កម្ពុជា និងចិនបង្កើនការតភ្ជាប់ផ្លូវអាកាស

ដោយ៖ ដែន ចែងចាំង

ភ្នំពេញ៖ កំនើននៃការមកដល់របស់ភ្ញៀវទេសចរណ៍ និងទំហំពាណិជ្ជកម្មកើនឡើង បានធ្វើឲ្យការតភ្ជាប់ផ្លូវអាកាសកំពុងកើនឡើងរវាងប្រទេសកម្ពុជា ចិន ខណៈដែលកម្ពុជារំពឹងថា នឹងទទួលបានភ្ញៀវទេសចរណ៍ចិន២លាននាក់នៅឆ្នាំ២០២។

មន្ត្រីទទួលបន្ទុកបង្កើនការហោះហើរនៃក្រុមហ៊ុនអាកាសយានដ្ឋានកម្ពុជា លោកពេជ្រ សុប៉ុនតារាបានថ្លែងឲ្យដឹងតាមទូរស័ព្ទកាលពីម្សិលម៉ិញនេះថា ការតភ្ជាប់តាមផ្លូវអាកាសរវាងកម្ពុជា ចិនកំពុងកើនឡើងខ្ពស់ ដោយបច្ចុប្បន្ននេះ មានក្រុមហ៊ុនអាកាសចរណ៍ក្នុងស្រុកចំនួន៥ បានហោះហើរទៅកាន់គោលដៅផ្សេងៗគ្នានៃប្រទេសចិន និងមានក្រុមហ៊ុនអាកាសចរណ៍ចិនប្រមាណ១២បានភ្ជាប់ជើងហោះហើរពីទីក្រុងនានា មកកាន់រាជធានីភ្នំពេញ សៀមរាប និងខេត្តព្រះសីហនុ។

លោកបន្តថា “ការភ្ជាប់ជើងហោះហើរកាន់តែច្រើន បង្ហាញពីសញ្ញាល្អប្រសើរនៃការផ្លាស់ប្តូរពាណិជ្ជកម្មរវាងប្រទេសទាំងពីរ និងនាំមកនូវភ្ញៀវទេសចរណ៍កាន់តែច្រើន។ លោកបន្តថា “តាមរយៈការតភ្ជាប់អាកាសចរណ៍នានាមកកម្ពុជា និងពីកម្ពុជាទៅកាន់ប្រទេសចិន ក្នុងមូយថ្ងៃមានជើងហោះហើរប្រមាណ៣៥ទៅ៤០លើកបានភ្ជាប់រវាងកម្ពុជា ចិន។

យោងតាមរបាយការណ៍ របស់រដ្ឋលេខាធិការដ្ឋានអាកាសចរណ៍ស៊ីវិលបានឲ្យដឹងកាលពីពេលថ្មីៗនេះថា បច្ចុប្បន្នព្រលានយន្តហោះអន្តរជាតិភ្នំពេញមានភ្ជាប់ជើងហោះហើរ ទាំងទៅទាំងមកចំនួន២២០លើក ព្រលានយន្តហោះអន្តរជាតិខេត្តសៀមរាបចំនួន២១៩លើក និងព្រលានយន្តហោះអន្តរជាតិភ្នំពេញចំនួន២៤លើកក្នុងមួយថ្ងៃ។

លោកហូ វណ្ឌីទីប្រឹក្សាសមាគមទីភ្នាក់ងារទេសចរណ៍កម្ពុជាបានថ្លែងថា សកម្មភាពនៃការហោះហើររវាងកម្ពុជា ទៅកាន់ប្រទេសចិន និងពីប្រទេសចិនមកកម្ពុជាកំពុងកើនឡើងខ្លាំង ក្នុងប៉ុន្មានឆ្នាំចុងក្រោយនេះ ដោយសារយុទ្ឋសាស្ត្របើកចំហជើងមេឃរបស់រដ្ឋាភិបាល និងទំនាក់ទំនងល្អរវាងរដ្ឋាភិបាលនៃប្រទេសទាំងពីរ។លោកបន្តថា តាមរយៈការបង្កើនជើងហោះហើរនេះ បានធ្វើឲ្យចំនួនភ្ញៀវទេសចរណ៍ចិនកើនឡើងខ្លាំង នេះបើតាមរបាយការណ៍របស់ក្រសួងទេសចរណ៍។

លោកបន្តថា “កម្ពុជារំពឹងថានឹងទទួលបានភ្ញៀវចិនចំនួន១លាននាក់នៅឆ្នាំនេះ កើនឡើងពី៨៤ម៉ឺននាក់កាលពីឆ្នាំមុន”៕

តើអាស៊ានបានដើរដល់ចំណុចណាហើយ?

ដោយ ៖ វត្ថា

ភ្នំពេញ៖ ប្រវត្តិសាស្ត្របានផ្លាស់ប្តូរសហគមន៍សេដ្ឋកិច្ច ប្រជាជាតិអាស៊ីអាគ្នេយ៍ ទៅជាសហគមន៍សេដ្ឋកិច្ចថ្មីមួយកាលពីចុងឆ្នាំ២០១៥ ប៉ុន្តែសំណួរបន្តគឺតើអាស៊ានត្រូវធ្វើអ្វីទៀត និងការធ្វើសមាហរណកម្មកន្លងមកទទួលបានជោគជ័យបែបណានៅតែជាសំណួរ ដែលពិបាកឆ្លើយនៅឡើយ។

ជាក់ស្តែងនៅក្នុងសប្តាហ៍នេះ មេដឹកនាំកំពូលអាស៊ាន នៃប្រទេសជាដៃគូបានចូលរួមកិច្ចប្រជុំកំពូលអាស៊ានលើកទី៣១ និងកិច្ចប្រជុំពាក់ព័ន្ធបានចាប់កាលពីថ្ងៃទី១០ ដល់ទី១៤ ខែវិច្ឆិកា ឆ្នាំ២០១៧ នៅទីក្រុងម៉ានីឡា ប្រទេសហ្វីលីពីនដើម្បីបន្តស្វែងរក និងពង្រឹងកិច្ចសហប្រតិបត្តិការជាមួយប្រទេសជិតខាង ក្រោយប្រធានបទ “ភាពជាដៃគូសម្រាប់ការផ្លាស់ប្តូរការចូលរួមរបស់ពិភពលោក” ឆ្លុះបញ្ចាំងពីការតស៊ូមតិរបស់រដ្ឋាភិបាលហ្វីលីពីន ដើម្បីលើកកម្ពស់សាមគ្គីភាពក្នុងចំណោមប្រទេសសមាជិកអាស៊ាន និងដៃគូសកលលោករបស់ខ្លួន។

គេហទំព័រ Propertyarea.asia សូមលើកយកចំណេះដឹងខ្លះៗ ទាក់ទងនឹងប្រវត្តិ និងកិច្ចប្រជុំកំពូលដ៏មានសារៈសំខាន់មួយនេះ។

កិច្ចប្រជុំកំពូលអាស៊ាន (ASEAN Summit) ជាកិច្ចប្រជុំដែលរៀបចំធ្វើឡើងដោយសមាជិក នៃសមាគមប្រជាជាតិអាស៊ីអាគ្នេយ៍ ទាក់ទងនឹងការអភិវឌ្ឍសេដ្ឋកិច្ច និងវប្បធម៌នៃបណ្តាប្រទេសអាស៊ីអាគ្នេយ៍។

សម្ព័ន្ធមេត្រីភាពរបស់អាស៊ានបច្ចុប្បន្ន មានទំនាក់ទំនងជាមួយបណ្តាប្រទេសដទៃទៀត ដែលមានបំណងចូលរួមក្នុងបេសកកម្ម និងទស្សនៈវិស័យរបស់អាស៊ាន និងពិភពលោក។ ជាក់ស្ដែងក្របខ័ណ្ឌសម្ព័ននេះ កំពុងរៀបចំកិច្ចប្រជុំប្រចាំឆ្នាំ ជាមួយបណ្តាប្រទេសដទៃទៀត នៅក្នុងអង្គការដែលត្រូវបានគេស្គាល់ថាជាដៃគូសន្ទនាអាស៊ាន (ASEAN dialogue partners)។

