ដោយ: គង់ លាងហួរ
អន្តរជាតិ: ប្រទេសចិនបានបើកការដ្ឋានសាងសង់ផ្លូវរថភ្លើងល្បឿនលឿនក្រោមសមុទ្រវែងជាងគេបំផុតនៅក្នុងប្រទេសរបស់ខ្លួនជាផ្លូវការហើយ កាលពីសប្តាហ៍មុន។នេះបើយោងតាមការចុះផ្សាយដោយទីភ្នាក់ងារសារពត៌មាន China Daily។

នៅពេលដែលការសាងសង់ត្រូវបានបញ្ចប់រួចរាល់ជាស្ថាពរ ផ្លូវរូងក្រោមទឹកសមុទ្រ Jintang នឹងក្លាយជាកំណាត់ផ្លូវមួយខ្សែដ៏សំខាន់នៃប្រព័ន្ធផ្លូវរថភ្លើងល្បឿនលឿន ដែលតភ្ជាប់ទីក្រុង Ningbo និងទីក្រុង Zhoushan ក្នុងខេត្ត Zhejiang។

ផ្លូវក្រោមទឹកនេះនឹងលាតសន្ធឹងប្រវែង១៦,១៨គីឡូម៉ែត្រ ដែលធ្វើឱ្យផ្លូវនេះក្លាយជាផ្លូវរូងក្រោមទឹក ដែលវែងបំផុត ក្នុងចំណោមផ្លូវក្រោមទឹកវែងបំផុតផ្សេងៗទៀតនៅលើពិភពលោក ហើយរថភ្លើងនឹងធ្វើដំណើរក្នុងល្បឿន២៥០គីឡូម៉ែត្រក្នុងមួយម៉ោង។

ការសាងសង់ផ្លូវរូងក្រោមទឹកសមុទ្រនេះគឺជាគម្រោងប្រកបដោយមហិច្ឆតាខ្ពស់របស់ប្រទេសចិន។ ប៉ុន្តែ គម្រោងនេះត្រូវជួបបញ្ហាប្រឈមខ្លាំងបំផុត ដោយសារស្ថានភាពភូមិសាស្ត្រ សម្ពាធជម្រៅទឹក និងប្រវែងរបស់ផ្លូវនេះតែម្តង។

នៅពេលសាងសង់រួចរាល់ ផ្លូវនេះនឹងក្លាយទៅជាផ្លូវរថភ្លើងក្រោមសមុទ្រ ដែលវែងជាងគេទី៣ របស់ពិភពលោក បន្ទាប់ពីផ្លូវរូងក្រោមទឹកឈ្មោះ Channel Tunnel ដែលតភ្ជាប់ចក្រភពអង់គ្លេស និងប្រទេសបារាំង និងផ្លូវរូងក្រោមទឹក Seikan របស់ប្រទេសជប៉ុន។ ទោះជាយ៉ាងណាក្តី រថភ្លើងទាំងនោះធ្វើដំណើរក្នុងល្បឿនអតិបរមាត្រឹមតែ១៦០គីឡូម៉ែត្រប៉ុណ្ណោះក្នុងមួយម៉ោង។

បច្ចុប្បន្ន ទីក្រុង Zhoushan និងទីក្រុង Ningbo ត្រូវបានតភ្ជាប់ដោយស្ពានឆ្លងសមុទ្រ និងសាឡាង ដែលតែងទទួលរងការរំខានពីព្យុះទីហ្វុង បញ្ហាប្រឈមនៃការដឹកជញ្ជូនតាមសមុទ្រ និងការកកស្ទះក្នុងថ្ងៃបុណ្យឈប់សម្រាក ដែលបណ្តាលឱ្យមានការរអាក់រអួលសម្រាប់អ្នកធ្វើដំណើរ។

ផ្លូវរូងក្រោមសមុទ្រ Jintang នឹងក្លាយជាកំណាត់ផ្លូវមួយខ្សែដ៏សំខាន់នៃប្រព័ន្ធផ្លូវរថភ្លើងល្បឿនលឿន Ningbo-Zhoushan ដែលមានប្រវែងសរុបចំនួន៧៧គីឡូម៉ែត្រ ដែលត្រូវបានគេរំពឹងទុកថា នឹងដាក់ឱ្យដំណើរការនៅឆ្នាំ២០២៨ខាងមុខ៕ប្រភព: China Daily៕

