ដោយ: លាងហួរ

វ៉ាស៊ីនតោន: យោងតាមក្រុមហ៊ុន S&P Global និង Morgan Stanley បានឱ្យដឹងថា ប្រទេសឥណ្ឌានឹងវ៉ាដាច់ប្រទេសជប៉ុន និងអាល្លឺម៉ង់ ដើម្បីក្លាយជាប្រទេសមហាអំណាចសេដ្ឋកិច្ចធំជាងគេបំផុតទី៣ នៅលើពិភពលោក។ នេះបើយោងតាមការចេញផ្សាយដោយសារពត៌មាន CNBC កាលពីថ្ងៃទី០១ ខែធ្នូ ឆ្នាំ២០២២។

ក្រុមហ៊ុន S&P បានព្យាករណ៍បែបនេះដោយផ្អែកលើកំណើនផលិតផលក្នុងស្រុកសរុបបន្ទាប់បន្សំ (Nominal GDP) ប្រចាំឆ្នាំរបស់ប្រទេសឥណ្ឌា ដែលនឹងមានជាមធ្យម៦,៣ភាគរយ រហូតដល់ឆ្នាំ២០៣០។

ស្រដៀងគ្នានេះដែរ ក្រុមហ៊ុនសេវាកម្មហិរញ្ញវត្ថុសកល Morgan Stanley បានព្យាករណ៍ថា GDP របស់ឥណ្ឌាអាចនឹងកើនឡើងទ្វេរដង ពីកម្រិតបច្ចុប្បន្ន នៅក្នុងឆ្នាំ២០៣១ខាងមុខ។

ក្រុមអ្នកវិភាគនៅក្រុមហ៊ុន Morgan Stanley ដឹកនាំដោយលោក Ridham Desai និងលោកស្រី Girish Acchipalia បានសរសេរ នៅក្នុងរបាយការណ៍នេះថា ប្រទេសឥណ្ឌាមានលក្ខខណ្ឌជាច្រើន សម្រាប់ការរីកចំរើនផ្នែកសេដ្ឋកិច្ច ដែលជំរុញដោយការនាំចេញ ការវិនិយោគក្នុងការផលិត ការផ្លាស់ប្តូរថាមពល និងហេដ្ឋារចនាសម្ព័ន្ធឌីជីថលទំនើបរបស់ប្រទេសនេះ ហើយកត្តាជំរុញទាំងនេះនឹងធ្វើឱ្យឥណ្ឌាក្លាយជាប្រទេសមានសេដ្ឋកិច្ច និងទីផ្សារភាគហ៊ុនធំជាងគេទីបីរបស់ពិភពលោក នៅមុនចុងបញ្ចប់នៃទសវត្សរ៍នេះ។

ប្រទេសឥណ្ឌាបានប្រកាសពី កំណើនសេដ្ឋកិច្ចរបស់ខ្លួនចំនួន៦,៣ភាគរយសម្រាប់ត្រីមាសខែកក្កដាដល់ខែកញ្ញា ពោលគឺខ្ពស់ជាងការព្យាករណ៍ ក្នុងការស្ទង់មតិរបស់សារពត៌មាន Reuters។

នៅមុននេះ សេដ្ឋកិច្ចរបស់ប្រទេសឥណ្ឌាបានកើនឡើងរហូតទៅដល់១៣,៥សម្រាប់ខែមេសា ដល់ខែមិថុនា បើប្រៀបធៀបទៅនឹងឆ្នាំមុន ដោយកំណើនដ៏ខ្ពស់នេះត្រូវបានជំរុញ ដោយតម្រូវការក្នុងស្រុកដ៏រឹងមាំនៅក្នុងវិស័យសេវាកម្ម។

ការព្យាករណ៍របស់ក្រុមហ៊ុន S&P គឺពឹងផ្អែកលើការបន្តសេរីភាវូបនីយកម្មពាណិជ្ជកម្ម និងហិរញ្ញវត្ថុរបស់ប្រទេសឥណ្ឌា កំណែទម្រង់ទីផ្សារការងារ ក៏ដូចជាការវិនិយោគលើហេដ្ឋារចនាសម្ព័ន្ធ និងធនធានមនុស្សរបស់ប្រទេសនេះផងដែរ៕

