មន្ត្រីអាកាសចរណ៍ស៊ីវិលអះអាងថា ការសាងសង់ព្រលានយន្តហោះថ្មីខេត្តសៀមរាបកំពុងឆ្ពោះទៅមុខ

August 14, 2019

ដោយៈរ៉ា ណេត

សៀមរាបៈ មន្ត្រីជាន់ខ្ពស់នៃរដ្ឋលេខាធិការដ្ឋាន អាកាសចរណ៍ស៊ីវិលបានអះអាងថាគម្រោងសាងសង់ព្រលានយន្តថ្មី នៅលើទឹកដីខេត្តសៀមរាប ដែលមានតម្លៃវិនិយោគប្រមាណ ៩០០លានដុល្លារ កំពុងដំណើរការឆ្ពោះទៅមុខ ប៉ុន្តែសកម្មភាពសាងសង់ហាក់យឺតយ៉ាវបន្តិច។

ព្រលានយន្តហោះអន្តរជាតិថ្មីនេះវិនិយោគដោយក្រុមហ៊ុន Yunnan Investment Holdings Ltd ក្នុងទំហំទឹកប្រាក់ជិត ៩០០លានដុល្លារ ស្ថិតក្នុងស្រុកសូរនិគម ចម្ងាយប្រមាណ ៥០គីឡូម៉ែត្រពីព្រលានយន្តហោះក្រុងសៀមរាបបច្ចុប្បន្ន។

ការសាងសង់ព្រលានយន្តហោះថ្មីនេះក៏ជាផ្នែកមួយនៃគោលដៅចៀសវាងផលប៉ះពាល់ដល់ប្រាង្គប្រាសាទអង្គរវត្ត រួមនឹងប្រាសាទបាយន្តផងដែរ និងពង្រីកសមត្ថភាពចុះចតយន្តហោះធំៗជាងមុន នៅលើផ្ទៃដីទំហំប្រមាណ៧០០ហិកតា។

អ្នកនាំពាក្យរដ្ឋលេខាធិការ នៃរដ្ឋលេខាធិការដ្ឋានអាកាសចរណ៍ស៊ីវិល លោក ស៊ិន ចាន់សិរីវុត្ថា បានមានប្រសាសន៍ឲ្យដឹងតាមទូរស័ព្ទនារសៀលថ្ងៃទី១៤ សីហានេះថា វត្តមានថ្មីនៃព្រលានយន្តហោះនេះ នឹងចូលរួមជួយលើកកម្ពស់សេដ្ឋកិច្ចកម្ពុជា ជាពិសេសខេត្តសៀមរាបទាំងមូល តាមរយៈការបម្រើលើវិស័យដឹកជញ្ជូនតាមផ្លូវអាកាស ដែលបច្ចុប្បន្នការសាងសង់ព្រមានថ្មីមួយនេះ ក៏កំពុងតែមានដំណើរការជាបណ្ដើរៗហើយ ប៉ុន្តែហាក់មានដំណើរយឺតបន្ដិច។

អ្នកនាំពាក្យរូបនេះបានបន្តទៀតថា “សកម្មភាពសាងសង់គឺកំពុងតែធ្វើជាបណ្តើរៗ ដូចជាការឈូសឆាយពង្រាបដី ការកំណត់ព្រំដែលត្រូវសាងសង់ជាដើម។ លោកបានបន្តទៀតថា “ចំពោះដំណឹងថា រដ្ឋាភិបាលមានគម្រោងសិក្សាទៅលើការពង្រីកទំហំព្រមានយន្តហោះថ្មីនេះបន្ថែម ខ្ញុំអត់បានដឹងដឹងនោះទេ ដឹងត្រឹមតែការអនុវត្តគម្រោងចាស់តែប៉ុណ្ណោះ។

លោកបានបន្តទៀតថា “ខ្ញុំគិតថាទំហំគម្រោងព្រលានយន្តហោះថ្មីមួយនេះ គឺវាមានភាពគ្រប់គ្រាន់ពេកទៅហើយ ដោយមិនចាំបាច់ពង្រីកបន្ថែមទៀតនោះទេ អ្វីដែលត្រូវធ្វើ គឺទំនាក់ទំនងឱ្យមានការហោះហើរត្រង់ មកកាន់ព្រលានមួយនេះឱ្យបានកាន់តែច្រើនទៅពិតជាល្អហើយ។

ពាក់ព័ន្ធទៅនឹងកាលបរិច្ឆេទ នៃការប្រារព្វពិធីបើកការដ្ឋានចាប់ផ្តើមសាងសង់ជាផ្លូវ ត្រូវបានលោក ស៊ិន ចាន់សិរីវុត្ថា អះអាងថា រហូតមកដល់ពេលនេះ នៅមិនទាន់អាចសម្រេចកំណត់ថ្ងៃណាមួយឱ្យជាក់លាក់នៅឡើយនោះទេ។

លោកបានបញ្ជាក់ថា “ការបើកការដ្ឋានសាងសង់ព្រលានយន្តហោះថ្មីនេះ តម្រូវមានការផ្តល់វត្តមានជាកិត្តិយសពីសំណាក់ថ្នាក់នាំប្រទេសទាំង២ ដូច្នេះត្រូវរង់ចាំពេលណាមួយសមគួរ ដែលកំពូលថ្នាក់ដឹកនាំទាំងសងខាង អាចមានពេលសមរម្យអាចចូលរួមបាន” ៕

សណ្ឋាគារប្រវត្តិសាស្ត្រមានប្រវត្តិដ៏គួរឲ្យចាប់អារម្មណ៍បានបើកដំណើរការឡើងវិញនៅក្នុងក្រុងសៀមរាប

August 14, 2019

0

សណ្ឋាគារប្រវត្តិសាស្ត្រមានប្រវត្តិដ៏គួរឲ្យចាប់អារម្មណ៍

ដោយ ម៉ាណេត

សៀមរាបៈ សណ្ឋាគារ Avani Hotels & Resorts បានធ្វើការបង្ហាញខ្លួនជាលើកដំបូងនៅកម្ពុជា ជាមួយនឹងការដាក់ឱ្យដំណើរការនូវឈ្មោះថ្មី FCC Angkor ដែលគ្រប់គ្រងដោយក្រុមហ៊ុន Avani។

