តើការចុះបញ្ជីដីធ្លីដាច់ដោយដុំមាននិតិវិធីបែបណា?

September 13, 2019

ដោយនៅ ស៊ីវុត្ថា

ភ្នំពេញៈ គេហទំព័រ Propertyarea.asia សូមលើកយកចំណេះដឹងថ្មីមួយទៀតទាក់ទងនឹងវិស័យអចលនទ្រព្យកម្ពុជា ពិសេសចំណដឹងលើការចុះបញ្ជីរដីធ្លីនៅកម្ពុជា។

យោងអនុក្រឹត្យលេខ៤៦ និងលេខ៤៧ ដែលបានដាក់ឲ្យប្រើប្រាស់កាលពីថ្ងៃទី ៣១ ខែឧសភា ឆ្នាំ២០០២។ ក្នុងក្របខ័ណ្ឌគតិយុត្តិមានទម្រង់ពីរនៃការចុះបញ្ជីដីធ្លី គឺការចុះបញ្ជីដីធ្លីជាប្រព័ន្ធ និងការចុះបញ្ជីដីធ្លីដាច់ដោយដុំ។ តែនៅចំនុចនេះយើងខ្ញុំសូមលើកយកពីនីតិវិធីក្នុងការ ចុះបញ្ជីដីធ្លីលក្ខណៈដាច់ដោយដុំ។

ការចុះបញ្ជីដីធ្លីដាច់ដោយដុំនេះ ម្ចាស់កម្មសិទ្ធិអាចធ្វើស្នើសុំធ្វើប័ណ្ណនេះបាន ប៉ុន្តែមានតម្លៃថ្លៃតាមតម្លៃ ដែលបានកំណត់ដោយក្រសួង ទៅតាមទីតាំងដីតាំងនៅ ហើយប្រជាជនភាគច្រើន ច្រើនមិនមានលទ្ធភាពធ្វើប័ណ្ណនេះទុកនោះទេ បើមិនមានតម្រូវការចាំបាច់ក្នុងការលក់ដូរ។ ការចុះបញ្ជីដីធ្លីដាច់ដោយដុំនេះ អាចចែកជា៣ដំណាក់សំខាន់ឬជា៥ដំណាក់កាល។

១. ការដាក់ពាក្យស្នុំសុំចុះបញ្ជីដីធ្លី

ដំបូងម្ចាស់ដី ត្រូវដាក់ពាក្យសុំទៅការិយាល័យភូមិបាលស្រុក /ខ័ណ្ឌ តាមរយៈមេឃុំ/ចៅសង្កាត់ ដែលដីនោះតាំងនៅ។ មេឃុំ/ចៅសង្កាត់ នឹងត្រូវធ្វើការបញ្ជាក់លើចំណុចមួយចំនួនរបស់ម្ចាស់ដីនិងអត្ដសញ្ញាណនៃការប្រើប្រាស់ដី។

២. ក្រុមការងារប្រតិបត្តិ

បន្ទាប់ពីបានទទួលការបញ្ជាក់ពីមេឃុំឬចៅសង្កាត់ ដំណាក់កាលបន្ទាប់ គឺការស្នើសុំទៅសាលាស្រុក/ខ័ណ្ឌដែលដីតាំងនៅ ដើម្បីមន្រ្តីសុរិយោដីស្រុកចុះវាស់វែងនិងកំណត់ព្រំដី។

ជាធម្មតា នៅមុនពេលចុះវាស់វែងកំណត់ព្រំដី ក៏មានការជូនដំណឹងជាសាធារណៈ ១៤ថ្ងៃមុនពេលចុះវាស់ដើម្បីភាគីពាក់ព័ន្ធចូលរួម ឬតវ៉ា។ នៅក្នុងការវាស់វែងនេះ ម្ចាស់កម្មសិទិ្ធ និងម្ចាស់ដីដែលមានព្រំប្រទល់ជាប់គ្នា រួមជាមួយសុរិយោដី សហការដើម្បីវាស់វែងដី ដោយមានការឯកភាពទាំងសងខាងក្រោយមកមន្រ្ដី នឹងមានគូសចេញជាប្លង់ក្បាលដី។

៣. ការបិទផ្សាយជាសាធារណៈ

នៅក្នុងការកសាងប្លង់សុរិយោដីនេះ សាលាស្រុកត្រូវធ្វើការផ្សព្វផ្សាយជាសាធារណៈ។ នៅក្រោយពេលគូសប្លង់សុរិយោដីរួចហើយ ក៏មានការផ្សព្វផ្សាយជាសាធារណៈជាថ្មីម្តងទៀត អំពីប្លង់ដី និងអត្តសញ្ញាណម្ចាស់ដីរយៈពេល៣០ថ្ងៃ ដើម្បីទុកឱកាសឲ្យបុគ្គលពាក់ព័ន្ធមានសិទ្ធិជំទាស់ ឬធ្វើការតវ៉ា។

៤. មន្រ្ដីពិនិត្យនិងសម្រេច

ប្រសិនបើគ្មានការតវ៉ាណាមួយទេនោះអាជ្ញាធរស្រុក/ខ័ណ្ឌ នឹងរៀបចំធ្វើរបាយការណ៍ ទៅឲ្យសុរិយោដីថ្នាក់ខេត្ត/ក្រុងជាអ្នកពិនិត្យសម្រេចជាចុងក្រោយ។

៥. ការប្រគល់ប័ណ្ណ

ជាដំណាក់កាលចុងក្រោយដែលម្ចាស់សាម៉ី ត្រូវទៅទទួលយកប័ណ្ណកាន់កាប់ដីធ្លី(ប្លង់រឹង)ដោយផ្ទាល់ នៅសុរិយោដីខេត្ត/ក្រុងដែលតាំងនៅ ដោយមានការផ្តិតមេដៃទទួលយកជាដើម៕

រដ្ឋាភិបាលបញ្ជាក់ថា បញ្ហាហិរញ្ញវត្ថុរបស់ក្រុមហ៊ុន KrisEnergy មិនរាំងស្ទះដល់ការចាប់ផ្តើមផលិតកម្មប្រេងឆៅនៅកម្ពុជា

September 12, 2019

0

ដោយ ប៊ី

ភ្នំពេញៈ បញ្ហាបំណុលរបស់ក្រុមហ៊ុន KrisEnergy ដែលជាក្រុមហ៊ុនទទួលបានសិទ្ធិវិនិយោគ លើការបូមប្រេងកាតប្លុក A របស់កម្ពុជា នឹងមិនប៉ះពាល់ដល់ការចាប់ផ្តើមផលិតកម្មប្រេងឆៅរបស់កម្ពុជានោះឡើយ។

