កម្ពុជា-ម៉ាឡេស៊ីនឹងចុះអនុស្សរណៈសហប្រតិបត្តិការលើវិស័យទេសចរណ៍ ក្នុងអំឡុងនាយករដ្ឋមន្ត្រីម៉ាឡេស៊ីមកទស្សនកិច្ចនៅកម្ពុជាចុងឆ្នាំនេះ

June 27, 2019

ដោយ វុត្ថា

ភ្នំពេញ៖ កម្ពុជានិងភាគីម៉ាឡេស៊ីនឹងចុះអនុស្សរណៈនៃការយោគយល់គ្នា (MoU) ផ្តោតលើកិច្ចសហប្រតិបត្តិការក្នុងវិស័យទេសចរណ៍ជាមួយគ្នាជាផ្លូវការ នៅពេលដែលនាយករដ្ឋមន្ត្រីម៉ាឡេស៊ី អញ្ជើញមកទស្សនកិច្ចនៅកម្ពុជា នាអំឡុងចុងឆ្នាំ២០១៩ ខាងមុខនេះ។

ក្នុងជំនួបពិភាក្សាការងាររវាងលោក ថោង ខុន រដ្ឋមន្ត្រីក្រសួងទេសចរណ៍ ជាមួយលោក Eldeen Husaini BINMOHDHASHIM ឯកអគ្គរាជទូតម៉ាឡេស៊ីថ្មីប្រចាំកម្ពុជាកាលពីថ្ងៃទី២៦ ខែមិថុនា ឆ្នាំ២០១៩ នេះ បានឱ្យដឹងថា ភាគីទាំងពីរបានឯកភាពគ្នាក្នុងការបង្កើតក្រុមការងារពិសេសកម្ពុជា-ម៉ាឡេស៊ី ដើម្បីរៀបចំអនុស្សរណៈនៃការយោគយល់គ្នា ដោយផ្តោតលើកិច្ចសហប្រតិបត្តិការក្នុងវិស័យទេសចរណ៍ ក្នុងនោះរួមមាន ការផ្លាស់ព័ត៌មានទេសចរណ៍ ការផ្សព្វផ្សាយពីវិស័យទេសចរណ៍ ការជំរុញការបណ្ដុះបណ្ដាធនធានមនុស្សក្នុងវិស័យទេសចរណ៍។

លោក Eldeen Husaini BINMOHDHASHIM ឯកអគ្គរាជទូតម៉ាឡេស៊ីថ្មីប្រចាំកម្ពុជា បានស្នើសុំកិច្ចសហការពីភាគីកម្ពុជា ០៤ចំនុច៖ ទី១-ការជំរុញវិស័យទេសចរណ៍សុខាភិបាល ដោយផ្សព្វផ្សាយដល់ប្រជាពលរដ្ឋកម្ពុជាឲ្យទៅពិនិត្យព្យាបាលជំងឺ ភ្ជាប់ជាមួយដំណើរទេសចរណ៍ (ដោយម៉ាឡេស៊ីនឹងផ្ដល់ជូននូវតម្លៃពិសេស) ទី២-ការជំរុញទេសចរណ៍វាយកូនគោល (Golf Tourism) ដោយកីឡាប្រភេទនេះមានការពេញនិយមខ្លាំងនៅម៉ាឡេស៊ី ហើយម៉ាឡេស៊ីក៏ចាប់អារម្មណ៍ការនិយមលេងនៅកម្ពុជាផងដែរ។

ទី៣-រៀបចំពិធីពិព័រណ៍ម្ហូបអាហារបែបមូស្លីមនៅកម្ពុជា ឬហៅថា Food Festival និងទី៤- ស្នើភាគីកម្ពុជាបង្កើនការបណ្ដុះបណ្ដាលមគ្គុទ្ទេសក៍ទេសចរណ៍និយាយភាសាម៉ាឡេស៊ី ដើម្បីបំពេញតម្រូវទីផ្សារ និងការរៀបចំសេវាកម្មម្ហូបអាហារហាឡាល់។

លោក ថោង ខុន រដ្ឋមន្ត្រីក្រសួងទេសចរណ៍ បានគាំទ្រ និងឯកភាពចំពោះសំណើទាំងនេះ ហើយក៏បានអញ្ជើញភាគីម៉ាឡេស៊ីចូលរួមសន្និសីទស្តីពីម្ហូបអាហារ (Conference on Gastronomy) ដែលនឹងធ្វើឡើងអំឡុងខែកញ្ញា ឆ្នាំ២០១៩ ខាងមុខ និងបានលើកឡើងពីបំណងរៀបចំឱ្យមានដំណើរកម្សាន្តឆ្លងដែនតាមម៉ូតូ ដែលជាផលិតផលទេសចរណ៍ដ៏ទាក់ទាញមួយ ដែលអាចផ្ដល់ផលប្រយោជន៍សម្រាប់ប្រទេសទាំងពីរ ដោយអាចធ្វើដំណើរឆ្លងពីកម្ពុជាទៅថៃ ហើយបន្តទៅកាន់ម៉ាឡេស៊ី៕

រដ្ឋបាលក្រុងភ្នំពេញចាប់ផ្តើមតម្លើងអំពូល LED ឆ្លាតវៃនៅតាមមហាវិថីសហព័ន្ឋរុស្សី

June 27, 2019

0

ដោយ វុត្ថា

ភ្នំពេញ៖ រដ្ឋបាលក្រុងភ្នំពេញបានចាប់ផ្តើមម្លើងអំពូល LED ឆ្លាតវៃ Smart Light នៅតាមបណ្តោយមហាវិថី សហព័ន្ឋរុស្សី ដើម្បីប្រែលក្លាយទីក្រុងភ្នំពេញជាទីក្រុងវៃឆ្លាត ឬ Smart City ។យោងតាមមន្ទីរសាធារណៈការ និងដឹកជញ្ជូនបានឱ្យដឹងនៅថ្ងៃទី ២៧ ខែមិថុនា ឆ្នាំ ២០១៩ នេះថា គម្រោងអំពូលឆ្លាតវៃ ជាបច្ចេកវិទ្យាទំនើបរបស់ប្រទេសជប៉ុន ដែលអាចគ្រប់គ្រង និងបញ្ជារការបំភ្លឺតាមដងផ្លូវដោយប្រព័ន្ឋស្វ័យប្រវត្តិ កាំពន្លឺច្បាស់ និងប្រើថាមពលអស់តិច ។