ក្រុមហ៊ុនបានចំណាយលើការជួសជុល៧លានដុល្លារ ហើយសណ្ឋាគារដែល៨០ បន្ទប់នេះបានបើកដំណើរការឡើងវិញនៅត្រីមាសទី ២នេះ។

អេហ្វស៊ីស៊ីអង្គរ (FCC) ជាសណ្ឋាគារមួយ ក្នុងចំណោមសណ្ឋាគារល្បីៗរបស់កម្ពុជា ហើយមានទីតាំងនៅក្បែរសួនច្បារ និងព្រះបរមរាជវាំងឯករាជ្យក្នុងទីក្រុងសៀមរាប និងមានទីតាំងស្ថិតនៅជុំវិញ អតីតវិមានរបស់អភិបាលអាណានិគមបារាំង ដែលបានក្លាយជាក្លឹបអ្នកឆ្លើយឆ្លងព័ត៌មានបរទេស។

សណ្ឋាគារនេះក៏ស្ថិតនៅជិតផ្សារក្នុងតំបន់ ភោជនីយដ្ឋាន និងផាប់ស្ទ្រីត។ តំបន់បេតិកភណ្ឌពិភពលោក យូណេស្កូជាបេតិកភណ្ឌពិភពលោកអង្គរ ប្រើពេលធ្វើដំណើរត្រឹមតែ ១០នាទីពីសណ្ឋាគារនេះ។

រួមជាមួយបន្ទប់ដែលត្រូវបានកែលម្អថ្មី អេហ្វស៊ីស៊ីអង្គរបានធ្វើបច្ចុប្បន្នភាព និងពង្រីកកន្លែងរបស់ខ្លួន។ បារថ្មីមួយដែលមានឈ្មោះថា Scribe ឥឡូវនេះបំពេញបន្ថែមភោជនីយដ្ឋានដែលបានកែលម្អ។ ការបន្ថែមផ្សេងទៀត រួមមាន ស្ប៉ា អាងហែលទឹក និងកន្លែងសម្រាកលំហែ។

លោក Dillip Rajakarier នាយកប្រតិបត្តិក្រុមហ៊ុនមេរបស់ក្រុមហ៊ុន Avani បាននិយាយថា “ការចូលមកសណ្ឋាគារ Avani Hotels & Resorts ដំបូងគឺជាសញ្ញាបង្ហាញពីការប្តេជ្ញាចិត្តរបស់យើង ក្នុងការផ្តល់ជូននូវបទពិសោធន៍កាន់តែប្រសើរឡើង ដល់ភ្ញៀវទេសចរទាំងអស់។ លោកបន្ថែមថា “យើងជឿជាក់ថា អេហ្វស៊ីស៊ីអង្គរនឹងក្លាយជាកន្លែងសម្រាប់អ្នកធ្វើដំណើរស្វែងរកបទពិសោធន៍ពិតប្រាកដនៅក្នុងមជ្ឈមណ្ឌលសង្គមនៃខេត្តសៀមរាប។

លោកបានថ្លែងថា យើងមានក្តីរំភើបដែលបានធ្វើការជាមួយ Avani Hotels & Resorts ព្រោះពួកគេជាប្រតិបត្តិករសណ្ឋាគារ ដែលភាពឥតខ្ចោះក្នុងការនាំមកនូវបទពិសោធន៍ស្នាក់នៅពិសេស ហើយបានកំណត់យ៉ាងល្អដើម្បីលើកកម្ពស់ និងដាក់យីហោអេហ្វស៊ីស៊ីអង្គរ។ អេហ្វស៊ីស៊ីអង្គរថ្មី នឹងក្លាយជាសមាជិកនៃក្រុមហ៊ុន Preferred Hotels & Resorts ដោយចូលរួមជាមួយយើងក្នុងការប្តេជ្ញាចិត្តផ្តល់នូវបទពិសោធន៍ប្លែកៗសម្រាប់ភ្ញៀវនៅលើពិភពលោករបស់យើង។

កាលពីពេលថ្មីៗនេះស្ថានីយ៍ទូរទស្សន៍ CNN ដែលមានមូលដ្ឋាននៅសហរដ្ឋអាមេរិកបានចុះផ្សាយកាលពីម្សិលមិញថា ខេត្តសៀមរាបជាកន្លែងទេសចរ ណ៍ដ៏ល្អបំផុតមួយ ក្នុងការធ្វើទស្សនាក្នុងចំណោមបណ្តាប្រទេសអាស៊ី។

ក្រៅពីខេត្តសៀមរាប ដែលជាកន្លែងទេសចរណ៍ដ៏ល្អបំផុតមួយ ទូរទស្សន៍ដ៏ល្បីរបស់អាមេរិក CNN ក៏បានបង្ហាញថា ទីក្រុងក្យូតូ ប្រទេសជប៉ុន ទីក្រុងសេអ៊ូលប្រទេសកូរ៉េខាងត្បូង និងកោះបាលីប្រទេសឥណ្ឌូនេស៊ី ជាកន្លែងទេសចរណ៍ដ៏ល្អសម្រាប់ទេសចរណ៍ផងដែរ។

CNN បានឲ្យដឹងនៅក្នុងរបាយការណ៍ថា “មានអ្នកទេសចរលើសពី ២,៥លាននាក់បានមកកាន់ទីក្រុងសៀមរាប ជារៀងរាល់ឆ្នាំជាមួយគោលបំណងចង់ឃើញ និងទស្សនាប្រាសាទអង្គរវត្ត”៕

ក្រុមហ៊ុន Huawei ប្តេជ្ញាបន្តវិនិយោគលើវិស័យជាច្រើនទៀតនៅកម្ពុជាក្រៅពីទូរគមនាគមន៍

August 14, 2019

0

ក្រុមហ៊ុន Huawei ប្តេជ្ញាបន្តវិនិយោគលើវិស័យជាច្រើនទៀតនៅកម្ពុជាក្រៅពីទូរគមនាគមន៍

ដោយ វុត្ថា

ភ្នំពេញៈ ក្រុមហ៊ុន Huawei ប្ដេជ្ញានឹងបន្តវិនិយោគបន្ថែម មិនត្រឹមតែក្នុងវិស័យទូរគមនាគមន៍ប៉ុណ្ណោះទេ ប៉ុន្តែថែមទាំងពង្រីកសកម្មភាពធុរកិច្ចផ្សេងទៀត ក្នុងវិស័យឌីជីថល ដើម្បីចូលរួមចំណែកដល់ការអភិវឌ្ឍសេដ្ឋកិច្ចឌីជីថលនៅកម្ពុជា។

