ដោយ៖ សុផារី

ភ្នំពេញ៖ កត្តាទីផ្សារ និងសេដ្ឋកិច្ចពិភពលោកធ្លាក់ចុះដោយសារសង្គ្រាម និងវិបត្តិអតិផរណា ក្នុងរយៈពេលប៉ុន្មានខែចុងក្រោយនេះ បានជំរុញឱ្យតម្លៃភាគហ៊ុននានានៅក្នុងពិភពលោកកំពុងតែត្រូវបានជួញដូរក្នុងថ្លៃទាប។ អ្នកជំនាញលើកឡើងថា ពេលនេះជាឱកាសដ៏ល្អមួយ សម្រាប់វិនិយោគិនលើភាគហ៊ុន។

លោក ហុង សុហួរ ប្រតិភូរាជរដ្ឋាភិបាលទទួលបន្ទុកជាអគ្គនាយកផ្សារមូលបត្រកម្ពុជា មានប្រសាសន៍ថា នៅក្នុងថ្ងៃទី២៤ ខែតុលា ឆ្នាំ២០២២កន្លងមកថា ​​ទីផ្សារ​ភាគហ៊ុនកម្ពុជា ទទួលបានចំណាប់អារម្មណ៍ខ្លាំងជាងមុន ដោយមានសាធារណជនជាច្រើនបានមកសួរព័ត៌មាននៅតាមស្តង់នានា និងបើកគណនីជួញដូរភ្លាមៗ នៅក្នុងពិព័រណ៍​ ដោយខុសពីលើកមុនៗ ដែល​ត្រូវចេញទៅរកពួកគាត់។

លោកមានប្រសាសន៍ថា “ថ្លៃភាគហ៊ុនភាគច្រើននៅទីផ្សារបច្ចុប្បន្ន ស្ទើរទាំងអស់ កំពុងតែត្រូវបានជួញដូរក្នុងថ្លៃទាប ដូចនេះវិនិយោគិនរបស់យើងអាចទិញបានភាគហ៊ុនក្រុមហ៊ុនល្អៗ ក្នុងថ្លៃពិសេស ដែលនេះក៏មកពីកត្តាទីផ្សារ រួមផ្សុំជាមួយសេដ្ឋកិច្ចពិភពលោកធ្លាក់ចុះ ការមានសង្គ្រាម និងវិបត្តិអតិផរណាជាដើម”។

លោកអះអាងថា “នេះគឺជាឱកាសដ៏ល្អមួយសម្រាប់វិនិយោគិនទាំងអស់គ្នា ព្រោះថ្លៃភាគហ៊ុនអាចនឹងឡើងថ្លៃវិញខ្លាំងក្នុងពេលខាងមុខ ដូចខ្ញុំធ្លាប់បាននិយាយថា ទិញហ៊ុន ក៏នឹងអាចធ្វើឱ្យយើងក្លាយជាអ្នកមានបានដែរ”។

លោកបានបង្ហើបថា ជាលទ្ធផល ក្នុងរយៈពេលត្រឹមតែបីថ្ងៃ កាលពីសប្តាហ៍មុន ទទួលបានការស្នើសុំលេខអត្តសញ្ញាណវិនិយោគិនថ្មី និងបើកគណនីជួញដូរបានជាង២០០០គណនីថ្មី។ បើធៀបនឹងចំនួនបើកគណនីជួញដូរប្រចាំខែ ដែលមានប្រមាណជាង៣០០គណនីក្នុងមួយខែ ដូចនេះក្នុងរយៈពេល៣ថ្ងៃនេះ ​ការបើកគណនីថ្មី បានចំនួនប្រមាណស្មើនឹង៧ខែ។​

