ភ្នំពេញ៖ ក្រសួងមហាផ្ទៃ បានចេញប័ណ្ណស្នាក់នៅអចិន្ត្រៃយ៍ជូនដល់ជនបរទេសអន្តោប្រវេសន្ត ដែលបានទទួលស្គាល់ដោយក្រសួងមហាផ្ទៃ សម្រាប់ប្រើប្រាស់បម្រើជីវភាពប្រចាំថ្ងៃ ហើយបានជម្រាបក្រសួង ស្ថាប័ន រដ្ឋបាលថ្នាក់ក្រោមជាតិ និងវិស័យឯកជនមួយចំនួន ឱ្យបានជ្រួតជ្រាប និងទទួលស្គាល់តម្លៃក្នុងការប្រើប្រាស់ប័ណ្ណស្នាក់នៅអចិន្ត្រៃយ៍នេះ។

ក្រសួងបានអនុញ្ញាតិឱ្យជនបរទេសអន្តោប្រវេសន្តទទួលបាននូវសេវាសាធារណៈ ដូចជា ការស្នើសុំសេវារដ្ឋបាល សេវាសាធារណៈ សេវាសុខភាព សេវាធនាគារ ការទិញលក់ចលនវត្ថុ អចលនវត្ថុ ការធ្វើអាជីវកម្ម ការស្នើសុំធ្វើការងារតាមរោងចក្រ សហគ្រាស និងសកម្មភាពមួយចំនួនទៀត ដែលច្បាប់អនុញ្ញាតសម្រាប់ជនបរទេស។

ក្រសួងមហាផ្ទៃ បានឱ្យដឹងថា អនុវត្តតាមច្បាប់ស្តីពីអន្តោប្រវេសន៍ដែលប្រកាសឱ្យ ប្រើដោយព្រះរាជក្រមលេខ ០៥ ន.ស/៩៤ ចុះថ្ងៃទី២២ ខែកញ្ញា ឆ្នាំ១៩៩៤ ក្រសួងមហាផ្ទៃ បានចេញប័ណ្ណ ស្នាក់នៅអចិន្ត្រៃយ៍ជូនដល់ជនបរទេសអន្តោប្រវេសន្ត ដែលបានទទួលស្គាល់ដោយប្រកាសរបស់ក្រសួងមហាផ្ទៃ សម្រាប់ប្រើប្រាស់បម្រើជីវភាពប្រចាំថ្ងៃ។

ទន្ទឹមនេះ ក្រសួងមហាផ្ទៃ ក៏បានចេញសេចក្ដីណែនាំលេខ ០១៥ សណន ចុះថ្ងៃទី០១ ខែកក្កដា ឆ្នាំ២០១៩ ស្តីពីការចេញលិខិតរដ្ឋបាល និងលិខិតអត្រានុកូលដ្ឋានឱ្យសហព័ទ្ធជាខ្មែរ កូន និងជនបរទេស អន្តោប្រវេសន្ត ដែលក្នុងសេចក្ដីណែនាំនោះ ក៏មានជម្រាបជូនអំពីតម្លៃប្រើប្រាស់ប័ណ្ណស្នាក់នៅអចិន្ត្រៃយ៍ ដែលក្រសួងបានចេញឱ្យជនបរទេសអន្តោប្រវេសន្តផងដែរ។

ក្រសួងមហាផ្ទៃឱ្យដឹងទៀតថា ដោយបានសង្កេតឃើញថា នៅមានក្រសួង ស្ថាប័ន រដ្ឋបាលថ្នាក់ ក្រោមជាតិ និងវិស័យឯកជនមួយចំនួន ពុំទាន់បានជ្រួតជ្រាប និងទទួលស្គាល់តម្លៃក្នុងការប្រើប្រាស់ប័ណ្ណ ស្នាក់នៅអចិន្ត្រៃយ៍នេះនៅឡើយ ក្រសួងមហាផ្ទៃជូនដំណឹងដល់ក្រសួង ស្ថាប័ន រដ្ឋបាលថ្នាក់ក្រោមជាតិ និងវិស័យឯកជន ដើម្បីទទួលស្គាល់ប័ណ្ណស្នាក់នៅអចិន្ត្រៃយ៍សម្រាប់ជនបរទេសអន្តោប្រវេសន្តនៅក្នុង ប្រទេសកម្ពុជា និងបង្កលក្ខណៈស្របតាមច្បាប់ជាធរមាន៕

