ដោយ៖ សុផារី

ភ្នំពេញ៖ លោក ម៉េង សក្តិធារ៉ា រដ្ឋលេខាធិការក្រសួងរ៉ែ និងថាមពល បានមានប្រសាសន៍ថា ក្រសួងកំពុងចរចារជាមួយភាគីពាក់ព័ន្ធករណីប្រេងជិង៣០ម៉ឺនបារ៉ែលដែលបានបាត់ ហើយគ្រោងរាយការណ៍ជូនសម្តេចតេជោ ដើម្បីស្នើសុំការឯកភាព ដោយក្នុងនោះកម្ពុជាទាមទារ៧០ភាគរយនៃប្រេងទាំងអស់ ដោយបូកបន្ថែមប្រាក់តម្កល់៥លានដុល្លាររបស់ក្រុមហ៊ុន KrisEnergy។

លោក ម៉េង សក្តិធារ៉ា បានលើកឡើងនៅក្នុងសន្និសីទសារព័ត៌មាន ស្តីពី “សមិទ្ធផលសម្រេចបានរយៈពេល៥ឆ្នាំកន្លងមក របស់ក្រសួងរ៉ែ និងថាមពល” នៅថ្ងៃទី៩ ខែសីហា ឆ្នាំ២០២២នេះ។

លោកលើកឡើងថា ការងាររបស់រាជរដ្ឋាភិបាលកម្ពុជា បានខិតខំធ្វើការចរចាយ៉ាងសកម្មជាមួយភាគីម្ចាស់កប៉ាល់ MT Strovolos ដែលផ្ទុកប្រេង និងម្ចាស់បំណុលធំរបស់ក្រុមហ៊ុន KrisEnergy ដោយទទួលបានលទ្ធផលល្អ ដែលក្រសួងនឹងឆ្លងគោលការណ៍សម្រេចដ៏ខ្ពង់ខ្ពស់ពីសម្តេចតេជោ ហ៊ុន សែន ដើម្បីអាចឈានទៅបញ្ចប់ និងចុះហត្ថលេខាលើកិច្ចព្រមព្រៀងលក់ប្រេងឆៅក្នុងកប៉ាល់ជិត៣០ម៉ឺននោះក្នុងពេលឆាប់ៗ អាចនៅក្នុងដំណាច់ខែកញ្ញា ឆ្នាំ២០២២។

លោកបញ្ជាក់បន្ថែមថា “ក្រៅពីវិធានការច្បាប់ ដែលយើងបានអនុវត្តន៍កន្លងមក យើងបានចរចាឡើងវិញ អំពីការបែងចែកផលប្រយោជន៍ គឺប្រេងជិង៣០ម៉ឺនបារ៉ែលនោះ ត្រូវបានចែងចែកឲ្យម្ចាស់បំណុល [ម្ចាស់បំណុលក្រុមហ៊ុន KrisEnergy ខ្លះ ត្រូវបែងចែកឲ្យម្ចាស់កប៉ាល់ខ្លះ ដើម្បីទូទាត់ថ្លៃកប៉ាល់ដែលគេបានជួល ហើយដល់ប៉ុន្មានមកឲ្យយើង”។

លោកបានបន្តថា “ការចរចានេះជាការតស៊ូវែងឆ្ងាយ ដើម្បីធ្វើយ៉ាងណាឲ្យយើងទទួលបានផលប្រយោជន៍ច្រើន។ លទ្ធផលនៃការចរចានេះ យើងនឹងរាយការណ៍ជូនសម្តេចតេជោ ដើម្បីស្នើសុំការឯកភាព ប៉ុន្តែយើងទាមទារបានជារួម គឺ៧០ភាគរយនៃប្រេងទាំងអស់ ហើយ២៦ភាគរយ សម្រាប់ទូទាត់ទៅឲ្យថ្លៃកប៉ាល់ និង៤ភាគរយសម្រាប់ម្ចាស់បំណុលក្រុមហ៊ុន KrisEnergy ដែលក្ស័យធនទៅហើយនោះ”។

