ដោយ: គង់ លាងហួរ

អន្តរជាតិ: ប្រទេស​ចិន​ គឺ​ជា​ម្ចាស់​ជើង​ឯក​​ ដែលបំបែកកំណត់ត្រា ក្នុង​ការ​សាង​សង់​ទំនប់វារីអគ្គិសនី ធំបំផុតនៅលើពិភព​លោក ជាពិសេស ចិនបានសាងសង់ទំនប់វារីអគ្គិសនី ដែលមានសមត្ថភាពធំជាងគេ និងកំពុងបើកដំណើរការនាពេលបច្ចុប្បន្ន គឺទំនប់ Three Gorges នៅលើទន្លេ Yangtze។

នៅពេលនេះ ប្រទេសមហាអំណាចសេដ្ឋកិច្ចធំជាងទី២ នៅលើពិភពលោកមួយនេះ កំពុងដំណើរការសាងសង់ ទំនប់វារីអគ្គិសនីធំជាងគេបង្អស់របស់ពិភពលោក ដើម្បីបំបែកកំណត់ត្រាសារជាថ្មីម្តងទៀត។

ទំនប់វារីអគ្គិសនីនេះ នឹងស្ថិតនៅផ្នែកខាងក្រោមនៃទន្លេ Yarlung Zangbo ដែលត្រូវបានគេស្គាល់ថា ជាទន្លេ Brahmaputra ក្នុងប្រទេសឥណ្ឌា ស្ថិតក្នុងចន្លោះជើងភ្នំហិម៉ាឡៃ ក្នុងតំបន់ស្វយ័តទីបេ។

ទន្លេ Yarlung Zangbo ហូរឆ្លង​កាត់​តំបន់​ទីបេ ដែលមានចម្ងាយ​ប្រហែល១.៦០០គីឡូម៉ែត្រ​ ហើយ​បន្ទាប់​មក​ហូរ​ចូល​ទៅ​កាន់ប្រទេស​ឥណ្ឌា។ ទឹក​ទន្លេ​នេះ ហូរ​កាត់រដ្ឋ Arunachal Pradesh ដែលស្ថិតនៅភាគឦសាន ប្រទេសឥណ្ឌា មុន​ពេល​ហូរ​ចូល​ទន្លេ Brahmaputra ប្រទេស​បង់ក្លាដែស។

ផែនការ​របស់​ប្រទេស​ចិន ដើម្បី​សាងសង់​ទំ នប់​វារីអគ្គិសនី ឆ្លង​កាត់​ទន្លេ Yarlung Zangbo បាន​បង្កឱ្យ​មាន​ការ​ព្រួយ​បារម្ភ​ នៅ​ក្នុង​ប្រទេស​ឥណ្ឌា និងបង់ក្លាដែស ​ដែល​ជា​ប្រទេស​ស្ថិត​នៅ​ខ្សែ​ទឹក​ខាង​ក្រោម​នៃ​ទំនប់​វារីអគ្គិសនី​តែ​មួយ។

ប៉ុន្តែទោះជាយ៉ាងនេះក្តី រដ្ឋាភិបាលចិនបានព្យាយាមបង្ហាញពីភាពត្រឹមត្រូវនៃគម្រោងរបស់ខ្លួន ដោយគូសបញ្ជាក់ថា ការកសាងទំនប់នេះនឹងជួយឱ្យប្រទេសចិន សម្រេចបាននូវគោលដៅអព្យាក្រឹតភាពកាបូនរបស់ខ្លួន នៅត្រឹមឆ្នាំ២០៦០ខាងមុខ។

ទន្ទឹមគ្នានេះ អ្នកនាំពាក្យក្រសួងធនធានទឹករបស់ប្រទេសឥណ្ឌាបានបញ្ជាក់ប្រាប់កាសែត Al Jazeera ថា ខ្លួនកំពុងរៀបចំគម្រោងសាងសង់ គម្រោងថាមពល១០ជីហ្គាវ៉ាត់ នៅលើដៃទន្លេ Brahmaputra ដើម្បីទប់ទល់នឹងផលប៉ះពាល់ នៃទំនប់វារីអគ្គិសនីរបស់ប្រទេសចិន៕