ដោយ:  សូរិយា

ភ្នំពេញ៖ រដ្ឋាភិបាលកម្ពុជា និងសហរដ្ឋអាមេរិក បានសម្តែងនូវការប្តេជ្ញាចិត្តបន្តកិច្ចសហការសម្របសម្រួល និងជំរុញសកម្មភាពធុរកិច្ចនិងវិនិយោគ ដើម្បីជំរុញកំណើនសេដ្ឋកិច្ច និងពាណិជ្ជកម្ម រវាងប្រទេសទាំងពីរឱ្យកាន់តែរីកចម្រើនបន្ថែមទៀត។

តាមរយៈជំនួបការងារនៅព្រឹកថ្ងៃទី៣១ ខែសីហា ឆ្នាំ២០២២នេះ រវាងលោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម និងគណៈប្រតិភូសភាសហរដ្ឋអាមេរិក ដែលដឹកនាំដោយ លោកស្រី ខារ៉ូល មីល័រ (Carol Miller) សមាជិកសភាសហរដ្ឋអាមេរិកប្រចាំរដ្ឋ West Virginia ក្នុងគោលបំណងឈ្វេងយល់ពីកាលានុវត្តភាពវិនិយោគនៅកម្ពុជា និងសំដៅពង្រឹងកិច្ចសហប្រតិបត្តិការពាណិជ្ជកម្មទ្វេភាគីរវាងប្រទេសទាំងពីរ។

លោករដ្ឋមន្រ្តី បានសម្តែងការស្វាគមន៍យ៉ាងកក់ក្តៅចំពោះគណៈប្រតិភូ ព្រមទាំងសហការី ដែលបានអញ្ជើញមកធ្វើទស្សនកិច្ចដោយផ្ទាល់នៅក្រសួង និងបានថ្លែងអំណរគុណចំពោះរដ្ឋាភិបាលសហរដ្ឋអាមេរិក ក្នុងការផ្តល់នូវវ៉ាក់សាំងប្រឆាំងកូវីដ-១៩ ប្រមាណជាង៣លានដូស ដល់ប្រជាជនកម្ពុជា ដែលនេះជាការរួមចំណែកយ៉ាងសំខាន់ដល់ការបើកសកម្មភាពសេដ្ឋកិច្ច និងសង្គមកម្ពុជាឡើងវិញ។

ជាមួយគ្នានេះ លោករដ្ឋមន្រ្តី បានជម្រាបជូនអំពីវឌ្ឍនភាពជោគជ័យនៃការរៀបចំកិច្ចប្រជុំអាស៊ាន ដែលកម្ពុជាធ្វើជាប្រធាន និងកិច្ចប្រជុំពាក់ព័ន្ធនានា ជាពិសេសការត្រៀមកិច្ចប្រជុំរដ្ឋមន្រ្តីសេដ្ឋកិច្ចអាស៊ានលើកទី៥៤ នៅសៀមរាប នាពេលខាងមុខនេះ។

លោកក៏បានលើកឡើងផងដែរ អំពីទំហំពាណិជ្ជកម្មកម្ពុជា-អាមេរិក ដែលមានការកើនឡើងយ៉ាងល្អប្រសើរ ទោះបីស្ថិតក្នុងវិបត្តិកូវីដ-១៩ ក៏ដោយ។ លើសពីនេះ លោកបានជម្រាបជូនជាសង្ខេបពីគោលនយោបាយយុទ្ធសាស្ត្រចតុកោណរបស់រាជរដ្ឋាភិបាលកម្ពុជា និងក្របខ័ណ្ឌច្បាប់នានាដែលគាំទ្រដល់ការធ្វើពាណិជ្ជកម្ម និងវិនិយោគនៅកម្ពុជា ប្រកបដោយភាពប្រកួតប្រជែងខ្ពស់ ដើម្បីឈានដល់ការសម្រេចគោលដៅក្លាយជាប្រទេសមានចំណូលខ្ពស់នៅឆ្នាំ២០៥០។