លោក Yuya YAO នាយកប្រតិបត្តិថ្មីរបស់ក្រុមហ៊ុន Huawei ប្រចាំនៅក្នុងប្រទេសកម្ពុជា នៅក្នុងជំនួបជាមួយលោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ នៅថ្ងៃទី១៤ ខែសីហា ឆ្នាំ ២០១៩នេះ បានឱ្យដឹងអំពីសកម្មភាពធុរកិច្ចរបស់ក្រុមហ៊ុន Huawei ដែលបានវិនិយោគលើវិស័យបច្ចេកវិទ្យាព័ត៌មាន និងទូរគមនាគមន៍ ចាប់តំងពីឆ្នាំ១៩៩៩មក ដែលបានផ្តល់ការងារដល់ប្រជាជនកម្ពុជា និងរួមចំណែកដល់ការអភិវឌ្ឍសេដ្ឋកិច្ចកម្ពុជា។

លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានឱ្យដឹងថា រាជរដ្ឋាភិបាលកម្ពុជា បាននិងកំពុងផ្តល់អាទិភាព ដល់ការអភិវឌ្ឍសេដ្ឋកិច្ចឌីជីថល និងរដ្ឋាភិបាលឌីជីថល ដែលបង្កើតបរិស្ថានសម្រាប់ការរីកលូតលាស់វិស័យឌីជីថល។

លោកឧបនាយករដ្ឋមន្ត្រីបានលើកទឹកចិត្ត ឱ្យក្រុមហ៊ុន Huawei បន្តវិនិយោគ និងផ្តល់ការគាំទ្របន្ថែមតាមរយៈជំនាញ និងបទពិសោធន៍របស់ខ្លួនដល់ការងាររៀបចំក្របខណ្ឌគោលនយោបាយសេដ្ឋកិច្ចឌីជីថល និងរដ្ឋាភិបាលឌីជីថល ។

ក្រុមហ៊ុនទូរគមនាគមន៍របស់ចិនមួយនេះ បានចុះហត្ថលេខាលើអនុស្សរណៈយោគយល់គ្នាស្តីពី ភាពជាដៃគូ ក្នុងការរួមគ្នាអភិវឌ្ឍ និងដាក់ឱ្យប្រើប្រាស់បច្ចេកវិទ្យាទូរគមនាគមន៍ជំនាន់ទី៥ (5G) នៅក្នុងឆ្នាំ២០១៩នេះ ជាមួយទូរគមនាគមន៍កម្ពុជា(ទ.ក.) ដែលនឹងធ្វើឱ្យកម្ពុជាក្លាយជាប្រទេស ដែលប្រើប្រាស់មុនគេនៅក្នុងតំបន់អាស៊ាន ហើយនឹងបន្តពង្រីកវិសាលភាពអោយបានគ្រប់តំបន់ទូទាំងប្រទេស។

ក្រសួងប្រៃសនីយ៍ និងទូរគមនាគមន៍របស់កម្ពុជា បាននឹងកំពុងអនុវត្តលើគោលនយោបាយអភិវឌ្ឍន៍ វិស័យបច្ចកវិទ្យាគមនាគមន៍និងព័ត៌មាន (ICT) ជាពិសេសបណ្តាញខ្សែកាប្លិ៍អុបទិកក្រោមបាតសមុទ្រ ដែលមានការអភិវឌ្ឍជាបន្តបន្ទាប់ ដើម្បីពង្រឹងបន្ថែមនៃហេដ្ឋារចនាសម្ព័ន្ធ សម្រាប់ឆ្លើយតបនឹងតម្រូវការកើនឡើង នៃបណ្តាញទំនាក់ទំនងព័ត៌មាន ជាមួយការអភិវឌ្ឍសេដ្ឋកិច្ចលើកកម្ពស់សមត្ថភាព ការប្រកួតប្រជែងក្នុងវិស័យទូរគមនាគមន៍។

របាយការណ៍របស់ក្រសួងប្រៃសនីយ៍ និងទូរគមនាគមន៍របស់កម្ពុជាបានបង្ហាញថា គិតមកដល់ពេលនេះការប្រើប្រាស់ទូរស័ព្ទចល័ត និងអ៊ីនធើណិតនៅកម្ពុជាមានការកើនឡើងជាលំដាប់ ដោយចំនួននៃការចុះឈ្មោះប្រើប្រាស់អ៊ីនធើណេត មានប្រហែល ១៣,៦លាននាក់ ស្មើនឹង ៨៣%នៃប្រជាពលរដ្ឋសរុប៕

ស្ថានករណ៍ធូរស្រាលបន្តិច ខណៈប្រធានាធិបតីអាមេរិកពន្យាពេលយកពន្ធលើទំនិញចិនកំឡុងសង្គ្រាមពាណិជ្ជកម្ម

August 14, 2019

0

ដោយ Donald Lee

វ៉ាស៊ីនតោនៈ ប្រធានាធិបតីអាមេរិកលោក Donald Trump បានពន្យាពេលចំពោះការអនុវត្តពន្ធថ្មីរបស់លោក ដែលគ្រោងនឹងចាប់ផ្តើមនៅខែក្រោយ លើកញ្ចប់ទំនិញចិនដែលមានតម្លៃ៣០០ពាន់លានដុល្លារ។

ការិយាល័យតំណាងពាណិជ្ជកម្មសហរដ្ឋអាមេរិក (USTR) បានពន្យាពេលពន្ធលើទំនិញក្នុងបញ្ជីទំនិញចិន ដែលត្រូវជាប់ពន្ធគយកាលពីថ្ងៃ អង្គារ។ USTR បានឲ្យដឹងថា ពន្ធគយនេះនឹងត្រូវពន្យារពេលរហូតដល់ខែ ធ្នូ។

