ចំណេះដឹង! តើអ្នកជួលអាចផ្ទេរសិទ្ធិជួលឬជួលបន្តទៅអ្នកដទៃអាចធ្វើដោយគ្មានការយល់ព្រមពីម្ចាស់អចលនវត្ថុឬទេ?

June 10, 2019

ដោយ វុត្ថា

ភ្នំពេញៈ ចំពោះកិច្ចសន្យាជួលទូទៅ អ្នកជួលមិនអាចផ្ទេរសិទ្ធិជួល ឬជួលបន្តទៅឲ្យអ្នកដទៃបានទេ បើមិនមានការយល់ព្រមពីម្ចាស់អចលនវត្ថុ។ មានន័យថាបើអ្នកចង់ជួលបន្តក៏ត្រូវមានការយល់ព្រមពីម្ចាស់អចលនវត្ថុ។

ចង់ផ្ទេរសិទ្ធិទៅឲ្យអ្នកដទៃប្រើប្រាស់ ឬអាស្រ័យផលលើអចលនវត្ថុជួល ក៏ចាំបាច់ត្រូវតែមានការយល់ព្រមពីម្ចាស់អចលនវត្ថុ។ បើមិនដូច្នោះទេ ម្ចាស់វត្ថុអាចរំលាយកិច្ចសន្យាជួលនេះចោលបាន។

យោងតាមមាត្រា ១៤៤នៃក្រមរដ្ឋប្បវេណីបានចែងថា លើកលែងតែក្នុងករណីជួលអចិន្រ្តៃយ៍ ពោលគឺកិច្ចសន្យាជួលអចលនវត្ថុ ដែលមានរយៈពេលចាប់ពី១៥ឆ្នាំឡើងទៅ ក្នុងករណីជួលអចិន្រ្តៃយ៍។ មាត្រា២៥២បានចែង ដោយផ្តល់សិទ្ធិឲ្យអ្នកជួលអាចយកអចលនវត្ថុទៅជួលបន្តក៏បាន ឬក៏ផ្ទេរសិទ្ធិឲ្យអ្នកដទៃប្រើប្រាស់ ឬអាស្រ័យផលលើអចលនវត្ថុនេះដោយឥតយកថ្លៃក៏បាន ដោយមិនចាំបាច់ទៅសុំការយល់ព្រមពីម្ចាស់វត្ថុជាមុនទេ។

សរុបមកម្ចាស់ដី ឬម្ចាស់ផ្ទះ ឬអាគារ និងអ្នកជួលមានសិទ្ធិរំលាយកិច្ចសន្យាមុនកាលកំណត់បាន ប្រសិនបើភាគីទាំងពីរព្រមព្រៀងគ្នា ឬកំណត់ក្នុងកិច្ចសន្យាជួល។ ម្ចាស់ផ្ទះមានសិទ្ធិផ្ទេរ មានសិទ្ធិលក់ ទៅអ្នកដទៃ ខណៈដែលកិច្ចសន្យាកំពុងមានសុពលភាពបាន ប៉ុន្តែអ្នកជួលមិនអាចធ្វើសិទ្ធិប្រើប្រាស់ ឬផ្ទេរកិច្ចសន្យាទៅអ្នកដទៃដោយមិនមានការយល់ព្រមពីម្ចាស់អាគារ ឬម្ចាស់ផ្ទះនោះទេ៕

តម្រូវការការរិយាល័យនៅក្នុងប្រទេសសឹង្ហបុរីមានដំណើរការល្អ

June 10, 2019

0

00EE4745-CB2B-42CC-A81E-5D67F2A28750 — អគារខ្ពស់នៅសិង្ហបុរី

ដោយ វុត្ថា

អាស៊ាន៖ ការផ្គត់ផ្គង់ទីផ្សារការិយាល័យ នៅក្នុងប្រទេសសឹង្ហបុរីមានដំណើរការល្អសម្រាប់ឆ្នាំ២០១៩នេះ ដោយសារតែតម្រូវការពីពាណិជ្ជករ និងអ្នកវិនិយោគកើនឡើងគួរឲ្យកត់សម្គាល់ក្នុងរយៈពេលកន្លងមកនេះ។

យោងតាមគេហទំព័រសារព័ត៌មាន The Business Times បានចុះផ្សាយកាលពីសប្តាហ៍មុនថា ទីផ្សារអចនទ្រព្យនៅក្នុងប្រទេសសឹង្ហបុរី នៅតែរក្សាបាននូវកំណើការល្អសម្រាប់ឆ្នាំ២០១៩នេះតទៅ ដោយសារកំណើរនៃការផ្គត់ផ្គង់ការិយាល័យ នៅតបន្តកើនឡើងខ្ពស់។

សារព័ត៌មាននេះបានចុះផ្សាយទៀតថា តម្លៃអចលនទ្រព្យនៅក្នុងប្រទេសសឹង្ហបុរី និងការជួលអគារការិយាល័យនឹងបន្តកើនឡើង ហើយរំពឹងថាតម្លៃទីផ្សារភាគហ៊ុននឹងបង្រួបគម្លាត ដើម្បីជាមួយមូលដ្ឋានគ្រឹះអចលនទ្រព្យ ដែលកំពុងមានសុខភាពល្អ ជាពិសេសម្រាប់អ្នកអភិវឌ្ឍន៍។

តម្លៃលំនៅដ្ឋាននឹងបន្តកើនឡើង៥ភាគរយបន្ថែមទៀត ដោយសារការវិលត្រឡប់នៃការកើនឡើងនិន្ននាការ ចំពោះការផ្គត់ផ្គង់ការិយាល័យ និងតម្រូវការនៅក្នុងទីផ្សារអចលនទ្រព្យ។ ជាមួយគ្នានោះ ការជួយអគារការិយាល័យ ក៏នឹងកើនឡើងតួលេខទ្វេដង នៅក្នុងឆ្នាំ ២០១៩ នេះ។

យោងតាមក្រុមហ៊ុន Knight Frank ប្រចាំអាស៊ីប៉ាស៊ីហ្វិក បានបញ្ចេញរបាយការណ៍របស់ខ្លួនថា ការជួលការិយាល័យនៅប្រទេសសិង្ហបុរី បានកើនឡើង ២៣,៧%នៅក្នុងត្រីមាសទី១ បើធៀបនឹងរយៈពេលដូចគ្នា មានអត្រាកំនើនត្រឹម ១០.៧៥ % កាលពីឆ្នាំ ២០១៨កន្លងមកនេះ។