បើយោងតាមលោក ម៉េង សក្តិធារ៉ា តាមរយៈលទ្ធផលនេះ បើប្រៀបធៀបទៅនឹងអ្វីដែលគួរបានពីមុនកម្ពុជានឹងទទួលបានច្រើនជាងមុន ដោយសារថ្លៃប្រេងបច្ចុប្បន្នេះ បានកើនឡើងពី៥០ដុល្លារក្នុង១បារ៉ែល មកដល់ជិត១០០ដុល្លារក្នុង១បារ៉ែល ដោយតម្លៃប្រេងឡើងច្រើន នោះនឹងទទួលបានលុយច្រើនដែរ ហើយ៧០ភាគរយនេះ បូកបន្ថែមជាមួយប្រាក់តម្កល់៥លានដុល្លាររបស់ក្រុមហ៊ុន KrisEnergy ផងដែរ៕

ដោយ៖ សុផារី

ព្រះវិហារ៖ ក្រុមហ៊ុនធំមួយទៀត បន្ទាប់ពីក្រុមហ៊ុន KrisEnergy របស់សិង្ហបុរី  បានចាប់ផ្តើមសាកល្បងផលិតមាសរបស់ខ្លួន ផលិតបាន២០គីឡូក្រាម ដោយផលិតជាដុំ ក្នុង១ដុំមួយគីឡូ នៅស្រុករវៀង ខេត្តព្រះវិហារ។

ក្នុងសន្និសីទសារព័ត៌មានស្តីពី “សមិទ្ធផលសម្រេចបានរយៈពេល៥ឆ្នាំ របស់ក្រសួងរ៉ែ និងថាមពល” នៅថ្ងៃទី០៩ ខែសីហា ឆ្នាំ២០២២ លោក អ៊ឹង ឌីប៊ូឡា អគ្គនាយកនៃអគ្គនាយកដ្ឋានធនធានរ៉ែ នៃក្រសួងរ៉ែ និងថាមពល បានឱ្យដឹងថា ក្រុមហ៊ុនទី២នេះ ឈ្មោះថា “ឌែលខម” ជាក្រុមហ៊ុនធុនមធ្យម ដោយផែនការក្នុងឆ្នាំដំបូង នៃគម្រោងផែនការអាជីវកម្ម គ្រោងផលិត៣៤០គីឡូក្នុងមួយឆ្នាំ។

តាមរយៈអាជីវកម្មនេះ បើគិតជាសួយសារចូលរដ្ឋ ប្រហែលជាជិត៦០ម៉ឺនដុល្លារក្នុងមួយឆ្នាំ ដោយក្រុមហ៊ុននេះកំពុងធ្វើអាជីវកម្មនៅស្រុករវៀង ខេត្តព្រះវិហារ។ កាលពីថ្ងៃទី៤ ខែសីហាប៉ុន្មានថ្ងៃមុននេះ គឺមានក្រុមហ៊ុនឌែលខម (Delcom Cambodia) បានចាប់ផ្តើមសាកល្បងផលិតមាសរបស់ខ្លួន ផលិតបាន២០គីឡូក្រាម ដោយផលិតជាដុំ ក្នុង១ដុំមួយគីឡូ។

ក្រុមហ៊ុនឌែលខម ជាក្រុមហ៊ុនធុនមធ្យម ដោយផែនការក្នុងឆ្នាំដំបូង នៃគម្រោងផែនការអាជីវកម្ម គ្រោងផលិត៣៤០គីឡូក្នុងមួយឆ្នាំ។ បើគិតជាសួយសារចូលរដ្ឋ ប្រហែលជាជិត៦០ម៉ឺនដុល្លារក្នុងមួយឆ្នាំ។ ក្រុមហ៊ុននេះកំពុងធ្វើអាជីវកម្មនៅស្រុករវៀង ខេត្តព្រះវិហារ។