USTR បានឲ្យដឹងថា ការផ្លាស់ប្តូរនេះផ្តើមចេញពីកត្តាសុខភាព និងសន្តិសុខ។

ទោះយ៉ាងណាអ្នកវិភាគជឿជាក់ថា ការផ្លាស់ប្តូរគោលនយោបាយរបស់ប្រធានាធិបតីអាមេរិកTrump គឺផ្តើមចេញពីប្រតិកម្មសាធារណៈជន ដែលគាត់អាចនឹងប្រឈម ប្រសិនបើអ្នកប្រើប្រាស់ទិញទំនិញក្នុងតម្លៃខ្ពស់ នៅតាមហាងលក់រាយក្នុងឱកាសវិស្សមកាលខែ ធ្នូ ដែលជាខែលក់រាយសំខាន់បំផុតប្រចាំឆ្នាំសម្រាប់អ្នកលក់រាយអាមេរិក។

នៅក្នុងបញ្ជីទំនិញថ្មីរបស់ចិន ដែលត្រូវយកពន្ធផលិតផល ដូចជា iPhones ស្បែកជើងម៉ាក Addidas និងវីដេអូហ្គេម ត្រូវបានដាក់បញ្ចូលជាមួយនឹងពន្ធគយ ហើយអ្នកលក់រាយនឹងដាក់តម្លៃខ្ពស់ដល់អ្នកប្រើប្រាស់។

USTR បានថ្លែងនៅក្នុងសេចក្តីថ្លែងការណ៍កាលពីថ្ងៃ អង្គារ ថា “វាត្រូវបានកំណត់ថា ពន្ធគួរតែត្រូវបានពន្យារពេលដល់ថ្ងៃទី ១៥ ខែធ្នូ។

USTR បានបន្ថែមថា “ផលិតផលនៅក្នុងក្រុមនេះរួមមានទូរស័ព្ទដៃ ប្រដាប់ប្រដាក្មេងលេង កំព្យូទ័រ និងរបស់របរស្បែកជើង និងសម្លៀកបំពាក់មួយចំនួន។

លោក Trump គឺងាយរងគ្រោះ ហើយត្រូវការភាពទាក់ទាញពីសាធារណជនអាមេរិក មុនការបោះឆ្នោតដែលគ្រោងនឹងចាប់ផ្តើមនៅឆ្នាំក្រោយ។ ប្រសិនបើអ្នកប្រើប្រាស់មិនសប្បាយចិត្ត ហើយឃើញថាអំណាចទិញរបស់ពួកគេត្រូវបានកាត់បន្ថយ នៅរដូវឈប់សម្រាកដើរទិញឥវ៉ាន់ណូអែល ពួកគេអាចបង្ហាញការមិនពេញចិត្តក្នុងការបោះឆ្នោត។

ទីផ្សារអាមេរិកបានរីករាយ ចំពោះព័ត៌មាននៃការពន្យាពេលពន្ធគយ ដែលប្រមូលផ្តុំរាប់រយពិន្ទុ។ មធ្យមភាគ ភាគហ៊ុនឧស្សាហកម្ម Dow Jones កើនឡើង៣៧២ ពិន្ទុ ក្រុមហ៊ុន S&P 500 បានកើនឡើង ១,៥ ភាគរយ និង ក្រុមហ៊ុនNasdaq កើនឡើងជិត ២ ភាគរយ។

ប្រធានាធិបតីអាមេរិកលោកTrump ក៏បានទទួលស្គាល់ផងដែរថា ការសម្រេចពន្យារពេលពន្ធគយ ដើម្បីចៀសវាងបង្កការប៉ះពាល់ដល់ប្រជាជន ក្នុងរដូវទិញទំនិញថ្ងៃឈប់សម្រាក ហើយការពន្យារពេលពន្ធគយនេះនឹងជួយដល់ប្រជាជនជាច្រើន៕

ខុនដូចំនួន ១៤៥គម្រោង បានបញ្ចប់ និងកំពុងសាងសង់នៅរាជធានីភ្នំពេញ

August 14, 2019

0

ខុនដូចំនួន ១៤៥គម្រោង បានបញ្ចប់ និងកំពុងសាងសង់នៅរាជធានីភ្នំពេញ

ដោយៈ រ៉ាណេត

ភ្នំពេញៈ គិតត្រឹមពាក់កណ្តាលឆ្នាំ២០១៩នេះ វត្តមានសំណង់ខុនលំដាប់ស្ដង់ដាសរុបចំនួន១៤៥គម្រោង បានបង្ហាញវត្តមាននៅក្នុងរាជធានីភ្នំពេញ ដែលក្នុងនោះមានគម្រោងថ្មីៗចំនួន១៣ ទើបតែបានដាក់ចូលទីផ្សារក្នុងត្រីមាសទី២នៃឆ្នាំនេះ។

បើទោះបីជាទិដ្ឋភាពជាក់ស្ដែងនៃការទិញ លក់ នៅលើទីផ្សារសំណង់ខុនដូ ត្រូវបានមើលឃើញថា ហាក់មិនសូវមានភាពពុះកញ្ជ្រោលខ្លាំង ដូចជា វិស័យសំណង់ផ្សេងទៀតក៏ពិតមែន ប៉ុន្តែផ្អែកតាមការអះអាងអ្នកជំនាញផ្នែកវិស័យសំណង់ និងអចលនទ្រព្យបានបញ្ជាក់ថា ទីផ្សារខុនដូនៅតែមានតម្រូវការដដែល ជាពិសេសប្រភេទខុនដូតម្លៃមធ្យម ខណៈដែលមានការចាប់អារម្មណ៍ពីសំណាក់អតិថិជន និងអ្នកវិនិយោគបន្តជាជនជាតិខ្មែរ ច្រើនជាងជនជាតិបរទេស។

យោងតាមរបាយការណ៍របស់ CBRE Cambodia បានលើកឡើងថា ចំនួនខុនដូដែលបានបញ្ចប់ការសាងសង់ទាំងស្រុង រួមជាមួយនឹងគម្រោងដែលកំពុងតែបន្តសកម្មភាពនៅឡើយក្នុងរាជធានីភ្នំពេញ គិតត្រឹមឆមាសទី១នៃឆ្នាំ២០១៩នេះ មានរហូតដល់ចំនួន ១៤៥គម្រោង។