ដោយ: គង់ លាងហួរ

ភ្នំពេញ: ធនាគារពាណិជ្ជកម្មក្រៅប្រទេសនៃកម្ពុជា (FTB) បានចូលរួមជាមួយកម្មវិធីហិរញ្ញវត្ថុ ខ្សែសង្វាក់ពាណិជ្ជកម្ម និងការផ្គត់ផ្គង់ (TSCFP) របស់ធនាគារអភិវឌ្ឍន៍អាស៊ី (ADB) ដើម្បីបង្កើនហិរញ្ញវត្ថុពាណិជ្ជកម្ម សម្រាប់សហគ្រាសធុនមីក្រូ តូច និងមធ្យម (MSMEs) នៅកម្ពុជា។

លោក ឌិត សុចល នាយកប្រតិបត្តិធនាគារ FTB  និងលោកស្រី Jyotsana Varma នាយិកាធនាគារ ADB ប្រចាំប្រទេសកម្ពុជា  បានចុះហត្ថលេខា លើកិច្ចព្រមព្រៀងនេះនៅរាជធានីភ្នំពេញ។

លោកស្រី Varma បានថ្លែងនៅក្នុងព្រឹត្តិការណ៍នោះថា “កិច្ចព្រមព្រៀងនេះ គឺជាផ្នែកមួយនៃគំនិតផ្តួចផ្តើម អភិវឌ្ឍន៍វិស័យឯកជនរបស់ ADB ដើម្បីលើកកម្ពស់ការចូលរួមរបស់វិស័យនេះ ក្នុងការធ្វើពិពិធកម្មសេដ្ឋកិច្ចរបស់កម្ពុជា”។

លោកស្រីបានបន្ថែមថា “វានឹងបំពេញចន្លោះប្រហោង នៅក្នុងទីផ្សារ ដោយផ្តល់ហិរញ្ញប្បទានតាមរយៈធនាគារដៃគូ ដើម្បីគាំទ្រដល់ពាណិជ្ជកម្ម និងសហគ្រាសធុនមីក្រូ តូច និងមធ្យម ដែលតំណាងឱ្យប្រហែល៩៩ភាគរយ នៃសហគ្រាសទាំងអស់នៅក្នុងប្រទេសកម្ពុជា”។

លោកស្រីបញ្ជាក់ទៀតថា ក្នុងនាមជាធនាគារដៃគូរបស់កម្មវិធី TSCFP ធនាគារពាណិជ្ជកម្មក្រៅបរទេសនៃកម្ពុជា នឹងផ្តល់ការគាំទ្រដល់អតិថិជនជាសហគ្រិន និង MSME នៅកម្ពុជា ដោយអនុញ្ញាតឱ្យឧបករណ៍ហិរញ្ញវត្ថុពាណិជ្ជកម្ម ដែលចេញដោយFTB ទទួលបានការធានាឥណទានពីកម្មវិធី TSCFP ។ជាមួយគ្នានេះ លោក ឌិត សុចល បាននមានប្រសាសន៍ឱ្យដឹងថា ធនាគារ FTB បាននិងកំពុងធ្វើការជាមួយកម្មវិធី ADB រួចមកហើយ ដើម្បីបង្កើនចំណេះដឹង និងជំនាញរបស់ខ្លួនក្នុងការសម្របសម្រួលពាណិជ្ជកម្ម។

លោកបន្ថែមថា កម្មវិធីនេះបានជួយកសាងសមត្ថភាពរបស់ធនាគារ FTB លើការរៀបចំរបាយការណ៍ ការអនុវត្តល្អ យុទ្ធសាស្រ្តច្នៃប្រឌិត ការបណ្តុះបណ្តាល និងការវាស់វែងការអនុវត្ត។