ដោយៈ គង់ សូរិយា

        ភ្នំពេញៈ រដ្ឋមន្ដ្រីក្រសួងរ៉ែ និងថាមពល លោកកែវ រតនៈបានបញ្ជាក់ឲ្យដឹងថា នាពេលខ្លីខាងមុខនេះ កម្ពុជានឹងដំឡើងថាមពលអគ្គិសនីដើរដោយកម្លាំងខ្យល់ នៅក្នុងខេត្តមណ្ឌលគិរី និងតំបន់ភ្នំបូកគោ ក្នុងខេត្តកំពត ដើម្បីបង្កើនការផ្តត់ផ្គង់ថាមពលស្អាត ជូនដល់បងប្អូនប្រជាពលរដ្ឋបន្ថែមទៀត។

តាមរយៈវីដេអូខ្លី ដែលលោកឈរនិយាយអំពី ថាមពលអគ្គិសនីដើរដោយកម្លាំងខ្យល់ ក្នុងឧទ្យានមួយក្នុងប្រទេសចិន លោក កែវ រតនៈ បានបញ្ជាក់យ៉ាងដូច្នេះថា “ប្រទេសកម្ពុជា នឹងឈានទៅធ្វើថាមពលដើរដោយខ្យល់ នៅក្នុងពេលខាងមុខដ៏ខ្លី គឺនៅក្នុងខេត្ដ​មណ្ឌលគិរី និងក្នុងតំបន់ភ្នំបូកគោ”។

លោក កែវ រតនៈបានបញ្ជាក់ថា “ថាមពលដើរដោយខ្យល់នេះ សំខាន់ខ្លាំងណាស់ ជាចំណែកមួយនៃការដាក់ថាមពលស្អាត នៅក្នុងពិភពលោក”។លោកបន្តថា “ការដំឡើងថាមពលដើរដោយខ្យល់នេះ ដើម្បីជួយរុញថាមពលស្អាត និងថាមពលកកើតឡើងវិញ សម្រាប់ប្រព័ន្ធអគ្គិសនី នៅក្នុងប្រទេសកម្ពុជា”។

ជាមួយគ្នានេះ លោក ហេង គុណលាង អគ្គនាយកនៃអគ្គនាយកដ្ឋានថាមពល បានឲ្យដឹងថា បច្ចុប្បន្នក្រសួងរ៉ែ និងថាមពល បានអនុញ្ញាតឲ្យក្រុមហ៊ុនស្រុក ដែលសហការជាមួយក្រុមហ៊ុនអន្ដរជាតិ កំពុងធ្វើការសិក្សា ក្នុងការអនុវត្ដគម្រោងនេះ។លោកបញ្ជាក់ថា  “យើងកំពុងតែអនុញ្ញាតឲ្យក្រុមហ៊ុនធ្វើការសិក្សា ដោយមិនទាន់ដឹងអំពីទំហំវិនិយោគនៅឡើយទេ ដោយទុកឲ្យក្រុមហ៊ុនធ្វើការសិក្សាជាមុនសិន”។

លោកបានលើកឡើងថា ការដំឡើងថាមពលដើរដោយខ្យល់នេះ នឹងធ្វើឲ្យការផ្គត់ផ្គង់ថាមពលអគ្គិសនី ដល់បណ្ដាញប្រព័ន្ធជាតិ របស់អគ្គិសនីកម្ពុជា មានភាពគ្រាប់គ្រាន់៕

ដោយៈ ជេស៊ីកា

        ភ្នំពេញៈ យោងតាមផែនការយុទ្ធសាស្ត្រថវិកាជាតិ សម្រាប់ឆ្នាំ២០២៥ខាងមុខនេះ បានអោយដឹងថា រដ្ឋាភិបាលនឹងចំណាយសរុបថវិកាថ្នាក់ជាតិ ត្រូវបានគ្រោងរភាធ ទៅតាមវិស័យជាច្រើន។

