ដោយៈស៊ីវ ម៉េង
ភ្នំពេញៈ ប្រសិនជាមិនការប្រែប្រួលនោះទេ នៅត្រឹមដើមឆ្នាំ២០២០ខាងមុខនេះ ផ្សារទំនើបធំៗចំនួន៩ទៀត នឹងត្រៀមខ្លួនចូលមកដំណើរការនៅលើទីផ្សារ ដែលធ្វើឲ្យទីក្រុងភ្នំពេញប្រឈមមុខនឹងបញ្ហានៃការប្រកួតប្រជែងកាន់តែខ្លាំងឡើង។
ការមកដល់នៃផ្សារទំនើប AEON MALL1, AEON MALL2 និងការដាក់ឲ្យដំនើរការផ្សារទំនើបធំៗមួយចំនួនទៀត ដូចជាផ្សារ MAKRO ជាដើម បាននិងកំពុងធ្វើឲ្យផ្សារទំនើបតូចៗកំពុងបាត់បង់អតិថិជន។
អ្នកដើរផ្សារទំនើបតូចៗបាននិយាយថា ផ្សារទំនើបដូចផារ៉ាហ្គនដ៏ល្បីមកពីប្រទេសថៃ ផ្សារបាយ័ន ផ្សារទំនើបសុវណ្ណា ស៊ីធីម៉លជាដើម បានបាត់បង់អតិថិជន ហើយតូបមួយចំនួនបានបិទទ្វារ ដោយសារអ្នកលក់រាយបានបាត់បង់អតិថិជន ធ្វើឲ្យពួកគេមិនអាចរកផលចំណេញបាន។
អនុប្រធានក្រុមប្រឹក្សាភិបាលសមាគមអ្នកជំនាញអចលនទ្រព្យកម្ពុជា លោកយិន លាងគង់បានមានប្រសាសន៍ឲ្យដឹងកាលពីថ្ងៃទី២ កក្កដាកន្លងមកថា ជាមួយនឹងកំនើនសេដ្ឋកិច្ច និងការកើនឡើងនូវប្រាក់ចំណូលរបស់ប្រជាជន បានធ្វើឲ្យអ្នកវិនិយោគចាប់យកឳកាសនេះដើម្បីស្វែងរកផលចំណេញ ដោយសារពួកគេរំពឹងថាការវិនិយោគរបស់ពួកគេទទួលបានជោគជ័យ ប៉ុន្តែការពិតទីផ្សារនេះនៅតូចនៅឡើយ ហើយអំណាចនៃការបញ្ជាទិញនៅមានកម្រិត។
លោកបន្តថា “អ្នកមានលំដាប់ខ្ពស់នៅទីក្រុងភ្នំពេញ ពួកគេនៅតែនិយមទិញទំនិញនៅបរទេស ហើយពួកគេមិនទាន់គាំទ្រផលិតផលនាំចូលនៅឡើយទេ ទោះជាផលិតផលនោះមានម៉ាកសញ្ញានិងគុណភាពល្អដូចនៅក្រៅប្រទេសក្តី”។
លោកឧកញ៉ាសៀ រិទ្ឋីអគ្គនាយកក្រុមហ៊ុន World Bridge Land ដែលបានវិនិយោគផ្សារទំនើបដោយខ្លួនឯងក្នុងគំរោងThe Bridge, និងក្នុងគំរោង The PeAk នាពេលអនាគតធ្លាប់បានអះអាងកាលពីពេលថ្មីៗនេះផងដែរថា វត្តមានផលិតផលល្បីៗ ឬ Brand មកពីបរទេសមិនទាន់ដល់ពេលវេលានៅឡើយ ប៉ុន្តែពួកគេនៅតែចូលមក ទោះបីពួកគេដឹងថាទីផ្សារមិនទាន់ល្អក្តី ប៉ុន្តែគោលដៅរបស់ពួកគេ គឺពង្រីកការផ្សព្វផ្សាយផលិតផលរបស់ពួកគេ។
លោកបន្តថា “ខ្ញុំគិតថាវាត្រូវការពេលវេលាបន្ថែមទៀត សម្រាប់ផលិតផល Brand នៅកម្ពុជា”។
ទោះជាប្រឈមនឹងបញ្ហា ដែលអំណាចនៃការបញ្ជាទិញមិនទាន់កើនឡើងខ្លាំងក្តី ប៉ុន្តែផ្សារទំនើបចំនួន៩បានបើកនិងត្រៀមបើកទ្វារស្វាគមន៍អតិថិជន ដែលផ្សារទាំងនោះរួមមានដូចជា៖ ផ្សារទំនើប Phnom Penh Mega Mall, The Olympia Mall, Chip Mong Baktouk CC, WB Arena, The Park, The Point, Noro Mall, The Bridge, និង Midtown-mall។
