ដោយ នៅ វឌ្ឍនា
ភ្នំពេញ៖ ក្រសួងទេសចរណ៍ បានអំពាវនាវដល់មហាជន ពិសេសយុវជនសូមចូលរួមក្នុងចលនាប្រឡងប្រណាំង វីដេអូ (Video Contest) អំពីសហគមន៍ទេសចរណ៍ និងអេកូទេសចរណ៍ ក្រោមប្រធានបទ «កំណប់សហគមន៍ ជំរំទេសចរណ៍» រដូវកាលទី២ ដើម្បីជួយផ្សព្វផ្សាយពីវិស័យទេសចរណ៍ជាតិទៅកាន់ទីផ្សារទេសចរណ៍ឲ្យកាន់តែខ្លាំងក្លាថែមទៀត។
យោងតាមសេចក្តីជូនដំណឹងរបស់ក្រសួងទេសចរណ៍ដែលបានផ្សព្វផ្សាយនាពេលកន្លងមកបានឲ្យដឹងថា ចលនាប្រឡងប្រណាំងនេះ នឹងចាប់ផ្ដើមនាខែមេសាដល់ខែមិថុនា ចំណែកឯការចំណាយស្នាក់នៅ ម្ហូបអាហារ និងធ្វើដំណើរ គឺក្រសួងទេសចរណ៍រ៉ាប់រង។
សេចក្តីជូនដំណឹងដដែលបន្តថា ការរៀបចំការប្រឡងប្រណាំងនេះ ធ្វើឡើងក្នុងគោលបំណងជំរុញកាលចូលរួមរបស់សាធារណជន ជាពិសេសយុវជន ក្នុងការផ្សព្វផ្សាយសក្តានុពលសហគមន៍ ទេសចរណ៍ និងអេកូទេសចរណ៍នៅកម្ពុជា បណ្ដុះគំនិតស្រលាញ់ជាតិមាតុភូមិ និងឆ្លុះបញ្ចាំងពីប្រសិទ្ធភាពយុទ្ធសាស្ត្ររបស់ រាជរដ្ឋាភិបាលកម្ពុជា ក្នុងការកាត់បន្ថយភាពក្រីក្រនៅតាមសហគមន៍ តាមរយៈការបញ្ចូលសកម្មភាព ទេសចរណ៍។
ក្រសួងទេសចរណ៍កាលពីឆ្នាំ ២០១៨ កន្លងមកនេះ ក៏បានដាក់ចេញនូវការប្រឡងប្រណាំងថតវីដេអូ (Video Contest) ស្តីអំពីសហគមន៍ទេសចរណ៍ និងអេកូទេសចរណ៍លើកទី១ ក្រោមប្រធានបទ ”កំណប់សហគមន៍ ជំរំទេសចរណ៍” ដែលមានយុវជន សិស្ស និស្សិត និងសាធារណជនចូលរួមប្រកួតប្រជែងជាច្រើនផងដែរ ដើម្បីជំរុញការចូលរួមរបស់សាធារណជន យុវជន សិស្ស-និស្សិត ក្នុងការផ្សព្វផ្សាយអំពីសក្តានុពលនៃការអភិវឌ្ឍសហគមន៍ទេសចរណ៍ និងអេកូទេសចរណ៍នៅកម្ពុជា៕
ក្រសួងទេសចរណ៍ជំរុញឱ្យយុវជនចូលរួមប្រឡងថតវីដេអូទេសចរណ៍លើកទី២ ឱ្យបានច្រើន
ផ្លូវជាតិលេខ៧ដែលចំណាយថវិកាប្រមាណ៤០ លានដុល្លារត្រូវបានសាងសង់រួចហើយ
ដោយ វុត្ថា
ភ្នំពេញ៖ រដ្ឋាភិបាលកម្ពុជាចំណាយចំណាយថវិកាប្រមាណ ៤០ លានដុល្លារសាងសង់ផ្លូវជាតិលេខ៧ ដើម្បីសម្រួលដល់ការដឹកជញ្ជូន ពាណិជ្ជកម្ម និងការធ្វើដំណើររបស់ពលរដ្ឋឆ្លងកាត់ទៅកាន់ខេត្តភូមិភាគឥសាន្តនៃប្រទេសកម្ពុជាខេត្តស្ទឹងត្រែង–និងខេត្តក្រចេះ–ប្រវែងជាង៩៣គីឡូម៉ែត្រដែលមកដល់ពេលនេះត្រូវបានសាងសង់រួចរាល់។
ក្នុងឱកាសចុះពិនិត្យមើលផ្លូវជាតិលេខ៧កាលពីថ្ងៃទី២៣មេសា ម្សិលមិញនេះ លោក ឡួយ សូផាត អ្នកតំណាងរាស្ត្រមណ្ឌលស្ទឹងត្រែងបានឲ្យដឹងថា ផ្លូវនេះជាសម្បត្តិដ៍ស្តុកស្តម្ភដែលប្រមុខរាជរដ្ឋាភិបាលកម្ពុជាចំណាយថវិកាជិត៤០លានដូល្លារទៅលើការសាងសង់ផ្លូវមួយខ្សែនេះ ។