វិស័យសំខាន់ៗ ដែលត្រូវចំណាយមានដូចខាងក្រោម៖
១-ចំណាយសរុបថវិការដ្ឋ គ្រោង១៧,៨៤% នៃផលទុនជាតិសរុប(ផ.ស.ស។
២-ចំណាយចរន្តថវិការដ្ឋ គ្រោង១២,៤១% នៃ ផ.ស.ស
៣-ចំណាយបន្ទុកបុគ្គលិក គ្រោង៥,៥៤% នៃ ផ.ស.ស
៤-ចំណាយក្រៅបន្ទុកបុគ្គលិក គ្រោង៦,៨៧% នៃ ផ.ស.ស
៥-ចំណាយមូលធន គ្រោង៥,៤២% នៃ ផ.ស.ស សម្រាប់ស្តារហេដ្ឋារចនាសម្ព័ន្ធនានា។
៦-ចំណាយសរុបថវិកាថ្នាក់ជាតិ ដែលចែកជា

   ក-ចំណាយវិស័យរដ្ឋបាលទូទៅ ត្រូវបានគ្រោងប្រមាណ ១,៦៤% នៃ ផ.ស.ស. ដើម្បីបន្ត គាំទ្រការអនុវត្តកម្មវិធីជាតិកែទម្រង់រដ្ឋបាលសាធារណៈ។
ខ- ចំណាយវិស័យការពារជាតិ, សន្តិសុខ និងសណ្តាប់ធ្នាប់សាធារណៈ ត្រូវបានគ្រោងប្រមាណ ២,៧៣% នៃ ផ.ស.ស. សំដៅគាំទ្រដល់បុព្វហេតុធានាកិច្ចការពារជាតិ និងរក្សា សន្តិភាព និងស្ថិរភាពនយោបាយ។
គ-ចំណាយវិស័យសង្គមកិច្ច ត្រូវបានគ្រោងប្រមាណ ៥,១៧% នៃ ផ.ស.ស. សំដៅថែទាំសុខភាព គាំពារផ្នែកសង្គមកិច្ច, សាសនា, វប្បធម៌ និងបរិស្ថាន។
ង-ចំណាយវិស័យសេដ្ឋកិច្ច ត្រូវបានគ្រោងប្រមាណ ៣,៨៣% នៃ ផ.ស.ស. ដើម្បីគាំទ្រដល់ ការអភិវឌ្ឍសហគ្រាសធុនតូច និងមធ្យម។
ច- ចំណាយផ្សេងៗ ត្រូវបានគ្រោងប្រមាណ ៣,២៩% នៃ ផ.ស.ស. ដើម្បីផ្តល់លទ្ធភាព និងភាពបត់បែនខ្ពស់ដល់រាជរដ្ឋាភិបាល ក្នុងការបំពេញតម្រូវការ។

ចំពោះកិច្ចការបន្ទាន់ចំពោះមុខរបស់ រាជរដ្ឋាភិបាល ដូចជាការត្រៀមបម្រុងសម្រាប់គ្រោះមហន្តរាយធម្មជាតិ និងស្បៀងបំរុងជាដើម។
៧-ចំណាយចរន្តថវិកាថ្នាក់ជាតិគ្រោង១១,៤៧% នៃ ផ.ស.ស និង
៨-ចំណាយចរន្តថវិកាថ្នាក់ក្រោមជាតិ គ្រោង១,៧៩% នៃ ផ.ស.ស៕

ដោយ: គង់ លាងហួរ
បាងកក: សហព័ន្ធឧស្សាហកម្មថៃ (FTI) ជឿជាក់ថា ការសម្រេចចិត្តរបស់សហរដ្ឋអាមេរិកក្នុងការដំឡើងពន្ធខ្ពស់លើការនាំចូលពីប្រទេសចិនអាចផ្តល់អត្ថប្រយោជន៍ដល់ឧស្សាហកម្ម និងជំរុញការនាំចេញផលិតផលមួយចំនួនរបស់ប្រទេសថៃ។

លោក Kriengkrai Thiennukul ប្រធាន FTI លើកឡើងថា “ប្រទេសថៃអាចទទួលបានអត្ថប្រយោជន៍ពីសង្រ្គាមពាណិជ្ជកម្ម នៅពេលដែលសហរដ្ឋអាមេរិកដាក់ពន្ធនាំចូលខ្ពស់លើទំនិញពីប្រទេសចិន។ ស្ថានភាពនេះអាចជំរុញឱ្យមានការស្វែងរកផលិតផលជំនួស ដែលអាចជាអត្ថប្រយោជន៍របស់ប្រទេសថៃ”។