អ្នកជំនាញផ្នែកសិក្សាស្រាវជ្រាវអចលនទ្រព្យ ប្រចាំនៅក្រុមហ៊ុនអន្តរជាតិ CBRE Cambodia កញ្ញាគឹម គិនកេសាបានឱ្យដឹងថា “នៅក្នុងចំណោមគម្រោងខុនដូទាំង១៤៥ ខាងលើនេះ មានគម្រោងចំនួន៧០ បានបញ្ចប់ការសាងសង់ជាស្ថាពរ ហើយ៧៥ គម្រោងកំពុងតែបន្តដំណើរការសាសង់ យ៉ាងសកម្មនាពេលបច្ចុប្បន្ននេះ។ កញ្ញាបានបន្តទៀតថា នៅក្នុងចំណោមទាំង ៧៥គម្រោង មានខុនដូចំនួន៦២គម្រោង ជាការសាងសង់បន្តដែលនៅសល់តាំងពីឆ្នាំចាស់ ហើយគម្រោងខុនដូចចំនួន១៣ថ្មីបន្ថែមទៀត ទើបតែបានដាក់ចូលនៅក្នុងឆមាសទី១ នៃឆ្នាំ ២០១៩ ។

នៅក្នុងចំណោមគម្រោងខុនដូ ដែលកំពុងតែបន្តដំណើរការសាងសង់ទាំងអស់ គម្រោងធំដែលត្រូវបានធ្វើការចាប់អារម្មណ៍ និងនៅលំដាប់កំពូល រួមមានចំនួន៧គម្រោង រួមមានគម្រោង R&F City, គម្រោង Arakawa Residence, គម្រោង Urban Village, គម្រោង Booyoung Town, គម្រោង La Vista One, គម្រោង Park Land Condo និង គម្រោង The Peak ដោយគម្រោងនីមួយៗ ភាគច្រើនត្រូវបានបែងចែកចេញជាច្រើនដំណាក់កាលក្នុងការសាងសង់។

ដោយឡែកសម្រាប់គម្រោងសាងសង់ សំណង់អគារភ្លោះដ៏មហិមាររបស់ក្រុមហ៊ុន ថៃ ប៊ុនរ៉ុង មានកម្ពស់រហូតដល់ ៥៦៨ ម៉ែត្រ ដែលកំពុងតែបន្តភាពសកម្មក្នុងការសាងសង់ជញ្ជាំងទប់ដីនៅដំណាក់ដំបូងនាពេលបច្ចុប្បន្ននេះ ត្រូវបានចាត់បញ្ចូលទៅក្នុងបញ្ជីគម្រោងនាពេលអនាគត ដោយសារតែម្ចាស់គម្រោងមិនទាន់បានផ្តល់ព័ត៌មានលម្អិតថាតើនឹងមាន Component អ្វីខ្លះ ហើយផ្នែកនីមួយៗមានចំនួនប៉ុន្មានឡើយ៕

ប្លុកប្រេងថ្មីមួយត្រូវបានរដ្ឋាភិបាលកម្ពុជាអនុម័តឲ្យក្រុមហ៊ុនឯកជនធ្វើការរុករក

August 14, 2019

0

ប្លុកប្រេងថ្មីមួយត្រូវបានរដ្ឋាភិបាលកម្ពុជាអនុម័តឲ្យក្រុមហ៊ុនឯកជនធ្វើការរុករក

ដោយ ម៉ាណេត

ភ្នំពេញៈ ក្រុមហ៊ុន Angkor Gold Corp តាមរយៈក្រុមហ៊ុនបុត្រសម្ព័ន្ធ EnerCam Resources Co Ltd (“EnerCam”) បានទទួលការយល់ព្រមពីរដ្ឋាភិបាលកម្ពុជាលើការស្នើសុំដីសម្បទានប្រេង និងឧស្ម័ន ដែលមានទំហំ៧៣០០គីឡូម៉ែត្រក្រឡានៅកម្ពុជា។ នេះបើយោងតាមរបាយការណ៍ក្រុមហ៊ុនចុះផ្សាយនៅថ្ងៃនេះ។

រដ្ឋាភិបាលកម្ពុជា បានយល់ព្រមលើសំណើរបស់ក្រុមហ៊ុន Angkor Gold Corp សម្រាប់ការអភិវឌ្ឍប្លុកប្រេងទី៨ (Block VIII) តាមរយៈក្រុមហ៊ុនបុត្រសម្ព័ន្ធរបស់ខ្លួន EnerCam Resources Co. Ltd។ ជាមួយនឹងការយល់ព្រមនេះក្រុមហ៊ុន Angkor កំពុងបន្តការចរចារកិច្ចព្រមព្រៀងស្តីពី ការចែករំលែកផលិតកម្មទាក់ទងនឹងអាជ្ញាប័ណ្ណនេះ។ ការអនុម័តនេះ ក៏អនុញ្ញាតឱ្យក្រុមហ៊ុនបន្តការរុករកប្រេង និងឧស្ម័ននៅប្លុកទី៨ ។

លោក Stephen Burega នាយកប្រតិបត្តិក្រុមហ៊ុន Angkor បានមានប្រសាសន៍ថា “នេះគឺជាព្រឹត្តិការណ៍សំខាន់មួយសម្រាប់ក្រុមហ៊ុន Angkor។ ក្រុមហ៊ុន Angkor គឺជាក្រុមហ៊ុនរុករករ៉ែដំបូងគេរបស់កាណាដា ដែលត្រូវបានផ្តល់ការយល់ព្រមកម្រិតនេះ ដើម្បីស្វែងរកឱកាសប្រេង និងឧស្ម័ននៅកម្ពុជា។ បន្ទាប់ពីពិនិត្យរួច រដ្ឋាភិបាលកម្ពុជាបានកំណត់ក្រុមហ៊ុនបុត្រសម្ព័ន្ធរបស់ខ្លួន EnerCam ដែលមានលក្ខណៈសម្បត្តិគ្រប់គ្រាន់ក្នុងការរុករកនិងអភិវឌ្ឍដីសម្បទានប្រេង និងឧស្ម័ន។