ប្រទេសសឹង្ហបុរី គឺជាប្រទេសមួយដែលមានទីផ្សារអចលនទ្រព្យល្អបំផុត ក្នុងតំបន់អាស៊ីដែលធ្វើឪ្យកំណើន GDP កើនឡើង អត្រាអ្នកអត់ការងារធ្វើមានកម្រិតទាប និងស្ថេរភាពសេដ្ឋកិច្ចសង្គម ។

ជាមួយគ្នានោះ អ្ននវិភាគសេដ្ឋកិច្ចសេដ្ឋកិច្ចបានលើកឡើងថា វិស័យអចលនទ្រព្យនៅក្នុងប្រទេសមួយនេះ នឹងនៅតែរក្សានូវកមណើនល្អប្រសើរ សម្រាប់រយៈពេលមួយទសវត្សទៅមុខទៀត៕

អភិបាលខេត្តៈក្រុមហ៊ុនចិនគ្រោងវិនិយោគទឹកប្រាក់បន្ថែមរហូតដល់ជិត ៩ពាន់លានដុល្លារ

June 10, 2019

0

2B810C82-C815-46E0-9020-B2FED7433110 — អភិបាលនៃគណអភិបាលខេត្តកំពង់ស្ពឺ លោក វ៉ី សំណាង

ដោយៈ រ៉ាណេត

កំពង់ស្ពឺៈ មន្ត្រីជាន់ខ្ពស់ប្រចាំខេត្តកំពង់ស្ពឺបានអះអាងថា មិនយូរទៀតនោះទេ ក្រុមហ៊ុនធំៗមកពីប្រទេសចិននឹងបោះទុនវិនិយោគ ដែលមានទំហំទឹកប្រាក់សរុបរហូតដល់ជិត៩ពាន់លានដុល្លារសហរដ្ឋអាមេរិកនៅក្នុងមូលដ្ឋានខេត្តនេះ ហើយគំរោងនេះអាចផ្តល់កន្លែងការងារដល់ប្រជាពលរដ្ឋរហូតដល់ជាង ១២ម៉ឺននាក់។

អភិបាលនៃគណអភិបាលខេត្តកំពង់ស្ពឺ លោក វ៉ី សំណាង បានមានប្រសាសន៍ប្រាប់តាមទូរស័ព្ទកាលពីថ្ងៃទី៩ មិថុនាកន្លងមកថា បច្ចុប្បន្ននេះ នៅក្នុងខេត្តកំពង់ស្ពឺមានរោងចក្រ និងក្រុមហ៊ុនរបស់ចិនដំណើរការមួយចំនួនរួចហើយ ប៉ុន្តែនៅក្នុងពេលដ៏ខ្លីឆាប់ៗខាងមុខនេះ នឹងមានក្រុមហ៊ុនថ្មីៗចំនួន ១២ទៀតនឹងចូលមកបន្ថែម។

លោកបន្តថា បន្ទាប់ពីទទួលបានការពិនិត្យ និងសម្រេចអនុញ្ញាតពី CDC នៅត្រឹមពេលដ៏ខ្លីខាងមុខនេះ ក្រុមហ៊ុនធំៗរបស់ចិន នឹងចូលមកកាន់ទីតាំងដូចដែលបានគ្រោងទុករួចជាស្រេច ស្ថិតនៅតាមបណ្តាស្រុកមួយចំនួន ក៏ដូចជាក្រុងច្បារមនផងដែរ ជាពិសេស តំបន់ដែលស្ថិតនៅក្បែរផ្លូវជាតិលេខ៤។

លោកបន្តទៀតថា “ក្រុមហ៊ុនទាំងអស់នោះភាគច្រើន ជាប្រភេទរោងចក្រកាត់ដេរ និងគ្រឿងអេឡិចត្រូនិក ក៏ដូចជាសម្ភារៈសំណង់”។ លោកបន្តទៀតថា“វត្តមានរបស់ក្រុមហ៊ុនទាំងអស់នេះ នឹងចូលរួមលើកកម្ពស់និងជម្រុញឱ្យសេដ្ឋកិច្ចជាតិកម្ពុជា ក៏ដូចជាសេដ្ឋកិច្ចក្នុងខេត្តកំពង់ស្ពឺទាំងមូល មានភាពកាន់តែល្អប្រសើរ ហើយក៏ជួយសម្រួលដល់បណ្តាកម្មករចំណូលស្រុកតាមរយៈការទទួលបានការងារផងដែរ”។

លោក វ៉ី សំណាង បានបញ្ជាក់ថា ចំនួនក្រុមហ៊ុនទាំងអស់នេះ នៅមិនទាន់ច្រើនគ្រប់គ្រាន់សម្រាប់ខេត្តកំពង់ស្ពឺនៅឡើយនោះទេ ដែលយើងនៅតែទាមទាស្នើសុំ និងស្វាគមន៍វត្តមានក្រុមហ៊ុន និងរោងចក្រចិនមកកាន់ខេត្តមួយនេះបន្ថែមទៀត”។

ក្រុមហ៊ុនចិនធំៗដែលចូលមកកាន់ខេត្តកំពង់ស្ពឺទាំង១២ ក៏មានវត្តមានរបស់ក្រុមហ៊ុនលំដាប់ពិភពលោក Smart Phone OPPO និងក្រុមហ៊ុន Smart Phone VIVO ដែលតម្រូវសាងសង់អគារមានកម្ពស់រហូតជិត២០០ម៉ែត្រ រួមជាមួយនឹងអគារមជ្ឍមណ្ឌលពាណិជ្ជកម្ម ដែលមានទីតាំងស្ថិតនៅក្នុងក្រុងច្បារមន នៅក្នុងទំហំទឹកប្រាក់វិនិយោគចំនួន ៥០០លានដុល្លារសហរដ្ឋអាមេរិកផងដែរ។