ដោយឡែក លោកស្រី Ratchel Thompson នាយិកាប្រតិបត្តិក្នុង ក្រុមប្រឹក្សាភិបាល ធនាគារអភិវឌ្ឍន៍អាស៊ី បានសម្ដែងការគាំទ្រ មហិច្ឆតារបស់កម្ពុជា ក្នុងការបង្កើតបណ្តាញ អគ្គិសនីអាស៊ាន ក្នុងទស្សនៈចែករំលែក ការពារបរិស្ថាន និងបង្កើនសន្តិសុខថាមពលបៃតងរបស់អាស៊ាន។ការសម្ដែងការគាំទ្រនេះ បានធ្វើឡើងក្នុងឱកាសដែលលោកស្រីនាយិកា ចូលជួបពិភាក្សាការងារ ជាមួយលោក កែវ រតនៈ រដ្ឋមន្រ្តីក្រសួងរ៉ែ និងថាមពល។

ក្នុងជំនួបនោះ លោកស្រី Ratchel Thompson បានវាយតម្លៃខ្ពស់លើគោលនយោបាយ និងការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក្នុងស្ថានភាពដែលសេដ្ឋកិច្ចពិភពលោកកំពុងជួបបញ្ហាគ្រប់ទិសទី។

លើសពីនេះ លោកស្រីបានបង្ហាញសុទិដ្ឋិនិយមខ្ពស់ លើភាពជាដៃគូរវាងធនាគារ ADB និងរដ្ឋាភិបាលកម្ពុជា ហើយប្តេជ្ញាបន្តការគាំទ្រ លើផែនការអភិវឌ្ឍន៍វិស័យរ៉ែ និងថាមពលនៅកម្ពុជា៕ប្រភព៖ Xinhua៕

ដោយ: គង់ លាងហួរ
អន្តរជាតិ: អគារមួយ ដែលនឹងក្លាយជាអគារខ្ពស់ជាងគេទី១ នៅសហរដ្ឋអាមេរិក និងខ្ពស់ជាងគេលំដាប់ទី៥ នៅលើពិភពលោក គ្រោងនឹងសាងសង់ឡើង នៅក្នុងទីក្រុងដែលមនុស្សមួយចំនួនប្រហែលនឹកស្មានមិនដល់។
ក្រុមហ៊ុនអភិវឌ្ឍន៍អចលនទ្រព្យ ដែលស្ថិតនៅពីក្រោយគម្រោងនេះ បានដាក់សំណើរសាងសង់អគារថ្មី ដែលមានកំពស់១.៩០៧ហ្វីត និងមានប៉មចំនួន៤ ដែលនឹងវ៉ាដាច់អគារ One World Trade Center។

បច្ចុប្បន្ននេះ អគារខ្ពស់ជាងគេបំផុតលំដាប់លេខ១ នៅសហរដ្ឋអាមេរិកគឺអគារ One World Trade Center ដែលមានទីតាំងនៅទីក្រុងញូវយ៉ក និងមានកម្ពស់ចំនួន១.៧៧៦ហ្វីត។
គម្រោងអគារខាងលើ មិនត្រូវបានស្នើសាងសង់ឡើងនៅក្នុងទីក្រុងធំៗ ដូចជាញូវយ៉ក ឈីកាហ្គោ ឬទីក្រុងផ្សេងទៀតដែលល្បីល្បាញ និងសម្បូរទៅដោយអគារខ្ពស់ៗនោះទេ។ប៉ុន្តែផ្ទុយទៅវិញ ក្រុមហ៊ុនអភិវឌ្ឍន៍អចលនទ្រព្យ Matteson Capital និងក្រុមហ៊ុនរចនាបថស្ថាបត្យកម្ម AO កំពុងដាក់សំណើសាងសង់អគារនេះនៅទីក្រុងOklahoma។ ទីក្រុងនេះគឺជារដ្ឋដ៏តូចមួយនៅសហរដ្ឋអាមេរិក ដែលមានប្រជាជនជាង៤លាននាក់។