លោកបានបន្ថែមថា ផ្សារមូលបត្រកម្ពុជានឹងបន្តផ្សព្វផ្សាយ និងបណ្តុះបណ្តាលវិនិយោគិនថ្មីៗ ឱ្យយល់ច្បាស់ពីទីផ្សារ ដោយ​ផ្សារមូលបត្រកម្ពុជា នឹងមានវគ្គបណ្តុះបណ្តាលជារៀងរាល់ថ្ងៃសុក្រ ចាប់ពីម៉ោង២ ដល់៥រសៀល នៅអគារផ្សារមូលបត្រកម្ពុជា និងតាមប្រព័ន្ធអនឡាញ។ សាធារណជនរាប់រយនាក់នឹងមានឱកាសស្នើសុំបើកលេខអត្តសញ្ញាណវិនិយោគិនថ្មី និងបើកគណនីដោយឥតគិតថ្លៃផងដែរនៅក្នុងវគ្គបណ្តុះបណ្តាលនេះផងដែរ៕

ដោយ: លាងហួរ

បាងកក: គណៈរដ្ឋមន្ត្រីថៃ កាលពីថ្ងៃអង្គារម្សិលមិញនេះ បានឯកភាពអនុញ្ញាតឱ្យ ជនបរទេសទិញផ្ទះ និងដីរហូតដល់១៦០០ម៉ែត្រការេ ប្រសិនបើពួកគេអាចបោះទុនវិនិយោគយ៉ាងហោចណាស់៤០លានបាត (ប្រហែល១,០៥លានដុល្លារ)។

សេចក្តីណែនាំនេះគ្រោងចូលជាធរមាន សម្រាប់រយៈពេលប្រាំឆ្នាំ បន្ទាប់ពីវាត្រូវបានបោះពុម្ពនៅក្នុង Royal Gazette ដោយរដ្ឋាភិបាលថៃបាននិយាយថា “គួរតែឆាប់”។

សំណើ​នេះ​ត្រូវ​បាន​ក្រសួង​មហាផ្ទៃ​លើក​ឡើង ​កាល​ពី​ខែ​ឧសភា ក្នុង​គោល​បំណង​ទាក់ទាញ​ការ​វិនិយោគ​ពី​បរទេស និង​ទាក់ទាញជនបរទេស ​ដែល​មាន​ជំនាញ​ពិសេស ​មកកាន់​ប្រទេស​ថៃ។

យ៉ាង​ណា​ក៏ដោយ គណៈរដ្ឋមន្ត្រី​បាន​ចំណាយ​ពេល​រាប់​ខែ ​ដើម្បី​ថ្លឹងថ្លែង​សំណើ​នេះ និង​ស្តាប់​យោបល់​ពី​ស្ថាប័ន​ពាក់ព័ន្ធ​មួយ​ចំនួន។

សេចក្តីណែនាំដែលអនុញ្ញាតឱ្យជនបរទេសទិញដី និងផ្ទះមួយរ៉ៃនឹងអនុវត្តចំពោះជនបរទេស ដែលមានទ្រព្យសម្បត្តិ និវត្តជន ក្រុមអ្នកពនេចរជំនាញឌីជីថល  ដែលចង់មានមូលដ្ឋាននៅក្នុងប្រទេសថៃ និងអ្នកដែលមានជំនាញពិសេស។

ដើម្បីមានសិទ្ធិទិញផ្ទះនិងដីធ្លី ពលរដ្ឋបរទេសនឹងត្រូវតម្រូវឱ្យវិនិយោគយ៉ាងតិច៤០លានបាតក្នុងប្រទេសថៃ ហើយអាចបន្តវិនិយោគរយៈពេលយ៉ាងតិច៣ឆ្នាំ ដោយចាប់ផ្តើមពីថ្ងៃ ដែលពួកគេដាក់ពាក្យស្នើសុំទិញ។ ជនបរទេស ដែលស្នើសុំការអនុញ្ញាតទិញដី ឬផ្ទះ ត្រូវតែមានវិញ្ញាបនបត្របញ្ជាក់ពីការវិនិយោគរបស់ពួកគេ។

