ដោយ: គង់ លាងហួរ

អន្តរជាតិ: ក្រុមហ៊ុនអភិវឌ្ឍអចលនទ្រព្យឧស្សាហកម្ម Pinthong Industrial Park Plc (PIN) បានបង្ហាញសញ្ញាសុទិដ្ឋិនិយមថា ការលក់ដីរបស់ខ្លួននៅក្នុងខេត្ត Chon Buri និង Rayong នឹងកើនឡើងដល់៦៧,២ហិកតា ដែលជំរុញដោយការវិនិយោគ ពីប្រទេសចិនក្នុងការផលិតរថយន្តអគ្គិសនី (EV)។

កំណើននៃការលក់ដី បានកើតឡើងស្របពេលដែលរដ្ឋាភិបាលបន្តលើកកម្ពស់ការផលិត និងការប្រើប្រាស់រថយន្តអគ្គិសនី(EV) តាមរយៈការកាត់បន្ថយពន្ធ និងការឧបត្ថម្ភធននៅឆ្នាំ២០២៣នេះ។

លោក Pira Patamavorakulchai នាយកប្រតិបត្តិនៃក្រុមហ៊ុន PIN បានមានប្រសាសន៍ថា “ការវិនិយោគពីឧស្សាហកម្មផ្សេងទៀត រួមទាំងការអភិវឌ្ឍន៍មជ្ឈមណ្ឌលទិន្នន័យ ក៏ត្រូវបានរំពឹងថានឹងជំរុញការលក់ដីឧស្សាហកម្មផងដែរ”។

លោកបានមានប្រសាសន៍ថា “រដ្ឋាភិបាលថៃ និងចិនបានបើកប្រទេ​សរបស់ពួកគេ ហើយនេះបានដើរតួយ៉ាងសំខាន់ ក្នុងការគាំទ្រដល់ការវិនិ​យោគបន្ថែមទៀតនៅក្នុងប្រទេសថៃ”។

លោក Pira បានបន្តថា កំណើននៃការលក់ដីធ្លី រួមជាមួយនឹងប្រភពចំណូលផ្សេងទៀត រួមទាំងអាជីវកម្មរបស់ខ្លួនដែលជួលរោងចក្រ និងឃ្លាំងស្តុកទំនិញ នឹងធ្វើឱ្យក្រុមហ៊ុនរីកចម្រើនបន្ថែមទៀតនៅឆ្នាំនេះ។

នៅក្នុងឆ្នាំ២០២២ ប្រាក់ចំណូលសរុបរបស់ក្រុមហ៊ុន បានកើនឡើង៩៤ភាគរយ ពីមួយឆ្នាំទៅមួយឆ្នាំ ដល់១,១ពាន់លានបាត ខណៈដែលប្រាក់ចំណេញ បានកើនឡើង១២៥ភាគរយ ពីមួយឆ្នាំទៅមួយឆ្នាំ ដល់៣២៥លានបាត។

លោក Pira បានវាយតម្លៃថា “ដំណើរការអាជីវកម្មដ៏រ៉ឹងមាំនេះ បណ្តាលមកពីការកើនឡើង នៃការលក់ដីឧស្សាហកម្ម និងប្រាក់ចំណូលពីអាជីវកម្មរោងចក្រ និងឃ្លាំង ព្រមទាំងសេវាកម្មហេដ្ឋារចនាសម្ព័ន្ធផងដែរ”៕

ដោយៈ សុផារី

កំពង់ធំៈ ខេត្តកំពង់ធំជាខេត្ត ដែលមានទីក្រុងជាប់ដងទន្លេ ហើយនៅក្នុងឆ្នាំ២០២៣នេះ កំពង់ធំត្រូវបានជ្រើសរើសជាខេត្ត សម្រាប់រៀបចំបុណ្យទន្លេលើកទី៧។

