា  កម្ពុជាកំពុងប្រែក្លាយខ្លួន ជាគោលដៅទេសចរណ៍ឈានមុខគេ  និងជាតំបន់ទាក់ទាញទេសចរណ៍ ជាមួ​យនឹងសណ្ឋាគារលំដាប់ផ្កាយ៥ និងលំដាប់ថ្នាក់អន្តរជាតិ និងទាក់ទាញរោងចក្រ សហគ្រាសថ្មីៗកាន់តែច្រើន។

លើសពីនេះ តំបន់សេដ្ឋកិច្ចពិសេសកម្ពុជា(SEZ)  និងដំណោះស្រា​យសេវាកម្មច្រកចេញចូលតែមួយ នឹងបន្តដើរតួនាទីឈានមុខគេ ក្នុងការជំរុញកំណើនសេដ្ឋកិច្ច នៃវិស័យផលិតកម្មបន្ថែមទៀត ខណៈដែលកម្ពុជាទទួលបានអត្ថប្រយោជន៍យ៉ាងច្រើន ពីកិច្ចព្រមព្រៀងពាណិជ្ជកម្មសេរីកម្ពុជា-ចិន កិច្ចព្រមព្រៀងពាណិជ្ជកម្មសេរីកម្ពុជា -កូរ៉េខាងត្បូង សហគមន៍សេដ្ឋកិច្ចអាស៊ាន  និងសមាហរណកម្ម និងជាសមាជិកនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់។

ដោយឡែក  ខណៈដែលកម្ពុជាកំពុងមានស្ថិរភាព ផ្នែកនយោបាយយ៉ាងល្អប្រសើរផងដែរនោះ វាបានអំណោយផលដល់ការវិនិយោគ និងការអភិវឌ្ឍសេដ្ឋកិច្ច យ៉ាងឆាប់រហ័សក្នុងប្រទេស ដែលស្ថិតក្នុងតំបន់អាស៊ី មួយនេះ។

ជាមួយគ្នានេះ កម្ពុជាមានអត្រានៃនគរូបនីយកម្មយ៉ាងខ្ពស់  ដែលនោះហើយជាមូលហេតុ  ដែលការអភិវឌ្ឍសេដ្ឋកិច្ច និងកំណើនប្រាក់ចំណូ​លមានសារៈសំខាន់ខ្លាំងណាស់ ក្នុងការសម្រេចបាននូវឋានៈជាខ្លាសេដ្ឋកិច្ចអាស៊ី និងឋានៈជាប្រទេសមានចំណូលមធ្យមនៅឆ្នាំ២០៣០ខាងមុខ។

ការធ្វើជាម្ចាស់ផ្ទះ នៃការប្រកួតកីឡាស៊ីហ្គេមនៅឆ្នាំ២០២៣ របស់កម្ពុជា នឹងជំរុញឱ្យមានចំណាប់អារម្មណ៍ លើវិស័យកីឡារបស់យុវជន និងប្រជាពលរដ្ឋកម្ពុជាបន្ថែមទៀត  ដែលកត្តានេះនឹងធ្វើឱ្យតម្រូវការកីឡា និងទំនិញផលិតក្នុងស្រុក ឬទំនិញនាំចូលមានការកើនឡើង។

ពិសេសជាងនេះទៅទៀត កម្ពុជាក៏កំពុងសាងសង់អាកាសយានដ្ឋានធំជាងគេបំផុតទី៩នៅលើពិភពលោក  ដែលធ្វើឲ្យប្រទេសនេះ កាន់តែមានភាពទាក់ទាញ ជាមួយនឹងជើងហោះហើរត្រង់អន្តរជាតិ កាន់តែច្រើនពីអឺរ៉ុប និងអាមេរិកខាងជើង។

ខណៈដែលអាកាសយានដ្ឋានដ៏ធំនេះ នឹងបើកដំណើរការឡើងនៅពេលអនាគត គេជឿជាក់ថា  វិស័យឧស្សាហកម្មដឹកជញ្ជូនទំនិញ របស់កម្ពុជា នឹងរីកចម្រើនយ៉ាងខ្លាំង ក្នុងរយៈពេលពី៥ទៅ១០ឆ្នាំខាងមុខ។

កម្ពុជាជាប្រទេស ដែលនិយាយភាសាអង់គ្លេសច្រើនជាងគេ នៅតំបន់អាស៊ី បន្ទាប់ពីសិង្ហបុរី និងម៉ាឡេស៊ី ដោយកត្តាភាសានេះ នឹងជំរុញភាពទាក់ទាញដល់វិស័យឧស្សាហកម្ម ទេសចរណ៍សម្រាប់អ្នកដំណើរ និងភ្ញៀវទេសចរអន្តរជាតិផងដែរ។