អនុប្រធានក្រុមប្រឹក្សាភិបាលសមាគមអ្នកជំនាញអចលនទ្រព្យកម្ពុជា លោកយិន លាងគង់បានលើកឡើងថា ការពិតខេត្តកំពង់ស្ពឺជាខេត្តមានសក្តានុពលក្នុងការទាក់ទាញការវិនិយោឡគ ដោយសារកត្តាសំខាន់ៗជាច្រើន ដូចជាទី១ ជាខេត្តស្ថិតនៅក្នុងភូមិសាស្រ្តល្អ ដោយមានទីតាំងជាប់់រាជធានីភ្នំពេញ ទី២ ជាខេត្តដែលមានហេដ្ឋារចនាសម្ព័ន្ឋតភ្ជាប់ល្អប្រសើរ ក្នុងការដឹកជញ្ជូនទៅកាន់កំពង់ផែ ដោយសារខេត្តនេះតភ្ជាប់ជាមួយផ្លូវជាតិលេខ៤ លេខ៣ ផ្លូវល្បឿនលឿនជាដើម។

ទី៣ កត្តាប្រជាសាស្រ្ត គឺទោះបីជាខេត្តនេះ មានប្រជាជនចំណាកស្រុកចូលមករាជធានីភ្នំពេញច្រើន ក៏ខេត្តនេះមានមនុស្សឆ្លងកាត់ច្រើន មានប្រជាជនរស់នៅច្រើនផងដែរ ដែលផ្តល់ភាពអំណោយផលដល់ការវិនិយោគលើវិស័យវាយណភ័ណ្ឌ កាត់ដេរ និងស្បែកជើង ដែលជាវិស័យត្រូវការលំលាំងពលកម្មច្រើន។

លោកបន្តថា “ដោយសារកត្តាខាងលើ ព្រមទាំងលក្ខខ័ណ្ឌភូមិសាស្រ្តល្អប្រសើរ នឹងជាភាពអំណោយផលដែលធ្វើឲ្យខេត្តនេះ កាន់់តែមានភាពរីកចម្រើមនលឿនថែមទៀតនាពេលអនាគត”៕

ថ្នាក់ដឹកនាំក្រុមហ៊ុន ប៉េង ហួត គ្រុប ថ្វាយតង្វាយជាថវិកាដល់ព្រះមហាក្សត្រចំនួន ៨០០លានរៀល សម្រាប់ព្រះរាជកិច្ចមនុស្សធម៌

June 8, 2019

0

ក្រុមការងារក្រុមហ៊ុន ប៉េង ហួត គ្រុប ថតរូបអនុស្សាវរីយ៍ជាមួយ ព្រះមហាក្សត្រ។ រូបថត៖ សហការី

ដោយ រតនៈ

ភ្នំពេញ៖ ព្រះមហាក្សត្រ និងព្រះវររាជមាតាជាតិខ្មែរ ព្រះបរមរាជានុញ្ញាតឲ្យថ្នាក់ដឹកនាំក្រុមហ៊ុន ប៉េង ហួត គ្រុប ចូលក្រាបបង្គំគាល់និងថ្វាយតង្វាយជាថវិកា សម្រាប់ព្រះរាជកិច្ចមនុស្សធម៌។

នៅព្រះមហាប្រាសាទខេមរិន្ទ ថ្ងៃទី៦ ខែមិថុនា ឆ្នាំ២០១៩ ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និង សម្តេចព្រះមហាក្សត្រី ព្រះវររាជមាតាជាតិខ្មែរ នរោត្តម មុនីនាថ សីហនុ ទ្រង់សព្វព្រះរាជហឬទ័យ បរមរាជានុញ្ញាត ឲ្យលោកឧកញ៉ា ថៃ ជាហួត ប្រធានក្រុមប្រឹក្សាភិបាល ក្រុមហ៊ុន ប៉េង ហួត គ្រុប ព្រមទាំងថ្នាក់ដឹកនាំក្រុមហ៊ុន ចូលក្រាបបង្គំគាល់ និង ថ្វាយតង្វាយជាថវិកាសម្រាប់ព្រះរាជកិច្ចមនុស្សធម៌ ។

លោកឧកញ៉ា ថៃ ជាហួត បានថ្វាយតង្វាយជាថវិកាចំនួន ៨០០លានរៀល (ប្រាំបីរយលានរៀល) សម្រាប់ប្រើប្រាស់លើការងារមនុស្សធម៌ តាមសព្វព្រះហឬទ័យដ៏ខ្ពង់ខ្ពស់បំផុត។ ឆ្លៀតក្នុងឱកាសនេះផងដែរ ថ្នាក់ដឹកនាំនិងក្រុមការងារ ប៉េងហួតគ្រុប សូមបួងសួងដល់គុណបុណ្យព្រះរតនត្រ័យ ព្រមទាំងវត្ថុស័ក្តិសិទ្ធក្នុងលោក សូមព្រះអង្គមានព្រះរាជសុខភាពល្អ បរិបូរណ៍ ព្រះជន្មាយុយឺនយូរ ដើម្បីគង់ប្រថាប់ជាមហាម្លប់ ដ៏ត្រជាក់ដល់ប្រជារាស្ត្រជាកូនចៅទូទាំងព្រះរាជាណាចក្រកម្ពុជាតរៀងទៅ៕

សេដ្ឋកិច្ចប្រទេសឥណ្ឌូនេស៊ីនៅតែបន្តសម្រេចបានកំណើនល្អប្រសើរ

June 8, 2019

0

ដោយនៅ វឌ្ឈនា

អាស៊ានៈ យោងតាមការចុះផ្សាយរបស់ Global Porperty Guide បានឲ្យដឹងកាលពីពេលថ្មីៗនេះថា តម្លៃលំនៅឋាននៅក្នុងទីក្រុងធំៗចំនួន១៤ របស់ប្រទេសឥណ្ឌូនេស៊ីបានសម្រេចបាន ០,១៦%ក្នុងកំឡុងត្រីមាសទី១ ឆ្នាំ២០១៩ ដោយធ្លាក់ចុះមកពី 0,១៩% ក្នុងត្រីមាសទី៤ ឆ្នាំ២០១៨។