តាមរយៈព្រឹត្តិការណ៍កម្រិតជាតិនេះ អ្នកជំនាញមូលដ្ឋានបានបង្ហាញក្តីសង្ឃឹមនៃលំហូរវិនិយោគិនលើទីផ្សារអចលនទ្រព្យ នៅក្នុងខេត្តមួយនេះ។

លោក ថោង ខុន រដ្ឋមន្ត្រីក្រសួងទេសចរណ៍ បានឱ្យដឹងថា ពិធីបុណ្យទន្លេលើកទី៧នេះ គឺមានគោលបំណងជំរុញលើកតម្លៃ និងផ្សព្វផ្សាយសក្តានុពលទេសចរណ៍ខេត្តនានាតាមដងទន្លេ ជាពិសេសលើកទឹកចិត្តដល់ប្រជាជននៅតាមបណ្តាខេត្តទាំងនោះ ឱ្យចូលរួមយ៉ាងសកម្ម ក្នុងការអភិវឌ្ឍទីក្រុង​ជាប់ដងទន្លេ ការងារអភិវឌ្ឍទេសចរណ៍សហគមន៍។

លោកចាន់ ចំណាន ប្រធានសាខាក្រុមហ៊ុនCentury 21 Zillion Holding ប្រចាំខេត្តកំពង់ធំ មានប្រសាសន៍ នៅព្រឹកថ្ងៃទី២៨ ខែកុម្ភៈ ឆ្នាំ២០២៣នេះថា ដោយសារការរៀបចំបុណ្យទន្លេនេះ ទីផ្សារអចលនទ្រព្យរំពឹងថា នឹងផ្តល់ជាសញ្ញាល្អប្រសើរ ក្នុងការទាក់ទាញវិនិយោគិន ពីបណ្តាខេត្តក្រុងផ្សេងមកកាន់ខេត្តកំពង់ធំ ហើយជះផលវិជ្ជមានដល់សន្ទុះតម្លៃដីធ្លីក្នុងខេត្ត។

លោក ចំណាន បានបន្តថា “ក្នុងរយៈពេលប៉ុន្មានខែចុងក្រោយនេះ សកម្មភាពសាងសង់ អភិវឌ្ឍន៍លំនៅឋានក្នុងខេត្តកំពង់ធំ មានភាពល្អប្រ​សើរច្រើន បើទោះបីជាមិនសូវច្រើនដូចមុនវិបត្តិក្តី”។

លោកយល់ថា ការរៀបចំបុណ្យទន្លេ គឺជាគោលនយោបាយមួយរបស់រាជរដ្ឋាភិបាល ក្នុងការទាក់ទាញទេសចរជាតិ និងអន្តរជាតិមកទស្សនាកំសាន្ត និងជំរុញការចាយវាយនៅក្នុងខេត្ត។

លោកចាន់ ចំណានបានបន្តទៀតថា ចរន្តសេដ្ឋកិច្ច ក៏ជាក្តីសង្ឍឹមដល់ទីផ្សារអចលនទ្រព្យផងដែរ ជាពិសេសលើទីផ្សារដីធ្លី ដែលស្ថិតនៅទ្រឹងរយៈពេលប៉ុន្មានឆ្នាំចុងក្រោយនេះ។ ពិធីបុណ្យនេះក៏ជាចលករមួយ ដែលនាំឱ្យខេត្តកំពង់ធំមានការរីកចម្រើន លើប្រព័ន្ធហេដ្ឋារចនាសម្ព័ន្ធមូលដ្ឋាន ដូចជា ផ្លូវថ្នល់ ទឹក ភ្លើង ។ល។ ហើយអាចទាក់ទាញវិនិយោគិន មកវិនិយោគក្នុងខេត្តបាន។