ដោយមានជំនាញ និងការប្តេជ្ញាចិត្តយូរអង្វែងរបស់លោក Mike Weeks ប្រធាននាយកប្រតិបត្តិរបស់ក្រុមហ៊ុនអង្គរនៅក្នុងគម្រោងប្រេង និងឧស្ម័នបរទេស និងនៅកម្ពុជាបានមានប្រសាសន៍ថា យើងមានទីតាំងល្អក្នុងការពង្រីក នៅក្នុងវិស័យទាញយករ៉ែនៅអាស៊ីអាគ្នេយ៍។ ក្រុមហ៊ុន Angkor ទន្ទឹងរង់ចាំការចរចាលើកិច្ចព្រមព្រៀង ចែករំលែកផលិតផល និងចាប់ផ្តើមពិនិត្យឡើងវិញនូវការរញ្ជួយដី និងទិន្នន័យរបស់យើងឱ្យបានឆាប់តាមដែលអាចធ្វើទៅបាន។

លោក ជៀប សួរ អគ្គនាយកនៃអគ្គនាយកដ្ឋានប្រេងកាត បានមានប្រសាសន៍ថា “យើងរីករាយដែលបានធ្វើការជាមួយក្រុមហ៊ុនអង្គរ ក្នុងការអភិវឌ្ឍសក្តានុពលប្រេង និងឧស្ម័ននៅកម្ពុជា”៕

ការសិក្សា៖ តម្លៃដីថ្មីនៅក្នុងប្រទេសថៃនឹងកើនឡើង ៨% ជាប្រចាំចាប់ពីឆ្នាំ ២០២០ខាងមុខនេះ

August 14, 2019

0

ដោយ វុត្ថា

ភ្នំពេញ៖ ការវាយតម្លៃដីនៅក្នុងប្រទេសថៃបានចាប់ផ្តើមចូលជាធរមានដោយគិតជាមធ្យមក្នុងរយៈពេល ៤ឆ្នាំទៅមុខ ពោលគឺចាប់ពីថ្ងៃទី ១ ខែមករា ឆ្នាំ ២០២០ ខាងមុខនេះនឹងកើនឡើង ៨% នៅទូទាំងប្រទេស បើធៀបនឹងតំលៃដីបច្ចុប្បន្ន។

លោកស្រី Wilawan Veerakun អគ្គនាយករងនៃនាយកដ្ឋានរតនាគាររបស់ប្រទេសថៃ បានប្រាប់សារព័ត៌មាន Bangkok Post នៅថ្ងៃទី ១៤ ខែកក្កដា ឆ្នាំ ២០១៩ នេះថា ការវាយតំលៃដីធ្លីថ្មីគឺ ដើម្បីយកពន្ធដីធ្លី និងអគារនាពេលខាងមុខឱ្យបានត្រឹមត្រូវ ដោយជំនួសការពន្ធលើតម្លៃបច្ចុប្បន្ននេះមានការរិះគន់ថាហួសសម័យទៅហើយ។

លោកស្រីបន្តថា តម្លៃដីដែលបានវាយតម្លៃ កាលពីលើកមុនលើផ្ទៃ ៧០ភាគរយនៃផ្ទៃដីសរុបកើនឡើង ២៩ភាគរយ និងនៅសល់ ១ភាគរយទៀតបានធ្លាក់ចុះ។

លោកស្រី Wilawan បន្តថា សម្រាប់តម្លៃដីវាយតម្លៃនៅខេត្ដ Kamphaeng Phet បានកើនឡើងខ្លាំងបំផុតគឺ ២០០ភាគរយបើប្រៀបធៀបទៅនឹងកំណែបច្ចុប្បន្ន ប៉ុន្តែតម្លៃថ្មីគឺប្រហាក់ប្រហែលនឹងបណ្តាខេត្តដទៃទៀតហើយតម្លៃសម្រាប់ Kamphaeng Phet មិនត្រូវបានកែតម្រូវសម្រាប់ជុំទី២នោះទេ។

លោកស្រី Wilawan បាននិយាយថា តម្លៃវាយតម្លៃថ្មីសម្រាប់ដីនៅច្រករបៀងសេដ្ឋកិច្ចភាគខាងកើតនឹងមិនមានការកើនឡើងតម្លៃនោះទេ ពីព្រោះគម្រោងហេដ្ឋារចនាសម្ព័ន្ធមិនទាន់បានបញ្ចប់។

ទោះបីជាមានការវាយតម្លៃដីធ្លីរបស់ក្រសួងរតនាគារមានរយៈពេល ៤ ឆ្នាំទៅមុខក៏ដោយ ក៏មន្ទីរមានសិទ្ធិផ្លាស់ប្តូរតម្លៃ បើតម្លៃទីផ្សារឡើងថ្លៃខ្លាំង៕

ផ្សារទំនើប Furi Times Square ប្រកាសផ្តល់ឱកាសការងារជាច្រើនរយកន្លែង និងត្រៀមដំណើរការនៅដំណាច់ឆ្នាំនេះ

August 14, 2019

0

ផ្សារទំនើប Furi Times Square ប្រកាសផ្តល់ឱកាសការងារជាច្រើនរយកន្លែង

ដោយ ៖ រ៉ាណេត

ព្រះសីហនុ ៖ ផ្សារទំនើបដ៏ធំលើកដំបូងគេបង្អស់នៅក្នុងក្រុងព្រះសីហនុ Furi Times Square ដែលត្រូវបានជ្រើសរើសជាម្ចាស់ពានរង្វាន់រចនាស្ថាបត្យកម្មដ៏ល្អផុតលេខនៅក្នុងកម្មវិធីពានរង្វាន់អចលនទ្រព្យកម្ពុជា បានប្រកាសផ្តល់ឱកាសការងារជាច្រើនរយកន្លែង ជាមួយមនឹងគម្រោងបើកសម្ពោធដាក់ដំណើរការជាផ្លូវការណ៍នៅត្រឹមចុងឆ្នាំ២០១៩ឆាប់ៗខាងមុខនេះ ។