នៅក្នុងត្រីមាសទី១ ឆ្នាំ២០១៩ សេដ្ឋកិច្ចរបស់ឥណ្ឌូនេស៊ី បានកើនឡើង៥,0៧% ធៀបនឹងឆ្នាំមុនដែលមានកំណើន៥,១៨% ក្នុងត្រីមាសទី៤ឆ្នាំ២០១៨ ។ នៅត្រីមាសទី ៣ មាន៥,១៧%, ក្នុងត្រីមាសទី២មាន៥,២%, និងនៅត្រីមាសទី១ មាន ៥,0៦%។

យោងតាមធនាគារឥណ្ឌូនេស៊ីបានព្យាករណ៍ថា សេដ្ឋកិច្ចឥណ្ឌូណេស៊ីនៅតែរឹងមាំនៅឆ្នាំនេះ ជាមួយនឹងអត្រាកំណើន GDP ពី ៥% ទៅ ៥,៤%។

យោងតាមធនាគារឥណ្ឌូនេស៊ីបញ្ជាក់ថា ការលក់អចលនទ្រព្យលំនៅដ្ឋានបានកើនឡើងយ៉ាងខ្លាំងរហូតដល់២៣,៧៧% ក្នុងត្រីមាសទី១ ឆ្នាំ២០១៩ ផ្ទុយទៅនឹងការធ្លាក់ចុះប្រចាំត្រីមាសចំនួន៥,៧៨% នៅក្នុងត្រីមាសទី៤ និង១៤,១៤% ក្នុងត្រីមាសទី ៣ និង 0,0៨%នៅក្នុងត្រីមាសទី២ ឆ្នាំ២០១៨។ ការលក់បានកើនឡើងពីរខ្ទង់ចាប់ពីឆ្នាំ២០១៣ ដល់ឆ្នាំ ២០១៥៕

ធនាគារកូរ៉េ និងធនាគារពិភពលោកសហការក្នុងការផ្តល់ប្រាក់ ៣០លានដុល្លារដល់អាជីវកម្មខ្នាតតូចនៅកម្ពុជា

June 8, 2019

0

ដោយ ដូណាល់ លី

ភ្នំពេញៈ ធនាគារពិភពលោកនឹងសហការជាមួយធនាគារ PPCBank ដែលមានមូលដ្ឋាននៅកូរ៉េខាងត្បូងក្នុងការបង្កើនប្រាក់កម្ចី ដើម្បីលើកកម្ពស់សហគ្រាសធុនតូចនិងមធ្យម (SMEs) នៅកម្ពុជា។

សាជីវកម្មហិរញ្ញវត្ថុអន្ដរជាតិ (IFC) ដែលជាសមាជិកនៃក្រុមធនាគារពិភពលោកនឹងផ្តល់ប្រាក់កម្ចីរហូតដល់៥០ភាគរយ នៃកម្ចីសហគ្រាសធុនតូច និងមធ្យមដែលស្មើនឹងទំហំទឹប្រាក់៣០លានដុល្លារដល់ធនាគារ PPCBank។

សាជីវកម្មហិរញ្ញវត្ថុអន្ដរជាតិ និងធនាគារ PPCBank នឹងទទួលបាន៥០ភាគរយនៃការគ្រប់គ្រងចំពោះផលប័ត្រសហគ្រាសខ្នាតតូច និងមធ្យមដែលមានទំហំទឹកប្រាក់ដល់ទៅ៣០លានដុល្លារ។ នេះបើតាមរបាយការណ៍របស់ IFC ចេញផ្សាយកាលពីម្សឹលមិញនេះ។

ធនាគារ PPCBank កំពុងដើរតួនាទីយ៉ាងសំខាន់ ក្នុងការរីកចម្រើននៃវណ្ណៈកណ្តាលនៃសេដ្ឋកិច្ច និងអាជីវកម្មខ្នាតតូច ដែលត្រូវបានគេមិនយកចិត្តទុកដាក់ពីវិស័យធនាគារពាណិជ្ជនាពេលកន្លងមក។

លោក Chang Moo Shin ប្រធានធនាគារ PPCBank បានមានប្រសាសន៍ថា “ចំនួនប្រជាជន ដែលមានចំណូលមធ្យមកំពុងកើនឡើងនៅកម្ពុជា ហើយវាជាសញ្ញាវិជ្ជមានមួយ ដែលនៅពេលប្រជាជន ដែលមានចំណូលមធ្យមកំពុងរីកចម្រើន ហើយពួកគេនឹងត្រូវការសេវាធនាគារ និងហិរញ្ញវត្ថុ”។

លោកបានបន្ថែមថា “នោះជាទិសដៅចម្បងរបស់យើង។ ក្រុមចំណូលមធ្យម និងសហគ្រាសធុនតូច ជាគោលដៅសំខាន់របស់យើង។ រហូតមកដល់ពេលនេះបរិយាកាសធុរកិច្ចសម្រាប់សហគ្រាសធុនតូច និងមធ្យមគឺមិនល្អទេសព្វថ្ងៃនេះ ប៉ុន្តែសហគ្រាសធុនតូច និងមធ្យមមានសក្តានុពលច្រើនក្នុងរីកចម្រើនបន្ថែម”។

ប្រទេសកូរ៉េខាងត្បូងគឺជាដៃគូពាណិជ្ជកម្ម និងវិនិយោគដ៏សំខាន់មួយរបស់ប្រទេសកម្ពុជា ហើយបានវិនិយោគលើគម្រោងចំនួន២១២ នៅកម្ពុជាពីឆ្នាំ១៩៩៤ដល់ឆ្នាំ ២០១៨ និងមានទំហំវិនិយោគ៤,៥ពាន់លានដុល្លារ។

កាលពីឆ្នាំមុនពាណិជ្ជកម្មទ្វេភាគីកម្ពុជា និងកូរ៉េខាងត្បូងបានឈានដល់៩៧៥ លានដុល្លារ៕

កម្ពុជា-បារាំងបង្កើនកិច្ចសហប្រតិបត្តិការដើម្បីជំរុញទំហំពាណិជ្ជកម្ម

June 8, 2019

0

cambodia-flag-combined-with-france-flag — ទង់ជាតិប្រទេសកម្ពុជា បារាំង

ដោយៈ រ៉ាណេត

ភ្នំពេញៈ មេដឹកនាំកម្ពុជា និងបារាំងបាននិងកំពុងពង្រីកកិច្ចសហប្រតិបត្តិការ ដើម្បីជំរុញការវិនិយោគ ក៏ដូចជាធ្វើឲ្យទំហំពាណិជ្ជកម្មទ្វេរភាគីកាន់តែមានភាពប្រសើរឡើង។

