ដោយ: គង់ លាងហួរ

អន្តរជាតិ: ក្រុមហ៊ុនជំនាញផលិតថាមពល ឈានមុខគេរបស់ប្រទេសថៃ B.Grimm Power Plc (BGRIM) បានបន្តការពង្រីករបស់ខ្លួន នៅក្នុងវិស័យថាមពលកកើតឡើងវិញ ដោយថ្មីៗនេះ ក្រុមហ៊ុនបានផ្តួចផ្តើម គម្រោងរោងចក្រថាមពលពន្លឺព្រះអាទិត្យ នៅក្នុងប្រទេសអ៊ីតាលី។

លោក Harald Link ប្រធានក្រុមហ៊ុនBGRIM បានមានប្រសា​សន៍ថា ក្រុមហ៊ុនបានប្តេជ្ញាចិត្តក្នុងការសាងសង់ និងអភិវឌ្ឍរោងចក្រថាមពលកកើតឡើងវិញ នៅក្នុងប្រទេសកម្ពុជា កូរ៉េខាងត្បូង ជប៉ុន វៀតណាម ហ្វីលីពីន ក្រិក សហរដ្ឋអាមេរិក អូស្ត្រាលី អារ៉ាប់រួម អារ៉ាប៊ីសាអូឌីត និងប្រទេសថៃ។
តួយ៉ាង កាលពីឆ្នាំ២០២១កន្លងទៅ ក្រុមហ៊ុនB.Grimm Power Plc (BGRIM) បានសម្រេចចូលមកបណ្តាក់ទុននៅកម្ពុជា លើគម្រោងថាមពលពន្លឺព្រះអាទិត្យ ក្រោយពីទទួលបានប្រាក់កម្ចីចំនួន២៨,១លានដុល្លារអាមេរិក ពីធនាគារធំៗចំនួន៣របស់ប្រទេសថៃ។លោក Link បានបន្តថា ពេញមួយឆ្នាំ២០២៣នេះ ក្រុមហ៊ុនរបស់លោកបានបោះទុនវិនិយោគ លើរោងចក្រថាមពលកកើតឡើងវិញ ក្រោមគម្រោងក្រុមហ៊ុនបុត្រសម្ព័ន្ធ និងក្រុមហ៊ុនបណ្តាក់ទុនរួមគ្នា។លោក​ Link បាន​បញ្ជាក់ទៀតថា​ “ក្រុមហ៊ុន B.Grimm Power ក៏ត្រូវ​បាន​ជ្រើសរើស​ឱ្យផលិត និង​ផ្គត់ផ្គង់​អគ្គិសនី​ចេញពី​ប្រភព​កកើ​ត​ឡើង​វិញ​សម្រាប់​រដ្ឋាភិបាល​ថៃ​ ចំនួន៣៣៩មេហ្គាវ៉ាត់ផងដែរ”។

លោក Link បានបន្ថែមថា “ការវិនិយោគដទៃផ្សេងទៀតរបស់ក្រុមហ៊ុនរួមមាន រោងចក្រថាមពលពន្លឺព្រះអាទិត្យ នៅក្នុងប្រទេសម៉ាឡេស៊ី ដែលមានសមត្ថភាពផលិត ថាមពលសរុប៩០មេហ្គាវ៉ាត់ និងរោងចក្រថាមពលពន្លឺព្រះអាទិត្យ ដែលមានសមត្ថភាពផលិតថាម​ពល៩៩មេហ្គាវ៉ាត់ នៅប្រទេសកូរ៉េខាងត្បូង”៕

ដោយ: គង់ លាងហួរ
ម៉ារ៉ុក: មូលនិធិរូបិយវត្ថុអន្តរជាតិ(IMF) បានបន្ទាបការព្យាកររបស់ខ្លួនសម្រាប់កំណើនសេដ្ឋកិច្ចចិន និងតំបន់ចាយប្រាក់អឺរ៉ូ ដោយបាននិយាយថា កំណើនសេដ្ឋកិច្ចសកលលោកទាំងមូលនៅតែមានកម្រិតទាប និងមិនស្មើគ្នា។