លោក បានជំរុញឱ្យស្ថាប័នពាក់ព័ន្ធនិងប្រជាពលរដ្ឋមានកាតព្វកិច្ចរួមគ្នាថែរក្សាទុកជាប្រយោជន៍ជាតិសម្រាប់ប្រើប្រាស់ឱ្យបានយូរអង្វែង។ អ្នកតំណាងរាស្រ្តរូបនេះ ក៏បានលើកទឹកចិត្តឱ្យថ្នាក់ដឹកនាំមន្ទីរសាធារណការនិងដឹកជញ្ជូនខេត្តស្ទឹងត្រែងនិងខេត្តក្រចេះបង្កើនកិច្ចសហប្រតិបត្តិការរួមគ្នាថែរក្សាផ្លូវជាតិលេខ៧ឱ្យស្ថិតនៅមាននិរន្តរភាព សម្រាប់ការធ្វើចរាចរណ៍របស់ប្រជាពលរដ្ឋបានយូរអង្វែង។
លោកស្រេង ស្រស់ ប្រធានមន្ទីរសាធារណការនិងដឹកជញ្ជូនខេត្តក្រចេះ បានឲ្យដឹងដែរថា ផ្លូវមួយខ្សែនេះកំពុងតែបំរើឱ្យវិស័យសេដ្ឋកិច្ចនិងទេសចរណ៍មានកំណើនជាលំដាប់ពិសេសជាងនេះទៀតប្រជាពលរដ្ឋនៅភូមិភាគឥសាន្តរួមមានខេត្តក្រចេះ–ស្ទឹងត្រែង– រតនគីរី– និងមណ្ឌលគីរីទទួលបានផលប្រយោជន៍ពីផ្លូវនេះ។លោកបន្តថាផ្លួវលេខ០៧ដែលទើបសាងសង់ហើយនេះស្ថិននៅក្នុងគម្រោងថែរក្សារបស់ក្រុមហ៊ុននៅឡើយទេតែទោះជាយ៉ាងណាវាជាសម្បត្តិដ៍មានតម្លៃដែលប្រជាពលរដ្ឋយើងទទួលបានពីរាជរដ្ឋាភិបាល។
លោកកែវ បុប្ផាមេឃុំអូរគ្រៀងស្រុកសំបូរខេត្តក្រចេះ បានឲ្យដឹងដែរថា ប្រជាពលរដ្ឋជាង៣០០០គ្រួសារនៅក្នុងឃុំក៍បានយកចិត្តទុកដាក់ចូលរួមអនុវត្តតាមការណែនាំរបស់អាជ្ញាធរបានល្អដែរព្រោះពេលបានផ្លូវស្រួលធ្វើដំណើរមានផលប្រយោជន៍គ្រប់យ៉ាងដល់ការស់នៅ។
លោកបន្តថា “នៅពេលផ្លូវល្អតម្លៃសេវាដឹកជញ្ជូនចុះថោក ហើយនៅពេលដែលមានជំងឺឈឺស្កាតសង្គ្រោះបន្ទាន់គ្រោះថ្នាក់ចរាចរណ៍ពិសេសគឺការឆ្លងទន្លេធ្វើដំណើរបានលឿនយើងមានឡានពេទ្យដឹកជញ្ជូនទៅដល់ខេត្តក្រចេះប្រជាជនមិនបារម្ភ ពីមុនផ្លូវមិនល្អអាចដេកផ្លូវហើយប្រើរយៈរហូត៣ទៅ៤ម៉ោងបានទៅដល់មន្ទីរពេទ្យខេត្តឥឡូវនេះគឺប្រើរយៈពេលតែ១ម៉ោងទៅដល់ពេទ្យខេត្តដូច្នេះសង្គ្រោះជីវិតមនុស្សទូទៅក្នុងឃុំដូចជាប្រជាពលរដ្ឋនៅតាមបណ្តាផ្លូវជាតិនេះ”។
ផ្លូវជាតិលេខ៧ចេញពីខេត្តក្រចេះទៅដល់ច្រកទ្វារអន្តរជាតិក្រពាំងគ្រៀលខេត្តស្ទឹងមានប្រវែងជិត២០០គីឡូម៉ែត្របច្ចុប្បន្នសាងសង់ថ្មីឡើងវិញបានជាង៩៣គីឡូម៉ែត្រនៅសល់ជាង១០០គីឡូម៉ែត្រទៀតរាជរដ្ឋាភិបាលរៀបគម្រោងឱ្យក្រុមហ៊ុនចិនជាដៃគូធ្វើការសាងសង់នៅចុងឆ្នាំ២០១៩នេះ។ដោយឡែកស្ពានចំនួន៥នៅក្នុងទឹកដីខេត្តក្រចេះដៃគូវិនិយោគភ្នាក់ងារសហប្របត្តិការអន្តរជាតិជប៉ុនកំពុងដំណើរការសាងសង់ថ្មីជំនួសស្ពានចាស់ជាបណ្តាញតភ្ជាប់ផ្លូវគមនាគមន៍ពីខេត្តក្រចេះដល់ទីខេត្តត្បូងឃ្មុំ៕
តើក្រុមហ៊ុនណាដែលផលិតដែកថែបធំជាងគេបំផុតនៅក្នុងពិភពលោក
ដោយ វល័ក្ខ
ភ្នំពេញ៖ យោងតាមរបាយការណ៍របស់សមាគមដែកថែបពិភពលោក (WSA) បានឱ្យដឹងថា ក្នុងមួយឆ្នាំៗ មានដែកថែបរាប់លានតោនត្រូវបានផលិត ដើម្បីបំពេញទៅតាមតម្រូវការទីផ្សារ ព្រោះការសាងសង់អគារតូច ធំជាច្រើនបានកើនឡើងជារៀងរាល់ថ្ងៃ។
តើលោកអ្នកចង់ដឹងទេថាក្រុមហ៊ុនផលិតដែកថែបណាមួយធំជាងគេបំផុតនៅលើពិភពលោក?
