ក្រសួងដែនដីផ្តល់វិញ្ញាបនបត្រដល់អាជីវកម្មសំណង់បានចំនួន៣៦៦ក្រុមហ៊ុនក្នុងរយៈពេល៩ខែនៃឆ្នាំនេះ

ដោយ វុត្ថា

ភ្នំពេញៈ ក្រសួងរៀបចំដែនដី នគរូបនីយកម្ម និងសំណង់បានចេញវិញ្ញាបនបត្រប្រកបអាជីវកម្មសិក្សាគម្រោងប្លង់ និងសាងសង់បានចំនួនសរុប៣៦៦ក្រុមហ៊ុន ក្នុងរយៈពេល ៩ ខែនៃឆ្នាំ ២០១៩នេះ កើនឡើង១២០ ក្រុមហ៊ុនស្មើនឹងនឹងកំនើន៤៨,៧៨%ធៀបរយៈពេលដូចគ្នាកាលពីឆ្នាំមុន។

យោងតាមរបាយការណ៍របស់ក្រសួងដដែល ដែលគេហទំព័រ propertyarea.asia ទទួលកាលពីកន្លងមកថ្មីៗនេះបានឱ្យដឹងថា ក្នុងចំណោមក្រុមហ៊ុនទាំងនោះ ក្រសួងបានចុះបញ្ជីក្រុមហ៊ុនក្នុងស្រុកមានចំនួន១៩១ក្រុមហ៊ុន ដែលមានក្រុមហ៊ុនសាងសង់ចំនួន ១៨១ ក្រុមហ៊ុន និងក្រុមហ៊ុនសិក្សាគម្រោងប្លង់ចំនួន១០ក្រុមហ៊ុន។

របាយការណ៍ដដែលបញ្ជាក់ទៀតថា ដោយឡែកក្រសួង ក៏បានចុះបញ្ជីក្រុមហ៊ុនបរទេសចំនួន១៧៥ក្រុមហ៊ុន ដែលមានក្រុមហ៊ុនសាងសង់ចំនួន១៦៧ក្រុមហ៊ុន និងក្រុមហ៊ុនសិក្សាគម្រោងប្លង់ចំនួន៨ក្រុមហ៊ុន។

បើគិតចាប់តាំងពីឆ្នាំ ២០០០ ដល់ខែកញ្ញា ឆ្នាំ ២០១៩ ក្រសួងរៀបចំដែនដីនគរូបនីយកម្ម និងសំណង់ បានចុះបញ្ជីក្រុមហ៊ុនប្រកបអាជីវកម្មសិក្សាគម្រោងប្លង់ និងសាងសង់បានចំនួន២៥១៧ ក្រុមហ៊ុន ប៉ុន្តែក្រុមហ៊ុនដែលនៅមានសុពលភាពបច្ចុប្បន្ន មានតែចំនួន១០២៧ ក្រុមហ៊ុនបុណ្ណោះ។

យោងតាមសេចក្តីជូនដំណឹងរបស់ក្រសួងរៀបចំដែនដី ចុះកាលពីថ្ងៃទី ៤ខែកក្កដា ឆ្នាំ ២០១៩កាលពីកន្លងមកនេះបានឱ្យដឹងថា ក្រុមហ៊ុនប្រកបអាជីវកម្មសាងសង់ និងក្រុមជាងសំណង់ ដែលទទួលវិញ្ញាបនបត្រត្រូវបំពេញកាតព្វកិច្ច និងលក្ខខណ្ឌចម្បងៗដូចជា ត្រូវមានការិយាល័យការងារ ឃ្លាំងផ្ទុកសម្ភារៈ ជម្រកកម្មករ គ្រឿងចក្រ សកម្មភាពសាងសង់ ត្រូវរៀបចំ និងប្រព្រឹត្តិទៅក្នុងរបងហ៊ុមព័ន្ធនៃការដ្ឋាន ឬការដ្ឋានរណប ឬទីកន្លែងដែលធានាបានសណ្តាប់ធ្នាប់ និងសន្តិសុខសាធារណៈ ដោយមិនត្រូវឲ្យស្នាក់នៅក្នុងអាគារដែលកំពុងសាងសង់ឡើយ។

កម្ពុជាបានទាក់ទាញទុនវិនិយោគ ក្នុងវិស័យសំណង់ក្នុងរយៈពេល៩ខែឆ្នាំ២០១៩នេះ មានចំនួនជាង៦៤៩៤ លានដុល្លារអាមេរិក កើនឡើងប្រមាណ៣៤,៧៣ ភាគរយ បើធៀបរយៈពេលដូចគ្នាកាលពីឆ្នាំមុន៕

លោកង៉ែត ជូ បង្ហាញពីរបៀបបែបផែនរកលុយតាមសម័យកាល

ដោយៈ រ៉ាណេត

ភ្នំពេញៈ នៅក្នុងជីវភាពរស់នៅប្រចាំថ្ងៃ លុយត្រូវបានគេប្រដូចទៅស្ដេចនៃការទំនាក់ទំនង ដែលអាចចូលរួមចំណែកយ៉ាងសំខាន់ ក្នុងការដោះស្រាយបញ្ហាលំបាកនានាផងដែរ។

ដូច្នេះហើយ ទើបមនុស្សគ្រប់គ្នាតែងប្រាថ្នា និងមានតម្រូវការលុយខ្ពស់បំផុត ជាមួយនឹងការរិះរកមធ្យោបាយជាច្រើន ដើម្បីអាចទទួលបានលុយកាន់តែច្រើន យកមកប្រើប្រាស់នៅក្នុងដៃ។

របៀប និងវិធីសាស្ត្រក្នុងការកលុយ ត្រូវបានមនុស្សធ្វើឡើងក្នុងលក្ខខណ្ឌផ្សេងៗពីគ្នា និងគ្រប់រូបភាពទាំងអស់ រហូតមានអ្នកខ្លះស្វែងរកលុយក្រៅក្រមសីលធម៌ ក្រោមសកម្មភាពប្រាសចាកពីគន្លងនៃផ្លូវច្បាប់ក៏មាន។ តើគួរធ្វើយ៉ាងណា ទើបអាចរកលុយបានច្រើន ហើយទទួលបាននូវការសាទរពីមនុស្ស និងសង្គមជុំវិញខ្លួនបាន?។