IMF បានរក្សាការព្យាករសម្រាប់កំណើន GDP ពិតប្រាកដរបស់ពិភពលោកក្នុងឆ្នាំ២០២៣ក្នុងរង្វង់៣,០%ដដែល នៅក្នុងទស្សនវិស័យសេដ្ឋកិច្ចពិភពលោកចុងក្រោយ (WEO) ប៉ុន្តែ IMF បានបន្ទាបការព្យាករចំនួន០,១ភាគរយសម្រាប់កំណើនសេដ្ឋកិច្ចសកលនៅឆ្នាំ២០២៤ មកនៅត្រឹម២,៩ភាគរយធៀបនឹងការព្យាករក្នុងខែកក្កដារបស់ខ្លួន។

ប្រធានសេដ្ឋវិទូរបស់ IMF លោកស្រី Pierre-Olivier Gourinchas បានប្រាប់អ្នកយកព័ត៌មានថា សេដ្ឋកិច្ចពិភពលោកបានបន្តងើបឡើងវិញពីជំងឺរាតត្បាត  ការឈ្លានពានរបស់រុស្ស៊ីលើអ៊ុយក្រែន និងវិបត្តិថាមពលកាលពីឆ្នាំមុន ប៉ុន្តែនិន្នាការកំណើនមានភាពខុសប្លែកគ្នាកាន់តែខ្លាំងឡើងនៅទូទាំងពិភពលោក។លោកស្រី Gourinchas បានបន្តថា ជាទូទៅ ការព្យាករទាំងនេះបានចង្អុលបង្ហាញឱ្យឃើញពីការធ្លាក់ចុះនៃសេដ្ឋកិច្ចក្នុងកម្រិតមួយសមរម្យ ប៉ុន្តែ IMF នៅតែមានការព្រួយបារម្ភអំពីហានិភ័យទាក់ទងនឹងវិបត្តិអចលនទ្រព្យនៅក្នុងប្រទេសចិន តម្លៃទំនិញដែលប្រែប្រួលខ្លាំង ការបែងចែកភូមិសាស្ត្រនយោបាយ និងការកើនឡើងវិញនៃអតិផរណា។

លោកស្រីបញ្ជាក់ថា សេដ្ឋកិច្ចពិភពលោកកំពុងបង្ហាញពីភាពធន់ ហើយសេដ្ឋកិច្ចពិភពលោកមិនរងការភ្ញាកផ្អើលខ្លាំង ដោយសារការតក់ស្លុតដ៏ដែលវាបានជួបប្រទះក្នុងរយៈពេលពីរ ឬបីឆ្នាំចុងក្រោយនេះនោះទេប៉ុន្តែសេដ្ឋកិច្ចក៏មិនបានដំណើរការល្អពេកដែរ។

IMF បានបង្កើនការព្យាកររបស់ខ្លួនសម្រាប់កំណើនសេដ្ឋកិច្ចអាមេរិក ដែលជាសេដ្ឋកិច្ចធំជាងគេរបស់ពិភពលោកចំនួន០,៣ភាគរយ ឡើងដល់២,១ភាគរយសម្រាប់ឆ្នាំនេះ និងបង្កើនចំនួន០,៥ភាគរយ ដល់១,៥ភាគរយ សម្រាប់ឆ្នាំ២០២៤។

ផ្ទុយទៅវិញ IMF ព្យាករថា សេដ្ឋកិច្ចចិននឹងកើនឡើង៥ភាគរយនៅឆ្នាំនេះ និង៤,២ភាគរយនៅឆ្នាំ២០២៤ ដែលការព្យាករថ្មីនេះឆ្លុះបញ្ចាំងពីការធ្លាក់ចុះចំនួន០,២%និង០,៣%រៀងៗគ្នាបើធៀបនឹងការព្យាករកាលពីលើកមុន។

លើសពីនេះ IMF ក៏បានបន្ទាបការព្យាករកំណើនសេដ្ឋកិច្ចសម្រាប់តំបន់ចាយប្រាក់អឺរ៉ូមកត្រឹម០,៧ភាគរយសម្រាប់ឆ្នាំនេះ និង១,២ភាគរយសម្រាប់ឆ្នាំ២០២៤ បើធៀបនឹងការព្យាករ០,៩% និង១,៥%រៀងៗគ្នាកាលពីខែកក្កដាកន្លងទៅ៕