សមាគមដែកថែបពិភពលោក បានបង្ហាញតារាងក្រុមហ៊ុនផលិតដែកថែបធំៗនៅលើពិភពលោក ដោយនៅក្នុងតារាងនោះគឺធ្វើការវាយតម្លៃទៅលើចំនួនដែកថែបដែលក្រុមហ៊ុននីមួយៗបានផលិត និងគិតជាតោន ដោយជាលទ្ធផលគឺក្រុមហ៊ុន ArcelorMittal ជាប់ចំណាត់ថា្នក់លេខ១ ជាក្រុមហ៊ុនផលិតដែកថែបធំជាងគេ។
នៅក្នុងឆ្នាំ ២០១៨ កន្លងទៅនេះ ក្រុមហ៊ុន ArcelorMittal ផលិតបានដែកថែបចំនួន ៩២.៥លានតោន បើធៀបនឹងឆ្នាំ ២០១៧ បានធ្លាក់ចុះបន្តិច ប៉ុន្តែក្រុមហ៊ុនដែលមានមូលដ្ឋាននៅក្នុងប្រទេស Luxembourg ដែលជាប្រទេសតូចមួយនៅទ្វីបអឺរ៉ុប។
ArcelorMittal ជាក្រុមហ៊ុនផលិតដែកថែបមួយដែលបង្កើតឡើងនៅឆ្នាំ ២០០៦ និងបច្ចុប្បន្នម្ចាស់ភាគហ៊ុនធំមកពីប្រទេសឥណ្ឌា គឺលោក Lakshmi Mittal ដែលបានកាន់កាប់ភាគហ៊ុនរហូតដល់ ៣៨ភាគរយ និងមានតួនាទីជាអគ្គនាយក និងជានាយប្រតិបត្តិនៅក្នុងក្រុមហ៊ុន ArcelorMittal។
យោងតាមការចេញផ្សាយរបស់ Wikipedia បានឱ្យដឹងថានៅក្នុងឆ្នាំ ២០១៨ កន្លងទៅនេះ ក្រុមហ៊ុន ArcelorMittal រកប្រាក់ចំណូលបានជាង ៧៦ពាន់លានដុល្លារអាមេរិក ខណៈដែលគិតត្រឹមពេលនេះ មានបុគ្គលិក ២០៩០០០នាក់នៅជុំវិញពិភពលោក៕
ក្រុមហ៊ុនកំពង់ផែយក្សចិនចាប់ផ្តើមសិក្សាសាងសង់កំពង់ផែនៅកម្ពុជា
ដោយ នៅ ស៊ីវុត្ថា
ភ្នំពេញ៖ ក្រុមហ៊ុន China Merchants Port ដែលទីតាំងស្ថិតនៅក្រុង Shenzhen ជាកំពង់ផែដែលធំជាងគេទី២ នៅក្នុងប្រទេសចិន និងជាកំពង់ផែធំជាងគេទី៣ នៅលើពិភពលោក បាននឹងកំពុងមកសិក្សាលើការសាងសង់កំពង់ផែនៅកម្ពុជា។
នៅក្នុងជំនួបពិភាក្សាការងារជាមួយ គណៈប្រតិភូក្រុមហ៊ុន China Merchants Port ដែលដឹកនាំដោយលោក Jiang Luning នាយកផ្នែកពាណិជ្ជកម្មក្រៅប្រទេស កាលពីថ្ងៃទី ២៣ ខែមេសាម្សិលមិញនេះ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូនបានឲ្យដឹងថា បេសកកម្មរបស់ក្រុមគណប្រតិភូចិនមកកម្ពុជានាពេលនេះគឺ ដើម្បីសិក្សាលើការអភិវឌ្ឍផែនការមេកំពង់ផែអោយចប់សព្វគ្រប់ ក្នុងរយៈពេលបីខែ។
លោកទេសរដ្ឋមន្រ្តី បានស្នើឲ្យការសិក្សារបស់គណៈប្រតិភូក្រុមហ៊ុននេះផ្តោតសំខាន់លើតំបន់ក្រុងព្រះសីហនុ និងរាជធានីភ្នំពេញ ព្រមទាំងការតភ្ជាប់ការដឹកជញ្ជូនផ្លូវទឹកតាមដងទន្លេមេគង្គផងដែរ ។
តាមសំណើផ្លូវការរបស់លោកទេសរដ្ឋមន្រ្តី ស៊ុន ចាន់ថុល ក្នុងអំឡុងពេលទស្សនកិច្ច នៅក្នុងប្រទេសចិនកាលពីខែមុន ពេលនេះគណៈប្រតិភូក្រុមហ៊ុន China Merchants Port Group បានមកធ្វើទស្សនកិច្ចនៅកម្ពុជា ។
កាលពីថ្ងៃទី២៣-២៨ ខែមីនា ឆ្នាំ២០១៩ លោកទេសរដ្ឋមន្រ្តី ស៊ុន ចាន់ថុល បានដឹកនាំគណប្រតិភូក្រសួងសាធារណការ និងដឹកជញ្ជូន បំពេញទស្សនកិច្ចជាផ្លូវការនៅប្រទេសចិន ដើម្បីផ្លាស់ប្តូរទស្សនវិស័យ និងបទពិសោធន៍ល្អៗ សំដៅពង្រឹងកិច្ច សហប្រតិបត្តិការលើវិស័យហេដ្ឋារចនាសម្ព័ន្ធដឹកជញ្ជូន និងការធ្វើឱ្យប្រសើរឡើងនូវការតភ្ជាប់រវាងកម្ពុជា និងចិន ។
លោកទេសរដ្ឋមន្រ្តី ស៊ុន ចាន់ថុល និងគណប្រតិភូក៏បានពិភាក្សា និងផ្លាស់ប្តូរយោបល់ ជាមួយលោក Fu Gangfeng ប្រធានក្រុមហ៊ុន China Merchants Group ដែលជាក្រុមហ៊ុនមេ និងលោក Lu Vincent អនុប្រធានក្រុមហ៊ុន China Merchant Port Group ដែលជាក្រុមហ៊ុនបុត្រសម្ព័ន្ធ លើទស្សនវិស័យ និងបទពិសោធន៍ ជំនាញល្អៗ នៅក្នុងការដឹកនាំ គ្រប់គ្រង និងដំណើរការកំពង់ផែដ៏ធំមួយនោះនៅក្រុង Shenzhen ព្រមទាំងបានពិភាក្សាផងដែរពីលទ្ធភាពនៃកិច្ចសហប្រតិបត្តិការ រវាងកំពង់ផែស្វយ័តភ្នំពេញ កំពង់ផែស្វយ័តក្រុងព្រះសីហនុ និងកំពង់ផែ China Merchants Port។