   ដោយៈ វឌ្ឍនៈ

ភ្នំពេញៈ អ្នកធុរកិច្ចជប៉ុនជាអ្នកវិនិយោគដ៏ធំមួយ នៅក្នុងប្រទេសកម្ពុជា និងមានគម្រោងលេចធ្លោមួយចំនួនទទួលបានការគាំទ្រពី ប្រជាពលរដ្ឋកម្ពុជាផងដែរ ខណៈបច្ចុប្បន្ននេះមានក្រុមហ៊ុនជប៉ុនជាច្រើន កំពុងចង់មកបណ្ដាក់ទុនវិនិយោគជាច្រើនថែមទៀត។

សម្ដេចតេជោហ៊ុនសែន នាយករដ្ឋមន្ត្រីនៃកម្ពុជា បានថ្លែងនៅក្នុងពិធីគម្រប់ខួប១១ឆ្នាំនៃ ក្រុមហ៊ុនMinebeaកាលពីថ្ងៃទី១ ធ្នូ២០២២ ថា មុនជប៉ុនចូលមកវិនិយោគគេសួរតែពីរសំនួរប៉ុណ្ណោះ។

សម្ដេចតេជោបានមានប្រសាសន៍ថា បើនិយាយពីជប៉ុនមកវិនិយោគនៅក្នុងប្រទេសកម្ពុជា ចំណុចសំខាន់គឺមានតែពីរទេដែលជប៉ុនសួរមុនគេ ទី១ តើតម្លៃអគ្គិសនីយ៉ាងម៉េច ? រឿងនេះ វាទាក់ទងនឹងផលចំណេញរបស់អ្នកវិនិយោគ ដែលគេត្រូវគិតគូរឱ្យបានច្បាស់ មុននឹងចូលមកវិនិយោគ។ចំណុចទី២ ទាក់ទិននឹងពលកម្មជំនាញ ឬធនធានមនុស្ស។

សម្ដេចបន្តថា ទាក់ទងនឹងចំណុចទាំងនេះ ទើបកម្ពុជាបានខិតខំបណ្ដុះបណ្ដាលធនធានមនុស្ស ឱ្យកាន់តែច្រើនបន្ថែមទៀត ដើម្បីបំពេញតម្រូវការជាក់ស្ដែង ក្រុមហ៊ុនជប៉ុនមួយMinebea មានបុគ្គលិករហូតដល់ជាង៦០០០នាក់ទៅហើយ ហើយក្រុមហ៊ុននេះលឺថា គ្រោងនឹងពង្រីកបន្ថែមទៀតនៅថ្ងៃខាងមុខ ។ ក្រៅពីក្រុមហ៊ុនជប៉ុនមួយនេះ ក៏មានក្រុមហ៊ុនជប៉ុនផ្សេងទៀត ក៏ដូចជា ក្រុមហ៊ុនបរទេសនិងក្នុងស្រុកជាច្រើនទៀត ។

នៅក្នុងពិធីគម្រប់ខួប Minebea នេះដែរសម្ដេចមានប្រសាសន៍ថា ក្រុមហ៊ុននេះ មិនមែននៅជាមួយយើងត្រឹម១០ ឬ២០ឆ្នាំ ឬក៏៣០ឆ្នាំនោះទេ តែក្រុមហ៊ុននេះនឹងនៅរហូត តកូនតចៅ ដូច្នេះយើងមានក្រុមហ៊ុនជប៉ុនធំមួយដែលនៅជាមួយយើង និងអាចពង្រីកអាជីវកម្មបន្តបន្ទាប់ទៀត។

ជាមួយគ្នានេះ លោកច្រឹក សុខនីមប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា បានលើកឡើងថាជប៉ុនជាវិនិយោគិនមួយ ដែលមានភាពស្មោះត្រង់ និងជាវិនិយោគិន ដែលមានគោលដៅច្បាស់លាស់ ហើយប្រទេសណាក៏ចង់បានជប៉ុនទៅ បណ្ដាក់ទុនវិនិយោគប្រទេសរបស់ពួកគេដែរ៕

ដោយ៖ សុផារី

ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានមានប្រសាសន៍ថា ស្ថិតក្នុងបរិការណ៍ដែលអាស៊ាន និងសកលលោកបាននិងកំពុងជួបប្រទះនឹងបញ្ហាប្រឈមជាបន្តបន្ទាប់ ការកសាងទីក្រុងឆ្លាត ដែលមានការប្រើប្រាស់បច្ចេកវិទ្យាឌីជីថល និងភាពបៃតង គឺជាទិសដៅដ៏ត្រឹមត្រូវបំផុត សម្រាប់ពេលបច្ចុប្បន្ន និងទៅថ្ងៃអនាគត។