ក្រុមហ៊ុន KrisEnergy ដែលមានមូលដ្ឋាននៅសឹង្ហបូរី ព្យាយាមស្តារបំណុលជិត ៥០០លានដុល្លារអាមេរិក បន្ទាប់ពីបានជួបបញ្ហា និងដោះស្រាយបំណុល កាលពីខែសីហា។ នេះយោងតាមរបាយការសារព័ត៌មាន Strait Times ដែលមានមូលដ្ឋានរបស់សឹងបូរី។

លោក ម៉េង សក្តិធារ៉ា រដ្ឋលេខាធិការក្រសួងរ៉ែ និងថាមពល នៅថ្ងៃទី១២ ខែកញ្ញា ឆ្នាំ២០១៩ បានបញ្ជាក់ប្រាប់បណ្តាញព័ត៌មាន Fresh News ថា “បញ្ហាកំណែទម្រង់បំណុលហិរញ្ញប្បទានរបស់ KrisEnergy នឹងមិនប៉ះពាល់ ឬរាំងស្ទះដល់ការឈាន ទៅចាប់ផ្តើមផលិតកម្មប្រេងឆៅរបស់កម្ពុជាទេ”។

លោកបានបន្តថា “យើងមានការបារម្ភខ្លះៗពីកត្តាអាកាសធាតុ ដែលអាចបង្កឧបសគ្គខ្លះដល់សុវត្ថិភាព និងដំណើរការសាងសង់ស្ថានីយអណ្តូងប្រេង។ ប៉ុន្តែរហូតមកដល់បច្ចុប្បន្ននេះ ដំណើរការអនុវត្តគម្រោងនៅតែមានវឌ្ឍនភាពទៅមុខជាធម្មតា តាមផែនការគ្រោងទុក ពុំមានការរាំងស្ទះគួរកត់សំគាល់ទេ”។

តំបន់ប្លុក A ត្រូវបានគេរំពឹងថា នឹងផលិតប្រេងឆៅដំបូងនៅកម្ពុជា នៅឆ្នាំក្រោយ ប៉ុន្តែក្រុមអ្នកវិភាគកំពុងចាប់ផ្តើមសង្ស័យថា ក្រុមហ៊ុននេះនឹងឈានដល់គោលដៅរបស់ខ្លួន នៅពេលដែលខ្លួនកំពុងព្យាយាមជាមួយការសងប្រាក់ រាប់រយលានដុល្លារដល់ធនាគារនិងម្ចាស់បំណុលបរទេស។

ក្រុមហ៊ុននេះ បានជាប់គាំងជាបំណុលចំនួន៤៧៦,៨លានដុល្លារ ហើយបានបញ្ឈប់ការសងប្រាក់កម្ចី និងការប្រាក់ចាប់តាំងពីខែ សីហា។

របាយការណ៍របស់ក្រមហ៊ុន Fitch Solutions Macro Research បានលើកឡើងថា “ផែនការរបស់កម្ពុជា ដើម្បីផលិតប្រេងឆៅដំបូងរបស់ខ្លួននៅឆ្នាំ២០២០ ហាក់ដូចជានឹងទទួលរងផលប៉ះពាល់ដោយឧបសគ្គ បន្ទាប់ពីក្រុមហ៊ុន KrisEnergy របស់ប្រទេសសឹង្ហបូរីបានប្រកាសជួបបញ្ហាបំណុលកាលពីខែ សីហាចំពេលតម្លៃប្រេងទាប និងផលិតកម្មប្រេងនិងឧស្ម័នចុះខ្សោយ”។

ក្រុមហ៊ុន KrisEnergy បានស្នើសុំការការពារពីតុលាការរយៈពេល៦ខែ ពីធនាគារ និងម្ចាស់បំណុល ប៉ុន្តែត្រូវបានបដិសេធនៅឯសវនាការកាលពីថ្ងៃច័ន្ទ។

តុលាការសឹង្ហបូរី បានបដិសេធសំណើរយៈពេល៦ខែ និងបានបញ្ជាឲ្យក្រុមហ៊ុនរៀបចំស្តារបំណុលឡើងវិញក្នុងរយៈ ពេល៣ខែ៕

ចិនប្រើប្រាស់រូបិយប័ណ្ណខ្លួនជាអាវុធក្នុងការធ្វើសង្គ្រាមពាណិជ្ជកម្មជាមួយអាមេរិក

September 12, 2019

0

ដោយ Donald Lee

ភ្នំពេញ៖ សេដ្ឋវិទូបានអះអាងថា រដ្ឋាភិបាលចិនកំពុងបញ្ចុះតម្លៃប្រាក់យ័ន ដើម្បីឆ្លើយតបនឹងពន្ធអាមេរិក ដែលនឹងដាក់ពន្ធលើទំនិញទាំងអស់ ដែលចេញមកពីចិនដីគោក។

អ្នកវិភាគហិរញ្ញវត្ថុព្យាករណ៍ថា ប្រាក់យ័ននឹងចុះថោក ធៀបនឹងប្រាក់ដុល្លារអាមេរិក ដោយតម្លៃប្រាក់យ័ននឹងកើនដល់៧យ័ន ទើបស្មើនឹង១ដុល្លារអាមេរិករហូតដល់ដំណាច់ឆ្នាំ។

ការធ្លាក់ចុះតម្លៃប្រាក់យ័នជួយដល់ក្រុមហ៊ុន ដែលនាំចេញពីប្រទេសចិន ដោយបន្ថយតម្លៃនៃការនាំចេញ និងផ្តល់ឱ្យក្រុមហ៊ុននូវអត្ថប្រយោជន៍ប្រកួតប្រជែង នឹងក្រុមហ៊ុនដែលនាំចេញទៅក្រៅប្រទេស។

ប្រាក់យ័នបានធ្លាក់ដល់កម្រិតទាបមួយ មិនធ្លាប់មានក្នុងរយៈពេល១០ឆ្នាំ នៅក្នុងអ្វីដែលមន្រ្តីរដ្ឋាភិបាលអាមេរិកជាច្រើន បានដាក់ឈ្មោះថាជា “ការរៀបចំរូបិយវត្ថុ”។

ប្រធានាធិបតីអាមេរិកលោក Donald Trump បានសរសេរនៅលើបណ្តាញសង្គមធ្វីតធឺថា “ចិនបានទម្លាក់តម្លៃរូបិយប័ណ្ណរបស់ពួកគេ នៅកម្រិតទាបមួយជាប្រវត្តិសាស្ត្រ”។លោកបានបន្ថែមថា “វាត្រូវបានគេហៅថា“ការកេងចំណេញរូបិយវត្ថុ”។