ដោយ: គង់ លាងហួរ
អន្តរជាតិ: កាលពីថ្ងៃចន្ទទី២៣ ខែតុលា កន្លងទៅនាយករដ្ឋមន្រ្តីជប៉ុន លោក Fumio kishida បានប្រកាសដាក់ចេញនូវវិធានការអាទិភាពមួយចំនួនទៅក្នុងផែនការជំរុញកំណើនសេដ្ឋកិច្ចជាតិឡើងវិញ។

ទាក់ទិនទៅនឹងគោលនយោបាយការបរទេសរបស់ប្រទេសជប៉ុនលោក kishida បានផ្តោតជាសំខាន់លើទំនាក់ទំនងជាមួយប្រទេសចិន និងកូរ៉េខាងជើង។ លោក kishida បានថ្លែងបែបនេះនៅក្នុងសភាស្របពេលដែលប្រជាប្រិយភាពរបស់លោកកំពុងធ្លាក់ចុះខ្លាំង។កម្រិតប្រជាប្រិយភាពរបស់លោក fumio kishida បានធ្លាក់ចុះយ៉ាងគំហុកនៅក្នុងរយៈពេលប៉ុន្មានខែចុងក្រោយនេះចាប់តាំងពីបានចូលកាន់តំណែងជានាយករដ្ឋមន្រ្តីជប៉ុនកាលពី ខែ តុលា ឆ្នាំ២០២១។

ការធ្លាក់ចុះនៃប្រជាប្រិយភាព នេះអាចជះផលប៉ះពាល់មិនត្រឹមតែតំណែងលោក kishida ក្នុងនាមជាប្រមុខរដ្ឋាភិបាលជប៉ុនប៉ុណ្ណោះទេ ប៉ុន្តែវាក៏ជះផលប៉ះពាល់ផងដែរដល់តំណែងរបស់លោកក្នុងនាមជាប្រធានគណបក្សប្រជាធិបតេយ្យសេរី ស្របពេលដែលការបោះឆ្នោត ជ្រើសរើសប្រធានថ្មីរបស់គណបក្សនេះគ្រោងនឹងរៀបចំធ្វើឡើងនៅឆ្នាំ២០២៤ខាងមុខនេះ។

“សេដ្ឋកិច្ច សេដ្ឋកិច្ច សេដ្ឋកិច្ច សេដ្ឋកិច្ច ជាវិស័យសំខាន់ជាងគេ និងជាអាទិភាពរបស់ខ្ញុំ”គឺជាពាក្យនិងប្រយោគ ដែលលោក kishida បានបញ្ជាក់ជាច្រើនលើកជាច្រើនសារនៅក្នុងការថ្លែងសុន្ទរកថារបស់លោកនៅឯសភាកាលពីថ្ងៃចន្ទម្សិលមិញ។

វិធានការអាទិភាពចំនួន៣ចំណុច ដែលលោក kishida បានដាក់បញ្ចូលទៅក្នុងផែនការថ្មីនោះរួមមានដូចជាវិធានការទី១: កាត់បន្ថយការប្រមូលពន្ធពីប្រជាពលរដ្ឋ វិធានការទី២:ដំឡើងប្រាក់ខែ និងវិធានទី៣: ជំរុញឱ្យរោងចក្រ និងសហគ្រាសបង្កើនការវិនិយោគរបស់ពួកគេ។ លោកបានបន្ថែមថា ក្នុងរយៈពេល២ឬ៣ឆ្នាំខាងមុខនេះ រដ្ឋាភិបាលជប៉ុននឹងពង្រឹងវិធានការគាំទ្រ ដែលអាចចូលរួមជួយពង្រឹងសមត្ថភាពផ្គត់ផ្គង់របស់ប្រទេសនេះ ដោយផ្តោតជាសំខាន់ទៅលើការវិនិយោគ នៅក្នុងវិស័យដែលទាក់ទងនឹងសន្តិសុខជាតិជាពិសេស ក្នុងវិស័យបន្ទះsemiconductor។

ជាមួយនឹងទីក្រុងប៉េកាំងលោក kishida ចង់បានទំនាក់ទំនងមួយប្រកបដោយស្ថិរភាព និងការស្ថាបនា។ ទោះជាយ៉ាងនេះក្តីលោកក៏បានអំពាវនាវឱ្យប្រទេសចិនដកចេញនូវវិធានការហាមឃាត់ការនាំចូលគ្រឿងសមុទ្រ ពីប្រទេសជប៉ុនផងដែរ។