តាមរយៈសេចក្តីណែនាំបានបង្ហាញថា ជនបរទេសអាចទិញដី ឬផ្ទះនៅក្នុងទីក្រុងបាងកក ប៉ាតាយ៉ា  ឬតំបន់ផ្សេងទៀត ប៉ុន្តែពួកគេមិនអាចទិញដី ក្នុងតំបន់យោធាបានទេ៕

ដោយ៖ សុផារី

ភ្នំពេញ៖ លោកបណ្ឌិត ហ៊ុន ម៉ាណែត បានចែករំលែកមេរៀនដ៏ល្អមួយ ដើម្បីឈានទៅកាន់ភាពជោគជ័យ ដែលលោកបណ្ឌិតបានរៀនសូត្រពីឪពុករបស់លោក គឺសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា។

លោកបណ្ឌិត ហ៊ុន ម៉ាណែត បានថ្លែងតាមរយៈវីដេអូ លើទំព័រហ្វេសប៊ុករបស់លោកបណ្ឌិតថា ទម្លាប់ក្នុងការនាំឱ្យជោគជ័យមានច្រើន តែក្នុងនោះទម្លាប់ទី១ ត្រូវធ្វើការឲ្យល្អ ម៉ត់ចត់ ច្បាស់លាស់ ព្យាយាម អំណត់ មិនថាការងារតូច ឬការងារធំ ក្នុងឋានៈតូច ឬក្នុងឋានៈធំទេ ដាក់ការងារអ្វី ធ្វើឱ្យល្អ កុំចាំថាខ្លួនមានសញ្ញាបត្រអនុបណ្ឌិត ទាល់តែធ្វើមេគេ ទើបអាចបញ្ចេញស្នាដៃ គឺអត់បានការទេ។

លោកបណ្ឌិត បានបញ្ជាក់ថា “កាលមុនខ្ញុំទៅអាមេរិក VOA គេសួរខ្ញុំថា អ្នកណាជា Role Model របស់អ្នកឯង ខ្ញុំប្រាប់ថា ឪខ្ញុំ មិនមែនដោយសារគាត់ជានាយករដ្ឋមន្ត្រីទេ ប៉ុន្តែគាត់តស៊ូគ្រប់ពេល តាំងពីគាត់ធ្វើជាក្មេងវត្តក៏គាត់ប្រឹង គាត់ជាកូនទាហានគេ ក៏គាត់ខំប្រឹង ហើយគាត់ធ្វើការពេលនោះ មិនមែនរំពឹងដើម្បីបានធ្វើជានាយករដ្ឋមន្ត្រីទេ គឺធ្វើដើម្បីឲ្យបានជោគជ័យ នូវអ្វីដែលគាត់ធ្វើ”។

លោកបណ្ឌិត បានបន្តថា “មិនមែនខ្ញុំថា Role Model របស់ខ្ញុំទាល់តែអ្នកធំ អត់ទេ គាត់អ្នកស្ទឹងត្រង់ គាត់តស៊ូអ្វីដែលគាត់ធ្វើ តាំងពីកូនទាហានរហូតដល់ឡើងមេទាហាន រហូតដល់រដ្ឋមន្ត្រីការបរទេស រហូតដល់ធ្វើនាយករដ្ឋមន្ត្រី គឺគាត់ខិតខំគ្រប់បែបយ៉ាង នៅពេលមានភារកិច្ចឲ្យគាត់ ហើយបើគាត់មិនខំបំពេញភារកិច្ច ក្នុងពេលតូចទេ ក៏ថ្នាក់លើមិនអាចវាយតម្លៃឲ្យគាត់ឡើងដែរ”៕

ដោយ:លាងហួរ
ភ្នំពេញ:ប្រទេសកម្ពុជា និងសិង្ហបុរីបានចុះហត្ថលេខាលើអនុស្សរណៈយោគយល់គ្នា (MoU) កាលពីថ្ងៃអង្គារម្សិលមិញនេះ ស្តីពីកិច្ចសហប្រតិបត្តិការថាមពលស្អាត។