លោក Fu Gangfeng បានបង្ហាញពីចំណាប់អារម្មណ៍ ក្នុងការវិនិយោគនៅកម្ពុជា ក៏ដូចជាការចូលរួមលើកស្ទួយវិស័យឡូជីស្ទីក និងកំពង់ផែនៅកម្ពុជា ឲ្យកាន់តែមានការរីកចម្រើនថែមទៀតផងដែរ។
លោកទេសរដ្ឋមន្ត្រី បានយល់ព្រមជាមួយលោក Lu Vincent ក្នុងកិច្ចសហការរៀបចំផែនការមេ សម្រាប់ចក្ខុវិស័យវែងឆ្ងាយ ក្នុងការអភិវឌ្ឍវិស័យកំពង់ផែ និងឡូជីស្ទីកនៅកម្ពុជា។ លោកទេសរដ្ឋមន្ត្រីក៏បានអញ្ជើញ លោក Lu និងថ្នាក់ដឹកនាំក្រុមហ៊ុន ព្រមទាំងសហការីជំនាញទៅធ្វើទស្សនកិច្ចនៅកម្ពុជា ដើម្បីសិក្សានិងពិភាក្សាលម្អិត ពីគម្រោងវិនិយោគ និងកិច្ចសហប្រតិបត្តិការបន្ត រវាងក្រសួងសាធារណការនិងដឹកជញ្ជូន និងក្រុមហ៊ុន Merchants Port Group ផងដែរ៕
កម្ពុជាចុះហត្ថលេខាលើកិច្ចព្រមព្រៀងអាស៊ានស្ដីពីសេវាកម្ម និងវិនិយោគ
ដោយនៅ ស៊ីវុត្ថា
ភ្នំពេញ៖ រដ្ឋាភិបាលនៃប្រទេសកម្ពុជាតាមរយៈក្រសួងពាណិជ្ជកម្ម បានចុះហត្ថលេខាលើកិច្ចព្រមព្រៀងអាស៊ាន ស្តីពីសេវាកម្ម (ASEAN Trade in Services Agreement - ATISA) និងពិធីសារទី៤ ធ្វើវិសោធនកម្មកិច្ចព្រមព្រៀងគ្រប់ជ្រុងជ្រោយអាស៊ាន ស្តីពីវិនិយោគ (Fourth Protocol to Amend the ASEAN Comprehensive Investment Agreement - ACIA)ដើម្បីកាត់បន្ថយរបាំងនានាក្នុងតំបន់។
នៅក្នុងកិច្ចប្រជុំចង្អៀតរដ្ឋមន្រ្តីសេដ្ឋកិច្ចអាស៊ាន លើកទី២៥កាលពីថ្ងៃទី២៣ ខែមេសា ឆ្នាំ២០១៩នៅទីក្រុងភូកេត ប្រទេសថៃ លោកប៉ាន សូរស័ក្តិ រដ្ឋមន្ត្រីពាណិជ្ជកម្មកម្ពុជាបានឲ្យដឹងថា កិច្ចព្រមព្រៀង និងពិធីសារនេះនឹងរួមចំណែកដ៏សំខាន់ ក្នុងការពង្រីកពាណិជ្ជកម្មលើផ្នែកសេវាកម្មនៅក្នុងតំបន់ តាមរយៈការកាត់បន្ថយរបាំងនានា ជំរុញកិច្ចសហប្រតិបត្តិការ បង្កើនការចូលរួមរបស់សហគ្រាសធុនតូច និងមធ្យម កាត់បន្ថយគម្លាតអភិវឌ្ឍន៍រវាងរដ្ឋជាសមាជិក ក៏ដូចជាជួយសម្រួលដល់សេរីភាវូបនីយកម្ម និងការវិនិយោគក្នុងអាស៊ាន ដើម្បីទទួលបានផលប្រយោជន៍ជាអតិបរមា នៃសមាហរណកម្មសេដ្ឋកិច្ចថ្នាក់តំបន់។
ជាមួយគ្នានេះរដ្ឋមន្រ្តីអាស៊ានទាំងអស់បានពិនិត្យ និងពិភាក្សាលើការបញ្ចប់កិច្ចព្រមព្រៀង RCEP នៅក្នុងឆ្នាំ២០១៩។ កិច្ចប្រជុំបានឯកភាពដោះស្រាយបញ្ហាដែលនៅសេសសល់ តាមរយៈការប្រកាន់នូវគោលជំហររួម ដើម្បីអាចបញ្ចប់កិច្ចព្រមព្រៀង RCEP នៅក្នុងឆ្នាំនេះ ស្របតាមអាណត្តិផ្តល់ឲ្យដោយថ្នាក់ដឹកនាំ។
រដ្ឋមន្រ្តីទាំងអស់ក៏បានពិភាក្សាលើការធ្វើកំណែទម្រង់អង្គការពាណិជ្ជកម្មពិភពលោក ដោយក្នុងនោះ លោករដ្ឋមន្រ្តី ប៉ាន សូរស័ក្តិ និងបណ្តារដ្ឋមន្រ្តីសេដ្ឋកិច្ចអាស៊ានដទៃទៀត ក៏បានលើកអំពីតួនាទី និងសារៈសំខាន់នៃអង្គការពាណិជ្ជកម្មពិភពលោក (WTO) បន្តគាំទ្រ និងរក្សាប្រពន្ធ័ពាណិជ្ជកម្មពហុភាគី និងបានឯកភាពចូលរួមក្នុងការធ្វើកំណែទម្រង់ (WTO) ដើម្បីជំរុញប្រសិទ្ធភាពឱ្យកាន់តែប្រសើរឡើង។ កិច្ចប្រជុំក៏បានជំរុញឲ្យមានការតែងតាំងសមាជិកអង្គភាពដោះស្រាយជម្លោះ (WTO) ឲ្យបានឆាប់បំផុត ដើម្បីជៀសវាងនូវបញ្ហាជាប់គាំងយន្តការដោះស្រាយជម្លោះពាណិជ្ជកម្មដ៏សំខាន់នេះ៕
ចំណេះដឹង! តើការនាំចូល និងនាំចេញរូបិយប័ណ្ណបរទេសមានតម្លៃប៉ុន្មាន?