អ្នកជំនាញផ្នែកសេដ្ឋកិច្ច លោកង៉ែត ជូ បានរៀបរាប់តាមរយៈសំណេរនៅលើប ណ្តាញទំនាក់ទំនងសង្គមគណនីផ្ទាល់ខ្លួនយ៉ាងខ្លីថា គ្រប់រូបភាពរកលុយទាំងអស់សុទ្ធតែត្រូវបានគេនិយម ធ្វើឡើងទៅតាមសម័យកាល និងវិធីសាស្ត្រផ្សេងៗគ្នា។

លោកបានបញ្ជាក់ថា “បន្ទាប់ពីសម័យខ្មែរក្រហមដួលរលំ កម្ពុជាបានឆ្លងកាត់សម័យកាល៤ដូចជា ទី១ សម័យកាលទី១៖ សម័យរដ្ឋកម្ពុជា ត្រូវខំរៀនក្រែងបានធ្វើធំ និងមានការងារកន្លែងខ្លាញ់។ ទីសម័យកាលទី២ សម័យអ៊ុនតាក់ ត្រូវខំរៀនភាសាអង់គ្លេស ក្រែងបានធ្វើជាអ្នកបកប្រែទើបអាចទទួលបានប្រាក់ខែច្រើន។

សម័យកាលទី៣ ក្រោយសម័យអ៊ុនតាក់ ត្រូវខំរៀនក្រែងបានការងារល្អនៅតាមអង្គការ ធនាគារ ឬគ្រឹះស្ថានមីក្រូហិរញ្ញវត្ថុ។

សម័យកាលទី៤ ចាប់ពីពេលនេះតទៅ ត្រូវខំរៀន និងពង្រឹងសមត្ថភាព ដើម្បីក្លាយខ្លួនជាអ្នកជំនួញ ឬអ្នកវិនិយោគទើបមានឱកាសទទួលបាន ភាពជោគជ័យផ្នែកហិរញ្វត្ថុ។

សម័យកាលទី១ ទី២ និងទី៣ ជាសម័យកាលធ្វើការដើម្បីលុយ រីឯសម័យកាលទី៤ គឺជាសម័យកាលដែលត្រូវតែចេះប្រើលុយ ដើម្បីបង្កើតលុយ។ ដូច្នេះមនុស្សត្រូវតែមានសមត្ថភាពខ្លាំងជាងមុន មានចំណេះដឹងអំពីលុយខ្ពស់ជាងមុន និងមានវិន័យក្នុងការចាយលុយផងដែរ៕

ចំណេះដឹង! តើវិនិយោគិនអាចផ្ទេរ ឬលក់គម្រោងវិនិយោគរបស់ខ្លួនបានយ៉ាងដូចម្តេច?

ដោយ វុត្ថា

ភ្នំពេញៈ ដោយយោងតាមច្បាប់ស្តីពីវិនិយោគនៃព្រះរាជាណាចក្រកម្ពុជា ត្រង់មាត្រាមួយបានចែងថា មានការហាមឃាត់ដោយប្រយោល លើគម្រោងវិនិយោគ ព្រោះច្បាប់បានហាមឃាត់ក្នុងការលក់ ឬ ផ្ទេរវិនិយោគឡើយ។

ប៉ុន្តែមាត្រានេះត្រូវបានលុបចោលដោយច្បាប់ស្តីពី វិសោធនកម្មច្បាប់ស្តីពីការវិនិយោគ ដែលជំនួសដោយច្បាប់វិសោធនកម្មឆ្នាំ២០០៣ បានអនុញ្ញាតឲ្យមានការផ្ទេរ និងទិញ លក់ ឬរំលាយចូលគ្នាកាលណាគម្រោងវិនិយោគនោះ មានលក្ខណៈសម្បត្តិគ្រប់គ្រាន់។

អ្នកទិញជាបុគ្គលមិនបានចុះបញ្ជី

អ្នកសុំទិញត្រូវដាក់ពាក្យទៅក្រុមប្រឹក្សាអភិវឌ្ឍន៍កម្ពុជា(CDC) ឬអនុគណៈកម្មាធិការវិនិយោគរាជធានី ខេត្ត តាមនីតិវិធីចុះបញ្ជី និងផ្ទេរវិញ្ញាបនបត្រចុះបញ្ជីជាស្ថាពរ នៃគម្រោងវិនិយោគមានលក្ខណៈសម្បត្តិគ្រប់គ្រាន់ មកនីតិបុគ្គលថ្មីក្នុងរយៈពេល១០ថ្ងៃមុនធ្វើការផ្ទេរ ។

(CDC)ឬអនុគណៈកម្មាធិការរាជធានី ខេត្ត ត្រូវធ្វើការត្រួតពិនិត្យព្រម ឬមិនព្រម និងត្រូវជូនដំណឹងទៅនីតិបុគ្គលជាអ្នកទិញ ក្នុងរយៈពេល១០ថ្ងៃ បន្ទាប់ពីទទួលពាក្យស្នើសុំ ។

អ្នកទិញជាបុគ្គលបានចុះបញ្ជីត្រូវអនុវត្តន៍ដូចនីតិវិធី អ្នកទិញជាបុគ្គលមិនបានចុះបញ្ជីដែរ ។