សម្ដេចតេជោ ហ៊ុន សែន បានលើកឡើងនៅព្រឹកថ្ងៃទី០២ ខែធ្នូ ឆ្នាំ២០២២នេះ បានអញ្ជើញជាអធិបតីភាពបើកកិច្ចប្រជុំអភិបាលរាជធានី និងរដ្ឋធានីអាស៊ាន (MGMAC 2022) និងវេទិកាអភិបាលក្រុងអាស៊ាន ឆ្នាំ២០២២។

សម្តេចតេជោ ហ៊ុន សែន ទីក្រុងឆ្លាតមានសក្តានុពលខ្ពស់ ក្នុងការដោះស្រាយបញ្ហាទូទៅនៃការរៀបចំនគរូបនីយកម្ម ប្រកបដោយនវានុវត្តន៍ ពង្រឹងភាពធន់តទល់នឹងហានិភ័យផ្សេងៗ និងជាពិសេសលើកកម្ពស់ សុខុមាលភាព និងវិបុលភាពនៃជីវភាពរស់នៅរបស់ប្រជាជនក្នុងមូលដ្ឋានតាមគន្លងប្រក្រតីភាពថ្មី។

សម្តេចបានបន្ថែមថា ទីក្រុងឆ្លាតនឹងក្លាយជាប៉ូលយ៉ាងសំខាន់ ក្នុងការជំរុញសកម្មភាពសង្គមសេដ្ឋកិច្ច ធុរកិច្ច ពាណិជ្ជកម្ម និងការវិនិយោគ ឱ្យកាន់តែខ្លាំងឡើងថែមទៀត ព្រមទាំងផ្ដល់ឱកាសការងារមុខរបរ និងអាជីវកម្មដល់ប្រជាជនទូទៅក្នុងប្រទេស និងតំបន់អាស៊ានទាំងមូល។

សម្តេចបានបន្តថា ការកសាងទីក្រុងឆ្លាតមានភាពធន់ និងមានចីរភាព ត្រូវមានការចូលរួមពីគ្រប់ភាគីពាក់ព័ន្ធ ទាំងរដ្ឋបាលមូលដ្ឋាន វិស័យឯកជន ដៃគូអភិវឌ្ឍន៍ ស្ថាប័នជាតិ និងអន្តរជាតិ និងជាពិសេសពីប្រជាជនដែលរស់នៅក្នុងមូលដ្ឋានផ្ទាល់តែម្ដង។

ក្នុងន័យនេះ រដ្ឋបាលក្រុង រាជធានី និងរដ្ឋធានីអាស៊ាន ដែលស្ថិតនៅជាប់ផ្ទាល់ជាមួយប្រជាជន ត្រូវលើកកម្ពស់ការយល់ដឹង និងសមត្ថភាពក្នុងមូលដ្ឋានរបស់ខ្លួន ក្នុងការចាប់យកបច្ចេកវិទ្យាឌីជីថល ព្រមទាំងការចាប់ផ្តើមយកចិត្តទុកដាក់លើសេដ្ឋកិច្ចវិលជុំ និងសេដ្ឋកិច្ចបៃតង។ ជាមួយគ្នានេះ រដ្ឋបាលក្រុង រាជធានី និងរដ្ឋធានីអាស៊ាន ក៏ត្រូវបង្កបរិយាកាសងាយស្រួលដល់ការធ្វើការអាជីវកម្ម ធុរកិច្ច ពាណិជ្ជកម្ម និងការវិនិយោគ និងដោះស្រាយបញ្ហាចំពោះមុខផ្សេង ដែលប៉ះពាល់ដល់ជីវភាពរស់នៅប្រចាំថ្ងៃរបស់ប្រជាជន៕

ដោយ: លាងហួរ

បាងកក: យោងតាមក្រុមហ៊ុនអាកាសចរណ៍អន្តរជាតិ U-Tapao International Aviation Company Ltd (UTA) បានឱ្យដឹងថា ដំណាក់កាលទី១ នៃគម្រោងអាកាសយានដ្ឋានអន្តរជាតិ U-tapao ថ្មីអាចប្រឈមនឹងការពន្យារពេលរយៈពេល២ឆ្នាំ ដោយសារតែផលប៉ះពាល់នៃជំងឺកូវីដ១៩។