អ្នកនាង សរ រស្មី ប្រជាពលរដ្ឋមួយរូប ដែលរស់នៅតាមបណ្តោយផ្លូវជាតិលេខ៦ ក្នុងខេត្តកំពង់ធំ បានមានប្រសាសន៍ប្រាប់ Property Area នៅរសៀលថ្ងៃទី២៦ ខែកុម្ភៈកន្លងមកថា ការរៀបចំបុណ្យទន្លេនៅក្នុងខេត្តនាពេលខាងមុខនេះ នឹងធ្វើឱ្យខេត្តមានភាពអ៊ូអរជាងមុន ហើយលោកស្រីសង្ឃឹមថា អាជីវកម្មរបស់លោកស្រី និងគ្រួសារនឹងលក់ដាច់ច្រើន ដោយសា​រមានភ្ញៀវទេសចរជាតិ និងអន្តរជាតិមកទស្សនាកំសាន្ត។

ឆ្លើយតបនឹងសំណួរថា តើមានការអភិវឌ្ឍច្រើនដែរឬទេ នៅក្នុងរយៈពេលប៉ុន្មានឆ្នាំចុងក្រោយនេះ លោកស្រីបានបញ្ជាក់ប្រាប់ថា ដោយសារតែវិបត្តិកូវីដ១៩ លោកស្រីសង្កេតឃើញថា គម្រោងបុរី ឬដីឡូតិ៍មានភាពស្ងប់ស្ងាត់ច្រើនជាងមុនវិបត្តិ ប៉ុន្តែក៏មានប្រជាជនមកពីបណ្តាខេត្តផ្សេងជាច្រើនបានមកទិញ ឬសាងសង់លំនៅឋាន ដើម្បីប្រកបអាជីវកម្មផងដែរ។

ពីធីបុណ្យទន្លេលើកទី៧ នឹងប្រព្រឹត្តទៅចាប់ពីថ្ងៃទី៨-១០ ខែមីនា ឆ្នាំ២០២៣ ក្រោមប្រធានបទ “ទន្លេរបស់យើង ដើម្បីបច្ចុប្បន្ន និងអនាគត” (Our River for Now and Next) ក្រោមកិច្ចសហការរៀបចំរបស់គណៈកម្មការអន្តរក្រសួង ដើម្បីរៀបចំពិធីបុណ្យទន្លេលើកទី៧ នៅខេត្តកំពង់ធំ។

ពិធីបុណ្យទន្លេលើកទី៧ ដែលគ្រោងធ្វើឡើងនៅខេត្តកំពង់ធំនោះ គឺ ផ្តោតសំខាន់ លើការអប់រំផ្សព្វផ្សាយពីវិស័យទេសចរណ៍ ផ្សារភ្ជាប់ជាមួយវប្បធម៌ អរិយធម៌ ប្រវត្តិសាស្ត្រ បរិស្ថាន និងការរស់នៅរបស់ប្រជាជននៅតាមដងទន្លេ ស្ទឹងក្នុងតំបន់ ព្រមទាំងផ្សព្វផ្សាយពីព្រឹត្តិការណ៍កីឡាស៊ីហ្គេម៕

  ដោយៈ ជេស៊ីកា

       កណ្តាលៈ សិក្សាជំនាញផ្នែកអភិវឌ្ឍន៍ទីក្រុង លោកឌិន សុមេធារិទ្ឋម្ចាស់គំរោងភូមិផ្កាត្រកួន និងជាអ្នកជំនាញក្នុងវិស័យទេសចរណ៍ផងនោះ បាន និងកំពុងប្រែក្លាយរមណីយដ្ឋាននេះ ក្លាយជាផលិតផលទេសចរណ៍ផងដែរ។