ការរំលាយបញ្ចូលគ្នា

ប្រសិនបើមានការព្រមព្រៀងគ្នារវាងអ្នកវិនិយោគពីរ ឬច្រើន បានយល់ព្រមដាក់បញ្ចូលគ្នា នូវទុនឬគំរោងវិនិយោគរបស់ខ្លួនតាមការព្រមព្រៀង បង្កើតទៅជានីតិបុគ្គលថ្មីដែលបានទទួលការលើកទឹកចិត្ត និងការការពារ ត្រូវអនុវត្តនូវវិធានការដូចខាងក្រោម៖ ដាក់ពាក្យទៅ (CDC)ឬអនុគណៈកម្មាធិការរាជធានី ខេត្ត តាមនីតិវិធីសុំចុះបញ្ជីវិនិយោគ ; និងធ្វើការផ្ទរវិញ្ញាបនបត្រស្ថាពរ នៃគម្រោងវិនិយោគមានលក្ខណៈគ្រប់គ្រាន់ មកឲ្យនីតិបុគ្គលថ្មី ក្នុងរយៈពេល១០ថ្ងៃ មុនធ្វើការរំលាយបញ្ចូលគ្នា។

(CDC) ត្រូវធ្វើការត្រួតពិនិត្យថាតើព្រម ឬមិនព្រមនៃការចុះបញ្ជី និងការផ្ទេរវិញ្ញាបនបត្រស្ថាពរ និងជូនដំណឹងទៅអ្នកទិញ ក្នុងរយៈពេល១០ថ្ងៃ បន្ទាប់ពីទទួលពាក្យស្នើសុំ៕

លោក ឯម ច័ន្ទមករា ៖ ទីក្រុងស្អាតជាកាតព្វកិច្ចរបស់រដ្ឋ ឯកជន ឬប្រជាពលរដ្ឋ?

ភ្នំពេញៈ បញ្ហាសំរាម និងការធ្វើឲ្យទីក្រុងស្អាត បានក្លាយជាចំណាប់អារម្មណ៍ថ្មីមួយក្នុងសង្គមកម្ពុជា ហើយបញ្ហានេះត្រូវបានលើកជាបន្តបន្ទាប់ ក្នុងបណ្តាញទំនាក់ទំនងសង្គម។

ជាមន្រ្តីជាន់ខ្ពស់នៃក្រសួងសង្គមកិច្ច និងអតីតយុទ្ធជន លោក ឯម ច័ន្ទមករា អគ្គលេខាធិការ នៃអគ្គលេខាធិការដ្ឋានក្រុមប្រឹក្សាសកម្មភាពជនពិការ បានចំណាយពេលវេលាប្រមាណជាង៣ម៉ោង ក្នុងចម្ងាយផ្លូវប្រមាណជិត២០គីឡូម៉ែត្រ បន្ទាប់ពីចប់ការចូលរួមកិច្ចប្រជុំ មុនពេលឡើងយន្តហោះត្រឡប់មកមាតុប្រទេសវិញ។

លោកបានសរសេរថា “ខ្ញុំបានផ្តិតយករូបភាពមួយចំនួន ដើម្បីជាបច័្ចយគំនិតជូនប្រជាពលរដ្ឋខ្មែរយើងប្រសិនបើស្រលាញ់បរិស្ថាន ល្អស្អាត ផាសុកភាព ស៊ីវីល័យ អនាម័យ មនោរម្យ និងមានការបង្កលក្ខណៈងាយស្រួលដូចក្នុងរូបថតនៃទីក្រុងប៉េងកាំង សាធារណៈរដ្ឋប្រជាមានិតចិន”។

លោកថា “ពិតណាស់ថាការរៀបចំទីក្រុង ខេត្ត ឬជនបទសម្រាប់ប្រទេសដែលកំពុងអភិវឌ្ឍដូចប្រទេសកម្ពុជារបស់យើង គឺមិនមានភាពងាយស្រួល ដូចការនិយាយនិងការចង់បាននោះទេ ព្រោះនិយាយងាយស្រួលជាងធ្វើ! សន្តិភាពគឺជាកត្តាសំខាន់ណាស់សម្រាប់ការអភិវឌ្ឍ និងរីកចម្រើនផ្នែកសេដ្ឋកិច្ច ព្រមទាំងការធ្វើវិនិយោគទុនផងដែរ”។

លោកបានធ្វើដំណើរដោយថ្មើរជើងបណ្តើរ គិតស្រមោលស្រមៃបណ្តើរ អស់រយៈពេលជាង៣ម៉ោង ព្រោះចង់ឃើញប្រទេសកម្ពុជារបស់យើងមានភាពស្រស់បំព្រងបែបនេះ។

លោកបានថ្លែងថា “និយាយបែបនេះ មិនមែនបង្អាប់ប្រទេសជាតិដើមកំណើតខ្លួនឯង ហើយប្រៀបធៀបការរីកចម្រើនរបស់ប្រទេសដទៃនោះទេ ប៉ុន្តែជាការឆ្លុះបញ្ចាំងនិងជូនឧទាហរណ៍ក្រែងបងៗឬថ្នាក់ដឹកនាំពាក់ព័ន្ធ វិស័យឯកជន ពិសេសប្រជាពលរដ្ឋខ្មែរយើងទូទាំងនគរ អាចចូលរួមស្ថាបនានិងអភិវឌ្ឍប្រទេសជាតិយើង ឱ្យជឿនលឿនដូចគេនេះ”។

លោកថា “ការគោរពច្បាប់ និងទំលាប់គិតពីអនាម័យ គឺជាកត្តាចំបងដែលប្រជាពលរដ្ឋខ្មែរយើងគួរនាំគ្នាពិចារណា! សម្រាប់ខ្ញុំ ខ្ញុំជឿថាប្រជាពលរដ្ឋខ្មែរគ្រប់រូបពិតជាចង់ឱ្យប្រទេសកម្ពុជារបស់យើងមានសោភ័ណភាពដូចក្នុងរូបទាំងនេះអញ្ចឹង តើមែនឬទេ?”។