ជាក់ស្តែងប្រទេសចិន បានផ្អាកការនាំចូលគ្រឿងសមុទ្រពីប្រទេសជប៉ុនចាប់តាំងពីដំណាច់ខែសីហាឆ្នាំនេះមកម្ល៉េះ ខណៈដែលទីក្រុងតូក្យូបានសម្រេចចិត្តបង្ហូរទឹកចេញពីរោងចក្រនុយក្លេអ៊ែរ Fukushima ចូលទៅក្នុងសមុទ្រ៕

ដោយ: គង់ លាងហួរ
អន្តរជាតិ: អតីតកប៉ាល់ទេសចរណ៍ខ្នាតយក្ស MV Doulos Hope ដែលបច្ចុប្បន្នប្រែក្លាយជាបណ្ណាល័យ ឬបណ្ណាគារអណ្តែតទឹកដ៏ធំបំផុតរបស់ពិភពលោក ដែលជាកម្មសិទ្ធិរបស់អង្គការសប្បុរសធម៌អាល្លឺម៉ង់GBA Ships បានធ្វើដំណើរទៅកាន់ទីក្រុងបាងកក កាលពីដើមសប្តាហ៍នេះ។

កប៉ាល់ខ្នាតយក្សនេះបាន និងកំពុងចូលចតនៅឯកំពង់ផែបាងកកក្នុងសង្កាត់ Khong Toei រហូតដល់ថ្ងៃទី២៦ ខែវិច្ឆិកា។ដោយត្រូវបានសាងសង់ឡើងក្នុងឆ្នាំ១៩៨៩ ក្នុងនាមជាកប៉ាល់ទេសចរណ៍ខ្នាតយក្ស ប៉ុន្តែឥឡូវនេះវាក្លាយជាបណ្ណាល័យ ឬបណ្ណា គារអណ្តែតទឹក MV Doulos Hope ដែលមានដាក់តាំងសៀវភៅអប់រំជាភាសាអង់គ្លេសជាង២.០០០ចំណងជើង ដែលអ្នកទស្សនាអាចទិញបានក្នុងតម្លៃពិសេស។

មុននឹងចូលចតនៅប្រទេសថៃ កប៉ាល់ MV Doulos Hope ត្រូវបានចតនៅកំពង់ផែ Kota Kinabalu របស់ប្រទេសម៉ាឡេស៊ី ហើយបន្ទាប់ពីចាកចេញពីទីក្រុងបាងកក វានឹងចេញដំណើរទៅកាន់ខេត្តព្រះសីហនុ ក្នុងប្រទេសកម្ពុជារបស់យើង។

ខណៈពេលដែលស្ថិតនៅក្នុងប្រទេសថៃ អ្នកស្ម័គ្រចិត្តនៅលើកប៉ាល់ ដែលមកពីបណ្តាប្រទេសជាង៣០ នឹងទៅទស្សនាសហគមន៍ជុំវិញកំពង់ផែ សម្រាប់សកម្មភាពផ្លាស់ប្តូរការអប់រំ និងវប្បធម៌។

កប៉ាល់នេះ បានបើកទទួលភ្ញៀវជារៀងរាល់ថ្ងៃ លើកលែងតែថ្ងៃចន្ទ ចាប់ពីម៉ោង២រសៀលរហូតដល់ម៉ោង៩យប់។  តម្លៃចូលមកកាន់កប៉ាល់គឺ៣០បាត ក្នុងមនុស្សម្នាក់ ហើយឥតគិតថ្លៃសម្រាប់កុមារអាយុក្រោម១២ឆ្នាំ និងមនុស្សចាស់ដែលមានអាយុលើសពី៦៥ឆ្នាំ៕