ក្រសួងរៀបចំដែនដីនគរូបនីយកម្ម និងសំណង់កម្ពុជាកាលពីកន្លងទៅនេះ បានចុះហត្ថលេខាលើអនុស្សរណៈ នៃកិច្ចសហប្រតិបត្តិការស្ដីពីការបង្កើត “វេទិកាសាធារណៈ ឯកជន ស្ដីពីការអភិវឌ្ឍនគរូបនីយកម្ម កម្ពុជា-ជប៉ុន ” គឺបង្កលក្ខណៈដល់ក្រុមហ៊ុនជប៉ុន និងក្រុមហ៊ុនកម្ពុជាចាប់ដៃគូវិនិយោគរួមគ្នា លើការអភិវឌ្ឍអចលនទ្រព្យ ការអភិវឌ្ឍសំណង់លំនៅដ្ឋាន ពាណិជ្ជកម្ម សេវាកម្ម ឧស្សាហកម្ម ហេដ្ឋារចនាសម្ព័ន្ធ បរិស្ថានទីក្រុង ការរៀបចំទីក្រុងនឹងរួមចំណែកក្នុងការបង្កើតទីក្រុងឆ្លាតវៃ (Smart Cities)។

បើតាមក្រសួងជំនាញដដែល បានបន្តថា ជប៉ុនជួយគាំទ្របង្កើតទីក្រុងឆ្លាតវៃ ( Smart Cities) នៅប្រទេសកម្ពុជា ដោយចាប់ផ្តើមពីរាជធានីភ្នំពេញ ក្រុងបាត់ដំបង និងក្រុងសៀមរាប ដែលជាទីក្រុងគំរូ។ ជប៉ុនជួយគាំទ្រ និងរួមចំណែកដល់ការរៀបចំបង្កើតបណ្តាញទីក្រុងឆ្លាតវៃ ( Smart Cities) អាស៊ាន-ជប៉ុន និងការបង្កើតវេទិកាសាធារណៈ ឯកជន ស្តីពីការអភិវឌ្ឍនគរូបនីយកម្មអាស៊ាន – ជប៉ុននាពេលខាងមុខ។

បើតាមការបញ្ជាក់ពីក្រសួងដែនដីកម្ពុជា នៅពាក់កណ្តាលខែមីនា ឆ្នាំ២០១៩ ជប៉ុននឹងបញ្ជូនអ្នកបច្ចេកទេសមកសិក្សា ដំឡើងផ្កាយរណបគាំទ្រដល់ការងាររៀបចំស្ថានីយវាស់វែងអចិន្រ្តៃយ៍នៅព្រះរាជាណាចក្រកម្ពុជា ដើម្បីបម្រើដល់ការងារវាស់វែង និងផលិតផែនទី។

រាជរដ្ឋាភិបាលយល់ព្រមជាគោលការណ៍ កាលពីខែមីនា ឆ្នាំ ២០១៩ កន្លងមកនេះ ជូនក្រសួងរៀបចំដែនដី នគរូបនីយកម្ម និងសំណង់ ក្នុងការបង្កើតបណ្តាញទីក្រុងឆ្លាតវៃ (Smart City) អាស៊ាន-ជប៉ុន និងការបង្កើតវេទិកាសាធារណៈ ឯកជន ស្ដីពីការអភិវឌ្ឍនគរូបនីយកម្មអាស៊ាន-ជប៉ុន។

ការបង្កើតទីក្រុងឆ្លាតវៃ (Smart City) អាស៊ាន-ជប៉ុន គឺជាគំនិតផ្តួចផ្តួមរបស់ភាគីជប៉ុន ហើយទីក្រុងទាំង៣របស់កម្ពុជា គឺរាជធានីភ្នំពេញ ក្រុងសៀមរាប និងក្រុងបាត់ដំបង ដែសស្ថិតក្នុងគម្រោងនេះ៕

ក្រសួងបរិស្ថានទទួលស្គាល់សហគមន៍តំបន់ការពារធម្មជាតិចំនួន ១៩នៅក្នុងខេត្តចំនួន ៤

June 27, 2019

0

ដោយ វុត្ថា

ភ្នំពេញ៖ ក្រសួងបរិស្ថានទទួលស្គាល់ជាផ្លូវការសហគមន៍តំបន់ការពារធម្មជាតិចំនួន ១៩ ក្នុងដែនជម្រកសត្វព្រៃព្រៃឡង់ក្នុងភូមិសាស្ត្រខេត្តកំពង់ធំ ព្រះវិហារ ស្ទឹងត្រែង និងក្រចេះ។

យោងតាមសេចក្តីប្រកាសរបស់ក្រសួងបរិស្ថានកាលខែមករា ឆ្នាំ ២០១៩ ស្តីពីការទទួលស្គាល់សហគមន៍តំបន់ការពារធម្មជាតិរបស់ក្រសួងបរិ ស្ថាន សហគមន៍តំបន់ការពារធម្មជាតិទាំង ១៩ នោះរួមមាន ខេត្តស្ទឹងត្រែងមាន ៥ សហគមន៍គឺសហគមន៍តំបន់ការពារធម្មជាតិផ្អាវ ទាល់ អន្លង់ភេ គីរីសុខសាន្ត និងអន្លង់ជ្រៃ។

ខេត្តកំពង់ធំមាន ២ សហគមន៍គឺសហគមន៍តំបន់ការពារធម្មជាតិក្បាលដូនក្រី និងកងមាស។ ខេត្តព្រះវិហារ មាន ៨ សហគមន៍ គឺសហគមន៍ការពារតំបន់ធម្មជាតិប្រាសាទភ្នំក្រៀល ប្រាសាទឈើទាលកោង ស្រែវាល ភ្នំជ្រាប់ត្រីក្សាន្ត ភ្នំល្អាង ភូមិពើក ព្រៃកំរ៉ែង បង្កនសែនជ័យ។

ខេត្តក្រចេះមាន ៤ សហគមន៍រួមមានសហគមន៍តំបន់ការពារធម្មជាតិកំពង់ក្បឿង អង្គរឥន្ទ ឥន្ទជ័យ កំពង់ដំរី៕

ក្រុមហ៊ុនដ៏ធំមួយរបស់ចិននឹងសាងសង់អគារកប់ពពកនិងមជ្ឈមណ្ឌលពាណិជ្ជកម្ម លើកដំបូងនៅខេត្តកំពង់ចាម

June 27, 2019

0

ដោយ វុត្ថា

ភ្នំពេញៈ ក្រុមហ៊ុនយក្សមួយមកពីប្រទេសចិន គ្រោងនឹងសាងសង់អគារកប់ពពកនិងមជ្ឈមណ្ឌលកំសាន្តលំដាប់អន្តរជាតិ ជាលើកដំបូងនៅក្នុងទីរួមខេត្តកំពង់ចាមនាពេលឆាប់ៗខាងមុខនេះ។

គំរោងនេះត្រូវបានវិនិយោគដោយក្រុមហ៊ុនចិន Yue Tai Group Shanghai ខណៈបច្ចុប្បន្ននេះ ក្រុមហ៊ុននេះបាននឹងកំពុងឈួសឆាយដី ដើម្បីត្រៀមសាងសង់នាពេលខាងមុខ។