ក្រុមហ៊ុន AO បានអះអាងថា គម្រោងនេះ រួមមានការសាងសង់ប៉មចំនួន៤ ដែលក្នុងនោះ ប៉មចំនួន៣នឹងមានកម្ពស់៣៤៥ហ្វីតដូចៗគ្នា ខណៈប៉មទី៤ ឈ្មោះ “Legends Tower” នឹងមានកំពស់ខ្ពស់ជាងគេចំនួន១.៩០៧ហ្វីត។

នៅពេលសាងសង់បញ្ចប់ អគារ Legends Tower នឹងក្លាយទៅជាអគារពហុមុខងារ ដែលក្នុងអគារនោះ រួមមានទាំង សណ្ឋាគារ ខុនដូ លំនៅដ្ឋាន ផ្សារទំនើប ហាងលក់រាយ និងភោជនីយដ្ឋានប្រណីតផងដែរ៕ប្រភព៖USA Today៕

ដោយៈ ជេស៊ីកា

        មណ្ឌលគិរីៈ គំរោងសិក្សាដើម្បីឈានទៅ សម្រេចចិត្តវិនិយោគឬអត់របស់ក្រុមហ៊ុនធំមួយ គ្រោងចំណាយពេលសិក្សារហូតដល់មួយឆ្នាំឬយូរជាងនេះ ដើម្បីក្រុមហ៊ុនមានមូលដ្ឋានក្នុងការសម្រេចចិត្ត។

អនុរដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកា​សចរណ៍ស៊ីវិល លោកស៊ីន ចាន់សិរីវត្ថាបានមានប្រសាសន៍ឲ្យដឹងកាលពីសប្តាហ៍មុនថា គំរោងសិក្សាព្រលាននេះ គឺនៅឆ្ងាយណាស់ យ៉ាងហោចណាស់ ត្រូវការយៈពេល១ឆ្នាំដែរ។

លោកបញ្ជាក់ថា “ឥលូវនេះក្រុមហ៊ុនកំពុងរៀបចំសិក្សា លើទិដ្ឋភាពច្បាប់ ទិដ្ឋភាពពាណិជ្ជកម្មច្រើន បច្ចេកទេសច្រើន ហើយជ្រើសរើសក្រុមអ្នកជំនាញ ប្រឹក្សាយោបល់ច្រើនណាស់ ទើបចាប់ផ្តើមធ្វើការសិក្សា”។

លោកស៊ីន ចាន់សិរីវត្ថាបានបន្តថា ការរៀបចំធនធានមនុស្ស និងហិរញ្ញវត្ថុរួច ទើបជ្រើសរើសអ្នកជំនាញផ្តល់ប្រឹក្សា ទើបឈានដល់ការសិក្សា។

យោងតាមផែនការមេអភិវឌ្ឍន៍ វិស័យទេសចរណ៍ខខេត្តមណ្ឌ​លគិរីឆ្នាំ២០២៣ ២០៣៥ រដ្ឋាភិបាលកម្ពុជាគ្រោងទាក់ទាញភ្ញៀវទេសចរណ៍អន្តរជាតិ ទៅទស្សនាខេត្តនេះឲ្យបាន១លាននាក់ និងភ្ញៀវទេសចរណ៍ក្នុងស្រុក ឲ្យបានប្រមាណ៤លាននាក់ក្នុងមួយឆ្នាំ។

ការប្រកាសសាងសង់ព្រលានយន្តហោះ នៅខេត្តមណ្ឌលគិរី កាលពីពេលកន្លងមក ត្រូវបានសិក្សានិងចាប់អារម្មណ៍វិនិយោគដោ​យក្រុមហ៊ុនChina Power ប៉ុន្តែក្រុមហ៊ុននេះមានវិបត្តិហិរញ្ញវត្ថុ ទើបបានដកខ្លួនចេញពីគំរោងនេះ ខណៈក្រុមហ៊ុនសិក្សាបច្ចុប្បន្នជាក្រុមហ៊ុនពហុជាតិសាសន៍៕