ប្រជុំអាស៊ានបូកបី មានប្រទេសចិន ជប៉ុន និងកូរ៉េខាងត្បូង។ កិច្ចប្រជុំកំពូលផ្លូវការត្រូវបានប្រារព្ធធ្វើឡើងក្នុងរយៈពេល៣ ថ្ងៃដោយមាកម្មវិធីដូចជា ទី១ កិច្ចប្រជុំមេដឹកនាំរៀបចំកិច្ចប្រជុំស្ថាប័នផ្ទៃក្នុង ទី២ មេដឹកនាំអាស៊ានរៀបចំសន្និសីទមួយជាមួយរដ្ឋមន្ត្រីការបរទេសនៃវេទិកាតំបន់អាស៊ាន ទី៣ មេដឹកនាំនៃដៃគូសន្ទនាអាស៊ានទាំង៣ (អាស៊ាន+៣) ដូចជាប្រទេសចិន ជប៉ុន និងកូរ៉េខាងត្បូងរៀបខំធ្វើកិច្ចប្រជុំជាមួយមេដឹកនាំអាស៊ាន ទី៤ និងកិច្ចប្រជុំដាច់ដោយឡែកមួយត្រូវបានកំណត់ សម្រាប់មេដឹកនាំដៃគូសន្ទនាអាស៊ាន២ (ក៏ត្រូវបានគេស្គាល់ថាអាស៊ាន + CER) ដែលមានឈ្មោះថាអូស្ត្រាលី និងនូវែលសេឡង់។

ប្រវត្តិនៃកិច្ចប្រជុំកំពូលអាស៊ាន

កិច្ចប្រជុំកំពូលអាស៊ាន ត្រូវបានចាប់ផ្តើមប្រជុំលើកដំបូង នៅខែកុម្ភៈឆ្នាំ១៩៧៦ នៅកោះបាលីប្រទេសឥណ្ឌូនេស៊ី។ នៅក្នុងកិច្ចប្រជុំកំពូលនេះអាស៊ានបានបង្ហាញនូវការត្រៀមខ្លួនដើម្បី “អភិវឌ្ឍន៍ទំនាក់ទំនងប្រកបដោយផ្លែផ្កា” និងកិច្ចសហប្រតិបត្តិការ ដែលមានផលប្រយោជន៍ទៅវិញទៅមក ជាមួយបណ្តាប្រទេសដទៃទៀតនៅក្នុងតំបន់។ មេដឹកនាំអាស៊ានបានចុះហត្ថលេខាលើសន្ធិសញ្ញាមិត្តភាព និងកិច្ចសហប្រតិបត្តិការនៅអាស៊ីអាគ្នេយ៍។

នៅកិច្ចប្រជុំកំពូលអាស៊ានលើកទី២ ដែលបានប្រារព្ធឡើងនៅទីក្រុងគូឡាឡាំពួប្រទេសម៉ាឡេស៊ីនៅឆ្នាំ១៩៧៧ គឺជាឱកាសសម្រាប់កិច្ចប្រជុំកំពូលលើកដំបូងរវាងជប៉ុននិងអាស៊ាន។ ជប៉ុនបានសម្តែងគោលបំណងរបស់ខ្លួនក្នុងការជំរុញកិច្ចសហប្រតិបត្តិការជាមួយអាស៊ាន។

នៅកិច្ចប្រជុំកំពូលអាស៊ានលើកទី៩កិច្ចប្រជុំនៅថ្ងៃទី៧ ខែតុលាឆ្នាំ ២០០៣ នៅកោះបាលីប្រទេសឥណ្ឌូនេស៊ី។ មេដឹកនាំនៃប្រទេសជាសមាជិកបានចុះហត្ថលេខាលើសេចក្តីប្រកាសមួយ ដែលគេស្គាល់ថាជាកោះបាលីកុងស៊ុលទី២ ដែលពួកគេបានព្រមព្រៀងគ្នា ដើម្បីធ្វើសមាហរណកម្មសេដ្ឋកិច្ចឱ្យបានជិតស្និទ្ធនៅឆ្នាំ២០២០៕

ចំណុចសំខាន់ទាំង3 ដែលអ្នកគួរធ្វើនៅពេលចេញធ្វើជំនួញអចលនទ្រព្យ

Handing Over the House Keys in Front of Sold New Home Against a Blue Sky

សម្រួលដោយ ៖ រ៉ាវី

ភ្នំពេញ ៖ ស្របពេលដែលគេមើលឃើញថា កម្ពុជាកំពុងតែមានភាពរីកចម្រើនខ្លាំងលើវិស័យអចលនទ្រព្យ បានជម្រុញឱ្យមានការកើនឡើងនូវក្រុមហ៊ុនវិនិយោគ ភ្នាក់ងារអចលនទ្រព្យ ក៏ដូចជាអ្នកស្វែងរកកម្រៃជើងសារជាច្រើន ។ ប៉ុន្តែបើទោះជាអ្នកទាំងនោះបានសម្រេចចិត្តចេញមកប្រកបជាមួយអាជីពមួយនេះក៏ដោយ តែភាពជាក់ស្តែងត្រូវបានគត់សម្គាល់ឃើញថា ក្នុងចំណោមអ្នកទាំងនោះ គឺមានមួយចំនួនអាចសម្រេចបានភាពល្អប្រសើរ និងរីកចម្រើនទទួលបានប្រាក់ចំណេញពីការវិនិយោគ ដោយឡែកក៏មានមនុស្សមួយក្រុមទៀត ជួបភាពបរាជ័យលើការធ្វើជំនួយក្នុងវិស័យមួយនេះទៅវិញ ។ យ៉ាងណាក៏ដោយ ភាពបរាជ័យ និងភាពជោគជ័យទាំងនោះ ត្រូវបានគេលើកឡើងថា គឺមានការជាប់ព័ន្ធទៅនឹងចំណុចធំៗចំនួន3 ដែលវាជាគ្រឹះក្នុងការប្រកបជំនួញទិញ-លក់អចលនទ្រព្យ ។ ដូច្នេះ ដើម្បីឈរជើង និងរកស៊ីបានយូរនៅក្នុងវិស័យអចលនទ្រព្យ អ្នកត្រូវតែមានភាពឆ្លាតវៃបំផុតក្នុងការបង្កើតទំនាក់ទំនង និងចេះវាយតម្លៃទៅលើអចលនទ្រព្យ។ តើអ្នកគួរតែយល់ដឹងអ្វីខ្លះនៅក្នុងវិស័យអចលនទ្រព្យ?

Handshakes with customer after contract signature

ស្វែងយល់ឱ្យបានច្បាស់ពីតម្លៃជាក់ស្ដែងក្នុងស្រុក ៖ នេះជាកិច្ចការដំបូងដែលអ្នកត្រូវដឹងតម្លៃអចលនទ្រព្យក្នុងពេលបច្ចុប្បន្ន នៅក្នុងតំបន់នីមួយៗក្នុងប្រទេសរបស់អ្នក ជាពិសេសគឺតំបន់កំពុងអភិវឌ្ឍន៍ និងតំបន់គ្រោងអភិវឌ្ឍន៍ នៅពេលដែលអ្នកដឹងពីតម្លៃអចលនទ្រព្យក្នុងតំបន់ណាមួយច្បាស់ នោះអ្នកនឹងងាយស្រួលក្នុងការលក់ ឬទិញ ដោយទទួលបានផលចំណេញច្រើន។ អ្នកត្រូវដឹងឱ្យច្បាស់ថា តម្លៃនៃអចលនទ្រព្យមួយនេះ វានឹងកើនតម្លៃនៅក្នុងរយៈពេលប៉ុន្មានឆ្នាំទៀតនៅពេលខាងមុខ ជាពិសេសត្រូវដឹងថា ហេតុអ្វីតំបន់នេះមានការអភិវឌ្ឍន៍ច្រើន ប៉ុន្តែតម្លៃនៃអចលនទ្រព្យមិនកើនឡើងសោះ?