ជាការកត់សម្គាល់របស់លោកនៃការធ្វើដំណើរដោយថ្មើជើង លោកសង្កេតឃើញការរៀបចំទីក្រុងរបស់គេមានដូចខាងក្រោមនេះ
-ការៀបចំផ្លូវសម្រាប់ធ្វើចរាចរណ៍បានល្អ
-មានចំណតសម្រាប់គ្រប់យាន្តជំនិះ
-ការខាន់ចែកផ្លូវសម្រាប់យានយន្ត ទោចក្រយាន្តយន្ត ផ្លូវសម្រាប់អ្នកថ្មើរជើង
-ទុកចំណីថ្លូវឬចិញ្ចើមផ្លូវបានធំៗល្អ
-ហាងដែលធ្វើអាជីវកម្មលើដងវិថី មានទុកគំលាតឬចិញ្ចើមផ្លូវធំៗ មានជម្រាល មានកន្លែងចតយានជំនិះ
-ការគោរពច្បាប់ចរាចរណ៍បានល្អ
-មានផ្លូវពិសេសសម្រាប់រថយន្តក្រុងឬសាធារណៈ
-មានជម្រាលសម្រាប់មនុស្សចាស់ ជនមានពិការភាព ស្ត្រីពោះធំ កុមារដើរឡើងឆ្លងផ្លូវកាត់ថ្ន់ល់ធំៗ
-សោភ័ណភាពលូបង្ហូរទឹកស្អុយ
-ការដាក់តាំងលម្អនិងរចនាសួនច្បារ សួនផ្កាតាមដងវិថីសាធារណៈ។

-លំនៅដ្ឋានប្រជាពលរដ្ឋភាគច្រើនគឺសម្រាប់តែរស់នៅ មិនសម្រាប់ធ្វើអាជីវកម្ម
-មានចែកតំបន់អាជីវកម្ម លំនៅដ្ឋាន អគាខ្ពស់ៗ ផ្សារទំនើប កន្លែងធ្វើការ។ល។ -ការរៀបចំបានល្អនូវប្រព័ន្ធខ្សែអគ្គីសនី ទូរស័ព្ទ អ៊ីនធ័រណែត ខ្សែកាបទូរទស្សន៍។ល។ល។

ជារួម ការប្រែក្លាយក្តីស្រមៃខាងលើនេះ លោក គិតថា មិនតែជាការចង់បានរបស់ខ្ញុំតែម្នាក់ប៉ុណ្ណោះទេ ប៉ុន្តែក៏ជាការចង់បានរបស់ប្រជាពលរដ្ឋខ្មែរគ្រប់រូបផងដែរ សំនួរសួរ ម្តងទៀត តើមែនឬមិនមែន?។

មានកត្តាជាច្រើនណាស់ ទំរាំងយើងអាចសម្រេចបាននូវការស្រមោលស្រមៃបែបនេះ នោះរួមមាន៖-កត្តាសន្តិភាព -កត្តាសេដ្ឋកិច្ច -កត្តាស្នេហាជាតិ -កត្តាឆន្ទៈអភិវឌ្ឍ -កត្តាសាមគ្គីភាព -កត្តាស្រលាញ់បរិស្ថាននិងអនាម័យ -កត្តាវិនិយោគទន់ -កត្តាលះបង់ -និងមានកត្តាជាច្រើនទៀត។ល។ល។ល។

សរុបជារួម សង្ឃឹមថាប្រជាពលរដ្ឋខ្មែរគ្រប់រូបគឺអាចធ្វើបាន!៕

ADB ដាក់ចេញសៀវភៅនៃការវិវត្តិន៍អាស៊ាននៅកម្ពុជា

ដោយ ៖ ប៊ី
ភ្នំពេញ ៖ ធនាគារអភិវឌ្ឍន៍អាស៊ី (ADB) នៅប្រទេសកម្ពុជាកាលពីថ្ងៃចន្ទ បានដាក់ចេញនូវការបោះពុម្ពផ្សាយសៀវភៅមួយដែលមានចំណងជើងថា “ការវិវត្តអាស៊ាន ចក្ខុវិស័យ និងភាពជាក់ស្តែង” ។ នេះបើតាមសេចក្តីប្រកាសព័ត៌មានរបស់ADB។
ការចេញផ្សាយសៀវភៅនេះត្រូវបានចូលរួមដោយមន្ត្រីរដ្ឋាភិបាល និងអ្នកដើរតួនាទីសំខាន់មកពីវិស័យឯកជនដើម្បីឆ្លុះបញ្ចាំងពីការអនុវត្តរបស់សមាគមប្រជាជាតិអាស៊ីអាគ្នេយ៍ (អាស៊ាន) ចំពោះចក្ខុវិស័យនៃសមាហរណកម្មសេដ្ឋកិច្ច។
ក្រុមវាគ្មិនដែលបានពិភាក្សាលើប្រធានបទនៅក្នុងព្រឹត្តិការណ៍នេះបានពិចារណាអំពីផលប៉ះពាល់នៃការវិវត្តក្នុងតំបន់ និងពិភពលោក រួមទាំងភាពតានតឹងផ្នែកពាណិជ្ជកម្ម និងវឌ្ឍនភាពនៅក្នុងក្រុមតំបន់ផ្សេងទៀតដែលរួមមានភាពជាដៃគូសេដ្ឋកិច្ចជ្រុងជ្រោយក្នុងតំបន់លើសហគមន៍ក្នុងតំបន់ និងតម្រូវការរបស់វិស័យឯកជន។
លោកស្រី Sunniya Durrani-Jamal ប្រធាន ADB ប្រចាំប្រទេសកម្ពុជា បានមានប្រសាសន៍ថា “ទោះបីមានការទទួលស្គាល់នូវកង្វះខាតក្នុងការអនុវត្តនៅក្នុងតំបន់មួយចំនួនក៏ដោយ អាស៊ានបានចាប់ផ្តើមបង្កើតសហគមន៍សេដ្ឋកិច្ចអាស៊ាន (AEC) ជាផ្លូវការនៅក្នុងខែធ្នូឆ្នាំ ២០១៥”។
លោកស្រី មានប្រសាសន៍ថា “ជាមួយសុន្ទរកថាឥឡូវនេះបានផ្លាស់ប្តូរទៅរកចក្ខុវិស័យ និងទិសដៅសម្រាប់អាស៊ាន ២០២៥ វាជាពេលវេលាដើម្បីឆ្លុះបញ្ចាំងពីអតីតកាល និងផែនការសម្រាប់អនាគតនៃសមាហរណកម្មសេដ្ឋកិច្ចអាស៊ាន”។
លោក Jayant Menon សេដ្ឋវិទូនាំមុខរបស់ធនាគារអភិវឌ្ឍន៍អាស៊ីទាក់ទងនឹងពាណិជ្ជកម្ម និងកិច្ចសហប្រតិបត្តិការក្នុងតំបន់ និងជាអ្នកកែសម្រួលការបោះពុម្ពផ្សាយ បាននិយាយថា អាស៊ានកំពុងស្ថិតនៅលើផ្លូវបំបែកមួយ។
លោកបានមានប្រសាសន៍ថា “ទោះបីជាសហគមន៍សេដ្ឋកិច្ចអាស៊ានទទួលបានជោគជ័យគួរឱ្យកត់សម្គាល់មួយចំនួនក៏ដោយ ចក្ខុវិស័យនៃការធ្វើសមាហរណកម្មសេដ្ឋកិច្ចមិនទាន់ត្រូវបានទទួលស្គាល់ពេញលេញនៅឡើយទេ”។
លោកបានបន្ថែមថា “សៀវភៅ (១៨១ ទំព័រ) ពិនិត្យមើលការវិវត្តន៍នៃសមាហរណកម្មសេដ្ឋកិច្ចអាស៊ាន ដោយប្រៀបធៀបទស្សនវិស័យរបស់អ្នកគិតគូដើមរបស់ខ្លួន និងភាពពិតជាបន្តបន្ទាប់។ វាក៏ពិនិត្យលើបញ្ហាប្រឈមដែលបានកើតឡើងក្នុងទសវត្សកន្លងមក និងផ្តល់នូវអនុសាសន៍ស្តីពីវិធីដើម្បីជម្នះបញ្ហាទាំងនោះ”។
បណ្តាប្រទេសអាស៊ានរួមមានព្រុយណេ កម្ពុជា ឥណ្ឌូនេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សឹង្ហបូរី ថៃ និងវៀតណាម៕