        ដោយៈ គង់ សូរិយា

        កោះកុងៈ ក្រុមមន្រ្តីនៃលេខាធិការដ្ឋាន គណៈកម្មាធិការគ្រប់​គ្រងនិងអភិវឌ្ឍតំបន់ឆ្នេរសមុទ្រកម្ពុជា ខេត្តកោះកុង បានចុះពិនិត្យស្ថានភាពឆ្នេរសមុទ្រ ការងារអនាម័យ បរិស្ថាន និងទេសចរណ៍នៅកោះកុងក្រៅ។

តំបន់ទេសចរណ៍នេះ ស្ថិតក្នុងភូមិជ្រោយប្រស់ ឃុំជ្រោយប្រស់ ស្រុកកោះកុង ខេត្តកោះកុង។ដោយមានការចាត់តាំងរបស់លោកជំទាវអភិបាល នៃគណៈអភិបាលខេត្ត លោកអន សុធារិទ្ធ អភិបាលរងខេត្ត និងជាប្រធានលេខាធិការដ្ឋានគណៈកម្មាធិការគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា ខេត្តកោះកុង បានដឹកនាំក្រុមការងារខេត្ត និងមានការចូលរួមពីមន្ទីរជំនាញ ស្ថាប័នពាក់ព័ន្ធ និងរដ្ឋបាលស្រុកកោះកុង ឃុំជ្រោយប្រស់ បានចុះពិនិត្យស្ថានភាពឆ្នេរសមុទ្រ ការងារអនាម័យ បរិស្ថាន និងទេសចរណ៍នៅតំបន់ខាងលើនេះ។

ក្រោយការចុះពិនិត្យស្ថានភាពឆ្នេរទី៣ កោះកុងក្រៅ ក្រុមការ​ងារបានពិនិត្យឃើញថា មានការសម្អាតសំរាម និងមានការរៀបចំបន្ទប់ទឹក កន្លែងងូតទឹកសាប និងកន្លែងបោះតង់ ក្នុងនោះគឺនៅសល់សំរាមតិចតួចតាមឆ្នេរ ដែលនាំមកពីសមុទ្រ។

បន្ទាប់ពីការចុះពិនិត្យ និងប្រជុំពិភាក្សា ជាមួយកងកម្លាំងប្រចាំការនៅឆ្នេរសមុទ្រទី៣ កោះកុងក្រៅ គឺតាមបណ្តោយឆ្នេរសមុទ្រ នៃកោះកុងក្រៅ មិនមានប្រព័ន្ធទូរស័ព្ទនោះទេ និងជាលទ្ធផលលោកប្រធានគណៈកម្មាធិការ គ.អ.ឆ.ក ខេត្តកោះកុង បានដាក់ចេញទិសដៅចំនួន៣ ដូចជា​ទី ១.អាជ្ញាធរស្រុក ឃុំ សហគមន៍ និងសេវាករ ត្រូវរៀបចំឱ្យមានការគ្រប់គ្រងសំរាម សំណល់រឹង ពិសេសសំរាមប្លាស្ទិកឱ្យបានល្អប្រសើរ នៅតាមឆ្នេរសមុទ្រនានានៃកោះកុងក្រៅ។

ទី២ ស្នើទៅស្ថាប័នពាក់ព័ន្ធ ដើម្បីរៀបចំឱ្យមានការសិក្សាលើការតម្លើងអង់តែនប្រព័ន្ធទូរស័ព្ទ នៅកោះកុងក្រៅ និងទី៣ រាល់សេវាកម្មនានា នៅតាមឆ្នេរសមុទ្រ នៃកោះកុងក្រៅ ត្រូវឱ្យមានតម្លៃសមរម្យ និងចេញជាតារាងតម្លៃត្រឹមត្រូវ។