ស្ថានទូតបារាំងប្រចាំកម្ពុជា បានរៀបចំវេទិកាប្រចាំឆ្នាំរបស់ទីប្រឹក្សាពាណិជ្ជកម្មក្រៅប្រទេសរបស់បារំាងនៅតាមប្រទេសអាស៊ាន រៀបចំឡើងដោយលោកស្រី អេវ៉ា ង្វៀនប៊ីញ (Eva Nguyen Binh) ឯកអគ្គរដ្ឋទូតបារាំងប្រចាំកម្ពុជា នៅក្នុងស្ថានទូតបារាំងប្រចាំកម្ពុជា នៅរាត្រីថ្ងៃទី៦ ខែមិថុនា ឆ្នាំ២០១៩កន្លងមក លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្មបានមានប្រសាសន៍ថា ទំនាក់ទំនងពាណិជ្ជកម្មរវាងកម្ពុជា និងបារាំង មានភាពល្អប្រសើរ និងភាពវិជ្ជាមានជាច្រើន ហើយបានជំរុញឱ្យទំហំពាណិជ្ជកម្មប្រទេសទាំងពីរកើនឡើងជាបន្តបន្ទាប់។

លោកបានបន្តទៀតថា “កម្ពុជាជាប្រទេសមានភាពបើកទូលាយ និងគោលនយោបាយអនុគ្រោះជាច្រើនសម្រាប់ការវិនិយោគ ពាណិជ្ជកម្ម និងធុរកិច្ច”។

តាមរយៈគោលនយោបាយគាំទ្រធុរកិច្ច និងពាណិជ្ជកម្មរបស់កម្ពុជា ទំហំពាណិជ្ជកម្មសរុបរវាងកម្ពុជា និងបារាំងបានឈានទៅដល់ជាង ១ពាន់លានដុល្លារអាមេរិកនៅឆ្នាំ២០១៨ កើនឡើង ៩,២% ធៀបរយៈពេលដូចគ្នានឹងឆ្នាំ២០១៧។

លោកប៉ាន សូរស័ក្តិបានបន្តទៀតថា “ក្រោមការដឹកនាំរបស់សម្តេចតេជោនាយករដ្ឋមន្ត្រីបានធានាសន្តិភាព និងស្ថេរភាពនយោបាយ ដែលជាមូលដ្ឋានគ្រឹះនៃការអភិវឌ្ឍន៍”។ លោកបន្តថា “លើសពីនេះទៀត រាជរដ្ឋាភិបាលកម្ពុជា កំពុងតែអនុវត្តកម្មវិធីកំណែទម្រង់នានា ដើម្បីជួយសម្រួលដល់បរិយាកាសធុរកិច្ច ទាក់ទាញការវិនិយោគបន្ថែមទៀត ដោយទាំងអស់នេះ ជាចក្ខុវិស័យដែលបានកំណត់នៅក្នុងគោលនយោបាយអភិវឌ្ឍន៍ឧស្សាហកម្ម ២០១៥-២០២៥”។

លោកស្រី Eva Nguyen Binh ឯកអគ្គរដ្ឋទូតបារាំងប្រចាំកម្ពុជា បានបង្ហាញពីក្ដីសាទរ និងគាំទ្រគោលជំហរនៃការបន្តកិច្ចសហការជាដៃគូយូរអង្វែង រវាងប្រទេសទាំងពីរ។ លោកស្រីក៏បានតាំងចិត្តខិតខំជំរុញ ឱ្យវិស័យពាណិជ្ជកម្មរវាងប្រទេសទាំងពីរនេះ កាន់តែមានភាពរីកចម្រើន។

អនុប្រធានសភាពាណិជ្ជកម្មកម្ពុជា លោក ឧកញ៉ា លឹម ហេង បានមានប្រសាសន៍ប្រាប់តាមទូរស័ព្ទកាលពីព្រឹកថ្ងៃទី៨ ខែមិថុនានេះថា កិច្ចទំនាក់ទំនង និងភាពជាដៃគូរវាងកម្ពុជា និងបារាំងក្នុងវិស័យពាណិជ្ជកម្ម នៅតែបន្តមានភាពល្អប្រសើរគ្មានអ្វីប្រែប្រួលនោះទេ។ លោកឧកញ៉ាបន្តថា ពាណិជ្ជកម្មកម្ពុជា បារាំង កាលពីពេលកន្លងទៅភាគច្រើនគឺផ្តោតទៅលើ EBA ដែលជាទីផ្សារសហគមន៍អឺរ៉ុប ក្នុងទំហំទឹកប្រាក់រាប់រយលានដុល្លារ។

លោកឧកញ៉ាបន្តទៀតថា “បើទោះជាបច្ចុប្បន្ននេះ ការអនុគ្រោះពន្ធកំពុងតែស្ថិតនៅក្នុងភាពមិនទាន់ច្បាស់ការណ៍ ក៏ប៉ុន្តែតម្រូវការទីផ្សាររបស់ប្រទេសបារាំង និងកម្ពុជានៅតែមានដដែល”។

លោកឧកញ៉ាបន្តទៀតថា “ភាគច្រើនទំនិញដែលត្រូវបាននាំចេញពីកម្ពុជាទៅកាន់ប្រទេសបារាំង រួមមាន ដូចជាប្រភេទកសិផល ស្រូវអង្ករ និងវិស័យកាត់ដេរ ហើយបើទោះជាការនាំចេញ ទៅកាន់ផ្សារប្រទេសមួយនេះតម្រូវបង់ពន្ធ ឬអនុគ្រោះពន្ធ ការនាំចេញនៅតែបន្តដដែល”៕

ឧកញ៉ាម៉ុង ឬទ្ឋីវិនិយោគគម្រោងអភិវឌ្ឍលំនៅដ្ឋានលំហែរកាយធំមួយនៅខេត្តកំពង់ស្ពឺ

June 8, 2019

0

photo_2019-06-08_11-53-51 — គម្រោងអភិវឌ្ឍលំនៅដ្ឋានលំហែរកាយក្នុងតំបន់កសិកទេសចរណ៍ ម៉ុង ឫទ្ធី សែនជ័យ