អ្នកវិភាគហិរញ្ញវត្ថុបានឯកភាពគ្នាថា រដ្ឋាភិបាលចិនរៀបចំអត្រារូបិយប័ណ្ណ ជាអាវុធយុទ្ធសាស្ត្រក្នុងសង្គ្រាមពាណិជ្ជកម្ម។

លោក Eric Fishwick សេដ្ឋវិទូជាន់ខ្ពស់របស់ក្រុមហ៊ុន CLSA បាននិយាយនៅក្នុងបទសម្ភាសន៍មួយនៅលើកញ្ចក់ទូរទស្សន៍អាមេរិកថា “ក្រឡេកមើលរបៀបដែលការជួញដូររូបិយប័ណ្ណ វាត្រូវបានបង្ហាញយ៉ាងច្បាស់ថា វាកំពុងត្រូវបានប្រើជាមធ្យោបាយមួយដើម្បីទូទាត់ផលប៉ះពាល់នៃពន្ធគយ”។

លោកបានបន្ថែមថា“ ប្រាក់យ័នត្រូវបានធ្វើឱ្យចុះខ្សោយ នៅពេលណាដែលអាមេរិកធ្វើឱ្យមានភាពតានតឹងកាន់តែខ្ពស់”៕

មន្ត្រីជាន់ខ្ពស់ក្រសួងរៀបចំដែនដី គាំទ្រការផ្សព្វផ្សាយរបស់គេហទំព័រ Propertyarea.asia

September 12, 2019

0

ដោយគង់ សូរិយា

ភ្នំពេញៈ មន្ត្រីជាន់ខ្ពស់ក្រសួងរៀបចំដែនដី នគរូនីយកម្ម និងសំណង់បានគាំទ្រដល់ការផ្សព្វផ្សាយរបស់គេហទំព័រPropertyarea.asia ដែលជាគេហទំព័រផ្តោតលើការផ្សព្វផ្សាយព័ត៌មានពីវិស័យសំណង់ និងអចលនទ្រព្យ និងទិដ្ឋភាពទូទៅនៃសេដ្ឋកិច្ចកម្ពុជា។

ក្នុងឱកាសអនុញ្ញាត្តឲ្យលោកយិន លាងគង់ ស្ថាបនិក និងអគ្គនាយកគេហទំព័រ Propertyarea.asia និងសហការីចូលជួបសម្តែងការគួរសម និងស្នើសុំការគាំទ្រពីក្រសួង លោកលាង មុនីរីទ្ឋរដ្ឋលេខាធិការ និងជាតំណាងដ៏ខ្ពង់ខ្ពស់របស់លោកឧបនាយករដ្ឋមន្រ្តីជា សុផារ៉ា រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់បានផ្តល់អនុសាសន៍ល្អៗជាច្រើនដល់ថ្នាក់ដឹកនាំគេហទំព័រ និងសហការី ដើម្បីធ្វើយ៉ាងណាផ្តល់ព័ត៌មានពិត មានសុក្រិតភាពដល់សាធារណៈជន ដើម្បីផ្តល់ផលប្រយោជន៍ជូនប្រជាពលរដ្ឋ និងប្រទេសជាតិ។

លោកបន្តថា កន្លងមកមន្រ្តីក្រសួងដែនដីបានយកព័ត៌មាន ពីគេហទំព័រនេះទៅផ្សព្វផ្សាយដល់សាធារណៈជន និងមន្រ្តីក្រសួងបានសិក្សាស្វែងយល់ផងដែរ ពិសេសលោកសង្កេតឃើញថា គេហទំព័រនេះសរសេរព័ត៌មានបានល្អ មានសុក្រិតភាព ដោយមិនមានការបំភ្លៃព័ត៌មានណាមួយ នាំឲ្យសាធារណៈជនមានការយល់ច្រឡំឡើយ។

លោកលាង មុនីរិទ្ឋក៏បានជំរុញឲ្យថ្នាក់ដឹកនាំគេហទំព័រនេះ បន្តរក្សានូវគុណភាពព័ត៌មាន ដែលមានសុក្រិតភាព ដើម្បីផ្តល់ផលប្រយោជន៍ដល់សាធារណៈជនបន្តទៀត ដើម្បីផ្តល់ជាគុណតម្លៃដល់ក្រុមហ៊ុនផង ដល់សាធារណៈជនផង និងប្រទេសជាតិផង។

ជាមួយគ្នានេះ លោកយិន លាងគង់បានជម្រាបជូនថ្នាក់ដឹកនាំជាន់ខ្ពស់ក្រសួងរៀបចំដែនដី នគរូបនីយកម្ម និងសំណង់ពីប្រវត្តិនៃការកកើតនូវគេហទំព័រនេះ ពិសេសពីផែនការនិងចក្ខុវិស័យរបស់ក្រុមហ៊ុន ដើម្បីធ្វើយ៉ាងណាឲ្យសារព័ត៌មានមួយនេះដើរតួនាទីជាកញ្ចក់ឆ្លុះបញ្ចាំងនូវការពិតរបស់សង្គម ពិសេសផ្តល់នូវព័ត៌មានពិត និងមានសុក្រិតភាព ដែលសារធាណៈជន និងអ្នកវិនិយោគជាតិ អន្តរជាតិអាចយកទៅប្រើប្រាស់ដើម្បីធ្វើជាមូលដ្ឋានវិភាគ ពិចារណាមុនសម្រេចចិត្តវិនិយោគ។

លោកបន្តថា គេហទំព័រ Propertyarea.asia បានកើនបុគ្គលិកពី៤នាក់ ដល់១២នាក់ និងបានពង្រីកការផ្សព្វផ្សាយជាពីរភាសាគឺភាសាខ្មែរ និងភាសាអង់គ្លេសទៅកាន់់មជ្ឈដ្ឋានជាតិ និងអន្តរជាតិ និងពង្រីកការផ្សព្វផ្សាយទៅកាន់បណ្តាញទំនាក់ទំនងសង្គម និងប្រព័ន្ឋអនឡាញ (youtube) ផងដែរ។ លោកបន្តថា បច្ចុប្បន្ននេះ គេហទំព័ររបស់យើងបានក្លាយជាវេទិកាផ្សព្វផ្សាយព័ត៌មានសេដ្ឋកិច្ច ពិសេសវិស័យអចលនទ្រព្យឈានមុខគេនៅកម្ពុជា ដោយចំនួនអ្នកអានបានកើនចន្លោះ១៥,០០០ ទៅ២០,០០០នាក់ក្នុងមួយថ្ងៃ។