សម្លឹងទៅតំបន់ជាយក្រុងដែលមានសក្ដានុពល ៖ ជាការពិតណាស់ នៅពេលការអភិវឌ្ឍន៍ក្នុងក្រុងកាន់តែតូចទៅៗ នោះក្រុមអ្នកវិនិយោគនឹងងាកទៅជាយក្រុងវិញម្ដង ដូច្នេះ អ្នកត្រូវដឹងថា បច្ចុប្បន្នតើការអភិវឌ្ឍន៍នៅក្នុងទីក្រុងដល់កម្រិតណាហើយ ហើយវានឹងជះឥទ្ធិពលទៅដល់ជាយក្រុងនៅពេលណា? នៅពេលដែលអ្នកដឹងថា តំបន់ជាយក្រុងណាមួយ នឹងក្លាយជាតំបន់អភិវឌ្ឍន៍នោះ នោះអ្នកនឹងមើលឃើញពីការរកស៊ី និងទទួលបានផលចំណេញពីការរកស៊ីនៅក្នុងវិស័យអចលនទ្រព្យមួយនេះ។

តាមដានព័ត៌មានផ្សេងទៀតដែលពាក់ព័ន្ធ ៖ ត្រូវមានទំនាក់ទំនងល្អជាមួយនឹងស្ថាប័នឯកជន ឬ ស្ថាប័នរដ្ឋ ដើម្បីទទួលបានព័ត៌មាននានា លើវិស័យអចលនទ្រព្យ ព្រោះអ្នកនឹងដឹងថា តំបន់ណានឹងក្លាយជាតំបន់អភវិឌ្ឍន៍ តំបន់ណានឹងត្រូវរដ្ឋាភិបាលកាត់ធ្វើជារបស់រដ្ឋ។ មួយទៀត ការមានទំនាក់ទំនងល្អជាមួយនឹងស្ថាប័នរដ្ឋ អ្នកក៏អាចនឹងទទួលបានផលចំណេញច្រើន ព្រោះនៅពេលមានក្រុមវិនិយោគមក គេអាចនឹងរុញច្រានគម្រោងណាមួយឱ្យមកអ្នកក៏ថាបានដែរ ។

ដូច្នេះ សម្រាប់លោកអ្នកដែលចង់ធ្វើការវិនិយោគ ឬធ្វើជំនួញក្នុងវិស័យអចនទ្រព្យគម្បីធ្វើការសិក្សាលម្អិតទៅលើចំណុចគ្រឹះទាំង3ខាងលើនេះ ៕

កម្ពុជាកំពុងឆ្ពោះទៅកាន់ប្រទេសមានប្រាក់ចំណូលមធ្យមកម្រិតខ្ពស់

ដោយ ៖ គង់ សូរិយា

ភ្នំពេញ ៖ ការពង្រឹងធនធានមនុស្ស និងការពង្រឹងភាពម្ចាស់ការក្នុងការងារអភិវឌ្ឍសង្គម-សេដ្ឋកិច្ចរបស់ខ្លួន គឺជាការចូលរួមចំណែកជំរុញកិច្ចខិតខំប្រឹងប្រែងរបស់កម្ពុជា ក្នុងការប្រែក្លាយខ្លួនទៅជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ 2030 ។

រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លោក ហ៊ាន សាហ៊ីប បានលើកឡើងនៅក្នុងវគ្គបណ្តុះបណ្តាល ស្តីពីភាពជាដៃគូរវាងរដ្ឋ និងវិស័យឯកជនកាលពីម្សិលម៉ិញនេះថា កម្ពុជាបានឆ្លងផុតពីប្រទេសក្រីក្រ មកជាប្រទេសមានប្រាក់ចំណូលមធ្យមកម្រិតទាប ក្នុងនោះកម្ពុជាកំពុងបន្តកិច្ចខិតខំប្រឹងប្រែងប្រែក្លាយខ្លួនទៅជាប្រទេសមានប្រាក់ចំណូលមធ្យមកម្រិតខ្ពស់។ នេះជារបត់ថ្មីមួយទៀត ដែលកម្ពុជាត្រូវពង្រឹងកិច្ចម្ចាស់ការក្នុងការងារអភិវឌ្ឍសង្គម-សេដ្ឋកិច្ច ជាពិសេសការពង្រីកនូវផ្នែកចំណេះដឹងឲ្យមានច្រើនសំបូរបែប។ លោកបានបន្តថា ក្នុងស្មារតីនេះ កម្ពុជាបានរៀបចំឯកសារគោលនយោបាយ ស្តីពីការអភិវឌ្ឍយន្តការភាពជាដៃគូរវាងរដ្ឋ និងវិស័យឯកជន សម្រាប់គ្រប់គ្រងគម្រោងវិនិយោគសាធារណៈ 2016 – 2020 ដែលឆ្លុះបញ្ចាំងឱ្យឃើញពីការប្តេជ្ញាចិត្ត និងការយកចិត្តទុកដាក់ខ្ពស់ក្នុងការបន្តអភិវឌ្ឍវិស័យហេដ្ឋារចនាសម្ពន្ធសាធារណៈ សំដៅរួមចំណែកទ្រទ្រង់ចីរភាពនៃកំណើនសេដ្ឋកិច្ចរយៈពេលវែង និងបង្កើនសមត្ថភាពប្រកួតប្រជែងរបស់កម្ពុជាទាំងក្នុងតំបន់និងសកលលោក។

លោក ហ៊ាន សាហ៊ីប បានបន្តថា ការពង្រីកចំណេះដឹងនេះដែរ កម្ពុជាកំពុងមានសេចក្តីត្រូវការ ក្នុងការស្វែងយល់បន្ថែមនូវឧត្តមនុវត្តន៍ និងការផ្លាស់ប្តូរបទពិសោធន៍ជាអន្តរជាតិ ក្នុងការអនុវត្តលើភាពជាដៃគូរវាងរដ្ឋ និងវិស័យឯកជន ពិសេសក្នុងវិស័យហេដ្ឋរចនាសម្ពន្ធផ្លូវ ស្ពាន ថាមពល ជាដើម សម្រាប់ចូលរួមចំណែក ជួយជំរុញដល់ការអភិវឌ្ឍសង្គម-សេដ្ឋកិច្ចកម្ពុជា។

ប្រទេសមានប្រាក់ចំណូលមធ្យមកម្រិតខ្ពស់ សំដៅដល់ប្រទេសដែលប្រជាជនម្នាក់ៗ មានប្រាក់ចំណូលចាប់ពីជាង 4,800 ដុល្លារ ដល់ 12,000 ដុល្លារអាមេរិកក្នុងមួយឆ្នាំ។

លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិបានថ្លែងថា ផ្អែកតាមសូចនាករសេដ្ឋកិច្ចកម្ពុជាអាចឲ្យយើងព្យាករណ៍ថា រដ្ឋាភិបាលកម្ពុជានឹងសម្រេចបានក្នុងការនាំប្រទេសទៅកាន់ប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ 2030 ។ លោកបន្តថា ការព្យាករណ៍នេះផ្អែកលើមូលដ្ឋានវិទ្យាសាស្រ្តច្បាស់លាស់ មិនមែនចេះតែលើកឡើងនោះទេ ហើយលោកជឿជាក់លើសមត្ថភាពធនធានមនុស្សរបស់កម្ពុជា ដែលបាននិងកំពុងធ្វើការងារនេះ។

លោកបន្តថា “ផ្អែកលើមូលដ្ឋាននៃសេដ្ឋកិច្ច និងកំណើនសេដ្ឋកិច្ចដែលកម្ពុជាសម្រេចបាន កម្ពុជាពិតណាស់នឹងសម្រេចបាននូវគោលដៅរបស់ខ្លួននៅឆ្នាំ 2030 ក្នុងនាមជាប្រទេសមានប្រាក់ចំណូលមធ្យមកម្រិតខ្ពស់” ៕

ព្រលានយន្តហោះអន្តរជាតិខេត្តកោះកុង កំពុងចាប់ផ្តើមសាងសង់

ដោយ៖ គង់ សូរិយា

ភ្នំពេញ៖ ព្រលានយន្តហោះអន្តរជាតិថ្មីមួយទៀត ស្ថិតនៅដែនមហាសាគរកម្ពុជា បាននិងកំពុងសាងសង់យ៉ាងសកម្មហើយនាពេលនេះ ដែលនេះជាមូលដ្ឋាននៃការរីកចម្រើននៃសេដ្ឋកិច្ច សង្គមកម្ពុជា។

អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល លោក ស៊ិន ចាន់សិរីវុត្ថាបានថ្លែងឲ្យដឹងនាព្រឹកថ្ងៃទី១៤ វិច្ឆិកានេះថា ភាគីក្រុមហ៊ុនសាងសង់ព្រលានយន្តហោះនេះ បានមកជួបជាមួយមន្ត្រីជំនាញ និងមន្ត្រីជាន់ខ្ពស់រដ្ឋលេខាធិការដ្ឋានអាកាសចរណ៍ស៊ីវិលចំនួនពីរលើកមកហើយ ដើម្បីបង្ហាញពីគំរោងរបស់ពួកគេ និងសកម្មភាពនៃការចាប់ផ្តើមគំរោងនេះ។ លោកបន្តថា ព្រលានយន្តហោះនេះសាងសង់លឿន ឬយឺតអាស្រ័យលើល្បឿន នៃការអភិវឌ្ឍន៍រមណីយដ្ឋាន និងមជ្ឈមណ្ឌលពាណិជ្ជកម្មរបស់ពួកគេនៅក្នុងស្រុកថ្មបាំង និបុទុមសាគរក្នុងខេត្តកោះកុង។