លោក Puttipong Prasarttong-Osoth ប្រធានក្រុមហ៊ុន Bangkok Airways និងជាតំណាងក្រុមហ៊ុន UTA បានមានប្រសាសន៍ថា ដំណាក់កាលទី១អាចនឹងត្រូវបញ្ចប់នៅឆ្នាំ២០២៦ ខណៈក្រុមហ៊ុនត្រូវកែសម្រួលដំណើរការសាងសង់ ដោយសារតែអត្រាកំណើនអ្នកដំណើរធ្លាក់ចុះទាប ក្នុងអំឡុងពេលនៃជំងឺកូវីដ១៩។

ដើមឡើយ គម្រោងដំណាក់កាលទី១នេះគ្រោងសាងសង់បញ្ចប់នៅឆ្នាំ២០២៤ ជាមួយនឹងសមត្ថភាពអាចផ្ទុកអ្នកដំណើរបានចំនួន១៥,៩លាននាក់ក្នុងមួយឆ្នាំ និងមានស្ថានីយទំហំ១៥៧.០០០ម៉ែត្រការ៉េ ចំណតយន្តហោះចំនួន៦០ រួមទាំងកន្លែងពាណិជ្ជកម្ម និងមជ្ឈមណ្ឌលដឹកជញ្ជូនផ្ទាល់ដីមួយផងដែរ។

លោក Puttipong បានបន្តថា ដំបូងឡើយ គម្រោងនេះរត្រូវបានបែងចែកជា៤ដំណាក់កាល  ហើយនឹងអាចត្រូវបានពង្រីកដល់៦ដំណាក់កាល។

លោកបានបន្ថែមថា ថវិកាចំនួន១៤,៣ពាន់លានបាត (ប្រហែល៤០៨,៩១លានដុល្លារអាមេរិក) ដែលទទួលបានពីក្រុមហ៊ុន Bangkok Airways Airport Leasehold Real Estate Investment Trust (BAREIT) នឹងត្រូវយកមកវិនិយោគនៅក្នុងគម្រោងអាកាសយានដ្ឋាននេះ។

គម្រោងអាកាសយានដ្ឋាននេះ ជាការបណ្តាក់ទុនរួមគ្នារវាងក្រុមហ៊ុន BBS រួមទាំងក្រុមហ៊ុន Bangkok Airways និងគណៈកម្មាធិការគោលនយោបាយច្រករបៀងសេដ្ឋកិច្ចភាគខាងកើត (EEC) របស់រដ្ឋាភិបាល ក្រោមសម្បទានរយៈពេល៥០ឆ្នាំ៕

ដោយ៖ សុផារី

ភ្នំពេញ៖ កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ (CKFTA) បានចូលជាធរមានហើយនៅថ្ងៃទី០១ ធ្នូហើយនឹងត្រូវប្រើប្រាស់ដោយភាគីទាំងពីរ ដើម្បីលើកទឹកចិត្តអ្នកវិនិយោគបន្ថែមទៀត ពីសាធារណរដ្ឋកូរ៉េខាងត្បូង ឱ្យមកបណ្តាក់ទុននៅប្រទេសកម្ពុជា និងនាំចេញផលិតផលទៅកាន់កូរ៉េខាងត្បូង។

កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ គឺជាកិច្ចព្រមព្រៀងពាណិជ្ជកម្មសេរីទ្វេភាគីទីពីរ សម្រាប់ប្រទេសកម្ពុជា បន្ទាប់ពីកិច្ចព្រមព្រៀងពាណិជ្ជកម្មសេរីទ្វេភាគី រវាងប្រទេសកម្ពុជា និងប្រទេសចិន ដែលត្រូវបានអនុវត្តកាលពីដើមឆ្នាំ២០២២នេះ។

លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានមានប្រសាសន៍នៅថ្ងៃទី៣០ ខែវិច្ឆិកាថា កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ នឹងក្លាយជាច្រកមួយផ្សេងទៀត សម្រាប់ការធ្វើពិពិធកម្មការនាំចេញទំនិញរបស់ក្រុមហ៊ុនឯកជនបន្ថែមពីលើទីផ្សារបច្ចុប្បន្ន និងការអនុគ្រោះពន្ធ តាមរយៈប្រព័ន្ធ EBA និងប្រព័ន្ធអនុគ្រោះទូទៅ GSP ផ្តល់ដោយសហរដ្ឋអាមេរិក ដែលនឹងផុតសុពលភាពក្នុងពេលឆាប់ៗនេះ។