ដោយ នៅ វឌ្ឈនា
ភ្នំពេញ៖ ប្រជាពលរដ្ឋខ្មែរភាគច្រើន មិនទាន់បានដឹងពីអ្នកដំណើរទៅក្រៅប្រទេស ឬមកក្នុងប្រទេសកម្ពុជាមានលទ្ធភាពអាចននាំចូល និងនាំចេញរូបិយប័ណ្ណបរទេសមានតម្លៃប៉ុន្មានជាប់នឹងខ្លួននោះទេ។
យោងតាមច្បាប់ស្តីពី និតិវិធីក្នុងការនាំចេញ - នាំចូលរូបិយប័ណ្ណបរទេសរបស់អគ្គនាយកដ្ឋានគយ និងរដ្ឋករកម្ពុជាបានឲ្យដឹង ការនាំចូលរូបិយប័ណ្ណបរទេស មកក្នុងទឹកដីនៃព្រះរាជាណាចក្រកម្ពុជា ដោយគណៈប្រតិភូនានា ភ្ញៀវគ្រប់ប្រភេទ នីតិបុគ្គល និងរូបវ័ន្តបុគ្គលដទៃទៀត ហៅកាត់ថា “អ្នកតំណាង” ពុំមានការកម្រិតបរិមាណទេ។ អ្នកដំណើរដែលនាំចូលនូវរូបិយប័ណ្ណបរទេស មានទឹកប្រាក់ស្មើឬលើសពី១០.០០០ “មួយម៉ឺន” ដុល្លារអាមេរិក ចាំបាច់ត្រូវបំពេញប្រតិវេទន៍គយ តាមនីតិវិធីកំណត់ជាធរមាន ហើយត្រូវប្រគល់ឲ្យមន្រ្តីគយ សម្រាប់ពិនិត្យផ្ទៀងផ្ទាត់នៅពេលនាំចេញទៅវិញ។
សម្រាប់អ្នកដំណើរដែលនាំចេញ នូវរូបិយប័ណ្ណបរទេសពីទឹកដី នៃព្រះរាជាណាចក្រកម្ពុជា មានទឹកប្រាក់លើសពី១០.០០០ “មួយម៉ឺន” ដុល្លារអាមេរិក ឬលើសពីចំនួនរូបិយប័ណ្ណបរទេសដែលសាម៉ីខ្លួនបានប្រកាសក្នុង ប្រតិវេទន៍គយនាពេលនាំចូល ត្រូវមានការអនុញ្ញាតឲ្យនាំចេញ ពីធនាគារជាតិនៃកម្ពុជា និងស្ថាប័នមាន សមត្ថកិច្ចពាក់ព័ន្ធនានា។
អ្នកដំណើរដែលនាំចេញរូបិយប័ណ្ណបរទេស ត្រូវអនុវត្តដូចតទៅ៖
• បង្ហាញចំពោះមន្រ្តីគយ នូវលិខិតអនុញ្ញាតឲ្យនាំចេញ ដែលផ្តល់ដោយធនាគារជាតិនៃកម្ពុជា។
• បំពេញប្រតិវេទន៍គយឲ្យបានត្រឹមត្រូវ គ្រប់គ្រាន់ និងច្បាស់លាស់
• ធ្វើដំណើរតាមមាត់ច្រកចូល-ចេញ ដែលបានកំណត់ដោយភ្នាក់ងារមានសមត្ថកិច្ច។ ការយករូបិយប័ណ្ណធ្វើដំណើរតាមច្រកផ្លូវផ្សេង ឬដោយអ្នកកាន់បញ្ញើដ៏ទៃ ក្រៅពីម្ចាស់កម្មសិទ្ធិ ត្រូវហាមឃាត់ជាដាច់ខាត។
បំពេញជាលាយល័ក្ខណ៍អក្សរឲ្យបានត្រឹមត្រូវ គ្រប់គ្រាន់ និងច្បាស់លាស់លើប្រតិវេទន៍គយ អំពីប្រភេទ និងចំនួនរូបិយប័ណ្ណ ដែលមានជាប់នឹងខ្លួន បញ្ញើជាមួយអ្នកដ៏ទៃ បញ្ញើរតាមយន្តហោះ ដើម្បីបង្ហាញដល់មន្រ្តីគយដែលមានភារកិច្ចត្រួតពិនិត្យ នៅក្នុងការិយាល័យគយនិងរដ្ឋាករ៕
តើតម្លៃអចលនទ្រព្យនៅតាមបណ្តោយផ្លូវហាណូយមានសភាពដូចម្តេច?
ដោយ រ៉ាណេត
ភ្នំពេញ៖ នៅតាមបណ្តោយផ្លូវហាណូយនាពេលបច្ចុប្បន្ននេះ រាប់ចាប់គិតពីចំណុចស្ពាន៥មករា រហូតដល់ចំណុចបំបែកផ្លូវឧកញ៉ា ម៉ុង ឬទ្ធី ត្រូវបានអ្នកជំនាញលើកឡើងថា កំពុងតែមានសក្ដានុពលផ្នែកអចលនទ្រព្យគួរឱ្យកត់សម្គាល់ ប៉ុន្តែបើទោះជាតម្លៃដី និងអចលនទ្រព្យនៅតាមបណ្តោយផ្លូវមួយនេះ មានការកើនឡើងយ៉ាងណាក៏ដោយ ប៉ុន្តែវានៅតែមានកម្រិត។
នាយិកាក្រុមហ៊ុន AMATAK Property Service លោកស្រី តាំង ហួរ បានមានប្រសាសន៍ប្រាប់តាមរយៈទូរស័ព្ទកាលពីពេលថ្មីៗនេះថា បច្ចុប្បន្នអចលនទ្រព្យ ក៏ដូចជាដីធ្លី ដែលមានទីតាំងស្ថិតនៅជាប់នឹងផ្លូវហាយណូយ គឺកំពុងតែមានភាពទាក់ទាញ ហើយតម្លៃក៏មានការកើនឡើងគួរឱ្យកត់សម្គាល់ផងដែរ បើប្រៀបធៀបទៅនឹងរយៈពេលប្រមាណ២ឆ្នាំមុន។
លោកស្រីបានបញ្ជាក់ថា អចលនទ្រព្យនៅតាមផ្លូវនេះ ជាពិសេសនៅតំបនទីប្រជុំជន (ម្ដុំដីហ៊ុយ) គឺមានតម្លៃខ្ពស់ ហើយក៏ពិបាកក្នុងការរកទិញ ដោយសារតែនៅម្ដុំនេះជាតំបន់ដែលអំណោផល ដល់ការធ្វើអាជីវកម្មចម្រុះលក្ខណៈគ្រួសារ មិនថាចំពោះប្រភេទសម្ភារៈប្រើប្រាស់ អគ្គិសនី គ្រឿងសំណង់ ក៏ដូចជាផ្នែកចំណីអាហារនោះទេ។