ក្រុមហ៊ុន Tianjin Union Development Group បានទទួលដីសម្បទានពីរដ្ឋាភិបាលជាង ៥ម៉ឺនហិកតា ដែលគ្របដណ្តប់ស្រុកស្រុកពីររបស់ខេត្តកោះកុង ជាអ្នកសាងសង់ព្រលានយន្តហោះអន្តរជាតិថ្មីនេះ។ ក្រុមហ៊ុននេះគ្រោងបោះទុនវិនិយោគប្រមាណ ៥០០០លានដុល្លារអាមេរិក។

លោក ស៊ិន ចាន់សិរីវុត្ថា បានបន្តថា សកម្មភាពឈូសឆាយទីតាំងសាងសង់ ព្រលានយន្តហោះអន្តរជាតិថ្មីនេះ បានចាប់ផ្តើមតាំងពីដើមឆ្នាំនេះ ប៉ុន្តែសកម្មភា ពហាក់មានភាពយឺតៗ ដោយសាររដូវភ្លៀង ប៉ុន្តែនៅពេលបញ្ចប់រដូវភ្លៀងសកម្មភាពនៃការសាងសង់នឹងត្រូវពន្លឿនហើយ។

ទោះជាយ៉ាងណាតាមព៌តមានរបស់ក្រុមហ៊ុននេះ នាពេលកន្លងមកបានឲ្យដឹងថា រដ្ឋាភិបាលកម្ពុជាបានអនុម័ត នូវគំរោងសាងសង់ព្រលានយន្តហោះអន្តរជាតិថ្មី ដែលវិនិយោគដោយក្រុមហ៊ុន Tianjin Union Development Group ជាក្រុមហ៊ុនដែលបាន និងកំពុងវិនិយោគលើរមណីយដ្ឋានទេសចរណ៍លំដាប់អន្តរជាតិនៅខេត្តកោះកុង។

តំណាងក្រុមហ៊ុន Tainjin Union Development Group លោកស្រី ប៊ែលឡា ហ្សាង ធ្លាប់បានមានប្រសាសន៍ឲ្យដឹងថា ការធ្វើផែមការសាងសង់ព្រលានយន្តហោះលំដាប់អន្តរជាតិនេះ បានបញ្ចប់ហើយ និងកំពុងត្រៀមរៀបចំផែនការដើម្បីធ្វើការសាងសង់។ ព្រលានយន្តហោះនេះ អាចទទួលអ្នកដំណើរបាន ១០លាននាក់ក្នុងមួយឆ្នាំ និងអាចចុះចតយន្តហោះខ្នាតធំ Boeing A380 ហើយក្រុមហ៊ុនបានធ្វើការសិក្សាពីភូមិសាស្ត្រ និងកំណត់ទីតាំងសម្រាប់ព្រលានយន្តហោះនេះរួចហើយ។

តាមព័ត៌មានរបស់ក្រុមហ៊ុនដដែលនេះបានឲ្យដឹងថា បច្ចុប្បន្នក្រុមហ៊ុនបាននិងកំពុងដំណើរការគំរោងរមណីយដ្ឋាន លំដាប់ប្រណីតនៅខេត្តកោះកុងរួចហើយ ដែលរួមមានសណ្ឋាគារលំដាប់ផ្កាយ៥ភោជនីយដ្ឋាន ទីលានវាយកូនហ្គោលលំដាប់អន្តរជាតិជាដើម។

ទីប្រឹក្សាសភាពាណិជ្ជកម្មកម្ពុជាលោកហូ វណ្ឌីបានថ្លែងថា ការមានព្រលានយន្តហោះថ្មីមួយទៀត នឹងហុចសក្តានុពលសម្រាប់វិស័យអាកាសចរណ៍នៅកម្ពុជា ជាពិសេសផ្តល់ឲ្យមានជម្រើសកាន់តែច្រើនថែមទៀត សម្រាប់ក្រុមហ៊ុនអាកាសចរណ៍នានា ដែលអាចហោះហើរត្រង់មកកម្ពុជា ហើយប្រសិនជាព្រលានថ្មីនេះមានស្តង់ដាអន្តរជាតិ វានឹងអាចទាក់ទាញក្រុមហ៊ុនអាកាសចរណ៍មកពីប្រទេសថៃ និងខេត្តរបស់ថៃដែលជាប់នឹងកម្ពុជា អាចភ្ជាប់បណ្តាញហោះហើរទៅវិញទៅមក។

លោកបន្តថា “ខ្ញុំស្វាគមន៍គំរោងវិនិយោគដ៏ល្អនេះ ដែលវានឹងជួយជំរុញកំនើនសេដ្ឋកិច្ច និងទាក់ទាញទេសចរណ៍មកទស្សនាកម្ពុជា កាន់តែច្រើនថែមទៀត។

ការវិនិយោគនេះជាផ្នែកមួយនៃវិថីសូត្រ ខ្សែក្រវ៉ាត់មួយ ផ្លូវមួយរបស់ប្រទេសចិន មកកម្ពុជា ដែលរដ្ឋាភិបាលប្រទេសទាំងពីរ បានគាំទ្រគ្នាទៅវិញទៅមក ហើយកម្ពុជារំពឹងថា នឹងទទួលបានភ្ញៀវទេសចរណ៍ចិន២លាននាក់នៅឆ្នាំ២០២០ខាងមុខនេះ៕

ធ្វើតាមវិធីសាស្រ្តទាំងនេះ ទើប លក់អចលនទ្រព្យបានដាច់លឿន

ដោយ ៖ ដែន ចែងចាំង

ក្នុងពិភពនៃការទិញ-លក់អចលនទ្រព្យ អ្នកជំនាញមានវិធីសាស្រ្តផ្សេងៗគ្នាក្នុងការផ្សព្វផ្សាយ និងចចារជាមួយអតិថិជនរបស់ខ្លួន ដើម្បីឲ្យអចលនទ្រព្យរបស់ខ្លួនលក់ដាច់លឿន។ វាមិនមែនជាការងាយស្រួលដូចត្រឹមការនិយាយនោះទេ តែវិធីសាស្រ្តមួយចំនួនខាងក្រោមនេះទំនងជាមួយលោកអ្នកបាន។

បញ្ជីគុណភាព

យោងតាមការសិក្សាស្រាវជ្រាវមួយដែលធ្វើឡើងដោយសមាគមជាតិភ្នាក់ងារអចលនទ្រព្យ (អាមេរិក) កាលពីពេលថ្មីៗនេះបានរកឃើញថា ការស្រាវជ្រាវដែលទាក់ទងនឹងអចលនទ្រព្យនៅក្នុង Google.com បានកើនឡើង 253 ភាគរយ នៅ 4 ឆ្នាំចុងក្រោយនេះ ហើយនៅពេលនេះប្រមាណ 90 ភាគរយ នៃមានបំណងទិញផ្ទះ បានប្រើប្រាស់អ៊ីនធឺណិត ដើម្បីធ្វើការស្វែងរកទិញផ្ទះរបស់ពួកគេ។

ការស្រាវជ្រាវថ្មីពី We Are Social របស់សិង្ហបុរីក៏បានរកឃើញផងដែរថា ការប្រើប្រាស់អ៊ីនធឺណិតនៅប្រទេសកម្ពុជា បានកើនឡើង 400 ភាគរយនៃចន្លោះឆ្នាំ2015 និង 2016 ។

ដោយសារការកើនឡើងយ៉ាងរហ័ស នៃអ្នកប្រើប្រាស់អ៊ីនធឺណិតនៅប្រទេស កម្ពុជា ដែលបានកើនឡើងដល់ទៅ 6,70 លាននាក់ នៅក្នុងឆ្នាំ 2016កន្លងមកនេះ បញ្ជីរគុណភាពអចលនទ្រព្យ ក៏បានក្លាយទៅជារឿងដែលមានសារៈសំខាន់យ៉ាងខ្លាំង។