ជាងនេះទៅទៀត លោករដ្ឋមន្រ្តី បានលើកឡើងពីអត្ថប្រយោជន៍ ដែលកម្ពុជាទទួលបានពីប្រព័ន្ធអនុគ្រោះពន្ធទូទៅ (GSP) របស់សហរដ្ឋអាមេរិក ដែលបានទាក់ទាញរោងចក្រផលិតសម្ភារៈធ្វើដំណើរជាច្រើនមកកម្ពុជា និងបានបង្កើតការងារជាច្រើនដល់ប្រជាជនកម្ពុជា។

លោកបានស្នើឱ្យសមាជិកសភាសហរដ្ឋអាមេរិកជួយគាំទ្រ និងបន្តផ្តល់ប្រព័ន្ធអនុគ្រោះពន្ធទូទៅ (GSP) របស់សហរដ្ឋអាមេរិកដល់កម្ពុជាបន្តទៀត ព្រមទាំងបានបញ្ជាក់ពីតម្រូវការចាំបាច់របស់កម្ពុជានាពេលបច្ចុប្បន្ន ក្នុងការអភិវឌ្ឍលើវិស័យបច្ចេកវិទ្យា ស្របតាមបរិបទថ្មីនៃសង្គមឌីជីថល រួមមាន បច្ចេកវិទ្យាថ្មីៗ អ្នកបច្ចេកទេស និងការអភិវឌ្ឍធនធានមនុស្ស ជាដើម។

ជាការឆ្លើយតប ភាគីសហរដ្ឋអាមេរិក បានថ្លែងអំណរគុណយ៉ាងក្រៃលែងដល់ លោករដ្ឋមន្រ្តី ព្រមទាំងថ្នាក់ដឹកនាំនៃក្រសួងពាណិជ្ជកម្ម ដែលបានទទួលគណៈប្រតិភូយ៉ាងកក់ក្តៅ និងបានសម្តែងចំណាប់អារម្មណ៍ចំពោះបរិយាកាសធុរកិច្ច និងវិនិយោគនៅកម្ពុជា លើវិស័យសំខាន់ៗមួយចំនួន និងស្វែងយល់ពីសក្តានុពលរបស់កម្ពុជា និងកិច្ចការនានា ដែលសហរដ្ឋអាមេរិកអាចជួយជ្រោមជ្រែងដល់ការអភិវឌ្ឍសេដ្ឋកិច្ចរបស់កម្ពុជា៕

ដោយ៖ សុផារី

ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអំពាវនាវឱ្យប្រជាជនចាកចេញពីចម្ការលោក ខឹម វាសនា និងបានដាក់បញ្ជាដល់អភិបាលខេត្តសៀមរាប លោក ទៀ សីហា ឱ្យត្រៀមមធ្យោបាយដឹកជញ្ជូនប្រជាពលរដ្ឋ ដែលចាញ់បោកលោក ខឹម វាសនា ហើយគ្មានលទ្ធភាពត្រលប់ទៅខេត្តរបស់ពួកគេវិញ។

ក្នុងពិធីបើកការដ្ឋានសាងសង់ស្ពានអាកាសថ្មីចំនួន២ នៅរាជធានីភ្នំពេញ ព្រឹកថ្ងៃទី៣១ ខែសីហា ឆ្នាំ២០២២នេះ សម្ដេចបានលើកឡើងអំពីវិធានការបិទចម្ការរបស់ លោក ខឹម វាសនា ដែលអាចចេញបានតែចូលមិនបាន ដោយបានថ្លែងថា “ខ្ញុំក៏អំពាវនាវឱ្យពលរដ្ឋនាំគ្នាដើរចេញមក មានឡានចាំដឹក ហើយក៏មានបាយជូនផងដែរ ព្រោះនៅទីនេះចេញបានតែចូលមិនបាន នេះជាបទបញ្ជាសម្រាប់ការអនុវត្ត របស់អាជ្ញាធរនៅទីនោះ ចេញបានតែចូលមិនបាន អញ្ចឹងតើអាចរស់បានប៉ុន្មានថ្ងៃទៀត ព្រឹកនេះបានដឹងហើយថា មានអ្នកចង់ចេញ ប៉ុន្តែមនុស្សជំនិតរបស់ ខឹម វាសនា បានហាមឃាត់គេ មិនឱ្យចេញ”។

