ដោយៈ គង់ សូរិយា
ភ្នំពេញៈ ក្រុមហ៊ុនអាកាសចរណ៍វៀតណាម អ៊ែរឡាញ (Vietnam Airline) បានប្រកាសបើកជាផ្លូវការ ជើងហោះហើរត្រង់រវាងទីក្រុងហាណូយ និងរាជធានីភ្នំពេញ។
ក្រុមហ៊ុនអាកាសចរណ៍នេះ បានចុះហត្ថលេខាលើកិច្ចព្រមព្រៀងសហប្រតិបត្តិការ ជាមួយដៃគូសំខាន់ៗ ក្នុងប្រទេសកម្ពុជា ដើម្បីជំរុញការអភិវឌ្ឍវិស័យអាកាសចរណ៍ និងទេសចរណ៍រវាងប្រទេសទាំងពីរ។
រដ្ឋមន្ត្រីក្រសួងទេសចរណ៍ លោកសុខ សូកេនបានមានប្រសាសន៍ ក្នុងពេលបើកសម្ពោធជើងហោះហើរថា លោកពិតជាមានសេចក្តីសោមនស្សរីករាយ ដែលបានចូលរួមក្នុងពិធីបើក ជើងហោះហើរហាណូយ–ភ្នំពេញ របស់ក្រុមហ៊ុនអាកាសចរណ៍វៀតណាម និងការចុះហត្ថលេខាលើអនុស្សរណៈ នៃការយោគយល់ សម្រាប់កម្មវិធីផ្សព្វផ្សាយទេសចរណ៍ កម្ពុជា–វៀតណាម “ប្រទេសពីរ គោលដៅមួយ” ដ៏មានអត្ថន័យយ៉ាងជ្រាលជ្រៅនាពេលនេះ។
លោកបានអបអរសាទរ ចំពោះការបើកឱ្យមានជើងហោះហើរតភ្ជាប់រវាងទីក្រុងទាំងពីរ និងការចុះអនុស្សរណៈរវាងក្រុមហ៊ុនអាកាសចរណ៍កម្ពុជា អង្គរ អ៊ែរ និងក្រុមហ៊ុន Vietnam Airline JSC សមាគមទេសចរណ៍កម្ពុជា (CATA) និងក្រុមហ៊ុនទេសចរណ៍ Saigon Tourist Group។
ជើងហោះហើរថ្មីនេះ នឹងចាប់ផ្ដើមបើកដំណើរការនៅថ្ងៃទី ២៧ ខែតុលា ឆ្នាំ២០២៤ ដែលមានការហោះហើរចំនួន៤ជើងក្នុងមួយសប្ដាហ៍រៀងរាល់ថ្ងៃចន្ទ ពុធ សុក្រ និងថ្ងៃអាទិត្យ ដោយប្រើប្រាស់យន្តហោះ Airbus A321។
នាបច្ចុប្បន្ននេះ អ្នកដំណើរពីទីក្រុងហាណូយ ទៅរាជធានីភ្នំពេញ ត្រូវផ្លាស់ប្តូរជើងយន្តហោះ នៅទីក្រុងវៀងចន្ទន៍ ប្រទេសឡាវ តាមរយៈសេវាកម្មអាកាសចរណ៍ឥណ្ឌូចិន។
ជើងហោះហើរថ្មីនេះ នឹងនាំឱ្យចំនួនការហោះហើរសរុបរបស់ក្រុមហ៊ុនអាកាសចរណ៍ វៀតណាម អ៊ែរឡាញ រវាងប្រទេសវៀតណាម និងប្រទេសកម្ពុជា កើនឡើងចំនួនប្រាំជើងនៅចុងខែតុលានេះ គិតរួមទាំងការហោះហើរត្រង់ចំនួនបួនគឺ ហាណូយ -ហូជីមិញ-ភ្នំពេញ និងហាណូយ-ហូជីមិញ-សៀមរាប ព្រមទាំងជើងហោះហើរមួយទៀត ជាមួយឥណ្ឌូចិន។ ចំនួនការហោះហើរសរុប រវាងប្រទេសទាំងពីរ នឹងឡើងដល់ ៨៦ដងក្នុងមួយសប្តាហ៍។
ជើងហោះហើរថ្មីនេះ ត្រូវបានរំពឹងទុកថា នឹងអាចទាក់ទាញភ្ញៀវទេសចរ ដែលមានបំណងធ្វើដំណើរទៅកាន់ប្រទេសវៀតណាម និងប្រទេសផ្សេងៗទៀតនៅក្នុងតំបន់ រួមមានប្រទេសជប៉ុន កូរ៉េ និងបណ្តាប្រទេសប៉ែកអឺរ៉ុប ដោយសាតែមានជើងហោះហើរច្រើន និងពេលវេលាផ្លាស់ប្តូរជើងយន្តហោះកាន់តែងាយស្រួល។
លោកដាង ង៉ុកហៅ ប្រធានក្រុមប្រឹក្សាភិបាលនៃក្រុមហ៊ុនអាកាសចរណ៍វៀតណាម បានមានប្រសាសន៍ថា ជើងហោះហើរត្រង់ថ្មីនេះ បានត្រៀមខ្លួនរួចជាស្រេច ដើម្បីផ្តល់នូវទំនាក់ទំនងតភ្ជាប់កាន់តែប្រសើរឡើង រវាងប្រទេសវៀតណាម និងកម្ពុជា។
លោកបញ្ជាក់ថា “ក្នុងនាមជាក្រុមហ៊ុនអាកាសចរណ៍ វៀតណាមអ៊ែរឡាញ បានប្តេជ្ញាចិត្ត ក្នុងការផ្តល់នូវប្រតិបត្តិការ ប្រកបដោយសុវត្ថិភាព និងប្រសិទ្ធភាពនៃសេវាកម្ម ក្នុងប្រទេសកម្ពុជា”។
លោកង៉ុកហៅ បានបន្តទៀតថា យើងនឹងបន្តពង្រីកបណ្តាញរបស់យើង បង្កើនកិច្ចសហប្រតិបត្តិការ ធ្វើឱ្យការប្រកួតប្រជែងកាន់តែប្រសើរឡើង និងផ្តល់នូវសេវាកម្មដែលមានគុណភាព ដែលជាទីពេញចិត្តដល់អ្នកដំណើរ។ គោលដៅរបស់យើង គឺជួយគាំទ្រដល់ការអភិវឌ្ឍសេដ្ឋកិច្ច សង្គម និងវប្បធម៌ ព្រមទាំងជំរុញទំនាក់ទំនងសហប្រតិបត្តិការ រវាងប្រទេសទាំងពីរ៕