លោកស្រីបានបន្តថា ដីនៅតំបន់នេះមិនមានតំបន់ទំនេរច្រើននោះទេ ប៉ុន្តែបើហួសចំណុចនេះបន្តិចប្រហែលជាង៣០០-៤០០ម៉ែត្រ អាចមានដីទំនេរខ្លះ។ ដីដែលមានទំហំតូច ឬជាប្រភេទដីលំនៅដ្ឋានមានតម្លៃប្រមាណ២០០០ដុល្លារ ឬអាចលើសពីនេះ អាស្រ័យដោយទីតាំង។ ដោយឡែកចំពោះដីដែលមានវិសាលភាពធំទូលាយ (១ហិកតាឡើងទៅ) អាចមានតម្លៃចន្លោះពី១០០០ដុល្លារក្នុងម៉ែត្រការ៉េ។
លើកឡើងស្រដៀងគ្នានេះ លោក វ៉ា វីរៈ នាយកក្រុមហ៊ុន Century21 Fortuna Investment ក៏បានប្រាប់ឱ្យដឹងតាមរយៈទូរស័ព្ទ កាលពីរសៀលថ្ងៃទី២៣ ខែមេសានេះថា តម្លៃដី និងអចលនទ្រព្យនៅតំបន់ខាងលើនេះ ពិតជាមានការកើនឡើងប្រាកដមែន បើយើងធ្វើការប្រៀបធៀបទៅនឹងតម្លៃដីកាលពី២-៣ឆ្នាំមុន គឺវាមានភាពល្អប្រសើរច្រើន ហើយតំបន់នេះ ក៏បានក្លាយជាតំបន់ដែលស្រូបទាញប្រជាជន ឱ្យចូលមករស់នៅច្រើនដែរ ជាពិសេសក្រោយពេលកើតមានតំបន់ពាណិជ្ជកម្ម និងផ្សារទំនើប AEON2 និងផ្សារ Makro តែម្ដង ដែលរឹតតែធ្វើឱ្យផ្លូវមួយខ្សែនេះ មានភាពមមាញឹកក្នុងការធ្វើដំណើរឆ្លងកាត់។
លោកបន្តថា បើតាមគម្រោងរបស់សាលារាជធានីភ្នំពេញ ក៏ដូចជាតម្រូវការជាក់ស្ដែងនាពេលបច្ចុប្បន្ននេះ មិនយូរទៀតនោះទេ ចំណុចកណ្តាលក្រុងនឹងរំកិលមកដល់ម្ដុំសាលាពេទ្យ IU (International University) ឬ ម្តុំ សាលា លីម កុកវីង ខណៈដែលពេលនេះ ក្រុងភ្នំពេញបានពង្រីកវិសាលភាពកាន់តែទូលាយ ឆ្ពោះទៅទិសខាងជើងឈៀងខាងត្បូងរួចទៅហើយនោះ។ ប៉ុន្តែបើទោះជាបែបនេះក្ដី ក៏តម្លៃដី និងតម្លៃអចលនទ្រព្យនៅតំបន់កណ្តាលកណ្តាលនាពេលអនាគតមួយនេះ នៅតែមិនអាចឡើងខ្ពស់ស្មើនឹងតំបន់កណ្តាលក្រុងសព្វថ្ងៃនេះដែរ ព្រោះថានៅក្នុងតំបន់នេះ គឺមិនត្រូវបានអនុញ្ញាតឱ្យមានការសាងសង់សំណង់អាគារខ្ពស់ៗ ដែលមានកម្ពស់ចាប់ពី៥ជាន់ ដូចជានៅក្នុងតំបន់ទួលគោក ឬតំបន់ជាប់ព្រំប្រទល់គ្នានោះទេ ដោយហេតុថា វាស្ថិតនៅចំផ្លូវអាកាសសម្រាប់យន្តហោះចុះចត៕
ខណ្ឌដង្កោបាននិងកំពុងក្លាយជាតំបន់ដ៏ទាក់ទាញលើវិស័យលំនៅដ្ឋាន
ដោយៈ រ៉ាណេត
ភ្នំពេញៈ ខណ្ឌដង្កោនៅពេលបច្ចុប្បន្ននេះ មិនស្ថិតក្នុងភាពឯកោដូចកាលពីប្រមាណ៥ឆ្នាំមុននោះទេ ព្រោះពេលនេះមានអ្នកវិនិយោគ លើការអភិវឌ្ឍសំណង់អាគារលំនៅដ្ឋានជាច្រើនស្អេកស្កះ ដែលក្នុងនោះសូម្បីតែក្រុមហ៊ុនសំណង់បុរីធំៗ និងល្បីឈ្មោះមួយចំនួនធំ ក៏បានចូលទៅបង្ហាញខ្លួននៅក្នុងខណ្ឌមួយនេះផងដែរ ជាពិសេសនៅភាគខាងត្បូងនៃរាជធានីភ្នំពេញតែម្ដង។
លោកឧកញ៉ាតេង រិទ្ធី អគ្គនាយកក្រុមហ៊ុនR Investment Group បានមានប្រសាសន៍ប្រាប់ឱ្យដឹង តាមរយៈទូរស័ព្ទកាលពីល្ងាចថ្ងៃទី២៣ ខែមេសាកន្លងទៅនេះថា បច្ចុប្បន្ននេះ ខណ្ឌដង្កោកំពុងតែមានភាពទាក់ទាញយ៉ាងខ្លាំង ដោយសារតែនៅក្នុងខណ្ឌមួយនេះមានលំហូរ នៃចំនួនប្រជាជនចំណាកស្រុកចូលមករស់នៅច្រើន ដែលជំរុញឱ្យមានតម្រូវការលើការលើការស្នាក់នៅច្រើន។
លោកឧកញ៉ាបន្តថា “ការកើនឡើងនៃចំនួនប្រជាជន មិនមែនមានតែនៅក្នុងខណ្ឌដង្កោនេះមួយនោះទេ គឺវាមានការកើនឡើងស្ទើរតែគ្រប់ខណ្ឌ ប៉ុន្តែអ្វីដែលធ្វើឱ្យខណ្ឌនេះមានតម្រូវការស្នាក់នៅច្រើន រហូតមានការចូលខ្លួនមកអភិវឌ្ឍន៍ ពីសំណាក់អ្នកអភិវឌ្ឍ សំណង់បុរីជាដើមនោះ ក៏ព្រោះតែខណ្ឌដែលស្ថិតនៅភាគខាងត្បូង នៃរាជធានីភ្នំពេញមួយនេះ មានវិសាលភាពធំទូលាយងាយស្រួលក្នុងការអភិវឌ្ឍន៍ ជាពិសេសតម្លៃដីធ្លីនៅមានកម្រិតនៅឡើយ ដែលវាជាការផ្តល់ឱកាសសម្រាប់បណ្តាអ្នកវិនិយោគទាំងនោះ”។