សម្តេចតេជោបន្តថា “ប៉ុន្តែខ្ញុំចង់តាំងជាសំណួរថា មានស្បៀងចំនួនប៉ុន្មានសម្រាប់ការតាំងនៅដីនោះ មានទឹកគ្រប់គ្រាន់ទេ មានបង្គន់គ្រប់គ្រាន់ទេ ហើយបើសិនជាឈឺមានពេទ្យគ្រប់គ្រាន់ទេ ជាពិសេសសម័យនេះកូវីដថែមទៀត”។

សម្តេចតេជោ ហ៊ុន សែន បានចាត់ទុកថា ការសន្និដ្ឋានថា លោក ខឹម វាសនា “សរសៃប្រសាទ ឬមិនគ្រប់ទឹក” គឺជារឿងប្រមាថមួយ។ ទោះជាយ៉ាងណា សម្តេចបានមើលឃើញថា អ្វីដែល លោក ខឹម វាសនា យកមកធ្វើនយោបាយនាពេលនេះ នឹងធ្វើឱ្យអ្នកគាំទ្រគាត់បាត់ជំនឿតែម្តង។

សម្តេចបញ្ជាក់ថា “មួយចាននេះគាត់លេងដោយយករឿងរ៉ាវ អបិយជំនឿយកមកដាក់បែបនេះ គាត់នឹងចាញ់ នោះប្រសិនបើអត់មានអ្វីកើតឡើងដូចគាត់គិត គាត់និយាយថា “ពិភពលោកនឹងស្លាប់ ដោយសារស៊ូណាមិ ដោយសាររញ្ជួយដី ដោយសារស្អីៗ” វាអត់កើតដូចអញ្ចឹងមែន គឺបានសេចក្តីថា មនុស្សដែលធ្លាប់ជឿ ឬនៅមានសមានចិត្តខ្លះជាមួយខឹម វាសនា ឬអ្នកដែលជឿខឹមវាសនា អាចនឹងត្រូវចប់ ព្រោះ គាត់និយាយអត់ពិត”។

នៅពេលកើតមានព្រឹត្តិការណ៍ជួបជុំនៅចម្ការ ខឹម វាសនា សម្តេចបានដាក់ចេញបទបញ្ជាចំនួនពីរ ទី១ ត្រូវការពារសន្តិសុខឱ្យបានកុំឱ្យបាតដៃទី២ ឆ្លៀតប្រើបង្កើតរឿង និងទី២ ដាច់ខាតមិនឱ្យទៅដណ្តើមដីនៅរុណតាឯក៕

ដោយ៖ សុផារី

ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានមានប្រសាសន៍សង្កត់ធ្ងន់លើការដកដំណែងរបស់អភិបាលក្រុងតាខ្មៅ ខេត្តកណ្តាល ដោយសារមូលហេតុមិនបានយកចិត្តទុកដាក់មើលប្រព័ន្ធផ្លូវថ្នល់។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានលើកឡើងនៅក្នុងពិធីបើកការដ្ឋានសាងសង់ស្ពានអាកាស នៅថ្ងៃទី៣១ ខែសីហា ឆ្នាំ២០២២នេះថា “ខ្ញុំនឹងរង់ចាំមើលថាតើចៅហ្វាយខេត្តមួយណា ដែលនឹងធ្វើឱ្យព្រែកហូរ ត្រូវបានចាក់បេតុងឲ្យបានច្រើនជាងហ្នឹង។ ស៊ីចៅហ្វាយខេត្តច្រើននោះច្រើន ប៉ុន្តែគ្មានចៅហ្វាយខេត្តណាធ្វើឲ្យបានល្អទេ”។