លោក គួច ចំរើន អភិបាលខេត្តកំពង់ចាម ដែលនឹងត្រូវផ្ទេរដំណែងទៅកាន់ខេត្តព្រះសីហនុនាពេលខាងមុខឆាប់ៗនេះ បានឱ្យដឹងតាមទូរស័ព្ទនៅថ្ងៃទី ២៧ ខែមិថុនា ឆ្នាំ ២០១៩ នេះថា មកដល់ពេលនេះ ខេត្តមិនទាន់បានទទួលនូវព៌តមានជាក់លាក់ពីគម្រោងសាងសង់អគារនេះជាក់លាក់នៅឡើយទេ តែឃើញក្រុមហ៊ុននេះបាននឹងកំពុងធ្វើសកម្មភាពពិតប្រកដមែននៅក្នុងទឹកដីកំង់ចាមនេះ។

លោកបន្តថា “ក្រុមហ៊ុននេះបានស្នើសុំសាងសង់សំណង់គំរូមួយ តែមិនមែនជាអគារកំពស់ប្រមាណ ១២៩.៦ម៉ែត្រនោះទេ តែនៅក្នុងមហិច្ឆិតារបស់ក្រុមហ៊ុននេះ ពិតជាមានការសងសង់អគារខ្ពស់កប់ពកមែន តែមិនទាន់មានការស្នើសុំច្បាប់សាងសង់ជាផ្លូវការនៅឡើងទេ”។

តែយ៉ាងណាក៏ដោយ លោកគួច ចំរើន មិនអាចបញ្ជាក់ពីតម្លៃនៃការវិនិយោគនិងទំហំដីនៃការសាងសង់ ឬអភិវឌ្ឍន៍របស់ក្រុមហ៊ុនថាមានប៉ុន្មានហិកតានោះ តែលោកបញ្ជាក់គឺមានទំហំធំស្ថិតនៅក្នុងក្រុងកំពង់ចាម។

លោក គួច ចំរើនបញ្ជាក់ទៀតទៀតថា នៅក្នុងគម្រោងនេះដែរ ក្រុមហ៊ុនក៏នឹងសាងសង់ Water Park មួយទៀត តែមិនទាន់បានសម្រេចផ្តល់លិខិតអនុញ្ញាតជាផ្លូវការនៅឡើយទេ តែបានដាក់ជាគោលការឱ្យក្រុមហ៊ុនយកទៅគិតគូឱ្យបានត្រឹមត្រូវ និងល្អិតល្អន់ ដោយផ្តល់ការរចនាឱ្យបានច្បាស់លាស់ពីការសាងសង់ និងគិតពីប្រព័ន្ធសុវត្ថិភាពជូនដល់អ្នកទេសចរណ៍ដែលមកលេងកម្សាន្តនៅទីនេះផងដែរ។

ក្រុមហ៊ុន Yue Tai Group Shanghai បាននិងកំពុងសាងសង់់បុរីជាលើកដំបូងនៅក្នុងទីក្រុងកំពង់ចាម ដោយក្រុមហ៊ុននេះកំពុងសាងសង់ទីក្រុងរណបមួយ នៅក្នុងទីក្រុងនេះ ស្ថិតនៅលើផ្ទៃដីជាង៤០ហិកតា៕

ក្រុមហ៊ុនរ៉ែដ៏ធំរបស់អូស្ត្រាលីបោះទុនវិនិយោគ ១៦០លានដុល្លាររ៉ុករករ៉ែមាសនៅខេត្តមណ្ឌលគិរី

June 27, 2019

0

ដោយ Donald Lee

ភ្នំពេញ: ក្រុមហ៊ុនរុករករ៉ែ Emerald Resources ដែលចុះបញ្ជីនៅប្រទេសអូស្រ្តាលីបានប្រកាសថា ខ្លួនបានទទួលទុនវិនិយោគបន្ថែមចំនួនជិត១៦០លានដុល្លារ សម្រាប់គម្រោងរុករករ៉ែមាសនៅមណ្ឌលគិរី។

ទឹកប្រាក់នេះជាការផ្តល់ទុនពីក្រុមហ៊ុន Sprott Private Resources ដែលជាក្រុមហ៊ុនផ្តល់ហិរញ្ញប្បទានរុករករ៉ែនៅប្រទេសកាណាដា បានយល់ព្រមលើការវិនិយោគ៦០លានដុល្លារ សម្រាប់ក្រុមហ៊ុនរុករករ៉ែនៅមណ្ឌលគិរីដែលហៅថា “គម្រោងអូររ៉ែមាសខ្វាវ”ជាជំហ៊ានដំបូង និងបានសន្យាផងដែរថានឹងវិនិយោគ ទឹកប្រាក់បន្ថែមចំនួន១០០ លានដុល្លារសម្រាប់ការអភិវឌ្ឍគម្រោងនេះនាពេលអនាគត។

លោក Morgan Hart នាយកគ្រប់គ្រងក្រុមហ៊ុន Emerald បានឲ្យដឹងក្នុងសេចក្តីថ្លែងការណ៍មួយកាលពីម្សិលមិញថា “ការផ្តល់ហិរញ្ញប្បទានដល់ Emerald របស់ក្រុមហ៊ុន Sprott ក្នុងការអភិវឌ្ឍគម្រោងរ៉ែមាសអូរខ្វាវ គឺធ្វើតាមដំណើរការបច្ចេកទេសហ្មត់ចត់ដែលបង្ហាញពីលក្ខណៈរឹងមាំនៃគម្រោង”។

លោកបានបន្ថែមថា “វាគាំទ្រដល់យុទ្ធសាស្ត្ររបស់ក្រុមហ៊ុន ក្នុងការក្លាយជាអ្នកផលិតមាសសម័យទំនើបដ៏ទំនើបដំបូងគេ”។

ការសិក្សាលទ្ធភាពនៃការរុករករ៉ែមាសនៅមណ្ឌលគិរី កាលពីឆ្នាំ២០១៧ បានរកឃើញថ្មដែលផ្ទុកដោយរ៉ែមាសមានចំនួន១៤,៣លានតោន។

តម្លៃមាសបានឡើងដល់កម្រិតខ្ពស់បំផុតក្នុងសប្តាហ៍នេះ ដែលមិនធ្លាប់មានក្នុងរយៈពេល៦ឆ្នាំកន្លងមកនេះ នៅពេលវិនិយោគិនបានបង្កើនការវិនិយោគ លើមាសរបស់ខ្លួនចំពេលដែលភាពតានតឹងសេដ្ឋកិច្ច និងនយោបាយសកល។

យោងតាមក្រុមអ្នកវិភាគបានឲ្យដឹងថា តម្លៃមាសបានកើនឡើង១០ភាគរយក្នុងរយៈពេល៤សប្តាហ៍ចុងក្រោយនេះ ដែលតម្លៃមាសស្មើនឹងប្រមាណ ១,៤០០ដុល្លារក្នុងមួយអោនជាលើកដំបូង ដោយគិតចាប់តាំងពីឆ្នាំ២០១៣ ហើយតម្លៃអាចមាសនឹងឡើងដល់ ១,៥០០ ដុល្លារក្នុងមួយអោន (ឬប្រហែល ៣១ ក្រាម) នៅចុងឆ្នាំនេះ។