ជាឧទាហរណ៍ ប្រទេសថៃគឺជាប្រទេសនាំចេញម៉ាស៊ីនត្រជាក់ធំទី២របស់ពិភពលោក បន្ទាប់ពីប្រទេសចិន។ត្រង់ចំណុចនេះលោក Kriengkrai បានមានប្រសាសន៍ឱ្យដឹងថា “នៅក្នុងសេណារីយ៉ូថ្មីតម្រូវការទិញម៉ាស៊ីនត្រជាក់ ដែលផលិតនៅប្រទេសថៃអាចនឹងមានការកើនឡើង”។

ម្យា៉ងវិញទៀត កាលពីមុននេះ សហរដ្ឋអាមេរិកក៏បានដំឡើងពន្ធលើផលិតផលម៉ាស៊ីនត្រជាក់ដែលនាំចូលមកពីប្រទេសចិនផងដែរ ដែលការណ៍នេះបានបណ្តាលឱ្យមានការកើនឡើងនៃតម្រូវការម៉ាស៊ីនត្រជាក់ ដែលនាំចូលមកពីប្រទេសថៃ។

លោក Kriengkrai បានមានប្រសាសន៍ឱ្យដឹងបន្តថា “ហេតុដូច្នេះហើយយើងនឹងធ្វើការត្រួតពិនិត្យតាមដានជាបន្តទៅទៀតថា តើសង្គ្រាមពាណិជ្ជកម្មនេះនឹងនាំឱ្យសហរដ្ឋអាមេរិកដំឡើងពន្ធបន្ថែមទៀតលើទំនិញផ្សេងទៀត ដែលនាំចូលពីប្រទេសចិន លើសពីវិស័យរថយន្តឬយ៉ាងណា”។

ប្រធានសហព័ន្ធឧស្សាហកម្មថៃ (FTI) រូបនេះបានគូសបញ្ជាក់បន្ថែមទៀតថា “ប្រសិនបើសហរដ្ឋអាមេរិកដំឡើងពន្ធលើប្រភេទ ទំនិញផ្សេងៗបន្ថែម ទៀតរបស់ប្រទេសចិននោះផលិតផលមកពីប្រទេសថៃ ដែលអាចប្រើជំនួស ផលិតផលចិនក៏នឹងទទួលបានផលចំណេញវិជ្ជមានផងដែរ”។

កាលពីពេលកន្លងទៅថ្មីៗនេះ សហរដ្ឋអាមេរិកបានប្រកាសដំឡើងពន្ធលើទំនិញភាគច្រើន ដែលនាំចូលពីប្រទេសចិនដល់អត្រា២៥% ខណៈអត្រាពន្ធលើរថយន្តអគ្គិសនីរបស់ចិនអាចនឹងត្រូវបានដំឡើងដល់១០០%តែម្តង និងអត្រាពន្ធ៥០%លើការនាំចូលគ្រឿងអេឡិចត្រូនិក កោសិកាថាមពលពន្លឺព្រះអាទិត្យ និងផលិតផលវេជ្ជៈសាស្ត្រ ខណៈពន្ធថ្មីទាំងនេះនឹងចូលជាធរមានក្នុងរយៈពេល៣ខែខាងមុខ៕

        ដោយៈ គង់ សូរិយា

        ភ្នំពេញៈ រំហូរវិនិយោគផ្ទាល់ពីបរទេសមកកម្ពុជាបានរំពឹងថានឹងបន្តកើនដល់ ប្រមាណ៤២៥០លានដុល្លារអាមេរិក សមមូលនឹងប្រមាណ៩,០% នៃផលទុនជាតិសរុប (ផ.ស.ស) ដោយសារការបន្តសកម្មភាពវិនិយោគលើវិស័យសក្តានុពល។

ទន្ទឹមនេះ ទុនបម្រុងអន្តរជាតិ ត្រូវបានព្យាករថានឹងបន្តកើនក្នុងរង្វង់២២,៣០៣ លានដុល្លារអាមេរិក ឬស្មើប្រមាណ៨,០ខែនៃការនាំចូល។