កិច្ច​ព្រម​ព្រៀង​នេះ​ត្រូវ​បាន​ចុះ​ហត្ថលេខា​តាម​រយៈ​វីដេអូ​តំណភ្ជាប់​រវាង​រដ្ឋមន្ត្រី​ក្រសួង​រ៉ែ និង​ថាមពល​កម្ពុជា លោក ស៊ុយ សែម និង​រដ្ឋមន្ត្រី​ក្រសួង​ថាមពល​សិង្ហបុរី និង​រដ្ឋមន្ត្រី​ក្រសួង​ពាណិជ្ជកម្ម និង​ឧស្សាហកម្ម​ទី២លោក Tan See Leng។

លោក ស៊ុយ សែម បានមានប្រសាសន៍ថាអនុស្សរណៈយោគយល់គ្នានេះ គឺជាជំហានដ៏សំខាន់មួយ ដើម្បីអភិវឌ្ឍបន្ថែមទៀតលើវិស័យថាមពលនៅក្នុងប្រទេស និងក្នុងតំបន់។

អ្នកនាំពាក្យក្រសួងរ៉ែ និងថាមពល និងជាអគ្គនាយកថាមពល លោក ហេង គុនលាង មានប្រសាសន៍ថា ប្រទេសទាំងពីរបានប្តេជ្ញាផ្លាស់ប្តូរឆ្ពោះទៅរកប្រភពថាមពលស្អាតជាងមុន។

លោកបានប្រាប់អ្នកយកសារព័ត៌មានថា អនុស្សរណៈយោគយល់គ្នានេះ មានអត្ថប្រយោជន៍ និងជាជំហានឆ្ពោះទៅរកការសម្រេចបាននូវចក្ខុវិស័យបណ្តាញថាមពលអាស៊ានដ៏ទូលំទូលាយ និងដើម្បីបង្កើនការតភ្ជាប់គ្នាទៅវិញទៅមកនូវ សន្តិសុខថាមពល និងនិរន្តរភាពនៅក្នុងតំបន់៕

សុខុម

អន្តរជាតិ: តើស្ថានភាពសេដ្ឋកិច្ចនៃប្រទេសរុស្ស៊ី ក្រោមការហ៊ុមព័ទ្ធជុំទិសពីសំណាក់លោកខាងលិច និងបណ្ដាប្រទេសជាសម្ព័ន្ធមិត្តទៅជាយ៉ាងណាហើយនៅពេលនេះ ហើយប្រទេសណាខ្លះដែលនៅតែជាដៃគូសេដ្ឋកិច្ចធំបំផុតរបស់រុស្ស៊ី។

យោងតាមឆានែលទូរទស្សន៍ YouTube មានឈ្មោះថា FREEVESTING បានទម្លាយឱ្យកាលពីថ្ងៃសៅរ៍ ទី២២ ខែតុលា ឱ្យដឹងថា ពេលនេះបុរសខ្លាំងរបស់រុស្ស៊ី ពោលគឺប្រធានាធិបតី វ្ល៉ាឌីមៀ ពូទីន កំពុងតែភ័យស្លន់ស្លោ ខណៈក្រុមអ្នកជំនាញមើលឃើញថា សេដ្ឋកិច្ចរបស់រុស្ស៊ី អាចនឹងឈានដល់ការដួលរលំទាំងស្រុងនៅពេលដ៏ខ្លីខាងមុខនេះ។