លោកឧកញ៉ាតេង រិទ្ឋីបានបន្តថា បច្ចុប្បន្ននេះ បើនិយាយពីតម្លៃដីធ្លីនៅក្នុងខណ្ឌដង្កោគឺបានកើនឡើងមួយកម្រិតធំរួចទៅហើយ ជាពិសេសកន្លែងដែលជាទីប្រជុំជន និងមានការអភិវឌ្ឍន៍រួចទៅហើយ។ ចំពោះដីដែលស្ថិតនៅតំបន់ទីប្រជុំជន ដូចជាចំណុចរង្វង់មូលគួរស្រូវ ចំណុចទីប្រជុំជនផ្សារចំការដូង ក៏ដូចជាផ្លូវបេតុងដែលឆ្ពោះទៅតំបន់ព្រៃស គឺមានតម្លៃចន្លោះចាប់ពី៣០០ដុល្លារក្នុងមួយម៉ែត្រការ៉េ ឬអាចលើសពីតម្លៃនេះបន្តិចបន្ទួច។ ប៉ុន្តែបើចំពោះប្រភេទដីដែលនៅទំនេរ និងមានទំហំចាប់ពី១ហិកតាឡើងទៅ អាចមានតម្លៃចាប់ពី ៣៥ទៅ១០០ ដុល្លារក្នុងមួយម៉ែត្រការ៉េ ហើយចំពោះប្រភេទដីលំនៅដ្ឋាន ឬជាប្រភេទដីឡូតិ៍ អាចមានតម្លៃរហូតដល់១៥០ដុល្លារក្នុងមួយការ៉េ។
ជាមួយគ្នានេះ អគ្គនាយកក្រុមហ៊ុនអចលនទ្រព្យ Khmer Foundation Appraisal (KFA) លោកឧកញ៉ា នួន រិទ្ធី ធ្លាប់បានមានប្រសាសន៍ឱ្យដឹងផងដែរថា ដង្កោ គឺជាខណ្ឌងាយស្រួលក្នុងការអភិវឌ្ឍន៍ ព្រោះខណ្ឌនេះមានសណ្ឋានដី និងអំណោយផលល្អច្រើន ម្យ៉ាងទៀតវាក៏មានទីតាំងស្ថិតនៅជិតទីប្រជុំជននៃរាជធានីភ្នំពេញ ដែលជាបណ្តុំនៃមណ្ឌលពាណិជ្ជ ហើយវាក៏មានភាពងាយស្រួល ក្នុងការពង្រីកខ្លួនទៅដល់ស្រុកកណ្ដាលស្ទឹង ដែលឃុំមួយចំនួនស្ថិតក្នុងស្រុកមួយនេះ ត្រូវបានកាត់ចូលមកក្នុងខណ្ឌដង្កោ។
លោកឧកញ៉ាបានបន្តថា លើសពីនេះទៅទៀត ក្រៅពីមានទំនោរទៅលើទីផ្សារលំនៅដ្ឋាន ខណ្ឌដង្កោ ក៏មានសួនឧស្សាហកម្មមួយចំនួននៅទីនោះផងដែរ រហូតត្រូវបានគេចាត់ទុកថា ជាតំបន់មានការអភិវឌ្ឍចម្រុះ។ ម្យ៉ាងទៀត ចំពោះទិសដៅនៃការអភិវឌ្ឍន៍នាពេលអនាគត វានឹងឆ្ពោះទៅរកតំបន់ជាយក្រុង ដែលស្ថិតនៅជុំវិញរាជធានីភ្នំពេញចម្ងាយប្រមាណ៣០គីឡូម៉ែត្រ ព្រោះបច្ចុប្បន្នតំបន់កណ្ដាលក្រុងភ្នំពេញ ស្ទើរតែអស់ដីក្នុងការអភិវឌ្ឍគម្រោងលំនៅឋានទៅហើយ ដែលធ្វើឱ្យអចលនវត្ថុកាន់តែមានតម្លៃខ្ពស់។
លោកឧកញ៉ា នួន រិទ្ធីបានបន្តថា អ្វីដែលធ្វើឱ្យខណ្ឌដង្កោ មានសក្ដានុពល ក៏ព្រោះតែតំបន់នេះមានប្រព័ន្ធទឹក ភ្លើង និងមានហេដ្ឋារចនាសម្ព័ន្ធខ្វាត់ខ្វែង ដែលអាចតភ្ជាប់ពីរាជធានីភ្នំពេញ ទៅតំបន់នេះងាយស្រួលក្នុងការធ្វើចរាចរណ៍ អាចកាត់បន្ថយការកកស្ទះបានយ៉ាងប្រសើរផងដែរ។
ហេតុផលមួយទៀតដែលធ្វើឱ្យមនុស្សជាច្រើន ក៏ដូចជាបណ្តាអ្នកធ្វើជំនួញលើវិស័យអចលនទ្រព្យ មានទំនោរទៅលើការវិនិយោគក្នុងខណ្ឌដង្កោ ជាពិសេសនៅប៉ែកខាងត្បូងតែម្ដង ក៏ព្រោះវាមានភាពល្អប្រសើរជាច្រើនដូចជា ស្ថិតនៅក្បែរផ្លូវ៦០ម៉ែត្រ ដែលបែងចែកទៅកាន់ផ្លូវជាតិលេខ២ និងផ្លូវជាតិលេខ៣ មានមជ្ឈមណ្ឌលពាណិជ្ជកម្ម ស្ថិតនៅជិតគម្រោងផ្សារទំនើបAEON3 ផ្សារទំនើបប៉េងហួត Eco Mall អាចធ្វើដំណើរត្រឹមជាង១០នាទីមកដល់កណ្តាលរាជធានីភ្នំពេញ៕
CDC អនុម័តគម្រោងវិនិយោគ២ មានទឹកប្រាក់ចំនួនជិត ៩លានដុល្លារ
ដោយ វុត្ថា
ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា (CDC ) បានអនុម័តគម្រោងវិនិយោគចំនួន ២ ដែលមានទំហំទឹកប្រាក់ជិត៩លានដុល្លារ នៅក្នុងខេត្តកំពង់ស្ពឺ និងខេត្តកណ្តាល។