ជាមួយនឹងផែនការអភិវឌ្ឍន៍ដោយនិរន្តរភាព ផ្សារភ្ជាប់ការរស់នៅជាមួយបរិស្ថានស្រស់បំព្រង និងបឹងដែលផ្តល់នូវសំណើម ខ្សល់ និងសីតុណ្ហភាពត្រជាក់ លោកឌិន សុមេធារិទ្ឋ កំពុងរៀបចំផែនការបន្ថែម និងធ្វើឡើង ស្របតាមនិយមន្នាការនៃរសនិយមសម័យថ្មី ដោយផ្សារភ្ជាប់អ្នកមានជីវភាពធូរធារនៅទីក្រុង ជាមួយអ្នកជនបទ តាមរយៈការបង្កើតផ្សារសហគមន៍មួយ ដែលអ្នកទីក្រុងអាចទិញបន្លែ ត្រីសាច់ ធម្មជាតិនៅពេលពួកគេវិលត្រលប់មកកាន់រាជធានីភ្នំពេញវិញ។

សហស្ថាបនិក និងជាអគ្គនាយកគេហទំព័រPropertyarea.asia លោកយិ​ន លាងគង់ ដែលបានទៅកំសាន្តនៅតំបន់នេះ នាពេលថ្មីៗនេះបាននិយាយថា “ញាំនំ “កង” ខ្ញុំនឹកឃើញកាលពីស្ថិតក្នុងវ័យកុមារ” ទីកន្លែងនេះ បានធ្វើឲ្យខ្ញុំនឹកឃើញពីជីវិតក្រីក្រនាពេលកុមារភាព ក្រោយរបបខ្មែរក្រហមបញ្ចប់ទៅ។

សម្លឹងទៅកាន់បឹងទឹកថ្លាឆ្វេង មើលឃើញដល់បាតបឹង និងគយគន់ផ្ទះជាជួរ ដែលសាងសង់ឡើងតាមរសនិយមរបស់ម្ចាស់ដីម្នាក់ៗ លោកយិន លាងគង់បានលាន់មាត់ថា “ជីវិតស៊ីវិល័យ តែងតែផ្សារភ្ជាប់ជាមួយធម្មជាតិ” ខ្ញុំស្រម័យចង់បានផ្ទះបែបនេះ ដើម្បីអាចធ្វើឲ្យខ្ញុំនឹកឃើញអនុស្សាវរីយ៍ និងផ្ទះឪពុកខ្ញុំនៅស្រុកកំណើត”។

មែនទែនទៅ រៀងរាលចុងសប្តាហ៍ភូមិផ្កាត្រកួន បានក្លាយជាទីលំហែរ និងសម្រាកកាយរបស់ក្រុមអភិជនមួយក្រុម ដែលស្រលាញ់ជីវិតស្ងប់ស្ងាត់ និងរស់នៅជាមួយធម្មជាតិ ប៉ុន្តែជាមួយគ្នានេះ សាធារណៈជនក៏អាចចូលទស្សនា ស្ទូចត្រី អាំងសាច់ បោះតង់ ជិះទូកតូចៗជាមួយកូនៗកំសាន្តបានផងដែរ។

ភូមិផ្កាត្រកួន មានចម្ងាយជាង២០គីឡូម៉ែត្រប៉ុណ្ណោះ ពីរាជធានីភ្នំ​ពេញ ដែលពេលអនាគតតំបន់នេះ នឹងអាចកាត់ចូលក្នុងដែនរដ្ឋបាលរាជធានីភ្នំពេញ។ នេះបើយោងតាមផែនការមេអភិវឌ្ឍន៍ដីរបស់រដ្ឋាភិបាល ឆ្នាំ២០២២​ ២០៣៥ ដែលរាជធានីភ្នំពេញ នឹងត្រូវពង្រីកក្នុងកាំរង្វង់៣០គីឡូម៉ែត្រក្រឡា។

កាលពីពេលថ្មីៗនេះ លោកឌិន សុមេធារិទ្ឋ ទើបបង្ហាញគំរោងអភិវឌ្ឍន៍ដ៏ទាក់ទាញមួយទៀត ដែលបានដាក់ឈ្មោះ “ផ្ទះលំហែរកោះទេពនិម្មិត” នាភូមិផ្កាត្រកួន ដែលគំរោងនេះមានទំហំដីប្រមាណ៣ហិកតា។