ការវិនិយោគលើមាសត្រូវបានចាត់ទុកថា ជាការវិនិយោគប្រកបដោយសុវត្ថិភាព ក្នុងអំឡុងពេលនៃភាពចលាចលសេដ្ឋកិច្ច និងនយោបាយ៕

អន្តរក្រសួងគាំទ្រគំរោងផ្សារទំនើប Noro Mall និងឲ្យអ្នកវិនិយោគគោរពលើបទដ្ឋានមួយចំនួន

June 27, 2019

0

ដោយ ម៉ាណេត

ភ្នំពេញ៖ ក្រុមការងារអន្តរក្រសួងរបស់រដ្ឋាភិបាល បានគាំទ្រការវិនិយោគផ្សារទំនើប Noro Mall ដែលស្ថិតនៅលើផ្លូវនរោត្តម សង្កាត់បឹងកេងកង១ ដែលបាននិងកំពុងសាងសង់យ៉ាងសកម្ម។

យ៉ាងណាក៏ដោយកិច្ចប្រជុំអន្តរក្រសួងដឹកនាំដោយ នេត្រ ភក្រ្តា រដ្ឋលេខាធិការក្រសួងបរិស្ថាន ដើម្បីពិនិត្យ និងផ្តល់យោបល់លើរបាយការណ៍ វាយតម្លៃហេតុប៉ះពាល់បរិស្ថាននិងសង្គមដំបូង (IESIA) លើគម្រោងបង្កើតផ្សារទំនើប ណូរ៉ូម៉ល ដែលមានទីតាំងស្ថិតនៅតាមបណ្តោយមហាវិថីព្រះនរោត្តម ក្នុងភូមិ៨ សង្កាត់បឹងកេងកងទី១ ខណ្ឌចំការមន រាជធានីភ្នំពេញ របស់ក្រុមហ៊ុន NORO MALL CO., LTD. (ម្ចាស់គម្រោង)។

កិច្ចប្រជុំនេះបានគាំទ្រទៅលើគម្រោងវិនិយោគនេះ ព្រោះគម្រោងនេះចូលរួមចំណែកបង្កើនសេដ្ឋកិច្ចជាតិ ផ្តល់ការងារជូនប្រជាពលរដ្ឋ និងផ្តល់នូវសោភ័ណភាពទីក្រុង ប៉ុន្តែក្រុមហ៊ុននេះត្រូវគោរពបទដ្ឋានមួយចំនួនដូចជា ទី១ ក្រុមហ៊ុនត្រូវពិនិត្យបច្ចេកទេស និងទំហំអាងប្រព្រឹត្តកម្មសំណល់ទឹកកខ្វក់ឡើងវិញ ដើម្បីធានាថាគុណភាពសំណល់ទឹកកខ្វក់ ដែលបញ្ចេញចុងក្រោយចូលប្រព័ន្ធលូសាធារណ: ស្ថិតនៅក្រោមស្តង់ដាររបស់ក្រសួងបរិស្ថាន និងមានសមត្ថភាពគ្រប់គ្រាន់ក្នុងការស្តុក សំណល់ទឹកកខ្វក់ពីគម្រោងទាំងមូល ព្រមទាំងត្រូវញែកឱ្យដាច់ពីគ្នារវាងប្រព័ន្ធលូទឹកកខ្វក់ និងទឹកភ្លៀង។

ទី២ ក្រុមហ៊ុនត្រូវគ្រប់គ្រងសំណល់រឹង (សំរាម និងសំណល់សំណង់) ឱ្យបានត្រឹមត្រូវតាមបច្ចេកទេស ដោយត្រូវមានទីតាំងស្តុកសមស្រប ចៀសវាងទុកដាក់នៅតាមចិញ្ចើមផ្លូវ ឬទីសាធារណ: និងនៅដំណាក់កាលប្រតិបត្តិគម្រោង ក្រុមហ៊ុនត្រូវមានធុងសំរាមតាមជាន់នីមួយៗ ដោយត្រូវញែកសំរាមទៅតាមប្រភេទ ទី៣ ក្រុមហ៊ុនត្រូវគិតគូរអំពីការពង្រីកបន្ថែមនូវចំនួនចំណតរថយន្ត ដោយចៀសវាងការចតរថយន្តនៅចិញ្ចើមផ្លូវដែលធ្វើឱ្យមានការកកស្ទះចរាចរណ៍នៅមហាវិថីព្រះនរោត្តម ទី៤ ក្រុមហ៊ុនត្រូវគោរពច្បាប់ការងារដោយមានការចុះបញ្ជី ប.ស.ស។

ទី៥ ក្រុមហ៊ុនត្រូវសហការជាមួយអាជ្ញាធរមូលដ្ឋានដើម្បីពង្រឹងសន្តិសុខសាធារណ: ទី៦ ក្រុមហ៊ុនត្រូវចូលរួមនៅក្នុងសកម្មភាពអនាម័យបរិស្ថាន និងការដាំដើមឈើដើម្បីបង្កើនផ្ទៃបៃតង និងទី៧ ក្រុមហ៊ុនទីប្រឹក្សាត្រូវសហការជាមួយក្រុមហ៊ុនម្ចាស់គម្រោងក្នុងការធ្វើបច្ចុប្បន្នភាពនៃគម្រោងទាំងមូល (ដូចជា ប្រព័ន្ធអាងប្រព្រឹត្តកម្មសំណល់ទឹកកខ្វក់ និងចំណតរថយន្ត) និងកែសម្រួលរបាយការណ៍ IESIA នេះ ឡើងវិញទៅតាមមតិអង្គប្រជុំដែលបានលើកឡើង។

កិច្ចប្រជុំនេះមានការចូលរួមពី ឯកឧត្តម លោក លោកស្រីតំណាងអគ្គនាយកដ្ឋាន និងអគ្គលេខាធិការដ្ឋានពាក់ព័ន្ធនៃក្រសួងបរិស្ថាន តំណាងក្រសួងសេដ្ឋកិច្ច និងហិរញ្ញវត្ថុ ក្រសួងរៀបចំដែនដី នគរូបនីយកម្ម និងសំណង់ ក្រសួងសាធារណការ និងដឹកជញ្ជូន ក្រសួងធនធានទឹក និងឧតុនិយម ក្រសួងកសិកម្ម រុក្ខាប្រមាញ់ និងនេសាទ ក្រសួងការងារ និងបណ្តុះបណ្តាលវិជ្ជាជីវៈ ក្រុមប្រឹក្សាអភិវឌ្ឍន៍កម្ពុជា រដ្ឋបាលរាជធានីភ្នំពេញ និងមន្ទីរបរិស្ថានរាជធានីភ្នំពេញ តំណាងនាយកដ្ឋានវាយតម្លៃហេតុប៉ះពាល់បរិស្ថាន តំណាងក្រុមហ៊ុន NORO MALL CO., LTD. (ម្ចាស់គម្រោង) និងក្រុមហ៊ុនទីប្រឹក្សា RTM GREEN CONSULTANCY CO., LTD. ផងដែរ៕

តើ Mark Zuckerberg ចាប់ផ្ដើមពង្រីកអាជីវកម្ម Facebook ដោយរបៀបណា?