ដោយៈ រ៉ាណេត

កំពង់ស្ពឺៈ លោកឧកញ៉ាម៉ុង ឬទ្ឋីដែលជាសតេចកសិកម្មបានឈានជើងចូលប្រឡូកក្នុងវិស័យអចលនទ្រព្យជាថ្មី ដោយលោកបាននិងកំពុងវិនិយោគលំនៅដ្ឋានបែបលំហែរកាយធំមួយ នៅក្នុងខេត្តកំពង់ស្ពឺ។

គម្រោងអភិវឌ្ឍលំនៅដ្ឋានលំហែរកាយក្នុងតំបន់កសិកទេសចរណ៍ ម៉ុង ឫទ្ធី សែនជ័យដែលគ្រោងសាងសង់មានលំនៅដ្ឋានត្រឹម១១៦ខ្នង ពេលនេះបានបង្កើនរហូតដល់ ២៦៥ ខ្នង ខណៈដែលការគាំទ្រពីសំណាក់អតិថិជនបានបន្តកើនឡើងជាលំដាប់។

ក្នុងគោលបំណងនៃការចូលរួមអភិវឌ្ឍវិស័យអចលនទ្រព្យ ក៏ដូចជាបង្កើននូវចំណូលសេដ្ឋកិច្ចជាតិ ជាពិសេសដើម្បីកែប្រែវិស័យលំនៅដ្ឋានប្រជាជន ដែលរស់នៅតំបន់ទីជនបទ ឱ្យក្លាយទៅជាលំនៅដ្ឋានប្រកបដោយផាសុកភាព លោកឧកញ៉ា ម៉ុង ឫទ្ធី បាន និងកំពុងតែជម្រិញសកម្មភាព នៃការសាងសង់សំណង់លំនៅដ្ឋានលំហែរកាយកម្រិតមធ្យមឱ្យកាន់តែឆាប់រហ័ស ដើម្បីតម្រូវតាមការចង់បានរបស់អតិថិជន។

លោកឧកញ៉ា ម៉ុង ឫទ្ធី ធ្លាប់បានមានប្រសាសន៍ប្រាប់ថា គំរោងលំនៅដ្ឋាននេះ សាងសង់នៅលើផ្ទៃដី ១២០០ម៉ែត្រការ៉េ សម្រាប់ផ្ទះមួយខ្នងៗ ដែលរួមបញ្ចូលនូវដំណាំមួយចំនួនដូចជា ឈើហូបផ្លែ មានទឹក ភ្លើង ប្រព័ន្ធសុវត្ថិភាព មានផ្លូវប្រវែងជាង៤០គីឡូម៉ែត្រសម្រាប់ដើរ ឬជិះកង់ហាត់ប្រាណប្រកបដោយសុវត្ថិភាព”។

លោកឧកញ៉ាបានបន្តទៀតថា “នៅទីនេះមានភ្នំដែលខ្ញុំបានថែរក្សាទុក មានដើមឈើប្លែកៗរាប់លានដើមជាច្រើនប្រភេទ ដើមឈើមួយចំនួនបានបញ្ចេញផ្កា ទៅតាមរដូវកាលគួជាទីគយគន់ មានសត្វព្រៃជាច្រើនប្រភេទសត្វស្លាប មាន់ព្រៃ ក្ងោក ជ្រូកព្រៃជាដើម”។

លោកឧកញ៉ាបន្តទៀតថា ក្រៅពីនេះនៅមានដើមឈើមួយចំនួនដុះ នៅតំបន់ភ្នំសែនដី ស្រុកសំរោងទង ខេត្តកំពង់ស្ពឺ។ ទាំងដី ទាំងផ្ទះ និងការរៀបចំឱ្យមានសោភ័ណភាពស្រស់បំព្រង មានតម្លៃមិនលើសពី ១០ម៉ឺនដុល្លារនោះទេ។

អ្នកតំណាងផ្នែកលក់នៃគម្រោងលំនៅដ្ឋានលំហែរកាយកម្រិតមធ្យម នៃតំបន់កសិកទេសចរណ៍ ម៉ុង ឫទ្ធី សែនជ័យ បានបង្ហើបប្រាប់ឱ្យដឹងថា ពេលនេះគម្រោងអភិវឌ្ឍលំណោដ្ឋាននេះ ក្រុមហ៊ុននៅមិនទាន់ប្រកាសបើកលក់ជាផ្លូវការនៅឡើយនោះទេ ប៉ុន្តែអាស្រ័យដោយមានការពេញចិត្ត និងគាំទ្រពីសំណាក់អតិថិជនដែលចូលចិត្ត និងស្រលា ញ់ជីវភាពរស់នៅបែបធម្មជាតិ និងព្រៃភ្នំនោះ មានអតិថិជនមួយចំនួនសុំទិញជាបន្តបន្ទាប់រួចខ្លះទៅហើយ។

តម្លៃនៃលំនៅដ្ឋាន១ខ្នង មានតម្លៃចាប់ពីជាង ៩ម៉ឺនដល់ ១០ម៉ឺនដុល្លារ ប្រសើនបើអតិថិជនទិញបង់ផ្តាច់ នឹងទទួលបានការបញ្ចុះតម្លៃ៥ភាគរយ ប៉ុន្តែបើជាការបង់រំលស់គឺអាចលើស ១០ម៉ឺនបន្តិចបន្តួច។

គម្រោងអភិវឌ្ឍលំនៅដ្ឋានក្នុងតំបន់កសិទេសចរណ៍ម៉ុង ឫទ្ធី សែនជ័យ ស្ថិតនៅក្នុងស្រុកសំរោងទង ខេត្តកំពង់ស្ពឺ តាមផ្លូវជាតិលេខ៤ មានចម្ងាយ ៤៨គីឡូម៉ែត្រពីរាជធានីភ្នំពេញ។ នៅក្នុងគម្រោងមួយនេះ ក៏មានការរៀបចំជាសួនសត្វព្រៃ និងគម្រោងសាងសង់ទីលានប្រណាំងរថយន្តកម្រិតអន្តរជាតិផងដែរ នៅពេលអនាគត៕