គំរោងថ្មីនេះ បាននិងកំពុងគិតគូ និងរៀបចំឡើងតាមរសនិយមនៃជីវិតទាន់សម័យ ដោយអ្នកអភិវឌ្ឍន៍នៅតែផ្សារភ្ជាប់សំណង់ “បែបសហសម័យ ជាមួយនឹងធម្មជាតិ ដែលនេះជានិន្នាការរស់នៅបន្សាំ នឹងលក្ខខ័ណ្ឌប្រែប្រួលអាកាសធាតុ។

លោកសាស្រ្តាចារ្យទួល សាភឿនស្ថាបត្យករដ៏ល្បីមួយរូបបានមានប្រសាសន៍ឲ្យដឹងកាលពីពេលថ្មីៗនេះ និងបង្ហាញផ្ទះគំរូ នៅលើបណ្តាញទំនាក់ទំនងផ្លូវការរបស់ខ្លួនថា លំនៅដ្ឋានដែលអាចសមស្របសម្រាប់ការរស់នៅ ក្នុងបរិបទនៃការប្រែប្រួលអាកាសធាតុ ជាលំនៅដ្ឋានដែលផ្សារភ្ជាប់ជាមួយនឹងបរិសស្ថាន ទឹក ដើមឈើ និងបង្អួចធំៗ ដែលអនុញ្ញាត្តឲ្យខ្យល់ចេញចូលគ្រប់គ្រាន់់។

លើសពីនេះ លោកឌិន សុមេធារិទ្ឋ បាននិងកំពុងអភិវឌ្ឍន៍ភូមិផ្កាត្រកួន មិនត្រឹមតែក្នុងបរិបទកម្ពុជាប៉ុណ្ណោះទេ ប៉ុន្តែសមស្របនឹងគោលដៅ ប្រែក្លាយតំបន់នេះជាសហគមន៍ថ្មី ដែលមានទាំងរមណីយដ្ឋាន ផ្ទះលំហែរ កន្លែងសម្រាប់សាធារណៈជន និងមានបុរី នៅជាប់នឹងគំរោងនេះ ដែលអ្នកទិញផ្ទះក្នុងគំរោងអាចប្រកបអាជីវកម្ម និងរស់នៅប្រកបដោយផាសុខភាពផងដែរ៕

 ដោយៈ ច្រាយ ចំណាន

       តាកែវៈ បន្ទាប់ពីបញ្ចប់ការសាងសង់ខ្លោងទ្វារ ចូលគំរោងកាលពីពេលថ្មីៗនេះ នៅពេលនេះក្រុមហ៊ុនYoungsia Real Estateបាននិងកំពុងត្រៀមសាងសង់ សួនទឹកលំហែរដ៏ធំក្នុងគំរោងនេះ នៅក្នុងខែមិនា ខាងមុខនេះ។

គំរោងដែលស្ថិតនៅតំបន់ប្រជុំចម្រុះ ដោយរមណីយដ្ឋានធម្មជាតិ និងរមណីយដ្ឋានកែច្នៃ ដូចជា រមណីយដ្ឋានកំពូលពេជ្រ រមណីយដ្ឋានត្រីមាស “គំរោងឋានសួគ៌លំហែរ” នឹងក្លាយជារមណីយដ្ឋានមួយទៀត ដែលចូលរួមចំណែកទាក់ទាញភ្ញៀវទេសចរណ៍ជាតិ អន្តរជាតិទៅទស្សនាតំបន់នេះបន្ថែមទៀត។