លោកឧកញ៉ាបានមានប្រសាសន៍ថា “យើងនឹងពិភាក្សាដើម្បីទទួលបានអត្ថប្រយោជន៍ជាអតិបរមាពីកិច្ចព្រមព្រៀងនេះ ពិភាក្សាបញ្ហាដែលនឹងកើតឡើងក្នុងកំឡុងពេលអនុវត្ត ហើយទន្ទឹមនឹងនោះ យើងក៏នឹងពិភាក្សាអំពីការឆ្លើយតបទៅនឹងបញ្ហា ឬបញ្ហាប្រឈមទាំងនោះ មានន័យថា ដោះស្រាយបញ្ហាបណ្តើរ អនុវត្តបណ្តើរ”។

លោកបន្ថែមថា កម្ពុជា​នឹង​ពឹង​ផ្អែក​ជាង​លើ​កិច្ច​ព្រម​ព្រៀង​ពាណិជ្ជកម្ម​សេរី ដោយលោក​បាន​បន្ត​ថា​ “​អ្វី​ដែល​សំខាន់​ជាង​នេះ ​គឺ​ការ​អនុវត្ត និងកំឡុង​ពេល​អនុវត្ត យើង​នឹង​មើល​ឃើញ​បញ្ហា ព្រមទាំង​បញ្ហា​ប្រឈម ឬ​តម្រូវការ ដែលទាមទារឱ្យ​យើង​នឹង​ដាក់​លើ​តុ​ ដើម្បី​ស្វែងរក​ការ​ឆ្លើយ​តប​សម្រាប់​ការ​បង្កើន​ផលប្រយោជន៍​ជា​អតិបរមា”។

លោក ប៉ែន សុវិជាតិ អនុរដ្ឋលេខាធិការក្រសួងពាណិជ្ជកម្ម បានបញ្ជាក់ឱ្យដឹងថា តាមរយៈកិច្ចព្រមព្រៀងនេះ ប្រភេទមុខទំនិញ ដែលប្រទេសកម្ពុជាអាចនាំចេញទៅកាន់ប្រទេសកូរ៉េខាងត្បូងបាន រួមមាន ម្ទេស ចេក គ្រាប់ស្វាយចន្ទី ដំឡូង ម្នាស់ កាហ្វេ ផ្លែឈើ ពោត មៀនប៉ៃលិន ថ្នាំជក់ សាច់ ផលិតផលវារីវប្បកម្ម ស្ករ កៅស៊ូ សំលៀកបំពាក់ វាយនភណ្ឌ ស្បែកជើង កង់ សម្ភារៈធ្វើដំណើរ កាបូប គ្រឿងបន្លាស់ ទំនិញឧស្សាហកម្ម និងទំនិញជាច្រើនទៀត។ ចំណែក សាធារណរដ្ឋកូរ៉េនឹងត្រូវបានអនុញ្ញាតឱ្យនាំចេញឧបករណ៍អេឡិចត្រូនិក យានយន្ត គ្រឿងចក្រសំណង់ គ្រឿងយន្តកសិកម្ម វត្ថុធាតុដើមក្រណាត់ ក្រណាត់កែច្នៃ គ្រឿងសំអាង អាហារ គ្រឿងទេស សម្ភារៈសំណង់ និងគ្រឿងបន្លាស់ និងច្រើនទៀត មកកាន់ប្រទេសកម្ពុជា។

ស្របពេលជាមួយគ្នានេះដែរ រដ្ឋាភិបាល​កម្ពុជា​បានកំពុង​កំណត់​គោលដៅ ​ក្នុង​ការ​បង្កើត​កិច្ចព្រមព្រៀង​ពាណិជ្ជកម្មសេរី ​ជាមួយ​ប្រទេស​ផ្សេង​ទៀត​ ជាអាទិ៍ ​ប្រទេស​ជប៉ុន ឥណ្ឌា និង​ប្រទេស​អារ៉ាប់រួម។ កិច្ចព្រមព្រៀងភាពជាដៃគូសេដ្ឋកិច្ចទូលំទូលាយកម្ពុជា-អារ៉ាប់រួមក៏កំពុងពិភាក្សា ក្នុងការត្រៀមខ្លួនសម្រាប់ការចរចាជុំទីពីរ នៅក្នុងខែធ្នូ ឆ្នាំ២០២២នេះផងដែរ៕

By Reuters Staff

U.S. trade officials on Thursday are expected to issue a preliminary decision on whether to impose tariffs on solar panels from four Southeast Asian nations, a move clean energy advocates argue would stall projects and harm progress in combatting climate change.