លោកយិន លាងគង់ក៏បានជម្រាបថ្នាក់ដឹកនាំក្រសួង ពីចក្ខវិស័យរបស់គេហទំព័រនេះទៅថ្ងៃអនាគត ដោយចង់ប្រែក្លាយគេហទំព័រនេះជាវេទិការបស់ជាតិ ដែលប្រជាពលរដ្ឋ អ្នកវិនិយោគជាតិ អន្តរជាតិអាចប្រើប្រាស់ និងអានព័ត៌មានដើម្បីយកធ្វើជាមូលដ្ឋាននៃការពង្រីកចំណេះដឹង និងមូលដ្ឋាននៃការត្រិះរិះពិចារណា និងវិភាគដើម្បីកាត់បន្ថយហានិភ័យនៃការបំពុលពីព័ត៌មានក្លែងក្លាយ។

ជាការឆ្លើយតបលោកលាង មុនីរិទ្ឋបានកោតសរសើរដល់គេហទំព័រនេះ ដែលបានផ្តល់នូវព័ត៌មានពិតជាក់លាក់ ដោយឈរលើមូលដ្ឋានវិភាគ សុក្រិតមិនលំអៀង និងជាបណ្តាញព័ត៌មាន ដែលបានផ្សព្វផ្សាយពីចំណេះដឹងថ្មីៗ និងពីគំរោងអភិវឌ្ឍន៍ធំៗនៅកម្ពុជា ដើម្បីផ្តល់ជូនឲ្យសាធារណៈជនបានសិក្សាស្វែងយល់៕

បណ្តាប្រទេស CLMV បានព្រមព្រៀងគ្នាលើផែនការអភិវឌ្ឍន៍សេដ្ឋកិច្ចក្នុងតំបន់

September 12, 2019

0

ដោយ ប៊ី

ភ្នំពេញៈ ប្រទេសកម្ពុជា ឡាវ មីយ៉ាន់ម៉ា និងវៀតណាម (CLMV) បានព្រមព្រៀងលើក្របខ័ណ្ឌ សម្រាប់ការអភិវឌ្ឍសេដ្ឋកិច្ច ដែលនឹងត្រូវដាក់ជូនមេដឹកនាំរបស់ CLMV ដើម្បីអនុម័តនៅឆ្នាំក្រោយ។ នេះយោងតាមក្រសួងពាណិជ្ជកម្ម បានប្រកាសនៅថ្ងៃពុធ នេះ។

ការប្រកាសនេះត្រូវបានធ្វើឡើង បន្ទាប់ពីកិច្ចប្រជុំរដ្ឋមន្រ្តីសេដ្ឋកិច្ច CLMV លើកទី ១១ ក្នុងអំឡុងពេលនៃកិច្ចប្រជុំលើកទី ៥១ នៃរដ្ឋមន្រ្តីសេដ្ឋកិច្ចអាស៊ានដែលបានធ្វើឡើងនៅថ្ងៃទី ៥-៨ ខែកញ្ញានៅទីក្រុងបាងកក។

ក្របខ័ណ្ឌសម្រាប់ការអភិវឌ្ឍ CLMV នឹងត្រូវបញ្ជូនទៅថ្នាក់ដឹកនាំប្រទេស ដើម្បីអនុម័តនៅឯកិច្ចប្រជុំកំពូល CLMV លើកទី១០ ដែលគ្រោងនឹងធ្វើនៅឆ្នាំក្រោយនៅប្រទេសឡាវ។

ក្របខ័ណ្ឌអភិវឌ្ឍន៍ផ្តោតលើធាតុ៣រួមមាន ការតភ្ជាប់ដើម្បីសម្រួលដល់ការវិនិយោគ និងកិច្ចសហប្រតិបត្តិការពាណិជ្ជកម្ម វិធានការដើម្បីទាក់ទាញកម្មករជំនាញ និងការវិនិយោគក្នុងវិស័យ ដូចជា កសិកម្ម អាហារ និងទេសចរណ៍។

កិច្ចប្រជុំរដ្ឋមន្ត្រីសេដ្ឋកិច្ច CLMV ដែលដឹកនាំដោយប្រទេសកម្ពុជា និងដឹកនាំដោយរដ្ឋមន្រ្តីក្រសួងពាណិជ្ជកម្មលោកប៉ាន សូរស័ក្តិ ចូលរួមដោយរដ្ឋមន្រ្តីសេដ្ឋកិច្ច និងគណៈប្រតិភូមកពីប្រទេស CLMV ក៏ ដូចជាលេខាធិការដ្ឋានអាស៊ាន។

នៅក្នុងកិច្ចប្រជុំនេះរដ្ឋមន្ត្រីបានពិភាក្សា និងពិនិត្យវឌ្ឍនភាពនៃការអនុវត្តផែនការសកម្មភាព CLMV ឆ្នាំ ២០១៧-២០១៨ និង ២០១៩-២០២០។

ដោយឡែក គម្រោងទាំងពីរ ដែលត្រូវបានអនុវត្តដោយជោគជ័យ គឺទេសចរណ៍អេឡិចត្រូនិច ដែលជាវិធីសាស្រ្តច្នៃប្រឌិតថ្មីមួយ សម្រាប់សហគ្រាសទេសចរណ៍ខ្នាតតូច និងមធ្យមនៅក្នុងប្រទេស CLMV និងការវាយតម្លៃក្របខ័ណ្ឌច្បាប់និងបទប្បញ្ញត្តិស្តីពី ពាណិជ្ជកម្មអេឡិចត្រូនិក៕

ឧបនាយករដ្ឋមន្ត្រីជា សុផារ៉ាទទួលយកសំណើពីវិស័យឯកជនដែលកំពុងវិនិយោគក្នុងវិស័យសំណង់

September 12, 2019

0

ដោយនៅ វឌ្ឈនា

ភ្នំពេញៈ លោកឧបនាយករដ្ឋមន្រ្តីជា សុផារ៉ារដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់បានទទួលយក និងសន្យាដោះស្រាយបញ្ហាប្រឈមរបស់វិស័យឯកជនផ្នែកសំណង់ និងអចលនទ្រព្យ។នេះបើតាមលោកឧកញ៉ាលី ហួរប្រធានសមាគមអ្នកអភិវឌ្ឍន៍លំនៅដ្ឋានកម្ពុជា។