យោងតាមលោក អ៊ឹង ឌីប៊ូឡា មានក្រុមហ៊ុនចំនួន៧ ដែលបានទទួលអាជ្ញាប័ណ្ណអាជីវកម្ម ដើម្បីផលិតរ៉ែមាស ពីក្រសួងរ៉ែ និងថាមពល។

លោកបន្ថែមថា បច្ចុប្បន្ននេះ កម្ពុជាមិនទាន់មានអាជីវកម្មរ៉ែមាស នៅខេត្តរតនគិរីទេ គឺមានតែអាជ្ញាប័ណ្ណស្វែងរុករករ៉ែមាសចំនួន៣ ក្នុងនោះចំនួន២ គឺក្រុមហ៊ុនមកពីកាណាដា Angkor Gold និងមួយទៀតនោះ ក្រុមហ៊ុនមកពីប្រទេសចិន៕

ដោយ:លាងហួរ

បាងកក: អ្នកធុរកិច្ចថៃបានកំណត់ទិសដៅ លើការពង្រីកពាណិជ្ជកម្ម និងការវិនិយោគនៅក្នុងប្រទេសកម្ពុជា ជាពិសេសក្នុងវិស័យម្ហូបអាហារកែច្នៃ កសិកម្ម ទេសចរណ៍ ថាមពលកកើតឡើងវិញ ប្លាស្ទិក ត្បូង និងគ្រឿងអលង្ការ។

យោងតាមលោក Sanan Angubolkul ប្រធានសភាពាណិជ្ជកម្មថៃ និងក្រុមប្រឹក្សាភិបាលពាណិជ្ជកម្មថៃ បានឱ្យដឹងថា កម្ពុជាកំពុងសម្រេចបានកំណើនសេដ្ឋកិច្ច ជាមធ្យមពី៧ទៅ៨ភាគរយក្នុងមួយឆ្នាំ ដោយសារប្រទេសនេះ បើកចំហសម្រាប់ការវិនិយោគផ្ទាល់ពីបរទេស។

ប្រទេសកម្ពុជាបាននឹងកំពុងព្យាយាម អភិវឌ្ឍវិស័យទេសចរណ៍ និងកសិកម្ម ប៉ុន្តែប្រទេសនេះនៅខ្វះចំណេះដឹងគ្រប់គ្រាន់ និងបច្ចេកវិទ្យាទំនើប ជាពិសេសផ្នែកស្តុកទុក និងកែច្នៃ។

លោក Sanan បានមានប្រសាសន៍ថា នេះផ្តល់ឱកាសដ៏ល្អសម្រាប់អ្នកធុរកិច្ចថៃ ក្នុងការបង្កើតការវិនិយោគរួមគ្នា ជាមួយសមភាគីកម្ពុជាក្នុងវិស័យជាច្រើន ដូចជា អាហារកែច្នៃ កសិកម្ម ទេសចរណ៍ ថាមពលកកើតឡើងវិញ ប្លាស្ទីក វិស័យសេវាកម្ម ក៏ដូចជាត្បូង និងគ្រឿងអលង្ការដែល ពាណិជ្ជករ ថៃ ជាង៦០នាក់បានមកទស្សនកិច្ចនៅកម្ពុជា កាលពីថ្ងៃទី ៤-៥ ខែ សីហា។

យោងតាមលោក Sananបានឱ្យដឹងថា គណៈប្រតិភូធុរកិច្ចថៃក៏បានជួបជាមួយរដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍របស់កម្ពុជា លោកចម ប្រសិទ្ធ ហើយភាគីថៃក៏បានជំរុញរដ្ឋាភិបាល កម្ពុជា ឱ្យ ជួយ ដោះស្រាយឧបសគ្គ ក្នុងការសម្របសម្រួលពាណិជ្ជកម្ម ក្នុង លក្ខខណ្ឌ នៃច្បាប់និងបទប្បញ្ញត្តិ ដែលមិនប្រក្រតី ដើម្បីទាក់ទាញការវិនិយោគ ពីបរទេសឱ្យបានកាន់តែច្រើន ៕