ដំបូន្មានដើម្បីទទួលបានបញ្ជីគុណភាពខ្ពស់

ការបង្ហោះរូបភាព

រូបភាពបង្ហោះ គុណភាព និងសោភ័ណភាពនៃរូបភាពមានសារៈសំខាន់ណាស់ ដើម្បីទាក់ទាញទឹកចិត្តអតិថិជន ព្រោះថារូបមួយសន្លឹកមានន័យរាប់មិនអស់ ។ វាមានសារៈសំខាន់ណាស់ ដោយរូបដែលអ្នកបង្ហោះ គឺជារូបនៃអចលនទ្រព្យដែលអ្នកកំពុងលក់ពិតប្រាកដមែន ដោយសាររូបនេះអាចបង្ហាញពីភិនភាគពិតៗ នៃអចនលទ្រព្យទៅកាន់អ្នកទិញ។

សរសេរពិពណ៌នាពីអចលនទ្រព្យរបស់អ្នក

អ្នកលក់អចលនទ្រព្យ អាចផ្តល់ព័ត៌មានលម្អិតឲ្យបានច្រើន តាមដែលអ្នកអាចធ្វើទៅបាន នៅពេលដែលអ្នកសរសេរពិពណ៌នាបញ្ជីគុណភាព។ សាកស្រមៃថាខ្លួនអ្នកជាអ្នកទិញ។ តើអ្នកនឹងចង់បានគុណភាពយ៉ាងណាខ្លះពីអចលនទ្រព្យមួយនេះ។

ផ្តល់ព័ត៌មានទំនាក់ទំនងដែលល្អបំផុត

ការផ្សព្វផ្សាយបស់អ្នកនឹងមិនបានផលប្រយោជន៍អ្វីនោះទេ ប្រសិនបើគេមិនអាចទាក់ទងអ្នកបាន។ ហេតុនេះហើយទើបអ្នកត្រូវធានាថា ព័ត៌មានលម្អិតសម្រាប់ទំនាក់ទំនងជាមួយអ្នកមានភាពល្អ និងផ្តល់ភាពជឿជាក់បំផុត ។ ចុះលេខទូរស័ព្ទពីរខ្សែ និងអាសយដ្ឋានអ៊ីមែល ប្រសិនបើពេលខ្លះអ្នកមិនមានពេលលើកទូរស័ព្ទ។

ត្រូវធានាគុណភាពអចលនទ្រព្យរបស់អ្នកល្អបំផុត

ធម្មតាទេ ការលក់ផលិតផលអ្វីមួយ មិនត្រឹមតែទាមទារផលិតផលនោះមានគុណភាពនោះទេ តែក៏ត្រូវមានការផ្សព្វផ្សាយឲ្យបានល្អផងដែរ។ ហេតុនេះចំណងជើងអចលនទ្រព្យ ជាភាសាខ្មែរ និងអង់គ្លេស ឬភាសាចិន អ្នកត្រូវតែធ្វើវាឲ្យបានល្អ។ ប្រសិនបើវាមានភាពសាមញ្ញ ងាយយល់ នោះគេនឹងរកឃើញអចលនវត្ថុរបស់អ្នកមុនគេ។

ការដាក់តម្លៃអចលទ្រព្យរបស់អ្នក

ការដាក់តំលៃទាមទារឲ្យមានការប្រុងប្រយ័ត្នបំផុត ព្រោះបើអចលនទ្រព្យរបស់អ្នកដាក់តំលៃខ្ពស់ពេក អចលនទ្រព្យរបស់អ្នក នឹងមិនទទួលបានការចាប់អារម្មណ៍នោះទេ។ ប្រសិនបើតម្លៃនោះអាចតថ្លៃបាន អ្នកគួរតែធានាថា គេអាចដឹងតាមរយៈការពិពណ៌នារបស់អ្នក។

ប្រសិនបើលក្ខខណ្ឌនៃការទិញ ឬជួលអាចតថ្លៃបាន អ្នកក៏ត្រូវធ្វើយ៉ាងណាឲ្យគេដឹងតាមរយៈការពិពណ៌នារបស់អ្នកផងដែរ។

ការឆ្លើយតបជាមួយនឹងការសាកសួររកទិញឲ្យបានសមស្រប

ការឆ្លើយតបលឿនមានសារៈសំខាន់ណាស់ នៅពេលដែលអ្នកទទួលបានការចាប់អារម្មណ៍សាកសួរពីអតិថិជនរបស់អ្នក។ អ្នកគួរតែឆ្លើយតបជាមួយនឹងពួកគេឲ្យបានលឿនបំផុត។ ប្រសិនបើអ្នកមិនឆ្លើយតបលឿនទេ នោះពួកគេនឹងរកមើលវត្ថុថ្មីទៀត និងអ្នកលក់ថ្មីទៀតដែលយកចិត្តទុកដាក់នឹងពួកគេ។

ការបង្កើតបញ្ជីរថ្មីមួយនៅក្នុង Realestate.com.kh មានភាពងាយស្រួលយ៉ាងខ្លាំង ទោះបីជាអ្នកលក់ឯកជន ម្ចាស់ដី ឬភ្នាក់ងារអចលនទ្រព្យ។ អ្នកអាចលក់ដោយខ្លួនឯងបាន ហើយពួកយើងមិនយកកម្រៃជើងសារនោះឡើយ។

ការធ្វើឲ្យបញ្ជីរបស់អចលនទ្រព្យរបស់អ្នកកាន់តែប្រសើរ

ដោយសារបច្ចុប្បន្ន អ្នកអាចធ្វើឲ្យបញ្ជីអចនលទ្រព្យសម្រាប់លក់ ឬជួល របស់អ្នកឲ្យប្រសើរឡើង ដោយដាក់វានៅជាមួយវេបសាយអចលនទ្រព្យមួយចំនួនតូច ដែលមាននៅក្នុងប្រទេសកម្ពុជាក៏ដោយ ក៏អ្នកអាចចំណាយត្រឹមតែបន្តិចបន្តួចប៉ុណ្ណោះ ដើម្បីឲ្យអចលនទ្រព្យរបស់អ្នកទទួលបានការចាប់អារម្មណ៍ និងមើលឃើញលឿន៕

ក្រុមហ៊ុនចិនធំៗចំនួនពីរ ប្តេជ្ញាជួយបង្កើនការនាំចេញអង្ករពីកម្ពុជាបន្ថែមទៀត

ភ្នំពេញ៖ មន្ត្រីជាន់ខ្ពស់នៃប្រទេសកម្ពុជា បានថ្លែឲ្យដឹងនៅថ្ងៃទី នៅថ្ងៃទី១៣ ខែវិច្ឆិកា ឆ្នាំ ២០១៧ នេះថា តំណាងក្រុមហ៊ុនចិនធំៗចំនួនពីរបានប្តេជ្ញាចិតេ្តរបស់ខ្លួក្នុងការជួយជ្រោមជ្រែង ដើម្បីបង្កើនការនាំចេញអង្ករកម្ពុជាទៅប្រទេសចិន បន្ថែមលើកូតា ដែលមានស្រាប់ សំដៅធ្វើយ៉ាងណាជួយដោះស្រាយបញ្ហាប្រឈមនានា ក្នុងវិស័យស្រូវ-អង្កររបស់ប្រទេសកម្ពុជា ។

មន្ត្រីជាន់ខ្ពស់ក្រសួងចំនួនពីរ នៃប្រទេសកម្ពុជា រួមមាន ឯកឧត្តមបណ្ឌិតសភាចារ្យ អូន ព័ន្ធមុនីរ័ត្ន ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងឯកឧត្តម ប៉ាន់ សូរសក្តិ រដ្ឋមន្ត្រីក្រសួងពាណិជ្ជកម្ម បានចុះហត្ថលេខាលើអនុស្សរណៈយោគយល់គ្នា ជាមួយក្រុមហ៊ុនវិស័យឯកជន ចិនចំនួនពីរ គឺភាគីចិន មាន ឯកឧត្តម LIU Liange ប្រធានធនាគារនីហរ័ណ-អាហរ័ណចិន និង លោក WANG Jiong ប្រធានក្រុមហ៊ុន CITIC Group នៅលើគម្រោងជំរុញផលិតកម្មស្រូវ និងការនាំចេញអង្ករ។

ចំណែកការចុះអនុស្សរណៈ យោគយល់គ្នាផ្សេងមួយទៀត គឺរវាងរាជរដ្ឋាភិបាលកម្ពុជា តំណាងដោយក្រសួងសេដ្ឋកិច្ច និងហិរញ្ញវត្ថុ និងក្រសួងពាណិជ្ជកម្មដ៏ដែល ជាមួយភាគីចិន តំណាងដោយក្រុមហ៊ុន CITIC Construction Co., Ltd. និងក្រុមហ៊ុន Henan Yuguang International Economic & Technical Cooperation ដោយមានគោលបំណងកំណត់មូលដ្ឋានសម្រាប់រៀបចំ និងអនុវត្តគម្រោង រួមមានការសាងសង់ ប្រតិបត្តិការ និងការថែទាំហេដ្ឋារចនាសម្ព័ន្ធគម្រោង។