យោងតាមផែនការយុទ្ធសាស្ត្រថវិកាជាតិឆ្នាំ២០២៥- ២០២៧ បានរំពឹងថា រំហូរការវិនិយោគផ្ទាល់ពីបរទេសសម្រាប់ឆ្នាំ ២០២៥-២០២៧, ត្រូវបានព្យាករថានឹងបន្តកើន ក្នុងរង្វង់ជាមធ្យមប្រមាណ ៨,៦% នៃផ.ស.ស. ដោយសារការបន្តកើននូវទំនុកចិត្តវិនិយោគ ជាមួ យនឹងបរិយាកាសកាន់តែអំណោយផល សម្រាប់ការវិនិយោគនៅកម្ពុជា តាមរយៈការអនុវត្ត #ច្បាប់ស្តីពីវិនិយោគនៃព្រះរាជាណាចក្រកម្ពុជា# និងគោលនយោបាយគាំទ្រមួយចំនួនទៀត។

ផ្អែកលើមូលដ្ឋាននេះ, ក្នុងរយៈពេលមធ្យមខាងមុខ កម្ពុជារំពឹងថា នឹងអាចទាក់ទាញវិនិយោគដែលមានតម្លៃបន្ថែមខ្ពស់, ជាពិសេសក្នុងវិស័យកម្មន្តសាលមិនមែនកាត់ដេរ។ ជាលទ្ធផល, ទុនបម្រុងអន្តរជាតិនឹងបន្តកើន ដោយមានទំហំជាមធ្យមប្រមាណ៧ខែ នៃការនាំចូល៕

        ដោយៈ គង់ សូរិយា

        ភ្នំពេញៈ រដ្ឋមន្ត្រីក្រសួងព័ត៌មាន លោកនេត្រ ភ័ត្រាបានអំពាវនាវ និងស្នើសុំប្រជាពលរដ្ឋបញ្ឈប់ការផ្សព្វផ្សាយនូវរូបភាព ឃាតកម្ម រូបភាពហិង្សា នៅលើបណ្តាញសង្គមហ្វេសប៊ុក តិកតុក និងប្រព័ន្ធតេឡេក្រាម ព្រោះវាប៉ះពាល់កិត្តិយសនៃសព និងដល់ផ្លូវចិត្តនិងអារម្មណ៍របស់ក្រុមគ្រួសារជនរងគ្រោះ ដែលកំពុងតែទទួលរងភាពឈឺចាប់។

លោកនេត្រ ភ័ត្រាបានមានប្រសាសន៍ថា ជាថ្មីម្តងទៀត នៅប៉ុន្មានថ្ងៃនេះ, ខ្ញុំបានសង្កេតឃើញថា អ្នកសារព័ត៌មាន និងអ្នកប្រើប្រាស់បណ្តញសង្គមមួយចំនួន រួមនឹងក្រុមអ្នកផលិតមាតិកានិងរកប្រាក់តាមអនឡាញ​ (MMO) បានផ្សព្វផ្សាយ និងចែករំលែកនូវរូបភាពឃាតកម្ម រូបភាពហិង្សានៅលើបណ្តាញសង្គមហ្វេសប៊ុក តិកតុក និងប្រព័ន្ធតេឡេក្រាម។

លោកបញ្ជាក់ថា “ខ្ញុំសូមអំពាវនាវ និងស្នើសុំបងប្អូនបញ្ឈប់ការផ្សព្វផ្សាយនូវរូបភាពហិង្សាទាំងនេះ ព្រោះវាប៉ះពាល់កិត្តិយសនៃសព និងដល់ផ្លូវចិត្ត និងអារម្មណ៍របស់ក្រុមគ្រួសារជនរងគ្រោះ ដែលកំពុងតែទទួលរងភាពឈឺចាប់ និងការបាត់បង់សមាជិកគ្រួសារជាទីស្រឡា​ញ់របស់ខ្លួន”។

លោកនេត្រ ភ័ត្រាបានបន្តថា ជាមួយគ្នានេះ ក៏វាបានធ្វើឱ្យមានការប៉ះពាល់ផ្លូវចិត្ត និងអារម្មណ៍អ្នកប្រើប្រាស់បណ្តាញសង្គមផ្សេងទៀត ជាពិសេសយុវជននិងកុមារ ករណីពួកគាត់បានប្រទះឃើញរូបភាពទាំងនេះ។ ដើម្បីគោរពដល់ក្រុមគ្រួសារនៃជនរងគ្រោះ និងជនរងគ្រោះ បងប្អូនអាចចែករំលែករូបភាព ដែលមិនប៉ះពាល់ដល់សេចក្តីថ្លៃថ្នូរ និងឯកជនភាពរបស់ជនរងគ្រោះ ឬធ្វើឱ្យរូបភាពនោះប្ល័រ (រូបមិនច្បាស់) មុននឹងផ្សព្វផ្សាយ និងចែករំលែក។