គិតមកត្រឹមថ្ងៃពុធ ទី២៦ ខែតុលា នេះ វាមានរយៈពេល៩ខែ និង២ថ្ងៃហើយចាប់តាំងពីប្រទេសរុស្ស៊ី​ បានចាប់ផ្ដើមបញ្ឆេះ​សង្គ្រាមចូលឈ្លានពានប្រទេសអ៊ុយក្រែន នៅថ្ងៃទី២៤ ខែកុម្ភៈ ដើម​ឆ្នាំ២០២២ ជាមួយនឹងការបញ្ជូនទ័ពប្រមាណ១៥០.០០០ម៉ឺននាក់។

ទង្វើឈ្លានពានដ៏គឃ្លើនទៅ​លើ​ប្រទេសអ៊ុយក្រែន នេះ​បាន​ទទួល​រងការ​ថ្កោលទោសពេញពិភពលោក ជាពិសេសសហរដ្ឋអាមេរិក និងបណ្ដាសម្ព័ន្ធមិត្តរបស់សហរដ្ឋអាមេរិក ទាំងនៅអឺរ៉ុប និងអាស៊ី ដែលបានដាក់ទណ្ឌកម្មសេដ្ឋកិច្ចភ្លាមៗ និងធ្ងន់ធ្ងរយ៉ាងសម្បើមមិនធ្លាប់មានជាប្រវត្តិសាស្ត្រទៅលើរុស្ស៊ី។

ទណ្ឌកម្មនានាគឺធ្វើឡើងក្នុងគោលបំណងធ្វើឱ្យសេដ្ឋកិច្ចរបស់រុស្ស៊ី ដួលរលំតាមរយៈការតម្រង់គោលដៅទៅរកប្រេង ឧស្ម័នហ្គាស និងឧស្សាហកម្មធ្យូងថ្ម។

ក្រុមអ្នកជំនាញមើលឃើញថា ប្រសិនបើលោក ពូទីន នៅតែបន្តធ្វើសង្គ្រាមក្នុងប្រទេសអ៊ុយក្រែន តទៅទៀតនោះសេដ្ឋកិច្ចរបស់រុស្សី នឹងទទួលរងផលប៉ះពាល់កាន់តែធ្ងន់ធ្ងរហួសការស្មាន។

ជាការពិតណាស់ ក្រុមអ្នកជំនាញព្យាករថា សេដ្ឋកិច្ចរបស់រុស្ស៊ី អាចនឹងដួលរលំក្នុងពេលដ៏ខ្លីខាងមុខ ហើយផលទុនជាតិសរុប (GDP) របស់ប្រទេសនេះនឹងដាំក្បាលចុះខ្លាំង។

រយៈពេល៦ខែនៃទណ្ឌកម្មរបស់លោកខាងលិច និងការបង្កកទ្រព្យសម្បត្តិនានាជាបន្តបន្ទាប់ បានធ្វើឱ្យសេដ្ឋកិច្ចរបស់រុស្សី រីងស្ងួត ហើយទណ្ឌកម្មបន្ថែមទៀតនឹងត្រូវដាក់បន្ថែមនៅខែធ្នូ ចុងឆ្នាំ២០២២ នេះ។

ស្ថិតក្នុងស្ថានភាពដ៏គ្រោះថ្នាក់បែបនេះ វាមិនត្រឹមតែមិនល្អសម្រាប់លោក ពូទីន ប៉ុណ្ណោះទេ ពោលគឺសេដ្ឋកិច្ចរបស់រុស្ស៊ី គឺអាចនឹងដួលរលំទាំងស្រុងតែម្ដង។

ទន្ទឹមនេះ ដៃគូសេដ្ឋកិច្ចដ៏ធំបំផុតរបស់រុស្ស៊ី ក្រោយទទួលរងទណ្ឌកម្មពីលោកខាងលិច និងបណ្ដាសម្ព័ន្ធមិត្តគឺមានតែ២ប្រទេសប៉ុណ្ណោះ គឺប្រទេសចិន និងប្រទេសឥណ្ឌា៕ FREEVESTING៕