សឹង្ហបូរីជៀសផុតពីវិបត្តិសេដ្ឋកិច្ច បន្ទាប់សេដ្ឋកិច្ចធ្លាក់ចុះ ២ ត្រីមាសជាប់គ្នា

ដោយ Donald Lee
សឹង្ហបូរី ៖ សេដ្ឋកិច្ចសឹង្ហបូរីបានរួចផុតពីវិបត្តិសេដ្ឋកិច្ចដោយមានកំនើនសេដ្ឋកិច្ចកើនឡើង ០,៦ ភាគរយនៅក្នុងត្រីមាសចុងក្រោយ។ នេះបើយោងតាមទិន្នន័យរបស់ក្រសួងពាណិជ្ជកម្មសឹង្ហបូរីដែលបានចេញផ្សាយនៅថ្ងៃ ចន្ទនេះ។
ការកើនឡើងបន្តិចបន្តួចបានកើតឡើង ខណៈក្រុមអ្នកវិភាគប្រាកដថា សឹង្ហបូរីនឹងធ្លាក់ចូលក្នុងវិបត្តិសេដ្ឋកិច្ច ពោលគឺ ២ ត្រីមាសជាប់គ្នានៃការធ្លាក់ចុះផលិតផលក្នុងស្រុកសរុប បន្ទាប់ពីសេដ្ឋកិច្ចបានធ្លាក់ចុះមកត្រឹម ២,៧ ភាគរយនៅត្រីមាសទី ២ ដោយសារជម្លោះពាណិជ្ជកម្មរវាងអាមេរិក និងចិន។ នៅក្នុងការប្រៀបធៀបពីមួយឆ្នាំទៅមួយឆ្នាំផលិតផលក្នុងស្រុកសរុបរបស់សឹង្ហបូរីបានកើនឡើងត្រឹមតែ ០.១ ភាគរយប៉ុណ្ណោះ។
ក្រុមអ្នកវិភាគមានការងឿងឆ្ងល់ថា តើប្រទេសសឹង្ហបូរីអាចបន្តជៀសវាងការដើរថយក្រោយនៃសេដ្ឋកិច្ច ដោយសារសេដ្ឋកិច្ចរបស់ប្រទេសនេះពឹងផ្អែកយ៉ាងខ្លាំងទៅលើពាណិជ្ជកម្ម និងវដ្តសេដ្ឋកិច្ចពិភពលោក។
ទោះបីជាលទ្ធផលនៃកំណើនសេដ្ឋកិច្ចនៅឆ្នាំនេះ វេទិកាសេដ្ឋកិច្ចពិភពលោក (WEF) បានចាត់ថ្នាក់ប្រទេសសឹង្ហបូរីថាជាប្រទេសមានសេដ្ឋកិច្ចប្រកួតប្រជែងខ្លាំងបំផុតនៅលើពិភពលោក។
សន្ទស្សន៍ប្រកួតប្រជែងត្រូវបានបង្កើតឡើងដើម្បីពិចារណាពីកត្តាជំរុញនៃកំណើនសេដ្ឋកិច្ច និងថាតើកម្លាំងពលកម្ម និងមូលធនវិនិយោគមានប្រសិទ្ធិភាពយ៉ាងដូចម្តេចដើម្បីរួមបញ្ចូលគ្នាក្នុងការបង្កើតលទ្ធផល។
របាយការណ៍របស់ WEF បានបញ្ចប់ថា “ប្រទេសនេះស្ថិតក្នុងលំដាប់ទី ១ ទាក់ទងនឹងហេដ្ឋារចនាសម្ព័ន្ធ សុខភាព មុខងារទីផ្សារការងារ និងការអភិវឌ្ឍប្រព័ន្ធហិរញ្ញវត្ថុ”៕