The Commerce Department’s finding will mark the latest development in a longstanding effort by U.S. solar panel producers to stem the flow of cheap Asian goods that they argue make their products uncompetitive.

But even if the agency decides the tariffs are warranted, the levies would not take effect for two years thanks to a moratorium imposed by President Joe Biden earlier this year after solar companies said the mere threat of tariffs was freezing projects nationwide.

The waiver is meant to allow U.S. manufacturing time to ramp up, the White House said.

Biden has a goal of weaning the U.S. electricity sector off of fossil fuels by 2035, a target that could propel solar to supply up to 40% of the nation’s power needs, up from 3% today.

The determination by Commerce follows an eight month probe into whether Chinese solar panel makers shifted production to Malaysia, Thailand, Vietnam and Cambodia to avoid paying U.S. duties on solar goods made in China that have been in place for a decade. The four countries account for about 80% of U.S. panel supplies.

A final decision is expected in May. Auxin Solar, a small U.S. solar panel maker, requested the investigation in February, drawing fierce opposition from solar project developers who rely on cheap imports to keep costs low.

“This is a meritless case that could lock up the vast majority of imports coming into the United States,” Abigail Ross Hopper, president of the trade group Solar Energy Industries Association, said in a call with reporters last month.

ដោយ: លាងហួរ

វ៉ាស៊ីនតោន: កន្លងមក លោក ចូ បៃដិនបានសម្រេចថាពន្ធការនៃចូលបន្ទះសូឡាពីបណ្តាប្រទេសអាស៊ានចំនួន៤ អាចនឹងត្រូវលើកលែង ប៉ុន្តែពន្ធនោះនៅមិនទាន់មានប្រសិទ្ធភាពនៅឡើយទេ ដោយសារដំណើរការកំពុងស្ថិតនៅក្រោមការត្រួតពិនិត្យ ដើម្បីការពារផលប្រយោជន៍ផលិតកម្មក្នុងស្រុក និងរារាំងការឆ្លៀតឱកាសរបស់ប្រទេសចិន។

ក្រុមមន្ត្រីពាណិជ្ជកម្មអាមេរិក នៅថ្ងៃព្រហស្បតិ៍ ទី០១ ខែធ្នូ បានចេញសេចក្តីសម្រេចបឋមមួយ ស្តីពីការពិចារណាថា តើត្រូវដាក់ពន្ធលើបន្ទះសូឡា ដែលនាំចូលពីប្រទេសអាស៊ីអាគ្នេយ៍ចំនួន៤ ឬយ៉ាងណា ដោយប្រទេសទាំងនោះ រួមមាន កម្ពុជា ថៃ វៀតណាម និងម៉ាឡេស៊ី។

បើយោងតាមការចេញផ្សាយដោយសារពត៌មានរ៉យទ័រ កាលពីថ្ងៃទី០១ ខែវិច្ឆិកា ឆ្នាំ២០២២ បានឱ្យដឹងថា សេចក្តីសម្រេចចិត្ត របស់ក្រសួងពាណិជ្ជកម្មអាមេរិក នឹងគូសសម្គាល់ពីការវិវឌ្ឍចុងក្រោយបង្អស់ ក្នុងកិច្ចខិតខំប្រឹងប្រែងដ៏យូរអង្វែង របស់ក្រុមហ៊ុនផលិតបន្ទះស្រូបពន្លឺព្រះអាទិត្យ របស់សហរដ្ឋអាមេរិក ដើម្បីរារាំងលំហូរនៃទំនិញអាស៊ី ដែលមានតំលៃថោកជាង ដោយធ្វើឱ្យផលិតផលរបស់អាមេរិកមិនអាចប្រកួតប្រជែងបាន។

កន្លងមក ទោះបីជាសហរដ្ឋអាមេរិកសម្រេចថាពន្ធត្រូវបានធានាក៏ដោយ ប៉ុន្តែពន្ធនោះនៅមិនទាន់មានប្រសិទ្ធភាពនៅឡើយទេ ដោយសារកាលពីដើមឆ្នាំនេះ លោកចូបៃដិនបានប្រកាសផ្អាកយកពន្ធមួយរយៈ ក្រោយពីក្រុមហ៊ុនថាមពលពន្លឺព្រះអាទិត្យនានា បានលើកឡើងថា ការគំរាមកំហែងផ្នែកពន្ធគយបានធ្វើឱ្យគម្រោងទាំងអស់ នៅទូទាំងសហរដ្ឋអាមេរិកមានភាពជាប់គាំង។