ដើម្បីបង្កើនប្រសិទ្ធភាពនៃការធ្វើការងារ ដែលមានចំនួនច្រើននៅមូលដ្ឋាន សម្តេចបានថ្លែងថា រាជរដ្ឋាភិបាលបានរៀបចំធ្វើវិសោធនកម្មច្បាប់ បង្កើនអាសនៈឲ្យថ្នាក់ដឹកនាំរាជធានីខេត្ត និងក្រុងស្រុកខណ្ឌ ដោយសង្កត់ធ្ងន់ថា “ការផ្ទេរនេះគឺមិនមែនដើម្បីឲ្យមន្រ្តីអង្គុយជុំនំគ្នាលេងអុកនោះទេ”។

សម្តេចសង្កាត់ធ្ងន់ទៀតថា នៅក្នុងថ្ងៃដែលចៅហ្វាយក្រុងតាខ្មៅត្រូវបានដកហូតដំណែង អតីតចៅហ្វាយក្រុងតាខ្មៅរូបនោះ មិនបានមានវត្តមាននៅក្នុងការដ្ឋានជុសជុលផ្លូវឡើយ។

សម្តេចក៏បានបញ្ជាក់ថា ការជួសជុលផ្លូវថ្នល់ នៅក្នុងក្រុងតាខ្មៅ ក៏ដូចជារាជធានីខេត្តនានា មិនចាំបាច់រង់ចាំការដោះស្រាយពីក្រសួងសាធារណការ និងដឹកជញ្ជូននោះទេ តែសម្តេចបញ្ហាឲ្យអភិបាលខណ្ឌយកចិត្តទុកដាក់មើលផ្លូវថ្នល់បន្ថែមទៀត។

សម្តេចបន្តថា “កុំបញ្ចាំគ្នា ឬគ្រាន់តែផ្លូវប៉ុណ្ណឹង ចាំក្រសួងសាធារណការមកធ្វើដែរ។ […] ផ្លូវកាន់តែច្រើន តម្រូវការជុសជុលកាន់តែច្រើន ផ្លូវកាន់តែវែង ការជួសជុលកាន់តែច្រើន ត្រូវតែមានការទទួលខុសត្រូវលើការថែទាំវា”៕

ដោយ៖ សុផារី

ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានលើកឡើងថា រាជរដ្ឋាភិបាលមិនចូលអន្ទាក់របស់លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ (LDP) ឡើយ ដោយសម្តេចដឹងថា អ្វីដែលលោក ខឹម វាសនា ចង់បាននោះ គឺចង់ឲ្យរាជរដ្ឋាភិបាលប្រើប្រាស់កងកម្លាំង ដើម្បីបំបែកការជួបជុំ និងចាប់ខ្លួនរូបលោកភ្លាម។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានលើកឡើងនៅថ្ងៃទី៣១ ខែសីហា ឆ្នាំ២០២២នេះថា “ឥឡូវខ្ញុំគួរតែនិយាយទៅកាន់ឯកឧត្ដម ខឹម វាសនា និងអ្នកគាំទ្រ ក៏ដូចជាបងប្អូនអ្នកដែលគាំទ្រខ្ញុំ ដែលយប់មិញនេះ បានបង្ហាញពីកំហឹងពុះកញ្ជ្រោលអំពីសារដ៏ធ្ងន់ធ្ងរ ដែលឯកឧត្ដម ខឹម វាសនា បានធ្វើការប្រមាថចំពោះខ្ញុំ ជេរគ្រប់សព្វរហូតអាខ្វាក់”។

សម្តេចបន្តថា “ជាបន្ទាន់ខ្ញុំបានចេញបទបញ្ជាថា អ្វីដែលលោក ខឹម វាសនា ចង់បាន នោះគឺចាប់បង្ខំឲ្យរាជរដ្ឋាភិបាលប្រើប្រាស់កម្លាំង គឺផ្ទេរពីអបិយជំនឿ ទៅកាន់នយោបាយតែម្ដង សូមកុំចូលអន្ទាក់របស់ ខឹម វាសនា ឲ្យសោះ”។