ក្រុមហ៊ុនជប៉ុនគ្រោងវិនិយោគលើការផលិតអំពូលភ្លើងបំភ្លឺផ្លូវសាធារណៈវៃឆ្លាតនៅកម្ពុជា

ដោយ ៖ វុត្ថា
ភ្នំពេញ ៖ ក្រុមហ៊ុន MinebeaMitsumi របស់ប្រទេសជប៉ុន បានបង្ហាញពីគោលបំណងរបស់ខ្លួនវិនិយោគលើការផលិតអំពូលភ្លើងបំភ្លឺផ្លូវសាធារណៈវៃឆ្លាត (Smart LED) នៅកម្ពុជា ដើម្បីចូលរួមចំណែកបន្ថែមទៀតដល់ការអភិវឌ្ឍហេដ្ឋារចនាសម្ព័ន្ធកម្ពុជា។

លោក YOSHIHISA KAINUMA នាយកប្រតិបត្តិរបស់ក្រុមហ៊ុន Minebea Mitsumi នៅក្នុងជំនួបជាមួយលោក តូច ចាន់កុសល រដ្ឋលេខាធិការក្រសួងសាធារណការ និងដឹកជញ្ជូនកាលពីថ្ងៃទី ១៤ ម្សិលមិញនេះអំពីវិសាលភាពនៃប្រតិបត្តិ ការអាជីវកម្មរបស់ក្រុមហ៊ុននៅក្នុងប្រទេសជប៉ុនទាក់ទងនឹងការវិនិយោគលើគម្រោងភ្លើងបំភ្លឺផ្លូវសាធារណៈវៃឆ្លាត (Smart LED) និងមានបំណងចង់វិនិយោគលើវិស័យនេះនៅក្នុងប្រទេសកម្ពុជា។
លោកបានសម្តែងនូវសុឆន្ទៈក្នុងការសហប្រតិបត្តិការជាមួយក្រសួងសាធារណការ និងដឹកជញ្ជូន ដើម្បីចូលរួមចំណែកបន្ថែមទៀតដល់ការអភិវឌ្ឍហេដ្ឋារចនាសម្ព័ន្ធកម្ពុជា។
លោក តូច ចាន់កុសល រដ្ឋលេខាធិការក្រសួងសាធារណការ និងដឹកជញ្ជូន បានស្វាគមន៍ចំពោះក្រុមហ៊ុនជប៉ុន ដែលមានបំណងចង់វិនិយោគលើគម្រោងភ្លើងបំភ្លឺផ្លូវសាធារណៈវៃឆ្លាត និងបានសម្តែងការគាំទ្រ និងការប្តេជ្ញាចិត្តយ៉ាងមុតមាំ ដើម្បីស្វាគមន៍ និងជួយសម្រួលដល់ក្រុមហ៊ុនដែលមានបំណងមកវិនិយោគនៅកម្ពុជាផងដែរ។
ក្រុមហ៊ុន MinebeaMitsumi បាននិងកំពុងផលិតផលិតផលដែលមានបច្ចេកវិទ្យាខ្ពស់ ផ្តល់គុណប្រយោជន៍ដល់បរិស្ថាន ដែលក្នុងនោះ ក្រុមហ៊ុនក៏បាននិងកំពុងត្រៀមដំឡើងអំពូល LED ក្នុងរាជធានីភ្នំពេញ ខេត្តសៀមរាប និងខេត្តព្រះសីហនុ ដែលជាខេត្ត ត្រូវបានជ្រើសរើសជាបណ្តាញទីក្រុងឆ្លាតវៃក្នុងតំបន់អាស៊ាន ដែលគាំទ្រដោយរដ្ឋាភិបាលជប៉ុន។
គម្រោងទីក្រុងឆ្លាតវៃនេះ គឺត្រូវបានរាជរដ្ឋាភិបាលកម្ពុជាយល់ព្រមជាគោលការណ៍ជូនក្រសួងរៀបចំដែនដី នគរូបនីយកម្ម និងសំណង់ ក្នុងការបង្កើតបណ្តាញទីក្រុងឆ្លាតវៃ អាស៊ាន-ជប៉ុន កាលពីពេលថ្មីៗនេះ។
ក្រុមហ៊ុននេះក៏នឹងដំឡើងអំពូល LED ដែលជាប្រភេទអំពូលសន្សំសំចៃចរន្តអគ្គិសនី ចំនួន ៧ ៣៥៩ បង្គោលដែលបម្រើឲ្យទម្រង់នៃទីក្រុងឆ្លាតវៃនឹងត្រូវដាក់ប្រតិបត្តិការនៅឆ្នាំនេះ ដែលក្នុងនោះ ក្រុមហ៊ុនបានដំឡើងអំពូលបានចំនួន ១ ១៨៧ បង្គោលនៅតាមមហាវិថីចំនួន ៣ នៅរាជធានីភ្នំពេញ។ ចំណែកនៅឯខេត្តសៀមរាប ក្រុមហ៊ុននឹងដំឡើងបន្ថែមចំនួន ៥០០ ទៀត ហើយគម្រោងនេះ ក៏នឹងអាចបន្តអនុវត្តនៅខេត្តព្រះសីហនុផងដែរ៕