លោក ចូ បៃដិន គ្រោងកាត់បន្ថយវិស័យអគ្គិសនីរបស់សហរដ្ឋអាមេរិក ចេញពីឥន្ធនៈហ្វូស៊ីលនៅឆ្នាំ២០៣៥ ដោយប្រើថាមពលពន្លឺព្រះអាទិត្យជំនួស ក្នុងការផ្គត់ផ្គង់ថាមពលរហូតដល់៤០ភាគរយ នៃតម្រូវការរបស់ប្រទេសទាំងមូល។

ការសម្រេចចិត្តនេះធ្វើឡើង បន្ទាប់ពីសហរដ្ឋអាមេរិកបានបើកការស៊ើបអង្កេត អស់រយៈពេល៨ខែដើម្បីស្វែងរកថា តើក្រុមហ៊ុនផលិតបន្ទះសូឡារបស់ចិន បានផ្លាស់ប្តូរផលិតកម្មរបស់ខ្លួន ទៅកាន់ប្រទេសម៉ាឡេស៊ី ថៃ វៀតណាម និងប្រទេសកម្ពុជា ដើម្បីជៀសវាងការបង់ពន្ធឱ្យសហរដ្ឋអាមេរិក ឬយ៉ាងណា ប៉ុន្តែការសម្រេចជាចុងក្រោយនឹងធ្វើឡើង ក្នុងខែឧសភាឆ្នាំ២០២៣ខាងមុខ។

ប្រទេសទាំង៤ខាងលើនេះបានរួមចំណែកប្រហែល៨០ភាគរយ នៃការផ្គត់ផ្គង់បន្ទះសូឡាដល់សហរដ្ឋអាមេរិក៕

ដោយ៖ សុផារី

ភ្នំពេញ៖ នៅក្នុងឆ្នាំ២០២២ តម្លៃអចលនទ្រព្យនៅរក្សាតម្លៃសមរម្យ ដោយសារជម្រើសទីតាំងល្អៗ និងលក្ខខណ្ឌបង់ប្រាក់មានភាពបត់បែន អ្នកវិនិយោគមួយចំនួនបានចាប់យកឱកាសនេះធ្វើការវិនិយោគ។

អ្នកជំនាញណែនាំនូវទីតាំងសំខាន់ៗចំនួនពីរ ដែលអាចបន្តផ្តល់ផលចំណេញសម្រាប់ការទិញវិនិយោគ។

លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានបង្ហើបពីទីតាំងដី ដែលវិនិយោគិនគួរនិយោគនៅឆ្នាំថ្មី២០២៣ ដែលអាចមានឱកាសចំណេញល្អ។

លោកបញ្ជាក់ថា ទីតាំងតំបន់ដីដែលគួរវិនិយោគទាំងនោះ រួមមាន ដីធ្លីនៅផ្លូវវាត់ក្រុងទី៣ និងដីនៅតំបន់ផ្លូវក្រវាត់ក្រុងទី៤ នៃភូមិសាស្រ្ដរាជធានីភ្នំពេញ។

លោកបានលើកទឹកចិត្ដ ឱ្យអ្នកវិនិយោគិនគួរវិនិយោគទៅលើគម្រោងក្រវាត់ក្រុងទី៣ និងទី៤ ព្រោះផ្លូវទាំងពីរខ្សែនេះគឺជាផ្នែកដ៏សំខាន់ ក្នុងការអភិវឌ្ឍ ព្រោះយន្ដការនៅក្នុងការអភិវឌ្ឍ ក្នុងក្រវាត់ក្រុងទី៣ និងទី៤ ជួយជំរុញឱ្យផ្លូវផ្សេងៗទៀតនៅក្នុងក្រវាត់ក្រុងនេះទទួលបាននូវភាពរីកចម្រើន និងគួបផ្សំទៅនឹងកាលានុវត្ដភាព នៃទីផ្សារអចលនទ្រព្យផងដែរ។