ដោយៈ គង់ សូរិយា

        ភ្នំពេញៈ អគ្គនាយកក្រុមហ៊ុនERA Cambodia លោកខន គង្គាបានអះអាងថា ទីផ្សារខុនដូបានងើបឡើងវិញខ្លាំង នៅក្នុងអំឡុងខែតុលានេះ។ លោកខន គង្គាបានមានប្រសាសន៍ឲ្យដឹង កាលពីល្ងាចថ្ងៃទី២៤ តុលាថា  បើធៀបនឹងខែសីហា និងខែកញ្ញាកន្លងមក នៅខែតុលានេះ សកម្មភាពទិញ និងជួលខុនដូបានងើបឡើងវិញច្រើន សម្រាប់រាជធានីភ្នំពេញ និងក្រុងព្រះសីហនុ។  លោកបន្តថា ការវិនិយោគខុនដូ នៅតែមានឱកាសចំណេញពីការជួលត្រលប់ ធៀបនឹងការទិញផ្ទះនៅតាមបុរីនានា ដោយខុនដូតម្លៃ៧ទៅ១០ម៉ឺនដុល្លារ អាចជួលបានចន្លោះពី៨០០ ទៅ១០០០ដុល្លារក្នុងមួយខែ ខណៈការទិញផ្ទះនៅតាមបុរី តម្លៃចាប់ពី១០ទៅ២០ម៉ឺនដុល្លារ អាចជួលបានចន្លោះពី៥០០ ទៅ៧០០ដុល្លារប៉ុណ្ណោះក្នុងមួយខែ។ លោកបន្តថា តំបន់បឹងកេងកេង១ តំបន់ទួលគោក និងតំបន់ជ្រោយចង្វារ ជាតំបន់មានសក្តានុពល លើការទិញខុនដូសម្រាប់រស់នៅ និងការជួល ប៉ុន្តែតំបន់ដែលមានជនបរទេសរស់នៅ និងធ្វើការច្រើន គឺតំបន់បឹងកេងកង១ និងតំបន់ជុំវិញនេះ។

ទីផ្សារខុនដូនៅកម្ពុជា​ បានថមថយល្បឿននៃការសាងសង់ និងការទិញលក់ ដោយសារវិបត្តិសេដ្ឋកិច្ច ដែលបណ្តាលមកពីជំងឺកូវីដ១៩ និងសង្រ្គាមរុស្ស៊ី អ៊ុយក្រែនចាប់តាំងពីឆ្នាំ២០២០ ដល់ឆ្នាំ​២០២៣ ប៉ុន្តែទីផ្សារនេះបាន និងកំពុងមានសញ្ញាងើបឡើងវិញបណ្តើរៗហើយ៕

ដោយ: គង់ លាងហួរ

អន្តរជាតិ: កោះ Phu Quoc ឬកោះត្រល់ នៅប្រទេសវៀតណាម កំពុង​ស្រូបបានលំហូរ​ភ្ញៀវ​ទេសចរ​អន្តរជាតិ មក​ពី​ប្រទេសកាហ្សាក់ស្ថាន និង​រុស្ស៊ី ​តាម​រយៈជើង​ហោះ​ហើរ​ពិសេស ខណៈ​ក្រុមហ៊ុន​អាកាសចរណ៍​កូរ៉េ​ខាង​ត្បូង ​ក៏កំពុង​រៀបចំ​បើកជើង​ហោះ​ហើរ​ត្រង់​មកកាន់កោះ​នេះផងដែរ។

តួយ៉ាង កាលពីថ្ងៃចន្ទដើមសប្តាហ៍នេះ ភ្ញៀវទេសចរចំនួន២១០នាក់ ដែលធ្វើដំណើរមកពីប្រទេសកាហ្សាក់ស្ថាន បានចុះចតនៅឯអាកាសយានដ្ឋានអន្តរជាតិ Phu Quoc ។ ចំណែកភ្ញៀវទេសចររុស្ស៊ីរាប់រយនាក់ បានធ្វើដំណើរមកដល់ តាមរយៈជើងហោះហើរពិសេសចំនួន២កាលពីថ្ងៃអង្គារ។

លោក Bui Quoc Thai ប្រធានមន្ទីរទេសចរណ៍ខេត្ត Kien Giang បានមានប្រសាសន៍ថា ការវិលត្រឡប់មកវិញនៃភ្ញៀវទេសចរអន្តរជាតិបង្កើនក្តីសង្ឃឹម សម្រាប់ការស្តារវិស័យទេសចរណ៍ឱ្យងើបឡើងវិញ។លោកបានបន្ថែមថា អាជ្ញាធរខេត្តកំពុងធ្វើការ ជាមួយភ្នាក់ងារពាក់ព័ន្ធ ដើម្បីជំរុញយុទ្ធនាការផ្សព្វផ្សាយទេសចរណ៍ នៅក្នុងទីផ្សាររុស្ស៊ី និងបណ្តាប្រទេសដែលនិយាយភាសារុស្ស៊ី នៅតំបន់អាស៊ីកណ្តាល។ជាមួយគ្នានេះដែរ ក្រុមហ៊ុនអាកាសចរណ៍កូរ៉េខាងត្បូងមួយចំនួន បានប្រកាសពីផែនការ ចាប់ផ្តើមបើកសេវាកម្មហោះហើរដោយផ្ទាល់ទៅកាន់កោះPhu Quocនៅឆ្នាំនេះ។