គោលបំណងនៃការចុះអនុស្សរណៈយោគយល់គ្នានេះ គឺដើម្បីកំណត់ចំណុចសំខាន់ៗពាក់ព័ន្ធ នឹងទស្សនាទាន វិសាលភាព រចនាសម្ព័ន្ធអនុវត្ត ប្រភព និងគំរូហិរញ្ញប្បទាន ព្រមទាំងកិច្ចការហិរញ្ញវត្ថុនៃគម្រោង ជាសិសេស នឹងផ្ដល់ជាមូលដ្ឋានច្បាស់លាស់ សម្រាប់ការរៀបចំ និងការអនុវត្តគម្រោងដូចជា ការសិក្សាសមិទ្ធិលទ្ធភាព ការរៀបចំប្លង់ លម្អិត ផែនការហិរញ្ញប្បទាន ការសាងសង់ ប្រតិបត្តិការ និងការថែទាំហេដ្ឋារចនាសម្ព័ន្ធគម្រោង យន្តការប្រើប្រាស់ស្រូវ-អង្ករស្តុកក្នុងឃ្លាំងជាវត្ថុបញ្ចាំ ដើម្បីទទួលបានឥណទានពីធនាគារ និងការបង្កើតទីផ្សារលក់ដូរស្រូវ-អង្ករ។

ពាក់ព័ន្ធការផ្សារភ្ជាប់ជាមួយគម្រោងនេះដែរ ភាគីចិននឹងខិតខំប្រឹងប្រែងជួយជ្រោមជ្រែង ដើម្បីបង្កើនការនាំ ចេញអង្ករកម្ពុជាទៅចិន បន្ថែមពីលើកូតាដែលមានស្រាប់ ហើយសម្រាប់គម្រោងនេះដែរ ត្រូវបានរចនាឡើងសំដៅ ដោះស្រាយបញ្ហាប្រឈមនានា ក្នុងវិស័យស្រូវ-អង្ករនៅកម្ពុជា សម្រាប់រយៈពេលវែង និងប្រកបដោយចីរភាព ពោលគឺ ដំណោះស្រាយជាប្រព័ន្ធ និងគ្រប់ជ្រុងជ្រោយ ហើយក៏ជាការបោះជំហានទៅមុខមួយជំហាន មុននឹងឈានដល់ដំណោះ ស្រាយសម្រាប់ដំណាំ និងផល្លានុផលផ្សេងទៀត។

ដើម្បីអភិវឌ្ឍនូវគម្រោងនេះ រាជរដ្ឋាភិបាលកម្ពុជា នឹងស្នើប្រើប្រាស់ឥណទានសម្បទានពីសាធារណរដ្ឋប្រជា មានិតចិន ដើម្បីអនុវត្តគម្រោង ដោយវិនិយោគលើការសាងសង់ហេដ្ឋារចនាសម្ព័ន្ធ ឃ្លាំងស្តុកស្រូវ-អង្ករ និងឡសម្ងួត នៅទីកន្លែងចាំបាច់ទូទាំងប្រទេស ដើម្បីផ្តល់សេវាស្តុក និងសម្ងួត ជូនប្រជាកសិករ និងធុរជន ក្នុងតម្លៃទាប សមរម្យ ដែលកសិករ និងធុរជនអាចទទួលយកបាន។ សម្រាប់គម្រោងនេះដែរ គឺពុំមានផលប៉ះពាល់ជាអវិជ្ជមាន ដល់យន្តការទីផ្សារសេរី ក្នុងវិស័យស្រូវអង្ករឡើយ ព្រោះមិនមានការសាងសង់រោងម៉ាស៊ីនកិនស្រូវបន្ថែម និងមិនធ្វើការ លក់ដូរស្រូវ-អង្ករដោយផ្ទាល់ ដែលអាចបង្កើតឲ្យមានការប្រកួតប្រជែងជាមួយឈ្មួញ និងអ្នកនាំចេញអង្ករទៅទីផ្សារក្រៅ ប្រទេស របស់ផ្នែកឯកជនផងដែរ ៕

កម្ពុជាចុះហត្ថលេខាលើកិច្ចព្រមព្រៀងពាណិជ្ជកម្មសេរីចំនួន២ រវាងអាស៊ាន-ហុង

ដោយ៖ វុត្ថា
ហ្វីលីពីន៖ ក្នុងអំឡុងពេលចូលរួមកិច្ចប្រជុំកំពូលអាស៊ានលើកទី៣១ និងកិច្ចប្រជុំពាក់ព័ន្ធ ចាប់ពីថ្ងៃទី១០ ដល់ទី១៤ ខែវិច្ឆិកា ឆ្នាំ២០១៧ នៅទីក្រុងម៉ានីឡា ប្រទេសហ្វីលីពីន ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម រួមជាមួយរដ្ឋមន្ត្រីសេដ្ឋកិច្ចអាស៊ាន និងរដ្ឋលេខាធិការពាណិជ្ជកម្ម និងឧស្សាហកម្ម ចិនហុងកុងកាលពីថ្ងៃទី១២ ខែវិច្ឆិកា ឆ្នាំ២០១៧ បានចុះហត្ថលេខាលើកិច្ចព្រមព្រៀងសំខាន់ចំនួនពីរ៖ កិច្ចព្រមព្រៀងពាណិជ្ជកម្មសេរីរវាងអាស៊ាន-ហុងកុង និងកិច្ចព្រមព្រៀងស្តីពីវិនិយោគ រវាងអាស៊ាន និងហុងកុង។

នេះគឺជាជោគជ័យថ្មីមួយទៀតរបស់ប្រទេសកម្ពុជាដែលទទួលបានក្នុងការធ្វើសមាហរណកម្មសេដ្ឋកិច្ចទៅក្នុងសេដ្ឋកិច្ចតំបន់ និងពិភពលោក បន្ទាប់ពីរដ្ឋសភា និងព្រឹទ្ធសភានៃព្រះរាជាណាចក្រកម្ពុជា បានអនុម័តយល់ព្រមលើសេចក្តីព្រាងច្បាប់ស្តីពីឧបាស្រ័យពាណិជ្ជកម្ម និងអនុម័តយល់ព្រមលើពិធីសារនៃការអនុវត្តកិច្ចព្រមព្រៀងអាស៊ាន សាធារណរដ្ឋប្រជាមានិតចិនកាលពីខែតុលា ឆ្នាំ២០១៧ កន្លងទៅ។

គោលបំណងសំខាន់ៗ នៃកិច្ចព្រមព្រៀងទាំងពីរគឺ៖ (១) កាត់បន្ថយរបាំងចំពោះលំហូរពាណិជ្ជកម្មទំនិញ សេវា និងវិនិយោគ ធើ្វឲ្យកាន់តែស៊ីជម្រៅ និងទូលំទូលាយនូវការផ្សារភ្ជាប់សេដ្ឋកិច្ច កាត់បន្ថយចំណាយសម្រាប់ធុរជន បង្កើនពាណិជ្ជកម្ម ពង្រឹងប្រសិទ្ធភាពសេដ្ឋកិច្ច និងបង្កើតទីផ្សារកាន់តែធំទូលាយជាមួយកាលានុវត្តភាពច្រើនជាងមុន និងសេដ្ឋកិច្ចមាត្រដ្ឋានកាន់តែធំសម្រាប់ធុរកិច្ច (២) ធ្វើពិពិធកម្ម និងជំរុញពាណិជ្ជកម្ម វិនិយោគ និងទំនាក់ទំនងសេដ្ឋកិច្ចរវាងភាគី (៣) ផ្តល់ការអនុគ្រោះពិសេស និងដោយឡែក ចំពោះរដ្ឋជាសមាជិកអាស៊ានថ្មី ដូចជា កម្ពុជា ឡាវ មីយ៉ាន់ម៉ា និងវៀតណាម ដើម្បីបង្កើនការចូលរួមក្នុងសមាហរណកម្មសេដ្ឋកិច្ចកាន់តែខ្លាំងជាងមុន និងពង្រីកការនាំចេញ តាមរយៈការបង្កើនសមត្ថភាព ប្រសិទ្ធភាព និងភាពប្រកួតប្រជែងក្នុងស្រុក (៤) ជួយទ្រទ្រង់ដល់ការធ្វើសមាហរណកម្មសេដ្ឋកិច្ចទៅក្នុងតំបន់ និងពិភពលោក និងទ្រទ្រង់ដល់ការអភិវឌ្ឍសេដ្ឋកិច្ចប្រកបដោយចីរភាព។