កិច្ចប្រជុំជាមួយក្រុមការងារទី១៣ផ្នែកសំណង់នេះ បានដឹកនាំដោយលោកឧបនាយករដ្ឋមន្រ្តីជា សុផារ៉ា រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់។ កិច្ចប្រជុំនេះ ក៏មានការចូលរួមពីអ្នកឧកញ៉ាគិត ម៉េងប្រធានសភាពាណិជ្ជកម្មកម្ពុជា និងលោកឧកញ៉ាលី ហួរសហប្រធានក្រុមការងារទី១៣ ដែលបានធ្វើឡើងនាព្រឹកថ្ងៃទី១២ កញ្ញានេះ។

ក្នុងកិច្ចប្រជុំដ៏មានសារៈសំខាន់នេះ ក្រុមការងារវិស័យឯកជនបានលើកឡើងនូវបញ្ហាប្រឈមមួយចំនួនក្នុងវិស័យសំណង់ និងអចលទ្រព្យ ដូចជា និតិវិធីយឺតយ៉ាវនៃការស្នើសុំអាជ្ញាប័ណ្ណសាងសង់ និងអាជ្ញាប័ណ្ណពាក់ព័ន្ឋនានា ដើម្បីជូនក្រសួងជួយសម្រួលនិងដោះស្រាយ។

លោកឧកញ៉ាលី ហួរបានមានប្រសាសន៍ឲ្យដឹងថា ក្រុមការងារទី១៣បានលើកឡើងពីបញ្ហាប្រឈមមួយចំនួន ជូនលោកឧបនាយករដ្ឋមន្រ្តីបានដឹង និងជួយដោះស្រាយ ដែលជាលទ្ឋផល គឺក្រសួងសន្យានឹងដោះស្រាយបញ្ហាប្រឈម និងជួយសម្របសម្រូលលើការងារនេះ ដើម្បីធ្វើយ៉ាងណាឲ្យការអភិវឌ្ឍវិស័យសំណង់ និងអចលនទ្រព្យនៅកម្ពុជាមានការរីកចម្រើនប្រកបដោយចីរភាព ពិសេសពង្រឹងបាននូវបទដ្ឋានសំណង់ប្រកបដោយគុណភាពខ្ពស់។

លោកឧកញ៉ាបានបន្តថា “ប្រមុខរដ្ឋាភិបាលកម្ពុជា បានបង្កើតក្រុមការងារទី១៣ដែលមានខ្ញុំជាសហប្រធាន ដើម្បីធ្វើយ៉ាងណាជំរុញនិងអភិវឌ្ឍន៍វិស័យនេះ ឲ្យមានការរីកចម្រើនប្រកបដោយគុណភាព និងប្រសិទ្ឋភាពខ្ពស់”។

ជាមួយគ្នានេះលោក ឧកញ្ញា លឹមហេង អនុប្រធានសភាពាណិជ្ជកម្មកម្ពុជា បានឱ្យដឹងផងដែរថា នៅក្នុងជំនួបនេះដែរ ខាងវិស័យឯកជនបានលើកយកបញ្ហាចំនួន៥ ដាក់ជូន លោកឧបនាយករដ្ឋមន្រ្តីជាសុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសមណង់ ដើម្បីដោះស្រាយនូវទុក្ខលំបាក់របស់វិស័យឯកជន។

បញ្ហាទាំង៥នេះ រួមមាន ទី១ បញ្ហាភាពយឺតយ៉ាវដោយសារកង្វះមន្រ្តីធ្វើការ ទី២ បញ្ហាស្នើសុំច្រកចេញចូលតែមួយ ទី៣បញ្ហាបាត់បង់កន្លែងរំដោះប្រព័ន្ធទឹក និង ប្រព័ន្ធអគ្គីសនី តាមបណ្តាដងផ្លូវជាតិមួយចំនួន ទី៤ បញ្ហាការស្នើសុំច្បាប់សាងសង់ និងទី៥ បញ្ហាការសុំអាជ្ញាប័ណ្ណលក់ និងបញ្ហាផ្សេងៗមួយចំនួនត្រូវបានដោះស្រាយរួចរាល់។

លោកឧកញ៉ាលឹម ហេងបានបន្តថា “បញ្ហាទាំងនេះ ត្រូវបានទេសរដ្ឋមន្ត្រី ជាសុផារ៉ា ទទួលតាមការស្នើសុំរបស់វិស័យឯកជន ជាពិសេសវិស័យឯកជនយទៅដោះស្រាយជាបណ្តើរៗ”។

ជាមួយគ្នានេះ លោកឧបនាយករដ្ឋមន្ត្រីនឹងបង្កើតក្រុមការងារ ក្នុងការបង្កើតយន្តការភាពជាដៃគូរវាងវិស័យឯកជន ជាមួយក្រសួងក្នុងគោលបំណងដោះស្រាយទៅតាមជំនាញរួមានសូរិយោដី សំណង់ និងវិវាទលើបញ្ហាផ្សេងៗ ហើយអ្វីៗទាំងអស់នេះ គឺជាការចង់បានរបស់វិស័យឯកជន៕

មជ្ឈមណ្ឌលពាណិជ្ជកម្ម និងពិព័រណ៍ថ្មីមួយទៀតនឹងបង្ហាញខ្លួននៅក្នុងខណ្ឌសែនសុខ

September 12, 2019

0

ដោយរ៉ា ណេត

ភ្នំពេញ៖ មជ្ឈមណ្ឌលពាណិជ្ជកម្ម និងពិព័រណ៍លំដាប់អន្តរជាតិថ្មីមួយទៀត នឹងបង្ហាញខ្លួនៅតាមមហាវិថីហាណូយ ខណ្ឌសែនសុខ រាជធានីភ្នំពេញ ទីដែលមជ្ឈមណ្ឌលពាណិជ្ជកម្ម និងសំណង់បុរីលំនៅដ្ឋានបានរីកចម្រើនយ៉ាងលឿន ក្នុងប៉ុន្មានឆ្នាំចុងក្រោយនេះ។

បច្ចុប្បន្ននេះ បានក្លាយជាតំបន់ដែលមានប្រជាប្រិយភាព លើវិស័យលំនៅដ្ឋានកម្រិតមធ្យម និងកម្រិតខ្ពស់ ស្របពេលដែលកំណើនប្រជាសាស្ត្របានចូលទៅរស់នៅកាន់តែច្រើន រួមជាមួយនឹងវត្តមាននៃផ្សារទំនើបនានាផងដែរ។ បន្ថែមពីនេះ នៅត្រឹមដើមឆ្នាំ២០២០ មជ្ឈមណ្ឌលពាណិជ្ជកម្ម និងពិព័រណ៍ថ្មីមួយទៀតនឹងចាប់ដំណើរការ ដែលកាន់តែជួយជំរុញ ឱ្យតំបន់ភាគខាងជើងរាជធានីភ្នំពេញមួយនេះ កាន់តែមានសក្ដានុពលខ្លាំងថែមទៀត។