អាមេរិកព្រមានចាប់ផ្តើមសង្គ្រាមពាណិជ្ជកម្មជាថ្មី ប្រសិនបើការចរចាមិនទទួលបានជោគជ័យ

ដោយ Donald Lee
ភ្នំពេញ៖ រដ្ឋមន្ត្រីក្រសួងរតនាគារអាមេរិកលោក Steven Mnuchin បានឱ្យដឹងថា រដ្ឋាភិបាលសហរដ្ឋអាមេរិកនឹងដំឡើងពន្ធលើទំនិញចិននៅក្នុងខែធ្នូ ប្រសិនបើកិច្ចព្រមព្រៀងពាណិជ្ជកម្មមិនត្រូវបានបញ្ចប់នៅខែធ្នូ។
លោក Mnuchin គឺជាអ្នកចរចាដ៏សំខាន់ម្នាក់របស់អាមេរិកក្នុងអំឡុងកិច្ចពិភាក្សាពាណិជ្ជកម្មកាលពីសប្តាហ៍មុនជាមួយឧបនាយករដ្ឋមន្ត្រីចិនលោក Liu He ដែលបានប្រារព្ធធ្វើនៅទីក្រុងវ៉ាស៊ីនតោន។
លោក Mnuchin បាននិយាយនៅក្នុងបទសម្ភាសន៍នៅលើកញ្ចក់ទូរទស្សន៍អាមេរិកថា “ខ្ញុំមានការរំពឹងទុកទាំងអស់ ប្រសិនបើមិនមានកិច្ចព្រមព្រៀងណាមួយ ពន្ធគយទាំងនោះនឹងត្រូវអនុវត្ត ប៉ុន្តែខ្ញុំរំពឹងថាយើងនឹងមានកិច្ចព្រមព្រៀងមួយ”។
ការដំឡើងពន្ធរបស់អាមេរិកលើទំនិញចិនដែលមានតម្លៃ ២៥០ ពាន់លានដុល្លារ ត្រូវបានដកចេញបន្ទាប់ពីមានការចរចាពាណិជ្ជកម្មកម្រិតខ្ពស់កាលពីថ្ងៃព្រហស្បតិ៍ និងថ្ងៃសុក្រ។
ប្រធានាធិបតីអាមេរិក Donald Trump បានប្រកាសយ៉ាងឆាប់រហ័សថា “កិច្ចព្រមព្រៀងមួយដំណាក់កាលត្រូវបានធ្វើ ហើយជាថ្នូរនឹងការផ្អាកពន្ធបង្កើនការនាំចូលរបស់ចិន ទីក្រុងប៉េកាំងនឹងទិញទំនិញកសិកម្មអាមេរិករហូតដល់ ៥០ ពាន់លានដុល្លារ។
លោក Trump បានសរសេរនៅលើបណ្តាញសង្គម Twitter ថា “កិច្ចព្រមព្រៀងរបស់ខ្ញុំជាមួយចិនគឺថាពួកគេនឹងចាប់ផ្តើមទិញផលិតផលកសិកម្មរបស់យើងយ៉ាងច្រើន ហើយមិនត្រូវរង់ចាំរហូតដល់កិច្ចព្រមព្រៀងត្រូវបានចុះហត្ថលេខាក្នុងរយៈពេល ៣ ឬ ៤ សប្តាហ៍ខាងមុខនេះទេ”។
ការដំឡើងពន្ធបន្ទាប់របស់អាមេរិកដែលគ្រោងនឹងធ្វើឡើងនៅថ្ងៃទី ១៥ ខែ ធ្នូ ហើយនឹងដាក់ពន្ធលើការនាំចូលទំនិញចិនដែលមានតម្លៃ ១៦០ ពាន់លានដុល្លារ៕

ប្រធានសមាគម CVEA នឹងបង្ហាញឱកាសវិនិយោគកម្ពុជាទៅដល់វិនិយោគិនអចលនទ្រព្យនៅអាមេរិក

ដោយ ៖ វុត្ថា
ភ្នំពេញ ៖ ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម នឹងដឹកនាំគណៈប្រតិភូរបស់សមាគមទៅសហរដ្ឋអាមេរិក ដើម្បីបង្ហាញពីសក្តានុពលសម្រាប់វិនិយោគលើវិស័យអចលនទ្រព្យនៅកម្ពុជាទៅកាន់វិនិយោគិនបរទេសមកពី៦០ប្រទេសចាប់ពីថ្ងៃទី ៨ ដែលថ្ងៃទី ១១ខែវិច្ឆិកាខាងមុខនេះ ។

លោក ច្រឹក សុខនីម បានឱ្យដឹងកាលពីពេលថ្មីៗនេះថា ប្រទេសកម្ពុជាគឺសមាជិកសមាគមអ្នកវាយតម្លៃអចលនទ្រព្យអាមេរិក ហើយការដឹកនាំគណៈប្រតិភូទៅសហរដ្ឋអាមេរិកនាពេលនេះ គឺក្នុងគោលបំណងទី១ ទៅរៀនសូត្រពីបទពិសោធន៍ដែលអ្នកជំនាញទទួលបាន និងទី២ បង្ហាញឱកាសវិនិយោគរបស់កម្ពុជាទៅកាន់វិនិយោគិនបរទេស និងបង្ហាញពីឱកាសវិនិយោគបរទេសមកកាន់កម្ពុជាផងដែរ។
លោកបន្ថែមថា “សម្រាប់ប្រទេសកម្ពុជាយើងមានពេលប្រមាណ ១៥ នាទី ដើម្បីបង្ហាញពីឱកាសវិនិយោគនៅកម្ពុជាទៅកាន់អ្នកវិយោគបរទេសនៅលើសកលលោកឱ្យមកវិនិយោគអចលនទ្រព្យនៅកម្ពុជា។ ហើយអ្វីដែលសំខាន់នោះ កម្ពុជារបស់យើងបានលើកទង់ជាតិរបស់កម្ពុជានៅលើឆាកអន្តរជាតិផងដែរ” ។
លោក ច្រឹក សុខនីម នឹងលើកយកពីសក្តានុពលសេដ្ឋកិច្ចខ្ពស់របស់កម្ពុជាក្នុងរង្វង់ ៧,៥ ភាគរយក្នុងរយៈពេល ៥ ឆ្នាំជាប់គ្នាចុងក្រោយនេះ ហើយក៏ជាប្រទេសដែលមានការទាក់វិនិយោគប្រទេសជាច្រើននៅក្នុងតំបន់អាស៊ីផងដែរ និងនីតិវិធីនៃការវិនិយោគកាន់តែមានភាពងាយស្រួលជាដើម។
លោកថា ពីមុនគេមិនដែលស្គាល់ប្រទេសកម្ពុជានោះទេ គេស្គាល់តែប្រទេសផ្សេងៗនៅក្នុងតំបន់អាស៊ី តែបន្ទាប់ពីមានការសផ្សព្វផ្សាយយ៉ាងទូលំទូលាយ វិនិយោគិនបរទេសបានចាប់អារម្មណ៍ វិនិយោគអចលនទ្រព្យ នៅកម្ពុជាកាន់តែច្រើន ព្រោះការវិយោគវិស័យអលចនទ្រព្យនៅកម្ពុជាមានឱកាសចំណេញច្រើនជាបណ្តាប្រទេសនានានៅក្នុងតំបន់អាស៊ី។
លោកបញ្ជាក់ទៀតថា នៅពេលដែលអ្នកវិនិយោគអាមេរិកចូលមកវិនិយោគច្រើនលើវិស័យអចលនវត្ថុកម្ពុជា នោះ គឺជាការកសាងទំនុកចិត្តក្នុងវិស័យនេះធ្វើឲ្យវិស័យនេះ កាន់តែរឹងមាំថែមទៀត ដែលកម្ពុជាត្រូវធ្វើការងារច្រើនទៀតលើវិស័យអចលនទ្រព្យ ដើម្បីទាក់ទាញការវិនិយោគបន្ថែមពីសហរដ្ឋអាមេរិក ៕