នៅពេលកិច្ចព្រមព្រៀងនេះចូលជាធរមាន នឹងធ្វើឲ្យមានភាពល្អប្រសើរឡើងនូវលំហូរវិនិយោគ និងពាណិជ្ជកម្មរវាងភាគីទាំងពីរ ដែលនឹងផ្តល់អត្ថប្រយោជន៍ដល់ប្រជាជនអាស៊ាន រួមមានកម្ពុជាផង ក៏ដូចជា ហុងកុង។ លើសពីនេះទៀត នឹងបង្កើនការតភ្ជាប់សេដ្ឋកិច្ចរវាងអាស៊ានហុងកុង តាមរយៈការធ្វើសេរីភាវូបនីយកម្មពាណិជ្ជកម្មទំនិញ សេវាកម្ម និងវិនិយោគ។ កម្ពុជានឹងទទួលបានផលប្រយោជន៍ច្រើនពីកិច្ចព្រមព្រៀងនេះ ដោយសារហុងកុង ជាទីផ្សារមូលធនដ៏ធំ។

គួររំលឹកថា កិច្ចព្រមព្រៀងសំខាន់ទាំងពីរ ត្រូវបានចាប់ផ្តើមចរចាដំបូងនៅឆ្នាំ២០១៤ និងបានបញ្ចប់នាកិច្ចប្រជុំគណៈកម្មាធិការចរចាពាណិជ្ជកម្មអាស៊ាន-ហុងកុង លើកទី១០ នៅទីក្រុងបាងកក ថៃឡង់ដ៏ កាលពីខែកក្កដា ឆ្នាំ២០១។ ក្រោយនោះ មានការងារបច្ចេកទេសលម្អិតជាច្រើន ត្រូវបានបន្តធ្វើ ដូចជាការងាររៀបចំឲ្យមានការឯកភាពគ្នាក្នុងការប្រើប្រាស់ពាក្យពេចន៍គន្លឹះមួយចំនួន តារាងបញ្ចុះពន្ធគយចុងក្រោយ ទម្រង់រួមនៃតារាងពន្ធគយ។ល។ នៅថ្ងៃទី២៧ ខែតុលា ឆ្នាំ២០១៧ ប្រធានក្រុមចរចាបានឈានដល់ការឯកភាពគ្នាទាំងស្រុងលើអត្ថបទចុងក្រោយនៃកិច្ចព្រមព្រៀង ដែលរួចរាល់សម្រាប់ការចុះហត្ថលេខាដោយរដ្ឋមន្ត្រីសេដ្ឋកិច្ចអាស៊ាន ជាមួយរដ្ឋលេខាធិការនៃចិនហុងកុង៕

ជំនាញស្ថាបត្យកម្ម និងវិស្វកម្មកំពុងមានទីផ្សារការងារច្រើន

ដោយ៖ ដែន ចែងចាំង

ភ្នំពេញ៖ ខណៈវិស័យសំណង់នៅកម្ពុជា កំពុងមានសន្ទុះរីកចម្រើនយ៉ាងឆាប់រហ័សនោះបានធ្វើឱ្យវិស័យមួយនេះ ត្រូវប្រឈមមុខទៅនឹងបញ្ហាមួយចំនួន ដូចជា តម្រូវការកម្លាំងកម្មករ និងធនធានមនស្សដែលមានចំណេះដឹងច្បាស់លាស់ជាច្រីន។

ឮលោកបណ្ឌិតទួស សាភឿន អគ្គលេខាធិការរងនៃគណៈស្ថាបត្យករកម្ពុជាបានមានប្រសាសន៍ឲ្យដឹងកាលពីពេលថ្មីៗនេះថា ធនធានមនុស្សផ្នែកវិស្វករសំណង់ស៊ីវិល និងស្ថាបត្យកម្ម នៅកម្ពុជានាពេលបច្ចុប្បន្ននេះ នៅមិនទាន់អាចឆ្លើយតបទៅនឹងតម្រូវនៃការរីកចម្រើន ដ៏ឆាប់រហ័សរបស់វិស័យសំណង់នៅកម្ពុជានារយៈពេល១ទសវត្សរ៍ចុងក្រោយនេះបានទេ។ លោកបានប្រាប់ទៀតថា ជារៀងរាល់ឆ្នាំមានក្រុមហ៊ុនជាច្រើន បានមកទាក់ទងសាកលវិទ្យាល័យ ដើម្បីជ្រើសរើសនិស្សិតដែលកំពុងសិក្សាទៅធ្វើការ ប៉ុន្តែពេលខ្លះសាលាមិនអាចរកនិស្សិតបានគ្រប់គ្រាន់សម្រាប់ផ្តល់ឲ្យក្រុមហ៊ុនទាំងអស់នោះបានទេ។

លោកបន្តថា “ការងារក្នុងវិស័យសំណង់មានច្រើន ដូច្នេះនិស្សិតដែលសិក្សាជំនាញស្ថាបត្យកម្ម និងសំណង់ស៊ីវិល មិនខ្វះការងារធ្វើទេ។ ជាក់ស្តែងមាននិស្សិតខ្លះមានការងារធ្វើចាប់តាំងពីឆ្នាំទី១តែម្តង។

បើតាមលោកទួស សាភឿន ក្នុង១ឆ្នាំមាននិស្សិតខ្មែរចន្លោះពី២០០-៣០០នាក់បានបញ្ចប់ការសិក្សាលើផ្នែកស្ថាបត្យកម្ម ខណៈនៅកម្ពុជាបច្ចុប្បន្នមានគ្រឹះស្ថានសិក្សាពី៥-៦ប៉ុណ្ណោះ ដែលទទួលបណ្តុះបណ្តាលធនធានមនុស្សសម្រាប់ផ្នែកនេះ។

ព្រឹទ្ធបុរសនៃមហាវិទ្យាល័យស្ថាបត្យកម្ម និងសំណង់ស៊ីវិល នៃសាកលវិទ្យាល័យន័រតុន លោក លឹម សុខតៃបាននិយាយថា ធនធានមនុស្សដែលមានចំណេះដឹងទាក់ទងទៅនឹងវិស័យសំណង់ កំពុងមានតម្រូវការច្រើននៅក្នុងទីផ្សារប្រទេសកម្ពុជា ដោយនិស្សិតដែលរៀននៅសាកលវិទ្យាល័យន័រតុន ចាប់ពីឆ្នាំទី៣ឡើងទៅស្ទើរតែទាំងអស់ត្រូវបានក្រុមហ៊ុនមកទាក់ទងយកទៅធ្វើការ។លោកបានបន្តថា ការងារទាក់ទងទៅនឹងវិស័យសំណង់នៅកម្ពុជា នឹងត្រូវការធនធានមនុស្សច្រើនបន្ថែមទៀត ជាពិសេសនៅពេលការការធ្វើ សមាហរណកម្មសេដ្ឋកិច្ចអាស៊ានឈានចូលមកដល់។

លោកបានបន្តថា “បច្ចុប្បន្ននេះនិស្សិត ដែលចូលសិក្សាផ្នែកវិស្វករសំណង់ស៊ីវិល និងស្ថាបត្យកម្មនៃសាកលវិទ្យាល័យន័រតុន បានកើនឡើងជាបន្តបន្ទាប់។ ជាក់ស្តែងបច្ចុប្បន្ននេះ និស្សិតដែលកំពុងរៀនផ្នែកវិស្វករសំណង់ស៊ីវិល មានប្រមាណជាង៣០០នាក់ ចំណែកខាងផ្នែកស្ថាបត្យកម្ម និងនគរូបនីយកម្ម មានប្រមាណប្រហែល១០០នាក់។

លោកបន្តថា រហូតមកដល់ពេលនេះនិស្សិត ដែលបានបញ្ចប់ការសិក្សាលើផ្នែកទាំង២របស់សាកលវិទ្យាល័យ មានចំនួនប្រមាណប្រហែល៣៨០០នាក់ហើយ។