លោកបន្តថា “ធ្វើដូច្នេះ គឺគោរពក្រមសីលធម៌វិជ្ជាជីវៈផង និងគោរពកិត្តិយស និងសេចក្តីថ្លៃថ្នូររបស់ជនរងគ្រោះផង”។ លោកបន្ថែមថា “ខ្ញុំសង្ឃឹមនិងជឿជាក់ថាបងប្អូនអ្នកសារព័ត៌មាន អ្នកប្រើប្រាស់បណ្តាញសង្គម និងក្រុមអ្នកផលិតមាតិកាមួយចំនួនលើកតម្លៃខ្ពស់ ក្នុងការគោរពក្រមសីលធម៌ និងអនុវត្តតាមស្តង់ដារប្រតិបត្តិនៃការផ្សព្វផ្សាយរបស់បណ្តាញសង្គម និងគោរពឯកជនភាពរបស់បុគ្គល”៕

        ដោយៈ សហការី

        សៀមរាបៈ យោងតាមសំណេរបង្ហោះនៅលើទំព័រហ្វេសប៊ុកSeasia Stats របស់ឥណ្ឌូណេស៊ីបានរៀបរាប់ថា ប្រាសាទអង្គរវត្តរបស់ប្រទេសកម្ពុជា រួមទាំងរមណីយដ្ឋានកោះបាលី (Bali) ប្រទេសឥណ្ឌូណេស៊ី និងកោះបូរ៉ាកាយ (Boracay) ប្រទេសហ្វីលីពីន ស្ថិតនៅក្នុងចំណោមគោលដៅ សម្រាប់ទស្សនាទិដ្ឋភាពនាពេលថ្ងៃលិច ដ៏ស្រស់ស្អាតបំផុត នៅលើពិភពលោក ក្នុងឆ្នាំ ២០២៣។

ខាងលើនេះ ជាខ្លឹមសារដកស្រង់ចេញពីគេហទំព័រ Bounce របស់អូស្ត្រាលី ដែលចុះផ្សាយអំពីចំណោមទិសដៅ ទេសចរណ៍សម្រាប់ទស្សនាទិដ្ឋភាពសុរិយាអស្ដង្គត ដ៏ស្រស់ស្អាតបំផុតទាំង ១៥ លើពិភពលោក ក្នុងឆ្នាំ ២០២៣ ។

គេហទំព័រនេះបានធ្វើការវិភាគ រាល់ចំនួនអត្ថបទ/Blogs ដែលបានណែនាំ នៅលើបណ្តាញអ៊ីនធឺណិត ក៏ដូចជាតួលេខនៃការបង្ហោះទិដ្ឋភាពថ្ងៃលិច នៅលើបណ្តាញសង្គមអ៊ីនស្តាក្រាម (Instagram) រួមទាំងការផ្តល់ពិន្ទុ សម្រាប់ចំណាត់ថ្នាក់តាមទីកន្លែងនីមួយៗ ។

នៅក្នុងចំណោមគោលដៅទេសចរណ៍ទាំងអស់នេះ ទីក្រុងអ៊ូលូរូ (Uluru) របស់ប្រទេសអូស្ត្រាលី ជាប់ចំណាត់ថ្នាក់លេខ១ ដោយទទួលបានពិន្ទុ៩.១៣ ក្នុងចំណោម១០ពិន្ទុ។ ទន្ទឹមនឹងនោះ សម្រាប់តំបន់អាស៊ីអាគ្នេយ៍ ប្រាសាទអង្គរវត្ត របស់កម្ពុជា ស្ថិតនៅក្នុងចំណាត់ថ្នាក់លេខ៥ ដោយទទួលបានពិន្ទុ៨.៥៤ ខណៈកោះបាលី របស់ឥណ្ឌូណេស៊ី ស្ថិតក្នុងចំណាត់ថ្នាក់លេខ៧ ដោយទទួលបានពិន្ទុ ៨.២០។