ជាមួយនឹងផែនការដាំផ្កាលឿងរាជ២០០០ដើម គំរោងនេះបាននិងកំពុងរៀបចំនូវហេដ្ឋារចនាសម្ព័ន្ឋយ៉ាងលឿន និងរសរវើក ដើម្បីបំពេញបន្ថែ​មនូវទេសភាពជើងភ្នំដ៏ខៀវស្រងាត់ អមជាមួយដំណក់សន្សើមពេលព្រឹកព្រលឹម ដែលធ្វើឲ្យអ្នកសាងសង់ផ្ទះលំហែរ នៅក្នុងគំរោងនេះ ទទួលបានអារម្មណ៍មនោរម្យ ស្រស់ស្រាយ នាពេលព្រឹកព្រលឹម និងអាចគយគន់ទិដ្ឋភាពថ្ងៃរៀបលិចដ៏ស្រស់ស្អាត នាពេលល្ងាចផងដែរ។

អគ្គនាយកក្រុមហ៊ុនYoungsia Real Estate លោកCooler Tanបានមានប្រសាសន៍ថា ជាមួយនឹងផែនការចំពោះមុខ និងឆ្លើយតបនឹងកំនើនតម្រូវការដីលំហែរ កើនឡើងរបស់ប្រជាពលរដ្ឋ ដោយសារជីវភាពួកគាត់កាន់តែប្រសើរឡើង គំរោងឋានសួគ៌លំហែរ ក៏ដូចជាគំរោងផ្សេងៗទៀតរបស់ក្រុមហ៊ុន បានគិតគូជាចម្បងលើហេដ្ឋារចនាសម្ព័ន្ឋ សោភ័ណភាព ដើម្បីធ្វើយ៉ាងណាឲ្យអតិថិជន ទទួលបានដីលំហែរពិតប្រាកដ និងអាចសម្រេចបាននូវក្តីសុបិនសាងសង់ផ្ទះលំហែរ ដែលពួកគេអាចមកកំសាន្តបានរៀងរាល់ចុងសប្តាហ៍។

លោកបន្តថា “យើងមានភាពបត់បែន និងផ្តល់ឲ្យអតិថិជនគ្រប់ស្រ​ទាប់អាចទិញដីលំហែរបាន ជាមួយលក្ខខ័ណ្ឌបង់ប្រាក់ពិសេស ដោយពួកគាត់អាចបង់ប្រាក់ត្រឹម៥០ដុល្លារប៉ុណ្ណោះក្នុងមួយខែ”។ លោកបន្តថា “ពីមុនប្រជាជនគិតធ្វើម៉េច គិតលើបញ្ហាជីវភាពប្រសើរឡើង ហើយពេលនេះជីវភាពពួកគាត់ប្រសើរហើយ ហេតុនេះពួកគាត់ក៏មានតម្រូវការដីលំហែរ សម្រាប់កំសាន្ត”។

ជាមួយគ្នានេះ លោកណុប ម៉ាណុតប្រធានផ្នែកទីផ្សារនៃគំរោងឋានសួគ៌លំហែរបានមានប្រសាសន៍ឲ្យដឹងថា អ្នកទិញដីលំហែរ គួរសិក្សាឲ្យបានម៉ត់ចត់លើគំរោងនិមួយៗ និងប្រវត្តិម្ចាស់គំរោងថា តើពួកគាត់អភិវឌ្ឍន៍ពិតឬគ្រាន់តែបោះបង្គោលចោល។

លោកបន្តថា “គំរោងទាំងអស់របស់ក្រុមហ៊ុនYoungsia Real Estate មិនបានធ្វើឲ្យអតិថិជនខកចិត្តឡើយ ពេលពួកគេមកដល់គំរោង ពួកគេតែងតែកក់ប្រាក់ និងទិញតៗគ្នា”។ លោកបន្តថា “អ្នកអភិវឌ្ឍន៍គំរោងនេះ បានគិតពីនិរន្តរភាពនៃការអភិវឌ្ឍ និងផែនការវិនិយោគ ហេតុនេះទើបគំរោងរបស់ក្រុមហ៊ុន តែងតែទទួលបានការគាំទ្រ ពីប្រជាពលរដ្ឋក្នុងស្រុក និងក្រៅប្រទេស”៕