មជ្ឈមណ្ឌលពាណិជ្ជកម្ម និងពិព័រណ៍ថ្មីមួយទៀត ដែលមានឈ្មោះថា B2B Park មានទីតាំងស្ថិតនៅបណ្តោយផ្លូវហាណូយ សង្កាត់ឃ្មួញ ខណ្ឌសែនសុខ នឹងចាប់ផ្តើមដំណើរការដើម្បីបំពេញតាមតម្រូវការរបស់អតិថិជន។

លោក ព្រឿង វិបុល ប្រធានផ្នែកជួលទីតាំងមជ្ឈមណ្ឌលពាណិជ្ជកម្ម និងពិព័រណ៍ B2B Park ដែលគ្រោងនឹងដំណើរការនៅពេលឆាប់ៗខាងមុខនេះ បានបង្ហើបឱ្យដឹងថា គម្រោងមួយនេះ ត្រូវបានវិនិយោគដោយអ្នកជំនួញក្នុងស្រុកសុទ្ធសាធ និងផ្តោតសំខាន់ទៅលើអតិថិជនកម្រិតធម្យម។ លោកបានបន្តឱ្យដឹងទៀតថា ជាមួយនឹងកិច្ចចាប់ផ្តើមដំណើរការនៅដើមឆ្នាំ២០២០ខាងមុខនេះ មជ្ឈមណ្ឌល B2B Park ដែលស្ថិតនៅលើផ្ទៃដីទំហំជាង២៨០០០ ម៉ែត្រការ៉េ ត្រូវបានបែងចែកជាផ្នែកផ្សេងៗពីគ្នាច្រើន ដើម្បីតម្រូវទៅតាមសេចក្ដីត្រូវការរបស់អតិជន រួមមានដូចជាជាន់សម្រាប់លក់ទំនិញ និងផលិតផលប្រើប្រាស់ទូទៅ ជាន់លក់សម្ភារៈ និងឧបករណ៍ប្រើប្រាស់អេឡិចត្រូនិច ជាន់សម្រាប់ពិព័រណ៍ផលិតផល ជាន់សម្រាប់ជួលជាការិយាល័យ ; ជាន់លក់ម្ហូបអាហារ និងភេសជ្ជៈចំរុះ និងជាន់ Sky Bar។

បន្ថែមពីនេះ B2B Park ក៏មានការរោងកុនទំនើប កន្លែងអង្គុយលំហែរកាយ និហងទេសចរណ៍កម្សាន្ត ជាមួយនឹងសួនច្បារដ៏ស្រស់ស្អាតយ៉ាងធំទូលាយ។ ជាមួយនឹងការត្រៀមខ្លួនចាប់ដំណើរការនៅពេលខាងមុខនេះ លោកបានបង្ហាញពីភាពជឿជាក់ថា នឹងទទួលបានការគាំទ្រ ពីសំណាក់អតិថិជនច្រើនជាក់ជាមិនខាន ដោយសារតែចំណែកទីផ្សារ ដែលស្ថិតនៅក្នុងគោលដៅរបស់មជ្ឈមណ្ឌល B2B Park មិនបានប្រកួតប្រជែងជាមួយបណ្តាផ្សារទំនើបដែលមានស្រាប់នោះទេ។

នាយិកាប្រចាំប្រទេសនៃក្រុមហ៊ុន CBRE Cambodia លោកស្រីអាន សុធីតាបានថ្លែងថា នៅតំបន់ខាងលើនេះ មានភាពទាក់ទាញខ្លាំង និងមានតម្រូវការបញ្ជាទិញខ្ពស់។ លោកស្រីបានបន្តទៀតថា បច្ចុប្បន្ននេះ បើទោះជាមានផ្សារទំនើបច្រើនក៏ពិតមែន ប៉ុន្តែវានៅតែទាមទារឱ្យមានផ្សារទំនើបបន្ថែមទៀត ដែលមានការផ្គត់ផ្គង់ផលិតផលផ្សេងៗគ្នា មិនមែនជាការប្រកួតប្រជែង។

លោកស្រីបានបញ្ជាក់ថា “នៅក្នុងខណ្ឌសែនសុខនាពេលបច្ចុប្បន្ននេះ ចំនួនផ្សារទំនើបនៅមិនទាន់លើសតម្រូវការនោះទេ ហើយកម្លាំងនៃការបញ្ជារទិញនៅតែបន្តមានកំណើន”៕

អ្នកនាំពាក្យរដ្ឋាភិបាលអះអាងថាប្រាក់ចំណូលប្រជាជនកម្ពុជាកើនឡើងដល់១.៦៧៩ដុល្លារក្នុងឆ្នាំនេះ

September 12, 2019

0

ដោយ វុត្ថា

ភ្នំពេញ៖ អង្គភាពអ្នកនាំពាក្យរាជរដ្ឋាភិបាលបានឱ្យដឹងថា ស្ថានភាពនៃជីវភាពប្រជាជនកម្ពុជាទទួលបានកំណើនសេដ្ឋកិច្ច ដោយមនុស្សម្នាក់ៗនឹងមានកំណើនកើនឡើងដល់១.៦៧៩ដុល្លារ ក្នុងឆ្នាំ២០១៩នេះ កើនឡើងពី ១៥៤៨ដុល្លារធៀបនឹងឆ្នាំមុន ចំណែកអត្រានៃភាពក្រីក្រត្រូវបានកាត់បន្ថយមកក្រោម ១០%។

យោងតាមសេចក្តីប្រកាសព័ត៌មានរបស់អង្គភាព អ្នកនាំពាក្យរាជរដ្ឋាភិបាលកម្ពុជាប បានចេញផ្សាយនៅថ្ងៃទី ១២ ខែកញ្ញា ឆ្នាំ ២០១៩ នេះថា ស្ថានភាពទីផ្សារការងារនៅកម្ពុជាមានលក្ខណៈវិជ្ជមាន ពីព្រោះគ្មានការងារធ្វើនៅកម្ពុជា ក៏កាន់តែកម្រិតទាបប្រមាណជា០,៣ភាគរយ ខណៈការងារថ្មីៗជាច្រើនទៀត ត្រូវង្កើតនៅក្នុងវិស័យឧស្សាហកម្ម សេវាកម្ម និងសណង់។