សម្ដេចតេជោ បានបន្ថែមថា “សូមកុំមើលមួយជ្រុង បងប្អូនយើងមើលមួយជ្រុង វាយមកខ្ញុំ តាម Whats app ផង តាម Telegram ផងថា ទ្រាំមិនបានទេ ត្រូវតែទ្រាំ ទ្រាំមិនបានក៏ត្រូវតែទ្រាំ។ ធ្វើនយោបាយ កុំមើលតែជ្រុងតែម្ខាង ត្រូវមើលព្រៃទាំងមូល កុំមើលតែឈើមួយដើម”៕

ដោយៈ គង់ សូរិយា

       ភ្នំពេញៈ សម្តេចតេជោហ៊ុន សែននាយករដ្ឋមន្រ្តីនៃកម្ពុជាបានថ្លែងថា រាជធានីភ្នំពេញ មានតម្រូវការសាងសង់ស្ពាន ចំនួនបីបន្ថែមទៀត ខណៈស្ពានកម្ពុជា កូរ៉េកំពុងចចារនិងជម្រើស។

សម្តេចបន្តថា សម្តេចសង្ឃឹមថា ភាគីកូរ៉េនឹងយកចិត្តទុកដាក់លើការ​ងារនេះ ដើម្បីឲ្យស្ពានមិត្តភាពកម្ពុជា កូរ៉េបានសាងសង់នាពេលខាងមុខ។

សម្តេចតេជោហ៊ុន សែននាយករដ្ឋមន្រ្តីបានបន្តថា ស្ពានមួយទៀតកំពុងសស្ថិតក្នុងការសិក្សា គឺស្ពានក្តីតាកុយ ដែលហេតុនេះទើបលោកទេស​រដ្ឋមន្រ្តីស៊ុន ចាន់ថុលត្រូវបានដាក់ចេញបទបញ្ជា ឲ្យចចាជាមួយមិត្ត ចិន។

សម្តេចបន្តថា ជាមួយគ្នានេះ រដ្ឋាភិបាលនឹងសាងសង់ស្ពានព្រែកប្រា ដែលមានប្រវែង៨៤៥ម៉ែត្រ និងគ្រោងសាងសង់ជាបួនគន្លង ពីរទៅពីរមក ស្ពានព្រែកប្រា ដែលមានតម្លៃ៦៥លានដុល្លារ ដែលកំពុងស្ថិតក្នុងការចចា ហើយបើមិត្តចិនយល់ព្រម ការដ្ឋាននេះនឹងសាងសង់នៅឆ្នាំក្រោយ៕

ដោយៈ ជេស៊ីកា

       ភ្នំពេញៈ សម្តេចតេជោហ៊ុន សែននាយករដ្ឋមន្រ្តីនៃកម្ពុជាបានបង្ហើបឲ្យដឹងថា សម្តេចបាននិងកំពុងឲ្យសិក្សាបង្កើតក្រុងល្វាឯម ខេត្តកណ្តាល។

សម្តេចបានមានប្រសាសន៍បែបនេះ ក្នុងពិធីបើកការដ្ឋានសាងសង់ស្ពានអាកាសចំនួនពីរ នាព្រឹកថ្ងៃទី៣១សីហានេះ។

សម្តេចតេជោបានបន្តថា សម្តេចបានប្រាប់សម្តេច ក្រឡាហោមស ខេងថា ទីក្រុងល្វាឯម មិនកាត់ចូល ឬស្ថិតក្រោមចំណុះរាជធានីភ្នំពេញទេ ប៉ុន្តែក្រុងល្វាឯម នឹងស្ថិតក្រោមចំណុះខេត្តកណ្តាល ដើម្បីខេត្តនេះមានមូល    ដ្ឋានពន្ឋរបស់ខ្លួន គឺមានក្រុងតាខ្មៅ និងក្រុងល្វាឯម៕