ក្រុមហ៊ុន Amazon គ្រោងចំណាយប្រាក់រាប់ពាន់លានដុល្លារលើគម្រោងផ្កាយរណប

June 8, 2019

0

amazon satellite — លោក Jeff Bezos នាយកប្រតិបត្តិក្រុមហ៊ុន Amazon.com Inc

ប្រែសម្រួលដោយ ម៉ាណេត

ពីកម្ពុជាៈ លោក Jeff Bezos នាយកប្រតិបត្តិក្រុមហ៊ុន Amazon.com Inc. គ្រោងនឹងចំណាយប្រាក់រាប់ពាន់លានដុល្លារ ដើម្បីកសាងសង់បណ្តាញផ្កាយរណប ដោយប្រើប្រាស់ទឹករាប់ពាន់ដុល្លារអាមេរិកដើម្បីផ្តល់សេវា Internet។ នេះបើយោងតាមសារព័ត៌មាន Bloomberg ចុះផ្សាយកាលពេលថ្មីៗនេះ។

កំពូលមហាសេដ្ឋីដែលមានលុយច្រើនជាងគេរូបនេះ បាននិយាយកាលពីថ្ងៃព្រហស្បតិ៍ នៅឯសន្និសីទមួយដែលកាត់ថា MARS នៅទីក្រុងឡាសវេហ្គាសថា គម្រោង Kuiper ដែលត្រូវបានបង្ហើបឲ្យដឹងកាលពីដើមឆ្នាំនេះ គឺជាការវិនិយោគដ៏ធំមួយ ដែលក្រុមហ៊ុនត្រូវការវិនិយោគជាមួយទំហំទុនដ៏ធំ។

លោក Bezos បានថ្លែងថា “គម្រោងនេះគឺជា “អាជីវកម្មដ៏ល្អសម្រាប់ក្រុមហ៊ុន Amazon” ព្រោះវាតម្រូវឲ្យមានការចំណាយមូលធនច្រើន”។លោកបន្ថែមថា “វាមានប្រាក់រាប់ពាន់លានដុល្លារ។ ក្រុមហ៊ុនអាម៉ាហ្សូនគឺជាក្រុមហ៊ុនគ្រប់គ្រង់ដ៏ធំមួយនៅពេលនេះ ដែលជាអ្វីដែលយើងត្រូវធ្វើ។ ប្រសិនបើវាដំណើរការ វាពិតជាអាចមានការផ្លាស់ប្តូរដ៏អស្ចារ្យ”។

នៅក្នុងឯកសាររបស់ International Telecommunications Union ក្រុមហ៊ុន Amazon បានឲ្យដឹងថា ខ្លួនមានបំណងដាក់ផ្កាយរណបចំនួន៣,២៣៦ ដើម្បីធ្វើដំនើរទៅកាន់គន្លងគោចរកម្ពស់ទាប ហើយប្រើវាដើម្បីបង្កើតការតភ្ជាប់អ៊ីធឺណិតល្បឿនលឿនទូទាំងពិភពលោក។

លោក Bezos បានថ្លែងថា “តាមនិយមន័យ អ្នកនឹងអាចងាយស្រួលក្នុងការធ្វើការទំនាក់ទំនងជាមួយអ្នកដែលទទួលបានសេវាកម្ម Internet នេះ។ នៅតំបន់ជនបទ ឬតំបន់ដាច់ស្រយាល ខ្ញុំគិតថា អ្នកអាចមើលឃើញថាការចូលទៅកាន់ Internet នឹងកាន់ធ្វើឲ្យមានភាពជិតស្និត និងឆ្លើយតបតម្រូវការជាមូលដ្ឋានរបស់មនុស្សជាតិ”៕

CDC អនុម័តំរោងវិនិយោគតម្លៃ ៦៣៣លានដុល្លារក្នុងរយ:ពេលត្រឹម ១សប្តាហ៍

June 8, 2019

0

ដោយ វុត្ថា

ភ្នំពេញ៖ នៅសប្តាហ៍ទី១ នៃខែមិថុនានេះ ក្រុមប្រឹក្សាអភិវឌ្ឍន៍កម្ពុជា ( CDC) បានអនុម័តគម្រោងវិនិយោគចំនួន ១៣គម្រោង ដែលមានទឹកប្រាកចំនួន ៦៣៣,៥ លានដុល្លារសហរដ្ឋអាមេរិក និងផ្តល់ឱកាសការងារជាច្រើនកន្លែងជូនប្រជាជនកម្ពុជា។

គម្រោមវិនិយោគទាំងនោះរួមមានដូចខាងក្រោម៖

១) តាមសំណើសុំវិនិយោគលើគម្រោងបង្កើតរោងចក្រផលិតបារីរបស់ក្រុមហ៊ុន “GLOBAL NEW MATERIALS RESEARCH AND DEVELOPMENT TECHNOLOGY CO.,LTD.” គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចុះបញ្ជីគម្រោងវិនិយោគនេះនៅ ក.អ.ក តែពុំមានការលើកទឹកចិត្តជូនដល់ក្រុមហ៊ុនខាងលើ ដែលមានទីតាំងវិនិយោគស្ថិតនៅភូមិកំពោតជ្រូក ឃុំព្រៃអង្កុញ ក្រុងបាវិត ខេត្តស្វាយរៀង មានទុនវិនិយោគប្រមាណ ១៣,៦លានដុល្លារអាមេរិក និងអាចបង្កើតការងារបានចំនួន ១៧៥កន្លែង។

២) គណៈកម្មាធិការវិនិយោគកម្ពុជាក៏បានសម្រេចចេញវិញ្ញាបនប័ត្រចុះបញ្ជីជាស្ថាពរជូនដល់ក្រុមហ៊ុន៖ “ZHEJIANG HENGFENG TOP LEISURE (CAMBODIA) CO., LTD.” គម្រោងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅអគារលេខ៣ សួនឧស្សាហកម្មវឌ្ឍនៈ II ផ្លូវជាតិលេខ៣ សង្កាត់ក្រាំងពង្រ ខណ្ឌដង្កោ រាជធានីភ្នំពេញ មានទុនវិនិយោគប្រមាណ ៣,៤លានដុល្លារអាមេរិក និងអាចបង្កើតការងារបានចំនួន ១.៣០៦កន្លែង។