ប្រទេសកម្ពុជានៅតែមានសក្ដានុពលជាច្រើន ដែលមិនទាន់បានប្រើប្រាស់ក្នុងឧស្សាហកម្មផ្សេងៗទៀត ដោយវិនិយោគិនអាចស្វែងរកបាន និងមានកម្មសិទ្ធិ១០០ភាគរយនៃក្រុមហ៊ុន ដែលវិនិយោគក្នុងឧស្សាហកម្មទាំងនោះ។

លើសពីនេះ ស្ថិរភាពនយោបាយរបស់កម្ពុជា មានភាពល្អប្រសើរជាងប្រទេសថៃក្នុងរយៈពេលមធ្យម និងវែង ហើយកម្ពុជាមានសេដ្ឋកិច្ចមូលធននិយមបើកចំហរ និងពន្ធលើប្រាក់ចំណូលផ្ទាល់ខ្លួន និងពន្ធសាជីវកម្មទាបជាងប្រទេសវៀតណាម និងថៃផងដែរ៕

 ដោយៈ ស៊ីវ ម៉េង

       ភ្នំពេញៈ ថ្នាក់ដឹកនាំនៃក្រុមហ៊ុនOCICបានបញ្ជាក់ឲ្យដឹងថា រហូតមកទល់ពេលនេះ ការសាងសង់ស្ពានតភ្ជាប់ពីទីក្រុងកោះពេជ្រ ទៅកាន់ទីក្រុងរណបកោះនរា សម្រេចបានជាង៥០ភាគរយហើយ។

អគ្គនាយករងក្រុមហ៊ុនOCIC លោកទូច សំណាងបានមានប្រសាស​ន៍​ឲ្យដឹងតាមទូរស័ព្ទកាលពីរសៀលថ្ងៃទី១៤ ធ្នូថា រហូតមកទល់ពេលនេះ ហេដ្ឋារចនាសម្ព័ន្ឋចាំបាច់នានា នៅទីក្រុងកោះនរា សម្រេចបានតាមផែនកា​ររបស់ខ្លួន ដោយការវាយតម្លៃកាលពីពេលថ្មីៗនេះបានរកឃើញថា ស្ពានឆ្លងពីកោះពេជ្រ ទៅកោះនរាសម្រេចបាន៥២ភាគរយ។

លោកបន្តឲ្យដឹងទៀតថា ចំណែកគំរោងចាក់ខ្សាច់បំពេញទីក្រុងនេះ សម្រេចបានជាង៩០ភាគរយ និងគំរោងរៀបចំហេដ្ឋារចនាសម្ព័ន្ឋដូចជាបណ្តាញលូ បណ្តាញទឹកស្អាត និងបណ្តាញអគ្គិសនី សម្រេចបានជាង៥០ភាគរយផងដែរ។

លោកទូច សំណាងបានបន្តថា “ហេដ្ឋារចនាសម្ព័ន្ឋទាំងអស់នៅទីក្រុង​កោះនរា នឹងសម្រេចបានតាមផែនការដែលបានគ្រោងទុក ព្រោះការសាងសង់សម្រេចបានវឌ្ឍនភាពប្រសើរ”។ លោកបន្តថា “ក្នុងអំឡុងវិបត្តិកូវីដធ្ងន់ធ្ងរ ការសាងសង់មានភាពយឺតយ៉ាវ ប៉ុន្តែស្ថានភាពពេលនេះកំពុងមានភាពរលូន និងដំណើរការតាមការគ្រោងទុក”។

ទីក្រុងកោះនរា មានទំហំផ្ទៃដីសរុប១២៥ហិកតា ដែលទីក្រុងនេះត្រូវចាក់ខ្សាច់បំពេញ លើដីកោះទន្លេរដែលបានបាក់ ចូលក្នុងទន្លេមេគង្គនិងទន្លេរធំក្នុងអំឡុងទសវត្សរ៍នេះ។

ទស្សនទាននៃការអភិវឌ្ឍទីក្រុងកោះនរា នឹងមានសភាពដូចគ្នានឹងទីក្រុងកោះពេជ្រ ដែលបច្ចុប្បន្នកំពុងទាក់ទាញ គំរោងវិនិយោគរបស់អ្នកធុរកិច្ចជាតិ អន្តរជាតិយ៉ាងច្រើន៕

ដោយ: សុផារី

ភ្នំពេញ: គម្រោងផ្លូវនាវាចរណ៍ និងប្រព័ន្ធភស្តុភារកម្មតភ្ជាប់ពីទន្លេបាសាក់ ទៅកាន់សមុទ្រក្នុងខេត្តកែប គ្រោងនឹងបញ្ចប់ការសិក្សានៅចុងខែមករា ឆ្នាំ២០២៣ខាងមុខនេះហើយ ដើម្បីឈានទៅដាក់ជូនគណៈកម្មការអន្តរក្រសួងពិនិត្យ និងសម្រេចចុងក្រោយ។

នេះបើយោងតាមកិច្ចប្រជុំពិគ្រោះយោបល់ ដើម្បីពិនិត្យវឌ្ឍនភាព និងលទ្ធផល នៃការសិក្សាសមិទ្ធិលទ្ធភាពនៃគម្រោងនេះ នៅថ្ងៃទី១៤ ខែធ្នូ ឆ្នាំ២០២២។