ដោយៈ សុខុម

ប៉េកាំង: មហាយក្សចិន បានប្រកាសពីថ្ងៃអង្គារ ទី២៥ ខែតុលា ថា ខ្លួននឹងលើកកម្ពស់ការវិនិយោគរបស់បរទេស ដោយផ្តោតលើឧស្សាហកម្មផលិតកម្ម បន្ទាប់ពីប្រធានាធិបតីចិន លោក ស៊ី ជីនភីង អំឡុងសមាជបក្សកុម្មុយនីស្តចិន ដែលបានបញ្ចប់កាលពីចុងសប្តាហ៍កន្លងទៅ បានអំពាវនាវឱ្យប្រឹងប្រែងធ្វើយ៉ាងណា “យកឈ្នះសមរភូមិ” ផ្នែកបច្ចេកវិទ្យាស្នូលសំខាន់ៗ។

គណៈកម្មាធិការជាតិអភិវឌ្ឍន៍ និងកំណែទម្រង់ (National Development and Reform Commission) ដែលជាទីភ្នាក់ងារផែន​ការដ៏មានឥទ្ធិពលរបស់ប្រទេសចិន បានចេញសេចក្តីថ្លែងការណ៍បង្ហោះលើគេហទំព័ររបស់ខ្លួនថា ប្រទេសចិន នឹងជំរុញលើកទឹកចិត្តក្រុមហ៊ុនសហគ្រាសបរទេសនានា ឱ្យវិនិយោគលើឧបករណ៍ និងគ្រឿងបង្គុំបច្ចេកវិទ្យាខ្ពស់។

សេចក្តីថ្លែងការណ៍ដដែលបញ្ជាក់ថា ប្រទេសចិន ក៏នឹងពង្រឹងការជួយគាំទ្រផ្នែកហិរញ្ញវត្ថុ សម្រាប់បណ្ដាក្រុមហ៊ុនសហគ្រាសបរទេស រួមទាំងការប្រមូលដើមទុន តាមរយៈការចុះបញ្ជីនលើទីផ្សារភាគហ៊ុន របស់ប្រទេសចិន ផងដែរ។

សេដ្ឋកិច្ចរបស់ប្រទេសចិន សម្រេចបានកំណើន៣,៩%ក្នុងត្រីមាសខែទី៣ បើធៀបនឹងឆ្នាំមុន ដោយស្ទុះងើបឡើងលឿនជាងការរំពឹងទុក ទោះ​បីជាទស្សនវិស័យសេដ្ឋកិច្ចអាប់អួរ ដោយសារវិធានការដ៏តឹងរ៉ឹងនៅក្នុងការទប់ស្កាត់កូវីដ-១៩ ការដាំក្បាលចុះរយៈពេលវែង នៃវិស័យអចលនទ្រព្យចិន និងការធ្លាក់ចុះនៃសេដ្ឋកិច្ចពិភពលោកក្ដី។

តាមរយៈសេចក្តីថ្លែងការណ៍ដដែលនេះ គណៈកម្មាធិការជាតិអភិវឌ្ឍន៍ និងកំណែទម្រង់របស់ចិន ក៏បានសន្យាផ្ដល់ការគាំទ្រដល់បណ្ដាក្រុមហ៊ុនសហគ្រាសបរទេស ដែលបញ្ជូនបុគ្គលិករបស់ខ្លួនមកកាន់ប្រទេសចិន ផងដែរ។

គណៈកម្មាធិការនេះលើកឡើងថា “ប្រទេសចិន នឹងជួយសម្រួលការចេញចូលប្រទេសចិន ពីសំណាក់នាយកប្រតិបត្តិ នៃបណ្ដាក្រុមហ៊ុនពហុជាតិសាសន៍ ក្រុមអ្នកបច្ចេកទេស និងក្រុមគ្រួសាររបស់ពួកគេក្រោមការទប់ស្កាត់ និងគ្រប់គ្រងវិបត្តិកូវីដ-១៩”៕ Reuters៕