June 27, 2019

0

ដោយ វល័ក្ខ

អាមេរិក៖ នៅដើមឆ្នាំ ២០០៤ បណ្ដាញសង្គម Facebook ទទួលបានជោគជ័យនៅក្នុងដំណាក់កាលដំបូង ពោលគឺចាប់ផ្ដើមអ្នកប្រើប្រាស់មកពីសកលវិទ្យា ល័យធំៗជាច្រើននៅសហរដ្ឋអាមេរិក និងកាណាដា។ នៅពេលនោះហើយដែលលោក Mark Zuckerberg សហស្ថាបនិក និងជាមេធំរបស់ Facebook ត្រូវ អនុវត្តផែកការណ៍បន្ត។

ត្បិតតែ Facebook មានមនុស្សជាច្រើនចាប់ផ្ដើមចុះឈ្មោះប្រើប្រាស់ពិតមែន ប៉ុន្តែវាមិនអាចរីកធំជាងជាងនេះបាននោះទេ បើសិនជាគ្មានលុយ ក្នុងការ វិនិយោគនោះ ហេតុនេះហើយទើបលោក Mark Zuckerberg ត្រូវរកជំនួយខាងផ្នែកហិរញ្ញវត្ថុ។

នៅពាក់កណ្ដាលឆ្នាំ ២០០៤ លោក Mark Zuckerberg បានជួបជាមួយលោក Peter Thiel ដែលជាសហស្ថាបនិក និងជាមេធំរបស់ PayPal ដើម្បីសូមការណែនាំ ក៏ដូចជា ហិរញ្ញវត្ថុ។

ជំនួបមេធំរវាងក្រុមហ៊ុនទាំងពីរបានលេចចេញជាផ្លែផ្ដាគឺលោក Peter Thiel យល់ព្រមបោះទុនវិនិយោគនូវទឹកប្រាក់ ៥០ម៉ឺនដុល្លារអាមេរិក ជាថ្នូរ មកវិញគឺ លោកទទួលបានភាគហ៊ុន Facebook ចំនួន ១០.២ភាគរយ។ មិនត្រឹមតែប៉ុណ្ណោះ Facebook ក៏បានតែងតាំងលោក Peter Thiel ជាក្រុមប្រឹក្សាភិបាល ទៀតផង។

ក្រោយពីទទួលបានការវិនិយោគជាលុយសុទ្ធ និងការប្រឹក្សាយោបល់ផ្នែកយុទ្ធសាស្ត្រពីលោក Peter Thiel មក បណ្ដាញសង្គម Facebook ចាប់ផ្ដើម រីក ដុះដាល និងធំធាត់ឡើងយ៉ាងឆាប់រហ័ស ដោយនៅចុងឆ្នាំ ២០០៤ ចំនួនអ្នកប្រើបានកើនឡើងដល់ ១.៥លាននាក់។

ក្នុងនាមជាក្រុមប្រឹក្សាភិបាល និងជាម្ចាស់ភាគហ៊ុនម្នាក់ផងនោះ លោក Peter Thiel បានព្យាយាមគៀងគរក្រុមអ្នកវិនិយោគ និងអ្នកជំនួញជាច្រើនឱ្យមកវិនិយោគជាមួយក្រុមហ៊ុន Facebook ព្រោះលក់បានមើលឃើញថា អនាគត ទៅមុខ អ្នកប្រើ Facebook នឹងកើនឡើងខ្លាំង នៅពេលនោះហើយដែល Facebook នឹងអាចប្រមូលលុយមកវិញបានច្រើនផងដែរ។

«ខ្ញុំគិតថាការវិនិយោគរបស់ខ្ញុំនៅពេលនេះគឺជាការវិនិយោគដ៏ត្រឹមត្រូវមួយ ហើយខ្ញុំរំពឹងថាវានឹងទទួលបានផ្លែផ្ដាដ៏ច្រើនសន្ធឹកនៅពេលអនាគត។ លុយដែលខ្ញុំចំណាយ ខ្ញុំត្រូវតែយកមកវិញ ហើយយកច្រើនជាងការចំណាយ រាប់លាន ដង»។

នេះជាសំដីរបស់លោក Peter Thiel បានថ្លែងប្រាប់អ្នកសារព័ត៌មាននៅក្នុងសម្ភាសន៍មួយ ក្រោយពេលលោកបោះទុនវិនិយោគ ៥០ម៉ឺនដុល្លារលើក្រុមហ៊ុន Facebook។

នៅខែឧសភា ឆ្នាំ ២០១២ បណ្ដាញសង្គម Facebook បានបោះផ្សាយមូលបត្រថ្លៃដើម (IPO) ទៅកាន់ទីផ្សារភាគហ៊ុន ដោយទទួលបានជាង ១០០ពាន់ លានដុល្លារអាមេរិក (៣៨ដុល្លារក្នុងមួយហ៊ុន) ខណៈនោះផងដែរ លោក Peter Thiel ក៏បានលក់ភាគហ៊ុនមួយចំនួន និងទទួលបាន ប្រាក់ ៦៣៨ លានដុល្លារអាមេរិក ហើយបើតាមការប៉ាន់ប្រមាណ បើសិនជានៅពេលនោះ លោក Peter Thiel លក់ភាគហ៊ុនទាំងអស់ លោកអាចទទួលបានជាង ១ពាន់លាន ដុល្លារអាមេរិក។

នៅពេលនេះ បណ្ដាញសង្គម Facebook មានអ្នកប្រើប្រាស់រហូតដល់ជាង ២៣០០លាននាក់នៅជុំវិញពិភពលោក ហើយកាលពីឆ្នាំ ២០១៨ រកប្រាក់ចំណូលបានជាង ៥៥ពាន់លានដុល្លារអាមេរិក៕

ឥណ្ឌាមានបំណងក្នុងការបណ្ដុះបណ្ដាលវិជ្ជាជីវៈដល់យុវជនកម្ពុជាលើវិស័យទេសចរណ៍ និងបច្ចេកវិទ្យា