វិស័យសំណង់នៅកម្ពុជាត្រូវបានគេចាត់ទុកជាវិស័យ១ នៅក្នុងចំណោមវិស័យសំខាន់ៗចំនួន៤ ដែលបានដើរតួនាទីយ៉ាងសំខាន់ នៅក្នុងរួមចំណែកលើកស្ទួយកំណើនសេដ្ឋកិច្ចជាតិ ជាក់ស្តែងគិតត្រឹមដំណាច់ត្រីមាសទី៣ឆ្នាំនេះ ទុនវិនិយោគក្នុងវិស័យនេះកើនឡើងដល់ទឹកប្រាក់៥៦៣៦លានដុល្លារ កើនឡើង២២ភាគរយធៀបរយៈពេលដូចគ្នាកាលពីឆ្នាំមុន។

លោកម៉េង ចំរើន ប្រធានក្រុមវិស្វករប្រចាំការដ្ឋានសាងសង់ក្នុងគម្រោងទីក្រុង Olympia City បានថ្លែងថា បច្ចុប្បន្ននេះនៅក្នុងការដ្ឋានសាងសង់ទីក្រុងOlympia City មានវិស្វករ និងស្ថាបត្យករកំពុងធ្វើការសរុបប្រហែល100នាក់ ក្នុងនៅវិស្វករមានប្រហែល៧០ភាគរយ។ លោកបានបន្តថា ក្នុងចំណោមនោះមានវិស្វករ និងស្ថាបត្យករបរទេសប្រហែល៥ភាគរយ ដែលពួកគេទាំងនោះសុទ្ធតែជាអ្នកជំនាញ ដែលមានបទពិសោធ និងស្នាដៃលើគម្រោងធំៗជាច្រើន។

លោកបានថ្លែងថា “ខ្ញុំគិតថាវិស្វករ និងស្ថាបត្យករនាពេលបច្ចុប្បន្នសុទ្ធតែមានសមត្ថភាព អាចធ្វើការនៅតាមការដ្ឋានសំណង់ធំៗបាន ដោយយើងគ្រាន់តែយកអ្នកជំនាញ(មកពីបរទេស) មកជួយបណ្តុះបណ្តាលតែបន្តិចបន្តួចប៉ុណ្ណ។

តែទោះបីជាយ៉ាងណាលោកចំរើន ក៏បានបញ្ជាក់ថា “ខ្ញុំគិតថាសមត្ថភាពរបស់វិស្វករកម្ពុជា នឹងមិនសូវមានបញ្ហាសមត្ថភាពគ្រប់គ្រាន់នោះទេ បន្ទាប់ពីសមាហរណកម្មសេដ្ឋកិច្ចអាស៊ានឈានចូលមកដល់នោះទេ តែអ្វីដែលខ្ញុំគិតថាអាចមានបញ្ហានោះគឺខាងផ្នែកស្ថាបត្យកម្ម ព្រោះការ Design របស់អ្នកជំនាញនៅប្រទេសក្នុងតំបន់អាស៊ានមួយចំនួនអាចមានសមត្ថភាពលើសពីស្ថាបត្យករកម្ពុជា”៕

កម្ពុជាគ្រោងសាងសង់អាគារកំពស់៦០០ម៉ែត្រមួយនៅខាងជើងក្រុងភ្នំពេញ

ភ្នំពេញ៖ ប្រទេសកម្ពុជាគ្រោងនឹងសាងសង់អាគារកំពស់៦០០ម៉ែត្រមួយទៀត ស្ថិតនៅភាគខាងជើងក្រុងភ្នំពេញ ដែលជាគម្រោងដ៏មហស្ចារ្យមួយនៃទីក្រុងនាគរាជសម្តេចតេជោ។

លោកសាស្ត្រាចារ្យ ភឿង សុភ័ណ្ឌ រដ្ឋលេខាធិការក្រសួងរៀបចំដែនដី នគរូបនីយកម្មនិងសំណង់ ដែលជាស្ថាបត្យករផ្តួតផ្តើមរៀបចំគំរោងទីក្រុងនាគរាជសម្តេចតេជោបានថ្លែងឲ្យដឹងកាលពីសប្តាហ៍មុនថា តាមផែនការមេនៃទីក្រុងនាគរាជសម្តេចតេជោ យើងគ្រោងនឹងសាងសង់មជ្ឈមណ្ឌលពាណិជ្ជកម្មកំពស់៦០០ម៉ែត្រមួយ សម្រាប់ប្រើប្រាស់ជាការិយាល័យកណ្តាលរបស់សម្តេចតេជោ ដែលលោកអាចត្រួតពិនិត្យមើលស្ថានភាព និងការអភិវឌ្ឍន៍ប្រទេសចេញពីអាគារនេះបាន ព្រោះកំពស់៦០០ម៉ែត្រអាចមើលឃើញទូទាំងប្រទេសហើយ។

លោកបន្តថា “អាគារនេះនឹងសាងសង់នៅពេលទីក្រុងនេះមាបថវិកាគ្រប់ គ្រាន់សម្រាប់រៀបចំ ហើយបច្ចុប្បន្នមានក្រុមហ៊ុនចិនមួយចំនួនកំពុងចាប់អារម្ម ណ៍ចូលរួមវិនិយោគក្នុងគំរោងនេះហើយ។លោកបន្តថា “ការសាងសង់ទីក្រុងនេះ ដើម្បីរំលឹកនិងដឹងគុណសម្តេចតេជោ ក៏ដូចជាបន្សល់ទុកមរតកសម្រាប់មនុស្សជំនាន់ក្រោយ ព្រោះរយៈពេល៥៨០ឆ្នាំហើយ យើងមិនដែលបានសាងសង់ទីក្រុងថ្មីទេ។

លោកសាស្ត្រាចារ្យ ភឿង សុភ័ណ្ឌ ដែលបានសញ្ញាបត្រស្មើគ្នានឹងសាស្ត្រាចារ្យវីរស្ថាបត្យករកម្ពុជា លោកវណ្ណ ម៉ូលីវណ្ណផងដែរនោះបានថ្លែងឲ្យដឹងទៀតថា ទីក្រុងនាគរាជសម្តេចតេជោ នឹងសាងសង់មជ្ឈមណ្ឌលអាគារពាណិជ្ជកម្ម អាគារស្នាក់នៅ និងមជ្ឈមណ្ឌលកំសាន្តនានាមានរូបរាងដូចនាគរាជ ដែលត្រូវនឹងឆ្នាំរបស់សម្តេច។លោកបន្តថា ទីក្រុងនេះនឹងរៀបចំឲ្យមានកំពង់ផែ ដើម្បីភ្ជាប់សេវាកម្មដឹកជញ្ជូន ពាណិជ្ជកម្មនៅក្នុងមជ្ឈមណ្ឌលជាពាណិជ្ជកម្មអន្តរជាតិសម្តេចតេជោ ដែលនឹងរៀបចំឲ្យមាននៅក្នុងទីក្រុងនេះផងដែរ។

លោកឧកញ៉ានួន រិទ្ឋីអគ្គនាយកក្រុមហ៊ុនអចលនទ្រព្យ KFA បានថ្លែងថា កម្ពុជាមានសក្តានុពលសម្រាប់រយៈពេល២០ឆ្នាំទៀត ក្នុងការវិនិយោគលើវិស័យអចលនទ្រព្យ ដោយសារកំនើនសេដ្ឋកិច្ច ស្ថិរភាពនយោបាយ ស្ថិរភាពសង្គមដែលធ្វើឲ្យប្រាក់ចំណូលរបស់ប្រជាពលរដ្ឋ មានការកើនឡើង ហើយលំហូរទុនវិនិយោគពីបរទេស នឹងបន្តកើនឡើងបន្តទៀត។លោកបន្តថា តាមរយៈគោលនយោបាយផ្លូវសូត្ររបស់ប្រទេសចិន កម្ពុជានឹងទទួលបានអត្ថប្រយោជន៍កាន់តែច្រើនថែមទៀត។

លោកឧកញ៉ាបានបន្តថា ការសាងសង់ទីក្រុងនាគរាជសម្តេចតេជោ នៅប្របនឹងទន្លេមេគង្គ និងទន្លេសាបនេះ ពិតជាមានភាពវិសេសវិសាលណាស់ ព្រោះវានឹងធ្វើឲ្យមុខមាត់កម្ពុជា កាន់តែលេចធ្លោនៅឆាកអន្តរជាតិ ធ្វើឲ្យអ្នកវិនិយោគកាន់តែមានទំនុកចិត្ត និងអ្វីពិសេសនោះជាការឆ្លើយតបនឹងអ្វីជាគុណសម្បត្តិរបស់សម្តេច ដែលបានលះបង់កំលាំងកាយចិត្ត និងរហូតហ៊ានលះបង់ជីវិត ដើម្បីបុព្វហេតុសុខសន្តិភាពនៅកម្ពុជា៕