គណៈកម្មាធិការគ្រប់គ្រង និងអភិវឌ្ឍតំបន់ឆ្នេរសមុទ្រកម្ពជា ខេត្តកោះកុង ក៏បានបោះបង្គោលព័ត៍មាន ក្រមប្រតិបត្តិឆ្នេរសមុទ្រ Beach Code of Conduct និងស្នើសុំខាងក្រុមហ៊ុនសេវាកម្មទេសចរណ៍ ភ្ញៀវទេសចរ និងអ្នកមកលេងកម្សាន្តតាមបណ្តារឆ្នេរនានានៃកោះកុងក្រៅ សូមចូលរួមទុកដាក់សំរាមឱ្យបាមត្រឹមត្រូវ កាត់បន្ថយសំរាមប្លាស្ទិក និងអនុវត្តន៍ក្រមប្រតិបត្តិឆ្នេរសមុទ្រឱ្យបានល្អប្រសើរ៕

ដោយ: គង់ លាងហួរ

អន្តរជាតិ: មូលនិធិរូបិយវត្ថុអន្តរជាតិ (IMF)  បានបង្កើនការព្យាករណ៍ សម្រាប់កំណើនសេដ្ឋកិច្ចរបស់ពិភពលោក នៅក្នុងឆ្នាំ២០២៤នេះ ដោយលើកឡើងពីការថយចុះ នៃអត្រាអតិផរណាលឿនជាងការរំពឹងទុក។

លោក Pierre-Olivier Gourinchas ប្រធានសេដ្ឋវិទូរបស់ IMF  បានលើកឡើងថា បច្ចុប្បន្នភាពទស្សនវិស័យ សេដ្ឋកិច្ចពិភពលោករបស់យើងបានបង្ហាញថា “ការថយចុះនៃសេដ្ឋកិច្ចបានកើតឡើងក្នុង រយៈពេលខ្លី ប៉ុន្តែកំណើនសេដ្ឋកិច្ចទាំងមូល និងពាណិជ្ជកម្មសកលនៅតែមានកម្រិតទាប ជាងមធ្យមភាគប្រវត្តិសាស្ត្រដដែល”។

លោកបានបន្តថា “សេដ្ឋកិច្ចពិភពលោក បានបន្តបង្ហាញភាពធន់គួរឱ្យកត់សម្គាល់ ដោយសារអតិផរណាបានធ្លាក់ចុះជាលំដាប់ ហើយកំណើនសេដ្ឋកិច្ចកំពុងកើនឡើង”។ នេះបើយោងតាមការចុះផ្សាយដោយសារពត៌មាន Reuters។

ប៉ុន្តែលោកបានព្រមានថា មូលដ្ឋាននៃកំណើនមានសភាពយឺតយ៉ាវ ហើយហានិភ័យនៅតែកើតមាន ដូចជា ភាពតានតឹងភូមិសាស្ត្រនយោបាយនៅតំបន់មជ្ឈិមបូព៌ា និងការវាយប្រហារនៅសមុទ្រក្រហ​ម ដែលអាចរំខានដល់តម្លៃទំនិញ និងខ្សែសង្វាក់ផ្គត់ផ្គង់។

មូលនិធិ IMF បានបន្តថា ទស្សនវិស័យវិជ្ជមានសម្រាប់សេដ្ឋកិច្ចសកល ត្រូវបានជំរុញគាំទ្រ តាមរយៈការចំណាយឯកជន និងសាធារណៈកាន់តែច្រើន ក៏ដូចជាការកើនឡើង នៃការចូលរួមកម្លាំងពលកម្ម ការកែសម្រួលខ្សែសង្វាក់ផ្គត់ផ្គង់  គួបផ្សំនឹងការថយចុះនៃតម្លៃថាម​ពល និងទំនិញ។