June 27, 2019

0

ដោយ វុត្ថា

ភ្នំពេញ៖ ក្រុមហ៊ុនមួយរបស់ឥណ្ឌាបានបង្ហាញគោលបំណងចង់បង្កើតនូវកិច្ចសហប្រតិបត្តិការជាមួយរាជរដ្ឋាភិបាលកម្ពុជា ក្នុងការបណ្ដុះបណ្ដាលវិជ្ជាជីវៈដល់យុវជន ដែលកំពុងសិក្សានៅកម្រិតអនុវិទ្យាល័យ និងយុវជនដែលបោះបង់ការសិក្សា លើវិស័យទេសចរណ៍ សុខាភិបាលនិង បច្ចេកវិទ្យាដើម្បីឱ្យពួកគេទទួលបានជំនាញមួយច្បាស់លាស់ និងមានការងារធ្វើសមរម្យ។

លោក អ៉ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នៅក្នុងកិច្ចជំនួបពិភាក្សាជាមួយលោក Rajneesh Kanotra ប្រធានផ្នែកទំនាក់ទំនងទីផ្សាររបស់ក្រុមហ៊ុន Centum Learning Ltd កាលពីថ្ងៃទី២៦ ខែមិថុនា ឆ្នាំ២០១៩ បានស្វាគមន៍ចំពោះគោលបំណងក្នុងការបង្កើតនូវកិច្ចសហប្រតិបត្តិការជាមួយកម្ពុជា ដោយសារនេះជាការចូលរួមដ៏សំខាន់ក្នុងការជំរុញទំនាក់ទំនងរវាងកម្ពុជា និងឥណ្ឌាឱ្យកាន់តែមានភាពល្អប្រសើរ។

លោកបន្ថែមថាបន្តថា «ខ្ញុំពិតជាចង់ឱ្យឥណ្ឌាមានវត្តមានលើវិស័យអប់រំបណ្ដុះបណ្ដាលបច្ចេកទេស និងវិជ្ជាជីវៈ (TVET) នៅកម្ពុជាណាស់»។

លោក Rajneesh Kanotra ប្រធានផ្នែកទំនាក់ទំនងទីផ្សាររបស់ក្រុមហ៊ុន Centum Learning Ltd បានឱ្យដឹងដែរថា ក្រុមហ៊ុន Centum Learning Ltd នេះ ពិតជាបានដំណើរការក្នុងការបណ្ដុះបណ្ដាលវិជ្ជាជីវៈ និងអភិវឌ្ឍន៍ជំនាញយ៉ាងជោគជ័យ រយៈពេល៧ឆ្នាំមកហើយ ដោយបានជួយដល់ប្រជាពលរដ្ឋជាច្រើន ទាំងនៅប្រទេសឥណ្ឌា នៅតំបន់អាហ្វ្រិកផងដែរ។

លោកថា ក្រុមហ៊ុនមានគោលបំណងចង់បង្កើតនូវកិច្ចសហប្រតិបត្តិការជាមួយរាជរដ្ឋាភិបាលកម្ពុជា ក្នុងការបង្កើតគម្រោងអភិវឌ្ឍន៍ការបណ្ដុះបណ្ដាលវិជ្ជាជីវៈដល់យុវជនកម្ពុជា ដែលកំពុងសិក្សានៅកម្រិតមធ្យមសិក្សាបឋមភូមិ (អនុវិទ្យាល័យ) និងយុវជនដែលបានបោះបង់ការសិក្សាត្រឹមថ្នាក់ទី៩ ដើម្បីឱ្យពួកគេទទួលបាននូវជំនាញវិជ្ជាជីវៈណាមួយ និងទទួលបានការងារធ្វើសមរម្យ ក្នុងនោះមានដូចជាជំនាញបច្ចេកវិទ្យា ទេសចរណ៍ សុខាភិបាល ហិរញ្ញវត្ថុជាដើម។

លោករដ្ឋមន្ត្រី អ៉ិត សំហេង បានបង្ហាញនូវការគាំទ្រយ៉ាងខ្លាំងចំពោះគោលបំណងចង់បង្កើតកិច្ចសហប្រតិបត្តិការនេះថា និងចាត់ក្រុមការងារជំនាញនៃអគ្គនាយកដ្ឋានអប់រំបណ្ដុះបណ្ដាលបច្ចេកទេស និងវិជ្ជាជីវៈ (TVET) ឱ្យធ្វើការពិភាក្សាលើការងារពាក់ព័ន្ធនានា ដើម្បីឱ្យកិច្ចសហប្រតិបត្តិការខាងលើនេះលេចជារូបរាងឡើង និងផ្ដល់ផ្លែផ្កាសម្រាប់ការអភិវឌ្ឍនៅកម្ពុជា។

លោករដ្ឋមន្ត្រីបន្តទៀតថា នៅកម្ពុជាបច្ចុប្បន្នមានកម្លាំងពលកម្មប្រមាណជាង ១០លាននាក់ ហើយអាត្រានៃកម្លាំងពលកម្មដែលចូលក្នុងទីផ្សារការងារក្នុងមួយឆ្នាំៗ មានមិនដល់កន្លះលាននាក់ទេ ប៉ុន្តែទោះបីជាយ៉ាងនេះក្ដី កម្ពុជាក៏នៅតែមិនអាចផ្ដល់ការបណ្ដុះបណ្ដាលដល់ពួកគេគ្រប់គ្នានៅឡើយដែរ ដែលទាមទារឱ្យមានដៃគូសហការទាំងជាតិ និងអន្តរជាតិ ក្នុងការជួយអភិវឌ្ឍន៍វិស័យនេះឱ្យបានកាន់តែច្រើន។

គោលបំណងចង់បង្កើតកិច្ចសហប្រតិបត្តិការនេះ គឺស្របទៅនឹងស្ថានភាពដែលកម្ពុជាកំពុងត្រូវការដៃគូសហការបន្ថែម ។កម្ពុជា-ឥណ្ឌា ធ្លាប់មានទំនាក់ទំនងល្អជាមួយគ្នាតាំងពីបុរាណកាលមក ហើយបច្ចុប្បន្នស្ថានភាពប្រជាសាស្ត្រ ការគោរពប្រតិបត្តិសាសនា ទំនៀមទម្លាប់ ការរស់នៅរវាងប្រជាពលរដ្ឋកម្ពុជា និងឥណ្ឌាក៏មានភាពប្រហាក់ប្រហែលគ្នាដែរ៕

បុរី កៀនស្វាយ ផាក ចាប់ផ្តើមបុកគ្រឹះបើកការដ្ឋានសាងសង់ជាផ្លូវការហើយ

June 27, 2019

0

ដោយ ៖ រ៉ាណេត

ភ្នំពេញ ៖ នៅត្រឹមព្រឹកថ្ងៃទី២៧ ខែមិថុនា ឆ្នាំ២០១៩ បុរី កៀនស្វាយ ផាក របស់ក្រុមហ៊ុន KFA Property Co,.Ltd ដែលជាបុត្រសម្ព័ន្ធរបស់ក្រុមហ៊ុន Khmer Foundation Appraisal បានចាប់ផ្តើមប្រារព្វពិធីបុកគ្រឹះដំណើរការបើកការដ្ឋានសាងសង់ជាផ្លូវការហើយ ។