យោតាមការចុះផ្សាយរបស់គេហទំព័រ ហ្វេសបុក របស់ ក្រុមប្រឹក្សាអភិវឌ្ឍន៍កម្ពុជា (CDC) នៅថ្ងៃទី ២៣ ខែមេសា ឆ្នាំ២០១៩នេះថា តាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនប័ត្រចុះបញ្ជីជាស្ថាពរ ជូនដល់ក្រុមហ៊ុនដូចជា ទី១- “HENG SIM FOOTWEAR CO., LTD.” គម្រោងបង្កើតរោងចក្រផលិតស្បែកជើង ដែលមានទីតាំង វិនិយោគស្ថិតនៅភូមិរំលេច ឃុំរលាំងគ្រើល ស្រុកសំរោងទង ខេត្តកំពង់ស្ពឺ មានទុនវិនិយោគប្រមាណ៥,៤លានដុល្លារអាមេរិក និងអាចបង្កើតការងារបានចំនួន៣.២២៨កន្លែង។
ទី២- “XINRUI (CAMBODIA) GARMENT CO., LTD.” គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅផ្លូវជាតិលេខ៤ ភូមិទន្លាប់ខ្ពស់ត្បូង ឃុំដំណាក់អំពិល ស្រុកអង្គស្នួល ខេត្តកណ្តាល មានទុនវិនិយោគប្រមាណ៣លានដុល្លារអាមេរិក និងអាចបង្កើតការងារបានចំនួន១.២២១កន្លែង៕
គេហទំព័រទេសចរណ៍ថ្មីមួយនឹងចូលរួមបង្កើនការផ្សព្វផ្សាយសក្តានុពលវិស័យនេះទៅកាន់ពិភពលោក
ដោយ គង់ សូរិយា
ភ្នំពេញ៖ គេហទំព័រព៌តមានទេសចរណ៍ថ្មីមួយ www.cambodiatourism.news និង Facebook Page, Cambodia Tourism News នឹងចូលរួមបង្កើនការផ្សព្វផ្សាយពីវិស័យទេសចរណ៍កម្ពុជាទៅកាន់ពិភពលោក។
យោងតាមសេចក្តីប្រកាសព៌តមានរបស់គេហទំព័រនេះ បានឲ្យដឹងកាលពីថ្ងៃច័ន្ទដើមសប្តាហ៍នេះថា ដោយសារមានគោលដៅចង់ចូលរួមផ្សព្វផ្សាយ និងបង្កើនសក្តានុពលវិស័យទេសចរណ៍កម្ពុជា ទៅកាន់មជ្ឈដ្ឋានជាតិ និងអន្តរជាតិ គេហទំព័រនេះបានប្រមូលផ្តុំដោយក្រុមអ្នកសារព៌តមាន ដែលមានជំនាញវិជ្ជាជីវៈច្បាស់លាស់ និងមានបទពិសោធន៍លើវិស័យសារព៌តមានជាច្រើនឆ្នាំ ដើម្បីផ្តល់នូវព៌តមានពិត ឥតលំអៀង ដើម្បីលើកកំពស់វិស័យទេសចរណ៍ផង និងលើកកំពស់វិជ្ជាជីវៈសារព៌តមានផង។
គេហទំព័រ www.cambodiatourism.news និង Facebook page Cambodia Tourism News បច្ចុប្បន្នមានការផ្សព្វផ្សាយជាបីភាសាគឺភាសាខ្មែរ ភាសាអង់គ្លេសនិងភាសាចិននាពេលអនាគត។ អ្វីដែលគេហទំព័រនេះផ្តោតជាពិសេស គឺផ្តល់ព៌តមានថ្មីៗទាក់ទងនឹងបច្ចុប្បន្នភាពលើវិស័យទេសចរណ៍ រមណីយដ្ឋាននានា ពីការអភិវឌ្ឍន៍គំរោងនានាក្នុងវិស័យទេសចរណ៍។
ជាពិសេសនាពេលអនាគត យើងនឹងផ្តល់សេវាកម្មកក់ផ្ទះសំណាក់ សណ្ឋាគារ ភោជនីយដ្ឋាន រមណីយដ្ឋាន និងក្រុមហ៊ុនភ្នាក់ងារទេសចរណ៍នានាផងដែរ ដែលអ្នកអានអាចចូលទៅគេហទំព័រនេះ ហើយអាចស្វែងរកព៌តមាន លេខទូរស័ព្ទទំនាក់ទំនងបាន(គំរោងនាពេលអនាគត)។
សេចក្តីប្រកាសព៌តមានដដែលបានបន្តថា ក្រុមការងារនៃគេហទំព័រខាងលើបាននិងកំពុងចូលរួមចំណែកយ៉ាងសំខាន់ជាមួយរាជរដ្ឋាភិបាល ពិសេសក្រសួងទេសចរណ៍ ដើម្បីបង្កើនការផ្សព្វផ្សាយពីវិស័យនេះ ដើម្បីលើកកំពស់មុខមាត់ និងកិត្យានុភាពកម្ពុជាទៅកាន់ឆាកអន្តរជាតិ។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានស្វាគមន៍ និងសម្តែងការគាំទ្រចំពោះការរៀបចំគេហទំព័រនេះឡើង ដោយលោកស្រីបានមានប្រសាសន៍ថា ការរីកចម្រើននិងជំរុញការផ្សព្វផ្សាយពីវិស័យទេសចរណ៍កម្ពុជា មិនអាចខ្វះការចូលរួមពីវិស័យសារព៌តមាននោះទេ ហេតុនេះការផ្សព្វផ្សាយពីវិស័យនេះឲ្យបានទូលំទូលាយតាមរយៈវេបសាយនេះ ជារឿងល្អសំរាប់កម្ពុជា៕