នៅពេលនេះ មូលនិធិ IMF បានបង្កើនការព្យាករណ៍សម្រាប់កំណើនសេដ្ឋកិច្ចពិភពលោកក្នុងឆ្នាំ២០២៤ កើនឡើងដល់៣,១ភាគរយ បើធៀបនឹងការព្យាករណ៍ពីមុនក្នុងរង្វង់២,៩ភាគរយ។ សម្រាប់ឆ្នាំ២០២៥ខាងមុខ មូលនិធិ​IMF បានរក្សាការព្យា​ករណ៍កំណើនសេដ្ឋកិច្ចពិភពលោក ក្នុងកម្រិត៣,២ភាគរយដដែល៕

        ដោយៈ គង់ សូរិយា

        ភ្នំពេញៈ មន្រ្តីជាន់ខ្ពស់កម្ពុជា និងសមាគមធុរកិច្ចកូរ៉េបានរៀបចំ វេទិកាជំរុញ និងទាក់ទាញវិនិយោគកម្ពុជា- កូរ៉េ នឹងពាំនាំមកនូវផ្លែផ្កាវិជ្ជមាន សម្រាប់រុញច្រានរំហូរវិនិយោគពីកូរ៉េ មកកាន់កម្ពុជាឱ្យកាន់​តែមានកំណើនគួរឱ្យកត់សម្គាល់។

កាលពីព្រឹកថ្ងៃទី៦ ខែកុម្ភៈ ឆ្នាំ២០២៤ លោកសួន សុផល អគ្គលេខាធិការរង គណៈកម្មាធិការវិនិយោគកម្ពុជា (គ.វ.ក.) បានដឹកនាំក្រុមការងារទទួលជួបពិភាក្សា ការងារជាមួយទីភ្នាក់ងារជំរុញវិនិយោគ និងពាណិជ្ជកម្មកូរ៉េ (KOTRA) តំណាងដោយ លោក Hacheong Yun អគ្គនាយកKOTRAភ្នំពេញ ក្នុងគោលបំណងពិភា​ក្សាអំពីកិច្ចសហប្រតិបត្តិការ ចំពោះមុខពាក់ព័ន្ធនឹងសកម្មភាពជំរុញ និងទាក់ទាញវិនិយោគមកកាន់ទឹកដី នៃព្រះរាជាណាចក្រកម្ពុជា។

លោកសួន សុផលបានរំលឹកឡើងវិញអំពីអត្ថិភាពនៃតុវិនិយោគកូរ៉េ (Korea Desk) ដែលជាមរតកដ៏មានតម្លៃ នៃកិច្ចសហប្រតិបត្តិការរវាងក្រុមប្រឹក្សាអភិវឌ្ឍន៍កម្ពុជា និងរដ្ឋាភិបាលនៃសាធារណរដ្ឋកូរ៉េ ពាក់ព័ន្ធនឹងកិច្ចការវិនិយោគឯកជន។

បន្ថែមពីនេះ លោកក៏បានថ្លែងអំណរគុណ ជូនចំពោះភាគីមិត្តដែលមានបំណងរៀបចំវេទិកាជំរុញ និងទាក់ទាញវិនិយោគមកកាន់កម្ពុជានាពេលដ៏ខ្លីខាងមុខ សំដៅបញ្ជ្រាបការឈ្វេងយល់ ដល់ធុរជន និងវិនិយោគិនកូរ៉េអំពីកាលានុវត្តភាព និងបរិយាកាសវិនិយោគនៅកម្ពុជា។

ជាមួយគ្នានេះ លោកមានសុទិដ្ឋិនិយមថាវេទិកា នាពេលខាងមុខនឹងពាំនាំមកនូវផ្លែផ្កាវិជ្ជមាន សម្រាប់រុញច្រានរំហូរវិនិយោគពីកូរ៉េមកកាន់កម្ពុជា ឱ្យកាន់តែមានកំណើនគួរឱ្យកត់សម្គាល់។