បុរីលំនៅដ្ឋានបែបទំនើបលើកដំបូងគេនៅក្នុងស្រុកកៀនស្វាយ ខេត្តកណ្តាល បានចាប់ផ្តើមបុកគ្រឹះបើកការដ្ឋានដំណើរការសាងសង់ជាផ្លូវការណ៍ហើយ ក្រោមវត្តមានរបស់លោកឧកញ៉ា នួន រិទ្ធី អគ្គនាយកក្រុមហ៊ុនអចលនទ្រព្យ Khmer Foundation Appraisal និងលោកជំទាវ ព្រមទាំងបណ្តាបុគ្គលិកជាច្រើននាក់។

អគ្គនាយកក្រុមហ៊ុនអចលនទ្រព្យ Khmer Foundation Appraisal លោកឧកញ៉ា នួន រិទ្ធី ដែលជាអ្នកវិនិយោគ និងអភិវឌ្ឍគម្រោងមួយនេះដោយផ្ទាល់បានមានប្រសាសន៍ថា គម្រោងបុរី កៀនស្វាយផាក ស្ថិតនៅក្រោមការគ្រប់គ្រង និងវិនិយោគដោយក្រុមហ៊ុន KFA Property Co ., Ltd ដែលជាបុត្រសម្ព័ន្ធរបស់ក្រុមហ៊ុន Khmer Foundation Appraisal នឹងក្លាយជាលំនៅដ្ឋានដ៏ស្រស់ស្អាត ប្រណីតភាព និងមានផាសុកភាពខ្ពស់មុនគេនៅក្នុងតំបន់ជាយក្រុង។

លោកឧកញ៉ាបានមានប្រសាសន៍ទៀតថា “នៅក្នុងជំហ៊ានដំបូងរបស់ បុរី កៀនស្វាយ ផាក ត្រូវសាងសង់នៅលើផ្ទៃដីប្រមាណជិត៣ម៉ឺនម៉ែត្រការ៉េ និងដាក់លក់ចំនួន ១៦៨ ល្វែង ហើយបញ្ជប់ទាំងការសាងសង់ទាំងស្រុងត្រឹមរយៈពេល២៤ខែ ចែកចេញជា២វគ្គ (១វគ្គ រយៈពេល១២ខែ) ហើយអតិថិជនអាចទទួលបានលំនៅដ្ឋានត្រឹមរយៈ១២ខែតែប៉ុណ្ណោះបន្ទាប់ពីបង់ប្រាក់”។

លោកឧកញ៉ាបានបន្តទៀតថា “នៅក្នុងឱកាសនៃការប្រកាសលក់នេះ ក្រុមហ៊ុនក៏មានកញ្ចប់ពិសេសសម្រាប់អតិថិជនចំនួន២៧នាក់ដំបូងផងដែរ ជាមួយនឹងការទទួលបានទឹកប្រាក់នៃការបញ្ចុះតម្លៃចំនួន ១០០០ដុល្លារភ្លាមៗ”។ បច្ចុប្បន្ននេះ គម្រោងបុរីលំនៅដ្ឋានទាន់សម័យ និងទំនើប តម្លៃសមរម្យ កៀនស្វាយ ផាក បាន និងកំពុងមានសកម្មភាពយ៉ាងមមាញឹកក្នុងការរៀបចំបណ្តាញហេដ្ឋារចនាសម្ព័ន្ធ ដូចជាផ្លូវថ្នល់ បណ្តាញទឹកស្អាត បណ្តាញអគ្គិសនី និងបណ្តាញបង្ហូរទឹកស្របតាមបទដ្ឋានដែលក្រសួងបានកំណត់។

លោកឧកញ៉ា នួន រិទ្ធី បានមានប្រសាសន៍បន្តទៀតថា “លំនៅដ្ឋាននេះ មានលក្ខណៈល្អប្រសើរក្នុងការរស់នៅ ដោយសារតែវាជាតំបន់ដែលកំពុងតែមានការអភិវឌ្ឍខ្លាំង ហើយដោយឡែកចំពោះលំនៅដ្ឋាន ក៏ដូចជាបរិស្ថានជុំវិញ ក៏ត្រូវបានក្រុមហ៊ុនរៀបចំធ្វើឡើងគោរពតាមមាត្រដ្ឋានរបស់ក្រសួង ទាំងការរៀបចំធ្វើផ្លូវធំដែលមានទំហំ១១ម៉ែត្រ និងផ្លូវខាងក្នុងមានទំហំ៨ម៉ែត្រ ជាពិសេសមានការបង្កើតជាតំបន់បៃតង រួមជាមួយផ្សារបែបទំនើបក្នុងតំបន់ ដែលមិនធ្លាប់នោះឡើយនៅក្នុងតំបន់កៀនស្វាយនេះ”។

លោកឧកញ៉ាបានបន្តទៀតថា “នៅតំបន់នេះនឹងមានភាពលេចធ្លោក្នុងពេលដ៏ខ្លី ដោយសារតែវាមានវិសាលភាពផ្ទៃដីនៅទូលាយ តម្លៃនៅមានកម្រិត ហើយជាពិសេស ជាតំបន់ដែលស្ថិតនៅក្នុងគម្រោងអភិវឌ្ឍន៍មជ្ឈមណ្ឌលសេដ្ឋកិច្ច ដែលក្រៅពីមានកំពង់ផែភ្នំពេញ មានតំបន់សេដ្ឋពិសេស មជ្ឈមណ្ឌលកម្សាន្តលំដាប់អភិជន The Prince មណ្ឌលកម្សាន្តរបស់ក្រុមហ៊ុនវឌ្ឍនៈ រោងចក្រកាត់ដេរនោះ គឺថែមទាំងមានផ្លូវក្រវ៉ាត់ក្រុងទី៣ ដែលជាខ្សែបណ្តាញសេដ្ឋកិច្ចយ៉ាងសំខាន់របស់កម្ពុជាទៀតផង”។

បុរី កៀនស្វាយ ផាក បានបង្ហាញខ្លួននៅក្នុងតំបន់ទីប្រជុំជន ដែលហ៊ុំព័ទ្ធទៅដោយគម្រោងអភិវឌ្ឍជាច្រើន ដែលក្រៅពីអំណោយផលដល់ការរស់នៅយ៉ាងមានផាសុកភាព ថែមទាំងអាចប្រកបអាជីវកម្មលក្ខណៈគ្រួសារបានយ៉ាងប្រសើរថែមទៀតផង។ សម្រាប់អតិថិជនដែលមានបំណងចង់ក្លាយជាម្ចាស់លំនៅឋានបែបទំនើប និងទាន់សម័យនៅក្នុងបុរី កៀនស្វាយ ផាក អាចទំនាក់ទំនងផ្ទាល់ជាមួយក្រុមហ៊ុនដែលមានទីស្នាក់ការលក់ដែលស្ថិតនៅភូមិស្រែអំពិល ឃុំឈើទាល ស្រុកកៀនស្វាយ ខេត្តកណ្តាល ឬអាចទំនាក់ទំនងតាមរយៈទូរស័ព្ទលេខ ៖ ០១៧ ៧៩ ៦៦ ៣៣ / ០៧៧ ៩៩ ៧៨ ៨៨