ជាមួយនឹងកិច្ចប្រឹងប្រែងយ៉ាងយកចិត្តទុកដាក់ទៅលើការអភិវឌ្ឍប្រទេសជាតិពីសំណាក់ប្រមុខរាជរដ្ឋាភិបាលកម្ពុជា តាមរយៈវិស័យសំណង់ និងវិស័យពាណិជ្ជកម្មចំរុះ ផ្សារទំនើបដ៏ធំ និងស្រស់ស្អាត ដែលទើបតែមានជាលើកដំបូងប្រចាំនៅក្នុងក្រុងព្រះសីហនុ Furi Times Square នឹងបង្ហាញខ្លួនយ៉ាងអស្ចារ្យនៅក្នុងពេលឆាប់ៗខាងមុខនេះ។

តាមរយៈនៃការបង្ហាញវត្តមានក្នុងរូបភាពជាផ្សារទំនើប ដែលវិនិយោគដោយក្រុមហ៊ុន FURI Corporation និងក្រុមហ៊ុនវិនិយោគមកពីក្រុងហុងកុង និងក្រុងម៉ាកាវ ប្រទេសចិន មួយនេះ បានជួយបង្កើនសោភ័ណភាពក្នុងក្រុង ក៏ដូចជាបំពេញតម្រូវការរបស់ប្រជាពករដ្ឋទូទៅ និងបណ្តាភ្ញៀវទេសចរចំរុះជាតិសាសន៍ដែលចូលមកកម្សាន្តនៅក្នុងក្រុងមួយនេះ។

ជាមួយនឹងគម្រោងបើកសម្ពោធដំណើរការជាផ្លូវការក្នុងពេលដ៏ខ្លីខាងមុខនេះ ផ្សារទំនើប Furi Times Square បានប្រកាសផ្តល់ឱកាសការងារជាច្រើនកន្លែង និងច្រើនផ្នែក ដើម្បីបម្រើការងារជាបុគ្គលិកនៅក្នុងផ្សារទំនើបមួយនេះ។ សម្រាប់បេក្ខភាពទាំង២ភេទ ដែលចង់ក្លាយជាបុគ្គលិកបម្រើការងារនៅក្នុងផ្សារទំនើបមួយនេះ ត្រូវមានអាយុចាប់ពី ១៨-៣៥ឆ្នាំ កម្រិតវប្បធម៌អាស្រ័យលើកិច្ចសម្ភាសន៍ដោយផ្ទាល់តាមផ្នែក និងតួនាទី (មិនមានបទពិសោធន៍ក៏អាចដាក់ពាក្យបានដែរ)។

សម្រាប់អត្ថប្រយោជន៍ដែលទទួលបានរួមមាន ៖ ប្រាក់បៀរវត្សរ៍ប្រចាំខែ ទទួលបានការបណ្តុះបណ្តាលចំណេះដឹង និងជំនាញបន្ថែមពាក់ព័ន្ធនឹងតួនាទី មានការលើកទឹកចិត្តការងារប្រចាំឆ្នាំ រួមជាមួយនឹងការផ្តល់ជូននូវប្រយោជន៍ផ្សេងៗបន្ថែមទៀត។ សម្រាប់អ្នកដែលមានចំណាប់អារម្មណ៍អាចទំនាក់ទំនងសាកសួរព័ត៌មានបន្ថែមតាមរយៈទូរស័ព្ទ ៖ 012 999 183 ,016 325 266 E-mail: [email protected]៕

ខេត្តកំពង់ធំចងសម្ព័ន្ធមេត្រីភាពជាមួយទីក្រុង Panzhou របស់ចិន ដើម្បីបង្កើនកិច្ចសហប្រតិបត្តិការសេដ្ឋកិច្ច

August 14, 2019

0

ខេត្តកំពង់ធំចងសម្ព័ន្ធមេត្រីភាពជាមួយទីក្រុង Panzhou របស់ចិន

ដោយ វុត្ថា

ភ្នំពេញ៖ ខេត្តកំពង់ធំរបស់ប្រទេសកម្ពុជា បានចុះកិច្ចព្រមព្រៀង ចងសម្ព័ន្ធមេត្រីភាពគ្នា ជាមួយទីក្រុង Panzhou ខេត្ត Guizhou នៃសាធារណរដ្ឋប្រជាមានិតចិន ដើម្បីផ្លាស់ប្តូរកិច្ចសហប្រតិបត្តិការលើវិស័យចំនួន៨ ដើម្បីជំរុញឱ្យមានការរីកចម្រើនរួមគ្នា។

លោក សុខ លូ អភិបាលខេត្តកំពងធំ បានឱ្យដឹងនៅក្នុងពិធីចុះកិច្ចព្រមព្រៀងកាលពីថ្ងៃទី១៣ ខែសីហា ម្សិលមិញនេះថាកិច្ចសហប្រតិបត្តិការទាំងនោះរួមមានវិស័យ ពាណិជ្ជកម្ម សិក្សាអប់រំ វប្បធម៌ កសិកម្ម ទេសចរណ៍ សុខាភិបាល បណ្តុះបណ្តាលផ្នែកវិទ្យាសាស្ត្រ និងបច្ចេកវិទ្យាជាដើម។

លោកបន្តថា នេះជាការបោះជំហានទៅមុខរបស់រដ្ឋបាលខេត្តកំពង់ធំ ក្នុងការចាប់ដៃគូ ចង សម្ព័ន្ធមេត្រីភាព លើកិច្ចសហប្រតិបត្តិការជាមួយទីក្រុងដ៏ធំរបស់មិត្តចិន ក្នុងគោលបំណងដើម្បីពង្រឹង និងពង្រីកចំណងមិត្តភាព និងកិច្ចសហប្រតិបត្តិការ លើការអភិវឌ្ឍខេត្ត ឱ្យកាន់តែវិវឌ្ឍន៍រីកចម្រើនស្របតាមគោលនយោបាយ នៃកិច្ចសហប្រតិបត្តិការគ្រប់ជ្រុងជ្រោយ របស់រាជរដ្ឋាភិបាលកម្ពុជា ដឹកនាំដោយសម្តេចតេជោហ៊ុន សែន។

លោក Li Lingbo អភិបាលក្រុង Panzhou ខេត្ត Guizhou បានថ្លែងអំណរគុណ ដល់ភាគីកម្ពុជាដែលបានទទួលស្វាគមន៍ ហើយបានលើកឡើងថា ភាគីទាំងពីរនឹងបង្កើនទំនាក់ទំនង កិច្ចសហប្រតិបត្តិការទៅវិញទៅមកយ៉ាងស៊ីជម្រៅ បន្ទាប់ពីចុះហត្ថលេខាលើអនុស្សារណៈយោគយល់គ្នា នៅពេលវេលាសមស្រប នាពេលខាងមុខនេះ។