ដោយៈ សុខុម

ញូវយ៉ក: មន្ត្រីអាមេរិក បានប្រកាសកាលពីថ្ងៃច័ន្ទ ទី៨ ខែសីហា ថា សហរដ្ឋអាមេរិក នឹងប្រគល់វត្ថុបុរាណ ដែលអាយុកាលជាង១.០០០ឆ្នាំ មានតម្លៃមិនអាចកាត់ថ្លៃបាន ចំនួន៣០ដែលចោរលួចមកឱ្យកម្ពុជាវិញ។

យោងតាមសារព័ត៌មានថៃ The Nation ដែលចុះផ្សាយនៅថ្ងៃអង្គារ ទី៩ ខែសីហា នេះឱ្យដឹងថា វត្ថុបុរាណទាំងនោះ រួមមានទាំងពុទ្ធប្បដិមាសំរឹទ្ធិ និងបដិមាអាទិទេព ក្នុងលទ្ធិព្រហ្មញ្ញសាសនា ដែលឆ្លាក់ពីថ្មផងដែរ។

ទីតាំងបុរាណវត្ថុនានារបស់កម្ពុជា រួមទាំងទាំងប្រាសាទកោះកេរ ដែលជាអតីតរាជធានីនៃអាណាចក្រខ្មែរ នាសម័យបុរាណផង បានទទួលរងការលួចប្លន់ យ៉ាងផុសផុលគួរឱ្យសោកស្ដាយបំផុត អំឡុងសង្គ្រាមស៊ីវិលចន្លោះពីទសវត្សរ៍ឆ្នាំ១៩៦០ ដល់ទសវត្សរ៍ឆ្នាំ១៩៩០។

ចាប់តាំងពីពេលនោះមក រាជរដ្ឋាភិបាលកម្ពុជា បានខិតខំស្វះស្វែងយ៉ាងខ្លាំង ធ្វើយ៉ាងណាឱ្យវត្ថុបុរាណទាំងនោះ​ ដែលចោរលួចយកទៅលក់នៅលើទីផ្សារអន្តរជាតិ បញ្ជូនមកឱ្យកម្ពុជាវិញ។

លោក Damian Williams រដ្ឋអាជ្ញាសហព័ន្ធកំពូលនៅសង្កាត់ Manhattan ក្នុងទីក្រុងញូវយ៉ក សហរដ្ឋអាមេរិក បានបញ្ជាក់ថា វត្ថុបុរាណទាំងនេះ ត្រូវបានលក់ទៅឱ្យអ្នកទិញ នៅលោកខាងលិច ដោយឈ្មួញវត្ថុបុរាណម្នាក់នៅទីក្រុងបាងកក ប្រទេសថៃ ឈ្មោះ Douglas Latchford ដែលបានក្លែងឯកសារ ដើម្បីលាក់បាំងការពិតកុំឱ្យគេដឹងថា វត្ថុបុរាណទាំងនោះត្រូវបានគេលួច និងរត់ពន្ធដោយខុសច្បាប់។

ក្នុងពិធីប្រកាសប្រគល់វត្ថុបុរាណទាំងនេះមកឱ្យកម្ពុជា វិញនៅ Manhattan លោក Damian Williams បានលើកឡើងថា “រូបចម្លាក់ និងវត្ថុបុរាណទាំងនេះ មានអាយុកាលចាប់ពីសម័យសំរឹទ្ធិ រហូតដល់សតវត្សទី១២ គឺជាតម្លៃវប្បធម៌ដ៏អស្ចារ្យសម្រាប់ប្រជាជនកម្ពុជា”៕ Reuters៕