កម្ពុជា ចិនគ្រោងនឹងបង្កើនទំហំពាណិជ្ជកម្មទ្វេភាគី ១០ពាន់លានដុល្លារ

June 27, 2019

0

ប្រែសម្រួលដោយ យុទ្ធ

ភ្នំពេញៈ ប្រទេសកម្ពុជា និងចិន គ្រោងនឹងបង្កើនទំហំពាណិជ្ជកម្មទ្វេភាគីឲ្យបាន ១០ ពាន់លានដុល្លារនាពេលខាងមុខ។ នេះយោងតាមសារព័ត៌មានអនឡាញ Business Report ចុះផ្សាយកាលពីម្សិលមិញនេះ។

នៅក្នុងខែ មករា លោក ស៊ី ជីនពីង (Xi Jinping) ប្រធានាធិបតីចិនបានជួបជាមួយសម្ដេចនាយករដ្ឋមន្ត្រី ហ៊ុនសែនសម្រាប់វេទិកាលើកកម្ពស់ពាណិជ្ជកម្ម និងវិនិយោគចិន-កម្ពុជាឆ្នាំ២០១៩នៅទីក្រុងប៉េកាំង។ ក្នុងដំណើរទស្សនកិច្ចរយៈពេលបីថ្ងៃរបស់សម្ដេចនាយករដ្ឋមន្ត្រី ហ៊ុនសែន បានជួបជាមួយលោកស៊ី ជីនពីង ដើម្បីចាប់ផ្តើមកិច្ចចរចាទ្វេភាគី ដែលសម្តេចបានស្នើសុំជំនួយបន្ថែម ;ពីប្រទេសចិនដែលជាម្ចាស់ជំនួយ និងជាអ្នកវិនិយោគធំបំផុតរបស់កម្ពុជា។

ក្នុងអំឡុងពេលទស្សនកិច្ចនេះលោក ស៊ី ជីនពីង បានថ្លែងថា “ប្រទេសចិនមានឆន្ទៈធ្វើការជាមួយកម្ពុជា ដើម្បីបង្កើតអនាគតដែលបានចែករំលែក ក្នុងចំណោមសហគមន៍នេះ”។

ហេតុដូច្នេះបាននាំឲ្យលោកស៊ី ជីនពីង អំពាវនាវឲ្យប្រទេសទាំងពីររក្សាការផ្លាស់ប្តូរកម្រិតខ្ពស់របស់ពួកគេ។

យោងតាមសេចក្តីថ្លែងការណ៍មួយ បានដកស្រង់ចេញពីរដ្ឋមន្ត្រីការបរទេសកម្ពុជា បានបង្ហាញថា លោក ស៊ី ជិនភីងបានប្រាប់សម្ដេចនាយករដ្ឋមន្ត្រី ហ៊ុន សែន ថាចិនចង់ពង្រឹងកិច្ចសហប្រតិបត្តិការនយោបាយ សេដ្ឋកិច្ច និងសន្តិសុខជាមួយកម្ពុជា។

ទោះបីជាប្រទេសទាំងពីរ បានមើលឃើញពីការជឿនលឿន នៃកិច្ចសហប្រតិបត្តិការនៅក្នុងក្របខ័ណ្ឌពហុភាគីក៏ដោយ ក៏លោក Hu Chunhua ឧបនាយករដ្ឋមន្ត្រីចិន បានសម្តែងក្តីសង្ឃឹម សម្រាប់ការលើកកម្ពស់ទំនាក់ទំនងសេដ្ឋកិច្ច និងពាណិជ្ជកម្មទ្វេរភាគីបន្ថែម។

ដោយចង់ជួយដល់កម្ពុជា ចិននឹងពង្រឹងការផ្សារភ្ជាប់ជាមួយ កម្ពុជាដោយយុទ្ធសាស្រ្តអភិវឌ្ឍន៍ខ្លួន ដោយការជំរុញរួមគ្នានូវគម្រោងខ្សែក្រវ៉ាត់មួយ និងផ្លូវមួយ (BRI)។

ប្រទេសចិនជឿជាក់ថា ពួកគេកំពុងគាំទ្រកម្ពុជា ជាមួយកិច្ចខិតខំប្រឹងប្រែងក្នុងការរក្សាស្ថេរភាព អភិវឌ្ឍន៍សេដ្ឋកិច្ច និងលើកកម្ពស់ជីវភាពរបស់ប្រជាជន។

សម្តេចនាយករដ្ឋមន្ត្រី ហ៊ុន សែន ក៏បានថ្លែងផងដែរថា ប្រទេសទាំងពីរបានចុះហត្ថលេខាលើកិច្ចព្រមព្រៀងតូចៗជាច្រើន ដែលកម្ពុជានឹងទទួលបានដូចជាការទទួលបានផ្លូវល្បឿនលឿន ពីភ្នំពេញទៅខេត្តព្រះសីហនុ ការផ្តួចគម្រោងផ្តើមទឹកស្អាត និងការជួសជុលប្រាសាទ ដែលទាំងអស់នេះនឹងត្រូវបានផ្តល់ដោយប្រទេសចិន។

ទោះបីជាយ៉ាងណាក៏ដោយ ប្រទេសចិនសន្យាផ្ដល់ជំនួយ៤ពាន់លានយ័ន (៥៨៧,៦លានដុល្លារអាមេរិក) ក្នុងរយៈពេលបីឆ្នាំខាងមុខ ក្នុងការជួយជំនួយក៏ពិតមែន ប៉ុន្តែសេចក្តីថ្លែងការណ៍មួយ ដែលត្រូវបានដកចេញពីក្រសួងការបរទេសចិន មិនបាននិយាយអំពីជំនួយហិរញ្ញវត្ថុទេ។

ដោយសារហេដ្ឋារចនាសម្ព័ន្ធ ជារឿងអាទិភាពសម្រាប់កម្ពុជា ក៏ដូចជា ប្រទេសចិនមានបទពិសោធសម្បូរបែប ក្នុងការអភិវឌ្ឍហេដ្ឋារចនាសម្ព័ន្ធ ដោយផ្អែកលើគម្រោងផ្តួចផ្តើមខ្សែក្រវ៉ាត់មួយ។ ដូច្នេះវាឆ្លុះបញ្ចាំងពីទំនាក់ទំនងរវាងកម្ពុជា និងចិន។ បច្ចុប្បន្ននេះភាគច្រើននៃផ្លូវថ្នល់ និងស្ពានស្ថិតនៅកម្ពុជា ត្រូវបានផ្តល់មូលនិធិដោយប្រទេសចិន៕