អ្នកស្រាវជ្រាវផ្នែកអចលនទ្រព្យជាន់ខ្ពស់ប្រចាំក្រុមហ៊ុន CBRE Cambodia កញ្ញា គឹម គិនកេសា បានមានប្រសាសន៍ឲ្យដឹងាកាលពីពេលថ្មីៗនេះថា នៅឆ្នាំ២០១៩នេះ ទំហំនៃផ្ទៃក្រឡាសម្រាប់ដាក់លក់រាយ នៅក្នុងបណ្តាផ្សារទំនើបនៅកម្ពុជា មានកំណើនរហូតដល់ចំនួន៣៤៨,០០០ ម៉ែត្រការ៉េ ខណៈដែលកាលពីឆ្នាំ២០១៨ ផ្ទៃក្រឡាសម្រាប់ទីតាំង លក់រាយមានចំនួនត្រឹមតែ២៨២,០០០ ម៉ែត្រការ៉េតែប៉ុណ្ណោះ។
កញ្ញាបន្តថា “ការកើនឡើងផ្សារទំនើបយ៉ាងច្រើននៅឆ្នាំ២០១៩នេះ មួយភាគធំគឺជាផ្នែកដែលបន្សល់ ពីគម្រោងចាស់ដែលមិនទាន់បញ្ចប់រួចរាល់កាលពីឆ្នាំ២០១៨”។
យោងតាមរបាយការណ៍របស់ CBRE បានឲ្យដឹងផងដែរថា នៅឆ្នាំ២០១៨កន្លងមកនេះ កំណើននៃចំនួនម៉ាកផលិតផលថ្មីបានកើនឡើង តាមរយៈទីផ្សារទំនើបរហូតដល់៦៥ម៉ាក ខណៈឆ្នាំ២០១៧ ដែលមានត្រឹម២៩ម៉ាក។ ផលិតផលល្បីៗដែលនាំចូល ភាគច្រើនជាប្រភេទចំណីអាហារ និងភេសជ្ជៈ និងត្រូវបាននាំចូលមកពីតំបន់អាស៊ីប៉ាស៊ីហ្វិក ហើយមួយចំណែកតូចត្រូវបាននាំចូលមកពីប៉ែកអឺរ៉ុប ដូចជាសម្ភារៈប្រើប្រាស់ និងសម្លៀកបំពាក់ជាដើម។
ទោះជាយ៉ាងណាអ្នកនាងអាន សុធីតា នាយិកាប្រចាំប្រទេសនៃក្រុមហ៊ុន CBRE Cambodia នៅតែមានសុទិដ្ឋិនិយម ដោយអ្នកនាងបានមានប្រសាសន៍ថា ការកើនឡើងនៃផ្សារទំនើបកាលពីឆ្នាំមុន មិនទាន់បានធ្វើឲ្យទីផ្សារនេះលើសតម្រូវការនៅឡើយទេ ប៉ុន្តែអ្នកនាងបានព្រមានថា ប្រសិនជាឆ្នាំបន្តបន្ទាប់វត្តមានផ្សារទំនើបកើនឡើងច្រើនដូចឆ្នាំ២០១៨ ចំនួននៃការផ្គត់ផ្គង់ផ្សារទំនើប ធៀបនឹងតម្រូវការអាចមានបញ្ហា”។
អ្នកនាងបន្តថា “ការវិនិយោគលើផ្សារទំនើប បានធ្វើឲ្យអ្នកវិនិយោគអាចទាញផលចំណេញពីផ្នែកនេះត្រលប់មកវិញបានខ្ពស់ ប៉ុន្តែអ្នកវិនិយោគត្រូវការធ្វើការកែលំអរឲ្យផ្សាររបស់ខ្លួនមានភាពទាក់ទាញរៀងរាល់៥ឆ្នាំម្តង”។
ការកើនឡើងនៃវត្តមានផ្សារទំនើបកាន់តែច្រើន ប៉ុន្តែទីផ្សារនេះមិនទាន់មានការធ្វើពិពិធកម្មនៅឡើយ។
អតីតអគ្គនាយកក្រុមហ៊ុនប៊ុណ្ណារៀលធីគ្រុប លោកស៊ឹង ប៊ុណ្ណាធ្លាប់បានថ្លែងថា វត្តមានផ្សារទំនើបកាន់តែច្រើន អាចធ្វើឲ្យទីផ្សារនេះលើសតម្រូវការ ប៉ុន្តែដើម្បីអាចដោះស្រាយបញ្ហានេះ អ្នកវិនិយោគគួរធ្វើឲ្យទីផ្សាររបស់ខ្លួនមានភាពទាក់ទាញ ដោយធ្វើយ៉ាងណាឲ្យមានផ្សារលក់ផលិតផលតែមួយផ្តាច់មុខ ឧទាហរណ៍ផ្សារមួយលក់តែសម្លៀកបំពាក់ ផ្សារមួយលក់តែគ្រឿងអេឡិកត្រូនិក ដើម្បីឲ្យអតិថិជនមានភាពងាយស្រួលក្នុងការជ្រើសរើស និងដឹងពីទីតាំងពិតប្រាកដ ដែលពួកគេអាចទៅរកទិញផលិតផលណាមួយបាន ដោយមិនចាំបាច់ទៅកាន់កន្លែងដទៃទៀត៕