ជាក់ស្តែង ក្រុមហ៊ុនអាកាសចរណ៍កូរ៉េ Jeju Air គ្រោងនឹងបើកដំណើរការសេវាកម្មហោះហើរ ប្រចាំថ្ងៃពីទីក្រុងសេអ៊ូល មកកាន់កោះ Phu Quoc ក្នុងខែតុលានេះ ខណៈដែលក្រុមហ៊ុន Korean Air និង Jin Air គ្រោងនឹងបើកជើងហោះហើរ លើផ្លូវដូចគ្នាចាប់ពីចុងខែវិច្ឆិកា និងខែធ្នូ។

យោងតាមសារពត៌មាន VNexpress បានឱ្យដឹងថា នៅលើកោះ Phu Quoc មានបន្ទប់សណ្ឋាគារជិត៣០.០០០បន្ទប់ និងគ្រឹះ​ស្ថានចំនួន៨០០កន្លែងដូចជាហាង និងភោជនីយដ្ឋាន៕

ដោយៈ ស៊ីវ ម៉េង

        ភ្នំពេញៈ អ្នកជំនាញអចលនទ្រព្យ បានលើកឡើងនូវទីតាំងនិងតម្លៃដី ដែលមានឱកាសចំណេញខ្ពស់នាពេលអនាគត។ អគ្គនាយិកាក្រុមហ៊ុនAmatak Property Service Co, Ltdលោកស្រីតាំង ហួរបានមានប្រសាសន៍ឲ្យដឹង តាមបណ្តាញតេឡេក្រាមកាលពីរសៀលថ្ងៃទី24 តុលាថា ការវិនិយោគដីធ្លីនៅតំបន់ជាយក្រុង ពិសេសតំបន់អរិយក្សត្រ នៅតែមានឱកាសចំណេញខ្ពស់ សម្រាប់ដីមានតម្លៃចន្លោះពី៣០ ទៅ៥០ដុល្លារក្នុងមួយម៉ែត្រការ៉េ។

លោកស្រីបន្តថា “ដីនៅតាមបណ្តោយផ្លូវ៤១ ផ្លូវលេខ៥១ និងតំបន់អរិយក្សត្រ នឹងមានឱកាសឡើងថ្លៃច្រើន នាពេលអនាគត”។​លោកស្រីបន្តថា “តំបន់អរិយក្សត្រ ជាតំបន់មានសក្តានុពល ដែលអ្វីៗរង់ចាំតែស្ពានមិត្តភាពកម្ពុជា កូរ៉េសាងសង់ប៉ុណ្ណោះ ខណៈស្ពាននេះគ្រោងនឹងបើកការដ្ឋាន សាងសង់នៅឆ្នាំ២០២៤ខាងមុខនេះ”។
លោកស្រីតាំង ហួរបានបន្តថា ដីនៅតំបន់អរិយក្សត្រ មានតម្លៃចន្លោះពី៤០ទៅ៦០ដុល្លារ ឬទាបជាងនេះអាស្រ័យលើទីតាំង និងទំហំដីជាក់ស្តែង ពិសេសដីបឹងនៅមានតម្លៃទាបសមរម្យនៅឡើយ។

លោកស្រីតាំង ហួរ ដែលមានបទពិសោធន៍ លើវិស័យអចលវត្ថុជាង២០ឆ្នាំ ដែលបាននិងកំពុងផ្តោតលើទីផ្សារដីធ្លី បានអះអាងបន្តថា ការទិញ លក់ដីធ្លីនៅតែមានសកម្មភាព ប៉ុន្តែមិនមានចំនួនគគ្រឹ​កគគ្រេងដូចមុនវិបត្តិឡើយ៕