រដ្ឋាភិបាលក្រុងប៉េកាំង៖ ស្រាសាំប៉ាញគួររក្សាទុកនៅក្នុងទូទឹកកកសិន មុនភាពជោគជ័យមកដល់

ដោយ Donald Lee

ប៉េកាំងៈ បន្ទាប់ពីកិច្ចចរចាពាណិជ្ជកម្មអាមេរិក-ចិនជុំទី១៣បានបញ្ចប់កាលពីថ្ងៃ សុក្រ នៅទីក្រុងវ៉ាស៊ីនតោនប្រធានាធិបតីអាមេរិកលោក Donald Trump បាននិយាយថា កិច្ចព្រមព្រៀងពាណិជ្ជកម្មមួយដំណាក់កាល ត្រូវបានបញ្ចប់ ដែលនឹងបញ្ឈប់ការដំឡើងពន្ធលើខែ តុលាលើទំនិញចិន ហើយទីក្រុងប៉េកាំងបានយល់ព្រមទិញ កសិផលរបស់អាមេរិករហូតដល់៥០ពាន់លានដុល្លារ។

នៅចុងបញ្ចប់នៃការចរចា នៅទីក្រុងវ៉ាស៊ីនតោនលោក Trump បាននិយាយថា “យើងជិតដល់ទីបញ្ចប់នៃសង្គ្រាមពាណិជ្ជកម្ម”។

អ្នកវិភាគជាច្រើនអះអាងថា “មិនមានអ្វីប្រាកដប្រជាទេ ខណៈអាមេរិកបានបង្ហាញដោយការដាក់បញ្ជីខ្មៅដល់ក្រុមហ៊ុន និងមន្រ្តីចិន មុនពេលកិច្ចពិភាក្សាពាណិជ្ជកម្មបានចាប់ផ្តើមកាលពីសប្តាហ៍មុន”។

ជាក់ស្តែង ទោះបីជាទីក្រុងប៉េកាំង បានរួចផុតពីការដំឡើងពន្ធ៥ភាគរយ លើទំនិញដែលមានតម្លៃ២៥០ពាន់លានដុល្លារក៏ដោយ ការដំឡើងពន្ធផ្សេងទៀតកំពុងកើតឡើងនៅជុំវិញជ្រុងមួយ ដែលនឹងឈានមកដល់នៅថ្ងៃទី១៥ខែធ្នូខាងមុខ។

សេចក្តីរាយការណ៍របស់លោក Morgan Stanley បានចេញផ្សាយបន្ទាប់ពីការចរចារពាណិជ្ជកម្មរវាងអាមេរិក និងចិនបានឱ្យដឹងថា “មិនទាន់មានផ្លូវដែលអាចអនុវត្តបានចំពោះការធ្លាក់ចុះពន្ធគយ ដែលកំពុងមាននៅឡើយទេ ហើយការដំឡើងពន្ធនៅតែជាហានិភ័យ”។

ទីក្រុងប៉េកាំង ក៏បានប្រយ័ត្នប្រយែងផងដែរ អំពីការប្រកាសនូវរបកគំហើញណាមួយ បន្ទាប់ពីកិច្ចពិភាក្សាពាណិជ្ជកម្មបានបញ្ចប់កាលពីថ្ងៃ សុក្រ។

សេចក្តីអត្ថាធិប្បាយរបស់កាសែត China Daily បានឱ្យដឹងថា “ខណៈពេលដែលការចរចាហាក់ដូចជាបានបង្កើតការយល់ដឹង ជាមូលដ្ឋានលើបញ្ហាសំខាន់ៗ និងអត្ថប្រយោជន៍កាន់តែទូលំទូលាយ នៃទំនាក់ទំនងមិត្តភាព ដូចស្រាសាំប៉ាញត្រូវទុកលើទឹកកកសិន (កុំទាន់សប្បាយ មុនភាពជោគជ័យមិនទាន់មកដល់)។

សេចក្តីអត្ថាធិប្បាយបានបន្ថែមថា “យ៉ាងហោចណាស់រហូត ដល់ប្រធានាធិបតីទាំងពីរដាក់ប៊ិចទៅក្រដាស ដូចដែលផ្អែកលើការអនុវត្តកន្លងមក។ វាតែងតែមានលទ្ធភាពដែលក្រុងវ៉ាស៊ីនតោន អាចសម្រេចចិត្តលុបចោលកិច្ចព្រមព្រៀង ប្រសិនបើគេគិតថាធ្វើដូច្នេះនឹងបម្រើផលប្រយោជន៍របស់ខ្លួនឱ្យកាន់តែប្រសើរឡើង”៕