លោក ច្រឹក សុខនីម បានបញ្ជាក់ថា “ដីធ្លីនៅភ្នំពេញ និងជាយរាជធានីភ្នំពេញ និងតាមបណ្ដាក្រវាត់ក្រុងទី៣ ទី៤ គឺជាចំណុចសំខាន់និងផ្ដល់សក្ដានុពលក្នុងការវិនិយោគអាចទទួលបានប្រាក់ចំណេញគួរសម នៅក្នុងកាលានុវត្ដភាព នៅពេលស្ថានភាពគាប់ប្រសើរឡើងវិញនូវបញ្ហា ឬភាពលំបាកក្នុងវិស័យសេដ្ឋកិច្ចនាពេលបច្ចុប្បន្ន”៕

ដោយ៖ សហការី

ភ្នំពេញ៖ នៅព្រឹកថ្ងៃទី២ ខែធ្នូ ឆ្នាំ២០២២នេះ សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា នឹងអញ្ជើញជាអធិបតីភាពដ៏ខ្ពង់ខ្ពស់ក្នុងពិធីបើកវេទិកាអភិបាលក្រុងអាស៊ាន ដែលប្រព្រឹត្តទៅនៅសណ្ឋាគារសុខាភ្នំពេញ។

រាជធានីភ្នំពេញត្រូវធ្វើជាម្ចាស់ផ្ទះនៃកិច្ចប្រជុំអភិបាលរាជធានី និងរដ្ឋធានីអាស៊ាន (MGMAC 2022) និងវេទិកាអភិបាលក្រុងអាស៊ាន ឆ្នាំ២០២២ (ASEAN Mayors Forum 2022) ក្នុងរយៈពេល២ថ្ងៃ នោះគឺថ្ងៃសុក្រ និងសៅរ៍ ថ្ងៃទី២និង៣ ខែធ្នូ ឆ្នាំ ២០២២។

កិច្ចប្រជុំនិងវេទិកានេះនឹងមានតំណាងទីក្រុងនិងខេត្តចូលរួមប្រមាណ៨០ ទីក្រុងក្នុងតំបន់អាស៊ាន និង ក្រៅអាស៊ាន មានជាង៣០ទីក្រុងធំៗចូលរួមផងដែរ។

វេទិកា AMF និងកិច្ចប្រជុំ MGMAC នេះ មានសារសំខាន់ក្នុងការអនុញ្ញាតឲ្យបណ្ដារដ្ឋបាលថ្នាក់ក្រោមជាតិ ទាំងនៅថ្នាក់រាជធានី ឬរដ្ឋធានី ខេត្ត ក៏ដូចជាក្រុង ស្រុក របស់ប្រទេសជាសមាជិកអាស៊ាន អាចជួបប្រជុំគ្នាជជែកលើបញ្ហាប្រឈម ក៏ដូចជាចែករំលែកបទពិសោធន៍ល្អៗដែលខ្លួនមាន ដែលជាដំណោះស្រាយអាចយកអនុវត្តបាន ជាពិសេសក្នុងកាលៈទេសៈនៃការស្តារឡើងវិញរបស់ទីក្រុងនីមួយៗ នៅក្រោយវិបត្តិជំងឺកូវីដ១៩។

វេទិកា និងកិច្ចប្រជុំខាងលើនេះ នឹងចូលរួមជំរុញកិច្ចសហប្រតិបត្តិការ សន្តិភាព សាមគ្គីភាព និងសុខដុមនីយកម្មរវាងរដ្ឋបាលមូលដ្ឋានរបស់ប្រទេសជាសមាជិកអាស៊ាន ជាមួយនឹងរដ្ឋបាលមូលដ្ឋាន នៃបណ្ដាប្រទេសជាម្ចាស់ផ្ទះកិច្ចប្រជុំកំពូលអាស៊ាន។ ចំពោះរាជធានីភ្នំពេញ និងរដ្ឋបាលថ្នាក់ក្រោមជាតិកម្ពុជាវិញ វេទិកា និងកិច្ចប្រជុំទាំងពីរខាងលើនឹងផ្ដល់ឱកាសដល់រដ្ឋបាលរាជធានីភ្នំពេញ និងបណ្ដាទីក្រុងនិងខេត្តរបស់កម្ពុជា ក្នុងការបង្កើនទំនាក់ទំនងជាមិត្តភាព សាមគ្គីភាព និងកិច្ចសហប្រតិបត្តិការជាមួយបណ្តារាជធានី រដ្ឋធានី និងខេត្ត ក្រុងនៃប្រទេសជាសមាជិកអាស៊ាន៕