ភាគីទាំងពីរបានចុះហត្ថលេខា បានបកប្រែចេញជា ០៣ ភាសា គឺភាសាខ្មែរ ភាសាចិន និងភាសាអង់គ្លេស ដោយកិច្ចប្រជុំនេះបានពិភាក្សាអំពីអត្ថប្រយោជន៍បំពេញបន្ថែម និងទំហំសក្តានុពលសម្រាប់កិច្ចសហប្រតិបត្តិការ រវាងទីក្រុងផានចូវ និងខេត្តកំពង់ធំ លើផ្នែកកិច្ចសហប្រតិបត្តិការទេសចរណ៍ និងការធ្វើពាណិជ្ជកម្មផលិតផលកសិកម្ម។

ភាគីទាំងពីរបានឯកភាពគ្នា បន្តធ្វើការផ្លាស់ប្តូរ និងកិច្ចសហប្រតិបត្តិការកាន់តែស៊ីជម្រៅ លើកកម្ពស់ការផ្លាស់ប្តូរគណៈប្រតិភូ រវាងទីក្រុងផានចូវ និងខេត្តកំពង់ធំ ដោយមិនមានកំណត់ និងផ្តល់ការគាំទ្រ និងជំនួយដល់ដំណើរទស្សនកិច្ច ធុរកិច្ចព្រមគ្នាទាំងសងខាង ការចរចារពាណិជ្ជកម្ម កិច្ចសហប្រតិបត្តិការសេដ្ឋកិច្ច ការតាំងពិព័រណ៍ និងសកម្មភាពសេដ្ឋកិច្ច និងពាណិជ្ជកម្មដទៃទៀត៕

ផលិតផលម៉ាកល្បីៗចំនួន ១៥ប្រភេទ នឹងបង្ហាញវត្តមាននៅផ្សារទំនើប Furi Times Square

August 14, 2019

0

ដោយ វុត្ថា

ភ្នំពេញៈ ផលិតផលនិងហាងល្បីៗចំនួន១៥ ប្រភេទមកពីក្រៅប្រទេស និងនៅក្នុងស្រុកជាច្រើនប្រភេទ នឹងបង្ហាញវត្តមាននៅក្នុងផ្សារទំនើបដ៏ធំ Furi Times Square នៅក្រុងព្រះសីហនុ ខណៈផ្សារទំនើបមួយនេះ គ្រោងនឹងដាក់ឱ្យដំណើរការនៅក្នុងអំឡុងខែតុលា ឆ្នាំ ២០១៩ ខាងមុខនេះ។

យោងតាមការផ្សព្វផ្សាយរបស់ក្រុមហ៊ុន FURI Corporation កាលពីកន្លងមកនេះបានបង្ហាញថា ផលិតផលនិងហាងល្បីៗទាំងនោះរួមមាន Starbucks, KFC, Amazon Cafe, Geylang Lor9, Dr. Professional Clinic, Bee Chheng Haing, Eyes Care Optic, KOI, LEVI’s, Samsonite, HIS& HER, JayJun Comestic, G-Shock, HGB Group, និង Dakasi Tea ព្រមផលិតផលរបស់ក្រុមហ៊ុនល្បីៗជាច្រើនផ្សេងទៀតច្រើនផ្សេងទៀតផងដែរ។

ផ្សារទំនើប FURI TIMES SQUARE ក៏មានការវិនិយោគលើ Sky Bar ទំនើបជាងគេ ដោយគ្រាន់តែ Sky Bar នេះវិនិយោគអស់ទឹកប្រាក់ជាង១លានដុល្លារអាមេរិក។ ផ្សារទំនើបកំពស់៥ជាន់នេះ ស្ថិតនៅលើផ្លូវឯករាជ្យ ស្ថិតក្នុងសង្កាត់មិត្តភាព ខ័ណ្ឌមិត្តភាព ក្រុងព្រះសីហនុ។

តំណាងផ្នែកលក់ និងទីផ្សារនៃក្រុមហ៊ុន FURI Corporation ដែលអភិវឌ្ឍគម្រោងផ្សារទំនើប Furi Times Square កញ្ញាតាំង គីមហុង បានប្រាប់ឱ្យដឹងនៅក្នុងឱកាសជួបជុំជាមួយអតិថិជនកាលពីពេលថ្មីៗនេះ ក្រុមហ៊ុនបានទទួលយោបល់ល្អ និងមានការកោតសរសើរពីអតិថិជនអ្នកជួលផ្សារទំនើបនេះ។

កញ្ញាបានបន្តទៀតថា ការកោតសរសើរទាំងនេះ គឺដោយសារផ្សារទំនើប Furi Times Square មានហេដ្ឋារចនាសម្ព័ន្ធយ៉ាងល្អឥតខ្ចោះ ទាំងផ្នែកទីធ្លានៅខាងក្នុង និងរូបរាងខាងក្រៅ ហើយផ្តោតលើការរៀបចំប្រព័ន្ធ នៃការលក់មានភាពទូលាយល្អ មានទីធ្លាសាធារណៈ ការឌីសាញមានភាពទាក់ទាញ ហើយទីតាំងនៃគម្រោងនេះស្ថិតនៅតំបន់ដែលមានសក្ដានុពលល្អ។

កញ្ញាតាំង គីមហុងបានបន្តថា “ការទទួលបានការសរសើរពីអតិថិជន អ្នកជួលទីតាំងលក់រាយក្នុងគំរោងនេះ ដោយសារការវិនិយោគរបស់អ្នកវិនិយោគ ផ្សារទំនើបនេះ ផ្តោតលើការវិនិយោគ រយៈពេលវែងជាជាងរកផលចំណេញ។ កញ្ញាបន្ថែមថា“រហូតមកទល់ពេលនេះហាងអាហារ និងផលិតផលល្បីឈ្មោះជាង២០ក្រុមហ៊ុន បានចុះកុងត្រាលក់នៅផ្សារនេះ ហើយផលិតផលល្បីៗជាច្រើនទៀតកំពុងដំណើរការនិតិវិធី”៕