សូមអានសេចក្តីប្រកាសព័ត៌មានរបស់អង្គភាព អ្នកនាំពាក្យរាជរដ្ឋភិបាលកម្ពុជាខាងក្រោមនេះ៖

កម្ពុជាចុះហត្ថលេខាលើគំរោងថាមពលអគ្គិសនីចំនួន ២៤០០មេហ្កាវ៉ាត់ពីប្រទេសឡាវក្រោមវត្តមាននាយករដ្ឋមន្ត្រីទាំងពីរ

September 12, 2019

0

ដោយ វុត្ថា

ភ្នំពេញៈ កម្ពុជាបានចុះហត្ថលេខទិញថាមពលអគ្គិសនី ពីរោងចក្រផលិតអគ្គិសនីដុតធ្យូងថ្មអានុភាព២៤០០មេហ្កាវ៉ាត់ នៅតំបន់រ៉ែធ្យូងថ្ម នៅខេត្តសេកុង សាធារណរដ្ឋប្រជាធិបតេយ្យប្រជាមានិតឡាវនៅថ្ងៃនេះ ក្រោមអធិបតីភាពនាយករដ្ឋមន្ត្រីនៃប្រទេសទាំងពីរ ។

គណៈរដ្ឋមន្ត្រីនៃប្រទសកម្ពុជា បានសម្រេចអនុម័តផ្លូវការនូវការទិញថាមពលអគ្គិសនីពីរោងចក្រផលិតអគ្គិសនីដុតធ្យូងថ្មនេះ ដោយសារកម្ពុជាមានសន្តិភាពនិងស្ថិរភាពនយោបាយ និងការអភិវឌ្ឍយ៉ាងឆាប់រហ័សលើគ្រប់វិស័យ ទន្ទឹមនឹងស្ថានភាពដ៏កាន់តែល្អនៅក្រោយការបោះឆ្នោតសកលឆ្នាំ២០១៨ សកម្មភាពវិនិយោគ បានកើនឡើងយ៉ាងគំហុកលើសពីពេលមុនៗ ជាពិសេសវិស័យសំណង់ នេះជាប្រការជះឥទ្ធិពលឱ្យការប្រើប្រាស់ថាមពលអគ្គិសនីនៅឆ្នាំ២០១៩ និងឆ្នាំបន្តបន្ទាប់ទៅមុខទៀតអាចនឹង កើនឡើងលើសពីការគ្រោងទុក។

;ចំពោះស្ថានភាពជាក់ស្តែងថ្មីនេះ ដើម្បីឱ្យការផ្គត់ផ្គង់ថាម ពលអគ្គិសនីនៅកម្ពុជាមានសុវត្ថិភាព និងបរិមាណគ្រប់គ្រាន់ រាជរដ្ឋាភិបាលបានធ្វើការព្យាករណ៍សេចក្ដីត្រូវការថាមពលអគ្គិសនីឡើងវិញយ៉ាងប្រុងប្រយ័ត្ន និងរកប្រភពថាមពលអគ្គិសនីបន្ថែមឱ្យបានគ្រប់គ្រាន់ទាន់តាមកំណើនតម្រូវការ ព្រមទាំងរៀបចំអភិវឌ្ឍន៍ប្រព័ន្ធបណ្ដាញចែកចាយអគ្គិសនីគ្រប់រូបភាពទូទំាងប្រទេស។ ដូចបណ្តាប្រទេសនានាមួយចំនួនក្នុងតំបន់ដែរ ក្រៅពីការអភិវឌ្ឍប្រភពថាមពលអគ្គិសនីក្នុងស្រុក ប្រទេសកម្ពុជាត្រូវការនំាចូលថាមពល អគ្គិសនីបន្ថែមទៀតពីប្រទេសជិតខាង។

ក្នុងបរិបទនេះ រាជរដ្ឋាភិបាលបានតម្រង់ទិសជាអាទិភាពទៅរកប្រទេសឡាវដែល ការនំាចូលថាមពលអគ្គិសនីពីប្រទេសឡាវ មានលក្ខណៈអនុគ្រោះទាំងថ្លៃ ទំាងបរិមាណ និងលក្ខខណ្ឌទិញលក់ល្អប្រសើរ ហើយមានសុវត្ថិភាពយូរអង្វែង។

គម្រោង ទិញថាមពលអគ្គិសនីផលិតដោយធ្យូងថ្ម២៤០០មេហ្កាវ៉ាត់ ពីប្រទេសឡាវ មកពីរោងចក្រចំនួនពីរកន្លែង ដែលត្រូវផ្គត់ផ្គង់ថាមពលអគ្គិសនីផ្តាច់មុខមកកម្ពុជាតែមួយគត់ ដោយភ្ជាប់ផ្ទាល់មកប្រព័ន្ធផ្គត់ផ្គង់អគ្គិសនីរបស់កម្ពុជា។ គម្រោងវិនិយោគនេះមានទំហំទុនសរុបចំនួន៤៩៧០លានដុល្លារអាមេរិក និងមានអាណត្តិនៃកិច្ចព្រមព្រៀងទិញលក់អគ្គិសនីរយៈពេល៣០ឆ្នំា។

ចំពោះអានុភាពក្រុមហ៊ុន TSBP SEKONG POWER AND MINERAL COMPANY LIMITED អាចបញ្ចេញបានចំនួន៦០០មេហ្កាវ៉ាត់ និងក្រុមហ៊ុន XEKONG THERMAL POWER PLANT COMPANY LIMITED ; អាចបញ្ចេញបានចំនួន១៨០០មេហ្កាវ៉ាត់។ ក្រុមហ៊ុនទំាងពីរខាងលើនេះ ទទួលបានសម្បទានធ្វើការអភិវឌ្ឍអណ្តូងរ៉ែធ្យូងថ្ម និងរោងចក្រ ផលិត អគ្គិសនីពីរដ្ឋាភិបាលប្រទេសឡាវ។