គម្រោងផ្លូវនាវាចរណ៍ និងប្រព័ន្ធភស្តុភារកម្មទន្លេបាសាក់ បាននិងកំពុងសិក្សាលម្អិត ដោយក្រុមហ៊ុនសាជីវកម្មស្ពានថ្នល់ចិន(CRBC)  រួមជាមួយក្រុមហ៊ុន CCCC Water Transportation Consultants Co., Ltd។

រហូតមកដល់ពេលនេះគម្រោងផ្លូវនាវាចរណ៍ និងប្រព័ន្ធភស្តុភារកម្មទន្លេបាសាក់នេះ កំពុងស្ថិតនៅក្នុងដំណាក់កាលទី២ នៃការសិក្សាសមិទ្ធិលទ្ធភាព បន្ទាប់ពីទទួលបានចំណារឯកភាពដ៏ខ្ពង់ខ្ពស់ពី សម្តេចតេជោ នាយករដ្ឋមន្ត្រី កាលពីថ្ងៃទី៨ ខែមេសា ឆ្នាំ២០២២ កន្លងទៅ ហើយគ្រោងនឹងបញ្ចប់ការសិក្សានេះឱ្យបានរួចរាល់ និងគ្រប់ជ្រុងជ្រោយ នៅដំណាច់ខែមករា ឆ្នាំ២០២៣ ខាងមុខនេះ។

ភាគីទាំងពីរបានពិនិត្យ និងពិភាក្សាដោយយកចិត្តទុកដាក់លើការងារបច្ចេកទេសសំខាន់ៗមួយចំនួន រួមទាំងបានពិនិត្យដោយយកចិត្តទុកដាក់លើលទ្ធផលនៃការវិភាគ និងវាយតម្លៃផលប៉ះពាល់នានា លើគ្រប់ប្រភេទហេដ្ឋារចនាសម្ព័ន្ធរូបវ័ន្តមួយចំនួន ដែលអាចរងផលប៉ះពាល់ដោយសារការអភិវឌ្ឍនៃគម្រោងនេះ ។

អង្គប្រជុំក៏បានពិភាក្សា និងផ្តល់អនុសាសន៍ណែនាំលើ ប្លង់បច្ចេក​ទេ​សរួមមាន ប្លង់ស្ថាបត្យកម្ម ប្លង់គ្រឿងបង្គុំនៃការងារសាងសង់ ហេដ្ឋារចនាសម្ព័ន្ធតាមផ្លូវទឹក ការជ្រើសរើសស្តង់ដារនៃការសាងសង់ គន្លងផ្លូវនាវាចរណ៍ រួមនឹងសន្ទះផ្លូវនាវាចរណ៍ផងដែរ។

លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានផ្តល់អនុសាសន៍ ឱ្យក្រុមការងារបច្ចេកទេសទាំងពីរ បន្តខិតខំអនុវត្តការសិក្សាលម្អិតមួយចំនួន ដែលនៅសេសសល់ ឱ្យបានស៊ីជម្រៅគ្រប់ជ្រុងជ្រោយ ជាពិសេសត្រូវបញ្ចៀសកុំឱ្យមានការប៉ះពាល់ ទៅលើសំណង់វត្តអារាម និងសាលារៀនជាដាច់ខាត។

គម្រោងប្រព័ន្ធផ្លូវនាវាចរណ៍ និងប្រព័ន្ធភ័ស្តុភារកម្មទន្លេបាសាក់ ត្រូវបានសិក្សាឡើង ក្នុងគោលបំណងដើម្បីជំរុញវិស័យ ដឹកជញ្ជូនតាមផ្លូវទឹករបស់កម្ពុជាឱ្យមានសន្ទុះកើនឡើង មានប្រសិទ្ធភាពខ្ពស់ថែមមួយកម្រិតទៀត នឹងអាចជួយកាត់បន្ថយការចំណាយ លើថ្លៃដើមនៃការដឹកជញ្ជូន និងភស្តុភារកម្មរបស់កម្ពុជា ឱ្យកាន់តែមានប្រសិទ្ធភាព និងគុណភាពខ្ពស់ជាងមុន ក៏ដូចជាជួយកាត់បន្ថយសម្ពាធជាអតិបរមា នៃការដឹកជញ្ជូនធុនធ្ងន់តាមផ្លូវថ្នល់ ព្រមទាំងងាយស្រួលធ្វើសមាហរណកម្ម ផ្ទៃក្នុងប្រទេសជួយពង្រឹង និងពង្រីកការតភ្ជាប់ជាមួយតំបន់ និងអន្តរជាតិតាមរយៈការដឹកជញ្ជូ​នតាមផ្លូវទឹក ផ្លូវសមុទ្រ និងកំពង់ផែកានត់តែងាយស្រួល មានភាពរលូន និងមានប្រសិទ្ធភាពជាងមុនផងដែរ៕