ជាមួយគ្នានេះកោះបូរាកាយ ប្រទេសហ្វីលីពីន ស្ថិតនៅក្នុងចំណាត់ថ្នាក់ទី៩ ជាមួយនឹងពិន្ទុ៧.៩៤ និងភ្នំភ្លើងប្រូម៉ូ (Mount Bromo) ស្ថិតក្នុងចំណាត់ថ្នាក់ទី១៤ ជាមួយនឹងកម្រិតពិន្ទុ៦.៧៨ ៕

ដោយ: គង់ លាងហួរ
អន្តរជាតិ: តម្លៃអាផាតមុិននៅទីក្រុង Da Nang ប្រទេសវៀតណាម បានកើនឡើងចន្លោះពី១ ទៅ៣% ក្នុងត្រីមាសទី១ដល់៥០ ទៅ៨០លានដុង (២.០០០ទៅ៣.២០០ដុល្លារ) ក្នុងមួយម៉ែត្រការ៉េ។នេះបើយោងតាមក្រុមហ៊ុនអចលនទ្រព្យកាណាដា Avison Young ។

នៅក្នុងរបាយការណ៍ ដែលចេញផ្សាយកាលពីពេលថ្មីៗកន្លងទៅនេះ ក្រុមហ៊ុនខាងលើបានគូសបញ្ជាក់ថា អត្រាស្រូបយកអាផាតមុិន(Absorption rate)នៅក្នុងទីក្រុងDa Nang (ដាណាង) ស្ថិតក្នុងរង្វង់៥០ភាគរយ។

យោងតាមក្រុមហ៊ុនប្រឹក្សាអចលនទ្រព្យក្នុងស្រុក DKRA បានឱ្យដឹងថា តម្លៃខ្ពស់បំផុតអាចហក់ឡើងដល់ប្រមាណ១៥០លានដុងក្នុងមួយម៉ែត្រការ៉េ ដោយក្នុងនោះ អាផាតមុិនដែលមានតម្លៃថ្លៃបំផុតក្នុងទីក្រុងដាណាង មានទីតាំងនៅសង្កាត់ Hai Chau ។

ចំណែក អាផាតមុិននៅក្នុងសង្កាត់ Son Tra និងសង្កាត់ Ngu Hanh Son ត្រូវបានដាក់លក់ក្នុងតម្លៃលើសពី៨០លានដុងក្នុងមួយម៉ែត្រការ៉េ។ រីឯ អាផាតមុិន នៅសង្កាត់ Ngu Hanh Son ត្រូវបានដាក់លក់ក្នុងតម្លៃចាប់ពី៥០ ទៅ៦៥លានដុងក្នុងមួយម៉ែត្រការ៉េ។

យោងតាមលោក David Jackson នាយកប្រតិបត្តិនៃក្រុមហ៊ុន Avison Young Vietnam បានមានប្រសាសន៍ឱ្យដឹងថា ទីផ្សារអាផាតមុិននៅក្នុងទីក្រុងដាណាង ត្រូវបានជំរុញដោយផ្នែកហេដ្ឋារចនាសម្ព័ន្ធ ទេសចរណ៍ និងការអភិវឌ្ឍន៍សេដ្ឋកិច្ច។

អ្នកជំនាញរូបនេះបន្ថែមថា “អ្នកអភិវឌ្ឍន៍ជាច្រើនកំពុងផ្តោតលើការសាងសង់អាផាតមុិនដែលមានតម្លៃថ្លៃៗ ភាពងាយស្រួល និងការរចនាឌីហ្សាញ ខណៈតម្លៃនៃសម្ភារៈសំណង់បានកើនឡើងយ៉ាងគំហុក ដែលកត្តាទាំងនេះកំពុងជំរុញឱ្យតម្លៃអាផាតមុិនកើនឡើង”។

ទីក្រុងទេសចរណ៍ Da Nang គឺជាទីក្រុងឆ្នេរសមុទ្រមួយស្ថិតនៅភាគកណ្តាលនៃប្រទេសវៀតណាម ដែលមានភាពល្បីល្បាញដោយសារឆ្នេរខ្សាច់ដ៏ស្រស់ស្អាត និងមានស្នាមប្រវត្តិសាស្ត្រជាកំពង់ផែអាណានិគមបារាំង៕ប្រភព: VNexpress៕