ជាការឆ្លើយតប សមភាគីបានសម្តែងនូវការពេញចិត្ត ជូនចំពោះក្រុមប្រឹក្សាអភិវឌ្ឍន៍កម្ពុជា ដែលជានិច្ចកាលតែងតែផ្តល់កិច្ចសហការយ៉ាងជិតស្និទ្ធ ក្នុងការរៀបចំសកម្មភាពគាំទ្រនានា។ ក្នុងស្មារតីនេះ សមភាគី បានបង្ហាញជំនឿចិត្តយ៉ាងមុតមាំថា ផែនការសកម្មភាពជំរុញ និងទាក់ទាញវិនិយោគ នឹងសម្រេចជោគជ័យតាមការគ្រោងទុក៕

ដោយ: គង់ លាងហួរ

អន្តរជាតិ: យោងតាមប្រភពសារពត៌មាន BBC បានចុះផ្សាយថា ប្រទេសអង់គ្លេសគ្រោង នឹងសាងសង់អគារខ្ពស់កប់ពពកមួយទៀត ដែលមានកំពស់ស្មើនឹងអគារThe Shard។

កំពស់អគារ One Undershaft នឹងលូតឡើងដល់៧៤ជាន់។ នេះបើយោងតាមផែនការ ដែលបានកែសម្រួល និងត្រូវបានដាក់ជូនទៅកាន់ទីភ្នាក់ងាររដ្ឋាភិបាល “City of London Corporation”ដើម្បីអនុម័ត។

យោងតាមសំណើ ដែលត្រូវបានធ្វើវិសោធនកម្ម ទម្រង់អាគារនេះរួមមាន ការរចនាអគារជាថ្នាក់ៗ ជំនួសឱ្យការរចនាអគារជារាងចតុកោណ ខណៈដំបូងឡើយ អគារនេះបានទទួលការអនុម័តឱ្យសាងសង់ក្នុងឆ្នាំ២០១៦។នៅក្រោមផែនការថ្មីនេះ អ្នកអភិវឌ្ឍន៍គ្រោងសាងសង់អគារនេះឱ្យខ្ពស់ជាងផែនការពីមុនបន្តិច ដែលនឹងធ្វើឱ្យវាក្លាយជាអគារខ្ពស់ជាងគេបំផុតទី១ របស់ទីក្រុងឡុងដិ៍  ជាមួយនឹងកំពស់៣០៩,៦ម៉ែត្រ ដែលស្មើនឹងអគារ The Shard ។

អគារ One Undershaft នឹងត្រូវបានសាងសង់នៅចន្លោះអគារ Gherkin និងអគារ Cheesegrater ដែលធ្វើឱ្យវាក្លាយជាអគារខ្ពស់បំផុត នៅក្នុងសង្កាត់ហិរញ្ញវត្ថុរបស់ទីក្រុងឡុងដិ៍ ខណៈការសាងសង់នឹងចាប់ផ្តើមឡើង បន្ទាប់ពីការកម្ទេចចោលអគារ Aviva Tower ដែលមានស្រាប់។

ប្រសិនបើផែនការដែលបានធ្វើវិសោធនកម្មរួច ត្រូវបានអនុម័តដោយរដ្ឋាភិបាល នៅក្នុងខែឧសភាខាងមុខ នោះ អគារខ្ពស់កប់ពពកមួយនេះ នឹងត្រូវបញ្ចប់ការសាងសង់រួចរាល់ជាស្ថាពរ នៅត្រឹមឆ្នាំ២០៣០។

អគារ One Undershaft គ្រោងនឹងចំណាយថវិកាសាងសង់ប្រមាណ៥០១,៨លានដុល្លារអាមេរិក ដែលអភិវឌ្ឍឡើងដោយក្រុមហ៊ុនសិង្ហបុរី ឈ្មោះ Perennial Group និងរចនាដោយស្ថាបត្យករដ៏ល្បីឈ្មោះ គឺលោកEric parry៕