គម្រោងនេះផ្តល់អត្ថប្រយោជន៍ចំពោះប្រទេស កម្ពុជាដូចជា ទី១-ទទួលបានថ្លៃអគ្គិសនី៧,៧សេនដុល្លារអាមេរិក ក្នុងមួយគីឡូវ៉ាត់ម៉ោង ជាថ្លៃទាប ធៀបនឹងបណ្តារោងចក្រផលិតអគ្គិសនីដុតធ្យូងថ្មផ្សេងទៀតនៅកម្ពុជា និងមានថ្លៃថេរ ហើយថ្លៃនេះបានឆ្លើយតបនឹងគោលនយោបាយរបស់រាជរដ្ឋាភិបាល ក្នុងការបញ្ចុះថ្លៃភ្លើងនា ពេលអនាគត។ ទី២-ទទួលបានលក្ខខណ្ឌបច្ចេកទេស និងសេដ្ឋកិច្ចនៃកិច្ចព្រមព្រៀងទំាងពីរមានលក្ខណៈប្រសើរជាងកិច្ចព្រមព្រៀងដែលធ្លាប់មានកន្លងមក។ ទី៣-ជួយកាត់បន្ថយការទិញថាមពលអគ្គិសនីដែលមានថ្លៃខ្ពស់នំាចូលមកពីប្រទេសវៀតណាម និងប្រទេសថៃនាពេល បច្ចុប្បន្ន។

ទី៤-ធានាបានការផ្គត់ផ្គង់ថាមពលបន្ថែម ដល់ប្រព័ន្ធអគ្គិសនីជាតិឱ្យមានស្ថិរភាព ជាពិសេសនៅរដូវប្រាំង។ ទី៥-នំាមកនូវចំណេះដឹង និងការបណ្តុះបណ្តាលបង្កើនសមត្ថភាព ជំនាញរបស់កម្មករនិយោជិតអគ្គិសនីកម្ពុជា តាមរយៈការសិក្សានៅរោងចក្រអគ្គិសនីផ្ទាល់។ ទី៦-ផ្តល់លទ្ធភាពឱ្យរាជរដ្ឋាភិបាលកម្ពុជា វិនិយោគសាងសង់ខ្សែបញ្ជូនតង់ស្យុងខ្ពស់៥០០គីឡូវ៉ុលថ្មីបន្ថែមទៀត ដែលអនុញ្ញាតឱ្យប្រទេសកម្ពុជាអាចទិញថាមពលដែលមានថ្លៃទាបសមរម្យ ពីបណ្តុំស្ថានីយវារីអគ្គិសនីនៅភាគខាងត្បូង នៃប្រទេសឡាវ និងទី៧-មិនមានផលប៉ះពាល់បរិស្ថាននៅក្នុងប្រទេសកម្ពុជា៕

ស្ថានភាពធូរស្រាល៖ លោក Donald Trump ពន្យាពន្ធលើទំនិញចិនក្នុងពេលខួបលើកទី៧០របស់ចិន

September 12, 2019

0

ដោយ Donald Lee

ភ្នំពេញ៖ ប្រធានាធិបតីអាមេរិក Donald Trump បានយល់ព្រមពន្យាពេលការដំឡើងពន្ធថ្មី ដែលត្រូវបានកំណត់សម្រាប់ថ្ងៃទី១ខែតុលា តាមសំណើរបស់រដ្ឋាភិបាលចិន ដែលគ្រោងនឹងរៀបចំពិធីដ៏ធំមួយសម្រាប់ខួបលើកទី៧០ នៃសាធារណរដ្ឋប្រជាមានិតចិន។

លោក Liu He ឧបនាយករដ្ឋមន្ត្រីនៃប្រទេសចិន បានធ្វើការស្នើសុំផ្ទាល់ទៅកាន់ប្រធានាធិបតីអាមេរិក Trump។

ការដំឡើងពន្ធនឹងប៉ះពាល់ដល់ទំនិញចិន ដែលមានតម្លៃ២៥០ពាន់លានដុល្លារ។ ពន្ធនេះនឹងចូលជាធរមាននៅថ្ងៃទី១៥ ខែ តុលា ពីរសប្តាហ៍បន្ទាប់ពីកាលបរិច្ឆេទដើម។

ការសរសេររបស់លោក Trump នៅលើបណ្តាញទំនាក់ទំនងសង្គម Twitter កាលពីថ្ងៃពុធបានឲ្យដឹងថា “តាមសំណើរបស់ឧបនាយករដ្ឋមន្រ្តីចិន លោក Liu He ហើយដោយសារតែសាធារណរដ្ឋប្រជាមានិតចិន នឹងប្រារព្ធខួបលើកទី៧០របស់ពួកគេ នៅថ្ងៃទី១ ខែតុលា យើងបានព្រមព្រៀងគ្នាជាកាយវិការនៃឆន្ទៈល្អ ក្នុងការផ្លាស់ប្តូរការដំឡើ ពន្ធលើទំនិញចំនួន ដែលមានតម្លៃ២៥០ពាន់លានដុល្លារ (២៥% ទៅ ៣០%) ចាប់ពីថ្ងៃទី ១ ដល់ថ្ងៃទី១៥ ខែតុលា”។

សង្គ្រាមពាណិជ្ជកម្មរវាងអាមេរិក និងចិនបានបំផ្លាញសេដ្ឋកិច្ចពិភពលោក និងជាផ្នែកសំខាន់មួយនៃសេដ្ឋកិច្ចពិភពលោកឆ្ពោះទៅរកវិបត្តិសេដ្ឋកិច្ច។

វិនិយោគិនអាស៊ី កំពុងមានការព្រួយបារម្ភកាន់តែខ្លាំងឡើង អំពីរបៀបដែលសង្គ្រាមពាណិជ្ជកម្មនឹងជះឥទ្ធិពល ដល់កំណើនសេដ្ឋកិច្ចនៅក្នុងតំបន់អាស៊ី។

ការស្ទង់មតិថ្មីមួយរបស់ក្រុមហ៊ុន RBC Wealth Management និងក្រុមហ៊ុន The Economist Intelligence Unit បានរកឃើញថា វិនិយោគិន៨០ភាគរយ បានផ្តោតខ្លាំងទៅលើសេដ្ឋកិច្ចពិភពលោក និងផលប៉ះពាល់ដែលវា នឹងមានទៅលើផលប័ត្ររបស់ពួកគេ។

លោក Terence Chow នាយកប្រតិបត្តិនៃក្រុមហ៊ុន RBC បានថ្លែងប្រាប់បណ្តាញសារព័ត៌មានហុងកុងថា “ដោយសារតែសេដ្ឋកិច្ចអាស៊ី ត្រូវបានពឹងផ្អែកខ្លាំងលើពាណិជ្ជកម្មច្រើនជាងអាមេរិក វាហាក់ដូចជាមានផលវិបាក ដែលអាស៊ីមានការព្រួយបារម្ភបំផុតអំពីភាពមិនប្រាកដប្រជានៃសេដ្ឋកិច្ចសកល”៕