៣) តាមសំណើសុំវិនិយោគលើគម្រោងបង្កើតរោងចក្រផលិតទៀនគ្រប់ប្រភេទរបស់ក្រុមហ៊ុន “KAM CHING (CAMBODIA) CRAFTS &; GIFTS CO.,LTD.” គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចុះបញ្ជីគម្រោងវិនិយោគនេះនៅ ក.អ.ក តែពុំមានការលើកទឹកចិត្ត ជូនដល់ក្រុមហ៊ុនខាងលើ ដែលមានទីតាំងវិនិយោគស្ថិតនៅផ្លូវលំ ភូមិកណ្តឹងធំ ឃុំកណ្តឹង ស្រុកបាទី ខេត្តតាកែវ មានទុនវិនិយោគប្រមាណ ៣,៨លានដុល្លារអាមេរិក និងអាចបង្កើតការងារបានចំនួន ៣២០កន្លែង។

៤) – “PHAT PHNOM PENH CO., LTD.” គម្រោងសាងសង់សួនទឹកកំសាន្ត ដែលមានទីតាំងវិនិយោគ ស្ថិតនៅភូមិព្រែកតារ័ត្ន សង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ មានទុនវិនិយោគចំនួន ៥៥លានដុល្លារអាមេរិក និងអាចបង្កើតការងារបានចំនួន ៧១៥កន្លែង។

៥) – “ZHI XU INVESTMENT CO., LTD.” គម្រោងសាងសង់និងអាជីវកម្មសណ្ឋាគារថ្នាក់ផ្កាយ៥ ចំនួន ១៩៣បន្ទប់ ដែលមានទីតាំងវិនិយោគ ស្ថិតនៅភូមិ៤ សង្កាត់លេខ៤ ក្រុងព្រះសីហនុ ខេត្តព្រះសីហនុ មានទុនវិនិយោគប្រមាណ ៦២,៨លានដុល្លារអាមេរិក និងអាចបង្កើតការងារបានចំនួន ៨៣៩កន្លែង។

៦) – “ZHI XIN INVESTMENT CO., LTD.” គម្រោងសាងសង់ និងអាជីវកម្មសណ្ឋាគារថ្នាក់ផ្កាយ៤ ចំនួន៣២៤បន្ទប់ និងមជ្ឈមណ្ឌលពាណិជ្ជកម្ម ដែលមានទីតាំងវិនិយោគ ស្ថិតនៅភូមិ១ សង្កាត់លេខ៣ ក្រុងព្រះសីហនុ ខេត្តព្រះសីហនុ មានទុនវិនិយោគប្រមាណ ១១១,៤លានដុល្លារអាមេរិក និងអាចបង្កើតការងារបានចំនួន ៤.៩៦០កន្លែង។

៧) – “PRINCE TIAN XI WAN CO., LTD.” គម្រោងសាងសង់ និងអាជីវកម្មសណ្ឋាគារថ្នាក់ផ្កាយ៥ ចំនួន៣៩៣បន្ទប់ និងមជ្ឈមណ្ឌលពាណិជ្ជកម្ម ដែលមានទីតាំងវិនិយោគស្ថិតនៅភូមិ៣ សង្កាត់លេខ៣ ក្រុងព្រះសីហនុ ខេត្តព្រះសីហនុ មានទុនវិនិយោគប្រមាណ ៣០៤,៩លានដុល្លារអាមេរិក និងអាចបង្កើតការងារបានចំនួន ៤.៨៦០កន្លែង។

៨) តាមសំណើសុំវិនិយោគលើគម្រោងបង្កើតរោងចក្រគ្រឿងសង្ហារឹម និងសម្ភារៈបរិក្ខារផ្សេងៗ (បម្រើការសាងសង់) ពីថ្មម៉ាប ឬថ្មក្រានីត របស់ក្រុមហ៊ុន “MIKOL STONE CO., LTD.” គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចុះបញ្ជីគម្រោងវិនិយោគនេះនៅ ក.អ.ក តែពុំមានការលើកទឹកចិត្ត ជូនដល់ក្រុមហ៊ុនខាងលើ ដែលមានទីតាំងវិនិយោគស្ថិតនៅភូមិស្ទឹងច្រាល ឃុំអូរបាក់រទេះ ស្រុកកំពង់សីលា ខេត្តព្រះសីហនុ មានទុនវិនិយោគប្រមាណ ២,៩លានដុល្លារអាមេរិក និងអាចបង្កើតការងារបានចំនួន ២៥៧កន្លែង។

៩) – “SAAB PHNOM PENH CO., LTD.” គម្រោងបង្កើតរោងចក្របោកគក់ និងកែច្នៃម៉ូតសម្លៀកបំពាក់ ដែលមានទីតាំងវិនិយោគស្ថិតនៅភូមិបឹងកំបោរ សង្កាត់ឪទ្បោក ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគប្រមាណ ២,៣លានដុល្លារអាមេរិក និងអាចបង្កើតការងារបានចំនួន ១.០២៨កន្លែង។

១០) -“SHAN HAI JING (HONG KONG) HANDICRAFT MANUFACTURING CO., LTD.” គម្រោងបង្កើតរោងចក្រផលិតផ្កា និងផ្លែឈើសិប្បនិម្មិត ដែលមានទីតាំងវិនិយោគស្ថិតនៅភូមិសាលាគ្រួស ឃុំព្រះនិព្វាន្ត ស្រុកគងពិសី ខេត្តកំពង់ស្ពឺ មានទុនវិនិយោគប្រមាណ ២,៩លានដុល្លារអាមេរិក និងអាចបង្កើតការងារបានចំនួន ៤៤១កន្លែង។

១១) – “YONG DE XIN (CAMBODIA) CO., LTD.” គម្រោងបង្កើតរោងចក្រផលិតសម្ភារៈសំណង់គ្រប់ប្រភេទ ដែលមានទីតាំងវិនិយោគស្ថិតនៅភូមិគីរីរស្មី ឃុំព្រៃរំដួល ស្រុកភ្នំស្រួច ខេត្តកំពង់ស្ពឺ មានទុនវិនិយោគ ប្រមាណ ៤,៥លានដុល្លារអាមេរិក និងអាចបង្កើតការងារបានចំនួន ១២៥កន្លែង៕